← All works

Kathāvatthu — Mahāpaṇṇāsaka — Vīsatimavagga

Early Buddhist texts (SuttaCentral): Abhidhamma · abhidhamma · 64 sections

1. kv20.3:0.1

   Kathāvatthu

2. kv20.3:0.2

   Mahāpaṇṇāsaka

3. kv20.3:0.3

   Vīsatimavagga

4. kv20.3:0.4

   Nirayapālakathā

5. kv20.3:1.1

   Natthi nirayesu nirayapālāti?

6. kv20.3:1.2

   Āmantā.

7. kv20.3:1.3

   Natthi nirayesu kammakāraṇāti?

8. kv20.3:1.4

   Na hevaṁ vattabbe …pe…

9. kv20.3:1.5

   atthi nirayesu kammakāraṇāti?

10. kv20.3:1.6

    Āmantā.

11. kv20.3:1.7

    Atthi nirayesu nirayapālāti?

12. kv20.3:1.8

    Na hevaṁ vattabbe …pe….

13. kv20.3:2.1

    Atthi manussesu kammakāraṇā, atthi ca kāraṇikāti?

14. kv20.3:2.2

    Āmantā.

15. kv20.3:2.3

    Atthi nirayesu kammakāraṇā, atthi ca kāraṇikāti?

16. kv20.3:2.4

    Na hevaṁ vattabbe …pe…

17. kv20.3:2.5

    atthi nirayesu kammakāraṇā, natthi ca kāraṇikāti?

18. kv20.3:2.6

    Āmantā.

19. kv20.3:2.7

    Atthi manussesu kammakāraṇā, natthi ca kāraṇikāti?

20. kv20.3:2.8

    Na hevaṁ vattabbe …pe….

21. kv20.3:3.1

    Atthi nirayesu nirayapālāti?

22. kv20.3:3.2

    Āmantā.

23. kv20.3:3.3

    Nanu vuttaṁ bhagavatā—

24. kv20.3:4.1

    “Na vessabhū nopi ca pettirājā,

25. kv20.3:4.2

    Somo yamo vessavaṇo ca rājā;

26. kv20.3:4.3

    Sakāni kammāni hananti tattha,

27. kv20.3:4.4

    Ito paṇunnaṁ paralokapattan”ti.

28. kv20.3:5.1

    Attheva suttantoti?

29. kv20.3:5.2

    Āmantā.

30. kv20.3:5.3

    Tena hi natthi nirayesu nirayapālāti.

31. kv20.3:6.1

    Natthi nirayesu nirayapālāti?

32. kv20.3:6.2

    Āmantā.

33. kv20.3:6.3

    Nanu vuttaṁ bhagavatā—

34. kv20.3:6.4

    “tamenaṁ, bhikkhave, nirayapālā pañcavidhabandhanaṁ nāma kāraṇaṁ kārenti—

35. kv20.3:6.5

    tattaṁ ayokhīlaṁ hatthe gamenti, tattaṁ ayokhīlaṁ dutiye hatthe gamenti, tattaṁ ayokhīlaṁ pāde gamenti, tattaṁ ayokhīlaṁ dutiye pāde gamenti, tattaṁ ayokhīlaṁ majjheurasmiṁ gamenti;

36. kv20.3:6.6

    so tattha dukkhā tibbā kaṭukā vedanā vedeti;

37. kv20.3:6.7

    na ca tāva kālaṁ karoti yāva na taṁ pāpakammaṁ byantī hotī”ti.

38. kv20.3:6.8

    Attheva suttantoti?

39. kv20.3:6.9

    Āmantā.

40. kv20.3:6.10

    Tena hi atthi nirayesu nirayapālāti.

41. kv20.3:7.1

    Natthi nirayesu nirayapālāti?

42. kv20.3:7.2

    Āmantā.

43. kv20.3:7.3

    Nanu vuttaṁ bhagavatā—

44. kv20.3:7.4

    “tamenaṁ, bhikkhave, nirayapālā saṁvesetvā kuṭhārīhi tacchanti …pe…

45. kv20.3:7.5

    tamenaṁ, bhikkhave, nirayapālā uddhampādaṁ adhosiraṁ ṭhapetvā vāsīhi tacchanti …pe…

46. kv20.3:7.6

    tamenaṁ, bhikkhave, nirayapālā rathe yojetvā ādittāya pathaviyā sampajjalitāya sajotibhūtāya sārentipi paccāsārentipi …pe…

47. kv20.3:7.7

    tamenaṁ, bhikkhave, nirayapālā mahantaṁ aṅgārapabbataṁ ādittaṁ sampajjalitaṁ sajotibhūtaṁ āropentipi oropentipi …pe…

48. kv20.3:7.8

    tamenaṁ, bhikkhave, nirayapālā uddhampādaṁ adhosiraṁ gahetvā tattāya lohakumbhiyā pakkhipanti ādittāya sampajjalitāya sajotibhūtāya.

49. kv20.3:7.9

    So tattha pheṇuddehakaṁ paccati, so tattha pheṇuddehakaṁ paccamāno sakimpi uddhaṁ gacchati, sakimpi adho gacchati, sakimpi tiriyaṁ gacchati.

50. kv20.3:7.10

    So tattha dukkhā tibbā kaṭukā vedanā vedayati, na ca tāva kālaṁ karoti yāva na taṁ pāpakammaṁ byantīhoti.

51. kv20.3:7.11

    Tamenaṁ, bhikkhave, nirayapālā mahāniraye pakkhipanti.

52. kv20.3:7.12

    So kho pana, bhikkhave, mahānirayo—

53. kv20.3:8.1

    Catukkaṇṇo catudvāro,

54. kv20.3:8.2

    vibhatto bhāgaso mito;

55. kv20.3:8.3

    Ayopākārapariyanto,

56. kv20.3:8.4

    ayasā paṭikujjito.

57. kv20.3:9.1

    Tassa ayomayā bhūmi,

58. kv20.3:9.2

    Jalitā tejasā yutā;

59. kv20.3:9.3

    Samantā yojanasataṁ,

60. kv20.3:9.4

    Pharitvā tiṭṭhati sabbadā”ti.

61. kv20.3:10.1

    Attheva suttantoti?

62. kv20.3:10.2

    Āmantā.

63. kv20.3:10.3

    Tena hi atthi nirayesu nirayapālāti.

64. kv20.3:10.4

    Nirayapālakathā niṭṭhitā.

SuttaCentral (suttacentral.net), from the bilara-data and sc-data repositories. Licence: Public Domain. Source.