← All works

Aṅguttara Nikāya 3.109 — 11. Sambodhavagga — Arakkhitasutta

Early Buddhist texts (SuttaCentral): Sutta · Bhikkhu Sujato · sutta · 27 sections

1. an3.109:0.1

   Aṅguttara Nikāya 3.109

   Numbered Discourses 3.109

2. an3.109:0.2

   11. Sambodhavagga

   11. Awakening

3. an3.109:0.3

   Arakkhitasutta

   Unprotected

4. an3.109:1.1

   Atha kho anāthapiṇḍiko gahapati yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca:

   Then the householder Anāthapiṇḍika went up to the Buddha, bowed, and sat down to one side. The Buddha said to him:

5. an3.109:1.2

   “citte, gahapati, arakkhite kāyakammampi arakkhitaṁ hoti, vacīkammampi arakkhitaṁ hoti, manokammampi arakkhitaṁ hoti.

   “Householder, when the mind is unprotected, deeds of body, speech, and mind are unprotected.

6. an3.109:1.3

   Tassa arakkhitakāyakammantassa arakkhitavacīkammantassa arakkhitamanokammantassa kāyakammampi avassutaṁ hoti, vacīkammampi avassutaṁ hoti, manokammampi avassutaṁ hoti.

   When deeds are unprotected, they fester.

7. an3.109:1.4

   Tassa avassutakāyakammantassa avassutavacīkammantassa avassutamanokammantassa kāyakammampi pūtikaṁ hoti, vacīkammampi pūtikaṁ hoti, manokammampi pūtikaṁ hoti.

   When deeds fester, they become rotten.

8. an3.109:1.5

   Tassa pūtikāyakammantassa pūtivacīkammantassa pūtimanokammantassa na bhaddakaṁ maraṇaṁ hoti, na bhaddikā kālakiriyā.

   Someone whose deeds of body, speech, and mind are rotten will not have a good death.

9. an3.109:2.1

   Seyyathāpi, gahapati, kūṭāgāre ducchanne kūṭampi arakkhitaṁ hoti, gopānasiyopi arakkhitā honti, bhittipi arakkhitā hoti;

   It’s like a bungalow with a bad roof. The roof peak, rafters, and walls are unprotected.

10. an3.109:2.2

    kūṭampi avassutaṁ hoti, gopānasiyopi avassutā honti, bhittipi avassutā hoti;

    They fester,

11. an3.109:2.3

    kūṭampi pūtikaṁ hoti, gopānasiyopi pūtikā honti, bhittipi pūtikā hoti.

    and become rotten.

12. an3.109:3.1

    Evamevaṁ kho, gahapati, citte arakkhite kāyakammampi arakkhitaṁ hoti, vacīkammampi arakkhitaṁ hoti, manokammampi arakkhitaṁ hoti.

    In the same way, when the mind is unprotected, bodily, verbal, and mental deeds are unprotected. …

13. an3.109:3.2

    Tassa arakkhitakāyakammantassa arakkhitavacīkammantassa arakkhitamanokammantassa kāyakammampi avassutaṁ hoti, vacīkammampi avassutaṁ hoti, manokammampi avassutaṁ hoti.

14. an3.109:3.3

    Tassa avassutakāyakammantassa avassutavacīkammantassa avassutamanokammantassa kāyakammampi pūtikaṁ hoti, vacīkammampi pūtikaṁ hoti, manokammampi pūtikaṁ hoti.

15. an3.109:3.4

    Tassa pūtikāyakammantassa pūtivacīkammantassa pūtimanokammantassa na bhaddakaṁ maraṇaṁ hoti, na bhaddikā kālakiriyā.

    Someone whose deeds of body, speech, and mind are rotten will not have a good death.

16. an3.109:4.1

    Citte, gahapati, rakkhite kāyakammampi rakkhitaṁ hoti, vacīkammampi rakkhitaṁ hoti, manokammampi rakkhitaṁ hoti.

    When the mind is protected, bodily, verbal, and mental deeds are protected.

17. an3.109:4.2

    Tassa rakkhitakāyakammantassa rakkhitavacīkammantassa rakkhitamanokammantassa kāyakammampi anavassutaṁ hoti, vacīkammampi anavassutaṁ hoti, manokammampi anavassutaṁ hoti.

    When deeds are protected, they don’t fester.

18. an3.109:4.3

    Tassa anavassutakāyakammantassa anavassutavacīkammantassa anavassutamanokammantassa kāyakammampi apūtikaṁ hoti, vacīkammampi apūtikaṁ hoti, manokammampi apūtikaṁ hoti.

    When deeds don’t fester, they don’t become rotten.

19. an3.109:4.4

    Tassa apūtikāyakammantassa apūtivacīkammantassa apūtimanokammantassa bhaddakaṁ maraṇaṁ hoti, bhaddikā kālakiriyā.

    Someone whose deeds of body, speech, and mind aren’t rotten will have a good death.

20. an3.109:5.1

    Seyyathāpi, gahapati, kūṭāgāre succhanne kūṭampi rakkhitaṁ hoti, gopānasiyopi rakkhitā honti, bhittipi rakkhitā hoti;

    It’s like a bungalow with a good roof. The roof peak, rafters, and walls are protected.

21. an3.109:5.2

    kūṭampi anavassutaṁ hoti, gopānasiyopi anavassutā honti, bhittipi anavassutā hoti;

    They don’t get soaked,

22. an3.109:5.3

    kūṭampi apūtikaṁ hoti, gopānasiyopi apūtikā honti, bhittipi apūtikā hoti.

    and they don’t become rotten.

23. an3.109:6.1

    Evamevaṁ kho, gahapati, citte rakkhite kāyakammampi rakkhitaṁ hoti, vacīkammampi rakkhitaṁ hoti, manokammampi rakkhitaṁ hoti.

    In the same way, when the mind is protected, bodily, verbal, and mental deeds are protected. …

24. an3.109:6.2

    Tassa rakkhitakāyakammantassa rakkhitavacīkammantassa rakkhitamanokammantassa kāyakammampi anavassutaṁ hoti, vacīkammampi anavassutaṁ hoti, manokammampi anavassutaṁ hoti.

25. an3.109:6.3

    Tassa anavassutakāyakammantassa anavassutavacīkammantassa anavassutamanokammantassa kāyakammampi apūtikaṁ hoti, vacīkammampi apūtikaṁ hoti, manokammampi apūtikaṁ hoti.

26. an3.109:6.4

    Tassa apūtikāyakammantassa apūtivacīkammantassa apūtimanokammantassa bhaddakaṁ maraṇaṁ hoti, bhaddikā kālakiriyā”ti.

    Someone whose deeds of body, speech, and mind aren’t rotten will have a good death.”

27. an3.109:6.5

    Sattamaṁ.

SuttaCentral (suttacentral.net), from the bilara-data and sc-data repositories. Licence: Public Domain (root); CC0 1.0 (translation). Source.