Gospel of Thomas (Coptic)

Coptic literature (Coptic SCRIPTORIUM) · 389 sections

thomas_gospel:1
ⲛⲁⲓ ⲛⲉ ⲛϣⲁϫⲉ ⲉⲧϩⲏⲡ ⲉⲛⲧⲁⲓⲏⲥⲟⲩⲥ ⲉⲧⲟⲛϩ ϫⲟⲟⲩ ⲁⲩⲱ ⲁϥⲥϩⲁⲓⲥⲟⲩ ⲛϭⲓⲇⲓⲇⲩⲙⲟⲥ ⲓⲟⲩⲇⲁⲥ ⲑⲱⲙⲁⲥ
thomas_gospel:2
ⲁⲩⲱ ⲡⲉϫⲁϥ ϫⲉⲡⲉⲧⲛⲁϩⲉ ⲉⲧϩⲉⲣⲙⲏⲛⲉⲓⲁ ⲛⲛⲉⲓϣⲁϫⲉ ϥⲛⲁϫⲓϯⲡⲉ ⲁⲛ ⲙⲡⲙⲟⲩ ·
thomas_gospel:3
ⲡⲉϫⲉⲓⲏⲥⲟⲩⲥ ⲙⲡⲣⲧⲣⲉϥⲗⲟ ⲛϭⲓⲡⲉⲧϣⲓⲛⲉ ⲉϥϣⲓⲛⲉ ϣⲁⲛⲧⲉϥϭⲓⲛⲉ
thomas_gospel:4
ⲁⲩⲱ ϩⲟⲧⲁⲛ ⲉϥϣⲁⲛϭⲓⲛⲉ ϥⲛⲁϣⲧⲟⲣⲧⲣ
thomas_gospel:5
ⲁⲩⲱ ⲉϥϣⲁⲛϣⲧⲟⲣⲧⲣ ϥⲛⲁⲣϣⲡⲏⲣⲉ ⲁⲩⲱ ϥⲛⲁⲣⲣⲣⲟ ⲉϫⲛⲡⲧⲏⲣϥ
thomas_gospel:6
ⲡⲉϫⲉⲓⲏⲥⲟⲩⲥ ϫⲉⲉⲩϣⲁⲛϫⲟⲟⲥ ⲛⲏⲧⲛ ⲛϭⲓⲛⲉⲧⲥⲱⲕ ϩⲏⲧⲧⲏⲩⲧⲛ ϫⲉⲉⲓⲥϩⲏⲏⲧⲉ ⲉⲧⲙⲛⲧⲣⲣⲟ ϩⲛⲧⲡⲉ ⲉⲓⲉ ⲛϩⲁⲗⲏⲧ ⲛⲁ ⲣϣⲟⲣⲡ ⲉⲣⲱⲧⲛ ⲛⲧⲉⲧⲡⲉ
thomas_gospel:7
ⲉⲩϣⲁⲛϫⲟⲟⲥ ⲛⲏⲧⲛ ϫⲉⲥϩⲛⲧⲑⲁⲗⲁⲥⲥⲁ ⲉⲓⲉ ⲛⲧⲃⲧ ⲛⲁ ⲣϣⲟⲣⲡ ⲉⲣⲱⲧⲛ
thomas_gospel:8
ⲁⲗⲗⲁ ⲧⲙⲛⲧⲣⲣⲟ ⲥⲙⲡⲉⲧⲛϩⲟⲩⲛ ⲁⲩⲱ ⲥⲙⲡⲉⲧⲛⲃⲟⲗ
thomas_gospel:9
ϩⲟⲧⲁⲛ ⲉⲧⲉⲧⲛϣⲁⲛⲥⲟⲩⲱⲛⲧⲏⲩⲧⲛ ⲧⲟⲧⲉ ⲥⲉⲛⲁⲥⲟⲩⲱⲛⲧⲏⲛⲉ ⲁⲩⲱ ⲧⲉⲧⲛⲛⲁⲉⲓⲙⲉ ϫⲉⲛⲧⲱⲧⲛ ⲡⲉ ⲛϣⲏⲣⲉ ⲛⲡⲉⲓⲱⲧ ⲉⲧⲟⲛϩ
thomas_gospel:10
ⲉϣⲱⲡⲉ ⲇⲉ ⲧⲉⲧⲛⲛⲁⲥⲟⲩⲱⲛⲧⲏⲩⲧⲛ ⲁⲛ ⲉⲓⲉ ⲧⲉⲧⲛϣⲟⲟⲡ ϩⲛⲟⲩⲙⲛⲧϩⲏⲕⲉ ⲁⲩⲱ ⲛⲧⲱⲧⲛ ⲡⲉ ⲧⲙⲛⲧϩⲏⲕⲉ
thomas_gospel:11
ⲡⲉϫⲉⲓⲏⲥⲟⲩⲥ ϥⲛⲁϫⲛⲁⲩ ⲁⲛ ⲛϭⲓⲡⲣⲱⲙⲉ ⲛϩⲗⲗⲟ ϩⲛⲛⲉϥϩⲟⲟⲩ ⲉϫⲛⲉⲟⲩⲕⲟⲩⲓ ⲛϣⲏⲣⲉ ϣⲏⲙ ⲉϥϩⲛⲥⲁϣϥ̅ ⲛϩⲟⲟⲩ ⲉⲧⲃⲉⲡⲧⲟⲡⲟⲥ ⲙⲡⲱⲛϩ
thomas_gospel:12
ⲁⲩⲱ ϥⲛⲁⲱⲛϩ ϫⲉⲟⲩⲛϩⲁϩ ⲛϣⲟⲣⲡ ⲛⲁⲣϩⲁⲉ ⲁⲩⲱ ⲛⲥⲉϣⲱⲡⲉ ⲟⲩⲁ ⲟⲩⲱⲧ
thomas_gospel:13
ⲡⲉϫⲉⲓⲏⲥⲟⲩⲥ ⲥⲟⲩⲱⲛⲡⲉⲧⲙⲡⲙⲧⲟ ⲙⲡⲉⲕϩⲟ ⲉⲃⲟⲗ
thomas_gospel:14
ⲁⲩⲱ ⲡⲉⲧϩⲏⲡ ⲉⲣⲟⲕ ϥⲛⲁϭⲱⲗⲡ ⲉⲃⲟⲗ ⲛⲁⲕ
thomas_gospel:15
ⲙⲛⲗⲁⲁⲩ ⲅⲁⲣ ⲉϥϩⲏⲡ ⲉϥⲛⲁⲟⲩⲱⲛϩ ⲉⲃⲟⲗ ⲁⲛ
thomas_gospel:16
ⲁⲩϫⲛⲟⲩϥ ⲛϭⲓⲛⲉϥⲙⲁⲑⲏⲧⲏⲥ ⲡⲉϫⲁⲩ ⲛⲁϥ ϫⲉⲕⲟⲩⲱϣ ⲉⲧⲣⲛⲣⲛⲏⲥⲧⲉⲩⲉ
thomas_gospel:17
ⲁⲩⲱ ⲁϣ ⲧⲉ ⲧϩⲉ ⲉⲛⲛⲁϣⲗⲏⲗ ⲉⲛⲛⲁϯⲉⲗⲉⲏⲙⲟⲥⲩⲛⲏ
thomas_gospel:18
ⲁⲩⲱ ⲉⲛⲛⲁⲣⲡⲁⲣⲁⲧⲏⲣⲉⲓ ⲉⲟⲩ ⲛϭⲓⲛⲟⲩⲱⲙ
thomas_gospel:19
ⲡⲉϫⲉⲓⲏⲥⲟⲩⲥ ϫⲉⲙⲡⲣϫⲓϭⲟⲗ
thomas_gospel:20
ⲁⲩⲱ ⲡⲉⲧⲉⲧⲙⲙⲟⲥⲧⲉ ⲙⲙⲟϥ ⲙⲡⲣⲁⲁϥ ϫⲉⲥⲉϭⲟⲗⲡ ⲧⲏⲣⲟⲩ ⲉⲃⲟⲗ ⲙⲡⲉⲙⲧⲟ ⲉⲃⲟⲗ ⲛⲧⲡⲉ
thomas_gospel:21
ⲙⲛⲗⲁⲁⲩ ⲅⲁⲣ ⲉϥϩⲏⲡ · ⲉϥⲛⲁⲟⲩⲱⲛϩ ⲉⲃⲟⲗ ⲁⲛ
thomas_gospel:22
ⲁⲩⲱ ⲙⲛⲗⲁⲁⲩ ⲉϥϩⲟⲃⲥ ⲉⲩⲛⲁϭⲱ ⲟⲩⲉϣⲛ ϭⲟⲗⲡϥ
thomas_gospel:23
ⲡⲉϫⲉⲓⲏⲥⲟⲩⲥ ⲟⲩⲙⲁⲕⲁⲣⲓⲟⲥ ⲡⲉ ⲡⲙⲟⲩⲓ ⲡⲁⲓ ⲉⲧⲉⲡⲣⲱⲙⲉ ⲛⲁⲟⲩⲟⲙϥ
thomas_gospel:24
ⲁⲩⲱ ⲛⲧⲉⲡⲙⲟⲩⲓ ϣⲱⲡⲉ ⲛⲣⲱⲙⲉ ⲁⲩⲱ ϥⲃⲏⲧ · ⲛϭⲓⲡⲣⲱⲙⲉ ⲡⲁⲓ ⲉⲧⲉⲡⲙⲟⲩⲓ ⲛⲁⲟⲩⲟⲙϥ
thomas_gospel:25
ⲁⲩⲱ ⲡⲙⲟⲩⲓ ⲛⲁϣⲱⲡⲉ ⲣⲣⲱⲙⲉ
thomas_gospel:26
ⲁⲩⲱ ⲡⲉϫⲁϥ ϫⲉⲉⲣⲉⲡⲣⲱⲙⲉ ⲧⲛⲧⲱⲛ ⲉⲩⲟⲩⲱϩⲉ ⲛⲣⲙⲛϩⲏⲧ ⲡⲁⲓ ⲛⲧⲁϥⲛⲟⲩϫⲉ ⲛⲧⲉϥⲁⲃⲱ ⲉⲧⲑⲁⲗⲁⲥⲥⲁ ⲁϥⲥⲱⲕ ⲙⲙⲟⲥ ⲉϩⲣⲁⲓ ϩⲛⲧⲑⲁⲗⲁⲥⲥⲁ ⲉⲥⲙⲉϩ ⲛⲧⲃⲧ ⲛⲉⲕⲟⲩⲓ ⲛ ϩⲣⲁⲓ ⲛϩⲏⲧⲟⲩ
thomas_gospel:27
ⲁϥϩⲉ ⲉⲩⲛⲟϭ ⲛⲧⲃⲧ ⲉⲛⲁⲛⲟⲩϥ ⲛϭⲓⲡⲟⲩⲱϩⲉ ⲛⲣⲙⲛϩⲏⲧ
thomas_gospel:28
ⲁϥⲛⲟⲩϫⲉ ⲛⲛⲕⲟⲩⲓ ⲧⲏⲣⲟⲩ ⲛⲧⲃⲧ ⲉⲃⲟⲗ ⲉⲡⲉⲥⲏⲧ ⲉⲧⲑⲁⲗⲁⲥⲥⲁ ⲁϥⲥⲱⲧⲡ · ⲙⲡⲛⲟϭ ⲛⲧⲃⲧ ⲭⲱⲣⲓⲥϩⲓⲥⲉ
thomas_gospel:29
ⲡⲉⲧⲉⲟⲩⲛⲙⲁⲁϫⲉ ⲙⲙⲟϥ ⲉⲥⲱⲧⲙ ⲙⲁⲣⲉϥⲥⲱⲧⲙ
thomas_gospel:30
ⲡⲉϫⲉⲓⲏⲥⲟⲩⲥ ϫⲉⲉⲓⲥϩⲏⲏⲧⲉ · ⲁϥⲉⲓ ⲉⲃⲟⲗ ⲛϭⲓⲡⲉⲧⲥⲓⲧⲉ ⲁϥⲙⲉϩⲧⲟⲟⲧϥ ⲁϥⲛⲟⲩϫⲉ
thomas_gospel:31
ⲁϩⲟⲓⲛⲉ ⲙⲉⲛ ϩⲉ ⲉϫⲛⲧⲉϩⲓⲏ ⲁⲩⲉⲓ ⲛϭⲓⲛϩⲁⲗⲁⲧⲉ ⲁⲩⲕⲁⲧϥⲟⲩ
thomas_gospel:32
ϩⲉⲛⲕⲟⲟⲩⲉ ⲁⲩϩⲉ ⲉϫⲛⲧⲡⲉⲧⲣⲁ ⲁⲩⲱ ⲙⲡⲟⲩϫⲓⲛⲟⲩⲛⲉ ⲉⲡⲉⲥⲏⲧ ⲉⲡⲕⲁϩ ⲁⲩⲱ ⲙⲡⲟⲩⲧⲉⲩⲉϩⲙⲥ ⲉϩⲣⲁⲓ ⲉⲧⲡⲉ
thomas_gospel:33
ⲁⲩⲱ ϩⲉⲛⲕⲟⲟⲩⲉ ⲁⲩϩⲉ ⲉϫⲛⲛϣⲟⲛⲧⲉ ⲁⲩⲱϭⲧ ⲙⲡⲉϭⲣⲟϭ ⲁⲩⲱ ⲁⲡϥⲛⲧ ⲟⲩⲟⲙⲟⲩ
thomas_gospel:34
ⲁⲩⲱ ⲁϩⲉⲛⲕⲟⲟⲩⲉ ϩⲉ ⲉϫⲛⲡⲕⲁϩ ⲉⲧⲛⲁⲛⲟⲩϥ ⲁⲩⲱ ⲁϥϯⲕⲁⲣⲡⲟⲥ ⲉϩⲣⲁⲓ ⲉⲧⲡⲉ ⲉⲛⲁⲛⲟⲩϥ ⲁϥⲉⲓ ⲛⲥⲉ ⲉⲥⲟⲧⲉ ⲁⲩⲱ ϣⲉϫⲟⲩⲱⲧ ⲉⲥⲟⲧⲉ
thomas_gospel:35
ⲡⲉϫⲉⲓⲏⲥⲟⲩⲥ ϫⲉⲁⲓⲛⲟⲩϫⲉ ⲛⲟⲩⲕⲱϩⲧ ⲉϫⲛⲡⲕⲟⲥⲙⲟⲥ
thomas_gospel:36
ⲁⲩⲱ ⲉⲓⲥϩⲏⲏⲧⲉ ϯϩⲁⲣⲉϩ ⲉⲣⲟϥ ϣⲁⲛⲧⲉϥϫⲉⲣⲟ
thomas_gospel:37
ⲡⲉϫⲉⲓⲏⲥⲟⲩⲥ ϫⲉⲧⲉⲓⲡⲉ ⲛⲁⲣⲡⲁⲣⲁⲅⲉ ⲁⲩⲱ ⲧⲉⲧⲛⲧⲡⲉ ⲙⲙⲟⲥ ⲛⲁⲣⲡⲁⲣⲁⲅⲉ
thomas_gospel:38
ⲁⲩⲱ ⲛⲉⲧⲙⲟⲟⲩⲧ ⲥⲉⲟⲛϩ ⲁⲛ
thomas_gospel:39
ⲁⲩⲱ ⲛⲉⲧⲟⲛϩ ⲥⲉⲛⲁⲙⲟⲩ ⲁⲛ ⲛϩⲟⲟⲩ
thomas_gospel:40
ⲛⲉⲧⲉⲧⲛⲟⲩⲱⲙ ⲙⲡⲉⲧⲙⲟⲟⲩⲧ ⲛⲉⲧⲉⲧⲛⲉⲓⲣⲉ ⲙⲙⲟϥ ⲙⲡⲉⲧⲟⲛϩ
thomas_gospel:41
ϩⲟⲧⲁⲛ ⲉⲧⲉⲧⲛϣⲁⲛϣⲱⲡⲉ ϩⲙⲡⲟⲩⲟⲉⲓⲛ ⲟⲩ ⲡⲉⲧⲉⲧⲛⲛⲁⲁⲁϥ
thomas_gospel:42
ϩⲙⲡϩⲟⲟⲩ ⲉⲧⲧⲉⲧⲛⲟ ⲛⲟⲩⲁ ⲁⲧⲉⲧⲛⲉⲓⲣⲉ ⲙⲡⲥⲛⲁⲩ
thomas_gospel:43
ϩⲟⲧⲁⲛ ⲇⲉ ⲉⲧⲉⲧⲛϣⲁⲛϣⲱⲡⲉ ⲛⲥⲛⲁⲩ · ⲟⲩ ⲡⲉⲧⲉⲧⲛⲛⲁⲁⲁϥ ·
thomas_gospel:44
ⲡⲉϫⲉⲙⲙⲁⲑⲏⲧⲏⲥ ⲛⲓⲏⲥⲟⲩⲥ ϫⲉⲧⲛⲥⲟⲟⲩⲛ ϫⲉⲕⲛⲁⲃⲱⲕ ⲛⲧⲟⲟⲧⲛ
thomas_gospel:45
ⲛⲓⲙ ⲡⲉ ⲉⲧⲛⲁⲣⲛⲟϭ ⲉϩⲣⲁⲓ ⲉϫⲱⲛ
thomas_gospel:46
ⲡⲉϫⲉⲓⲏⲥⲟⲩⲥ ⲛⲁⲩ ϫⲉⲡⲙⲁ ⲛⲧⲁⲧⲉⲧⲛⲉⲓ ⲙⲙⲁⲩ ⲉⲧⲉⲧⲛⲛⲁⲃⲱⲕ ϣⲁⲓⲁⲕⲱⲃⲟⲥ ⲡⲇⲓⲕⲁⲓⲟⲥ ⲡⲁⲓ ⲛⲧⲁⲧⲡⲉ ⲙⲛⲡⲕⲁϩ ϣⲱⲡⲉ ⲉⲧⲃⲏⲏⲧϥ
thomas_gospel:47
ⲡⲉϫⲉⲓⲏⲥⲟⲩⲥ ⲛⲛⲉϥⲙⲁⲑⲏⲧⲏⲥ ϫⲉⲧⲛⲧⲱⲛⲧ ⲛⲧⲉⲧⲛϫⲟⲟⲥ ⲛⲁⲓ ϫⲉⲉⲓⲉⲓⲛⲉ ⲛⲛⲓⲙ
thomas_gospel:48
ⲡⲉϫⲁϥ ⲛⲁϥ ⲛϭⲓⲥⲓⲙⲱⲛ ⲡⲉⲧⲣⲟⲥ ϫⲉⲉⲕⲉⲓⲛⲉ ⲛⲟⲩⲁⲅⲅⲉⲗⲟⲥ ⲛⲇⲓⲕⲁⲓⲟⲥ
thomas_gospel:49
ⲡⲉϫⲁϥ ⲛⲁϥ ⲛϭⲓⲙⲁⲑⲑⲁⲓⲟⲥ ϫⲉⲉⲕⲉⲓⲛⲉ ⲛⲟⲩⲣⲱⲙⲉ ⲙⲫⲓⲗⲟⲥⲟⲫⲟⲥ ⲛⲣⲙⲛϩⲏⲧ
thomas_gospel:50
ⲡⲉϫⲁϥ ⲛⲁϥ ⲛϭⲓⲑⲱⲙⲁⲥ ϫⲉⲡⲥⲁϩ ϩⲟⲗⲱⲥ ⲧⲁⲧⲁⲡⲣⲟ ⲛⲁϣϣⲁⲡϥ ⲁⲛ ⲉⲧⲣⲁϫⲟⲟⲥ ϫⲉⲉⲕⲉⲓⲛⲉ ⲛⲛⲓⲙ
thomas_gospel:51
ⲡⲉϫⲉⲓⲏⲥⲟⲩⲥ ϫⲉⲁⲛⲟⲕ ⲡⲉⲕⲥⲁϩ ⲁⲛ ⲉⲡⲉⲓⲁⲕⲥⲱ ⲁⲕϯϩⲉ ⲉⲃⲟⲗ ϩⲛⲧⲡⲏⲅⲏ ⲉⲧⲃⲣⲃⲣⲉ ⲧⲁⲓ ⲁⲛⲟⲕ ⲛⲧⲁⲓϣⲓⲧⲥ
thomas_gospel:52
ⲁⲩⲱ ⲁϥϫⲓⲧϥ ⲁϥⲁⲛⲁⲭⲱⲣⲉⲓ ⲁϥϫⲱ ⲛⲁϥ ⲛϣⲟⲙⲧ ⲛϣⲁϫⲉ
thomas_gospel:53
ⲛⲧⲁⲣⲉⲑⲱⲙⲁⲥ ⲇⲉ ⲉⲓ ϣⲁⲛⲉϥϣⲃⲉⲉⲣ ⲁⲩϫⲛⲟⲩϥ ϫⲉⲛⲧⲁⲓⲏⲥⲟⲩⲥ ϫⲟⲟⲥ ϫⲉⲟⲩ ⲛⲁⲕ
thomas_gospel:54
ⲡⲉϫⲁϥ ⲛⲁⲩ ⲛϭⲓⲑⲱⲙⲁⲥ ϫⲉⲉⲓϣⲁⲛϫⲱ ⲛⲏⲧⲛ ⲟⲩⲁ ϩⲛⲛϣⲁϫⲉ ⲛⲧⲁϥϫⲟⲟⲩ ⲛⲁⲓ ⲧⲉⲧⲛⲛⲁϥⲓⲱⲛⲉ ⲛⲧⲉⲧⲛⲛⲟⲩϫⲉ ⲉⲣⲟⲓ ⲁⲩⲱ ⲛⲧⲉⲟⲩⲕⲱϩⲧ ⲉⲓ ⲉⲃⲟⲗ ϩⲛⲛⲱⲛⲉ ⲛⲥⲣⲱⲕϩ ⲙⲙⲱⲧⲛ
thomas_gospel:55
ⲡⲉϫⲉⲓⲏⲥⲟⲩⲥ ⲛⲁⲩ ϫⲉⲉⲧⲉⲧⲛϣⲁⲛⲣⲛⲏⲥⲧⲉⲩⲉ ⲧⲉⲧⲛⲛⲁϫⲡⲟ ⲛⲏⲧⲛ ⲛⲟⲩⲛⲟⲃⲉ
thomas_gospel:56
ⲁⲩⲱ ⲉⲧⲉⲧⲛϣⲁⲛϣⲗⲏⲗ ⲥⲉⲛⲁⲣⲕⲁⲧⲁⲕⲣⲓⲛⲉ ⲙⲙⲱⲧⲛ
thomas_gospel:57
ⲁⲩⲱ ⲉⲧⲉⲧⲛϣⲁⲛϯⲉⲗⲉⲏⲙⲟⲥⲩⲛⲏ ⲉⲧⲉⲧⲛⲛⲁⲉⲓⲣⲉ ⲛⲟⲩⲕⲁⲕⲟⲛ ⲛⲛⲉⲧⲛⲡⲛⲉⲩⲙⲁ
thomas_gospel:58
ⲁⲩⲱ ⲉⲧⲉⲧⲛϣⲁⲛⲃⲱⲕ ⲉϩⲟⲩⲛ ⲉⲕⲁϩ ⲛⲓⲙ ⲁⲩⲱ ⲛⲧⲉⲧⲙⲙⲟⲟϣⲉ ϩⲛⲛⲭⲱⲣⲁ ⲉⲩϣⲁⲛⲣⲡⲁⲣⲁⲇⲉⲭⲉ ⲙⲙⲱⲧⲛ ⲡⲉⲧⲟⲩⲛⲁⲕⲁⲁϥ ϩⲁⲣⲱⲧⲛ ⲟⲩⲟⲙϥ
thomas_gospel:59
ⲛⲉⲧϣⲱⲛⲉ ⲛϩⲏⲧⲟⲩ ⲁⲣⲓⲑⲉⲣⲁⲡⲉⲩⲉ ⲙⲙⲟⲟⲩ
thomas_gospel:60
ⲡⲉⲧⲛⲁⲃⲱⲕ ⲅⲁⲣ ⲉϩⲟⲩⲛ ϩⲛⲧⲉⲧⲛⲧⲁⲡⲣⲟ ϥⲛⲁϫⲱϩⲙⲧⲏⲩⲧⲛ ⲁⲛ
thomas_gospel:61
ⲁⲗⲗⲁ ⲡⲉⲧⲛⲏⲩ ⲉⲃⲟⲗ ϩⲛⲧⲉⲧⲛⲧⲁⲡⲣⲟ ⲛⲧⲟϥ ⲡⲉⲧⲛⲁϫⲁϩⲙⲧⲏⲩⲧⲛ
thomas_gospel:62
ⲡⲉϫⲉⲓⲏⲥⲟⲩⲥ ϫⲉϩⲟⲧⲁⲛ ⲉⲧⲉⲧⲛϣⲁⲛⲛⲁⲩ ⲉⲡⲉⲧⲉⲙⲡⲟⲩϫⲡⲟϥ ⲉⲃⲟⲗ ϩⲛⲧⲥϩⲓⲙⲉ ⲡⲉϩⲧⲧⲏⲩⲧⲛ ⲉϫⲙⲡⲉⲧⲛϩⲟ ⲛⲧⲉⲧⲛⲟⲩⲱϣⲧ ⲛⲁϥ
thomas_gospel:63
ⲡⲉⲧⲙⲙⲁⲩ ⲡⲉ ⲡⲉⲧⲛⲉⲓⲱⲧ
thomas_gospel:64
ⲡⲉϫⲉⲓⲏⲥⲟⲩⲥ ϫⲉⲧⲁⲭⲁ ⲉⲩⲙⲉⲉⲩⲉ ⲛϭⲓⲛⲣⲱⲙⲉ ϫⲉⲛⲧⲁⲓⲉⲓ ⲉⲛⲟⲩϫⲉ ⲛⲟⲩⲉⲓⲣⲏⲛⲏ ⲉϫⲙⲡⲕⲟⲥⲙⲟⲥ
thomas_gospel:65
ⲁⲩⲱ ⲥⲉⲥⲟⲟⲩⲛ ⲁⲛ ϫⲉⲛⲧⲁⲓⲉⲓ ⲁⲛⲟⲩϫⲉ ⲛϩⲉⲛⲡⲱⲣϫ ⲉϫⲛⲡⲕⲁϩ ⲟⲩⲕⲱϩⲧ ⲟⲩⲥⲏϥⲉ ⲟⲩⲡⲟⲗⲉⲙⲟⲥ
thomas_gospel:66
ⲟⲩⲛϯⲟⲩ ⲅⲁⲣ ⲛⲁϣⲱⲡⲉ ϩⲛⲟⲩⲏⲓ
thomas_gospel:67
ⲟⲩⲛϣⲟⲙⲧ ⲛⲁϣⲱⲡⲉ ⲉϫⲛⲥⲛⲁⲩ ⲁⲩⲱ ⲥⲛⲁⲩ ⲉϫⲛϣⲟⲙⲧ ⲡⲉⲓⲱⲧ ⲉϫⲙⲡϣⲏⲣⲉ ⲁⲩⲱ ⲡϣⲏⲣⲉ ⲉϫⲙⲡⲉⲓⲱⲧ
thomas_gospel:68
ⲁⲩⲱ · ⲥⲉⲛⲁⲱϩⲉ ⲉⲣⲁⲧⲟⲩ ⲉⲩⲟ ⲙⲙⲟⲛⲁⲭⲟⲥ
thomas_gospel:69
ⲡⲉϫⲉⲓⲏⲥⲟⲩⲥ ϫⲉϯⲛⲁϯ ⲛⲏⲧⲛ ⲙⲡⲉⲧⲉⲙⲡⲉⲃⲁⲗ ⲛⲁⲩ ⲉⲣⲟϥ ⲁⲩⲱ ⲡⲉⲧⲉⲙⲡⲉⲙⲁⲁϫⲉ ⲥⲟⲧⲙⲉϥ ⲁⲩⲱ ⲡⲉⲧⲉⲙⲡⲉϭⲓϫ ϭⲙϭⲱⲙϥ ⲁⲩⲱ ⲙⲡⲉϥⲉⲓ ⲉϩⲣⲁⲓ ϩⲓⲡϩⲏⲧ ⲛⲣⲱⲙⲉ
thomas_gospel:70
ⲡⲉϫⲉⲙⲙⲁⲑⲏⲧⲏⲥ ⲛⲓⲏⲥⲟⲩⲥ ϫⲉϫⲟⲟⲥ ⲉⲣⲟⲛ ϫⲉⲧⲉⲛϩⲁⲏ ⲉⲥⲛⲁϣⲱⲡⲉ ⲛⲁϣ ⲛϩⲉ
thomas_gospel:71
ⲡⲉϫⲉⲓⲏⲥⲟⲩⲥ ⲁⲧⲉⲧⲛϭⲱⲗⲡ ⲅⲁⲣ ⲉⲃⲟⲗ ⲛⲧⲁⲣⲭⲏ ϫⲉⲕⲁⲁⲥ ⲉⲧⲉⲧⲛⲛⲁϣⲓⲛⲉ ⲛⲥⲁⲧϩⲁⲏ ϫⲉϩⲙⲡⲙⲁ ⲉⲧⲉⲧⲁⲣⲭⲏ ⲙⲙⲁⲩ ⲉⲣⲉⲧϩⲁⲏ ⲛⲁϣⲱⲡⲉ ⲙⲙⲁⲩ
thomas_gospel:72
ⲟⲩⲙⲁⲕⲁⲣⲓⲟⲥ ⲡⲉⲧⲛⲁⲱϩⲉ ⲉⲣⲁⲧϥ ϩⲛⲧⲁⲣⲭⲏ
thomas_gospel:73
ⲁⲩⲱ ϥⲛⲁⲥⲟⲩⲱⲛⲧϩⲁⲏ
thomas_gospel:74
ⲁⲩⲱ ϥⲛⲁϫⲓϯⲡⲉ ⲁⲛ ⲙⲙⲟⲩ
thomas_gospel:75
ⲡⲉϫⲉⲓⲏⲥⲟⲩⲥ ϫⲉⲟⲩⲙⲁⲕⲁⲣⲓⲟⲥ ⲡⲉⲛⲧⲁϥϣⲱⲡⲉ ϩⲁⲧⲉϩⲏ ⲉⲙⲡⲁⲧⲉϥϣⲱⲡⲉ
thomas_gospel:76
ⲉⲧⲉⲧⲛϣⲁⲛϣⲱⲡⲉ ⲛⲁⲓ ⲙⲙⲁⲑⲏⲧⲏⲥ ⲛⲧⲉⲧⲛⲥⲱⲧⲙ ⲁⲛⲁϣⲁϫⲉ ⲛⲉⲓⲱⲛⲉ ⲛⲁⲣⲇⲓⲁⲕⲟⲛⲉⲓ ⲛⲏⲧⲛ
thomas_gospel:77
ⲟⲩⲛⲧⲏⲧⲛ ⲅⲁⲣ ⲙⲙⲁⲩ ⲛϯⲟⲩ ⲛϣⲏⲛ ϩⲙⲡⲁⲣⲁⲇⲓⲥⲟⲥ ⲉⲥⲉⲕⲓⲙ ⲁⲛ ⲛϣⲱⲙ ⲙⲡⲣⲱ
thomas_gospel:78
ⲁⲩⲱ ⲙⲉⲣⲉⲛⲉⲩϭⲱⲃⲉ ϩⲉ ⲉⲃⲟⲗ
thomas_gospel:79
ⲡⲉⲧⲛⲁⲥⲟⲩⲱⲛⲟⲩ ϥⲛⲁϫⲓϯⲡⲉ ⲁⲛ ⲙⲙⲟⲩ
thomas_gospel:80
ⲡⲉϫⲉⲙⲙⲁⲑⲏⲧⲏⲥ ⲛⲓⲏⲥⲟⲩⲥ ϫⲉϫⲟⲟⲥ ⲉⲣⲟⲛ ϫⲉⲧⲙⲛⲧⲣⲣⲟ ⲛⲙⲡⲏⲩⲉ ⲉⲥⲧⲛⲧⲱⲛ ⲉⲛⲓⲙ
thomas_gospel:81
ⲡⲉϫⲁϥ ⲛⲁⲩ ϫⲉⲉⲥⲧⲛⲧⲱⲛ ⲁⲩⲃⲗⲃⲓⲗⲉ ⲛϣⲗⲧⲁⲙ
thomas_gospel:82
ⲥⲥⲟⲃⲕ ⲡⲁⲣⲁⲛϭⲣⲟϭ ⲧⲏⲣⲟⲩ
thomas_gospel:83
ϩⲟⲧⲁⲛ ⲇⲉ ⲉⲥϣⲁⲛϩⲉ ⲉϫⲙⲡⲕⲁϩ ⲉⲧⲟⲩⲣϩⲱⲃ ⲉⲣⲟϥ ϣⲁϥⲧⲉⲩⲟ ⲉⲃⲟⲗ ⲛⲟⲩⲛⲟϭ ⲛⲧⲁⲣ ⲛϥϣⲱⲡⲉ ⲛⲥⲕⲉⲡⲏ ⲛϩⲁⲗⲁⲧⲉ ⲛⲧⲡⲉ
thomas_gospel:84
ⲡⲉϫⲉⲙⲁⲣⲓϩⲁⲙ ⲛⲓⲏⲥⲟⲩⲥ ϫⲉⲉⲣⲉⲛⲉⲕⲙⲁⲑⲏⲧⲏⲥ ⲉⲓⲛⲉ ⲛⲛⲓⲙ
thomas_gospel:85
ⲡⲉϫⲁϥ ϫⲉⲉⲩⲉⲓⲛⲉ ⲛϩⲉⲛϣⲏⲣⲉ ϣⲏⲙ ⲉⲩϭⲉⲗⲓⲧ ⲉⲩⲥⲱϣⲉ ⲉⲧⲱⲟⲩ ⲁⲛ ⲧⲉ
thomas_gospel:86
ϩⲟⲧⲁⲛ ⲉⲩϣⲁⲛⲉⲓ ⲛϭⲓⲛϫⲟⲉⲓⲥ ⲛⲧⲥⲱϣⲉ ⲥⲉⲛⲁϫⲟⲟⲥ ϫⲉⲕⲉⲧⲉⲛⲥⲱϣⲉ ⲉⲃⲟⲗ ⲛⲁⲛ
thomas_gospel:87
ⲛⲧⲟⲟⲩ ⲥⲉⲕⲁⲕⲁϩⲏⲩ ⲙⲡⲉⲩⲙⲧⲟ ⲉⲃⲟⲗ ⲉⲧⲣⲉⲩⲕⲁⲁⲥ ⲉⲃⲟⲗ ⲛⲁⲩ ⲛⲥⲉϯⲧⲉⲩⲥⲱϣⲉ ⲛⲁⲩ
thomas_gospel:88
ⲇⲓⲁⲧⲟⲩⲧⲟ ϯϫⲱ ⲙⲙⲟⲥ ϫⲉⲉϥϣⲁⲛⲉⲓⲙⲉ ⲛϭⲓⲡϫⲉⲥϩⲛⲏⲉⲓ ϫⲉϥⲛⲏⲩ ⲛϭⲓⲡⲣⲉϥϫⲓⲟⲩⲉ ϥⲛⲁⲣⲟⲉⲓⲥ ⲉⲙⲡⲁⲧⲉϥⲉⲓ ⲛϥⲧⲙⲕⲁⲁϥ ⲉϣⲟϫⲧ ⲉϩⲟⲩⲛ ⲉⲡⲉϥⲏⲓ ⲛⲧⲉⲧⲉϥⲙⲛⲧⲣⲣⲟ ⲉⲧⲣⲉϥϥⲓ ⲛⲛⲉϥⲥⲕⲉⲩⲟⲥ
thomas_gospel:89
ⲛⲧⲱⲧⲛ ⲇⲉ ⲣⲟⲉⲓⲥ ϩⲁⲧⲉϩⲏ ⲙⲡⲕⲟⲥⲙⲟⲥ
thomas_gospel:90
ⲙⲟⲩⲣ ⲙⲙⲱⲧⲛ ⲉϫⲛⲛⲉⲧⲛϯⲡⲉ ϩⲛⲟⲩⲛⲟϭ ⲛⲇⲩⲛⲁⲙⲓⲥ ϩⲓⲛⲁ ϫⲉⲛⲉⲛⲗⲏⲥⲧⲏⲥ ϩⲉ ⲉϩⲓⲏ ⲉⲉⲓ ϣⲁⲣⲱⲧⲛ ⲉⲡⲉⲓⲧⲉⲭⲣⲉⲓⲁ ⲉⲧⲉⲧⲛϭⲱϣⲧ ⲉⲃⲟⲗ ϩⲏⲧⲥ ⲥⲉⲛⲁϩⲉ · ⲉⲣⲟⲥ ·
thomas_gospel:91
ⲙⲁⲣⲉϥϣⲱⲡⲉ ϩⲛⲧⲉⲧⲛⲙⲏⲧⲉ ⲛϭⲓⲟⲩⲣⲱⲙⲉ ⲛⲉⲡⲓⲥⲧⲏⲙⲱⲛ
thomas_gospel:92
ⲛⲧⲁⲣⲉⲡⲕⲁⲣⲡⲟⲥ ⲡⲱϩ ⲁϥⲉⲓ ϩⲛⲟⲩϭⲉⲡⲏ ⲉⲣⲉⲡⲉϥⲁⲥϩ ϩⲛⲧⲉϥϭⲓϫ ⲁϥϩⲁⲥϥ
thomas_gospel:93
ⲡⲉⲧⲉⲟⲩⲛⲙⲁⲁϫⲉ ⲙⲙⲟϥ ⲉⲥⲱⲧⲙ ⲙⲁⲣⲉϥⲥⲱⲧⲙ
thomas_gospel:94
ⲁⲓⲏⲥⲟⲩⲥ ⲛⲁⲩ ⲉϩⲉⲛⲕⲟⲩⲓ ⲉⲩϫⲓⲉⲣⲱⲧⲉ
thomas_gospel:95
ⲡⲉϫⲁϥ ⲛⲛⲉϥⲙⲁⲑⲏⲧⲏⲥ ϫⲉⲛⲉⲓⲕⲟⲩⲓ ⲉⲧϫⲓⲉⲣⲱⲧⲉ ⲉⲩⲧⲛⲧⲱⲛ ⲉⲛⲉⲧⲃⲏⲕ ⲉϩⲟⲩⲛ ⲉⲧⲙⲛⲧⲣⲣⲟ
thomas_gospel:96
ⲡⲉϫⲁⲩ ⲛⲁϥ ϫⲉⲉⲓⲉⲉⲛⲟ ⲛⲕⲟⲩⲓ ⲧⲛⲛⲁⲃⲱⲕ ⲉϩⲟⲩⲛ ⲉⲧⲙⲛⲧⲣⲣⲟ
thomas_gospel:97
ⲡⲉϫⲉⲓⲏⲥⲟⲩⲥ ⲛⲁⲩ ϫⲉϩⲟⲧⲁⲛ ⲉⲧⲉⲧⲛϣⲁⲛⲣⲡⲥⲛⲁⲩ ⲟⲩⲁ ⲁⲩⲱ ⲉⲧⲉⲧⲛϣⲁⲛⲣⲡⲥⲁ ⲛϩⲟⲩⲛ ⲛⲧϩⲉ ⲙⲡⲥⲁ ⲛⲃⲟⲗ ⲁⲩⲱ ⲡⲥⲁ ⲛⲃⲟⲗ ⲛⲧϩⲉ ⲙⲡⲥⲁ ⲛϩⲟⲩⲛ ⲁⲩⲱ ⲡⲥⲁⲛ ⲛⲧⲡⲉ ⲛⲧϩⲉ ⲙⲡⲥⲁ ⲙⲡⲓⲧⲛ ⲁⲩⲱ ϩⲓⲛⲁ ⲉⲧⲉⲧⲛⲛⲁⲉⲓⲣⲉ ⲙⲡϩⲟⲟⲩⲧ ⲙⲛⲧⲥϩⲓⲙⲉ ⲙⲡⲓⲟⲩⲁ ⲟⲩⲱⲧ · ϫⲉⲕⲁⲁⲥ ⲛⲛⲉⲡϩⲟⲟⲩⲧ · ⲣϩⲟⲟⲩⲧ · ⲛⲧⲉⲧⲥϩⲓⲙⲉ ⲣⲥϩⲓⲙⲉ ϩⲟⲧⲁⲛ ⲉⲧⲉⲧⲛϣⲁⲛⲉⲓⲣⲉ ⲛϩⲉⲛⲃⲁⲗ ⲉⲡⲙⲁ ⲛⲟⲩⲃⲁⲗ · ⲁⲩⲱ ⲟⲩϭⲓϫ ⲉⲡⲙⲁ ⲛⲟⲩϭⲓϫ · ⲁⲩⲱ ⲟⲩ ⲟⲩⲉⲣⲏⲧⲉ ⲉⲡⲙⲁ ⲛⲟⲩⲟⲩⲉⲣⲏⲧⲉ ⲟⲩϩⲓⲕⲱⲛ · ⲉⲡⲙⲁ ⲛⲟⲩϩⲓⲕⲱⲛ ⲧⲟⲧⲉ ⲧⲉⲧⲛⲛⲁⲃⲱⲕ ⲉϩⲟⲩⲛ ⲉⲧⲙⲛⲧⲣⲣⲟ
thomas_gospel:98
ⲡⲉϫⲉⲓⲏⲥⲟⲩⲥ ϫⲉϯⲛⲁⲥⲉⲧⲡⲧⲏⲛⲉ ⲟⲩⲁ ⲉⲃⲟⲗ ϩⲛϣⲟ ⲁⲩⲱ ⲥⲛⲁⲩ ⲉⲃⲟⲗ ϩⲛⲧⲃⲁ
thomas_gospel:99
ⲁⲩⲱ ⲥⲉⲛⲁⲱϩⲉ ⲉⲣⲁⲧⲟⲩ ⲉⲩⲟ ⲟⲩⲁ ⲟⲩⲱⲧ ·
thomas_gospel:100
ⲡⲉϫⲉⲛⲉϥⲙⲁⲑⲏⲧⲏⲥ ϫⲉⲙⲁⲧⲥⲉⲃⲟⲛ ⲉⲡⲧⲟⲡⲟⲥ ⲉⲧⲕⲙⲙⲁⲩ ⲉⲡⲉⲓⲧⲁⲛⲁⲅⲕⲏ ⲉⲣⲟⲛ ⲧⲉ ⲉⲧⲣⲉⲛϣⲓⲛⲉ ⲛⲥⲱϥ

Coptic SCRIPTORIUM, corpus thomas.gospel (github.com/CopticScriptorium/corpora). Licence as stated per document in the project's own meta.json and checked there at parse time. English, where present, is Coptic SCRIPTORIUM's aligned translation. Licence: CC-BY 4.0. Source.