← Library

Dhātukathā — 2 Niddesa — 2.1. Paṭhamanaya saṅgahāsaṅgahapadaniddesa

Early Buddhist texts (SuttaCentral): Abhidhamma · abhidhamma · 576 sections

1. dt2.1:30.2

   Katihi asaṅgahitā?

2. dt2.1:30.3

   Ekena khandhena dasahāyatanehi soḷasahi dhātūhi asaṅgahitā.

3. dt2.1:31.1

   (Dukamūlakaṁ.)

4. dt2.1:32.1

   Dvādasāyatanāni katihi khandhehi katihāyatanehi katihi dhātūhi saṅgahitā?

5. dt2.1:32.2

   Dvādasāyatanāni asaṅkhataṁ khandhato ṭhapetvā pañcahi khandhehi dvādasahāyatanehi aṭṭhārasahi dhātūhi saṅgahitā.

6. dt2.1:32.3

   Katihi asaṅgahitā?

7. dt2.1:32.4

   Na kehici khandhehi na kehici āyatanehi na kāhici dhātūhi asaṅgahitā.

8. dt2.1:33.1

   (Dvādasakaṁ.)

9. dt2.1:34.0

   2.1.3. Dhātu

10. dt2.1:34.1

    Cakkhudhātu katihi khandhehi katihāyatanehi katihi dhātūhi saṅgahitā?

11. dt2.1:34.2

    Cakkhudhātu ekena khandhena ekenāyatanena ekāya dhātuyā saṅgahitā.

12. dt2.1:34.3

    Katihi asaṅgahitā?

13. dt2.1:34.4

    Catūhi khandhehi ekādasahāyatanehi sattarasahi dhātūhi asaṅgahitā.

14. dt2.1:35.1

    Sotadhātu … ghānadhātu … jivhādhātu … kāyadhātu … rūpadhātu … saddadhātu … gandhadhātu … rasadhātu … phoṭṭhabbadhātu … cakkhuviññāṇadhātu … sotaviññāṇadhātu … ghānaviññāṇadhātu … jivhāviññāṇadhātu … kāyaviññāṇadhātu … manodhātu … manoviññāṇadhātu ekena khandhena ekenāyatanena ekāya dhātuyā saṅgahitā.

15. dt2.1:35.2

    Katihi asaṅgahitā?

16. dt2.1:35.3

    Catūhi khandhehi ekādasahāyatanehi sattarasahi dhātūhi asaṅgahitā.

17. dt2.1:36.1

    Dhammadhātu asaṅkhataṁ khandhato ṭhapetvā catūhi khandhehi ekenāyatanena ekāya dhātuyā saṅgahitā.

18. dt2.1:36.2

    Katihi asaṅgahitā?

19. dt2.1:36.3

    Ekena khandhena ekādasahāyatanehi sattarasahi dhātūhi asaṅgahitā.

20. dt2.1:37.1

    (Ekamūlakaṁ.)

21. dt2.1:38.1

    Cakkhudhātu ca sotadhātu ca ekena khandhena dvīhāyatanehi dvīhi dhātūhi saṅgahitā.

22. dt2.1:38.2

    Katihi asaṅgahitā?

23. dt2.1:38.3

    Catūhi khandhehi dasahāyatanehi soḷasahi dhātūhi asaṅgahitā.

24. dt2.1:39.1

    Cakkhudhātu ca ghānadhātu ca … cakkhudhātu ca jivhādhātu ca … cakkhudhātu ca kāyadhātu ca … cakkhudhātu ca rūpadhātu ca … cakkhudhātu ca saddadhātu ca … cakkhudhātu ca gandhadhātu ca … cakkhudhātu ca rasadhātu ca … cakkhudhātu ca phoṭṭhabbadhātu ca ekena khandhena dvīhāyatanehi dvīhi dhātūhi saṅgahitā.

25. dt2.1:39.2

    Katihi asaṅgahitā?

26. dt2.1:39.3

    Catūhi khandhehi dasahāyatanehi soḷasahi dhātūhi asaṅgahitā.

27. dt2.1:40.1

    Cakkhudhātu ca cakkhuviññāṇadhātu ca dvīhi khandhehi dvīhāyatanehi dvīhi dhātūhi saṅgahitā.

28. dt2.1:40.2

    Katihi asaṅgahitā?

29. dt2.1:40.3

    Tīhi khandhehi dasahāyatanehi soḷasahi dhātūhi asaṅgahitā.

30. dt2.1:41.1

    Cakkhudhātu ca sotaviññāṇadhātu ca … cakkhudhātu ca ghānaviññāṇadhātu ca … cakkhudhātu ca jivhāviññāṇadhātu ca … cakkhudhātu ca kāyaviññāṇadhātu ca … cakkhudhātu ca manodhātu ca … cakkhudhātu ca manoviññāṇadhātu ca dvīhi khandhehi dvīhāyatanehi dvīhi dhātūhi saṅgahitā.

31. dt2.1:41.2

    Katihi asaṅgahitā?

32. dt2.1:41.3

    Tīhi khandhehi dasahāyatanehi soḷasahi dhātūhi asaṅgahitā.

33. dt2.1:42.1

    Cakkhudhātu ca dhammadhātu ca asaṅkhataṁ khandhato ṭhapetvā catūhi khandhehi dvīhāyatanehi dvīhi dhātūhi saṅgahitā.

34. dt2.1:42.2

    Katihi asaṅgahitā?

35. dt2.1:42.3

    Ekena khandhena dasahāyatanehi soḷasahi dhātūhi asaṅgahitā.

36. dt2.1:43.1

    (Dukamūlakaṁ.)

37. dt2.1:44.1

    Aṭṭhārasa dhātuyo katihi khandhehi katihāyatanehi katihi dhātūhi saṅgahitā?

38. dt2.1:44.2

    Aṭṭhārasa dhātuyo asaṅkhataṁ khandhato ṭhapetvā pañcahi khandhehi dvādasahāyatanehi aṭṭhārasahi dhātūhi saṅgahitā.

39. dt2.1:44.3

    Katihi asaṅgahitā?

40. dt2.1:44.4

    Na kehici khandhehi na kehici āyatanehi na kāhici dhātūhi asaṅgahitā.

41. dt2.1:45.1

    (Aṭṭhārasakaṁ.)

42. dt2.1:46.0

    2.1.4. Sacca

43. dt2.1:46.1

    Dukkhasaccaṁ katihi khandhehi katihāyatanehi katihi dhātūhi saṅgahitaṁ?

44. dt2.1:46.2

    Dukkhasaccaṁ pañcahi khandhehi dvādasahāyatanehi aṭṭhārasahi dhātūhi saṅgahitaṁ.

45. dt2.1:46.3

    Katihi asaṅgahitaṁ?

46. dt2.1:46.4

    Na kehici khandhehi na kehici āyatanehi na kāhici dhātūhi asaṅgahitaṁ.

47. dt2.1:47.1

    Samudayasaccaṁ … maggasaccaṁ ekena khandhena ekenāyatanena ekāya dhātuyā saṅgahitaṁ.

48. dt2.1:47.2

    Katihi asaṅgahitaṁ?

49. dt2.1:47.3

    Catūhi khandhehi ekādasahāyatanehi sattarasahi dhātūhi asaṅgahitaṁ.

50. dt2.1:48.1

    Nirodhasaccaṁ na kehici khandhehi ekenāyatanena ekāya dhātuyā saṅgahitaṁ.

51. dt2.1:48.2

    Katihi asaṅgahitaṁ?

52. dt2.1:48.3

    Pañcahi khandhehi ekādasahāyatanehi sattarasahi dhātūhi asaṅgahitaṁ.

53. dt2.1:49.1

    (Ekamūlakaṁ.)

54. dt2.1:50.1

    Dukkhasaccañca samudayasaccañca pañcahi khandhehi dvādasahāyatanehi aṭṭhārasahi dhātūhi saṅgahitā.

55. dt2.1:50.2

    Katihi asaṅgahitā?

56. dt2.1:50.3

    Na kehici khandhehi na kehici āyatanehi na kāhici dhātūhi asaṅgahitā.

57. dt2.1:51.1

    Dukkhasaccañca maggasaccañca pañcahi khandhehi dvādasahāyatanehi aṭṭhārasahi dhātūhi saṅgahitā.

58. dt2.1:51.2

    Katihi asaṅgahitā?

59. dt2.1:51.3

    Na kehici khandhehi na kehici āyatanehi na kāhici dhātūhi asaṅgahitā.

60. dt2.1:52.1

    Dukkhasaccañca nirodhasaccañca asaṅkhataṁ khandhato ṭhapetvā pañcahi khandhehi dvādasahāyatanehi aṭṭhārasahi dhātūhi saṅgahitā.

61. dt2.1:52.2

    Katihi asaṅgahitā?

62. dt2.1:52.3

    Na kehici khandhehi na kehici āyatanehi na kāhici dhātūhi asaṅgahitā.

63. dt2.1:53.1

    (Dukamūlakaṁ.)

64. dt2.1:54.1

    Dukkhasaccañca samudayasaccañca maggasaccañca pañcahi khandhehi dvādasahāyatanehi aṭṭhārasahi dhātūhi saṅgahitā.

65. dt2.1:54.2

    Katihi asaṅgahitā?

66. dt2.1:54.3

    Na kehici khandhehi na kehici āyatanehi na kāhici dhātūhi asaṅgahitā.

67. dt2.1:55.1

    Dukkhasaccañca samudayasaccañca nirodhasaccañca asaṅkhataṁ khandhato ṭhapetvā pañcahi khandhehi dvādasahāyatanehi aṭṭhārasahi dhātūhi saṅgahitā.

68. dt2.1:55.2

    Katihi asaṅgahitā?

69. dt2.1:55.3

    Na kehici khandhehi na kehici āyatanehi na kāhici dhātūhi asaṅgahitā.

70. dt2.1:56.1

    (Tikamūlakaṁ.)

71. dt2.1:57.1

    Dukkhasaccañca samudayasaccañca maggasaccañca nirodhasaccañca asaṅkhataṁ khandhato ṭhapetvā pañcahi khandhehi dvādasahāyatanehi aṭṭhārasahi dhātūhi saṅgahitā.

72. dt2.1:57.2

    Katihi asaṅgahitā?

73. dt2.1:57.3

    Na kehici khandhehi na kehici āyatanehi na kāhici dhātūhi asaṅgahitā.

74. dt2.1:58.1

    Cattāri saccāni katihi khandhehi katihāyatanehi katihi dhātūhi saṅgahitāni?

75. dt2.1:58.2

    Cattāri saccāni asaṅkhataṁ khandhato ṭhapetvā pañcahi khandhehi dvādasahāyatanehi aṭṭhārasahi dhātūhi saṅgahitāni.

76. dt2.1:58.3

    Katihi asaṅgahitāni?

77. dt2.1:58.4

    Na kehici khandhehi na kehici āyatanehi na kāhici dhātūhi asaṅgahitāni.

78. dt2.1:59.1

    (Catukkaṁ.)

79. dt2.1:60.0

    2.1.5. Indriya

80. dt2.1:60.1

    Cakkhundriyaṁ katihi khandhehi katihāyatanehi katihi dhātūhi saṅgahitaṁ?

81. dt2.1:60.2

    Cakkhundriyaṁ ekena khandhena ekenāyatanena ekāya dhātuyā saṅgahitaṁ.

82. dt2.1:60.3

    Katihi asaṅgahitaṁ?

83. dt2.1:60.4

    Catūhi khandhehi ekādasahāyatanehi sattarasahi dhātūhi asaṅgahitaṁ.

84. dt2.1:61.1

    Sotindriyaṁ … ghānindriyaṁ … jivhindriyaṁ … kāyindriyaṁ … itthindriyaṁ … purisindriyaṁ ekena khandhena ekenāyatanena ekāya dhātuyā saṅgahitaṁ.

85. dt2.1:61.2

    Katihi asaṅgahitaṁ?

86. dt2.1:61.3

    Catūhi khandhehi ekādasahāyatanehi sattarasahi dhātūhi asaṅgahitaṁ.

87. dt2.1:62.1

    Manindriyaṁ ekena khandhena ekenāyatanena sattahi dhātūhi saṅgahitaṁ.

88. dt2.1:62.2

    Katihi asaṅgahitaṁ?

89. dt2.1:62.3

    Catūhi khandhehi ekādasahāyatanehi ekādasahi dhātūhi asaṅgahitaṁ.

90. dt2.1:63.1

    Jīvitindriyaṁ dvīhi khandhehi ekenāyatanena ekāya dhātuyā saṅgahitaṁ.

91. dt2.1:63.2

    Katihi asaṅgahitaṁ?

92. dt2.1:63.3

    Tīhi khandhehi ekādasahāyatanehi sattarasahi dhātūhi asaṅgahitaṁ.

93. dt2.1:64.1

    Sukhindriyaṁ … dukkhindriyaṁ … somanassindriyaṁ … domanassindriyaṁ … upekkhindriyaṁ … saddhindriyaṁ … vīriyindriyaṁ … satindriyaṁ … samādhindriyaṁ … paññindriyaṁ … anaññātaññassāmītindriyaṁ … aññindriyaṁ … aññātāvindriyaṁ ekena khandhena ekenāyatanena ekāya dhātuyā saṅgahitaṁ.

94. dt2.1:64.2

    Katihi asaṅgahitaṁ?

95. dt2.1:64.3

    Catūhi khandhehi ekādasahāyatanehi sattarasahi dhātūhi asaṅgahitaṁ.

96. dt2.1:65.1

    (Ekamūlakaṁ.)

97. dt2.1:66.1

    Cakkhundriyañca sotindriyañca ekena khandhena dvīhāyatanehi dvīhi dhātūhi saṅgahitā.

98. dt2.1:66.2

    Katihi asaṅgahitā?

99. dt2.1:66.3

    Catūhi khandhehi dasahāyatanehi soḷasahi dhātūhi asaṅgahitā.

100. dt2.1:67.1

     Cakkhundriyañca ghānindriyañca … cakkhundriyañca jivhindriyañca … cakkhundriyañca kāyindriyañca … cakkhundriyañca itthindriyañca … cakkhundriyañca purisindriyañca ekena khandhena dvīhāyatanehi dvīhi dhātūhi saṅgahitā.

← Previous · Next → — showing 101–200 of 576

SuttaCentral (suttacentral.net), from the bilara-data and sc-data repositories. Licence: Public Domain. Source.