Helias

Coptic literature (Coptic SCRIPTORIUM) · 531 sections

helias_encomium:114
ⲁⲛⲟⲛ ⲇⲉ ϩⲱⲱⲛ ⲙⲁⲣⲉⲛⲕⲱ ⲛⲁⲛ ⲡⲉⲛⲡⲟⲗⲓⲧⲉⲩⲙⲁ ϩⲉⲙⲡⲙⲁ ⲉⲧⲙⲙⲁⲩ ⲧⲁⲓ ⲅⲁⲣ ⲧⲉ ⲧϩⲉ ⲉⲧⲛⲛⲁϣⲱⲡⲉ ⲛϣⲃⲏⲣ
helias_encomium:115
ⲁⲩⲱ ⲛⲥⲟⲛ ⲉⲛⲉⲧⲟⲩⲁⲁⲃ
helias_encomium:116
ⲁⲩⲱⲉϣϫⲉ ⲛⲧⲉⲛϩⲛⲟⲩⲙⲛⲧⲙⲁⲣⲧⲩⲣⲟⲥ ⲁⲛⲛⲧϩⲉ ⲙⲡϩⲁⲅⲓⲟⲥ ϩⲏⲗⲓⲁⲥ :ⲻⲁⲗⲗⲁ ⲙⲁⲣⲉⲛϣⲱⲡⲉ ϩⲛⲟⲩⲙⲛⲧⲇⲓⲕⲁⲓⲟⲥ ⲛⲧϩⲉ ⲛⲛⲉⲥⲛⲏⲩ ⲉⲧϩⲁⲧⲏϥ ·
helias_encomium:117
ⲡⲉⲓⲕⲉϩⲱⲃ ⲡⲁⲓ ⲡⲁⲧⲥⲟⲫⲓⲁ ⲙⲡⲛⲟⲩⲧⲉ ⲡⲉ · ⲉⲁϥⲟⲓⲕⲟⲛⲟⲙⲉⲓ ⲉⲧⲣⲉ ⲛⲕⲉⲉⲥ ⲛⲛⲓⲁⲥⲕⲏⲧⲏⲥ ϣⲱⲡⲉ ϩⲁⲧⲉⲛⲛⲁⲡⲙⲁⲣⲧⲩⲣⲟⲥ ϫⲉⲕⲁⲥ ⲉⲣⲉⲧⲉⲩϩⲩⲡⲟⲑⲉⲥⲓⲥ ⲛⲁϣⲱⲡⲉ · ⲙⲡⲣⲟⲧⲣⲟⲡⲏ ⲛⲟⲩⲟⲛ ⲛⲓⲙ ·
helias_encomium:118
ⲉϩⲟⲩⲛ ⲉⲧⲙⲛⲧⲁⲛⲟⲓⲁ ⲉⲓⲧⲁ ⲟⲛ ⲉⲕϣⲟⲟⲡ ϩⲛⲟⲩⲕⲉⲣⲟⲥ ⲛⲇⲓⲱⲅⲙⲟⲥⲉⲓⲥ ⲡⲉⲛⲧⲁϥϫⲣⲟ ϩⲛⲛⲇⲓⲱⲅⲙⲟⲥ · ⲡϩⲁⲅⲓⲟⲥϩⲏⲗⲓⲁⲥ :ⲻⲡⲁⲗⲓⲛ ⲇⲉ ⲟⲛⲕϣⲟⲟⲡ ⲁϫⲛⲇⲓⲱⲅⲙⲟⲥ ·
helias_encomium:119
ⲉⲓⲥ ⲛⲉⲛⲧⲁⲩⲟ ⲉⲩⲇⲱⲕⲓⲙⲏ ϩⲛⲧⲡⲟⲗⲩⲧⲓⲁ ⲙⲛⲧⲗⲥⲕⲩⲥⲓⲥ :ⲻⲕⲁⲓ ⲅⲁⲣ ⲡⲃⲓⲟⲥ ⲛⲧⲁⲥⲕⲏⲥⲓⲥ · ⲟⲩϩⲓⲥⲁⲕⲱⲕⲓⲟⲛ ⲡⲉ · ⲉⲛϥϭⲟϫⲃⲁⲛ ⲉⲡⲁⲛⲙⲁⲣⲧⲩⲣⲟⲥ :ⲻϩⲟⲧⲉ ⲇⲉ · ϫⲉⲡⲉⲓⲥⲙⲟⲧ ·
helias_encomium:120
ϯⲛⲁⲉⲓⲛⲉ ⲛⲁⲕ ⲙⲡⲥⲟⲫⲟⲥ ⲛⲁⲡⲟⲥⲧⲟⲗⲟⲥ · ⲉϥⲟ ⲛⲥⲩⲛⲏⲅⲟⲣⲟⲥ · ⲉⲧⲉⲓϩⲩⲡⲟⲑⲉⲥⲓⲥ ⲛⲧⲉⲣⲉϥϩⲓⲥⲧⲱⲣⲓⲍⲉ ⲛⲁⲛ ⲛⲧⲡⲓⲥⲧⲓⲥ ⲙⲡⲟⲩⲁ ⲡⲟⲩⲁ ⲛⲛⲉⲧⲟⲩⲁⲁⲃ ·
helias_encomium:121
ⲁⲩⲱ ⲛⲧⲉⲣⲉϥⲓⲛⲉ ⲉⲧⲙⲏⲧⲉ ⲛⲅⲉⲇⲉⲱⲛ ·
helias_encomium:122
ⲃⲁⲣⲁⲕ ⲥⲁⲙⲯⲱⲛ ⲇⲁⲩⲉⲇ · ⲙⲛⲥⲁⲙⲟⲩⲏⲗ ⲉⲁϥⲕⲱ ⲉϩⲣⲁⲓ ⲛⲛⲉⲛⲧⲁϫⲣⲟ ϩⲙⲡⲉⲥⲧⲁⲇⲓⲟⲛ ⲛⲧⲙⲛⲧⲙⲁⲣⲧⲩⲣⲟⲥ ⲉⲁϥϩⲱⲧⲣ ⲛⲙⲙⲁⲩ ⲙⲡⲃⲓⲟⲥ ⲛⲧⲙⲛⲧⲙⲟⲛⲁⲭⲟⲥ ·
helias_encomium:123
ⲉϥϫⲱ ⲙⲙⲟⲥ ⲛⲧⲉⲓϩⲉ ϫⲉⲉⲩⲥⲟⲣⲉⲙ ϩⲛⲛϫⲁⲓⲉ ⲙⲛⲛⲉⲧⲟⲟⲩ ⲙⲛⲛⲉⲉⲓⲁ ⲙⲛⲛⲉϣⲕⲟⲗ ⲙⲡⲕⲁϩ ⲉⲩⲣϭⲣⲱϩ ⲉⲩⲑⲗⲓⲃⲉ ⲉⲩⲙⲟⲕϩ ⲛⲁⲓⲧⲉ ⲙⲡⲕⲟⲥⲙⲟⲥ ⲉⲙⲻⲡϣⲁ ⲙⲙⲟⲟⲩ .
helias_encomium:124
ⲉⲡϩⲁⲉ ⲇⲉ ⲁϥⲥⲧⲉⲫⲁⲛⲟⲩ ⲙⲙⲟⲟⲩ ⲧⲏⲣⲟⲩ ϩⲉⲙⲡⲣⲁⲛ ⲛⲧⲙⲛⲧⲙⲁⲣⲧⲩⲣⲟⲥ ⲉϥϫⲱ ⲙⲙⲟⲥ ϫⲉⲉⲧⲃⲉⲡⲁⲓ ⲉⲟⲩⲛⲧⲁⲛ ⲙⲙⲁⲩ ⲙⲡⲉⲓⲙⲏⲏϣⲉ ⲙⲙⲛⲧⲣⲉ ⲉⲩⲕⲏ ⲛⲁⲛ ⲉϩⲣⲁⲓ ⲙⲁⲣⲉⲛⲡⲱⲧ ϩⲓⲧⲛⲟⲩϩⲩⲡⲟⲙⲟⲛⲏ ⲙⲡⲁⲅⲱⲛ ⲉⲧⲕⲏ ⲛⲁⲛ ⲉϩⲣⲁⲓ .
helias_encomium:125
ⲁⲕⲛⲁⲩ ϫⲉⲧⲙⲛⲧⲙⲟⲛⲁⲭⲟⲥ ⲧⲥⲱⲛⲉ ⲇⲉ ⲛⲧⲙⲛⲧⲙⲁⲣⲧⲩⲣⲟⲥ ⲙⲡⲉⲧⲛⲁⲁⲥ ⲁϫⲛϩⲩⲡⲟⲕⲣⲏⲥⲓⲥ ϩⲓⲥⲁⲕ ⲙⲙⲛⲧⲛⲟⲩϫ .
helias_encomium:126
ⲕⲁⲓ ⲅⲁⲣ ⲡⲉⲓⲁⲅⲱⲛ ⲥⲛⲁⲩ ⲁⲡⲉⲭⲣⲓⲥⲧⲟⲥ ⲧⲩⲡⲟⲩ ⲙⲙⲟⲟⲩ ⲛⲁⲛ ϩⲣⲁⲓ ⲛϩⲏⲧϥ ⲙⲙⲓⲛ ⲙⲙⲟϥ .
helias_encomium:127
ⲁϥϫⲣⲟ ⲅⲁⲣ ⲉⲡⲇⲓⲁⲃⲟⲗⲟⲥ ϩⲙⲡⲧⲣⲉϥⲁⲛⲁⲭⲱⲣⲉⲓ ⲉϩⲣⲁⲓ ⲉⲧⲏⲣⲉⲙⲟⲥ .
helias_encomium:128
ⲡⲁⲗⲓⲛ ⲇⲉ ⲟⲛ ⲁϥⲧⲁϩⲟ ⲉⲣⲁⲧϥ ⲙⲡⲟⲩϫⲁⲓ ⲛⲧⲟⲓⲕⲟⲩⲙⲉⲛⲏ ⲧⲏⲣⲥ ϩⲓⲧⲙⲡⲛⲓⲕⲓⲟⲛ ⲙⲡⲉⲥⲧⲁⲩⲣⲟⲥ :ⲻⲛⲉⲧϩⲛⲧⲏⲣⲉⲙⲟⲥ ⲙⲉⲛ ⲁϥϯⲛⲁⲩⲙⲡⲉϫⲣⲟ ϩⲙⲡⲧⲣⲉϥϣⲱⲡⲉ ⲛⲁⲩ ⲛⲁⲣⲭⲏⲅⲟⲥ ⲉⲡⲁⲓ :ⲻⲡⲁⲗⲓⲛ ⲇⲉ ⲟⲛ ⲛⲉⲛⲧⲁⲩϯ ⲙⲡⲉⲩⲟⲩⲟⲓ ⲉⲡⲉⲥⲧⲁⲇⲓⲟⲛ ⲛⲧⲙⲛⲧⲙⲁⲣⲧⲩⲣⲟⲥ ⲁϥϣⲱⲡⲉ ⲛⲁⲩ ⲛⲕⲗⲟⲙ
helias_encomium:129
ⲁⲛⲟⲛ ⲇⲉ ϩⲱⲱⲛⲛⲁⲥⲛⲏⲩ ⲙⲁⲣⲉⲛⲟⲩⲁϩⲛ ⲛⲥⲁⲡϫⲟⲉⲓⲥ ⲙⲛⲡⲁⲡϫⲟⲉⲓⲥ :ⲻⲙⲁⲣⲉⲛϩⲟⲙⲟⲗⲟⲅⲉⲓ ⲙⲡϫⲟⲉⲓⲥ ⲙⲛ ⲛⲉⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲙⲁⲣⲉⲛϣⲱⲡⲉ ⲛⲁϥ ⲉⲓⲟⲩⲁⲁⲃ ⲙⲏⲛⲉⲛⲧⲁⲩⲧⲃⲃⲟⲟⲩ ⲛⲁϥ ϩⲓⲧⲉⲛⲧⲁⲥⲕⲏⲥⲓⲥ :ⲻⲙⲁⲣⲉⲛⲣⲟⲉⲓⲥ ⲉⲧⲉⲛⲡⲓⲥⲧⲓⲥ ⲛⲧϩⲉ ⲛⲛⲉⲙⲁⲣⲧⲩⲣⲟⲥ ⲉⲧⲟⲩⲁⲁⲃ ⲙⲁⲣⲉⲛϣⲱⲡⲉ ⲛⲕⲟⲓⲛⲟⲙⲓⲕⲟⲥ ϩⲛⲧⲁⲅⲁⲡⲏ ⲙⲡⲛⲡⲛⲁ:ⲻ
helias_encomium:130
ⲕⲁⲓ ⲅⲁⲣ ⲉϣϫⲉⲛⲧⲉⲛⲛⲁⲉⲣⲟⲩⲟⲉⲓⲛ ⲁⲛ ⲛⲧϩⲉ ⲙⲡⲣⲏ ⲁⲗⲗⲁ ⲙⲁⲣⲟⲩⲛⲁⲩⲉⲣⲟⲛ ϩⲛⲧⲧⲁⲝⲓⲥ ⲛⲛⲥⲓⲟⲩ ⲙⲁⲧⲉ ⲡⲁⲓ ⲇⲉ ⲡⲉϯϫⲱ ⲙⲙⲟϥ ϫⲉⲕⲁⲛ ⲉϣϫⲉ ⲛⲧⲉⲛⲛⲁϣ ⲡⲱϩ ⲁⲛ ⲉⲧⲙⲛⲧⲛⲟϭ ⲛⲛⲁⲅⲱⲛ ⲛⲛⲉⲙⲁⲣⲧⲩⲣⲟⲥ :ⲻⲁⲗⲗⲁ ⲙⲁⲣⲟⲩ ϭⲛⲧⲛ ⲙⲙⲁⲧⲉ ϩⲛⲧⲁⲅⲅⲉⲗⲏ ⲛⲛⲡⲓⲥⲧⲟⲥ :ⲻⲕⲁⲛ ⲉϣϫⲉ ⲛⲧⲛⲛⲁⲙⲉⲣⲉ ⲡⲛⲟⲩⲧⲉ ⲁⲛ ⲛⲧϩⲉ ⲛⲧⲁϥⲙⲉⲣⲓⲧⲛ ⲁⲗⲗⲁ ⲙⲁⲣⲉⲛⲙⲉⲣⲉⲛⲉⲛⲉⲣⲏⲩ ⲛⲧⲉⲛϩⲉ ⲁⲩⲱ ⲕⲁⲛ ⲉϣϫⲉ ⲙⲛⲧⲁⲛ ⲗⲁⲁⲩ ⲉϯ ⲛⲁϥ ⲁⲗⲗⲁ ⲡⲁⲣⲁⲙⲩⲑⲓⲝⲉ ⲙⲙⲟϥ ϩⲙⲡⲉⲕϣⲁϫⲉ ⲧⲁϫⲣⲟϥ ϩⲙⲡⲉⲣⲏⲧⲛ ⲧⲙⲛⲧⲣⲣⲟ ⲛⲙⲡⲏⲩⲉ .
helias_encomium:131
ϫⲱ ⲉⲣⲟϥ ⲙⲡϣⲁ ϫⲉⲙⲡⲁⲡⲟⲥⲧⲟⲗⲟⲥ ϫⲉⲛϩⲓⲥⲉ ⲙⲡⲉⲓⲟⲩⲟⲉⲓϣ ⲧⲉⲛⲟⲩ ⲛⲥⲉ ⲉⲙⲡϣⲁ ⲁⲛ ⲙⲡⲉⲟⲟⲩ ⲉⲧⲛⲁϭⲱⲗⲡ ⲉⲣⲟⲛ . ⲟⲩⲙⲛⲧⲙⲁⲣⲧⲩⲣⲟⲥ ⲅⲁⲣ ⲧⲉ ⲧⲙⲛⲧϩⲏⲕⲉ ⲙⲡⲉⲧⲛⲁ ϥⲓ ϩⲁⲣⲟⲥ ϩⲛⲟⲩϣⲉⲡϩⲙⲟⲧ ⲧⲁⲓ ⲅⲁⲣ ⲧⲉ ⲧϩⲉ ⲛⲧⲁϥϫⲟⲟⲥ ⲛϭⲓⲡⲉⲛⲱⲛϩ ⲧⲏⲣⲛ ⲡⲉⲭⲣⲓⲥⲧⲟⲥ ϫⲉⲛⲁⲓⲁⲧⲟⲩⲛⲛϩⲏⲕⲉ ϩⲉⲙⲡⲉⲡⲛⲁ ϫⲉⲧⲱⲟⲩ ⲧⲉ ⲧⲙⲛⲧⲣⲣⲟ ⲛⲙⲡⲏⲩⲉ ⲛⲉⲛⲧⲁⲩⲡⲱⲧ ⲇⲉ ϩⲱⲟⲩ ⲛⲥⲱⲟⲩ ⲉⲧⲃⲉⲧⲇⲓⲕⲁⲓⲟⲥⲩⲛⲏ ϫⲉⲛⲧⲟⲟⲩ ⲛⲉⲧⲟⲩⲛⲁⲙⲟⲩⲧⲉ ⲉⲣⲟⲟⲩϫⲉ ⲛϣⲏⲣⲉ ⲙⲡⲛⲟⲩⲧⲉ ⲉⲧⲙⲙⲁⲣⲧⲩⲣⲟⲥ ⲛⲉ
helias_encomium:132
ⲁⲛⲟⲛ ⲇⲉ ϩⲱⲱⲛ ⲱ ⲛⲁⲙⲉⲣⲁⲧⲉ ⲙⲁⲣⲉⲛⲙⲉⲣⲉⲛⲉⲧϩⲓⲧⲟⲩⲱⲛⲛⲑⲉ ⲛⲧⲁⲛⲙⲁⲣⲧⲩⲣⲟⲥ ⲙⲉⲣⲉⲡⲛⲟⲩⲧⲉ ⲁⲩⲡⲉϩⲧⲡⲉⲩⲥⲛⲟϥ ⲉⲃⲟⲗ ϩⲓϫⲱϥ ϫⲉⲕⲁⲥ ⲉⲛⲛⲁϩⲉ ⲉⲩⲛⲁ ⲙⲡⲉϩⲟⲟⲩ ⲉⲛⲛⲁⲡⲱⲧ ⲉⲣⲁⲧϥ ⲡϫⲟⲉⲓⲥ ⲉϥⲉⲥⲙⲟⲩ ⲉⲣⲱⲧⲛⲧⲏⲣⲧⲛ ·ϫⲓⲛⲡⲉⲧⲛⲕⲟⲩⲓ ϣⲁⲡⲉⲧⲛⲛⲟϭ ⲛϥⲧⲟⲩⲛⲉⲥ ⲧⲏⲩⲧⲛ ⲉϩⲣⲁⲓ ϩⲛⲧⲉⲓⲁⲙⲉⲗⲓⲁ .
helias_encomium:133
ⲛⲧⲉⲧⲛⲛⲏⲫⲉ ⲛⲧⲉⲧⲛⲣⲟⲉⲓⲥ ϫⲉⲡⲁⲛⲇⲓⲕⲓⲙⲉⲛⲟⲥ ⲡⲇⲓⲁⲃⲟⲗⲟⲥ ·
helias_encomium:134
ⲙⲟⲟϣⲉϩⲙⲡⲕⲁⲕⲉ ⲛⲧⲉⲩϣⲏ ⲙⲛⲡⲉϩⲟⲟⲩ · ⲛⲧⲛⲛⲁⲩ ⲉⲣⲟϥ ⲁⲛ ·ⲉϥϣⲓⲛⲉ ⲛⲥⲁⲟⲩⲱⲙⲕ ⲛⲛⲉⲛⲯⲩⲭⲏ :ⲻϯⲥⲟⲡⲥ ⲙⲙⲱⲧⲛ ⲧⲏⲣⲧⲛ ⲉⲧⲣⲉⲡⲟⲩⲁ ⲡⲟⲩⲁ ⲙⲉϣⲧⲡⲉϥⲃⲓⲟⲥ · ϫⲉⲛⲧⲁϥⲣⲟⲩ ·
helias_encomium:135
ⲏ ⲉϥϣⲁⲁⲧⲛⲟⲩ :ⲻⲉϣⲱⲡⲉ ⲙⲉⲛⲁϥⲣⲛⲟⲃⲉ ·
helias_encomium:136
ⲙⲁⲣⲉϥⲙⲉⲧⲁⲛⲟⲓϩⲁⲡⲉⲛⲧⲁϥⲁⲁϥⲁⲩⲱ ϯⲡⲓⲥⲧⲉⲩⲉⲉⲡⲛⲟⲩⲧⲉ · ⲙⲛⲛⲉϣⲗⲏⲗ ⲙⲡⲙⲁⲣⲧⲩⲣⲟⲥ ⲉⲧⲟⲩⲁⲁⲃ ·
helias_encomium:137
ⲡϩⲁⲅⲓⲟⲥϩⲏⲗⲓⲁⲥ ϫⲉϥⲛⲁⲕⲱ ⲛⲁϥ ⲉⲃⲟⲗ ·
helias_encomium:138
ⲙⲡⲉⲣⲧⲣⲉⲛϭⲱ ⲉⲛϯⲛⲟⲩϩⲟⲟⲩ ⲛⲥⲁⲟⲩϩⲟⲟⲩ ·
helias_encomium:139
ⲛⲧⲉⲡⲃⲁⲓϣⲓⲛⲉ ⲙⲡⲙⲟⲩ ⲧⲁϩⲟⲛ ⲛϥϩⲉⲉⲣⲟⲛ ⲛⲧⲛⲥⲃⲧⲱⲧ ⲁⲛⲛⲧⲉⲛⲣϩⲧⲏⲛⲛⲧⲉⲛⲥϩⲟⲩⲉⲣⲡⲉϩⲟⲟⲩ ·
helias_encomium:140
ⲛⲧⲁⲩϫⲡⲟⲛ ⲛϩⲏⲧϥⲉⲡϫⲓⲛϫⲏ . ϫⲉⲁⲡⲛⲁⲩ ⲟⲩⲉⲓⲛⲉ ⲛⲧⲟⲟⲧⲛⲁⲩⲥⲉⲕⲧⲁⲃⲱⲉ ⲡⲉⲕⲣⲟ ·ⲡⲉⲧⲟⲩⲛⲁϩⲉ ⲉⲣⲟϥⲛϩⲟⲩⲛ ⲉⲣⲟⲥ ·ⲕⲁⲛⲛⲁⲛⲟⲩϥⲕⲁⲛ ⲉϥϩⲟⲟⲩⲡⲉⲛⲧⲁϥⲟⲩⲉⲓⲛⲉ ·
helias_encomium:141
ⲁϥⲟⲩⲉⲓⲛⲉ ⲛⲁⲛⲟⲩⲥ ⲛⲁⲛ ⲛⲧⲉⲛⲙⲉⲧⲁⲛⲟⲉⲓ ⲙⲡⲛⲁⲧⲟⲩϣⲧⲟⲙ ⲉⲣⲱⲛ ⲙⲡⲣⲟ ⲛⲧⲙⲛⲧⲁⲛⲟⲓⲁ .
helias_encomium:142
ⲡⲉⲛⲛⲟⲩⲧⲉ ⲡⲉⲭⲣⲓⲥⲧⲟⲥ ⲓⲏⲥⲟⲩⲥ ⲡϫⲟⲉⲓⲥ ⲛⲧⲡⲉ ⲙⲛⲡⲕⲁϩ ⲉϥⲉⲕⲱ ⲛⲧⲉϥⲉⲓⲣⲏⲛⲏ ϩⲓϫⲱⲛ ⲛϥⲇⲓⲱⲕⲉⲓ ⲙⲡⲇⲓⲁⲃⲟⲗⲟⲥ ⲙⲛⲛⲉϥⲇⲁⲓⲙⲟⲛⲓⲟⲛ ⲥⲁⲃⲟⲗ ⲙⲙⲟⲛ .
helias_encomium:143
ⲡⲁⲓ ⲡⲉⲟⲟⲩ ⲛⲁϥⲙⲛⲡⲧⲁⲉⲓⲟ ⲙⲛⲧⲉⲡⲣⲟⲥⲕⲩⲛⲏⲥⲓⲥ ⲙⲛⲡⲉϥⲉⲓⲱⲧ ⲛⲁⲅⲁⲑⲟⲥⲙⲛⲡⲉⲡⲛⲁ ⲉⲧⲟⲩⲁⲁⲃ ⲧⲉⲧⲣⲓⲁⲥ ⲉⲧϫⲏⲕ ⲉⲃⲟⲗ ⲉⲥϩⲛⲟⲩⲙⲛⲧⲟⲩⲁ
helias_encomium:144
ⲁⲩⲱ ⲧⲙⲛⲧⲟⲩⲁ ⲉⲥϩⲛⲟⲩⲧⲣⲓⲁⲥ ⲛϩⲟⲙⲟⲟⲩⲥⲓⲟⲛ ϣⲁⲉⲛⲉϩ ⲛⲉⲛⲉϩ ϩⲁⲙⲏⲛ

Coptic SCRIPTORIUM, corpus helias (github.com/CopticScriptorium/corpora). Licence as stated per document in the project's own meta.json and checked there at parse time. English, where present, is Coptic SCRIPTORIUM's aligned translation. Licence: CC-BY 4.0. Source.