Romans (Bohairic Coptic)

Coptic New Testament (Bohairic) · 433 sections

15.28
ⲫⲁⲓ ⲟⲩⲛ ⲁⲓϣⲁⲛϫⲟⲕϥ ⲉⲃⲟⲗ ⲛⲧⲁⲉⲣⲥⲫⲣⲁⲅⲓⲍⲓⲛ ⲙⲡⲁⲓⲟⲩⲧⲁϩ ⲛⲱⲟⲩ ⲉⲓⲉϣⲉ ⲛⲏⲓ ⲉⲃⲟⲗ ϩⲓⲧⲉⲛⲑⲏⲛⲟⲩ ⲉϯⲥⲡⲁⲛⲓⲁ .
When therefore I have accomplished this, and have sealed to them this fruit, I will go on by way of you to Spain.
15.29
ϯⲥⲱⲟⲩⲛ ⲇⲉ ϫⲉⲁⲓⲛⲏⲟⲩ ϩⲁⲣⲱⲧⲉⲛ ⲁⲓⲛⲏⲟⲩ ϧⲉⲛⲟⲩⲙⲟϩ ⲛⲥⲙⲟⲩ ⲛⲧⲉⲡⲭⲣⲓⲥⲧⲟⲥ .
I know that, when I come to you, I will come in the fullness of the blessing of the Good News of Christ.
15.30
ϯϯϩⲟ ⲟⲩⲛ ⲉⲣⲱⲧⲉⲛ ⲛⲁⲥⲛⲏⲟⲩ ⲉⲃⲟⲗ ϩⲓⲧⲉⲛⲡⲉⲛϭⲟⲓⲥ ⲓⲏⲥⲟⲩⲥ ⲡⲭⲣⲓⲥⲧⲟⲥ ⲛⲉⲙⲉⲃⲟⲗ ϩⲓⲧⲉⲛϯⲁⲅⲁⲡⲏ ⲛⲧⲉⲡⲓⲡⲛⲉⲩⲙⲁⲉⲑⲣⲉⲧⲉⲛⲉⲣⲁⲅⲱⲛⲓⲍⲉⲥⲑⲉ ⲛⲉⲙⲏⲓ ϧⲉⲛⲛⲉⲧⲉⲛⲡⲣⲟⲥⲉⲩⲭⲏ ⲉϩⲣⲏⲓ ⲉϫⲱⲓ ϩⲁⲫⲛⲟⲩϯ .
Now I beg you, brothers, by our Lord Jesus Christ, and by the love of the Spirit, that you strive together with me in your prayers to God for me,
15.31
ϩⲓⲛⲁ ⲛⲧⲁⲛⲟϩⲉⲙ ⲉⲃⲟⲗ ϩⲁⲛⲏ ⲉⲧⲟⲓ ⲛⲁⲧⲥⲱⲧⲉⲙ ϧⲉⲛϯⲓⲟⲩⲇⲉⲁ ⲟⲩⲟϩ ⲧⲁⲇⲓⲁⲕⲟⲛⲓⲁ ⲉⲓⲉⲣⲟⲥⲁⲗⲏⲙ ⲛⲧⲉⲥϣⲱⲡⲓ ⲉⲥϣⲏⲡ ⲉⲛⲓϩⲁⲅⲓⲟⲥ .
that I may be delivered from those who are disobedient in Judea, and that my service which I have for Jerusalem may be acceptable to the saints;
15.32
ϩⲓⲛⲁ ⲁⲓϣⲁⲛⲓ ϩⲁⲣⲱⲧⲉⲛ ϧⲉⲛⲟⲩⲣⲁϣⲓ ⲉⲃⲟⲗ ϩⲓⲧⲉⲛⲡⲉⲧⲉϩⲛⲉ ⲫⲛⲟⲩϯ ⲟⲩⲟϩ ⲛⲧⲁⲙⲧⲟⲛ ⲙⲙⲟⲓ ⲛⲉⲙⲱⲧⲉⲛ .
that I may come to you in joy through the will of God, and together with you, find rest.
15.33
ⲫⲛⲟⲩϯ ⲇⲉ ⲛⲧⲉϯϩⲓⲣⲏⲛⲏ ϥⲭⲏ ⲛⲉⲙⲱⲧⲉⲛ ⲧⲏⲣⲟⲩ ⲁⲙⲏⲛ
Now the God of peace be with you all. Amen.
16.1
ϯϯϩⲟ ⲇⲉ ⲙⲫⲟⲓⲃⲏ ⲧⲉⲛⲥⲱⲛⲓ ⲉⲧⲉⲛ ⲑⲏⲛⲟⲩ ⲉⲧⲉⲟⲩⲣⲉϥϣⲉⲙϣⲓ ϩⲱⲥⲧⲉ ⲛⲧⲉϯⲉⲕⲕⲗⲏ ⲥⲓⲁ ⲉⲧϧⲉⲛⲕⲉⲛⲭⲣⲉⲉⲥ
I commend to you Phoebe, our sister, who is a servant of the assembly that is at Cenchreae,
16.2
ϩⲓⲛⲁ ⲛⲧⲉⲧⲉⲛϣⲟⲡⲥ ⲉⲣⲱⲧⲉⲛ ϧⲉⲛⲡϭⲟⲓⲥ ϧⲉⲛⲡⲉⲙⲡϣⲁ ⲛⲧⲉⲛⲏ ⲉⲑⲟⲩⲁⲃ ⲟⲩⲟϩ ⲛⲧⲉⲧⲉⲛϯⲧⲟⲧⲥ ϧⲉⲛϩⲱⲃ ⲛⲓⲃⲉⲛ ⲉⲧⲉⲥⲛⲁⲉⲣⲭ ⲣⲓⲁ ⲙⲙⲱⲧⲉⲛ ⲛϧⲏⲧⲟⲩ ⲕⲉ ⲅⲁⲣ ⲛⲑⲟⲥ ϩⲱⲥ ⲁⲥϣⲱⲡⲓ ϧⲁϫⲉⲛ ⲟⲩⲙⲏϣ ⲡⲉⲙⲏⲓ ϩⲱ .
that you receive her in the Lord, in a way worthy of the saints, and that you assist her in whatever matter she may need from you, for she herself also has been a helper of many, and of my own self.
16.3
ϣⲓⲛⲓ ⲉⲡⲣⲓⲥⲕⲩⲗⲗⲁ ⲛⲉⲙⲁⲕⲩⲗⲗⲁ ⲛⲁϣⲫⲏⲣ ⲛⲣⲉϥⲉⲣϩⲱⲃ ϧⲉⲛⲡⲭⲣⲓⲥⲧⲟⲥ ⲓⲏⲥⲟⲩⲥ .
Greet Prisca and Aquila, my fellow workers in Christ Jesus,
16.4
ⲛⲁⲓ ⲉⲧⲁⲩϯ ⲛⲧⲟⲩⲛⲁϩⲃⲓ ⲉϩⲣⲏⲓ ⲉϫⲉⲛⲧⲁⲯⲩⲭⲏ ⲛⲁⲓ ⲉⲧⲉⲁⲛⲟⲕ ⲙⲙⲁⲩⲁⲧ ⲁⲛ ⲉⲧϣⲉⲡϩⲙⲟⲧ ⲛⲧⲟⲧⲟⲩ ⲁⲗⲗⲁ ⲛⲉⲙⲛⲓⲕⲉⲉⲕⲕⲗⲏ ⲥⲓⲁ ⲧⲏⲣⲟⲩ ⲛⲧⲉⲛⲓⲉⲑⲛⲟⲥ ⲛⲉⲙϯⲉⲕⲕⲗⲏⲥⲓⲁ ⲛⲧⲉⲡⲟⲩⲏⲓ
who for my life, laid down their own necks; to whom not only I give thanks, but also all the assemblies of the Gentiles.
16.5
ϣⲓⲛⲓ ⲉⲡⲉⲛⲉⲧⲟⲥ ⲡⲁⲁⲅⲁⲡⲏⲧⲟⲥ ⲉⲧⲉⲛⲑⲟϥ ⲡⲉ ϯⲁⲣⲭⲏ ⲛⲧⲉϯⲁⲥⲓⲁ ϧⲉⲛⲡϭⲟⲓⲥ .
Greet the assembly that is in their house. Greet Epaenetus, my beloved, who is the first fruits of Achaia to Christ.
16.6
ϣⲓⲛⲓ ⲉⲙⲁⲣⲓⲁ ⲑⲏ ⲉⲧⲁⲥϭⲓ ⲟⲩⲙⲏϣ ⲛϧⲓⲥⲓ ϧⲁⲣⲱⲧⲉⲛ .
Greet Mary, who labored much for us.
16.7
ϣⲓⲛⲓ ⲉⲁⲛⲇⲣⲟⲛⲓⲕⲟⲥ ⲛⲉⲙⲓⲟⲩⲗⲓⲁ ⲛⲁⲥⲩⲅⲅⲉⲛⲏ ⲥⲟⲩⲟϩ ⲛⲁϣⲫⲏⲣ ⲛⲉⲭⲙⲁⲗⲱⲧⲟⲥ ⲉⲧⲉϩⲁⲛⲥⲟⲩⲓⲛ ⲛⲉϧⲉⲛⲛⲓⲁⲡⲟⲥⲧⲟⲗⲟⲥ ⲛⲁⲓ ⲉⲧⲉϩⲁⲛϣⲟⲣⲡ ⲉⲣⲟⲓ ⲛⲉϧⲉⲛⲡⲭⲣⲓⲥⲧⲟⲥ .
Greet Andronicus and Junias, my relatives and my fellow prisoners, who are notable among the apostles, who also were in Christ before me.
16.8
ϣⲓⲛⲓ ⲉⲁⲙⲡⲗⲓⲁⲧⲟⲥ ⲡⲁⲁⲅⲁⲡⲏⲧⲟⲥ ϧⲉⲛⲡϭⲟⲓⲥ .
Greet Amplias, my beloved in the Lord.
16.9
ϣⲓⲛⲓ ⲉⲟⲩⲣⲃⲁⲛⲟⲥ ⲛⲉⲛϣⲫⲏⲣ ⲛⲣⲉϥⲉⲣϩⲱⲃ ϧⲉⲛⲡⲭⲣⲓⲥⲧⲟⲥ ⲛⲉⲙⲥⲧⲁⲭⲏⲥ ⲡⲁⲁⲅⲁⲡⲏⲧⲟⲥ .
Greet Urbanus, our fellow worker in Christ, and Stachys, my beloved.
16.10
ϣⲓⲛⲓ ⲉⲁⲡⲉⲗⲗⲏⲥ ⲡⲓⲥⲱⲧⲡ ϧⲉⲛⲡⲭⲣⲓⲥⲧⲟⲥ ϣⲓⲛⲓ ⲉⲛⲏ ⲉⲧϣⲟⲡ ⲉⲃⲟⲗ ϧⲉⲛⲁⲣⲓⲥⲧⲟⲃⲟⲩⲗⲟⲥ .
Greet Apelles, the approved in Christ. Greet those who are of the household of Aristobulus.
16.11
ϣⲓⲛⲓ ⲉⲏⲣⲱⲇⲓⲟⲛ ⲡⲁⲥⲩⲅⲅⲉⲛⲏⲥ ϣⲓⲛⲓ ⲉⲛⲏ ⲉⲧϣⲟⲡ ⲉⲃⲟⲗ ϧⲉⲛⲛⲁⲛⲁⲣⲕⲩⲥⲟⲥ ⲛⲏ ⲉⲧϣⲟⲡ ϧⲉⲛⲡϭⲟⲓⲥ .
Greet Herodion, my kinsman. Greet them of the household of Narcissus, who are in the Lord.
16.12
ϣⲓⲛⲓ ⲉⲧⲣⲓⲫⲱⲛⲁ ⲛⲉⲙⲧⲣⲩⲫⲱⲥⲁ ⲛⲏ ⲉⲧϧⲟⲥⲓ ϧⲉⲛⲡϭⲟⲓⲥ ϣⲓⲛⲓ ⲉⲡⲉⲣⲥⲓⲇⲁ ϯⲙⲉⲛⲣⲓⲧ ⲑⲏ ⲉⲧⲁⲥϭⲓ ⲟⲩⲙⲏϣ ⲛϧⲓⲥⲓ ϧⲉⲛⲡϭⲟⲓⲥ .
Greet Tryphaena and Tryphosa, who labor in the Lord. Greet Persis, the beloved, who labored much in the Lord.
16.13
ϣⲓⲛⲓ ⲉⲣⲟⲩⲫⲟⲥ ⲡⲓⲥⲱⲧⲡ ϧⲉⲛⲡϭⲟⲓⲥ ⲛⲉⲙⲧⲉϥⲙⲁⲩ ⲟⲩⲟϩ ⲑⲱⲓ ϩⲱ ⲧⲉ .
Greet Rufus, the chosen in the Lord, and his mother and mine.
16.14
ϣⲓⲛⲓ ⲉⲁⲥⲩⲛⲕⲣⲓⲧⲟⲥ ⲫⲗⲏⲅⲟⲛⲧⲁ ⲉⲣⲙⲏ ⲡⲁⲧⲣⲟⲃⲁ ⲉⲣⲙⲁ ⲛⲉⲙⲛⲓⲕⲉⲥⲛⲏⲟⲩ ⲉⲑⲛⲉⲙⲱⲟⲩ .
Greet Asyncritus, Phlegon, Hermes, Patrobas, Hermas, and the brothers who are with them.
16.15
ϣⲓⲛⲓ ⲉⲫⲩⲗⲟⲗⲟⲅⲟⲥ ⲛⲉⲙⲓⲟⲩⲗⲓⲁ ⲛⲉⲣⲉⲁ ⲛⲉⲙⲧⲉϥⲥⲱⲛⲓ ⲛⲉⲙⲟⲩⲩⲙⲡⲁⲛ ⲛⲉⲙⲛⲓϩⲁⲅⲓⲟⲥ ⲧⲏⲣⲟⲩ ⲉⲑⲛⲉⲙⲱⲟⲩ .
Greet Philologus and Julia, Nereus and his sister, and Olympas, and all the saints who are with them.
16.16
ⲁⲣⲓⲁⲥⲡⲁⲍⲉⲥⲑⲉ ⲛⲛⲉⲧⲉⲛⲉⲣⲏⲟⲩ ϧⲉⲛⲟⲩⲫⲓ ⲉⲥⲟⲩⲁⲃ ⲥⲉϣⲓⲛⲓ ⲉⲣⲱⲧⲉⲛ ⲛϫⲉⲛⲓⲉⲕⲕⲗⲏ ⲥⲓⲁ ⲧⲏⲣⲟⲩ ⲛⲧⲉⲡⲭⲣⲓⲥⲧⲟⲥ .
Greet one another with a holy kiss. The assemblies of Christ greet you.
16.17
ϯϯϩⲟ ⲉⲣⲱⲧⲉⲛ ⲛⲁⲥⲛⲏⲟⲩ ⲉⲑⲣⲉⲧⲉⲛϯϩⲑⲏⲧⲉⲛ ⲉⲛⲏ ⲉⲧⲓⲣⲓ ⲛⲛⲓⲫⲱⲣϫ ⲛⲉⲙⲛⲓⲥⲕⲁⲛⲇⲁⲗⲟⲛ ⲥⲁⲃⲟⲗ ⲛϯⲥⲃⲱ ⲉⲧⲁⲣⲉⲧⲉⲛⲧⲥⲁⲃⲟ ⲉⲣⲟⲥ ⲟⲩⲟϩ ⲣⲉⲕ ⲑⲏⲛⲟⲩ ⲥⲁⲃⲟⲗ ⲙⲙⲱⲟⲩ .
Now I beg you, brothers, look out for those who are causing the divisions and occasions of stumbling, contrary to the doctrine which you learned, and turn away from them.
16.18
ⲛⲁⲓ ⲅⲁⲣ ⲙⲡⲁⲓⲣⲏϯ ⲥⲉⲟⲓ ⲙⲃⲱⲕ ⲁⲛ ⲙⲡⲉⲛϭⲟⲓⲥ ⲓⲏⲥⲟⲩⲥ ⲡⲭⲣⲓⲥⲧⲟⲥ ⲁⲗⲗⲁ ⲛⲧⲟⲩⲛⲉϫⲓ ⲟⲩⲟϩ ⲉⲃⲟⲗ ϩⲓⲧⲉⲛⲧⲟⲩϫⲓⲛⲥⲁϫⲓ ⲉⲧϩⲟⲗϫ ⲛⲉⲙⲡⲟⲩⲥⲙⲟⲩ ϣⲁⲩⲉⲣϩⲁⲗ ⲙⲡϩⲏⲧ ⲛⲛⲓⲁⲧⲕⲁⲕⲓⲁ .
For those who are such don't serve our Lord, Jesus Christ, but their own belly; and by their smooth and flattering speech, they deceive the hearts of the innocent.
16.19
ⲧⲉⲧⲉⲛⲙⲉⲧⲣⲉϥⲥⲱⲧⲉⲙ ⲅⲁⲣ ⲁⲥϣⲉ ⲛⲁⲥ ϣⲁⲟⲩⲟⲛ ⲛⲓⲃⲉⲛ ϯⲣⲁϣⲓ ⲟⲩⲛ ⲉϫⲉⲛⲑⲏⲛⲟⲩ ϯⲟⲩⲉϣ ⲑⲏⲛⲟⲩ ⲇⲉ ⲉⲣⲉⲧⲉⲛⲟⲓ ⲛⲥⲁⲃⲉ ϧⲉⲛⲡⲓⲡⲉⲑⲛⲁⲛⲉϥ ⲁⲕⲉⲣⲉⲟⲥ ⲇⲉ ⲉⲡⲓⲡⲉⲧϩⲱⲟⲩ .
For your obedience has become known to all. I rejoice therefore over you. But I desire to have you wise in that which is good, but innocent in that which is evil.
16.20
ⲫⲛⲟⲩϯ ⲇⲉ ⲛⲧⲉϯϩⲓⲣⲏⲛⲏ ⲉϥⲉϧⲟⲙϧⲉⲙ ⲙⲡⲥⲁⲧⲁⲛⲁⲥ ϧⲁⲛⲉⲧⲉⲛϭⲁⲗⲁⲩϫ ⲛⲭⲱⲗⲉⲙ ⲡϩⲙⲟⲧ ⲙⲡⲉⲛϭⲟⲓⲥ ⲓⲏⲥⲟⲩⲥ ⲡⲭⲣⲓⲥⲧⲟⲥ ⲛⲉⲙⲱⲧⲉⲛ .
And the God of peace will quickly crush Satan under your feet. The grace of our Lord Jesus Christ be with you.
16.21
ϥϣⲓⲛⲓ ⲉⲣⲱⲧⲉⲛ ⲛϫⲉⲧⲓⲙⲟⲑⲉⲟⲥ ⲡⲁϣⲫⲏ ⲣⲛⲣⲉϥⲉⲣϩⲱⲃ ⲛⲉⲙⲗⲟⲩⲕⲓⲟⲥ ⲛⲉⲙⲓⲁⲥⲥⲱⲛ ⲛⲉⲙⲥⲱⲥⲓⲡⲁⲧⲣⲟⲥ ⲡⲁⲥⲩⲅⲅⲉⲛⲏⲥ .
Timothy, my fellow worker, greets you, as do Lucius, Jason, and Sosipater, my relatives.
16.22
ϯϣⲓⲛⲓ ⲉⲣⲱⲧⲉⲛ ⲁⲛⲟⲕ ⲧⲉⲣⲧⲓⲟⲥ ⲫⲏ ⲉⲧⲁϥⲥϧⲉ ⲧⲁⲓⲉⲡⲓⲥⲧⲟⲗⲏ ϧⲉⲛⲡϭⲟⲓⲥ .
I, Tertius, who write the letter, greet you in the Lord.
16.23
ϥϣⲓⲛⲓ ⲉⲣⲱⲧⲉⲛ ⲛϫⲉⲅⲁⲓⲟⲥ ⲡⲁϣⲉⲙⲙⲟ ⲛⲉⲙϯⲉⲕⲕⲗⲏⲥⲓⲁ ⲧⲏⲣⲥ ϥϣⲓⲛⲓ ⲉⲣⲱⲧⲉⲛ ⲛϫⲉⲁⲣⲁⲥⲧⲟⲥ ⲡⲓⲟⲓⲕⲟⲛⲟⲙⲟⲥ ⲛⲧⲉϯⲡⲟⲗⲓⲥ ⲛⲉⲙⲕⲟⲩⲁⲣⲧⲟⲥ ⲡⲓⲥⲟⲛ .
Gaius, my host and host of the whole assembly, greets you. Erastus, the treasurer of the city, greets you, as does Quartus, the brother.
16.24
ⲡϩⲙⲟⲧ ⲙⲡⲉⲛϭⲟⲓⲥ ⲓⲏⲥⲟⲩⲥ ⲡⲭⲣⲓⲥⲧⲟⲥ ⲛⲉⲙⲱⲧⲉⲛ ⲧⲏⲣⲟⲩ ⲁⲙⲏⲛ
The grace of our Lord Jesus Christ be with you all! Amen.
16.25
ⲫⲏ ⲉⲧⲉⲟⲩⲟⲛ ϣϫⲟⲙ ⲙⲙⲟϥ ⲉⲧⲁϫⲣⲉ ⲑⲏⲛⲟⲩ ⲕⲁⲧⲁⲡⲁⲉⲩⲁⲅⲅⲉⲗⲓⲟⲛ ⲛⲉⲙⲡⲓϩⲓⲱⲓϣ ⲛⲧⲉⲡⲭⲣⲓⲥⲧⲟⲥ ⲓⲏⲥⲟⲩⲥ ⲕⲁⲧⲁⲟⲩϭⲱⲣⲡ ⲉⲃⲟⲗ ⲛⲧⲉⲟⲩⲙⲩⲥⲧⲏⲣⲓⲟⲛ ⲉⲁⲩⲭⲁⲣⲱⲟⲩ ⲉⲣⲟϥ ⲉϩⲁⲛⲥⲏ ⲟⲩ ⲛⲉⲛⲉϩ .
16.26
ϯⲛⲟⲩ ⲇⲉ ⲁϥⲟⲩⲟⲛϩϥ ⲉⲃⲟⲗ ϩⲓⲧⲉⲛⲛⲓⲅⲣⲁⲫⲏ ⲛⲧⲉⲛⲓⲡⲣⲟⲫⲏⲧⲏⲥ ⲕⲁⲧⲁⲡⲓⲟⲩⲁϩⲥⲁϩⲛⲓ ⲛⲧⲉⲫⲛⲟⲩϯ ⲡⲓϣⲁ ⲉⲛⲉϩ ⲉⲁⲩⲟⲩⲟⲛϩϥ ⲉⲃⲟⲗ ⲉⲩⲥⲱⲧⲉⲙ ⲛⲧⲉⲫⲛⲁϩϯ ϧⲉⲛⲛⲓⲉⲑⲛⲟⲥ ⲧⲏⲣⲟⲩ
16.27
ⲡⲓⲟⲩⲁⲓ ⲙⲙⲁⲩⲁⲧϥ ⲡⲓⲥⲁⲃⲉ ⲫⲛⲟⲩϯ ⲉⲃⲟⲗ ϩⲓⲧⲉⲛⲓⲏⲥⲟⲩⲥ ⲡⲭⲣⲓⲥⲧⲟⲥ ⲫⲁⲓ ⲉⲧⲉⲫⲱϥ ⲡⲉ ⲡⲓⲱⲟⲩ ϣⲁⲉⲛⲉϩ ⲛⲧⲉⲛⲓⲉⲛⲉϩ ⲁⲙⲏⲛ

Bohairic Coptic New Testament, Coptic SCRIPTORIUM (github.com/CopticScriptorium/corpora, corpus bohairic.nt). Coptic text from Marcion / Hany Takla; annotation by Nina Speranskaja, Nicholas Wagner and Amir Zeldes. English is the World English Bible (public domain), aligned by Coptic SCRIPTORIUM. Licence: CC-BY 4.0. Source.