← All works

Peshitta Maccabees 1 A

Peshitta (Syriac Old Testament) · 836 sections

1. Maccabees 1 A 1:1

   ܘܗܘܐ ܡܢ ܒܬܪ ܕܩܛܠ ܐܠܟܣܢܕܪܘܣ ܒܪ ܦܝܠܝܦܘܣ ܡܩܕܘܢܝܐ ܕܢܦܩ ܡܢ ܐܪܥܐ ܕܟܬܝ̈ܐ ܘܡܚܝܗܝ ܘܩܛܠܗ ܠܕܪܝܘܫ ܡܠܟܐ ܕܦܪ̈ܣܝܐ ܘܕܡ̈ܕܝܐ ܘܐܡܠܟ ܚܠܦܘܗܝ ܠܘܩܕܡ ܕܝܢ ܐܡܠܟ ܒܗܠܕܐ

2. Maccabees 1 A 1:2

   ܘܥܒܕ ܩܪ̈ܒܐ ܪ̈ܘܪܒܐ ܘܐܚܕ ܚܣ̈ܢܐ ܣ̈ܓܝܐܐ ܘܩܛܠ ܠܡ̈ܠܟܝܗ ܕܐܪܥܐ

3. Maccabees 1 A 1:3

   ܘܐܙܠ ܥܕܡܝܐ ܠܣ̈ܘܦܝܗ ܕܐܪܥܐ ܘܢܣܒ ܒܙܬܐ ܕܥܡ̈ܡܐ ܣ̈ܓܝܐܐ ܘܫܠܝܬ ܘܐܬܬܢܝܚܬ ܐܪܥܐ ܩܕܡܘܗܝ ܘܐܫܬܩܠ ܘܐܬܪܝܡ ܠܒܗ

4. Maccabees 1 A 1:4

   ܘܟܢܫ ܠܗ ܚܝܠܐ ܥܫܝܢܐ ܘܣܓܝܐܐ ܘܐܫܬܠܛ ܥܠ ܥܡ̈ܡܐ ܘܥܠ ܐܡܘ̈ܬܐ ܘܥܠ ܛܪ̈ܘܢܐ ܘܗܘܘ ܠܗ ܡ̈ܣܩܝ ܡܕܐܬܐ

5. Maccabees 1 A 1:5

   ܘܡܢ ܒܬܪ ܗܠܝܢ ܢܦܠ ܐܠܟܣܢܕܪܘܣ ܥܠ ܥܪܣܗ ܘܝܕܥ ܕܡܐܬ ܠܗ

6. Maccabees 1 A 1:6

   ܘܩܪܐ ܠܥܒ̈ܕܘܗܝ ܡܫܒ̈ܚܐ ܗܢܘܢ ܕܐܬܪܒܝܘ ܥܡܗ ܡܢ ܛܠܝܘܬܗ ܘܦܠܓܗ ܠܗܘܢ ܡܠܟܘܬܗ ܥܕ ܗܘ ܚܝ

7. Maccabees 1 A 1:7

   ܐܡܠܟ ܕܝܢ ܐܠܟܣܢܕܪܘܣ ܬܪ̈ܬܥܣܪ̈ܐ ܫܢ̈ܝܢ ܘܡܝܬ

8. Maccabees 1 A 1:8

   ܘܐܚܕܘ ܥܒ̈ܕܘܗܝ ܟܠ ܚܕ ܚܕ ܡܢܗܘܢ ܐܬܪܗ

9. Maccabees 1 A 1:9

   ܘܩܛܪܘ ܟܠܗܘܢ ܬ̈ܓܐ ܡܢ ܒܬܪ ܡܘܬܗ ܐܦ ܒܢܝ̈ܗܘܢ ܡܢ ܒܬܪܗܘܢ ܫ̈ܢܝܐ ܣܓܝܐ̈ܬܐ ܘܐܣܓܝܘ ܒܝܫ̈ܬܐ ܥܠ ܐܪܥܐ

10. Maccabees 1 A 1:10

    ܘܢܦܩ ܡܢܗܘܢ ܥܩܪܐ ܕܚܛܝܬܐ ܐܢܛܝܟܘܣ ܐܦܝܦܢܘܣ ܒܪܗ ܕܐܢܛܝܟܘܣ ܡܠܟܐ ܗܘ ܕܐܝܬܘܗܝ ܗܘܐ ܗܡܝܪܐ ܒܪܗܘܡܐ ܘܐܡܠܟ ܒܫܢܬ ܡܐܐ ܘܬܠܬܝܢ ܘܫܒܥ ܕܡܠܟܘܬܐ ܕܝܘ̈ܢܝܐ

11. Maccabees 1 A 1:11

    ܒܗܢܘܢ ܝܘܡ̈ܬܐ ܢܦܩܘ ܡܢ ܐܝܣܪܝܠ ܐܢܫ̈ܐ ܒܢ̈ܝ ܥܘ̈ܠܐ ܘܐܦܝܣܘ ܠܣܓ̈ܝܐܐ ܟܕ ܐܡܪܝܢ ܠܗܘܢ ܢܐܙܠ ܘܢܩܝܡ ܩܝܡܐ ܥܡ ܥܡ̈ܡܐ ܗܠܝܢ ܕܚܕܝܪ̈ܝܢ ܠܢ ܡܛܠ ܕܡܢ ܝܘܡܐ ܕܦܪܫܢ ܡܢܗܘܢ ܐܫܟܚܢ ܒܝܫ̈ܬܐ ܣܓܝܐ̈ܬܐ

12. Maccabees 1 A 1:12

    ܘܫܦܪܬ ܡܠܬܐ ܒܥܝ̈ܢܝܗܘܢ

13. Maccabees 1 A 1:13

    ܘܐܬܚܫܒܘ ܐܢܫܐ ܡܢ ܥܡܐ ܘܐܙܠܘ ܠܘܬ ܡܠܟܐ ܘܝܗܒ ܠܗܘܢ ܡܠܟܐ ܫܘܠܛܢܐ ܕܢܥܒܕܘܢ ܐܝܟ ܢܡܘܣܐ ܕܥܡ̈ܡܐ

14. Maccabees 1 A 1:14

    ܘܒܢܘ ܒ̈ܢܝ ܥܘܠܐ ܐܣܛܕܝܘܢ ܒܐܘܪܫܠܡ ܐܝܟ ܢܡܘܣܗܘܢ ܕܥܡ̈ܡܐ

15. Maccabees 1 A 1:15

    ܘܢܓܕܘ ܠܗܘܢ ܥܘܪܠܘܬܐ ܘܐܪܚܩܘ ܡܢ ܕܝܬܩܐ ܩܕܝܫܬܐ ܘܐܬܚܠܛܘ ܒܥܡ̈ܡܐ ܘܐܨܛܒܝܘ ܠܡܥܒܕ ܒܝܫ̈ܬܐ

16. Maccabees 1 A 1:16

    ܘܐܬܥܬܕܬ ܘܐܬܛܝܒܬ ܡܠܟܘܬܐ ܩܕܡ ܐܢܛܝܟܘܣ ܘܨܒܐ ܕܢܡܠܟ ܐܦ ܥܠ ܐܪܥܐ ܕܡܨܪܝܢ ܐܝܟܢܐ ܕܢܡܠܟ ܥܠ ܬܪ̈ܬܝܗܝܢ ܡܠܟܘ̈ܬܐ

17. Maccabees 1 A 1:17

    ܘܥܠ ܐܢܛܝܟܘܣ ܠܡܨܪܝܢ ܒܚܝܠܐ ܥܫܝܢܐ ܘܪܒܐ ܒܡܪ̈ܟܒܬܐ ܘܒܦ̈ܝܠܐ ܘܒܦܪ̈ܫܐ ܘܒܬܫܒܘܚܬܐ ܪܒܬܐ

18. Maccabees 1 A 1:18

    ܘܥܒܕ ܩܪܒܐ ܥܡ ܦܛܠܡܐܘܣ ܡܠܟܐ ܕܡܨܪܝܢ ܘܐܙܕܟܝ ܦܛܠܡܐܘܣ ܡܢ ܩܕܡܘܗܝ ܘܥܪܩܘ ܘܢܦܠܘ ܩ̈ܛܝܠܐ ܣܓ̈ܝܐܐ

19. Maccabees 1 A 1:19

    ܘܐܚܕܘ ܡܕܝܢ̈ܬܐ ܥܫܝܢ̈ܬܐ ܕܡܨܪܝܢ ܘܢܣܒܘ ܒܙܬܐ ܕܐܪܥܐ ܕܡܨܪܝܢ

20. Maccabees 1 A 1:20

    ܘܗܦܟ ܐܢܛܝܟܘܣ ܡܢ ܒܬܪ ܕܡܚܗ ܠܡܨܪܝܢ ܒܫܢܬ ܡܐܐ ܘܐܪܒܥܝܢ ܘܬܠܬ ܘܣܠܩ ܐܦ ܥܠ ܐܝܣܪܝܠ ܘܐܬܐ ܠܐܘܪܫܠܡ ܒܚܝܠܐ ܥܫܝܢܐ

21. Maccabees 1 A 1:21

    ܘܥܠ ܠܒܝܬ ܡܩܕܫܐ ܒܫܘܒܗܪܐ ܘܢܣܒ ܠܡܕܒܚܐ ܕܕܗܒܐ ܘܠܡܢܪܬܐ ܕܢܘܗܪܐ ܘܠܟܠܗܘܢ ܡܐ̈ܢܝ ܬܘܩܢܗ

22. Maccabees 1 A 1:22

    ܘܠܦܬܘܪܐ ܕܠܚܡ ܐ̈ܦܐ ܘܠܢܘܩ̈ܝܐ ܘܠܦܝ̈ܠܣܐ ܘܠܡ̈ܐܢܝ ܕܒ̈ܚܐ ܘܩܘܪ̈ܒܢܐ ܕܕܗܒܐ ܘܠܐ̈ܦܝ ܬܪܥܐ ܘܠܟ̈ܠܝܠܐ ܘܠܟܠܗ ܨܒܬܐ ܕܕܗܒܐ ܕܒܐ̈ܦܝ ܗܝܟܠܐ ܘܩܠܦ ܟܠܗ ܥܒܕܐ

23. Maccabees 1 A 1:23

    ܘܢܣܒ ܕܗܒܐ ܘܣܐܡܐ ܘܠܟܠܗܘܢ ܡܐ̈ܢܐ ܕܪܓܬܐ ܘܢܣܒ ܣܝ̈ܡܬܐ ܡܛܫ̈ܝܬܐ ܐܝܠܝܢ ܕܐܫܟܚ

24. Maccabees 1 A 1:24

    ܘܢܣܒ ܟܠܡܕܡ ܐܢܛܝܟܘܣ ܘܐܙܠ ܠܐܪܥܗ ܘܥܒܕ ܩܛܠܐ ܪܒܐ ܘܡܠܠ ܒܫܒܗܪܢܘܬܐ ܪܒܬܐ

25. Maccabees 1 A 1:25

    ܘܗܘܐ ܐܒܠܐ ܪܒܐ ܒܐܝܣܪܝܠ ܒܟܠ ܒܝܬ ܡܥܡܪܗܘܢ

26. Maccabees 1 A 1:26

    ܘܐܬܬܢܚܘ ܪ̈ܫܢܐ ܘܣ̈ܒܐ ܘܥܠܝܡ̈ܐ ܘܒܬܘ̈ܠܬܐ ܐܫܬܦܠ ܘܐܫܬܚܠܦ ܫܘܦܪܗܝܢ ܕܢܫ̈ܐ

27. Maccabees 1 A 1:27

    ܘܟܠ ܚܬܢܐ ܢܣܒ ܥܠܘܗܝ ܐܒܠܐ ܘܕܝܬܒܐ ܒܓܘ ܓܢܘܢܐ ܐܬܐܒܠܬ

28. Maccabees 1 A 1:28

    ܘܐܬܬܙܝܥܬ ܐܪܥܐ ܥܠ ܥܡܘܕ̈ܝܗ ܘܟܠܗ ܒܝܬ ܝܥܩܘܒ ܠܒܫܘ ܒܗܬܬܐ

29. Maccabees 1 A 1:29

    ܘܡܢ ܒܬܪ ܬܪ̈ܬܝܢ ܫ̈ܢܝܢ ܫܕܪ ܐܢܛܝܟܘܣ ܡܠܟܐ ܪܫܐ ܕܬܒܥܬܐ ܕܡܕܐܬܐ ܒܐܪܥܐ ܕܝܗܘܕ ܘܐܬܐ ܠܐܘܪܫܠܡ ܒܚܝܠܐ ܥܫܝܢܐ ܘܪܒܐ

30. Maccabees 1 A 1:30

    ܘܡܠܠ ܡ̈ܠܐ ܕܫܠܡܐ ܒܢܟܠܐ ܘܗܝܡܢܘܗܝ ܘܢܦܠ ܥܠ ܡܕܝܢܬܐ ܡܢ ܫܠܝܐ ܘܡܚܗ ܡܚܘܬܐ ܪܒܬܐ ܘܐܘܒܕ ܥܡܐ ܣܓܝܐܐ ܡܢ ܐܝܣܪܐܝܠ

31. Maccabees 1 A 1:31

    ܘܢܣܒ ܒܙܬܗ ܕܡܕܝܢܬܐ ܘܐܘܩܕܗ ܒܢܘܪܐ ܘܣܚܦ ܒ̈ܬܝܗ ܘܠܫܘܪܗ ܟܕ ܚܕܪ

32. Maccabees 1 A 1:32

    ܘܫܒܐ ܢܫ̈ܝܗܘܢ ܘܒܢܝ̈ܗܘܢ ܘܒܥܝܪܗܘܢ ܘܝܪܬܘ ܒܗܘܢ ܝܘܪܬܢܐ

33. Maccabees 1 A 1:33

    ܘܒܢܘ ܠܡܕܝܢܬܗ ܕܕܘܝܕ ܒܫܘܪܐ ܪܒܐ ܘܚܣܝܢܐ ܘܒܡ̈ܓܕܠܐ ܥܫܝ̈ܢܐ ܘܗܘܬ ܠܗܘܢ ܠܡܪܕܐ

34. Maccabees 1 A 1:34

    ܘܐܘܬܒܘ ܒܗ ܥܡܐ ܚܬܝܐ ܐܢܫܐ ܥܒ̈ܕܝ ܥܘܠܐ ܘܐܬܥܫܢܘ ܒܗ

35. Maccabees 1 A 1:35

    ܘܣܡܘ ܒܗ ܙܝܢܐ ܘܪ̈ܘܡܚܐ ܘܟܢܫܘ ܟܠܗ ܒܙܬܐ ܕܐܘܪܫܠܡ ܘܣܡܘ ܬܡܢ ܘܗܘܬ ܠܦܚܐ ܪܒܐ

36. Maccabees 1 A 1:36

    ܘܗܘܬ ܠܥܘܘܟܐ ܠܒܝܬ ܡܩܕܫܐ ܘܠܬܘܩܠܬܐ ܘܠܡܟܫܘ̈ܠܐ ܒܝܫܐ ܠܐܝܣܪ̈ܝܠ ܒܟܠܙܒܢ

37. Maccabees 1 A 1:37

    ܘܐܫܕܘ ܕܡܐ ܙܟܝܐ ܚܕܪ̈ܝ ܒܝܬ ܡܩܕܫܐ ܘܛܡܐܘܗܝ ܠܒܝܬ ܡܩܕܫܐ

38. Maccabees 1 A 1:38

    ܘܥܪܩܘ ܡܛܠܬܗܘܢ ܝܬܒ̈ܝܗ ܕܐܘܪܫܠܡ ܘܗܘܬ ܒܝܬ ܡܥܡܪܐ ܠܢܘܟܪ̈ܝܐ ܘܗܘܬ ܢܘܟܪܝܬܐ ܠܝ̈ܠܕܝܗ ܘܒܢ̈ܝܗ ܫܒܩܘܗ

39. Maccabees 1 A 1:39

    ܘܒܝܬ ܡܩܕܫܐ ܚܪܒ ܐܝܟ ܡܕܒܪܐ ܥܕܥ̈ܕܝܗ ܐܬܗܦܟܘ ܠܐܒܠܐ ܘܫܒ̈ܝܗ ܠܚܣܕܐ ܘܐܝܩܪܗ ܠܨܥܪܐ

40. Maccabees 1 A 1:40

    ܐܝܟ ܣܘܓܐܐ ܕܬܫܒܘܚܬܗ ܗܟܢܐ ܣܓܝ ܨܥܪܗ ܘܪܘܡܪܡܗ ܐܬܗܦܟ ܠܡܘܟܟܐ

41. Maccabees 1 A 1:41

    ܘܟܬܒ ܐܢܛܝܟܘܣ ܡܠܟܐ ܠܟܠܗ ܡܠܟܘܬܗ ܕܢܗܘܘܢ ܟܠܗܘܢ ܥܡܐ ܚܕ

42. Maccabees 1 A 1:42

    ܘܢܫܒܘܩ ܟܠ ܐܢܫ ܢܡܘܣܗ ܘܩܒܠܘ ܟܠܗܘܢ ܥܡ̈ܡܐ ܕܢܥܒܕܘܢ ܐܝܟ ܡܠܬܗ ܕܡܠܟܐ

43. Maccabees 1 A 1:43

    ܘܣܓ̈ܝܐܐ ܡܢ ܐܝܣܪܝܠ ܐܨܛܒܝܘ ܒܦܘܠܚܢܗ ܘܕܒܚܘ ܠܦܬܟܪ̈ܘܗܝ ܘܐܚܠܘ ܫܒܬܐ

44. Maccabees 1 A 1:44

    ܘܫܕܪ ܡܠܟܐ ܐܢܛܝܟܘܣ ܒܝܕ ܫ̈ܠܝܚܘܗܝ ܠܐܪܫܠܡ ܘܠܩܘܪ̈ܝܐ ܕܝܗܘܕܐ ܕܢܐܙܠܘܢ ܒܬܪ ܢܡܘ̈ܣܐ ܢܘܟܪ̈ܝܐ ܕܐܪܥܐ

45. Maccabees 1 A 1:45

    ܘܕܢܬܟܠܘܢ ܕܒ̈ܚܐ ܘܢܘ̈ܩܝܐ ܘܩܘܪ̈ܒܢܐ ܡܢ ܒܝܬ ܡܩܕܫܐ ܘܠܡܚܠܘ ܫܒ̈ܐ ܘܥ̈ܕܥܕܐ

46. Maccabees 1 A 1:46

    ܘܠܡܛܡܐܘ ܠܒܝܬ ܡܩܕܫܐ ܘܩܘܕܫܐ

47. Maccabees 1 A 1:47

    ܘܕܢܒܢܘܢ ܥܠܘ̈ܬܐ ܘܒܝܬ ܦܬܟܪ̈ܐ ܘܠܡܩܡܘ ܦܬܟܪ̈ܐ ܘܠܡܢܟܣܘ ܚܙܝܪ̈ܐ ܘܒܥܝܪܐ ܛܡܐܬܐ

48. Maccabees 1 A 1:48

    ܘܠܡܫܒܩ ܒܢܝ̈ܗܘܢ ܟܕ ܠܐ ܓܙܝܪ̈ܝܢ ܘܠܡܣܝܒܘ ܢܦܫ̈ܬܗܘܢ ܒܟܠ ܛܡܐܘܬܐ ܘܠܡܚܠܘ ܐܢܘܢ

49. Maccabees 1 A 1:49

    ܐܝܟ ܕܢܛܥܘܢ ܢܡܘܣܐ ܘܢܫܚܠܦܘܢ ܟܠܗܘܢ ܦܘܩ̈ܕܢܐ

50. Maccabees 1 A 1:50

    ܘܟܠ ܡܢܘ ܕܠܐ ܢܥܒܕ ܐܝܟ ܡܠܬܗ ܕܡܠܟܐ ܢܡܘܬ

51. Maccabees 1 A 1:51

    ܘܐܝܟ ܟܠܗܘܢ ܗܠܝܢ ܦܬܓܡ̈ܐ ܟܬܒ ܠܟܠܗ ܡܠܟܘܬܗ ܘܐܩܝܡ ܩܝܘ̈ܡܐ ܥܠ ܟܠܗ ܥܡܐ ܘܦܩܕ ܠܡܕܝܢ̈ܬܐ ܕܝܗܘ̈ܕܝܐ ܠܡܕܒܚܘ ܒܟܠ ܡܕܝܢܐ ܘܡܕܝܢܐ

52. Maccabees 1 A 1:52

    ܘܐܬܟܢܫܘ ܠܘܬܗܘܢ ܣܓ̈ܝܐܐ ܡܢ ܥܡܐ ܟܠ ܡܢܘ ܕܫܒܩ ܢܡܘܣܐ ܘܥܒܕܘ ܒܝܫ̈ܬܐ ܣܓܝܐ̈ܬܐ ܒܐܪܥܐ

53. Maccabees 1 A 1:53

    ܘܣܡܘܗܝ ܠܐܝܣܪܐܝܠ ܒܡܛܫܝ̈ܬܐ ܒܟܠ ܒܝܬ ܥܪ̈ܘܩܝܗܘܢ

54. Maccabees 1 A 1:54

    ܘܒܚܡܫܥܣܪܐ ܒܝܪܚܐ ܒܟܢܘܢ ܩܕܝܡ ܒܫܢܬ ܡܐܐ ܘܐܪܒܥܝܢ ܘܚܡܫ ܒܢܘ ܛܡܐܘܬܐ ܕܚܘܪܒܐ ܥܠ ܡܕܒܚܐ ܒܡܕܝ̈ܢܬܐ ܕܝܗܘܕܐ ܘܒܢܘ ܚܕܪ̈ܘܗܝ ܥ̈ܠܘܬܐ

55. Maccabees 1 A 1:55

    ܘܥܠ ܬܪ̈ܥܐ ܕܒ̈ܬܐ ܘܒܦܠܛܘ̈ܬܐ ܡܕܒܚܝܢ ܗܘܘ

56. Maccabees 1 A 1:56

    ܘܟܬ̈ܒܐ ܕܢܡܘܣܐ ܕܐܫܟܚܘ ܣܕܩܘ ܘܐܘܩܕܘ ܐܢܘܢ ܒܢܘܪܐ

57. Maccabees 1 A 1:57

    ܘܟܠ ܐܝܟܐ ܕܡܫܬܟܚ ܗܘܐ ܟܬܒܐ ܕܢܡܘܣܐ ܐܘ ܡܢܘ ܕܡܨܛܒܐ ܒܗ ܒܢܡܘܣܐ ܗܢܐ ܗܘܐ ܓܙܪ ܕܝܢܗ ܕܡܠܟܐ ܕܢܡܘܬ

58. Maccabees 1 A 1:58

    ܘܗܟܢܐ ܒܥܘܫܢܐ ܐܠܨܝܢ ܗܘܘ ܠܐܝܣܪܝܠ ܠܟܠܗܘܢ ܐܝܠܝܢ ܕܡܫܬܟܚܝܢ ܗܘܘ ܒܡܕܝܢ̈ܬܐ ܒܟܠ ܝܪܚ ܒܝܪܚ

59. Maccabees 1 A 1:59

    ܘܒܚܡܫܐ ܘܥܣܪܝܢ ܒܝܪܚܐ ܟܕ ܡܕܒܚܝܢ ܗܘܘ ܥܠ ܥܠܬܐ ܗܝ ܕܐܝܬ ܗܘܐ ܥܠ ܡܕܒܚܐ

60. Maccabees 1 A 1:60

    ܡܝܬܝܢ ܗܘܘ ܢܫ̈ܐ ܐܝܠܝܢ ܕܓܙܪ ܒܢ̈ܝܗܝܢ ܘܡܩܛܠܝܢ ܗܘܘ ܠܗܝܢ ܐܝܟ ܦܘܩܕܢܐ

61. Maccabees 1 A 1:61

    ܟܕ ܬܠܝܢ ܗܘܘ ܒܢܝ̈ܗܝܢ ܒܨܘܪ̈ܝܗܝܢ ܘܒܙܘ ܒܬ̈ܝܗܝܢ ܘܠܐܝܠܝܢ ܕܓܙܪܘ ܐܢܘܢ ܩܛܠܘ ܐܢܘܢ

62. Maccabees 1 A 1:62

    ܘܣܓ̈ܝܐܐ ܡܢ ܐܝܣܪܝܠ ܐܬܚܝܠܘ ܘܐܬܥܫܢܘ ܕܠܐ ܢܐܟܠܘܢ ܕܡܣܝܒ

63. Maccabees 1 A 1:63

    ܘܓܒܘ ܠܗܘܢ ܕܢܡܘܬܘܢ ܘܠܐ ܕܢܣܬܝܒܘܢ ܒܡܐ̈ܟܠܬܐ ܐܘ ܕܢܫܪܘܢ ܕܝܬܩܐ ܩܕܝܫܬܐ ܘܡܝܬܘ

64. Maccabees 1 A 1:64

    ܘܗܘܐ ܪܘܓܙܐ ܪܒܐ ܒܐܝܣܪܐܝܠ

65. Maccabees 1 A 2:1

    ܘܒܗܢܘܢ ܝܘ̈ܡܬܐ ܩܡ ܡܬܝܬܐ ܒܪܗ ܕܝܘܚܢܢ ܒܪ ܫܡܥܘܢ ܟܗܢܐ ܡܢ ܒ̈ܢܝ ܝܘܢܕܒ ܡܢ ܐܘܪܫܠܡ ܘܝܬܒ ܒܡܘܕܥܝܡ

66. Maccabees 1 A 2:2

    ܘܐܝܬ ܗܘܐ ܠܗ ܚܡܫܐ ܒ̈ܢܝܢ ܝܘܚܢܢ ܗܘ ܕܡܬܩܪܐ ܓܕܝ

67. Maccabees 1 A 2:3

    ܘܫܡܥܘܢ ܕܐܬܩܪܝ ܬܪܣܝ

68. Maccabees 1 A 2:4

    ܘܝܗܘܕܐ ܗܘ ܕܐܬܩܪܝ ܡܩܒܝ

69. Maccabees 1 A 2:5

    ܘܐܠܝܥܙܪ ܗܘ ܕܐܬܩܪܝ ܚܘܪܢ ܘܝܘܢܬܢ ܗܘ ܕܐܬܩܪܝ ܚܦܘܣ

70. Maccabees 1 A 2:6

    ܘܚܙܘ ܓܘ̈ܕܦܐ ܕܗܘܝܢ ܒܝܗܘܕܐ ܘܒܐܘܪܫܠܡ

71. Maccabees 1 A 2:7

    ܘܐܡܪ ܘܝ ܠܝ ܠܡܢܐ ܐܬܝܠܕܬ ܕܐܚܙܐ ܒܬܒܪܗ ܕܒܪܬ ܥܡܝ ܘܕܡܕܝܢܬܐ ܩܕܝܫܬܐ ܘܐܝܬܒܘ ܬܡܢ ܢܘܟܪ̈ܝܐ ܡܛܠ ܕܐܬܝܗܒܬ ܒܐܝܕܐ ܕܒܥ̈ܠܕܒܒܐ ܘܒܝܬ ܡܩܕܫܗ ܒܐܝܕܐ ܕܢܘܟܪ̈ܝܐ

72. Maccabees 1 A 2:8

    ܗܘܐ ܗܝܟܠܗ ܒܙܒܢ ܐܝܟ ܓܒܪܐ ܡܫܒܚܐ

73. Maccabees 1 A 2:9

    ܘܗܫܐ ܡܐ̈ܢܐ ܕܬܫܒܘܚܬܗ ܐܙܠܘ ܒܫܒܝܐ ܝܠܘ̈ܕܝܗ ܐܬܩܛܠܘ ܒܦܠܛܘ̈ܬܗ ܘܥܠܝܡ̈ܐ ܒܪܘܡܚܗ ܕܒܥܠܕܒܒܐ

74. Maccabees 1 A 2:10

    ܐܝܢܘ ܥܡܐ ܕܠܐ ܐܝܪܬܘ ܒܡܠܟܘܬܗ ܘܢܣܒ ܡܢ ܒܙܬܗ

75. Maccabees 1 A 2:11

    ܟܠܗ ܨܒܬܗ ܐܬܢܣܒ ܡܢܗ ܘܚܠܦ ܚܐܪܘܬܗ̇ ܗܘܬ ܠܥܒܕܘܬܐ

76. Maccabees 1 A 2:12

    ܘܗܐ ܒܝܬ ܡܩܕܫܢ ܘܨܒܬܢ ܘܬܫܒܘܚܬܢ ܗܘܘ ܠܚܘܪܒܐ ܘܣܝܒܘ ܐܢܘܢ ܥܡܡ̈ܐ

77. Maccabees 1 A 2:13

    ܘܠܡܢܐ ܡܟܝܠ ܐܙܠ ܠܢ ܠܡܚܐ

78. Maccabees 1 A 2:14

    ܘܣܕܩܘ ܡܬܝܬܐ ܘܒܢ̈ܘܗܝ ܢܚ̈ܬܝܗܘܢ ܘܐܬܟܣܝܘ ܣܩ̈ܐ ܘܐܬܐܒܠܘ ܪܘܪܒܐܝܬ

79. Maccabees 1 A 2:15

    ܘܐܬܘ ܦܠܚ̈ܘܗܝ ܕܡܠܟܐ ܗܢܘܢ ܕܐܠܨܝܢ ܗܘܘ ܥܠ ܡܣܛܝܢܘܬܐ ܠܡܘܪܥܝܡ ܡܕܝܢܬܐ ܕܢܕܒܚܘܢ

80. Maccabees 1 A 2:16

    ܘܣ̈ܓܝܐܐ ܡܢ ܐܝܣܪܝܠ ܐܬܘ ܠܘܬܗܘܢ ܐܦ ܡܬܝܬܐ ܘܐܝܠܝܢ ܕܥܡܗ ܐܬܟܢܫܘ

81. Maccabees 1 A 2:17

    ܘܥܢܘ ܦܠܚ̈ܘܗܝ ܕܡܠܟܐ ܘܐܡܪܘ ܠܡܬܝܬܐ ܐܢܬ ܗܘ ܪܫܐ ܘܪܒܐ ܘܡܫܒܚܐ ܒܡܕܝܢܬܐ ܗܕܐ ܕܡܫܪܪ ܐܢܬ ܘܡܩܝܡ ܒܒܢ̈ܝܐ ܘܒܐ̈ܚܐ

82. Maccabees 1 A 2:18

    ܘܗܫܐ ܗܟܝܠ ܩܪܘܒ ܐܢܬ ܩܕܡܝܐ ܘܥܒܕ ܦܘܩܕܢܗ ܕܡܠܟܐ ܐܝܟ ܕܥܒܕܘ ܟܠܗܘܢ ܥܡܡ̈ܐ ܘܓܒܪ̈ܐ ܕܝܗܘܕܐ ܐܝܠܝܢ ܕܐܫܬܚܪܘ ܒܐܘܪܫܠܡ ܘܬܗܘܐ ܐܢܬ ܘܒܢ̈ܝܟ ܡܢ ܪ̈ܚܡܘܗܝ ܕܡܠܟܐ ܘܐܢܬ ܘܒ̈ܢܝܟ ܬܫܬܒܚܘܢ ܒܕܗܒܐ ܘܒܣܐܡܐ ܘܒܫܪܟܐ ܕܡܘܗ̈ܒܬܐ ܐܚܪ̈ܢܝܬܐ

83. Maccabees 1 A 2:19

    ܘܥܢܐ ܡܬܝܬܐ ܒܩܠܐ ܪܡܐ ܘܐܡܪ ܐܢܗܘ ܕܟܠܗܘܢ ܥܡܡ̈ܐ ܕܬܚܝܬ ܫܘܠܛܢܗ ܕܡܠܟܐ ܡܫܬܡܥܝܢ ܠܗ ܕܢܦܪܩܘܢ ܡܢ ܦܘܠܚܢܐ ܕܐܒܗ̈ܝܗܘܢ ܘܢܨܛܒܘܢ ܒܦܘܩ̈ܕܢܘܗܝ

84. Maccabees 1 A 2:20

    ܐܠܐ ܐܢܐ ܘܒ̈ܢܝ ܘܐܚ̈ܝ ܒܕܝܬܩܐ ܕܐܒ̈ܗܝܢ ܪ̈ܕܝܢ ܐܢܚܢܢ

85. Maccabees 1 A 2:21

    ܚܣ ܠܢ ܕܢܫܒܘܩ ܢܡܘܣܗ ܕܡܪܝܐ ܘܦܘܩ̈ܕܢܘܗܝ

86. Maccabees 1 A 2:22

    ܠܐ ܡܫܬܡܥܝܢ ܚܢܢ ܠܡܠܬܗ ܕܡܠܟܐ ܕܢܥܒܪ ܩܝܡܢ ܘܦܘܠܚܢܢ ܐܘ ܕܢܣܛܐ ܡܢܗܘܢ ܠܝܡܝܢܐ ܐܘ ܠܣܡܠܐ

87. Maccabees 1 A 2:23

    ܘܟܕ ܫܠܝ ܡܬܝܬܐ ܡܢ ܕܡܡܠܠ ܗܠܝܢ ܦܬܓܡ̈ܐ ܩܪܒ ܓܒܪܐ ܚܕ ܝܗܘܕܝܐ ܠܥܝܢ ܟܠܗ ܥܡܐ ܠܡܕܒܚܘ ܥܠ ܥܠܬܐ ܕܒܡܘܪܥܝܡ ܐܝܟ ܦܘܩܕܢܗ ܕܡܠܟܐ

88. Maccabees 1 A 2:24

    ܘܚܙܐ ܡܬܝܬܐ ܘܛܢ ܘܪܬ ܟܘ̈ܠܝܬܗ ܘܐܣܩ ܚܡܬܐ ܐܝܟ ܕܝܢܐ ܘܪܗܛ ܘܩܛܠܗ ܥܠ ܥܠܬܐ

89. Maccabees 1 A 2:25

    ܘܐܦ ܠܪܒܐ ܕܡܠܟܐ ܗܘ ܕܐܠܨ ܗܘܐ ܕܢܕܒܚܘܢ ܩܛܠܗ ܒܗܘ ܙܒܢܐ ܘܠܥܠܬܐ ܣܚܦ

90. Maccabees 1 A 2:26

    ܘܛܢ ܡܬܝܬܐ ܒܢܡܘܣܐ ܐܝܟ ܕܥܒܕ ܦܝܢܚܣ ܠܙܡܪܝ ܒܪ ܣܠܘ

91. Maccabees 1 A 2:27

    ܘܩܪܐ ܡܬܝܬܐ ܒܡܕܝܢܬܐ ܒܩܠܐ ܪܡܐ ܘܐܡܪ ܟܠ ܡܢܘ ܕܛܐܢ ܒܢܡܘܣܐ ܘܡܩܝܡ ܕܝܬܩܐ ܢܐܬܐ ܒܬܪܝ

92. Maccabees 1 A 2:28

    ܘܥܪܩ ܗܘ ܘܒܢ̈ܘܗܝ ܠܛܘܪܐ ܘܫܒܩܘ ܡܕܡ ܕܐܝܬ ܗܘܐ ܠܗܘܢ ܒܡܕܝܢܬܐ

93. Maccabees 1 A 2:29

    ܗܝܕܝܢ ܢܚܬܘ ܣܓ̈ܝܐܐ ܕܒ̈ܥܝܢ ܗܘܘ ܙܕܝܩܘܬܐ ܘܕܝܢܐ ܠܐܪܥܐ ܕܡܕܒܪܐ ܕܢܬܒܘܢ ܬܡܢ

94. Maccabees 1 A 2:30

    ܗܢܘܢ ܘܢܫ̈ܝܗܘܢ ܘܒܢ̈ܝܗܘܢ ܘܒܥܝܪܗܘܢ ܡܛܠ ܕܣ̈ܓܝ ܥܠܝܗܘܢ ܒܝܫ̈ܬܐ

95. Maccabees 1 A 2:31

    ܘܐܬܐܡܪ ܠܦܠܚ̈ܘܗܝ ܕܡܠܟܐ ܘܠܚܝ̈ܠܘܬܐ ܕܐܝܬ ܗܘܘ ܒܐܘܪܫܠܡ ܒܡܕܝܢܬܗ ܕܕܘܝܕ ܕܢܚܬܘ ܐܢܫܐ ܐܝܠܝܢ ܕܒܛܠܘ ܦܘܩܕܢܗ ܕܡܠܟܐ ܘܐܝܬܝܗܘܢ ܒܛܫܝ̈ܬܐ ܕܡܕܒܪܐ

96. Maccabees 1 A 2:32

    ܘܪܗܛܘ ܥܠܝܗܘܢ ܣܓ̈ܝܐܐ ܘܐܕܪܟܘ ܐܢܘܢ ܘܥܒܕܘ ܥܡܗܘܢ ܩܪܒܐ ܒܝܘܡܐ ܕܫܒܬܐ

97. Maccabees 1 A 2:33

    ܘܐܡܪܘ ܠܗܘܢ ܣܦܩܐ ܠܟܘܢ ܥܕܡܐ ܠܗܕܐ ܦܘܩܘ ܘܥܒܕܘ ܐܝܟ ܦܘܩܕܢܗ ܕܡܠܟܐ ܘܚܝܘ

98. Maccabees 1 A 2:34

    ܘܐܡܪܘ ܠܐ ܢܦܩܝܢ ܐܢܚܢܢ ܘܐܦܠܐ ܥܒܕܝܢܢ ܡܠܬܗ ܕܡܠܟܐ ܠܡܫܪܐ ܘܠܡܒܛܠܘ ܝܘܡܐ ܕܫܒܬܐ

99. Maccabees 1 A 2:35

    ܘܣܪܗܒܘ ܥܠܝܗܘܢ ܩܪܒܐ

100. Maccabees 1 A 2:36

     ܘܠܐ ܝܗܒܘ ܠܗܘܢ ܦܬܓܡܐ ܐܦܠܐ ܟܐܦܐ ܫܕܘ ܒܗܘܢ ܐܦܠܐ ܣܟܪܘ ܒܐ̈ܦܝܗܘܢ ܒܡܛܫ̈ܝܬܐ

Next → — showing 1–100 of 836

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.