← All works

Peshitta Nahum

Peshitta (Syriac Old Testament) · 47 sections

1. Nahum 1:1

   ܡܚܘܬܐ ܕܢܝܢܘܐ ܕܒܣܦܪܐ ܕܚ̈ܙܘܢܐ ܕܢܚܘܡ ܐܠܩܘܫܝܐ

2. Nahum 1:2

   ܐܠܗܐ ܛܢܢܐ ܘܬܒܘܥܐ ܡܪܝܐ ܬܒܥ ܡܪܝܐ ܒܪܘܓܙܐ ܬܒܥ ܡܪܝܐ ܡܢ ܣܢܐ̈ܘܗܝ ܘܢܛܪ ܠܒ̈ܥܠܕܒܒܘܗܝ

3. Nahum 1:3

   ܢܓܝܪܐ ܪܘܚܗ ܕܡܪܝܐ ܘܣܓܝ ܚܝܠܗ ܘܡܙܟܝܘ ܠܐ ܡܙܟܐ ܡܪܝܐ ܒܥܠܥܠܐ ܘܒܟܘܟܝܬܐ ܐܘܪܚܗ ܘܥܢ̈ܢܐ ܚܠܐ ܕܪ̈ܓܠܘܗܝ

4. Nahum 1:4

   ܟܐܐ ܒܝܡܐ ܘܡܘܒܫ ܠܗ ܘܟܠܗܘܢ ܢܗܪ̈ܘܬܐ ܡܚܪܒ ܐܠܬ ܡܬܢܝܢ ܘܟܪܡܠܐ ܘܦܪܥܐ ܕܠܒܢܢ ܝܒܫ

5. Nahum 1:5

   ܛܘܪ̈ܐ ܙܥܘ ܡܢ ܩܕܡܘܗܝ ܘܪ̈ܡܬܐ ܐܬܦܪܩ ܙܥܬ ܐܪܥܐ ܡܢ ܩܕܡܘܗܝ ܬܒܝܠ ܘܟܠܗܘܢ ܥܡܘܪ̈ܝܗ̇

6. Nahum 1:6

   ܩܕܡ ܪܘܓܙܗ ܡܢܘ ܩܐܡ ܘܡܢܘ ܡܣܝܒܪ ܚܡܬܐ ܕܪܘܓܙܗ ܚܡܬܗ ܝܩܕܐ ܐܝܟ ܢܘܪܐ ܘܛܘܪ̈ܐ ܐܬܦܫܪܘ ܡܢܗ

7. Nahum 1:7

   ܛܒ ܗܘ ܡܪܝܐ ܠܡܣܝܥܘ ܒܝܘܡܐ ܕܐܘܠܨܢܐ ܘܝܕܥ ܠܐܝܠܝܢ ܕܬܟܝܠܝܢ ܥܠܘܗܝ

8. Nahum 1:8

   ܘܒܓܪܘܦܝܐ ܥܒܕ ܓܡܘܪܝܐ ܢܥܒܪ ܠܐܬܪܗ ܘܠܒ̈ܥܠܕܒܒܘܗܝ ܢܪܕܘܦ ܚܫܘܟܐ

9. Nahum 1:9

   ܡܢܐ ܡܬܚܫܒܝܢ ܐܢܬܘܢ ܥܠ ܡܪܝܐ ܕܓܡܘܪܝܐ ܥܒܕ ܘܠܐ ܢܩܘܡ ܕܬܪ̈ܬܝܢ ܙܒ̈ܢܝܢ ܐܘܠܨܢܐ

10. Nahum 1:10

    ܡܛܠ ܕܥܕܡܐ ܠܫ̈ܠܝܛܢܝܗܘܢ ܡܪܘܕܝܢ ܘܒܪܘܝܘܬܗܘܢ ܪܘܝܢ ܘܐܟܠܘ ܘܐܬܡܠܝܘ ܚܒܬܐ ܝܒܝܫܬܐ

11. Nahum 1:11

    ܡܢܟܝ ܢܦܘܩ ܕܡܬܚܫܒ ܒܝܫܬܐ ܥܠ ܡܪܝܐ ܘܡܬܪܥܐ ܥܘܠܐ

12. Nahum 1:12

    ܗܟܢܐ ܐܡܪ ܡܪܝܐ ܥܠ ܪ̈ܝܫܝ ܡ̈ܝܐ ܣ̈ܓܝܐܐ ܕܓܪܘ ܘܥܒܪܘ ܘܕܥܢܝܬܟܝ ܬܘܒ ܠܐ ܐܥܢܝܟܝ

13. Nahum 1:13

    ܡܟܝܠ ܐܬܒܪ ܢܝܪܗ ܡܢܟܝ ܘܚܢܩ̈ܝܟܝ ܐܦܣܩ

14. Nahum 1:14

    ܘܢܦܩܘܕ ܥܠܝܟܝ ܡܪܝܐ ܘܠܐ ܢܙܕܪܥ ܬܘܒ ܡܢ ܫܡܟܝ ܒܝܬ ܐܠܗܟܝ ܘܐܘܒܕ ܓܠܝ̈ܦܐ ܘܢܣܝ̈ܟܐ ܘܐܥܒܕܝܘܗܝ ܩܒܪܟܝ ܒܥܓܠ

15. Nahum 2:1

    ܗܐ ܥܠ ܛܘܪ̈ܐ ܪ̈ܓܠܘܗܝ ܕܡܣܒܪܢܐ ܘܕܡܫܡܥ ܫܠܡܐ ܥܒܕ ܝܗܘܕܐ ܥ̈ܐܕܝܟ ܘܫܠܡ ܢܕܪ̈ܝܟ ܡܛܠ ܕܠܐ ܡܘܣܦ ܬܘܒ ܠܡܥܒܕ ܒܟ ܥܘܠܐ ܡܛܠ ܕܟܠܗ ܐܒܕ

16. Nahum 2:2

    ܣܠܩ ܡܕܒܪܢܐ ܩܕܡܝܟ ܘܢܛܪ ܡܛܪܬܐ ܘܚܐܪ ܐܘܪܚܐ ܘܐܚܕ ܒܚܨܐ ܘܛܒ ܚܣܝܢ ܚܝܠܗ

17. Nahum 2:3

    ܡܛܠ ܕܡܦܢܐ ܐܢܐ ܐܝܩܪܗ ܕܝܥܩܘܒ ܐܝܟ ܐܝܩܪܗ ܕܐܝܣܪܝܠ ܡܛܠ ܕܕܫܘ ܐܢܘܢ ܕܝܘܫ̈ܐ ܘܚܒܠܘ ܫܒ̈ܘܩܝܗܘܢ

18. Nahum 2:4

    ܣܟܪ̈ܐ ܕܓܢܒܪ̈ܝܗܘܢ ܡܣܡ̈ܩܢ ܘܓܒܪ̈ܐ ܓܢܒܪ̈ܐ ܡܫܬܥܝܢ ܒܠܡܦܐ̈ܕܐ ܕܢܘܪܐ ܘܒܡܪ̈ܟܒܬܐ ܒܝܘܡܐ ܕܡܬܛܝܒܝܢ ܘܦܪ̈ܫܐ ܡܬܒܠܗܝܢ

19. Nahum 2:5

    ܘܒܫܡܐ ܡܫܬܒܚܝܢ ܒܡܪ̈ܟܒܬܗܘܢ ܘܡܫܬܒܗܪܝܢ ܘܚܙܘܗܘܢ ܐܝܟ ܠܡܦܐ̈ܕܐ ܘܐܝܟ ܒܪ̈ܩܐ ܪܗܛܝܢ

20. Nahum 2:6

    ܢܐܚܕܘܢ ܠܫ̈ܠܝܛܢܝܗܘܢ ܘܢܬܬܩܠܘܢ ܒܗ̈ܠܟܬܗܘܢ ܘܢܣܬܪܗܒܘܢ ܠܫܘܪܐ ܘܢܛܝܒܘܢ ܥܥܝ̈ܬܐ

21. Nahum 2:7

    ܬܪ̈ܥܐ ܕܝܗܘܕܐ ܐܬܦܬܚܘ ܘܗܝܟܠܐ ܙܥ

22. Nahum 2:8

    ܘܐܩܝܡܬ ܦܪ̈ܫܝܗ̇ ܘܣܠܩܬ ܘܐܡ̈ܗܬܗ̇ ܡܢܗ̈ܡܢ ܗ̈ܘܝ ܒܠܒܝ̈ܗܝܢ ܐܝܟ ܝܘ̈ܢܐ

23. Nahum 2:9

    ܘܢܝܢܘܐ ܐܝܟ ܝܡܬܐ ܗܝ ܕܡ̈ܝܐ ܘܒܝܬ ܡ̈ܝܐ ܗܝ ܘܗܢܘܢ ܥܪܩܝܢ ܐܩܝܡܘ ܐܩܝܡܘ ܘܠܝܬ ܕܡܬܦܢܐ

24. Nahum 2:10

    ܒܙܘ ܣܐܡܐ ܘܒܙܘ ܕܗܒܐ ܘܠܝܬ ܣܟܐ ܠܨܒܬܗ̇ ܥܫܝܢ̈ܝܢ ܟܠܗܘܢ ܡܐ̈ܢܐ ܕܪܓܬܗ̇

25. Nahum 2:11

    ܕܝܫܬܐ ܘܣܚܝܦܬܐ ܘܡܬܪܥܬܐ ܘܠܒܐ ܬܒܝܪܐ ܘܦܘܪܩ ܒܘܪ̈ܟܐ ܘܪܥܠܐ ܒܟܠ ܚܨ̈ܝܢ ܘܐ̈ܦܝ ܟܠܗܘܢ ܐܟܘܡ ܐܝܟ ܫܘܚܪ̈ܐ ܕܩܕܪܐ

26. Nahum 2:12

    ܐܝܟܐ ܗܝ ܡܪܒܘܥܝܬܗ̇ ܕܐܪܝܘܬܐ ܘܒܝܬ ܪܥܝܐ ܕܓܘܪܝܐ ܕܐܪܝܘܬܐ ܕܐܙܠ ܐܪܝܐ ܠܡܥܠ ܠܬܡܢ ܘܓܘܪܝܐ ܕܐܪܝܐ ܘܠܝܬ ܕܡܗܪ

27. Nahum 2:13

    ܐܪܝܐ ܬܒܪ ܡܣܬ ܡܐܟܘܠܬܐ ܕܓܪ̈ܘܗܝ ܘܦܣܩ ܐܦ ܠܬܢܝ̈ܢܘܗܝ ܘܡܠܐ ܢܩ̈ܥܘܗܝ ܘܡܪܒܘܥܝܬܗ ܬܒܪܐ

28. Nahum 2:14

    ܗܐ ܐܢܐ ܥܠܝܟܝ ܐܡܪ ܡܪܝܐ ܚܝܠܬܢܐ ܘܐܘܒܕ ܒܬܢܢܐ ܟܢܫ̈ܝܟܝ ܘܓܪ̈ܝܟܝ ܬܐܟܘܠ ܚܪܒܐ ܘܐܘܒܕ ܡܢ ܐܪܥܐ ܬܒܪܟܝ ܘܬܘܒ ܠܐ ܢܫܬܡܥ ܩܠܐ ܕܥܒ̈ܕܝܟܝ

29. Nahum 3:1

    ܘܝ ܠܡܕܝܢܬܐ ܕܕܡܐ ܕܟܠܗ̇ ܟܕܒܘܬܐ ܘܡܠܝܐ ܥܘܠܐ ܘܠܐ ܡܬܡܝܫ ܒܗ̇ ܬܒܪܐ

30. Nahum 3:2

    ܩܠܐ ܕܫܘܛܐ ܘܩܠܐ ܕܙܘܥܐ ܕܓܝ̈ܓܠܐ ܣܘܣܝܐ ܕܢܦܪ ܘܡܪܟܒܬܐ ܕܡܢܕܝܐ

31. Nahum 3:3

    ܦܪܫܐ ܕܕܒܪ ܘܣܝܦܐ ܕܡܙܗܪ ܘܢܝܙܟܐ ܕܡܒܪܩ ܘܣܘܓܐܐ ܕܩ̈ܛܝܠܐ ܘܥܘܫܢܐ ܕܫ̈ܠܕܐ ܘܠܝܬ ܣܟܐ ܠܫ̈ܠܕܐ ܢܬܬܩܠܘܢ ܒܗܝܢ ܒܫ̈ܠܕܝܗܘܢ

32. Nahum 3:4

    ܡܢ ܣܘܓܐܬ ܙܢܝܘܬܗ̇ ܕܙܢܝܬܐ ܫܦܝܪܬ ܚܙܘܐ ܘܡܪܬ ܚܪ̈ܫܐ ܕܡܪܒܝܐ ܥܡܡ̈ܐ ܒܙܢܝܘܬܗ̇ ܘܫܪ̈ܒܬܐ ܒܚܪ̈ܫܝܗ̇

33. Nahum 3:5

    ܗܐ ܐܢܐ ܥܠܝܟܝ ܐܡܪ ܡܪܝܐ ܚܝܠܬܢܐ ܘܐܣܚܘܦ ܫ̈ܦܘܠܝܟܝ ܥܠ ܐ̈ܦܝܟܝ ܘܐܚܘܐ ܦܘܪܣܝܟܝ ܠܥܡ̈ܡܐ ܘܨܥܪܟܝ ܠܡ̈ܠܟܘܬܐ

34. Nahum 3:6

    ܘܐܫܕܐ ܥܠܝܟܝ ܛܢܦܘܬܐ ܘܐܨܥܪܟܝ ܘܐܥܒܕܟܝ ܠܚܙܘܐ

35. Nahum 3:7

    ܘܟܠ ܡ̇ܢ ܕܚܙܐ ܠܟܝ ܢܢܕ ܡܢܟܝ ܘܢܐܡܪ ܐܬܒܙܬ ܢܝܢܘܐ ܠܡ̇ܢ ܬܟܪܐ ܥܠܝܟܝ ܘܐܝܡܟܐ ܐܒܥܐ ܠܟܝ ܡܒܝܐܢܐ

36. Nahum 3:8

    ܕܠܡܐ ܛܒܐ ܐܢܬܝ ܡܢ ܝܘܢ ܕܐܡܘܢ ܕܝܬܒܐ ܒܢܗܪ̈ܘܬܐ ܘܡ̈ܝܐ ܚܕܝܪ̈ܝܢ ܠܗ̇ ܕܚܝܠܗ̇ ܝܡܐ ܘܡ̈ܝܐ ܫܘܪܗ̇

37. Nahum 3:9

    ܟܘܫ ܘܡܨܪܝܢ ܥܘܫܢܗ̇ ܘܠܝܬ ܠܗ̇ ܣܟ ܦܘܛܝܐ ܘܠܘܒ̈ܝܐ ܗܘܘ ܒܥܘܕܪܢܗ̇

38. Nahum 3:10

    ܐܦ ܗܝ ܒܫܒܝܬܐ ܐܙܠܬ ܘܝ̈ܠܘܕܝܗ̇ ܐܫܬܩܦܘ ܒܪܝܫ ܟܘܠܗܘܢ ܫ̈ܘܩܝܗ̇ ܘܥܠ ܝܩܝܪ̈ܝܗ̇ ܐܪܡܝܘ ܦܨ̈ܐ ܘܟܠܗܘܢ ܪ̈ܘܪܒܢܝܗ̇ ܐܬܐܣܪܘ ܒܫܫ̈ܠܬܐ

39. Nahum 3:11

    ܐܦ ܐܢܬܝ ܬܕܘܝܢ ܘܬܗܘܝܢ ܫܝܛܬܐ ܐܦ ܐܢܬܝ ܬܒܥܝܢ ܥܘܕܪܢܐ ܡܢ ܒ̈ܥܠܕܒܒܝܟܝ

40. Nahum 3:12

    ܟܠܗܘܢ ܟܪ̈ܟܝܟܝ ܐܝܟ ܬܐ̈ܢܐ ܐܢܘܢ ܒܟܪ̈ܬܐ ܕܡܐ ܕܒܫܠ ܢ̈ܦܠܢ ܒܦܘܡܗ ܕܐܟܘܠܐ

41. Nahum 3:13

    ܘܥܡܟܝ ܐܝܟ ܢܫ̈ܐ ܐܢܘܢ ܒܓܘܟܝ ܢܬܦܬܚܘܢ ܬܪ̈ܥܐ ܕܐܪܥܟܝ ܠܒ̈ܥܠܕܒܒܝܟܝ ܘܬܐܟܘܠ ܢܘܪܐ ܠܡܘܟ̈ܠܝܟܝ

42. Nahum 3:14

    ܡ̈ܝܐ ܒܐܘܠܨܢܐ ܡܠܝ ܠܟܝ ܘܐܥܫܢܝ ܟܪ̈ܟܝܟܝ ܥܘܠܝ ܒܣܝܢܐ ܘܕܘܫܝ ܒܛܝܢܐ ܘܐܥܫܢܝ ܡܘܠܟܢܐ

43. Nahum 3:15

    ܬܡܢ ܬܐܟܠܟܝ ܢܘܪܐ ܘܬܘܒܕܟܝ ܚܪܒܐ ܘܬܐܟܠܟܝ ܐܝܟ ܙܚܠܐ ܥܠ ܕܥܫܢܬܝ ܐܝܟ ܙܚܠܐ ܘܣܓܝܬܝ ܐܝܟ ܩܡܨܐ

44. Nahum 3:16

    ܘܐܣܓܝܬܝ ܬܓܪ̈ܝܟܝ ܛܒ ܡܢ ܟܘ̈ܟܒܝ ܫܡܝܐ ܙܚܠܐ ܫܠܚ ܘܦܪܚ

45. Nahum 3:17

    ܢܙܝܪ̈ܝܟܝ ܐܝܟ ܩܡܨܐ ܘܟܬܝܫ̈ܝܟܝ ܐܝܟ ܩܡܨܐ ܕܣܒܝܟ ܒܣܝܓܐ ܒܝܘܡܐ ܩܪܝܪܐ ܕܡܐ ܕܕܢܚܬ ܫܡܫܐ ܡܫܩܠ ܘܠܐ ܡܬܝܕܥܐ ܕܘܟܬܗ

46. Nahum 3:18

    ܢܡܘ ܚܒܪ̈ܝܟܝ ܡ̈ܠܟܐ ܕܐܬܘܪ ܘܫܪܘ ܩܪ̈ܝܒܝܟܝ ܐܬܒܕܪܘ ܥܡܟܝ ܥܠ ܛܘܪ̈ܐ ܘܠܝܬ ܠܗܘܢ ܡܟܢܫܢܐ

47. Nahum 3:19

    ܠܝܬ ܕܟܐܒ ܠܗ ܥܠ ܬܒܪܟܝ ܟܝܒܐ ܗܝ ܡܚܘܬܟܝ ܟܠ ܕܫܡܥܘ ܫܡܥܟܝ ܢܩܫܘ ܟܦܐ ܥܠܝܟܝ ܡܛܠ ܕܥܠ ܟܘܠ ܐܢܫ ܐܡܝܢܐܝܬ ܥܒܪܬ ܒܝܫܬܟܝ

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.