← All works

Peshitta Maccabees 2

Peshitta (Syriac Old Testament) · 555 sections

1. Maccabees 2 1:1

   ܐܚ̈ܐ ܝܗܘ̈ܕܝܐ ܕܒܐܪܫܠܡ ܘܒܐܪܥܐ ܕܝܗܘܕܐ ܠܐ̈ܚܝܢ ܝܗܘ̈ܕܝܐ ܕܒܡܨܪܝܢ ܫܠܡ ܫܠܡܐ ܘܛܝܒܘܬܐ ܥܡܟܘܢ

2. Maccabees 2 1:2

   ܘܢܛܐܒ ܠܟܘܢ ܐܠܗܐ ܘܢܬܕܟܪ ܩܝܡܗ ܕܥܡ ܐܒܪܗܡ ܘܐܝܣܚܩ ܘܝܥܩܘܒ ܥܒ̈ܕܘܗܝ ܡܗܝ̈ܡܢܐ

3. Maccabees 2 1:3

   ܘܢܬܠ ܠܟܘܢ ܠܒܐ ܠܟܘܠܟܘܢ ܕܬܕܚܠܘܢ ܠܗ ܘܬܥܒܕܘܢ ܦܘܩ̈ܕܢܘܗܝ ܒܠܒܐ ܡܠܝܐ ܘܒܢܦܫܐ ܕܡܨܛܒܝܐ

4. Maccabees 2 1:4

   ܘܢܦܬܚ ܐܕܢ̈ܝܟܘܢ ܘܠܒܘ̈ܬܟܘܢ ܠܢܡܘ̈ܣܘܗܝ ܘܠܦܘܩ̈ܕܢܘܗܝ ܘܢܥܒܕ ܥܡܟܘܢ ܫܠܡܐ

5. Maccabees 2 1:5

   ܘܢܫܡܥ ܒܥܘܬܟܘܢ ܘܢܬܪܥܐ ܠܟܘܢ ܘܠܐ ܢܫܒܘܩܟܘܢ ܒܙܒ̈ܢܐ ܕܒܝܫܬܐ

6. Maccabees 2 1:6

   ܘܗܫܐ ܗܐ ܗܪܟܐ ܚܢܢ ܘܡܨܠܝܢܢ ܥܠܝܟܘܢ

7. Maccabees 2 1:7

   ܘܒܫܢܬ ܡܐܐ ܘܫܬܝܢ ܘܬܫܥ ܒܡܠܟܘܬܗ ܕܕܡܛܪܝܘܣ ܚܢܢ ܝܗܘ̈ܕܝܐ ܟܬܒܢ ܠܟܘܢ ܒܥܩ̈ܬܐ ܘܒܐܘܠܨ̈ܢܐ ܕܡܛܝܘܢ ܒܗܠܝܢ ܫܢ̈ܝܐ ܡܢ ܕܐܫܬܕܪ ܐܝܣܘܢ ܘܐܝܠܝܢ ܕܥܡܗ ܡܢ ܡܠܟܘܬܐ ܠܐܪܥܐ ܩܕܝܫܬܐ

8. Maccabees 2 1:8

   ܘܐܘܩܕܘ ܬܪ̈ܥܐ ܘܐܫܕܘ ܕܡܐ ܙܟܝܐ ܘܨܠܝܢ ܘܒܥܝܢ ܡܢ ܡܪܝܐ ܘܫܡܥ ܒܩܠܢ ܘܩܪܒܢ ܩܘܪ̈ܒܢܐ ܘܣܡܝܕܐ ܘܐܢܗܪ̈ܢ ܫܪ̈ܓܐ ܘܣܡܢ ܠܚܡ ܐ̈ܦܐ

9. Maccabees 2 1:9

   ܘܗܫܐ ܬܗܘܘܢ ܥܒܕܝܢ ܥܕܥܕܐ ܕܡ̈ܛܠܐ ܒܟܢܘܢ ܩܕܡ

10. Maccabees 2 1:10

    ܒܫܢܬ ܡܐܐ ܘܬܡܢܐܝܢ ܘܬܡܢܐ ܐܝܠܝܢ ܕܒܐܪܫܠܡ ܘܒܝܗܘܕܐ ܘܟܠܗܘܢ ܣ̈ܒܐ ܕܝܗܘܕܐ ܠܐܪܣܛܒܘܠܘܣ ܡܠܦܢܗ ܕܦܛܠܡܐܘܣ ܡܠܟܐ ܕܐܝܬܘܗܝ ܡܢ ܫܪܒܬܐ ܕܟܗ̈ܢܐ ܡܫܝ̈ܚܝܐ ܘܠܝܗܘ̈ܕܝܐ ܕܒܡܨܪܝܢ ܫܠܡܐ ܘܚܘܠܡܢܐ

11. Maccabees 2 1:11

    ܣܓܝ ܘܪܘܪܒܐܝܬ ܡܘܕܝܢܢ ܠܐܠܗܐ ܕܩܡ ܠܢ ܘܦܨܝܢ ܡܢ ܟܠܗܘܢ ܐܘܠܨ̈ܢܐ ܕܐܬܘ ܥܠܝܢ

12. Maccabees 2 1:12

    ܟܕ ܐܬܐ ܥܠܝܢ ܓܝܪ ܡܠܟܐ ܠܩܪܒܐ ܠܡܬܟܬܫܘ ܥܠ ܡܕܝܢܬܐ ܩܕܝܫܬܐ

13. Maccabees 2 1:13

    ܕܚܩܗ ܘܫܕܝܗܝ ܠܦܪܣ ܟܕ ܓܝܪ ܐܙܠ ܠܬܡܢ ܗܘ ܘܟܠܗ ܚܝܠܗ ܗܘ ܕܡܣܬܒܪ ܗܘܐ ܕܠܐ ܡܙܕܟܐ ܐܬܩܛܠ ܒܗܝܟܠܗ ܕܢܢܝ ܕܐܚܕܘ ܘܚܒܫܘ ܐܢܘܢ ܒܢܟܠܐ ܟܘܡܪ̈ܝܗ ܕܢܢܝ

14. Maccabees 2 1:14

    ܗܘ ܓܝܪ ܐܙܠ ܗܘܐ ܠܬܡܢ ܐܝܟ ܕܢܥܡܪ ܥܡܗ ܐܢܛܝܟܘܣ ܘܪ̈ܚܡܘܗܝ ܡܛܠ ܕܢܣܒ ܩܢܝܢܐ ܣܓܝܐܐ ܒܚܘܫܒܢ ܦܪܢܝܬܐ

15. Maccabees 2 1:15

    ܘܐܬܪܡܝܘ ܘܐܫܬܘܕܝܘ ܠܗ ܟܘܡܪ̈ܝܗ ܕܢܢܝ ܘܗܘ ܕܝܢ ܟܕ ܥܠ ܥܡ ܐܢܫܐ ܙܥܘܪ̈ܐ ܠܓܘ ܡܢ ܫܘܪܗ ܕܗܝܟܠܐ

16. Maccabees 2 1:16

    ܦܬܚܘ ܘܥܠܘ ܥܠܘܗܝ ܡܢ ܬܪܥܐ ܙܥܘܪܐ ܘܐܪܡܝܘ ܥܠܘܗܝ ܟܐ̈ܦܐ ܘܩܛܠܘܗܝ ܘܦܣܩܘ ܪܫܗ ܘܫܕܘ ܠܗܠܝܢ ܕܠܒܪ

17. Maccabees 2 1:17

    ܒܟܠܡܕܡ ܕܝܢ ܡܒܪܟ ܗܘ ܐܠܗܢ ܗܘ ܕܐܫܠܡ ܐܢܘܢ ܠܪ̈ܫܝܥܐ

18. Maccabees 2 1:18

    ܡܛܠ ܗܟܝܠ ܕܥܬܝܕܝܢ ܚܢܢ ܠܡܥܒܕ ܕܘܟܝܗ ܕܗܝܟܠܐ ܒܟܢܘܢ ܩܕܡ ܒܚܡܫܐ ܘܥܣܪܝܢ ܨܒܝܢ ܕܢܘܕܥ ܐܦ ܠܟܘܢ ܕܐܦ ܐܢܬܘܢ ܬܗܘܘܢ ܥܒܕܝܢ ܠܗ ܐܝܟ ܥܕܥܕܐ ܕܡ̈ܛܠܐ ܢܐܡܪ ܠܟܘܢ ܕܝܢ ܐܦ ܥܠ ܢܘܪܐ ܟܕ ܒܢܐ ܢܚܡܝܐ ܗܝܟܠܐ ܘܡܕܒܚܐ ܘܐܣܩ ܩܘܪ̈ܒܢܐ

19. Maccabees 2 1:19

    ܘܟܕ ܐܒܗ̈ܝܢ ܐܙܠܝܢ ܗܘܘ ܠܦܪܣ ܟܗ̈ܢܐ ܙܕܝ̈ܩܐ ܕܒܗܘ ܙܒܢܐ ܢܣܒܘ ܗܘܘ ܡܢ ܢܘܪܐ ܕܡܕܒܚܐ ܡܛܫܝܐܝܬ ܘܛܫܝܘ ܒܒܪܐ ܕܠܐ ܐܝܬ ܗܘܐ ܒܗ ܡ̈ܝܐ ܘܟܣܝܘܗ ܕܠܐܢܫ ܠܐ ܬܬܝܕܥ ܕܘܟܬܗ

20. Maccabees 2 1:20

    ܟܕ ܥܒܪ ܕܝܢ ܫܢ̈ܝܐ ܣܓܝܐ̈ܬܐ ܘܫܦܪ ܠܐܠܗܐ ܐܫܬܕܪ ܢܚܡܝܐ ܡܢ ܡܠܟܐ ܕܦܪܣ ܥܡ ܒܢܝ̈ܗܘܢ ܕܟܗ̈ܢܐ ܗܢܘܢ ܕܛܫܝܘ ܗܘܘ ܢܘܪܐ

21. Maccabees 2 1:21

    ܘܫܕܪ ܐܢܘܢ ܕܢܝܬܘܢ ܢܘܪܐ ܘܐܬܘ ܘܐܡܪܘ ܕܠܐ ܐܫܟܚܘ ܢܘܪܐ ܐܠܐ ܐܢ ܡ̈ܝܐ ܕܠܝܚ̈ܐ ܘܦܩܕ ܕܢܣܒܘܢ ܘܢܝܬܘܢ ܡܢܗܘܢ ܘܟܕ ܕܝܢ ܣܠܩܘ ܕܒܚ̈ܐ ܘܩܘܪ̈ܒܢܐ ܦܩܕ ܢܚܡܝܐ ܠܟܗ̈ܢܐ ܕܢܪܣܘܢ ܡܢܗܘܢ ܥܠ ܩܝ̈ܣܐ ܘܥܠ ܕܒܚ̈ܐ

22. Maccabees 2 1:22

    ܘܟܕ ܕܝܢ ܥܒܕܘ ܗܟܢܐ ܘܥܒܪ ܥܕܢܐ ܩܠܝܠ ܕܢܚ ܠܘܩܕܡ ܫܡܫܐ ܟܕ ܥܡܘܛ ܒܥܢ̈ܢܐ ܘܗܝܕܝܢ ܕܠܩܛ ܢܘܪܐ ܪܒܬܐ ܐܝܟ ܕܢܬܡܗܘܢ ܟܠܗܘܢ

23. Maccabees 2 1:23

    ܟܗ̈ܢܐ ܕܝܢ ܒܨܠܘܬܐ ܩܝܡܝܢ ܗܘܘ ܥܕܡܐ ܕܫܠܡܬ ܬܫܡܫܬܗ ܕܢܘܪܐ ܟܗ̈ܢܐ ܕܝܢ ܘܝܘܢܬܢ ܘܫܪܟܐ ܟܕ ܢܚܬܘ ܐܡܪܘ ܗܘܘ ܕܒܨܠܘܬܗ ܕܢܚܡܝܐ ܕܠܩܬ

24. Maccabees 2 1:24

    ܐܝܬܝܗ ܗܘܬ ܕܝܢ ܨܠܘܬܗ ܗܟܢܐ ܡܪܝܐ ܡܪܝܐ ܐܠܗܐ ܐܚܝܕ ܟܠ ܘܒܪܘܝܐ ܕܟܠ ܕܚܝܠܐ ܘܚܝܠܬܢܐ ܙܕܝܩܐ ܘܡܪܚܡܢܐ ܡܠܟܐ ܒܠܚܘܕܘܗܝ ܘܒܣܝܡܐ ܒܠܚܘܕܘܗܝ

25. Maccabees 2 1:25

    ܡܬܪܣܝܢܐ ܒܠܚܘܕܘܗܝ ܙܕܝܩܐ ܚܝ ܥܠܡ̈ܐ ܘܐܚܝܕ ܟܠ ܦܪܘܩܗ ܕܝܣܪܝܠ ܡܢ ܟܠ ܒܝ̈ܫܬܐ ܗܘ ܕܓܒܐ ܠܐܒ̈ܗܝܢ ܘܩܕܫ ܐܢܘܢ

26. Maccabees 2 1:26

    ܩܒܠ ܩܘܪܒܢܐ ܗܢܐ ܥܠ ܐ̈ܦܝ ܟܠܗ ܥܡܟ ܐܝܣܪܝܠ ܘܢܛܪ ܘܩܕܫ ܡܢܬܟ ܘܝܪܬܘܬܟ

27. Maccabees 2 1:27

    ܘܟܢܫ ܒܘܕܪܢ ܘܚܪܪ ܠܐܝܠܝܢ ܕܡܫܥܒܕܝܢ ܒܝܬ ܥܡ̈ܡܐ ܛܡ̈ܐܐ ܘܡܣ̈ܠܝܐ ܘܚܘܪܒܢ ܕܢܕܥܘܢ ܥܡ̈ܡܐ ܕܐܢܬ ܗܘ ܐܠܗܢ

28. Maccabees 2 1:28

    ܘܫܢܩ ܠܐܝܠܝܢ ܕܡܬܬܪܝܡܝܢ ܘܡܫܥܒܕܝܢ ܒܫܘܒܗܪܐ

29. Maccabees 2 1:29

    ܘܫܪܪܝܗܝ ܠܥܡܟ ܒܐܬܪܟ ܩܕܝܫܐ ܐܝܟ ܕܐܡܪ ܡܘܫܐ

30. Maccabees 2 1:30

    ܟܗ̈ܢܐ ܕܝܢ ܩܝܡܝܢ ܗܘܘ ܘܡܙܡܪܝܢ ܒܬܫܒ̈ܚܬܐ

31. Maccabees 2 1:31

    ܘܟܕ ܐܫܬܠܡܘ ܕܒ̈ܚܐ ܘܩܘܪ̈ܒܢܐ ܘܡ̈ܝܐ ܕܐܫܬܚܪܘ ܦܩܕ ܢܚܡܝܐ ܕܢܣܝܡܘܢ ܘܢܚܕܪܘܢܗ ܠܕܘܟܬܐ ܒܟܐ̈ܦܐ ܪ̈ܘܪܒܬܐ

32. Maccabees 2 1:32

    ܘܟܕ ܕܝܢ ܥܒܕܘ ܗܟܢܐ ܕܠܩܬ ܫܠܗܒܝܬܐ ܕܢܘܪܐ ܥܕܡܐ ܕܓܡܪ ܢܘܗܪܐ ܕܢܘܪܐ ܕܥܠ ܡܕܒܚܐ

33. Maccabees 2 1:33

    ܟܕ ܕܝܢ ܐܬܝܕܥܬ ܨܒܘܬܐ ܘܐܬܓܠܝܬ ܠܡܠܟܐ ܕܦܪܣ ܕܒܕܘܟܬܐ ܐܝܟܐ ܕܛܫܝܘ ܢܘܪܐ ܗܢܘܢ ܕܐܫܬܒܝܘ ܗܘܘ ܡ̈ܝܐ ܕܠܝܚ̈ܐ ܐܫܬܟܚܘ ܘܡܢܗܘܢ ܩܕܫ ܢܚܡܝܐ ܘܐܝܠܝܢ ܕܥܡܗ ܠܩܘܪ̈ܒܢܐ ܘܠܕܒ̈ܚܐ

34. Maccabees 2 1:34

    ܒܢܗ ܡܠܟܐ ܠܕܘܟܬܐ ܘܥܒܕ ܒܗ ܗܝܟܠܐ ܟܕ ܒܩܗ ܠܨܒܘܬܐ

35. Maccabees 2 1:35

    ܘܝܗܒ ܗܘܐ ܠܗܘܢ ܕܝܢ ܡܠܟܐ ܡܘܗ̈ܒܬܐ ܪ̈ܘܪܒܬܐ ܘܡܝܬܪ̈ܬܐ ܗܢܘܢ ܕܝܢ ܢܣܒܝܢ ܗܘܘ ܘܝܗܒܝܢ ܠܐܝܠܝܢ ܕܚܣܝܪ ܗܘܐ ܠܗܘܢ

36. Maccabees 2 1:36

    ܩܪܐܘܗܝ ܕܝܢ ܕܒܝܬ ܢܚܡܝܐ ܓܘܢܦܬܪ ܕܡܬܬܪܓܡ ܕܘܟܝܐ ܡܬܩܪܐ ܕܝܢ ܒܝܢܬ ܣܓ̈ܝܐܐ ܢܦܬܝ

37. Maccabees 2 2:1

    ܡܫܬܟܚ ܕܝܢ ܒܟܬܒܐ ܕܐܪܡܝܐ ܢܒܝܐ ܕܦܩܕ ܕܢܣܒܘܢ ܢܘܪܐ ܐܝܠܝܢ ܕܡܢ ܒܬܪ ܗܠܝܢ ܗܘܝܢ ܐܝܟ ܕܡܚܘܐ

38. Maccabees 2 2:2

    ܘܡܦܩܕ ܠܐܝܠܝܢ ܕܡܢ ܒܬܪ ܗܠܝܢ ܗ̈ܘܝܢ ܢܒܝܐ ܕܝܗܒ ܠܗܘܢ ܢܡܘܣܐ ܕܠܐ ܢܛܥܘܢ ܦܘܩ̈ܕܢܘܗܝ ܕܡܪܝܐ ܘܢܬܗ̈ܦܟܢ ܬܪ̈ܥܝܬܗܘܢ ܟܕ ܢܚܙܘܢ ܨܠܡ̈ܐ ܕܕܗܒܐ ܘܕܣܐܡܐ ܘܨܒܬܗܘܢ

39. Maccabees 2 2:3

    ܘܐܚܪ̈ܢܝܬܐ ܕܐܝܟ ܗܠܝܢ ܐܡܪ ܗܘܐ ܘܒܥܐ ܗܘܐ ܡܢܗܘܢ ܕܠܐ ܢܪܚܩܘܢ ܢܡܘܣܐ ܡܢ ܠܒܗܘܢ

40. Maccabees 2 2:4

    ܐܝܬ ܗܘܐ ܕܝܢ ܒܟܬܒܐ ܗܟܢܐ ܐܝܟ ܕܐܬܓܠܝ ܗܘܐ ܠܗ ܠܢܒܝܐ ܦܩܕ ܕܬܗܘܐ ܐܙܠܐ ܥܡܗ ܩܒܘܬܐ ܘܡܫܟܢܐ ܟܕ ܕܝܢ ܢܦܩ ܠܛܘܪܐ ܗܘ ܕܣܠܩ ܠܗ ܡܘܫܐ ܘܚܙܐ ܝܪܬܘܬܗ ܕܡܪܝܐ

41. Maccabees 2 2:5

    ܐܬܐ ܐܪܡܝܐ ܘܐܫܟܚ ܒܝܬܐ ܕܡܥܪܬܐ ܘܥܠ ܘܣܡ ܬܡܢ ܠܡܫܟܢܐ ܘܠܩܒܘܬܐ ܘܠܡܕܒܚܐ ܕܒܣܡܐ ܘܣܟܪܗ ܠܬܪܥܐ

42. Maccabees 2 2:6

    ܘܢܦܩܘ ܐܢܫܐ ܡܢ ܐܝܠܝܢ ܕܐܙܠܘ ܥܡܗ ܐܝܟ ܕܢܕܥܘܢܗ ܠܐܘܪܚܐ ܘܠܕܘܟܬܐ ܘܠܐ ܐܫܟܚܘ

43. Maccabees 2 2:7

    ܘܟܕ ܕܝܢ ܝܕܥ ܐܪܡܝܐ ܪܫܐ ܗܘܐ ܠܗܘܢ ܘܐܡܪ ܕܠܐ ܡܬܝܕܥܐ ܕܘܟܬܐ ܥܕܡܐ ܕܟܢܫ ܐܠܗܐ ܟܢܘܫܬܗ ܕܥܡܐ ܘܢܚܣܐ ܥܠܝܗܘܢ

44. Maccabees 2 2:8

    ܘܗܝܕܝܢ ܡܪܝܐ ܢܓܠܐ ܐܢܘܢ ܠܗܠܝܢ ܘܬܬܚܙܐ ܬܫܒܘܚܬܗ ܕܡܪܝܐ ܘܥܢܢܐ ܐܝܟ ܕܡܬܓܠܝܐ ܗܘܬ ܥܠ ܡܘܫܐ ܐܝܟ ܕܐܦ ܫܠܝܡܘܢ ܒܥܐ ܕܢܬܩܕܫ ܐܬܪܐ ܪܘܪܒܐܝܬ

45. Maccabees 2 2:9

    ܡܬܡܠܠ ܗܘܐ ܕܝܢ ܕܐܝܟ ܚܟܡܬܐ ܕܐܝܬ ܗܘܐ ܠܗ ܐܣܩ ܗܘܐ ܩܘܪ̈ܒܢܐ ܘܕܒ̈ܚܐ ܕܚܘܕܬܐ ܘܕܫܘܟܠܠܗ ܕܗܝܟܠܐ

46. Maccabees 2 2:10

    ܐܝܟ ܕܐܦ ܡܘܫܐ ܨܠܝ ܠܘܬ ܡܪܝܐ ܘܢܚܬܬ ܢܘܪܐ ܡܢ ܫܡܝܐ ܘܐܟܠܬ ܕܒܚ̈ܐ ܘܩܘܪ̈ܒܢܐ ܗܟܢܐ ܐܦ ܫܠܝܡܘܢ ܨܠܝ ܘܢܚܬܬ ܢܘܪܐ ܘܐܟܠܬ ܕܒܚ̈ܐ ܘܝܩ̈ܕܐ

47. Maccabees 2 2:11

    ܐܡܪ ܗܘܐ ܓܝܪ ܡܘܫܐ ܕܥܠ ܕܠܐ ܐܬܐܟܠ ܨܦܪܝܐ ܕܚܛܗܐ ܐܟܠܬܗ ܢܘܪܐ

48. Maccabees 2 2:12

    ܗܟܘܬ ܬܘܒ ܐܦ ܫܠܝܡܘܢ ܥܒܕ ܬܡܢܝܐ ܝܘܡ̈ܝܢ

49. Maccabees 2 2:13

    ܡܬܢܝܢ ܗܘܘ ܕܝܢ ܐܦ ܒܟܬܒ̈ܐ ܘܒܥܘܗ̈ܕܢܐ ܕܢܚܡܝܐ ܗܟܢܐ ܥܒܕ ܗܘܐ ܘܟܢܫ ܗܘܐ ܘܐܬܩܢ ܟܬܒ̈ܐ ܕܡܠܟܘ̈ܬܐ ܘܕܢܒ̈ܝܐ ܘܕܕܘܝܕ ܘܐܓܪ̈ܬܐ ܕܡ̈ܠܟܐ ܕܥܠ ܩܘܪ̈ܒܢܐ ܘܕܒܚ̈ܐ

50. Maccabees 2 2:14

    ܒܗ ܕܝܢ ܒܕܡܘܬܐ ܐܦ ܝܗܘܕܐ ܡܕܡ ܕܐܬܒܕܪܘ ܗܘܘ ܡܛܠ ܩܪ̈ܒܐ ܕܗܘܘ ܥܡܢ ܟܢܫ ܐܢܘܢ ܠܟܠܗܘܢ ܘܐܝܬܝܗܘܢ ܨܐܕܝܢ

51. Maccabees 2 2:15

    ܡܕܡ ܗܟܝܠ ܕܡܬܒܥܐ ܠܟܘܢ ܡܢܗܘܢ ܫܕܪܘ ܘܣܒܘ ܠܟܘܢ

52. Maccabees 2 2:16

    ܡܛܠ ܗܟܝܠ ܕܥܬܝܕܝܢ ܚܢܢ ܠܡܥܒܕ ܕܘܟܝܐ ܟܬܒܢ ܐܦ ܠܟܘܢ ܕܐܦ ܐܢܬܘܢ ܬܗܘܘܢ ܥܒܕܝܢ

53. Maccabees 2 2:17

    ܐܠܗܐ ܕܝܢ ܕܦܪܩ ܠܥܡܗ ܒܟܘܠ ܡܕܡ ܘܝܗܒ ܝܪܬܘܬܐ ܠܟܠܢܫ ܘܡܠܟܘܬܐ ܘܟܗܢܘܬܐ ܘܩܕܝܫܘܬܐ

54. Maccabees 2 2:18

    ܐܝܟ ܕܐܫܬܘܕܝ ܒܝܕ ܢܡܘܣܐ ܗܘ ܕܒܗ ܡܣܒܪܝܢܢ ܕܒܥܓܠ ܢܪܚܡ ܥܠܝܢ ܘܢܟܢܫܢ ܡܢ ܬܚܝܬ ܫܡܝܐ ܠܐܬܪܗ ܩܕܝܫܐ ܦܨܝܢ ܓܝܪ ܡܢ ܒܝܫ̈ܬܐ ܣܓܝܐ̈ܬܐ ܘܕܟܝ ܐܦ ܠܐܬܪܐ

55. Maccabees 2 2:19

    ܥܠ ܝܗܘܕܐ ܕܝܢ ܡܩܒܝ ܘܥܠ ܐܚ̈ܘܗܝ ܘܥܠ ܕܘܟܝܗ ܕܗܝܟܠܐ ܪܒܐ ܘܡܫܒܚܐ ܘܥܠ ܚܘܕܬܗ ܕܡܕܒܚܐ

56. Maccabees 2 2:20

    ܘܬܘܒ ܕܝܢ ܥܠ ܩܪ̈ܒܐ ܕܗܘܘ ܡܢ ܩܕܡ ܐܢܛܝܟܘܣ ܐܦܝܦܢܘܣ ܘܒܪܗ ܐܘܦܛܪ

57. Maccabees 2 2:21

    ܘܥܠ ܬܕܡܪ̈ܬܐ ܕܗ̈ܘܝ ܓܠܝܐܝܬ ܡܢ ܫܡܝܐ ܥܡ ܐܝܠܝܢ ܕܚܠܦ ܝܗܘ̈ܕܝܐ ܓܢܒܪܐܝܬ ܡܬܟܬܫܝܢ ܗܘܘ ܗܟܢܐ ܕܟܕ ܙܥܘܪ̈ܐ ܗܘܘ ܒܡܢܝܢܐ ܠܟܘܠܗܘܢ ܥܡ̈ܡܐ ܕܐܪ̈ܥܬܐ ܐܝܠܝܢ ܕܒܫܝܚܢܘܬܐ ܘܒܦܩܪܘܬܐ ܐܬܝܢ ܗܘܘ ܥܠܝܗܘܢ ܪܕܦܘ ܘܒܕܪܘ ܐܢܘܢ

58. Maccabees 2 2:22

    ܗܟܢܐ ܕܗܝܟܠܐ ܘܒܝܬ ܡܩܕܫܐ ܗܘ ܕܡܫܒܚ ܒܟܠܗ ܐܪܥܐ ܒܫܠܝܐ ܘܒܢܝܚܐ ܐܫܬܟܚ ܘܡܕܝܢܬܐ ܐܬܚܪܪܬ ܡܢ ܫܘܥܒܕܐ ܕܥܡ̈ܡܐ ܘܠܢܡܘ̈ܣܐ ܕܩܪܝܒܝܢ ܗܘܘ ܠܡܬܒܕܪܘ ܟܢܫܘ ܘܬܩܢܘ ܒܨܒܝܢܗ ܕܡܪܝܐ ܘܒܪ̈ܚܡܘܗܝ ܕܗܘܘ ܥܡܗܘܢ

59. Maccabees 2 2:23

    ܘܟܘܠܗܝܢ ܕܝܢ ܐܝܠܝܢ ܕܗ̈ܘܝ ܘܐܬܟܬܒ ܒܚܡܫܐ ܣܦܪ̈ܝܢ ܡܢ ܐܝܣܘܢ ܩܝܪܝܢܝܐ ܐܬܒܛܠ ܠܢ ܒܥܡܠܐ ܣܓܝܐܐ ܕܒܦܣܝ̈ܩܬܐ ܢܟܬܘܒ ܐ̈ܢܝܢ ܒܚܕ ܣܦܪܐ

60. Maccabees 2 2:24

    ܟܕ ܚܙܝܢ ܓܝܪ ܫܦܥܐ ܕܣܘܓܐܐ ܕܦܬܓ̈ܡܐ ܘܕܥܛܠܐ ܗܝ ܠܐܝܠܝܢ ܕܨܒܝܢ ܕܢܒܥܘܢ ܥܠ ܬܫܥ̈ܝܬܐ ܕܥܒ̈ܝܕܬܐ ܘܥܠ ܬܘܢܝܐ ܕܡ̈ܠܐ ܣܓܝܐ̈ܬܐ ܡܛܠ ܣܘܓܐܐ ܕܬܘܢܝܐ ܕܦܬ̈ܓܡܐ

61. Maccabees 2 2:25

    ܐܬܒܛܠ ܠܢ ܕܒܥܡܠܐ ܢܬܩܢ ܘܢܣܝܡ ܒܦܣܝ̈ܩܬܐ ܕܠܐܝܠܝܢ ܕܩܪܝܢ ܢܪܬܐ ܢܦܫ̈ܬܗܘܢ ܒܫܪܪܐ ܘܠܐܝܠܝܢ ܕܨܒܝܢ ܕܢܠܒܟܘܢ ܒܒܛܝܠܘܬܐ ܥܘܗܕܢܐ ܕܡ̈ܠܐ ܢܐܚܕܘܢ ܦܫܝܩܐܝܬ ܘܠܟܠܗܘܢ ܐܝܠܝܢ ܕܩܪܝܢ ܢܗܝܪܐܝܬ ܢܬܚܙܐ ܥܘܕܪܢܐ

62. Maccabees 2 2:26

    ܠܢ ܕܝܢ ܕܝܠܢ ܕܐܬܒܛܠ ܠܢ ܥܠ ܗܠܝܢ ܘܟܬܒܢ ܒܦܣܝ̈ܩܬܐ ܠܐ ܦܫܝܩܐ ܗܘܬ ܠܢ ܗܕܐ ܐܠܐ ܒܕܘܥܬܐ ܘܒܥܡܠܐ ܘܒܠܐܘܬܐ ܘܒܫܗܪܐ ܣܓܝܐܐ ܦܚܡܢ ܘܐܬܩܢ ܘܟܬܒܢ ܒܦܣܝ̈ܩܬܐ

63. Maccabees 2 2:27

    ܐܟܙܢܐ ܓܝܪ ܕܐܝܢܐ ܕܨܒܐ ܕܢܬܩܢ ܘܢܛܝܒ ܚܫܡܝܬܐ ܘܢܝܚܐ ܠܣܓ̈ܝܐܐ ܠܗ ܕܝܠܗ ܠܐ ܗܘܬ ܦܫܝܩܐ ܐܠܐ ܡܛܠ ܕܨܒܐ ܕܢܢܝܚ ܘܢܒܣܡ ܠܐܝܠܝܢ ܕܩܪܐ ܚܕܝܐܝܬ ܡܩܒܠ ܥܠܘܗܝ ܥܡܠܐ ܘܠܐܘܬܐ ܗܟܢܐ ܐܦ ܚܢܢ ܡܛܠ ܒܘܣܡܐ ܘܢܝܚܐ ܕܣܓ̈ܝܐܐ ܚܕܝܐܝܬ ܩܒܠܢ ܥܠܝܢ ܥܡܠܐ ܘܠܐܘܬܐ ܘܣܝܒܪܢ ܫܚܩܐ ܣܓܝܐܐ

64. Maccabees 2 2:28

    ܕܢܟܬܘܒ ܗܟܝܠ ܥܠ ܟܠܗܝܢ ܬܫܥ̈ܝܬܐ ܡܢ ܗܕܐ ܐܫܬܐܠܢ ܘܨܒܝܢ ܕܒܚܦܝܛܘܬܐ ܘܒܥܡܠܐ ܣܓܝܐܐ ܒܦܣܝ̈ܩܬܐ ܢܡܠܠ ܐܝܠܝܢ ܕܒܣܓ̈ܝܐܬܐ ܟܬܝ̈ܒܢ ܘܐܡܝܪ̈ܢ

65. Maccabees 2 2:29

    ܐܟܙܢܐ ܓܝܪ ܕܪܒ ܢܓܪ̈ܐ ܡܐ ܕܒܢܐ ܒܝܬܐ ܠܗ ܗܘ ܒܛܝܠ ܥܠ ܟܘܠܗ ܬܪܡܝܬܗ ܕܒܢܝܢܐ ܠܐܝܢܐ ܕܝܢ ܕܨܐܪ ܘܡܨܒܬ ܒܣܡ̈ܡܢܐ ܟܠܡܕܡ ܕܡܬܒܥܐ ܡܫܐܠ ܘܒܥܐ ܥܠ ܬܨܒܝܬܗ ܕܒܝܬܐ ܗܟܢܐ ܣܒܪ ܐܢܐ ܕܐܝܬܝܗ ܐܦ ܨܐܕܝܢ

66. Maccabees 2 2:30

    ܕܥܠ ܟܘܠܗܝܢ ܠܡܒܨܐ ܘܠܡܥܩܒܘ ܘܠܡܟܬܒ ܟܠܗܝܢ ܐܟܚܕܐ ܠܗܘ ܐܝܢܐ ܕܡܫܪܐ ܡܬܒܥܐ

67. Maccabees 2 2:31

    ܕܢܪܗܛ ܕܝܢ ܒܬܪ ܦܣܝ̈ܩܬܐ ܕܡ̈ܠܐ ܘܕܢܫܬܐܠ ܡܢ ܣܓܝܐ̈ܬܐ ܡܦܣ ܗܘ ܠܗܘ ܕܒܦܣܝ̈ܩܬܐ ܣܓܝܐ̈ܬܐ ܒܙܥܘܪ̈ܝܬܐ ܡܡܠܠ

68. Maccabees 2 2:32

    ܡܢ ܗܪܟܐ ܗܟܝܠ ܢܫܪܐ ܥܠ ܬܫܥ̈ܝܬܐ ܐܝܠܝܢ ܕܡܩܕܡ̈ܢ ܐܡܝܪܢ ܘܒܦܣܝ̈ܩܬܐ ܡܪ̈ܟܒܢ ܫܦܝܪ ܗܘ ܓܝܪ ܕܩܕܡ ܬܫܥܝܬܐ ܐܢܫ ܢܣܓܐ ܢܚܘܐ ܘܢܦܝܣ ܘܠܗ ܕܝܢ ܠܬܫܥܝܬܐ ܒܦܣܝ̈ܩܬܐ ܢܡܠܠܝܗ

69. Maccabees 2 3:1

    ܟܕ ܡܕܝܢܬܐ ܩܕܝܫܬܐ ܒܫܠܝܐ ܘܒܫܠܡܐ ܥܡܪܐ ܗܘܬ ܘܢܡܘ̈ܣܐ ܫܦܝܪ ܡܬܢܛܪܝܢ ܗܘܘ ܡܛܠ ܙܕܝܩܘܬܗ ܕܚܘܢܝܐ ܪܒ ܟܗ̈ܢܐ ܘܕܣܢܐ ܗܘܐ ܒܝ̈ܫܬܐ

70. Maccabees 2 3:2

    ܐܦ ܡ̈ܠܟܐ ܓܕܫ ܕܢܝܩܪܘܢܝܗܝ ܠܒܝܬܐ ܘܠܐܬܪܐ ܒܐܝܩܪ̈ܐ ܘܒܩܘܪ̈ܒܢܐ ܪ̈ܘܪܒܐ ܘܡܫܒ̈ܚܐ

71. Maccabees 2 3:3

    ܐܝܟ ܕܐܦ ܣܠܘܩܘܣ ܡܠܟܐ ܕܐܣܝܐ ܝܗܒ ܗܘܐ ܡܢ ܕܝܠܗ ܟܠܡܕܡ ܕܐܙܠ ܗܘܐ ܠܬܫܡܫܬܐ ܕܩܘܪ̈ܒܢܐ

72. Maccabees 2 3:4

    ܣܝܡܘܢ ܕܝܢ ܕܐܝܬܘܗܝ ܗܘܐ ܡܢ ܫܒܛܐ ܕܒܢܝܡܝܢ ܘܥܒܝܕ ܗܘܐ ܪܒ ܒܝܬܐ ܩܡ ܠܘܩܒܠ ܟܗ̈ܢܐ ܡܥܕܪ ܗܘܐ ܓܝܪ ܠܥܘܠܐ ܕܗܘܐ ܗܘܐ ܒܡܕܝܢܬܐ

73. Maccabees 2 3:5

    ܘܟܕ ܠܐ ܐܫܟܚ ܕܢܙܟܝܘܗܝ ܠܚܘܢܝܐ ܪܒ ܟܗ̈ܢܐ ܐܙܠ ܠܘܬ ܐܦܘܠܘܢܝܣ ܒܪ ܬܪܣܝܣ ܗܘ ܕܒܗܘ ܙܒܢܐ ܐܝܬܘܗܝ ܗܘܐ ܪܫܐ ܘܡܕܒܪܢܐ ܕܣܘܪܝܐ ܘܕܦܘܢܝܩܐ

74. Maccabees 2 3:6

    ܘܐܘܕܥܗ ܥܠ ܓܙܐ ܕܐܝܬ ܗܘܐ ܒܗܝܟܠܐ ܕܒܐܘܪܫܠܡ ܘܐܡܪ ܠܗ ܕܠܐ ܡܣܬܝܟ ܘܠܐ ܡܬܡܢܐ ܥܘܬܪܐ ܕܐܝܬ ܒܗ ܘܐܡܪ ܕܗܢܐ ܟܠܗ ܠܐ ܙܕܩ ܕܢܬܬܣܝܡ ܒܚܘܫܒܢܐ ܕܕܒ̈ܚܐ ܘܕܩܘܪ̈ܒܢܐ ܐܠܐ ܕܢܗܘܐ ܬܚܝܬ ܫܘܠܛܢܗ ܕܡܠܟܐ

75. Maccabees 2 3:7

    ܐܙܠ ܕܝܢ ܐܦܘܠܘܢܝܘܣ ܘܐܘܕܥܗ ܠܡܠܟܐ ܥܠ ܓܙܐ ܘܥܘܬܪܐ ܕܐܬܐܡܪ ܠܗ ܡܠܟܐ ܕܝܢ ܩܪܐ ܠܗܠܝܕܪܘܣ ܗܘ ܕܥܒܝܕ ܗܘܐ ܥܠ ܨܒ̈ܘܬܐ ܘܦܩܕܗ ܘܫܕܪܗ ܕܢܣܒ ܘܢܝܬܐ ܟܠܗ ܓܙܐ ܘܥܘܬܪܐ ܕܐܬܐܡܪ ܠܗ ܥܠܘܗܝ

76. Maccabees 2 3:8

    ܘܒܪܫܥܬܗ ܕܝܢ ܗܠܝܕܘܪܘܣ ܢܦܩ ܗܘܐ ܘܐܙܠ ܥܠ ܡܕܝ̈ܢܬܐ ܕܣܘܪܝܐ ܘܕܦܘܢܝܩܐ ܘܡܣܬܪܗܒ ܗܘܐ ܕܢܥܒܕ ܘܢܫܠܡ ܦܘܩܕܢܗ ܕܡܠܟܐ

77. Maccabees 2 3:9

    ܘܟܕ ܐܬܐ ܕܝܢ ܗܠܝܕܪܘܣ ܠܐܘܪܫܠܡ ܐܬܩܒܠ ܒܐܝܩܪ̈ܐ ܣܓ̈ܝܐܐ ܡܢ ܪܒܟܗܢܐ ܘܡܢ ܡܕܝܢܬܐ ܘܓܠܐ ܠܗܘܢ ܥܠ ܡܕܡ ܕܐܫܬܕܪ ܥܠܘܗܝ ܕܐܬܐܡܪ ܠܡܠܟܐ ܘܡܫܐܠ ܗܘܐ ܠܗܘܢ ܕܐܢ ܗܠܝܢ ܗܟܢܐ ܐܝܬܝܗܝܢ ܒܫܪܪܐ

78. Maccabees 2 3:10

    ܘܐܡܪ ܠܗ ܕܝܢ ܘܐܘܕܥܗ ܪܒܟܗܢܐ ܕܦܪ̈ܬܩܣ ܐ̈ܢܝܢ ܕܣܝ̈ܡܢ ܕܝ̈ܬܡܐ ܘܕܐܪ̈ܡܠܬܐ

79. Maccabees 2 3:11

    ܘܡܢܗܝܢ ܕܝܢ ܕܗܝܪܩܢܘܣ ܒܪ ܛܘܒܝܐ ܓܒܪܐ ܡܝܩܪܐ ܘܥܬܝܪܐ ܘܠܐ ܗܘܐ ܐܝܟ ܡܕܡ ܕܐܬܐ ܘܐܡܪ ܒܡܐܟܠ ܩܪܨܐ ܣܝܡܘܢ ܪܫܝܥܐ ܟܠܗ ܕܝܢ ܥܒܕܐ ܗܘܐ ܐܪܒܥܡܐܐ ܟܟܪ̈ܝܢ ܕܣܐܡܐ ܘܡܐܬܝܢ ܕܕܗܒܐ

80. Maccabees 2 3:12

    ܠܐ ܕܝܢ ܡܫܟܚܝܢ ܡܬܛܠܡܝܢ ܘܡܬܓܠܙܝܢ ܐܝܠܝܢ ܕܗܝܡܢܘ ܠܩܕܝܫܘܬܗ ܕܐܬܪܐ ܘܠܢܟܦܘܬܗ ܕܗܝܟܠܐ ܘܠܫܡܗ ܪܒܐ ܘܡܫܒܚܐ ܕܒܟܠܗ ܥܠܡܐ ܕܠܐ ܡܬܚܠܨ ܘܠܐ ܡܬܓܢܒ

81. Maccabees 2 3:13

    ܗܠܝܕܪܘܣ ܕܝܢ ܡܛܠ ܦܘܩܕܢܗ ܕܡܠܟܐ ܐܡܪ ܗܘܐ ܕܗܠܝܢ ܠܒܝܬ ܡܠܟܐ ܡܬܒܥܐ ܠܗܝܢ ܕܢܥ̈ܠܢ ܘܢܬܬܣܝ̈ܡܢ

82. Maccabees 2 3:14

    ܘܐܩܝܡ ܠܗܘܢ ܝܘܡܐ ܕܐܡܬܝ ܢܥܘܠ ܘܢܚܙܐ ܐ̈ܢܝܢ ܘܢܫܬܠܛ ܥܠܝܗܝܢ ܘܠܐ ܗܘܐ ܙܥܘܪ ܐܓܘܢܐ ܕܐܝܬ ܗܘܐ ܒܟܠܗ ܡܕܝܢܬܐ

83. Maccabees 2 3:15

    ܟܗ̈ܢܐ ܕܝܢ ܒܠܒܘ̈ܫܝܗܘܢ ܕܟܗܢܘܬܐ ܫܕܘ ܢܦܫܗܘܢ ܥܠ ܐܪܥܐ ܘܓܥܝܢ ܗܘܘ ܘܒܥܝܢ ܡܢ ܡܢܘ ܕܣܡ ܠܗܘܢ ܢܡܘܣܐ ܕܢܬܢܛܪ̈ܢ ܦܪ̈ܬܩܣ ܠܡܪ̈ܝܗܝܢ ܡܫܠܡܢܐܝܬ

84. Maccabees 2 3:16

    ܘܬܘܒ ܕܝܢ ܟܠܗܘܢ ܐܝܠܝܢ ܕܚܙܝܢ ܗܘܘ ܠܪܒܟܗܢܐ ܡܬܡܣܝܢ ܗܘܘ ܠܒܘܬ̈ܗܘܢ ܚܙܘܐ ܓܝܪ ܕܐܦܘ̈ܗܝ ܘܫܘܚܠܦܐ ܕܚܙܬܗ ܡܘܕܥ ܗܘܐ ܥܠ ܫܚܩܐ ܕܢܦܫܗ

85. Maccabees 2 3:17

    ܢܣܝܟܐ ܗܘܬ ܓܝܪ ܘܫܪܝܐ ܥܠ ܓܒܪܐ ܛܝܒܘܬܐ ܘܫܘܦܪܐ ܕܚܙܬܐ ܥܠ ܦܓܪܗ ܘܡܛܠ ܗܢܐ ܐܬܝܕܥ ܚܫܐ ܕܟܐܒܐ ܕܐܝܬ ܗܘܐ ܠܗ ܒܢܦܫܗ

86. Maccabees 2 3:18

    ܘܬܘܒ ܢܦܩܝܢ ܗܘܘ ܡܢ ܒܬ̈ܐ ܟܢܫ̈ܝܢ ܟܢܫ̈ܝܢ ܘܒܥܝܢ ܗܘܘ ܘܡܬܟܫܦܝܢ ܡܛܘܠ ܗܝܟܠܐ ܕܠܐ ܢܗܘܐ ܠܓܘܚܟܐ ܘܠܒܘܙܚܐ

87. Maccabees 2 3:19

    ܢܫ̈ܐ ܕܝܢ ܟܕ ܡܚ̈ܝܢ ܣܩ̈ܐ ܒܚܨܝܗܝܢ ܦܗ̈ܝܢ ܗܘ̈ܝ ܒܝܬ ܐܘܪ̈ܚܬܐ ܘܒܬܘ̈ܠܬܐ ܚܒ̈ܝܫܬܐ ܡܢܗܝܢ ܠܬܪ̈ܥܐ ܪ̈ܗܛܢ ܗ̈ܘܝ ܘܡܢܗܝܢ ܠܫܘܪܐ ܘܡܢܗܝܢ ܡܢ ܟܘ̈ܐ ܡܕܝܩ̈ܢ ܗܘ̈ܝ

88. Maccabees 2 3:20

    ܟܠܗܝܢ ܕܝܢ ܦܪ̈ܝܣܢ ܗܘ̈ܝ ܐܝ̈ܕܝܗܝܢ ܘܓ̈ܥܝܢ ܗܘ̈ܝ ܘܒܥ̈ܝܢ ܡܢ ܥܡܘܪܐ ܕܫܡܝܐ

89. Maccabees 2 3:21

    ܐܝܬܝܗ ܗܘܬ ܕܝܢ ܨܒܘܬܐ ܕܐܢܫ ܢܚܙܐ ܘܢܪܚܡ ܥܠ ܫܚܩܗ ܘܥܠ ܐܘܠܨܢܗ ܕܥܡܐ ܘܥܠ ܐܓܘܢܗ ܘܚܫܗ ܘܣܘܟܝܗ ܕܪܒ ܟܗ̈ܢܐ

90. Maccabees 2 3:22

    ܟܠܗܘܢ ܕܝܢ ܓܥܝܢ ܗܘܘ ܘܒܥܝܢ ܡܢ ܐܠܗܐ ܐܚܝܕ ܟܠ ܕܐܝܠܝܢ ܕܐܬܗܝܡܢ ܠܐܝܠܝܢ ܕܗܝܡܢܘ ܐ̈ܢܝܢ ܢܬܢܛܪ̈ܢ ܡܫܠܡܢܐܝܬ ܒܟܘܠ ܙܘܗܪ

91. Maccabees 2 3:23

    ܗܠܝܕܪܘܣ ܕܝܢ ܡܬܚܦܛ ܗܘܐ ܕܢܫܠܡ ܨܒܘܬܐ ܕܐܙܠ ܗܘܐ ܡܛܠܬܗ

92. Maccabees 2 3:24

    ܘܫܪܝ ܗܘܐ ܕܢܥܘܠ ܠܒܝܬ ܓܙܐ ܥܡ ܠܒܫ̈ܐ ܕܙܝܢܐ ܘܦ̈ܠܚܐ ܕܥܡܗ ܘܒܪܫܥܬܗ ܐܬܚܙܝ ܡܪܝܐ ܕܪ̈ܘܚܬܐ ܘܐܠܗܐ ܕܟܠ ܚܝܠ ܘܕܟܘܠ ܫܘܠܛܢ ܘܥܒܕ ܠܗܘܢ ܬܕܡܘܪܬܐ ܘܓܠܝܢܐ ܪܒܐ ܐܝܟܢܐ ܕܟܠܗܘܢ ܐܝܠܝܢ ܕܐܡܪܚܘ ܠܡܥܠ ܢܫܬܪܘܢ ܘܢܦܠܘܢ ܒܬܡܗܐ ܕܚܝܠܐ ܕܐܠܗܐ ܕܐܬܚܙܝ ܥܠܝܗܘܢ

93. Maccabees 2 3:25

    ܐܬܚܙܝ ܠܗܘܢ ܓܝܪ ܣܘܣܝܐ ܚܕ ܕܚܝܠܐ ܟܕ ܪܟܝܒ ܥܠܘܗܝ ܓܒܪܐ ܕܫܦܝܪ ܒܚܙܘܗ ܣܓܝ ܘܫܒܝܚ ܒܥܘܛܦܐ ܕܠܒܘܫܗ ܕܐܬܐ ܗܘܐ ܒܚܐܦܐ ܘܒܩܠܐ ܕܢܩܫܐ ܕܙܝܢܗ ܡܙܝܥ ܗܘܐ ܩܕܡ ܗܠܝܕܘܪܘܣ ܘܡܬܚܙܐ ܗܘܐ ܕܝܢ ܪܟܒܗ ܕܡܚܙܩ ܗܘܐ ܒܙܝܢܐ ܕܕܗܒܐ

94. Maccabees 2 3:26

    ܘܐܬܚܙܝܘ ܬܘܒ ܥܡܗ ܬܪܝܢ ܥܠܝܡ̈ܝܢ ܐܚܪ̈ܢܝܢ ܕܫܦܝܪܝܢ ܒܚܙܘܗܘܢ ܘܫܒܝܚܝܢ ܒܚܝܠܐ ܘܝܐܝܢ ܘܬܡܝܗܝܢ ܒܠܒܘܫ̈ܝܗܘܢ ܘܩܝܡܝܢ ܗܘܘ ܡܢ ܬܪ̈ܝܗܘܢ ܓܒܘ̈ܗܝ ܕܗܠܝܕܪܘܣ ܘܡܢܓܕܝܢ ܗܘܘ ܠܗ ܒܢܓ̈ܕܐ ܪ̈ܘܪܒܐ

95. Maccabees 2 3:27

    ܘܢܦܠ ܡܢ ܫܠܝܐ ܥܠ ܐܪܥܐ ܟܕ ܩܛܝܪ ܥܠܘܗܝ ܚܫܘܟܐ ܣܓܝܐܐ ܘܛܥܢܘܗܝ ܘܐܦܩܘܗܝ ܠܒܪ ܠܕܪܬܐ

96. Maccabees 2 3:28

    ܠܗܘ ܕܡܢ ܩܕܡ ܩܠܝܠ ܒܫܘܒܗܪܐ ܘܒܚܝܠܐ ܣܓܝܐܐ ܥܐܠ ܗܘܐ ܠܒܝܬ ܓܙܐ ܘܫܕܐ ܗܘܐ ܕܠܐ ܚܝܠ ܟܕ ܠܐ ܡܫܟܚ ܗܘܐ ܕܢܥܕܪ ܢܦܫܗ ܘܐܬܚܙܝ ܓܠܝܐܝܬ ܚܝܠܗ ܕܐܠܗܐ

97. Maccabees 2 3:29

    ܘܫܕܝܗܝ ܟܕ ܡܫܪܐ ܗܘܐ ܒܡܥܒܕܢܘܬܐ ܕܩܘܫܬܐ ܟܕ ܠܝܬ ܗܘܐ ܠܗ ܣܒܪܐ ܐܦܠܐ ܣܘܟܝܐ ܕܚ̈ܝܐ

98. Maccabees 2 3:30

    ܥܡܐ ܕܝܢ ܒܪܟܘ ܠܡܪܝܐ ܗܘ ܕܥܒܕ ܬܫܒܘܚܬܐ ܠܐܬܪܗ ܘܗܝܟܠܐ ܗܘ ܕܡܢ ܩܕܡ ܩܠܝܠ ܡܠܐ ܗܘܐ ܙܘܥܬܐ ܘܐܪܗܒܐ ܒܣܘܥܪܢܗ ܘܒܓܠܝܢܗ ܕܡܪܝܐ ܐܚܝܕ ܟܠ ܐܬܡܠܝ ܗܘܐ ܒܘܣܡܐ ܘܚܕܘܬܐ

99. Maccabees 2 3:31

    ܘܒܪ ܫܥܬܗ ܕܝܢ ܩܪܒܘ ܐܢܫܐ ܡܢ ܪ̈ܚܡܘܗܝ ܕܗܠܝܕܪܣ ܘܒܥܝܢ ܗܘܘ ܡܢ ܚܘܢܝܐ ܕܢܨܠܐ ܘܢܒܥܐ ܡܢ ܡܪܝܐ ܕܢܬܠ ܚ̈ܝܐ ܠܗܘ ܕܡܫܠܡܢܐܝܬ ܪܡܐ ܗܘܐ ܕܠܐ ܣܒܪܐ

100. Maccabees 2 3:32

     ܐܬܪܥܝ ܗܘܐ ܕܝܢ ܪܒ ܟܗ̈ܢܐ ܕܕܠܡܐ ܡܡܬܘܡ ܢܣܒܪ ܡܠܟܐ ܕܒܡܥܒܕܢܘܬܐ ܡܕܡ ܗܘܬ ܡܢ ܝܗܘ̈ܕܝܐ ܥܠ ܗܠܝܕܪܘܣ ܘܩܪܒ ܩܘܪ̈ܒܢܐ ܥܠ ܐ̈ܦܝ ܚܝ̈ܘܗܝ ܕܓܒܪܐ

Next → — showing 1–100 of 555

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.