← All works
Mercurius Coptic literature (Coptic SCRIPTORIUM) · 629 sections
Single column Two columns
martyrdom.mercurius:169 ϩⲟⲓⲛⲉ ⲇⲉ ⲛⲛⲉⲥⲛⲏⲩ ⲁⲩϯ ⲛⲁϥ ⲛϩⲉⲛⲭⲣⲏⲙⲁ ⲁⲩⲥⲡⲥⲱⲡϥ ⲉⲧⲣϥϯⲧϩⲉ ⲛⲁⲩ ⲉⲧⲣⲉⲩϥⲓ ⲛⲛⲕⲉⲉⲥ ⲛⲛⲉⲧⲟⲩⲁⲁⲃ · ⲛⲧⲟϥ ⲇⲉ ⲁϥϫⲓ ⲛⲛϩⲟⲙⲛⲧ · ⲁϥⲉⲓⲣⲉ ⲕⲁⲧⲁⲧϩⲉ ⲛⲧⲁⲩϫⲟⲟⲥ ⲛⲁϥ · ⲁϥⲕⲁⲟⲩⲱϣ ⲛⲁⲩ ⲉϩⲣⲁⲓ ⲉⲧⲣⲉⲩⲉⲓ ⲛⲧⲉⲩϣⲏ ⲛⲥⲉϥⲓ ⲛⲛⲕⲉⲉⲥ ⲛⲛⲉⲧⲟⲩⲁⲁⲃ · ⲓⲱϩⲁⲛⲛⲏⲥ ⲡⲃⲁⲡⲧⲓⲥⲧⲏⲥ ⲙⲛⲉⲗⲩⲥⲁⲓⲟⲥ ⲡⲉⲡⲣⲟⲫⲏⲧⲏⲥ ·
encomium.mercurius:169 ⲁⲩⲛⲟϭ ⲛϣⲡⲏⲣⲉ ϣⲱⲡⲉ · ⲉⲥⲙⲡϣⲁ ⲛⲣⲡⲉⲥⲙⲉⲉⲩⲉ · ⲙⲛⲛⲥⲁⲧⲣⲉⲡⲙⲁⲣⲧⲩⲣⲟⲥ ϫⲱⲕ ⲉⲃⲟⲗ · ⲁⲡⲉϥⲥⲱⲙⲁ ⲟⲩⲃⲁϣ ⲛⲧϩⲉ ⲛⲟⲩⲭⲓⲱⲛ · ⲉϥϣⲉϣⲥϯⲛⲟⲩϥⲉ ⲉⲃⲟⲗ · ⲛⲧϩⲉ ⲛⲟⲩϣⲟⲩϩⲏⲛⲉ ⲉϥⲥⲟⲧⲡ · ⲉⲧⲃⲉⲡⲉⲓⲙⲁⲉⲓⲛ ϭⲉ · ⲁϩⲁϩ ⲛⲣⲱⲙⲉ ϣⲱⲡⲉ ⲛⲭⲣⲓⲥⲧⲓⲁⲛⲟⲥ ·
martyrdom.mercurius:170 ⲛⲧⲟⲟⲩ ⲇⲉ ⲉⲣⲉⲧϭⲓϫ ⲙⲡϫⲟⲉⲓⲥ ϣⲟⲟⲡ ⲛⲙⲙⲁⲩ · ⲁⲩⲧⲟⲃⲥⲟⲩ ⲇⲉ ⲉϫⲓⲧⲟⲩ ⲉⲕⲏⲙⲉ ⲛⲁⲑⲁⲛⲁⲥⲓⲟⲥ · ⲉⲃⲟⲗ ϫⲉⲛⲉϥⲉⲡⲓⲑⲩⲙⲉⲓ ⲣⲱ ⲉⲛⲁⲩ ⲉⲣⲟⲟⲩ ·
encomium.mercurius:170 ⲡⲡⲉⲧⲟⲩⲁⲁⲃ ⲇⲉ · ⲁⲩⲟⲩⲁϩϥ ϩⲛⲧⲟⲡⲟⲥ · ⲉϥⲟⲩⲱⲛϩ ⲉⲃⲟⲗ ⲡⲙⲁ ⲉⲧⲉⲣⲉⲟⲩⲙⲏⲏϣⲉ ⲛϭⲟⲙ ϩⲓⲧⲁⲗϭⲟ ϣⲱⲡⲉ ⲙⲙⲁⲩ ·
martyrdom.mercurius:171 ⲁⲩⲉⲓ ⲇⲉ ⲉⲃⲟⲗ ⲉϫⲛⲧϩⲁⲗⲗⲁⲥⲁ ⲁⲩϩⲉ ⲉⲡϫⲟⲉⲓ ϩⲛⲟⲩϣⲡⲛϣⲱⲡ · ⲁⲩⲁⲗⲉ ⲁⲩⲉⲓ ⲉⲣⲁⲕⲟⲧⲉ ϩⲛⲟⲩⲁⲥⲁⲓ ⲁⲩⲧⲁⲁⲩ ⲛⲁⲑⲁⲛⲁⲥⲓⲟⲥ · ⲁϥⲣⲁϣⲉ ⲉϩⲣⲁⲓ ⲉϫⲱⲟⲩ · ⲛⲧϩⲉ ⲛⲧⲁϥⲛⲁⲩ ⲉⲣⲟⲟⲩ ϩⲱⲥ ϫⲉⲛⲧⲁϥⲛⲁⲩ ⲉⲣⲟⲟⲩ ϩⲙⲡⲥⲱⲙⲁ
encomium.mercurius:171 ⲟⲩⲉⲟⲟⲩ ⲙⲡⲛⲟⲩⲧⲉ ⲡⲉⲓⲱⲧ · ⲙⲛⲡⲉϥⲙⲟⲛⲟⲅⲉⲛⲏⲥ ⲛϣⲏⲣⲉ · ⲉⲓⲥ ⲡⲉⲭⲣⲓⲥⲧⲟⲥ ⲡⲉⲛϫⲟⲉⲓⲥ · ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ⲧⲉⲛⲟⲩ ⲁⲩⲱ ⲛⲟⲩⲟⲉⲓϣ ⲛⲓⲙ · ϣⲁⲛⲁⲓⲱⲛ ⲧⲏⲣⲟⲩ ⲛⲁⲓⲱⲛ ϩⲁⲙⲏⲛ ⲻ ::: ⲻ :::
martyrdom.mercurius:172 ⲁϥϩⲟⲡⲟⲩ ϩⲙⲡⲃⲁⲡϯⲥⲧⲏⲣⲓⲟⲛ · ⲉϥϣⲓⲛⲉ ⲛⲥⲁⲟⲩⲟⲉⲓϣ · ⲛⲕⲱⲧ ⲉⲣⲟⲟⲩ ⲛⲟⲩⲙⲁⲣⲧⲩⲣⲓⲟⲛ .
martyrdom.mercurius:173 ⲉϥⲟⲩⲱⲙ ⲇⲉ ⲛⲟⲩϩⲟⲟⲩ ϩⲙⲡⲕⲏⲡⲟⲥ ⲛⲛⲉⲛⲉⲓⲟⲧⲉ ⲙⲛⲛⲉⲥⲛⲏⲩ · ⲛϥⲙⲟⲩⲧⲉ ⲅⲁⲣ ⲙⲙⲏⲛⲉ ⲉⲛⲛⲟϭ ⲙⲡⲉⲕⲗⲏⲣⲟⲥ · ⲉϥⲟⲩⲱⲙ ⲛⲙⲙⲁⲩ · ⲛⲁⲓ ⲉⲛⲉⲩⲛⲏⲩ ϣⲁⲣⲟϥ ⲉϩⲛⲁⲩ ·
martyrdom.mercurius:174 ⲟⲩⲙⲟⲛⲟⲛ ⲇⲉ ϫⲉⲉⲩⲟⲩⲱⲙ · ⲁⲗⲗⲁ ⲉⲩⲥⲱⲧⲙ ⲟⲛ ⲉⲛϣⲁϫⲉ ⲛⲧⲥⲟⲫⲓⲁ · ⲛⲧⲁⲡⲛⲟⲩⲧⲉ ⲧⲁⲁⲥ ⲛⲁϥ · ⲕⲁⲧⲁⲧϩⲉ ⲉⲧⲥⲏϩ · ϩⲱⲃ ⲛⲓⲙ ⲉⲡⲉⲟⲟⲩ ⲙⲡⲛⲟⲩⲧⲉ ·
martyrdom.mercurius:175 ⲉⲓⲧⲉ ⲙⲡⲛⲁⲩ ⲛⲛⲏⲥⲧⲉⲩⲉ · ⲉⲓⲧⲉ ⲙⲡⲛⲁⲩ ⲛⲟⲩⲱⲙ · ⲁⲩⲱ ⲛⲥⲱ · ⲉϥⲟⲩⲱⲙ ⲉϥⲥⲱ ϩⲙⲡϣⲁϫⲉ ⲙⲡⲛⲟⲩⲧⲉ ⲛⲟⲩⲟⲉⲓϣ ⲛⲓⲙ ·
martyrdom.mercurius:176 ⲉϥⲟⲩⲱⲙ ϭⲉ ⲙⲛⲛⲉⲥⲛⲏⲩ ⲙⲛⲛⲉⲕⲗⲏⲣⲓⲕⲟⲥ ⲙⲛⲛⲛⲟϭ ⲙⲫⲓⲗⲟⲡⲟⲛⲟⲥ ⲛⲧⲉⲕⲕⲗⲏⲥⲓⲁ · ϩⲙⲡⲕⲏⲡⲟⲥ ⲉⲧϣⲟⲟⲡ ⲛⲁϥ ϩⲙⲡϩⲓⲣ · ⲉⲧⲟⲩⲙⲟⲩⲧⲉ ⲉⲣⲟϥ ϫⲉⲡϩⲉⲣⲙⲏⲥ ⲙⲡⲣⲏⲥ ⲛⲧⲡⲟⲗⲓⲥ · ⲉϥⲟⲩⲏⲛ ⲉϫⲛϩⲉⲛⲕⲟⲡⲣⲓⲁ · ⲙⲛϩⲉⲛⲡⲗⲁϯⲁ ⲛϫⲁⲓⲉ ·
martyrdom.mercurius:177 ⲡⲉϫⲁϥ ϫⲉⲉⲓϣⲁⲛϭⲛⲡⲉⲟⲩⲟⲉⲓϣ ϯⲛⲁⲕⲁⲑⲁⲣⲓⲍⲉ ⲛⲛⲉⲕⲟⲡⲣⲓⲁ · ⲛⲧⲁⲕⲱⲧ ⲛϩⲏⲧⲟⲩ · ⲙⲡⲙⲁⲣⲧⲩⲣⲓⲟⲛ ⲛⲓⲱϩⲁⲛⲛⲏⲥ ⲡⲃⲁⲡϯⲥⲧⲏⲥ ·
martyrdom.mercurius:178 ⲑⲉⲟⲫⲩⲗⲟⲥ ⲇⲉ ⲙⲡⲉⲟⲩⲟⲉⲓϣ ⲉⲧⲙⲙⲁⲩ ⲛϥⲁϩⲉⲣⲁⲧϥ ⲉⲧⲉⲧⲣⲁⲡⲉⲍⲁ ⲉϥⲟⲩⲱⲙ · ⲉⲃⲟⲗ ϫⲉⲛⲉϥⲟ ⲛⲛⲟⲧⲁⲣⲓⲟⲥ ⲛⲁϥ · ⲁϥⲥⲱⲧⲙ ⲉⲡϣⲁϫⲉ ⲛⲧⲁϥϫⲟⲟϥ ⲛϭⲓⲁⲑⲁⲛⲁⲥⲓⲟⲥ · ⲁϥⲕⲁⲁϥ ϩⲙⲡⲉϥϩⲏⲧ ·
martyrdom.mercurius:179 ⲓⲟⲩⲗⲓⲁⲛⲟⲥ ⲇⲉ ⲕⲁⲧⲁⲡⲉⲧⲥⲱⲕ ⲙⲙⲟϥ · ⲉⲧⲣⲉϥⲃⲱⲕ ϩⲛⲟⲩϭⲱⲛⲧ ⲉⲧⲡⲉⲣⲥⲓⲥ · ⲁⲡⲉⲭⲣⲓⲥⲧⲟⲥ ⲓⲏⲥⲟⲩⲥ ⲡⲛⲟⲩⲧⲉ ⲧⲁⲁϥ ⲉϩⲣⲁⲓ ⲉⲧⲟⲟⲧⲟⲩ ⲛⲙⲡⲉⲣⲥⲟⲥ · ⲉⲃⲟⲗ ϫⲉⲁϥⲕⲁⲛⲉⲧⲟⲩⲁⲁⲃ · ⲉⲩⲟⲧⲡ ⲉϩⲟⲩⲛ ⲁϥⲃⲱⲕ ⲉⲧⲡⲉⲣⲥⲓⲥ ·
martyrdom.mercurius:180 ⲡⲙⲟⲩ ⲇⲉ ⲛⲧⲁϥⲙⲟⲩ ⲙⲙⲟϥ ⲛⲉⲟⲩϯϩⲉ ⲡⲉ · ⲁϥⲛⲁⲩ ϩⲛⲧⲉⲟⲩϣⲏ ⲉⲩⲙⲏⲏϣⲉ ⲙⲙⲁⲧⲟⲓ ⲉⲩⲛⲏⲩ ⲉϫⲱϥ ⲉⲃⲟⲗ ϩⲙⲡⲁⲏⲣ · ⲉⲓⲥⲟⲩⲗⲟⲅⲭⲏ ⲇⲉ ⲁⲥⲣⲁϩⲧϥ ⲉϫⲛⲛⲉϥϭⲗⲟⲟⲧⲉ ⲁϥⲥⲟⲩⲱⲛⲟⲩ ϫⲉⲛⲉⲧⲟⲩⲁⲁⲃ ⲛⲉ ·
martyrdom.mercurius:181 ⲁϥϫⲓ ϭⲉ ⲙⲡⲉϥⲥⲛⲟϥ ⲁϥⲛⲟϫϥ ⲉϩⲣⲁⲓ ⲉⲧⲡⲉ ⲉϥϫⲱ ⲙⲙⲟⲥ ϫⲉϫⲓⲧϥ ⲛⲁⲕ ⲓⲏⲥⲟⲩⲥ ⲁⲕϥⲓ ⲡⲙⲁ ⲧⲏⲣϥ ·
martyrdom.mercurius:182 ⲛⲧⲉⲣϥϫⲓⲟⲩⲁ · ⲅⲁⲣ ⲛⲧⲉⲩⲛⲟⲩ ⲁϥϩⲉ ⲁⲩⲱ ⲁⲡⲛⲟⲩⲧⲉ ⲣϩⲙⲙⲉ ⲙⲡⲉϥⲗⲁⲟⲥ · ⲁⲩⲱ ⲁϥⲧⲟⲩϫⲟⲛ · ⲓⲉϩⲣⲱⲙⲁⲓⲟⲥ ⲉϩⲣⲁⲓ ⲉⲡⲉⲩⲙⲁ ·
martyrdom.mercurius:183 ⲃⲁⲥⲓⲗⲉⲓⲟⲥ ϭⲉ ϩⲁⲧϩⲏ ⲛϣⲟⲙⲛⲧ ⲛϩⲟⲟⲩ ⲉⲡⲙⲟⲩ ⲛⲓⲟⲩⲗⲓⲁⲛⲟⲥ · ⲁϥⲛⲁⲩ ⲉⲩⲣⲁⲥⲟⲩ ϩⲙⲡⲉϣⲧⲉⲕⲟ ·
martyrdom.mercurius:184 ⲁϥⲛⲉϩⲥⲉ ⲇⲉ ⲁϥϫⲟⲥ ⲉⲡⲉϥⲥⲟⲛ ⲥⲛⲁⲩ ⲉϥϫⲱ ⲙⲙⲟⲥ · ϫⲉⲁⲓⲛⲁⲩ ϩⲛⲧⲉⲓⲟⲩϣⲏ ⲉⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ·
martyrdom.mercurius:185 ⲉⲁϥⲃⲱⲕ ⲉϩⲟⲩⲛ ⲉⲡⲉϥⲙⲁⲣⲧⲩⲣⲓⲟⲛ · ⲁϥⲧⲱⲕⲙ ⲙⲡⲉϥⲙⲉⲣⲉϩ ⲉϥϫⲱ ⲙⲙⲟⲥ ϫⲉⲉⲓⲛⲁⲕⲁⲡⲉⲓⲁⲛⲟⲙⲟⲥ ⲛⲧⲉⲓϩⲉ · ⲉϥϫⲓⲟⲩⲁ · ⲉⲡⲛⲟⲩⲧⲉ ⲛⲧⲡⲉ ·
martyrdom.mercurius:186 ⲁⲩⲱ ⲛⲧⲉⲣⲉϥϫⲉⲛⲁⲓ ⲁϥⲃⲱⲕ ⲁⲓⲗⲟ ⲉⲛⲁⲩ ⲉⲣⲟϥ ·
martyrdom.mercurius:187 ⲁⲩⲟⲩⲱϣⲃ ⲇⲉ ⲛϭⲓⲡⲕⲉⲥⲛⲁⲩ ϫⲉⲛⲁⲙⲉ ⲁⲛⲟⲛ ϩⲱⲱⲛ · ⲁⲛⲛⲁⲩ ⲉⲡⲉⲓϩⲟⲣⲟⲙⲁ ⲛϯⲙⲓⲛⲉ .
martyrdom.mercurius:188 ⲛⲧⲉⲣⲟⲩⲛⲁⲩ ⲇⲉ ⲛⲧⲉⲓⲅⲛⲱⲙⲏ ⲛⲧⲁⲡⲛⲟⲩⲧⲉ ⲧⲥⲁⲃⲟⲟⲩ · ⲉⲣⲟⲥ · ⲁⲩⲡⲓⲥⲧⲉⲩⲉ · ⲡⲉϫⲁⲩ ⲛⲛⲉⲩⲉⲣⲏⲩ ϫⲉⲙⲁⲣⲉⲛϫⲟⲟⲩ ⲉⲡⲙⲁⲣⲧⲩⲣⲓⲟⲛ ⲙⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ · ⲛⲧⲛⲛⲁⲩ ϫⲉⲉⲣⲉⲡⲉϥⲙⲉⲣⲉϩ ⲧⲟⲕⲥ ⲉⲡⲉϥⲙⲁ ϫⲉⲛⲙⲙⲟⲛ ·
martyrdom.mercurius:189 ⲁⲩⲧⲛⲛⲟⲟⲩ ϭⲉ ⲁⲩⲱ ⲙⲡⲟⲩϭⲛⲧϥ ⲁⲩⲡⲓⲥⲧⲉⲩⲉ ⲉⲡϩⲟⲣⲟⲙⲁ ·
martyrdom.mercurius:190 ⲙⲛⲛⲥⲁϣⲟⲙⲛⲧ ⲇⲉ ⲛϩⲟⲟⲩ ⲁⲩⲧⲛⲛⲟⲟⲩ ⲛⲛⲉⲥϩⲁⲓ ⲉⲧⲁⲛⲧⲓⲟⲭⲓⲁ ϫⲉⲁⲡⲣⲣⲟ ⲙⲟⲩ ϩⲙⲡⲡⲟⲗⲉⲙⲟⲥ ·
martyrdom.mercurius:191 ⲧⲥⲩⲅⲕⲗⲏⲧⲟⲥ ⲇⲉ ⲧⲏⲣⲥ ϩⲛⲟⲩⲯⲏⲫⲟⲥ ⲛⲧⲉⲡⲛⲟⲩⲧⲉ ⲁⲩⲁⲙⲁϩⲧⲉ ⲛⲓⲟⲩⲃⲓⲁⲛⲟⲥ · ⲁⲩⲁⲁϥ ⲛⲣⲣⲟ · ⲉⲡⲙⲁ ⲛⲓⲟⲩⲗⲓⲁⲛⲟⲥ ·
martyrdom.mercurius:192 ⲉⲩⲣⲱⲙⲉ ⲡⲉ ⲙⲡⲓⲥⲧⲟⲥ · ⲛⲣⲙⲛⲛⲟⲩⲧⲉ ϫⲓⲛⲧⲉϥⲙⲛⲧⲕⲟⲩⲓ · ⲛⲧⲟϥ ⲇⲉ ⲛⲧⲉⲩⲛⲟⲩ ⲁϥⲕⲱ ⲉⲃⲟⲗ ⲛⲛⲉⲧⲟⲩⲁⲁⲃ ⲃⲁⲥⲩⲗⲉⲓⲟⲥ · ⲡⲉⲥⲧⲩⲗⲗⲟⲥ ⲛⲧⲙⲉ · ⲡⲕⲁⲡⲡⲁⲇⲟⲝ · ⲙⲛⲛⲉⲥⲛⲏⲩ ·
martyrdom.mercurius:193 ⲁⲩⲱ ϭⲉ ⲙⲡⲉϥⲕⲟⲧϥ ⲛϭⲓⲓⲟⲩⲗⲓⲁⲛⲟⲥ ⲕⲁⲧⲁⲡϣⲁϫⲉ ⲛⲃⲁⲥⲓⲗⲉⲓⲟⲥ ·
martyrdom.mercurius:194 ϩⲛⲟⲩⲉⲓⲣⲏⲛⲉ ⲛⲧⲉⲡⲛⲟⲩⲧⲉ · ⲉⲣⲉⲛⲉϣⲗⲏⲗ ⲙⲛⲛⲧⲱⲃϩ ⲙⲡⲓⲛⲟϭ ⲛⲥⲧⲣⲁⲧⲏⲗⲁⲧⲏⲥ ⲡϩⲁⲅⲓⲟⲥ ⲙⲉⲣⲕⲟⲩⲣⲓⲟⲥ ⲛⲁⲉⲓ ⲉϩⲣⲁⲓ ⲉϫⲱⲛ ⲛⲧⲛⲟⲩϫⲁⲓ ϩⲓⲟⲩⲥⲟⲡ · ϥⲑ ·
Coptic SCRIPTORIUM, corpus mercurius (github.com/CopticScriptorium/corpora). Licence as stated per document in the project's own meta.json and checked there at parse time. English, where present, is Coptic SCRIPTORIUM's aligned translation. Licence: CC-BY 4.0. Source .