← All works

Peshitta Letter of Baruch A

Peshitta (Syriac Old Testament) · 82 sections

1. Letter of Baruch A 78:1

   ܘܗܠܝܢ ܦܬ̈ܓܡܐ ܕܫܕܪ ܒܪܘܟ ܒܪ ܢܪܝܐ ܠܬܫܥܐ ܫܒ̈ܛܝܢ ܘܦܠܓܗ. ܗܠܝܢ ܕܐܝܬܝܗܘܢ ܗܘܘ ܒܥܒܪܗ ܕܢܗܪܐ ܦܪܬ̇. ܕܟܬ̈ܝܒܢ ܗ̈ܘܝ ܒܗ̣̇ ܗܠܝܢ

2. Letter of Baruch A 78:2

   ܗܟܢܐ ܐܡ̇ܪ. ܒܪܘܟ ܒܪ ܢܪܝܐ̇. ܠܐ̈ܚܐ ܕܐܫܬ̣ܒܝܘ. ܪ̈ܚܡ̣ܐ ܘܫܠܡܐ

3. Letter of Baruch A 78:3

   ܥܗܝܕ ܐܢܐ ܐܚ̈ܝ ܠܚܘܒܐ ܕܗ̇ܘ ܕܒܪܢ. ܕܐܚ̣ܒܢ ܡܢ ܩܕܝܡ̣ ܘܕܠܐ ܡܡܬܘܡ ܣܢܢ. ܐܠܐ̣ ܝܬܝܪܐܝܬ ܪܕܐ ܗܘܐ ܠܢ

4. Letter of Baruch A 78:4

   ܘܫܪܝܪܐܝܬ ܝ̇ܕܥ ܐܢܐ. ܕܗܐ ܐܬܐܣܪܢ ܟܠܢ ܬܪ̈ܥܣܪ ܫܒ̈ܛܝ̣ܢ ܒܚܕ ܐܣܘܪܝܐ. ܕܐܝܟ ܕܡܢ ܚܕ ܐܒܐ ܝܠܝܕܝܢܢ

5. Letter of Baruch A 78:5

   ܡܛܠ ܗܢܐ ܝܬܝܪܐܝܬ ܐܬ̣ܒܛܠ ܠܝ̣ ܕܐܫܒܘܩ ܠܟܘܢ ܡ̈ܠܝܗ̇ ܕܐ̇ܝܓܪܬܐ ܗܕܐ ܡܢ ܩܕܡ ܕܐܡܘܬ. ܕܬܗܘܘܢ ܡܬܒܝܐܝܢ ܥܠ ܒܝܫ̣̈ܬܐ ܕܡ̇ܛܝܟܘܢ. ܘܕܬܬܥܝܩܘܢ ܬܘܒ ܥܠ ܒܝܫ̣ܬܐ ܕܓ̣ܕܫܬ ܠܐ̈ܚܝܟܘܢ. ܬܘܒ ܕܝ̣ܢ ܐܦ ܕܬ̇ܙܕܩܘܢ ܕܝܢ̣ܗ ܕܗ̇ܘ ܕܓܙܪ ܥܠܝܟܘܢ ܕܬܫܬܒܘܢ . ܒܨܝܪ ܗܘ ܓܝܪ ܡܕܡ ܕܚܫܬܘܢ ܡܢ ܡܕܡ ܕܥܒ̣ܕܬܘܢ. ܡܛܠ ܕܠܙܒ̈ܢܐ ܐܚܪ̈ܝܐ. ܬܫܬܟܚܘܢ ܫ̇ܘ̇ܝܢ ܠܐ̈ܒܗܝܟܘܢ

6. Letter of Baruch A 78:6

   ܡܛܠ ܗܢܐ ܐܢ ܬܬܚܫܒܘܢ ܗܠܝܢ ܕܠܛܒ̈ܬܟܘܢ ܗ̣ܘ ܚܫܬܘܢ ܗܫܐ. ܕܠܐ ܠܚܪܬܐ ܬܬܕܝܢ̣ܘܢ ܘܬܫ̇ܬܢܩܘܢ. ܗܝܕܝܢ ܬܩܒܠܘܢ ܣܒܪܐ ܕܠܥܠܡ. ܐܢ ܗ̣ܘ ܕܝܬܝܪܐܝܬ ܬܪܝܡܘܢ ܡܢ ܠܒܟܘܢ ܛܥܝܘܬܐ ܣܪܝܩܬܐ. ܗ̇ܝ ܕܡܛܠܬܗ̇ ܐܙܠ̣ܬܘܢ ܡܢ ܗܪܟܐ

7. Letter of Baruch A 78:7

   ܐܢ ܓܝܪ ܬܥܒܕܘܢ ܗܠܝܢ ܗܟܢܐ. ܐܡܝܢܐܝܬ ܡܬ̣ܕܟܪ ܠܟܘܢ̇. ܗ̇ܘ ܕܒܟܠܙܒܢ ܐܫܬܘܕܝ ܚܠܦܝܢ ܠܐܝܠܝܢ ܕܡܝܬܪܝܢ ܡܢܢ̇. ܕܠܐ ܠܥܠܡ ܢܛܥܝܢ ܐܘ ܢܫܒ̣ܩܢ. ܐܠܐ ܒܪ̈ܚܡܐ ܣ̈ܓܝܐܐ ܢܟܢ̇ܫ ܬܘܒ ܠܐܝܠܝܢ ܕܐ̇ܬܒܕܪܘ ܰ •

8. Letter of Baruch A 79:1

   ܡܟܝܠ ܐܚ̈ܝ ܗܘܝܬܘܢ ܝܕܥܝܢ ܠܘܩܕܡ̣. ܕܡܢܐ ܓܕܫܗ̇ ܠܨܗܝܘܢ. ܕܣܠ̣ܩ ܥܠܝܢ ܢܒܘܟܕܢܨܪ ܡ̇ܠܟܐ ܕܒܒܠ

9. Letter of Baruch A 79:2

   ܚܛܝܢ ܓܝܪ ܠܗ̇ܘ ܕܥܒܕܢ̣. ܘܠܐ ܢܛܪܢ ܦܘܩܕܢܐ ܕܦܩ̇ܕܢ

10. Letter of Baruch A 79:3

    ܐܠܐ ܐܦ ܠ̣ܢ ܐܕܪܟ ܡܕܡ ܕܓܕܫܟܘܢ. ܕܝܬܝܪܐܝܬ ܬܘܒ ܢܚ̣ܫ. ܐܦ ܠܢ ܓܝܪ̣ ܓܕܫܢ

11. Letter of Baruch A 80:1

    ܘܗܫܐ ܐܚ̈ܝ ܡܘܕܥ ܐܢܐ ܠܟܘܢ̣. ܕܟܕ ܚܕܪܘܗ̇ ܒ̈ܥܠܕܒܒܐ ܠܡܕܝܢܬܐ̣. ܐ̇ܫܬܕܪܘ ܡܠܐ̈ܟܐ ܕܡܪܝܡܐ̣. ܘܣ̇ܚܦܘ ܚܣ̈ܢܘܗܝ ܕܫܘܪܐ ܥܫܝܢܐ. ܘܗܓܡܘ ܙܘܝ̈ܬܐ ܫܪ̈ܝܪܬܐ ܕܦܪܙܠܐ̇. ܗܠܝܢ ܕܠܐ ܡܫ̈ܟܚܢ ܗ̈ܘܝ ܕܢܬܥܩܪ̈ܢ

12. Letter of Baruch A 80:2

    ܒܪܡ ܕܝܢ ܡܐ̈ܢܐ ܡܢ ܡܐ̈ܢܐ ܕܩܘܕܫܐ ܛ̇ܫܝܘ̣. ܐܝܟ ܕܠܐ ܢܣܬ̇ܝܒܘܢ ܡܢ ܒ̈̇ܥܠܕܒܒܐ

13. Letter of Baruch A 80:3

    ܘܟܕ ܥܒ̣ܕܘ ܗܠܝܢ̣. ܗܝܕܝܢ ܐܫܠܡܘ ܠܗܘܢ ܠܒ̈ܥܠܕܒܒܐ̣. ܫܘܪܐ̣ ܟܕ ܣܚܝܦ. ܘܒܝܬܐ̣ ܟܕ ܒܙܝܙ. ܘܗܝܟܠܐ̣ ܟܕ ܡܘܩܕ. ܘܥܡܐ ܕܐܙܕܟܝ ܡܛܠ ܕܐܫܬ̣ܠܡ̣. ܕܠܐ ܢܗܘܘܢ ܡܫܬܒܗܪ̈ܝܢ ܒ̈ܥܠܕܒܒܐ ܘܐܡܪ̈ܝܢ̇. ܕܗܟܢܐ ܐܬܡܨܝܢܢ ܒܚܝܠܐ̇. ܥܕܡܐ ܕܐܦ ܠܒܝܬܗ ܕܡܪܝܡܐ ܢܚ̇ܪܒ ܒܩܪ̈ܒܐ

14. Letter of Baruch A 80:4

    ܐܦ ܠܐ̈ܚܝܟܘܢ ܦܟ̣ܪܘ̣ ܘܐܘܒܠܘ ܠܒܒܠ. ܘܐܥܡܪܘ ܐܢܘܢ ܬܡ̇ܢ

15. Letter of Baruch A 80:5

    ܘܐܫܬܚܪܢ ܗܪܟܐ ܩܠܝܠ ܙܥܘܪ̈ܐ

16. Letter of Baruch A 80:6

    ܗܕܐ ܗܝ ܥܩܬܐ ܕܟܬ̇ܒܬ ܠܟܘܢ ܥܠܝܗ̇

17. Letter of Baruch A 80:7

    ܫܪܝܪܐ̇ܝܬ ܓܝܪ ܝ̇ܕܥ ܐܢܐ̣. ܕܡܒܝܐ ܗܘܐ ܠܟܘܢ ܥܡܘܪܗ̇ ܕܨܗܝܘܢ. ܟܡܐ ܕܝ̇ܕܥܝܢ ܗܘܝܬܘܢ ܕܡ̣ܨܠܚܐ ܗܘܬ̇. ܝܬܝܪ ܡܢ ܥܩܬܐ ܕܡܥܩܝܢ ܗܘܝܬܘܢ ܕܐܪܚܩܬܘܢ ܡܢܗ̇

18. Letter of Baruch A 81:1

    ܐܠܐ ܐܦ ܥܠ ܒܘܝܐܐ̣ ܫܡܥ̣ܘ ܡܠܬܐ

19. Letter of Baruch A 81:2

    ܐܢܐ ܓܝܪ ܡܬܐ̇ܒܠ ܗܘܝܬ ܥܠ ܨܗܝܘܢ. ܘܒ̇ܥܐ ܪ̈ܚܡ̣ܐ ܡܢ ܡܪܝܡܐ. ܘܐܡ̇ܪܬ

20. Letter of Baruch A 81:3

    ܕܥܕܡܐ ܠܐܡܬܝ ܗܠܝܢ ܩܝ̈ܡܢ ܠܢ. ܘܒܟܠ ܙܒܢ ܐܬ̈ܝܢ ܥܠܝܢ ܒܝܫ̈ܬܐ̇

21. Letter of Baruch A 81:4

    ܗܠܝܢ ܕܥܒ̣ܕ ܚܝܠܬܢܐ ܐܝܟ ܣܘܓܐܐ ܕܪ̈ܚ̣ܡܘܗܝ̇. ܘܡܪܝܡܐ ܐܝܟ ܪܒܘܬܐ ܕܚܢܢܗ. ܘܓܠ̣ܐ ܠܝ ܡܠܬܐ̣ ܐܝܟ ܕܐܬܒܝܐ. ܘܚܘܝܢܝ ܚܙܘܐ̇ ܐܝܟ ܕܬܘܒ̣. ܠܐ ܐܬܬܥܝܩ. ܘܐܘܕܥܢܝ ܪܐܙܐ ܕܙܒ̈ܢܐ. ܘܡܐܬܝܬܗܘܢ ܕܥ̈ܕܢܐ̣ ܚܘܝܢܝ

22. Letter of Baruch A 82:1

    ܡܛܠ ܗܢܐ ܐܚ̈ܝ ܟܬܒܬ ܠܟܘܢ̣. ܕܐܝܟܢܐ ܬܬܒܝܐܘܢ ܡܢ ܣܘܓܐܐ ܕܥܩ̈ܬܟܘܢ

23. Letter of Baruch A 82:2

    ܗܘ̣ܝܬܘܢ ܕܝܢ ܝܕܥܝܢ̣. ܕܡܬܒܥ ܬܒ̇ܥ ܠܢ ܥܒܘܕܢ ܡܢ ܟܠܗܘܢ ܒ̈ܥܠܕܒܒܝܢ̣. ܐܝܟ ܟܠ ܡܐ ܕܥܒ̣ܕܘ ܠܢ. ܐܦ ܕܝܬܝܪܐܝܬ ܩܪܝܒ ܗܘ̣ ܫܘܠܡܐ ܕܥܒ̇ܕ ܡܪܝܡܐ. ܘܪ̈ܚܡ̣ܘܗܝ ܕܢܐܬܘܢ. ܘܠܐ ܗܘܐ ܪܚܝܩ ܫܘܠܡܐ ܕܕܝܢ̣ܗ

24. Letter of Baruch A 82:3

    ܗܐ ܓܝܪ ܚܙܝܢܢ ܗܫܐ ܣܘܓܐܐ ܕܡܨܠܚܢܘܬܗܘܢ ܕܥܡ̈ܡܐ̣. ܟܕ ܗ̣ܢܘܢ̣ ܡܪ̈ܫܥܝܢ. ܐܠܐ̣ ܠܗܒܠܐ ܗܘ ܕܡ̇ܝܢ

25. Letter of Baruch A 82:4

    ܘܚܝܪܝܢ ܚܢܢ ܒܣܘܓܐܐ ܕܐܘܚܕܢܗܘܢ̣. ܟܕ ܗ̣ܢܘܢ ܡܥܘܠܝܢ. ܐܠܐ̣ ܠܢܘܛܦܬܐ ܢܬ̇ܕܡܘܢ

26. Letter of Baruch A 82:5

    ܘܚ̇ܙܝܢ ܚܢܢ ܫܘܪܪܗ ܕܚܝܠܗܘܢ̇. ܟܕ ܗ̣ܢܘܢ ܠܘܩܒܠ ܚܝܠܬܢܐ ܩܝܡܝ̣ܢ ܒܟܠ ܫܥܐ. ܐܠܐ̣ ܐܝܟ ܪܘܩܐ ܢܬܚ̇ܫܒܘܢ̇

27. Letter of Baruch A 82:6

    ܘܡܬ̇ܚܫܒܝܢ ܚܢܢ ܥܠ ܬܫܒܘܚܬܐ ܕܪܒܘܬܗܘܢ̇. ܟܕ ܗ̣ܢܘܢ̣ ܠܐ ܢܛܪܝܢ ܦܘܩ̈ܕܢܘܗܝ ܕܡܪܝܡܐ. ܐܠܐ̣ ܐܝܟ ܬܢܢܐ ܢܥ̣ܒܪܘܢ

28. Letter of Baruch A 82:7

    ܘܪܢܝܢܢ ܥܠ ܫܘܦܪܐ ܕܚܝܘܬܗܘܢ. ܟܕ ܗ̣ܢܘܢ̣ ܒܛܢܦܘܬܐ ܡܬ̇ܕܒܪܝܢ. ܐܠܐ̣ ܐܝܟ ܥܣܒܐ ܕܚ̇ܡܐ ܢܐܒܫܘܢ

29. Letter of Baruch A 82:8

    ܘܡܬܚܫܒܝܢܢ ܥܠ ܥܘܫܢܐ ܕܩܫܝܘܬܗܘܢ̣. ܟܕ ܗ̣ܢܘܢ ܚܪܬܐ̣ ܠܐ ܡ̇ܬܕܟܪܝܢ. ܐܠܐ̣ ܐܝܟ ܓܠܐ ܕܥܒ̇ܪ ܢܫ̇ܬܚܩܘܢ

30. Letter of Baruch A 82:9

    ܘܡܬܒܝܢܝܢ ܚܢܢ ܥܠ ܫܘܦܪܐ ܕܚܝܠܗܘܢ̣. ܟܕ ܗ̣ܢܘܢ ܟܦܪܝܢ ܒܛܝܒܘܬܗ ܕܗ̇ܘ ܕܝܗ̣ܒ ܠܗܘܢ. ܐܠܐ̣ ܐܝܟ ܥܢܢܐ ܕܥܒ̇ܪܐ ܢܥܒܪܘܢ

31. Letter of Baruch A 83:1

    ܡܪܝܡܐ ܓܝ̣ܪ ܡܣ̣ܪܗܒܘ ܡܣܪܗܒ ܙܒܢ̈ܘܗܝ. ܘܡܝܬܝܘ ܡܝ̇ܬܐ ܥܕܢ̈ܘܗܝ

32. Letter of Baruch A 83:2

    ܘܡܕܢ ܢܕܘܢ ܠܐܝܠܝܢ ܕܒܥܠܡܗ. ܘܢܦܩܘܕ ܒܫܪܪܐ̣ ܟܠ ܡܕܡ ܒܐܝܕܐ ܕܟܘܠ ܥ̇ܒ̈ܕܝܗܘܢ ܕܒܛܘܫܝܐ

33. Letter of Baruch A 83:3

    ܘܡܒ̣ܨܐ ܢܒ̣ܨܐ ܡܚܫ̈ܒܬܐ ܟܣ̈ܝܬܐ. ܘܟܠ ܕܒܬܘܢܐ ܕܒܟܠܗܘܢ ܗ̈ܕܡܐ ܕܒܪܢܫܐ ܣܝܡ. ܘܠܓܠܝܐ ܩܕܡ ܟܠܢܫ̣ ܒܟܐܬܐ ܡ̇ܦܩ

34. Letter of Baruch A 83:4

    ܡܟܝܠ ܠܐ ܢܣܩ̈ܢ ܥܠ ܠܒܟܘܢ ܚܕܐ ܡܢ ܗܠܝܢ ܕܩܝ̈ܡܢ. ܐܠܐ ܝܬܝܪܐܝܬ ܢܣ̇ܟܐ̣. ܡܛܠ ܕܐܬ̇ܐ ܗ̇ܘ ܡܕܡ ܕܡܠ̣ܝܟ ܠܢ

35. Letter of Baruch A 83:5

    ܘܠܐ ܢܚܘܪ ܗܫܐ ܒܦܘܢܩܗܘܢ ܕܥܡ̈ܡܐ. ܐ̇ܠܐ ܢ̇ܬܕܟܪ̣ ܡܕܡ ܕܠܚܪܬܐ ܡܠܝܟ ܠܢ

36. Letter of Baruch A 83:6

    ܡܛܠ ܕܡܥܒܪ ܥܒܪ̈ܝܢ ܬܚ̈ܘܡܝܗܘܢ ܕܙܒ̈ܢܐ̣ ܘܕܥ̈ܕܢܐ. ܘܟܠ ܕܐܝܬ ܒܗܘܢ̣ ܐܟܚܕܐ

37. Letter of Baruch A 83:7

    ܒܫܘܠܡܗ ܕܝܢ ܕܥܠܡܐ̣. ܗܝܕܝܢ ܢܚܘ̣ܐ ܚܝܠܗ ܪܒܐ ܕܡܕܒܪܢܗ̇. ܟܕ ܟܘܠ ܡܕܡ ܢܐܬܐ ܠܕܝܢ̣ܐ

38. Letter of Baruch A 83:8

    ܐܢܬܘܢ ܗܟܝܠ̣ ܐܬܩܢܘ ܠܒ̈ܘܬܟܘܢ ܠܡܕܡ ܕܡܢ ܩܕܝܡ ܗܝܡܢܬܘܢ̣. ܕܠܐ ܡܢ ܬܪ̈ܝܗܘܢ ܥ̈ܠܡܐ̇ ܬܬ̣ܚܕܘܢ. ܕܗܫܐ ܐܫܬ̣ܒܝܬܘܢ̇. ܘܬܘܒ̣ ܬܫܬ̇ܢܩܘܢ

39. Letter of Baruch A 83:9

    ܡܕܡ ܓܝܪ ܕܩܝ̣ܡ ܗܫܐ ܐܘ ܕܥܒ̇ܪ ܐܘ ܕܐܬ̇ܐ ܒܟܠܗܝܢ ܗܠܝܢ̣. ܐܦ ܠܐ ܒܝܫ̣ܬܐ ܒܝܫ̣ܐ ܡܠܝܐܝܬ̣. ܐܦ ܠܐ ܛܒܬܐ ܬܘܒ ܓܡܝܪܐܝܬ ܛܒܬܐ ܐܝܬܝܗ̇

40. Letter of Baruch A 83:10

    ܟܘܠ ܓܝܪ ܚܘ̈ܠܡܢܐ ܕܗܫܐ̣ ܗܦܟܝܢ ܠܟܘܪ̈ܗܢܐ

41. Letter of Baruch A 83:11

    ܘܟܠ ܚܝܠܬܢܘܬܐ ܕܗܫܐ̣. ܗ̇ܦܟܐ̣ ܠܡܚܝܠܘܬܐ. ܘܟܠ ܥܘܫܢܐ ܕܗܫܐ̣ ܗ̇ܦܟ̣ ܠܕܐܘܘܐܢܐ

42. Letter of Baruch A 83:12

    ܘܟܘܠ ܥܘܙܐ ܕܥܠܝܡܘ̇ܬܐ̇ ܗ̇ܦܟ ܠܣܝܒܘܬܐ̣ ܘܠܫܘܠܡܐ. ܘܟܠ ܫܘܦܪܐ ܕܝܐܝܘܬܐ ܕܗܫܐ̣. ܗ̇ܦܟ ܚ̇ܡܐ̣ ܘܡ̇ܣܬ̣ܢܐ

43. Letter of Baruch A 83:13

    ܘܟܠ ܐܘܚܕܢܐ ܕܫܒܗܪܢܘܬܐ ܕܗܫܐ̣. ܗ̇ܦܟ ܠܫܦܠܐ̣ ܘܠܒܗܬܬܐ

44. Letter of Baruch A 83:14

    ܘܟܘܠ ܫܘܒܚܐ ܕܪܡܘܬܐ ܕܗܫܐ̣. ܗ̇ܦܟ ܠܒܗܬܬܐ ܕܫܬܩܐ. ܘܟܠ ܓܐܝܘܬܐ ܘܚܬܝܪܘܬܐ ܕܗܫܐ̣. ܗ̇ܦܟܐ̣ ܠܡܦܘܠܬܐ ܕܫܠܝܐ

45. Letter of Baruch A 83:15

    ܘܟܠ ܦܘܢܩ̈ܐ ܘܒܘܣ̈ܡܐ ܕܗܫܐ̣. ܗ̇ܦܟ ܠܪܡ̣ܬܐ̣ ܘܠܚ̇ܒܠܐ

46. Letter of Baruch A 83:16

    ܘܟܠ ܩܥܬܐ ܕܫܘܒܗܪܐ ܕܗܫܐ̣. ܗ̇ܦܟܐ ܠܥܦܪܐ̣ ܘܠܫܬܩܐ

47. Letter of Baruch A 83:17

    ܘܟܠ ܩܢܝܢܐ ܘܥܘܬܪܐ ܕܗܫܐ̇ ܗ̇ܦܟ ܠܫܝܘܠ̣ ܒܠܚܘܕܘܗܝ

48. Letter of Baruch A 83:18

    ܘܟܘܠ ܚ̈ܛܘܦܝܐ ܕܪܓܬܐ ܕܗܫܐ̣. ܗܦܟܝܢ ܠܡܘܬܐ̣ ܕܠܐ ܒܨܒܝܢܗܘܢ. ܘܟܠ ܪܓܬܐ ܕܚܫ̈ܐ ܕܗܫܐ̣. ܗܦܟܐ ܠܕܝܢ̣ܐ ܕܬܫܢܝܩܐ

49. Letter of Baruch A 83:19

    ܘܟܠ ܨܢܝܥܘܬܐ ܘܚܪܥܘܬܐ ܕܗܫܐ̣. ܗ̇ܦܟܐ̣ ܠܡܟܣ̇ܢܘܬܐ ܕܫܪܪܐ

50. Letter of Baruch A 83:20

    ܘܟܠ ܚܠܝܘܬܐ ܕܡܫܚ̈ܢܐ ܕܗܫܐ̣. ܗ̇ܦܟܐ ܠܕܝܢ̣ܐ̣ ܘܠܚܝܒܘܬܐ

51. Letter of Baruch A 83:21

    ܘܟܠ ܪܚܡܘܬܐ ܕܫܘܩܪܐ̣. ܗ̇ܦܟܐ ܠܚܣܕܐ̣ ܒܩܘܫܬܐ ܰ

52. Letter of Baruch A 83:22

    ܟܕ ܗܠܝܢ ܗܟܝܠ ܟܠܗܝܢ ܗ̈ܘܝܢ ܗܫܐ̣. ܣܒ̇ܪ ܐܢܫ̣ ܕܠܐ ܡܬ̈ܬܒܥܢ

53. Letter of Baruch A 83:23

    ܫܘܠܡܐ ܕܝ̣ܢ ܕܟܠ̣ ܠܫܪܪܐ ܢܐܬܐ

54. Letter of Baruch A 84:1

    ܐܢܐ ܗܟܝܠ ܗܐ ܐܘܕܥܬܟܘܢ̣ ܥܕ ܚܝ ܐܢܐ. ܐܡ̇ܪܬ ܓܝܪ̣ ܕܡܝܬܪ̈ܬܐ ܬܐܠܦܘܢ. ܦܩܕܢܝ ܓܝܪ ܚܝܠܬܢܐ̣ ܕܐܪܬܝܟܘܢ̇ ܘܐܣܝܡ ܩܕܡܝܟܘܢ ܩܠܝܠ ܡܢ ܦܘܩ̈ܕܢܐ ܕܕܝܢ̣ܗ ܡܢ ܩܕܡ ܕܐܡܘܬ

55. Letter of Baruch A 84:2

    ܐܬ̣ܕܟܪܘ ܕܒܙܒ̣ܢ. ܡܣ̇ܗܕܘ ܣܗ̇ܕ ܒܟ̣ܘܢ ܡܘܫܐ̇ ܫܡܝܐ̣ ܘܐܪܥܐ. ܘܐܡ̣ܪ. ܕܐܢ ܬܥ̣ܒܪܘܢ ܥܠ ܢܡܘܣܐ̣ ܬܬܒ̇ܕܪܘܢ. ܘܐܢ ܬܛܪܘܢܝܗܝ̣ ܬܬ̇ܢܛܪܘܢ

56. Letter of Baruch A 84:3

    ܐܠܐ̣̇ ܐܦ ܐܚܪ̈ܢܝܬܐ ܐܡ̣ܪ ܗܘܐ ܠܟܘܢ ܟܕ ܐܝܬܝܟܘܢ ܗܘܝܬܘܢ ܐܟܚܕܐ ܬܪ̈ܥܣܪ ܫܒ̈ܛܝܢ ܒܡܕܒܪܐ

57. Letter of Baruch A 84:4

    ܘܡܢ ܒܬܪ ܡܘܬܗ̣ ܕܚ̣ܩܬܘܢ ܐ̈ܢܝܢ ܡܢܟܘܢ. ܡܛܠ ܗܢܐ ܡ̇ܛܝܟܘܢ ܗܠܝܢ ܕܡܩ̈ܕܡܢ ܗ̈ܘܝ ܐܡܝܪ̈ܢ

58. Letter of Baruch A 84:5

    ܘܗܫܐ̣. ܡܘܫܐ ܐܡ̣ܪ ܗܘܐ ܠܟܘܢ̣ ܡܢ ܩܕܡ ܕܠܐ ܢܓܕܫܟܘܢ. ܘܗܐ̣ ܓܕܫܟܘܢ. ܫܒ̣ܩܬܘܢ ܓܝܪ ܢܡܘܣܐ

59. Letter of Baruch A 84:6

    ܐܦ ܐܢܐ ܗܐ ܐܡ̇ܪ ܐܢܐ ܠܟܘܢ̣ ܡܢ ܒܬܪ ܕܚܫܬܘܢ̣. ܕܐܢ ܬ̇ܛܦܝܣܘܢ ܠܐܝܠܝܢ ܕܐܬܐܡܪ ܠܟܘܢ̣. ܬܣ̇ܒܘܢ ܡܢ ܚܝܠܬܢܐ̣ ܟܠ ܡܕܡ̇ ܕܣܝܡ ܘܢܛܝܪ ܠܟܘܢ

60. Letter of Baruch A 84:7

    ܬܗܘܐ ܕܝܢ ܗܕܐ ܐܓܪܬܐ ܒܝܬ ܠܝ ܘܠܟܘܢ ܠܣܗܕܘܬܐ. ܕܬܗܘܘܢ ܥܗܝܕܝܢ ܠܦܘܩ̈ܕܢܘܗܝ ܕܚܝܠܬܢܐ. ܐܝܟܢܐ ܕܐܦ ܠܝ̣ ܢܗܘܐ ܠܝ ܡܦܩ ܒܪܘܚܐ ܩܕܡ ܗ̇ܘ ܕܫܕܪܢܝ

61. Letter of Baruch A 84:8

    ܘܗܘ̣ܝܬܘܢ ܥܗܝܕܝܢ ܠܢܡܘܣܐ̣ ܘܠܨܗܝܘܢ. ܘܠܐܪܥܐ ܩܕܝܫܬܐ̣ ܘܠܐ̈ܚܝܟܘܢ̇ ܘܠܕܝܬܩܐ ܕܐ̈ܒܗܝܟܘܢ. ܘܠܥܕܥܐ̈ܕܐ ܘܠܫ̈ܒܐ̣ ܠܐ ܬܛܥ̣ܘܢ

62. Letter of Baruch A 84:9

    ܘܫ̇ܠܡܘ ܗܕܐ ܐܝܓܪܬܐ ܘܡܫܠܡܢܘܬܗ ܕܢܡܘܣܐ ܠܒܢܝ̈ܟܘܢ ܡܢ ܒܬܪܟܘܢ̣. ܐܝܟܢܐ ܕܐܦ ܠܟܘܢ ܐܫܠ̣ܡܘ ܠܟܘܢ ܐ̈ܒܗܝܟܘܢ̇

63. Letter of Baruch A 84:10

    ܘܒܟܠ ܙܒܢ ܐܡܝܢܐܝܬ̣ ܗܘ̣ܝܬܘܢ ܒ̇ܥܝܢ ܘܡܨܠܝܢ ܚܦܝܛܐܝܬ ܡܢ ܟܠܗ̇ ܢܦܫܟܘܢ̣. ܐܝܟ ܕܢܬܪܥܐ ܠܟܘܢ ܚܝܠܬܢܐ. ܘܠܐ ܢܚܫܘܒ̣ ܣܘܓܐܐ̣ ܕܚ̈ܛܗܝܟܘܢ. ܐܠܐ ܢܬ̣ܕܟ̣ܪ ܠܬܪܝܨܘܬܐ ܕܐ̈ܒܗܝܟܘܢ

64. Letter of Baruch A 84:11

    ܐܢ ܓܝܪ ܐܝܟ ܣܘܓܐ̇ܐ ܕܪ̈ܚ̣ܡܘܗܝ ܠܐ ܢܕܘܢ̣ܢ. ܘܝ ܠ̣ܢ ܠܟܠܗܘܢ ܐܝ̈ܠܝܕܐ

65. Letter of Baruch A 85:1

    ܬܘܒ ܕܝܢ ܗܘ̣ܝܬܘܢ ܝܕܥܝ̣ܢ. ܕܒܙܒܢ̈ܐ ܩܕܡ̈ܝܐ ܘܒܕܪ̈ܐ ܕܡܢ ܩܕܝܡ̣. ܐܝܬ ܗܘܐ ܠܗܘܢ ܠܗ̇ܢܘܢ ܐ̈ܒܗܝܢ ܡܥܕܪ̈ܢܐ̣. ܙܕܝܩ̈ܐ̣ ܘܢܒ̈ܝܐ ܚܣ̈ܝܐ

66. Letter of Baruch A 85:2

    ܐܠܐ ܐܦ ܒܗ̇ ܗܘ̣ܝܢ ܒܐܪܥܢ̣. ܘܗ̣ܢܘܢ ܡܥܕܪܝܢ ܗܘܘ ܠܢ̇. ܡܐ ܕܚ̇ܛܝܢ ܗܘܝܢ. ܘܒ̇ܥܝܢ ܗܘܘ ܥܠܝܢ ܡܢ ܗ̇ܘ ܕܥܒܕܢ. ܡܛܠ ܕܬܟܝܠܝܢ ܗܘܘ ܥܠ ܥ̇ܒ̈ܕܝܗܘܢ. ܘܚܝܠܬܢܐ ܫܡ̇ܥ ܗܘܐ ܨܠܘܬܗܘܢ̣ ܘܡܚ̇ܣܐ ܥܠܝܢ

67. Letter of Baruch A 85:3

    ܗܫܐ ܕܝܢ ܙܕܝܩ̈ܐ̣ ܐܬܟܢ̣ܫܘ. ܘܢܒ̈ܝܐ̣ ܫܟ̣ܒܘ. ܘܐܦ ܚܢܢ ܡܢ ܐܪܥܐ̣ ܢܦ̣ܩܢ. ܘܨܗܝܘܢ̣ ܐܫܬܩ̣ܠܬ ܡܢܢ. ܘܠܝܬ ܠܢ ܗܫܐ ܡܕܡ̣. ܐܠܐ ܐܢ ܚܝܠܬܢܐ̣ ܘܢܡܘܣܗ ܰ

68. Letter of Baruch A 85:4

    ܐܢ ܗܟܝܠ ܢܬܪܘܨ ܘܢܬ̣ܩܢ ܠܒ̈ܘܬܢ̣. ܢܣܒܝܢܢ ܟܠ ܕܐܘܒܕܢ. ܘܕܡܝܬܪ̈ܢ ܣ̇ܓܝ ܡܢ ܐܝܠܝܢ ܕܐܘܒܕܢ̣ ܒܐ̈ܥܦܐ ܣ̈ܓܝܐܐ

69. Letter of Baruch A 85:5

    ܡܕܡ ܓܝܪ ܕܐܘܒܕܢ̣ ܕܚܒ̇ܠܐ ܗܘ. ܘܡܕܡ ܕܢܣܒܝܢ̣ܢ ܠܐ ܡܬܚ̇ܒܠ

70. Letter of Baruch A 85:6

    ܐܦ ܠܐ̈ܚܝܢ̣ ܕܝܢ̣ ܗܟܢܐ ܟܬ̇ܒܬ ܠܒܒܠ. ܕܐܦ ܠܗܘܢ̣ ܗܢ̣ܝܢ ܗܠܝܢ ܐ̇ܣܗܕ

71. Letter of Baruch A 85:7

    ܢ̈ܗܘܝܢ ܕܝܢ ܒܟܠܙܒܢ ܩܕܡ̇ ܥܝܢ̈ܝܟܘܢ̣. ܗܠܝܢ ܟܠܗܝܢ ܕܡܩܕܡܢ ܐܡܝܪ̈ܢ. ܡܛܠ ܕܥܕܟܝܠ ܒܪܘܚܐ ܚܢ̣ܢ. ܘܫܘܠܛܢܐ ܕܚܐܪܘܬܢ.

72. Letter of Baruch A 85:8

    ܬܘܒ ܕܝܢ ܡܪܝܡܐ̣. ܡܓܪ ܪܘܚܗ ܥܡܢ ܗܪܟܐ. ܘܐܘܕܥܢ ܡܕܡ ܕܥܬܝܕ. ܘܠܐ ܟ̣ܣ̇ܝ ܡܢܢ ܡܕܡ ܕܠܚܪܬܐ ܓܕܫ

73. Letter of Baruch A 85:9

    ܡܢ ܩܕܡ ܗܟܝܠ̣. ܕܢܬܒ̣ܥ ܕܝܢ̣ܐ ܕܝܠܗ ܘܫܪܪܐ ܕܡܕܡ ܕܙܕܩ ܠܗ. ܢ̇ܛܝܒ ܢܦܫܢ ܕܢܣ̇ܒ̣ ܘܠܐ ܕܢܬܢܣ̣ܒ. ܘܕܢܣ̇ܒܪ̣ ܘܠܐ ܕܢܒܗ̣ܬ. ܘܕܢܬܬܢܝܚ ܥܡ ܐ̈ܒܗܬܢ̣. ܘܠܐ ܕܢܫܬܢܩ ܥܡ ܣ̈ܢܐܝܢ

74. Letter of Baruch A 85:10

    ܥܠܝܡܘܬܗ ܓܝܪ̣ ܕܥܠܡܐ̣ ܥܒ̣ܪܬ. ܘܥܘܙܗ̇ ܕܒܪܝܬܐ ܡܢ ܟܕܘ̣ ܫܠ̣ܡ ܠܗ. ܘܡܐܬܝܬܗܘܢ ܕܙܒ̈ܢܐ ܒܨܝܪ ܩܠܝܠ̣ ܘܥܒܪܘ ܠܗܘܢ. ܘܩܪܝܒܐ ܩܘܠܬܐ ܠܓܘܒܐ̣ ܘܐܠܦܐ ܠܠܡܐܢܐ. ܘܡܪܕܝܬܐ ܕܐܘܪܚܐ ܠܡܕܝܢܬܐ̣ ܘܚ̈ܝܐ ܠܫܘܠܡܐ

75. Letter of Baruch A 85:11

    ܬܘܒ ܕܝܢ ܛܝ̇ܒܘ ܢܦܫ̈ܬܟܘܢ. ܕܡܐ ܕܪܕܝ̣ܬܘܢ ܘܣܠ̣ܩܬܘܢ ܡܢ ܐܠܦܐ̣ ܬܬܢܝܚ̣ܘܢ. ܘܠܐ ܡܐ ܕܐܙܠ̣ܬܘܢ ܬܬܚ̇ܝܒܘܢ

76. Letter of Baruch A 85:12

    ܗܐ ܓܝܪ ܟܕ ܢܝܬܐ ܡܪܝܡܐ ܗܠܝܢ ܟܠܗܝ̣ܢ. ܬܡ̇ܢ ܬܘܒ̣ ܠܝܬ ܐܬܪܐ ܠܬܝܒܘܬܐ. ܘܠܐ ܬܚܘܡܐ ܠܙܒ̈ܢܐ. ܘܠܐ ܢܘܓܪܐ ܠܥܕ̈ܢܐ. ܘܠܐ ܚ̇ܘܠܦܐ ܠܐܪܘܚܬܐ. ܘܠܐ ܐܬܪܐ ܠܒܥܘܬܐ. ܘܠܐ ܡܫܕܪܢܘܬܐ ܕܫܐ̈ܠܬܐ. ܘܠܐ ܠܡܣܒ ܐܝܕܥܬܐ. ܘܠܐ ܝܗܘܒܐ ܕܚܘܒܐ. ܘܠܐ ܐܬܪܐ ܠܬܘܬ ܢܦܫܐ. ܘܠܐ ܦܝܣܐ ܥܠ ܣ̈ܟܠܘܬܐ. ܘܠܐ ܒ̈ܥܘܬܐ ܕܐܒ̈ܗܐ. ܘܠܐ ܨܠܘܬܐ ܕܢܒ̈ܝܐ. ܘܠܐ ܥܘܕܪܢܐ ܕܙܕܝܩ̈ܐ

77. Letter of Baruch A 85:13

    ܐܝܬ ܬܡ̇ܢ̣ ܓܙܪ ܕܝܢ̣ܐ ܕܚ̇ܒܠܐ. ܐܘܪܚܐ ܕܢܘܪܐ ܘܫܒܝܠܐ ܕܡ̇ܩܪܒ ܠܓܗܢܐ

78. Letter of Baruch A 85:14

    ܡܛܠ ܗܢܐ ܚܕ ܒܝܕ ܚ̣ܕ ܢܡܘܣܐ. ܚܕ ܥܠܡܐ. ܘܠܐܝܠܝܢ ܕܐܝܬ ܒܗ̣. ܣܟܐ ܠܟܠܗܘܢ̣

79. Letter of Baruch A 85:15

    ܘܗܝܕܝܢ ܢܚ̇ܐ. ܘܠܐܝܠܝܢ ܕܡ̇ܫܟܚ ܕܢܚ̇ܣܐ ܥܠܝܗܘܢ̣. ܘܐܟܚܕܐ ܢܘܒܕ ܠܐܝܠܝܢ ܕܒܚ̈ܛܗܐ ܡܦܠܦܠܝܢ

80. Letter of Baruch A 86:1

    ܟܕ ܬܣ̣ܒܘܢ ܗܟܝܠ ܗܕܐ ܐܓܪܬܝ̣. ܩܪܐܘܗ̇ ܒܟܢܫ̈ܝܟܘܢ̣ ܒܒܛܝܠܘܬܐ

81. Letter of Baruch A 86:2

    ܘܗܘ̣ܝܬܘܢ ܡܬܗ̇ܓܝܢ ܒܗ̇. ܝܬܝܪܐܝܬ̣ ܒܝ̈ܘܡܝ ܨܘ̈ܡܝܟܘܢ

82. Letter of Baruch A 86:3

    ܘܗܘ̣ܝܬܘܢ ܡܬܕܟܪܝܢ ܠܝ ܒܝܕ ܐܓܪܬܐ ܗܕܐ. ܐܝܟܢܐ̣ ܕܐܦ ܡܬ̣ܕܟܪ ܐܢܐ ܠܟܘܢ ܒܗ̇. ܘܒܟܠ ܙܒ̣ܢ ܗܘ̣ܝܬܘܢ ܚܠܝܡܝܢ.

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.