← All works

Kathāvatthu — Mahāpaṇṇāsaka — Terasamavagga

Early Buddhist texts (SuttaCentral): Abhidhamma · abhidhamma · 29 sections

1. kv13.8:0.1

   Kathāvatthu

2. kv13.8:0.2

   Mahāpaṇṇāsaka

3. kv13.8:0.3

   Terasamavagga

4. kv13.8:0.4

   Asātarāgakathā

5. kv13.8:1.1

   Atthi asātarāgoti?

6. kv13.8:1.2

   Āmantā.

7. kv13.8:1.3

   Dukkhābhinandino sattā, atthi keci dukkhaṁ patthenti pihenti esanti gavesanti pariyesanti, dukkhaṁ ajjhosāya tiṭṭhantīti?

8. kv13.8:1.4

   Na hevaṁ vattabbe …pe…

9. kv13.8:1.5

   nanu sukhābhinandino sattā, atthi keci sukhaṁ patthenti pihenti esanti gavesanti pariyesanti, sukhaṁ ajjhosāya tiṭṭhantīti?

10. kv13.8:1.6

    Āmantā.

11. kv13.8:1.7

    Hañci sukhābhinandino sattā, atthi keci sukhaṁ patthenti pihenti esanti gavesanti pariyesanti, sukhaṁ ajjhosāya tiṭṭhanti, no ca vata re vattabbe—

12. kv13.8:1.8

    “atthi asātarāgo”ti.

13. kv13.8:2.1

    Atthi asātarāgoti?

14. kv13.8:2.2

    Āmantā.

15. kv13.8:2.3

    Dukkhāya vedanāya rāgānusayo anuseti, sukhāya vedanāya paṭighānusayo anusetīti?

16. kv13.8:2.4

    Na hevaṁ vattabbe …pe…

17. kv13.8:2.5

    nanu sukhāya vedanāya rāgānusayo anuseti, dukkhāya vedanāya paṭighānusayo anusetīti?

18. kv13.8:2.6

    Āmantā.

19. kv13.8:2.7

    Hañci sukhāya vedanāya rāgānusayo anuseti, dukkhāya vedanāya paṭighānusayo anuseti, no ca vata re vattabbe—

20. kv13.8:2.8

    “atthi asātarāgo”ti.

21. kv13.8:3.1

    Na vattabbaṁ—

22. kv13.8:3.2

    “atthi asātarāgo”ti?

23. kv13.8:3.3

    Āmantā.

24. kv13.8:3.4

    Nanu vuttaṁ bhagavatā—

25. kv13.8:3.5

    “so evaṁ anurodhavirodhaṁ samāpanno yaṁ kiñci vedanaṁ vedayati sukhaṁ vā dukkhaṁ vā adukkhamasukhaṁ vā, so taṁ vedanaṁ abhinandati abhivadati ajjhosāya tiṭṭhatī”ti.

26. kv13.8:3.6

    Attheva suttantoti?

27. kv13.8:3.7

    Āmantā.

28. kv13.8:3.8

    Tena hi atthi asātarāgoti.

29. kv13.8:3.9

    Asātarāgakathā niṭṭhitā.

SuttaCentral (suttacentral.net), from the bilara-data and sc-data repositories. Licence: Public Domain. Source.