Dhammasaṅgaṇī — 2 Niddesa — 2.3 Nikkhepakaṇḍa
- ds2.3.2:94.5
idaṁ vuccati macchariyasaññojanaṁ.
- ds2.3.2:95.1
Tattha katamaṁ avijjāsaññojanaṁ?
- ds2.3.2:95.2
Dukkhe aññāṇaṁ, dukkhasamudaye aññāṇaṁ, dukkhanirodhe aññāṇaṁ, dukkhanirodhagāminiyā paṭipadāya aññāṇaṁ, pubbante aññāṇaṁ, aparante aññāṇaṁ, pubbantāparante aññāṇaṁ, idappaccayatā paṭiccasamuppannesu dhammesu aññāṇaṁ;
- ds2.3.2:95.3
yaṁ evarūpaṁ aññāṇaṁ adassanaṁ anabhisamayo ananubodho asambodho appaṭivedho asaṅgāhanā apariyogāhanā asamapekkhanā apaccavekkhaṇā apaccakkhakammaṁ dummejjhaṁ bālyaṁ asampajaññaṁ moho pamoho sammoho avijjā avijjogho avijjāyogo avijjānusayo avijjāpariyuṭṭhānaṁ avijjālaṅgī moho akusalamūlaṁ—
- ds2.3.2:95.4
idaṁ vuccati avijjāsaññojanaṁ.
- ds2.3.2:96.1
Ime dhammā saññojanā.
- ds2.3.2:97.1
Katame dhammā no saññojanā?
- ds2.3.2:97.2
Te dhamme ṭhapetvā avasesā kusalākusalābyākatā dhammā kāmāvacarā, rūpāvacarā, arūpāvacarā, apariyāpannā;
- ds2.3.2:97.3
vedanākkhandho …pe… viññāṇakkhandho;
- ds2.3.2:97.4
sabbañca rūpaṁ, asaṅkhatā ca dhātu—
- ds2.3.2:97.5
ime dhammā no saññojanā.
- ds2.3.2:98.0
2.3.2.4.2. Saññojaniyaduka
- ds2.3.2:98.1
Katame dhammā saññojaniyā?
- ds2.3.2:98.2
Sāsavā kusalākusalābyākatā dhammā kāmāvacarā, rūpāvacarā, arūpāvacarā;
- ds2.3.2:98.3
rūpakkhandho …pe… viññāṇakkhandho—
- ds2.3.2:98.4
ime dhammā saññojaniyā.
- ds2.3.2:99.1
Katame dhammā asaññojaniyā?
- ds2.3.2:99.2
Apariyāpannā maggā ca, maggaphalāni ca, asaṅkhatā ca dhātu—
- ds2.3.2:99.3
ime dhammā asaññojaniyā.
- ds2.3.2:100.0
2.3.2.4.3. Saññojanasampayuttaduka
- ds2.3.2:100.1
Katame dhammā saññojanasampayuttā?
- ds2.3.2:100.2
Tehi dhammehi ye dhammā sampayuttā vedanākkhandho …pe… viññāṇakkhandho—
- ds2.3.2:100.3
ime dhammā saññojanasampayuttā.
- ds2.3.2:101.1
Katame dhammā saññojanavippayuttā?
- ds2.3.2:101.2
Tehi dhammehi ye dhammā vippayuttā vedanākkhandho …pe… viññāṇakkhandho;
- ds2.3.2:101.3
sabbañca rūpaṁ, asaṅkhatā ca dhātu—
- ds2.3.2:101.4
ime dhammā saññojanavippayuttā.
- ds2.3.2:102.0
2.3.2.4.4. Saññojanasaññojaniyaduka
- ds2.3.2:102.1
Katame dhammā saññojanā ceva saññojaniyā ca?
- ds2.3.2:102.2
Tāneva saññojanāni saññojanā ceva saññojaniyā ca.
- ds2.3.2:103.1
Katame dhammā saññojaniyā ceva no ca saññojanā?
- ds2.3.2:103.2
Tehi dhammehi ye dhammā saññojaniyā, te dhamme ṭhapetvā avasesā sāsavā kusalākusalābyākatā dhammā kāmāvacarā, rūpāvacarā, arūpāvacarā;
- ds2.3.2:103.3
rūpakkhandho …pe… viññāṇakkhandho—
- ds2.3.2:103.4
ime dhammā saññojaniyā ceva no ca saññojanā.
- ds2.3.2:104.0
2.3.2.4.5. Saññojanasaññojanasampayuttaduka
- ds2.3.2:104.1
Katame dhammā saññojanā ceva saññojanasampayuttā ca?
- ds2.3.2:104.2
Kāmarāgasaññojanaṁ avijjāsaññojanena saññojanañceva saññojanasampayuttañca, avijjāsaññojanaṁ kāmarāgasaññojanena saññojanañceva saññojanasampayuttañca, paṭighasaññojanaṁ avijjāsaññojanena saññojanañceva saññojanasampayuttañca, avijjāsaññojanaṁ paṭighasaññojanena saññojanañceva saññojanasampayuttañca, mānasaññojanaṁ avijjāsaññojanena saññojanañceva saññojanasampayuttañca, avijjāsaññojanaṁ mānasaññojanena saññojanañceva saññojanasampayuttañca, diṭṭhisaññojanaṁ avijjāsaññojanena saññojanañceva saññojanasampayuttañca, avijjāsaññojanaṁ diṭṭhisaññojanena saññojanañceva saññojanasampayuttañca, vicikicchāsaññojanaṁ avijjāsaññojanena saññojanañceva saññojanasampayuttañca, avijjāsaññojanaṁ vicikicchāsaññojanena saññojanañceva saññojanasampayuttañca, sīlabbataparāmāsasaññojanaṁ avijjāsaññojanena saññojanañceva saññojanasampayuttañca, avijjāsaññojanaṁ sīlabbataparāmāsasaññojanena saññojanañceva saññojanasampayuttañca, bhavarāgasaññojanaṁ avijjāsaññojanena saññojanañceva saññojanasampayuttañca, avijjāsaññojanaṁ bhavarāgasaññojanena saññojanañceva saññojanasampayuttañca, issāsaññojanaṁ avijjāsaññojanena saññojanañceva saññojanasampayuttañca, avijjāsaññojanaṁ issāsaññojanena saññojanañceva saññojanasampayuttañca, macchariyasaññojanaṁ avijjāsaññojanena saññojanañceva saññojanasampayuttañca, avijjāsaññojanaṁ macchariyasaññojanena saññojanañceva saññojanasampayuttañca—
- ds2.3.2:104.3
ime dhammā saññojanā ceva saññojanasampayuttā ca.
- ds2.3.2:105.1
Katame dhammā saññojanasampayuttā ceva no ca saññojanā?
- ds2.3.2:105.2
Tehi dhammehi ye dhammā sampayuttā, te dhamme ṭhapetvā vedanākkhandho …pe… viññāṇakkhandho—
- ds2.3.2:105.3
ime dhammā saññojanasampayuttā ceva no ca saññojanā.
- ds2.3.2:106.0
2.3.2.4.6. Saññojanavippayuttasaññojaniyaduka
- ds2.3.2:106.1
Katame dhammā saññojanavippayuttā saññojaniyā?
- ds2.3.2:106.2
Tehi dhammehi ye dhammā vippayuttā sāsavā kusalākusalābyākatā dhammā kāmāvacarā, rūpāvacarā, arūpāvacarā;
- ds2.3.2:106.3
rūpakkhandho …pe… viññāṇakkhandho—
- ds2.3.2:106.4
ime dhammā saññojanavippayuttā saññojaniyā.
- ds2.3.2:107.1
Katame dhammā saññojanavippayuttā asaññojaniyā?
- ds2.3.2:107.2
Apariyāpannā maggā ca, maggaphalāni ca, asaṅkhatā ca dhātu—
- ds2.3.2:107.3
ime dhammā saññojanavippayuttā asaññojaniyā.
- ds2.3.2:108.0.1
2.3.2.5. Ganthagocchaka
- ds2.3.2:108.0.2
2.3.2.5.1. Ganthaduka
- ds2.3.2:108.1
Katame dhammā ganthā?
- ds2.3.2:108.2
Cattāro ganthā—
- ds2.3.2:108.3
abhijjhākāyagantho, byāpādo kāyagantho, sīlabbataparāmāso kāyagantho, idaṁ saccābhiniveso kāyagantho.
- ds2.3.2:109.1
Tattha katamo abhijjhākāyagantho?
- ds2.3.2:109.2
Yo rāgo sārāgo anunayo anurodho nandī nandīrāgo cittassa sārāgo icchā mucchā ajjhosānaṁ gedho paligedho saṅgo paṅko ejā māyā janikā sañjananī sibbinī jālinī saritā visattikā suttaṁ visaṭā āyūhinī dutiyā paṇidhi bhavanetti vanaṁ vanatho santhavo sineho apekkhā paṭibandhu āsā āsisanā āsisitattaṁ rūpāsā saddāsā gandhāsā rasāsā phoṭṭhabbāsā lābhāsā dhanāsā puttāsā jīvitāsā jappā pajappā abhijappā jappā jappanā jappitattaṁ loluppaṁ loluppāyanā loluppāyitattaṁ pucchañjikatā sādhukamyatā adhammarāgo visamalobho nikanti nikāmanā patthanā pihanā sampatthanā kāmataṇhā bhavataṇhā vibhavataṇhā rūpataṇhā arūpataṇhā nirodhataṇhā rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā ogho yogo gantho upādānaṁ āvaraṇaṁ nīvaraṇaṁ chādanaṁ bandhanaṁ upakkileso anusayo pariyuṭṭhānaṁ latā vevicchaṁ dukkhamūlaṁ dukkhanidānaṁ dukkhappabhavo mārapāso mārabaḷisaṁ māravisayo taṇhānadī taṇhājālaṁ taṇhāgaddulaṁ taṇhāsamuddo abhijjhā lobho akusalamūlaṁ—
- ds2.3.2:109.3
ayaṁ vuccati abhijjhākāyagantho.
- ds2.3.2:110.1
Tattha katamo byāpādo kāyagantho?
- ds2.3.2:110.2
Anatthaṁ me acarīti āghāto jāyati, anatthaṁ me caratīti āghāto jāyati, anatthaṁ me carissatīti āghāto jāyati, piyassa me manāpassa anatthaṁ acari …pe… anatthaṁ carati …pe…
- ds2.3.2:110.3
anatthaṁ carissatīti āghāto jāyati, appiyassa me amanāpassa atthaṁ acari …pe…
- ds2.3.2:110.4
atthaṁ carati …pe…
- ds2.3.2:110.5
atthaṁ carissatīti āghāto jāyati, aṭṭhāne vā pana āghāto jāyati.
- ds2.3.2:110.6
Yo evarūpo cittassa āghāto paṭighāto paṭighaṁ paṭivirodho kopo pakopo sampakopo doso padoso sampadoso cittassa byāpatti manopadoso kodho kujjhanā kujjhitattaṁ doso dussanā dussitattaṁ byāpatti byāpajjanā byāpajjitattaṁ virodho paṭivirodho caṇḍikkaṁ asuropo anattamanatā cittassa—
- ds2.3.2:110.7
ayaṁ vuccati byāpādo kāyagantho.
- ds2.3.2:111.1
Tattha katamo sīlabbataparāmāso kāyagantho?
- ds2.3.2:111.2
Ito bahiddhā samaṇabrāhmaṇānaṁ sīlena suddhi, vatena suddhi, sīlabbatena suddhīti;
- ds2.3.2:111.3
yā evarūpā diṭṭhi diṭṭhigataṁ diṭṭhigahanaṁ diṭṭhikantāro diṭṭhivisūkāyikaṁ diṭṭhivipphanditaṁ diṭṭhisaññojanaṁ gāho patiṭṭhāho abhiniveso parāmāso kummaggo micchāpatho micchattaṁ titthāyatanaṁ vipariyāsaggāho—
- ds2.3.2:111.4
ayaṁ vuccati sīlabbataparāmāso kāyagantho.
- ds2.3.2:112.1
Tattha katamo idaṁsaccābhiniveso kāyagantho?
- ds2.3.2:112.2
Sassato loko, idameva saccaṁ moghamaññanti vā;
- ds2.3.2:112.3
asassato loko, idameva saccaṁ moghamaññanti vā;
- ds2.3.2:112.4
antavā loko, idameva saccaṁ moghamaññanti vā;
- ds2.3.2:112.5
anantavā loko, idameva saccaṁ moghamaññanti vā;
- ds2.3.2:112.6
taṁ jīvaṁ taṁ sarīraṁ, idameva saccaṁ moghamaññanti vā;
- ds2.3.2:112.7
aññaṁ jīvaṁ aññaṁ sarīraṁ, idameva saccaṁ moghamaññanti vā;
- ds2.3.2:112.8
hoti tathāgato paraṁ maraṇā, idameva saccaṁ moghamaññanti vā;
- ds2.3.2:112.9
na hoti tathāgato paraṁ maraṇā, idameva saccaṁ moghamaññanti vā;
- ds2.3.2:112.10
hoti ca na ca hoti tathāgato paraṁ maraṇā, idameva saccaṁ moghamaññanti vā;
- ds2.3.2:112.11
neva hoti na na hoti tathāgato paraṁ maraṇā, idameva saccaṁ moghamaññanti vā;
- ds2.3.2:112.12
yā evarūpā diṭṭhi diṭṭhigataṁ diṭṭhigahanaṁ diṭṭhikantāro diṭṭhivisūkāyikaṁ diṭṭhivipphanditaṁ diṭṭhisaññojanaṁ gāho patiṭṭhāho abhiniveso parāmāso kummaggo micchāpatho micchattaṁ titthāyatanaṁ vipariyāsaggāho—
- ds2.3.2:112.13
ayaṁ vuccati idaṁsaccābhiniveso kāyagantho.
- ds2.3.2:112.14
Ṭhapetvā sīlabbataparāmāsaṁ kāyaganthaṁ sabbāpi micchādiṭṭhi idaṁsaccābhiniveso kāyagantho.
- ds2.3.2:113.1
Ime dhammā ganthā.
- ds2.3.2:114.1
Katame dhammā no ganthā?
- ds2.3.2:114.2
Te dhamme ṭhapetvā avasesā kusalākusalābyākatā dhammā kāmāvacarā, rūpāvacarā, arūpāvacarā, apariyāpannā;
- ds2.3.2:114.3
vedanākkhandho …pe… viññāṇakkhandho;
- ds2.3.2:114.4
sabbañca rūpaṁ, asaṅkhatā ca dhātu—
- ds2.3.2:114.5
ime dhammā no ganthā.
- ds2.3.2:115.0
2.3.2.5.2. Ganthaniyaduka
- ds2.3.2:115.1
Katame dhammā ganthaniyā?
- ds2.3.2:115.2
Sāsavā kusalākusalābyākatā dhammā kāmāvacarā, rūpāvacarā, arūpāvacarā;
- ds2.3.2:115.3
rūpakkhandho …pe… viññāṇakkhandho—
- ds2.3.2:115.4
ime dhammā ganthaniyā.
- ds2.3.2:116.1
Katame dhammā aganthaniyā?
- ds2.3.2:116.2
Apariyāpannā maggā ca, maggaphalāni ca, asaṅkhatā ca dhātu—
- ds2.3.2:116.3
ime dhammā aganthaniyā.
- ds2.3.2:117.0
2.3.2.5.3. Ganthasampayuttaduka
- ds2.3.2:117.1
Katame dhammā ganthasampayuttā?
- ds2.3.2:117.2
Tehi dhammehi ye dhammā sampayuttā vedanākkhandho …pe… viññāṇakkhandho—
- ds2.3.2:117.3
ime dhammā ganthasampayuttā.
← Previous · Next → — showing 301–400 of 1,048
SuttaCentral (suttacentral.net), from the bilara-data and sc-data repositories. Licence: Public Domain. Source.