← All works

Kathāvatthu — Mahāpaṇṇāsaka — Paṭhamavagga

Early Buddhist texts (SuttaCentral): Abhidhamma · abhidhamma · 146 sections

1. kv1.5:17.6

   “anāgāmimaggena oḷārikaṁ kāmarāgaṁ oḷārikaṁ byāpādaṁ jahatī”ti.

2. kv1.5:18.1

   Puthujjano kāmesu vītarāgo saha dhammābhisamayā anāgāmiphale saṇṭhātīti?

3. kv1.5:18.2

   Āmantā.

4. kv1.5:18.3

   Ye keci dhammaṁ abhisamenti, sabbe te saha dhammābhisamayā anāgāmiphale saṇṭhahantīti?

5. kv1.5:18.4

   Na hevaṁ vattabbe …pe….

6. kv1.5:19.1

   Na vattabbaṁ—

7. kv1.5:19.2

   “jahati puthujjano kāmarāgabyāpādan”ti?

8. kv1.5:19.3

   Āmantā.

9. kv1.5:19.4

   Nanu vuttaṁ bhagavatā—

10. kv1.5:20.1

    “Ahesuṁ te atītaṁse,

11. kv1.5:20.2

    Cha satthāro yasassino;

12. kv1.5:20.3

    Nirāmagandhā karuṇedhimuttā,

13. kv1.5:20.4

    Kāmasaṁyojanātigā.

14. kv1.5:21.1

    Kāmarāgaṁ virājetvā,

15. kv1.5:21.2

    brahmalokūpagā ahu;

16. kv1.5:21.3

    Ahesuṁ sāvakā tesaṁ,

17. kv1.5:21.4

    anekāni satānipi.

18. kv1.5:22.1

    Nirāmagandhā karuṇedhimuttā,

19. kv1.5:22.2

    Kāmasaṁyojanātigā;

20. kv1.5:22.3

    Kāmarāgaṁ virājetvā,

21. kv1.5:22.4

    Brahmalokūpagā ahū”ti.

22. kv1.5:23.1

    Attheva suttantoti?

23. kv1.5:23.2

    Āmantā.

24. kv1.5:23.3

    Tena hi jahati puthujjano kāmarāgabyāpādanti.

25. kv1.5:24.1

    Jahati puthujjano kāmarāgabyāpādanti?

26. kv1.5:24.2

    Āmantā.

27. kv1.5:24.3

    Nanu vuttaṁ bhagavatā—

28. kv1.5:24.4

    “so hi nāma, bhikkhave, sunetto satthā evaṁ dīghāyuko samāno evaṁ ciraṭṭhitiko aparimutto ahosi jātiyā jarāya maraṇena sokehi paridevehi dukkhehi domanassehi upāyāsehi ‘aparimutto dukkhasmā’ti vadāmi.

29. kv1.5:24.5

    Taṁ kissa hetu?

30. kv1.5:24.6

    Catunnaṁ dhammānaṁ ananubodhā appaṭivedhā.

31. kv1.5:24.7

    Katamesaṁ catunnaṁ?

32. kv1.5:24.8

    Ariyassa sīlassa ananubodhā appaṭivedhā, ariyassa samādhissa, ariyāya paññāya, ariyāya vimuttiyā ananubodhā appaṭivedhā.

33. kv1.5:24.9

    Tayidaṁ, bhikkhave, ariyaṁ sīlaṁ anubuddhaṁ paṭividdhaṁ, ariyo samādhi anubuddho paṭividdho, ariyā paññā anubuddhā paṭividdhā, ariyā vimutti anubuddhā paṭividdhā, ucchinnā bhavataṇhā, khīṇā bhavanetti, natthi dāni punabbhavo”ti.

34. kv1.5:25.1

    “Sīlaṁ samādhi paññā ca,

35. kv1.5:25.2

    vimutti ca anuttarā;

36. kv1.5:25.3

    Anubuddhā ime dhammā,

37. kv1.5:25.4

    gotamena yasassinā.

38. kv1.5:26.1

    Iti buddho abhiññāya,

39. kv1.5:26.2

    dhammamakkhāsi bhikkhunaṁ;

40. kv1.5:26.3

    Dukkhassantakaro satthā,

41. kv1.5:26.4

    cakkhumā parinibbuto”ti.

42. kv1.5:27.1

    Attheva suttantoti?

43. kv1.5:27.2

    Āmantā.

44. kv1.5:27.3

    Tena hi na vattabbaṁ—

45. kv1.5:27.4

    “jahati puthujjano kāmarāgabyāpādan”ti.

46. kv1.5:27.5

    Jahatikathā niṭṭhitā.

← Previous — showing 101–146 of 146

SuttaCentral (suttacentral.net), from the bilara-data and sc-data repositories. Licence: Public Domain. Source.