← All works

Peshitta Letter of Baruch B

Peshitta (Syriac Old Testament) · 83 sections

1. Letter of Baruch B 78:1

   ܗܠܝܢ ܐܢܘܢ ܦܬܓܡ̈ܐ ܕܐܓܪܬܐ ܗ̇ܝ ܕܫ̇ܕܪ ܒܪܘܟ ܒܪ ܢܪܝܐ ܠܬܫܥܐ ܫ̈ܒܛܝܢ ܘܦܠܓܗ. ܗܠܝܢ ܕܐܝܬܝܗܘܢ ܗܘܘ ܒܥܒܪܗ ܕܢܗܪܐ. ܕܟܬܝܒܝܢ ܗܘܘ ܒܗ̇ ܗܠܝܢ.

2. Letter of Baruch B 78:2

   ܗܟܢܐ ܐܡ̇ܪ ܒܪܘܟ ܒܪ ܢܪܝܐ. ܠܐܚ̈ܐ ܕܐܫܬܒܝܘ. ܪ̈ܚܡܐ ܐܦ ܫܠܡܐ ܢܗܘܐ ܠܟܘܢ.

3. Letter of Baruch B 78:3

   ܥܗܝܕ ܐܢܐ ܐܚ̈ܝ ܠܚܘܒܐ ܕܗ̇ܘ ܕܒܪܢܝ ܕܐܚܒܢ ܡܢ ܩܕܝܡ. ܘܕܠܐ ܡܡܬܘܡ ܣܢܢ. ܐܠܐ ܝܬܝܪܐܝܬ ܪܕܐ ܗܘܐ ܠܢ

4. Letter of Baruch B 78:4

   ܘܫܪܝܪܐܝܬ ܝܕ̇ܥ ܐܢܐ ܕܠܘ ܐܬܐܣܪܢ ܟܠܢ ܬܪܥܣܪ ܫܒ̈ܛܝܢ ܒܚܕ ܐܣܘܪܝܐ. ܕܐܝܟ ܕܡܢ ܚܕ ܐܒܐ ܝܠܝܕܝܢ ܚܢܢ.

5. Letter of Baruch B 78:5

   ܡܛܠ ܗܢܐ ܝܬܝܪܐܝܬ ܐܬܒܛܠ ܠܝ ܕܐܫܒܘܩ ܠܟܘܢ̇. ܡ̈ܠܝܗ̇ ܕܗܕܐ ܐܓܪܬܐ. ܡܢ ܩܕܡ ܕܐܡܘܬ. ܕܬܗܘܘܢ ܡܬܒܝܐܝܢ ܥܠ ܒܝܫ̈ܬܐ ܕܡܛܝܟܘܢ. ܘܕܬܬܥ̇ܝܩܘܢ ܬܘܒ ܥܠ ܒܝ̣ܫ̈ܬܐ ܕܓ̣ܕܫ ܠܐܚ̈ܝܟܘܢ. ܘܬܘܒ ܕܝܢ ܕܬܙܕܩܘܢ ܕܝܢ̣ܗ ܕܗ̇ܘ ܕܓ̣ܙܪ ܥܠܝܟܘܢ ܕܬܫܬܒܘܢ. ܒܨܝܪ ܗܘ ܓܝܪ ܡܕܡ ܕܚܫ̇ܬܘܢ ܡܢ ܡܐ ܕܥ̣ܒܕܬܘܢ. ܡܛܠ ܕܠܙܒ̈ܢܐ ܐܚܪ̈ܝܐ ܬܫܬܟܚܘܢ ܫܘ̇ܝܢ ܠܐܒܗ̈ܝܟܘܢ.

6. Letter of Baruch B 78:6

   ܡܛܠ ܗܢܐ ܐܢ ܬܬܚܫܒܘܢ ܗܠܝܢ ܕܠܛܒ̈ܬܟܘܢ ܚܫܬܘܢ ܗܫܐ̣. ܕܠܐ ܠܚܪܬܐ ܬܬܕܝܢܘܢ ܘܬܫܬܢܩܘܢ. ܗ̇ܝܕܝܢ ܬܩܒܠܘܢ ܣܒܪܐ ܕܠܥܠܡ̇. ܐܢܗ̣ܘ ܕܝܬܝܪܐܝܬ ܬܪܝܡܘܢ ܡܢ ܠܒܟܘܢ ܛܥܝܘܬܐ ܣܪܝܩܬܐ. ܗ̇ܝ ܕܡܛܠܬܗ̇ ܐܙ̣ܠܬܘܢ ܡܢ ܗܪܟܐ.

7. Letter of Baruch B 78:7

   ܐܢ ܓܝܪ ܬܥܒܕܘܢ ܗܠܝ̣ܢ. ܗܟܢܐ ܐܡܝܢܐܝܬ ܡܬܕܟܪ ܗܘ ܠܟܘܢ. ܗ̇ܘ ܕܒܟܘܠ ܙܒܢ ܐܫܬܘܕܝ ܚܠܦܝܢ ܠܐܝܠܝܢ ܕܡܝܬܪܝܢ ܡܢܢ. ܕܠܐ ܠܥܠܡ ܢܛܥܐ ܐܘ ܢܫܒܘܩ ܙܪܥܢ. ܐܠܐ ܒܪ̈ܚܡܐ ܣܓܝܐ̈ܐ ܢܟ̇ܢܫ ܬܘܒ ܠܟܘܠܗܘܢ ܐܝܠܝܢ ܕܐܬܒܕܪܘ...

8. Letter of Baruch B 79:1

   ܡܟܝܠ ܐܚ̈ܝ ܗ̣ܘܝܬܘܢ ܝܕ̇ܥܝܢ ܩܕܡܝ ܕܡܢܐ ܓܕܫܗ̇ ܠܨܗܝܘܢ: ܕܣ̣ܠܩ ܥܠܝܢ ܢܒܘܟܕܢܨܪ ܡ̇ܠܟܐ ܕܒܒܠ.

9. Letter of Baruch B 79:2

   ܚ̇ܛܝܢ ܓܝܪ ܠܗ̇ܘ ܕܥܒ̈ܕܢ. ܘܠܐ ܢܛܪ̈ܢ ܦܘܩ̈ܕܢܐ ܕܦܩܕܢ

10. Letter of Baruch B 79:3

    ܐܠܐ ܐܦ ܠܐ ܪܕ̣ܢ ܐܝܟ ܕܫ̇ܘܝܢ ܗ̈ܘܝܢ. ܡܕܡ ܓܝܪ ܕܓܕܫܟܘܢ ܕܝܬܝܪܐܝܬ ܬܘܒ ܢܚܫ. ܐܦ ܠܢ ܓܝܪ ܓܕ̈ܫܢ܀

11. Letter of Baruch B 80:1

    ܘܗܫܐ ܐܚ̈ܝ ܟܕ ܚܕܪܘܗ̇ ܒܥܠܕܒ̈ܒܐ ܠܡܕܝܢܬܐ. ܐܫܬܕܪܘ ܡܠܐܟ̈ܐ ܕܡܪܝܡܐ ܘܣܚܦܘ ܚܣܢܗ ܕܫܘ̣ܪܐ ܥܫܝܢܐ̇. ܘܗܓ̣ܡ ܙܘܝ̈ܬܗ̇ ܫܪ̈ܝܪܬܐ ܕܦܪܙܠܐ̇. ܗܠܝܢ ܕܠܐ ܡܫ̈ܟܚܢ ܗܘ̈ܝ ܕܢܬܥܩܪ̈ܢ.

12. Letter of Baruch B 80:2

    ܒܪܡ ܕܝܢ ܡܐ̈ܢܝ ܩܘܕܫܐ ܛܫ̇ܝܘ̣. ܐܝܟ ܕܠܐ ܢܣܬܝܒܘܢ ܡܢ ܒܥܠܕ̈ܒܒܐ.

13. Letter of Baruch B 80:3

    ܘܟܕ ܥܒ̣ܕܘ ܗܠܝ̣ܢ. ܗܝ̇ܕܝܢ ܐܫܠܡܘ ܠܒܥ̈ܠܕܒܒܐ ܫܘܪܐ. ܟܕ ܣܚܝܦ ܘܒܝܬܐ ܟܕ ܒ̇ܙܝܙ. ܘܗܝܟܠܐ ܟܕ ܡܘܩܕ. ܘܥܡܐ ܕܙܟ̣ܐ ܡܛܠ ܕܐܫܬܠܡ. ܕܠܐ ܢܗܘܘܢ ܡܫܬܒܗܪܝܢ ܒܥܠܕ̈ܒܒܐ ܘܐܡ̇ܪܝܢ ܕܗܟܢܐ ܐܬܡܨܝܢ ܥܕܡܐ ܕܐܦ ܠܒܝܬܗ ܕܡܪܝܡܐ ܢܚܪܒ ܒܩܪܒܐ.

14. Letter of Baruch B 80:4

    ܐܦ ܠܐܚ̈ܝܟܘܢ ܦܟ̣ܪܘ ܘܐܘܒܠܘ ܠܒܒܠ. ܘܐܥܡܪܘ ܐܢܘܢ ܬܡܢ.

15. Letter of Baruch B 80:5

    ܘܐܫܬܚܪ̈ܢ ܚܢܢ ܗܪܟܐ. ܩܠܝܠ ܙܥܘܪ̈ܐ.

16. Letter of Baruch B 80:6

    ܗܕܐ ܗܝ ܥܩܬܐ ܕܟ̣ܬ̇ܒܬ ܠܟܘܢ ܥܠܝܗ̇.

17. Letter of Baruch B 80:7

    ܫܪܝܪܐܝܬ ܓܝܪ ܝܕ̇ܥ ܐܢܐ. ܕܡܒܝܐ ܗܘܐ ܠܟܘܢ̣ ܥܡ̈ܘܪܝܗ̇ ܕܨܗܝܘܢ. ܟܡܐ ܕܝ̇ܕܥܝܢ ܗ̣ܘܝܬܘܢ ܕܡܨܠܚܐ ܗܘܬ ܝܬܝܪ ܡܢ ܥܩܬܐ ܕܡܥܝܩܝܢ ܗ̣ܘܝܬܘܢ ܕܐܪܚܩܬܘܢ ܡܢܗ̇.܀

18. Letter of Baruch B 81:1

    ܐܠܐ ܐܦ ܥܠ ܒܘܝܐܐ ܫܡ̣ܥܘ ܡܠܬܐ.

19. Letter of Baruch B 81:2

    ܐܢܐ ܓܝܪ ܡܬܐܒܠ ܗ̇ܘܝܬ ܥܠ ܨܗܝܘܢ. ܘܒܥ̇ܝܬ ܪ̈ܚܡܐ ܡܢ ܡܪܝܡܐ ܘܐܡ̇ܪܬ

20. Letter of Baruch B 81:3

    ܕܗܠܝܢ ܥܕܡܐ ܠܐܚܪܝܬܐ ܩܝ̈ܡܢ ܠܢ. ܘܒܟܠܙܒܢ ܐ̈ܬܝܢ ܥܠܝܢ ܒܝܫ̈ܬܐ ܗܠܝܢ.

21. Letter of Baruch B 81:4

    ܘܥܒ̣ܕ ܚܝ̇ܠܬܢܐ ܐܝܟ ܣܘܓܐܐ ܕܪ̈ܚ̣ܡܘܗܝ. ܘܡܪܝܡܐ ܐܝܟ ܪܒܘܬܐ ܕܚܢܢܗ. ܘܓܠ̣ܐ ܠܝ ܡܠܬܐ ܐܝܟ ܕܐܬܒܝܐܐ. ܘܚܘܝܢܝ ܚܙ̈ܘܢܐ ܐܝܟ ܕܬܘܒ ܠܐ ܐܬܬܥܝܩ. ܘܐܘܕܥܢܝ ܪ̈ܐܙܐ ܕܙܒ̈ܢܐ. ܘܡܬܝܬܗܘܢ ܕܥ̈ܕܢܐ ܚܘܝܢܝ܀

22. Letter of Baruch B 82:1

    ܡܛܠ ܗܢܐ ܐܚ̈ܝ ܟܬܒ̇ܬ ܠܟܘܢ ܕܐܝܟ̇ܢܐ ܬܬܒܝܐܘܢ ܡܢ ܣܘܓܐܐ ܕܥܩ̈ܬܐ.

23. Letter of Baruch B 82:2

    ܬܗܘܘܢ ܕܝܢ ܝܕ̇ܥܝܢ ܕܡܬܒܥ ܬ̇ܒ̇ܥ ܥܒܘܕܢ ܡܢ ܟܠܗܘܢ ܒܥܠܕܒ̈ܒܝܢ. ܐܝܟ ܕܟܠ ܡܐ ܕܥܒ̣ܕܘ ܠܢ ܘܒܢ. ܘܕܝܬܝܪܝܬ ܩܪܝ̣ܒ ܗܘ ܫܘܠܡܐ ܕܥ̇ܒܕ ܡܪܝܡܐ ܘܪ̣̈ܚܡܘܗܝ ܕܢܐܬܘܢ. ܘܠܐ ܗܘܐ ܪܚܝܩ ܫܘܠܡܗ.. ܕܕܝ̣ܢܗ̣.

24. Letter of Baruch B 82:3

    ܗܫܐ ܓܝܪ ܚ̇ܙܝܢܢ ܣܘܓܐܐ ܕܡܨܠܚܢܘܬܐ ܕܥܡ̈ܡܐ ܟܕ ܗܢ̣ܘܢ ܡܪܫܥܝܢ. ܐܠܐ ܠܗܒܠܐ ܗܘ ܕܡ̇ܝܢ.

25. Letter of Baruch B 82:4

    ܘܚܝ̇ܪܝܢܢ ܒܣܘܓܐܐ ܕܐܘܚܕܢܗܘܢ ܟܕ ܗܢ̣ܘܢ ܡܥܘܠܝܢ. ܐܠܐ ܠܛܢܦܬܐ ܢܬܕܡܘܢ.

26. Letter of Baruch B 82:5

    ܘ̇ܚܙܝܢܢ ܫܪܪܗ ܕܚܝܠܗܘܢ. ܟܕ ܗܢ̣ܘܢ ܠܘܩܒܠ ܚܝܠܬܢܐ ܩܝ̇ܡܝܢ ܒܟܠ ܫܢܐ. ܐܠܐ ܐܝܟ ܪܘܩܐ ܢܬܚܫܒܘܢ.

27. Letter of Baruch B 82:6

    ܘܡ̇ܬܚܫܒܝܢܢ ܥܠ ܬܫܒܘܚܬܐ ܕܪܒܘܬܗܘܢ. ܟܕ ܗ̣ܢܘܢ ܠܐ ܢ̇ܛܪܝܢ ܩܝܡ̈ܘܗܝ ܕܡܪܝܡܐ. ܐܠܐ ܐܝܟ ܬܢܢܐ ܢܥܒܪܘܢ.

28. Letter of Baruch B 82:7

    ܘܪܢܝ̇ܢܢ ܥܠ ܫܘܦܪܐ ܕܝܐܝܘܬܗܘܢ. ܟܕ ܗܢ̣ܘܢ. ܒܛܢ̈ܦܘܬܐ ܡܬܕܒܪܝܢ. ܐܠܐ ܐܝܟ ܥܣܒܐ ܕܚܡ̇ܐ ܢܐܒܫܘܢ.

29. Letter of Baruch B 82:8

    ܘܡܬܚܫܒܝܢ ܚܢܢ ܥܠ ܥܘܫܢܐ ܕܩܫܝܘܬܗܘܢ. ܟܕ ܗ̣ܢܘܢ ܚܪܬܐ ܠܐ ܡܬܕܟܪܝܢ. ܐܠܐ ܐܝܟ ܓܠܠܐ ܕܥ̇ܒܪ ܢܫܬܚܩܘܢ.

30. Letter of Baruch B 82:9

    ܘܡܬܒܝܢܝܢܢ ܥܠ ܫܘܒܗܪ̈ܐ ܕܚܝܠܗܘܢ. ܟܕ ܗ̣ܢܘܢ ܟ̇ܦܪܝܢ ܒܛܝܒܘܬܗ ܕܐܠܗܐ ܗ̇ܘ ܕܝ̣ܗܒ ܠܗܘܢ. ܐܠܐ ܐܝܟ ܥܢܢܐ ܕܥ̇ܒܪܐ ܢܥܒܪܘܢ܀

31. Letter of Baruch B 83:1

    ܡܪܝܡܐ ܓܝܪ ܡܣܪܗܒܘ ܡܣܪܗܒ ܙܒܢ̈ܘܗܝ. ܘܡܝܬܝܘ ܡܝܬܐ ܥܕ̈ܢܘܗܝ.

32. Letter of Baruch B 83:2

    ܘܡܕܢ ܢܕܘܢ ܠܐܝܠܝܢ ܕܒܥܠܡܗ. ܘܢ̇ܦܩܘܕ ܒܫܪܪܐ ܟܠܡܕܡ. ܒܐܝ̣ܕܐ ܕܟܠ ܥ̇ܒ̈ܕܝܗܘܢ ܕܚܛܗ̈ܐ̇ ܗܘܘ.

33. Letter of Baruch B 83:3

    ܘܡܒܨܐ ܢܒܨܐ ܡܚܫ̈ܒܬܐ ܟܣ̈ܝܬܐ ܘܟܠ ܕܒܬܘܘ̈ܢ̣ܐ. ܕܟܘܠܗܘܢ ܗܕܡ̈ܐ ܕܒܪܘܫܥܐ ܣܝ̣ܡ. ܘܠܓܠܝܐ ܩܕܡ ܟܘܠ ܐܢܫ ܒܟܐܬܐ ܡ̣ܦܩ.

34. Letter of Baruch B 83:4

    ܡܟܝܠ ܠܐ ܢܣ̈ܩܢ ܥܠ ܠܒܟܘܢ ܚܕܐ ܡܢ ܗܠܝܢ ܕܩ̈ܝ̇ܡܢ. ܐܠܐ ܝܬܝܪܐܝܬ ܢܣ̇ܟܐ. ܡܛܠ ܕܐܬ̇ܐ ܗ̇ܘ ܡܕܡ ܕܡܠܝܟ̣.

35. Letter of Baruch B 83:5

    ܘܠܐ ܢܚܘܪ ܒܦܘ̈ܢܩܝܗܘܢ ܕܥܡ̈ܡܐ ܕܗܫܐ. ܐܠܐ ܢܬܕܟܪ ܡܕܡ ܕܠܚܪܬܐ ܡܠܝܟ ܠܢ.

36. Letter of Baruch B 83:6

    ܡܛܠ ܕܡܥܒܪ ܥ̇ܒܪܝܢ ܬܚܘܡ̈ܝܗܘܢ ܕܙܒ̈ܢܐ ܘܥܕ̈ܢܐ. ܘܟܘܠ ܕܐܝܬ ܒܗܘܢ ܐܝܟ ܚܕܐ.

37. Letter of Baruch B 83:7

    ܫܘܠܡܗ ܕܝܢ ܕܥܠܡܐ ܗ̇ܝܕܝܢ ܢܚܘܐ ܚܝܠܗ ܪܒܐ ܕܡܕܒܪܢܗ. ܟܕ ܟܠܡܕܡ ܢܐܬܐ ܠܕܝܢܐ.

38. Letter of Baruch B 83:8

    ܐܢܬܘܢ ܗܟܝܠ ܐܬܩܢܘ ܠܒܘ̈ܬܟܘܢ ܠܡܕܡ ܕܡܢ ܩܕܝܡ ܗܝܡ̣ܢܬܘܢ. ܕܠܐ ܡܢ ܬܪ̈ܝܗܘܢ ܥܠܡܐ ܬܬܚܕܘܢ ܕܐܫܬܒܝܬܘܢ ܗܪܟܐ. ܘܬܡܢ ܬܫܬܢܩܘܢ.

39. Letter of Baruch B 83:9

    ܡܕܡ ܓܝܪ ܕܩ̇ܝܡ ܗܫܐ ܐܘ ܕܥܒ̣ܪ ܐܘ ܕܐܬܐ ܒܟܘܠܗܝܢ ܗܠܝܢ. ܐܦ ܠܐ ܒܝ̣ܫܬܐ ܒܝ̣ܫܐ ܡܠܝܐܝܬ. ܐܦ ܠܐ ܬܘܒ ܛܒ̇ܬܐ ܡܠܝܐܝܬ ܛܒ̇ܬܐ ܐܝܬܝܗ̇.

40. Letter of Baruch B 83:10

    ܟܠ ܓܝܪ ܚܘܠܡ̈ܢܐ ܕܗܫܐ ܗ̇ܦܟܝܢ ܠܟܘܪ̈ܗܢܐ.

41. Letter of Baruch B 83:11

    ܘܟܘܠ ܚܝܠܬܢܘܬܐ ܕܗܫܐ ܗ̇ܦܟܐ ܠܡܚܝܠܘܬܐ. ܘܟܠ ܥܘܫ̣ܢܐ ܕܗܫܐ. ܗ̇ܦܟ ܠܕܐܘ̈ܘܢܐ.

42. Letter of Baruch B 83:12

    ܘܟܠ ܥܘܙܐ ܕܥܠܝܡܘܬܐ ܗ̇ܦܟ ܠܣܝܒܘܬܐ ܘܫܘܠܡܐ. ܘܟܠ ܫܘܦܪܐ ܕܝܐܝܘܬܐ ܕܗܫܐ ܗ̇ܦܟ ܚܡ̇ܐ ܘܡܣܬܢܐ.

43. Letter of Baruch B 83:13

    ܘܟܠ ܚܘܬܪܐ ܕܫܒܪܢܘܬܐ ܕܗܫܐ ܗ̇ܦܟ ܠܫܦܠܐ ܘܠܒܗܬܬܐ.

44. Letter of Baruch B 83:14

    ܘܟܠ ܫܘܒܚܐ ܕܪܡܘܬܐ ܕܗܫܐ ܗ̇ܦܟ ܠܒܗܬܬܐ ܕܫܬܩܐ. ܘܟܠ ܓܐܝܘܬܐ ܘܚܬܝܪܘܬܐ ܕܗܫܐ ܗܦܟܐ ܠܡܦܘܠܬܐ ܕܫܠܝܐ.

45. Letter of Baruch B 83:15

    ܘܟܠ ܦܘܢ̈ܩܐ ܘܒܘܣ̈ܡܐ ܕܗܫܐ. ܗܦ̇ܟ ܠܪܡܘܬܐ ܘܠܚܒܠܐ.

46. Letter of Baruch B 83:16

    ܘܟܠ ܩܥܬܐ ܕܫܒܗܪ̈ܢܐ ܗ̇ܦܟܐ ܠܥܦܪܐ ܫܠܝܐ.

47. Letter of Baruch B 83:17

    ܘܟܠ ܩܢܝܢܐ ܕܥܘܬܪܐ ܕܗܫܐ ܗ̇ܦܟ ܠܫܝܘܠ ܒܠܚܘܕܘܗܝ.

48. Letter of Baruch B 83:18

    ܘܟܠ ܚܛܘ̈ܦܝܐ ܕܪܓܬܐ ܕܗܫܐ ܗ̇ܦܟܝܢ ܠܡܘܬܐ ܕܠܐ ܒܨܒܝܢܗܘܢ. ܘܟܘܠ ܪܓܬܐ ܕܚܫ̈ܐ ܗ̇ܦܟܐ ܠܕܝܢ̣ܐ. ܕܬܫܢܝܩܐ.

49. Letter of Baruch B 83:19

    ܘܟܠ ܨܢܥܬܐ ܕܚܪܥܘܬܐ ܕܗܫܐ ܗ̇ܦܟܐ ܠܡܟܣܢܘܬܐ ܕܫܪܪܐ.

50. Letter of Baruch B 83:20

    ܘܟܠ ܚܠܝܘܬܐ ܕܡ̈ܫܚ̈ܢܐ ܕܗܫܐ ܗ̇ܦܟܐ ܠܕܝܢ̣ܐ ܘܠܚܝܒܘܬܐ.

51. Letter of Baruch B 83:21

    ܘܟܠ ܪܚܡܘܬܐ ܗ̇ܦܟܐ. ܠܚ̈ܣܕܐ ܒܫܬܩܐ.

52. Letter of Baruch B 83:22

    ܟܕ ܗܟܝܠ ܗܠܝܢ ܟܠܗܝܢ ܗ̈ܘܝ ܗܫܐ. ܣܒ̇ܪ ܐܢܬ ܕܠܐ ܡܬ̈ܬܒܥܢ̣.

53. Letter of Baruch B 83:23

    ܫܘܠܡܐ ܕܝܢ ܕܟܘܠ ܠܫܪܪܐ ܢܐܬܐ....

54. Letter of Baruch B 84:1

    ܐܢܐ ܗܟܝܠ ܐܘ̇ܕܥܬܟܘܢ ܥܕ ܚܝ ܐܢܐ. ܐܡ̇ܪܬ ܓܝܪ ܕܝܬܝܪܐܝܬ ܬܐܠܦܘܢ ܦܘܩ̈ܕܢܝ ܚܝ̈ܠܬܢܐ ܕܐܪܬܝܟܘܢ̇. ܘܐ̇ܣܝܡ ܩܕܡܝܟܘܢ ܩܠܝܠ ܡܢ ܦܘܩ̈ܕܢܐ ܕܕܝܢ̣ܗ ܡܢ ܩܕܡ ܕܐܡ̇ܘܬ.

55. Letter of Baruch B 84:2

    ܐܬܕܟܪܘ ܕܒܙܒܢ ܡܣܗܕܘ ܣܗܕ ܒܟܘܢ ܡܘܫܐ ܫܡܝܐ ܘܐܪܥܐ ܘܐܡ̣ܪ. ܕܐܢ ܬܥܒܪܘܢ ܢܡܘܣܐ ܬܬܒܕܪܘܢ. ܘܐܢ ܬܛܪܘܢܝܗܝ ܬܬܢܨܒܘܢ.

56. Letter of Baruch B 84:3

    ܘܐܦ ܐܚܪ̈ܢܝܬܐ ܐܡ̇ܪ ܗܘܐ ܠܟܘܢ ܟܕ ܐܝܬܝܟܘܢ ܗܘܝ̣ܬܘܢ ܐܟܚܕܐ ܬܪܥܣܪ ܫܒ̈ܛܐ ܒܡܕܒܪܐ.

57. Letter of Baruch B 84:4

    ܘܡܢ ܒܬܪ ܡܘܬܗ ܕܚܩܬܘܢ ܐ̈ܢܝܢ ܡܢܟܘܢ. ܘܡܛܘܠ ܗܢܐ ܡܛܝܟܘܢ ܐܝܠܝܢ ܕܡ̈ܩܕܡܢ ܗ̈ܘܝ ܐܡܝܪ̈ܢ.

58. Letter of Baruch B 84:5

    ܘܗܫܐ ܡܘܫܐ ܐܡ̇ܪ ܗܘܐ ܠܟܘܢ ܡܢ ܩܕܝܡ ܕܠܐ ܢܓܕܫܟܘܢ. ܘܗܐ ܓܕܫܟܘܢ. ܫܒ̣ܩܬܘܢ ܓܝܪ ܢܡܘܣܐ̣.

59. Letter of Baruch B 84:6

    ܐܦ ܐܢܐ ܗܐ ܐܡ̇ܪ ܐܢܐ ܠܟܘܢ ܡܢ ܒܬܪ ܕܚܫܬܘܢ. ܕܐܢ ܬܛܦܝܣܘܢ. ܠܐܝܠܝܢ ܕܐܬܐܡܪ ܠܟܘܢ̣. ܬܣܒܘܢ ܡܢ ܚܝܠܬܢܐ ܟܠܡܕܡ ܕܣ̣ܝܡ ܘܢܛܝܪ ܠܟܘܢ.

60. Letter of Baruch B 84:7

    ܬܗܘܐ ܕܝܢ ܗܕܐ ܐܓܪܬܐ ܒܝ̈ܢܝ ܠܝ ܘܠܟܘܢ̣ ܠܣܗܕܘܬܐ. ܕܬܗܘܘܢ ܥܗܕܝܢ ܦܘܩܕ̈ܢܘܗܝ ܕܚܝܠܬܢܐ. ܘܕܐܝ̇ܟܢܐ ܐܦ ܠܝ ܢܗܘܐ ܠܝ ܡܦܩ ܒܪܘܚܐ ܩܕܡ ܗ̇ܘ ܕܫܕܪܢܝ.

61. Letter of Baruch B 84:8

    ܘܗ̣ܘܝܬܘܢ ܥܗܝܕܝܢ ܠܨܗܝܘܢ ܘܠܢܡܘܣܐ. ܐܦ ܠܐܪܥܐ ܩܕܝܫܬܐ. ܘܠܐܚܝ̈ܟܘܢ ܘܠܕܝܬܩܐ ܘܠܐܒ̈ܗܝܟܘܢ. ܘܠܥܕ̈ܥܕܐ ܘܠܫ̈ܒܐ ܠܐ ܬܛܥܘܢ.

62. Letter of Baruch B 84:9

    ܘܐܫܠܡܘ ܗܕܐ ܐܓܪܬܐ ܘܡܫܠܡܢܘܬܗ ܕܢܡܘܣܐ ܠܒܢܝ̈ܟܘܢ ܡܢ ܒܬܪܟܘܢ. ܐܝܟ ܕܐܦ ܠܟܘܢ ܐܫܠܡܘ ܠܟܘܢ ܐܒ̈ܗܝܟܘܢ.

63. Letter of Baruch B 84:10

    ܘܒܟܠܙܒܢ ܗ̣ܘܝܬܘܢ ܒ̈ܥܝܢ ܘܡܨܠܝܢ ܚܦܝܛܐܝܬ ܡܢ ܟܠܗ̇ ܢܦܫܟܘܢ ܐܝܟ ܕܢܬܪܥܐ ܠܟܘܢ ܚܝܠܬܢܐ. ܘܠܐ ܢܚܫܘܒ ܣܘܓܐܐ ܕܚܛܝ̈ܟܘܢ. ܐܠܐ ܢܬܕܟܪ ܠܬܪܝܨܘܬܐ ܕܐܒܗ̈ܝܟܘܢ.

64. Letter of Baruch B 84:11

    ܐܢ ܓܝܪ ܐܝܟ ܣܘܓܐܐ ܕܪ̈ܚ̣ܡܘܗܝ ܠܐ ܢܕܘܢܢ. ܘܝ ܠܢ ܠܟܠ ܝܠܝ̈ܕܐ..

65. Letter of Baruch B 85:1

    ܬܘܒ ܕܝܢ ܗ̣ܘܝܬܘܢ ܝܕ̇ܥܝܢ. ܕܒ̈ܙܒܢܐ ܩܕܡ̈ܝܐ ܘܒܕܪ̈ܐ ܕܡܢ ܩܕܝܡ ܐܝܬ ܗܘܐ ܠܗܘܢ ܠܐܒ̈ܗܝܢ ܡܥܕܪ̈ܢܐ ܙܕܝ̈ܩܐ. ܘܢܒ̈ܝܐ ܘܚܣ̈ܝܐ.

66. Letter of Baruch B 85:2

    ܐܠܐ ܕܝܢ ܒܗ̇ ܗ̇ܘܝܢ ܒܐܪܥܢ. ܘܗ̣ܢܘܢ ܡܥܕܪܝܢ ܗܘܘ ܠܢ ܡܐ ܕܚ̇ܛܝܢ ܗ̇ܘܝܢ. ܘܒ̇ܥܝܢ ܗܘܘ ܥܠܝܢ ܡܢ ܗ̇ܘ ܕܥܒܕܢ. ܡܛܠ ܕܬܟܝܠܝܢ ܗܘܘ ܥܠ ܥ̇ܒ̈ܕܝܗܘܢ. ܘܚܝܠܬܢܐ ܫܡ̇ܥ ܗܘܐ ܠܗܘܢ. ܘܡܚܣܐ ܗܘܐ ܥܠܝܢ.

67. Letter of Baruch B 85:3

    ܗܫܐ ܕܝܢ ܙܕܝܩ̈ܐ ܐܬܟܢܫܘ. ܘܢܒ̈ܝܐ ܫܟ̣ܒܘ. ܐܦ ܚܢܢ ܡܢ ܐܪܥܢ ܢܦ̇ܩܢ. ܘܨܗܝܘܢ ܐܫܬܩܠܬ ܡܢܢ. ܘܠܝܬ ܠܢ ܡܕܡ ܗܫܐ ܐܠܐ ܐܢ ܚܝܠܬܢܐ ܘܢܡܘܣܗ.

68. Letter of Baruch B 85:4

    ܐܢ ܗܟܝܠ ܢܬܪܘܨ ܘܢܬܩܢ ܠܒܘ̈ܬܢ ܢܣ̇ܒܝܢܢ ܟܠܡܕܡ ܕܐܘܒܕܢ ܚܢܢ ܒܥ̈ܦܐ ܣ̈ܓܝܐܐ.

69. Letter of Baruch B 85:5

    ܡܕܡ ܓܝܪ ܕܐܘܒܕܢܢ ܕܚܒܠܐ ܗ̈ܘܝ. ܘܡܕܡ ܕܢܣ̇ܒܝܢܢ ܠܐ ܡܬܚ̈ܒܠܢ.

70. Letter of Baruch B 85:6

    ܐܦ ܠܐ̈ܚܝܢ ܕܝܢ ܗܟܢܐ ܟܬܒ̇ܬ ܠܒܒܠ. ܕܐܦ ܠܗܘܢ ܗ̣̈ܢܝܢ ܗܠܝܢ ܐܣܗܕ.

71. Letter of Baruch B 85:7

    ܢܗ̈ܘܝܢ ܕܝܢ ܒܟܠ ܙܒܢ ܩܕܡ ܥ̈ܝܢܝܟܘܢ ܗܠܝܢ. ܟܠܗܝܢ ܕܡܩܕܡܢ ܐܡܝܪ̈ܢ. ܡܛܠ ܕܥܕܟܝܠ ܒܪܘܚܐ ܚܢܢ ܕܫܘܠܛܢܐ. ܕܚܐܪܘܬܢ.

72. Letter of Baruch B 85:8

    ܘܬܘܒ ܕܝܢ ܐܦ ܡܪܝܡܐ ܡܓܪ ܪܘܚܗ ܥܡܢ ܗܪܟܐ. ܘܐܘܕܥܢ ܡܕܡ ܕܥܬܝܕ. ܘܠܐ ܟܣܝ ܡܢܢ ܡܕܡ ܕܠܚܪܬܐ ܓܕ̇ܫ.

73. Letter of Baruch B 85:9

    ܡܢ ܩܕܡ ܗܟܝܠ ܕܢܬܒܥ ܕܝܢ̣ܗ ܕܝܠܗ. ܘܫܪܪܐ ܕܡܕܡ ܕܠܗ ܙܕ̇ܩ. ܢܛܝܒ ܢܦܫܢ ܕܢܣܒ ܘܠܐ ܕܢܬܢܣܒ. ܘܕܢܣܒܪ ܘܠܐ ܕܢܒܗܬ. ܘܕܢܬܬܢܝܚ ܥܡ ܐܒܗ̈ܬܢ. ܘܠܐ ܕܢܫܬܢܩ ܥܡ ܣܢ̈ܐܝܢ.

74. Letter of Baruch B 85:10

    ܥܠܝܡܘܬܗ ܓܝܪ ܕܥܠܡܐ ܥܒܪܬ. ܘܥܘܙܗ̇ ܕܒܪܝܬܐ ܡܢ ܟܕܘ ܫܠܡ ܠܗ̇. ܘܡܐܬܝܬܗܘܢ ܕܙܒ̈ܢܐ ܒ̇ܨܝܪ ܩܠܝܠ ܘܥܒ̣ܪܘ. ܠܗܘܢ. ܘܩܪܝܒܐ ܗܝ ܩܘܠܬܐ ܠܓܘܒܐ. ܘܐܠܦܐ ܠܠܡܐܢܐ. ܘܡܪܕܝܬܗ̇ ܕܐܘܪܚܐ ܠܡܕܝܢܬܐ. ܘܚ̈ܝܐ ܠܫܘܠܡܐ.

75. Letter of Baruch B 85:11

    ܬܘܒ ܕܝܢ ܛ̇ܝܒܘ ܢܦܫ̈ܬܟܘܢ ܕܡܐ ܕܪܕܝܬܘܢ ܘܣ̣ܠܩܬܘܢ ܡܢ ܐܠܦܐ ܬܬܢܝܚܘܢ. ܘܠܐ ܕܡܐ ܕܐ̣ܙܠܬܘܢ ܬܬܚܝܒܘܢ.

76. Letter of Baruch B 85:12

    ܗܐ ܓܝܪ ܟܕ ܢܝܬܐ ܡܪܝܡܐ ܗܠܝܢ ܟܠܗܝ̣ܢ. ܬܡܢ ܠܝܬ ܬܘܒ ܐܬܪܐ ܠܬܝܒܘܬܐ. ܘܠܐ ܬܚܘܡܐ ܠܙܒ̈ܢܐ. ܘܠܐ ܢܘܓܪܐ ܠܥܕ̈ܢܐ. ܘܠܐ ܚܘܠܦܐ ܠܐܪܘܚܬܐ. ܘܠܐ ܐܬܪܐ ܠܒܥܘܬܐ. ܘܠܐ ܡܫܕܪܢܘܬܐ ܕܫܐ̈ܠܬܐ. ܘܠܐ ܠܡܣܒ ܝܕܥܬܐ. ܘܠܐ ܝܗܒ̇ܐ ܕܚܘܒ̇ܐ. ܘܠܐ ܐܬܪܐ ܠܬܘܬ ܢܦܫܐ. ܘܠܐ ܦܝܣ̈ܬܐ ܥܠ ܣܟ̈ܠܘܬܐ. ܘܠܐ ܒܥܘ̈ܬܐ ܕܐܒ̈ܗܐ. ܘܠܐ ܨܠܘܬܐ ܕܢܒ̈ܝܐ. ܘܠܐ ܥܘܕܪܢܐ ܕܙܕܝ̈ܩܐ.

77. Letter of Baruch B 85:13

    ܐܝܬ ܬܡܢ ܕܝܢ ܓܙܪܐ ܕܕܝܢ̣ܐ ܠܚ̇ܒܠܐ ܕܐܘܪܚܐ ܕܢܘܪܐ ܘܫܒܝܠܐ ܕܡܩܪܒ ܠܓܘܡܪ̈ܐ.

78. Letter of Baruch B 85:14

    ܡܛܠ ܗܢܐ ܚܕ ܒܝܕ ܚܕ ܢܡܘܣܐ ܚܕ ܥܠܡܐ. ܘܠܐܝܠܝܢ ܕܐܝܬ ܒܗ ܣܟܐ ܠܟܠܗܘܢ.

79. Letter of Baruch B 85:15

    ܗ̇ܝܕܝܢ ܢܚܐ ܠܐܝܠܝܢ ܕܡܫܟܚ ܘܢܚܣܐ ܥܠܝܗܘܢ ܘܐܟܚܕܐ ܢܘܒܕ ܠܐܝܠܝܢ ܕܡܦܠܦܠܝܢ ܒܚܛܗ̈ܐ.

80. Letter of Baruch B 86:1

    ܟܕ ܗܟܝܠ ܬܣܒܘܢ ܐܓܪܬܐ ܩܪܐܘܗ̇ ܒܟܢܫܝ̈ܟܘܢ ܒܒܛܝܠܘܬܐ.

81. Letter of Baruch B 86:2

    ܘܗ̣ܘܝܬܘܢ ܡܬܗܓܝܢ ܒܗ̇. ܝܬܝܪܐܝܬ ܕܝܢ ܒܝܘ̈ܡܝ ܨܘܡ̈ܝܟܘܢ.

82. Letter of Baruch B 86:3

    ܘܗ̣ܘܝܬܘܢ ܡܬܕܟܪܝܢ ܠܝ ܒܝܕ ܐܓܪܬܐ ܗܕܐ̣. ܐܝܟ ܕܐܦ ܐܢܐ ܡܬܕܟܪ ܐܢܐ ܠܟܘܢ ܒܗ̇ ܘܒܟܠܙܒܢ܀

83. Letter of Baruch B 87:1

    ܘܗ̣ܘܐ ܕܟܕ ܫ̇ܠܡܬ ܟܠܗܘܢ ܦܬ̈ܓܡܐ ܕܐܓܪܬܐ ܗܕܐ ܘܟܬܒܬܗ̇ ܒܛܝܠܐܝܬ ܥܕܡܐ ܠܫܘܠܡܗ̇ ܘܟܪܟܬܗ̇ ܘܚܬܡܬܗ̇ ܙܗܝܪܐܝܬ. ܘܩܛܪܬܗ̇ ܒܨܘܪܗ ܕܢܫܪܐ. ܘܫ̇ܪܝܬ ܘܫܕܪܬܗ̇.

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.