Peshitta Judges

ܘܐܬܡܢܝܘ ܬܡܢ ܥܡܐ ܘܠܐ ܐܫܬܟܚ ܐܢܫ ܬܡܢ ܡܢ ܝܬܒ̈ܝ ܝܒܝܫ ܕܓܠܥܕ

ܘܫܕܪܘ ܠܬܡܢ ܥܡܐ ܬܪ̈ܥܣܪ ܐ̈ܠܦܝܢ ܓܒܪ̈ܝܢ ܡܢ ܒܢ̈ܝ ܚܝܠܐ ܘܦܩܕܘ ܐܢܘܢ ܘܐܡܪܘ ܠܗܘܢ ܙܠܘ ܚܪܘܒܘ ܠܝܬ̈ܒܝ ܝܒܝܫ ܕܓܠܥܕ ܒܦܘܡܐ ܕܚܪܒܐ ܘܢܫ̈ܐ ܘ̈ܛܠܝܐ

ܗܟܢܐ ܥܒܕܘ ܠܟܠ ܓܒܪܐ ܘܠܟܠ ܐܢܬܬܐ ܕܚܟܡܗ̇ ܓܒܪܐ ܚܪܘܒܘ

ܘܐܫܟܚܘ ܡܢ ܝܬܒ̈ܝ ܝܒܝܫ ܕܓܠܥܕ ܐܪܒܥܡܐܐ ܥܠܝܡ̈ܬܐ ܒܬܘ̈ܠܬܐ ܕܠܐ ܚܟܡܘ ܐܢܝ̈ܢ ܓܒܪ̈ܐ ܘܐܝܬܝܘ ܐ̈ܢܝܢ ܠܡܫܪܝܬܐ ܠܫܝܠܘ ܕܒܐܪܥܐ ܕܟܢܥܢ

ܘܫܕܪܘ ܟܠܗ ܥܡܐ ܘܐܡܪܘ ܠܒܢܝܡܝܢ ܕܒܫܩܝܦܐ ܕܪܡܘܢ ܘܩܪܘ ܠܗ ܫܠܡܐ

ܘܐܬܐ ܒܢܝܡܝܢ ܒܙܒܢܐ ܗܘ ܘܝܗܒܘ ܠܗܘܢ ܢܫ̈ܐ ܕܐܚܝܘ ܡܢ ܢܫ̈ܐ ܕܝܒܝܫ ܕܓܠܥܕ ܘܠܐ ܡܠܝ ܠܗܘܢ

ܘܥܡܐ ܐܬܬܘܝܘ ܥܠ ܒܢܝܡܝܢ ܡܛܠ ܕܥܒܕ ܡܪܝܐ ܬܘܪܥܬܐ ܒܫ̈ܒܛܐ ܕܐܝܣܪܝܠ

ܘܐܡܪܘ ܣܒ̈ܐ ܕܥܡܐ ܡܢܐ ܢܥܒܕ ܠܐܝܠܝܢ ܕܐܫܬܒܩܘ ܕܠܐ ܢܫ̈ܐ ܗܠܝܢ ܕܐܫܬܚܪܘ ܡܛܠ ܕܣܦ ܠܗܝܢ ܢ̈ܫܐ ܕܒܢܝܡܝܢ

ܘܐܡܪܘ ܕܢܫܬܒܩ ܫܪܟܢܐ ܕܒܢܝܡܝܢ ܘܠܐ ܢܛܥܐ ܫܒܛܐ ܡܢ ܐܝܣܪܝܠ

ܚܢܢ ܓܝܪ ܠܐ ܡܫܟܚܝܢܢ ܕܢܬܠ ܠܗܘܢ ܢܫ̈ܐ ܡܢ ܒܢ̈ܬܢ ܡܛܠ ܕܐܝܡܘ ܒܢܝ̈ ܐܝܣܪܝܠ ܘܐܡܪܘ ܠܝܛ ܗܘ ܡ̇ܢ ܕܢܬܠ ܐܢܬܬܐ ܠܒܢܝܡܝܢ

ܘܐܡܪܘ ܗܐ ܚܓܐ ܕܡܪܝܐ ܗܘܐ ܒܫܝܠܘ ܡܢ ܥܕܢ ܠܥܕܢ ܡܢ ܓܪܒܝܐ ܕܒܝܬ ܐܝܠ ܡܢ ܡܕ̈ܢܚܝ ܫܡܫܐ ܡܢ ܫܒܝܠܐ ܕܣܠܩ ܡܢ ܒܝܬ ܐܝܠ ܠܫܟܝܡ ܡܢ ܬܝܡܢܐ ܕܠܒܘܢܐ

ܘܦܩܕܘ ܠܒܢ̈ܝ ܒܢܝܡܝܢ ܘܐܡܪܘ ܠܗܘܢ ܙܠܘ ܟܡܢܘ ܒܟܪ̈ܡܐ

ܘܡܐ ܕܚܙܝܬܘܢ ܕܢܦܩ ܡܢ ܒܢ̈ܬ ܫܝܠܘ ܠܡܩܫ ܒ̈ܦܠܓܐ ܦܘܩܘ ܡܢ ܟܪ̈ܡܐ ܘܚܛܘܦܘ ܠܟܘܢ ܓܒܪ ܐܢܬܬܗ ܡܢ ܒܢ̈ܬ ܫܝܠܘ ܘܙܠܘ ܠܐܪܥܐ ܕܒܢܝܡܝܢ

ܘܐܢ ܐܬܘ ܐܒܗܝ̈ܗܝܢ ܐܘ ܐ̈ܚܝܗܝܢ ܠܡܕܢ ܩܕܡܝܢ ܐܡܪܝܢܢ ܠܗܘܢ ܪܚܡܘ ܥܠܝܗܘܢ ܡܛܠ ܕܠܐ ܕܒܪܘ ܓܒܪ ܐܢܬܬܗ ܒܩܪܒܐ ܠܐ ܗܘܐ ܐܢܬܘܢ ܝܗܒܬܘܢ ܐ̈ܢܝܢ ܠܗܘܢ ܕܬܚܛܘܢ

ܘܥܒܕܘ ܗܟܢܐ ܒܢ̈ܝ ܒܢܝܡܝܢ ܘܢܣܒܘ ܠܗܘܢ ܢܫ̈ܐ ܠܟܠܗܘܢ ܡܢ ܢܩ̈ܫܬ ܦ̈ܠܓܐ ܕܚܛܦܘ ܘܗܦܟܘ ܘܐܬܘ ܠܝܪܬܘܬܗܘܢ ܘܒܢܘ ܩܘܪ̈ܝܐ ܘܐܝܬܒܘ ܒܗܝܢ

ܘܐܙܠܘ ܡܢ ܬܡܢ ܒܢ̈ܝ ܐܝܣܪܝܠ ܒܙܒܢܐ ܗܘ ܐܢܫ ܠܫܒܛܗ ܘܠܫܪܒܬܗ ܘܢܦܩܘ ܡܢ ܬܡܢ ܐܢܫ ܠܝܪܬܘܬܗ

ܘܒܝ̈ܘܡܬܐ ܗܢܘܢ ܠܝܬ ܗܘܐ ܡܠܟܐ ܒܝܬ ܐܝܣܪܝܠ ܘܟܠ ܐܢܫ ܐܝܟ ܕܫܦܝܪ ܒܥܝ̈ܢܘܗܝ ܗܘ ܗܘ ܥܒ̇ܕ ܗܘܐ