← All works

Peshitta Judith

Peshitta (Syriac Old Testament) · 341 sections

1. Judith 1:0

   ܀ • ܟܬܒܐ ܕܝܗܘܕܝܬ ܀

2. Judith 1:1

   ܒܫܢܬ ܬܪܬܥܣܪܐ ܕܡܠܟܘܬܗ ܕܢܒܘܟܕܢܨ̇ܪ ܡܠܟܐ ܕܐܬܘܪ. ܕܐܡܠܟ ܒܢܝܢܘܐ ܡܕܝܢܬܐ ܪܒܬ̣ܐ̣. ܒܝܘܡ̈ܘܗܝ ܕܐܪܦܟܫܪ ܡ̇ܠܟܐ ܕܡܕܝ ܕܐܡܠܟ ܒܩܦܛܢ̣

3. Judith 1:2

   ܘܒܢܐ ܡܓܕܠܐ ܠܩܦܛܢ. ܘܐܚܕܪܗ ܫܘܪܐ ܒܟܐ̈ܦܐ ܦܣܝ̈ܠܬܐ. ܕܗ̇ܘܐ ܦܬܝܗ̇ ܕܟܐܦܐ̣. ܬܠܬ ܐ̈ܡܝܢ. ܘܐܘܪܟܗ̇ ܫܬ ܐܡ̈ܝܢ. ܘܗ̇ܘܐ ܪܘܡܗ ܕܫܘܪܐ̣ ܫܒ̈ܥܝܢ ܐܡ̈ܝܢ

4. Judith 1:3

   ܘܒܢ̣ܐ ܡܓܕ̈ܠܐ ܕܬܪܥܐ ܕܫܘܪܐ ܡܐܐ ܐܡ̈ܝܢ. ܘܦܬܝܗ̇ ܕܬܪܥܐ ܫܬܝܢ ܐܡ̈ܝܢ

5. Judith 1:4

   ܘܥ̣ܒܕ ܬܪ̈ܥܐ ܘܩܝ̈ܡܐ. ܪܘܡܗܘܢ̣ ܫܬܝܢ ܐܡ̈ܝܢ ܘܦܬܝܗܘܢ̣ ܐܪܒܥܝܢ ܐܡܝܢ. ܠܡܦܩܢܐ ܕܡܪ̈ܟܒܬܐ ܕܚܝܠܗ

6. Judith 1:5

   ܘܒܝܘܡ̈ܬܐ ܗ̇ܢܘܢ̣. ܥܒ̣ܕ ܩܪܒܐ ܡ̈ܠܟܐ ܢܒܘܟܕܢ̣ܨܪ ܥܡ ܐܪܦܟܫܪ ܡ̇ܠܟܐ ܒܦܩܥܬܐ. ܗ̣ܝ ܗܝ ܦܩܥܬ ܕܘܪܐ

7. Judith 1:6

   ܘܢܦܩܘ ܠܩܘܒܠܗ̣ ܟܠܗܘܢ ܥܡܪ̈ܝ ܛܘ̣ܪܐ ܘܟܘܠ ܕܥܡܪܝܢ ܥܠ ܢܗܪܐ ܦܪܬ̇ ܘܥܠ ܕܩܠܬ ܘܥܠ ܐܘܠܝ. ܒܦܩܥܬܐ ܕܐܪܝܘܟ ܡ̇ܠܟܐ ܕܥܝܠܡ. ܘܐܬܟܢܫܘ ܥ̈ܡܡܐ ܣܓܝ̈ܐܐ̇. ܠܡܩܪܒܘ ܥܡ ܟܠܕ̈ܝܐ

8. Judith 1:7

   ܘܫ̇ܕܪ ܢܒܘܟܕܢܨܪ ܡ̇ܠܟܐ ܕܐܬܘܪ ܥܡ ܟܠܗܘܢ ܥ̇ܡܘܪ̈ܐ ܕܠܒܢܐ̣. ܘܥܠ ܟܠ ܕܥܡ̇ܪܝܢ ܒܩܝܠܝܩܝܐ. ܘܒܕܪܡܣܘܩ ܘܒܠܒܢܢ ܘܒܚܕܪ̈ܘܗܝ. ܘܥܠ ܟܠ ܕܥ̇ܡܪܝܢ ܥܠ ܝܕ ܝܡܐ

9. Judith 1:8

   ܘܥܠ ܥ̇ܡܘܪ̈ܐ ܕܟܪܡܠܐ ܘܕܓܠܥܕ ܘܕܓܠܝܠܐ ܥܠܝܬܐ. ܘܒܦܩܥܬܐ ܪܒ̇ܬܐ ܕܐܝܙܪܥܐܝܠ

10. Judith 1:9

    ܘܥܠ ܟܘܠ ܕܒܫܡ̇ܪܝܢ ܘܒܡܕ̈ܝܢܬܐ ܘܠܕܒ̇ܥܒܪܐ ܕܝܘܪܕܢܢ ܥܕܡܐ ܠܐܘܪܫܠܡ. ܘܠܕܒܛܢܢ. ܘܕܟܠܘܢ ܘܕܩܕܫ. ܘܠܕܒܢܗܪܐ ܕܡܨܪ̈ܝܢ ܘܠܕܒܬܚܦܝܣ. ܘܠܕܪܥܡܣܝܣ. ܘܠܟܘܠܗ̇ ܓܫܢ ܥܕܡܐ ܠܨܥܢ̣

11. Judith 1:10

    ܘܠܡ̇ܦܣ. ܘܠܟܠ ܕܥ̇ܡܪܝܢ ܒܐܪܥܐ ܕܡܨܪܝܢ. ܥܕܡܐ ܠܬܚܘܡܐ ܕܟܘܫ

12. Judith 1:11

    ܘܐܗܦܟܘ ܦܬܓ̈ܡܐ ܕܢܒܘܟܕܢܨܪ ܡ̇ܠܟܐ. ܟܠܗܘܢ ܥܡܘܪ̈ܝܗ̇ ܕܐܪܥܐ. ܘܠܐ ܐܬܘ ܠܩܪܒܐ ܘܠܐ ܕܚ̣ܠܘ ܡܢܗ. ܡܛܠ ܕܗܘܘ ܟܠܗܘܢ ܐܝܟ ܓܒܪܐ ܚܕ. ܘܐܗܦܟܘ ܐܢܘܢ ܠܡܠܐܟ̈ܘܗܝ ܒܨ̇ܥܪܐ ܕܐܦܝ̈ܗܘܢ

13. Judith 1:12

    ܘܐܬܚ̣ܡܬ ܛܒ ܢܒܘܟܕܢܨܪ ܥܠ ܟܠܗ̇ ܐܪܥܐ ܗܕܐ. ܘܐܝܡܐ ܒܟܘܪܣܝܗ ܘܒܡܠܟܘܬܗ. ܕܢܬ̇ܒܥ ܡܢ ܟܠܗܘܢ ܬܚܘ̈ܡܐ ܕܩ̇ܝܠܝ̈ܩܝܐ ܘܕܕܪܡܣܘܩ ܘܕܒܝܫܢ. ܘܠܡܩܛܠܘ ܒܚܪܒܐ ܠܟܠܗܘܢ ܥ̇ܡܘܪ̈ܐ ܕܡܘܐܒ. ܘܠܒ̈ܢܝ ܥܡܗܘ̇ܢ ܘܠܟܠܗ̇ ܝܗܘܕ ܘܠܟܠ ܕܒܡܨܪܝܢ. ܘܠܡܐܬܐ ܥܕܡܐ ܠܬܚܘܡܐ ܕܬܪ̈ܝܗܘܢ ܝܡܡ̈ܐ

14. Judith 1:13

    ܘܥ̇ܬܕ ܚܝܠܗ ܠܘܩܒܠ ܐܪܦܟܫܪ ܡ̇ܠܟܐ. ܒܫܢܬ ܫܒܥܣܪܐ̣̇. ܘܐܬܥܫܢ ܒܩܪܒܐ. ܘܐܗܦܟ ܠܟܠܗ ܚܝܠܗ ܕܐܪܦܟܫܪ. ܘܠܟܠܗܘܢ ܦܪ̈ܫܘܗܝ̣ ܘܠܟܠܗܝܢ ܡܪ̈ܟܒܬܗ

15. Judith 1:14

    ܘܐܫܬܠܛ ܥܠ ܡܕܝܢ̈ܬܗ. ܘܡܛܝ ܥܕܡܐ ܠܩܦܛܢ. ܘܟ̣ܒܫ ܡܓܕ̈ܠܐ ܘܫ̣ܒܐ ܠܫܛܚܝ̈ܗܘܢ ܘܠܟܠܗ̇ ܝܐܝܘܬܗܘܢ̇ ܥ̣ܒܕܗ̇ ܠܚܣ̇ܕܐ

16. Judith 1:15

    ܘܐܚܕܗ̇ ܠܐܪܦܟܫܪ ܒܛܘܪ̈ܝ ܪܓܘ. ܘܩܛܠܗ ܒܪܘܡܗ. ܘܐܘܒܕܗ̣ ܥܕܡܐ ܠܝܘܡܢܐ

17. Judith 1:16

    ܘܗܦܟ ܠܢܝܢܘܐ ܗ̣ܘ ܘܚܝܠܗ. ܘܣܘܓܐܐ ܕܓܒܪ̈ܐ ܩܪ̈ܒ̇ܬܢܐ. ܘܗ̣ܘܐ ܡܬܓܐܐ ܬܡܢ ܘܡܬܒܣܡ. ܗ̣ܘ̣ ܘܟܠܗ ܚܝܠܗ. ܡܐܐ̣ ܘܥܣܪ̈ܝܢ ܝܘܡ̈ܝܢ

18. Judith 2:1

    ܘܒܫܢܬ ܥܣܪ̈ܝܢ ܘܬܡܢܐ. ܒܬܪܥܣܪܐ ܒܝܪܚܐ ܩܕܡܝܐ. ܗ̣ܘܐ ܦܬܓܡܐ ܒܒܝܬܗ ܕܢܒܘܟܕܢܨܪ ܡ̇ܠܟܐ̣. ܠܡܬܬܒܥܘ ܡܢ ܟܠܗ̇ ܐܪܥܐ ܐܝܟ ܕܐܡ̣ܪ

19. Judith 2:2

    ܘܩ̣ܪܐ ܠܟܠܗܘܢ ܥܒ̣̈ܕܘܗܝ ܘܪ̈ܘܪܒܢܘܗܝ̣. ܘܓܠܐ ܠܗܘܢ ܪܐܙܐ ܕܠܒܗ. ܘܗ̣ܘܐ ܕܟܕ ܫ̇ܠܡ ܠܡܐܡܪ ܒܝܫ̣ܬܐ ܥܠ ܟܠܗ̇ ܐܪܥܐ̣

20. Judith 2:3

    ܩܒܠܘ ܐܦ ܗ̣ܢܘܢ ܠܡܘܒܕܘ ܠܟܠܗܘܢ ܐܢܫܐ. ܐܝܠܝܢ ܕܠܐ ܐܫܬܡܥܘ. ܠܡܠܬ ܦܘܡܗ

21. Judith 2:4

    ܘܗ̣ܘܐ ܕܟܕ ܫ̇ܠܡ ܪܥܝܢܗܘܢ̇ ܩ̣ܪܐ ܢܒܘܟܕܢܨܪ ܡ̇ܠܟܐ ܕܐܬܘܪ ܠܐܠܦܪܢܐ ܪܒ ܚܝܠܗ̣. ܡܛܠ ܕܬܪܝܢܗ ܗܘܐ ܘܐܡ̣ܪ ܠܗ

22. Judith 2:5

    ܗܟܢܐ ܐܡ̇ܪ ܡ̇ܠܟܐ ܪܒܐ ܡܪܗ̇ ܕܟܠܗ̇ ܐܪܥܐ ܗܐ ܐܢܬ ܬܦܘܩ ܡܢ ܩܕܡܝ̣. ܘܬܕܒܪ ܥܡܟ ܓܒܪ̈ܐ ܕܥܫܝܢܝܢ ܪ̈ܓܠܝܐ ܡܐܐ ܘܥܣܪ̈ܝܢ ܐ̈ܠܦܝܢ. ܘܣܘܓܐܐ ܕܪ̈ܟܫܐ ܥܡ ܪ̈ܟܒܝܗܘܢ̣ ܬܪܥܣܪ ܐ̈ܠܦܝܢ

23. Judith 2:6

    ܘܣܩ ܥܠ ܐ̈ܦܝ ܟܠܗ̇ ܐܪܥܐ ܕܡܥܪܒܐ̇. ܐܝܠܝܢ ܕܛܠܡܘ ܦܬܓܡܐ ܕܦܘܡܝ

24. Judith 2:7

    ܘܬܐܡܪ ܠ̇ܗܘܢ ܕܢ̇ܛܝܒܘܢ ܠܝ ܐܪܥܐ̣ ܘܡ̈ܝܐ. ܡܛܠ ܕܢܦ̇ܩ ܐܢܐ ܥܠܝܗܘܢ ܒܚܡܬܝ. ܘܡܟܣܐ ܐܢܐ̣ ܐ̈ܦܝ ܟܠܗ̇ ܐܪܥܐ̇. ܒܪ̈ܓܠܝܐ ܕܚܝܠܝ. ܘܐܬܠ ܐܢܘܢ ܠܒܙܬܐ ܠܚܝܠܐ

25. Judith 2:8

    ܘܢܬܡܠܘܢ ܢܚ̈ܠܝܗܘܢ ܘܪ̈ܓܠܬܗܘܢ ܡܢ ܩܛܝܠܝܗܘܢ ܘܢܗܪܐ ܢ̇ܓܕܦ ܡܢ ܩܛܝܠܝ̈ܗܘܢ̣. ܘܢܬܡܠܐ

26. Judith 2:9

    ܘܐܕܒܪ ܫܒܝܬܗܘܢ ܒ̇ܣ̈ܘܦܝܗ̇ ܕܐܪܥܐ

27. Judith 2:10

    ܘܐܢܬ ܦܘܩ ܘܐܚܘܕ ܠܝ ܟܘܠܗܘܢ ܬܚܘܡܝܗܘܢ̣. ܘܐܢ ܢܫܠܡܘܢ̇ ܛܪ ܐܢܘܢ ܠܝ ܥܕܡܐ ܠܝܘܡܐ̇ ܕܡܟܣܢܘܬܗܘܢ

28. Judith 2:11

    ܘܥܠ ܐܝܠܝܢ ܕܠܐ ܡܬܛܦܝܣܝܢ̣. ܠܐ ܬܚܘܣ ܥܝܢܟ ܠܡܬܠ ܐܢܘܢ̇ ܠܩܛܠܐ ܘܠܒܙܬܐ ܠܟܠܗ̇ ܐܪܥܐ

29. Judith 2:12

    ܡܛܠ ܕܚܝ ܐܢܐ ܘܡܠܟܘܬܝ ܕܡ̇ܠܠܬ. ܘܐܥܒܕ ܗܠܝܢ ܟܠܗܝܢ ܒܐܝ̈ܕܝ

30. Judith 2:13

    ܘܐܢܬ̣ ܠܐ ܬܥܒܪ ܥܠ ܚܕ ܡܢ ܦܘܩܕ̈ܢܐ ܕܡܪܟ. ܐܠܐ ܡܫܡܠܝܘ ܬܫܡܠܐ̣. ܐܝܟܢܐ ܕܦܩܕܬܟ ܠܡܥܒܕ ܗܠܝܢ.

31. Judith 2:14

    ܘܢܦ̣ܩ ܐܠܦܪܢܐ ܡܢ ܩܕܡ ܡܪܗ̣. ܘܩ̣ܪܐ ܠܡܪ̈ܘܬܐ ܘܠܪ̈ܒܝ ܚܝ̈ܠܐ ܘܠܩܝܘ̈ܡܐ ܕܚ̈ܝܠܐ ܕܐܬܘܪ̣

32. Judith 2:15

    ܘܡܢܐ ܓܒܪ̈ܐ ܓܒ̈ܝܐ ܠܩܪܒܐ ܐܝܟ ܕܦܩܕܗ ܡܪܗ̣. ܡܐܐ ܘܥܣܪ̈ܝܢ ܐ̈ܠܦܝܢ. ܘܦܪ̈ܫܐ̇ ܫܕ̈ܝܝ ܒܩܫ̈ܬܬܐ̣. ܬܪܥܣܪ ܐ̈ܠܦܝܢ

33. Judith 2:16

    ܘܦ̣ܩܕ ܠܗܘܢ ܠܡܬܘܥܕܘ ܠܩܪܒܐ

34. Judith 2:17

    ܘܕܒܪ ܓܡ̈ܠܐ ܘܚ̇ܡܪܐ ܕܢܫܩ̇ܠܘܢ ܬܪܣܝܗܘܢ ܣܘܓܐܐ̣ ܕܛܒ̇ ܘܥܪ̈ܒܐ̇ ܘܬܘܪ̈ܐ̇ ܘܥܢܐ ܠܡܐܟܘܠܬܗܘܢ ܕܠܐ ܡܢܝܢ

35. Judith 2:18

    ܘܕܗܒܐ ܘܟܣܦܐ ܡܢ ܒܝܬܗ ܕܡ̇ܠܟܐ ܣܘܓܐܐ̣ ܕܛܒ

36. Judith 2:19

    ܘܢܦ̣ܩ ܡܢ ܢܝܢܘܐ ܗܘ ܘܚܝܠܗ ܠܡܪܕܝܐ ܩܕܡ ܡ̇ܠܟܐ. ܘܢܟܣܐ ܐܦܝ̈ܗ̇ ܕܟܘܠܗ̇ ܐܪܥܐ ܕܡܥܪܒܐ. ܒܡܪ̈ܟܒ̇ܬܐ ܘܒܪܓܠܝܐ ܓ̇ܒܝܐ

37. Judith 2:20

    ܘܢ̣ܦܩ ܥܡܗܘܢ ܚ̇ܠܘܛܐ̣ ܣܘܓܐܐ. ܐܝܟ ܩܡܨܐ ܘܐܝܟ ܚܠܐ ܕܐܪܥܐ ܘܠܝܬ ܗܘܐ ܡ̈ܢܝܢ ܠܣܟܗܘܢ

38. Judith 2:21

    ܘܢܦ̣ܩ ܡܢ ܢܝܢܘܐ ܡܪܕܐ ܬܠܬܐ ܝܘܡ̈ܝܢ. ܠܘܩܒܠ ܦܩܥܬܐ ܕܒܝܬ ܩܛܝܠܬ. ܘܫܪܘ̣ ܠܘܩܒܠ ܒܝܬ ܩܛܝܠܬ. ܥܠ ܓܢܒ ܛܘ̣ܪܐ ܕܐ̈ܓܢܐ̇. ܕܡܢ ܣܡܠܐ ܕܩܝܠܝܩܝܐ ܥܠܝܬܐ

39. Judith 2:22

    ܘܕܒ̣ܪ ܠܟܠܗ ܚܝܠܗ ܪ̈ܓܠܝܐ ܘܦܪ̈ܫܐ ܘܡܪ̈ܟܒܬܐ. ܘܫܩܠ ܡܢ ܬܡܢ ܠܛܘ̣ܪܐ

40. Judith 2:23

    ܘܚܪܒ ܠܦܘ̈ܛܝܐ̣ ܘܠܠܘܕ̈ܝܐ. ܘܫܒܘ ܠܟܠܗܘܢ ܒ̈ܢܝ ܬܝܪܣ. ܘܠܒ̈ܢܝ ܪܥܡܣܝܣ. ܘܠܒ̈ܢܝ ܐܝܫܡܥܐܝܠ ܕܥ̇ܡ̇ܪܝܢ ܒܡܕܒܪܐ ܕܡܢ ܬܝܡܢܐ

41. Judith 2:24

    ܘܟܠܘܢ ܐܪܥܐ ܕܟ̈ܠܕ̣ܝܐ ܘܥܒܪ ܦܪܬ. ܘܥܒܪܗ ܠܒܝܬ ܢܗܪ̈ܘܬܐ ܕܡܢ ܬܝܡܢܐ ܘܥ̣ܩܪ ܠܟܠܗܝܢ ܡܕܝ̈ܢܬܐ ܥܫܝ̈ܢܬܐ ܕܥܠ ܓܢܒ ܢܚܠܐ ܕܝܒ̇ܩ. ܘܥܕܡܐ ܕܐܬܘ ܠܝܡܐ

42. Judith 2:25

    ܘܐܚܕܘ ܬܚܘܡܐ ܕܩܝܠܝܩܝܐ. ܘܚܪܒ ܠܟܠ ܕܩܐ̇ܡ ܠܩܘܒܠܗ. ܘܐ̣ܬܐ ܠܬܚܘܡܐ ܕܝܦܬ ܕܒܬܝܡܢܐ̇. ܥܠ ܐ̈ܦܝ ܟܠܗ̇ ܥ̇ܪܒ

43. Judith 2:26

    ܘܐܬܟܪܟܘ ܠܟܠܗܘܢ ܒ̈ܢܝ ܡܕܝܢ. ܘܐܘܩܕܘ ܠܟܠܗܘܢ ܡܫܟ̈ܢܝܗܘܢ̇ ܘܫܒ̇ܘ ܛܝܪ̈ܝܗܘܢ̇

44. Judith 2:27

    ܘܢܚܬܘ ܠܚܩ̈ܠܬܐ ܕܕܪܡܣܘܩ. ܒܝܘ̈ܡܝ ܚܨܕܐ ܕܚ̈ܛܐ. ܘܐܘܩܕܘ ܠܟܠ ܚܩ̈ܠܬܗܘܢ̇ ܘܕܪܘ ܦܩܥܬܗܘܢ ܘܡܪܒܥܐ ܕܥܢܗܘܢ. ܘܒܩܪ̈ܝܗܘܢ. ܘܓܙܪ̈ܝܗܘܢ ܥܒܕܘ ܠܚܒ̇ܠܐ. ܘܒ̇ܙܘ ܡܕܝ̈ܢܬܗܘܢ. ܘܩܛܠܘ ܥܠܝܡ̈ܝܗܘܢ ܒܦܘܡܐ ܕܚܪܒܐ

45. Judith 2:28

    ܘܢܦ̣ܠܬ ܕܚܠܬܐ ܘܪܬܝܬܐ̣. ܥܠ ܟܠ ܕܥ̇ܡܪܝܢ ܥܠ ܓܢܒ ܝܡܐ. ܘܒܨܘܪ ܘܒܨܝܕܢ. ܘܥܠ ܥ̇ܡܘܪ̈ܝܗ ܕܣܘܪܝ. ܘܥܠ ܟܠ ܕܥܡܪܝܢ ܒܠܒܢܐ. ܘܥܠ ܥ̇ܡܘܪ̈ܝܗ̇ ܕܐܫܕܘܕ ܘܕܐܫܩܠܘܢ ܘܕܥܙܐ. ܘܕܚ̣ܠܘ ܡܢܗ ܛܒ

46. Judith 3:1

    ܘܫܕܪܘ ܠܘܬܗ̣ ܐܝܙܓܕ̈ܐ ܒܡ̈ܠܐ ܕܫܠܡܐ ܘܐܡ̣ܪܘ

47. Judith 3:2

    ܐܡ̇ܪܝܢ ܚܢܢ ܥܒ̈ܕܐ ܚܢ̣ܢ ܕܢܒܘܟܕܢܨܪ ܡ̇ܠܟܐ ܪܒܐ. ܗܐ ܩ̇ܝܡܝܢ ܚܢܢ ܩܕܡܝܟ. ܥܒ̣ܕ ܠܢ ܐܝܟ ܕܫܦܝܪ ܒܥܝ̈ܢܝܟ

48. Judith 3:3

    ܗܐ̣ ܟܠܗ̇ ܐܪܥܐ ܕܒܝܬ ܡܥܡܪܢ. ܘܟܘܠ ܚܩ̈ܠܬܢ ܘܦܩܥ̈ܬܐ ܕܥܒܘܪܢ. ܘܥܢܢ̇ ܘܬܘܪ̈ܝܢ. ܘܟܠ ܒܝܬ ܡܥܡܪܐ ܕܒܥ̇ܝܪܢ ܩܕܡܝܟ. ܥ̣ܒܕ ܠ̣ܢ ܐܝܟ ܕܫ̇ܦܝܪ ܠܟ

49. Judith 3:4

    ܘܗܐ ܡܕܝܢܬܢ ܘܥܡܘܪ̈ܝܗܝܢ ܥܒ̣̈ܕܝܟ ܐܢܘܢ. ܬܐ ܘܦܓ̣ܥ ܒ̣ܢ ܐܝܟ ܕܛܒ ܒܥ̈ܝܢܝܟ

50. Judith 3:5

    ܘܐܬܘ̇ ܐܝܙ̈ܓܕܐ̣ ܘܐܡܪܘ ܠܐܠܦܪܢܐ ܐܝܟ ܦܬܓ̈ܡܐ ܗܠܝܢ

51. Judith 3:6

    ܘܢܚ̣ܬ ܠܘܬ ܡܕܝ̈ܢܬܐ ܕܥܠ ܓܢܒ ܝܡܐ ܗ̣ܘ̣ ܘܚܝܠܗ. ܘܐܩܝܡ ܡܛܪ̈ܬܐ ܒܡܕܝܢ̈ܬܐ ܥܫ̈ܝܢܬܐ. ܘܕܒܪ ܡܢܗ̇ܝܢ ܥܕܪ̈ܐ ܓܒܪ̈ܐ ܓܒ̈ܝܐ

52. Judith 3:7

    ܘܩܒܠܝܗܝ ܡܕܝܢ̈ܬܐ ܘܩܘܪ̈ܝܐ. ܒܟܠܝܠܐ ܘܒ̈ܦܠܓܐ̣ ܘܒܪ̈ܒܝܥܐ

53. Judith 3:8

    ܘܥܩܪ ܟܘܠ ܗܝ̈ܟܠܝܗܘܢ. ܘܟܠܗܝܢ ܕܚ̈ܠܬܗܘܢ ܦܣ̇ܩܘ. ܡܛܠ ܕܝܗ̣ܒ ܗܘܐ ܒܐܪܙ ܠܡܘܒܕܘ ܠܟܠܗܘܢ ܐ̈ܠܗܐ ܕܐܪܥܐ. ܐܝܟ ܕܠܗ ܠܢܒܘܟܕܢܨܪ ܢܦܠܚܘܢ ܘܢܣܓܕܘܢ. ܟܠܗܘܢ ܥܡ̈ܡܐ ܘܠܫ̈ܢܐ. ܘܢܩܪܘܢܗ ܐܠܗ

54. Judith 3:9

    ܘܐܬ̣ܐ ܠܐܝܙܪܥܝܠ ܕܥܠ ܓܢܒ ܕܬܢ̇. ܠܘܩܒܠ ܡܣܪܐ ܪܒܐ ܕܝܗܘܕ

55. Judith 3:10

    ܘܫ̣ܪܐ ܒܝܬ ܓܒܥ ܠܒܝܫܢ. ܘܥܒܕ ܬܡܢ ܝܪܚ̣ ܝܘܡ̈ܝܢ. ܠܡܬܩܢܘ ܟܠܗܝܢ ܥܒܝ̈ܕܬܐ ܕܚܝܠܗ

56. Judith 4:1

    ܘܫܡ̣ܥܘ ܒܢ̈ܝ ܐܝܣܪܐܝܠ ܕܥ̇ܡܪܝܢ ܒܝܗܘܕ. ܟܠ ܕܥܒ̣ܕ ܐܠܦܪܢܐ ܪܒ ܚܝܠܐ ܕܢܒܘ ܟܕܢܨܪ ܡ̇ܠܟܐ. ܕܐܬܘܪ ܒܥ̈ܡܡܐ. ܘܢܣܒ̣ܘ ܐܠܗ̈ܝܗܘܢ ܘܝ̣ܗܒܘ ܐܢܘܢ ܠܚ̇ܒܠܐ

57. Judith 4:2

    ܘܕܚ̣ܠܘ ܛܒ ܡܢ ܩܕܡܘܗܝ. ܥܠ ܐܘܪܫܠܡ ܘܥܠ ܗܝܟܠܐ ܕܡܪܝܐ ܐܠܗܗܘܢ. ܘܐܬܕ̇ܠܚܘ

58. Judith 4:3

    ܡܛܠ ܕܗܟܝܠ ܗܘ ܣܠ̣ܩܘ ܗܘܘ ܡܢ ܫܒܝܬܐ. ܘܕܫܪܘܝܬܝܢ ܗܘ ܐܬܟܢܫܘ ܗܘܐ ܥܡܐ ܕܝܗܘ̈ܕܝܐ. ܘܡ̈ܐܢܐ ܘܡܕܒܚܐ̣. ܗܟܝܠ ܗܘ ܐܬܩܕܫܘ ܗܘܘ ܡܢ ܛܡܐܘܬܐ

59. Judith 4:4

    ܘܫܕܪܘ ܠܬܚܘܡܐ ܕܫܡ̇ܪܝܢ ܘܠܩܘܪܝܐ ܕܒܝܬ ܚܘܪܢ ܘܠܐܒܠ ܡܚܘܠܐ. ܘܠܐܝܪܝܚܘ ܘܠܟܟܪ ܘܠܒܝܬ ܚܘܪܢ ܘܠܐܘܠܘܢܐ̇ ܕܓܠܝܡ

60. Judith 4:5

    ܘܐܚܕܘ ܟܠ ܪ̈ܝܫܝ ܛܘܪ̈ܐ ܪ̈ܡ̇ܐ. ܘܐܥܫܢܘ ܩܘܪ̈ܝܐ ܕܒܗܘܢ̇ ܘܐܣܩܘ ܐ̈ܢܝܢ ܐܝܟ ܕܠܩܪܒܐ. ܡܛܠ ܗܟܝܠ ܗܘ ܐܬܚܨܕ ܗ̈ܘܝ ܐܪ̈ܥܬܗܘܢ

61. Judith 4:6

    ܘܟ̣ܬܒ ܐܠܝܩܝܡ ܟܗܢܐ ܪܒܐ ܒܝܘ̈ܡܬܐ. ܗ̇ܢܘܢ ܒܐܘܪܫܠܡ. ܠܥܡܘܪ̈ܐ ܕܒܝܬ ܦܠܘ. ܘܠܒܝܬ ܡܣܬܝܡ. ܕܠܥܠ ܡܢ ܡܣܪܐ ܕܠܘܩܒܠ ܐܝܙܪܥܝܠ ܘܠܘܩܒܠ ܦܩܥܬܐ ܪܒܬܐ̇. ܕܥܠ ܓܢܒ ܕܘܬܢ

62. Judith 4:7

    ܠܡܐܡܪ. ܐܚܘܕܘ ܡܣܩܢܐ ܕܛܘ̣ܪܐ. ܕܡܢ ܬܡܢ ܗܘ ܡܥܠܢܐ ܠܝܗܘܕ. ܡܛܠ ܕܠܐ ܦܫܝܩ ܗܘܐ ܠܐܝܠܝܢ ܕܣ̇ܠܩܝܢ. ܡܛܠ ܕܩܛܝܢܐ ܗܘܬ ܡܣܩܬܐ̇. ܐܦ ܠܬܪ̈ܝܢ ܓܒܪ̈ܝܢ ܐܟܚܕܐ

63. Judith 4:8

    ܘܥܒ̣ܕܘ ܒ̈ܢܝ ܐܝܣܪܝܠ ܐܝܟ ܕܐܡ̣ܪ ܐܠܝܩܝܡ ܟܗܢܐ ܪܒܐ̇. ܘܣܒ̈ܐ ܕܟܘܠܗ ܥܡܐ ܕܐܝܣܪܝܠ ܕܝܬ̇ܒܝܢ ܒܐܘܪܫܠܡ

64. Judith 4:9

    ܘܓܥܘ ܟܠܗ ܐܝܣܪܐܝܠ ܠܘܬ ܡܪܝܐ ܒܟܠܗ ܠܒܗܘܢ. ܘܡܟܟܘ ܢܦܫܗܘܢ ܒܨܘܡܐ ܪܒܐ

65. Judith 4:10

    ܗܢܘܢ ܘܢܫ̈ܝܗܘܢ ܘܝܠܘܕ̈ܝܗܘܢ ܘܟܠ ܥ̇ܡܘܪܐ ܘܐܓܝܪܐ. ܘܙܒܝܢ ܟܣܦܐ. ܘܡܚܘ ܣܩ̈ܐ ܒܚܨ̈ܝܗܘܢ

66. Judith 4:11

    ܘܟܠ ܓܒܪܐ ܡܢ ܐܝܣܪܝܠ ܘܐܢܬ̣ܬܐ ܘܛܠܝܐ ܐܝܠܝܢ ܕܥ̇ܡܪܝ̣ܢ ܒܐܘܪܫܠܡ̣. ܢܦ̣ܠܘ ܥܠ ܐܦܝ̈ܗܘܢ ܩܕܡ ܗܝܟܠܗ ܕܡܪܝܐ. ܘܚܙܩܘ ܣܩ̈ܐ ܥܠ ܡܕܒܚܐ

67. Judith 4:12

    ܘܓܥܘ ܠܘܬ ܐܠܗܐ ܕܐܝܣܪܝܠ ܐܟܚܕܐ. ܕܠܐ ܢܬܠ ܝܠܕܝ̈ܗܘܢ ܠܒܙܬܐ. ܘܢܫܝ̈ܗܘܢ ܠܫܒ̈ܝܐ. ܘܡܕܝ̈ܢܬܗܘܢ ܠܚܒܠܐ ܘܩܘܕܫܐ ܠܛܡܐܘܬܐ ܘܠܚܣܕܐ̣. ܘܠܚܕܘܬܐ ܠܥܡܡ̈ܐ

68. Judith 4:13

    ܘܫܡ̣ܥ ܡܪܝܐ̣ ܘܚ̣ܙܐ ܐܘܠܨ̈ܢܝܗܘܢ. ܘܗܘܘ ܥܡܐ ܨܝ̇ܡܝܢ ܝܘܡ̈ܬܐ ܣܓܝܐ̈ܐ. ܒܟܠܗ̇ ܐܝܗܘܕ ܘܒܐܘܪܫܠܡ. ܘܢܦ̣ܠܘ ܩܕܡ ܒܝܬ ܩܘܕܫܐ ܕܡܪܝܐ ܚܝܠܬܢܐ

69. Judith 4:14

    ܘܐܠܝܩܝܡ ܟܗܢܐ ܪܒܐ. ܘܟܠ ܐܝܠܝܢ ܕܩ̇ܝܡܝܢ ܩܕܡ ܡܪܝܐ̣. ܟܗܢ̈ܐ ܘܡܫܡ̈ܫܢܐ̣. ܟܕ ܐܣܝܪܝܢ ܣܩ̈ܐ ܒܚܨ̈ܝܗܘܢ̇. ܘܡܩܪܒܝܢ ܗܘܘ ܝܩ̈ܕܐ ܫܠܡ̈ܐ ܐܡ̈ܝܢܐ. ܘܢܕܪ̈ܐ ܘܦܘܪ̈ܫܢܐ̣ ܘܩܘܪ̈ܒܢܐ ܕܥܡܐ

70. Judith 4:15

    ܘܩܛܡܐ̣ ܐܪܡܐ ܥܠ ܟܠܘ̈ܝܗܘܢ. ܘܓܥܝܢ ܗܘܘ ܠܘܬ ܡܪܝܐ̣ ܡܢ ܟܠܗ ܚܝܠܗܘܢ̇ ܕܢܣܥܘܪ ܠܟܠܗ ܒܝܬ ܐܝܣܪܝܠ ܠܛܒ

71. Judith 5:1

    ܘܐܬܐܡܪ ܠܐܠܦܪܢܐ ܪܒ ܚܝܠܐ ܕܐܬܘܪ. ܕܐܬܘܥܕܘ ܒ̈ܢܝ ܐܝܣܪܝܠ ܠܩܪܒܐ. ܘܡܥܠܢܐ ܕܛܘ̣ܪܐ ܐܚܕܘ. ܘ̇ܥ̣ܫܢܘ̇ ܟܠ ܪܝܫܝ ܛܘܪ̈ܐ ܪ̈ܡܐ. ܘܝܗ̣ܒܘ ܟܡܐ̈ܢܐ ܒܚܩ̈ܠܬܐ̇

72. Judith 5:2

    ܘܐܬܚܡܬ ܪܘܓܙܗ ܕܐܠܦܪܢܐ̣ ܛܒ. ܘܩܪܐ̣ ܠܟܠܗܘܢ ܪ̈ܘܪܒܢܐ ܕܡܘܐܒ̣. ܘܠܫ̈ܠܝܛܢܐ ܕܒ̈ܢܝ ܥܡܘܢ. ܘܠܟܠܗܘܢ ܪ̈ܝܫܝ ܡܕܝ̈ܢܬܐ ܕܥܠ ܝܕ ܝܡܐ

73. Judith 5:3

    ܘܐܡ̣ܪ ܠܗܘܢ. ܐܡܪܘ ܠܝ ܒ̈ܢܝ ܟܢܥ̣ܢ. ܡ̇ܢܘ ܥܡܐ ܗܢܐ̇ ܕܝܬ̇ܒܝܢ ܒܛܘ̣ܪܐ. ܘܡܢܐ ܐܢ̈ܝܢ ܡܕܝ̈ܢܬܐ ܘܣܘܓܐܬ ܚܝܠܗܘܢ. ܘܡܢܐ ܚܝܠܗܘܢ ܘܥܘܫܢܗܘܢ. ܘܡܢ̣ܘ ܪܒܐ ܕܩܐ̇ܡ ܥܠܝܗܘܢ

74. Judith 5:4

    ܘܠܡܢܐ ܠܐ ܨܒܘ ܠܡܐܬܐ ܠܐܘܪܥܝ̇. ܝܬܝܪ ܡܢ ܟܘܠ ܐܝܠܝܢ ܕܥܡ̇ܪܝܢ ܒܡܥܪ̈ܐ

75. Judith 5:5

    ܘܐܡ̣ܪ ܠܗ ܐܚܝܘܕ ܪܒܐ ܕܒ̈ܢܝ ܥܡܗܘܢ. ܢ̇ܫܡܥ ܡܪܝ ܡܠܬ ܦܘܡܐ ܕܥܒ̣ܕܗ. ܘܐ̇ܡܪ ܠܟ ܫܪܝܪܐܝܬ ܥܠ ܥܡܐ ܕܥܡ̇ܪ ܥܠ ܓܒܟ ܒܛܘ̣ܪܐ ܗܢܐ. ܘܠܐ ܘܠܐ ܬܦܘܩ ܡܠܬܐ ܕܓܠܬܐ ܡܢ ܦܘܡܗ ܕܥ̣ܒܕܟ

76. Judith 5:6

    ܡܛܠ ܕܥܡܐ ܗܢܐ̣ ܡܢ ܛܘܗܡܐ ܗܘ ܕܟ̈ܠܕܝܐ

77. Judith 5:7

    ܘܝܬܒ ܠܘܩܕܡ ܒܝܬ ܢܗܪ̈ܘܬܐ. ܡܛܠ ܕܠܐ ܨܒܘ ܠܡܐܙܠ ܒܬܪ ܐܠܗ̈ܐ ܕܐܒܗ̈ܝܗܘܢ̇. ܕܗܘܘ ܡܝܩܪܝܢ ܒܐܪܥܐ ܕܟ̈ܠܕܝܐ

78. Judith 5:8

    ܐ̇ܠܐ ܣܛܘ ܡܢ ܐܠܗ̈ܐ ܕܐܒܗ̈ܝܗܘܢ̇. ܘܣܓܕܘ ܠܐܠܗܐ ܕܫܡܝܐ. ܠܐܠܗܐ ܕܝܕܥܘܗܝ. ܘܐܦܩ ܐܢܘܢ ܡܢ ܩܕܡ ܐܠܗܝ̈ܗܘܢ̇. ܘܥܪܩܘ ܠܒܝܬ ܢܗܪ̈ܘܬܐ. ܘܥܡ̣ܪܘ ܬܡܢ ܝܘܡ̈ܬܐ ܣܓܝܐ̈ܐ

79. Judith 5:9

    ܘܐܡ̣ܪ ܠܗܘܢ ܐܠܗܗܘܢ. ܕܢܦܩܘܢ ܡܢ ܒܝܬ ܝܪ̈ܬܘܬܗܘܢ̇. ܠܡܐܙܠ ܠܐܪܥܐ ܕܟܢܥܢ. ܘܥܡ̣ܪܘ ܬܡܢ ܘܥܬ̣ܪܘ ܒܕܗܒܐ. ܘܒܟܣܦܐ. ܘܒܒܥܝܪ̈ܐ ܣܘܓܐ̈ܐ ܕܛܒ

80. Judith 5:10

    ܘܢܚ̣ܬܘ ܠܡܨܪܝܢ ܡܛܠ ܟܦܢܐ ܕܗ̣ܘܐ ܒܐܪܥܐ ܕܟܢܥܢ. ܘܝܬܒܘ ܬܡ̣ܢ ܘܐܬܬܪܣܝܘ. ܘܣܓܝܘ ܬܡܢ ܛܒ. ܘܠܝܬ ܗܘ̣ܐ ܡ̈ܢܝܢ ܠܫܪ̈ܒܬܗܘܢ̇

81. Judith 5:11

    ܘܩ̇ܡܘ ܥܠܝܗܘܢ ܡܨܪ̈ܝܐ̣. ܘܐܬܚܟܡܘ ܠܗܘܢ. ܘܫ̣ܥܒܕܘ ܐܢܘܢ ܒܛܝܢܐ ܘܒܠܒ̈ܢܐ. ܘܡܟܟܘܗܝ ܠܥܡ̈ܐ̣. ܘܥ̣ܒܕܘ ܐܢܘܢ ܥܒ̣ܕܐ

82. Judith 5:12

    ܘܓܥܘ ܠܘܬ ܐܠܗܗܘܢ. ܘܡ̣ܚܐ ܠܟܘܠܗ̇ ܐܪܥܐ ܕܡܨܪܝ̣ܢ. ܒ̇ܚܘܘ̈ܬܐ ܕܠܝܬ ܠܗܝܢ ܐܣܝܘ. ܘܐܦܩܘ ܐܢܘܢ ܡܨܪ̈ܝܐ ܡܢ ܐܪܥܗܘܢ̇

83. Judith 5:13

    ܘܐܘܒܫ ܐܠܗܐ ܝܡܐ ܕܣܘܦ ܡܢ ܩܕܡܝܗܘܢ

84. Judith 5:14

    ܘܐܝܬܝ ܐܢܘܢ ܠܐܘܪܚܐ ܕܛܘ̣ܪ ܣܝܢܝ̣. ܘܠܩܕܫ. ܘܐܦܩܘ ܠܟܠܗܘܢ ܥܡܘܪ̈ܐ ܕܡܕܒܪܐ̣

85. Judith 5:15

    ܘܠܟܠ ܕܥܡ̇ܪܝܢ ܒܐܪܥܐ ܕܐܡܘܪ̈ܝܐ. ܘܠܒ̈ܢܝ ܚܫܒܘܢ ܐܘܒܕܘ ܒܥܘܫܢܗܘܢ̣̇ ܘܥܒ̣ܪܘ ܝܘܪܕܢܢ. ܘܝܪܬܘ ܟܠ ܛܘ̣ܪ̈ܐ

86. Judith 5:16

    ܘܐܦܩܘ ܡܢ ܩܕܡ̇ܝܗܘܢ̣. ܠܟܢܥ̈ܢܝܐ ܘܠܦܪ̈ܙܝܐ. ܘܠܚܘ̈ܝܐ ܘܠܝܒܘܣ̈ܝܐ. ܘܠܟܠܗܘܢ ܓܪ̈ܓܘܣܝܐ. ܘܥܡܪܘ ܒܗ̇ ܝܘܡ̈ܬܐ̣ ܣܓܝ̈ܐܐ

87. Judith 5:17

    ܘܟܡܐ ܕܠܐ ܚ̇ܛܝܢ ܗܘܘ ܩܕܡ ܐܠܗܗܘܢ̣. ܥܡܗܘܢ ܗ̈ܘܝ ܛ̇ܒ̈ܬܐ. ܡܛܠ ܕܐܠܗܐ ܗܘ ܕܣ̇ܢܐ ܥܘ̣ܠܐ

88. Judith 5:18

    ܘܟܕ ܥܒܪܘ ܥܠ ܐܘܪܚܐ ܕܦ̇ܩܕ ܐܢܘ̇ܢ̣. ܐܘܒܕܘ ܒܩܪ̈ܒܐ̣ ܣܓ̈ܝܐܐ. ܘܐܫܬܒܝܘ ܠܐܪܥܐ ܕܠܐ ܕܝܠܗܘܢ ܘܗܝܟܠܐ ܕܐܠܗܗܘܢ ܗ̣ܘܐ ܠܕܝܫܐ. ܘܡܕܝܢܬܗܘܢ̣ ܐܬܬܚܕܬ ܡܢ ܒܥܠܕܒ̈ܒܐ

89. Judith 5:19

    ܘܗܫܐ̣ ܐܬܦܢܝܘ ܠܘܬ ܐܠܗܗܘܢ̣. ܘܐܬ̇ܟܢܫܘ ܡܢ ܐܬܪ̈ܘܬܐ ܕܐܬܒܕܪܘ ܠܬܡܢ. ܘܐܫܬܠܛܘ ܒܐܘܪܫܠܡ ܐܬܪ ܕܒܝܬ ܡܩܕܫܗܘܢ ܬܡܢ. ܘܥܡ̣ܪܘ ܒܛܘ̣ܪܐ ܕܚ̣ܪܒ ܗܘܐ

90. Judith 5:20

    ܘܗܫܐ ܡܪܝ ܐܢ ܐܝܬ ܚܛܗܐ ܒܥܡܐ ܗܢܐ ܘܡܣܟܠܝ̣ܢ ܒܐܠܗܗܘܢ̣̇ ܢܬܪܥܐ ܕܗ̇ܘܝܐ ܠܗܘܢ ܠܬܘܩܠܬܐ ܗܕܐ. ܘܢܣܩ ܘܢܩܪܒ ܥܡܗܘܢ

91. Judith 5:21

    ܘܐܢ ܠܝܬ ܥܘ̣ܠܐ ܒܥܡܗܘܢ̣. ܢ̇ܥܒܪ ܐܢܘܢ ܡܪܝ. ܕܠܡܐ ܢܣ̇ܝܥ ܐܢܘܢ ܐܠܗܗܘܢ̇. ܘܢܗܘܐ ܚܣܕܐ ܥܠ ܐ̈ܦܝ ܟܠܗ̇ ܐܪܥܐ

92. Judith 5:22

    ܘܗ̣ܘܐ ܕܟܕ ܫ̇ܠܝ ܐܚܝܘܕ ܡܢ ܕܠܡܡܠܠܘ ܦܬܓܡ̈ܐ ܗܠܝ̣ܢ. ܪܛܢ̣ܘ ܟܠܗ ܥܡܐ ܕܩ̇ܝܡܝܢ ܚܕܪ ܡ̇ܫܟܢܐ. ܘܐܡܪܘ ܪ̈ܘܪܒܢܐ ܕܐܠܦܪܢܐ̣. ܘܥ̇ܡܘܪ̈ܐ ܕܥܠ ܓܢܒ ܝܡܐ̇. ܘܥܡܘܪ̈ܝܗ̇ ܕܡܘܐܒ ܠܡܦܩ ܠܡܦܩܘܬ̇ܗ ܠܐܚܝܘܕ

93. Judith 5:23

    ܡܛܠ ܕܐܡ̣ܪܘ ܠܐ ܕܚ̇ܠܝܢܢ ܡܢ ܒ̈ܢܝ ܐܝܣܪܝܠ. ܥܡܐ ܗܘ ܓܝܪ̣ ܕܠܝܬ ܒܗ ܚܝܠܐ ܠܩܪܒܐ

94. Judith 5:24

    ܡܛܠ ܗܢ̇ܐ ܢܣ̇ܩ ܥܠܝܗܘܢ. ܘܢܗܘܘܢ ܠܚܝܠܟ ܡܪܢ ܐܠܦܪܢܐ

95. Judith 6:1

    ܘܟܕ ܫ̣ܠܝ ܪܘܒ̇ܐ ܕܓܒܪ̈ܐ ܕܚܕܝܪܝܢ ܠܗܘܢ̇. ܐܡ̣ܪ ܐܠܦܪܢܐ ܪܒ ܚܝܠܐ ܕܐܬܘܪ ܠܐܚܝܘܪ ܩܕܡ ܟܠܗ ܥܡܐ.

96. Judith 6:2

    ܡ̇ܢ ܐܢܬ ܐܚܝܘܪ̣. ܘܟܠܗܘܢ ܒ̈ܢܝ ܡܘܐܒ. ܘܐܓܝܪ̈ܐ ܕܥܡܘܢ̇. ܕܐܬܢܒܝܬ ܠܢ ܐܝܟ ܕܝܘܡܢܐ. ܘܐܡ̣ܪ̣ܬ ܠܢ ܕܥܡ ܥܡܐ ܕܐܝܣܪܝܠ ܠܐ ܢ̣ܩܪܒ̇. ܡܛܠ ܕܐܠܗܗܘܢ ܡܣܝܥ ܠܗܘܢ̇. ܘܡ̣ܢܘ ܐܠܗܐ ܐܠܐ ܢܒܘ ܟܕܢܨ̇ܪ ܡ̇ܠܟܐ ܕܟܠܗ̇ ܐܪܥܐ

97. Judith 6:3

    ܘܗ̣ܘ ܢܫܕ̇ܪ ܚܝܠܗ ܘܢܘܒܕ ܐܢܘܢ. ܡܢ ܐ̈ܦܝ ܐܪܥܐ. ܘܠܐ ܢܦܪܘܩ ܐܢܘܢ ܐܠܗܗܘܢ̇. ܘܚܢܢ ܥܒ̣ܕ̈ܘܗܝ ܕܢܒܘܟܕܢܨܪ. ܢܡܚ̣ܐ ܐܢܘܢ̣ ܐܝܟ ܕܠܚܕ ܓܒܪ. ܘܠܐ ܢܩܘܡܘܢ ܩܕܡ ܨܗܠܐ ܕܪ̈ܟܫܢ

98. Judith 6:4

    ܡܛܠ ܕܢܘܒܕ ܐܢܘܢ̣. ܘܬܚܘ̈ܡܝܗܘܢ ܢܪܘܘܢ ܡܢ ܕܡܗܘܢ ܘܦܩ̈ܥܬܗܘܢ ܢܬܡ̈ܠܝܢ ܡܢ ܫ̈ܠܕܝܗܘܢ̇. ܘܠܐ ܬܩܘܡ ܥܩܒܬܐ ܕܪ̈ܓܠܝܗܘܢ ܩܕܡܝܢ. ܐܠܐ̣ ܡܐܒܕ ܢܐܒܕܘܢ ܐܡ̇ܪ ܢܒܘܟܕܢܨܪ ܡܪܐ ܕܟܠܗ̇ ܐܪܥܐ. ܘܠܐ ܢܗܦܟܘܢ ܦܬܓܡ̈ܘܗܝ ܠܒܣܬܪܗܘܢ̇

99. Judith 6:5

    ܐܢܬ ܕܝܢ ܐܚܝܘܕ ܐܓܝܪܐ ܕܥܡܗܘܢ. ܕܡܠ̣ܠܬ ܦܬܓ̈ܡܐ ܗܠܝܢ̣. ܒܝܘܡܐ ܕܥܘ̣ܠܟ ܠܐ ܬܚܙܐ ܡܢ ܝܘܡܢܐ̇. ܥܕܡܐ ܕܐ̇ܥܒܕ ܬܒܥܬܐ ܡܢ ܥܡܐ ܕܣܠܩ ܡܢ ܡܨܪܝܢ

100. Judith 6:6

     ܘܗ̇ܝܕܝܢ ܢܥܘܠ ܣܝܦܐ ܕܚܝܠܝ ܘܢܝܙܟܐ ܕܥ̈ܒܕܝ ܒܕܦܢܟ. ܘܬܦܠ ܥܡ ܩ̈ܛܝܠܝܗܘܢ ܡܐ ܕܗܦܟܬ

Next → — showing 1–100 of 341

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.