← All works

Peshitta Maccabees 1 B

Peshitta (Syriac Old Testament) · 908 sections

1. Maccabees 1 B 9:33

   ܘܝܕܥ ܝܘܢܬܢ ܘܫܡܥܘܢ ܐܚܘܗܝ ܘܟܘܠܗܘܢ ܕܥܡܗ ܘܥܪܩܘ ܠܡܕܒܪܐ ܕܬܩܘܥ ܘܫܪܘ ܥܠ ܡ̈ܝܐ ܕܓܘܒܐ ܕܐܣܦܪ

2. Maccabees 1 B 9:34

   ܘܝܕܥ ܒܝܟܪܘܣ ܠܝܘܡܐ ܕܫܒܬܐ ܘܐܬܐ ܗܘ ܘܟܠܗ ܚܝܠܗ ܠܥܒܪܐ ܕܝܘܪܕܢܢ

3. Maccabees 1 B 9:35

   ܘܫܕܪ ܠܐܚܘܗܝ ܡܕܒܪܢܐ ܠܟܢܫܐ ܘܒܥܐ ܡܢ ܒܛܢ̈ܝܐ ܪ̈ܚܡܘܗܝ ܕܢܓܥܠܘܢ ܨܐܕܝܗܘܢ ܐܝܩܪܬܗܘܢ ܣܓܝܐܬܐ

4. Maccabees 1 B 9:36

   ܘܢܦܩܘ ܒܢ̈ܝ ܥܡܪܝ ܡܢ ܡܐܕܒܐ ܘܐܚܕܘܗܝ ܠܝܘܚܢܢ ܘܠܟܠ ܡܕܡ ܕܐܝܬ ܗܘܐ ܠܗ ܘܫܩܠܘ ܘܐܙܠܘ

5. Maccabees 1 B 9:37

   ܡܢ ܒܬܪ ܗܠܝܢ ܐܬܐܡܪ ܠܝܘܢܬܢ ܘܠܫܡܥܘܢ ܐܚܘܗܝ ܕܒܢ̈ܝ ܥܡܪܝ ܥܒܕܝܢ ܚܠܘܠܐ ܪܒܐ ܘܡܝܬܝܢ ܟܠܬܐ ܡܢ ܢܚܠܒܬ ܒܪܬܗ ܕܚܕ ܡܢ ܡܪ̈ܘܬܐ ܪ̈ܘܪܒܢܐ ܕܟܢܥܢ ܒܙܘܚܐ ܪܒܐ

6. Maccabees 1 B 9:38

   ܘܐܬܕܟܪܘ ܕܡܐ ܕܝܘܚܢܢ ܐܚܘܗܘܢ ܘܩܡܘ ܘܟܡܢܘ ܬܚܝܬ ܣܬܪܐ ܕܛܘܪܐ

7. Maccabees 1 B 9:39

   ܘܐܪܝܡܘ ܥܝܢܝ̈ܗܘܢ ܘܚܙܘ ܘܗܐ ܫܓܝܫܬܐ ܘܝܩܝܪܬܐ ܣܓܝܐܬܐ ܘܚܬܢܐ ܢܦܩ ܘܐܚܘ̈ܗܝ ܘܪ̈ܚܡܘܗܝ ܠܐܘܪܥܗܘܢ ܒܦܠܓ̈ܐ ܘܒܪ̈ܒܝܥܐ ܘܙܝܢܐ ܣܓܝܐܐ

8. Maccabees 1 B 9:40

   ܘܩܡܘ ܥܠܝܗܘܢ ܡܢ ܟܡܐܢܐ ܘܩܛܠܘ ܐܢܘܢ ܘܢܦܠܘ ܚܪ̈ܝܒܐ ܣ̈ܓܝܐܐ ܘܕܐܫܬܚܪܘ ܥܪܩܘ ܠܛܘܪܐ ܘܢܣܒܘ ܟܠܗ ܒܙܬܗܘܢ

9. Maccabees 1 B 9:41

   ܘܐܬܗܦܟ ܚܠܘܠܐ ܠܐܒܠܐ ܘܩܠܐ ܕܙܡܪܗܘܢ ܠܐܘ̈ܠܝܬܐ

10. Maccabees 1 B 9:42

    ܘܐܬܬܒܥܘ ܬܒܥܬܐ ܕܕܡܐ ܕܐܚܘܗܘܢ ܘܗܦܟܘ ܠܗܘܢ ܠܡܪܓܐ ܕܥܠ ܝܘܪܕܢܢ ܢܗܪܐ

11. Maccabees 1 B 9:43

    ܘܫܡܥ ܒܝܟܪܘܣ ܘܐܬܐ ܒܝܘܡܐ ܕܫܒܬܐ ܥܕܡܐ ܠܣܦܬ ܝܘܪܕܢܢ ܒܚܝܠܐ ܣܓܝܐܐ

12. Maccabees 1 B 9:44

    ܘܐܡܪ ܝܘܢܬܢ ܠܕܥܡܗ ܢܩܘܡ ܗܫܐ ܘܢܩܪܒ ܥܠ ܐ̈ܦܝ ܢܦܫ̈ܬܢ ܝܘܡܢܐ ܓܝܪ ܠܐ ܗܘܐ ܐܝܟ ܕܐܬܡܠܝ ܘܐܝܟ ܕܡܢܬܡܠܝ

13. Maccabees 1 B 9:45

    ܗܐ ܓܝܪ ܩܪܒܐ ܩܕܡܝܢ ܘܒܣܬܪܢ ܡ̈ܝܐ ܓܝܪ ܕܝܘܪܕܢܢ ܡܟܐ ܘܡܟܐ ܘܡܪ̈ܓܐ ܘܥܒ̈ܐ ܘܠܝܬ ܐܬܪܐ ܠܡܣܛܐ

14. Maccabees 1 B 9:46

    ܗܫܐ ܕܝܢ ܓܥܘ ܠܫܡܝܐ ܐܝܟܢܐ ܕܬܬܦܨܘܢ ܡܢ ܐܝܕܐ ܕܒܥܠܕܒ̈ܒܝܟܘܢ

15. Maccabees 1 B 9:47

    ܘܫܪܝ ܩܪܒܐ ܘܦܫܛ ܐܝܕܗ ܝܘܢܬܢ ܠܡܩܛܠܗ ܠܒܝܟܪܘܣ ܘܓܥܨ ܠܗ ܡܢܗ ܠܒܣܬܪܗ

16. Maccabees 1 B 9:48

    ܘܫܘܪ ܝܘܢܬܢ ܘܕܥܡܗ ܠܝܘܪܕܢܢ

17. Maccabees 1 B 9:49

    ܢܦܠܘ ܕܝܢ ܡܢ ܕܒܝܬ ܒܝܟܪܘܣ ܒܗܘ ܝܘܡܐ ܬܠܬܐ ܐ̈ܠܦܝܢ ܓܒܪ̈ܝܢ

18. Maccabees 1 B 9:50

    ܘܗܦܟܘ ܠܐܘܪܫܠܡ ܘܒܢܘ ܡܕܝܢ̈ܬܐ ܥܫܝܢ̈ܬܐ ܒܝܗܘܕܐ ܘܠܚܣܢܐ ܕܐܝܪܝܚܘ ܘܠܥܡܐܘܣ ܘܠܒܝܬ ܚܘܪܝܒ ܘܠܒܬܐܝܠ ܕܒܬܡܢܬ ܘܠܦܪܥܬܘܢ ܘܠܬܦܘܚ ܫܘܪ̈ܐ ܪ̈ܡܐ ܘܬܪ̈ܥܐ ܘܡܘ̈ܟܠܐ

19. Maccabees 1 B 9:51

    ܘܐܩܝܡ ܒܗܝܢ ܡܛܪ̈ܬܐ ܠܒܥܠܕܒܒܘܬܐ ܕܐܝܣܪܝܠ

20. Maccabees 1 B 9:52

    ܘܐܥܫܢܗ ܠܒܝܬ ܫܘܪܐ ܘܠܓܙܪ ܘܠܚܣܢܐ ܘܫܒܩ ܒܗ ܚܝ̈ܠܘܬܐ ܘܣܝܡܐ ܕܐܣܢܐ ܟܡܐ ܕܡܬܒܥܐ

21. Maccabees 1 B 9:53

    ܘܢܣܒ ܠܒܢ̈ܝ ܡܕܒܪ̈ܢܐ ܕܐܪܥܐ ܠܗܡܝܪ̈ܐ ܘܣܡ ܐܢܘܢ ܒܚܣܢܐ ܕܐܘܪܫܠܡ ܒܝܬ ܢܛܘܪܬܐ

22. Maccabees 1 B 9:54

    ܘܒܫܢܬ ܡܐܐ ܘܚܡܫܝܢ ܘܬܠܬ ܒܝܪܚܐ ܕܬܪܝܢ ܦܩܕ ܐܠܩܝܡܘܣ ܠܡܥܩܪ ܫܘܪܐ ܕܕܪܬ ܩܘܕܫܐ ܓܘܝܬܐ ܘܠܡܣܬܪ ܥܒ̈ܕܐ ܕܢܒ̈ܝܐ ܘܫܪܝ ܠܡܣܬܪ

23. Maccabees 1 B 9:55

    ܒܙܒܢܐ ܗܘ ܒܠܥ ܐܠܩܝܡܘܣ ܘܐܬܥܟܪܘ ܥܒ̈ܕܘܗܝ ܘܐܣܬܟܪ ܚܟܗ ܘܐܫܬܕܝ ܘܠܐ ܡܫܟܚ ܗܘܐ ܬܘܒ ܠܡܡܠܠܘ ܡܠܬܐ ܘܕܢܦܩܕ ܥܠ ܒܝܬܗ

24. Maccabees 1 B 9:56

    ܘܡܝܬ ܒܙܒܢܐ ܗܘ ܒܬܫܢܝܩܐ ܪܒܐ

25. Maccabees 1 B 9:57

    ܘܚܙܐ ܒܝܟܪܘܣ ܕܡܝܬ ܠܗ ܐܠܩܝܡܣ ܘܗܦܟ ܠܗ ܠܘܬ ܡܠܟܐ ܘܫܠܝܬ ܐܪܥܐ ܕܝܗܘܕܐ ܬܪ̈ܬܝܢ ܫ̈ܢܝܢ

26. Maccabees 1 B 9:58

    ܘܐܬܪܥܝܘ ܟܠܗܘܢ ܥܘ̈ܠܐ ܘܐܡܪܝܢ ܗܐ ܝܘܢܬܢ ܘܕܥܡܗ ܒܫܠܝܐ ܥܡܪܝܢ ܘܬܟܝܠܐܝܬ ܗܫܐ ܢܣܩܝܘܗܝ ܠܒܝܟܪܘܣ ܘܢܐܚܘܕ ܐܢܘܢ ܠܟܠܗܘܢ ܒܠܠܝܐ ܚܕ

27. Maccabees 1 B 9:59

    ܘܐܙܠܘ ܘܡܠܟܘܗܝ

28. Maccabees 1 B 9:60

    ܘܫܩܠ ܠܡܐܬܐ ܥܠܝܗܘܢ ܒܚܝܠܐ ܣܓܝܐܐ ܘܫܕܪ ܐܓܪ̈ܬܐ ܡܛܫܝܐܝܬ ܠܟܠܗܘܢ ܡܥܕܪ̈ܢܘܗܝ ܕܐܝܬ ܒܝܗܘܕ ܐܝܟ ܕܢܐܚܕܘܢ ܠܝܘܢܬܢ ܘܠܐܝܠܝܢ ܕܥܡܗ ܘܠܐ ܡܫܟܚܝܢ ܗܘܘ ܡܛܠ ܕܐܬܓܠܝܬ ܠܗ ܬܪܥܝܬܗܘܢ

29. Maccabees 1 B 9:61

    ܘܐܚܕܘ ܡܢ ܓܒܪ̈ܐ ܕܐܬܪܐ ܪ̈ܝܫܢܐ ܕܒܝܫܬܐ ܐܝܟ ܚܡܫܝܢ ܓܒܪ̈ܝܢ ܘܩܛܠܘ ܐܢܘܢ

30. Maccabees 1 B 9:62

    ܘܫܢܝ ܝܘܢܬܢ ܘܫܡܥܘܢ ܘܐܝܠܝܢ ܕܥܡܗ ܠܒܝܬ ܒܣܝܣ ܕܒܡܕܒܪܐ ܘܒܢܐ ܡܣܬܪ̈ܬܗ ܘܫܪܪܗ

31. Maccabees 1 B 9:63

    ܘܝܕܥ ܒܝܟܪܘܣ ܘܟܢܫ ܟܠܗ ܟܢܫܗ ܘܠܕܡܢ ܝܗܘܕ ܫܠܚ ܕܐܬܘܥܕܘ

32. Maccabees 1 B 9:64

    ܘܐܬܐ ܫܪܐ ܒܝܬ ܒܣܝܣ ܘܐܩܪܒ ܥܡܗ ܝܘܡ̈ܬܐ ܣ̈ܓܝܐܐ ܘܥܒܕ ܡܐܟܢ̈ܘܬܐ

33. Maccabees 1 B 9:65

    ܘܫ̣ܒܩ ܝܘܢܬܢ ܠܫܡܥܘܢ ܐܚܘܗܝ ܒܡܕܝܢܬܐ ܘܢܦܩ ܠܐܬܪܐ ܘܐܬܐ ܠܥܡܬܘܬ

34. Maccabees 1 B 9:66

    ܘܦܩܕ ܠܥܕܘܪ ܘܠܐܚ̈ܘܗܝ ܘܠܒ̈ܢܝ ܦܣܠܘܢ ܒܡܫ̈ܟܢܝܗܘܢ ܘܫܪܝ ܚܪܒ ܘܣܠܩ ܒܚܝ̈ܠܘܬܐ

35. Maccabees 1 B 9:67

    ܘܫܡܥܘܢ ܘܐܝܠܝܢ ܕܥܡܗ ܢܦܩܘ ܡܢ ܡܕܝܢܬܐ ܘܐܘܩܕ ܐ̈ܢܝܢ ܠܡܐ̈ܟܢܘܬܐ

36. Maccabees 1 B 9:68

    ܘܐܩܪܒ ܥܡ ܒܝܟܪܘܣ ܘܐܬܬܒܪ ܩܕܡܝܗܘܢ ܘܐܠܨܝܢ ܗܘܘ ܠܗ ܛܒ ܕܐܝܬܝܗ ܗܘܬ ܡܚܫܒܬܗ ܘܡܐܬܝܬܗ ܣܪܝܩܐ

37. Maccabees 1 B 9:69

    ܘܐܬܚܡܬ ܪܘܓܙܗ ܥܠ ܗܢܘܢ ܓܒܪ̈ܐ ܥܘ̈ܠܐ ܕܡܠܟܘܗܝ ܕܢܐܬܐ ܠܐܬܪܐ ܘܩܛܠ ܡܢܗܘܢ ܣܘܓܐܐ ܘܐܬܪܥܝ ܠܡܐܙܠ ܠܐܬܪܗ

38. Maccabees 1 B 9:70

    ܘܝܕܥ ܝܘܢܬܢ ܘܫܕܪ ܠܘܬܗ ܐܝܙ̈ܓܕܐ ܕܢܥܒܕ ܥܡܗ ܫܠܡܐ ܘܕܢܦܢܐ ܠܗ ܫܒܝܬܐ

39. Maccabees 1 B 9:71

    ܘܩܒܠ ܘܐܨܛܒܝ ܘܥܒܕ ܐܝܟ ܡ̈ܠܘܗܝ ܘܝܡܐ ܠܗ ܕܠܐ ܢܣܥܘܪ ܒܝܫܬܐ ܟܘܠܗܘܢ ܝܘܡ̈ܬܐ ܕܚܝ̈ܘܗܝ

40. Maccabees 1 B 9:72

    ܘܦܢܝ ܠܗ ܫܒܝܬܐ ܩܕܡܝܬܐ ܕܫܒܐ ܡܢ ܝܗܘܕ ܘܗܦܟ ܘܐܙܠ ܠܐܬܪܗ ܘܠܐ ܐܘܣܦ ܬܘܒ ܠܡܐܬܐ ܠܬܚܘܡܗܘܢ

41. Maccabees 1 B 9:73

    ܘܫܠܝܬ ܚܪܒܐ ܡܢ ܐܝܣܪܐܝܠ ܘܥܡܪ ܝܘܢܬܢ ܒܡܟܡܣ ܘܫܪܝ ܝܘܢܬܢ ܠܡܕܢ ܠܥܡܐ ܘܡܚܒܠ ܗܘܐ ܠܪ̈ܫܝܥܐ ܕܐܝܣܪܐܝܠ

42. Maccabees 1 B 10:1

    ܒܫܢܬ ܡܐܐ ܘܫܬܝܢ ܫ̈ܢܝܢ ܣܠܩ ܐܠܟܣܢܕܪܘܣ ܒܪ ܐܢܛܝܟܘܣ ܝܕܝܥܐ ܘܐܚܕܗ ܠܥܟܘ ܘܩܒܠܘܗܝ ܘܐܡܠܟ ܬܡܢ

43. Maccabees 1 B 10:2

    ܘܫܡܥ ܕܡܛܪܝܘܣ ܡܠܟܐ ܘܟܢܫ ܚܝܠܘ̈ܬܐ ܣܓܝܐ̈ܐ ܛܒ ܘܢܦܩ ܠܐܘܪܥܗ ܠܩܪܒܐ

44. Maccabees 1 B 10:3

    ܘܫܕܪ ܕܡܛܪܝܘܣ ܠܘܬ ܝܘܢܬܢ ܐܓܪ̈ܬܐ ܘܡ̈ܠܐ ܕܫܠܡܐ ܐܝܟ ܕܢܘܪܒܝܘܗܝ

45. Maccabees 1 B 10:4

    ܐܡܪ ܓܝܪ ܢܩܕܡ ܢܥܒܕ ܥܡܗ ܫܠܡܐ ܥܕ ܠܐ ܢܩܝܡ ܥܡ ܐܠܟܣܢܕܪܘܣ ܡܢ ܩܕܡܝܢ

46. Maccabees 1 B 10:5

    ܢܬܕܟܪ ܓܝܪ ܟܠܗܝܢ ܒܝܫ̈ܬܐ ܕܓܪܡܢ ܠܗ ܘܠܐܚ̈ܘܗܝ ܘܠܥܡܗ

47. Maccabees 1 B 10:6

    ܘܝܗܒ ܠܗ ܫܘܠܛܢܐ ܕܢܟܢܫ ܚܝܠܐ ܘܕܢܥܬܕ ܙܝܢܐ ܘܕܢܗܘܐ ܠܗ ܡܥܕܪܢܐ ܘܗܡܝܪ̈ܐ ܕܐܝܬ ܒܚܣ̈ܢܐ ܐܡܪ ܕܢܫܠܡܘܢ ܠܗ

48. Maccabees 1 B 10:7

    ܘܐܬܐ ܝܘܢܬܢ ܠܐܘܪܫܠܡ ܘܩܪܐ ܐܓܪ̈ܬܐ ܒܐܕܢ̈ܘܗܝ ܕܥܡܐ ܘܕܒܢ̈ܝ ܚܣܢܐ

49. Maccabees 1 B 10:8

    ܘܕܚܠܘ ܕܚܠܬܐ ܪܒܬܐ ܟܕ ܫܡܥܘ ܕܝܗܒ ܠܗ ܡܠܟܐ ܫܘܠܛܢܐ ܠܡܟܢܫܘ ܚܝܠܐ

50. Maccabees 1 B 10:9

    ܘܦܢܝܘ ܠܗ ܒܢ̈ܝ ܚܣܢܐ ܠܝܘܢܬܢ ܗܡܝܪ̈ܐ ܘܦܢܝܘ ܐܢܘܢ ܠܐܒܗ̈ܝܗܘܢ

51. Maccabees 1 B 10:10

    ܘܥܡܪ ܝܘܢܬܢ ܒܐܘܪܫܠܡ ܘܫܪܝ ܒܢܐ ܘܡܚܕܬ ܡܕܝܢܬܐ

52. Maccabees 1 B 10:11

    ܘܐܡܪ ܠܐܝܠܝܢ ܕܥܒܕܝܢ ܥܒܕܐ ܠܡܒܢܐ ܫܘܪܐ ܘܠܡܒܢܐ ܛܘܪܐ ܕܨܗܝܘܢ ܟܕ ܚܕܪ ܒܟܐ̈ܦܐ ܡܪ̈ܒܥܬܐ ܠܡܪܕܐ ܘܥܒܕܘ ܗܟܢܐ

53. Maccabees 1 B 10:12

    ܘܥܪܩܘ ܗܘܘ ܢܘܟܪ̈ܝܐ ܕܐܝܬ ܗܘܘ ܒܚܣ̈ܢܐ ܗܢܘܢ ܕܒܢܐ ܒܝܟܪܘܣ

54. Maccabees 1 B 10:13

    ܘܫܒܩ ܟܠ ܐܢܫ ܐܬܪܗ ܘܐܙܠܘ ܠܐܪܥܗܘܢ

55. Maccabees 1 B 10:14

    ܒܪܡ ܕܝܢ ܒܝܬ ܫܘܪܐ ܗ̇ܘ ܫܪܪܘ ܐܢܫ̈ܝܢ ܕܫܒܩܘ ܢܡܘܣܐ ܘܦܘܩܕܢܐ ܗܘܐ ܗܘܐ ܠܗܘܢ ܓܝܪ ܠܒܝܬ ܓܘܣܐ

56. Maccabees 1 B 10:15

    ܘܫܡܥ ܐܠܟܣܢܕܪܣ ܡܠܟܐ ܡܘܗ̈ܒܬܐ ܕܝܗܒ ܕܝܡܛܪܝܘܣ ܠܝܘܢܬܢ ܘܐܫܬܥܝܘ ܠܗ ܩܪ̈ܒܐ ܘܢܨܚ̈ܢܐ ܕܥܒܕ ܗܘ ܘܐܚ̈ܘܗܝ ܘܥܡܠܐ ܕܥܡܠܘ ܘܐܡܪ

57. Maccabees 1 B 10:16

    ܠܐ ܢܫܟܚ ܓܒܪܐ ܚܕ ܐܚܪܢܐ ܐܝܟ ܗܢܐ ܘܗܫܐ ܢܥܒܕܝܘܗܝ ܠܢ ܪܚܡܐ ܘܡܥܕܪܢܐ

58. Maccabees 1 B 10:17

    ܘܟܬܒ ܐܓܪ̈ܬܐ ܘܫܠܚ ܠܗ ܐܝܟ ܡ̈ܠܐ ܗܠܝܢ ܘܐܡܪ

59. Maccabees 1 B 10:18

    ܡܠܟܐ ܐܠܟܣܢܕܪܘܣ ܠܐܚܝ ܝܘܢܬܢ ܫܠܡ

60. Maccabees 1 B 10:19

    ܫܡܥܢ ܥܠܝܟ ܕܓܒܪܐ ܐܢܬ ܓܢܒܪ ܚܝܠܐ ܘܨܢܝܥ ܐܢܬ ܕܬܗܘܐ ܠܢ ܪܚܡܐ

61. Maccabees 1 B 10:20

    ܘܗܫܐ ܐܩܝܡܢܟ ܝܘܡܢܐ ܪܒ ܟܗ̈ܢܐ ܕܥܡܟ ܘܪܚܡܐ ܕܡܠܟܐ ܬܬܩܪܐ ܘܫܕܪ ܠܗ ܐܪ̈ܓܘܢܐ ܘܟܠܝܠܐ ܕܡܠܟܐ ܕܕܗܒܐ ܘܕܬܐܨܦ ܕܝܠܢ ܘܬܛܪ ܪܚܡܘܬܐ ܠܘܬܢ

62. Maccabees 1 B 10:21

    ܘܠܒܫ ܝܘܢܬܢ ܠܒܘܫܐ ܕܫܘܒܚܐ ܒܝܪܚܐ ܫܒܝܥܝܐ ܒܫܢܬ ܡܐܐ ܘܫܬܝܢ ܫ̈ܢܝܢ ܒܥܕܐ ܕܡ̈ܛܠܐ ܟܢܫ ܚܝܠܐ ܘܥܬܕ ܙܝܢܐ ܣܓܝܐܐ

63. Maccabees 1 B 10:22

    ܘܫܡܥ ܕܡܛܪܝܘܣ ܡ̈ܠܐ ܗܠܝܢ ܘܟܪܝܬ ܠܗ ܘܐܡܪ

64. Maccabees 1 B 10:23

    ܡܢܐ ܗܘ ܗܢܐ ܕܥܒܕܢ ܕܩܕܡܢ ܐܠܟܣܢܕܪܘܣ ܕܢܐܚܘܕ ܪܚܡܘܬܐ ܕܝܗܘ̈ܕܝܐ ܠܥܘܕܪܢܐ

65. Maccabees 1 B 10:24

    ܐܟܬܘܒ ܠܗܘܢ ܐܦ ܐܢܐ ܡ̈ܠܐ ܕܒܘܝܐܐ ܘܕܪܘܡܪܡܐ ܘܕܡܘܗ̈ܒܬܐ ܐܝܟ ܕܢܗܘܘܢ ܠܝ ܠܥܘܕܪܢܐ

66. Maccabees 1 B 10:25

    ܘܫܠܚ ܠܗܘܢ ܐܝܟ ܡ̈ܠܐ ܗܠܝܢ ܡܠܟܐ ܕܡܛܪܝܘܣ ܠܥܡܐ ܕܝܗܘ̈ܕܝܐ ܫܠܡ

67. Maccabees 1 B 10:26

    ܡܛܠ ܕܢܛܪܬܘܢ ܥܡܢ ܫܪܪܐ ܘܩܘܝܬܘܢ ܒܪܚܡܘܬܢ ܘܠܐ ܐܫܠܡܬܘܢ ܠܒܥ̈ܠܕܒܒܝܢ ܫܡܥܢ ܘܚܕܝܢ

68. Maccabees 1 B 10:27

    ܘܗܫܐ ܩܘܘ ܬܘܒ ܠܡܛܪ ܥܡܢ ܫܪܪܐ ܘܢܦܪܘܥܟܘܢ ܚܠܦ ܕܢܛܪܝܬܘܢ ܥܡܢ

69. Maccabees 1 B 10:28

    ܘܢܫܒܘܩ ܠܟܘܢ ܫܘܒܩܢܐ ܣܓܝܐܐ ܘܢܬܠ ܠܟܘܢ ܡܘܗܒܬܐ

70. Maccabees 1 B 10:29

    ܘܗܫܐ ܫܪܐ ܐܢܐ ܠܟܘܢ ܘܫܒܩ ܐܢܐ ܠܟܠܗܘܢ ܝܗܘ̈ܕܝܐ ܡܢ ܫܩ̈ܠܐ ܘܡܢ ܕܡ̈ܝ ܡܠܚܐ ܘܟܠܝܠܐ

71. Maccabees 1 B 10:30

    ܘܚܠܦ ܬܘܠܬܐ ܕܙܪܥܐ ܘܚܠܦ ܦܠܓܘܬ ܦܐܪ̈ܐ ܕܐܝ̈ܠܢܐ ܕܙܕܩܝܢ ܠܝ ܕܐܣܒ ܫܒܝܩܝܢ ܠܟܘܢ ܡܢ ܝܘܡܢܐ ܘܠܗܠ ܕܐܣܒ ܡܢ ܐܪܥܐ ܕܝܗܘ̈ܕܝܐ ܘܡܢ ܬܠܬ ܡܢ̈ܘܢ ܕܡܬܬܘ̈ܣܦܢ ܠܗ ܡܢ ܫܡܪܝܢ ܘܕܓܠܝܠܐ ܡܢ ܝܘܡܐ ܕܝܘܡܢܐ ܘܠܗܠ

72. Maccabees 1 B 10:31

    ܘܐܘܪܫܠܡ ܬܗܘܐ ܩܕܝܫܐ ܘܫܒܝܩܐ ܒܬܚܘ̈ܡܝܗ ܘܡܥܣܪ̈ܐ ܘܡܟܣܐ ܫܘܒܩܢܐ

73. Maccabees 1 B 10:32

    ܘܫܘܠܛܢܐ ܕܚܣܢܐ ܕܐܘܪܫܠܡ ܝܗܒ ܐܢܐ ܠܗ ܠܒܝܬ ܩܘܕܫܐ ܐܝܟ ܕܢܩܝܡ ܒܗ ܓܒܪ̈ܐ ܐܝܠܝܢ ܕܗܘ ܓܒܐ ܠܡܛܪܗ

74. Maccabees 1 B 10:33

    ܘܟܠ ܢܦܫ̈ܬܐ ܕܝܗܘ̈ܕܝܐ ܕܐܫܬܒܝ ܡܢ ܐܪܥܐ ܕܝܗܘܕ ܠܟܠ ܒܝܬ ܡܠܟܘܬܝ ܫܒܩ ܐܢܐ ܡܚܪܪܐ ܡܓܢ ܘܠܟܠ ܐܢܫ ܫܒܩ ܐܢܐ ܫܩ̈ܠܐ ܘܕܒܥܝܪܗܘܢ

75. Maccabees 1 B 10:34

    ܘܠܟܠܗܘܢ ܥܕܥ̈ܕܐ ܘܫ̈ܒܐ ܘܪܝܫ ܝܪ̈ܚܐ ܘܝܘܡ̈ܬܐ ܝܕܝ̈ܥܐ ܘܬܠܬܐ ܝܘܡ̈ܝܢ ܩܕܡ ܥܐܕܐ ܘܬܠܬܐ ܝܘܡ̈ܝܢ ܡܢ ܒܬܪ ܥܐܕܐ ܢܗܘܘܢ ܕܠܐ ܡܟܣܐ ܘܫܒܩ ܐܢܐ ܠܟܠܗܘܢ ܝܗܘ̈ܕܝܐ ܠܐܝܠܝܢ ܕܐܝܬ ܒܡܠܟܘܬܝ

76. Maccabees 1 B 10:35

    ܕܠܐ ܐܢܫ ܢܫܬܠܛ ܠܡܓܒܐ ܘܠܡܗܪܘ ܠܚܕ ܡܢܗܘܢ ܥܠ ܟܠ ܨܒܘ

77. Maccabees 1 B 10:36

    ܘܢܬܟܬܒܘܢ ܡܢ ܝܗܘ̈ܕܝܐ ܒܚܝܠܐ ܕܡܠܟܐ ܬܠܬܐ ܐ̈ܠܦܝܢ ܓܒܪ̈ܝܢ ܘܢܬܝܗ̈ܒܢ ܠܗܘܢ ܢܦܩ̈ܬܐ ܐܝܟ ܕܙܕܩ ܠܟܠܗܘܢ ܚܝܠܘ̈ܬܐ ܕܡܠܟܐ

78. Maccabees 1 B 10:37

    ܘܢܩܘܡܘܢ ܡܢܗܘܢ ܒܚܣ̈ܢܐ ܕܡܠܟܐ ܪ̈ܘܪܒܐ ܘܡܢ ܗܠܝܢ ܢܩܘܡܘܢ ܥܠ ܨܒܘ̈ܬܐ ܕܡܠܟܘܬܐ ܐܝܠܝܢ ܕܐܝܬܝܗܘܢ ܒܝܬ ܫܪܪܐ ܘܪ̈ܝܫܢܝܗܘܢ ܘܫܠܝܛܢܝ̈ܗܘܢ ܡܢܗܘܢ ܢܗܘܘܢ ܘܢܬܕܒܪܘܢ ܒܢܡܘ̈ܣܝܗܘܢ ܐܝܟ ܕܦܩܕ ܡܠܟܐ ܒܐܪܥܐ ܕܝܗܘܕܐ

79. Maccabees 1 B 10:38

    ܘܬܠܬܐ ܢܡܘ̈ܣܝܢ ܕܡܘܣܦܝܢ ܠܝܗܘܕ ܡܢ ܐܬܪܐ ܕܫܡܪܝܢ ܠܝܗܘܕ ܢܬܚܫܒܘܢ ܕܠܐ ܢܗܘܘܢ ܬܚܝܬ ܐܢܫ ܘܠܐ ܢܫܬܡܥܘܢ ܠܫܘܠܛܢ ܐܚܪܢ ܐܠܐ ܐܢ ܠܪܒ ܟܗ̈ܢܐ

80. Maccabees 1 B 10:39

    ܘܥܟܘ ܘܫܘܠܛܢܗ ܝܗܒ ܐ̈ܢܝܢ ܡܘܗܒ̈ܬܐ ܠܕܒܐܘܪܫܠܡ ܠܢܦܩ̈ܬܐ ܕܒܝܬ ܩܘܕܫܐ

81. Maccabees 1 B 10:40

    ܘܐܢܐ ܝܗܒ ܐܢܐ ܟܘܠ ܫܢܐ ܚܡܫܬܥܣܪ ܐ̈ܠܦܝܢ ܡܬ̈ܩܠܝܢ ܕܟܣܦܐ ܡܢ ܓܒܝ̈ܬܐ ܕܥܠܢ

82. Maccabees 1 B 10:41

    ܘܟܘܠ ܝܬܝܪ̈ܬܐ ܕܠܐ ܦܪ̈ܥܝܢ ܗܘܘ ܡܢ ܨܒ̈ܘܬܐ ܐܝܟ ܕܒܫ̈ܢܝܐ ܩܕܡ̈ܝܬܐ ܡܢ ܗܫܐ ܢܬܠܘܢ ܠܥܒܕܗ ܕܒܝܬܐ ܗܢܐ

83. Maccabees 1 B 10:42

    ܘܥܠ ܚܡܫܐ ܐ̈ܠܦܝܢ ܡܬ̈ܩܠܝܢ ܕܟܣܦܐ ܕܢܣܒ ܗܘܝܬ ܡܢ ܨܒܘ̈ܬܐ ܕܒܝܬ ܩܘܕܫܐ ܘܡܢ ܚܘܫ̈ܒܢܐ ܟܠ ܫܢܐ ܠܟܗ̈ܢܐ ܕܡܫܡܫܝܢ

84. Maccabees 1 B 10:43

    ܘܠܐܝܠܝܢ ܕܡܬܬܪܣܝܢ ܒܗܝܟܠܐ ܕܒܐܘܪܫܠܡ ܘܒܟܘܠܗܘܢ ܬܚܘܡ̈ܘܗܝ ܘܕܚܝܒ ܠܡܠܟܘܬܐ ܘܟܘܠ ܨܒܘ ܢܫܬܒܩܘܢ ܘܟܠܡܕܡ ܕܐܝܬ ܠܗܘܢ ܒܡܠܟܘܬܝ

85. Maccabees 1 B 10:44

    ܘܕܢܬܒܢܐ ܘܢܬܚܕܬܢ ܥܒ̈ܝܕܬܐ ܕܒܝܬ ܩܘܕܫܐ ܘܢܦܩ̈ܬܐ ܢܬܝܗ̈ܒܢ ܡܢ ܚܘܫܒܢܐ ܕܡܠܟܐ

86. Maccabees 1 B 10:45

    ܘܠܡܒܢܐ ܫܘܪܐ ܕܒܝܗܘܕ

87. Maccabees 1 B 10:46

    ܘܟܕ ܫܡܥ ܕܝܢ ܝܘܢܬܢ ܘܥܡܐ ܡ̈ܠܐ ܗܠܝܢ ܠܐ ܗܝܡܢܘ ܐ̈ܢܝܢ ܘܠܐ ܩܒܠܘ ܡܛܠ ܕܐܬܕܟܪܘ ܒܝܫܬܐ ܪܒܬܐ ܕܥܒܕ ܠܐܝܣܪܐܝܠ ܘܐܠܨ ܐܢܘܢ ܛܒ

88. Maccabees 1 B 10:47

    ܘܐܨܛܒܝܘ ܒܐܠܟܣܢܕܪܣ ܡܛܠ ܕܗܘ ܗܘܐ ܩܕܡܝ ܒܡ̈ܠܐ ܕܫܠܡܐ ܘܡܥܕܪܝܢ ܗܘܘ ܠܗ ܟܠܗܘܢ ܝܘܡ̈ܬܐ

89. Maccabees 1 B 10:48

    ܘܟܢܫ ܐܠܟܣܢܕܪܣ ܚܝ̈ܠܘܬܐ ܪ̈ܘܪܒܐ ܘܫܪܐ ܠܘܩܒܠ ܕܡܛܪܝܘܣ

90. Maccabees 1 B 10:49

    ܘܐܩܪܒܘ ܬܪ̈ܝܗܘܢ ܡ̈ܠܟܐ ܘܥܪܩܬ ܡܫܪ̈ܝܬܐ ܕܕܡܛܪܝܘܣ ܘܪܕܦܗ ܐܠܟܣܢܕܪܣ ܘܐܬܚܝܠ ܥܠܝܗܘܢ

91. Maccabees 1 B 10:50

    ܘܥܫܢ ܩܪܒܐ

92. Maccabees 1 B 10:67

    ܕܕܡܛܪܝܘܣ ܒܪ ܕܡܛܪܝܘܣ ܡܢ ܩܪܛܐ ܘܥܪܩ ܠܐܪܥܐ ܕܐܒܗ̈ܘܗܝ

93. Maccabees 1 B 10:68

    ܘܫܡܥ ܐܠܟܣܢܕܪܣ ܡܠܟܐ ܘܟܪܝܬ ܠܗ ܛܒ ܘܗܦܟ ܠܗ ܠܐܢܛܝܘܟܝ

94. Maccabees 1 B 10:69

    ܘܐܩܝܡ ܕܡܛܪܝܘܣ ܠܐܦܘܠܘܢܝܘܣ ܛܢܢܐ ܥܠ ܥܘܡܩܐ ܕܣܘܪܝ ܘܟܢܫ ܚܝܠܐ ܣܓܝܐܐ ܘܫܪܐ ܒܝܡܝܢܐ ܘܫܕܪ ܠܘܬ ܝܘܢܬܢ ܪܒ ܟܗ̈ܢܐ ܘܐܡܪ

95. Maccabees 1 B 10:70

    ܐܢܬ ܒܠܚܘܕܝܟ ܡܬܬܪܝܡ ܐܢܬ ܥܠܝܢ ܐܢܐ ܕܝܢ ܗܘܝܬ ܠܓܘܚܟܐ ܘܠܚܣܕܐ ܡܛܠܬܟ ܘܠܡܢܐ ܐܢܬ ܡܫܬܠܛ ܐܢܬ ܥܠܝܢ ܒܛܘܪܐ

96. Maccabees 1 B 10:71

    ܗܫܐ ܐܢ ܬܟܝܠ ܐܢܬ ܥܠ ܚܝܠܟ ܚܘܬ ܠܘܬܢ ܠܦܩܥܬܐ ܘܢܐܪܘܥ ܚܕ ܠܚܕ ܬܡܢ ܡܛܠ ܕܥܡܝ ܗܘ ܚܝܠܐ ܕܡܕܝ̈ܢܬܐ

97. Maccabees 1 B 10:72

    ܫܐܠ ܘܝܠܦ ܡܢ ܐܢܐ ܘܫܪܟܐ ܕܡܣܝܥܝܢ ܠܝ ܘܢܐܡܪܘܢ ܠܟ ܕܠܝܬ ܠܟ ܩܝܡ ܪ̈ܓܠܐ ܩܕܡ ܐ̈ܦܝܢ ܡܛܠ ܕܬܪܬܝܢ ܙܒܢ̈ܝܢ ܐܬܬܒܪܘ ܐܒܗ̈ܝܟ ܒܐܪܥܗܘܢ

98. Maccabees 1 B 10:73

    ܘܗܫܐ ܠܐ ܬܫܟܚ ܠܡܩܡ ܩܕܡ ܦܪ̈ܫܐ ܘܚܝܠܐ ܗܢܐ ܒܦܩܥܬܐ ܐܬܪ ܕܠܝܬ ܟܐ̈ܦܐ ܐܦܠܐ ܒܙܩ̈ܐ ܐܦ ܠܐ ܐܬܪܐ ܠܡܥܪܩ

99. Maccabees 1 B 10:74

    ܘܟܕ ܫܡܥ ܝܘܢܬܢ ܡ̈ܠܐ ܕܐܦܘܠܘܢܝܘܣ ܐܬܬܙܝܥ ܒܬܪܥܝܬܗ ܘܓܒܐ ܥܣܪܐ ܐ̈ܠܦܝܢ ܓܒܪܝܢ ܘܢܦܩ ܡܢ ܐܘܪܫܠܡ ܘܐܘܪܥܗ ܫܡܥܘܢ ܐܚܘܗܝ ܠܥܘܕܪܢܐ

100. Maccabees 1 B 10:75

     ܘܫܪܐ ܥܠ ܝܘܦܐ ܘܚܒܫܘܗܝ ܠܒܪ ܡܢ ܡܕܝܢܬܐ ܡܛܘܠ ܕܡܛܪܬܗ ܕܐܦܘܠܘܢܝܘܣ ܒܝܘܦܐ ܗܘܬ ܘܐܩܪܒ ܥܡܗ

← Previous · Next → — showing 501–600 of 908

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.