← All works

Kathāvatthu — Niyāmapaṇṇāsaka — Sattamavagga

Early Buddhist texts (SuttaCentral): Abhidhamma · abhidhamma · 61 sections

1. kv7.1:0.1

   Kathāvatthu

2. kv7.1:0.2

   Niyāmapaṇṇāsaka

3. kv7.1:0.3

   Sattamavagga

4. kv7.1:0.4

   Saṅgahitakathā

5. kv7.1:1.1

   Natthi keci dhammā kehici dhammehi saṅgahitāti?

6. kv7.1:1.2

   Āmantā.

7. kv7.1:1.3

   Nanu atthi keci dhammā kehici dhammehi gaṇanaṁ gacchanti uddesaṁ gacchanti pariyāpannāti?

8. kv7.1:1.4

   Āmantā.

9. kv7.1:1.5

   Hañci atthi keci dhammā kehici dhammehi gaṇanaṁ gacchanti uddesaṁ gacchanti pariyāpannā, no ca vata re vattabbe—

10. kv7.1:1.6

    “natthi keci dhammā kehici dhammehi saṅgahitā”ti.

11. kv7.1:2.1

    Cakkhāyatanaṁ katamakkhandhagaṇanaṁ gacchatīti?

12. kv7.1:2.2

    Rūpakkhandhagaṇanaṁ gacchatīti.

13. kv7.1:2.3

    Hañci cakkhāyatanaṁ rūpakkhandhagaṇanaṁ gacchati, tena vata re vattabbe—

14. kv7.1:2.4

    “cakkhāyatanaṁ rūpakkhandhena saṅgahitan”ti.

15. kv7.1:2.5

    Sotāyatanaṁ …pe…

16. kv7.1:2.6

    ghānāyatanaṁ …pe…

17. kv7.1:2.7

    jivhāyatanaṁ …pe…

18. kv7.1:2.8

    kāyāyatanaṁ katamakkhandhagaṇanaṁ gacchatīti?

19. kv7.1:2.9

    Rūpakkhandhagaṇanaṁ gacchatīti.

20. kv7.1:2.10

    Hañci kāyāyatanaṁ rūpakkhandhagaṇanaṁ gacchati, tena vata re vattabbe—

21. kv7.1:2.11

    “kāyāyatanaṁ rūpakkhandhena saṅgahitan”ti.

22. kv7.1:3.1

    Rūpāyatanaṁ …pe…

23. kv7.1:3.2

    saddāyatanaṁ …pe…

24. kv7.1:3.3

    gandhāyatanaṁ …pe…

25. kv7.1:3.4

    rasāyatanaṁ …pe…

26. kv7.1:3.5

    phoṭṭhabbāyatanaṁ katamakkhandhagaṇanaṁ gacchatīti?

27. kv7.1:3.6

    Rūpakkhandhagaṇanaṁ gacchatīti.

28. kv7.1:3.7

    Hañci phoṭṭhabbāyatanaṁ rūpakkhandhagaṇanaṁ gacchati, tena vata re vattabbe—

29. kv7.1:3.8

    “phoṭṭhabbāyatanaṁ rūpakkhandhena saṅgahitan”ti.

30. kv7.1:4.1

    Sukhā vedanā katamakkhandhagaṇanaṁ gacchatīti?

31. kv7.1:4.2

    Vedanākkhandhagaṇanaṁ gacchatīti.

32. kv7.1:4.3

    Hañci sukhā vedanā vedanākkhandhagaṇanaṁ gacchati, tena vata re vattabbe—

33. kv7.1:4.4

    “sukhā vedanā vedanākkhandhena saṅgahitā”ti.

34. kv7.1:4.5

    Dukkhā vedanā …pe… adukkhamasukhā vedanā katamakkhandhagaṇanaṁ gacchatīti?

35. kv7.1:4.6

    Vedanākkhandhagaṇanaṁ gacchatīti.

36. kv7.1:4.7

    Hañci adukkhamasukhā vedanā vedanākkhandhagaṇanaṁ gacchati, tena vata re vattabbe—

37. kv7.1:4.8

    “adukkhamasukhā vedanā vedanākkhandhena saṅgahitā”ti.

38. kv7.1:5.1

    Cakkhusamphassajā saññā katamakkhandhagaṇanaṁ gacchatīti?

39. kv7.1:5.2

    Saññākkhandhagaṇanaṁ gacchatīti.

40. kv7.1:5.3

    Hañci cakkhusamphassajā saññā saññākkhandhagaṇanaṁ gacchati, tena vata re vattabbe—

41. kv7.1:5.4

    “cakkhusamphassajā saññā saññākkhandhena saṅgahitā”ti.

42. kv7.1:5.5

    Sotasamphassajā saññā …pe…

43. kv7.1:5.6

    manosamphassajā saññā katamakkhandhagaṇanaṁ gacchatīti?

44. kv7.1:5.7

    Saññākkhandhagaṇanaṁ gacchatīti.

45. kv7.1:5.8

    Hañci manosamphassajā saññā saññākkhandhagaṇanaṁ gacchati, tena vata re vattabbe—

46. kv7.1:5.9

    “manosamphassajā saññā saññākkhandhena saṅgahitā”ti.

47. kv7.1:6.1

    Cakkhusamphassajā cetanā …pe…

48. kv7.1:6.2

    manosamphassajā cetanā katamakkhandhagaṇanaṁ gacchatīti?

49. kv7.1:6.3

    Saṅkhārakkhandhagaṇanaṁ gacchatīti.

50. kv7.1:6.4

    Hañci manosamphassajā cetanā saṅkhārakkhandhagaṇanaṁ gacchati, tena vata re vattabbe—

51. kv7.1:6.5

    “manosamphassajā cetanā saṅkhārakkhandhena saṅgahitā”ti.

52. kv7.1:7.1

    Cakkhuviññāṇaṁ …pe…

53. kv7.1:7.2

    manoviññāṇaṁ katamakkhandhagaṇanaṁ gacchatīti?

54. kv7.1:7.3

    Viññāṇakkhandhagaṇanaṁ gacchatīti.

55. kv7.1:7.4

    Hañci manoviññāṇaṁ viññāṇakkhandhagaṇanaṁ gacchati, tena vata re vattabbe—

56. kv7.1:7.5

    “manoviññāṇaṁ viññāṇakkhandhena saṅgahitan”ti.

57. kv7.1:8.1

    Yathā dāmena vā yottena vā dve balībaddā saṅgahitā, sikkāya piṇḍapāto saṅgahito, sā gaddulena saṅgahito;

58. kv7.1:8.2

    evameva te dhammā tehi dhammehi saṅgahitāti?

59. kv7.1:8.3

    Hañci dāmena vā yottena vā dve balībaddā saṅgahitā, sikkāya piṇḍapāto saṅgahito, sā gaddulena saṅgahito, tena vata re vattabbe—

60. kv7.1:8.4

    “atthi keci dhammā kehici dhammehi saṅgahitā”ti.

61. kv7.1:8.5

    Saṅgahitakathā niṭṭhitā.

SuttaCentral (suttacentral.net), from the bilara-data and sc-data repositories. Licence: Public Domain. Source.