Bohairic Lausiac

Coptic literature (Coptic SCRIPTORIUM) · 159 sections

bohairic.lausiac_01:59
ⲟⲩⲟϩ ⲛⲓϫⲓⲛⲕⲓⲙ ⲛⲧⲉϯⲕⲁⲕⲓⲁ ⲉⲧⲟⲓ ⲙⲫⲣⲏϯ ⲛⲛⲓϩⲱⲓⲙⲓ ⲛⲧⲉⲫⲓⲟⲙ ⲉⲩϩⲓⲥⲫⲏⲓϯ ⲉⲧⲧⲱⲟⲩⲛⲟⲩ ⲙⲙⲱⲟⲩ ⲉϩⲣⲏⲓ ⲉϫⲱⲛ ⲙⲁⲣⲉⲛⲛⲟϣⲡⲟⲩ ⲉⲃⲟⲗ ϩⲓⲧⲉⲛϯⲡⲣⲟⲥⲉⲩⲭⲏ ⲛⲉⲙⲛⲓϥⲓⲣⲱⲟⲩϣ ⲛⲧⲉϯⲙⲉⲧⲣⲉϥϯϩⲑⲏϥ ⲉⲣⲟⲛ
The movements of depravity, which are like the waves of the sea foaming and rising against us, should be cast far away from us through prayer and attentiveness.
bohairic.lausiac_01:60
ⲟⲩⲟⲛ ⲟⲩⲙⲏϣ ⲛϫⲓⲛⲱⲛϧ ⲛⲧⲉⲛⲏ ⲉⲑⲟⲩⲁⲃ ⲛⲉⲙⲛⲓⲥⲛⲏⲟⲩ ⲙⲙⲁⲓⲛⲟⲩϯ ⲟⲩⲉⲧ ⲡϩⲱⲃ ⲙⲫⲁⲓ ⲟⲩⲉⲧ ⲡϩⲱⲃ ⲙⲡⲁⲓⲭⲉⲧ ⲟⲩⲛⲁϩϯ ⲛⲟⲩⲱⲧ ⲛⲉⲙⲟⲩⲡⲛⲉⲩⲙⲁ ⲛⲟⲩⲱⲧ ⲉⲧⲉⲣϩⲱⲃ ⲛϧⲏⲧⲟⲩ ⲧⲏⲣⲟⲩ .
Many are the lives of these holy and pious brothers, each of whom engaged in a different work: yet all shared one faith and one Spirit, working in all their endeavors.
bohairic.lausiac_01:61
ⲙⲫⲣⲏϯ ⲅⲁⲣ ⲛⲟⲩⲡⲁⲣⲁⲇⲓⲥⲟⲥ ⲉⲣⲉⲟⲩⲟⲛ ⲟⲩⲙⲏϣ ⲛⲛϣⲏⲛ ⲛϧⲏⲧϥ ⲟⲩⲉⲧ ⲡⲟⲩⲧⲁϩ ⲙⲫⲁⲓ ⲟⲩⲉⲧ ⲡⲟⲩⲧⲁϩ ⲙⲡⲁⲓⲭⲉⲧ ⲁⲗⲗⲁ ⲟⲩⲙⲱⲟⲩ ⲛⲟⲩⲱⲧ ⲉⲧⲧⲥⲓⲟ ⲙⲙⲱⲟⲩ ⲧⲏⲣⲟⲩ ⲫⲁⲓ ⲡⲉ ⲙⲫⲣⲏϯ ⲛⲛⲓϧⲉⲗⲗⲟⲓ ⲉⲑⲟⲩⲁⲃ ⲟⲩⲉⲧ ⲧⲁⲣⲉⲧⲏ ⲙⲫⲁⲓ ⲟⲩⲉⲧ ⲧⲁⲣⲉⲧⲏ ⲙⲡⲁⲓⲭⲉⲧ ⲟⲩⲁⲓ ϧⲉⲛⲟⲩⲙⲉⲧⲛⲁⲏⲧ ⲟⲩⲁⲓ ϧⲉⲛⲟⲩⲁⲥⲕⲩⲥⲓⲥ ⲟⲩⲁⲓ ϧⲉⲛⲟⲩϧⲓⲥⲓ ⲛⲥⲱⲙⲁ ⲟⲩⲁⲓ ϧⲉⲛⲟⲩϫⲱⲗ ⲉⲃⲟⲗ ⲕⲉⲟⲩⲁⲓ ϧⲉⲛⲟⲩϭⲛⲉϫⲱϥ
For just as in a garden there are many trees, each bearing different fruits, but all watered by the same source, so these holy elders were adorned with different virtues: one with mercy, another with ascetic practices, another with bodily afflictions, another with self-denial, another with humility.
bohairic.lausiac_01:62
ⲁⲡⲁⲝ ⲁⲡⲗⲱⲥ ϧⲉⲛϩⲱⲃ ⲛⲓⲃⲉⲛ ⲛⲧⲉϯⲙⲉⲧⲉⲩⲥⲉⲃⲏⲥ ⲉⲩϣⲟⲩϣⲟⲩ ⲙⲙⲱⲟⲩ ϧⲉⲛⲛⲓⲡⲟⲗⲏⲧⲓⲁ ⲛⲉⲙⲛⲓⲛⲁϩϯ ⲉⲩⲉⲣⲑⲁⲣⲓⲛ ⲙⲙⲱⲟⲩ ϧⲉⲛⲧⲙⲉⲗⲉⲧⲏ ⲙⲡⲥⲁϫⲓ ⲙⲫⲛⲟⲩϯ ⲛⲉⲙϩⲁⲛϫⲓⲛϭⲟϫⲓ ϧⲉⲛϯⲁⲅⲁⲡⲏ ⲉⲧⲥⲟⲧⲡ
In sum, they excelled in every work of virtue, transforming their way of life and their faith into glory, urging themselves onward to the meditation on divine teachings and an exceptional love through mutual encouragement.
bohairic.lausiac_01:63
ϩⲁⲛⲟⲩⲟⲛ ⲙⲉⲛ ⲁⲩϩⲓⲧⲟⲧⲟⲩ ϩⲱⲟⲩ ⲉⲛⲁⲓⲁⲣⲉⲧⲏ ⲁⲗⲗⲁ ⲙⲡⲟⲩϣⲁϣⲛⲓ ⲉⲑⲃⲉⲧⲟⲩⲙⲉⲧⲁⲧϯⲁⲕⲣⲓⲥⲓⲥ ⲉⲑⲃⲉϫⲉⲉⲩⲓⲣⲓ ⲙⲙⲱⲟⲩ ϧⲉⲛⲟⲩⲙⲉⲧⲣⲁⲛⲁϣ ⲛⲣⲱⲙⲓ ⲛⲉⲙⲟⲩⲙⲉⲧⲣⲉϥϯϣⲑⲟⲩⲓⲧ ⲛⲧⲉⲛⲓⲥⲛⲏⲟⲩ ⲉⲩϭⲟϫⲓ ⲛⲥⲁⲛⲓϩⲃⲏⲟⲩⲓ ⲉⲑⲛⲁⲛⲉⲩ ⲉⲃⲟⲗ ϩⲓⲧⲉⲛⲟⲩⲑⲱϧ ⲛⲧⲉϩⲁⲛϩⲃⲏⲟⲩⲓ ⲉⲛⲟⲩⲟⲩ ⲁⲛ ⲛⲉ ⲟⲩⲟϩ ⲡⲁⲓⲣⲏϯ ⲥⲉⲧⲁⲕⲟ ⲛⲛⲓϩⲃⲏⲟⲩⲓ ⲉⲑⲛⲁⲛⲉⲩ ⲉⲃⲟⲗ ϩⲓⲧⲉⲛϯⲙⲉⲧϭⲁⲥⲓϩⲏⲧ ⲧⲙⲁⲩ ⲛϯⲙⲉⲧⲁⲧⲉⲙⲓ .
Some indeed strove toward these virtues but, lacking discernment, failed to attain them because they practiced these virtues to please men and to accuse their brothers, rushing toward good works out of emulation for works that were not good. In this way, they corrupted good works through pride, the mother of ignorance.
bohairic.lausiac_01:64
ⲓⲏⲥ ⲟⲩⲛ ⲙⲙⲟⲕ ⲡⲁⲥⲟⲛ ⲉⲧⲁϩⲟⲕ ⲉⲣⲁⲧⲕ ⲛⲟⲩⲉⲣⲫⲉⲓ ⲙⲫⲛⲟⲩϯ
Therefore, hurry, my brother, to present yourself as a temple of God.
bohairic.lausiac_01:65
ⲙⲡⲉⲣϯ ⲕⲉⲏⲓ ϫⲉ ⲛϯⲙⲉⲧⲣⲁⲙⲁⲟ ⲕⲁⲧⲁⲫⲣⲏϯ ⲉⲛⲁⲕⲓⲣⲓ ⲙⲙⲟⲥ ⲛⲟⲩⲥⲏⲟⲩ ⲁⲗⲗⲁ ⲙⲁⲗⲗⲟⲛ ⲙⲁⲣⲉⲥⲙⲟⲩⲛⲕ ⲛⲧⲟⲧⲕ ⲛϫⲉϯⲙⲉⲧⲙⲁⲓϩⲁⲧ ⲟⲩⲟϩ ⲛⲑⲟⲕ ϩⲱⲕ ⲛⲧⲉⲕⲙⲟⲩⲛⲕ ⲛⲧⲟⲧⲥ
Do not, as you once did, build yourself another house from wealth, but rather let the desire for silver abandon you, and you abandon it.
bohairic.lausiac_01:66
ⲙⲁⲣⲉⲥⲙⲟⲩⲛⲕ ⲛⲧⲟⲧⲕ ⲛϫⲉϯⲁⲥⲟⲩⲓ ⲉϣⲁⲥⲉⲣϩⲟⲗⲓ ϫⲫⲟ ⲇⲉ ⲛⲁⲕ ⲛⲑⲏ ⲉⲧⲉⲙⲡⲁⲣⲉⲛⲓⲥⲟⲛⲓ ϩⲓϣⲁⲧⲥ ⲉⲣⲟⲥ
Let the purse, which is consumed by moths, depart from you, and instead acquire for yourself treasures that thieves do not dig through.
bohairic.lausiac_01:67
ϭⲟⲥ ⲉⲃⲟⲗ ⲉⲛⲓϩⲏⲕⲓ ⲛⲉⲙⲛⲏ ⲉⲧⲉⲣⲭⲣⲓⲁ ⲙⲁⲧⲁⲗⲉ ⲡⲉⲕⲥⲧⲁⲩⲣⲟⲥ ⲉⲣⲟⲕ ⲟⲩⲟϩ ⲙⲟϣⲓ ⲛⲥⲁⲡⲉⲕϭⲟⲉⲓⲥ
Spend these on the poor and the needy, take up your cross, and follow the Lord.
bohairic.lausiac_01:68
ⲉⲃⲟⲗ ⲅⲁⲣ ϩⲓⲧⲉⲛⲡⲁⲓϩⲱⲃ ⲉⲕⲉϫⲫⲟ ⲛⲁⲕ ⲛⲛⲓⲁⲣⲉⲧⲏ ⲧⲏⲣⲟⲩ ⲟⲩⲟϩ ⲉⲕⲉⲁⲣⲉϩ ⲉⲣⲟⲕ ⲉⲃⲟⲗ ϩⲁϯⲙⲉⲧⲣⲁⲛⲁϥ ⲛⲣⲱⲙⲓ ⲉⲧⲧⲁⲕⲏⲟⲩⲧ
For in this way, you will acquire all virtues and guard yourself from corruptible human vanity.
bohairic.lausiac_01:69
ⲙⲡⲉⲣⲥⲱⲛϩ ⲛⲧⲉⲕⲡⲣⲟϩⲉⲣⲉⲥⲓⲥ ⲉⲃⲟⲗ ϩⲓⲧⲉⲛⲟⲩⲙⲉⲧⲁⲧⲥⲟϭⲛⲓ ϧⲉⲛⲟⲩⲁⲛⲁϣ ⲙⲙⲉⲧϭⲁⲥⲓϩⲏⲧ ϫⲉϯⲛⲁⲟⲩⲱⲙ ⲁⲛ ϯⲛⲁⲥⲱ ⲁⲛ ⲙⲫⲣⲏϯ ⲛϩⲁⲛⲟⲩⲟⲛ ⲉⲧⲁⲩⲉⲣⲟⲩϩⲱⲃ ⲙⲡⲁⲓⲣⲏϯ
Do not bind your freedom with the imprudence of an arrogant oath, saying, “I will not drink, I will not eat,” as some men have done who followed such a way of acting.
bohairic.lausiac_01:70
ⲁⲩⲣⲁⲟⲩⲱ ϧⲉⲛϩⲁⲛⲡⲁⲑⲟⲥ ⲛⲧⲉⲡⲓⲧⲱⲙⲧ ⲛⲉⲙϩⲁⲛϩⲩⲇⲟⲛⲏ ϣⲁⲧⲟⲩⲃⲱⲗ ⲙⲡⲓⲁⲛⲁϣ ⲉⲃⲟⲗ ⲉⲧⲁⲩⲧⲏⲓϥ .
For they fell into passions of hesitation and pleasures until they broke their oath.
bohairic.lausiac_01:71
ⲛⲑⲟⲕ ⲇⲉ ⲓⲧⲉ ⲉⲕⲟⲩⲱⲙ ⲟⲩⲱⲙ ϧⲉⲛⲡⲉⲕⲟⲩⲱϣ ⲓⲧⲉ ⲉⲕⲁⲙⲟⲛⲓ ⲛⲧⲟⲧⲕ ⲥⲁⲃⲟⲗ ⲙⲡⲓⲟⲩⲱⲙ ⲁⲙⲟⲛⲓ ϧⲉⲛⲡⲉⲕⲉⲣϣⲓϣⲓ ⲭⲱⲣⲓⲥⲁⲛⲁϣ ⲟⲩⲟϩ ⲛⲛⲉⲕⲉⲣⲛⲟⲃⲓ ⲉⲛⲉϩ
Therefore, if you eat, eat according to your will; if you refrain from eating, refrain according to your ability without making an oath, and may you never sin.
bohairic.lausiac_01:72
ⲟⲩⲛⲟⲩϯ ⲅⲁⲣ ⲡⲉ ⲡⲓⲕⲁϯ ⲉⲧϣⲟⲡ ⲛϧⲏⲧⲉⲛ ⲉϥϯ ⲟⲩⲃⲉⲛⲓⲕⲓⲙ ⲛⲧⲉⲡⲓⲡⲛⲉⲩⲙⲁ ⲉⲧϩⲱⲟⲩ ⲉⲑⲃⲟⲧⲥ ⲉⲣⲟⲛ ⲉⲧⲉⲛⲓⲙⲉⲩⲓ ⲛⲉ ⲉϥϩⲓⲟⲩⲓ ⲉⲃⲟⲗ ⲛⲛⲏⲉⲧⲉⲣⲃⲟⲛⲓ ⲉϥⲓⲛⲓ ⲇⲉ ⲉϧⲟⲩⲛ ⲛⲛⲏ ⲉⲧϯϩⲏⲟⲩ ⲛⲁⲛ
For the intelligence that resides in us is divine, fighting against the harmful movements of the evil spirit battling against us—that is, our thoughts—driving out those that are harmful and bringing in those that benefit us.
bohairic.lausiac_01:73
ⲡⲓⲑⲙⲏⲓ ⲅⲁⲣ ⲙⲙⲟⲛ ⲛⲟⲙⲟⲥ ⲭⲏ ϩⲓϫⲱϥ ⲁϥⲧⲟⲙϥ ⲅⲁⲣ ⲉⲫⲛⲟⲩϯ ⲡϭⲟⲉⲓⲥ ⲡⲉ ⲉⲧⲟⲓ ⲛⲛⲟⲙⲟⲥ ⲛⲁϥ .
For the law is not placed upon the righteous, for they are united with God, and the Lord Himself is their law.
bohairic.lausiac_01:74
ⲛⲁⲛⲉⲥ ⲅⲁⲣ ⲉⲥⲉⲏⲣⲡ ϩⲉⲛ ⲟⲩⲥⲟϭⲛⲓ ⲉⲛⲁⲛⲉϥ ⲉϩⲟⲧⲉ ⲉⲥⲉⲙⲱⲟⲩ ϧⲉⲛⲟⲩⲙⲉⲧϭⲁⲥⲓϩⲏⲧ
It is better, therefore, to drink wine with good judgment than to drink water with pride.
bohairic.lausiac_01:75
ⲙⲁϩⲑⲏⲕ ⲟⲩⲛ ⲉⲛⲓⲑⲙⲏⲓ ⲛⲏ ⲉⲧⲁⲩⲥⲉⲏⲣⲡ ϧⲉⲛⲟⲩⲥⲟϭⲛⲓ ⲉⲛⲁⲛⲉϥ ⲟⲩⲟϩ ⲙⲡⲉⲣϯϩⲑⲏⲕ ⲉⲛⲓⲣⲱⲙⲓ ⲛⲥⲙⲟⲧ ⲛⲇⲁⲓⲙⲱⲛ ⲛⲏ ⲉⲧⲥⲉⲙⲱⲟⲩ ϧⲉⲛⲟⲩⲙⲉⲩⲓ ⲉϥⲥⲙⲟⲛⲧ ⲁⲛ
Consider those righteous ones who drank wine with good judgment, and do not regard as images of demons those who drink water with improper thoughts.
bohairic.lausiac_01:76
ⲉⲓⲙⲫⲣⲏϯ ⲁⲛ ϫⲉⲉⲓϣⲱϣϥ ⲓⲉ ⲉⲓϯϩⲁⲡ ⲫⲏ ⲅⲁⲣ ⲉⲑⲟⲩⲱⲙ ⲁϥⲟⲩⲱⲙ ⲙⲡϭⲟⲉⲓⲥ ⲟⲩⲟϩ ϥϣⲉⲡϩⲙⲟⲧ ⲛⲧⲉⲛⲫⲛⲟⲩϯ ⲫⲏ ⲟⲛ ⲉⲑⲟⲩⲱⲙ ⲁⲛ ⲁϥⲟⲩⲱⲙ ⲁⲛ ⲙⲡϭⲟⲉⲓⲥ ⲟⲩⲟϩ ϥϣⲉⲡϩⲙⲟⲧ ⲛⲧⲉⲛⲫⲛⲟⲩϯ
I am not one to criticize or judge, for the one who eats, eats to the Lord and gives thanks to the Lord; and the one who does not eat, does not eat to the Lord and gives thanks to God.
bohairic.lausiac_01:77
ⲁⲗⲗⲁ ⲡⲓϩⲱⲃ ϭⲓ ⲉⲑⲣⲉ ⲡϧⲓⲥⲓ ⲙⲡⲓⲣⲱⲙⲓ ϣⲱⲡⲓ ϧⲉⲛⲡⲁⲣⲉϩ ⲙⲡⲓⲥⲟϭⲛⲓ ⲙⲏⲡⲱⲥ ⲛⲧⲉϥϩⲉⲓ ⲉⲟⲩⲥⲱⲃⲓ ⲛⲧⲉⲛⲓⲇⲁⲓⲙⲱⲛ
But it is very important that a person's affliction be carried out rationally, lest they fall into the mockery of demons.
bohairic.lausiac_01:78
ϯϣⲱϣϥ ⲁⲛ ⲛⲛⲓϧⲣⲏⲟⲩⲓ ⲟⲩⲇⲉ ϯϣⲟⲩϣⲟⲩ ⲉϫⲱⲟⲩ ⲁⲛ ⲟⲛ ⲁⲗⲗⲁ ⲙⲁⲗⲗⲟⲛ ϯϣⲟⲩϣⲟⲩ ⲉϫⲉⲛϯⲅⲛⲱⲙⲏ ⲉⲧϭⲓ ⲉⲃⲟⲗ ϧⲉⲛⲛⲓϧⲣⲏⲟⲩⲓ ϧⲉⲛⲟⲩⲥⲟϭⲛⲓ ⲛⲕⲁⲗⲱⲥ
I do not criticize food, nor do I exalt it with praise, but rather the judgment that receives food with good counsel.
bohairic.lausiac_01:79
ⲛⲏ ⲉⲧϭⲓ ⲉⲃⲟⲗ ϧⲉⲛⲛⲓϧⲣⲏⲟⲩⲓ ⲛⲕⲁⲗⲱⲥ ϯⲓⲣⲓ ⲙⲙⲱⲟⲩ ⲛϫⲱⲃ ⲟⲩⲟϩ ⲛⲁⲧⲉⲙⲓ .
Those who receive good food I consider weak and ignorant.
bohairic.lausiac_01:80
ⲁⲛⲁⲩ ⲉⲡⲓⲙⲁⲕⲁⲣⲓⲟⲥ ⲓⲱⲥⲏⲫ ϫⲉⲁϥⲥⲉⲏⲣⲡ ϧⲉⲛⲟⲩⲥⲟϭⲛⲓ ϧⲉⲛⲡⲓⲕⲁϩⲓ ⲛⲭⲏⲙⲓ ⲁⲗⲗⲁ ⲙⲡⲉϥϣⲓⲃϯ ⲛϫⲉⲡⲉϥⲕⲁϯ ⲟⲩⲇⲉ ⲙⲡⲉⲧⲉϥⲥⲃⲱ ⲧⲁⲕⲟ
Look at the blessed Joseph: he drank wine with good judgment in the land of Egypt, but his mind was not changed, nor was his discipline corrupted.
bohairic.lausiac_01:81
ⲛⲁϥⲧⲁϫⲣⲏⲟⲩⲧ ⲅⲁⲣ ⲡⲉ ⲛϫⲉⲡⲉϥϩⲏⲧ ⲟⲩⲟϩ ⲙⲡⲉⲥϣϫⲉⲙϫⲟⲙ ⲛⲉⲣϩⲁⲗ ⲙⲙⲟϥ ⲛϫⲉⲧⲉϥϭⲟⲉⲓⲥ ⲉⲡϭⲱϧⲉⲙ .
For his heart was steadfast, and his master's wife could not deceive him into defilement.
bohairic.lausiac_01:82
ⲁⲩⲥⲉⲙⲱⲟⲩ ϩⲱⲟⲩ ⲛϫⲉⲛⲓⲫⲓⲗⲟⲥⲟⲫⲟⲥ ⲉⲧⲉⲡⲩⲑⲁⲅⲟⲣⲁⲥ ⲡⲉ ⲛⲉⲙⲇⲓⲟⲅⲉⲛⲏⲥ ⲛⲉⲙⲡⲗⲁⲧⲱⲛ ⲛⲉⲙⲛⲓⲕⲉⲙⲁⲛⲓⲭⲉⲟⲥ ⲉⲧⲁⲩⲓ ⲉⲃⲟⲗ ⲛϧⲏⲧⲟⲩ ⲛⲉⲙϯⲑⲱⲟⲩⲧⲥ ⲧⲏⲣⲥ ⲛⲧⲉⲛⲓⲥⲁⲃⲉⲩ ⲛⲛⲟⲩϫ ⲛⲁⲓ ⲉⲧⲁⲩⲥⲣⲱϥⲧ ⲉϩⲁⲛⲛⲓϣϯ ⲛⲛⲟⲃⲓ ⲛⲧⲁⲓⲙⲁⲓⲏ ϩⲱⲥⲧⲉ ⲛⲧⲟⲩϣⲱⲡⲓ ⲛⲁⲧⲥⲟⲩⲉⲛⲫⲛⲟⲩϯ ⲟⲩⲟϩ ⲛⲧⲟⲩⲟⲩⲱϣⲧ ⲛⲛⲓⲓⲇⲱⲗⲟⲛ ⲉⲧⲥⲟϥ .
On the other hand, philosophers such as Pythagoras, Diogenes, Plato, and the Manichees who originated from them, and all the groups of false sages, drank water and committed such great sins of this kind that they forgot God and worshiped impure idols.
bohairic.lausiac_01:83
ⲁⲩⲥⲉⲏⲣⲡ ϩⲱⲟⲩ ⲛⲉⲙⲡⲉⲛϭⲟⲉⲓⲥ ⲓⲏⲥⲟⲩⲥ ⲡⲭⲣⲓⲥⲧⲟⲥ ⲛϫⲉⲛⲁⲛⲏⲓ ⲙⲡⲉⲧⲣⲟⲥ ⲡⲓⲁⲡⲟⲥⲧⲟⲗⲟⲥ ⲛⲉⲙⲛⲉϥⲙⲁⲑⲏⲧⲏⲥ ⲧⲏⲣⲟⲩ ϩⲱⲥⲧⲉ ⲛⲥⲉⲭⲣⲉⲙⲣⲉⲙ ⲛϫⲉⲛⲓⲓⲟⲩⲇⲁⲓ ⲛⲥⲁⲡⲓⲣⲉϥϯⲥⲃⲱ ⲉⲩϫⲱ ⲙⲙⲟⲥ ⲛⲁϥ ϫⲉⲉⲑⲃⲉⲟⲩ ⲛⲉⲕⲙⲁⲑⲏⲧⲏⲥ ⲥⲉⲉⲣⲛⲏⲥⲧⲉⲩⲓⲛ ⲁⲛ ⲙⲫⲣⲏϯ ⲛⲛⲓⲙⲁⲑⲏⲧⲏⲥ ⲛⲧⲉⲓⲱⲁⲛⲛⲏⲥ
Those in the house of Peter and all the disciples of our Lord Jesus Christ also drank wine with Him, so much so that the Jews murmured against the Master, saying: “Why do your disciples not fast like John's disciples?”
bohairic.lausiac_01:84
ⲟⲩⲟϩ ⲁⲡϭⲟⲉⲓⲥ ⲥⲟϩⲓ ⲛⲧⲟⲩⲙⲉⲧⲁⲧϩⲏⲧ ⲉϥϫⲱ ⲙⲙⲟⲥ ϫⲉⲙⲙⲟⲛ ϣϫⲟⲙ ⲛⲧⲉⲛⲓϣⲫⲏⲣⲓ ⲛⲧⲉⲡⲓⲡⲁⲧϣⲉⲗⲉⲧ ⲉⲣⲛⲏⲥⲧⲉⲩⲓⲛ ϩⲟⲥⲟⲛ ⲉⲣⲉⲡⲓⲡⲁⲧϣⲉⲗⲉⲧ ⲛⲉⲙⲱⲟⲩ ⲉⲧⲉⲁⲛⲟⲕ ⲡⲉ ⲉⲧϣⲟⲡ ϧⲉⲛⲟⲩⲕⲁϯ ⲛⲉⲙⲡⲟⲩⲥⲟϭⲛⲓ ⲉⲑⲛⲁⲛⲉϥ .
But the Lord rebuked their foolishness, saying: “The sons of the bridegroom cannot fast while the bridegroom is with them,” meaning that He Himself, who dwelt in their minds and good counsel, was present with them.
bohairic.lausiac_01:85
ⲡⲁⲗⲓⲛ ⲟⲛ ⲁⲩϫⲉⲙⲁⲣⲓⲕⲓ ⲉⲛⲉϥⲙⲁⲑⲏⲧⲏⲥ ϫⲉⲉⲧⲃⲉⲟⲩ ⲡⲉⲧⲉⲛⲣⲉϥϯⲥⲃⲱ ϥⲟⲩⲱⲙ ⲟⲩⲟϩ ϥⲥⲱ ⲛⲉⲙⲛⲓⲧⲉⲗⲱⲛⲏⲥ ⲛⲉⲙⲛⲓⲣⲉϥⲉⲣⲛⲟⲃⲓ
Again, they rebuked His disciples, saying: “Why does your teacher eat and drink with publicans and sinners?”
bohairic.lausiac_01:86
ⲛⲁⲩϫⲉⲙⲁⲣⲓⲕⲓ ⲁⲛ ⲡⲓϫⲁⲓ ⲉⲃⲏⲗ ϫⲉϧⲉⲛⲟⲩⲙⲉⲑⲙⲏⲓ ⲁϥⲟⲩⲱⲙ ⲟⲩⲟϩ ⲁϥⲥⲱ .
They did not criticize in vain only because He truly ate and drank.
bohairic.lausiac_01:87
ⲁϥⲉⲣⲟⲩⲱ ⲛϫⲉⲡⲉⲛϭⲟⲉⲓⲥ ⲓⲏⲥⲟⲩⲥ ⲡⲭⲣⲓⲥⲧⲟⲥ ϫⲉⲁϥⲓ ϩⲁⲣⲱⲧⲉⲛ ⲛϫⲉⲓⲱⲁⲛⲛⲏⲥ ⲡⲓⲣⲉϥϯⲱⲙⲥ ⲛϥⲟⲩⲱⲙ ⲁⲛ ⲟⲩⲇⲉ ⲛϥⲥⲱ ⲁⲛ ⲡⲉϫⲱⲧⲉⲛ ϫⲉⲟⲩⲟⲛ ⲟⲩⲇⲁⲓⲙⲱⲛ ⲛⲉⲙⲁϥ ⲉϥϫⲱ ⲙⲙⲟⲥ ϫⲉⲛⲁϥⲟⲩⲉⲙⲁϥ ⲡⲉ ⲟⲩⲇⲉ ⲛⲁϥⲥⲉⲏⲣⲡ ⲁⲛ ⲡⲉ ⲙⲙⲟⲛ ⲉϣ ⲟⲩⲣⲱⲙⲓ ⲱⲛϧ ϧⲉⲛⲡⲓⲥⲱⲙⲁ ⲛⲁⲧϥⲟⲩⲉⲙϧⲣⲉ ⲛⲉⲙⲙⲱⲟⲩ ⲉⲥⲱ .
The Lord Jesus Christ answered them: “John the Baptist came to you neither eating nor drinking, and you said, ‘He has a demon’ (for he did not eat meat nor drink wine, though no one can live in the body without eating food or drinking water);
bohairic.lausiac_01:88
ⲁϥⲓ ⲛϫⲉⲡϣⲏⲣⲓ ⲙⲫⲣⲱⲙⲓ ⲉϥⲟⲩⲱⲙ ⲟⲩⲟϩ ⲉϥⲥⲱ ⲡⲉϫⲱⲧⲉⲛ ϫⲉⲓⲥ ⲟⲩⲣⲱⲙⲓ ⲛⲣⲉϥⲟⲩⲱⲙ ⲟⲩⲟϩ ⲛⲣⲉϥⲥⲱ ⲉϥⲟⲓ ⲛϣⲫⲏⲣ ⲉⲛⲓⲧⲉⲗⲱⲛⲏⲥ ⲛⲉⲙⲛⲓⲣⲉϥⲉⲣⲛⲟⲃⲓ
The Son of Man came eating and drinking, and you say, ‘Behold a man who eats and drinks, who is a friend of publicans and sinners.’”
bohairic.lausiac_01:89
ⲟⲩⲟϩ ⲁⲥⲁⲙⲁϩⲓ ⲛϫⲉϯⲥⲟⲫⲓⲁ ⲉⲃⲟⲗ ϧⲉⲛⲛⲉⲥϩⲃⲏⲟⲩⲓ .
Thus, Wisdom was fulfilled by its deeds.
bohairic.lausiac_01:90
ⲭⲟⲩⲱϣ ⲛⲧⲉⲛⲉⲣⲟⲩ ϫⲉ ⲁⲛⲟⲛ ⲟⲩⲇⲉ ⲛⲏ ⲉⲧϣⲟⲩϣⲟⲩ ⲉϫⲱⲛ ⲟⲩⲇⲉ ⲛⲏ ⲉⲧϯϣⲱϣ ⲛⲁⲛ ⲙⲡⲉⲛⲑⲣⲉⲛⲙⲟϣⲓ ⲛⲥⲱⲟⲩ ⲁⲗⲗⲁ ⲙⲁⲣⲉⲛⲙⲟϣⲓ ⲛⲉⲙⲓⲱⲁⲛⲛⲏⲥ ⲡⲓⲣⲉϥϯⲱⲙⲥ ⲛⲧⲉⲛⲉⲣⲛⲏⲥⲧⲉⲩⲓⲛ ⲛⲉⲙⲁϥ ϧⲉⲛⲟⲩⲕⲁϯ ⲕⲁⲛ ⲁⲩϣⲁⲛϫⲟⲥ ϫⲉⲟⲩⲟⲛ ⲟⲩⲇⲁⲓⲙⲱⲛ ⲛⲉⲙⲱⲟⲩ
What then do you think we should do? Let us follow neither those who heap praises on us nor those who criticize us, but let us follow John the Baptist, let us fast intelligently with him, even if they say, “He has a demon.”
bohairic.lausiac_01:91
ⲟⲩⲟϩ ⲙⲁⲣⲉⲛⲥⲉⲏⲣⲡ ⲛⲧⲉⲛⲟⲩⲉⲙⲧⲉⲃⲧ ⲛⲉⲙⲡⲭⲣⲓⲥⲧⲟⲥ ϧⲉⲛⲟⲩϣⲉⲡϩⲙⲟⲧ ⲛⲉⲙⲟⲩⲕⲁϯ ⲉϣⲱⲡ ⲉⲣⲉⲧⲉⲛⲥⲁⲣⲝ ϣⲱⲛⲓ ⲓⲉ ⲉⲥⲉⲣⲭⲣⲓⲁ
And let us drink wine and eat fish with Christ in thanksgiving and with good counsel if our flesh is weak or in need, even if they say, “Behold, men who eat meat and drink wine.”
bohairic.lausiac_01:92
ⲟⲩⲟϩ ϯⲙⲉⲧⲁⲑⲟⲩⲱⲙ ϩⲗⲓ ⲡⲉ ⲁⲗⲗⲁ ⲡⲓⲛⲁϩϯ ⲉⲧⲥⲟⲩⲧⲱⲛ ⲡⲉ ⲉⲧⲟⲩⲕⲱϯ ⲛⲥⲱϥ ⲛⲧⲟⲧⲉⲛ ⲛⲉⲙⲡⲓⲁⲣⲉϩ ⲛⲧⲉⲛⲓⲉⲛⲧⲟⲗⲏ ⲉⲡⲁⲓⲧⲟⲩ ϧⲉⲛⲟⲩⲱⲛϩ ⲉⲃⲟⲗ ⲛⲧⲉⲛⲓϩⲃⲏⲟⲩⲓ ⲉⲑⲛⲁⲛⲉⲩ .
For not eating is nothing, but what matters is right faith, which is required of you, and the observance of the commandments, which is made evident through good works.
bohairic.lausiac_01:93
ⲉϣⲱⲡ ⲟⲩⲛ ⲉⲣⲉⲡⲓⲛⲁϩϯ ⲙⲟϣⲓ ⲛⲥⲁϩⲱⲃ ⲛⲓⲃⲉⲛ ⲉⲧⲉⲛⲛⲁⲁⲓⲧⲟⲩ ⲉⲑⲃⲉⲫⲛⲟⲩϯ ⲓⲧⲉ ⲡⲓⲟⲩⲱⲙ ⲓⲧⲉ ⲡⲓⲥⲱ ⲓⲧⲉ ⲕⲉϩⲱⲃ ⲕⲉϩⲱⲃ ⲉⲩⲉϣⲱⲡⲓ ⲉⲩⲟⲓ ⲛⲁⲧϯϩⲁⲡ ⲉⲣⲱⲟⲩ ⲉⲑⲃⲉⲡⲓⲛⲁϩϯ ⲉⲧⲥⲟⲩⲧⲱⲛ .
If, therefore, every good work we do for God is accompanied by faith—whether eating, drinking, or any other act—such works cannot be condemned because of right faith.
bohairic.lausiac_01:94
ϩⲱⲃ ⲇⲉ ⲛⲓⲃⲉⲛ ⲉⲧⲥⲁⲃⲟⲗ ⲙⲫⲛⲁϩϯ ⲫⲛⲟⲃⲓ ⲡⲉ .
However, any work done apart from faith is sin.
bohairic.lausiac_01:95
ⲁⲗⲗⲁ ⲉⲡⲓⲇⲏ ⲛⲏⲕⲉⲟⲩⲟⲛ ⲉⲑⲟⲩⲱⲙ ϧⲉⲛⲟⲩⲡⲁⲑⲟⲥ ⲛⲉⲙⲟⲩϩⲩⲇⲟⲛⲏ ⲉⲩϫⲱ ⲙⲙⲟⲥ ϫⲉⲛⲟⲩⲱⲙ ϧⲉⲛⲟⲩⲛⲁϩϯ ⲁⲗⲗⲁ ⲥⲉⲟⲩⲱⲙ ⲁⲛ ϧⲉⲛⲟⲩϣⲓ ⲉϥⲣⲱϣⲓ ⲁⲗⲗⲁ ϧⲉⲛⲟⲩⲙⲉⲧⲁⲧⲥⲓ ⲛⲧⲉⲟⲩϩⲩⲇⲟⲛⲏ ⲡⲱⲥ ⲧⲉⲛⲛⲁⲉⲙⲓ ⲉⲣⲱⲟⲩ .
But since there are those who eat with passion and indulgence, saying, “We eat with faith,” and who do not eat according to the measure of sufficiency but with insatiable greed, how shall we discern them?
bohairic.lausiac_01:96
ⲧⲉⲛⲛⲁⲉⲙⲓ ϥϫⲱ ⲅⲁⲣ ⲙⲙⲟⲥ ⲛϫⲉⲡⲉⲛⲥⲱⲧⲏⲣ ⲡⲭⲣⲓⲥⲧⲟⲥ ϫⲉⲉⲃⲟⲗ ϧⲉⲛⲛⲟⲩⲟⲩⲧⲁϩ ⲉⲣⲉⲧⲉⲛⲥⲟⲩⲱⲛⲟⲩ .
Certainly, we will recognize them, for Christ, our Savior, says: “You will know them by their fruits.”
bohairic.lausiac_01:97
ⲡⲟⲩⲧⲁϩ ⲇⲉ ⲛⲧⲉⲛⲏ ⲉⲧⲉⲣⲁⲅⲱⲛⲓⲍⲉⲥⲑⲉ ϧⲉⲛⲟⲩⲙⲉⲑⲙⲏⲓ ⲫⲁⲓ ⲡⲉ ⲕⲁⲧⲁⲫⲣⲏϯ ⲉⲧⲁϥϫⲟⲥ ⲛϫⲉⲡⲓⲁⲡⲟⲥⲧⲟⲗⲟⲥ ϫⲉⲧⲁⲅⲁⲡⲏ ⲫⲣⲁϣⲓ ϯϩⲓⲣⲓⲛⲏ ϯⲙⲉⲧⲣⲉϥⲱⲟⲩ ⲛϩⲏⲧ ϯⲙⲉⲧⲭⲣⲓⲥⲧⲟⲥ ϯⲙⲉⲧⲁⲅⲁⲑⲟⲥ ⲫⲛⲁϩϯ ϯⲙⲉⲧⲣⲉⲙⲣⲁⲩϣ ϯⲉⲛⲕⲣⲁⲧⲓⲁ
The fruits of those who strive in righteousness are, as the Apostle says: love, joy, peace, patience, kindness, goodness, faith, gentleness, and self-control.
bohairic.lausiac_01:98
ⲫⲁⲓ ⲡⲉ ⲛⲟⲩⲧⲁϩ ⲛⲧⲉⲡⲓⲡⲛⲉⲩⲙⲁ
These are the fruits of the Spirit.
bohairic.lausiac_01:99
ⲟⲧⲓ ⲇⲉ ϫⲉ ⲫⲏ ⲉⲑⲟⲩⲱϣ ⲉϯ ⲙⲡⲁⲓⲣⲏϯ ϥⲛⲁⲟⲩⲱϣ ⲁⲛ ⲉⲟⲩⲉⲙⲁϥ ⲓⲉ ⲉⲥⲉⲏⲣⲡ ϧⲉⲛⲟⲩⲙⲉⲧⲁⲧⲥⲟϭⲛⲓ ⲓⲉ ϧⲉⲛⲟⲩⲙⲉⲧⲁⲧϧⲟⲧϧⲉⲧ ⲟⲩⲇⲉ ϥⲛⲁϯⲙⲁϯ ⲁⲛ ⲉϫⲉⲛⲟⲩⲥⲩⲛⲏⲇⲏⲥⲓⲥ ⲉⲥϩⲱⲟⲩ
But whoever desires these fruits will not desire to eat meat or drink wine imprudently or carelessly, nor will they find satisfaction in a guilty conscience.
bohairic.lausiac_01:100
ϥⲛⲁⲥⲟϩⲓ ⲙⲙⲟϥ ⲛϫⲉⲡⲁⲩⲗⲟⲥ ⲉϥϫⲱ ⲙⲙⲟⲥ ϫⲉⲫⲏ ⲉⲧⲉⲣⲁⲅⲱⲛⲓⲍⲉⲥⲑⲉ ϣⲁϥⲁⲙⲟⲛⲓ ⲛⲧⲟⲧϥ ϧⲉⲛϩⲱⲃ ⲛⲓⲃⲉⲛ
Paul reproves such a person, saying: “Whoever competes abstains from all things.”
bohairic.lausiac_01:101
ⲉϣⲱⲡ ⲟⲩⲛ ⲉⲣⲉⲧⲉⲛⲥⲁⲣⲝ ⲭⲏ ⲥⲁⲃⲟⲗ ⲛϣⲱⲛⲓ ϣⲁϥⲁⲙⲟⲛⲓ ⲛⲧⲟⲧϥ ϧⲉⲛϩⲱⲃ ⲛⲓⲃⲉⲛ
If, therefore, our flesh is healthy, one will abstain from all things;
bohairic.lausiac_01:102
ⲉϣⲱⲡ ⲉⲣⲉⲧⲉϥⲥⲁⲣⲝ ⲇⲉ ⲭⲏ ϧⲉⲛϩⲁⲛϣⲱⲛⲓ ⲓⲉ ⲉⲥⲭⲏ ϧⲉⲛϩⲁⲛϧⲓϯ ⲓⲉ ⲉϥⲟⲓ ⲛⲙⲕⲁϩ ⲛϩⲏⲧ ϥⲛⲁⲟⲩⲱⲙ ⲟⲩⲟϩ ϥⲛⲁⲥⲱ ⲉϥⲟⲓ ⲙⲫⲣⲏϯ ϫⲉⲡⲓⲟⲩⲱⲙ ⲛⲉⲙⲡⲓⲥⲱ ⲁⲩⲟⲓ ⲙⲫⲁϧⲣⲓ ⲛⲧⲉⲡⲓⲙⲕⲁϩ ⲛϩⲏⲧ ⲛⲧⲉⲛⲓϣⲱⲛⲓ ⲛⲉⲙⲛⲓϧⲟϯ ⲉⲧϧⲉⲛⲡⲉϥⲥⲱⲙⲁ ϫⲉϩⲓⲛⲁ ⲛⲧⲉϥϫⲉⲙϫⲟⲙ ⲛϥⲁⲓ ϧⲁⲡⲓϣⲱⲛⲓ ⲛⲧⲉⲡⲓⲥⲱⲙⲁ
But if their body suffers from illness or pain, or if they are in sorrow, they will eat and drink so that food and drink may serve as remedies for the illness, pain, or sorrow within them, enabling them to endure the affliction of the body.
bohairic.lausiac_01:103
ϥⲛⲁⲁⲙⲟⲛⲓ ⲛⲧⲟⲧϥ ϩⲱϥ ⲥⲁⲃⲟⲗ ⲛⲛⲏ ⲉⲧⲉⲣⲃⲟⲛⲓ ⲛϯⲯⲩⲭⲏ ⲉⲧⲉⲡⲓϫⲱⲛⲧ ⲡⲉ ⲛⲉⲙⲡⲓⲫⲑⲟⲛⲟⲥ ⲛⲉⲙ ϯⲕⲁⲧⲁⲗⲁⲗⲓⲁ ⲛⲉⲙⲡⲓⲙⲟⲥϯ ⲛⲉⲙⲡⲓⲭⲟϩ ⲛⲉⲙϯⲙⲉⲧⲣⲉϥϯϣⲱϣ ⲛⲉⲙϯⲙⲉⲧϭⲁⲥⲓϩⲏⲧ ⲉⲃⲟⲗ ⲙⲫⲛⲟⲩϯ ⲛⲉⲙⲛⲉϥⲁⲅⲅⲉⲗⲟⲥ
However, they will abstain from those things that harm the soul, such as anger, envy, vanity, hatred, jealousy, insult, and pride in the sight of God and His angels.
bohairic.lausiac_01:104
ⲟⲩⲟϩ ⲉⲧⲓ ⲉϥⲭⲏ ϧⲉⲛⲛⲓϣⲱⲛⲓ ⲛⲧⲉⲡⲓⲥⲱⲙⲁ ϥⲛⲁϣⲉⲡϩⲙⲟⲧ ⲛⲧⲉⲛⲫⲛⲟⲩϯ ⲛⲥⲏⲟⲩ ⲛⲓⲃⲉⲛ .
And while they endure this bodily affliction, they will give thanks to God at all times.
bohairic.lausiac_01:105
ϯⲛⲁⲕⲏⲛ ⲇⲉ ϯⲛⲟⲩ ⲉⲓⲥⲁϫⲓ ⲛⲉⲙⲁⲕ ⲉⲑⲃⲉⲡⲁⲓϩⲱⲃ ⲁ ⲫⲣⲱϣⲓ ϣⲱⲡⲓ
Now I will conclude my discourse with you on these matters: it is sufficient.
bohairic.lausiac_01:106
ϯϯϩⲟ ⲟⲩⲛ ⲉⲧⲉⲕⲙⲉⲧⲙⲁⲓⲥⲃⲱ ϧⲉⲛⲡⲁⲓ ⲕⲉⲟⲩⲁⲓ ⲉⲑⲣⲉⲕⲫⲱⲧ ⲥⲁⲃⲟⲗ ⲙⲡⲓϫⲓⲛⲉⲣⲁⲡⲁⲛⲧⲁⲛ ⲛⲧⲉⲛⲓⲣⲱⲙⲓ ⲉⲧⲉⲙⲙⲟⲛ ⲛϧⲏⲧⲟⲩ ϧⲉⲛⲡⲓⲥⲙⲟⲧ ⲙⲉⲛⲛⲧⲉⲡⲟⲩϫⲓⲛⲱⲛϧ ⲛⲉⲙⲧⲟⲩⲡⲟⲗⲏⲧⲓⲁ
I also ask, for the sake of your love of knowledge, that you avoid associating with people from whom no benefit comes, nor follow the pattern of their lives or leadership.
bohairic.lausiac_01:107
ⲉⲩⲥⲟⲗⲥⲉⲗ ⲅⲁⲣ ⲙⲡⲓϣⲁⲣ ⲛⲧⲉⲥⲁⲃⲟⲗ ⲙⲙⲁⲩⲁⲧϥ ⲉⲧⲧⲟⲓ ϩⲓⲱⲧⲟⲩ ⲥⲁϧⲟⲩⲛ ⲇⲉ ⲙⲙⲱⲟⲩ ⲧⲟⲩⲃⲏⲟⲩⲧ ⲁⲛ .
For they decorate the exterior, like a skin that is clean only on the outside, but not the interior.
bohairic.lausiac_01:108
ⲉϣⲱⲡ ⲇⲉ ⲛⲧⲟⲩϫⲟⲥ ϫⲉⲡⲉⲛⲛⲁϩϯ ⲥⲟⲩⲧⲱⲛ ⲟⲩⲟϩ ⲛⲧⲉⲕⲙⲟϣⲧⲟⲩ ϧⲉⲛⲡⲉⲕⲕⲁϯ ⲛⲧⲉⲕⲛⲁⲩ ⲉⲛⲓⲟⲩⲧⲁϩ ϫⲉⲛⲁⲡⲓⲛⲁϩϯ ⲉⲧⲥⲟⲩⲧⲱⲛ ⲛⲉ ⲓⲉ ⲕⲁⲗⲱⲥ ⲕⲉⲣⲁⲡⲁⲛⲧⲁⲛ ⲉⲣⲱⲟⲩ
If they say, “Our faith is right,” and if you examine them with your understanding to see whether the fruits of true faith are present in them, then you may associate with them.
bohairic.lausiac_01:109
ⲉϣⲱⲡ ⲇⲉ ⲉⲩⲟⲓ ⲛϩⲉⲣⲉⲥⲓⲥ ⲉⲩϯⲟⲥⲓ ϧⲉⲛⲡⲟⲩϫⲓⲛⲛⲁⲩ ⲛⲉⲙⲧⲟⲩⲙⲉⲧϣⲟⲃⲓ ⲕⲁⲛ ⲉϣⲱⲡ ⲉⲩⲣⲏⲧ ⲛⲥⲭⲓⲙ ⲟⲩⲟϩ ⲉⲣⲉⲡⲟⲩϩⲟ ⲟⲓ ⲛⲉϥϫⲓ ϧⲉⲛϯⲙⲉⲧϧⲉⲗⲗⲟ ⲉϣⲱⲡ ⲙⲙⲟⲛ ⲟⲩⲧⲁϩ ⲛⲧⲉⲫⲛⲟⲩϯ ϣⲟⲡ ⲛϧⲏⲧⲟⲩ ⲁⲛ ⲁⲣⲓⲡⲁⲣⲉⲧⲓⲥⲑⲉ ⲙⲡⲟⲩϫⲓⲛⲛⲁⲩ ⲉⲣⲱⲟⲩ
But if they are heretics, offering harm through their appearance and hypocrisy—even if their hair is white and their faces show the marks of old age—if they do not bear the fruits of God, avoid their company.
bohairic.lausiac_01:110
ⲕⲁⲛ ⲁⲕϣⲁⲛϫⲟⲥ ϫⲉⲥⲉⲛⲁⲉⲣⲃⲗⲁⲡⲧⲓⲛ ⲙⲙⲟⲓ ⲁⲛ ⲉⲑⲃⲉⲡⲓⲥⲙⲟⲧ ⲛⲧⲉⲧⲉⲕⲙⲉⲧⲉⲩⲥⲉⲃⲏⲥ ϫⲉⲥⲉⲛⲁϣⲃⲱⲗ ⲙⲡⲉⲧϭⲱⲗⲕ ⲉⲃⲟⲗ ⲁⲛ ⲓⲉ ⲁⲣⲏⲟⲩ ⲭⲛⲁϭⲁⲥⲕ ⲉϫⲱⲟⲩ ⲓⲉ ⲛⲧⲉⲕⲥⲱⲃⲓ ⲙⲙⲱⲟⲩ
Even if you say, “They will not harm me,” because of the strength of your piety, do not let them weaken your fervor, nor make yourself proud before them, nor mock them.
bohairic.lausiac_01:111
ⲁⲗⲗⲁ ⲥⲉⲛⲁⲙⲓϣⲓ ⲛⲧⲉⲕⲥⲩⲛⲏⲇⲏⲥⲓⲥ ϧⲉⲛⲟⲩⲥⲁϫⲓ ⲛϫⲉⲟⲩⲁⲓ ⲉⲧⲁⲩϫⲱ ⲙⲙⲱⲟⲩ ⲟⲩⲟϩ ⲥⲉⲛⲁⲧⲁⲕⲟ ⲛⲧⲉⲕⲯⲩⲭⲏ ϧⲉⲛⲟⲩⲥⲁϫⲓ ⲉⲧϩⲱⲟⲩ ⲉⲑⲙⲉϩ ⲛⲉⲩⲃⲗⲁⲥⲫⲏⲙⲓⲁ .
For they will attack your conscience with their blasphemous words and destroy your soul with evil and blasphemous speech.
bohairic.lausiac_01:112
ⲛⲑⲟⲕ ⲟⲩⲛ ϯⲛⲟⲩ ϣⲱⲡⲓ ⲉⲕϫⲟⲩϣⲧ ⲉⲃⲟⲗ ϧⲉⲛⲟⲩⲣⲱⲥ ⲛⲉⲙⲟⲩⲛⲟⲩⲥ ⲉϥⲉⲣⲟⲩⲱⲓⲛⲓ
Therefore, now consider them with clear speech and mind.
bohairic.lausiac_01:113
ⲟⲩⲟϩ ⲁⲣⲓⲁⲡⲁⲛⲧⲁⲛ ⲉⲛⲓⲣⲱⲙⲓ ⲉⲑⲟⲩⲁⲃ ⲉⲕϩⲓⲕⲁⲧ ⲉⲣⲱⲟⲩ ⲉⲕϭⲓ ⲛⲧⲟⲧⲟⲩ ⲛⲛⲓϩⲙⲟⲧ ⲛⲧⲉⲧⲉⲕⲯⲩⲭⲏ ϩⲓⲛⲁ ⲉⲃⲟⲗ ϩⲓⲧⲟⲧⲟⲩ ⲙⲫⲣⲏϯ ⲛⲉⲃⲟⲗϩⲓⲧⲉⲛⲟⲩϫⲱⲙ ⲛⲱϣ ⲛⲧⲉⲕϫⲉⲙϫⲟⲙ ⲛⲛⲁⲩ ⲉⲡⲉⲕϩⲏⲧ ϫⲉⲁⲛ ϥⲥⲙⲟⲛⲧ ⲓⲉ ⲉϥⲟⲓ ⲛⲕⲉⲣⲏϯ
Associate with holy men, seek them out, and receive grace for your soul from them so that, like reading books, you may see whether your heart is steadfast or not.
bohairic.lausiac_01:114
ϫⲉϩⲓⲛⲁ ⲉⲃⲟⲗ ϩⲓⲧⲟⲧⲥ ⲛϯϫⲓⲛⲛⲁⲩ ⲛⲧⲉⲛⲏ ⲉⲑⲟⲩⲁⲃ ⲛⲉⲙⲡⲓⲁⲟⲩⲁⲛ ⲛⲧⲉⲡⲟⲩϩⲟ ⲛⲉⲙⲛⲟⲩⲥⲭⲓⲙ ⲉⲑⲙⲉϩ ⲛϩⲙⲟⲧ ⲛⲉⲙⲡϫⲓⲛⲕⲱⲗϩ ⲛⲧⲉⲛⲟⲩϩⲃⲱⲥ ϧⲉⲛⲟⲩⲑⲉⲃⲓⲟ ⲛⲉⲙⲡⲟⲩϫⲓⲛⲥⲁϫⲓ ⲛⲁⲧⲙⲉⲧϭⲁⲥⲓϩⲏⲧ ⲛⲉⲙⲛⲟⲩⲗⲉⲝⲓⲥ ⲉⲑⲙⲉϩ ⲙⲙⲉⲧϣⲁⲙϣⲉⲛⲟⲩϯ ⲛⲉⲙⲡⲓϩⲙⲟⲧ ⲉⲧϧⲉⲛⲡⲟⲩⲕⲁϯ ⲉϥⲉϯⲛⲟⲙϯ ⲛⲁⲕ ⲛϩⲟⲩⲟ ⲕⲁⲛ ⲉⲕⲭⲏ ϧⲉⲛⲟⲩⲧⲱⲙⲧ
From the sight of holy men, their gracious countenance, and their aged, honorable hair, from their humble clothing and lack of pride, from their words full of piety, from their readings and grace, which reside in their understanding, you may draw great strength, even if you have been negligent.
bohairic.lausiac_01:115
ⲟⲩϫⲓⲛⲕⲱⲗϩ ⲅⲁⲣ ⲛⲧⲉϩⲁⲛϩⲃⲱⲥ ⲛⲧⲉⲟⲩⲣⲱⲙⲓ ⲛⲉⲙⲡⲓϫⲓⲛⲙⲟϣⲓ ⲛⲧⲉⲛⲉϥϭⲁⲗⲁⲩϫ ⲛⲉⲙⲡⲓⲛⲉϥⲧⲣⲱϥ ⲛⲥⲱⲃⲓ ⲛⲧⲉⲛⲓⲛⲁϫϩⲓ ⲥⲉⲟⲩⲱⲛϩ ⲙⲡⲓⲣⲱⲙⲓ ⲉⲃⲟⲗ ⲕⲁⲧⲁⲫⲣⲏϯ ⲉⲧⲥϧⲏⲟⲩⲧ ϧⲉⲛϯⲅⲣⲁⲫⲏ
For a person's clothing, the manner of their dress, their gait, and the way they laugh reveal what kind of person they are, as it is written in Scripture.
bohairic.lausiac_01:116
ⲉϣⲱⲡ ⲁⲓϣⲁⲛⲉⲣϩⲏⲧⲥ ⲙⲫⲓⲣⲓ ⲉⲡⲓϫⲓⲛⲱⲛϧ ⲛⲧⲉⲛⲉⲛⲓⲟϯ ϯⲛⲁⲭⲁⲟⲩⲧⲟⲡⲟⲥ ⲉⲃⲟⲗ ⲁⲛ ⲉⲁⲓϩⲱⲗ ⲉⲣⲟϥ ⲛⲧⲁϣⲧⲉⲙⲧⲁⲙⲟⲕ ⲉⲣⲟϥ ⲓⲧⲉ ⲛⲏ ⲉⲧϧⲉⲛⲛⲓⲃⲁⲕⲓ ⲓⲧⲉ ⲛⲏ ⲉⲧϧⲉⲛⲛⲓϯⲙⲓ ⲓⲧⲉ ⲛⲏ ⲉⲧϧⲉⲛⲡϣⲁϥⲉ ⲓⲧⲉ ⲛⲏ ⲉⲧϧⲉⲛⲧⲁⲛⲓⲣⲱⲙⲓ ⲛⲟⲩⲕⲟⲩϫⲓ
When I begin to tell you the lives of our Fathers, I will omit no place into which I have entered to instruct you—neither those who dwell in cities, nor in villages, nor in the desert, nor those who live only briefly among others.
bohairic.lausiac_01:117
ϫⲉⲟⲩⲏⲓ ⲅⲁⲣ ⲛⲓⲧⲟⲡⲟⲥ ⲁⲛ ⲡⲉ ⲧⲉⲛⲕⲱϯ ⲛⲥⲱⲟⲩ ⲛⲏ ⲉⲧⲁⲩϣⲱⲡⲓ ⲛϧⲏⲧⲟⲩ ⲁⲗⲗⲁ ⲉⲛⲕⲱϯ ⲛⲥⲁⲛⲟⲩⲧⲣⲟⲡⲟⲥ ⲛⲉⲙⲧⲟⲩⲡⲣⲟϩⲉⲣⲉⲥⲓⲥ ⲉϧⲟⲩⲛ ⲉⲫⲛⲟⲩϯ .
For we do not seek the places or the people who dwell in them, but rather their character and their choice for God.

Coptic SCRIPTORIUM, corpus bohairic.lausiac (github.com/CopticScriptorium/corpora). Licence as stated per document in the project's own meta.json and checked there at parse time. English, where present, is Coptic SCRIPTORIUM's aligned translation. Licence: CC-BY 4.0. Source.