← All works

Peshitta Maccabees 1 B

Peshitta (Syriac Old Testament) · 908 sections

1. Maccabees 1 B 5:46

   ܘܐܬܘ ܥܕܡܐ ܠܥܦܪܘܢ ܘܗܝ ܡܕܝܢܬܐ ܗܝ ܪܒܬܐ ܘܡܥܠܢܗ ܥܫܝܢ ܛܒ ܘܠܝܬ ܠܡܣܛܐ ܡܢܗ ܠܝܡܝܢܐ ܐܘ ܠܣܡܠܐ ܐܠܐ ܐܢ ܒܡܨܥܬܗ ܠܡܥܒܪ

2. Maccabees 1 B 5:47

   ܘܐܚܕܘ ܬܪ̈ܥܐ ܕܡܕܝܢܬܐ ܩܕܡܝܗܘܢ ܘܣܪܦܘ ܐܢܘܢ ܬܪ̈ܥܐ ܒܟܐ̈ܦܐ

3. Maccabees 1 B 5:48

   ܘܫܠܚ ܝܗܘܕܐ ܡ̈ܠܐ ܕܫܠܡܐ ܘܐܡܪ ܢܥܒܪ ܒܐܪܥܟ ܠܡܐܙܠ ܠܐܪܥܢ ܘܠܐ ܐܢܫ ܢܒܐܫ ܠܟܘܢ ܚܢܢ ܕܝܢ ܒܪ̈ܓܠܝܢ ܢܥܒܪ ܘܠܐ ܨܒܘ ܠܡܦܬܚ ܠܗ

4. Maccabees 1 B 5:49

   ܘܦܩܕ ܝܗܘܕܐ ܠܡܟܪܙܘ ܒܡܫܪܝܬܐ ܕܢܩܪܒ ܐܢܫ ܡܢ ܕܘܟܬܗ

5. Maccabees 1 B 5:50

   ܘܡܩܪܒܝܢ ܗܘܘ ܓܒܪ̈ܐ ܕܚܝܠܐ ܘܐܬܟܬܫܘ ܥܡ ܡܕܝܢܬܐ ܗܝ ܟܠܗ ܝܘܡܐ ܗܘ ܘܟܠܗ ܠܠܝܐ ܘܐܫܬܠܡܬ ܡܕܝܢܬܐ ܒܐܝ̈ܕܘܗܝ

6. Maccabees 1 B 5:51

   ܘܐܘܒܕ ܟܘܠ ܕܟܪܐ ܒܦܘܡܐ ܕܚܪܒܐ ܘܥܩܪܗ ܘܫܩܠ ܒܙܬܗ ܘܥܒܪ ܒܓܘ ܡܕܝܢܬܐ ܥܠ ܚܪ̈ܝܒܐ

7. Maccabees 1 B 5:52

   ܘܥܒܪ ܝܘܪܕܢܢ ܠܦܩܥܬܐ ܪܒܬܐ ܠܘܩܒܠ ܒܝܬ ܝܫܢ

8. Maccabees 1 B 5:53

   ܘܗܘܐ ܝܗܘܕܐ ܟܢܫ ܠܐܚܪ̈ܝܐ ܘܡܒܝܐ ܠܥܡܐ ܒܟܠܗ ܐܘܪܚܐ ܥܕܡܐ ܕܢܐܬܘܢ ܠܐܪܥܐ ܕܝܗܘܕܐ

9. Maccabees 1 B 5:54

   ܘܣܠܩܘ ܠܛܘܪܐ ܕܨܗܝܘܢ ܒܒܘܣܡܐ ܘܒܚܕܘܬܐ ܘܩܪܒܘ ܫܠܡ̈ܐ ܘܠܐ ܢܦܠ ܡܢܗܘܢ ܐܦ ܠܐ ܚܕ ܥܕܡܐ ܕܗܦܟܘ ܒܫܠܡܐ

10. Maccabees 1 B 5:55

    ܘܒܝܘܡ̈ܬܐ ܕܐܝܬܝܗܘܢ ܗܘܘ ܒܓܠܥܕ ܝܗܘܕܐ ܘܝܘܢܬܢ ܐܚܘܗܝ ܘܫܡܥܘܢ ܐܚܘܗܘܢ ܒܓܠܝܠܐ ܠܘܩܒܠ ܥܟܘ

11. Maccabees 1 B 5:56

    ܘܫܡܥ ܝܘܣܦ ܒܪ ܙܟܪܝܐ ܘܥܙܪܝܐ ܪ̈ܫܐ ܕܚܝܠܐ ܢܨܚ̈ܢܐ ܘܩܪ̈ܒܐ ܕܥܒܕܘ

12. Maccabees 1 B 5:57

    ܘܐܡܪܘ ܢܥܒܕ ܠܢ ܐܦ ܚܢܢ ܫܡܐ ܢܐܙܠ ܘܢܩܪܒ ܥܡ ܥܡ̈ܡܐ ܕܚܕܪ̈ܝܢ

13. Maccabees 1 B 5:58

    ܘܦܩܕܘ ܠܐܝܠܝܢ ܕܡܢ ܚܝܠܐ ܕܥܡܗܘܢ ܘܐܙܠܘ ܥܠ ܝܕ ܝܡܐ

14. Maccabees 1 B 5:59

    ܘܢܦܩ ܓܘܪܓܝܐ ܘܓܒܪ̈ܘܗܝ ܡܢ ܡܕܝܢܬܐ ܠܐܘܪܥܗܘܢ ܠܩܪܒܐ

15. Maccabees 1 B 5:60

    ܘܐܬܬܒܪܘ ܝܘܣܦ ܘܥܙܪܝܐ ܘܐܬܪܕܦܘ ܥܕܡܐ ܠܬܚܘܡܐ ܕܝܗܘܕܐ ܘܢܦܠܘ ܒܝܘܡܐ ܗܘ ܡܢ ܥܡܐ ܕܐܝܣܪܐܝܠ ܐܝܟ ܬܪܝܢ ܐ̈ܠܦܝܢ ܓܒܪ̈ܐ

16. Maccabees 1 B 5:61

    ܘܗܘܐ ܬܒܪܐ ܪܒܐ ܒܐܝܣܪܝܠ ܡܛܠ ܕܠܐ ܫܡܥܘ ܠܝܗܘܕܐ ܘܠܐܚܘܗܝ ܣܒܪܝܢ ܗܘܘ ܓܝܪ ܠܡܨܠܚܘ

17. Maccabees 1 B 5:62

    ܗܢܘܢ ܕܝܢ ܠܐ ܗܘܘ ܡܢ ܙܪܥܐ ܕܓܒܪ̈ܐ ܗܢܘܢ ܕܐܬܝܗܒ ܦܘܪܩܢܐ ܠܐܝܣܪܐܝܠ ܒܐܝ̈ܕܝܗܘܢ

18. Maccabees 1 B 5:63

    ܘܓܒܪܐ ܝܗܘܕܐ ܘܐܚ̈ܘܗܝ ܐܫܬܒܚܘ ܛܒ ܩܕܡ ܟܠܗ ܐܝܣܪܝܠ ܘܥܡ̈ܡܐ ܘܒܟܠ ܐܬܪ ܕܡܫܬܡܥ ܗܘܐ ܫܡܥܗܘܢ

19. Maccabees 1 B 5:64

    ܡܬܟܢܫܝܢ ܠܘܬܗܘܢ ܘܡܫܒܚܝܢ

20. Maccabees 1 B 5:65

    ܘܢܦܩ ܝܗܘܕܐ ܘܐ̈ܚܘܗܝ ܘܡܩܪܒܝܢ ܗܘܘ ܥܡ ܒܢ̈ܝ ܥܝܣܘ ܒܐܪܥܐ ܕܬܝܡܢܐ ܘܡܚܘ ܠܚܒܪܘܢ ܘܠܒ̈ܬܝܗ ܘܣܬܪܘ ܚܣܢܗ ܘܠܡܓܕܠܝܗ ܐܘܩܕܘ ܟܕ ܚܕܪܝܢ

21. Maccabees 1 B 5:66

    ܘܫܩܠܘ ܠܡܐܙܠ ܠܐܪܥܐ ܕܦܠܫ̈ܬܝܐ ܘܥܒܪܝܢ ܗܘܘ ܥܠ ܫܡܪܝܢ

22. Maccabees 1 B 5:67

    ܒܗܘ ܝܘܡܐ ܢܦܠܘ ܟܗ̈ܢܐ ܒܩܪܒܐ ܨܒܝܢ ܗܘܘ ܗܢܘܢ ܠܡܙܟܐ ܡܛܠ ܕܢܦܩܘ ܠܩܪܒܐ ܕܠܐ ܒܡܠܟܐ

23. Maccabees 1 B 5:68

    ܘܣܛܐ ܝܗܘܕܐ ܠܐܫܕܘܕ ܠܐܪܥܐ ܕܦܠܫ̈ܬܝܐ ܘܥܩܪܘ ܥܠܘ̈ܬܗܘܢ ܘܓܠܝ̈ܦܐ ܕܐܠܗܝ̈ܗܘܢ ܐܘܩܕܘ ܒܢܘܪܐ ܘܒܙܘ ܒܙܬܐ ܒܡܕܝܢܬܐ ܘܗܦܟܘ ܠܐܪܥܐ ܕܝܗܘܕܐ

24. Maccabees 1 B 6:1

    ܘܡܠܟܐ ܐܢܛܝܘܟܘܣ ܡܗܠܟ ܗܘܐ ܒܐܬܪ̈ܘܬܐ ܕܒܝܬ ܓ̈ܠܝܐ ܘܫܡܥ ܕܐܝܬ ܥܝܠܡ ܒܦܪܣ ܡܕܝܢܬܐ ܡܫܒܚܬܐ ܘܥܬܝܪܐ ܒܣܐܡܐ ܘܒܕܗܒܐ

25. Maccabees 1 B 6:2

    ܘܒܝܬ ܦܬܟܪ̈ܐ ܕܒܗ ܥܬܝܪ ܗܘܐ ܛܒ ܘܬܡܢ ܣܟܪ̈ܐ ܕܕܗܒܐ ܘܫܪܝܢܐ ܘܙܝ̈ܢܐ ܕܫܒܩ ܬܡܢ ܐܠܟܣܢܕܪܘܣ ܒܪ ܦܝܠܝܦܘܣ ܡܠܟܐ ܡܩܕܘܢܝܐ ܗܘ ܕܐܡܠܟ ܗܘܐ ܠܘܩܕܡ ܒܝܘ̈ܢܝܐ

26. Maccabees 1 B 6:3

    ܘܐܬܐ ܗܘܐ ܘܒܥܐ ܗܘܐ ܠܡܐܚܕܗ ܠܡܕܝܢܬܐ ܘܠܐ ܐܫܟܚ ܡܛܠ ܕܐܫܬܡܥܬ ܡܠܬܐ ܠܒ̈ܢܝ ܡܕܝܢܬܐ

27. Maccabees 1 B 6:4

    ܘܐܪܥܘܗܝ ܒܩܪܒܐ ܘܥܪܩ ܘܫܩܠ ܡܢ ܬܡܢ ܒܟܪܝܘܬܐ ܪܒܬܐ ܠܡܗܦܟ ܠܒܒܠ

28. Maccabees 1 B 6:5

    ܘܐܬܐ ܠܗ ܐܢܫ ܡܣܒܪܢܐ ܠܦܪܣ ܕܐܬܬܒܪ ܡܫܪ̈ܝܬܐ ܗܠܝܢ ܕܐܙܠ ܠܐܪܥܐ ܕܝܗܘܕܐ

29. Maccabees 1 B 6:6

    ܘܐܙܠ ܠܘܣܝܐ ܒܚܝܠܐ ܥܫܝܢܐ ܩܕܡܝܬ ܘܐܬܬܒܪ ܩܕܡ ܐܦܝ̈ܗܘܢ ܘܐܬܚܝܠܘ ܒܙܝܢܐ ܘܒܚܝܠܐ ܘܒܒܙܬܐ ܣܓܝܐܬܐ ܕܢܣܒܘ ܡܢ ܡܫܪ̈ܝܬܐ ܕܚܪܒܘ

30. Maccabees 1 B 6:7

    ܘܥܩܪܘ ܛܡܐܐ ܕܒܢܝܬ ܥܠ ܡܕܒܚܐ ܕܒܢܝܬ ܒܐܘܪܫܠܡ ܘܒܢܘ ܡܕܒܚܐ ܘܩܘܕܫܐ ܐܝܟ ܕܡܢ ܩܕܝܡ ܘܐܬܟܪܟܘ ܫܘܪ̈ܐ ܪ̈ܡܐ ܘܒܝܬ ܫܘܪ̈ܐ ܕܡܕܝܢܬܐ

31. Maccabees 1 B 6:8

    ܘܗܘܐ ܕܟܕ ܫܡܥ ܡܠܟܐ ܡ̈ܠܐ ܗܠܝܢ ܬܘܪ ܘܐܬܙܝܥ ܛܒ ܘܢܦܠ ܥܠ ܥܪܣܐ ܘܢܦܠ ܒܬܫܢܝܩܐ ܡܢ ܟܪܝܘܬܗ ܡܛܠ ܕܠܐ ܗܘܐ ܠܗ ܐܝܟܢܐ ܕܡܬܪܥܐ ܗܘܐ

32. Maccabees 1 B 6:9

    ܘܗܘܐ ܬܡܢ ܝܘܡ̈ܬܐ ܣܓܝܐ̈ܐ ܡܛܠ ܕܐܬܚܕܬܬ ܥܠܘܗܝ ܟܪܝܘܬܐ ܪܒܬܐ ܘܐܬܪܥܝ ܕܡܐܬ

33. Maccabees 1 B 6:10

    ܘܩܪܐ ܠܟܠܗܘܢ ܪ̈ܚܡܘܗܝ ܘܐܡܪ ܠܗܘܢ ܦܪܕܬ ܡܢ ܥ̈ܝܢܝ ܫܢܬܐ ܘܢܦܠܬ ܒܠܒܝ ܨܦܬܐ

34. Maccabees 1 B 6:11

    ܘܐܡܪܬ ܒܠܒܝ ܥܕܡܐ ܠܐܝܢܐ ܐܘܠܨܢܐ ܐܬܝܬ ܘܡܚܫܘܠܐ ܗܢܐ ܪܒܐ ܕܐܢܐ ܒܗ ܡܛܠ ܕܒܣܝܡܐ ܗܘܝܬ ܘܪܚܝܡܐ ܒܫܘܠܛܢܝ

35. Maccabees 1 B 6:12

    ܗܫܐ ܡܬܕܟܪ ܐܢܐ ܒܝܫ̈ܬܐ ܐܝܠܝܢ ܕܥܒܕܬ ܒܐܘܪܫܠܡ ܘܢܣܒܬ ܟܠܗܘܢ ܡܐ̈ܢܐ ܕܣܐܡܐ ܘܕܕܗܒܐ ܐܝܠܝܢ ܕܐܝܬ ܗܘܘ ܒܗ ܘܫܕܪܬ ܠܡܥܩܪ ܠܥܡܘܪ̈ܐ ܕܝܗܘܕ ܣܪܝܩܐܝܬ

36. Maccabees 1 B 6:13

    ܝܕܥܬ ܕܡܛܠ ܗܠܝܢ ܐܕܪܟܢܢܝ ܒܝܫ̈ܬܐ ܗܠܝܢ ܘܗܐ ܐܒܕ ܐܢܐ ܒܟܪܝܘܬܐ ܪܒܬܐ ܒܐܪܥܐ ܢܘܟܪܝܬܐ

37. Maccabees 1 B 6:14

    ܘܩܪܐ ܠܦܝܠܝܦܘܣ ܚܕ ܡܢ ܪ̈ܚܡܘܗܝ ܘܐܩܝܡܗ ܥܠ ܟܘܠܗ ܡܠܟܘܬܗ

38. Maccabees 1 B 6:15

    ܘܝܗܒ ܠܗ ܬܓܗ ܘܠܒܘܫܗ ܘܥܙܩܬܗ ܠܡܣܩܘ ܠܒܪܗ ܐܢܛܝܟܘܣ ܘܢܕܒܪܝܘܗܝ ܕܢܡܠܟ

39. Maccabees 1 B 6:16

    ܘܡܝܬ ܬܡܢ ܐܢܛܝܘܟܘܣ ܒܫܢܬ ܡܐܐ ܘܐܪܒܥܝܢ ܘܬܫܥ

40. Maccabees 1 B 6:17

    ܘܝܕܥ ܠܘܣܝܐ ܕܡܝܬ ܠܗ ܡܠܟܐ ܘܐܩܝܡ ܠܐܢܛܝܟܘܣ ܒܪܗ ܕܢܡܠܟ ܚܠܦܘܗܝ ܠܗܘ ܕܪܒܝ ܡܢ ܛܠܝܘܬܗ ܘܩܪܐ ܫܡܗ ܐܘܦܛܘܪ

41. Maccabees 1 B 6:18

    ܘܕܡܢ ܚܣ̈ܢܐ ܐܠܨܝܢ ܗܘܘ ܠܐܝܣܪܝܠ ܡܢ ܚܕܪ ܒܝܬ ܡܩܕܫܐ ܘܒܥܝܢ ܗܘܘ ܒܝܫܬܐ ܒܟܠܙܒܢ

42. Maccabees 1 B 6:19

    ܘܐܬܪܥܝ ܠܡܥܩܪ ܐܢܘܢ ܘܐܦܩ ܠܟܠܗ ܥܡܐ ܕܢܐܙܠܘܢ ܢܚܒܫܘܢ ܐܢܘܢ

43. Maccabees 1 B 6:20

    ܘܐܬܟܢܫܘ ܐܟܚܕܐ ܘܫܪܘ ܥܠܝܗ ܒܫܢܬ ܡܐܐ ܘܚܡܫܝܢ ܫ̈ܢܝܢ ܘܥܒܕܘ ܥܠܝܗܘܢ ܩܫܬܙܝܪ̈ܐ ܘܡܟܢ̈ܘܬܐ

44. Maccabees 1 B 6:21

    ܘܢܦܩܘ ܡܢܗܘܢ ܡܢ ܚܒܘܫܝܐ ܘܢܦܩܘ ܐܢܫܐ ܪ̈ܫܝܥܐ ܡܢ ܐܝܣܪܐܝܠ

45. Maccabees 1 B 6:22

    ܘܐܙܠܘ ܠܘܬ ܡܠܟܐ ܘܐܡܪܝܢ ܠܗ ܥܕܡܐ ܠܐܡܬܝ ܠܐ ܬܥܒܕ ܕܝܢܐ ܘܬܒܥܬܐ ܕܐܚ̈ܝܢ

46. Maccabees 1 B 6:23

    ܚܢܢ ܨܒܝܢ ܠܡܦܠܚ ܠܐܒܘܟ ܘܠܡܐܙܠ ܒܬܪ ܐܝܠܝܢ ܕܡܢܗ ܡܬܐܡܪ̈ܢ ܘܠܡܬܢܩܦܘ ܠܦܘܩ̈ܕܢܘܗܝ

47. Maccabees 1 B 6:24

    ܘܝܬܒܝܢ ܗܘܘ ܥܠܝܗ ܒܢ̈ܝ ܥܡܢ ܡܛܠ ܗܠܝܢ ܘܡܬܢܙܪܝܢ ܗܘܘ ܡܢܢ ܒܪܡ ܕܝܢ ܐܝܠܝܢ ܕܡܫܟܚܝܢ ܗܘܘ ܡܢܢ ܡܩܛܠܝܢ ܗܘܘ ܘܝܪܬܘܬܢ ܡܬܚܛܦܐ ܗܘܬ

48. Maccabees 1 B 6:25

    ܘܠܐ ܗܘܐ ܥܠܝܢ ܒܠܚܘܕ ܐܘܫܛܘ ܐܝ̈ܕܝܐ ܐܠܐ ܐܦ ܥܠ ܟܠܗܘܢ ܬܚܘ̈ܡܝܗܘܢ

49. Maccabees 1 B 6:26

    ܘܗܐ ܝܘܡܢܐ ܫܪܝܢ ܥܠ ܚܣܢܐ ܕܒܐܘܪܫܠܡ ܕܢܟܒܫܘܢܗ ܘܒܝܬ ܡܩܕܫܐ ܘܒܝܬ ܫܘܪܐ ܕܢܥܫܢܘܢ

50. Maccabees 1 B 6:27

    ܘܐܠܐ ܡܕܪܟܝܢ ܐܢܬܘܢ ܠܗܘܢ ܒܥܓܠ ܕܒܝ̈ܫܢ ܡܢ ܗܠܝܢ ܢܥܒܕܘܢ ܘܠܐ ܬܫܟܚܘܢ ܠܡܟܒܫ ܐܢܘܢ

51. Maccabees 1 B 6:28

    ܘܪܓܙ ܡܠܟܐ ܟܕ ܫܡܥ ܘܟܢܫ ܠܟܠܗܘܢ ܪ̈ܚܡܘܗܝ ܪ̈ܫܐ ܕܚܝܠܘܬܐ ܕܡܢ ܝܘܢ

52. Maccabees 1 B 6:29

    ܘܡܢ ܡܠܟܘ̈ܬܐ ܐܚܪ̈ܢܝܬܐ ܘܡܢ ܓܙܪ̈ܬܐ ܕܝܡܐ ܘܐܬܘ ܠܘܬܗܘܢ ܚܝܠܘ̈ܬܐ ܕܐܓܝܪܝܢ

53. Maccabees 1 B 6:30

    ܘܐܝܬܘܗܝ ܗܘܐ ܡܢܝܢܐ ܕܚܝܠܗ ܡܐܐ ܐ̈ܠܦܝܢ ܪ̈ܓܠܝܝܢ ܘܥܣܪܐ ܐ̈ܠܦܝܢ ܦܪ̈ܫܝܢ ܘܦܝ̈ܠܐ ܬܠܬܝܢ ܘܬܪܝܢ ܝܕܥ̈ܝ ܩܪܒܐ

54. Maccabees 1 B 6:31

    ܘܐܬܘ ܒܐܘܪܚܐ ܕܐܕܘܡ ܘܫܪܘ ܒܝܬ ܫܘܪܐ ܘܐܬܟܬܫܘ ܝܘܡ̈ܬܐ ܣܓܝܐܐ ܘܥܒܕܘ ܡܐܟܢ̈ܘܬܐ ܘܢܦܩܘ ܘܐܘܩܕܘ ܐ̈ܢܝܢ ܒܢܘܪܐ ܘܐܩܪܒܘ ܓܢܒܪܐܝܬ

55. Maccabees 1 B 6:32

    ܘܐܫܩܠ ܝܗܘܕܐ ܡܢ ܚܣܢܐ ܘܫܪܐ ܒܝܬ ܙܟܪܝܐ ܠܘܩܒܠ ܡܫܪܝܬܐ ܕܡܠܟܐ

56. Maccabees 1 B 6:33

    ܘܩܕܡ ܡܠܟܐ ܒܫܦܪܐ ܘܐܫܩܠ ܠܡܫܪܝܬܐ ܒܥܘܙܗ ܒܐܘܪܚܐ ܕܒܝܬ ܙܟܪܝܐ ܘܐܙܕܝܢܘ ܚܝ̈ܠܘܬܐ ܠܩܪܒܐ ܘܩܪܘ ܒܫܝܦܘܪ̈ܐ

57. Maccabees 1 B 6:34

    ܘܠܦܝ̈ܠܐ ܚܘܝܘ ܕܡܐ ܕܥܢ̈ܒܐ ܘܕܬܘ̈ܬܐ ܐܝܟ ܕܢܩܝܡܘܢ ܐܢܘܢ ܒܩܪܒܐ

58. Maccabees 1 B 6:35

    ܘܦܠܓܘ ܦܝ̈ܠܐ ܠܦܠܓܐ ܘܐܩܝܡܘ ܥܠ ܓܢܒ ܚܕ ܚܕ ܦܝܠܐ ܐܠܦ ܓܒܪ̈ܝܢ ܕܡܙܝܢܝܢ ܒܙܪܕܐ ܘܒܣܢܘ̈ܪܬܐ ܕܢܚܫܐ ܘܚܡܫܡܐܐ ܦܪ̈ܫܝܢ ܡܫܠܡܝܢ ܠܚܕ ܚܕ ܡܢܗܘܢ ܡܫܠܡܝܢ ܗܘܘ ܠܗܢܘܢ

59. Maccabees 1 B 6:36

    ܗܠܝܢ ܡܢ ܩܕܡ ܙܒܢܐ ܕܐܝܟܐ ܕܗܘܐ ܦܝܠܐ ܬܡܢ ܢܗܘܘܢ ܘܐܝܟܐ ܕܐܙܠ ܐܙܠܝܢ ܗܘܘ ܘܠܐ ܦܪ̈ܩܝܢ ܗܘܘ ܡܢܗ

60. Maccabees 1 B 6:37

    ܘܡ̈ܓܕܠܐ ܕܩܝ̈ܣܐ ܥܫ̈ܝܢܐ ܕܡܟܣܝܢ ܗܘܘ ܥܠ ܚܕ ܚܕ ܡܢ ܦܝ̈ܠܐ ܕܡܚܙܩܝܢ ܥܠܝܗܘܢ ܒܡܐܟܢܐ ܘܥܠ ܚܕ ܚܕ ܡܢܗܘܢ ܓܒܪ̈ܐ ܩܪ̈ܒܬܢܐ ܬܠܬܝܢ ܘܫܘܫܢܗ

61. Maccabees 1 B 6:38

    ܘܫܪܟܐ ܕܦܪ̈ܫܐ ܡܟܐ ܘܡܟܐ ܐܩܝܡܘ ܥܠ ܬܪ̈ܝܗܘܢ ܓܒܝܗ ܕܡܫܪܝܬܐ ܢܩܫܝܢ ܗܘܘ ܒܙܝܢܗܘܢ ܒܦ̈ܠܓܐ

62. Maccabees 1 B 6:39

    ܟܕ ܕܝܢ ܐܨܡܚ ܫܡܫܐ ܥܠ ܣܟܪ̈ܐ ܕܕܗܒܐ ܘܣܟܪ̈ܐ ܕܢܚܫܐ ܡܒܪܩܝܢ ܗܘܘ ܛܘܪ̈ܐ ܡܢܗܘܢ ܘܡܙܗܪܝܢ ܗܘܘ ܐܝܟ ܠܡܦܝ̈ܕܐ ܕܢܘܪܐ

63. Maccabees 1 B 6:40

    ܘܐܬܡܬܚܘ ܡܢ ܡܫܪܝܬܐ ܕܡܠܟܐ ܡܢܗܘܢ ܥܠ ܛܘܪܐ ܪ̈ܡܐ ܘܡܢܗܘܢ ܥܠ ܪ̈ܟܢܐ ܘܐܬܝܢ ܗܘܘ ܙܗܝܐܝܬ ܟܕ ܣܕܝܪܝܢ ܗܘܘ

64. Maccabees 1 B 6:41

    ܘܡܬܬܙܝܥܝܢ ܗܘܘ ܟܘܠ ܕܫܡܥܝܢ ܗܘܘ ܩܠܐ ܕܪܓܘܫܝܗܘܢ ܘܗܠܟܬܐ ܕܣܘܓܐܗܘܢ ܘܢܩܫܐ ܕܙܝܢܗܘܢ ܐܝܬܝܗ ܗܘܬ ܓܝܪ ܡܫܪܝܬܐ ܕܥܫܝܢܐ ܛܒ

65. Maccabees 1 B 6:42

    ܘܩܪܒ ܝܗܘܕܐ ܘܡܫܪܝܬܗ ܠܩܪܒܐ ܘܢܦܠܘ ܡܢ ܡܫܪܝܬܐ ܕܡܠܟܐ ܫܬܡܐܐ ܓܒܪ̈ܝܢ

66. Maccabees 1 B 6:43

    ܘܚܙܐ ܐܠܝܥܙܪ ܕܡܬܩܪܐ ܚܘܪܢ ܚܕ ܡܢ ܦܝ̈ܠܐ ܕܡܙܝܢ ܒܫܪܝܢܐ ܕܡܠܟܘܬܐ ܘܐܝܬܘܗܝ ܗܘܐ ܥܫܝܢ ܡܢ ܟܠܗܘܢ ܦܝ̈ܠܐ ܘܐܬܚܙܝ ܕܒܗ ܗܘ ܡܠܟܐ

67. Maccabees 1 B 6:44

    ܘܝܗܒ ܢܦܫܗ ܠܡܚܝܘ ܠܥܡܗ ܘܕܢܥܒܕ ܠܢܦܫܗ ܫܡܐ ܠܥܠܡ

68. Maccabees 1 B 6:45

    ܘܪܗܛ ܥܠܘܗܝ ܒܚܐܦܐ ܠܡܨܥܬ ܦܠܓܐ ܘܚܪܒ ܗܘܐ ܠܝܡܝܢܐ ܘܠܣܡܠܐ ܘܐܬܦܠܓܘ ܡܢ ܩܕܡܘܗܝ ܡܟܐ ܘܡܟܐ

69. Maccabees 1 B 6:46

    ܘܥܠ ܬܚܝܬ ܦܝܠܐ ܘܕܩܪܗ ܘܩܛܠܗ ܘܢܦܠ ܥܠ ܐܪܥܐ ܥܠܘܗܝ ܘܡܝܬ ܬܡܢ

70. Maccabees 1 B 6:47

    ܘܚܙܘ ܥܘܫܢܗ ܕܡܠܟܘܬܐ ܘܥܘܙܐ ܕܚܝܠܘ̈ܬܐ ܘܐܪܟܢܘ ܡܢܗܘܢ

71. Maccabees 1 B 6:48

    ܘܡܢ ܡܫܪܝܬܐ ܕܡܠܟܐ ܣܠܩܝܢ ܗܘܘ ܠܐܘܪܥܗܘܢ ܠܐܘܪܫܠܡ ܘܫܪܐ ܡܠܟܐ ܒܝܗܘܕ ܘܒܛܘܪܐ ܕܨܗܝܘܢ

72. Maccabees 1 B 6:49

    ܘܥܒܕ ܫܠܡܐ ܥܡ ܐܝܠܝܢ ܕܐܝܬ ܗܘܘ ܒܝܬ ܫܘܪܐ ܘܢܦܩܘ ܡܢ ܡܕܝܢܬܐ ܡܛܘܠ ܕܠܝܬ ܗܘܐ ܠܗܘܢ ܬܡܢ ܐܣܢܐ ܕܢܬܚܒܫܘܢ ܬܡܢ ܡܛܠ ܕܫܒܬܐ ܗܘܬ ܠܐܪܥܐ

73. Maccabees 1 B 6:50

    ܘܐܚܕܗ ܡܠܟܐ ܠܒܝܬ ܫܘܪܐ ܘܐܩܝܡ ܬܡܢ ܡܛܪܬܐ ܠܡܛܪܗ

74. Maccabees 1 B 6:51

    ܘܫܪܐ ܥܠ ܒܝܬ ܩܘܕܫܐ ܝܘܡ̈ܬܐ ܣ̈ܓܝܐܐ ܘܐܩܝܡ ܬܡܢ ܩܫܬܙܝܪ̈ܐ ܘܡܟܢ̈ܘܬܐ ܘܕܫܕܝܢ ܢܘܪܐ ܘܕܫܕܝܢ ܟܐ̈ܦܐ ܘܥܩܪ̈ܒܐ ܠܡܫܕܐ ܓܐܪ̈ܐ ܘܩ̈ܠܥܐ

75. Maccabees 1 B 6:52

    ܘܥܒܕܘ ܐܦ ܗܢܘܢ ܡܟܢ̈ܘܬܐ ܠܘܩܒܠ ܡܟܢܘܬܗܘܢ ܘܐܩܪܒܘ ܝܘܡ̈ܬܐ ܣܓܝܐ̈ܐ

76. Maccabees 1 B 6:53

    ܐܣܢܐ ܕܝܢ ܠܝܬ ܗܘܐ ܒܝܬ ܩܘܕܫܐ ܡܛܠ ܕܫܢܬܐ ܗܘܬ ܫܒܝܥܝܬܐ ܘܐܝܠܝܢ ܕܡܫܬܘܙܒܝܢ ܗܘܘ ܠܝܗܘܕ ܡܢ ܥܡ̈ܡܐ ܐܟܠܘܗܝ ܠܫܪܟܐ ܕܐܣܢܐ

77. Maccabees 1 B 6:54

    ܘܐܫܬܚܪܘ ܒܝܬ ܩܘܕܫܐ ܐܢ̈ܫܐ ܙܥܘܪ̈ܐ ܡܛܠ ܕܥܫܢ ܗܘܐ ܟܦܢܐ ܥܠܝܗܘܢ ܘܐܬܒܕܪܘ ܟܘܠ ܐܢܫ ܠܐܬܪܗ

78. Maccabees 1 B 6:55

    ܘܫܡܥ ܠܘܣܝܐ ܕܦܝܠܝܦܘܣ ܗܘ ܕܐܩܝܡ ܡܠܟܐ ܐܢܛܝܘܟܘܣ ܟܕ ܚܝ ܠܡܬܪܣܝܘ ܠܒܪܗ ܘܠܡܡܠܟܘܬܗ

79. Maccabees 1 B 6:56

    ܐܗܦܟܗ ܡܢ ܦܪܣ ܘܡܢ ܡܕܝ ܘܚ̈ܝܠܘܬܐ ܕܐܙܠܘ ܥܡ ܡܠܟܐ ܥܡܗ ܘܕܒܥܐ ܗܘܐ ܨܒܘ̈ܬܐ ܕܢܐܚܘܕ

80. Maccabees 1 B 6:57

    ܘܡܬܒܠܗܝܢ ܗܘܘ ܘܡܣܬܪܗܒܝܢ ܠܡܐܙܠ ܘܐܡܪܘ ܠܡܠܟܐ ܘܠܡܕܒܪ̈ܢܐ ܕܚܝܠܐ ܘܠܓܒܪ̈ܐ ܓܡܪܝܢ ܚܢܢ ܟܠܝܘܡ ܘܣܝܒܪܬܐ ܙܥܘܪܝܐ ܠܢ ܘܐܬܪܐ ܕܫܪܝܢܢ ܥܠܘܗܝ ܥܫܝܢ ܘܩܡ ܠܗܝܢ ܥܠܝܢ ܨܒܘ̈ܬܐ ܕܡܠܟܘܬܐ

81. Maccabees 1 B 6:58

    ܗܫܐ ܢܬܠ ܝܡܝܢܐ ܠܓܒܪ̈ܐ ܗܠܝܢ ܘܢܥܒܕ ܥܡܗܘܢ ܫܠܡܐ ܘܥܡ ܟܘܠܗ ܥܡܗܘܢ

82. Maccabees 1 B 6:59

    ܘܢܩܝܡ ܠܗܘܢ ܩܝܡܐ ܕܢܬܕܒܪܘܢ ܒܢܡ̈ܘܣܝܗܘܢ ܐܝܟ ܕܡܢ ܩܕܝܡ ܡܛܘܠ ܢܡ̈ܘܣܝܗܘܢ ܓܝܪ ܕܒܛܠܢ ܐܪܓܙܘ ܘܥܒܕܘ ܗܠܝܢ ܟܠܗܝܢ

83. Maccabees 1 B 6:60

    ܘܫܦܪܬ ܡܠܬܐ ܩܕܡ ܡܠܟܐ ܘܩܕܡ ܡܕܒܪ̈ܢܐ ܘܫܕܪ ܠܘܬܗܘܢ ܕܢܫܝܢ ܐܢܘܢ ܘܩܒܠܘ

84. Maccabees 1 B 6:61

    ܘܝܡܐ ܠܗܘܢ ܡܠܟܐ ܘܪ̈ܘܪܒܢܘܗܝ ܘܥܠ ܗܠܝܢ ܢܦܩܘ ܡܢ ܚܣܢܐ

85. Maccabees 1 B 6:62

    ܘܥܠ ܡܠܟܐ ܠܛܘܪܐ ܕܨܗܝܘܢ ܘܚܙܐ ܚܣܢܗ ܕܐܬܪܐ ܗܘ ܘܟܕܒ ܒܡܘܡܬܐ ܕܝܡܐ ܘܦܩܕ ܘܣܬܪܘܗܝ ܠܫܘܪܐ ܟܕ ܚܕܪ

86. Maccabees 1 B 6:63

    ܘܫܩܠ ܡܣܪܗܒܐܝܬ ܘܗܦܟ ܠܐܢܛܝܘܟܝ ܘܐܫܟܚ ܠܦܝܠܝܦܘܣ ܕܐܫܬܠܛ ܒܡܕܝܢܬܐ ܘܐܩܪܒ ܥܡܗ ܘܢܣܒܗ ܠܡܕܝܢܬܐ

87. Maccabees 1 B 7:1

    ܒܫܢܬ ܡܐܐ ܘܚܡܫܝܢ ܢܦܩ ܕܡܛܪܝܘܣ ܒܪ ܣܠܘܩܣ ܡܢ ܪܗܘܡܝ ܘܣܠܩ ܒܐܢܫܐ ܙܥܘܪ̈ܐ ܠܡܕܝ̈ܢܬܐ ܕܥܠ ܓܢܒ ܝܡܐ ܘܐܡܠܟ ܬܡܢ

88. Maccabees 1 B 7:2

    ܘܗܘܐ ܕܟܕ ܥܐܠ ܗܘܐ ܠܒܝܬ ܡܠܟܘܬܐ ܕܐܒܗ̈ܘܗܝ ܘܐܟܠܝܢ ܗܘܘ ܚܝ̈ܠܘܬܐ ܩܪ̈ܨܘܗܝ ܕܐܢܛܝܘܟܘܣ ܘܕܠܘܣܝܐ ܕܢܝܬܘܢ ܐܢܘܢ ܠܗ

89. Maccabees 1 B 7:3

    ܘܐܬܝܕܥܬ ܨܒܘܬܐ ܘܐܡܪ ܠܐ ܬܚܘܘܢܢܝ ܐܦܝ̈ܗܘܢ

90. Maccabees 1 B 7:4

    ܘܩܛܠܘ ܐܢܘܢ ܚܝܠܘ̈ܬܐ ܘܝܬܒ ܕܡܛܪܝܘܣ ܥܠ ܟܘܪܣܝܐ ܕܡܠܟܘܬܗ

91. Maccabees 1 B 7:5

    ܘܐܬܘ ܠܘܬܗ ܟܠܗܘܢ ܓܒܪ̈ܐ ܒܢ̈ܝ ܥܘܠܐ ܪ̈ܫܝܥܐ ܡܢ ܐܝܣܪܐܝܠ ܘܐܠܩܝܡܘܣ ܡܕܒܪܢܗܘܢ ܘܡܬܪܥܐ ܗܘܐ ܕܢܟܗܢ

92. Maccabees 1 B 7:6

    ܘܐܟܠܘ ܩܪ̈ܨܐ ܕܥܡܐ ܠܘܬ ܡܠܟܐ ܘܐܡܪܝܢ ܐܘܒܕܘ ܝܗܘܕܐ ܘܐܚ̈ܘܗܝ ܠܟܠܗܘܢ ܪ̈ܚܡܝܟ ܘܠܢ ܒܕܪܘ ܡܢ ܐܪܥܗܘܢ

93. Maccabees 1 B 7:7

    ܗܫܐ ܫܕܪ ܓܒܪܐ ܐܝܢܐ ܕܫܪܝܪ ܠܟ ܢܐܙܠ ܢܚܙܐ ܟܘܠܗ ܥܩܘܪܝܐ ܕܥܒܕ ܠܢ ܘܠܐܬܪܐ ܕܡܠܟܐ ܘܕܐܫܬܢܕ ܒܗܘܢ ܘܒܟܠ ܕܡܥܕܪܝܢ ܠܗܘܢ

94. Maccabees 1 B 7:8

    ܘܓܒܐ ܡܠܟܐ ܠܒܝܟܪܘܣ ܡܢ ܪ̈ܚܡܐ ܕܡܠܟܐ ܕܫܠܝܛ ܗܘܐ ܒܥܒܪ ܢܗܪܐ ܘܪܒ ܒܡܠܟܘܬܗ ܘܫܪܝܪ ܠܡܠܟܐ

95. Maccabees 1 B 7:9

    ܘܫܕܪܗ ܠܗ ܘܠܐܠܩܝܡܘܣ ܪܫܝܥܐ ܘܐܩܝܡ ܠܗ ܟܗܢܘܬܐ ܘܦܩܕܗ ܕܢܥܒܕ ܬܒܥܬܐ ܒܒܢ̈ܝ ܐܝܣܪܝܠ

96. Maccabees 1 B 7:10

    ܘܫܩܠܘ ܘܐܬܘ ܒܚܝܠܐ ܣܓܝܐܐ ܠܐܪܥܐ ܕܝܗܘܕܐ ܘܫܕܪ ܡܠܐ̈ܟܐ ܠܘܬ ܝܗܘܕܐ ܘܐܚ̈ܘܗܝ ܒܡ̈ܠܐ ܕܫܠܡܐ ܒܢܟܠܐ

97. Maccabees 1 B 7:11

    ܘܠܐ ܚܕܝܘ ܒܡ̈ܠܘܗܝ ܚܙܘ ܓܝܪ ܕܐܬܘ ܒܚܝܠܐ ܣܓܝܐܐ

98. Maccabees 1 B 7:12

    ܘܐܬܟܢܫܘ ܠܘܬ ܐܠܩܝܡܣ ܘܒܝܟܪܘܣ ܟܢܘܫܬܐ ܕܣܦܪ̈ܐ ܠܡܒܥܐ ܬܪܝܨܘܬܐ

99. Maccabees 1 B 7:13

    ܘܪܫܐ ܕܐܫ̈ܕܝܐ ܗܘܘ ܒܐܝܣܪܝܠ ܘܒܥܝܢ ܗܘܘ ܕܢܥܒܕܘܢ ܥܡܗܘܢ ܫܠܡܐ

100. Maccabees 1 B 7:14

     ܐܡܪܘ ܓܝܪ ܓܒܪܐ ܟܗܢܐ ܡܢ ܙܪܥܐ ܕܐܗܪܘܢ ܐܬܐ ܒܚܝܠܘ̈ܬܐ ܘܠܐ ܢܗܪܢ

← Previous · Next → — showing 301–400 of 908

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.