← All works

Kathāvatthu — Mahāpaṇṇāsaka — Paṭhamavagga

Early Buddhist texts (SuttaCentral): Abhidhamma · abhidhamma · 219 sections

1. kv1.3:17.5

   Asaññasattesu devesu natthi brahmacariyavāsoti?

2. kv1.3:17.6

   Āmantā.

3. kv1.3:17.7

   Saññasattesu devesu natthi brahmacariyavāsoti?

4. kv1.3:17.8

   Na hevaṁ vattabbe.

5. kv1.3:18.1

   Saññasattesu devesu atthi brahmacariyavāsoti?

6. kv1.3:18.2

   Āmantā.

7. kv1.3:18.3

   Asaññasattesu devesu atthi brahmacariyavāsoti?

8. kv1.3:18.4

   Na hevaṁ vattabbe.

9. kv1.3:19.1

   Atthi manussesu brahmacariyavāsoti?

10. kv1.3:19.2

    Atthi yattha atthi, atthi yattha natthīti.

11. kv1.3:19.3

    Paccantimesu janapadesu atthi yattha atthi, atthi yattha natthi brahmacariyavāso milakkhesu aviññātāresu yattha natthi gati bhikkhūnaṁ bhikkhunīnaṁ upāsakānaṁ upāsikānaṁ, majjhimesu janapadesu atthi yattha atthi, atthi yattha natthi brahmacariyavāsoti?

12. kv1.3:19.4

    Na hevaṁ vattabbe.

13. kv1.3:20.1

    Manussesu atthi yattha atthi, atthi yattha natthi brahmacariyavāsoti?

14. kv1.3:20.2

    Āmantā.

15. kv1.3:20.3

    Kattha atthi, kattha natthīti?

16. kv1.3:20.4

    Paccantimesu janapadesu natthi brahmacariyavāso milakkhesu aviññātāresu yattha natthi gati bhikkhūnaṁ bhikkhunīnaṁ upāsakānaṁ upāsikānaṁ, majjhimesu janapadesu atthi brahmacariyavāsoti.

17. kv1.3:20.5

    Paccantimesu janapadesu natthi brahmacariyavāso milakkhesu aviññātāresu yattha natthi gati bhikkhūnaṁ bhikkhunīnaṁ upāsakānaṁ upāsikānanti?

18. kv1.3:20.6

    Āmantā.

19. kv1.3:20.7

    Majjhimesu janapadesu natthi brahmacariyavāsoti?

20. kv1.3:20.8

    Na hevaṁ vattabbe.

21. kv1.3:21.1

    Majjhimesu janapadesu atthi brahmacariyavāsoti?

22. kv1.3:21.2

    Āmantā.

23. kv1.3:21.3

    Paccantimesu janapadesu atthi brahmacariyavāso milakkhesu aviññātāresu yattha natthi gati bhikkhūnaṁ bhikkhunīnaṁ upāsakānaṁ upāsikānanti?

24. kv1.3:21.4

    Na hevaṁ vattabbe.

25. kv1.3:22.1

    Atthi devesu brahmacariyavāsoti?

26. kv1.3:22.2

    Āmantā.

27. kv1.3:22.3

    Nanu vuttaṁ bhagavatā—

28. kv1.3:22.4

    “tīhi, bhikkhave, ṭhānehi jambudīpakā manussā uttarakuruke ca manusse adhigaṇhanti deve ca tāvatiṁse.

29. kv1.3:22.5

    Katamehi tīhi?

30. kv1.3:22.6

    Sūrā, satimanto, idha brahmacariyavāso”ti.

31. kv1.3:22.7

    Attheva suttantoti?

32. kv1.3:22.8

    Āmantā.

33. kv1.3:22.9

    Tena hi natthi devesu brahmacariyavāsoti.

34. kv1.3:23.1

    Sāvatthiyaṁ vuttaṁ bhagavatā—

35. kv1.3:23.2

    “idha brahmacariyavāso”ti?

36. kv1.3:23.3

    Āmantā.

37. kv1.3:23.4

    Sāvatthiyaṁyeva brahmacariyavāso, natthi aññatra brahmacariyavāsoti?

38. kv1.3:23.5

    Na hevaṁ vattabbe.

39. kv1.3:24.1

    Anāgāmissa puggalassa pañcorambhāgiyāni saṁyojanāni pahīnāni, pañcuddhambhāgiyāni saṁyojanāni appahīnāni, ito cutassa tattha upapannassa kuhiṁ phaluppattīti?

40. kv1.3:24.2

    Tattheva.

41. kv1.3:24.3

    Hañci anāgāmissa puggalassa pañcorambhāgiyāni saṁyojanāni pahīnāni, pañcuddhambhāgiyāni saṁyojanāni appahīnāni, ito cutassa tattha upapannassa tahiṁ phaluppatti;

42. kv1.3:24.4

    no ca vata re vattabbe—

43. kv1.3:24.5

    “natthi devesu brahmacariyavāso”ti.

44. kv1.3:25.1

    Anāgāmissa puggalassa pañcorambhāgiyāni saṁyojanāni pahīnāni, pañcuddhambhāgiyāni saṁyojanāni appahīnāni, ito cutassa tattha upapannassa kuhiṁ bhāroharaṇaṁ, kuhiṁ dukkhapariññātaṁ, kuhiṁ kilesappahānaṁ, kuhiṁ nirodhasacchikiriyā, kuhiṁ akuppapaṭivedhoti?

45. kv1.3:25.2

    Tattheva.

46. kv1.3:25.3

    Hañci anāgāmissa puggalassa pañcorambhāgiyāni saṁyojanāni pahīnāni, pañcuddhambhāgiyāni saṁyojanāni appahīnāni, ito cutassa tattha upapannassa tahiṁ akuppapaṭivedho;

47. kv1.3:25.4

    no ca vata re vattabbe—

48. kv1.3:25.5

    “natthi devesu brahmacariyavāso”ti.

49. kv1.3:26.1

    Anāgāmissa puggalassa pañcorambhāgiyāni saṁyojanāni pahīnāni, pañcuddhambhāgiyāni saṁyojanāni appahīnāni, ito cutassa tattha upapannassa tahiṁ phaluppatti, tahiṁ bhāroharaṇaṁ, tahiṁ dukkhapariññātaṁ, tahiṁ kilesappahānaṁ, tahiṁ nirodhasacchikiriyā, tahiṁ akuppapaṭivedho;

50. kv1.3:26.2

    kenaṭṭhena vadesi—

51. kv1.3:26.3

    “natthi devesu brahmacariyavāso”ti?

52. kv1.3:26.4

    Handa hi anāgāmī puggalo idha bhāvitena maggena tattha phalaṁ sacchikarotīti.

53. kv1.3:27.0

    Saṁsandanabrahmacariyakathā

54. kv1.3:27.1

    Anāgāmī puggalo idha bhāvitena maggena tattha phalaṁ sacchikarotīti?

55. kv1.3:27.2

    Āmantā.

56. kv1.3:27.3

    Sotāpanno puggalo tattha bhāvitena maggena idha phalaṁ sacchikarotīti?

57. kv1.3:27.4

    Na hevaṁ vattabbe.

58. kv1.3:28.1

    Anāgāmī puggalo idha bhāvitena maggena tattha phalaṁ sacchikarotīti?

59. kv1.3:28.2

    Āmantā.

60. kv1.3:28.3

    Sakadāgāmī puggalo idha parinibbāyipuggalo tattha bhāvitena maggena idha phalaṁ sacchikarotīti?

61. kv1.3:28.4

    Na hevaṁ vattabbe.

62. kv1.3:29.1

    Sotāpanno puggalo idha bhāvitena maggena idha phalaṁ sacchikarotīti?

63. kv1.3:29.2

    Āmantā.

64. kv1.3:29.3

    Anāgāmī puggalo tattha bhāvitena maggena tattha phalaṁ sacchikarotīti?

65. kv1.3:29.4

    Na hevaṁ vattabbe.

66. kv1.3:30.1

    Sakadāgāmī puggalo idha parinibbāyipuggalo idha bhāvitena maggena idha phalaṁ sacchikarotīti?

67. kv1.3:30.2

    Āmantā.

68. kv1.3:30.3

    Anāgāmī puggalo tattha bhāvitena maggena tattha phalaṁ sacchikarotīti?

69. kv1.3:30.4

    Na hevaṁ vattabbe …pe….

70. kv1.3:31.1

    Idha vihāya niṭṭhassa puggalassa maggo ca bhāvīyati, na ca kilesā pahīyantīti?

71. kv1.3:31.2

    Āmantā.

72. kv1.3:31.3

    Sotāpattiphalasacchikiriyāya paṭipannassa puggalassa maggo ca bhāvīyati, na ca kilesā pahīyantīti?

73. kv1.3:31.4

    Na hevaṁ vattabbe …pe….

74. kv1.3:32.1

    Idha vihāya niṭṭhassa puggalassa maggo ca bhāvīyati, na ca kilesā pahīyantīti?

75. kv1.3:32.2

    Āmantā.

76. kv1.3:32.3

    Sakadāgāmiphalasacchikiriyāya paṭipannassa puggalassa …pe…

77. kv1.3:32.4

    arahattasacchikiriyāya paṭipannassa puggalassa maggo ca bhāvīyati, na ca kilesā pahīyantīti?

78. kv1.3:32.5

    Na hevaṁ vattabbe …pe….

79. kv1.3:33.1

    Sotāpattiphalasacchikiriyāya paṭipannassa puggalassa apubbaṁ acarimaṁ maggo ca bhāvīyati, kilesā ca pahīyantīti?

80. kv1.3:33.2

    Āmantā.

81. kv1.3:33.3

    Idha vihāya niṭṭhassa puggalassa apubbaṁ acarimaṁ maggo ca bhāvīyati, kilesā ca pahīyantīti?

82. kv1.3:33.4

    Na hevaṁ vattabbe.

83. kv1.3:34.1

    Sakadāgāmiphalasacchikiriyāya paṭipannassa puggalassa …pe…

84. kv1.3:34.2

    arahattasacchikiriyāya paṭipannassa puggalassa apubbaṁ acarimaṁ maggo ca bhāvīyati, kilesā ca pahīyantīti?

85. kv1.3:34.3

    Āmantā.

86. kv1.3:34.4

    Idha vihāya niṭṭhassa puggalassa apubbaṁ acarimaṁ maggo ca bhāvīyati, kilesā ca pahīyantīti?

87. kv1.3:34.5

    Na hevaṁ vattabbe.

88. kv1.3:35.1

    Anāgāmī puggalo katakaraṇīyo bhāvitabhāvano tattha upapajjatīti?

89. kv1.3:35.2

    Āmantā.

90. kv1.3:35.3

    Arahā upapajjatīti?

91. kv1.3:35.4

    Na hevaṁ vattabbe.

92. kv1.3:36.1

    Arahā upapajjatīti?

93. kv1.3:36.2

    Āmantā.

94. kv1.3:36.3

    Atthi arahato punabbhavoti?

95. kv1.3:36.4

    Na hevaṁ vattabbe.

96. kv1.3:37.1

    Atthi arahato punabbhavoti?

97. kv1.3:37.2

    Āmantā.

98. kv1.3:37.3

    Arahā bhavena bhavaṁ gacchati, gatiyā gatiṁ gacchati, saṁsārena saṁsāraṁ gacchati, upapattiyā upapattiṁ gacchatīti?

99. kv1.3:37.4

    Na hevaṁ vattabbe.

100. kv1.3:38.1

     Anāgāmī puggalo katakaraṇīyo bhāvitabhāvano anohaṭabhāro tattha upapajjatīti?

← Previous · Next → — showing 101–200 of 219

SuttaCentral (suttacentral.net), from the bilara-data and sc-data repositories. Licence: Public Domain. Source.