← All works

Peshitta Kings 1

Peshitta (Syriac Old Testament) · 816 sections

1. Kings 1 11:11

   ܘܐܡܪ ܡܪܝܐ ܠܫܠܝܡܘܢ ܚܠܦ ܕܗܘܬ ܗܕܐ ܥܡܟ ܘܠܐ ܢܛܪܬ ܩܝ̈ܡܝ ܘܕܝܢ̈ܝ ܘܦܘܩ̈ܕܢܝ ܕܦܩܕܬܟ ܡܨܪܐ ܐܨܪܝܗ ܠܡܠܟܘܬܐ ܡܢ ܐܝܕܟ ܘܐܬܠܝܗ ܠܥܒܕܟ

2. Kings 1 11:12

   ܒܪܡ ܒܝ̈ܘܡܝܟ ܠܐ ܐܥܒܕܝܗ ܡܛܠ ܕܘܝܕ ܥܒܕܝ ܡܢ ܐܝܕܐ ܕܒܪܟ ܐܨܪܝܗ

3. Kings 1 11:13

   ܒܪܡ ܟܠܗ ܡܠܟܘܬܐ ܠܐ ܐܨܪܐ ܫܒܛܐ ܚܕ ܐܬܠ ܠܒܪܟ ܡܛܠ ܕܘܝܕ ܥܒܕܝ ܘܡܛܠ ܐܘܪܫܠܡ ܩܪܝܬܐ ܕܓܒܝܬ

4. Kings 1 11:14

   ܘܐܩܝܡ ܡܪܝܐ ܣܛܢܐ ܠܫܠܝܡܘܢ ܠܗܕܕ ܐܕܘܡܝܐ ܡܢ ܙܪܥܐ ܗܘܐ ܓܝܪ ܕܡ̈ܠܟܐ ܒܐܕܘܡ

5. Kings 1 11:15

   ܘܟܕ ܚܪܒ ܕܘܝܕ ܠܐܕܘܡ ܟܕ ܣܠܩ ܝܘܐܒ ܪܒ ܚܝܠܐ ܠܡܩܒܪܘ ܩ̈ܛܝܠܐ ܘܩܛܠ ܟܠ ܕܟܪܐ ܒܐܕܘܡ

6. Kings 1 11:16

   ܡܛܠ ܕܫܬܐ ܝܪ̈ܚܝܢ ܝܬܒ ܬܡܢ ܝܘܐܒ ܘܟܠܗ ܐܝܣܪܝܠ ܥܡܗ ܥܕܡܐ ܕܩܛܠ ܟܠ ܕܟܪܐ ܒܐܕܘܡ

7. Kings 1 11:17

   ܘܥܪܩ ܗܕܕ ܗܘ ܘܐܢܫܐ ܐ̈ܕܘܡܝܐ ܡܢ ܥܒ̈ܕܘܗܝ ܕܐܒܘܗܝ ܠܡܥܠ ܠܡܨܪܝܢ ܘܗܕܕ ܛܠܝܐ ܗܘܐ ܙܥܘܪܐ

8. Kings 1 11:18

   ܘܩܡܘ ܡܢ ܡܕܝܢ ܘܥܠܘ ܠܦܪܢ ܘܕܒܪܘ ܓܒܪ̈ܐ ܥܡܗܘܢ ܡܢ ܦܪܢ ܘܥܠܘ ܠܡܨܪܝܢ ܠܘܬ ܦܪܥܘܢ ܡܠܟܐ ܕܡܨܪܝܢ ܘܝܗܒ ܠܗ ܒܝܬܐ ܘܠܚܡܐ ܘܐܡܪ ܠܗ ܬܒ ܠܘܬܝ ܘܐܪܥܐ ܝܗܒ ܠܗ

9. Kings 1 11:19

   ܘܐܫܟܚ ܗܕܕ ܪ̈ܚܡܐ ܒܥܝܢ̈ܝ ܦܪܥܘܢ ܘܝܗܒ ܠܗ ܐܢܬܬܐ ܚܬܗ ܕܐܢܬܬܗ ܚܬܗ ܕܬܚܦܝܣ ܪܒܬܐ

10. Kings 1 11:20

    ܘܝܠܕܬ ܠܗ ܚܬܗ ܕܬܚܦܝܣ ܠܓܒܘܬ ܒܪܗ ܘܚܣܠܬܗ ܬܚܦܝܣ ܒܓܘ ܒܝܬ ܦܪܥܘܢ ܘܗܘܐ ܓܒܘܬ ܒܝܬ ܦܪܥܘܢ ܒܝܢ̈ܬ ܒܢ̈ܘܗܝ ܕܦܪܥܘܢ

11. Kings 1 11:21

    ܘܗܕܕ ܫܡܥ ܒܡܨܪܝܢ ܕܫܟܒ ܕܘܝܕ ܥܡ ܐ̈ܒܗܘܗܝ ܘܕܡܝܬ ܝܘܐܒ ܪܒ ܚܝܠܐ ܘܗܕܕ ܐܡܪ ܠܦܪܥܘܢ ܫܕܪܝܢܝ ܐܙܠ ܠܐܪܥܝ

12. Kings 1 11:22

    ܐܡܪ ܠܗ ܦܪܥܘܢ ܡܢܐ ܓܝܪ ܚܣܪܬ ܠܘܬܝ ܕܗܐ ܒܥܐ ܐܢܬ ܕܬܐܙܠ ܠܟ ܠܐܪܥܟ ܐܡܪ ܠܗ ܠܐ ܐܠܐ ܡܫܕܪܘ ܫܕܪܝܢܝ

13. Kings 1 11:23

    ܘܐܩܝܡ ܠܗ ܡܪܝܐ ܣܛܢܐ ܠܗܕܪܘܢ ܒܪ ܐܠܝܕܥ ܕܥܪܩ ܡܢ ܠܘܬ ܗܕܪܥܙܪ ܡܠܟܐ ܕܨܘܒܐ ܡܪܗ

14. Kings 1 11:24

    ܘܟܢܫܘ ܥܠܘܗܝ ܓܒܪ̈ܐ ܘܗܘܐ ܪܒ ܓܝܣܐ ܘܟܕ ܩܛܠ ܐܢܘܢ ܕܘܝܕ ܐܙܠܘ ܠܕܪܡܣܘܩ ܘܝܬܒܘ ܒܗ ܘܐܡܠܟ ܗܕܕ ܒܕܪܡܣܘܩ

15. Kings 1 11:25

    ܘܗܘܐ ܣܛܢܐ ܠܐܝܣܪܝܠ ܟܠܗܘܢ ܝܘܡ̈ܬܗ ܕܫܠܝܡܘܢ ܥܠ ܒܝܫܬܐ ܕܥܒܕ ܘܗܕܕ ܐܥܝܩ ܠܒܢ̈ܝ ܐܝܣܪܝܠ ܘܐܡܠܟ ܥܠ ܐܕܘܡ

16. Kings 1 11:26

    ܘܝܘܪܒܥܡ ܒܪ ܢܒܛ ܐܦܪܬܝܐ ܡܢ ܨܕܕܐ ܘܫܡܐ ܕܐܡܗ ܨܪܘܒܐ. ܐܢܬܬܐ ܐܪܡܠܬܐ ܥܒܕܐ ܕܫܠܝܡܘܢ ܘܐܪܝܡ ܐܝܕܐ ܥܠ ܡܠܟܐ ܫܠܝܡܘܢ

17. Kings 1 11:27

    ܘܗܢܐ ܦܬܓܡܐ ܕܐܪܝܡ ܐܝܕܐ ܒܡܠܟܐ ܫܠܝܡܘܢ ܟܕ ܒܢܐ ܠܡܠܘ ܘܣܟܪ ܬܘܪ̈ܥܬܐ ܕܩܪܝܬܗ ܕܕܘܝܕ

18. Kings 1 11:28

    ܘܓܒܪܐ ܝܘܪܒܥܡ ܓܢܒܪ ܚܝܠܐ ܗܘܐ ܘܚܙܝܗܝ ܡܠܟܐ ܫܠܝܡܘܢ ܠܛܠܝܐ ܕܓܢܒܪ ܚܝܠܐ ܗܘ ܘܐܫܠܛܗ ܥܠ ܟܠܗ ܥܒܕܐ ܕܒܝܬ ܝܘܣܦ

19. Kings 1 11:29

    ܘܗܘܐ ܒܙܒܢܐ ܗܘ ܘܝܘܪܒܥܡ ܢܦܩ ܡܢ ܐܘܪܫܠܡ ܘܐܫܟܚܗ ܐܚܝܐ ܢܒܝܐ ܫܝܠܘܢܝܐ ܒܐܘܪܚܐ ܘܐܚܝܐ ܡܟܣܝ ܗܘܐ ܒܠܒܘܫܐ ܚܕܬܐ ܘܬܪ̈ܝܗܘܢ ܗܘܘ ܒܠܚܘܕ ܒܚܩܠܐ

20. Kings 1 11:30

    ܘܐܚܕ ܐܚܝܐ ܒܠܒܘܫܐ ܚܕܬܐ ܕܥܠܘܗܝ ܘܨܪܝܗܝ ܠܬܪ̈ܥܣܪ ܨܪ̈ܘܢ

21. Kings 1 11:31

    ܘܐܡܪ ܠܝܘܪܒܥܡ ܣܒ ܠܟ ܥܣܪܐ ܨܪ̈ܘܢ ܡܛܠ ܕܗܟܢܐ ܐܡܪ ܡܪܝܐ ܐܠܗܐ ܕܐܝܣܪܝܠ ܗܐ ܨܪܐ ܐܢܐ ܡܠܟܘܬܐ ܡܢ ܐܝܕܗ ܕܫܠܝܡܘܢ ܘܐܬܠ ܠܟ ܥܣܪܐ ܫܒ̈ܛܝܢ

22. Kings 1 11:32

    ܘܫܒܛܐ ܚܕ ܢܗܘܐ ܠܗ ܡܛܠ ܕܘܝܕ ܥܒܕܝ ܘܡܛܠ ܐܘܪܫܠܡ ܩܪܝܬܐ ܕܨܒܝܬ ܒܗ ܡܢ ܟܠܗܘܢ ܫܒ̈ܛܐ ܕܐܝܣܪܝܠ

23. Kings 1 11:33

    ܥܠ ܕܫܒܩܢܝ ܘܣܓܕ ܠܥܣܬܪܘܬ ܐܠܗܬܐ ܕܨܝ̈ܕܢܝܐ ܘܠܟܡܘܫ ܐܠܗܐ ܕܡ̈ܘܐܒܝܐ ܘܠܡܠܟܘܡ ܐܠܗܐ ܕܒܢܝ ܥܡܘܢ ܘܠܐ ܗܠܟ ܒܐܘܪ̈ܚܬܝ ܘܠܐ ܥܒܕ ܕܫܦܝܪ ܩܕܡܝ ܘܠܐ ܢܛܪ ܩܝ̈ܡܝ ܘܕܝܢ̈ܝ ܐܝܟ ܕܘܝܕ ܐܒܘܗܝ

24. Kings 1 11:34

    ܘܠܐ ܐܣܒ ܟܠܗ ܡܠܟܘܬܐ ܡܢ ܐ̈ܝܕܘܗܝ ܐܠܐ ܪܒܐ ܐܥܒܕܝܘܗܝ ܟܠ ܝܘܡ̈ܝ ܚܝ̈ܘܗܝ ܡܛܠ ܕܘܝܕ ܥܒܕܝ ܕܓܒܝܬܗ ܕܢܛܪ ܦܘܩ̈ܕܢܝ ܘܩܝ̈ܡܝ

25. Kings 1 11:35

    ܘܐܣܒ ܡܠܟܘܬܐ ܡܢ ܐܝ̈ܕܝ ܒܪܗ ܘܐܬܠ ܠܟ ܥܣܪܐ ܫܒ̈ܛܝܢ

26. Kings 1 11:36

    ܘܠܒܪܗ ܐܬܠ ܫܒܛܐ ܚܕ ܡܛܠ ܕܢܗܘܐ ܫܪܓܐ ܠܥܒܕܝ ܕܘܝܕ ܟܠܗܘܢ ܝܘܡ̈ܬܐ ܩܕܡܝ ܒܐܘܪܫܠܡ ܩܪܝܬܐ ܕܓܒܝܬ ܠܝ ܠܡܣܡ ܫܡܝ ܬܡܢ

27. Kings 1 11:37

    ܘܠܟ ܐܬܠ ܘܬܡܠܟ ܐܝܟ ܕܨܒܝܐ ܢܦܫܟ ܘܬܗܘܐ ܡܠܟܐ ܥܠ ܐܝܣܪܝܠ

28. Kings 1 11:38

    ܘܐܢ ܬܫܡܥ ܟܘܠ ܕܦܩܕܬܟ ܘܬܗܠܟ ܒܐܘܪ̈ܚܬܝ ܘܬܥܒܕ ܕܫܦܝܪ ܩܕܡܝ ܘܬܛܪ ܩܝ̈ܡܝ ܘܦܘܩ̈ܕܢܝ ܐܝܟ ܕܥܒܕ ܕܘܝܕ ܥܒܕܝ ܐܗܘܐ ܥܡܟ ܘܐܒܢܐ ܠܟ ܒܝܬܐ ܡܗܝܡܢܐ ܐܝܟ ܕܒܢܝܬ ܠܕܘܝܕ ܥܒܕܝ ܘܐܬܠ ܠܟ ܠܐܝܣܪܝܠ

29. Kings 1 11:39

    ܘܐܡܟܟ ܙܪܥܗ ܕܕܘܝܕ ܡܛܠ ܗܕܐ ܒܪܡ ܠܐ ܟܠܗܘܢ ܝܘܡ̈ܬܐ

30. Kings 1 11:40

    ܘܒܥܐ ܫܠܝܡܘܢ ܠܡܩܛܠܗ ܠܝܘܪܒܥܡ ܘܩܡ ܝܘܪܒܥܡ ܘܥܪܩ ܠܡܨܪܝܢ ܠܘܬ ܫܝܫܩ ܡܠܟܐ ܕܡܨܪܝܢ ܘܗܘܐ ܒܡܨܪܝܢ ܥܕܡܐ ܕܡܝܬ ܫܠܝܡܘܢ

31. Kings 1 11:41

    ܘܫܪܟܐ ܕܦܬ̈ܓܡܘܗܝ ܕܫܠܝܡܘܢ ܘܟܠ ܡܕܡ ܕܥܒܕ ܘܚܟܡܬܗ ܗܐ ܟܬܝܒܝܢ ܒܣܦܪ ܦܬ̈ܓܡܘܗܝ ܕܫܠܝܡܘܢ

32. Kings 1 11:42

    ܘܝܘܡ̈ܬܐ ܕܐܡܠܟ ܫܠܝܡܘܢ ܒܐܘܪܫܠܡ ܥܠ ܟܠܗ ܐܝܣܪܝܠ ܐܪ̈ܒܥܝܢ ܫ̈ܢܝܢ

33. Kings 1 11:43

    ܘܫܟܒ ܫܠܝܡܘܢ ܥܡ ܐ̈ܒܗܘܗܝ ܘܐܬܩܒܪ ܒܩܪܝܬܐ ܕܕܘܝܕ ܐܒܘܗܝ ܘܐܡܠܟ ܪܚܒܥܡ ܒܪܗ ܒܬܪܗ

34. Kings 1 12:1

    ܘܐܙܠ ܪܚܒܥܡ ܠܫܟܝܡ ܡܛܠ ܕܠܫܟܝܡ ܐܬܘ ܟܠܗ ܐܝܣܪܝܠ ܠܡܡܠܟܘܬܗ

35. Kings 1 12:2

    ܘܟܕ ܫܡܥ ܝܘܪܒܥܡ ܒܪ ܢܒܛ ܘܗܘ ܥܕܟܝܠ ܒܡܨܪܝܢ ܗܘܐ ܕܥܪܩ ܡܢ ܩܕܡ ܡܠܟܐ ܫܠܝܡܘܢ ܘܝܬܒ ܝܘܪܒܥܡ ܒܡܨܪܝܢ

36. Kings 1 12:3

    ܘܫܕܪܘ ܘܩܪܐܘܗܝ ܘܐܬܐ ܝܘܪܒܥܡ ܘܟܠܗ ܥܡܐ ܕܐܝܣܪܝܠ ܘܐܡܪܘ ܠܪܚܒܥܡ

37. Kings 1 12:4

    ܐܒܘܟ ܐܩܫܝ ܢܝܪܢ ܐܢܬ ܗܫܐ ܐܩܠ ܡܢ ܫܘܥܒܕܗ ܕܐܒܘܟ ܩܫܝܐ ܘܡܢ ܢܝܪܗ ܬܩܝܦܐ ܕܣܡ ܥܠܝܢ ܘܢܦܠܚܟ

38. Kings 1 12:5

    ܘܐܡܪ ܠܗܘܢ ܪܚܒܥܡ ܙܠܘ ܘܡܟܐ ܠܬܠܬܐ ܝܘܡ̈ܝܢ ܬܘ ܠܘܬܝ ܘܐܙܠܘ ܟܠܗ ܥܡܐ

39. Kings 1 12:6

    ܘܐܬܡܠܟ ܡܠܟܐ ܪܚܒܥܡ ܒܣ̈ܒܐ ܕܩܝܡܝܢ ܗܘܘ ܩܕܡ ܐܒܘܗܝ ܟܕ ܚܝ ܗܘܐ ܘܐܡܪ ܠܗܘܢ ܐܝܟܢܐ ܡܠܟܝܢ ܐܢܬܘܢ ܠܝ ܕܐܬܝܒܝܘܗܝ ܠܥܡܐ ܦܬܓܡܐ

40. Kings 1 12:7

    ܘܐܡܪܘ ܠܗ ܐܢ ܝܘܡܢܐ ܬܗܘܐ ܥܒܕܐ ܠܥܡܐ ܗܢܐ ܘܬܦܠܘܚ ܐܢܘܢ ܘܬܥܢܐ ܐܢܘܢ ܘܬܐܡܪ ܠܗܘܢ ܡ̈ܠܝܢ ܛܒ̈ܢ ܢܗܘܘܢ ܠܟ ܥܒ̈ܕܐ ܟܠܗܘܢ ܝܘܡ̈ܬܐ

41. Kings 1 12:8

    ܘܫܒܩ ܡܠ̣ܟܐ ܕܣ̈ܒܐ ܕܡܠܟܘܗܝ ܘܐܬܡܠܟ ܒ̈ܛܠܝܐ ܕܪܒܘ ܥܡܗ ܕܩܝܡܝܢ ܩܕܡܘܗܝ

42. Kings 1 12:9

    ܘܐܡܪ ܠܗܘܢ ܡܢܐ ܡܠܟܝܢ ܐܢܬܘܢ ܠܝ ܕܐܬܠ ܠܥܡܐ ܦܬܓܡܐ ܕܐܡܪܝܢ ܠܝ ܕܐܩܠ ܡܢ ܢܝܪܢ ܕܣܡ ܥܠܝܢ ܐܒܘܟ

43. Kings 1 12:10

    ܘܐܡܪܘ ܠܗ ܛ̈ܠܝܐ ܕܪܒܘ ܥܡܗ ܗܟܢܐ ܐܡܪ ܠܥܡܐ ܕܐܡܪܘ ܠܟ ܕܐܒܘܟ ܐܩܫܝ ܢܝܪܢ ܐܢܬ ܐܩܠ ܥܠܝܢ ܐܡܪ ܠܗܘܢ ܚܨܪܝ ܥܒܝܐ ܗܝ ܡܢ ܟܪܬܗ ܕܐܒܝ

44. Kings 1 12:11

    ܐܒܝ ܐܥܫܢ ܥܠܝܟܘܢ ܢܝܪܐ ܥܫܝܢܐ ܐܢܐ ܐܘܣܦ ܥܠ ܢܝܪܟܘܢ ܐܒܝ ܪܕܟܘܢ ܒܫ̈ܘܛܐ ܘܐܢܐ ܐܪܕܝܟܘܢ ܒܡܪ̈ܓܢܐ

45. Kings 1 12:12

    ܘܐܬܐ ܝܘܪܒܥܡ ܘܟܠܗ ܐܝܣܪܝܠ ܠܘܬ ܪܚܒܥܡ ܒܝܘܡܐ ܬܠܝܬܝܐ ܐܝܟܢܐ ܕܐܡܪ ܠܗܘܢ ܡܠܟܐ ܕܬܘ ܠܘܬܝ ܒܝܘܡܐ ܬܠܝܬܝܐ

46. Kings 1 12:13

    ܘܥܢܐ ܡܠܟܐ ܠܥܡܐ ܩܫܝܐܝܬ ܘܫܒܩ ܡܠ̣ܟܐ ܕܣܒ̈ܐ ܕܡܠܟܘܗܝ

47. Kings 1 12:14

    ܘܐܡܪ ܠܗܘܢ ܐܝܟ ܡܠ̣ܟܐ ܕ̈ܛܠܝܐ ܐܒܝ ܐܥܫܢ ܢܝܪܟܘܢ ܐܢܐ ܐܘܣܦ ܥܠ ܢܝܪܟܘܢ ܐܒܝ ܪܕܟܘܢ ܒܫ̈ܘܛܐ ܘܐܢܐ ܐܪܕܝܟܘܢ ܒܡܪ̈ܓܢܐ

48. Kings 1 12:15

    ܘܠܐ ܫܡܥ ܡܠ̣ܟܐ ܡܢ ܥܡܐ ܡܛܠ ܕܗܘܬ ܡܓܪܝܢܘܬܐ ܡܢ ܩܕܡ ܡܪܝܐ ܡܛܠ ܕܢܩܝܡ ܡܪܝܐ ܦܬ̈ܓܡܘܗܝ ܕܡܠܠ ܒܐܝܕܐ ܕܥܒܕܗ ܐܚܝܐ ܢܒܝܐ ܫܝܠܘܢܝܐ ܥܠ ܝܘܪܒܥܡ ܒܪ ܢܒܛ

49. Kings 1 12:16

    ܘܚܙܐ ܟܠܗ ܐܝܣܪܝܠ ܕܠܐ ܫܡܥ ܠܗܘܢ ܡܠܟܐ ܘܐܬܝܒܘ ܥܡܐ ܦܬܓܡܐ ܠܡܠܟܐ ܘܐܡܪܘ ܠܗ ܠܐ ܦܠܓܘܬܐ ܐܝܬ ܠܢ ܥܡ ܕܘܝܕ ܐܦܠܐ ܝܪܬܘܬܐ ܥܡ ܒܪܗ ܕܐܝܫܝ. ܠܡܫ̈ܟܢܝܟ ܐܝܣܪܝܠ ܡܟܝܠ ܚܙܝ ܒܝܬܟ ܕܘܝܕ. ܘܐܙܠܘ ܒܢ̈ܝ ܐܝܣܪܝܠ ܟܠ ܐܢܫ ܠܩܪܝܬܗ

50. Kings 1 12:17

    ܘܒܢ̈ܝ ܐܝܣܪܝܠ ܝܬܒܝܢ ܒܩܘܪ̈ܝܗܘܢ ܘܝܗܘܕܐ ܐܡܠܟܘ ܥܠܝܗܘܢ ܠܪܚܒܥܡ ܒܪ ܫܠܡܘܢ

51. Kings 1 12:18

    ܘܫܕܪ ܡܠܟܐ ܪܚܒܥܡ ܠܘܬ ܟܠܗ ܐܝܣܪܝܠ ܠܐܕܘܢܝܪܡ ܕܥܠ ܡܕܐܬܐ ܘܪܓܡܘܗܝ ܟܠܗܘܢ ܕܒܝܬ ܐܝܣܪܝܠ ܒܟܐ̈ܦܐ ܘܡܝܬ ܘܡܠܟܐ ܪܚܒܥܡ . ܐܬܥܫܢ ܕܢܣܩ ܒܡܪ̈ܟܒܬܐ ܘܢܥܪܘܩ ܠܐܘܪܫܠܡ

52. Kings 1 12:19

    ܘܡܪܕܘ ܕܒܝܬ ܐܝܣܪܝܠ ܥܠ ܕܒܝܬ ܕܘܝܕ ܥܕܡܐ ܠܝܘܡܢܐ

53. Kings 1 12:20

    ܘܟܕ ܫܡܥܘ ܟܠܗ ܐܝܣܪܐܝܠ ܕܗܦܟ ܝܘܪܒܥܡ ܫܕܪܘ ܘܩܪܐܘܗܝ ܠܟܢܘܫܬܐ ܘܐܡܠܟܘܗܝ ܥܠ ܟܠܗ ܐܝܣܪܝܠ ܘܠܐ ܗܘܐ ܒܬܪ ܕܒܝܬ ܕܘܝܕ ܐܠܐ ܐܢ ܫܒܛܐ ܕܝܗܘܕܐ ܒܠܚܘܕܝܗܘܢ

54. Kings 1 12:21

    ܘܐܬܐ ܪܚܒܥܡ ܠܐܘܪܫܠܡ ܘܟܢܫܘ ܟܠܗܘܢ ܕܒܝܬ ܝܗܘܕܐ ܘܫܒܛܐ ܕܒܝܬ ܒܢܝܡܝܢ ܡܐܐ ܘܬܡܢܐܝܢ ܐ̈ܠܦܝܢ ܓܒܪ̈ܐ ܥܒ̈ܕܝ ܩܪܒܐ ܠܡܬܟܬܫܘ ܥܡ ܕܒܝܬ ܐܝܣܪܝܠ ܠܡܗܦܟܘ ܡܠܟܘܬܐ ܠܪܚܒܥܡ ܒܪ ܫܠܝܡܘܢ

55. Kings 1 12:22

    ܘܗܘܐ ܦܬܓܡܗ ܕܡܪܝܐ ܥܠ ܫܡܥܝܐ ܢܒܝܗ ܕܐܠܗܐ ܠܡܐܡܪ

56. Kings 1 12:23

    ܐܡܪ ܠܪܚܒܥܡ ܒܪ ܫܠܝܡܘܢ ܡܠܟܐ ܕܝܗܘܕܐ ܘܠܟܠܗ ܒܝܬ ܝܗܘܕܐ ܘܒܢܝܡܝܢ ܘܠܫܪܟܗ ܕܥܡܐ ܠܡܐܡܪ

57. Kings 1 12:24

    ܗܟܢܐ ܐܡܪ ܡܪܝܐ ܠܐ ܬܣܩܘܢ ܘܠܐ ܬܬܟܬܫܘܢ ܥܡ ܐ̈ܚܝܟܘܢ ܒܢ̈ܝ ܐܝܣܪܝܠ ܗܦܘܟܘ ܐܢܫ ܠܒܝܬܗ ܡܛܠ ܕܡܢ ܩܕܡܝ ܗܘܐ ܦܬܓܡܐ ܗܢܐ ܘܫܡܥܘ ܦܬܓܡܗ ܕܡܪܝܐ ܘܗܦܟܘ ܠܡܐܙܠ ܐܝܟ ܦܬܓܡܗ ܕܡܪܝܐ

58. Kings 1 12:25

    ܘܒܢܐ ܝܘܪܒܥܡ ܠܫܟܝܡ ܕܒܛܘܪܐ ܕܐܦܪܝܡ ܘܝܬܒ ܒܗ ܘܢܦܩ ܡܢ ܬܡܢ ܘܒܢܐ ܠܦܢܘܐܝܠ

59. Kings 1 12:26

    ܘܐܡܪ ܝܘܪܒܥܡ ܒܠܒܗ ܡܟܝܠ ܗܦܟܐ ܠܗ ܡܠܟܘܬܐ ܠܒܝܬ ܕܘܝܕ

60. Kings 1 12:27

    ܐܢ ܣܠܩ ܥܡܐ ܗܢܐ ܠܡܥܒܕ ܕܒܚܬܐ ܒܒܝܬܗ ܕܡܪܝܐ ܒܐܘܪܫܠܡ ܡܬܦܢܐ ܠܒܗ ܕܥܡܐ ܗܢܐ ܥܠ ܪܚܒܥܡ ܡܪܗܘܢ ܡܠܟܐ ܕܝܗܘܕܐ ܘܩܛܠܝܢ ܠܝ ܘܗܦܟܝܢ ܠܘܬ ܪܚܒܥܡ ܡܪܗܘܢ ܡܠܟܐ ܕܝܗܘܕܐ

61. Kings 1 12:28

    ܘܐܬܡܠܟ ܡܠܟܐ ܘܥܒܕ ܬܪ̈ܝܢ ܥ̈ܓܠܐ ܕܕܗܒܐ ܘܐܡܪ ܠܟܠܗ ܐܝܣܪܝܠ ܣܓܝ ܗܘ ܠܟܘܢ ܠܡܣܩ ܠܐܘܪܫܠܡ. ܘܐܡܪ ܗܐ ܐ̈ܠܗܝܟ ܐܝܣܪܝܠ ܕܐܣܩܘܟ ܡܢ ܐܪܥܐ ܕܡܨܪܝܢ

62. Kings 1 12:29

    ܘܣܡ ܚܕ ܒܒܝܬ ܐܝܠ ܘܚܕ ܣܡ ܒܕܢ

63. Kings 1 12:30

    ܘܗܘܐ ܦܬܓܡܐ ܗܢܐ ܠܚܛܗܐ ܘܐܙܠܘ ܥܡܐ ܩܕܡ ܚܕ ܥܕܡܐ ܠܕܢ

64. Kings 1 12:31

    ܘܥܒܕ ܒܝܬ ܥ̈ܠܘܬܐ ܘܥܒܕ ܟܘܡܪ̈ܐ ܡܢ ܥܡܐ. ܐܝܠܝܢ ܕܠܐ ܗܘܘ ܡܢ ܒܢ̈ܝ ܠܘܝ

65. Kings 1 12:32

    ܘܥܒܕ ܝܘܪܒܥܡ ܚܓܐ ܒܝܪܚܐ ܬܡܝܢܝܐ ܒܟܣܐܐ ܒܗ ܒܝܪܚܐ ܐܝܟ ܚܓܐ ܕܒܝܗܘܕܐ ܘܣܠܩ ܥܠ ܡܕܒܚܐ ܀ ܘܗܟܢܐ ܥܒܕ ܐܦ ܒܒܝܬ ܐܝܠ ܠܡܕܒܚܘ ܠܥ̈ܓܠܐ ܕܥܒܕ ܘܐܩܝܡ ܒܒܝܬ ܐܝܠ ܟܘܡܪ̈ܐ ܕܥ̈ܠܘܬܐ ܕܥܒܕ

66. Kings 1 12:33

    ܘܣܠܩ ܥܠ ܡܕܒܚܐ ܕܥܒܕ ܒܒܝܬ ܐܝܠ ܒܟܣܐܐ ܒܗ ܒܝܪܚܐ ܬܡܝܢܝܐ ܒܝܪܚܐ ܕܒܕܐ ܡܢ ܠܒܗ ܘܥܒܕ ܚܓܐ ܠܒܢ̈ܝ ܐܝܣܪܝܠ ܘܣܠܩ ܥܠ ܡܕܒܚܐ ܠܡܣܡ ܒܣ̈ܡܐ

67. Kings 1 13:1

    ܘܗܐ ܢܒܝܐ ܕܐܠܗܐ ܐܬܐ ܡܢ ܝܗܘܕܐ ܒܦܬܓܡܗ ܕܡܪܝܐ ܠܒܝܬ ܐܝܠ ܘܝܘܪܒܥܡ ܩܐܡ ܗܘܐ ܥܠ ܡܕܒܚܐ ܠܡܣܡ ܒܣ̈ܡܐ

68. Kings 1 13:2

    ܘܩܪܐ ܥܠ ܡܕܒܚܐ ܦܬܓܡܗ ܕܡܪܝܐ ܘܐܡܪ ܡܕܒܚܐ ܡܕܒܚܐ. ܫܡܥ ܦܬܓܡܗ ܕܡܪܝܐ ܗܟܢܐ ܐܡܪ ܡܪܝܐ ܗܐ ܒܪܐ ܡܬܝܠܕ ܠܕܒܝܬ ܕܘܝܕ ܝܘܫܝܐ ܫܡܗ ܘܢܕܒܚ ܥܠܝܟ ܟܘܡܪ̈ܐ ܕܥ̈ܠܘܬܐ ܕܣܝܡܝܢ ܥܠܝܟ ܒܣ̈ܡܐ ܘܓܪ̈ܡܐ ܕܐܢܫܐ ܢܘܩܕ ܥܠܝܟ

69. Kings 1 13:3

    ܘܝܗܒ ܒܝܘܡܐ ܗܘ ܐܬܐ ܘܐܡܪ ܗܕܐ ܐܬܐ ܕܡܪܝܐ ܫܕܪܢܝ ܗܐ ܡܕܒܚܐ ܡܨܛܪܐ ܘܡܬܐܫܕ ܩܛܡܐ ܕܥܠܘܗܝ

70. Kings 1 13:4

    ܘܟܕ ܫܡܥ ܡܠܟܐ ܡ̈ܠܘܗܝ ܕܢܒܝܗ ܕܐܠܗܐ ܕܩܪܐ ܥܠ ܡܕܒܚܐ ܕܒܒܝܬ ܐܝܠ ܐܘܫܛ ܡܠܟܐ ܐܝܕܗ ܡܢ ܡܕܒܚܐ ܘܐܡܪ ܐܘܚܕܘܗܝ ܘܝܒܫܬ ܐܝܕܗ ܕܐܘܫܛ ܥܠܘܗܝ ܘܠܐ ܐܫܟܚ ܕܢܗܦܟܝܗ̇ ܠܘܬܗ

71. Kings 1 13:5

    ܘܡܕܒܚܐ ܐܨܛܪܝ ܘܐܬܐܫܕ ܩܛܡܐ ܕܥܠܘܗܝ ܐܝܟ ܐܬܐ ܕܝܗܒ ܢܒܝܗ ܕܐܠܗܐ ܒܦܬܓܡܗ ܕܡܪܝܐ

72. Kings 1 13:6

    ܘܥܢܐ ܡܠܟܐ ܘܐܡܪ ܠܢܒܝܗ ܕܐܠܗܐ ܨܠܐ ܥܠܝ ܩܕܡ ܡܪܝܐ ܐܠܗܟ ܘܒܥܝ ܥܠܝ ܕܬܗܦܘܟ ܐܝܕܝ ܠܘܬܝ ܘܨܠܝ ܢܒܝܗ ܕܐܠܗܐ ܩܕܡ ܡܪܝܐ ܘܗܦܟܬ ܐܝܕܗ ܕܡܠܟܐ ܠܘܬܗ ܘܗܘܬ ܐܝܟ ܕܡܢ ܩܕܝܡ

73. Kings 1 13:7

    ܘܐܡܪ ܡܠܟܐ ܠܢܒܝܗ ܕܐܠܗܐ ܬܐ ܥܡܝ ܠܒܝܬܐ ܘܠܥܣ ܘܐܬܠ ܠܟ ܡܘܗ̈ܒܬܐ

74. Kings 1 13:8

    ܘܐܡܪ ܠܗ ܢܒܝܗ ܕܐܠܗܐ ܐܢ ܬܬܠ ܠܝ ܦܠܓܗ ܕܒܝܬܟ ܠܐ ܐܥܘܠ ܥܡܟ ܠܒܝܬܐ ܘܠܐ ܐܟܘܠ ܠܚܡܐ ܘܠܐ ܐܫܬܐ ܡ̈ܝܐ

75. Kings 1 13:9

    ܡܛܠ ܕܗܟܢܐ ܦܩܕܢܝ ܒܦܬܓܡܐ ܡܪܝܐ ܘܐܡܪ ܠܝ ܠܐ ܬܐܟܘܠ ܠܚܡܐ ܘܠܐ ܬܫܬܐ ܡ̈ܝܐ ܘܠܐ ܬܗܦܘܟ ܒܐܘܪܚܐ ܕܐܬܝܬ ܒܗ

76. Kings 1 13:10

    ܘܐܙܠ ܠܗ ܒܐܘܪܚܐ ܐܚܪܬܐ ܘܠܐ ܗܦܟ ܒܐܘܪܚܐ ܕܐܬܐ ܒܗ ܠܒܝܬ ܐܝܠ

77. Kings 1 13:11

    ܘܢܒܝܐ ܚܕ ܣܒܐ ܝܬܒ ܗܘܐ ܒܒܝܬ ܐܝܠ ܘܐܬܘ ܒܢ̈ܘܗܝ ܘܐܫܬܥܝܘ ܠܗ ܟܠ ܥܒ̈ܕܐ ܕܥܒܕ ܢܒܝܗ ܕܐܠܗܐ ܒܝܘܡܐ ܗܘ ܒܒܝܬ ܐܝܠ ܘܦܬܓܡܐ ܕܐܡܪ ܠܡܠܟܐ ܐܫܬܥܝܘ ܒܢ̈ܘܗܝ ܠܐܒܘܗܘܢ

78. Kings 1 13:12

    ܘܐܡܪ ܠܗܘܢ ܐܒܘܗܘܢ ܒܐܝܕܐ ܐܘܪܚܐ ܐܙܠ ܘܚܘܝܘܗܝ ܒܢ̈ܘܗܝ ܐܘܪܚܐ ܕܐܙܠ ܒܗ ܢܒܝܗ ܕܐܠܗܐ ܕܐܬܐ ܡܢ ܝܗܘܕܐ

79. Kings 1 13:13

    ܘܐܡܪ ܠܒ̈ܢܘܗܝ ܐܪܡܘ ܠܝ ܥܠ ܚܡܪܐ ܘܐܪܡܝܘ ܠܗ ܥܠ ܚܡܪܐ ܘܪܟܒ ܥܠܘܗܝ

80. Kings 1 13:14

    ܘܐܙܠ ܒܬܪ ܢܒܝܗ ܕܐܠܗܐ ܘܐܫܟܚܗ ܟܕ ܝܬܒ ܬܚܝܬ ܒܛܡܬܐ ܘܐܡܪ ܠܗ ܐܢܬ ܗܘ ܢܒܝܗ ܕܐܠܗܐ ܕܐܬܝܬ ܡܢ ܝܗܘܕܐ ܐܡܪ ܠܗ ܐܢܐ ܗܘ

81. Kings 1 13:15

    ܐܡܪ ܠܗ ܬܐ ܥܡܝ ܠܒܝܬܐ ܘܐܟܘܠ ܠܚܡܐ

82. Kings 1 13:16

    ܘܐܡܪ ܠܗ ܠܐ ܡܫܟܚ ܐܢܐ ܕܐܗܦܘܟ ܥܡܟ ܘܐܬܐ ܠܒܝܬܟ ܘܠܐ ܐܟܘܠ ܥܡܟ ܠܚܡܐ ܘܠܐ ܐܫܬܐ ܡ̈ܝܐ ܒܐܬܪܐ ܗܢܐ

83. Kings 1 13:17

    ܡܛܠ ܕܗܟܢܐ ܐܬܐܡܪ ܠܝ ܒܦܬܓܡܗ ܕܡܪܝܐ ܕܠܐ ܬܐܟܘܠ ܬܡܢ ܠܚܡܐ ܘܠܐ ܬܫܬܐ ܬܡܢ ܡ̈ܝܐ ܘܠܐ ܬܗܦܘܟ ܒܐܘܪܚܐ ܕܐܬܝܬ ܒܗ

84. Kings 1 13:18

    ܘܐܡܪ ܠܗ ܐܦ ܐܢܐ ܢܒܝܐ ܐܢܐ ܐܟܘܬܟ ܘܡܠܐܟܐ ܐܡܪ ܠܝ ܒܦܬܓܡܗ ܕܡܪܝܐ ܕܐܗܦܟܝܗܝ ܥܡܟ ܠܒܝܬܐ ܢܐܟܘܠ ܠܚܡܐ ܘܢܫܬܐ ܡ̈ܝܐ ܘܟܕܒ ܒܗ

85. Kings 1 13:19

    ܘܗܦܟ ܥܡܗ ܘܐܟܠ ܠܚܡܐ ܒܒܝܬܗ ܘܐܫܬܝ ܡ̈ܝܐ

86. Kings 1 13:20

    ܘܟܕ ܗܢܘܢ ܝܬܒܝܢ ܥܠ ܦܬܘܪܐ ܗܘܐ ܦܬܓܡܗ ܕܡܪܝܐ ܥܠ ܢܒܝܐ ܕܐܗܦܟܗ

87. Kings 1 13:21

    ܘܩܪܐ ܠܢܒܝܗ ܕܐܠܗܐ ܕܐܬܐ ܡܢ ܝܗܘܕܐ ܘܗܟܢܐ ܐܡܪ ܠܗ ܗܟܢܐ ܐܡܪ ܡܪܝܐ ܥܠ ܕܡܪܡܪܬ ܡܠܬ ܦܘܡܗ ܕܡܪܝܐ ܘܠܐ ܢܛܪܬ ܦܘܩܕܢܐ ܕܦܩܕܟ ܡܪܝܐ ܐܠܗܟ

88. Kings 1 13:22

    ܘܗܦܟܬ ܘܐܟܠܬ ܠܚܡܐ ܘܐܫܬܝܬ ܡ̈ܝܐ ܒܐܬܪܐ ܕܐܡܪܬ ܠܟ ܕܠܐ ܬܐܟܘܠ ܠܚܡܐ ܘܠܐ ܬܫܬܐ ܡ̈ܝܐ. ܡܛܠ ܗܢܐ ܠܐ ܬܥܘܠ ܫܠܕܟ ܠܩܒܪܐ ܕܐ̈ܒܗܝܟ

89. Kings 1 13:23

    ܘܡܢ ܒܬܪ ܕܐܟܠܘ ܠܚܡܐ ܘܡܢ ܒܬܪ ܕܐܫܬܝܘ ܡ̈ܝܐ ܐܪܡܝܘ ܠܗ ܥܠ ܚܡܪܐ ܠܢܒܝܗ ܕܐܠܗܐ

90. Kings 1 13:24

    ܘܗܦܟ ܘܐܙܠ ܘܐܫܟܚܗ ܐܪܝܐ ܒܐܘܪܚܐ ܘܩܛܠܗ ܘܗܘܬ ܫܠܕܗ ܪܡܝܐ ܒܐܘܪܚܐ ܘܚܡܪܐ ܩܐܡ ܥܠ ܓܒܗ ܘܐܪܝܐ ܩܐܡ ܥܠ ܓܒ ܫܠܕܐ

91. Kings 1 13:25

    ܘܗܐ ܐܢܫܐ ܥܒܪܝܢ ܘܚܙܘ ܫܠܕܐ ܟܕ ܪܡܝܐ ܒܐܘܪܚܐ ܘܚܡܪܐ ܩܐܡ ܥܠ ܓܒܗ ܘܐܪܝܐ ܩܐܡ ܥܠ ܓܒ ܫܠܕܐ ܘܐܬܘ ܘܐܡܪܘ ܒܩܪܝܬܐ ܕܢܒܝܐ ܣܒܐ ܝܬܒ ܒܗ

92. Kings 1 13:26

    ܘܫܡܥ ܢܒܝܐ ܕܐܗܦܟܗ ܡܢ ܐܘܪܚܐ ܘܐܡܪ ܢܒܝܗ ܗܘ ܕܐܠܗܐ ܥܠ ܕܫܚܠܦ ܡܠܬ ܦܘܡܗ ܕܡܪܝܐ ܝܗܒܗ ܡܪܝܐ ܠܐܪܝܐ ܘܬܒܪܗ ܘܩܛܠܗ ܐܝܟ ܦܬܓܡܗ ܕܡܪܝܐ ܕܐܡܪ ܠܗ

93. Kings 1 13:27

    ܘܐܡܪ ܠܒܢ̈ܘܗܝ ܐܪܡܘ ܠܝ ܥܠ ܚܡܪܐ ܘܐܪܡܝܘ ܠܗ

94. Kings 1 13:28

    ܘܐܙܠ ܘܐܫܟܚ ܫܠܕܐ ܟܕ ܪܡܝܐ ܒܐܘܪܚܐ ܘܚܡܪܐ ܘܐܪܝܐ ܩܝܡܝܢ ܥܠ ܓܒ ܫܠܕܐ ܠܐ ܐܟܠ ܐܪܝܐ ܠܫܠܕܐ ܘܠܐ ܬܒܪ ܠܚܡܪܐ

95. Kings 1 13:29

    ܘܫܩܠ ܢܒܝܐ ܠܫܠܕܐ ܕܢܒܝܗ ܕܐܠܗܐ ܘܣܡܗ ܥܠ ܚܡܪܐ ܘܐܝܬܝܗ ܠܩܪܝܬܐ ܕܗܘ ܗܘ ܢܒܝܐ ܣܒܐ ܝܬܒ ܒܗ ܠܡܪܩܕܘ ܥܠܘܗܝ ܘܠܡܩܒܪܗ

96. Kings 1 13:30

    ܘܣܡ ܫܠܕܗ ܒܩܒܪܐ ܘܐܪܩܕ ܥܠܘܗܝ ܘܐܡܪ ܘܝ ܐܚܝ ܘܝ ܐܚܝ

97. Kings 1 13:31

    ܘܡܢ ܒܬܪ ܕܩܒܪܘܗܝ ܐܡܪ ܠܒܢ̈ܘܗܝ ܡܐ ܕܡܝܬܬ ܩܘܒܪܘܢܝ ܒܩܒܪܐ ܕܢܒܝܗ ܕܐܠܗܐ ܩܒܝܪ ܒܗ ܘܥܠ ܓܒ ܓܪ̈ܡܘܗܝ ܣܝܡܘ ܓܪ̈ܡܝ

98. Kings 1 13:32

    ܡܛܠ ܕܡܗܘܐ ܢܗܘܐ ܦܬܓܡܐ ܕܩܪܐ ܒܦܬܓܡܗ ܕܡܪܝܐ ܥܠ ܡܕܒܚܐ ܕܒܝܬ ܐܝܠ ܘܥܠ ܟܠܗܘܢ ܒ̈ܬܐ ܕܥ̈ܠܘܬܐ ܕܒܟܪܟܐ ܕܫܡܪܝܢ

99. Kings 1 13:33

    ܘܒܬܪ ܦܬܓܡܐ ܗܢܐ ܠܐ ܗܦܟ ܝܘܪܒܥܡ ܡܢ ܐܘܪܚܗ ܒܝܫܬܐ ܘܗܦܟ ܬܘܒ ܘܥܒܕ ܡܢ ܥܡܐ ܟܘܡܪ̈ܐ ܕܥ̈ܠܘܬܐ ܡ̇ܢ ܕܨܒܐ ܕܢܗܘܐ ܟܘܡܪܐ ܩܪܒ ܩܘܪܒܢܐ ܘܗܘܐ ܟܘܡܪܐ ܠܥܠܬܐ

100. Kings 1 13:34

     ܘܗܘܐ ܦܬܓܡܐ ܗܢܐ ܠܚܛܗܐ ܠܒܝܬ ܝܘܪܒܥܡ ܠܡܥܩܪ ܘܠܡܘܒܕܘ ܡܢ ܐ̈ܦܝ ܐܪܥܐ

← Previous · Next → — showing 401–500 of 816

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.