Peshitta Numbers
- Numbers 3:13
ܡܛܠ ܕܕܝܠܝ ܗܘ ܟܠ ܒܘܟܪܐ. ܒܝܘܡܐ ܕܩܛܠܬ ܟܠ ܒܘܟܪ̈ܐ ܕܒܐܪܥܐ ܕܡܨܪܝܢ. ܩܕܫܬ ܠܝ ܟܠ ܒܘܟܪ̈ܐ ܕܒܢ̈ܝ ܐܝܣܪܝܠ . ܡܢ ܐܢܫܐ ܘܥܕܡܐ ܠܒܥܝܪ̈ܐ ܠܝ ܢܗܘܘܢ. ܐܢܐ ܐܢܐ ܡܪܝܐ.
- Numbers 3:14
ܘܡܠܠ ܡܪܝܐ ܥܡ ܡܘܫܐ ܒܡܕܒܪܐ ܕܣܝܢܝ ܘܐܡܪ ܠܗ.
- Numbers 3:15
ܡܢܝ ܠܒ̈ܢܝ ܠܘܝ ܠܒܝܬ ܐܒܗܝ̈ܗܘܢ ܠܫܪܒܬܗܘܢ. ܟܠ ܕܟܪܐ ܡܢ ܒܪ ܝܪܚܐ ܘܠܥܠ. ܬܡܢܐ ܐܢܘܢ.
- Numbers 3:16
ܘܡܢܐ ܐܢܘܢ ܡܘܫܐ ܒܡܠܬ ܦܘܡܗ ܕܡܪܝܐ ܐܝܟ ܕܐܬܦܩܕ.
- Numbers 3:17
ܘܗܘܘ ܗܠܝܢ ܒܢ̈ܝ ܠܘܝ ܒܫܡܗܝ̈ܗܘܢ. ܓܪܫܘܢ ܘܩܗܬ ܘܡܪܪܝ.
- Numbers 3:18
ܘܗܠܝܢ ܫܡ̈ܗܐ ܕܒܢ̈ܝ ܓܪܫܘܢ ܠܫܪ̈ܒܬܗܘܢ ܠܒܢܝ ܘܫܡܥܝ .
- Numbers 3:19
ܘܒܢ̈ܝ ܩܗܬ ܠܫܪ̈ܒܬܗܘܢ. ܥܡܪܡ ܘܝܨܗܪ. ܘܚܒܪܘܢ ܘܥܘܙܝܠ.
- Numbers 3:20
ܘܒܢ̈ܝ ܡܪܪܝ ܠܫܪ̈ܒܬܗܘܢ ܡܚܠܝ ܘܡܘܫܝ. ܗܠܝܢ ܐܢܝ̈ܢ ܫܪ̈ܒܬܐ ܕܠܘܝ̈ܐ ܠܒܝܬ ܐ̈ܒܗܝܗܘܢ.
- Numbers 3:21
ܠܓܪܫܘܢ ܫܪܒܬܐ ܕܠܒܢܝ ܘܫܪܒܬܐ ܕܫܡܥܝ. ܗܠܝܢ ܐܢܝ̈ܢ ܫܪ̈ܒܬܐ ܕܓܪܫܘܢ.
- Numbers 3:22
ܘܡܢܝܢܗܘܢ ܒܡܢܝܢܐ ܕܟܠ ܕܟܪܐ ܡܢ ܒܪ ܝܪܚܐ ܘܠܥܠ. ܫܒܥܐ ܐܠܦ̈ܝܢ ܘܚܡܫܡܐܐ.
- Numbers 3:23
ܫܪܒܬܐ ܕܓܪܫܘܢ ܒܣܬܪ ܡܫܟܢܐ ܢܗܘܘܢ ܫ̇ܪܝܢ ܡܢ ܡܥܪܒܐ.
- Numbers 3:24
ܘܪܫܐ ܕܒܝܬ ܐܒܗ̈ܐ ܕܓܪܫܘܢ. ܐܠܝܐܣܦ ܒܪ ܐܠܝܒ.
- Numbers 3:25
ܘܡܛܪܬܐ ܕܒܢ̈ܝ ܓܪܫܘܢ ܒܡܫܟܢ ܙܒܢܐ ܡܫܟܢܐ. ܘܐ̈ܦܝ ܬܪܥܐ ܘܦܪܣܗ. ܘܦܪܣܐ ܕܬܪܥܐ ܕܡܫܟܢ ܙܒܢܐ.
- Numbers 3:26
ܘܓ̈ܠܓܐ ܕܕܪܬܐ. ܘܦܪܣܐ ܕܬܪܥܐ ܕܕܪܬܐ. ܕܥܠ ܡܫܟܢܐ ܘܥܠ ܡܕܒܚܐ ܟܕ ܚܕܪ. ܘܛܘܢ̈ܒܘܗܝ ܘܟܠܗܘܢ ܦܘܠܚ̈ܢܘܗܝ.
- Numbers 3:27
ܘܠܩܗܬ ܫܪܒܬܐ ܕܥܡܪܡ ܘܫܪܒܬܐ ܕܝܨܗܪ. ܘܫܪܒܬܐ ܕܚܒܪܘܢ. ܘܫܪܒܬܐ ܕܥܘܙܝܠ. ܗܠܝܢ ܐܢܝܢ ܫܪ̈ܒܬܐ ܕܩܗܬ.
- Numbers 3:28
ܘܡܢܝܢܗܘܢ ܒܡܢܝܢܐ ܕܟܠ ܕܟܪܐ ܡܢ ܒܪ ܝܪܚܐ ܘܠܥܠ. ܬܡܢܝܐ ܐܠܦ̈ܝܢ. ܘܫܬܡܐܐ ܢܛ̇ܪ̈ܝ ܡܛܪܬܐ ܕܩܘܕܫܐ.
- Numbers 3:29
ܘܫܪܒܬܐ ܕܒܝܬ ܩܗܬ. ܢܫܪܘܢ ܥܠ ܫܦܘ̈ܠܘܗܝ ܕܡܫܟܢܐ ܡܢ ܬܝܡܢܐ.
- Numbers 3:30
ܘܪܫܐ ܕܒܝܬ ܐܒ̈ܗܐ ܕܫܪܒܬܐ ܕܩܗܬ. ܐܠܝܨܦܢ ܒܪ ܥܘܙܝܠ.
- Numbers 3:31
ܘܡܛܪܬܗܘܢ ܩܒܘܬܐ ܘܦܬܘܪܐ ܘܡܢܪܬܐ ܘܡܕܒܚܐ ܘܡ̈ܐܢܝ ܩܘܕܫܐ ܕܡܫܡܫܝܢ ܒܗܘܢ. ܘܐ̈ܦܝ ܬܪܥܐ ܘܟܘܠܗ ܦܘܠܚܢܗ.
- Numbers 3:32
ܘܪܫܐ ܕܪ̈ܫܐ ܕܠܘ̈ܝܐ ܐܠܝܥܙܪ ܒܪܗ ܕܐܗܪܘܢ ܟܗܢܐ . ܕܫܠܝܛ ܥܠ ܢ̇ܛܪ̈ܝ ܡܛܪܬܐ ܕܩܘܕܫܐ.
- Numbers 3:33
ܘܕܡܪܪܝ ܫܪܒܬܐ ܕܡܚܠܝ ܘܫܪܒܬܐ ܕܡܘܫܝ. ܗܠܝܢ ܐܢܝܢ ܫܪ̈ܒܬܐ ܕܡܪܪܝ.
- Numbers 3:34
ܘܡܢܝܢܗܘܢ ܒܡܢܝܢܐ ܕܟܠ ܕܟܪܐ ܡܢ ܒܪ ܝܪܚܐ ܘܠܥܠ. ܫܬܐ ܐ̈ܠܦܝܢ ܘܡܐܬܝܢ.
- Numbers 3:35
ܘܪܫܐ ܕܒܝܬ ܐܒ̈ܗܐ ܕܫܪܒܬܐ ܕܡܪܪܝ. ܨܘܪܝܐܝܠ ܒܪ ܐܒܚܝܠ ܥܠ ܫܦ̈ܘܠܘܗܝ ܕܡܫܟܢܐ. ܢܗܘܘܢ ܫ̇ܪܝܢ ܡܢ ܓܪܒܝܐ.
- Numbers 3:36
ܘܫܘܠܛܢܐ ܕܡܛܪܬܐ ܕܒ̈ܢܝ ܡܪܪܝ. ܕܦ̈ܐ ܕܡܫܟܢܐ. ܘܡܘܟ̈ܠܘܗܝ ܘܩܝ̈ܡܘܗܝ ܘܣܡ̈ܟܘܗܝ ܘܟܠ ܡܐܢܘ̈ܗܝ ܘܟܠܗ ܦܘܠܚܢܗ.
- Numbers 3:37
ܘܥܡ̈ܘܕܐ ܕܕܪܬܐ ܟܕ ܚܕܪܝܢ. ܘܛܘܢܒ̈ܝܗܘܢ ܘܣܡ̈ܟܝܗܘܢ ܘܓܠܓܝ̈ܗܘܢ .
- Numbers 3:38
ܘܕܫ̇ܪܝܢ ܩܕܡ ܡܫܟܢܐ ܡܢ ܡܕܢܚܐ ܩܕܡ ܡܫܟܢ ܙܒܢܐ ܡܢ ܡܕܢܚܐ . ܡܘܫܐ ܘܐܗܪܘܢ. ܘܒܢܘ̈ܗܝ ܕܢ̇ܛܪܝܢ ܡܛܪܬܐ ܕܩܘܕܫܐ ܥܠ ܡܛܪܬܐ ܕܒ̈ܢܝ ܐܝܣܪܝܠ ܘܢܘܟܪܝܐ ܕܩ̇ܪܒ ܢܬܩܛܠ.
- Numbers 3:39
ܟܠܗܘܢ ܡܢܝ̈ܢܐ ܕܠܘܝ̈ܐ ܕܡܢܐ ܡܘܫܐ ܒܡܠܬ ܦܘܡܗ ܕܡܪܝܐ. ܟܠ ܕܟܪܐ ܡܢ ܒܪ ܝܪܚܐ ܘܠܥܠ. ܥܣܪ̈ܝܢ ܘܬܪ̈ܝܢ ܐܠܦ̈ܝܢ.
- Numbers 3:40
ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ . ܡܢܝ ܟܠ ܒܘܟܪ̈ܐ ܕܟܪ̈ܐ ܕܒ̈ܢܝ ܐܝܣܪܝܠ ܡܢ ܒܪ ܝܪܚܐ ܘܠܥܠ. ܘܩܒܠ ܡܢܝܢܐ ܕܫ̈ܡܗܝܗܘܢ.
- Numbers 3:41
ܘܬܩܪܒ ܐܢܘܢ ܠܝ ܠܠܘܝ̈ܐ. ܐܢܐ ܐܢܐ ܡܪܝܐ. ܚܠܦ ܟܠܗܘܢ ܒܘܟܪ̈ܐ ܕܒ̈ܢܝ ܐܝܣܪܝܠ. ܘܒܥܝܪܐ ܕܠܘܝ̈ܐ ܚܠܦ ܟܠܗܘܢ ܒܘܟܪ̈ܐ ܕܒܥܝܪܐ ܕܒ̈ܢܝ ܐܝܣܪܝܠ .
- Numbers 3:42
ܘܡܢܐ ܡܘܫܐ ܐܝܟ ܕܦܩܕܗ ܡܪܝܐ ܟܠܗܘܢ ܒܘܟܪ̈ܐ ܕܒ̈ܢܝ ܐܝܣܪܝܠ.
- Numbers 3:43
ܘܗܘܘ ܟܠ ܒܘܟܪ̈ܐ ܕܟܪ̈ܐ ܒܡܢܝܢ ܫܡ̈ܗܐ ܡܢ ܒܪ ܝܪܚܐ ܘܠܥܠ. ܡܢܝܢܗܘܢ ܥܣܪܝܢ ܘܬܪܝܢ ܐܠܦ̈ܝܢ ܘܡܐܬܝܢ. ܘܫܒܥܝܢ ܘܬܠܬܐ.
- Numbers 3:44
ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ.
- Numbers 3:45
ܩܪܒ ܠܠܘܝ̈ܐ ܚܠܦ ܟܠ ܒܘܟܪ̈ܐ ܕܒ̈ܢܝ ܐܝܣܪܝܠ ܘܒܥܝܪܐ ܕܠܘܝ̈ܐ ܚܠܦ ܒܥܝܪܗܘܢ. ܘܢܗܘܘܢ ܠܝ ܠܘܝ̈ܐ. ܐܢܐ ܐܢܐ ܡܪܝܐ.
- Numbers 3:46
ܘܦܘܪܩܢܐ ܕܡܐܬܝܢ ܘܫܒܥܝܢ ܘܬܠܬܐ ܕܝܬܝܪܝܢ ܥܠ ܠܘܝ̈ܐ ܒܘܟܪ̈ܐ ܕܒܢ̈ܝ ܐܝܣܪܝܠ.
- Numbers 3:47
ܣܒ ܚܡܫܐ ܚܡܫܐ ܡܬ̈ܩܠܝܢ ܠܪܝܫܐ ܒܡܬܩܠܐ ܕܩܘܕܫܐ. ܣܒ ܥܣܪ̈ܝܢ ܡ̈ܥܝܢ ܠܡܬܩܠܐ.
- Numbers 3:48
ܘܗܒܝܗܝ ܟܣܦܐ ܕܦܘܪܩܢܐ. ܕܐܝܠܝܢ ܕܝܬܝܪܝܢ ܒܗܘܢ. ܠܐܗܪܘܢ ܘܠܒܢܘܗܝ.
- Numbers 3:49
ܘܢܣܒ ܡܘܫܐ ܟܣܦܐ ܕܦܘܪܩܢܐ. ܡܢ ܗܢܘܢ ܕܝܬܝܪܝܢ ܥܠ ܦܘܪܩܢܐ ܕܠܘܝ̈ܐ.
- Numbers 3:50
ܡܢ ܒܘܟܪ̈ܐ ܕܒܢ̈ܝ ܐܝܣܪܝܠ. ܘܢܣܒ ܟܣܦܐ. ܐܠܦ ܘܬܠܬܡܐܐ ܘܫܬܝܢ ܘܚܡܫܐ ܡ̈ܬܩܠܝܢ ܒܡܬܩܠܐ ܕܩܘܕܫܐ.
- Numbers 3:51
ܘܝܗܒ ܡܘܫܐ ܟܣܦܐ ܕܦܘܪܩܢܐ. ܠܐܗܪܘܢ ܘܠܒ̈ܢܘܗܝ ܐܝܟ ܡܠܬ ܦܘܡܗ ܕܡܪܝܐ. ܐܝܟ ܕܦܩܕ ܡܪܝܐ ܠܡܘܫܐ.
- Numbers 4:1
ܘܡܠܠ ܡܪܝܐ ܥܡ ܡܘܫܐ ܘܥܡ ܐܗܪܘܢ ܘܐܡܪ ܠܗܘܢ.
- Numbers 4:2
ܩܒܠܘ ܚܘܫܒܢܐ ܕܒܢ̈ܝ ܩܗܬ ܡܢ ܓܘ ܒܢ̈ܝ ܠܘܝ ܠܫܪ̈ܒܬܗܘܢ ܠܒܝܬ ܐܒܗ̈ܝܗܘܢ.
- Numbers 4:3
ܡܢ ܒܪ ܬܠܬܝܢ ܫ̈ܢܝܢ ܘܠܥܠ ܘܥܕܡܐ ܠܒܪ ܚܡܫܝܢ ܫ̈ܢܝܢ. ܟܘܠ ܕܐܬܐ ܒܚܝܠܐ ܠܡܥܒܕ ܥܒܕܐ ܒܡܫܟܢܙܒܢܐ.
- Numbers 4:4
ܗܢܐ ܗܘ ܦܘܠܚܢܐ ܕܒܢ̈ܝ ܩܗܬ ܕܒܡܫܟܢܙܒܢܐ ܩܕܘܫ ܩܘܕ̈ܫܐ.
- Numbers 4:5
ܘܢܥܘܠ ܐܗܪܘܢ ܘܒܢ̈ܘܗܝ. ܡܐ ܕܫܩܠܐ ܡܫܪܝܬܐ. ܘܢܚܬܘܢ ܐܦ̈ܝ ܬܪܥܐ ܕܦܪܝܣ . ܘܢܟܣܘܢ ܒܗ ܠܩܒܘܬܐ ܕܣܗܕܘܬܐ.
- Numbers 4:6
ܘܢܦܪܣܘܢ ܥܠܝܗ̇ ܩܪܡܐ ܕܡܫ̈ܟܐ ܕܣܣܓܘܢܐ. ܘܢܦܪܣܘܢ ܢܚܬܐ ܓܡܝܪܐ ܕܬܟܠܬܐ ܡܢ ܠܥܠ. ܘܢܣܝܡܘܢ ܩܘ̈ܦܝܗ̇.
- Numbers 4:7
ܘܥܠ ܦܬܘܪܐ ܕܐܦ̈ܐ. ܢܦܪܣܘܢ ܢܚܬܐ ܕܬܟܠܬܐ. ܘܢܪܡܘܢ ܒܗ ܡܓ̈ܣܐ ܘܟܦ̈ܐ ܘܡܢ̈ܩܝܬܐ ܘܛܪ̈ܘܠܐ ܕܢܘܩܝܐ. ܘܠܚܡܐ ܐܡܝܢܐܝܬ ܥܠܘܗܝ ܢܗܘܐ.
- Numbers 4:8
ܘܢܦܪܣܘܢ ܥܠܘܗܝ ܢܚܬܐ ܕܙܚܘܪܝܬܐ. ܘܢܟܣܘܢܗ̇ ܒܩܪܡܐ ܕܡ̈ܫܟܐ ܕܣܣܓܘܢܐ ܘܢܣܝܡܘܢ ܩܘ̈ܦܘܗܝ.
- Numbers 4:9
ܘܢܣܒܘܢ ܢܚܬܐ ܕܬܟܠܬܐ ܘܢܟܣܘܢ ܡܢܪܬܐ ܕܡܢܗܪܐ. ܘܫܪ̈ܓܝܗ̇ ܘܡܠܩ̈ܛܝܗ̇. ܘܟܦ̈ܝܗ̇ ܘܟܠܗܘܢ ܡܐ̈ܢܐ ܕܡܫܚܐ ܕܡܫܡܫܝܢ ܠܗ ܒܗܘܢ.
- Numbers 4:10
ܘܢܪܡܘܢܗ ܘܠܟܠܗܘܢ ܡܐ̈ܢܝܗ̇ ܒܩܪܡܐ ܕܡ̈ܫܟܐ ܕܣܣܓܘܢܐ. ܘܢܪܡܘܢ ܥܠ ܩ̈ܘܦܝܗ̇.
- Numbers 4:11
ܘܥܠ ܡܕܒܚܐ ܕܕܗܒܐ ܢܦܪܣܘܢ ܢܚܬܐ ܓܡܝܪܐ ܕܬܟܠܬܐ. ܘܢܟܣܘܢܗ ܒܩܪܡܐ ܕܡܫ̈ܟܐ ܕܣܣܓܘܢܐ. ܘܢܪܡܘܢ ܩܘ̈ܦܘܗܝ.
- Numbers 4:12
ܘܢܣܒܘܢ ܟܠܗܘܢ ܡܐ̈ܢܐ ܕܬܫܡܫܬܐ ܕܡܫܡܫܝܢ ܒܗܘܢ ܒܩܘܕܫܐ . ܘܢܪܡܘܢ ܐܢܘܢ ܒܢܚܬܐ ܕܬܟܠܬܐ. ܘܢܟܣܘܢ ܐܢܘܢ ܒܟܣܝܐ ܕܡ̈ܫܟܐ ܕܣܣܓܘܢܐ. ܘܢܪܡܘܢ ܥܠ ܩ̈ܘܦܐ.
- Numbers 4:13
ܘܢܦܪܩܘܢܗ ܠܡܕܒܚܐ ܘܢܦܪܣܘܢ ܥܠܘܗܝ ܢܚܬܐ ܕܐܪܓܘܢܐ.
- Numbers 4:14
ܘܢܪܡܘܢ ܥܡܗ ܟܠܗܘܢ ܡܐ̈ܢܘܗܝ. ܕܡܫܡܫܝܢ ܒܗܘܢ ܥܠܘܗܝ. ܦܝܪ̈ܡܐ ܘܡܫ̈ܠܘܬܐ ܘܡܓܪ̈ܘܦܝܬܐ ܘܫ̈ܚܠܐ ܘܟܘܠܗܘܢ ܡܐ̈ܢܐ ܕܡܕܒܚܐ. ܘܢܦܪܣܘܢ ܥܠܘܗܝ ܩܪܡܐ ܕܡܫ̈ܟܐ ܕܣܣܓܘܢܐ ܘܢܪܡܘܢ ܩܘ̈ܦܘܗܝ.
- Numbers 4:15
ܘܡܐ ܕܫܠܡ ܐܗܪܘܢ ܘܒ̈ܢܘܗܝ ܠܡܟܣܝܘ ܩܘܕܫܐ. ܘܟܠܗܘܢ ܡܐ̈ܢܐ ܕܩܘܕܫܐ ܡܐ ܕܫܩܠܐ ܡܫܪܝܬܐ. ܗܝܕܝܢ ܢܥܠܘܢ ܒܢ̈ܝ ܩܗܬ ܠܡܫܩܠ. ܕܠܐ ܢܩܪܒܘܢ ܠܩܘܕܫܐ ܘܢܡܘܬܘܢ. ܗܠܝܢ ܐܢܘܢ ܡܫܩ̈ܠܢܐ ܕܒܢ̈ܝ ܩܗܬ ܕܒܡܫܟܢ ܙܒܢܐ .
- Numbers 4:16
ܘܫܘܠܛܢܗ ܕܐܠܝܥܙܪ ܒܪܗ ܕܐܗܪܘܢ ܟܗܢܐ. ܡܢ ܡܫܚܐ ܕܡܢܗܪܝܢ ܘܥܛܪܐ ܕܒܣ̈ܡܐ. ܘܣܡܝܕܐ ܐܡܝܢܐ ܘܡܫܚܐ ܕܡܫܝܚܘܬܐ. ܫܠܝܛ ܥܠ ܟܘܠܗ ܡܫܟܢܐ ܘܥܠ ܟܠ ܡܕܡ ܕܐܝܬ ܒܗ. ܘܒܩܘܕܫܐ ܘܒܡ̈ܐܢܘܗܝ.
- Numbers 4:17
ܘܡܠܠ ܡܪܝܐ ܥܡ ܡܘܫܐ ܘܥܡ ܐܗܪܘܢ ܘܐܡܪ ܠܗܘܢ.
- Numbers 4:18
ܠܐ ܬܘܒܕܘܢ ܫܒܛܐ ܕܫܪܒܬܐ ܕܩܗܬ ܡܢ ܓܘ ܠܘ̈ܝܐ.
- Numbers 4:19
ܐܠܐ ܗܕܐ ܥܒܕܘ ܠܗܘܢ. ܘܢܚܘܢ ܕܠܐ ܢܡܘܬܘܢ. ܡܐ ܕܥ̇ܐܠܝܢ ܠܩܕܘܫ ܩܘ̈ܕܫܐ. ܐܗܪܘܢ ܘܒ̈ܢܘܗܝ ܢܥܠܘܢ. ܘܢܫܠܛܘܢ ܐܢܘܢ ܐܢܫ ܐܢܫ ܥܠ ܦܘܠܚܢܗ ܘܥܠ ܡܫܩܠܢܗ .
- Numbers 4:20
ܘܠܐ ܢܥܠܘܢ ܠܡܚܙܐ ܟܕ ܡܬܟܣܐ ܩܘܕܫܐ ܕܠܐ ܢܡܘܬܘܢ.
- Numbers 4:21
ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ.
- Numbers 4:22
ܩܒܠ ܚܘܫܒܢܐ ܕܒܢ̈ܝ ܓܪܫܘܢ. ܐܦ ܕܝܠܗܘܢ ܠܒܝܬ ܐܒܗ̈ܝܗܘܢ ܠܫܪ̈ܒܬܗܘܢ.
- Numbers 4:23
ܡܢ ܒܪ ܬܠܬܝܢ ܫ̈ܢܝܢ ܘܠܥܠ ܘܥܕܡܐ ܠܒܪ ܚܡܫܝܢ ܫ̈ܢܝܢ ܬܡܢܐ ܐܢܘܢ. ܟܠ ܕܐܬ̇ܐ ܠܡܬܚܝܠܘ ܒܚܝܠܐ. ܘܠܡܦܠܚ ܦܘܠܚܢܐ ܒܡܫܟܢ ܙܒܢܐ.
- Numbers 4:24
ܗܢܘ ܦܘܠܚܢܐ ܕܫܪܒܬܐ ܕܓܪܫܘܢ. ܠܡܦܠܚ ܘܠܡܫܩܠ.
- Numbers 4:25
ܢܫܩܠܘܢ ܝܪ̈ܝܥܬܐ ܕܡܫܟܢܐ ܘܡܫܟܢܙܒܢܐ ܘܐ̈ܦܝ ܬܪܥܗ. ܘܦܪܣܐ ܕܣܣܓܘܢܐ ܕܐܝܬ ܥܠܘܗܝ ܡܢ ܠܥܠ ܘܐ̈ܦܝ ܬܪܥܐ ܕܡܫܟܢܙܒܢܐ.
- Numbers 4:26
ܘܓ̈ܠܓܐ ܕܕܪܬܐ. ܘܦܪܣܐ ܕܡܥܠܢܐ ܕܬܪܥܐ ܕܕܪܬܐ ܕܥܠ ܡܫܟܢܐ ܘܥܠ ܡܕܒܚܐ ܟܕ ܚ̇ܕܪ. ܘܛܘܢܒ̈ܝܗܘܢ ܘܟܠܗܘܢ ܡܐ̈ܢܐ ܕܦܘܠܚܢܗܘܢ ܟܠ ܡܕܡ ܕܥ̇ܒܕܝܢ ܘܦ̇ܠܚܝܢ.
- Numbers 4:27
ܒܡܠܬ ܦܘܡܗ ܕܐܗܪܘܢ ܘܕܒ̈ܢܘܗܝ ܢܗܘܐ ܟܘܠܗ ܦܘܠܚܢܐ ܕܒܢ̈ܝ ܓܪܫܘܢ. ܠܟܘܠܗ̇ ܫܩܘܠܬܗܘܢ ܘܠܟܠܗ ܦܘܠܚܢܗܘܢ. ܘܬܫܠܛܘܢ ܥܠܝܗܘܢ ܡܛܪܬܐ ܥܠ ܟܠܗ̇ ܫܩܘܠܬܗܘܢ.
- Numbers 4:28
ܗܢܐ ܗܘ ܦܘܠܚܢܐ ܕܫܪܒܬܐ ܕܒܢ̈ܝ ܓܪܫܘܢ ܕܒܡܫܟܢܙܒܢܐ . ܘܡܛܪܬܗܘܢ ܒܐܝܕܐ ܕܐܝܬܡܪ ܒܪܗ ܕܐܗܪܘܢ ܟܗܢܐ.
- Numbers 4:29
ܘܒܢ̈ܝ ܡܪܪܝ ܠܫܪ̈ܒܬܗܘܢ ܠܒܝܬ ܐܒ̈ܗܝܗܘܢ ܬܡܢܐ ܐܢܘܢ.
- Numbers 4:30
ܡܢ ܒܪ ܬܠܬܝܢ ܫ̈ܢܝܢ ܘܠܥܠ. ܘܥܕܡܐ ܠܒܪ ܚܡܫܝܢ ܫ̈ܢܝܢ ܬܡܢܐ ܐܢܘܢ. ܟܠ ܕܐܬ̇ܐ ܠܡܬܚܝܠܘ ܒܚܝܠܐ ܘܠܡܦܠܚ ܦܘܠܚܢܐ ܒܡܫܟܢܙܒܢܐ .
- Numbers 4:31
ܘܗܕܐ ܗܝ ܡܛܪܬܐ ܕܫܩܘܠܬܗܘܢ ܘܕܟܠܗ ܦܘܠܚܢܗܘܢ ܒܡܫܟܢ ܙܒܢܐ. ܕܦܘ̈ܗܝ ܕܡܫܟܢܐ ܘܡ̈ܘܟܠܘܗܝ ܘܥܡ̈ܘܕܘܗܝ ܘܣܡ̈ܟܘܗܝ.
- Numbers 4:32
ܘܥܡܘ̈ܕܐ ܕܕܪܬܐ ܟܕ ܚ̇ܕܪܐ. ܘܣܡ̈ܟܝܗܘܢ ܘܣܟܝ̈ܗܘܢ ܘܛܘ̈ܢܒܝܗܘܢ ܘܟܠܗܘܢ ܡܐ̈ܢܝܗܘܢ. ܘܟܘܠܗ ܦܘܠܚܢܗܘܢ ܒܫ̈ܡܗܐ ܡܢܘ. ܡܐ̈ܢܐ ܕܡܛܪܬܐ ܕܫܩܘܠܬܗܘܢ .
- Numbers 4:33
ܗܢܘ ܦܘܠܚܢܐ ܕܫܪܒܬܐ ܕܒܢ̈ܝ ܡܪܪܝ. ܘܟܠܗ ܦܘܠܚܢܗܘܢ ܒܡܫܟܢ ܙܒܢܐ. ܒܐܝܕܐ ܕܐܝܬܡܪ ܒܪܗ ܕܐܗܪܘܢ ܟܗܢܐ.
- Numbers 4:34
ܘܡܢܐ ܡܘܫܐ ܘܐܗܪܘܢ ܘܪ̈ܘܪܒܢܐ ܕܟܢܘܫܬܐ ܠܒܢ̈ܝ ܩܗܬ ܠܫܪ̈ܒܬܗܘܢ ܠܒܝܬ ܐܒܗ̈ܝܗܘܢ.
- Numbers 4:35
ܡܢ ܒܪ ܬܠܬܝܢ ܫ̈ܢܝܢ ܘܠܥܠ. ܘܥܕܡܐ ܠܒܪ ܚܡܫܝܢ ܫ̈ܢܝܢ ܟܘܠ ܕܐܬ̇ܐ ܒܚܝܠܐ ܠܦܘܠܚܢܐ ܕܡܫܟܢܙܒܢܐ.
- Numbers 4:36
ܘܗܘܐ ܡܢܝܢܗܘܢ ܠܫܪ̈ܒܬܗܘܢ ܬܪ̈ܝܢ ܐ̈ܠܦܝܢ ܘܫܒܥܡܐܐ ܘܚܡܫܝܢ.
- Numbers 4:37
ܗܠܝܢ ܡܢܝ̈ܢܐ ܕܫܪܒܬܐ ܕܩܗܬ. ܟܠ ܕܦ̇ܠܚ ܒܡܫܟܢܙܒܢܐ ܕܡܢܐ ܡܘܫܐ ܘܐܗܪܘܢ. ܒܡܠܬ ܦܘܡܗ ܕܡܪܝܐ ܒܐܝܕܐ ܕܡܘܫܐ.
- Numbers 4:38
ܘܡܢܝܢܐ ܕܒܢ̈ܝ ܓܪܫܘܢ ܠܫܪ̈ܒܬܗܘܢ ܠܒܝܬ ܐܒܗ̈ܝܗܘܢ.
- Numbers 4:39
ܡܢ ܒܪ ܬܠܬܝܢ ܫ̈ܢܝܢ ܘܠܥܠ. ܘܥܕܡܐ ܠܒܪ ܚܡܫܝܢ ܫ̈ܢܝܢ ܟܘܠ ܕܐܬ̇ܐ ܒܚܝܠܐ ܠܦܘܠܚܢܐ ܕܡܫܟܢܙܒܢܐ.
- Numbers 4:40
ܘܗܘܐ ܡܢܝܢܗܘܢ ܠܫܪ̈ܒܬܗܘܢ ܠܒܝܬ ܐܒܗ̈ܝܗܘܢ ܬܪ̈ܝܢ ܐܠܦܝܢ ܘܫܬܡܐܐ ܘܬܠܬܝܢ.
- Numbers 4:41
ܗܠܝܢ ܡܢܝ̈ܢܐ ܕܫܪܒܬܐ ܕܒܢ̈ܝ ܓܪܫܘܢ. ܟܠ ܕܦܠ̇ܚ ܒܡܫܟܢܙܒܢܐ. ܕܡܢܐ ܡܘܫܐ ܘܐܗܪܘܢ ܒܡܠܬ ܦܘܡܗ ܕܡܪܝܐ.
- Numbers 4:42
ܘܡܢܝܢܐ ܕܫܪܒܬܐ ܕܒܢ̈ܝ ܡܪܪܝ ܠܫܪ̈ܒܬܗܘܢ ܠܒܝܬ ܐܒܗ̈ܝܗܘܢ.
- Numbers 4:43
ܡܢ ܒܪ ܬܠܬܝܢ ܫ̈ܢܝܢ ܘܠܥܠ. ܘܥܕܡܐ ܠܒܪ ܚܡܫܝܢ ܫ̈ܢܝܢ. ܟܘܠ ܕܐܬ̇ܐ ܒܚܝܠܐ ܠܦܘܠܚܢܐ ܕܡܫܟܢ ܙܒܢܐ.
- Numbers 4:44
ܘܗܘܐ ܡܢܝܢܗܘܢ ܠܫܪ̈ܒܬܗܘܢ . ܬܠܬܐ ܐ̈ܠܦܝܢ ܘܡܐܬܝܢ.
- Numbers 4:45
ܗܠܝܢ ܡܢܝ̈ܢܐ ܕܫܪ̈ܒܬܐ ܕܒܢܝ ܡܪܪܝ. ܕܡܢܐ ܡܘܫܐ ܘܐܗܪܘܢ ܒܡܠܬ ܦܘܡܗ ܕܡܪܝܐ ܒܐܝܕܐ ܕܡܘܫܐ.
- Numbers 4:46
ܟܠ ܡܢܝ̈ܢܐ ܕܡܢܐ ܡܘܫܐ ܘܐܗܪܘܢ ܘܪܘܪ̈ܒܢܐ ܕܐܝܣܪܝܠ. ܠܠܘ̈ܝܐ ܠܫܪ̈ܒܬܗܘܢ ܠܒܝܬ ܐܒܗ̈ܝܗܘܢ.
- Numbers 4:47
ܡܢ ܒܪ ܬܠܬܝܢ ܫ̈ܢܝܢ ܘܠܥܠ. ܘܥܕܡܐ ܠܒܪ ܚܡܫܝܢ ܫ̈ܢܝܢ. ܟܘܠ ܕܐܬ̇ܐ ܒܚܝܠܐ ܠܡܥܒܕ ܥܒܕܐ ܒܦܘܠܚܢܐ . ܘܦܘܠܚܢܐ ܕܫܩܘܠܬܐ ܒܡܫܟܢܙܒܢܐ.
- Numbers 4:48
ܘܗܘܐ ܡܢܝܢܗܘܢ ܬܡܢܝܐ ܐ̈ܠܦܝܢ ܘܚܡܫܡܐܐ ܘܬܡܢܐܝܢ .
- Numbers 4:49
ܒܡܠܬ ܦܘܡܗ ܕܡܪܝܐ ܡܢܐ ܐܢܘܢ ܒܐܝܕܐ ܕܡܘܫܐ. ܓܒܪ ܓܒܪ ܥܠ ܦܘܠܚܢܗ ܘܥܠ ܫܩܠܗ . ܘܡܢܐ ܐܢܘܢ ܐܝܟ ܕܦܩܕ ܡܪܝܐ ܠܡܘܫܐ.
- Numbers 5:1
ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ.
- Numbers 5:2
ܦܩܕ ܠܒܢ̈ܝ ܐܝܣܪܝܠ. ܕܢܦܩܘܢ ܠܒܪ ܡܢ ܡܫܪܝܬܐ. ܠܟܘܠ ܕܓܪܒ ܘܠܟܠ ܕܕܐ̇ܒ. ܘܠܟܠ ܕܛܡܐ ܒܢܦܫܗ.
- Numbers 5:3
ܡܢ ܕܟܪܐ ܘܥܕܡܐ ܠܢܩܒܬܐ. ܬܦܩܘܢ ܐܢܘܢ ܠܒܪ ܡܢ ܡܫܪܝܬܐ. ܘܠܐ ܢܛܡܐܘܢ ܡܫܪܝܬܟܘܢ. ܕܐܢܐ ܫܪܐ ܐܢܐ ܒܝܢܬܟܘܢ.
- Numbers 5:4
ܘܥܒܕܘ ܗܟܢܐ ܒܢ̈ܝ ܐܝܣܪܝܠ. ܘܐܦܩܘ ܐܢܘܢ ܠܒܪ ܡܢ ܡܫܪܝܬܐ. ܘܐܝܟ ܕܐܡܪ ܡܪܝܐ ܠܡܘܫܐ. ܗܟܢܐ ܥܒܕܘ ܒܢ̈ܝ ܐܝܣܪܝܠ.
- Numbers 5:5
ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ.
- Numbers 5:6
ܐܡܪ ܠܒܢ̈ܝ ܐܝܣܪܝܠ . ܓܒܪܐ ܐܘ ܐܢܬܬܐ ܐܢ ܢܥܒܕܘܢ ܡܢ ܟܠ ܚ̈ܛܗܐ ܕܒ̈ܢܝ ܐܢܫܐ ܘܢܥܒܕܘܢ ܥܘܠܐ. ܩܕܡ ܡܪܝܐ ܬܬܚܝܒ ܢܦܫܐ ܗ̇ܝ.
- Numbers 5:7
ܘܢܘܕܘܢ ܚ̈ܛܗܝܗܘܢ ܕܥܒܕܘ ܘܢܗܦܘܟ ܚܛܗܗ ܥܠ ܪܝܫܗ. ܘܚܕ ܡܢ ܚܡܫܐ ܢܘܣܦ ܥܠܘܗܝ. ܘܢܦܢܐ ܠܡ̇ܢ ܕܕܝܠܗ ܗܘ ܚܛܗܐ.
- Numbers 5:8
ܘܐܢ ܠܝܬ ܠܗ ܠܓܒܪܐ. ܡ̇ܢ ܕܩܪܝܒ ܠܗ ܢܝܬܐ ܚܠܦ ܚܛܗܐ ܥܠ ܐܦܘ̈ܗܝ. ܚܛܗܐ ܕܡܝܬܝܢ ܚܠܦܘܗܝ ܩܕܡ ܡܪܝܐ. ܠܟܗܢܐ ܢܗܘܐ . ܣܛܪ ܡܢ ܕܟܪܐ ܕܚܘܣܝܐ ܕܡܬܚܣܐ ܒܗ ܥܠܘܗܝ.
- Numbers 5:9
ܘܟܘܠܗ ܦܘܪܫܢܐ ܕܟܠܗܘܢ ܩܘ̈ܕܫܐ ܕܡܩܪܒܝܢ ܒܢ̈ܝ ܐܝܣܪܝܠ ܠܟܗܢܐ ܕܝܠܗ ܢܗܘܐ.
- Numbers 5:10
ܘܓܒܪ ܩܘܕܫܗ ܠܗ ܢܗܘܐ. ܘܓܒܪ ܕܢܬܠ ܠܟܗܢܐ ܠܗ ܢܗܘܐ.
- Numbers 5:11
ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ.
- Numbers 5:12
ܡܠܠ ܥܡ ܒܢ̈ܝ ܐܝܣܪܝܠ ܘܐܡܪ ܠܗܘܢ. ܓܒܪ ܓܒܪ ܟܕ ܬܫܛܐ ܐܢܬܬܗ ܘܬܥܒܕ ܒܗ ܥܘܠܐ.
← Previous · Next → — showing 101–200 of 1,289
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.