Dormition John

Coptic literature (Coptic SCRIPTORIUM) · 121 sections

dormition.john.mercad:1
ⲧⲁⲛⲁⲡⲁⲩⲥⲓⲥ ⲙⲡϩⲁⲅⲓⲟⲥ · ⲓⲱϩⲁⲛⲛⲏⲥ · ⲡⲉⲩⲁⲅⲅⲉⲗⲓⲥⲧⲏⲥ · ⲁⲩⲱ ⲡⲁⲡⲟⲥⲧⲟⲗⲟⲥ ⲙⲡⲉⲭⲣⲓⲥⲧⲟⲥ · ϩⲛⲟⲩⲉⲓⲣⲏⲛⲏ · ⲛⲧⲉⲡⲛⲟⲩⲧⲉ ϩⲁⲙⲏⲛ . ═════ : ═════ : ═════ : ═════
dormition.john.mercad:2
ⲛⲉⲣⲉⲡⲙⲁⲕⲁⲣⲓⲟⲥ ⲓⲱϩⲁⲛⲛⲏⲥ ϩⲛⲉⲫⲉⲥⲟⲥ ⲙⲛⲛⲉⲥⲛⲏⲩ · ⲉϥⲧⲉⲗⲏⲗ ϩⲙⲡϫⲟⲉⲓⲥ ·
dormition.john.mercad:3
ⲙⲡⲉϩⲟⲟⲩ ⲇⲉ ⲛⲧⲕⲩⲣⲓⲁⲕⲏ · ⲛⲉⲣⲉⲛⲉⲥⲛⲏⲩ ⲧⲏⲣⲟⲩ ⲥⲟⲟⲩϩ ⲉⲛⲉⲩⲉⲣⲏⲩ ·
dormition.john.mercad:4
ⲁⲓⲱϩⲁⲛⲛⲏⲥ ⲁⲣⲭⲉⲓ ⲛϣⲁϫⲉ ⲛⲙⲙⲁⲩ ⲉϥϫⲱ ⲙⲙⲟⲥ · ϫⲉⲛⲁⲥⲛⲏⲩ · ⲁⲩⲱ ⲛⲁϣⲃⲣⲕⲗⲏⲣⲟⲛⲟⲙⲟⲥ · ⲁⲩⲱ ⲛⲥⲩⲙⲙⲉⲧⲟⲭⲟⲥ ⲙⲡⲉⲭⲣⲓⲥⲧⲟⲥ ⲓⲏⲥⲟⲩⲥ ⲡⲉⲛϫⲟⲉⲓⲥ · ⲉⲓⲙⲉ ϭⲉ ⲛⲏⲧⲛ ϫⲉⲁⲡϫⲟⲉⲓⲥ ϯ ⲛⲏⲧⲛ ⲛⲟⲩϭⲟⲙ ⲉⲃⲟⲗ ϩⲓⲧⲟⲟⲧϥ
dormition.john.mercad:5
ⲟⲩⲏⲣ ⲛϭⲟⲙ ϩⲓϣⲡⲏⲣⲉ · ϩⲓⲭⲁⲣⲓⲥⲙⲁ ·
dormition.john.mercad:6
ⲁϥⲁⲁⲩ ⲛⲏⲧⲛ · ⲁⲩⲱ ⲧⲉⲧⲛⲥⲟⲟⲩⲛ ϫⲉⲁϣ ⲛⲉ ⲛⲉⲥⲃⲟⲟⲩⲉ ⲙⲛⲛⲉⲣϩⲙⲙⲉ · ⲁⲩⲱ ⲛⲙⲧⲟⲛ ⲙⲛⲧⲇⲓⲁⲕⲟⲛⲓⲁ · ⲙⲛⲛⲉϩⲙⲟⲧ ⲙⲛⲛⲇⲱⲣⲉⲁ · ⲙⲛⲛⲕⲟⲟⲩⲉ ⲧⲏⲣⲟⲩ ·
dormition.john.mercad:7
ⲛⲧⲁⲧⲉⲧⲛⲛⲁⲩ ⲉⲣⲟⲟⲩ ϩⲛⲛⲉⲧⲛⲃⲁⲗ ·
dormition.john.mercad:8
ⲉⲩϯ ⲙⲙⲟⲟⲩ ⲛⲏⲧⲛ ⲉⲃⲟⲗ ϩⲓⲧⲟⲟⲧϥ ⲙⲡⲉⲛⲥⲁϩ ·
dormition.john.mercad:9
ⲛⲉϥⲟⲩⲱⲛϩ ⲉⲣⲱⲧⲛ ⲁⲛ ϩⲛⲛⲃⲁⲗ ⲙⲡⲥⲱⲙⲁ · ⲟⲩⲇⲉ ⲛⲉⲧⲉⲧⲛⲥⲱⲧⲙ ⲉⲣⲟϥ ⲁⲛ ϩⲛⲙⲙⲁⲁϫⲉ ⲙⲡⲥⲱⲙⲁ · ⲁⲗⲗⲁ ⲉϥⲟⲩⲱⲛϩ ⲙⲙⲟϥ ⲉⲣⲱⲧⲛ ϩⲙⲡⲥⲟⲟⲩⲧⲛ ⲙⲡⲉⲧⲛϩⲏⲧ · ϩⲛⲟⲩϩⲟⲣⲟⲙⲁ ϩⲛϩⲃⲏⲩⲉ ⲉⲩⲟⲩⲁⲁⲃ ·
dormition.john.mercad:10
ⲧⲁϫⲣⲉⲧⲏⲩⲧⲛ ϭⲉ ϩⲣⲁⲓ ⲛϩⲏⲧϥ · ⲉⲧⲉⲧⲛⲉⲓⲣⲉ ⲙⲡⲉϥⲙⲉⲉⲩⲉ ⲛⲟⲩⲟⲉⲓϣ ⲛⲓⲙ · ⲉⲧⲉⲧⲛⲉⲓⲣⲉ ⲟⲛ ⲙⲡⲙⲉⲉⲩⲉ ⲙⲡⲙⲩⲥⲧⲏⲣⲓⲟⲛ · ⲙⲛⲧⲕⲟⲓⲛⲱⲛⲓⲁ ⲛⲧⲁⲥϣⲱⲡⲉ ⲉϩⲟⲩⲛ ⲉⲣⲱⲧⲛ ·
dormition.john.mercad:11
ⲁⲡⲉⲛϫⲟⲉⲓⲥ ϫⲟⲕⲟⲩ ⲉⲃⲟⲗ ·
dormition.john.mercad:12
ⲧⲉⲛⲟⲩ ϭⲉ ⲱ ⲛⲉⲥⲛⲏⲩ · ϥⲥⲟⲡⲥ ⲙⲙⲱⲧⲛ ⲉⲃⲟⲗ ϩⲓⲧⲟⲟⲧϥ · ⲁⲩⲱ ϥⲡⲁⲣⲁⲕⲁⲗⲉⲓ ⲙⲙⲱⲧⲛ · ⲉϥⲟⲩⲱϣ · ⲉⲧⲣⲉⲧⲉⲧⲛϭⲱ ⲛⲟⲩⲉϣ ⲛⲗⲩⲡⲉⲓ ⲙⲙⲟϥ · ⲏ ⲉⲥⲟϣϥ · ⲏ ⲉⲉⲡⲓⲃⲟⲩⲗⲉⲩⲉ ⲉⲣⲟϥ ·
dormition.john.mercad:13
ϥⲥⲟⲟⲩⲛ ⲅⲁⲣ ⲙⲡⲥⲱϣ ⲉⲧϣⲟⲟⲡ ⲉⲃⲟⲗ ϩⲓⲧⲛⲧⲏⲩⲧⲛ ·
dormition.john.mercad:14
ϥⲉⲓⲙⲉ ⲇⲉ ⲟⲛ ⲉⲡⲧϭⲁⲉⲓⲟ ⲁⲩⲱ ϥⲥⲟⲟⲩⲛ ⲉⲧⲉⲡⲓⲃⲟⲩⲗⲏ ⲙⲛⲧⲕⲟⲗⲁⲥⲓⲥ ⲉⲧⲉⲧⲛⲕⲟⲗⲁⲍⲉ ⲙⲙⲟϥ ⲛϩⲏⲧⲥ ·
dormition.john.mercad:15
ϩⲟⲧⲁⲛ ⲉⲧⲉⲧⲛϣⲁⲛⲥⲱⲧⲙ ⲛⲥⲁⲛⲉϥⲉⲛⲧⲟⲗⲏ · ⲉⲧⲟⲩⲁⲁⲃ ϥⲛⲁⲛⲁ ⲛⲏⲧⲛ ϩⲱⲧⲧⲏⲩⲧⲛ ·
dormition.john.mercad:16
ⲙⲡⲣⲧⲣⲉⲡⲁⲅⲁⲑⲟⲥ ⲛⲛⲟⲩⲧⲉ ⲗⲩⲡⲉⲓ ⲉⲧⲃⲉⲧⲏⲩⲧⲛ · ⲡⲛⲁⲏⲧ ⲛϣⲁⲛϩⲧⲏϥ · ⲡⲁⲧⲧⲱⲗⲙ · ⲡⲁⲧϫⲃⲓⲛ · ⲡⲁⲧⲧⲁϩⲟϥ · ⲡⲟⲩⲁ ⲙⲁⲩⲁⲁϥ · ⲡⲁⲧⲡⲱⲱⲛⲉ · ⲡⲁⲧⲕⲣⲟϥ · ⲡⲁⲧϭⲱⲛⲧ · ⲡⲣⲁⲛ ⲉⲧϩⲓϫⲛⲣⲁⲛ ⲛⲓⲙ · ⲉϣⲁⲩⲛⲟⲉⲓ ⲙⲙⲟϥ ·
dormition.john.mercad:17
ⲙⲁⲣⲉϥⲉⲩⲫⲣⲁⲛⲉ ⲛⲙⲙⲏⲧⲛ ⲉⲧⲉⲧⲛⲡⲟⲗⲓⲧⲉⲩⲉ ⲛⲁϥ ⲕⲁⲗⲱⲥ ·
dormition.john.mercad:18
ⲙⲁⲣⲉϥⲣⲁϣⲉ ⲛⲙⲙⲏⲧⲛ · ⲉⲧⲉⲧⲛⲟⲛϩ · ϩⲛⲟⲩⲟⲩⲣⲟⲧ · ⲙⲛⲟⲩⲟⲡ ·
dormition.john.mercad:19
ⲙⲁⲣⲉϥⲙⲧⲟⲛ ⲙⲙⲟϥ ⲛϩⲏⲧⲧⲏⲩⲧⲛ ⲉⲧⲉⲧⲛⲁⲛⲁⲥⲧⲣⲉⲫⲉ ϩⲛⲟⲩⲙⲛⲧⲥⲉⲙⲛⲟⲥ ·
dormition.john.mercad:20
ⲙⲁⲣⲉϥⲣⲁⲧⲣⲟⲟⲩϣ · ⲉⲧⲉⲧⲛⲟⲛϩ · ϩⲛⲟⲩⲉⲅⲕⲣⲁⲧⲓⲁ ·
dormition.john.mercad:21
ⲙⲁⲣⲉϥⲟⲩⲛⲟϥ ⲉⲧⲉⲧⲛⲕⲟⲓⲛⲱⲛⲉⲓ · ⲉⲛⲁⲅⲁⲑⲟⲛ ⲙⲛⲛⲉⲣⲏⲧ ·
dormition.john.mercad:22
ⲙⲁⲣⲉϥⲧⲣⲩⲫⲁ ⲉⲧⲉⲧⲛⲙⲉ ⲙⲙⲟϥ ·
dormition.john.mercad:23
ⲙⲁⲣⲉϥⲥⲱⲃⲉ ⲉⲧⲉⲧⲛⲟ ⲛϩⲁⲕ ·
dormition.john.mercad:24
ⲛⲁⲓ ϭⲉ ⲛⲁⲥⲛⲏⲩ ⲉⲓϫⲱ ⲙⲙⲟⲟⲩ ⲛⲏⲧⲛ · ⲉⲃⲟⲗ ϫⲉ · ⲉⲓϭⲉⲡⲏ ⲉϯ ⲙⲡⲁⲟⲩⲟⲓ ⲉϩⲟⲩⲛ ⲉⲡϩⲱⲃ ⲉⲧⲉϥⲕⲏ ⲛⲁⲓ ⲉϩⲣⲁⲓ ⲡⲁⲓ ⲉⲧⲉⲣⲉⲡⲉϥϫⲱⲕ ⲉⲃⲟⲗ ⲛⲁϣⲱⲡⲉ ⲛⲁⲓ ⲉⲃⲟⲗ ϩⲓⲧⲙⲡϫⲟⲉⲓⲥ ·
dormition.john.mercad:25
ⲁϣ ⲅⲁⲣ ⲡⲉ ⲡⲕⲉϣⲁϫⲉ · ⲉⲧⲓⲛⲁϫⲟⲟϥ ⲉⲣⲱⲧⲛ ⲉⲟⲩⲛⲧⲏⲧⲛ ⲙⲙⲁⲩ ⲙⲡⲉⲛⲉⲭⲉⲣⲟⲛ ⲙⲡⲉⲧⲛⲛⲟⲩⲧⲉ ·
dormition.john.mercad:26
ⲟⲩⲛⲧⲏⲧⲛ ⲙⲙⲁⲩ ⲙⲡⲁⲣⲏⲃ ⲛⲧⲉϥⲙⲛⲧⲣⲣⲟ ·
dormition.john.mercad:27
ⲟⲩⲛⲧⲏⲧⲛ ⲙⲙⲁⲩ ⲛⲧⲉϥⲡⲁⲣⲟⲩⲥⲓⲁ ⲛⲁⲧⲡⲁⲣⲁⲓⲧⲉⲓ ⲙⲙⲟⲥ ·
dormition.john.mercad:28
ⲉϣⲱⲡⲉ ⲉⲧⲉⲧⲛϣⲁⲛⲧⲙⲣⲛⲟⲃⲉ · ϫⲓⲛⲧⲉⲛⲟⲩ · ⲉⲓⲉ ⲛⲉⲛⲧⲁⲧⲉⲧⲛⲁⲁⲩ ϩⲛⲟⲩⲙⲛⲧⲁⲧⲥⲟⲟⲩⲛ · ϥⲛⲁⲕⲁⲁⲩ ⲛⲏⲧⲛ ⲉⲃⲟⲗ ·
dormition.john.mercad:29
ⲉϣⲱⲡⲉ ⲇⲉ ⲟⲛ ⲙⲛⲛⲥⲁⲧⲣⲉⲧⲉⲧⲛⲥⲟⲩⲱⲛϥ ⲛⲧⲉⲧⲛϭⲱ ⲉⲧⲉⲧⲛⲙⲏⲛ ⲉⲃⲟⲗ ϩⲛⲛⲉⲓϩⲃⲏⲩⲉ ⲛⲟⲩⲱⲧ · ⲥⲉⲛⲁⲉⲡ ⲛϣⲟⲣⲡ ⲉⲣⲱⲧⲛ · ⲛⲥⲉⲡⲁⲣⲁⲇⲓⲇⲟⲩ ⲙⲙⲱⲧⲛ ⲉⲡⲕⲱϩⲧ ·
dormition.john.mercad:30
ⲁⲩⲱ ⲛⲧⲉⲣⲉϥϫⲉⲛⲁⲓ · ⲁϥϣⲗⲏⲗ ⲉϥϫⲱ ⲙⲙⲟⲥ · ϫⲉ · ⲓⲏⲥⲟⲩⲥ ⲡⲉⲛⲧⲁϥϣⲱⲛⲧ ⲙⲡⲉⲕⲗⲟⲙ ⲡⲁⲓ ⲉⲧϩⲙⲡⲉⲕϣⲱⲛⲧ ⲡⲱⲕ ·
dormition.john.mercad:31
ⲱ ⲡⲉⲛⲧⲁϥⲥⲱⲛⲧ ⲙⲡⲉⲕⲗⲟⲙ ⲛⲛⲉⲧⲟⲩⲁⲁⲃ ⲧⲏⲣⲟⲩ · ⲙⲛⲛⲉⲓⲟⲩⲟⲧⲟⲩⲉⲧ ⲉⲧⲟϣ · ⲉⲁϥϣⲟⲃⲟⲩ ϩⲛⲛⲉⲣⲱⲙⲉ · ⲡⲉⲕϩⲣⲏⲣⲉ · ⲉⲧⲉⲙⲉϥϩⲱϭⲃ ϣⲁⲃⲟⲗ ·
dormition.john.mercad:32
ⲱ ⲡⲉⲛⲧⲁϥϫⲟ ϩⲣⲁⲓ ⲛϩⲏⲧⲛ ⲛⲛⲉϥϣⲁϫⲉ ·
dormition.john.mercad:33
ⲱ ⲡϥⲁⲓⲣⲟⲟⲩϣ ⲙⲁⲩⲁⲁϥ ϩⲁⲛⲉϥϩⲙϩⲁⲗ ·
dormition.john.mercad:34
ⲱ ⲡⲥⲁⲉⲓⲛ ⲛⲡⲉⲛⲥⲱⲙⲁ · ⲉϥⲧⲁⲗϭⲟ ⲙⲙⲟⲟⲩ ⲧⲏⲣⲟⲩ ⲛϫⲓⲛϫⲏ ·
dormition.john.mercad:35
ⲱ ⲡⲉⲛⲣⲉϥⲣⲡⲉⲧⲛⲁⲛⲟⲩϥ ⲛⲁⲛ ⲙⲁⲩⲁⲁϥ ·
dormition.john.mercad:36
ⲱ ⲡⲉⲧⲉⲙⲛⲗⲁⲁⲩ ⲙⲙⲛⲧϫⲁⲥⲓϩⲏⲧ ϩⲏⲡ ⲛϩⲏⲧϥ ·
dormition.john.mercad:37
ⲱ ⲡⲛⲁⲏⲧ ⲙⲁⲩⲁⲁϥ · ⲁⲩⲱ ⲡⲙⲁⲓⲣⲱⲙⲉ ⲛⲓⲙ ·
dormition.john.mercad:38
ⲱ ⲡⲥⲱⲧⲏⲣ ⲙⲁⲩⲁⲁϥ · ⲁⲩⲱ ⲡⲇⲓⲕⲁⲓⲟⲥ · ⲡⲉⲧϣⲟⲟⲡ ϩⲙⲙⲁ ⲛⲓⲙ · ⲡⲉⲧϣⲱⲱⲡ ϫⲓⲛⲉⲛⲉϩ · ⲡⲛⲟⲩⲧⲉ ⲡⲉⲭⲣⲓⲥⲧⲟⲥ ⲓⲏⲥⲟⲩⲥ ·
dormition.john.mercad:39
ⲛⲧⲟⲕ ⲡⲉⲧⲥⲕⲩⲡⲁⲍⲉ ⲛⲟⲩⲟⲛ ⲛⲓⲙ ⲉⲧϩⲉⲗⲡⲓⲍⲉ ⲉⲣⲟⲕ · ϩⲛⲛⲉⲕⲇⲱⲣⲉⲁ ⲙⲛⲛⲉⲕⲙⲛⲧⲛⲁ · ⲉⲕⲥⲟⲟⲩⲛ ⲛⲧⲉⲭⲛⲏ ⲛⲓⲙ ⲙⲛⲉⲡⲏⲣⲉⲓⲁ ⲛⲓⲙ ⲛⲧⲉⲡϫⲁϫⲉ ⲉⲧϯⲟⲩⲃⲏⲛ ⲛⲟⲩⲟⲉⲓϣ ⲛⲓⲙ ·
dormition.john.mercad:40
ⲁⲩⲱ ⲙⲛⲛⲥⲁⲧⲣⲉϥϫⲉⲛⲁⲓ ⲛϭⲓⲡⲡⲉⲧⲟⲩⲁⲁⲃ ⲓⲱϩⲁⲛⲛⲏⲥ ⲡⲉⲩⲁⲅⲅⲉⲗⲓⲥⲧⲏⲥ · ⲁϥϫⲓ ⲛⲟⲩⲟⲉⲓⲕ · ⲁϥϣⲡϩⲙⲟⲧ ⲛⲧⲉⲓϩⲉ ⲉϥϫⲱ ⲙⲙⲟⲥ · ϫⲉⲁϣ ⲡⲉ ⲡⲕⲉⲥⲙⲟⲩ · ⲏ ⲁϣ ⲡⲉ ⲡⲕⲉⲉⲓ ⲉⲃⲟⲗ ⲙⲡϣⲁϫⲉ · ⲏ ⲁϣ ⲧⲉ ⲧⲕⲉⲉⲩⲭⲁⲣⲓⲥⲧⲓⲁ ⲉⲛⲛⲁⲟⲛⲟⲙⲁⲍⲉ ⲙⲙⲟⲟⲩ ⲉϫⲙⲡⲉⲓⲟⲉⲓⲕ ⲉⲛⲡⲱϣ ⲙⲙⲟϥ · ⲉⲓⲙⲏⲧⲓ ⲛⲧⲟⲕ ⲙⲁⲩⲁⲁⲕ · ⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ·
dormition.john.mercad:41
ⲧⲛϯⲉⲟⲟⲩ ⲛⲁⲕ ⲡϫⲟⲉⲓⲥ ⲓⲏⲥⲟⲩⲥ ⲡⲉⲭⲣⲓⲥⲧⲟⲥ ⲡⲁⲓ ⲛⲧⲁⲩⲟⲩⲉⲛϩⲡⲉϥⲣⲁⲛ ⲉⲃⲟⲗ ϩⲓⲧⲙⲡⲉⲓⲱⲧ ·
dormition.john.mercad:42
ⲧⲛϯⲉⲟⲟⲩ ⲛⲧⲉⲕϭⲓⲛⲉⲓ ⲉϩⲟⲩⲛ ϩⲓⲧⲙⲡⲣⲟ ·
dormition.john.mercad:43
ⲧⲛϯⲉⲟⲟⲩ ⲛⲧⲉⲕⲁⲛⲁⲥⲧⲁⲥⲓⲥ ⲉⲧⲟⲩⲁⲁⲃ · ⲉⲃⲟⲗ ϩⲛⲛⲉⲧⲙⲟⲟⲩⲧ · ⲧⲁⲓ ⲛⲧⲁⲩⲧⲥⲁⲃⲟⲛ ⲉⲣⲟⲥ · ⲉⲃⲟⲗ ϩⲓⲧⲟⲟⲧⲕ ·
dormition.john.mercad:44
ⲧⲛϯⲉⲟⲟⲩ ⲛⲁⲕ ⲧⲉϩⲓⲏ ·
dormition.john.mercad:45
ⲧⲛϯⲉⲟⲟⲩ ⲛⲁⲕ ⲡⲉϭⲣⲟⲟϭ · ⲡⲗⲟⲅⲟⲥ · ⲡⲉϩⲙⲟⲩ · ⲡⲱⲛⲉ ⲙⲙⲉ · ⲡⲁϩⲟ ⲉⲧⲟⲩⲁⲁⲃ · ⲡϩⲃⲃⲉ · ⲧⲁⲃⲱ · ⲧⲙⲛⲧⲛⲟϭ · ⲡⲉⲛⲧⲁⲩϫⲟⲟⲥ ⲉⲣⲟϥ · ϫⲉϣⲏⲣⲉ ⲛⲣⲱⲙⲉ ⲉⲧⲃⲏⲏⲧⲛ · ϫⲉⲕⲁⲥ ⲉϥⲉⲧⲟⲩϫⲟ ⲙⲡⲅⲉⲛⲟⲥ ⲛⲛⲣⲱⲙⲉ ·
dormition.john.mercad:46
ⲧⲛϯⲉⲟⲟⲩ ⲛⲁⲕ ⲧⲙⲉ · ⲡⲙⲧⲟⲛ · ⲡⲉⲟⲟⲩ · ⲧϭⲟⲙ ⲧⲉⲛⲧⲟⲗⲏ · ⲧⲡⲁⲣⲣⲏⲥⲓⲁ · ⲧⲙⲛⲧⲣⲙϩⲉ · ⲡⲉⲛⲙⲁ ⲙⲡⲱⲧ ·
dormition.john.mercad:47
ⲛⲧⲟⲕ ⲅⲁⲣ ⲡⲉ ⲡϫⲟⲉⲓⲥ · ⲧⲛⲟⲩⲛⲉ ⲛⲧⲙⲛⲧⲁⲧⲙⲟⲩ · ⲁⲩⲱ ⲧⲡⲏⲅⲏ ⲛⲧⲙⲛⲧⲁⲧⲧⲁⲕⲟ · ⲁⲩⲱ ⲡⲧⲁϫⲣⲟ ⲛⲛⲁⲓⲱⲛ ·
dormition.john.mercad:48
ⲉⲁⲩⲧⲁⲩⲉⲡⲉⲕⲣⲁⲛ ⲉϫⲛⲛⲁⲓ ⲧⲏⲣⲟⲩ · ϫⲉⲕⲁⲥ ⲁⲛⲟⲛ ϩⲱⲱⲛ ⲉⲛⲛⲁⲉⲡⲓⲕⲁⲗⲉⲓ ⲙⲙⲟⲕ ϩⲓⲧⲛⲛⲁⲓ ·
dormition.john.mercad:49
ⲧⲛⲥⲟⲟⲩⲛ ⲅⲁⲣ ⲛⲧⲉⲕⲙⲛⲧⲛⲟϭ ⲛⲁⲧⲛⲁⲩ ⲉⲣⲟⲥ · ⲧⲁⲓ ⲉⲧⲉⲛⲥⲟⲩⲟⲛϩ ⲉⲣⲟⲛ ⲁⲛ ⲧⲉⲛⲟⲩ ·
dormition.john.mercad:50
ϩⲟⲧⲁⲛ ⲉⲕϣⲁⲛⲧⲃⲃⲟⲛ · ⲧⲟⲧⲉ ⲧⲛⲛⲁⲛⲁⲩ ⲉⲣⲟⲕ ϩⲙⲡⲥⲱⲙⲁ ⲙⲁⲩⲁⲁϥ · ⲡⲁⲓ ⲛⲧⲁⲕⲁⲁϥ ⲛⲃⲣⲣⲉ ϩⲛⲟⲩⲙⲛⲧⲁⲥ ·
dormition.john.mercad:51
ⲁⲩⲱ ⲛⲧⲉⲣⲉϥⲡⲉϣ ⲡⲟⲉⲓⲕ · ⲁϥϣⲗⲏⲗ ⲉϫⲙⲡⲟⲩⲁ ⲡⲟⲩⲁ ⲛⲛⲉⲥⲛⲏⲩ · ϫⲉⲕⲁⲥ ⲉⲩⲉⲙⲡϣⲁ ⲛⲧⲉⲭⲁⲣⲓⲥ ⲙⲡϫⲟⲉⲓⲥ ·
dormition.john.mercad:52
ϩⲟⲙⲟⲓⲱⲥ ⲛⲧⲟϥ ϩⲱⲱϥ · ⲡⲡⲉⲧⲟⲩⲁⲁⲃ · ⲓⲱϩⲁⲛⲛⲏⲥ · ⲛⲧⲉⲣⲉϥϫⲓϯⲡⲉ ⲙⲡⲟⲉⲓⲕ ·
dormition.john.mercad:53
ⲉⲁϥϫⲟⲟⲥ ⲛⲧⲉⲓϩⲉ ⲛϭⲓⲡⲑⲉⲟⲗⲟⲅⲟⲥ ⲓⲱϩⲁⲛⲛⲏⲥ · ⲉϥϫⲱ ⲙⲙⲟⲥ · ϫⲉⲙⲁⲣⲉⲟⲩⲙⲉⲣⲓⲥ ϣⲱⲡⲉ ⲛⲁⲓ ϩⲱ ⲛⲙⲙⲏⲧⲛ ϩⲛⲟⲩⲉⲓⲣⲏⲛⲏ · ⲱ ⲛⲁⲙⲉⲣⲁⲧⲉ ·
dormition.john.mercad:54
ⲧⲟⲧⲉ ⲡⲉϫⲁϥ ⲛⲃⲓⲃⲣⲟⲥ ϫⲉϫⲓ ⲛⲙⲙⲁⲕ ⲛⲥⲟⲛ ⲥⲛⲁⲩ · ⲉⲩⲛϩⲉⲛⲃⲓⲣ ⲛⲧⲟⲟⲧⲟⲩ · ⲙⲛϩⲉⲛⲧⲱⲣⲉ · ⲛⲧⲉⲧⲛⲟⲩⲉϩⲧⲏⲩⲧⲛ ⲛⲥⲱⲓ ·
dormition.john.mercad:55
ⲃⲓⲃⲣⲟⲥ ⲇⲉ ⲙⲡⲉϥⲁⲙⲉⲗⲉⲓ ⲉⲡⲧⲏⲣϥ · ⲁⲗⲗⲁ ⲁϥⲉⲓⲣⲉ ⲙⲡⲉⲛⲧⲁⲩⲟⲩⲉϩⲥⲁϩⲛⲉ ⲙⲙⲟϥ ⲛⲁϥ ⲉⲃⲟⲗ ϩⲓⲧⲟⲟⲧϥ ⲙⲡⲡⲉⲧⲟⲩⲁⲁⲃ ⲡⲑⲉⲟⲗⲟⲅⲟⲥ ⲓⲱϩⲁⲛⲛⲏⲥ · ⲡϩⲙϩⲁⲗ ⲙⲡⲛⲟⲩⲧⲉ ·
dormition.john.mercad:56
ⲛⲧⲉⲣⲉⲡⲙⲁⲕⲁⲣⲓⲟⲥ ⲇⲉ ⲓⲱϩⲁⲛⲛⲏⲥ ⲉⲓ ⲉⲃⲟⲗ ϩⲙⲡⲉϥⲏⲓ · ⲁϥⲙⲟⲟϣⲉ ⲡⲃⲟⲗ ⲛⲧⲡⲩⲗⲏ ⲛⲧⲡⲟⲗⲓⲥ · ⲉⲁϥϫⲟⲟⲥ ⲉⲧⲣⲉⲡⲉϩⲟⲩⲟ ⲙⲡⲙⲏⲏϣⲉ ⲉⲧⲟⲩⲏϩ ⲛⲥⲱϥ · ⲃⲱⲕ ⲛⲥⲉⲗⲟ ϩⲁⲣⲟϥ ·
dormition.john.mercad:57
ⲛⲧⲉⲣⲉϥⲡⲱϩ ⲇⲉ ⲉⲩⲙⲁ ⲛⲙϩⲁⲁⲩ · ⲉⲡⲁⲟⲩⲁ ⲡⲉ ϩⲛⲛⲉⲥⲛⲏⲩ ⲁϥϫⲟⲟⲥ ⲛⲛⲉϩⲣϣⲓⲣⲉ · ϫⲉϣⲓⲕⲉ ϩⲙⲡⲉⲓⲙⲁ ⲛⲁϣⲏⲣⲉ ·
dormition.john.mercad:58
ⲛⲉⲧⲙⲙⲁⲩ ⲇⲉ ⲁⲩϣⲓⲕⲉ ⲉⲡⲉⲥⲏⲧ ·
dormition.john.mercad:59
ⲛⲧⲟϥ ⲇⲉ ⲓⲱϩⲁⲛⲛⲏⲥ ⲡⲑⲉⲟⲗⲟⲅⲟⲥ · ⲛⲉϥⲟⲩⲉϩⲥⲁϩⲛⲉ ⲛⲁⲩ · ϫⲉϣⲓⲕⲉ ⲉⲡⲉⲥⲏⲧ ⲕⲁⲗⲱⲥ ·
dormition.john.mercad:60
ⲁⲩⲱ ⲛⲉϥϫⲱ ⲙⲙⲟⲥ · ϫⲉϭⲱϫⲉ ⲉⲡⲉⲥⲏⲧ ⲉⲡⲉϩⲟⲩⲟ ·
dormition.john.mercad:61
ⲉⲩϭⲱϫⲉ ⲇⲉ ⲉⲡⲉⲥⲏⲧ ⲛϭⲓⲛⲉⲧⲙⲙⲁⲩ ·
dormition.john.mercad:62
ⲛⲉϥϣⲁϫⲉ ⲛⲙⲙⲁⲩ ϩⲙⲡϣⲁϫⲉ · ⲁⲩⲱ ⲛⲉϥⲡⲣⲟⲧⲣⲉⲡⲉ ⲙⲙⲟⲟⲩ · ⲉϥⲕⲱⲧ ⲙⲙⲟⲟⲩ · ⲉϥⲥⲟⲃⲧⲉ ⲙⲙⲟⲟⲩ ⲁⲩⲱ ⲉϥⲡⲉⲓⲑⲉ ⲙⲙⲟⲟⲩ ⲉϩⲟⲩⲛ ⲉⲧⲙⲛⲧⲣⲣⲟ ⲙⲡⲛⲟⲩⲧⲉ ·
dormition.john.mercad:63
ⲁⲩⲱ ⲛⲉϥϣⲗⲏⲗ ⲉϫⲙⲡⲟⲩⲁ ⲡⲟⲩⲁ ⲙⲙⲟⲟⲩ ·
dormition.john.mercad:64
ⲛⲧⲉⲣⲉⲛϩⲣϣⲓⲣⲉ ⲇⲉ ⲟⲩⲱ ⲉⲩϭⲱϫⲉ · ⲙⲡⲧⲟⲡⲟⲥ ⲉⲧⲟⲩϣⲓⲕⲉ ⲛϩⲏⲧϥ · ⲉⲁⲩⲥⲙⲛⲧϥ ⲕⲁⲗⲱⲥ · ⲕⲁⲧⲁⲧϩⲉ ⲛⲧⲁϥⲟⲩⲁϣⲥ ·
dormition.john.mercad:65
ⲁⲩⲱ ⲁⲛⲟⲛ ⲙⲡⲉⲛⲉⲓⲙⲉ ⲉⲗⲁⲁⲩ ·
dormition.john.mercad:66
ⲧⲟⲧⲉ ⲁϥⲕⲁⲁϥ ⲕⲁϩⲏⲩ ⲛⲛⲉϩⲟⲓⲧⲉ ⲉⲧⲧⲟ ϩⲓⲱⲱϥ ·
dormition.john.mercad:67
ⲁϥⲛⲟⲩϫⲉ ⲙⲙⲟⲟⲩ ⲉⲡⲉⲥⲏⲧ ⲉⲡⲧⲟⲡⲟⲥ ⲛⲧⲁⲩϭⲱϫⲉ ⲙⲙⲟϥ ⲉⲡⲉⲥⲏⲧ ⲙⲡⲉⲥⲙⲟⲧ · ⲛⲟⲩⲙⲁ ⲉϥⲡⲟⲣϣ ·
dormition.john.mercad:68
ⲛⲧⲟϥ ⲇⲉ ⲉⲛⲉϥⲁϩⲉⲣⲁⲧϥ · ⲉⲣⲉⲟⲩϣⲧⲏⲛ ⲛϩⲃⲟⲟⲥ ϩⲓⲱⲱϥ · ⲙⲁⲩⲁⲁⲥ · ⲉⲥϫⲓ ⲧⲟⲧⲉ ⲉⲡⲥⲁ ⲥⲛⲁⲩ ·
dormition.john.mercad:69
ⲁⲩⲱ ⲁϥⲡⲱⲣϣ ⲛⲛⲉϥϭⲓϫ ⲉⲃⲟⲗ ⲁϥϣⲗⲏⲗ ⲛⲧⲉⲓϩⲉ ⲉϥϫⲱ ⲙⲙⲟⲥ · ϫⲉⲡⲛⲟⲩⲧⲉ ⲡⲉⲛⲧⲁϥⲥⲱⲧⲡ ⲙⲙⲟⲓ ⲛⲁϥ · ⲉⲩⲙⲛⲧⲁⲡⲟⲥⲧⲟⲗⲟⲥ ⲛⲛϩⲉⲑⲛⲟⲥ · ⲉⲁⲕⲧⲛⲛⲟⲟⲩⲧ ⲉⲃⲟⲗ ⲉⲧⲟⲓⲕⲟⲩⲙⲉⲛⲏ ·
dormition.john.mercad:70
ⲡⲉⲛⲧⲁϥⲟⲩⲱⲛϩ ⲉⲃⲟⲗ ⲛⲛⲉⲡⲣⲟⲫⲏⲧⲏⲥ · ⲙⲛⲛⲉϥⲁⲡⲟⲥⲧⲟⲗⲟⲥ ·
dormition.john.mercad:71
ⲡⲉⲧⲉⲙⲡⲉϥϭⲱ ⲉⲛⲉϩ · ⲉϥⲣⲡⲉⲧⲛⲁⲛⲟⲩϥ · ϫⲓⲛⲧⲕⲁⲧⲁⲃⲟⲗⲏ ⲙⲡⲕⲟⲥⲙⲟⲥ · ⲉϥⲧⲟⲩϫⲟ ⲛⲟⲩⲟⲛ ⲛⲓⲙ · ⲉⲧⲉⲙⲛϭⲟⲙ ⲙⲙⲟⲟⲩ ·
dormition.john.mercad:72
ⲡⲉⲛⲧⲁϥⲧⲣⲉⲩⲥⲟⲩⲱⲛϥ · ⲉⲃⲟⲗ ϩⲓⲧⲛⲣⲱⲙⲉ ⲛⲓⲙ ⲛⲗⲟⲅⲓⲕⲟⲛ ⲙⲛⲍⲱⲟⲛ ⲛⲓⲙ · ⲉⲩⲇⲓⲁⲕⲟⲛⲉⲓ ⲙⲙⲟⲟⲩ ⲉⲃⲟⲗ ϩⲓⲧⲛⲧⲉϥⲡⲣⲟⲛⲟⲓⲁ ·
dormition.john.mercad:73
ⲡⲉⲛⲧⲁϥⲧⲣⲉⲧⲉⲛⲯⲩⲭⲏ ⲣϩⲩⲙⲉⲣⲟⲥ · ⲉⲁϥⲧⲣⲉⲥϩⲣⲟⲕ · ⲉⲥⲟ ⲛϫⲁⲉⲓⲉ · ⲁⲩⲱ ⲛⲁⲅⲣⲓⲟⲥ ·
dormition.john.mercad:74
ⲡⲉⲛⲧⲁϥⲧⲁⲁⲥ ⲛⲁϥ ⲙⲙⲓⲛⲙⲙⲟϥ ⲉⲥⲱⲃⲉ ⲛⲛⲉϥϫⲁϫⲉ ·
dormition.john.mercad:75
ⲡⲉⲛⲧⲁϥϭⲟⲗⲡⲥ ⲛⲁϥ ⲉⲥⲙⲟⲟⲩⲧ · ⲉⲁϥⲣⲛⲟⲙⲟⲥ ⲛⲁⲥ ⲉⲥⲟⲙⲥ ϩⲙⲡϣⲓⲕ ⲛⲧⲁⲛⲟⲙⲓⲁ ·
dormition.john.mercad:76
ⲡⲉⲛⲧⲁϥⲧⲣⲉⲥϫⲣⲟ ⲉⲛⲉⲥϫⲁϫⲉ ϩⲙⲡⲧⲣⲉⲥⲡⲱⲧ ⲉⲣⲁⲧϥ ·
dormition.john.mercad:77
ⲡⲉⲛⲧⲁϥϯ ⲛⲁⲥ ⲛⲧⲉϥϭⲓϫ · ⲁⲩⲱ ⲁϥⲧⲟⲩϫⲟⲥ ⲉⲃⲟⲗ ϩⲛⲁⲙⲛⲧⲉ ·
dormition.john.mercad:78
ⲡⲉⲧⲙⲡⲉϥⲕⲁⲁⲥ ⲉⲡⲟⲗⲓⲧⲉⲩⲉ ϩⲙⲡⲕⲟⲥⲙⲟⲥ ·
dormition.john.mercad:79
ⲡⲉⲛⲧⲁϥⲧⲥⲁⲃⲉ ⲉⲓⲁⲁⲧⲥ ⲉⲃⲟⲗ ⲉⲛⲉⲥϫⲁϫⲉ ·
dormition.john.mercad:80
ⲡⲉⲛⲧⲁϥⲧⲣⲉⲡⲉϥⲥⲟⲟⲩⲛ ⲣⲟⲩⲟⲉⲓⲛ ϩⲙⲙⲁ ⲛⲓⲙ ·
dormition.john.mercad:81
ⲡϣⲏⲣⲉ ⲙⲡⲛⲟⲩⲧⲉ · ⲡⲥⲱⲧⲏⲣ · ⲡϫⲟⲉⲓⲥ · ⲧⲧⲁⲝⲓⲥ ⲛⲛⲉⲧϩⲙⲡⲁⲏⲣ ·
dormition.john.mercad:82
ⲡⲣⲉϥϩⲁⲣⲉϩ ⲉⲛⲉⲧϩⲓϫⲙⲡⲕⲁϩ · ⲧⲉⲭⲁⲣⲓⲥ · ⲁⲩⲱ ⲡⲣⲁϣⲉ ⲛⲛⲉⲧⲉⲛⲟⲩⲃ ⲛⲉ ·
dormition.john.mercad:83
ϣⲱⲡ ⲉⲣⲟⲕ ⲛⲧⲉⲯⲩⲭⲏ ⲛⲓⲱϩⲁⲛⲛⲏⲥ · ⲡⲉⲧⲉⲡⲱⲕ ⲡⲉ · ⲧⲁⲓ ⲛⲧⲁⲕⲁⲁⲥ ⲛⲙⲡϣⲁ ⲉⲧⲣⲉⲕⲥⲟⲩⲱⲛⲥ ·
dormition.john.mercad:84
ⲛⲧⲟⲕ ⲅⲁⲣ ⲡⲉ ⲛⲧⲁⲕϩⲁⲣⲉϩ ⲉⲣⲟⲓ ϣⲁⲧⲉⲛⲟⲩ ⲙⲡⲉⲓⲧⲱⲗⲙ ϩⲟⲗⲱⲥ ⲙⲛⲥϩⲓⲙⲉ ·
dormition.john.mercad:85
ⲁⲕⲟⲩⲟⲛϩⲕ ⲛⲁⲓ ⲉⲃⲟⲗ · ⲛⲧⲉⲣⲓⲟⲩⲱϣ ⲉϫⲓⲥϩⲓⲙⲉ ϩⲛⲧⲁⲙⲛⲧⲃⲣⲣⲉ ·
dormition.john.mercad:86
ⲁⲩⲱ ⲁⲕϫⲟⲟⲥ ⲛⲁⲓ · ϫⲉⲓⲱϩⲁⲛⲛⲏⲥ · ϯⲣⲭⲣⲉⲓⲁ ⲙⲙⲟⲕ ·
dormition.john.mercad:87
ⲁⲕⲣϣⲟⲣⲡ ·
dormition.john.mercad:88
ⲁⲕⲟⲓⲕⲟⲛⲟⲙⲉⲓ ⲙⲡⲁⲥⲱⲙⲁ ⲛⲟⲩⲉϣ ⲛϣⲱⲛⲉ ⲛⲥⲱⲙⲁⲧⲓⲕⲟⲛ ·
dormition.john.mercad:89
ⲛⲧⲟⲕ ⲡⲉⲛⲧⲁⲕϯϫⲣⲟⲡ ⲛⲁⲓ ⲛϩⲁϩ ⲛⲥⲟⲡ · ⲛⲧⲉⲣⲓⲟⲩⲱϣ ⲉϫⲓⲥϩⲓⲙⲉ ·
dormition.john.mercad:90
ⲙⲛⲛⲥⲱⲥ ⲁⲕϣⲁϫⲉ ⲛⲙⲙⲁⲓ ⲛϫⲡϣⲟⲙⲧⲉ ⲙⲡⲉϩⲟⲟⲩ ϩⲓϫⲛⲧϩⲁⲗⲁⲥⲥⲁ · ϫⲉⲓⲱϩⲁⲛⲛⲏⲥ ⲉⲛⲉ ⲛⲧⲟⲕ ⲡⲉⲧⲉⲡⲱⲓ ⲁⲛ ⲡⲉ · ⲛⲉⲓⲛⲁⲗⲟ ϩⲁⲣⲟⲕ ⲡⲉ · ⲛⲅϫⲓⲥϩⲓⲙⲉ · ⲁⲩⲱ ⲛⲅⲣⲃⲗⲗⲉ ⲉⲡⲉⲕⲃⲁⲗ ⲥⲛⲁⲩ · ⲛⲅϭⲱ ⲉⲕⲣϩⲏⲃⲉ · ⲉⲕⲧⲱⲃϩ ⲙⲙⲟⲓ ·
dormition.john.mercad:91
ⲡⲉⲛⲧⲁϥⲟⲩⲱⲛ ⲙⲡⲁϩⲏⲧ ϩⲛⲧⲁⲙⲉϩϣⲟⲙⲧⲉ ⲛⲣⲟⲙⲡⲉ ·
dormition.john.mercad:92
ⲁⲕⲭⲁⲣⲓⲍⲉ ⲛⲁⲓ ⲛϩⲉⲛ ⲕⲉⲃⲁⲗ · ⲛⲥⲉⲟⲩⲟⲛϩ ⲉⲃⲟⲗ ⲁⲛ ·
dormition.john.mercad:93
ⲡⲉⲛⲧⲁϥⲧⲣⲉⲡϭⲱⲛⲧ · ⲏ ⲡⲉⲓⲱⲣϩ ⲛⲛⲉϩⲓⲟⲙⲉ ϣⲱⲡⲉ ⲛⲁⲓ ⲛⲃⲟⲧⲉ ·
dormition.john.mercad:94
ⲡⲉⲛⲧⲁϥⲛⲁϩⲙⲧ ⲉⲃⲟⲗ ϩⲛⲛⲉⲫⲁⲛⲧⲁⲥⲓⲁ ⲙⲡⲣⲟⲥⲟⲩⲟⲉⲓϣ · ⲉⲁϥϩⲁⲣⲉϩ ⲉⲣⲟⲓ ⲉⲡⲱⲛϩ ⲉⲧⲙⲏⲛ ⲉⲃⲟⲗ ·
dormition.john.mercad:95
ⲡⲉⲛⲧⲁϥⲁⲁⲧ ⲛϣⲙⲙⲟ ⲉⲧⲙⲁⲛⲓⲁ ⲉⲧϩⲟⲟⲩ · ⲧⲁⲓ ⲉⲧϣⲟⲟⲡ ϩⲛⲧⲥⲁⲣⲝ ⲉⲁϥⲧⲣⲁⲟⲩⲉ ⲉⲃⲟⲗ ⲙⲡⲙⲟⲩ ⲉⲧⲥⲁϣⲉ ·
dormition.john.mercad:96
ⲡⲉⲛⲧⲁϥⲛⲁϩⲙⲉⲧ ⲉⲡⲙⲟⲩ ⲙⲙⲉϩⲥⲛⲁⲩ · ⲉⲧⲉⲧⲅⲉϩⲉⲛⲛⲁ ⲛⲥⲁⲧⲉ ⲧⲉ · ⲉⲁⲕⲧⲁϩⲟⲓ ⲉⲣⲁⲧ ⲉⲓⲟⲩⲁⲁⲃ ·
dormition.john.mercad:97
ⲡⲉⲛⲧⲁϥⲧⲱⲙ ⲉⲣⲱϥ ⲙⲡϣⲱⲛⲉ ⲉⲧϩⲏⲡ ⲛⲧⲁⲯⲩⲭⲏ ·
dormition.john.mercad:98
ⲁⲩⲱ ⲁⲕϣⲱϣⲧ ⲉⲃⲟⲗ ⲛⲧⲉⲡⲣⲁⲝⲓⲥ ⲉⲧϩⲏⲡ · ⲏ ⲡϩⲱⲃ ⲉⲧⲟⲩⲟⲛϩ ⲉⲃⲟⲗ · ⲡⲁⲓ ⲉϣⲁⲩⲧⲁⲁϥ ϩⲙⲡⲥⲱⲙⲁ ·
dormition.john.mercad:99
ⲡⲉⲛⲧⲁϥⲛⲁϩⲙⲉⲧ · ⲁⲩⲱ ⲁϥⲛⲟⲩϫⲉ ⲉⲃⲟⲗ ⲛϩⲏⲧ · ⲙⲡⲉⲧϣⲧⲟⲣⲧⲣ ⲙⲙⲟⲓ ·
dormition.john.mercad:100
ⲡⲉⲛⲧⲁϥⲥⲟⲃⲧⲉ ⲛⲧⲁϭⲓⲛⲃⲱⲕ ϣⲁⲣⲟϥ ⲉⲥⲟⲩⲁⲁⲃ ·

Coptic SCRIPTORIUM, corpus dormition.john (github.com/CopticScriptorium/corpora). Licence as stated per document in the project's own meta.json and checked there at parse time. English, where present, is Coptic SCRIPTORIUM's aligned translation. Licence: CC-BY 4.0. Source.