← Library

Dhammasaṅgaṇī — 2 Niddesa — 2.3 Nikkhepakaṇḍa

Early Buddhist texts (SuttaCentral): Abhidhamma · abhidhamma · 330 sections

1. ds2.3.3:28.2

   Aparantaṁ ārabbha yā uppajjati diṭṭhi diṭṭhigataṁ …pe… vipariyāsaggāho—

2. ds2.3.3:28.3

   ayaṁ vuccati aparantānudiṭṭhi.

3. ds2.3.3:29.0

   2.3.3.15. Ahirikaduka

4. ds2.3.3:29.1

   Tattha katamaṁ ahirikaṁ?

5. ds2.3.3:29.2

   Yaṁ na hirīyati hiriyitabbena, na hirīyati pāpakānaṁ akusalānaṁ dhammānaṁ samāpattiyā—

6. ds2.3.3:29.3

   idaṁ vuccati ahirikaṁ.

7. ds2.3.3:30.1

   Tattha katamaṁ anottappaṁ?

8. ds2.3.3:30.2

   Yaṁ na ottappati ottappitabbena, na ottappati pāpakānaṁ akusalānaṁ dhammānaṁ samāpattiyā—

9. ds2.3.3:30.3

   idaṁ vuccati anottappaṁ.

10. ds2.3.3:31.0

    2.3.3.16. Hiriduka

11. ds2.3.3:31.1

    Tattha katamā hirī?

12. ds2.3.3:31.2

    Yaṁ hirīyati hiriyitabbena, hirīyati pāpakānaṁ akusalānaṁ dhammānaṁ samāpattiyā—

13. ds2.3.3:31.3

    ayaṁ vuccati hirī.

14. ds2.3.3:32.1

    Tattha katamaṁ ottappaṁ?

15. ds2.3.3:32.2

    Yaṁ ottappati ottappitabbena, ottappati pāpakānaṁ akusalānaṁ dhammānaṁ samāpattiyā—

16. ds2.3.3:32.3

    idaṁ vuccati ottappaṁ.

17. ds2.3.3:33.0

    2.3.3.17. Dovacassatāduka

18. ds2.3.3:33.1

    Tattha katamā dovacassatā?

19. ds2.3.3:33.2

    Sahadhammike vuccamāne dovacassāyaṁ dovacassiyaṁ dovacassatā vippaṭikūlaggāhitā vipaccanīkasātatā anādariyaṁ anādaratā agāravatā appaṭissavatā—

20. ds2.3.3:33.3

    ayaṁ vuccati dovacassatā.

21. ds2.3.3:34.1

    Tattha katamā pāpamittatā?

22. ds2.3.3:34.2

    Ye te puggalā assaddhā dussīlā appassutā maccharino duppaññā, yā tesaṁ sevanā nisevanā saṁsevanā bhajanā sambhajanā bhatti sambhatti taṁsampavaṅkatā—

23. ds2.3.3:34.3

    ayaṁ vuccati pāpamittatā.

24. ds2.3.3:35.0

    2.3.3.18. Sovacassatāduka

25. ds2.3.3:35.1

    Tattha katamā sovacassatā?

26. ds2.3.3:35.2

    Sahadhammike vuccamāne sovacassāyaṁ sovacassiyaṁ sovacassatā appaṭikūlaggāhitā avipaccanīkasātatā sagāravatā sādariyaṁ sādaratā sappaṭissavatā—

27. ds2.3.3:35.3

    ayaṁ vuccati sovacassatā.

28. ds2.3.3:36.1

    Tattha katamā kalyāṇamittatā?

29. ds2.3.3:36.2

    Ye te puggalā saddhā sīlavanto bahussutā cāgavanto paññavanto, yā tesaṁ sevanā nisevanā saṁsevanā bhajanā sambhajanā bhatti sambhatti taṁsampavaṅkatā—

30. ds2.3.3:36.3

    ayaṁ vuccati kalyāṇamittatā.

31. ds2.3.3:37.0

    2.3.3.19. Āpattikusalatāduka

32. ds2.3.3:37.1

    Tattha katamā āpattikusalatā?

33. ds2.3.3:37.2

    Pañcapi āpattikkhandhā āpattiyo, sattapi āpattikkhandhā āpattiyo.

34. ds2.3.3:37.3

    Yā tāsaṁ āpattīnaṁ āpattikusalatā paññā pajānanā …pe… amoho dhammavicayo sammādiṭṭhi—

35. ds2.3.3:37.4

    ayaṁ vuccati āpattikusalatā.

36. ds2.3.3:38.1

    Tattha katamā āpattivuṭṭhānakusalatā?

37. ds2.3.3:38.2

    Yā tāhi āpattīhi vuṭṭhānakusalatā paññā pajānanā …pe… amoho dhammavicayo sammādiṭṭhi—

38. ds2.3.3:38.3

    ayaṁ vuccati āpattivuṭṭhānakusalatā.

39. ds2.3.3:39.0

    2.3.3.20. Samāpattikusalatāduka

40. ds2.3.3:39.1

    Tattha katamā samāpattikusalatā?

41. ds2.3.3:39.2

    Atthi savitakkasavicārā samāpatti, atthi avitakkavicāramattā samāpatti, atthi avitakkaavicārā samāpatti.

42. ds2.3.3:39.3

    Yā tāsaṁ samāpattīnaṁ samāpattikusalatā paññā pajānanā …pe… amoho dhammavicayo sammādiṭṭhi—

43. ds2.3.3:39.4

    ayaṁ vuccati samāpattikusalatā.

44. ds2.3.3:40.1

    Tattha katamā samāpattivuṭṭhānakusalatā?

45. ds2.3.3:40.2

    Yā tāhi samāpattīhi vuṭṭhānakusalatā paññā pajānanā …pe… amoho dhammavicayo sammādiṭṭhi—

46. ds2.3.3:40.3

    ayaṁ vuccati samāpattivuṭṭhānakusalatā.

47. ds2.3.3:41.0

    2.3.3.21. Dhātukusalatāduka

48. ds2.3.3:41.1

    Tattha katamā dhātukusalatā?

49. ds2.3.3:41.2

    Aṭṭhārasa dhātuyo cakkhudhātu rūpadhātu cakkhuviññāṇadhātu, sotadhātu saddadhātu sotaviññāṇadhātu, ghānadhātu gandhadhātu ghānaviññāṇadhātu, jivhādhātu rasadhātu jivhāviññāṇadhātu, kāyadhātu phoṭṭhabbadhātu kāyaviññāṇadhātu, manodhātu dhammadhātu manoviññāṇadhātu.

50. ds2.3.3:41.3

    Yā tāsaṁ dhātūnaṁ dhātukusalatā paññā pajānanā …pe… amoho dhammavicayo sammādiṭṭhi—

51. ds2.3.3:41.4

    ayaṁ vuccati dhātukusalatā.

52. ds2.3.3:42.1

    Tattha katamā manasikārakusalatā?

53. ds2.3.3:42.2

    Yā tāsaṁ dhātūnaṁ manasikārakusalatā paññā pajānanā …pe… amoho dhammavicayo sammādiṭṭhi—

54. ds2.3.3:42.3

    ayaṁ vuccati manasikārakusalatā.

55. ds2.3.3:43.0

    2.3.3.22. Āyatanakusalatāduka

56. ds2.3.3:43.1

    Tattha katamā āyatanakusalatā?

57. ds2.3.3:43.2

    Dvādasāyatanāni—

58. ds2.3.3:43.3

    cakkhāyatanaṁ, rūpāyatanaṁ, sotāyatanaṁ, saddāyatanaṁ, ghānāyatanaṁ, gandhāyatanaṁ, jivhāyatanaṁ, rasāyatanaṁ, kāyāyatanaṁ, phoṭṭhabbāyatanaṁ, manāyatanaṁ, dhammāyatanaṁ.

59. ds2.3.3:43.4

    Yā tesaṁ āyatanānaṁ āyatanakusalatā paññā pajānanā …pe… amoho dhammavicayo sammādiṭṭhi—

60. ds2.3.3:43.5

    ayaṁ vuccati āyatanakusalatā.

61. ds2.3.3:44.1

    Tattha katamā paṭiccasamuppādakusalatā?

62. ds2.3.3:44.2

    Avijjāpaccayā saṅkhārā, saṅkhārapaccayā viññāṇaṁ, viññāṇapaccayā nāmarūpaṁ, nāmarūpapaccayā saḷāyatanaṁ, saḷāyatanapaccayā phasso, phassapaccayā vedanā, vedanāpaccayā taṇhā, taṇhāpaccayā upādānaṁ, upādānapaccayā bhavo, bhavapaccayā jāti, jātipaccayā jarāmaraṇaṁ sokaparidevadukkhadomanassupāyāsā sambhavanti;

63. ds2.3.3:44.3

    evametassa kevalassa dukkhakkhandhassa samudayo hotīti.

64. ds2.3.3:44.4

    Yā tattha paññā pajānanā …pe… amoho dhammavicayo sammādiṭṭhi—

65. ds2.3.3:44.5

    ayaṁ vuccati paṭiccasamuppādakusalatā.

66. ds2.3.3:45.0

    2.3.3.23. Ṭhānakusalatāduka

67. ds2.3.3:45.1

    Tattha katamā ṭhānakusalatā?

68. ds2.3.3:45.2

    Ye ye dhammā yesaṁ yesaṁ dhammānaṁ hetū paccayā uppādāya taṁ taṁ ṭhānanti, yā tattha paññā pajānanā …pe… amoho dhammavicayo sammādiṭṭhi—

69. ds2.3.3:45.3

    ayaṁ vuccati ṭhānakusalatā.

70. ds2.3.3:46.1

    Tattha katamā aṭṭhānakusalatā?

71. ds2.3.3:46.2

    Ye ye dhammā yesaṁ yesaṁ dhammānaṁ na hetū na paccayā uppādāya taṁ taṁ aṭṭhānanti, yā tattha paññā pajānanā …pe… amoho dhammavicayo sammādiṭṭhi—

72. ds2.3.3:46.3

    ayaṁ vuccati aṭṭhānakusalatā.

73. ds2.3.3:47.0

    2.3.3.24. Ajjavaduka

74. ds2.3.3:47.1

    Tattha katamo ajjavo?

75. ds2.3.3:47.2

    Yā ajjavatā ajimhatā avaṅkatā akuṭilatā—

76. ds2.3.3:47.3

    ayaṁ vuccati ajjavo.

77. ds2.3.3:48.1

    Tattha katamo maddavo?

78. ds2.3.3:48.2

    Yā mudutā maddavatā akakkhaḷatā akathinatā nīcacittatā—

79. ds2.3.3:48.3

    ayaṁ vuccati maddavo.

80. ds2.3.3:49.0

    2.3.3.25. Khantiduka

81. ds2.3.3:49.1

    Tattha katamā khanti?

82. ds2.3.3:49.2

    Yā khanti khamanatā adhivāsanatā acaṇḍikkaṁ anasuropo attamanatā cittassa—

83. ds2.3.3:49.3

    ayaṁ vuccati khanti.

84. ds2.3.3:50.1

    Tattha katamaṁ soraccaṁ?

85. ds2.3.3:50.2

    Yo kāyiko avītikkamo, vācasiko avītikkamo, kāyikavācasiko avītikkamo—

86. ds2.3.3:50.3

    idaṁ vuccati soraccaṁ.

87. ds2.3.3:50.4

    Sabbopi sīlasaṁvaro soraccaṁ.

88. ds2.3.3:51.0

    2.3.3.26. Sākhalyaduka

89. ds2.3.3:51.1

    Tattha katamaṁ sākhalyaṁ?

90. ds2.3.3:51.2

    Yā sā vācā aṇḍakā kakkasā parakaṭukā parābhisajjanī kodhasāmantā asamādhisaṁvattanikā, tathārūpiṁ vācaṁ pahāya yā sā vācā neḷā kaṇṇasukhā pemanīyā hadayaṅgamā porī bahujanakantā bahujanamanāpā tathārūpiṁ vācaṁ bhāsitā hoti;

91. ds2.3.3:51.3

    yā tattha saṇhavācatā sakhilavācatā apharusavācatā—

92. ds2.3.3:51.4

    idaṁ vuccati sākhalyaṁ.

93. ds2.3.3:52.1

    Tattha katamo paṭisanthāro?

94. ds2.3.3:52.2

    Dve paṭisanthārā—

95. ds2.3.3:52.3

    āmisapaṭisanthāro ca dhammapaṭisanthāro ca.

96. ds2.3.3:52.4

    Idhekacco paṭisanthārako hoti āmisapaṭisanthārena vā dhammapaṭisanthārena vā—

97. ds2.3.3:52.5

    ayaṁ vuccati paṭisanthāro.

98. ds2.3.3:53.0

    2.3.3.27. Indriyesuaguttadvāratāduka

99. ds2.3.3:53.1

    Tattha katamā indriyesu aguttadvāratā?

100. ds2.3.3:53.2

     Idhekacco cakkhunā rūpaṁ disvā nimittaggāhī hoti anubyañjanaggāhī.

← Previous · Next → — showing 101–200 of 330

SuttaCentral (suttacentral.net), from the bilara-data and sc-data repositories. Licence: Public Domain. Source.