← Library

5 Saccayamaka — 5.2 Pavattivāra — 5.2.3. Uppādanirodhavāra

Early Buddhist texts (SuttaCentral): Abhidhamma · abhidhamma · 142 sections

1. ya5.2.3:76.1

   Yassa yattha dukkhasaccaṁ uppajjati tassa tattha maggasaccaṁ nirujjhissatīti?

2. ya5.2.3:77.1

   Arahantānaṁ cittassa uppādakkhaṇe āpāyikānaṁ ye ca puthujjanā maggaṁ na paṭilabhissanti tesaṁ upapajjantānaṁ pavatte cittassa uppādakkhaṇe asaññasattaṁ upapajjantānaṁ tesaṁ tattha dukkhasaccaṁ uppajjati, no ca tesaṁ tattha maggasaccaṁ nirujjhissati. Aggamaggassa uppādakkhaṇe yassa cittassa anantarā aggamaggaṁ paṭilabhissanti tassa cittassa uppādakkhaṇe ye caññe maggaṁ paṭilabhissanti tesaṁ upapajjantānaṁ pavatte cittassa uppādakkhaṇe tesaṁ tattha dukkhasaccañca uppajjati maggasaccañca nirujjhissati.

3. ya5.2.3:78.1

   Yassa vā pana yattha maggasaccaṁ nirujjhissati tassa tattha dukkhasaccaṁ uppajjatīti?

4. ya5.2.3:79.1

   Yassa cittassa anantarā aggamaggaṁ paṭilabhissanti tassa cittassa bhaṅgakkhaṇe ye caññe maggaṁ paṭilabhissanti tesaṁ cavantānaṁ pavatte cittassa bhaṅgakkhaṇe arūpe maggassa ca phalassa ca uppādakkhaṇe tesaṁ tattha maggasaccaṁ nirujjhissati, no ca tesaṁ tattha dukkhasaccaṁ uppajjati. Aggamaggassa uppādakkhaṇe yassa cittassa anantarā aggamaggaṁ paṭilabhissanti tassa cittassa uppādakkhaṇe ye caññe maggaṁ paṭilabhissanti tesaṁ upapajjantānaṁ pavatte cittassa uppādakkhaṇe tesaṁ tattha maggasaccañca nirujjhissati dukkhasaccañca uppajjati.

5. ya5.2.3:80.1

   Yassa yattha samudayasaccaṁ uppajjati tassa tattha maggasaccaṁ nirujjhissatīti?

6. ya5.2.3:81.1

   Āpāyikānaṁ ye ca puthujjanā maggaṁ na paṭilabhissanti tesaṁ taṇhāya uppādakkhaṇe tesaṁ tattha samudayasaccaṁ uppajjati, no ca tesaṁ tattha maggasaccaṁ nirujjhissati. Ye maggaṁ paṭilabhissanti tesaṁ taṇhāya uppādakkhaṇe tesaṁ tattha samudayasaccañca uppajjati maggasaccañca nirujjhissati.

7. ya5.2.3:82.1

   Yassa vā pana yattha maggasaccaṁ nirujjhissati tassa tattha samudayasaccaṁ uppajjatīti?

8. ya5.2.3:83.1

   Aggamaggassa uppādakkhaṇe yassa cittassa anantarā aggamaggaṁ paṭilabhissanti ye caññe maggaṁ paṭilabhissanti tesaṁ taṇhāya bhaṅgakkhaṇe taṇhāvippayuttacitte vattamāne tesaṁ tattha maggasaccaṁ nirujjhissati, no ca tesaṁ tattha samudayasaccaṁ uppajjati. Ye maggaṁ paṭilabhissanti tesaṁ taṇhāya uppādakkhaṇe tesaṁ tattha maggasaccañca nirujjhissati samudayasaccañca uppajjati.

9. ya5.2.3:84.0

   5.2.3.5.4. Paccanīkapuggala

10. ya5.2.3:84.1

    Yassa dukkhasaccaṁ nuppajjati tassa samudayasaccaṁ na nirujjhissatīti?

11. ya5.2.3:85.1

    Sabbesaṁ cavantānaṁ pavatte cittassa bhaṅgakkhaṇe arūpe maggassa ca phalassa ca uppādakkhaṇe tesaṁ dukkhasaccaṁ nuppajjati, no ca tesaṁ samudayasaccaṁ na nirujjhissati. Aggamaggassa bhaṅgakkhaṇe arahantānaṁ cittassa bhaṅgakkhaṇe yassa cittassa anantarā aggamaggaṁ paṭilabhissanti tassa cittassa bhaṅgakkhaṇe arūpe aggamaggassa ca phalassa ca uppādakkhaṇe tesaṁ dukkhasaccañca nuppajjati samudayasaccañca na nirujjhissati.

12. ya5.2.3:86.1

    Yassa vā pana samudayasaccaṁ na nirujjhissati tassa dukkhasaccaṁ nuppajjatīti?

13. ya5.2.3:87.1

    Aggamaggassa uppādakkhaṇe arahantānaṁ cittassa uppādakkhaṇe yassa cittassa anantarā aggamaggaṁ paṭilabhissanti tassa cittassa uppādakkhaṇe tesaṁ samudayasaccaṁ na nirujjhissati, no ca tesaṁ dukkhasaccaṁ nuppajjati. Aggamaggassa bhaṅgakkhaṇe arahantānaṁ cittassa bhaṅgakkhaṇe yassa cittassa anantarā aggamaggaṁ paṭilabhissanti tassa cittassa bhaṅgakkhaṇe arūpe aggamaggassa ca phalassa ca uppādakkhaṇe tesaṁ samudayasaccañca na nirujjhissati dukkhasaccañca nuppajjati.

14. ya5.2.3:88.1

    Yassa dukkhasaccaṁ nuppajjati tassa maggasaccaṁ na nirujjhissatīti?

15. ya5.2.3:89.1

    Yassa cittassa anantarā aggamaggaṁ paṭilabhissanti tassa cittassa bhaṅgakkhaṇe ye caññe maggaṁ paṭilabhissanti tesaṁ cavantānaṁ pavatte cittassa bhaṅgakkhaṇe arūpe maggassa ca phalassa ca uppādakkhaṇe tesaṁ dukkhasaccaṁ nuppajjati, no ca tesaṁ maggasaccaṁ na nirujjhissati. Aggamaggassa bhaṅgakkhaṇe arahantānaṁ cittassa bhaṅgakkhaṇe ye ca puthujjanā maggaṁ na paṭilabhissanti tesaṁ cavantānaṁ pavatte cittassa bhaṅgakkhaṇe arūpe aggaphalassa uppādakkhaṇe tesaṁ dukkhasaccañca nuppajjati maggasaccañca na nirujjhissati.

16. ya5.2.3:90.1

    Yassa vā pana maggasaccaṁ na nirujjhissati tassa dukkhasaccaṁ nuppajjatīti?

17. ya5.2.3:91.1

    Arahantānaṁ cittassa uppādakkhaṇe ye ca puthujjanā maggaṁ na paṭilabhissanti tesaṁ upapajjantānaṁ pavatte cittassa uppādakkhaṇe tesaṁ maggasaccaṁ na nirujjhissati, no ca tesaṁ dukkhasaccaṁ nuppajjati. Aggamaggassa bhaṅgakkhaṇe arahantānaṁ cittassa bhaṅgakkhaṇe ye ca puthujjanā maggaṁ na paṭilabhissanti tesaṁ cavantānaṁ pavatte cittassa bhaṅgakkhaṇe arūpe aggaphalassa uppādakkhaṇe tesaṁ maggasaccañca na nirujjhissati dukkhasaccañca nuppajjati.

18. ya5.2.3:92.1

    Yassa samudayasaccaṁ nuppajjati tassa maggasaccaṁ na nirujjhissatīti?

19. ya5.2.3:93.1

    Aggamaggassa uppādakkhaṇe yassa cittassa anantarā aggamaggaṁ paṭilabhissanti ye caññe maggaṁ paṭilabhissanti tesaṁ taṇhāya bhaṅgakkhaṇe taṇhāvippayuttacitte vattamāne nirodhasamāpannānaṁ asaññasattānaṁ tesaṁ samudayasaccaṁ nuppajjati, no ca tesaṁ maggasaccaṁ na nirujjhissati. Aggamaggassa bhaṅgakkhaṇe arahantānaṁ ye ca puthujjanā maggaṁ na paṭilabhissanti tesaṁ taṇhāya bhaṅgakkhaṇe taṇhāvippayuttacitte vattamāne tesaṁ samudayasaccañca nuppajjati maggasaccañca na nirujjhissati.

20. ya5.2.3:94.1

    Yassa vā pana maggasaccaṁ na nirujjhissati tassa samudayasaccaṁ nuppajjatīti?

21. ya5.2.3:95.1

    Ye puthujjanā maggaṁ na paṭilabhissanti tesaṁ taṇhāya uppādakkhaṇe tesaṁ maggasaccaṁ na nirujjhissati, no ca tesaṁ samudayasaccaṁ nuppajjati. Aggamaggassa bhaṅgakkhaṇe arahantānaṁ ye ca puthujjanā maggaṁ na paṭilabhissanti tesaṁ taṇhāya bhaṅgakkhaṇe taṇhāvippayuttacitte vattamāne tesaṁ maggasaccañca na nirujjhissati samudayasaccañca nuppajjati.

22. ya5.2.3:96.0

    5.2.3.5.5. Paccanīkaokāsa

23. ya5.2.3:96.1

    Yattha dukkhasaccaṁ nuppajjati …pe….

24. ya5.2.3:97.0

    5.2.3.5.6. Paccanīkapuggalokāsa

25. ya5.2.3:97.1

    Yassa yattha dukkhasaccaṁ nuppajjati tassa tattha samudayasaccaṁ na nirujjhissatīti?

26. ya5.2.3:98.1

    Catuvokārā pañcavokārā cavantānaṁ pavatte cittassa bhaṅgakkhaṇe arūpe maggassa ca phalassa ca uppādakkhaṇe tesaṁ tattha dukkhasaccaṁ nuppajjati, no ca tesaṁ tattha samudayasaccaṁ na nirujjhissati. Aggamaggassa bhaṅgakkhaṇe arahantānaṁ cittassa bhaṅgakkhaṇe yassa cittassa anantarā aggamaggaṁ paṭilabhissanti tassa cittassa bhaṅgakkhaṇe arūpe aggamaggassa ca phalassa ca uppādakkhaṇe asaññasattā cavantānaṁ tesaṁ tattha dukkhasaccañca nuppajjati samudayasaccañca na nirujjhissati.

27. ya5.2.3:99.1

    Yassa vā pana yattha samudayasaccaṁ na nirujjhissati tassa tattha dukkhasaccaṁ nuppajjatīti?

28. ya5.2.3:100.1

    Aggamaggassa uppādakkhaṇe arahantānaṁ cittassa uppādakkhaṇe yassa cittassa anantarā aggamaggaṁ paṭilabhissanti tassa cittassa uppādakkhaṇe asaññasattaṁ upapajjantānaṁ tesaṁ tattha samudayasaccaṁ na nirujjhissati, no ca tesaṁ tattha dukkhasaccaṁ nuppajjati. Aggamaggassa bhaṅgakkhaṇe arahantānaṁ cittassa bhaṅgakkhaṇe yassa cittassa anantarā aggamaggaṁ paṭilabhissanti tassa cittassa bhaṅgakkhaṇe arūpe aggamaggassa ca phalassa ca uppādakkhaṇe asaññasattā cavantānaṁ tesaṁ tattha samudayasaccañca na nirujjhissati dukkhasaccañca nuppajjati.

29. ya5.2.3:101.1

    Yassa yattha dukkhasaccaṁ nuppajjati tassa tattha maggasaccaṁ na nirujjhissatīti?

30. ya5.2.3:102.1

    Yassa cittassa anantarā aggamaggaṁ paṭilabhissanti tassa cittassa bhaṅgakkhaṇe ye caññe maggaṁ paṭilabhissanti tesaṁ cavantānaṁ pavatte cittassa bhaṅgakkhaṇe arūpe maggassa ca phalassa ca uppādakkhaṇe tesaṁ tattha dukkhasaccaṁ nuppajjati, no ca tesaṁ tattha maggasaccaṁ na nirujjhissati. Aggamaggassa bhaṅgakkhaṇe arahantānaṁ cittassa bhaṅgakkhaṇe āpāyikānaṁ ye ca puthujjanā maggaṁ na paṭilabhissanti tesaṁ cavantānaṁ pavatte cittassa bhaṅgakkhaṇe arūpe aggaphalassa uppādakkhaṇe asaññasattā cavantānaṁ tesaṁ tattha dukkhasaccañca nuppajjati maggasaccañca na nirujjhissati.

31. ya5.2.3:103.1

    Yassa vā pana yattha maggasaccaṁ na nirujjhissati tassa tattha dukkhasaccaṁ nuppajjatīti?

32. ya5.2.3:104.1

    Arahantānaṁ cittassa uppādakkhaṇe āpāyikānaṁ ye ca puthujjanā maggaṁ na paṭilabhissanti tesaṁ upapajjantānaṁ pavatte cittassa uppādakkhaṇe asaññasattaṁ upapajjantānaṁ tesaṁ tattha maggasaccaṁ na nirujjhissati, no ca tesaṁ tattha dukkhasaccaṁ nuppajjati. Aggamaggassa bhaṅgakkhaṇe arahantānaṁ cittassa bhaṅgakkhaṇe āpāyikānaṁ ye ca puthujjanā maggaṁ na paṭilabhissanti tesaṁ cavantānaṁ pavatte cittassa bhaṅgakkhaṇe arūpe aggaphalassa uppādakkhaṇe asaññasattā cavantānaṁ tesaṁ tattha maggasaccañca na nirujjhissati dukkhasaccañca nuppajjati.

33. ya5.2.3:105.1

    Yassa yattha samudayasaccaṁ nuppajjati tassa tattha maggasaccaṁ na nirujjhissatīti?

34. ya5.2.3:106.1

    Aggamaggassa uppādakkhaṇe yassa cittassa anantarā aggamaggaṁ paṭilabhissanti ye caññe maggaṁ paṭilabhissanti tesaṁ taṇhāya bhaṅgakkhaṇe taṇhāvippayuttacitte vattamāne tesaṁ tattha samudayasaccaṁ nuppajjati, no ca tesaṁ tattha maggasaccaṁ na nirujjhissati. Aggamaggassa bhaṅgakkhaṇe arahantānaṁ āpāyikānaṁ ye ca puthujjanā maggaṁ na paṭilabhissanti tesaṁ taṇhāya bhaṅgakkhaṇe taṇhāvippayuttacitte vattamāne asaññasattānaṁ tesaṁ tattha samudayasaccañca nuppajjati maggasaccañca na nirujjhissati.

35. ya5.2.3:107.1

    Yassa vā pana yattha maggasaccaṁ na nirujjhissati tassa tattha samudayasaccaṁ nuppajjatīti?

36. ya5.2.3:108.1

    Āpāyikānaṁ ye ca puthujjanā maggaṁ na paṭilabhissanti tesaṁ taṇhāya uppādakkhaṇe tesaṁ tattha maggasaccaṁ na nirujjhissati, no ca tesaṁ tattha samudayasaccaṁ nuppajjati. Aggamaggassa bhaṅgakkhaṇe arahantānaṁ āpāyikānaṁ ye ca puthujjanā maggaṁ na paṭilabhissanti tesaṁ taṇhāya bhaṅgakkhaṇe taṇhāvippayuttacitte vattamāne asaññasattānaṁ tesaṁ tattha maggasaccañca na nirujjhissati samudayasaccañca nuppajjati.

37. ya5.2.3:109.0.1

    5.2.3.6. Atītānāgatavāra

38. ya5.2.3:109.0.2

    5.2.3.6.1. Anulomapuggala

39. ya5.2.3:109.1

    Yassa dukkhasaccaṁ uppajjittha tassa samudayasaccaṁ nirujjhissatīti?

40. ya5.2.3:110.1

    (Yathā nirodhavāre atītānāgatā pucchā anulomampi paccanīkampi vibhattā evaṁ uppādanirodhavārepi asammohantena vibhajitabbaṁ.)

41. ya5.2.3:111.1

    Uppādanirodhavāro.

42. ya5.2.3:112.1

    Pavattivāro niṭṭhito.

← Previous — showing 101–142 of 142

SuttaCentral (suttacentral.net), from the bilara-data and sc-data repositories. Licence: Public Domain. Source.