← Library

7 Anusayayamaka — 7.1. Uppattiṭṭhānavāra

Early Buddhist texts (SuttaCentral): Abhidhamma · abhidhamma · 12 sections

1. ya7.1:0.1

   7 Anusayayamaka

2. ya7.1:0.2

   7.1. Uppattiṭṭhānavāra

3. ya7.1:1.1

   Namo tassa Bhagavato Arahato Sammāsambuddhassa.

4. ya7.1:2.1

   Sattānusayā—kāmarāgānusayo, paṭighānusayo, mānānusayo, diṭṭhānusayo, vicikicchānusayo, bhavarāgānusayo, avijjānusayo.

5. ya7.1:3.1

   Kattha kāmarāgānusayo anuseti? Kāmadhātuyā dvīsu vedanāsu ettha kāmarāgānusayo anuseti.

6. ya7.1:4.1

   Kattha paṭighānusayo anuseti? Dukkhāya vedanāya ettha paṭighānusayo anuseti.

7. ya7.1:5.1

   Kattha mānānusayo anuseti? Kāmadhātuyā dvīsu vedanāsu rūpadhātuyā arūpadhātuyā ettha mānānusayo anuseti.

8. ya7.1:6.1

   Kattha diṭṭhānusayo anuseti? Sabbasakkāyapariyāpannesu dhammesu ettha diṭṭhānusayo anuseti.

9. ya7.1:7.1

   Kattha vicikicchānusayo anuseti? Sabbasakkāyapariyāpannesu dhammesu ettha vicikicchānusayo anuseti.

10. ya7.1:8.1

    Kattha bhavarāgānusayo anuseti? Rūpadhātuyā arūpadhātuyā ettha bhavarāgānusayo anuseti.

11. ya7.1:9.1

    Kattha avijjānusayo anuseti? Sabbasakkāyapariyāpannesu dhammesu ettha avijjānusayo anuseti.

12. ya7.1:10.1

    Uppattiṭṭhānavāro.

SuttaCentral (suttacentral.net), from the bilara-data and sc-data repositories. Licence: Public Domain. Source.