Acts (Bohairic Coptic)

Coptic New Testament (Bohairic) · 1,006 sections

26.2
ⲉⲑⲃⲉϩⲱⲃ ⲛⲓⲃⲉⲛ ⲉⲧⲟⲩϫⲉⲙ ⲁⲣⲓⲕⲓ ⲉⲣⲟϥ ⲛϧⲏⲧⲟⲩ ⲛϫⲉⲛⲓⲓⲟⲩⲇⲁⲓ ⲙⲡⲟⲩⲣⲟ ⲁⲅⲣⲓⲡⲡⲁ ϯⲙⲉⲩⲓ ϫⲉⲁⲛⲟⲕ ⲟⲩⲙⲁⲕⲁⲣⲓⲟⲥ ⲉⲓⲛⲁⲉⲣⲁⲡⲟⲗⲟⲅⲓⲥⲑⲉ ⲙⲫⲟⲟⲩ ϧⲁⲧⲟⲧⲕ .
'I think myself happy, King Agrippa, that I am to make my defense before you this day concerning all the things that I am accused by the Jews,
26.3
ⲙⲁⲗⲓⲥⲧⲁ ⲉⲕⲥⲱⲟⲩⲛ ⲛⲛⲓⲥⲩⲛⲏⲑⲓⲁ ⲛⲧⲉⲛⲓⲓⲟⲩⲇⲁⲓ ⲛⲉⲙⲛⲟⲩⲍⲏⲧⲏⲙⲁ ⲉⲑⲃⲉⲫⲁⲓ ϯⲧⲱⲃϩ ⲙⲙⲟⲕ ⲉⲑⲣⲉⲕⲥⲱⲧⲉⲙ ⲉⲣⲟⲓ ϧⲉⲛⲟⲩⲙⲉⲧⲣⲉϥⲱⲟⲩ ⲛϩⲏⲧ .
especially because you are expert in all customs and questions which are among the Jews. Therefore I beg you to hear me patiently.
26.4
ⲡⲁϫⲓⲛⲱⲛϧ ⲓⲥϫⲉⲛ ⲧⲁⲙⲉⲧⲁⲗⲟⲩ ⲉⲧⲁϥϣⲱⲡⲓ ⲓⲥϫⲉⲛ ϩⲏ ϧⲉⲛⲡⲁⲉⲑⲛⲟⲥ ⲛϩⲣⲏⲓ ϧⲉⲛⲓⲉⲣⲟⲥⲁⲗⲏⲙ ⲥⲉⲥⲱⲟⲩⲛ ⲙⲙⲟϥ ⲛϫⲉⲛⲓⲓⲟⲩⲇⲁⲓ ⲧⲏⲣⲟⲩ .
'Indeed, all the Jews know my way of life from my youth up, which was from the beginning among my own nation and at Jerusalem;
26.5
ⲉⲩⲉⲣϣⲟⲣⲡ ⲛⲥⲱⲟⲩⲛ ⲙⲙⲟⲓ ⲓⲥϫⲉⲛ ⲥⲁⲡϣⲱⲓ ⲁⲩϣⲁⲛⲟⲩⲱϣ ⲉⲉⲣⲙⲉⲑⲣⲉ ϫⲉⲕⲁⲧⲁϯϩⲉⲣⲉⲥⲓⲥ ⲉⲧⲧⲁϫⲣⲏⲟⲩⲧ ⲛⲧⲉⲡⲉⲛϣⲉⲙϣⲓ ⲁⲓⲱⲛϧ ⲙⲫⲁⲣⲓⲥⲉⲟⲥ .
having known me from the first, if they are willing to testify, that after the strictest sect of our religion I lived a Pharisee.
26.6
ⲟⲩⲟϩ ϯⲛⲟⲩ ⲉⲑⲃⲉⲧϩⲉⲗⲡⲓⲥ ⲙⲡⲓⲱϣ ⲉⲧⲁϥϣⲱⲡⲓ ⲛⲛⲉⲛⲓⲟϯ ⲉⲃⲟⲗ ϩⲓⲧⲉⲛⲫⲛⲟⲩϯ ⲧ ⲉⲣⲁⲧⲉⲩϯϩⲁⲡ ⲉⲣⲟⲓ .
Now I stand here to be judged for the hope of the promise made by God to our fathers,
26.7
ⲉⲧⲉⲧⲁⲓϩⲉⲗⲡⲓⲥ ⲧⲉ ⲉⲛⲁⲣⲉϯⲓⲃ ⲙⲫⲩⲗⲏ ϣⲉⲙϣⲓ ϧⲉⲛⲟⲩⲙⲟⲩⲛ ⲉⲃⲟⲗ ⲙⲡⲓⲉϩⲟⲟⲩ ⲛⲉⲙⲡⲓⲉϫⲱⲣϩ ⲉⲩⲟⲩⲱϣ ⲉⲧⲣⲉ ⲧⲟⲧⲟⲩ ϯⲙⲁϯ ⲉⲣⲟⲥ ⲉⲑⲃⲉⲧⲁⲓϩⲉⲗⲡⲓⲥ ⲡⲟⲩⲣⲟ ⲥⲉϫⲉⲙ ⲁⲣⲓⲕⲓ ⲉⲣⲟⲓ ⲛϫⲉⲛⲓⲓⲟⲩⲇⲁⲓ .
which our twelve tribes, earnestly serving night and day, hope to attain. Concerning this hope I am accused by the Jews, King Agrippa!
26.8
ⲟⲩ ⲙⲉⲧⲁⲑⲛⲁϩϯ ⲧⲉ ⲙⲁϩⲁⲡ ϧⲉⲛⲑⲏⲛⲟⲩ ⲓⲥϫⲉ ⲫⲛⲟⲩϯ ⲛⲁⲧⲟⲩⲛⲟⲥ ⲛⲓⲣⲉϥⲙⲱⲟⲩⲧ .
Why is it judged incredible with you, if God does raise the dead?
26.9
ⲁⲛⲟⲕ ⲙⲉⲛ ⲟⲩⲛ ⲛⲁⲓⲙⲉⲩⲓ ⲉⲣⲟⲓ ⲉⲉⲣ ⲟⲩⲙⲏϣ ⲛϩⲱⲃ ⲉⲩϯ ⲉϧⲟⲩⲛ ⲉϩⲣⲉⲛⲫⲣⲁⲛ ⲛⲓⲏⲥⲟⲩⲥ ⲡⲓⲛⲁⲍⲱⲣⲉⲟⲥ .
'I myself most certainly thought that I ought to do many things contrary to the name of Jesus of Nazareth.
26.10
ⲫⲁⲓ ⲉⲧⲁⲓⲁⲓϥ ϧⲉⲛⲓⲉⲣⲟⲥⲁⲗⲏⲙ ⲟⲩⲙⲏϣ ϧⲉⲛⲛⲏ ⲉⲑⲟⲩⲁⲃ ⲁⲛⲟⲕ ⲁⲓϩⲓⲧⲟⲩ ⲉϧⲟⲩⲛ ⲉⲛⲓϣⲧⲉⲕⲱⲟⲩ ⲉⲁⲓϭⲓ ⲙⲡⲓⲉⲣϣⲓϣⲓ ϩⲓⲧⲉⲛⲛⲓⲁⲣⲭⲏⲉⲣⲉⲩⲥ ⲉⲩϧⲱⲧⲉⲃ ⲙⲙⲱⲟⲩ ϣⲁⲓϯⲱⲡ ϧⲁⲣⲱⲟⲩ .
This I also did in Jerusalem. I both shut up many of the saints in prisons, having received authority from the chief priests, and when they were put to death I gave my vote against them.
26.11
ⲕⲁⲧⲁⲥⲩⲛⲁⲅⲱⲅⲏ ⲛⲓⲃⲉⲛ ⲉⲓϯⲙⲕⲁϩ ⲛⲱⲟⲩ ⲛⲟⲩⲙⲏϣ ⲛⲥⲟⲡ ⲛⲁⲓϭⲓ ⲙⲙⲱⲟⲩ ⲛϫⲟⲛⲥ ⲉⲑⲣⲟⲩϫⲉⲟⲩⲁ ϧⲉⲛⲟⲩⲙⲉⲧϩⲟⲩⲟ ⲇⲉ ⲉⲓϧⲉⲛ ⲟⲩⲗⲓⲃⲓ ⲉϧⲟⲩⲛ ⲉⲣⲱⲟⲩ ϣⲁⲓϭⲟϫⲓ ⲛⲥⲱⲟⲩ ϣⲁⲉϩⲣⲏⲓ ⲉⲛⲓⲕⲉⲡⲟⲗⲓⲥ ⲉⲧⲥⲁⲃⲟⲗ .
Punishing them often in all the synagogues, I tried to make them blaspheme. Being exceedingly enraged against them, I persecuted them even to foreign cities.
26.12
ⲟⲩⲟϩ ϧⲉⲛⲛⲁⲓ ⲉⲓⲙⲟϣⲓ ⲉⲇⲁⲙⲁⲥⲕⲟⲥ ⲛⲉⲙⲟⲩⲉⲝⲟⲩⲥⲓⲁ ⲛⲉⲙⲟⲩⲁϩⲥⲁϩⲛⲓ ⲛⲧⲉⲛⲓⲁⲣⲭⲓⲉⲣⲉⲩⲥ .
'Whereupon as I traveled to Damascus with the authority and commission from the chief priests,
26.13
ⲉⲓϩⲓ ⲡⲓⲙⲱⲓⲧ ⲇⲉ ϧⲉⲛⲧⲫⲁϣⲓ ⲙⲡⲓⲉϩⲟⲟⲩ ⲁⲓⲛⲁⲩ ⲡⲟⲩⲣⲟ ⲉⲟⲩⲟⲩⲱⲓⲛⲓ ⲉⲃⲟⲗ ϧⲉⲛⲧⲫⲉ ⲉϥⲫⲟⲣⲉⲓ ⲉϩⲟⲧⲉ ⲫⲣⲏ ⲁϥⲓ ⲉϩⲣⲏⲓ ⲉϫⲱⲓ ⲛⲉⲙⲛⲏ ⲉⲑⲛⲉⲙⲏⲓ .
at noon, O King, I saw on the way a light from the sky, brighter than the sun, shining around me and those who traveled with me.
26.14
ⲉⲧⲁⲛϩⲉⲓ ⲇⲉ ⲧⲏⲣⲉⲛ ϩⲓϫⲉⲛⲡⲓⲕⲁϩⲓ ⲁⲓⲥⲱⲧⲉⲙ ⲉⲟⲩⲥⲙⲏ ⲉⲥϫⲱ ⲙⲙⲟⲥ ⲛⲏⲓ ϧⲉⲛϯⲁⲥⲡⲓ ⲙⲙⲉⲧϩⲉⲃⲣⲉⲟⲥ ϫⲉⲥⲁⲟⲩⲗ ⲥⲁⲟⲩⲗ ⲁϧⲟⲕ ⲕϭⲟϫⲓ ⲛⲥⲱⲓ ⲟⲩϩⲱⲃ ⲉϥⲛⲁϣⲧ ⲛⲁⲕ ⲡⲉ ⲉϯϣⲉⲛⲫⲁⲧ ⲉϧⲟⲩⲛ ϧⲉⲛϩⲁⲛⲥⲟⲩⲣⲓ .
When we had all fallen to the earth, I heard a voice saying to me in the Hebrew language, 'Saul, Saul, why are you persecuting me? It is hard for you to kick against the goads.'
26.15
ⲁⲛⲟⲕ ⲇⲉ ⲡⲉϫⲏⲓ ϫⲉⲛⲑⲟⲕ ⲛⲓⲙ ⲡϭⲟⲓⲥ ⲡϭⲟⲓⲥ ⲇⲉ ⲡⲉϫⲁϥ ⲛⲏⲓ ϫⲉⲁⲛⲟⲕ ⲡⲉ ⲓⲏⲥⲟⲩⲥ ⲫⲏ ⲛⲑⲟⲕ ⲉⲧⲉⲕϭⲟϫⲓ ⲛⲥⲱϥ .
'I said, 'Who are you, Lord?' 'He said, 'I am Jesus, whom you are persecuting.
26.16
ⲁⲗⲗⲁ ⲧⲱⲛⲕ ⲟϩⲓ ⲉⲣⲁⲧⲕ ⲉϫⲉⲛⲛⲉⲕϭⲁⲗⲁⲩϫ ⲉⲑⲃⲉⲫⲁⲓ ⲅⲁⲣ ⲁⲓⲟⲩⲟⲛϩⲧ ⲉⲣⲟⲕ ⲉⲥⲟⲧⲡⲕ ⲛⲟⲩϩⲩⲡⲉⲣⲉⲧⲏⲥ ⲛⲏⲓ ⲟⲩⲟϩ ⲛⲧⲉⲕⲉⲣⲙⲉⲑⲣⲉ ⲛⲛⲏ ⲉⲧⲁⲕⲛⲁⲩ ⲉⲣⲱⲟⲩ ⲛⲏ ⲉϯⲛⲁⲟⲩⲟⲛϩⲧ ⲉⲣⲟⲕ ⲛϧⲏⲧⲟⲩ
But arise, and stand on your feet, for I have appeared to you for this purpose: to appoint you a servant and a witness both of the things which you have seen, and of the things which I will reveal to you;
26.17
ⲉⲓⲉⲛⲁϩⲙⲉⲕ ⲉⲃⲟⲗ ϧⲉⲛⲡⲓⲗⲁⲟⲥ ⲛⲉⲙⲉⲃⲟⲗ ϧⲉⲛⲛⲓⲉⲑⲛⲟⲥ ⲛⲏ ⲁⲛⲟⲕ ⲉϯⲛⲁⲟⲩⲟⲣⲡⲕ ⲉⲣⲱⲟⲩ
delivering you from the people, and from the Gentiles, to whom I send you,
26.18
ⲉⲁⲟⲩⲱⲛ ⲛⲛⲟⲩⲃⲁⲗ ⲉⲑⲣⲟⲩⲕⲟⲧⲟⲩ ⲉⲃⲟⲗ ϩⲁⲡⲭⲁⲕⲓ ⲉϧⲟⲩⲛ ⲉⲫⲟⲩⲱⲓⲛⲓ ⲛⲉⲙⲉⲃⲟⲗ ϩⲁⲡⲉⲣϣⲓϣⲓ ⲙⲡⲥⲁⲧⲁⲛⲁⲥ ⲉⲫⲛⲟⲩϯ ⲉⲑⲣⲟⲩϭⲓ ⲙⲡⲭⲱ ⲉⲃⲟⲗ ⲛⲧⲉⲛⲟⲩⲛⲟⲃⲓ ⲛⲉⲙⲟⲩⲕⲗⲏⲣⲟⲛⲟⲙⲓⲁ ϧⲉⲛⲛⲏ ⲉⲧⲧⲟⲩⲃⲏⲟⲩⲧ ϧⲉⲛⲡⲓⲛⲁϩϯ ⲉⲣⲟⲓ .
to open their eyes, that they may turn from darkness to light and from the power of Satan to God, that they may receive remission of sins and an inheritance among those who are sanctified by faith in me.'
26.19
ⲉⲑⲃⲉⲫⲁⲓ ⲡⲟⲩⲣⲟ ⲁⲅⲣⲓⲡⲡⲁ ⲙⲡⲓϣⲉⲣⲁⲧⲥⲱⲧⲉⲙ ⲛⲥⲁⲡⲓⲛⲁⲩ ⲛⲧⲉⲧⲫⲉ .
'Therefore, King Agrippa, I was not disobedient to the heavenly vision,
26.20
ⲁⲗⲗⲁ ⲛⲏ ⲉⲧϧⲉⲛⲇⲁⲙⲁⲥⲕⲟⲥ ⲛϣⲟⲣⲡ ⲛⲉⲙⲓⲉⲣⲟⲥⲁⲗⲏⲙ ⲛⲉⲙⲧⲭⲱⲣⲁ ⲧⲏⲣⲥ ⲛⲧⲉϯⲓⲟⲩⲇⲉⲁ ⲛⲉⲙⲛⲓⲉⲑⲛⲟⲥ ⲁⲓϩⲓⲱⲓϣ ⲛⲱⲟⲩ ⲉⲑⲣⲟⲩⲉⲣⲙⲉⲧⲁⲛⲟⲓⲛ ⲟⲩⲟϩ ⲉⲑⲣⲟⲩⲕⲟⲧⲟⲩ ⲉⲫⲛⲟⲩϯ ⲉⲓⲣⲓ ⲛϩⲁⲛϩⲃⲏⲟⲩⲓ ⲉⲩⲙⲡϣⲁ ⲛϯⲙⲉⲧⲁⲛⲟⲓⲁ .
but declared first to them of Damascus, at Jerusalem, and throughout all the country of Judea, and also to the Gentiles, that they should repent and turn to God, doing works worthy of repentance.
26.21
ⲉⲑⲃⲉⲫⲁⲓ ⲁⲛⲓⲓⲟⲩⲇⲁⲓ ⲁⲙⲟⲛⲓ ⲙⲙⲟⲓ ϧⲉⲛⲡⲓⲉⲣⲫⲉⲓ ⲛⲁⲩϭⲱⲛⲧ ⲉⲓⲛⲓ ⲛⲧⲟⲧⲟⲩ ⲉϩⲣⲏⲓ ⲉϫⲱⲓ .
For this reason the Jews seized me in the temple, and tried to kill me.
26.22
ⲉⲧⲁⲓϭⲓ ⲇⲉ ⲛⲟⲩⲃⲟⲏⲑⲓⲁ ⲉⲃⲟⲗ ϩⲓⲧⲉⲛⲫⲛⲟⲩϯ ⲁⲓⲟϩⲓ ⲉⲣⲁⲧϣⲁⲉϧⲟⲩⲛ ⲉⲫⲟⲟⲩ ⲉⲓⲉⲣⲙⲉⲑⲣⲉ ⲛⲟⲩⲕⲟⲩϫⲓ ⲛⲉⲙⲟⲩⲛⲓϣϯ ⲛϯϫⲉ ϩⲗⲓ ⲁⲛ ⲥⲁⲃⲟⲗ ⲛⲛⲏ ⲉⲧⲁ ⲛⲓⲡⲣⲟⲫⲏⲧⲏⲥ ϫⲟⲧⲟⲩ ⲛⲉⲙⲙⲱⲩⲥⲏⲥ ϫⲉⲥⲉⲛⲁϣⲱⲡⲓ
Having therefore obtained the help that is from God, I stand to this day testifying both to small and great, saying nothing but what the prophets and Moses said would happen,
26.23
ⲓⲥϫⲉ ⲟⲩⲣⲉϥϭⲓⲙⲕⲁϩ ⲡⲉ ⲡⲭⲣⲓⲥⲧⲟⲥ ⲓⲥϫⲉ ⲟⲩϩⲟⲩⲓⲧ ⲡⲉ ⲉⲃⲟⲗ ϧⲉⲛⲧⲁⲛⲁⲥⲧⲁⲥⲓⲥ ⲛⲧⲉⲛⲓⲣⲉϥⲙⲱⲟⲩⲧ ϥⲛⲁϩⲓⲱⲓϣ ⲛⲟⲩⲱⲓⲛⲓ ⲙⲡⲓⲗⲁⲟⲥ ⲛⲉⲙⲛⲓⲉⲑⲛⲟⲥ .
how the Christ must suffer, and how, by the resurrection of the dead, he would be first to proclaim light both to these people and to the Gentiles.'
26.24
ⲛⲁⲓ ⲉϥϫⲱ ⲙⲙⲱⲟⲩ ⲡⲉϫⲉ ⲫⲏⲥⲧⲟⲥ ϧⲉⲛⲟⲩⲛⲓϣϯ ⲛⲥⲙⲏ ϫⲉⲁⲕⲗⲓⲃⲓ ⲡⲁⲩⲗⲉ ⲁ ⲡⲓⲙⲏϣ ⲛⲥϧⲁⲓ ⲑⲣⲉⲕⲗⲓⲃⲓ .
As he thus made his defense, Festus said with a loud voice, 'Paul, you are crazy! Your great learning is driving you insane!'
26.25
ⲡⲁⲩⲗⲟⲥ ⲇⲉ ⲡⲉϫⲁϥ ϫⲉϯⲗⲟⲃⲓ ⲁⲛ ⲕⲣⲁⲧⲓⲥⲑⲉ ⲫⲏⲥⲧⲉ ⲁⲗⲗⲁ ϩⲁⲛⲥⲁϫⲓ ⲛⲧⲉϯⲙⲉⲑⲙⲏⲓ ⲛⲉⲙϯⲙⲉⲧⲉⲩⲥⲉⲃⲏⲥ ⲛⲏ ⲉϯϫⲱ ⲙⲙⲱⲟⲩ .
But he said, 'I am not crazy, most excellent Festus, but boldly declare words of truth and reasonableness.
26.26
ϥⲥⲱⲟⲩⲛ ⲅⲁⲣ ⲛϫⲉⲡⲓⲕⲉⲟⲩⲣⲟ ⲉⲑⲃⲉⲛⲁⲓ ⲫⲁⲓ ⲉϯⲟⲩⲟⲛϩ ⲙⲙⲟⲓ ⲉⲃⲟⲗ ⲉⲓⲥⲁϫⲓ ⲛⲉⲙⲁϥ ⲡⲁϩⲏⲧ ⲅⲁⲣ ⲑⲏⲧ ϫⲉⲟⲩⲟⲛ ϩⲗⲓ ⲛⲛⲁⲓ ⲟⲃϣ ⲉⲣⲟϥ ⲁⲛ ⲛⲉⲧⲁ ⲫⲁⲓ ⲅⲁⲣ ⲁⲛ ϣⲱⲡⲓ ϧⲉⲛⲟⲩⲉⲗⲕⲥ .
For the king knows of these things, to whom also I speak freely. For I am persuaded that none of these things is hidden from him, for this has not been done in a corner.
26.27
ⲭⲛⲁϩϯ ⲡⲟⲩⲣⲟ ⲁⲅⲣⲓⲡⲡⲁⲥ ⲉⲛⲓⲡⲣⲟⲫⲏ ⲧⲏⲥ ϯⲥⲱⲟⲩⲛ ϫⲉⲭⲛⲁϩϯ .
King Agrippa, do you believe the prophets? I know that you believe.'
26.28
ⲁⲅⲣⲓⲡⲡⲁⲥ ⲇⲉ ⲡⲉϫⲁϥ ⲙⲡⲁⲩⲗⲟⲥ ϫⲉⲕⲉⲕⲟⲩϫⲓ ⲭⲛⲁⲑⲉⲧ ⲡⲁϩⲏⲧ ⲉⲁⲓⲧ ⲛⲭⲣⲏⲥⲧⲓⲁⲛⲟⲥ .
Agrippa said to Paul, 'With a little persuasion are you trying to make me a Christian?'
26.29
ⲡⲁⲩⲗⲟⲥ ⲇⲉ ⲡⲉϫⲁϥ ϫⲉϯⲧⲱⲃϩ ⲙⲫⲛⲟⲩϯ ⲛⲉⲙϧⲉⲛⲟⲩⲕⲟⲩϫⲓ ⲛⲉⲙϧⲉⲛⲟⲩⲛⲓϣϯ ⲟⲩ ⲙⲟⲛⲟⲛ ⲛⲑⲟⲕ ⲁⲗⲗⲁ ⲛⲉⲙⲟⲩⲟⲛ ⲛⲓⲃⲉⲛ ⲉⲧⲥⲱⲧⲉⲙ ⲉⲣⲟⲓ ⲙⲫⲟⲟⲩ ⲉⲑⲣⲟⲩϣⲱⲡⲓ ⲙⲡⲁⲣⲏϯ ⲙⲡⲓⲣⲏϯ ⲉϯⲟⲓ ⲙⲙⲟϥ ϩⲱ ϣⲁⲧⲉⲛ ⲛⲁⲥⲛⲁⲩϩ .
Paul said, 'I pray to God, that whether with little or with much, not only you, but also all that hear me this day, might become such as I am, except for these bonds.'
26.30
ⲁϥⲧⲱⲛϥ ⲇⲉ ⲛϫⲉⲡⲟⲩⲣⲟ ⲛⲉⲙⲡⲓϩⲏⲅⲉⲙⲱⲛ ⲛⲉⲙⲃⲉⲣⲛⲓⲕⲏ ⲛⲉⲙⲛⲏ ⲉⲧϩⲉⲙⲥⲓ ⲛⲉⲙⲱⲟⲩ .
The king rose up with the governor, and Bernice, and those who sat with them.
26.31
ⲟⲩⲟϩ ⲉⲧⲁⲩⲉⲣⲁⲛⲁⲭⲱⲣⲓⲛ ⲛⲁⲩⲥⲁϫⲓ ⲛⲉⲙⲛⲟⲩⲉⲣⲏⲟⲩ ⲉⲩϫⲱ ⲙⲙⲟⲥ ϫⲉϥⲉⲣ ϩⲗⲓ ⲛϩⲱⲃ ⲁⲛ ⲛϫⲉⲡⲁⲓⲣⲱⲙⲓ ⲉϥⲙⲡϣⲁ ⲙⲫⲙⲟⲩ ⲓⲉ ϩⲁⲛⲥⲛⲁⲩϩ .
When they had withdrawn, they spoke one to another, saying, 'This man does nothing worthy of death or of bonds.'
26.32
ⲁⲅⲣⲓⲡⲡⲁⲥ ⲇⲉ ⲡⲉϫⲁϥ ⲙⲫⲏⲥⲧⲟⲥ ϫⲉⲛⲉⲟⲩⲟⲛ ϣϫⲟⲙ ⲡⲉ ⲉⲭⲁ ⲡⲁⲓⲣⲱⲙⲓ ⲉⲃⲟⲗ ⲉⲛⲉ ⲙⲡⲉϥⲉⲣⲉⲡⲓⲕⲁⲗⲓⲥⲑⲉ ⲙⲡⲟⲩⲣⲟ .
Agrippa said to Festus, 'This man might have been set free if he had not appealed to Caesar.'
27.1
ⲁⲥϣⲱⲡⲓ ⲇⲉ ⲉⲧⲁⲩϯϩⲁⲡ ⲉⲑⲣⲉⲛⲉⲣϩⲱⲧ ⲉϯϩⲩⲧⲁⲗⲓⲁ ⲁϥϯ ⲙⲡⲁⲩⲗⲟⲥ ⲛⲉⲙϩⲁⲛⲕⲉⲭⲱⲟⲩⲛⲓ ⲉⲩⲥⲟⲛϩ ⲉⲧⲟⲧϥ ⲛⲟⲩⲉⲕⲁⲧⲟⲛⲧⲁⲣⲭ ⲟⲥ ⲉⲡⲉϥⲣⲁⲛ ⲡⲉ ⲓⲟⲩⲗⲓⲟⲥ ⲉⲃⲟⲗ ϧⲉⲛϯⲥⲡⲓⲣⲁ ⲛⲧⲉⲥⲁⲃⲁⲥⲧⲏ .
When it was determined that we should sail for Italy, they delivered Paul and certain other prisoners to a centurion named Julius, of the Augustan band.
27.2
ⲁⲛⲁⲗⲏⲓ ⲇⲉ ⲉⲟⲩϫⲟⲉⲓ ⲛⲁⲛⲇⲣⲁⲙⲁⲛⲧⲓⲛⲉⲟⲥ ⲉϥⲛⲁⲉⲣϩⲱⲧ ⲉⲛⲓⲙⲁ ⲛⲧⲉϯⲁⲥⲓⲁ ⲁⲛϫⲱⲟⲩⲛ ⲉⲃⲟⲗ ⲉϥⲛⲉⲙⲁⲛ ⲛϫⲉⲡⲓⲕⲉⲁⲣⲓⲥⲧⲁⲣⲭⲟⲥ ⲛⲧⲉⲧⲙⲁⲕⲉⲇⲟⲛⲓⲁ ⲡⲓⲣⲉⲙⲑⲉⲥⲥⲁⲗⲟⲛⲓⲕⲏ .
Embarking in a ship of Adramyttium, which was about to sail to places on the coast of Asia, we put to sea; Aristarchus, a Macedonian of Thessalonica, being with us.
27.3
ⲡⲉϥⲣⲁⲥϯ ⲇⲉ ⲁⲛⲓ ⲉⲧⲥⲩⲇⲱⲛ ⲁϥⲓⲣⲓ ⲇⲉ ⲛⲟⲩⲙⲉⲧⲙⲁⲓⲣⲱⲙⲓ ⲛⲉⲙⲡⲁⲩⲗⲟⲥ ⲛϫⲉⲓⲟⲩⲗⲓⲟⲥ ⲁϥⲟⲩⲁϩⲥⲁϩⲛⲓ ⲛⲁϥ ⲉⲑⲣⲉϥϣⲉ ϣⲁⲛⲉϥϣⲫⲏⲣ ⲛⲥⲉϥⲓ ⲡⲉϥⲣⲱⲟⲩϣ .
The next day, we touched at Sidon. Julius treated Paul kindly, and gave him permission to go to his friends and refresh himself.
27.4
ⲟⲩⲟϩ ⲉⲧⲁⲛϫⲱⲟⲩⲛ ⲉⲃⲟⲗ ⲙⲙⲁⲩ ⲁⲛⲉⲣϩⲱⲧ ⲉⲃⲟⲗ ϩⲓⲧⲉⲛⲕⲩⲡⲣⲟⲥ ⲉⲑⲃⲉϫⲉ ⲛⲁⲣⲉⲡⲓⲑⲏⲟⲩ ϯⲉϧⲟⲩⲛ ⲉϩⲣⲁⲛ ⲡⲉ .
Putting to sea from there, we sailed under the lee of Cyprus, because the winds were contrary.
27.5
ⲉⲧⲁⲛⲉⲣϩⲱⲧ ⲇⲉ ⲉⲃⲟⲗ ⲉⲡⲓⲡⲉⲗⲁⲅⲟⲥ ⲉⲧⲟⲩⲧⲱϥ ⲛⲕⲩⲡⲣⲟⲥ ⲛⲉⲙϯⲡⲁⲙⲫⲩⲗⲓⲁ ⲁⲛⲓ ⲉⲗⲩⲥⲧⲣⲁ ⲛⲧⲉϯⲕⲩⲗⲓⲕⲓⲁ .
When we had sailed across the sea which is off Cilicia and Pamphylia, we came to Myra, a city of Lycia.
27.6
ⲟⲩⲟϩ ⲁⲡⲓⲉⲕⲁⲧⲟⲛⲧⲁⲣⲭⲟⲥ ϫⲓⲙⲓ ⲛⲟⲩϫⲟⲉⲓ ⲙⲙⲁⲩ ⲛⲧⲉⲣⲁⲕⲟϯ ⲉϥⲛⲁⲉⲣϩⲱⲧ ⲉϯϩⲩⲧⲁⲗⲓⲁ ⲁϥⲧⲁⲗⲟⲛ ⲉⲣⲟϥ .
There the centurion found a ship of Alexandria sailing for Italy, and he put us on board.
27.7
ⲉⲧⲁⲛⲱⲥⲕ ⲇⲉ ⲛⲉⲣϩⲱⲧ ⲛⲟⲩⲙⲏϣ ⲛⲉϩⲟⲟⲩ ⲟⲩⲟϩ ⲙⲟⲅⲓⲥ ⲉⲧⲁⲛⲓ ⲙⲡⲉⲙⲑⲟ ⲛⲭⲛⲓⲇⲟⲥ ⲛϥⲭⲱ ⲙⲙⲟⲛ ⲁⲛ ⲛϫⲉⲡⲓⲑⲏⲟⲩ ⲁⲛⲉⲣϩⲱⲧ ⲇⲉ ⲉⲃⲟⲗ ϩⲓⲧⲉⲛϯⲕⲣⲏⲧⲏ ⲙⲡⲉⲙⲑⲟ ⲛⲥⲁⲗⲙⲟⲛⲏ .
When we had sailed slowly many days, and had come with difficulty opposite Cnidus, the wind not allowing us further, we sailed under the lee of Crete, opposite Salmone.
27.8
ⲙⲟⲅⲓⲥ ⲉⲧⲁⲛⲭⲁⲥ ⲛⲥⲱⲛ ⲁⲛⲓ ⲉⲩⲙⲁ ⲉⲩⲙⲟⲩϯ ⲉⲣⲟϥ ϫⲉⲛⲓⲗⲩⲙⲏⲛ ⲉⲑⲛⲁⲛⲉⲩ ⲛⲁⲥϧⲉⲛⲧ ⲇⲉ ⲉⲣⲱⲟⲩ ⲛϫⲉⲟⲩⲡⲟⲗⲓⲥ ϫⲉⲗⲁⲥⲉⲁ .
With difficulty sailing along it we came to a certain place called Fair Havens, near the city of Lasea.
27.9
ⲉⲧⲁϥⲥⲓⲛⲓ ⲇⲉ ⲛϫⲉⲟⲩⲛⲓϣϯ ⲛⲭⲣⲟⲛⲟⲥ ⲟⲩⲟϩ ϩⲏⲇⲏ ⲛⲉⲡⲥⲏⲟⲩ ⲁⲛ ϫⲉⲡⲉ ⲛⲉⲣⲡⲗⲉⲓⲛ ⲛⲉⲁ ⲡⲓϫⲟⲉⲓ ⲅⲁⲣ ⲥⲱⲣⲉⲙ ⲡⲉ ⲉⲑⲃⲉϫⲉⲛⲉⲁ ϯⲕⲉⲛⲏⲥⲧⲓⲁ ⲥⲓⲛⲓ ⲡⲉ ⲛⲁϥϯⲛⲟⲙϯ ⲇⲉ ⲛϫⲉⲡⲁⲩⲗⲟⲥ
When much time had passed and the voyage was now dangerous, because the Fast had now already gone by, Paul admonished them,
27.10
ⲉϥϫⲱ ⲙⲙⲟⲥ ⲛⲱⲟⲩ ⲛⲓⲣⲱⲙⲓ ϯⲛⲁⲩ ϫⲉⲟⲩⲟⲛ ⲟⲩϣⲱϣ ⲛⲉⲙⲟⲩⲙⲏϣ ⲛⲟⲥⲓ ⲛⲁϣⲱⲡⲓ ⲟⲩ ⲙⲟⲛⲟⲛ ⲙⲡⲓϫⲟⲉⲓ ⲛⲉⲙⲡⲓⲁⲟⲩⲓⲛ ⲁⲗⲗⲁ ⲛⲉⲙⲛⲉⲛⲕⲉⲯⲩⲭⲏ ϧⲉⲛⲡⲁⲓϫⲓⲛⲉⲣϩⲱⲧ .
and said to them, 'Sirs, I perceive that the voyage will be with injury and much loss, not only of the cargo and the ship, but also of our lives.'
27.11
ⲡⲓⲉⲕⲁⲧⲟⲛⲧⲁⲣⲭⲟⲥ ⲇⲉ ⲛⲁϥⲑⲏⲧ ⲛϩⲏⲧ ⲛⲉⲙⲡⲓⲣⲉϥⲉⲣϩⲉⲙⲓ ⲛⲉⲙⲡⲓⲛⲁⲩⲕⲗⲏⲣⲟⲥ ⲉϩⲟⲧⲉ ⲛⲏ ⲉⲛⲁⲣⲉⲡⲁⲩⲗⲟⲥ ϫⲱ ⲙⲙⲱⲟⲩ .
But the centurion gave more heed to the master and to the owner of the ship than to those things which were spoken by Paul.
27.12
ⲉⲛϥⲥⲙⲟⲛⲧ ⲇⲉ ⲁⲛ ⲛϫⲉⲡⲓⲗⲩⲙⲏⲛ ⲉⲑⲣⲉⲛⲉⲣⲡⲁⲣⲁⲭⲓⲙⲁⲍⲓⲛ ⲁⲡⲟⲩϩⲟⲩⲟ ⲓⲣⲓ ⲛⲟⲩⲥⲟϭⲛⲓ ⲉⲭⲁⲩ ⲉⲃⲟⲗ ⲙⲙⲁⲩ ϫⲉⲁⲣⲏⲟⲩ ⲛⲥⲉϣϫⲟⲙϫⲉⲙ ⲛⲉⲣⲕⲁⲧⲁⲛⲧⲁⲛ ⲉⲫⲟⲓⲛⲓⲝ ⲉⲉⲣⲡⲁⲣⲁⲭ ⲓⲙⲁⲍⲓⲛ ϧⲉⲛⲟⲩⲗⲩⲙⲏⲛ ⲛⲧⲉϯⲕⲣⲏⲧⲏ ⲉϥⲥⲟⲙⲥ ⲉⲡⲓⲥⲁ ⲛⲉⲙⲉⲛⲧ ⲉⲟⲩⲙⲁ ⲛⲭⲱⲣⲁ ⲡⲉ .
Because the haven was not suitable to winter in, the majority advised going to sea from there, if by any means they could reach Phoenix, and winter there, which is a port of Crete, looking northeast and southeast.
27.13
ⲉϥⲛⲓϥⲓ ⲇⲉ ⲛϫⲉⲟⲩⲑⲟⲩⲣⲏⲥ ⲛⲁⲩⲙⲉⲩⲓ ⲡⲉ ϫⲉⲥⲉⲛⲁϣⲧⲁϩⲉ ⲡⲓϣⲟⲣⲡ ⲛⲑⲱϣ ⲉⲧⲁⲩⲁⲓϥ ⲁⲩϫⲱⲟⲩⲛ ⲉⲃⲟⲗ ϧⲉⲛⲁⲥⲥⲱⲥ ⲁⲩⲭⲁ ϯⲕⲣⲏⲧⲏ ⲛⲥⲱⲟⲩ .
When the south wind blew softly, supposing that they had obtained their purpose, they weighed anchor and sailed along Crete, close to shore.
27.14
ⲙⲡⲉⲥⲱⲥⲕ ⲇⲉ ⲁϥⲛⲓϥⲓ ⲉϧⲟⲩⲛ ⲉϩⲣⲁⲛ ⲛϫⲉⲟⲩⲑⲏⲟⲩ ⲉϥϭⲟⲥⲓ ⲫⲏ ⲉϣⲁⲩⲙⲟⲩϯ ⲉⲣⲟϥ ϫⲉⲉⲩⲣⲁⲕⲩⲗⲱⲛ .
But before long, a stormy wind beat down from shore, which is called Euroclydon.
27.15
ⲉⲧⲁϥϩⲱⲗⲉⲙ ⲇⲉ ⲙⲡⲓϫⲟⲉⲓ ⲉⲧⲉⲙⲡⲟⲩϣϫⲉⲙϫⲟⲙ ⲛϯ ⲉϧⲟⲩⲛ ⲉϩⲣⲁϥ ⲙⲡⲓⲑⲏ ⲟⲩ ⲁⲛϯⲧⲟⲧⲉⲛ ⲁⲛⲥⲱⲕ
When the ship was caught, and couldn't face the wind, we gave way to it, and were driven along.
27.16
ⲉⲧⲁⲛⲫⲱⲧ ⲇⲉ ⲉⲟⲩⲛⲏⲥⲟⲥ ⲉⲩⲙⲟⲩϯ ⲉⲣⲟⲥ ϫⲉⲕⲗⲁⲩⲇⲁ ⲙⲟⲅⲓⲥ ⲁⲛϣϫⲉⲙϫⲟⲙ ⲉⲁⲙⲁϩⲓ ⲛϯϧⲉⲗⲙⲉϩⲓ .
Running under the lee of a small island called Clauda, we were able, with difficulty, to secure the boat.
27.17
ⲑⲁⲓ ⲉⲧⲁⲩⲟⲗⲥ ⲛⲁⲩⲉⲣⲃⲟⲏⲑⲓⲛ ⲉⲩⲙⲟⲩⲣ ⲙⲡⲓϫⲟⲉⲓ ⲉⲩⲉⲣϩⲟϯ ⲇⲉ ⲙⲏⲡⲱⲥ ⲛⲥⲉϩⲉⲓ ⲉϧⲣⲏⲓ ⲉϯⲥⲓⲣⲧⲏⲥ ⲁⲛⲭⲱ ⲙⲡⲓⲥⲕⲉⲩⲟⲥ ⲉⲡⲉⲥⲏⲧ ⲟⲩⲟϩ ⲡⲁⲓⲣⲏϯ ⲁⲛⲗⲱⲓⲗⲓ .
After they had hoisted it up, they used cables to help reinforce the ship. Fearing that they would run aground on the Syrtis sand bars, they lowered the sea anchor, and so were driven along.
27.18
ⲉⲣⲉⲃⲟⲗ ⲇⲉ ⲫⲟⲛϩ ⲉⲣⲟⲛ ⲉⲙⲁϣⲱ ⲡⲉϥⲣⲁⲥϯ ⲇⲉ ⲛⲁⲩⲃⲟⲣⲃⲉⲣ ⲉⲃⲟⲗ ⲡⲉ .
As we labored exceedingly with the storm, the next day they began to throw things overboard.
27.19
ⲟⲩⲟϩ ϧⲉⲛⲫⲙⲁϩ ⲅⲛⲉϩⲟⲟⲩ ⲁⲩϩⲓⲧⲟⲧⲟⲩ ⲛⲥⲁⲛⲓⲥⲕⲉⲩⲟⲥ ⲛⲧⲉⲡⲓϫⲟⲉⲓ ⲁⲩⲥⲁⲧⲟⲩ ⲉⲃⲟⲗ
On the third day, they threw out the ship's tackle with their own hands.
27.20
ⲉϥⲟⲩⲟⲛϩ ⲇⲉ ⲁⲛ ⲛϫⲉⲡⲣⲏ ⲛⲉⲙⲛⲓⲥⲓⲟⲩ ⲛⲟⲩⲙⲏϣ ⲛⲉϩⲟⲟⲩ ⲛⲟⲩⲕⲟⲩϫⲓ ⲙⲫⲱⲛϩ ⲁⲛ ⲡⲉ ⲉⲛⲁϥϣⲟⲡ ⲗⲟⲓⲡⲟⲛ ⲛⲉⲁⲥϣⲉ ⲛⲁⲥ ⲡⲉ ⲛϫⲉⲧⲉⲛϩⲉⲗⲡⲓⲥ ⲧⲏⲣⲥ ⲉⲑⲣⲉⲛⲟⲩϫⲁⲓ .
When neither sun nor stars shone on us for many days, and no small storm pressed on us, all hope that we would be saved was now taken away.
27.21
ⲥϣⲟⲡ ⲇⲉ ⲛϫⲉⲟⲩⲛⲓϣϯ ⲙⲙⲉⲧⲁⲑⲟⲩⲱⲙ ⲧⲟⲧⲉ ⲁϥⲟϩⲓ ⲉⲣⲁⲧϥ ⲛϫⲉⲡⲁⲩⲗⲟⲥ ϧⲉⲛⲧⲟⲩϩⲙⲏϯ ⲡⲉϫⲁϥ ϫⲉⲛⲁⲥⲙⲡϣⲁ ⲙⲉⲛ ⲡⲉ ⲱⲛⲓⲣⲱⲙⲓ ⲉⲁⲧⲉⲧⲉⲛⲥⲱⲧⲉⲙ ⲛⲥⲱⲓ ⲉϣⲧⲉⲙϫⲱⲟⲩⲛ ⲉⲃⲟⲗ ϧⲉⲛϯⲕⲣⲏⲧⲏ ⲛⲧⲉⲧⲉⲛϫⲉⲙ ϩⲏⲟⲩ ⲙⲡⲁⲓϣⲱϣ ⲛⲉⲙⲡⲁⲓⲟⲥⲓ .
When they had been long without food, Paul stood up in the middle of them, and said, 'Sirs, you should have listened to me, and not have set sail from Crete, and have gotten this injury and loss.
27.22
ⲟⲩⲟϩ ϯⲛⲟⲩ ⲟⲛ ϯϧⲱⲛϫ ⲉⲣⲱⲧⲉⲛ ⲱⲟⲩⲛϩⲏⲧ ⲟⲩⲯⲩⲭⲏ ⲅⲁⲣ ⲛⲟⲩⲱⲧ ⲉⲃⲟⲗ ϧⲉⲛⲑⲏⲛⲟⲩ ⲥⲛⲁⲧⲁⲕⲟ ⲁⲛ ⲉⲃⲏⲗ ⲉⲡⲓϫⲟⲉⲓ ⲙⲙⲁⲩⲁⲧϥ .
Now I exhort you to cheer up, for there will be no loss of life among you, but only of the ship.
27.23
ⲁϥⲟϩⲓ ⲅⲁⲣ ⲉⲣⲁⲧϥ ⲛⲁϩⲣⲁⲓ ⲙⲡⲁⲓⲉϫⲱⲣϩ ⲛϫⲉⲟⲩⲁⲅⲅⲉⲗⲟⲥ ⲛⲧⲉⲫⲛⲟⲩϯ ⲉⲧⲉⲁⲛⲟⲕ ⲫⲱϥ ⲟⲩⲟϩ ϯϣⲉⲙϣⲓ ⲙⲙⲟϥ .
For there stood by me this night an angel, belonging to the God whose I am and whom I serve,
27.24
ⲉϥϫⲱ ⲙⲙⲟⲥ ϫⲉⲙⲡⲉⲣⲉⲣϩⲟϯ ⲡⲁⲩⲗⲉ ϩⲱϯ ⲛⲥⲉⲧⲁϩⲟⲕ ⲉⲣⲁⲧⲕ ⲛⲁϩⲣⲁϥ ⲙⲡⲟⲩⲣⲟ ⲟⲩⲟϩ ϩⲏⲡⲡⲉ ⲛⲏ ⲉⲧⲉⲣϩⲱⲧ ⲛⲉⲙⲁⲕ ⲧⲏⲣⲟⲩ ⲁⲓⲧⲏⲓⲧⲟⲩ ⲛⲁⲕ ⲛϩⲙⲟⲧ .
saying, 'Don't be afraid, Paul. You must stand before Caesar. Behold, God has granted you all those who sail with you.'
27.25
ⲉⲑⲃⲉⲫⲁⲓ ⲛⲓⲣⲱⲙⲓ ⲟⲩⲛⲟϥ ⲛϩⲏⲧ ϯⲛⲁϩϯ ⲅⲁⲣ ⲉⲫⲛⲟⲩϯ ϫⲉⲥⲉⲛⲁϣⲱⲡⲓ ⲙⲫⲣⲏϯ ⲉⲧⲁⲩⲥⲁϫⲓ ⲛⲉⲙⲏⲓ .
Therefore, sirs, cheer up! For I believe God, that it will be just as it has been spoken to me.
27.26
ϩⲱϯ ⲅⲁⲣ ⲛⲧⲉⲛⲓ ⲉϫⲉⲛⲟⲩⲛⲏⲥⲟⲥ .
But we must run aground on a certain island.'
27.27
ⲉⲧⲁ ⲓⲇ ⲇⲉ ⲛⲉϫⲱⲣϩ ϣⲱⲡⲓ ⲉⲛⲭⲏ ⲥⲁⲡⲓϩⲱⲓⲙⲓ ϧⲉⲛⲡⲓⲁⲛⲇⲣⲓⲁⲥ ϧⲉⲛⲧⲫⲁϣⲓ ⲇⲉ ⲙⲡⲓⲉϫⲱⲣϩ ⲛⲁⲩⲙⲉⲩⲓ ⲇⲉ ⲛϫⲉⲛⲓⲛⲉϥ ϫⲉⲁⲩϧⲱⲛⲧ ⲉϧⲟⲩⲛ ⲉⲟⲩⲭⲱⲣⲁ .
But when the fourteenth night had come, as we were driven back and forth in the Adriatic Sea, about midnight the sailors surmised that they were drawing near to some land.
27.28
ⲟⲩⲟϩ ⲉⲧⲁⲩⲥⲓϯ ⲉⲡⲉⲥⲏⲧ ⲛϯⲃⲟⲗⲓⲥ ⲁⲩϫⲉⲙ ⲕⲛϩϥⲟⲧ ⲙⲙⲱⲟⲩ ⲉⲧⲁⲩⲉⲣ ⲟⲩⲕⲟⲩϫⲓ ⲇⲉ ⲛⲟⲩⲱϣ ⲁⲩⲥⲓϯ ⲛϯⲃⲟⲗⲓⲥ ⲉⲡⲉⲥⲏⲧ ⲁⲩϫⲉⲙ ⲓⲉ ⲛϩϥⲟⲧ .
They took soundings, and found twenty fathoms.
27.29
ⲉⲛⲉⲣϩⲟϯ ⲇⲉ ⲙⲏⲡⲱⲥ ⲛⲧⲉⲛϩⲉⲓ ⲉϧⲣⲏⲓ ⲉϩⲁⲛⲙⲁ ⲉⲩⲛⲁϣⲧ ⲁⲩϩⲓ ⲇⲛⲁⲩϫⲁⲗ ⲥⲁⲫⲁϩⲟⲩ ⲙⲡⲓϫⲟⲉⲓ ⲛⲁⲩⲧⲱⲃϩ ⲉⲧⲣⲉ ⲡⲓⲉϩⲟⲟⲩ ϣⲱⲡⲓ .
Fearing that we would run aground on rocky ground, they let go four anchors from the stern, and wished for daylight.
27.30
ⲉⲩⲕⲱϯ ⲇⲉ ⲛϫⲉⲛⲓⲛⲉϥ ⲛⲥⲉⲫⲱⲧ ⲉⲃⲟⲗ ϩⲁⲡⲓϫⲟⲉⲓ ⲁⲩⲭⲱ ⲛϯⲥⲕⲁⲫⲏ ⲉϧⲣⲏⲓ ⲉⲫⲓⲟⲙ ϧⲉⲛⲟⲩⲗⲱⲓϫⲓ ϩⲱⲥ ϫⲉⲉⲩⲛⲁϩⲓⲟⲩⲓ ⲛϩⲁⲛⲁⲩϫⲁⲗ ⲉⲃⲟⲗ ⲥⲁⲧϩⲏ .
As the sailors were trying to flee out of the ship, and had lowered the boat into the sea, pretending that they would lay out anchors from the bow,
27.31
ⲡⲉϫⲉ ⲡⲁⲩⲗⲟⲥ ⲙⲡⲓⲉⲕⲁⲧⲟⲛⲧⲁⲣⲭⲟⲥ ⲛⲉⲙⲛⲓⲙⲁⲧⲟⲓ ϫⲉⲉϣⲱⲡ ⲁⲣⲉϣⲧⲉⲙ ⲛⲁⲓ ⲟϩⲓ ϩⲓⲡⲓϫⲟⲉⲓ ⲙⲙⲟⲛ ϣϫⲟⲙ ⲙⲙⲱⲧⲉⲛ ⲉⲛⲟϩⲉⲙ .
Paul said to the centurion and to the soldiers, 'Unless these stay in the ship, you can't be saved.'
27.32
ⲧⲟⲧⲉ ⲛⲓⲙⲁⲧⲟⲓ ⲁⲩⲥⲱⲗⲡ ⲛⲛⲓⲛⲟϩ ⲛⲧⲉϯⲥⲕⲁⲫⲏ ⲁⲩⲭⲁⲥ ⲉⲑⲣⲉⲥϩⲉⲓ .
Then the soldiers cut away the ropes of the boat, and let it fall off.
27.33
ϣⲁⲧⲉ ⲡⲓⲉϩⲟⲟⲩ ϣⲱⲡⲓ ⲛⲁϥⲑⲱⲧ ⲙⲡⲟⲩϩⲏⲧ ⲧⲏⲣⲟⲩ ⲛϫⲉⲡⲁⲩⲗⲟⲥ ϩⲓⲛⲁ ⲛⲥⲉϭⲓ ⲛⲟⲩϧⲣⲉ ⲉϥϫⲱ ⲙⲙⲟⲥ ϫⲉⲓⲥ ⲓⲇ ⲛⲉϩⲟⲟⲩ ⲁⲣⲉⲧⲉⲛϫⲟⲕⲟⲩ ⲉⲃⲟⲗ ⲉⲣⲉⲧⲉⲛⲥⲟⲙⲥ ⲉⲃⲟⲗ ⲙⲡⲉⲧⲉⲛⲟⲩⲉⲙ ϩⲗⲓ .
While the day was coming on, Paul begged them all to take some food, saying, 'This day is the fourteenth day that you wait and continue fasting, having taken nothing.
27.34
ⲉⲑⲃⲉⲫⲁⲓ ϯⲧⲱⲃϩ ⲙⲙⲱⲧⲉⲛ ⲉⲑⲣⲉⲧⲉⲧⲉⲛϭ ⲓⲛⲧⲉⲧⲉⲛϧⲣⲉ ⲫⲁⲓ ⲅⲁⲣ ϥϣⲟⲡ ⲛϣⲟⲣⲡ ⲉⲡⲉⲧⲉⲛⲟⲩϫⲁⲓ ⲟⲩϥⲱⲓ ⲅⲁⲣ ⲛⲧⲉⲧⲁⲫⲉ ⲛⲟⲩⲁⲓ ⲙⲙⲱⲧⲉⲛ ϥⲛⲁⲧⲁⲕⲟ ⲁⲛ .
Therefore I beg you to take some food, for this is for your safety; for not a hair will perish from any of your heads.'
27.35
ⲛⲁⲓ ⲇⲉ ⲉⲧⲁϥϫⲟⲧⲟⲩ ⲁϥϭⲓ ⲛⲟⲩⲱⲓⲕ ⲁϥϣⲉⲡϩⲙⲟⲧ ⲛⲧⲉⲛⲫⲛⲟⲩϯ ⲙⲡⲉⲙⲑⲟ ⲛⲟⲩⲟⲛ ⲛⲓⲃⲉⲛ ⲟⲩⲟϩ ⲉⲧⲁϥⲫⲁϣϥ ⲁϥⲉⲣϩⲏⲧⲥ ⲛⲟⲩⲱⲙ .
When he had said this, and had taken bread, he gave thanks to God in the presence of all, and he broke it, and began to eat.
27.36
ⲉⲧⲁ ⲡⲟⲩϩⲏⲧ ⲇⲉ ⲟⲩⲛⲟϥ ⲧⲏⲣⲟⲩ ⲛⲑⲱⲟⲩ ϩⲱⲟⲩ ⲁⲩϭⲓ ⲛⲧⲟⲩϧⲣⲉ .
Then they all cheered up, and they also took food.
27.37
ⲛⲓⲯⲩⲭⲏ ⲇⲉ ⲧⲏⲣⲟⲩ ⲉⲛⲁⲩϩⲓ ⲡⲓϫⲟⲉⲓ ⲛⲁⲩⲉⲣ ⲥⲟ ⲡⲉ .
In all, we were two hundred seventy-six souls on the ship.
27.38
ⲉⲧⲁⲩⲥⲓ ⲇⲉ ⲉⲃⲟⲗ ϧⲉⲛϯϧⲣⲉ ⲛⲁⲩⲑⲣⲟ ⲙⲡⲓϫⲟⲉⲓ ⲉⲁⲥⲓⲁⲓ ⲡⲉ ⲉⲩⲥⲓϯ ⲙⲡⲓⲥⲟⲩⲟ ⲉⲫⲓⲟⲙ .
When they had eaten enough, they lightened the ship, throwing out the wheat into the sea.
27.39
ϩⲟⲧⲉ ⲇⲉ ⲉⲧⲁ ⲡⲓⲉϩⲟⲟⲩ ϣⲱⲡⲓ ⲙⲡⲟⲩⲥⲟⲩⲉⲛ ⲡⲓⲕⲁϩⲓ ⲛⲁⲩϯ ⲇⲉ ⲛϩⲑⲏⲟⲩ ⲛⲟⲩⲕⲟⲗⲡⲥ ⲉⲟⲩⲟⲛ ⲟⲩⲭⲣⲟ ⲛϧⲏⲧϥ ⲛⲁⲩⲥⲟϭⲛⲓ ⲇⲉ ϫⲉⲁⲣⲏⲟⲩ ⲥⲉⲛⲁϣⲛⲟϩⲉⲙ ⲙⲡⲓϫⲟⲉⲓ ⲙⲙⲁⲩ .
When it was day, they didn't recognize the land, but they noticed a certain bay with a beach, and they decided to try to drive the ship onto it.
27.40
ⲟⲩⲟϩ ⲉⲧⲁⲩϥⲓ ⲛⲛⲓⲁⲩϫⲁⲗ ⲛⲁⲩⲭⲱ ⲙⲙⲱⲟⲩ ⲉϧⲣⲏⲓ ⲉⲫⲓⲟⲙ ⲁⲙⲁ ⲇⲉ ⲁⲩⲭⲁ ϫⲱⲟⲩ ⲛⲛⲓϩⲓⲏⲟⲩ ⲉⲃⲟⲗ ⲟⲩⲟϩ ⲉⲧⲁⲩⲥⲟⲥⲓ ⲙⲡⲓⲁⲣⲧⲉⲙⲱⲛ ⲙⲡⲓⲑⲏⲟⲩ ⲉⲑⲛⲓϥⲓ ⲁⲩⲙⲟⲛⲓ ⲉⲡⲓⲭⲣⲟ .
Casting off the anchors, they left them in the sea, at the same time untying the rudder ropes. Hoisting up the foresail to the wind, they made for the beach.
27.41
ⲉⲧⲁⲩϩⲉⲓ ⲇⲉ ⲉⲟⲩⲙⲁ ⲉϥⲟⲓ ⲛⲑⲁⲗⲁⲥⲥⲁ ⲥⲛⲟⲩϯ ⲁⲩϩⲉⲣϣ ⲡⲓϫⲟⲉⲓ ⲙⲙⲁⲩ ⲟⲩⲟϩ ϩⲓⲧϩⲏ ⲙⲉⲛ ⲙⲙⲟϥ ⲁϥⲧⲁϫⲣⲟ ⲁϥⲟϩⲓ ⲛϥⲕⲓⲙ ⲁⲛ ⲫⲁϩⲟⲩ ⲇⲉ ⲙⲙⲟϥ ⲁϥⲃⲱⲗ ⲉⲃⲟⲗ ⲛⲧⲉⲛⲡϭⲓⲛϫⲟⲛⲥ ⲛⲧⲉⲛⲓϩⲱⲓⲙⲓ .
But coming to a place where two seas met, they ran the vessel aground. The bow struck and remained immovable, but the stern began to break up by the violence of the waves.
27.42
ⲁⲩⲓⲣⲓ ⲇⲉ ⲛⲟⲩⲥⲟϭⲛⲓ ⲛϫⲉⲛⲓⲙⲁⲧⲟⲓ ϩⲓⲛⲁ ⲛⲥⲉϧⲱⲧⲉⲃ ⲛⲛⲏ ⲉⲧⲥⲟⲛϩ ⲙⲏⲡⲱⲥ ⲛⲧⲉⲟⲩⲁⲓ ⲛⲏⲃⲓ ⲛⲧⲉϥⲫⲱⲧ .
The soldiers' counsel was to kill the prisoners, so that none of them would swim out and escape.
27.43
ⲡⲓⲉⲕⲁⲧⲟⲛⲧⲁⲣⲭⲟⲥ ⲇⲉ ⲉϥⲟⲩⲱϣ ⲉⲛⲟϩⲉⲙ ⲙⲡⲁⲩⲗⲟⲥ ⲁϥϣⲁϣⲧⲟⲩ ⲉϣⲧⲉⲙⲓⲣⲓ ⲙⲡⲟⲩⲥⲟϭⲛⲓ ⲁϥⲟⲩⲁϩⲥⲁϩⲛⲓ ⲇⲉ ⲛⲛⲏ ⲉⲧⲉⲟⲩⲟⲛ ϣϫⲟⲙ ⲙⲙⲱⲟⲩ ⲛⲥⲉϥⲓⲧⲟⲩ ⲉⲫⲓⲟⲙ ⲛⲥⲉⲛⲏⲃⲓ ⲛϣⲟⲣⲡ ⲉⲡⲓⲭⲣⲟ .
But the centurion, desiring to save Paul, stopped them from their purpose, and commanded that those who could swim should throw themselves overboard first to go toward the land;
27.44
ⲟⲩⲟϩ ⲡⲕⲉⲥⲱϫⲡ ϩⲁⲛⲟⲩⲟⲛ ⲙⲉⲛ ϩⲓϩⲁⲛⲥⲁⲛⲓⲥ ϩⲁⲛⲕⲉⲭⲱⲟⲩⲛⲓ ⲇⲉ ϩⲓϩⲁⲛⲕⲉⲉⲛⲭ ⲁⲓ ⲛⲧⲉⲡⲓϫⲟⲉⲓ ⲟⲩⲟϩ ⲡⲁⲓⲣⲏϯ ⲁⲥϣⲱⲡⲓ ⲉⲑⲣⲉⲛⲛⲟϩⲉⲙ ⲧⲏⲣⲉⲛ ⲉⲡⲓⲭⲣⲟ .
and the rest should follow, some on planks, and some on other things from the ship. So it happened that they all escaped safely to the land.
28.1
ⲟⲩⲟϩ ⲉⲧⲁⲛⲛⲟϩⲉⲙ ⲧⲟⲧⲉ ⲁⲛⲉⲙⲓ ϫⲉϣⲁⲩⲙⲟⲩϯ ⲛϯⲛⲏⲥⲟⲥ ⲉⲧⲉⲙⲙⲁⲩ ϫⲉⲙⲉⲗⲓⲧⲓⲛⲏ .
When we had escaped, then they learned that the island was called Malta.
28.2
ⲛⲓⲃⲁⲣⲃⲁⲣⲟⲥ ⲇⲉ ⲛⲧⲉⲡⲓⲙⲁ ⲉⲧⲉⲙⲙⲁⲩ ⲛⲁⲩⲓⲣⲓ ⲛⲟⲩⲙⲉⲧⲙⲁⲓⲣⲱⲙⲓ ⲛⲉⲙⲁⲛ ⲛⲟⲩⲕⲟⲩϫⲓ ⲁⲛ ⲉⲧⲁⲩϭⲉⲣⲉ ⲟⲩⲭⲣⲱⲙ ⲅⲁⲣ ⲁⲩϣⲟⲡⲧⲉⲛ ⲧⲏⲣⲉⲛ ⲉⲣⲱⲟⲩ ⲉⲑⲃⲉⲡⲓⲙⲟⲩⲛϩⲱⲟⲩ ⲉⲧⲉⲛⲁϥϣⲟⲡ ⲛⲉⲙⲉⲑⲃⲉⲡⲓⲱϫⲉⲃ .
The natives showed us uncommon kindness; for they kindled a fire, and received us all, because of the present rain, and because of the cold.
28.3
ⲁϥⲕⲟⲧϥ ⲇⲉ ⲛϫⲉⲡⲁⲩⲗⲟⲥ ⲁϥϫⲓⲙⲓ ⲛⲟⲩⲙⲏϣ ⲛⲗⲉⲡϣ ⲟⲩⲟϩ ⲉⲧⲁϥϩⲓⲧⲟⲩ ⲉⲡⲓⲭⲣⲱⲙ ⲟⲩⲟϩ ⲉⲃⲟⲗ ϩⲓⲧⲉⲛⲡⲓϧⲙⲟⲙ ⲁⲥⲓ ⲉⲃⲟⲗ ⲛϫⲉⲟⲩⲁϫⲱ ⲁⲥϫⲉⲕϩ ⲧⲉϥϫⲓϫ .
But when Paul had gathered a bundle of sticks and laid them on the fire, a viper came out because of the heat, and fastened on his hand.
28.4
ⲉⲧⲁⲩⲛⲁⲩ ⲇⲉ ⲛϫⲉⲛⲓⲃⲁⲣⲃⲁⲣⲟⲥ ⲉⲡⲓⲑⲏ ⲣⲓⲟⲛ ⲉϥⲁϣⲓ ⲛⲥⲁⲧⲉϥϫⲓϫ ⲛⲁⲩϫⲱ ⲙⲙⲟⲥ ⲛⲛⲟⲩⲉⲣⲏⲟⲩ ϫⲉⲡⲁⲛⲧⲱⲥ ⲡⲁⲓⲣⲱⲙⲓ ⲟⲩⲣⲉϥϧⲱⲧⲉⲃ ⲡⲉ ⲫⲁⲓ ⲉⲧⲉⲙⲉⲛⲉⲛⲥⲁⲉⲧⲁϥⲛⲟϩⲉⲙ ⲉⲃⲟⲗ ϧⲉⲛⲡⲓⲟⲙ ⲙⲡⲉ ⲡⲉϥϩⲁⲡ ⲭⲁϥ ⲉⲱⲛϧ .
When the natives saw the creature hanging from his hand, they said one to another, 'No doubt this man is a murderer, whom, though he has escaped from the sea, yet Justice has not allowed to live.'
28.5
ⲛⲑⲟϥ ⲙⲉⲛ ⲟⲩⲛ ⲁϥⲛⲉϩ ⲡⲓⲑⲏⲣⲓⲟⲛ ⲉⲡⲓⲭⲣⲱⲙ ⲙⲡⲉ ϩⲗⲓ ⲙⲡⲉⲧϩⲱⲟⲩ ϣⲱⲡⲓ ⲙⲙⲟϥ .
However he shook off the creature into the fire, and wasn't harmed.
28.6
ⲛⲑⲱⲟⲩ ⲇⲉ ⲛⲁⲩⲙⲉⲩⲓ ϫⲉϥⲛⲁⲫⲱϫⲓ ⲓⲉ ϥⲛⲁϩⲉⲓ ⲥⲁⲧⲟⲧϥ ⲛⲧⲉϥⲙⲟⲩ ⲉⲧⲁⲩⲱⲥⲕ ⲇⲉ ⲉⲩⲥⲟⲙⲥ ⲉⲣⲟϥ ⲟⲩⲟϩ ⲉⲧⲁⲩⲛⲁⲩ ϫⲉⲙⲡⲉ ϩⲗⲓ ⲛϩⲱⲃ ⲉϥϩⲱⲟⲩ ⲧⲁϩⲟϥ ⲁⲩⲕⲟⲧⲟⲩ ⲥⲁⲧⲟⲧⲟⲩ ⲉⲩϫⲱ ⲙⲙⲟⲥ ⲉⲣⲟϥ ϫⲉⲟⲩⲛⲟⲩϯ ⲡⲉ .
But they expected that he would have swollen or fallen down dead suddenly, but when they watched for a long time and saw nothing bad happen to him, they changed their minds, and said that he was a god.
28.7
ⲛϩⲣⲏⲓ ⲇⲉ ϧⲉⲛⲡⲓⲙⲁ ⲉⲧⲉⲙⲙⲁⲩ ⲛⲉⲟⲩⲟⲛ ⲟⲩⲙⲏϣ ⲛⲓⲟϩⲓ ϣⲟⲡ ⲛⲧⲉⲡⲓϩⲟⲩⲓⲧ ⲛⲧⲉϯⲛⲏⲥⲟⲥ ⲉⲡⲉϥⲣⲁⲛ ⲡⲉ ⲡⲟⲩⲡⲗⲓⲟⲥ ⲫⲁⲓ ⲉⲧⲁϥϭⲓⲧⲧⲉⲛ ⲉϩⲣⲏⲓ ⲁϥϣⲟⲡⲧⲉⲛ ⲉⲣⲟϥ ϧⲉⲛⲟⲩⲙⲉⲓ ⲙⲙⲉⲧϣⲁⲡϣⲉⲙⲙⲟ ⲛⲅ ⲛⲉϩⲟⲟⲩ .
Now in the neighborhood of that place were lands belonging to the chief man of the island, named Publius, who received us, and courteously entertained us for three days.
28.8
ⲁⲥϣⲱⲡⲓ ⲇⲉ ⲉⲧⲁ ⲫⲓⲱⲧ ⲙⲡⲟⲩⲡⲗⲓⲟⲥ ϣⲱⲡⲓ ϧⲉⲛϩⲁⲛϧⲙⲟⲙ ⲛⲉⲙϩⲁⲛϣⲁⲛⲙⲁϧⲧ ⲉϥϣⲧⲏⲟⲩⲧ ϧⲁⲣⲱⲟⲩ ⲫⲁⲓ ⲇⲉ ⲁⲡⲁⲩⲗⲟⲥ ϣⲉ ⲉϧⲟⲩⲛ ϣⲁⲣⲟϥ ⲁϥⲉⲣⲡⲣⲟⲥⲉⲩⲭⲉⲥⲑⲉ ⲁϥⲭⲁ ⲛⲉϥϫⲓϫ ϩⲓϫⲱϥ ⲁϥⲧⲁⲗϭⲟϥ .
It happened that the father of Publius lay sick of fever and dysentery. Paul entered in to him, prayed, and laying his hands on him, healed him.
28.9
ⲉⲧⲁ ⲫⲁⲓ ⲇⲉ ϣⲱⲡⲓ ⲡⲥⲱϫⲡ ⲉⲧϧⲉⲛϯⲛⲏⲥⲟⲥ ⲉⲧⲉⲟⲩⲟⲛ ϣⲱⲛⲓ ϣⲟⲡ ⲙⲙⲱⲟⲩ ⲛⲁⲩⲛⲏⲟⲩ ϣⲁⲣⲟϥ ⲟⲩⲟϩ ⲛⲁϥⲧⲁⲗϭⲟ ⲙⲙⲱⲟⲩ .
Then when this was done, the rest also who had diseases in the island came, and were cured.
28.10
ⲛⲁⲓ ⲇⲉ ⲁⲩⲧⲁⲓⲟⲛ ϧⲉⲛⲟⲩⲛⲓϣϯ ⲛⲧⲁⲓⲟ ⲟⲩⲟϩ ⲉⲩⲛⲁⲉⲛⲧⲉⲛ ⲉⲃⲟⲗ ⲙⲙⲁⲩ ⲁⲩⲥⲉⲃⲧⲱⲧⲉⲛ ⲙⲡⲉⲧⲉⲛⲉⲣⲭⲣⲓⲁ ⲙⲙⲟϥ .
They also honored us with many honors, and when we sailed, they put on board the things that we needed.
28.11
ⲙⲉⲛⲉⲛⲥⲁⲅⲇⲉ ⲛⲁⲃⲟⲧ ⲁⲛⲓ ϩⲓⲟⲩϫⲟⲉⲓ ⲛⲧⲉⲣⲁⲕⲟϯ ⲉⲣⲉⲟⲩⲟⲛ ⲟⲩⲙⲏⲓⲛⲓ ϩⲓⲱⲧϥ ⲛⲧⲉϩⲁⲛⲇⲓⲟⲥⲕⲟⲣⲟⲥ ⲉⲁϥⲉⲣⲡⲁⲣⲁⲭⲓⲙⲁⲍⲓⲛ ϧⲉⲛϯⲛⲏⲥⲟⲥ .
After three months, we set sail in a ship of Alexandria which had wintered in the island, whose sign was 'The Twin Brothers.'
28.12
ⲟⲩⲟϩ ⲁⲛⲙⲟⲛⲓ ⲉⲥⲓⲣⲁⲕⲟⲩⲥⲁⲥ ⲁⲛϣⲱⲡⲓ ⲙⲙⲁⲩ ⲛⲅ ⲛⲉϩⲟⲟⲩ .
Touching at Syracuse, we stayed there three days.
28.13
ⲟⲩⲟϩ ⲉⲧⲁⲛⲓ ⲉⲃⲟⲗ ⲙⲙⲁⲩ ⲁⲛⲉⲣⲕⲁⲧⲁⲛⲧⲁⲛ ⲉⲣⲏⲅⲓⲟⲛ ⲟⲩⲟϩ ⲙⲉⲛⲉⲛⲥⲁⲟⲩⲉϩⲟⲟⲩ ⲁϥⲁⲙⲁϩⲓ ⲉϧⲟⲩⲛ ⲉϫⲱⲛ ⲛϫⲉⲟⲩⲑⲟⲩⲣⲏ ⲥⲁⲛⲓ ⲙⲡⲉⲛⲃ ⲉⲡⲟⲛⲧⲓⲟⲗⲟⲩⲥ .
From there we circled around and arrived at Rhegium. After one day, a south wind sprang up, and on the second day we came to Puteoli,
28.14
ⲟⲩⲟϩ ⲉⲧⲁⲛϫⲓⲙⲓ ⲛⲛⲓⲥⲛⲏⲟⲩ ⲙⲙⲁⲩ ⲁⲩⲑⲉⲧ ⲡⲉⲛϩⲏⲧ ⲉⲑⲣⲉⲛϣⲱⲡⲓ ϧⲁⲧⲟⲧⲟⲩ ⲛⲍ ⲛⲉϩⲟⲟⲩ ⲟⲩⲟϩ ⲡⲁⲓⲣⲏϯ ⲁⲛⲓ ⲉⲣⲱⲙⲏ .
where we found brothers, and were entreated to stay with them for seven days. So we came to Rome.
28.15
ⲉⲧⲁⲩⲥⲱⲧⲉⲙ ⲇⲉ ⲛϫⲉⲛⲓⲥⲛⲏⲟⲩ ⲉⲧⲉⲙⲙⲁⲩ ⲉⲑⲃⲏⲧⲉⲛ ⲁⲩⲓ ⲉⲃⲟⲗ ⲉϩⲣⲁⲛ ϣⲁⲉϩⲣⲏⲓ ⲉⲁⲡⲡⲓⲟⲫⲟⲣⲟⲩ ⲛⲅ ⲛⲧⲁⲃⲉⲣⲛⲱⲛ ⲉⲧⲁϥⲛⲁⲩ ⲇⲉ ⲉⲣⲱⲟⲩ ⲛϫⲉⲡⲁⲩⲗⲟⲥ ⲁϥϣⲉⲡϩⲙⲟⲧ ⲛⲧⲉⲛⲫⲛⲟⲩϯ ⲟⲩⲟϩ ⲁϥϭⲓ ⲛⲟⲩⲙⲉⲧϫⲁⲣϩⲏ ⲧ .
From there the brothers, when they heard of us, came to meet us as far as The Market of Appius and The Three Taverns. When Paul saw them, he thanked God, and took courage.
28.16
ϩⲟⲧⲉ ⲇⲉ ⲉⲧⲁⲛϣⲉ ⲉϧⲟⲩⲛ ⲉⲣⲱⲙⲏ ⲁϥⲟⲩⲁϩⲥⲁϩⲛⲓ ⲙⲡⲁⲩⲗⲟⲥ ⲉⲑⲣⲉϥϣⲱⲡⲓ ⲙⲙⲁⲩⲁⲧϥ ⲛⲉⲙⲡⲓⲙⲁⲧⲟⲓ ⲉⲧⲁⲣⲉϩ ⲉⲣⲟϥ .
When we entered into Rome, the centurion delivered the prisoners to the captain of the guard, but Paul was allowed to stay by himself with the soldier who guarded him.
28.17
ⲁⲥϣⲱⲡⲓ ⲇⲉ ⲙⲉⲛⲉⲛⲥⲁⲅⲛⲉϩⲟⲟⲩ ⲁϥⲙⲟⲩϯ ⲉⲛⲓϩⲟⲩⲁϯ ⲛⲧⲉⲛⲓⲓⲟⲩⲇⲁⲓ ⲉⲧϣⲟⲡ ⲙⲙⲁⲩ ⲉⲧⲁⲩⲓ ⲇⲉ ⲙⲙⲁⲩ ⲛⲁϥϫⲱ ⲙⲙⲟⲥ ⲛⲱⲟⲩ ⲁⲛⲟⲕ ⲛⲓⲣⲱⲙⲓ ⲛⲉⲛⲥⲛⲏⲟⲩ ⲙⲡⲓⲉⲣϩⲗⲓ ⲉⲓϯ ⲉϧⲟⲩⲛ ⲉϩⲣⲁϥ ⲙⲡⲓⲗⲁⲟⲥ ⲓⲉ ⲛⲓⲥⲩⲛⲏⲑⲓⲁ ⲛⲧⲉⲛⲉⲛⲓⲟϯ ⲁⲩⲥⲟⲛϩⲧ ⲉⲃⲟⲗ ϧⲉⲛⲓⲉⲣⲟⲥⲁⲗⲏⲙ ⲁⲩⲧⲏⲓⲧ ⲉϧⲣⲏⲓ ⲉⲛⲉⲛϫⲓϫ ⲛⲛⲓⲣⲱⲙⲉⲟⲥ .
It happened that after three days Paul called together those who were the leaders of the Jews. When they had come together, he said to them, 'I, brothers, though I had done nothing against the people, or the customs of our fathers, still was delivered prisoner from Jerusalem into the hands of the Romans,
28.18
ⲛⲁⲓ ⲉⲧⲁⲩϧⲉⲧϧⲱⲧ ⲛⲁⲩⲟⲩⲱϣ ⲉⲭⲁⲧ ⲉⲃⲟⲗ ⲡⲉ ϫⲉⲙⲡⲟⲩϫⲉⲙ ϩⲗⲓ ⲛⲉⲧⲓⲁ ⲛⲧⲉⲫⲙⲟⲩ ⲉϥϣⲟⲡ ⲛϧⲏⲧ .
who, when they had examined me, desired to set me free, because there was no cause of death in me.
28.19
ⲉⲩⲉⲣⲁⲛⲧⲓⲗⲉⲅⲓⲛ ⲇⲉ ⲛϫⲉⲛⲓⲓⲟⲩⲇⲁⲓ ⲁⲥⲉⲣⲁⲛⲁⲅⲕⲏ ⲉⲣⲟⲓ ⲉⲉⲣⲉⲡⲓⲕⲁⲗⲓⲥⲑⲉ ⲙⲡⲟⲩⲣⲟ ⲙⲫⲣⲏϯ ⲁⲛ ϫⲉⲟⲩⲟⲛ ϩⲗⲓ ⲛⲕⲁⲧⲏⲅⲟⲣⲓⲁ ⲉⲓⲣⲓ ⲙⲡⲁϣⲗⲱⲗ .
But when the Jews spoke against it, I was constrained to appeal to Caesar, not that I had anything about which to accuse my nation.
28.20
ⲉⲑⲃⲉⲧⲁⲓⲗⲱⲓϫⲓ ⲟⲩⲛ ⲛⲁⲓⲧⲱⲃϩ ⲉⲛⲁⲩ ⲉⲣⲱⲧⲉⲛ ⲟⲩⲟϩ ⲉⲥⲁϫⲓ ⲛⲉⲙⲱⲧⲉⲛ ⲉⲑⲃⲉⲧϩⲉⲗⲡⲓⲥ ⲅⲁⲣ ⲙⲡⲓⲥⲗ ϯⲥⲟⲛϩ ⲛⲧⲁⲓϩⲁⲗⲩⲥⲓⲥ .
For this cause therefore I asked to see you and to speak with you. For because of the hope of Israel I am bound with this chain.'
28.21
ⲛⲑⲱⲟⲩ ⲇⲉ ⲡⲉϫⲱⲟⲩ ⲛⲁϥ ϫⲉⲁⲛⲟⲛ ⲟⲩⲇⲉ ⲙⲡⲉ ⲥϧⲁⲓ ⲓⲛⲁⲛ ⲉⲃⲟⲗ ϧⲉⲛϯⲓⲟⲩⲇⲉⲁ ⲟⲩⲇⲉ ⲙⲡⲉϥⲓ ⲛϫⲉⲟⲩⲁⲓ ⲉⲃⲟⲗ ϧⲉⲛⲛⲓⲥⲛⲏⲟⲩ ⲛⲧⲉϥⲧⲁⲙⲟⲛ ⲓⲉ ⲛⲧⲉϥϫⲉ ⲟⲩⲥⲁϫⲓ ⲉϥϩⲱⲟⲩ ϧⲁⲣⲟⲕ .
They said to him, 'We neither received letters from Judea concerning you, nor did any of the brothers come here and report or speak any evil of you.
28.22
ⲧⲉⲛⲉⲣⲁⲝⲓⲟⲓⲛ ⲇⲉ ⲉⲥⲱⲧⲉⲙ ⲉⲃⲟⲗ ϩⲓⲧⲟⲧⲕ ⲛⲛⲏ ⲉⲧⲉⲕⲙⲉⲩⲓ ⲉⲣⲱⲟⲩ ⲉⲑⲃⲉⲧⲁⲓϩⲉⲣⲉⲥⲓⲥ ⲅⲁⲣ ⲡⲓϩⲱⲃ ⲟⲩⲟⲛϩ ⲉⲣⲟⲛ ϫⲉⲥⲉⲉⲣⲁⲛⲧⲓⲗⲉⲅⲓⲛ ⲉⲑⲃⲏⲧⲥ ϧⲉⲛⲙⲁⲓ ⲛⲓⲃⲉⲛ .
But we desire to hear from you what you think. For, as concerning this sect, it is known to us that everywhere it is spoken against.'
28.23
ⲁⲩϯⲛⲉⲓ ⲇⲉ ⲛⲁϥ ⲛⲟⲩⲉϩⲟⲟⲩ ⲁⲩⲓ ϣⲁⲣⲟϥ ⲉϯⲉⲝⲉⲛⲓⲁ ⲉⲩⲉⲣⲟⲩⲙⲏϣ ⲟⲩⲟϩ ⲁϥⲥⲁϫⲓ ϧⲁⲧⲟⲧⲟⲩ ⲉϥⲉⲣⲙⲉⲑⲣⲉ ⲛⲱⲟⲩ ⲉⲑⲃⲉϯⲙⲉⲧⲟⲩⲣⲟ ⲛⲧⲉⲫⲛⲟⲩϯ ⲉϥⲑⲱⲧ ⲙⲡⲟⲩϩⲏⲧ ⲉⲑⲃⲉⲓⲏⲥⲟⲩⲥ ⲉⲃⲟⲗ ϧⲉⲛⲫⲛⲟⲙⲟⲥ ⲙⲙⲱⲩⲥⲏⲥ ⲛⲉⲙⲛⲓⲡⲣⲟⲫⲏⲧⲏⲥ ⲓⲥϫⲉⲛ ϣⲟⲣⲡ ϣⲁⲣⲟⲩϩⲓ .
When they had appointed him a day, many people came to him at his lodging. He explained to them, testifying about the Kingdom of God, and persuading them concerning Jesus, both from the law of Moses and from the prophets, from morning until evening.
28.24
ⲟⲩⲟϩ ϩⲁⲛⲟⲩⲟⲛ ⲙⲉⲛ ⲛⲁⲣⲉⲡⲟⲩϩⲏⲧ ⲑⲏⲧ ⲛⲉⲙⲛⲏ ⲉⲛⲁϥϫⲱ ⲙⲙⲱⲟⲩ ϩⲁⲛⲕⲉⲭⲱⲟⲩⲛⲓ ⲇⲉ ⲛⲁⲩⲟⲓ ⲛⲁⲧⲛⲁϩϯ .
Some believed the things which were spoken, and some disbelieved.
28.25
ⲉⲩⲟⲓ ⲇⲉ ⲛⲁⲧϯⲙⲁϯ ⲛⲉⲙⲛⲟⲩⲉⲣⲏ ⲟⲩ ⲁϥⲭⲁⲩ ⲉⲃⲟⲗ ⲉϥϫⲱ ⲛⲟⲩⲥⲁϫⲓ ⲛⲟⲩⲱⲧ ⲛⲱⲟⲩ ⲛϫⲉⲡⲁⲩⲗⲟⲥ ϫⲉⲕⲁⲗⲱⲥ ⲁ ⲡⲓⲡⲛⲉⲩⲙⲁⲉⲑⲟⲩⲁⲃ ⲥⲁϫⲓ ⲉⲃⲟⲗ ϩⲓⲧⲟⲧϥ ⲛⲏⲥⲁⲏⲁⲥ ⲡⲓⲡⲣⲟⲫⲏⲧⲏⲥ ⲛⲉⲙⲛⲉⲧⲉⲛⲓⲟϯ
When they didn't agree among themselves, they departed after Paul had spoken one word, 'The Holy Spirit spoke rightly through Isaiah, the prophet, to our fathers,

Bohairic Coptic New Testament, Coptic SCRIPTORIUM (github.com/CopticScriptorium/corpora, corpus bohairic.nt). Coptic text from Marcion / Hany Takla; annotation by Nina Speranskaja, Nicholas Wagner and Amir Zeldes. English is the World English Bible (public domain), aligned by Coptic SCRIPTORIUM. Licence: CC-BY 4.0. Source.