Dormition John

Coptic literature (Coptic SCRIPTORIUM) · 121 sections

dormition.john.mercad:101
ⲡⲉⲛⲧⲁϥⲕⲁⲛⲁⲙⲉⲉⲩⲉ ⲉⲩϣⲟⲟⲡ ⲉϩⲟⲩⲛ ⲉⲣⲟϥ ⲛⲁⲧⲧⲱⲗⲙ ·
dormition.john.mercad:102
ⲡⲉⲛⲧⲁϥⲭⲁⲣⲓⲍⲉ ⲛⲁⲓ ⲛⲧⲉϥⲡⲓⲥⲧⲓⲥ ⲉⲛⲥⲡⲏϣ ⲁⲛ ·
dormition.john.mercad:103
ⲡⲉⲛⲧⲁϥⲧⲣⲉⲛⲁⲙⲉⲉⲩⲉ · ⲙⲛⲛⲁϣⲟϫⲛⲉ ϣⲱⲡⲉ ⲉⲩⲣϩⲟⲩⲟ ⲉϩⲟⲩⲛ ⲉⲣⲟϥ ·
dormition.john.mercad:104
ⲡⲉⲧϯ ⲙⲡⲟⲩⲁ ⲡⲟⲩⲁ · ⲕⲁⲧⲁⲛⲉϥϩⲃⲏⲩⲉ ·
dormition.john.mercad:105
ⲡⲉⲛⲧⲁϥⲕⲱ ϩⲣⲁⲓ ϩⲛⲧⲁⲯⲩⲭⲏ · ⲉⲧⲙⲕⲁⲗⲁⲁⲩ ⲛⲁⲓ · ⲛⲥⲁⲃⲗⲗⲁⲕ ⲙⲁⲩⲁⲁⲕ ⲡϫⲟⲉⲓⲥ ·
dormition.john.mercad:106
ⲟⲩ ⲅⲁⲣ ⲡⲉⲧⲓⲛⲁϩⲉ ⲉⲣⲟϥ ⲉϥⲥⲱⲧⲡ · ⲉϥⲧⲃⲃⲏⲩ ⲉϩⲟⲩⲟ ⲉⲣⲟⲕ ·
dormition.john.mercad:107
ⲧⲉⲛⲟⲩ ⲇⲉ ⲁⲓϩⲉ ⲉⲣⲟⲕ · ⲁⲩⲱ ⲁⲓϫⲱⲕ ⲉⲃⲟⲗ ⲛⲧⲟⲓⲕⲟⲛⲟⲙⲓⲁ ⲛⲧⲁⲕⲧⲁⲛϩⲟⲩⲧ ⲉⲣⲟⲥ ·
dormition.john.mercad:108
ⲁⲁⲧ ⲟⲩⲛ ⲛⲙⲡϣⲁ ⲉⲧⲣⲉⲕϯⲙⲧⲟⲛ ⲛⲁⲓ ϩⲛⲧⲉⲕⲁⲛⲁⲡⲁⲩⲥⲓⲥ ⲉⲧⲟⲩⲁⲁⲃ · ⲛⲅⲭⲁⲣⲓⲍⲉ ⲛⲁⲓ ⲛⲧⲙⲛⲧⲧⲉⲗⲓⲟⲥ ⲉⲧⲛϩⲏⲧⲕ · ⲉⲧⲉⲧⲙⲛⲧⲁⲧⲛⲟⲃⲉ ⲧⲉ · ⲙⲛⲡⲟⲩϫⲁⲓ ⲛⲁⲧϣⲁϫⲉ ⲉⲣⲟϥ · ⲁⲩⲱ ⲛⲁⲧϩⲉⲧϩⲱⲧϥ · ⲁⲩⲱ ⲛⲁⲧⲧⲁϩⲟϥ · ⲉⲓⲛⲏⲩ ϣⲁⲣⲟⲕ ⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
dormition.john.mercad:109
ⲙⲁⲣⲉϥϩⲣⲟⲕ ⲛϭⲓⲡⲕⲱϩⲧ · ⲛⲧⲉⲡⲕⲁⲕⲉ ⲁⲛⲁⲭⲱⲣⲉⲓ ⲛⲁϥ · ⲛⲧⲉⲡⲉⲭⲁⲟⲥ ⲣϭⲱⲃ · ⲛⲧⲉⲧⲉϩⲣⲱ ⲛⲥⲁⲧⲉ ϣⲱⲡⲉ ⲛⲁⲧϭⲟⲙ · ⲛⲧⲉⲧⲅⲉϩⲉⲛⲛⲁ ⲱϣⲙ · ⲁⲩⲱ ⲛⲥⲉⲟⲩⲁϩⲟⲩ ⲛⲥⲱⲓ ⲛϭⲓⲛⲁⲅⲅⲉⲗⲟⲥ ⲉⲧⲟⲩⲁⲁⲃ · ⲛⲧⲉⲛⲇⲁⲓⲙⲟⲛⲓⲟⲛ ⲣϩⲟⲧⲉ · ⲛⲥⲉⲟⲩⲱϣϥ ⲛϭⲓⲛⲁⲣⲭⲱⲛ · ⲛⲧⲉⲛⲇⲩⲛⲁⲙⲓⲥ ⲙⲡⲕⲁⲕⲉ ⲁⲛⲁⲭⲱⲣⲉⲓ ⲛⲁⲩ ⲛⲥⲉϩⲉ ⲉⲡⲉⲥⲏⲧ ⲛⲧⲉⲛⲧⲟⲡⲟⲥ ⲉⲧϩⲓⲟⲩⲛⲁⲙ ⲁϩⲉⲣⲁⲧⲟⲩ ·
dormition.john.mercad:110
ⲙⲁⲣⲉⲡⲇⲓⲁⲃⲟⲗⲟⲥ ϫⲓϣⲓⲡⲉ · ⲛⲥⲉⲥⲱⲃⲉ ⲛⲥⲁⲡⲥⲁⲧⲁⲛⲁⲥ ·
dormition.john.mercad:111
ⲙⲁⲣⲉⲡⲉϥϭⲱⲛⲧ ⲱϣⲙ · ⲛⲧⲉⲧⲉϥⲙⲁⲛⲓⲁ ϩⲣⲟⲕ ⲙⲙⲟⲥ ·
dormition.john.mercad:112
ⲙⲁⲣⲉⲡⲉϥⲧⲁⲓⲟ ϫⲓϣⲓⲡⲉ · ⲛⲧⲉⲧⲉϥⲟⲣⲅⲏ ⲟⲩⲱϣϥ · ⲙⲁⲣⲟⲩⲥⲉⲕⲛⲉϥϣⲏⲣⲉ ⲉⲡⲉⲥⲏⲧ ⲛⲥⲉⲡⲉⲣⲕⲧⲉⲩⲛⲟⲩⲛⲉ ⲧⲏⲣⲥ ·
dormition.john.mercad:113
ⲙⲁ ⲛⲁⲓ ⲛⲧⲉⲝⲟⲩⲥⲓⲁ ⲉⲧⲣⲁⲙⲟⲟϣⲉ · ⲁⲩⲱ ⲛⲧⲁϫⲉⲕⲧⲁϩⲓⲏ ⲉⲃⲟⲗ ⲁϫⲛϩⲓⲥⲉ ϩⲓϣⲧⲟⲣⲧⲣ · ⲉⲓⲛⲏⲩ ϣⲁⲣⲟⲕ ⲡⲁϫⲟⲉⲓⲥ ϫⲉⲕⲁⲥ ⲉⲓⲉϫⲓ ⲛⲛⲁⲅⲁⲑⲟⲛ ⲛⲛⲉⲛⲧⲁⲩⲱⲛϩ · ϩⲛⲟⲩⲟⲡ ·
dormition.john.mercad:114
ⲛⲁⲓ ⲇⲉ ⲛⲧⲉⲣⲉϥϫⲟⲟⲩ · ⲛϭⲓⲓⲱϩⲁⲛⲛⲏⲥ ⲡⲑⲉⲟⲗⲟⲅⲟⲥ · ⲉϥϭⲱϣⲧ ⲉⲙⲙⲁ ⲛϣⲁ ⲉϥϯⲉⲟⲟⲩ ⲙⲡⲛⲟⲩⲧⲉ ·
dormition.john.mercad:115
ⲉⲁϥⲡⲉⲣϣⲛⲉϥϭⲓϫ ⲟⲛ ⲉⲃⲟⲗ ⲁϥϣⲗⲏⲗ · ⲉϥϫⲱ ⲙⲙⲟⲥ · ϫⲉⲛⲧⲟⲕ ⲕϣⲟⲟⲡ ⲛⲙⲙⲁⲓ · ⲡⲁϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
dormition.john.mercad:116
ⲁⲩⲱ ⲛⲧⲉⲩⲛⲟⲩ ⲁϥϥⲟϭϥ ⲉⲡⲉⲥⲏⲧ ⲉⲡϣⲓⲕ ⲛⲧⲁⲩϣⲁⲕⲧϥ · ⲡⲙⲁ ⲉⲧⲉⲛⲉϥϩⲟⲓⲧⲉ ⲡⲟⲣϣ ⲛϩⲏⲧϥ ·
dormition.john.mercad:117
ⲁⲩⲱ ⲛⲧⲉⲣⲉϥϫⲟⲟⲥ ⲛⲁⲩ ϫⲉⲧⲉⲓⲣⲏⲛⲏ ⲁⲩⲱ ⲧⲉⲭⲁⲣⲓⲥ · ⲁϥⲕⲁⲛⲉⲥⲛⲏⲩ ⲉⲃⲟⲗ · ⲁⲩⲃⲱⲕ ⲁⲩⲉⲓ ⲉⲃⲟⲗ ⲙⲡⲉϥⲣⲁⲥⲧⲉ ·
dormition.john.mercad:118
ⲛⲧⲟϥ ⲙⲉⲛ ⲙⲡⲟⲩϩⲉ ⲉⲣⲟϥ · ⲁⲗⲗⲁ ⲁⲩϩⲉ ⲉⲡⲉϥⲥⲁⲛⲇⲁⲗⲓⲟⲛ · ⲙⲛⲟⲩⲕⲁϩ ⲛⲃⲣⲣⲉ ϩⲣⲁⲓ ϩⲙⲡⲙⲁ ⲛⲧⲁϥⲃⲱⲕ ⲉⲡⲉⲥⲏⲧ ⲉⲣⲟϥ ·
dormition.john.mercad:119
ⲁⲩⲣⲡⲙⲉⲉⲩⲉ ⲗⲟⲓⲡⲟⲛ ⲙⲡϣⲁϫⲉ · ⲛⲧⲁⲡϫⲟⲉⲓⲥ ϫⲟⲟϥ ⲙⲡⲉⲧⲣⲟⲥ ϫⲉⲉⲓϣⲁⲛⲟⲩⲱϣ ⲉⲧⲣⲉϥϭⲱ ϣⲁⲛⲧⲓⲉⲓ · ⲛⲧⲕ ⲛⲓⲙ ⲛⲧⲟⲕ ⲟⲩⲁϩⲕ ⲛⲥⲱⲓ ·
dormition.john.mercad:120
ⲁⲩⲱ ⲁⲩϯⲉⲟⲟⲩ ⲙⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ · ⲉϫⲛⲧⲉϣⲡⲏⲣⲉ ⲛⲧⲁⲥϣⲱⲡⲉ ⲙⲡⲙⲁⲕⲁⲣⲓⲟⲥ ⲛⲁⲡⲟⲥⲧⲟⲗⲟⲥ · ⲁⲩⲱ ⲛⲉⲩⲁⲅⲅⲉⲗⲓⲥⲧⲏⲥ · ⲁⲩⲱ ⲡⲑⲉⲟⲗⲟⲅⲟⲥ · ⲁⲩⲱ ⲡⲡⲁⲣⲑⲉⲛⲟⲥ ⲉⲧⲟⲩⲁⲁⲃ · ⲡϩⲁⲅⲓⲟⲥ ⲓⲱϩⲁⲛⲛⲏⲥ · ⲡⲙⲉⲣⲓⲧ ⲙⲡⲉⲭⲣⲓⲥⲧⲟⲥ ⲓⲏⲥⲟⲩⲥ ⲡⲉⲛϫⲟⲉⲓⲥ · ⲁⲩⲱ ⲡⲉⲛⲛⲟⲩⲧⲉ · ⲁⲩⲱ ⲡⲉⲛⲥⲱⲧⲏⲣ ·
dormition.john.mercad:121
ⲡⲁⲓ ⲉⲣⲉⲉⲟⲟⲩ ⲛⲓⲙ ⲡⲣⲉⲡⲉⲓ ⲙⲡⲉⲓⲱⲧ ⲛⲙⲙⲁϥ · ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ⲛⲣⲉϥⲧⲁⲛϩⲟ ⲙⲡⲧⲏⲣϥ · ⲁⲩⲱ ⲛϩⲟⲙⲟⲟⲩⲥⲓⲟⲛ · ⲧⲉⲛⲟⲩ · ⲁⲩⲱ ⲛⲟⲩⲟⲉⲓϣ ⲛⲓⲙ · ϣⲁⲛⲁⲓⲱⲛ ⲧⲏⲣⲟⲩ ⲛⲛⲁⲓⲱⲛ ϩⲁⲙⲏⲛ :—

Coptic SCRIPTORIUM, corpus dormition.john (github.com/CopticScriptorium/corpora). Licence as stated per document in the project's own meta.json and checked there at parse time. English, where present, is Coptic SCRIPTORIUM's aligned translation. Licence: CC-BY 4.0. Source.