← All works

Kathāvatthu — Mahāpaṇṇāsaka — Aṭṭhamavagga

Early Buddhist texts (SuttaCentral): Abhidhamma · abhidhamma · 535 sections

1. kv8.9:38.1

   Rūpaṁ kammanti?

2. kv8.9:38.2

   Āmantā.

3. kv8.9:38.3

   Nanu vuttaṁ bhagavatā—

4. kv8.9:38.4

   “kāye vā, ānanda, sati kāyasañcetanāhetu uppajjati ajjhattaṁ sukhadukkhaṁ;

5. kv8.9:38.5

   vācāya vā, ānanda, sati vacīsañcetanāhetu uppajjati ajjhattaṁ sukhadukkhaṁ;

6. kv8.9:38.6

   mane vā, ānanda, sati manosañcetanāhetu uppajjati ajjhattaṁ sukhadukkhan”ti.

7. kv8.9:38.7

   Attheva suttantoti?

8. kv8.9:38.8

   Āmantā.

9. kv8.9:38.9

   Tena hi na vattabbaṁ—

10. kv8.9:38.10

    “rūpaṁ kamman”ti.

11. kv8.9:39.1

    Rūpaṁ kammanti?

12. kv8.9:39.2

    Āmantā.

13. kv8.9:39.3

    Nanu vuttaṁ bhagavatā—

14. kv8.9:39.4

    “tividhā, bhikkhave, kāyasañcetanā akusalaṁ kāyakammaṁ dukkhudrayaṁ dukkhavipākaṁ;

15. kv8.9:39.5

    catubbidhā, bhikkhave, vacīsañcetanā akusalaṁ vacīkammaṁ dukkhudrayaṁ dukkhavipākaṁ;

16. kv8.9:39.6

    tividhā, bhikkhave, manosañcetanā akusalaṁ manokammaṁ dukkhudrayaṁ dukkhavipākaṁ;

17. kv8.9:39.7

    tividhā, bhikkhave, kāyasañcetanā kusalaṁ kāyakammaṁ sukhudrayaṁ sukhavipākaṁ;

18. kv8.9:39.8

    catubbidhā, bhikkhave, vacīsañcetanā kusalaṁ vacīkammaṁ sukhudrayaṁ sukhavipākaṁ;

19. kv8.9:39.9

    tividhā, bhikkhave, manosañcetanā kusalaṁ manokammaṁ sukhudrayaṁ sukhavipākan”ti.

20. kv8.9:39.10

    Attheva suttantoti?

21. kv8.9:39.11

    Āmantā.

22. kv8.9:39.12

    Tena hi na vattabbaṁ—

23. kv8.9:39.13

    “rūpaṁ kamman”ti.

24. kv8.9:40.1

    Rūpaṁ kammanti?

25. kv8.9:40.2

    Āmantā.

26. kv8.9:40.3

    Nanu vuttaṁ bhagavatā—

27. kv8.9:40.4

    “sacāyaṁ, ānanda, samiddhi moghapuriso pāṭaliputtassa paribbājakassa evaṁ puṭṭho evaṁ byākareyya—

28. kv8.9:40.5

    ‘sañcetaniyaṁ, āvuso pāṭaliputta, kammaṁ katvā kāyena vācāya manasā sukhavedaniyaṁ sukhaṁ so vedayati;

29. kv8.9:40.6

    sañcetaniyaṁ, āvuso pāṭaliputta, kammaṁ katvā kāyena vācāya manasā dukkhavedaniyaṁ dukkhaṁ so vedayati;

30. kv8.9:40.7

    sañcetaniyaṁ, āvuso pāṭaliputta, kammaṁ katvā kāyena vācāya manasā adukkhamasukhavedaniyaṁ adukkhamasukhaṁ so vedayatī’ti, evaṁ byākaramāno kho, ānanda, samiddhi moghapuriso pāṭaliputtassa paribbājakassa sammā byākaramāno byākareyyā”ti.

31. kv8.9:40.8

    Attheva suttantoti?

32. kv8.9:40.9

    Āmantā.

33. kv8.9:40.10

    Tena hi na vattabbaṁ—

34. kv8.9:40.11

    “rūpaṁ kamman”ti.

35. kv8.9:40.12

    Rūpaṁ kammantikathā niṭṭhitā.

← Previous — showing 501–535 of 535

SuttaCentral (suttacentral.net), from the bilara-data and sc-data repositories. Licence: Public Domain. Source.