Acts (Bohairic Coptic)

Coptic New Testament (Bohairic) · 1,006 sections

1.1
ⲡⲓϩⲟⲩⲓⲧ ⲙⲉⲛ ⲛⲥⲁϫⲓ ⲁⲓⲁⲓϥ ⲉⲑⲃⲉϩⲱⲃ ⲛⲓⲃⲉⲛ ⲱⲑⲉⲟⲫⲩⲗⲗⲉ ϧⲉⲛⲛⲏ ⲉⲧⲁ ⲓⲏⲥⲟⲩⲥ ϩⲓⲧⲟⲧϥ ⲉⲁⲓⲧⲟⲩ ⲟⲩⲟϩ ⲉϯⲥⲃⲱ .
The first book I wrote, Theophilus, concerned all that Jesus began both to do and to teach,
1.2
ϣⲁⲡⲓⲉϩⲟⲟⲩ ⲉⲧⲁϥϩⲟⲛϩⲉⲛ ⲉⲧⲟⲧⲟⲩ ⲛⲛⲓⲁⲡⲟⲥⲧⲟⲗⲟⲥ ⲉⲃⲟⲗ ϩⲓⲧⲉⲛⲡⲓⲡⲛⲉⲩⲙⲁⲉⲑⲟⲩⲁⲃ ⲛⲏ ⲉⲧⲁϥⲥⲟⲧⲡⲟⲩ ⲁⲩⲟⲗϥ ⲉⲧⲫⲉ .
until the day in which he was received up, after he had given commandment through the Holy Spirit to the apostles whom he had chosen.
1.3
ⲛⲁⲓ ⲉⲧⲁϥⲟⲩⲟⲛϩϥ ⲉⲣⲱⲟⲩ ⲉϥⲟⲛϧ ⲙⲉⲛⲉⲛⲥⲁⲉⲧⲁϥϣⲉⲡⲙⲕⲁϩ ϧⲉⲛⲟⲩⲙⲏϣ ⲙⲙⲏⲓⲛⲓ ⲉⲃⲟⲗ ϩⲓⲧⲉⲛⲙⲛⲉϩⲟⲟⲩ ⲉϥⲟⲩⲟⲛϩ ⲙⲙⲟϥ ⲉⲣⲱⲟⲩ ⲟⲩⲟϩ ⲉϥⲥⲁϫⲓ ⲛⲉⲙⲱⲟⲩ ⲉⲑⲃⲉϯⲙⲉⲧⲟⲩⲣⲟ ⲛⲧⲉⲫⲛⲟⲩϯ .
To these he also showed himself alive after he suffered, by many proofs, appearing to them over a period of forty days, and speaking about God's Kingdom.
1.4
ⲟⲩⲟϩ ⲉϥⲟⲩⲱⲙ ⲛⲉⲙⲱⲟⲩ ⲁϥϩⲟⲛϩⲉⲛ ⲛⲱⲟⲩ ⲉϣⲧⲉⲙⲫⲱⲣϫ ⲥⲁⲃⲟⲗ ⲛⲓⲉⲣⲟⲥⲁⲗⲏⲙ ⲁⲗⲗⲁ ⲉⲟϩⲓ ⲙⲡⲓⲱϣ ⲛⲧⲉⲫⲓⲱⲧ ⲫⲏ ⲉⲧⲁⲣⲉⲧⲉⲛⲥⲟⲑⲙⲉϥ ⲛⲧⲟⲧ .
Being assembled together with them, he commanded them, 'Don't depart from Jerusalem, but wait for the promise of the Father, which you heard from me.
1.5
ϫⲉⲓⲱⲁⲛⲛⲏⲥ ⲙⲉⲛ ⲁϥϯⲱⲙⲥ ϧⲉⲛⲟⲩⲙⲱⲟⲩ ⲛⲑⲱⲧⲉⲛ ⲇⲉ ⲥⲉⲛⲁⲉⲙⲥ ⲑⲏⲛⲟⲩ ϧⲉⲛⲟⲩⲡⲛⲉⲩⲙⲁⲉϥⲟⲩⲁⲃ ⲙⲉⲛⲉⲛⲥⲁⲟⲩⲙⲏϣ ⲛⲉϩⲟⲟⲩ ⲁⲛ ⲁⲛⲁⲓ ϣⲱⲡⲓ .
For John indeed baptized in water, but you will be baptized in the Holy Spirit not many days from now.'
1.6
ⲛⲑⲱⲟⲩ ⲙⲉⲛ ⲟⲩⲛ ⲉⲧⲁⲩⲑⲱⲟⲩϯ ⲛⲁⲩϣⲓⲛⲓ ⲙⲙⲟϥ ⲉⲩϫⲱ ⲙⲙⲟⲥ ϫⲉⲡϭⲟⲓⲥ ⲓⲉ ⲛϩⲣⲏⲓ ϧⲉⲛⲡⲁⲓⲥⲏⲟⲩ ⲭⲛⲁⲧⲫⲉ ϯⲙⲉⲧⲟⲩⲣⲟ ⲉⲡⲓⲥⲗ .
Therefore, when they had come together, they asked him, 'Lord, are you now restoring the kingdom to Israel?'
1.7
ⲡⲉϫⲁϥ ⲛⲱⲟⲩ ϫⲉⲫⲱⲧⲉⲛ ⲁⲛ ⲡⲉ ⲉⲉⲙⲓ ⲉϩⲁⲛⲭⲣⲟⲛⲟⲥ ⲓⲉ ϩⲁⲛⲥⲏⲟⲩ ⲛⲁⲓ ⲉⲧⲁ ⲫⲓⲱⲧ ⲭⲁⲩ ϧⲁⲡⲉϥⲉⲣϣⲓϣⲓ .
He said to them, 'It isn't for you to know times or seasons which the Father has set within his own authority.
1.8
ⲁⲗⲗⲁ ⲉⲣⲉⲧⲉⲛⲉϭⲓ ⲛⲟⲩϫⲟⲙ ⲉϣⲱⲡ ⲁⲣⲉϣⲁⲛ ⲡⲓⲡⲛⲉⲩⲙⲁⲉⲑⲟⲩⲁⲃ ⲓⲉϧⲣⲏⲓ ⲉϫⲉⲛⲑⲏⲛⲟⲩ ⲟⲩⲟϩ ⲧⲉⲧⲉⲛⲛⲁϣⲱⲡⲓ ⲛⲏⲓ ⲙⲙⲉⲑⲣⲉ ϧⲉⲛⲓⲉⲣⲟⲥⲁⲗⲏⲙ ⲛⲉⲙϯⲓⲟⲩⲇⲉⲁ ⲧⲏⲣⲥ ⲛⲉⲙⲧⲥⲁⲙⲁⲣⲓⲁ ⲛⲉⲙϣⲁⲁⲩⲣⲏϫϥ ⲙⲡⲕⲁϩⲓ .
But you will receive power when the Holy Spirit has come upon you. You will be witnesses to me in Jerusalem, in all Judea and Samaria, and to the uttermost parts of the earth.'
1.9
ⲟⲩⲟϩ ⲛⲁⲓ ⲉⲧⲁϥϫⲟⲧⲟⲩ ⲉⲩⲥⲟⲙⲥ ⲁⲩϥⲓⲧϥ ⲉⲡϣⲱⲓ ⲟⲩⲟϩ ⲟⲩϭⲏⲡⲓ ⲁⲥϣⲟⲡⲥ ⲉⲣⲟⲥ ⲉⲃⲟⲗ ϩⲁⲛⲟⲩⲃⲁⲗ .
When he had said these things, as they were looking, he was taken up, and a cloud received him out of their sight.
1.10
ⲛⲁⲩⲟⲓ ⲇⲉ ⲙⲫⲣⲏϯ ⲉⲛⲁⲩⲓⲟⲣⲉⲙ ⲟⲩⲁⲓ ⲟⲩⲃⲉ ⲟⲩⲁⲓ ⲙⲙⲱⲟⲩ ⲉϥⲙⲟϣⲓ ⲉϩⲣⲏⲓ ⲉⲧⲫⲉ ϩⲏⲡⲡⲉ ⲓⲥ ⲣⲱⲙⲓ ⲃⲁⲩⲟϩⲓ ⲉⲣⲁⲧⲟⲩⲛⲁϩⲣⲁⲩ ϧⲉⲛϩⲁⲛϩⲉⲃⲥⲱ ⲉⲩⲟⲩⲟⲃϣ .
While they were looking steadfastly into the sky as he went, behold, two men stood by them in white clothing,
1.11
ⲟⲩⲟϩ ⲡⲉϫⲱⲟⲩ ϫⲉⲛⲓⲣⲱⲙⲓ ⲛⲓⲅⲁⲗⲓⲗⲉⲟⲥ ⲁϧⲱⲧⲉⲛ ⲧⲉⲧⲉⲛⲟϩⲓ ⲉⲣⲁⲧⲉⲛ ⲑⲏⲛⲟⲩ ⲉⲣⲉⲧⲉⲛⲥⲟⲙⲥ ⲉⲡϣⲱⲓ ⲉⲧⲫⲉ ⲫⲁⲓ ⲡⲉ ⲓⲏⲥⲟⲩⲥ ⲉⲧⲁⲩⲟⲗϥ ⲉⲡϣⲱⲓ ⲉⲃⲟⲗ ϩⲁⲣⲱⲧⲉⲛ ⲫⲁⲓ ⲟⲛ ⲡⲉ ⲙⲫⲣⲏϯ ⲉⲧⲉϥⲛⲏⲟⲩ ⲙⲙⲟϥ ⲙⲫⲣⲏϯ ⲉⲧⲁⲣⲉⲧⲉⲛⲛⲁⲩ ⲉⲣⲟϥ ⲉϥⲙⲟϣⲓ ⲉϩⲣⲏⲓ ⲉⲧⲫⲉ .
who also said, 'You men of Galilee, why do you stand looking into the sky? This Jesus, who was received up from you into the sky will come back in the same way as you saw him going into the sky.'
1.12
ⲧⲟⲧⲉ ⲁⲩⲕⲟⲧⲟⲩ ⲉⲓⲉⲣⲟⲥⲁⲗⲏⲙ ⲉⲃⲟⲗ ϩⲁⲡⲓⲧⲱⲟⲩ ⲉϣⲁⲩⲙⲟⲩϯ ⲉⲣⲟϥ ϫⲉⲫⲁⲛⲓϫⲱⲓⲧ ⲉⲧϧⲉⲛⲧ ⲉϧⲟⲩⲛ ⲉⲓⲉⲣⲟⲥⲁⲗⲏⲙ ⲛⲟⲩⲥⲁⲃⲃⲁⲧⲟⲛ ⲙⲙⲟϣⲓ .
Then they returned to Jerusalem from the mountain called Olivet, which is near Jerusalem, a Sabbath day's journey away.
1.13
ⲧⲟⲧⲉ ⲉⲧⲁⲩϣⲉ ⲉϧⲟⲩⲛ ⲁⲩϣⲉ ⲉϩⲣⲏⲓ ⲉⲟⲩⲙⲁ ⲉϥⲥⲁⲡϣⲱⲓ ⲡⲓⲙⲁ ⲉⲛⲁϥϣⲟⲡ ⲛϧⲏⲧϥ ⲛϫⲉⲡⲉⲧⲣⲟⲥ ⲛⲉⲙⲓⲱⲁⲛⲛⲏⲥ ⲓⲁⲕⲱⲃⲟⲥ ⲛⲉⲙⲁⲛⲇⲣⲉⲁⲥ ⲫⲓⲗⲓⲡⲡⲟⲥ ⲛⲉⲙⲑⲱⲙⲁⲥ ⲃⲁⲣⲑⲟⲗⲟⲙⲉⲟⲥ ⲛⲉⲙⲙⲁⲧⲑⲉⲟⲥ ⲓⲁⲕⲱⲃⲟⲥ ⲫⲁ ⲁⲗⲫⲉⲟⲥ ⲛⲉⲙⲥⲓⲙⲱⲛ ⲡⲓⲣⲉϥⲭⲟϩ ⲛⲉⲙⲓⲟⲩⲇⲁⲥ ⲫⲁ ⲓⲁⲕⲱⲃⲟⲥ .
When they had come in, they went up into the upper room, where they were staying; that is Peter, John, James, Andrew, Philip, Thomas, Bartholomew, Matthew, James the son of Alphaeus, Simon the Zealot, and Judas the son of James.
1.14
ⲛⲁⲓ ⲇⲉ ⲧⲏⲣⲟⲩ ⲉⲩⲙⲏⲛ ⲉⲩⲥⲟⲡ ⲉϯⲡⲣⲟⲥⲉⲩⲭⲏ ⲛⲉⲙϩⲁⲛϩⲓⲟⲙⲓ ⲛⲉⲙⲙⲁⲣⲓⲁ ⲧⲙⲁⲩ ⲛⲓⲏⲥⲟⲩⲥ ⲛⲉⲙⲛⲉϥⲥⲛⲏⲟⲩ .
All these with one accord continued steadfastly in prayer and supplication, along with the women, and Mary the mother of Jesus, and with his brothers.
1.15
ⲟⲩⲟϩ ⲛϧⲣⲏⲓ ϧⲉⲛⲛⲁⲓⲉϩⲟⲟⲩ ⲁϥⲧⲱⲛϥ ⲛϫⲉⲡⲉⲧⲣⲟⲥ ϧⲉⲛⲧⲙⲏϯ ⲛⲛⲓⲥⲛⲏⲟⲩ ⲛⲉⲟⲩⲟⲛ ⲟⲩⲙⲏϣ ⲇⲉ ⲉⲩⲑⲟⲩⲏⲧ ϩⲓⲫⲁⲓ ⲉⲫⲁⲓ ⲉⲛⲁⲩⲛⲁⲉⲣⲣⲕ ⲛⲣⲁⲛ ⲡⲉϫⲁϥ
In these days, Peter stood up in the midst of the disciples (and the number of names was about one hundred twenty), and said,
1.16
ⲛⲓⲣⲱⲙⲓ ⲛⲓⲥⲛⲏⲟⲩ ϩⲱϯ ⲡⲉ ⲛⲧⲉⲥϫⲱⲕ ⲉⲃⲟⲗ ⲛϫⲉϯⲅⲣⲁⲫⲏ ⲑⲏ ⲉⲧⲁϥⲉⲣϣⲟⲣⲡ ⲛϫⲟⲥ ⲛϫⲉⲡⲓⲡⲛⲉⲩⲙⲁⲉⲑⲟⲩⲁⲃ ⲉⲃⲟⲗ ϧⲉⲛⲣⲱϥ ⲛⲇⲁⲩⲓⲇ ⲉⲑⲃⲉⲓⲟⲩⲇⲁⲥ ⲫⲏ ⲉⲧⲁϥⲉⲣϭⲁⲩⲙⲱⲓⲧ ⲛⲛⲏ ⲉⲧⲁⲩⲁⲙⲁϩⲓ ⲛⲓⲏⲥⲟⲩⲥ .
'Brothers, it was necessary that this Scripture should be fulfilled, which the Holy Spirit spoke before by the mouth of David concerning Judas, who was guide to those who took Jesus.
1.17
ϫⲉⲛⲁϥⲏⲡ ⲛϧⲣⲏⲓ ⲛϧⲏⲧⲉⲛ ⲡⲉ ⲟⲩⲟϩ ⲁⲡⲓⲱⲡ ⲓⲉⲣⲟϥ ⲙⲡⲓⲕⲗⲏⲣⲟⲥ ⲛⲧⲉⲧⲁⲓⲇⲓⲁⲕⲟⲛⲓⲁ .
For he was numbered with us, and received his portion in this ministry.
1.18
ⲫⲁⲓ ⲙⲉⲛ ⲟⲩⲛ ⲁϥϣⲱⲡ ⲛⲟⲩⲓⲟϩⲓ ⲉⲃⲟⲗ ϧⲉⲛⲫⲃⲉⲭⲉ ⲛⲧⲉⲧⲁⲇⲓⲕⲓⲁ ⲟⲩⲟϩ ⲁϥϩⲉⲓ ⲉϫⲉⲛⲡⲉϥϩⲟ ⲁϥⲕⲱϣ ϧⲉⲛⲧⲉϥⲙⲏϯ ⲟⲩⲟϩ ⲛⲏ ⲉⲧⲥⲁϧⲟⲩⲛ ⲙⲙⲟϥ ⲧⲏⲣⲟⲩ ⲁⲩⲫⲱⲛ ⲉⲃⲟⲗ .
Now this man obtained a field with the reward for his wickedness, and falling headlong, his body burst open, and all his intestines gushed out.
1.19
ⲟⲩⲟϩ ⲁϥⲟⲩⲟⲛϩ ⲉⲃⲟⲗ ⲛⲟⲩⲟⲛ ⲛⲓⲃⲉⲛ ⲉⲧϣⲟⲡ ϧⲉⲛⲓⲉⲣⲟⲥⲁⲗⲏⲙ ϩⲱⲥⲧⲉ ⲛⲥⲉⲙⲟⲩϯ ⲉⲫⲣⲁⲛ ⲙⲡⲓⲓⲟϩⲓ ⲉⲧⲉⲙⲙⲁⲩ ϧⲉⲛⲧⲟⲩⲁⲥⲡⲓ ϫⲉⲁⲭⲉⲗⲇⲁⲙⲁⲅ ⲉⲧⲉⲡⲓⲓⲟϩⲓ ⲛⲧⲉⲡⲓⲥⲛⲟϥ .
It became known to everyone who lived in Jerusalem that in their language that field was called 'Akeldama,' that is, 'The field of blood.'
1.20
ⲥⲥϧⲏⲟⲩⲧ ⲅⲁⲣ ϩⲓⲡϫⲱⲙ ⲛⲧⲉⲛⲓⲯⲁⲗⲙⲟⲥ ϫⲉⲧⲉϥⲉⲣⲃⲓ ⲙⲁⲣⲉⲥϣⲱϥ ⲟⲩⲟϩ ⲙⲡⲉⲛⲑⲣⲉϥϣⲱⲡⲓ ⲛϫⲉⲫⲏ ⲉⲧϣⲟⲡ ⲛϧⲏⲧⲥ ⲧⲉϥⲙⲉⲧⲉⲡⲓⲥⲕⲟⲡⲟⲥ ⲙⲁⲣⲉ ⲕⲉⲟⲩⲁⲓ ϭⲓⲧⲥ .
For it is written in the book of Psalms, 'Let his habitation be made desolate. Let no one dwell therein;'
1.21
ϩⲱϯ ⲟⲩⲛ ϧⲉⲛⲛⲓⲣⲱⲙⲓ ⲉⲧⲁⲩⲓ ⲉϧⲟⲩⲛ ⲛϧⲏⲧⲉⲛ ϧⲉⲛⲡⲓⲥⲏⲟⲩ ⲧⲏⲣϥ ⲉⲧⲁϥⲓ ⲉϧⲟⲩⲛ ⲟⲩⲟϩ ⲁϥⲓ ⲉⲃⲟⲗ ϩⲓϫⲱⲛ ⲛϫⲉⲡⲉⲛϭⲟⲓⲥ ⲓⲏⲥⲟⲩⲥ .
'Of the men therefore who have accompanied us all the time that the Lord Jesus went in and out among us,
1.22
ⲉⲁϥⲉⲣϩⲏⲧⲥ ⲓⲥϫⲉⲛ ⲡⲓⲱⲙⲥ ⲛⲧⲉⲓⲱⲁⲛⲛⲏⲥ ϣⲁⲉϧⲟⲩⲛ ⲉⲡⲓⲉϩⲟⲟⲩ ⲉⲧⲁⲩⲟⲗϥ ⲉⲡϣⲱⲓ ⲉⲃⲟⲗ ϩⲁⲣⲟⲛ ⲛⲧⲉⲟⲩⲁⲓ ⲛⲛⲁⲓ ⲉⲣⲙⲉⲑⲣⲉ ⲛⲉⲙⲁⲛ ϧⲁⲧⲉϥⲁⲛⲁⲥⲧⲁⲥⲓⲥ .
beginning from the baptism of John, to the day that he was received up from us, of these one must become a witness with us of his resurrection.'
1.23
ⲟⲩⲟϩ ⲁⲩⲧⲁϩⲉ ⲃⲉⲣⲁⲧⲟⲩ ⲓⲱⲥⲏⲫ ⲫⲏ ⲉⲧⲟⲩⲙⲟⲩϯ ⲉⲣⲟϥ ϫⲉⲃⲁⲣⲥⲁⲃⲃⲁⲥ ⲫⲏ ⲉⲧⲁⲩϯⲣⲉⲛϥ ϫⲉⲓⲟⲩⲥⲧⲟⲥ ⲛⲉⲙⲙⲁⲑⲓⲁⲥ .
They put forward two, Joseph called Barsabbas, who was surnamed Justus, and Matthias.
1.24
ⲟⲩⲟϩ ⲉⲧⲁⲩⲧⲱⲃϩ ⲡⲉϫⲱⲟⲩ ϫⲉⲡϭⲟⲓⲥ ⲛⲑⲟⲕ ⲡⲉⲧⲥⲱⲟⲩⲛ ⲙⲡϩⲏⲧ ⲛⲧⲉⲟⲩⲟⲛ ⲛⲓⲃⲉⲛ ⲟⲩⲟⲛϩ ⲙⲫⲏ ⲉⲧⲁⲕⲥⲟⲧⲡϥ ⲉⲃⲟⲗ ϧⲉⲛⲡⲁⲓⲃ ⲟⲩⲁⲓ
They prayed, and said, 'You, Lord, who know the hearts of all men, show which one of these two you have chosen
1.25
ⲉϭⲓ ⲉⲫⲙⲁ ⲛⲧⲉⲧⲁⲓⲇⲓⲁⲕⲟⲛⲓⲁ ⲛⲉⲙⲧⲁⲓⲙⲉⲧⲁⲡⲟⲥⲧⲟⲗⲟⲥ ⲑⲏ ⲉⲧⲁϥⲉⲣⲡⲁⲣⲁⲃⲉⲛⲓⲛ ⲙⲙⲟⲥ ⲛϫⲉⲓⲟⲩⲇⲁⲥ ⲉⲁϥϣⲉ ⲛⲁϥ ⲉⲡⲉϥⲙⲁ ⲉⲧⲉⲫⲱϥ ⲡⲉ .
to take part in this ministry and apostleship from which Judas fell away, that he might go to his own place.'
1.26
ⲟⲩⲟϩ ⲁⲩϯⲕⲗⲏⲣⲟⲥ ⲛⲱⲟⲩ ⲁⲡⲓⲕⲗⲏⲣⲟⲥ ⲓⲉϫⲉⲛ ⲙⲁⲑⲓⲁⲥ ⲁⲩⲟⲡϥ ⲛⲉⲙⲡⲓⲓⲁ ⲛⲁⲡⲟⲥⲧⲟⲗⲟⲥ .
They drew lots for them, and the lot fell on Matthias, and he was numbered with the eleven apostles.
2.1
ⲟⲩⲟϩ ⲉⲧⲁϥϫⲱⲕ ⲉⲃⲟⲗ ⲛϫⲉⲡⲓⲉϩⲟⲟⲩ ⲛⲧⲉϯⲡⲉⲛⲧⲏⲕⲟⲥⲧⲏ ⲛⲁⲩⲑⲟⲩⲏⲧ ⲧⲏⲣⲟⲩ ⲡⲉ ϩⲓⲟⲩⲙⲁ .
Now when the day of Pentecost had come, they were all with one accord in one place.
2.2
ⲛⲟⲩϩⲟϯ ϧⲉⲛⲟⲩϩⲟϯ ⲁⲥϣⲱⲡⲓ ⲛϫⲉⲟⲩⲥⲙⲏ ⲉⲃⲟⲗ ϧⲉⲛⲧⲫⲉ ⲙⲫⲣⲏϯ ⲛⲟⲩⲑⲏⲟⲩ ⲉⲩⲓⲛⲓ ⲙⲙⲟϥ ⲛϫⲟⲛⲥ ⲟⲩⲟϩ ⲁϥⲙⲟϩ ⲙⲡⲓⲏⲓ ⲧⲏⲣϥ ⲉⲛⲁⲩϩⲉⲙⲥⲓ ⲛϧⲏⲧϥ .
Suddenly there came from the sky a sound like the rushing of a mighty wind, and it filled all the house where they were sitting.
2.3
ⲟⲩⲟϩ ⲁⲩⲟⲩⲟⲛϩⲟⲩ ⲉⲣⲱⲟⲩ ⲙⲫⲣⲏϯ ⲛϩⲁⲛⲗⲁⲥ ⲛⲭⲣⲱⲙ ⲉⲩⲫⲏϣ ⲟⲩⲟϩ ⲁⲩϩⲉⲙⲥⲓ ⲉϫⲉⲛⲫⲟⲩⲁⲓ ⲫⲟⲩⲁⲓ ⲙⲙⲱⲟⲩ .
Tongues like fire appeared and were distributed to them, and one sat on each of them.
2.4
ⲟⲩⲟϩ ⲁⲩⲙⲟϩ ⲧⲏⲣⲟⲩ ⲉⲃⲟⲗ ϧⲉⲛⲟⲩⲡⲛⲉⲩⲙⲁⲉϥⲟⲩⲁⲃ ⲟⲩⲟϩ ⲁⲩⲟⲩⲁϩⲧⲟⲧⲟⲩ ⲉⲥⲁϫⲓ ⲛϩⲁⲛⲕⲉⲗⲁⲥ ⲕⲁⲧⲁⲫⲣⲏϯ ⲉⲧⲁϥϯ ⲛⲱⲟⲩ ⲛϫⲉⲡⲓⲡⲛⲉⲩⲙⲁⲉⲑⲣⲟⲩⲉⲣⲟⲩⲱ .
They were all filled with the Holy Spirit, and began to speak with other languages, as the Spirit gave them the ability to speak.
2.5
ⲛⲉ ⲟⲩⲟⲛ ϩⲁⲛⲟⲩⲟⲛ ⲇⲉ ⲉⲩϣⲟⲡ ϧⲉⲛⲓⲉⲣⲟⲥⲁⲗⲏⲙ ϩⲁⲛⲣⲱⲙⲓ ⲛⲓⲟⲩⲇⲁⲓ ⲉⲩⲉⲣϩⲟϯ ⲉⲃⲟⲗ ϧⲉⲛϣⲗⲱⲗ ⲛⲓⲃⲉⲛ ⲉⲧⲥⲁⲡⲉⲥⲏⲧ ⲛⲧⲫⲉ .
Now there were dwelling in Jerusalem Jews, devout men, from every nation under the sky.
2.6
ⲉⲧⲁⲥϣⲱⲡⲓ ⲇⲉ ⲛϫⲉⲧⲁⲓⲥⲙⲏ ⲁⲩⲑⲱⲟⲩϯ ⲛϫⲉⲛⲓⲙⲏϣ ⲟⲩⲟϩ ⲁⲩϣⲑⲟⲣⲧⲉⲣ ϫⲉⲛⲁⲣⲉⲫⲟⲩⲁⲓ ⲫⲟⲩⲁⲓ ⲥⲱⲧⲉⲙ ⲉⲣⲱⲟⲩ ⲉⲩⲥⲁϫⲓ ϧⲉⲛⲧⲟⲩⲁⲥⲡⲓ .
When this sound was heard, the multitude came together, and were bewildered, because everyone heard them speaking in his own language.
2.7
ⲛⲁⲩⲧⲱⲙⲧ ⲇⲉ ⲧⲏⲣⲟⲩ ⲡⲉ ⲉⲩⲉⲣϣⲫⲏⲣⲓ ⲉⲩϫⲱ ⲙⲙⲟⲥ ϫⲉⲟⲩⲭⲓ ⲛⲁⲓ ⲧⲏⲣⲟⲩ ⲉⲧⲥⲁϫⲓ ϩⲁⲛⲅⲁⲗⲓⲗⲉⲟⲥ ⲁⲛ ⲛⲉ .
They were all amazed and marveled, saying to one another, 'Behold, aren't all these who speak Galileans?
2.8
ⲡⲱⲥ ⲁⲛⲟⲛ ⲧⲉⲛⲥⲱⲧⲉⲙ ⲫⲟⲩⲁⲓ ⲫⲟⲩⲁⲓ ⲙⲙⲟⲛ ϧⲉⲛⲧⲉⲛⲁⲥⲡⲓ ⲉⲧⲁⲩϫⲫⲟⲛ ⲛϧⲏⲧⲥ .
How do we hear, everyone in our own native language?
2.9
ⲛⲓⲡⲁⲣⲑⲟⲥ ⲛⲉⲙⲛⲓⲙⲏⲇⲟⲥ ⲛⲉⲙⲛⲓⲉⲗⲁⲙⲓⲧⲏ ⲥⲛⲉⲙ ⲛⲏ ⲉⲧϣⲟⲡ ϧⲉⲛϯⲙⲉⲥⲟⲡⲟⲧⲁⲙⲓⲁ ϯⲓⲟⲩⲇⲉⲁ ⲛⲉⲙϯⲕⲁⲡⲡⲟⲇⲟⲕⲓⲁ ⲡⲟⲛⲧⲟⲥ ⲛⲉⲙϯⲁⲥⲓⲁ .
Parthians, Medes, Elamites, and people from Mesopotamia, Judea, Cappadocia, Pontus, Asia,
2.10
ϯⲫⲣⲓⲕⲓⲁ ⲛⲉⲙϯⲡⲁⲙⲫⲓⲗⲓⲁ ⲭⲏⲙⲓ ⲛⲉⲙⲛⲓⲥⲁ ⲛⲧⲉϯⲗⲩⲃⲏ ⲑⲏ ⲉⲧϩⲓ ⲛⲓⲥⲁ ⲛⲧⲉϯⲕⲩⲣⲓⲛⲛⲏ ⲛⲉⲙⲛⲓⲣⲱⲙⲉⲟⲥ ⲉⲧϣⲟⲡ ⲛϧⲏⲧⲉⲛ .
Phrygia, Pamphylia, Egypt, the parts of Libya around Cyrene, visitors from Rome, both Jews and proselytes,
2.11
ⲛⲓⲓⲟⲩⲇⲁⲓ ⲛⲉⲙⲛⲓϣⲉⲙⲙⲱⲟⲩ ⲛⲓⲕⲣⲓⲧⲏⲥ ⲛⲉⲙⲛⲓⲁⲣⲁⲃⲟⲥ ⲧⲉⲛⲥⲱⲧⲉⲙ ⲉⲣⲱⲟⲩ ⲉⲩⲥⲁϫⲓ ϧⲉⲛϩⲁⲛⲗⲁⲥ ⲛⲛⲓⲙⲉⲧⲛⲓϣϯ ⲛⲧⲉⲫⲛⲟⲩϯ .
Cretans and Arabians: we hear them speaking in our languages the mighty works of God!'
2.12
ⲛⲁⲩⲧⲱⲙⲧ ⲇⲉ ⲧⲏⲣⲟⲩ ⲡⲉ ⲉⲩⲓⲟⲣⲉⲙ ⲟⲩⲁⲓ ⲉϧⲟⲩⲛ ⲉϩⲣⲉⲛⲟⲩⲁⲓ ⲉⲩϫⲱ ⲙⲙⲟⲥ ϫⲉⲟⲩ ⲡⲉ ⲫⲁⲓ ⲉⲧⲁϥϣⲱⲡⲓ .
They were all amazed, and were perplexed, saying one to another, 'What does this mean?'
2.13
ϩⲁⲛⲕⲉⲭⲱⲟⲩⲛⲓ ⲇⲉ ⲛⲁⲩⲉⲣϣⲉⲣϣⲓ ⲉⲩϫⲱ ⲙⲙⲟⲥ ϫⲉⲁⲛⲁⲓ ⲙⲁϩ ϧⲏⲧⲟⲩ ⲛⲉⲙⲃⲣⲓⲥ ϩⲁⲛⲕⲉⲭⲱⲟⲩⲛⲓ ⲇⲉ ⲛⲁⲩϫⲱ ⲙⲙⲟⲥ ϫⲉⲁⲣⲉ ⲛⲁⲓ ⲑⲁϧⲓ .
Others, mocking, said, 'They are filled with new wine.'
2.14
ⲁϥⲟϩⲓ ⲇⲉ ⲉⲣⲁⲧϥ ⲛϫⲉⲡⲉⲧⲣⲟⲥ ⲛⲉⲙⲡⲓⲕⲉⲓⲁ ⲁϥϭⲓⲥⲓ ⲛⲧⲉϥⲥⲙⲏ ⲉϩⲣⲏⲓ ⲁϥⲉⲣⲟⲩⲱ ⲛⲱⲟⲩ ⲛⲓⲣⲱⲙⲓ ⲛⲓⲓⲟⲩⲇⲁⲓ ⲛⲉⲙⲛⲏ ⲉⲧϣⲟⲡ ϧⲉⲛⲓⲉⲣⲟⲥⲁⲗⲏⲙ ⲧⲏⲣⲟⲩ ⲫⲁⲓ ⲙⲁⲣⲉϥⲟⲩⲱⲛϩ ⲉⲣⲱⲧⲉⲛ ⲟⲩⲟϩ ϭⲓⲥⲙⲏ ⲉⲛⲁⲥⲁϫⲓ .
But Peter, standing up with the eleven, lifted up his voice, and spoke out to them, 'You men of Judea, and all you who dwell at Jerusalem, let this be known to you, and listen to my words.
2.15
ⲟⲩ ⲅⲁⲣ ⲙⲫⲣⲏϯ ⲛⲑⲱⲧⲉⲛ ⲁⲛ ⲉⲧⲉⲧⲉⲛⲙⲉⲩⲓ ⲉⲣⲟϥ ϫⲉⲁⲣⲉ ⲛⲁⲓ ⲑⲁϧⲓ ⲁϫⲡⲅϯ ⲅⲁⲣ ⲙⲡⲓⲉϩⲟⲟⲩ ⲧⲉ .
For these aren't drunken, as you suppose, seeing it is only the third hour of the day.
2.16
ⲁⲗⲗⲁ ⲫⲁⲓ ⲡⲉ ⲫⲏ ⲉⲧⲁϥϫⲟϥ ⲉⲃⲟⲗ ϩⲓⲧⲟⲧϥ ⲙⲡⲓⲡⲣⲟⲫⲏⲧⲏⲥ ⲓⲱⲏⲗ .
But this is what has been spoken through the prophet Joel:
2.17
ϫⲉⲉⲥⲉϣⲱⲡⲓ ϧⲉⲛⲛⲓⲉϩⲟⲟⲩ ⲛϧⲁⲉ ⲡⲉϫⲉ ⲫⲛⲟⲩϯ ⲉⲓⲉⲫⲱⲛ ⲉⲃⲟⲗ ϧⲉⲛⲡⲁⲡⲛⲉⲩⲙⲁⲉϫⲉⲛ ⲥⲁⲣⲝ ⲛⲓⲃⲉⲛ ⲟⲩⲟϩ ⲉⲩⲉⲉⲣⲡⲣⲟⲫⲏⲧⲉⲩⲓⲛ ⲛϫⲉⲛⲉⲧⲉⲛϣⲏⲣⲓ ⲛⲉⲙⲛⲉⲧⲉⲛϣⲉⲣⲓ ⲟⲩⲟϩ ⲛⲉⲧⲉⲛϧⲉⲗϣⲓⲣⲓ ⲉⲩⲉⲛⲁⲩ ⲉϩⲁⲛϩⲟⲣⲁⲥⲓⲥ ⲟⲩⲟϩ ⲛⲉⲧⲉⲛϧⲉⲗⲗⲟⲓ ⲉⲩⲉⲫⲱⲣ ⲛϩⲁⲛⲣⲁⲥⲟⲩⲓ .
'It will be in the last days, says God, that I will pour out my Spirit on all flesh. Your sons and your daughters will prophesy. Your young men will see visions. Your old men will dream dreams.
2.18
ⲕⲉⲅⲉ ⲉⲓⲉⲫⲱⲛ ⲉⲃⲟⲗ ϧⲉⲛⲡⲁⲡⲛⲉⲩⲙⲁⲉϩⲣⲏⲓ ⲉϫⲉⲛⲛⲁⲃⲱⲕ ⲛⲉⲙⲛⲁⲃⲱⲕⲓ ϧⲉⲛⲡⲓⲉϩⲟⲟⲩ ⲉⲧⲉⲙⲙⲁⲩ ⲟⲩⲟϩ ⲉⲩⲉⲉⲣⲡⲣⲟⲫⲏⲧⲉⲩⲓⲛ .
Yes, and on my servants and on my handmaidens in those days, I will pour out my Spirit, and they will prophesy.
2.19
ⲉⲓⲉϯ ⲛϩⲁⲛϣⲫⲏⲣⲓ ϧⲉⲛⲧⲫⲉ ⲉⲡϣⲱⲓ ⲛⲉⲙϩⲁⲛⲙⲏⲓⲛⲓ ϩⲓϫⲉⲛⲡⲕⲁϩⲓ ⲉⲡⲉⲥⲏⲧ ⲟⲩⲥⲛⲟϥ ⲛⲉⲙⲟⲩⲭⲣⲱⲙ ⲛⲉⲙⲟⲩⲭⲣⲉⲙⲧⲥ ⲛⲕⲁⲡⲛⲟⲥ .
I will show wonders in the sky above, and signs on the earth beneath; blood, and fire, and billows of smoke.
2.20
ⲫⲣⲏ ⲉϥⲉⲟⲩⲱⲧⲉⲃ ⲉϥⲉⲉⲣⲭⲁⲕⲓ ⲟⲩⲟϩ ⲡⲓⲓⲟϩ ⲉϥⲉⲉⲣⲥⲛⲟϥ ⲙⲡⲁⲧϥⲓ ⲛϫⲉⲡⲓⲛⲓϣϯ ⲛⲉϩⲟⲟⲩ ⲛⲧⲉⲡϭⲟⲓⲥ ⲉⲑⲟⲩⲟⲛϩ ⲉⲃⲟⲗ .
The sun will be turned into darkness, and the moon into blood, before the great and glorious day of the Lord comes.
2.21
ⲟⲩⲟϩ ⲉⲥⲉϣⲱⲡⲓ ⲛⲟⲩⲟⲛ ⲛⲓⲃⲉⲛ ⲉⲑⲛⲁⲧⲱⲃϩ ⲙⲫⲣⲁⲛ ⲙⲡϭⲟⲓⲥ ⲉϥⲉⲛⲟϩⲉⲙ .
It will be, that whoever will call on the name of the Lord will be saved.'
2.22
ⲛⲓⲣⲱⲙⲓ ⲛⲓⲓⲥⲣⲁⲏⲗⲓⲧⲏⲥ ⲥⲱⲧⲉⲙ ⲉⲛⲁⲥⲁϫⲓ ⲛⲁⲓ ⲓⲏⲥⲟⲩⲥ ⲡⲓⲛⲁⲍⲱⲣⲉⲟⲥ ⲟⲩⲣⲱⲙⲓ ⲉⲁ ⲫⲛⲟⲩϯ ⲟⲩⲟⲛϩϥ ⲉⲃⲟⲗ ϣⲁⲣⲱⲧⲉⲛ ⲡⲉ ϧⲉⲛϩⲁⲛϫⲟⲙ ⲛⲉⲙϩⲁⲛⲙⲏⲓⲛⲓ ⲛⲉⲙϩⲁⲛϣⲫⲏⲣⲓ ⲛⲏ ⲉⲧⲁ ⲫⲛⲟⲩϯ ⲁⲓⲧⲟⲩ ⲉⲃⲟⲗ ϩⲓⲧⲟⲧϥ ϧⲉⲛⲧⲉⲧⲉⲛⲙⲏϯ ⲕⲁⲧⲁⲫⲣⲏϯ ⲉⲧⲉⲧⲉⲛⲥⲱⲟⲩⲛ ⲛⲑⲱⲧⲉⲛ .
'Men of Israel, hear these words! Jesus of Nazareth, a man approved by God to you by mighty works and wonders and signs which God did by him in the midst of you, even as you yourselves know,
2.23
ⲫⲁⲓ ϧⲉⲛⲡⲓⲥⲟϭⲛⲓ ⲉⲧⲑⲏϣ ⲛⲉⲙⲡⲓϣⲟⲣⲡ ⲛⲉⲙⲓ ⲛⲧⲉⲫⲛⲟⲩϯ ⲉⲁⲧⲉⲧⲉⲛⲧⲏⲓϥ ⲉϧⲣⲏⲓ ⲉⲛⲉⲛϫⲓϫ ⲛⲛⲓⲁⲛⲟⲙⲟⲥ ⲉⲁⲣⲉⲧⲉⲛⲁϣϥ ⲟⲩⲟϩ ⲁⲣⲉⲧⲉⲛϧⲟⲑⲃϥ .
him, being delivered up by the determined counsel and foreknowledge of God, you have taken by the hand of lawless men, crucified and killed;
2.24
ⲫⲁⲓ ⲉⲧⲁ ⲫⲛⲟⲩϯ ⲧⲟⲩⲛⲟⲥϥ ⲉⲁϥⲃⲱⲗ ⲉⲃⲟⲗ ⲛⲛⲓⲛⲁⲕϩⲓ ⲛⲧⲉⲁⲙⲉⲛϯ ϫⲉⲛⲉⲙⲙⲟⲛ ϣϫⲟⲙ ⲛⲥⲉⲁⲙⲁϩⲓ ⲙⲙⲟϥ ⲉⲃⲟⲗ ϩⲓⲧⲟⲧϥ .
whom God raised up, having freed him from the agony of death, because it was not possible that he should be held by it.
2.25
ⲇⲁⲩⲓⲇ ⲅⲁⲣ ϥϫⲱ ⲙⲙⲟⲥ ⲉⲣⲟϥ ϫⲉⲁⲓⲉⲣϣⲟⲣⲡ ⲛⲛⲁⲩ ⲙⲡϭⲟⲓⲥ ⲙⲡⲁⲙⲑⲟ ⲉⲃⲟⲗ ⲛⲥⲏⲟⲩ ⲛⲓⲃⲉⲛ ⲉϥⲭⲏ ⲥⲁⲟⲩⲓⲛⲁⲙ ⲙⲙⲟⲓ ϫⲉⲛⲛⲁⲕⲓⲙ .
For David says concerning him, 'I saw the Lord always before my face, For he is on my right hand, that I should not be moved.
2.26
ⲉⲑⲃⲉⲫⲁⲓ ⲁⲡⲁϩⲏⲧ ⲟⲩⲛⲟϥ ⲟⲩⲟϩ ⲁ ⲡⲁⲗⲁⲥ ⲑⲉⲗⲏⲗ ⲉⲧⲓ ⲇⲉ ⲛⲉⲙⲧⲁⲕⲉⲥⲁⲣⲝ ⲉⲥⲉϣⲱⲡⲓ ϧⲉⲛⲟⲩϩⲉⲗⲡⲓⲥ .
Therefore my heart was glad, and my tongue rejoiced. Moreover my flesh also will dwell in hope;
2.27
ϫⲉⲛⲛⲉⲕⲥⲱϫⲡ ⲛⲧⲁⲯⲩⲭⲏ ϧⲉⲛⲁⲙⲉⲛϯ ⲟⲩⲇⲉ ⲛⲛⲉⲕϯ ⲙⲡⲉⲑⲟⲩⲁⲃ ⲛⲧⲁⲕ ⲉⲛⲁⲩ ⲉⲡⲧⲁⲕⲟ .
because you will not leave my soul in Hades, neither will you allow your Holy One to see decay.
2.28
ⲛⲓⲙⲱⲓⲧ ⲛⲧⲉⲡⲱⲛϧ ⲁⲕⲟⲩⲟⲛϩⲟⲩ ⲛⲏⲓ ⲉⲃⲟⲗ ⲉⲕⲉⲙⲁϩⲧ ⲛⲟⲩⲛⲟϥ ⲛⲉⲙⲡⲉⲕϩⲟ .
You made known to me the ways of life. You will make me full of gladness with your presence.'
2.29
ⲛⲓⲣⲱⲙⲓ ⲛⲉⲛⲥⲛⲏⲟⲩ ⲥϣⲉ ⲉⲥⲁϫⲓ ⲛⲉⲙⲱⲧⲉⲛ ϧⲉⲛⲟⲩⲟⲛϩ ⲉⲃⲟⲗ ⲉⲑⲃⲉⲡⲉⲛⲡⲁⲧⲣⲓⲁⲣⲭⲏ ⲥⲇⲁⲩⲓⲇ ϫⲉⲁϥⲙⲟⲩ ⲟⲩⲟϩ ⲁⲩⲕⲟⲥϥ ⲟⲩⲟϩ ⲡⲉϥⲙϩⲁⲩ ⲛϧⲏⲧⲉⲛ ϣⲁⲉϧⲟⲩⲛ ⲉⲫⲟⲟⲩ .
'Brothers, I may tell you freely of the patriarch David, that he both died and was buried, and his tomb is with us to this day.
2.30
ⲉⲟⲩⲡⲣⲟⲫⲏⲧⲏⲥ ⲟⲩⲛ ⲡⲉ ⲟⲩⲟϩ ⲉϥⲥⲱⲟⲩⲛ ϫⲉϧⲉⲛⲟⲩⲁⲛⲁϣ ⲁⲫⲛⲟⲩϯ ⲱⲣⲕ ⲛⲁϥ ⲉⲃⲟⲗ ϧⲉⲛⲡⲟⲩⲧⲁϩ ⲛⲧⲉⲧⲉϥϯⲡⲓ ⲉⲑⲣⲉϥϩⲉⲙⲥⲓ ϩⲓϫⲉⲛⲡⲉϥⲑⲣⲟⲛⲟⲥ .
Therefore, being a prophet, and knowing that God had sworn with an oath to him that of the fruit of his body, according to the flesh, he would raise up the Christ to sit on his throne,
2.31
ⲉⲧⲁϥⲛⲁⲩ ⲟⲩⲛ ⲓⲥϫⲉⲛ ϣⲟⲣⲡ ⲁϥⲥⲁϫⲓ ⲉⲑⲃⲉⲧⲁⲛⲁⲥⲧⲁⲥⲓⲥ ⲙⲡⲭⲣⲓⲥⲧⲟⲥ ϫⲉⲙⲡⲉϥⲥⲟϫⲡϥ ϧⲉⲛⲁⲙⲉⲛϯ ⲟⲩⲇⲉ ⲙⲡⲉⲧⲉϥⲥⲁⲣⲝ ⲛⲁⲩ ⲉⲡⲧⲁⲕⲟ .
he foreseeing this spoke about the resurrection of the Christ, that neither was his soul left in Hades, nor did his flesh see decay.
2.32
ⲫⲁⲓ ⲡⲉ ⲓⲏⲥⲟⲩⲥ ⲉⲧⲁ ⲫⲛⲟⲩϯ ⲧⲟⲩⲛⲟⲥϥ ⲫⲁⲓ ⲉⲧⲉⲁⲛⲟⲛ ⲧⲏⲣⲉⲛ ⲧⲉⲛⲟⲓ ⲙⲙⲉⲑⲣⲉ ⲛⲁϥ .
This Jesus God raised up, to which we all are witnesses.
2.33
ⲉⲁϥϭⲓⲥⲓ ⲥⲁⲟⲩⲓⲛⲁⲙ ⲙⲫⲛⲟⲩϯ ⲁϥϭⲓ ⲙⲡⲓⲱϣ ⲛⲧⲉⲡⲓⲡⲛⲉⲩⲙⲁⲉⲑⲟⲩⲁⲃ ⲉⲃⲟⲗ ϩⲓⲧⲟⲧϥ ⲙⲫⲓⲱⲧ ⲁϥⲫⲱⲛ ⲙⲙⲟϥ ⲫⲁⲓ ⲛⲑⲱⲧⲉⲛ ⲉⲧⲉⲧⲉⲛⲛⲁⲩ ⲉⲣⲟϥ ⲟⲩⲟϩ ⲧⲉⲧⲉⲛⲥⲱⲧⲉⲙ ⲉⲣⲟϥ .
Being therefore exalted by the right hand of God, and having received from the Father the promise of the Holy Spirit, he has poured out this, which you now see and hear.
2.34
ⲇⲁⲩⲓⲇ ⲅⲁⲣ ⲙⲡⲉϥϣⲉ ⲉϩⲣⲏⲓ ⲉⲧⲫⲉ ⲛⲑⲟϥ ϥϫⲱ ⲙⲙⲟⲥ ϫⲉⲡⲉϫⲉ ⲡϭⲟⲓⲥ ⲙⲡⲁϭⲟⲓⲥ ϫⲉϩⲉⲙⲥⲓ ⲥⲁⲟⲩⲓⲛⲁⲙ ⲙⲙⲟⲓ .
For David didn't ascend into the heavens, but he says himself, 'The Lord said to my Lord, 'Sit by my right hand,
2.35
ϣⲁϯⲭⲁ ⲛⲉⲕϫⲁϫⲓ ⲥⲁⲡⲉⲥⲏⲧ ⲛⲛⲉⲕϭⲁⲗⲁⲩϫ .
until I make your enemies a footstool for your feet.''
2.36
ⲁⲥⲫⲁⲗⲱⲥ ⲟⲩⲛ ⲙⲁⲣⲉϥⲉⲙⲓ ⲛϫⲉⲡⲏⲓ ⲧⲏⲣϥ ⲙⲡⲓⲥⲗ ϫⲉⲁϥⲁⲓϥ ⲛϭⲟⲓⲥ ⲟⲩⲟϩ ⲁϥⲁⲓϥ ⲛⲭⲣⲓⲥⲧⲟⲥ ⲛϫⲉⲫⲛⲟⲩϯ ⲫⲁⲓ ⲡⲉ ⲓⲏⲥⲟⲩⲥ ⲫⲁⲓ ⲛⲑⲱⲧⲉⲛ ⲉⲧⲁⲣⲉⲧⲉⲛⲁϣϥ .
'Let all the house of Israel therefore know certainly that God has made him both Lord and Christ, this Jesus whom you crucified.'
2.37
ⲉⲧⲁⲩⲥⲱⲧⲉⲙ ⲇⲉ ⲁⲡⲟⲩϩⲏⲧ ⲙⲕⲁϩ ⲡⲉϫⲱⲟⲩ ⲙⲡⲉⲧⲣⲟⲥ ⲛⲉⲙⲡⲥⲱϫⲡ ⲛⲛⲓⲁⲡⲟⲥⲧⲟⲗⲟⲥ ϫⲉⲟⲩ ⲡⲉ ⲉⲧⲉⲛⲛⲁⲁⲓϥ ⲛⲓⲣⲱⲙⲓ ⲛⲉⲛⲥⲛⲏⲟⲩ .
Now when they heard this, they were cut to the heart, and said to Peter and the rest of the apostles, 'Brothers, what shall we do?'
2.38
ⲡⲉⲧⲣⲟⲥ ⲇⲉ ⲡⲉϫⲁϥ ⲛⲱⲟⲩ ϫⲉⲁⲣⲓⲙⲉⲧⲁⲛⲟⲉⲓⲛ ⲟⲩⲟϩ ⲙⲁⲣⲉ ⲫⲟⲩⲁⲓ ⲫⲟⲩⲁⲓ ⲙⲙⲱⲧⲉⲛ ⲟⲙⲥϥ ⲉⲫⲣⲁⲛ ⲛⲓⲏⲥⲟⲩⲥ ⲡⲭⲣⲓⲥⲧⲟⲥ ⲉⲡⲭⲱ ⲉⲃⲟⲗ ⲛⲧⲉⲛⲉⲧⲉⲛⲛⲟⲃⲓ ⲟⲩⲟϩ ⲧⲉⲧⲉⲛⲛⲁϭⲓ ⲛϯⲇⲱⲣⲉⲁ ⲛⲧⲉⲡⲓⲡⲛⲉⲩⲙⲁⲉⲑⲟⲩⲁⲃ .
Peter said to them, 'Repent, and be baptized, every one of you, in the name of Jesus Christ for the forgiveness of sins, and you will receive the gift of the Holy Spirit.
2.39
ⲫⲱⲧⲉⲛ ⲅⲁⲣ ⲡⲉ ⲡⲓⲱϣ ⲛⲉⲙⲛⲉⲧⲉⲛⲓⲟϯ ⲛⲉⲙⲟⲩⲟⲛ ⲛⲓⲃⲉⲛ ⲉⲑⲟⲩⲏⲟⲩ ⲛⲏ ⲉⲧⲉⲡϭⲟⲓⲥ ⲡⲉⲛⲛⲟⲩϯ ⲛⲁⲑⲁϩⲙⲟⲩ .
For to you is the promise, and to your children, and to all who are far off, even as many as the Lord our God will call to himself.'
2.40
ⲛϧⲣⲏⲓ ⲇⲉ ϧⲉⲛⲕⲉⲙⲏϣ ⲛⲥⲁϫⲓ ⲛⲁϥⲉⲣⲙⲉⲑⲣⲉ ⲛⲱⲟⲩ ⲟⲩⲟϩ ⲛⲁϥϧⲱⲛϫ ⲉⲣⲱⲟⲩ ⲉϥϫⲱ ⲙⲙⲟⲥ ϫⲉⲛⲁϩⲉⲙ ⲑⲏⲛⲟⲩ ⲉⲃⲟⲗ ϩⲁⲧⲁⲓⲅⲉⲛⲉⲁ ⲉⲧⲕⲟⲗϫ .
With many other words he testified, and exhorted them, saying, 'Save yourselves from this crooked generation!'
2.41
ⲛⲏ ⲙⲉⲛ ⲟⲩⲛ ⲉⲧⲁⲩϣⲉⲡ ⲡⲓⲥⲁϫⲓ ⲉⲣⲱⲟⲩ ⲁⲩⲟⲙⲥⲟⲩ ⲟⲩⲟϩ ⲁⲩⲟⲩⲟϩ ⲉⲣⲱⲟⲩ ⲙⲡⲓⲉϩⲟⲟⲩ ⲉⲧⲉⲙⲙⲁⲩ ⲛϫⲉⲅⲛϣⲟ ⲙⲯⲩⲭⲏ .
Then those who gladly received his word were baptized. There were added that day about three thousand souls.
2.42
ⲛⲁⲩⲙⲏⲛ ⲇⲉ ⲉϯⲥⲃⲱ ⲛⲧⲉⲛⲓⲁⲡⲟⲥⲧⲟⲗⲟⲥ ⲛⲉⲙϯⲙⲉⲧϣⲫⲏⲣ ⲛⲧⲉⲡⲓⲫⲱϣ ⲛⲧⲉⲡⲓⲱⲓⲕ ⲛⲉⲙϯⲡⲣⲟⲥⲉⲩⲭⲏ .
They continued steadfastly in the apostles' teaching and fellowship, in the breaking of bread, and prayer.
2.43
ⲟⲩϩⲟϯ ⲇⲉ ⲛⲁⲥϣⲟⲡ ⲙⲯⲩⲭⲏ ⲛⲓⲃⲉⲛ ϩⲁⲛⲙⲏϣ ⲇⲉ ⲙⲙⲏⲛⲓ ⲛⲉⲙϩⲁⲛϣⲫⲏⲣⲓ ⲛⲁⲩϣⲟⲡ ⲡⲉ ⲉⲃⲟⲗ ϩⲓⲧⲟⲧⲟⲩ ⲛⲛⲓⲁⲡⲟⲥⲧⲟⲗⲟⲥ ϧⲉⲛⲓⲉⲣⲟⲥⲁⲗⲏⲙ ⲟⲩⲛⲓϣϯ ⲇⲉ ⲛϩⲟϯ ⲛⲁⲥϣⲟⲡ ϩⲓϫⲱⲟⲩ ⲧⲏⲣⲟⲩ ⲡⲉ .
Fear came on every soul, and many wonders and signs were done through the apostles.
2.44
ⲛⲏ ⲇⲉ ⲧⲏⲣⲟⲩ ⲉⲧⲁⲩⲛⲁϩϯ ⲛⲁⲩϩⲓⲟⲩⲙⲁ ⲡⲉ ⲟⲩⲟϩ ϩⲱⲃ ⲛⲓⲃⲉⲛ ⲛⲁⲩϣⲟⲡ ⲛⲱⲟⲩ ⲡⲉ ϧⲉⲛⲟⲩⲙⲉⲧϣⲫⲏⲣ .
All who believed were together, and had all things in common.
2.45
ⲟⲩⲟϩ ⲛⲟⲩⲓⲟϩⲓ ⲛⲉⲙⲛⲟⲩϩⲩⲡⲁⲣⲭⲟⲛⲧⲁ ⲛⲁⲩϯ ⲙⲙⲱⲟⲩ ⲉⲃⲟⲗ ⲟⲩⲟϩ ⲛⲁⲩⲫⲱϣ ⲙⲙⲱⲟⲩ ⲉϩⲣⲁⲩ ⲧⲏⲣⲟⲩ ⲕⲁⲧⲁⲡⲉⲧⲉ ⲡⲓⲟⲩⲁⲓ ⲡⲓⲟⲩⲁⲓ ⲉⲣⲭⲣⲓⲁ ⲙⲙⲟϥ .
They sold their possessions and goods, and distributed them to all, according as anyone had need.
2.46
ⲛⲁⲩⲙⲏⲛ ⲇⲉ ⲙⲙⲏⲛⲓ ⲡⲉ ⲉⲡⲓⲉⲣⲫⲉⲓ ⲉⲩⲫⲱϣ ⲛⲟⲩⲱⲓⲕ ⲕⲁⲧⲁⲏⲓ ⲟⲩⲟϩ ⲛⲁⲩϭⲓ ⲛⲟⲩϧⲣⲉ ϧⲉⲛⲟⲩⲑⲉⲗⲏⲗ ⲛⲉⲙⲟⲩϩⲏⲧ ⲉϥⲟⲩⲁⲃ .
Day by day, continuing steadfastly with one accord in the temple, and breaking bread at home, they took their food with gladness and singleness of heart,
2.47
ⲉⲩⲥⲙⲟⲩ ⲉⲫⲛⲟⲩϯ ⲉⲟⲩⲟⲛ ⲛⲧⲱⲟⲩ ⲙⲙⲁⲩ ⲛⲟⲩϩⲙⲟⲧ ϧⲁⲧⲉⲛⲡⲓⲗⲁⲟⲥ ⲧⲏⲣϥ ⲡϭⲟⲓⲥ ⲇⲉ ϣⲁϥⲟⲩⲟϩ ⲉⲛⲏ ⲉⲧⲉϣⲁⲩⲛⲟϩⲉⲙ ⲙⲙⲏⲛⲓ ϩⲓⲫⲁⲓ ⲉⲫⲁⲓ .
praising God, and having favor with all the people. The Lord added to the assembly day by day those who were being saved.
3.1
ⲡⲉⲧⲣⲟⲥ ⲇⲉ ⲛⲉⲙⲓⲱⲁⲛⲛⲏⲥ ⲛⲁⲩⲛⲁ ⲉϩⲣⲏⲓ ⲉⲡⲓⲉⲣⲫⲉⲓ ⲙⲫⲛⲁⲩ ⲛϯⲡⲣⲟⲥⲉⲩⲭⲏ ⲛⲧⲉⲁϫⲡⲑϯ .
Peter and John were going up into the temple at the hour of prayer, the ninth hour.
3.2
ⲛⲉ ⲟⲩⲟⲛ ⲟⲩⲣⲱⲙⲓ ⲇⲉ ⲉϥⲟⲓ ⲛϭⲁⲗⲉ ⲓⲥϫⲉⲛ ⲉϥϧⲉⲛ ⲧⲛⲉϫⲓ ⲛⲧⲉⲧⲉϥⲙⲁⲩ ⲫⲁⲓ ⲛⲉϣⲁⲩⲧⲱⲟⲩⲛ ⲙⲙⲟϥ ⲙⲙⲏⲛⲓ ⲛⲥⲉⲭⲁϥ ϧⲁⲧⲉⲛⲫⲣⲟ ⲛϯⲡⲩⲗⲏ ⲛⲧⲉⲡⲓⲉⲣⲫⲉⲓ ⲑⲏ ⲉϣⲁⲩⲙⲟⲩϯ ⲉⲣⲟⲥ ϫⲉⲧⲥⲁⲓⲏ ⲉⲑⲣⲉϥϭⲓ ⲛⲟⲩⲙⲉⲑⲛⲁⲏⲧ ⲛⲧⲉⲛⲛⲏ ⲉⲑⲛⲁ ⲉϧⲟⲩⲛ ⲉⲡⲓⲉⲣⲫⲉⲓ .
A certain man who was lame from his mother's womb was being carried, whom they laid daily at the door of the temple which is called Beautiful, to ask gifts for the needy of those who entered into the temple.
3.3
ⲫⲁⲓ ⲉⲧⲁϥⲛⲁⲩ ⲉⲡⲉⲧⲣⲟⲥ ⲛⲉⲙⲓⲱⲁⲛⲛⲏⲥ ⲉⲩⲛⲁ ⲉϧⲟⲩⲛ ⲉⲡⲓⲉⲣⲫⲉⲓ ⲛⲁϥⲧⲱⲃϩ ⲙⲙⲱⲟⲩ ⲉϥⲟⲩⲱϣ ⲉϭⲓ ⲛⲟⲩⲙⲉⲑⲛⲁⲏⲧ ⲛⲧⲟⲧⲟⲩ .
Seeing Peter and John about to go into the temple, he asked to receive gifts for the needy.
3.4
ⲡⲉⲧⲣⲟⲥ ⲇⲉ ⲁϥⲥⲟⲙⲥ ⲉⲣⲟϥ ⲛⲉⲙⲓⲱⲁⲛⲛⲏⲥ ⲡⲉϫⲁϥ ϫⲉⲥⲟⲙⲥ ⲉⲣⲟⲛ .
Peter, fastening his eyes on him, with John, said, 'Look at us.'
3.5
ⲛⲑⲟϥ ⲇⲉ ⲛⲁϥⲙⲉⲩⲓ ϫⲉⲁϥⲛⲁϭⲓ ⲛⲟⲩⲙⲉⲑⲛⲁⲏⲧ ⲛⲧⲟⲧⲟⲩ .
He listened to them, expecting to receive something from them.
3.6
ⲡⲉⲧⲣⲟⲥ ⲇⲉ ⲡⲉϫⲁϥ ⲛⲁϥ ϫⲉⲟⲩϩⲁⲧ ⲛⲉⲙⲟⲩⲛⲟⲩⲃ ⲛϥϣⲟⲡ ⲛⲏⲓ ⲁⲛ ⲡⲉⲧⲉⲛⲧⲏⲓ ⲇⲉ ϯϯ ⲙⲙⲟϥ ⲛⲁⲕ ϧⲉⲛⲫⲣⲁⲛ ⲛⲓⲏⲥⲟⲩⲥ ⲡⲭⲣⲓⲥⲧⲟⲥ ⲡⲓⲛⲁⲍⲱⲣⲉⲟⲥ ⲧⲱⲛⲕ ⲙⲟϣⲓ .
But Peter said, 'Silver and gold have I none, but what I have, that I give you. In the name of Jesus Christ of Nazareth, get up and walk!'
3.7
ⲁϥⲁⲙⲁϩⲓ ⲇⲉ ⲛⲧⲉϥϫⲓϫ ⲁϥⲧⲟⲩⲛⲟⲥϥ ⲛϯⲟⲩⲛⲟⲩ ⲇⲉ ⲁⲩⲧⲁϫⲣⲟ ⲛϫⲉⲛⲉϥⲃⲁⲥⲓⲥ ⲛⲉⲙⲛⲓϭⲟⲡ ⲛⲧⲉⲣⲁⲧϥ .
He took him by the right hand, and raised him up. Immediately his feet and his ankle bones received strength.
3.8
ⲁϥϭⲓⲫⲉⲓ ⲁϥⲟϩⲓ ⲉⲣⲁⲧϥ ⲁϥⲙⲟϣⲓ ⲟⲩⲟϩ ⲁϥϣⲉ ⲉϧⲟⲩⲛ ⲉⲡⲓⲉⲣⲫⲉⲓ ⲛⲉⲙⲱⲟⲩ ⲉϥⲙⲟϣⲓ ⲉϥϭⲓⲫⲉⲓ ⲉϥⲥⲙⲟⲩ ⲉⲫⲛⲟⲩϯ .
Leaping up, he stood, and began to walk. He entered with them into the temple, walking, leaping, and praising God.
3.9
ⲟⲩⲟϩ ⲁϥⲛⲁⲩ ⲉⲣⲟϥ ⲛϫⲉⲡⲓⲗⲁⲟⲥ ⲧⲏⲣϥ ⲉϥⲙⲟϣⲓ ⲉϥⲥⲙⲟⲩ ⲉⲫⲛⲟⲩϯ .
All the people saw him walking and praising God.
3.10
ⲛⲁⲩⲥⲱⲟⲩⲛ ⲇⲉ ⲙⲙⲟϥ ⲡⲉ ϫⲉⲫⲁⲓ ⲡⲉ ⲫⲏ ⲉⲛⲁϥϩⲉⲙⲥⲓ ⲉϥϣⲁⲧ ⲙⲉⲑⲛⲁⲓ ϧⲁⲧⲉⲛϯⲥⲁⲓⲏ ⲙⲡⲩⲗⲏ ⲛⲧⲉⲡⲓⲉⲣⲫⲉⲓ ⲁⲩⲙⲟϩ ⲧⲏⲣⲟⲩ ⲉⲃⲟⲗ ϧⲉⲛⲟⲩϩⲟϯ ⲛⲉⲙⲟⲩⲙⲉⲧⲉⲃⲏ ⲛϧⲣⲏⲓ ⲉϫⲉⲛⲫⲁⲓ ⲉⲧⲁϥϣⲱⲡⲓ .
They recognized him, that it was he who used to sit begging for gifts for the needy at the Beautiful Gate of the temple. They were filled with wonder and amazement at what had happened to him.
3.11
ⲁϥⲁⲙⲁϩⲓ ⲇⲉ ⲙⲡⲉⲧⲣⲟⲥ ⲛⲉⲙⲓⲱⲁⲛⲛⲏ ⲥⲁϥⲫⲱⲧ ϩⲁⲣⲱⲟⲩ ⲛϫⲉⲡⲓⲗⲁⲟⲥ ⲧⲏⲣϥ ϧⲁⲧⲉⲛϯⲥⲧⲟⲁ ⲑⲏ ⲉϣⲁⲩⲙⲟⲩϯ ⲉⲣⲟⲥ ϫⲉⲑⲁ ⲥⲟⲗⲟⲙⲱⲛ ⲉⲩⲛϧⲣⲏⲓ ϧⲉⲛⲟⲩϩⲟϯ .
As the lame man who was healed held on to Peter and John, all the people ran together to them in the porch that is called Solomon's, greatly wondering.
3.12
ⲉⲧⲁϥⲛⲁⲩ ⲇⲉ ⲛϫⲉⲡⲉⲧⲣⲟⲥ ⲁϥⲉⲣⲟⲩⲱ ⲙⲡⲓⲗⲁⲟⲥ ⲛⲓⲣⲱⲙⲓ ⲛⲓⲓⲥⲣⲁⲏⲗⲓⲧⲏⲥ ⲉⲑⲃⲉⲟⲩ ⲧⲉⲧⲉⲛⲉⲣϣⲫⲏⲣⲓ ⲉϫⲉⲛⲫⲁⲓ ⲓⲉ ⲁϧⲱⲧⲉⲛ ⲧⲉⲧⲉⲛⲥⲟⲙⲥ ⲉⲣⲟⲛ ϩⲱⲥ ϫⲉⲛϧⲣⲏⲓ ϧⲉⲛⲧⲉⲛϫⲟⲙ ⲓⲉ ⲧⲉⲛⲙⲉⲧⲉⲩⲥⲉⲃⲏⲥ ⲁⲛⲓⲣⲓ ⲙⲫⲁⲓ ⲉⲧⲣⲉ ⲫⲁⲓ ⲙⲟϣⲓ .
When Peter saw it, he responded to the people, 'You men of Israel, why do you marvel at this man? Why do you fasten your eyes on us, as though by our own power or godliness we had made him walk?
3.13
ⲫⲛⲟⲩϯ ⲛⲁⲃⲣⲁⲁⲙ ⲛⲉⲙⲫⲛⲟⲩϯ ⲛⲓⲥⲁⲁⲕ ⲛⲉⲙⲫⲛⲟⲩϯ ⲛⲓⲁⲕⲱⲃ ⲫⲛⲟⲩϯ ⲛⲧⲉⲛⲉⲛⲓⲟϯ ⲁϥϯⲱⲟⲩ ⲙⲡⲉϥⲁⲗⲟⲩ ⲓⲏⲥⲟⲩⲥ ⲫⲁⲓ ⲛⲑⲱⲧⲉⲛ ⲉⲧⲁⲣⲉⲧⲉⲛⲧⲏ ⲓϥ ⲁⲧⲉⲧⲉⲛϫⲟⲗϥ ⲉⲃⲟⲗ ⲙⲡⲉⲙⲑⲟ ⲙⲡⲓⲗⲁⲧⲟⲥ ⲉⲁ ⲫⲏ ⲙⲉⲛ ϯϩⲁⲡ ⲉⲭⲁϥ ⲉⲃⲟⲗ .
The God of Abraham, Isaac, and Jacob, the God of our fathers, has glorified his Servant Jesus, whom you delivered up, and denied in the presence of Pilate, when he had determined to release him.
3.14
ⲛⲑⲱⲧⲉⲛ ⲇⲉ ⲡⲉⲑⲟⲩⲁⲃ ⲡⲓⲑⲙⲏⲓ ⲁⲧⲉⲧⲉⲛϫⲟⲗϥ ⲉⲃⲟⲗ ⲁⲣⲉⲧⲉⲛⲉⲣⲉⲧⲓⲛ ⲉⲑⲣⲟⲩⲭⲁ ⲟⲩⲣⲱⲙⲓ ⲛⲱⲧⲉⲛ ⲉⲃⲟⲗ ⲛⲣⲉϥϧⲱⲧⲉⲃ .
But you denied the Holy and Righteous One, and asked for a murderer to be granted to you,
3.15
ⲡⲁⲣⲭⲏⲅⲟⲥ ⲇⲉ ⲛⲧⲉⲡⲱⲛϧ ⲁⲣⲉⲧⲉⲛϧⲟⲑⲃϥ ⲫⲁⲓ ⲉⲧⲁ ⲫⲛⲟⲩϯ ⲧⲟⲩⲛⲟⲥϥ ⲉⲃⲟⲗ ϧⲉⲛⲛⲏ ⲉⲧⲙⲱⲟⲩⲧ ⲫⲁⲓ ⲁⲛⲟⲛ ⲧⲉⲛⲟⲓ ⲙⲙⲉⲑⲣⲉ ⲛⲁϥ .
and killed the Prince of life, whom God raised from the dead, to which we are witnesses.
3.16
ⲟⲩⲟϩ ⲛϧⲣⲏⲓ ϧⲉⲛⲫⲛⲁϩϯ ⲛⲧⲉⲡⲉϥⲣⲁⲛ ⲫⲁⲓ ⲉⲧⲉⲧⲉⲛⲛⲁⲩ ⲉⲣⲟϥ ⲟⲩⲟϩ ⲧⲉⲧⲉⲛⲥⲱⲟⲩⲛ ⲙⲙⲟϥ ⲡⲉϥⲣⲁⲛ ⲡⲉ ⲉⲧⲁϥⲧⲁⲗϭ ⲟϥ ⲟⲩⲟϩ ⲡⲓⲛⲁϩϯ ⲟⲩⲉⲃⲟⲗ ϩⲓⲧⲟⲧϥ ⲡⲉ ⲁϥϯ ⲛⲁϥ ⲙⲡⲓⲟⲩϫⲁⲓ ⲙⲡⲉⲧⲉⲛⲙⲑⲟ ⲉⲃⲟⲗ ⲧⲏⲣⲟⲩ .
By faith in his name, his name has made this man strong, whom you see and know. Yes, the faith which is through him has given him this perfect soundness in the presence of you all.
3.17
ϯⲛⲟⲩ ⲇⲉ ⲛⲁⲥⲛⲏⲟⲩ ϯⲥⲱⲟⲩⲛ ϫⲉⲉⲧⲁⲣⲉⲧⲉⲛⲁⲓⲥ ϧⲉⲛⲟⲩⲙⲉⲧⲁⲧⲉⲙⲓ ⲙⲫⲣⲏϯ ⲛⲛⲉⲧⲉⲛⲕⲉⲁⲣⲭⲱⲛ .
'Now, brothers, I know that you did this in ignorance, as did also your rulers.
3.18
ⲫⲛⲟⲩϯ ⲇⲉ ⲛⲏ ⲉⲧⲁϥϫⲟⲧⲟⲩ ⲓⲥϫⲉⲛ ϣⲟⲣⲡ ⲉⲃⲟⲗ ϧⲉⲛⲣⲱⲟⲩ ⲛⲛⲉϥⲡⲣⲟⲫⲏⲧⲏⲥ ⲧⲏⲣⲟⲩ ⲉⲧⲣⲉ ⲡⲉϥⲭⲣⲓⲥⲧⲟⲥ ϣⲉⲡⲙⲕⲁϩ ⲁϥϫⲟⲕⲟⲩ ⲉⲃⲟⲗ ⲙⲡⲁⲓⲣⲏϯ .
But the things which God announced by the mouth of all his prophets, that Christ should suffer, he thus fulfilled.
3.19
ⲁⲣⲓⲙⲉⲧⲁⲛⲟⲉⲓⲛ ⲟⲩⲛ ⲟⲩⲟϩ ⲕⲉⲧ ⲑⲏⲛⲟⲩ ⲉⲑⲣⲟⲩϥⲱϯ ⲉⲃⲟⲗ ⲛⲛⲉⲧⲉⲛⲛⲟⲃⲓ ϩⲟⲡⲱⲥ ⲛⲥⲉⲓ ⲛⲱⲧⲉⲛ ⲛϫⲉϩⲁⲛⲥⲏⲟⲩ ⲛⲭⲃⲟⲃ ⲉⲃⲟⲗ ϧⲁⲧϩⲏ ⲙⲡϩⲟ ⲙⲡϭⲟⲓⲥ .
'Repent therefore, and turn again, that your sins may be blotted out, so that there may come times of refreshing from the presence of the Lord,
3.20
ⲟⲩⲟϩ ⲉϥⲉⲧⲁⲟⲩⲟ ⲛⲱⲧⲉⲛ ⲙⲫⲏ ⲉⲧⲁϥⲉⲣϣⲟⲣⲡ ⲛⲑⲁϣϥ ⲓⲏⲥⲟⲩⲥ ⲡⲭⲣⲓⲥⲧⲟⲥ .
and that he may send Christ Jesus, who was ordained for you before,
3.21
ⲫⲁⲓ ⲉⲧⲉϩⲱϯ ⲡⲉ ⲛⲧⲉⲛⲓⲫⲏⲟⲩⲓ ϣⲟⲡϥ ⲉⲣⲱⲟⲩ ϣⲁⲡⲥⲏⲟⲩ ⲛⲧⲁⲫⲉ ⲛϩⲱⲃ ⲛⲓⲃⲉⲛ ⲉⲧⲁϥⲥⲁϫⲓ ⲙⲙⲱⲟⲩ ⲛϫⲉⲫⲛⲟⲩϯ ⲉⲃⲟⲗ ϧⲉⲛⲣⲱⲟⲩ ⲛⲛⲉϥⲡⲣⲟⲫⲏⲧⲏⲥ ⲓⲥϫⲉⲛ ⲡⲉⲛⲉϩ .
whom heaven must receive until the times of restoration of all things, which God spoke long ago by the mouth of his holy prophets.
3.22
ⲙⲱⲩⲥⲏⲥ ⲙⲉⲛ ⲁϥϫⲟⲥ ϫⲉⲉⲣⲉⲡϭⲟⲓⲥ ⲫⲛⲟⲩϯ ⲉϥⲉⲧⲟⲩⲛⲟⲥ ⲟⲩⲡⲣⲟⲫⲏⲧⲏⲥ ⲛⲱⲧⲉⲛ ⲉⲃⲟⲗ ϧⲉⲛⲛⲉⲧⲉⲛⲥⲛⲏⲟⲩ ⲛⲁⲡⲁⲣⲏϯ ⲥⲱⲧⲉⲙ ⲛⲥⲱϥ ⲕⲁⲧⲁϩⲱⲃ ⲛⲓⲃⲉⲛ ⲉⲧⲉϥⲛⲁϫⲟⲧⲟⲩ ⲛⲱⲧⲉⲛ .
For Moses indeed said to the fathers, 'The Lord God will raise up a prophet for you from among your brothers, like me. You shall listen to him in all things whatever he says to you.
3.23
ⲉⲥⲉϣⲱⲡⲓ ⲇⲉ ⲙⲯⲩⲭⲏ ⲛⲓⲃⲉⲛ ⲉⲧⲉⲛⲥⲛⲁⲥⲱⲧⲉⲙ ⲁⲛ ⲛⲥⲁⲡⲓⲡⲣⲟⲫⲏⲧⲏⲥ ⲉⲧⲉⲙⲙⲁⲩ ⲉⲩⲉϥⲱϯ ⲛϯⲯⲩⲭⲏ ⲉⲧⲉⲙⲙⲁⲩ ⲉⲃⲟⲗ ϧⲉⲛⲡⲉⲥⲗⲁⲟⲥ .
It will be, that every soul that will not listen to that prophet will be utterly destroyed from among the people.'
3.24
ⲟⲩⲟϩ ⲛⲓⲡⲣⲟⲫⲏⲧⲏⲥ ⲧⲏⲣⲟⲩ ⲓⲥϫⲉⲛ ⲥⲁⲙⲟⲩⲏⲗ ⲛⲉⲙⲛⲏ ⲉⲧⲁⲩⲓ ⲙⲉⲛⲉⲛⲥⲱϥ ⲁⲩⲥⲁϫⲓ ⲟⲩⲟϩ ⲁⲩϩⲓⲱⲓϣ ⲉⲑⲃⲉⲛⲁⲓⲉϩⲟⲟⲩ .
Yes, and all the prophets from Samuel and those who followed after, as many as have spoken, they also told of these days.
3.25
ⲛⲑⲱⲧⲉⲛ ⲇⲉ ⲛⲉⲛϣⲏⲣⲓ ⲛⲛⲓⲡⲣⲟⲫⲏⲧⲏⲥ ⲛⲉⲙϯⲇⲓⲁⲑⲏⲕⲏ ⲉⲧⲁ ⲫⲛⲟⲩϯ ⲥⲉⲙⲛⲏⲧⲥ ⲛⲉⲙⲛⲉⲛⲓⲟϯ ⲉϥϫⲱ ⲙⲙⲟⲥ ⲛⲁⲃⲣⲁⲁⲙ ϫⲉⲉⲩⲉϣⲱⲡⲓ ⲉⲩⲥⲙⲁⲣⲱⲟⲩⲧ ϧⲉⲛⲡⲉⲕϫⲣⲟϫ ⲛϫⲉⲛⲓⲡⲁⲧⲣⲓⲁ ⲧⲏⲣⲟⲩ ⲛⲧⲉⲡⲕⲁϩⲓ .
You are the children of the prophets, and of the covenant which God made with our fathers, saying to Abraham, 'In your seed will all the families of the earth be blessed.'
3.26
ⲛϣⲟⲣⲡ ⲙⲉⲛ ⲁⲫⲛⲟⲩϯ ⲧⲟⲩⲛⲟⲥ ⲡⲉϥⲁⲗⲟⲩ ⲛⲱⲧⲉⲛ ⲁϥⲧⲁⲟⲩⲟϥ ⲉⲥⲙⲟⲩ ⲉⲣⲱⲧⲉⲛ ϫⲉⲭⲁⲥ ⲛⲧⲉⲡⲓⲟⲩⲁⲓ ⲡⲓⲟⲩⲁⲓ ⲙⲙⲱⲧⲉⲛ ϩⲉⲛϥ ⲥⲁⲃⲟⲗ ⲛⲛⲉϥⲡⲉⲧϩⲱⲟⲩ .
God, having raised up his servant, Jesus, sent him to you first, to bless you, in turning away everyone of you from your wickedness.'
4.1
ⲉⲩⲥⲁϫⲓ ⲇⲉ ⲛⲉⲙⲡⲓⲗⲁⲟⲥ ⲁⲩⲧⲱⲟⲩⲛⲟⲩ ⲉϩⲣⲏⲓ ⲉϫⲱⲟⲩ ⲛϫⲉⲛⲓⲟⲩⲏⲃ ⲛⲉⲙⲛⲓⲥⲁⲧⲏⲅⲟⲩⲥ ⲛⲧⲉⲡⲓⲉⲣⲫⲉⲓ ⲛⲉⲙⲛⲓⲥⲁⲇⲇⲟⲩⲕⲉⲟⲥ .
As they spoke to the people, the priests and the captain of the temple and the Sadducees came to them,

Bohairic Coptic New Testament, Coptic SCRIPTORIUM (github.com/CopticScriptorium/corpora, corpus bohairic.nt). Coptic text from Marcion / Hany Takla; annotation by Nina Speranskaja, Nicholas Wagner and Amir Zeldes. English is the World English Bible (public domain), aligned by Coptic SCRIPTORIUM. Licence: CC-BY 4.0. Source.