← All works

Peshitta Kings 2

Peshitta (Syriac Old Testament) · 719 sections

1. Kings 2 15:9

   ܘܥܒܕ ܕܒܝܫ ܩܕܡ ܡܪܝܐ ܐܝܟ ܕܥܒܕ ܐܒܘܗܝ ܘܠܐ ܣܛܐ ܡܢ ܟܠܗܘܢ ܚ̈ܛܗܘܗܝ ܕܝܘܪܒܥܡ ܒܪ ܢܒܛ ܕܐܚܛܝ ܠܐܝܣܪܝܠ

2. Kings 2 15:10

   ܘܡܪܕ ܥܠܘܗܝ ܫܠܘܡ ܒܪ ܝܒܝܫ ܘܡܚܝܗܝ ܠܘܩܒܠ ܥܡܐ ܘܩܛܠܗ ܘܐܡܠܟ ܒܬܪܗ

3. Kings 2 15:11

   ܘܫܪܟܐ ܕܦܬܓܡ̈ܘܗܝ ܕܙܟܪܝܐ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܐܝܣܪܝܠ

4. Kings 2 15:12

   ܘܫܠܡܬ ܡܠܬܗ ܕܡܪܝܐ ܕܐܡܪ ܠܝܗܘ ܕܒܢ̈ܝܐ ܐܪ̈ܒܝܥܝܐ ܢܬܒܘܢ ܠܟ ܥܠ ܟܘܪܣܝܐ ܕܐܝܣܪܝܠ ܘܗܘܐ ܗܟܢܐ

5. Kings 2 15:13

   ܘܫܠܘܡ ܒܪ ܝܒܝܫ ܐܡܠܟ ܒܫܢܬ ܬܠܬܝܢ ܘܬܫܥ ܫܢܝ̈ܢ ܠܥܘܙܝܐ ܡܠܟܐ ܕܝܗܘܕܐ ܘܐܡܠܟ ܝܪܚ ܝܘܡ̈ܝܢ ܒܫܡܪܝܢ

6. Kings 2 15:14

   ܘܣܠܩ ܡܚܢܝܡ ܒܪ ܓܕܝ ܡܢ ܬܪܨܐ ܘܥܠ ܠܫܡܪܝܢ ܘܡܚܝܗܝ ܠܫܠܘܡ ܒܪ ܝܒܝܫ ܒܫܡܪ̈ܝܢ ܘܩܛܠܗ ܘܐܡܠܟ ܒܬܪܗ

7. Kings 2 15:15

   ܘܫܪܟܐ ܕܦܬܓܡ̈ܘܗܝ ܕܫܠܘܡ ܘܡܪܕܐ ܕܡܪܕ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܐܝܣܪܝܠ

8. Kings 2 15:16

   ܗܝܕܝܢ ܡܚܐ ܡܚܢܝܡ ܠܬܦܣܚ ܘܠܟܠ ܕܐܝܬ ܒܗ ܘܠܬܚ̈ܘܡܝܗ ܡܢ ܬܪܨܐ ܥܠ ܕܠܐ ܦܬܚܘ ܠܗ ܬܪܥܐ ܘܚܪܒܗ ܘܠܟܠܗܝܢ ܒܛܢܬ̈ܗ ܦܪܬ

9. Kings 2 15:17

   ܒܫܢܬ ܬܠܬܝܢ ܘܬܫܥ ܫ̈ܢܝܢ ܠܥܘܙܝܐ ܡܠܟܐ ܕܝܗܘܕܐ ܐܡܠܟ ܡܚܢܝܡ ܒܪ ܓܕܝ ܥܠ ܐܝܣܪܝܠ ܒܫܡܪܝܢ ܥܣܪ ܫ̈ܢܝܢ

10. Kings 2 15:18

    ܘܥܒܕ ܕܒܝܫ ܩܕܡ ܡܪܝܐ ܘܠܐ ܣܛܐ ܡܢ ܚ̈ܛܗܘܗܝ ܕܝܘܪܒܥܡ ܒܪ ܢܒܛ ܕܐܚܛܝ ܠܐܝܣܪܝܠ ܟܘܠܗܘܢ ܝܘܡ̈ܘܗܝ

11. Kings 2 15:19

    ܘܐܬܐ ܦܘܠ ܡܠܟܐ ܕܐܬܘܪ ܥܠ ܐܪܥܐ ܘܝܗܒ ܡܚܢܝܡ ܠܦܘܠ ܐܠܦ ܟܟܪ̈ܝܢ ܕܟܣܦܐ ܕܬܗܘܐ ܐܝܕܗ ܥܡܗ ܘܢܐܚܘܕ ܡܠܟܘܬܐ ܒܐܝܕܗ

12. Kings 2 15:20

    ܘܐܪܡܝ ܡܚܢܝܡ ܥܠ ܐܝܣܪܝܠ ܟܣܦܐ ܥܠ ܟܠܗܘܢ ܥܬܝܪ̈ܐ ܕܐܪܥܐ ܕܢܬܠ ܠܡܠܟܐ ܕܐܬܘܪ ܚܡܫܝܢ ܡܬܩ̈ܠܝܢ ܕܟܣܦܐ ܥܠ ܓܒܪܐ ܚܕ ܘܗܦܟ ܡܠܟܐ ܕܐܬܘܪ ܘܠܐ ܩܡ ܬܡܢ ܒܐܪܥܐ

13. Kings 2 15:21

    ܘܫܪܟܐ ܕܦ̈ܬܓܡܘܗܝ ܕܡܚܢܝܡ ܘܟܠ ܡܕܡ ܕܥܒܕ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܐܝܣܪܝܠ

14. Kings 2 15:22

    ܘܫܟܒ ܡܚܢܝܡ ܥܡ ܐ̈ܒܗܘܗܝ ܘܐܡܠܟ ܦܩܚܝܐ ܒܪܗ ܒܬܪܗ

15. Kings 2 15:23

    ܒܫܢܬ ܚܡܫܝܢ ܫܢܝ̈ܢ ܠܥܘܙܝܐ ܡܠܟܐ ܕܝܗܘܕܐ ܐܡܠܟ ܦܩܚܝܐ ܒܪ ܡܚܢܝܡ ܥܠ ܐܝܣܪܐܝܠ ܒܫܡܪܝܢ ܬܪ̈ܬܝܢ ܫ̈ܢܝܢ

16. Kings 2 15:24

    ܘܥܒܕ ܕܒܝܫ ܩܕܡ ܡܪܝܐ ܘܠܐ ܣܛܐ ܡܢ ܚ̈ܛܗܘܗܝ ܕܝܘܪܒܥܡ ܒܪ ܢܒܛ ܕܐܚܛܝ ܠܐܝܣܪܝܠ

17. Kings 2 15:25

    ܘܡܪܕ ܥܠܘܗܝ ܦܩܚ ܒܪ ܪܘܡܠܝܐ ܓܢܒܪܗ ܘܩܛܠܗ ܒܫܡܪܝܢ ܒܣܚܪܬܐ ܕܒܝܬ ܡܠܟܐ ܘܕܒܪ ܠܪܓܐܘܒ ܘܠܐܢܝ ܘܥܡܗ ܚܡܫܝܢ ܓܒܪ̈ܝܢ ܡܢ ܒܢ̈ܝ ܓܠܥܕ ܘܩܛܠܗ ܘܐܡܠܟ ܒܬܪܗ

18. Kings 2 15:26

    ܘܫܪܟܐ ܕܦ̈ܬܓܡܘܗܝ ܕܦܩܚܝܐ ܘܟܠܡܕܡ ܕܥܒܕ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܐܝܣܪܝܠ

19. Kings 2 15:27

    ܒܫܢܬ ܚܡܫܝܢ ܘܬܪ̈ܬܝܢ ܫܢܝ̈ܢ ܠܥܘܙܝܐ ܡܠܟܐ ܕܝܗܘܕܐ ܐܡܠܟ ܦܩܚ ܒܪ ܪܘܡܠܝܐ ܥܠ ܐܝܣܪܝܠ ܒܫܡܪܝܢ ܥܣܪܝܢ ܫ̈ܢܝܢ

20. Kings 2 15:28

    ܘܥܒܕ ܕܒܝܫ ܩܕܡ ܡܪܝܐ ܘܠܐ ܣܛܐ ܡܢ ܚ̈ܛܗܘܗܝ ܕܝܘܪܒܥܡ ܒܪ ܢܒܛ ܕܐܚܛܝ ܠܐܝܣܪܝܠ

21. Kings 2 15:29

    ܘܒܝ̈ܘܡܘܗܝ ܕܦܩܚ ܡܠܟܐ ܕܐܝܣܪܝܠ ܐܬܐ ܬܓܠܬܦܠܣܪ ܡܠܟܐ ܕܐܬܘܪ ܘܕܒܪ ܠܥܝܘܢ ܘܠܐܒܠ ܡܚܘܠܐ ܘܠܟܠ ܒܝܬ ܡܥܟܐ ܘܠܢܝܚ ܘܠܩܕܫ ܘܠܚܨܘܪ ܘܠܓܠܥܕ ܘܠܓܠܝܠܐ ܘܠܟܠܗ ܐܪܥܐ ܕܢܦܬܠܝ ܘܓܠܝ ܐܢܘܢ ܠܐܬܘܪ

22. Kings 2 15:30

    ܘܡܪܕ ܡܪܕܐ ܗܘܫܥ ܒܪ ܐܠܐ ܥܠ ܦܩܚ ܒܪ ܪܘܡܠܝܐ ܘܡܚܝܗܝ ܘܩܛܠܗ ܘܐܡܠܟ ܒܬܪܗ ܒܫܢܬ ܬܪ̈ܬܝܢ ܠܝܘܬܡ ܒܪ ܥܘܙܝܐ

23. Kings 2 15:31

    ܘܫܪܟܐ ܕܦ̈ܬܓܡܘܗܝ ܕܦܩܚ ܘܟܠܡܕܡ ܕܥܒܕ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܐܝܣܪܝܠ

24. Kings 2 15:32

    ܒܫܢܬ ܬܪ̈ܬܝܢ ܕܦܩܚ ܒܪ ܪܘܡܠܝܐ ܡܠܟܐ ܕܐܝܣܪܝܠ ܐܡܠܟ ܝܘܬܡ ܒܪ ܥܘܙܝܐ ܡܠܟܐ ܕܝܗܘܕܐ

25. Kings 2 15:33

    ܒܪ ܥܣܪ̈ܝܢ ܗܘܐ ܘܚܡܫ ܫܢܝ̈ܢ ܟܕ ܐܡܠܟ ܘܫܬܬܥܣܪܐ ܫܢ̈ܝܢ ܐܡܠܟ ܒܐܘܪܫܠܡ ܘܫܡܐ ܕܐܡܗ ܝܪܘܫܐ ܒܪܬ ܨܕܘܩ

26. Kings 2 15:34

    ܘܥܒܕ ܕܫܦܝܪ ܩܕܡ ܡܪܝܐ ܐܝܟ ܕܥܒܕ ܥܘܙܝܐ ܐܒܘܗܝ

27. Kings 2 15:35

    ܒܪܡ ܥ̈ܠܘܬܐ ܠܐ ܐܥܒܪ ܘܥܕܟܝܠ ܥܡܐ ܡܕܒܚܝܢ ܗܘܘ ܘܣܝܡܝܢ ܗܘܘ ܒܣ̈ܡܐ ܥܠ ܥ̈ܠܘܬܐ ܘܗܘ ܒܢܐ ܬܪܥܐ ܥܠܝܐ ܕܒܝܬܗ ܕܡܪܝܐ

28. Kings 2 15:36

    ܘܫܪܟܐ ܕܦܬ̈ܓܡܘܗܝ ܕܝܘܬܡ ܘܟܠ ܡܕܡ ܕܥܒܕ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܝܗܘܕܐ

29. Kings 2 15:37

    ܒܝ̈ܘܡܬܐ ܗܢܘܢ ܫܪܝ ܡܪܝܐ ܠܡܓܪܝܘ ܒܝܗܘܕܐ ܠܪܨܢ ܡܠܟܐ ܕܐܪܡ ܘܠܦܩܚ ܒܪ ܪܘܡܠܝܐ ܡܠܟܐ ܕܐܝܣܪܝܠ

30. Kings 2 15:38

    ܘܫܟܒ ܝܘܬܡ ܥܡ ܐ̈ܒܗܘܗܝ ܘܐܬܩܒܪ ܥܡ ܐ̈ܒܗܘܗܝ ܒܩܪܝܬܐ ܕܕܘܝܕ ܘܐܡܠܟ ܐܚܙ ܒܪܗ ܒܬܪܗ

31. Kings 2 16:1

    ܒܫܢܬ ܬܡܢܥܣܪ̈ܐ ܫ̈ܢܝܢ ܠܦܩܚ ܒܪ ܪܘܡܠܝܐ ܡܠܟܐ ܕܐܝܣܪܝܠ ܐܡܠܟ ܐܚܙ ܒܪ ܝܘܬܡ ܡܠܟܐ ܕܝܗܘܕܐ

32. Kings 2 16:2

    ܒܪ ܥܣܪ̈ܝܢ ܗܘܐ ܫܢܝ̈ܢ ܐܚܙ ܟܕ ܐܡܠܟ ܘܫܬܬܥܣܪܐ ܫܢܝ̈ܢ ܐܡܠܟ ܒܐܘܪܫܠܡ ܘܠܐ ܥܒܕ ܕܫܦܝܪ ܩܕܡ ܡܪܝܐ ܐܠܗܗ ܐܝܟ ܕܘܝܕ ܐܒܘܗܝ

33. Kings 2 16:3

    ܘܗܠܟ ܒܐܘܪܚܐ ܕܡ̈ܠܟܐ ܕܐܝܣܪܝܠ ܐܦ ܒܪܗ ܐܥܒܪ ܒܢܘܪܐ ܐܝܟ ܢܡܘܣܐ ܕܥܡ̈ܡܐ ܕܐܘܒܕ ܡܪܝܐ ܡܢ ܩܕܡ ܒܢ̈ܝ ܐܝܣܪܝܠ

34. Kings 2 16:4

    ܘܕܒܚ ܘܐܥܛܪ ܥܠ ܥ̈ܠܘܬܐ ܘܥܠ ܪ̈ܡܬܐ ܘܬܚܝܬ ܟܠ ܐܝܠܢ ܕܥܒܝܛ

35. Kings 2 16:5

    ܗܝܕܝܢ ܣܠܩ ܪܨܢ ܡܠܟܐ ܕܐܪܡ ܘܦܩܚ ܒܪ ܪܘܡܠܝܐ ܡܠܟܐ ܕܐܝܣܪܝܠ ܠܐܘܪܫܠܡ ܠܡܬܟܬܫܘ ܥܡܗ ܘܠܐ ܐܫܟܚܘ ܕܢܬܟܬܫܘܢ ܥܠܝܗ

36. Kings 2 16:6

    ܒܙܒܢܐ ܗܘ ܐܗܦܟ ܪܨܢ ܡܠܟܐ ܕܐܪܡ ܠܐܝܠܬ ܠܐܪܡ ܘܐܦܩ ܠܝܗܘܕܐ ܡܢ ܐܝܠܬ ܘܐܪ̈ܡܝܐ ܐܬܘ ܠܐܝܠܬ ܘܝܬܒܘ ܬܡܢ ܥܕܡܐ ܠܝܘܡܢܐ

37. Kings 2 16:7

    ܘܫܕܪ ܐܚܙ ܐܝ̈ܙܓܕܐ ܠܘܬ ܬܓܠܬܦܠܣܪ ܡܠܟܐ ܕܐܬܘܪ ܘܐܡܪ ܥܒܕܟ ܐܢܐ ܘܒܪܟ ܣܩ ܘܦܪܘܩܝܢܝ ܡܢ ܐ̈ܝܕܘܗܝ ܕܡܠܟܐ ܕܐܪܡ ܘܡܢ ܐ̈ܝܕܘܗܝ ܕܡܠܟܐ ܕܐܝܣܪܝܠ ܕܩܝܡܝܢ ܥܠܝ

38. Kings 2 16:8

    ܘܢܣܒ ܐܚܙ ܟܣܦܐ ܘܕܗܒܐ ܕܐܫܬܟܚ ܒܒܝܬܗ ܕܡܪܝܐ ܘܒܒܝܬ ܓܙܐ ܕܡܠܟܐ ܘܫܕܪ ܠܡܠܟܐ ܕܐܬܘܪ ܩܘܪܒܢܐ

39. Kings 2 16:9

    ܘܫܡܥܗ ܡܠܟܐ ܕܐܬܘܪ ܘܣܠܩ ܡܠܟܐ ܕܐܬܘܪ ܥܠ ܕܪܡܣܘܩ ܘܐܚܕܗ ܘܓܠܝܗ ܠܩܝܪ ܘܠܪܨܢ ܩܛܠ

40. Kings 2 16:10

    ܘܐܙܠ ܡܠܟܐ ܐܚܙ ܠܐܘܪܥܗ ܕܬܓܠܬܦܠܣܪ ܡܠܟܐ ܕܐܬܘܪ ܠܕܪܡܣܘܩ ܘܚܙܐ ܡܕܒܚܐ ܕܒܕܪܡܣܘܩ ܘܫܕܪ ܡܠܟܐ ܐܚܙ ܠܐܘܪܝܐ ܟܗܢܐ ܕܡܘܬܗ ܕܡܕܒܚܐ ܘܒܢܝܢܗ ܘܟܠܗ ܥܒܕܗ

41. Kings 2 16:11

    ܘܥܒܕ ܐܘܪܝܐ ܟܗܢܐ ܡܕܒܚܐ ܐܝܟ ܕܫܕܪ ܡܠܟܐ ܐܚܙ ܡܢ ܕܪܡܣܘܩ ܗܟܢܐ ܥܒܕ ܐܘܪܝܐ ܟܗܢܐ ܥܕܠܐ ܢܐܬܐ ܐܚܙ ܡܠܟܐ ܡܢ ܕܪܡܣܘܩ

42. Kings 2 16:12

    ܘܐܬܐ ܡܠܟܐ ܡܢ ܕܪܡܣܘܩ ܘܚܙܐ ܐܚܙ ܡܠܟܐ ܡܕܒܚܐ ܘܩܪܒ ܡܠܟܐ ܠܘܬ ܡܕܒܚܐ ܘܣܠܩ ܠܥܠ ܡܢܗ

43. Kings 2 16:13

    ܘܐܣܩ ܥܠܘܗܝ ܥ̈ܠܘܬܐ ܘܩܘܪ̈ܒܢܐ ܘܢܩܝ ܢܘܩ̈ܝܐ ܘܪܣ ܕܡܐ ܕܫ̈ܠܡܐ ܕܝܠܗ ܥܠ ܡܕܒܚܐ

44. Kings 2 16:14

    ܘܡܕܒܚܐ ܕܢܚܫܐ ܕܩܕܡ ܡܪܝܐ ܩܪܒܗ ܡܢ ܩܕܡ ܐ̈ܦܝ ܒܝܬܐ. ܡܢ ܒܝܬ ܡܕܒܚܐ ܘܡܢ ܒܝܬ ܡܪܝܐ. ܘܣܡܗ ܥܠ ܓܒ ܡܕܒܚܐ ܡܢ ܓܪܒܝܐ.

45. Kings 2 16:15

    ܘܦܩܕ ܡܠܟܐ ܐܚܙ ܠܐܘܪܝܐ ܟܗܢܐ ܘܐܡܪ ܠܗ ܥܠ ܡܕܒܚܐ ܪܒܐ ܐܣܩ ܥܠܬܐ ܕܨܦܪܐ ܘܩܘܪܒܢܐ ܕܪܡܫܐ ܘܥܠܬܐ ܕܡܠܟܐ ܘܩܘܪܒܢܗ ܘܥܠܬܐ ܕܟܠܗ ܥܡܐ ܕܐܪܥܐ ܘܩܘܪ̈ܒܢܝܗܘܢ ܘܢܘܩܝܗܘܢ ܘܟܠܗ ܕܡܐ ܕܥܠܬܐ ܘܟܠ ܕܡܐ ܕܕܒܚ̈ܐ ܥܠܘܗܝ ܪܘܣ ܘܡܕܒܚܐ ܕܢܚܫܐ ܢܗܘܐ ܠܝ ܠܫܘܐܠܐ

46. Kings 2 16:16

    ܘܥܒܕ ܐܘܪܝܐ ܟܗܢܐ ܐܝܟ ܕܦܩܕܗ ܡܠܟܐ ܐܚܙ

47. Kings 2 16:17

    ܘܦܣܩ ܡܠܟܐ ܐܚܙ ܓܕܢ̈ܦܐ ܕܡܬܩܢܐ ܘܐܦܪܩ ܡܢܗܘܢ ܠܩܢ̈ܐ ܘܝܡܐ ܐܚܬ ܡܢ ܬܘܪ̈ܐ ܕܢܚܫܐ ܘܣܡܗ ܥܠ ܪܨܦܐ ܕܟܐ̈ܦܐ

48. Kings 2 16:18

    ܘܒܝܬ ܫܒܬܐ ܕܒܢܐ ܒܒܝܬܗ ܕܡܪܝܐ ܘܡܥܠܢܐ ܕܬܪܥܐ ܒܪܝܐ ܐܟܪܟ ܠܒܝܬܗ ܕܡܪܝܐ ܡܢ ܩܕܡ ܡܠܟܐ ܕܐܬܘܪ

49. Kings 2 16:19

    ܘܫܪܟܐ ܕܦܬ̈ܓܡܘܗܝ ܕܐܚܙ ܘܟܠ ܡܕܡ ܕܥܒܕ ܗܐ ܟܬܝܒܝܢ ܒܣܦܪ ܕܒܪܝܡܝܢ ܕܡ̈ܠܟܐ ܕܝܗܘܕܐ

50. Kings 2 16:20

    ܘܫܟܒ ܐܚܙ ܥܡ ܐ̈ܒܗܘܗܝ ܘܐܬܩܒܪ ܥܡ ܐ̈ܒܗܘܗܝ ܒܩܪܝܬܐ ܕܕܘܝܕ ܘܐܡܠܟ ܚܙܩܝܐ ܒܪܗ ܒܬܪܗ

51. Kings 2 17:1

    ܒܫܢܬ ܬܪ̈ܬܥܣܪܐ ܠܐܚܙ ܡܠܟܐ ܕܝܗܘܕܐ ܐܡܠܟ ܗܘܫܥ ܒܪ ܐܠܐ ܥܠ ܐܝܣܪܝܠ ܒܫܡܪܝܢ ܬܫܥ ܫ̈ܢܝܢ

52. Kings 2 17:2

    ܘܥܒܕ ܕܒܝܫ ܩܕܡ ܡܪܝܐ ܒܪܡ ܠܐ ܐܝܟ ܡ̈ܠܟܐ ܕܐܝܣܪܝܠ ܕܗܘܘ ܩܕܡܘܗܝ

53. Kings 2 17:3

    ܥܠܘܗܝ ܣܠܩ ܫܠܡܢܥܣܪ ܡܠܟܐ ܕܐܬܘܪ ܘܗܘܐ ܠܗ ܗܘܫܥ ܥܒܕܐ ܘܐܝܬܝ ܠܗ ܩܘܪ̈ܒܢܐ

54. Kings 2 17:4

    ܘܐܫܟܚ ܡܠܟܐ ܕܐܬܘܪ ܒܗܘܫܥ ܡܪܕܐ ܘܫܕܪ ܐ̈ܝܙܓܕܐ ܠܘܬ ܣܐܘ ܡܠܟܐ ܕܡܨܪܝܢ ܘܠܐ ܐܣܩ ܩܘܪ̈ܒܢܐ ܠܡܠܟܐ ܕܐܬܘܪ ܐܝܟ ܕܒܟܠ ܫܢܐ ܘܟܠܝܗܝ ܡܠܟܐ ܕܐܬܘܪ ܘܐܣܪܗ ܒܝܬ ܐܣܝܪ̈ܐ

55. Kings 2 17:5

    ܘܣܠܩ ܡܠܟܐ ܕܐܬܘܪ ܥܠ ܟܠܗ ܐܪܥܐ ܘܣܠܩ ܠܫܡܪ̈ܝܢ ܘܫܪܐ ܥܠܝܗ ܬܠܬ ܫ̈ܢܝܢ

56. Kings 2 17:6

    ܘܒܫܢܬܐ ܬܫܝܥܝܬܐ ܠܗܘܫܥ ܟܒܫ ܡܠܟܐ ܕܐܬܘܪ ܠܫܡܪܝܢ ܘܓܠܝ ܠܒܢ̈ܝ ܐܝܣܪܝܠ ܠܐܬܘܪ ܘܐܘܬܒ ܐܢܘܢ ܒܚܠܚ ܘܒܚܒܪ ܢܗܪ ܓܘܙܢ ܩܘܪ̈ܝܐ ܕܡܕܝ

57. Kings 2 17:7

    ܘܗܘܐ ܕܟܕ ܚܛܘ ܒܢ̈ܝ ܐܝܣܪܝܠ ܠܡܪܝܐ ܐܠܗܗܘܢ ܕܐܦܩ ܐܢܘܢ ܡܢ ܐܪܥܐ ܕܡܨܪܝܢ ܡܢ ܬܚܝܬ ܐܝܕܐ ܕܦܪܥܘܢ ܡܠܟܐ ܕܡܨܪܝܢ ܘܕܚܠܘ ܠܐ̈ܠܗܐ ܐܚܪ̈ܢܐ

58. Kings 2 17:8

    ܘܗܠܟܘ ܒܢܡܘܣܐ ܕܥܡ̈ܡܐ ܕܐܘܒܕ ܡܪܝܐ ܡܢ ܩܕܡ ܒܢ̈ܝ ܐܝܣܪܝܠ

59. Kings 2 17:9

    ܘܐܡܪܘ ܒܢ̈ܝ ܐܝܣܪܝܠ ܡ̈ܠܐ ܕܠܐ ܫܦܝܪ̈ܢ ܥܠ ܡܪܝܐ ܐܠܗܗܘܢ ܗܢܘܢ ܘܡ̈ܠܟܝܗܘܢ ܘܒܢܘ ܠܗܘܢ ܥ̈ܠܘܬܐ ܒܟܠ ܩܘܪ̈ܝܗܘܢ ܡܢ ܡܓܕܠ ܢܛܘܪ̈ܐ ܘܥܕܡܐ ܠܩܪܝܬܐ ܥܫܝܢܬܐ

60. Kings 2 17:10

    ܘܐܩܝܡܘ ܠܗܘܢ ܩܝܡ̈ܬܐ ܘܕܚ̈ܠܬܐ ܥܠ ܟܠ ܪܡܬܐ ܕܪܡܐ ܘܬܚܝܬ ܟܘܠ ܐܝܠܢ ܕܥܒܝܛ

61. Kings 2 17:11

    ܘܣܡܘ ܬܡܢ ܒܣ̈ܡܐ ܥܠ ܥ̈ܠܘܬܐ ܐܝܟ ܥܡ̈ܡܐ ܕܐܘܒܕ ܡܪܝܐ ܡܢ ܩܕܡܝܗܘܢ ܘܥܒܕܘ ܦܬ̈ܓܡܐ ܕܒܝܫ̈ܝܢ ܠܡܪܓܙܘ ܩܕܡ ܡܪܝܐ

62. Kings 2 17:12

    ܘܦܠܚܘ ܠܕܚ̈ܠܬܐ ܕܐܡܪ ܠܗܘܢ ܡܪܝܐ ܠܐ ܬܥܒܕܘܢ ܦܬܓܡܐ ܗܢܐ

63. Kings 2 17:13

    ܘܐܣܗܕ ܡܪܝܐ ܒܐܝܣܪܝܠ ܘܒܝܗܘܕܐ ܒܐܝܕܐ ܕܟܠܗܘܢ ܥܒ̈ܕܘܗܝ ܢܒ̈ܝܐ ܘܟܠ ܚ̈ܙܝܐ ܘܐܡܪ ܬܘܒܘ ܡܢ ܐܘܪ̈ܚܬܟܘܢ ܒܝܫ̈ܬܐ ܘܛܪܘ ܦܘܩ̈ܕܢܝ ܘܩܝ̈ܡܝ ܐܝܟ ܢܡ̈ܘܣܐ ܕܦܩܕܬ ܠܐ̈ܒܗܝܟܘܢ ܘܐܝܟ ܕܫܠܚܬ ܠܗܘܢ ܒܐܝܕܐ ܕܥܒ̈ܕܝ ܢܒ̈ܝܐ

64. Kings 2 17:14

    ܘܠܐ ܫܡܥܘ ܘܩܫܝܘ ܩܕܠܗܘܢ ܡܢ ܩܕܠܐ ܕܐ̈ܒܗܝܗܘܢ ܘܠܐ ܗܝܡܢܘ ܒܡܪܝܐ ܐܠܗܗܘܢ

65. Kings 2 17:15

    ܘܐܣܠܝܘ ܩܝ̈ܡܝ ܘܦܘܩ̈ܕܢܝ ܕܦܩܕܬ ܠܐ̈ܒܗܝܗܘܢ ܘܣ̈ܗܕܘܬܐ ܕܐܣܗܕܬ ܒܗܘܢ ܘܐܙܠܘ ܒܬܪ ܠܐ ܡܕܡ ܘܡܕܡ ܠܐ ܐܝܬܪܘ ܐܠܐ ܐܙܠܘ ܒܬܪ ܥܡ̈ܡܐ ܕܦܩܕ ܐܢܘܢ ܡܪܝܐ ܕܠܐ ܬܥܒܕܘܢ ܐܟܘܬܗܘܢ

66. Kings 2 17:16

    ܘܫܒܩܘ ܟܠܗܘܢ ܦܘܩ̈ܕܢܘܗܝ ܕܡܪܝܐ ܐܠܗܗܘܢ ܘܥܒܕܘ ܠܗܘܢ ܢܣܝ̈ܟܐ ܬܪ̈ܝܢ ܥ̈ܓܠܐ ܘܥܒܕܘ ܕܒܚ̈ܐ ܠܕܚ̈ܠܬܐ ܘܣܓܕܘ ܠܟܠ ܚܝ̈ܠܐ ܕܫܡܝܐ ܘܦܠܚܘ ܠܒܥܠܐ

67. Kings 2 17:17

    ܘܐܥܒܪܘ ܒܢܝ̈ܗܘܢ ܘܒܢ̈ܬܗܘܢ ܒܢܘܪܐ ܘܩܨܡܘ ܩܨ̈ܡܐ ܘܢܚܫܘ ܘܐܬܚܫܒܘ ܠܡܥܒܕ ܟܠ ܕܒܝܫ ܩܕܡ ܡܪܝܐ ܠܡܪܓܙܘܬܗ

68. Kings 2 17:18

    ܘܪܓܙ ܡܪܝܐ ܛܒ ܥܠ ܐܝܣܪܝܠ ܘܐܥܒܪ ܐܢܘܢ ܡܢ ܩܕܡܘܗܝ ܘܠܐ ܐܫܬܚܪ ܐܠܐ ܐܢ ܫܒܛܐ ܕܝܗܘܕܐ ܒܠܚܘܕ

69. Kings 2 17:19

    ܘܐܦ ܒܢ̈ܝ ܝܗܘܕܐ ܠܐ ܢܛܪܘ ܦܘܩ̈ܕܢܘܗܝ ܕܡܪܝܐ ܐܠܗܗܘܢ ܘܗܠܟܘ ܒܢܡܘܣܗ ܕܐܝܣܪܝܠ ܕܥܒܕܘ ܕܒܝܫ ܩܕܡ ܡܪܝܐ ܘܐܪܓܙܘܗܝ ܟܠܗܘܢ ܝܘܡ̈ܬܐ

70. Kings 2 17:20

    ܘܐܣܠܝ ܡܪܝܐ ܠܟܠܗ ܙܪܥܗ ܕܐܝܣܪܝܠ ܘܨܥܪ ܐܢܘܢ ܘܐܫܠܡ ܐܢܘܢ ܒܐܝܕܐ ܕܒ̈ܙܘܙܐ ܥܕܡܐ ܕܫܕܐ ܐܢܘܢ ܡܢ ܩܕܡ ܐ̈ܦܘܗܝ

71. Kings 2 17:21

    ܡܛܠ ܕܦܪܩܘ ܕܒܝܬ ܐܝܣܪܝܠ ܡܢ ܒܬܪ ܕܘܝܕ ܘܐܡܠܟܘ ܥܠܝܗܘܢ ܠܝܘܪܒܥܡ ܒܪ ܢܒܛ ܘܐܛܥܝ ܝܘܪܒܥܡ ܠܐܝܣܪܝܠ ܡܢ ܒܬܪ ܡܪܝܐ ܘܐܚܛܝ ܐܢܘܢ ܚ̈ܛܗܐ ܪ̈ܘܪܒܐ

72. Kings 2 17:22

    ܘܗܠܟܘ ܒܢ̈ܝ ܐܝܣܪܝܠ ܒܟܠܗܘܢ ܚ̈ܛܗܘܗܝ ܕܝܘܪܒܥܡ ܕܥܒܕ ܘܠܐ ܣܛܘ ܡܢܗܘܢ

73. Kings 2 17:23

    ܥܕܡܐ ܕܐܥܒܪ ܡܪܝܐ ܠܐܝܣܪܝܠ ܡܢ ܩܕܡܘܗܝ ܐܝܟ ܕܐܡܪ ܡܪܝܐ ܒܐܝܕܐ ܕܟܠܗܘܢ ܢܒ̈ܝܐ ܘܓܠܝ ܐܢܘܢ ܠܒܢ̈ܝ ܐܝܣܪܝܠ ܡܢ ܐܪܥܗܘܢ ܠܐܬܘܪ ܥܕܡܐ ܠܝܘܡܢܐ

74. Kings 2 17:24

    ܘܐܝܬܝ ܡܠܟܐ ܕܐܬܘܪ ܡܢ ܒܒܠ ܘܡܢ ܟܘܬ ܘܡܢ ܥܘܐ ܘܡܢ ܚܡܬ ܘܡܢ ܣܦܪܘܝܡ ܘܐܘܬܒ ܐܢܘܢ ܒܩܘܪ̈ܝܐ ܕܫܡܪ̈ܝܢ ܚܠܦ ܒܢ̈ܝ ܐܝܣܪܝܠ ܘܐܝܪܬܘ ܠܫܡܪ̈ܝܢ ܘܝܬܒܘ ܒܩܘܪ̈ܝܗ

75. Kings 2 17:25

    ܘܡܢ ܪܫܝܬܐ ܟܕ ܝܬܒܘ ܬܡܢ ܠܐ ܕܚܠܘ ܠܡܪܝܐ ܘܫܕܪ ܡܪܝܐ ܥܠܝܗܘܢ ܐܪ̈ܝܘܬܐ ܘܗܘܘ ܡܩܛܠܝܢ ܒܗܘܢ

76. Kings 2 17:26

    ܘܚܘܝܘ ܠܡܠܟܐ ܕܐܬܘܪ ܘܐܡܪܘ ܠܗ ܥܡ̈ܡܐ ܕܓܠܝܬ ܘܐܘܬܒܬ ܒܩܘܪ̈ܝܐ ܕܫܡܪ̈ܝܢ ܠܐ ܝܕܥܝܢ ܕܝܢܐ ܕܐܠܗܗ ܕܐܪܥܐ ܘܫܕܪ ܥܠܝܗܘܢ ܐܪ̈ܝܘܬܐ ܘܗܐ ܡܩܛܠܝܢ ܒܗܘܢ ܡܛܠ ܕܠܐ ܝܕܥܝܢ ܕܝܢܐ ܕܐܠܗܗ ܕܐܪܥܐ

77. Kings 2 17:27

    ܘܦܩܕ ܡܠܟܐ ܕܐܬܘܪ ܘܐܡܪ ܐܘܒܠܘ ܠܬܡܢ ܚܕ ܡܢ ܟܗ̈ܢܐ ܕܓܠܝܬܘܢ ܡܢ ܬܡܢ ܘܢܐܙܠ ܘܢܬܒ ܬܡܢ ܘܢܠܦ ܐܢܘܢ ܕܝܢܐ ܕܐܠܗܗ ܕܐܪܥܐ

78. Kings 2 17:28

    ܘܐܬܐ ܚܕ ܡܢ ܟܗ̈ܢܐ ܕܓܠܝ ܡܢ ܫܡܪ̈ܝܢ ܘܝܬܒ ܒܒܝܬ ܐܝܠ ܘܗܘܐ ܡܠܦ ܠܗܘܢ ܐܝܟܢܐ ܢܕܚܠܘܢ ܠܡܪܝܐ

79. Kings 2 17:29

    ܘܗܘܘ ܦܠܚܝܢ ܥܡ ܥܡ ܐܠܗܗ ܘܫܒܩܘ ܒܬ̈ܐ ܕܥ̈ܠܘܬܐ ܕܥܒܕܘ ܒܫܡܪܝܢ ܥܡ ܥܡ ܒܩܘܪ̈ܝܗܘܢ ܟܪ ܕܗܢܘܢ ܝܬܒܝܢ

80. Kings 2 17:30

    ܘܐܢܫ̈ܝ ܒܒܠ ܦܠܚܝܢ ܠܣܟܘܬ ܒܢܘܬ ܘܐܢܫ̈ܝ ܟܘܬ ܦܠܚܝܢ ܠܢܪܓܠ ܘܐܢܫ̈ܝ ܚܡܬ ܦܠܚܝܢ ܠܐܫܝܡܐ

81. Kings 2 17:31

    ܘܥܘ̈ܝܐ ܦܠܚܝܢ ܠܝܒܙܚ ܘܠܬܪܬܩ ܘܣܦܪ̈ܘܝܐ ܡܘܩܕܝܢ ܒܢܝ̈ܗܘܢ ܒܢܘܪܐ ܠܐܪܕܡܠܟ ܘܠܥܡܠܝܩ ܐ̈ܠܗܐ ܕܣܦܪܘܝܡ

82. Kings 2 17:32

    ܘܗܘܘ ܕܚܠܝܢ ܠܡܪܝܐ ܘܥܒܕܘ ܠܗܘܢ ܡܢܗܘܢ ܟܘܡܪ̈ܐ ܕܥ̈ܠܘܬܐ ܘܗܘܘ ܦܠܚܝܢ ܠܗܘܢ ܒܒܝܬ ܥ̈ܠܘܬܐ

83. Kings 2 17:33

    ܠܡܪܝܐ ܕܚܠܝܢ ܗܘܘ ܘܠܐ̈ܠܗܝܗܘܢ ܦܠܚܝܢ ܗܘܘ ܐܝܟ ܢܡܘܣܐ ܕܥܡ̈ܡܐ ܘܓܠܝܘ ܒܢ̈ܝ ܐܝܣܪܝܠ ܡܢ ܐܪܥܗܘܢ

84. Kings 2 17:34

    ܥܕܡܐ ܠܝܘܡܢܐ ܥܠ ܕܫܒܩܘ ܠܡܪܝܐ ܘܥܒܕܝܢ ܐܝܟ ܢܡܘܣܐ ܕܥܡ̈ܡܐ ܘܠܐ ܕܚܠܝܢ ܠܡܪܝܐ ܘܠܐ ܥܒܕܝܢ ܐܝܟ ܩܝܡܐ ܘܐܝܟ ܕܝܢܐ ܘܐܝܟ ܢܡܘܣܐ ܘܐܝܟ ܦܘܩܕܢܐ ܕܦܩܕ ܡܪܝܐ ܠܒܢ̈ܝ ܝܥܩܘܒ ܕܫܡܝ ܫܡܗ ܐܝܣܪܐܝܠ

85. Kings 2 17:35

    ܘܐܩܝܡ ܡܪܝܐ ܩܝܡܐ ܥܡܗܘܢ ܘܦܩܕ ܐܢܘܢ ܘܐܡܪ ܠܐ ܬܕܚܠܘܢ ܠܐ̈ܠܗܐ ܐܚܪ̈ܢܐ ܘܠܐ ܬܣܓܕܘܢ ܠܗܘܢ ܘܠܐ ܬܦܠܚܘܢ ܐܢܘܢ ܘܠܐ ܬܕܒܚܘܢ ܠܗܘܢ

86. Kings 2 17:36

    ܐܠܐ ܦܠܘܚܘ ܠܡܪܝܐ ܕܐܣܩܟܘܢ ܡܢ ܐܪܥܐ ܕܡܨܪܝܢ ܒܚܝܠܐ ܪܒܐ ܘܒܕܪܥܐ ܪܡܐ ܠܗ ܦܠܘܚܘ ܘܠܗ ܣܓܘܕܘ ܘܠܗ ܕܒܚܘ

87. Kings 2 17:37

    ܘܩܝ̈ܡܐ ܘܕܝ̈ܢܐ ܘܢܡܘܣ̈ܐ ܘܦܘܩ̈ܕܢܐ ܕܟܬܒ ܠܟܘܢ ܛܪܘ ܘܥܒܕܘ ܟܠܗܘܢ ܝܘܡ̈ܬܐ ܠܐ ܬܕܚܠܘܢ ܠܐ̈ܠܗܐ ܐܚܪ̈ܢܐ

88. Kings 2 17:38

    ܘܩܝ̈ܡܐ ܕܐܩܝܡܬ ܥܡܟܘܢ ܠܐ ܬܛܥܘܢ ܘܠܐ ܬܕܚܠܘܢ ܠܐ̈ܠܗܐ ܕܥܡ̈ܡܐ

89. Kings 2 17:39

    ܐܠܐ ܠܡܪܝܐ ܐܠܗܟܘܢ ܕܚܠܘ ܘܗܘ ܡܦܨܐ ܠܟܘܢ ܡܢ ܐܝܕܐ ܕܟܠܗܘܢ ܒ̈ܥܠܕܒܒܝܟܘܢ

90. Kings 2 17:40

    ܘܠܐ ܫܡܥܘ ܐܠܐ ܐܝܟ ܢܡܘܣܗܘܢ ܩܕܡܝܐ ܥܒܕܝܢ ܗܘܘ

91. Kings 2 17:41

    ܘܗܘܘ ܐܦ ܥܡ̈ܡܐ ܗܠܝܢ ܕܝܬܒܘ ܒܫܡܪܝܢ ܕܚܠܝܢ ܠܡܪܝܐ ܘܠܓܠܝܦܝ̈ܗܘܢ ܦܠܚܝܢ ܗܘܘ ܐܦ ܒ̈ܢܝܗܘܢ ܐܦ ܒܢ̈ܝ ܒܢܝ̈ܗܘܢ ܘܐܝܟ ܕܥܒܕܘ ܐ̈ܒܗܝܗܘܢ ܥܒܕܝܢ ܗܘܘ ܐܦ ܗܢܘܢ ܥܕܡܐ ܠܝܘܡܢܐ

92. Kings 2 18:1

    ܒܫܢܬ ܬܠܬ ܠܗܘܫܥ ܒܪ ܐܠܐ ܡܠܟܐ ܕܐܝܣܪܝܠ ܐܡܠܟ ܚܙܩܝܐ ܒܪ ܐܚܙ ܡܠܟܐ ܕܝܗܘܕܐ

93. Kings 2 18:2

    ܒܪ ܥܣܪ̈ܝܢ ܗܘܐ ܘܚܡܫ ܫܢ̈ܝܢ ܟܕ ܐܡܠܟ ܘܥܣܪ̈ܝܢ ܘܬܫܥ ܫܢܝ̈ܢ ܐܡܠܟ ܒܐܘܪܫܠܡ ܘܫܡܐ ܕܐܡܗ ܐܟܝ ܒܪܬ ܙܟܪܝܐ

94. Kings 2 18:3

    ܘܥܒܕ ܕܫܦܝܪ ܩܕܡ ܡܪܝܐ ܐܝܟ ܕܥܒܕ ܕܘܝܕ ܐܒܘܗܝ

95. Kings 2 18:4

    ܘܗܘ ܐܥܒܪ ܥ̈ܠܘܬܐ ܘܬܒܪ ܩܝ̈ܡܬܐ ܘܦܣܩ ܕܚ̈ܠܬܐ ܘܦܣܩ ܚܘܝܐ ܕܢܚܫܐ ܕܥܒܕ ܡܘܫܐ ܡܛܠ ܕܛܥܘ ܒܢܝ̈ ܐܝܣܪܝܠ ܒܬܪܗ ܘܣܝܡܝܢ ܗܘܘ ܠܗ ܒܣ̈ܡܐ ܥܕܡܐ ܠܝ̈ܘܡܬܐ ܗܢܘܢ ܘܩܪܐܘܗܝ ܢܚܫܬܢ

96. Kings 2 18:5

    ܘܒܡܪܝܐ ܐܠܗܐ ܕܐܝܣܪܝܠ ܣܒܪ ܘܒܬܪܗ ܠܐ ܗܘܐ ܐܟܘܬܗ ܒܟܠܗܘܢ ܡ̈ܠܟܐ ܕܝܗܘܕܐ ܘܐܦ ܠܐ ܒܕܗܘܘ ܩܕܡܘܗܝ

97. Kings 2 18:6

    ܘܐܬܕܒܩ ܒܡܪܝܐ ܘܠܐ ܣܛܐ ܡܢ ܒܬܪܗ ܘܢܛܪ ܦܘܩ̈ܕܢܘܗܝ ܐܝܟ ܕܦܩܕ ܡܪܝܐ ܠܡܘܫܐ

98. Kings 2 18:7

    ܘܗܘܐ ܡܪܝܐ ܥܡܗ ܘܠܐܝܟܐ ܕܐܙܠ ܗܘܐ ܙܟܐ ܗܘܐ ܘܡܪܕ ܥܠ ܡܠܟܐ ܕܐܬܘܪ ܘܠܐ ܦܠܚܗ

99. Kings 2 18:8

    ܘܗܘ ܡܚܐ ܠܦܠܫ̈ܬܝܐ ܥܕܡܐ ܠܥܐܙܐ ܘܠܬܚ̈ܘܡܝܗ ܡܢ ܡܓܕܠ ܢܛܘܪ̈ܐ ܘܥܕܡܐ ܠܩܪܝܬܐ ܥܫܝܢܬܐ

100. Kings 2 18:9

     ܘܒܫܢܬܐ ܪܒܝܥܝܬܐ ܠܡܠܟܐ ܚܙܩܝܐ ܗܝ ܗܝ ܫܢܬܐ ܫܒܝܥܝܬܐ ܠܗܘܫܥ ܒܪ ܐܠܐ ܡܠܟܐ ܕܐܝܣܪܝܠ ܣܠܩ ܫܠܡܢܥܣܪ ܡܠܟܐ ܕܐܬܘܪ ܥܠ ܫܡܪܝܢ ܘܫܪܐ ܥܠܝܗ

← Previous · Next → — showing 401–500 of 719

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.