← Library

Kathāvatthu — Mahāpaṇṇāsaka — Sattarasamavagga

Early Buddhist texts (SuttaCentral): Abhidhamma · abhidhamma · 41 sections

1. kv17.4:0.1

   Kathāvatthu

2. kv17.4:0.2

   Mahāpaṇṇāsaka

3. kv17.4:0.3

   Sattarasamavagga

4. kv17.4:0.4

   Indriyabaddhakathā

5. kv17.4:1.1

   Indriyabaddhaññeva dukkhanti?

6. kv17.4:1.2

   Āmantā.

7. kv17.4:1.3

   Indriyabaddhaññeva aniccaṁ saṅkhataṁ paṭiccasamuppannaṁ khayadhammaṁ vayadhammaṁ virāgadhammaṁ nirodhadhammaṁ vipariṇāmadhammanti?

8. kv17.4:1.4

   Na hevaṁ vattabbe …pe…

9. kv17.4:1.5

   nanu anindriyabaddhaṁ aniccaṁ saṅkhataṁ paṭiccasamuppannaṁ khayadhammaṁ vayadhammaṁ virāgadhammaṁ nirodhadhammaṁ vipariṇāmadhammanti?

10. kv17.4:1.6

    Āmantā.

11. kv17.4:1.7

    Hañci anindriyabaddhaṁ aniccaṁ saṅkhataṁ paṭiccasamuppannaṁ khayadhammaṁ vayadhammaṁ virāgadhammaṁ nirodhadhammaṁ vipariṇāmadhammaṁ, no ca vata re vattabbe—

12. kv17.4:1.8

    “indriyabaddhaññeva dukkhan”ti.

13. kv17.4:2.1

    Anindriyabaddhaṁ aniccaṁ saṅkhataṁ paṭiccasamuppannaṁ …pe…

14. kv17.4:2.2

    vipariṇāmadhammaṁ, tañca na dukkhanti?

15. kv17.4:2.3

    Āmantā.

16. kv17.4:2.4

    Indriyabaddhaṁ aniccaṁ saṅkhataṁ …pe…

17. kv17.4:2.5

    vipariṇāmadhammaṁ, tañca na dukkhanti?

18. kv17.4:2.6

    Na hevaṁ vattabbe …pe….

19. kv17.4:3.1

    Indriyabaddhaṁ aniccaṁ saṅkhataṁ …pe…

20. kv17.4:3.2

    vipariṇāmadhammaṁ, tañca dukkhanti?

21. kv17.4:3.3

    Āmantā.

22. kv17.4:3.4

    Anindriyabaddhaṁ aniccaṁ saṅkhataṁ …pe…

23. kv17.4:3.5

    vipariṇāmadhammaṁ, tañca dukkhanti?

24. kv17.4:3.6

    Na hevaṁ vattabbe …pe….

25. kv17.4:4.1

    Indriyabaddhaññeva dukkhanti?

26. kv17.4:4.2

    Āmantā.

27. kv17.4:4.3

    Nanu yadaniccaṁ taṁ dukkhaṁ vuttaṁ bhagavatā—

28. kv17.4:4.4

    “anindriyabaddhaṁ aniccan”ti?

29. kv17.4:4.5

    Āmantā.

30. kv17.4:4.6

    Hañci yadaniccaṁ taṁ dukkhaṁ vuttaṁ bhagavatā—

31. kv17.4:4.7

    “anindriyabaddhaṁ aniccaṁ”, no ca vata re vattabbe—

32. kv17.4:4.8

    “indriyabaddhaññeva dukkhan”ti.

33. kv17.4:5.1

    Na vattabbaṁ—

34. kv17.4:5.2

    “indriyabaddhaññeva dukkhan”ti?

35. kv17.4:5.3

    Āmantā.

36. kv17.4:5.4

    Yathā indriyabaddhassa dukkhassa pariññāya bhagavati brahmacariyaṁ vussati, evamevaṁ anindriyabaddhassa dukkhassa pariññāya bhagavati brahmacariyaṁ vussatīti?

37. kv17.4:5.5

    Na hevaṁ vattabbe …pe…

38. kv17.4:5.6

    yathā indriyabaddhaṁ dukkhaṁ pariññātaṁ na puna uppajjati, evamevaṁ anindriyabaddhaṁ dukkhaṁ pariññātaṁ na puna uppajjatīti?

39. kv17.4:5.7

    Na hevaṁ vattabbe.

40. kv17.4:5.8

    Tena hi indriyabaddhaññeva dukkhanti.

41. kv17.4:5.9

    Indriyabaddhakathā niṭṭhitā.

SuttaCentral (suttacentral.net), from the bilara-data and sc-data repositories. Licence: Public Domain. Source.