← All works

Peshitta Judges

Peshitta (Syriac Old Testament) · 617 sections

1. Judges 7:16

   ܘܦܠܓ ܬܠܬܡܐܐ ܓܒܪ̈ܝܢ ܠܬܠܬܐ ܪ̈ܫܝܢ ܘܐܘܚܕ ܩܪ̈ܢܬܐ ܒܐ̈ܝܕܝܗܘܢ ܕܟܘܠܗܘܢ ܘܩ̈ܘܠܐ ܣܪ̈ܝܩܬܐ ܘܠܡܦܐ̈ܕܐ ܒܓܘ ܩܘ̈ܠܐ

2. Judges 7:17

   ܘܐܡܪ ܠܗܘܢ ܠܝ ܚܙܘ ܘܗܟܢܐ ܥܒܕܘ ܗܐ ܥܐܠ ܐܢܐ ܒܓܘ ܡܫܪܝܬܐ ܐܝܟܢܐ ܕܥܒܕ ܐܢܐ ܗܟܢܐ ܥܒܕܘ

3. Judges 7:18

   ܘܩܪܐ ܐܢܐ ܒܫܝܦܘܪܐ ܐܢܐ ܘܟܠܗ ܥܡܐ ܕܥܡܝ ܘܩܪܘ ܐܦ ܐܢܬܘܢ ܒܫܝܦܘܪܐ ܒܚܕܪ̈ܝ ܟܠܗ̇ ܡܫܪܝܬܐ ܘܐܡܪܘ ܚܪܒܐ ܠܡܪܝܐ ܘܠܓܕܥܘܢ

4. Judges 7:19

   ܘܥܠ ܓܕܥܘܢ ܘܡܐܐ ܓܒܪ̈ܝܢ ܕܥܡܗ ܒܪܝܫ ܡܫܪܝܬܐ ܒܡܛܪܬܐ ܡܨܥܝܬܐ ܘܡܩܡܘ ܐܩܝܡ ܠܢܛܘܪ̈ܐ

5. Judges 7:20

   ܘܩܪܘ ܬܠܬܡܐܐ ܪ̈ܫܝܢ ܒܩܪ̈ܢܬܐ ܘܬܒܪܘ ܩ̈ܘܠܐ ܘܐܚܕܘ ܒܣ̈ܡܠܝܗܘܢ ܠܡܦܐ̈ܕܐ ܘܒܝܡܝ̈ܢܝܗܘܢ ܩܪ̈ܢܬܐ ܕܢܩܪܘܢ ܘܩܪܘ ܚܪܒܐ ܠܡܪܝܐ ܘܠܓܕܥܘܢ

6. Judges 7:21

   ܘܩܡܘ ܐܢܫ ܒܕܘܟܬܗ ܚܕܪ̈ܝ ܡܫܪܝܬܐ ܘܪܗܛܬ ܟܘܠܗ̇ ܡܫܪܝܬܐ ܘܝܒܒܘ ܘܥܪܩܘ

7. Judges 7:22

   ܘܩܪ̈ܝ ܬܠܬܡܐܐ ܩܪ̈ܢܢ ܘܣܡ ܡܪܝܐ ܚܪܒܗ ܕܓܒܪܐ ܒܚܒܪܗ ܒܟܘܠܗ̇ ܡܫܪܝܬܐ ܘܥܪܩܬ ܟܘܠܗ̇ ܡܫܪܝܬܐ ܥܕܡܐ ܠܒܝܬ ܫܒ̈ܛܐ ܘܠܨܕܕܬ ܘܥܕܡܐ ܠܣܦܬܐ ܕܐܒܠ ܡܚܘܠܐ ܕܥܠ ܝܛܒܬ

8. Judges 7:23

   ܘܩܥܘ ܒܢ̈ܝ ܐܝܣܪܝܠ ܡܢ ܢܦܬܠܝ ܘܡܢ ܐܫܝܪ ܘܡܢ ܟܠܗ ܡܢܫܐ ܘܪܕܦܘ ܒܬܪ ܡܕܝܢ

9. Judges 7:24

   ܘܐ̈ܝܙܓܕܐ ܫܕܪ ܓܕܥܘܢ ܒܟܠܗ ܛܘܪܐ ܕܐܦܪܝܡ ܘܐܡܪ ܚܘܬܘ ܠܐܘܪܥܐ ܕܡܕܝܢ ܘܐܚܘܕܘ ܡ̈ܝܐ ܥܕܡܐ ܠܒܝܬ ܒܪܐ ܕܥܠ ܓܢܒ ܝܘܪܕܢܢ ܘܩܥܘ ܟܠܗܘܢ ܕܒܝܬ ܐܦܪܝܡ ܘܐܚܕܘ ܡ̈ܝܐ ܥܕܡܐ ܠܒܝܬ ܒܪܐ ܕܝܘܪܕܢܢ

10. Judges 7:25

    ܘܐܚܕܘ ܠܬܪ̈ܝܢ ܪ̈ܘܪܒܢܐ ܕܡܕܝܢ ܠܥܘܪܝܒ ܘܠܙܝܒ ܘܩܛܠܘܗܝ ܠܥܘܪܝܒ ܒܨܘܪ ܘܠܙܝܒ ܩܛܠܘ ܒܝܬ ܩܒܪܒ ܘܪܕܦܘ ܠܡܕܝܢ ܘܠܪ̈ܫܝܗܘܢ ܕܥܘܪܝܒ ܘܕܙܝܒ ܐܝܬܝܘ ܠܓܕܥܘܢ ܠܥܒܪܐ ܕܝܘܪܕܢܢ

11. Judges 8:1

    ܘܐܡܪܝܢ ܠܗ ܕܒܝܬ ܐܦܪܝܡ ܠܡܢܐ ܥܒܕܬ ܗܟܢܐ ܘܠܐ ܩܪܝܬܢ ܟܕ ܐܙܠ ܐܢܬ ܠܡܬܟܬܫܘ ܥܡ ܡܕܝܢ ܘܢܨܝܢ ܗܘܘ ܥܡܗ ܩܫܝܐܝܬ

12. Judges 8:2

    ܐܡܪ ܠܗܘܢ ܡܢܐ ܥܒܕܬ ܗܫܐ ܐܟܘܬܟܘܢ ܠܐ ܗܘܐ ܛܒ ܒܘܥܪܗ ܕܐܦܪܝܡ ܡܢ ܩܛܦܗ ܕܐܝܙܪܥܝܠ ܘܒܐܝܙܪܥܝܠ

13. Judges 8:3

    ܒܐ̈ܝܕܝܟܘܢ ܐܫܠܡ ܐܠܗܐ ܠܬܪ̈ܝܢ ܪ̈ܘܪܒܢܐ ܕܡܕܝܢ ܠܥܘܪܝܒ ܘܠܙܝܒ ܘܡܢܐ ܐܫܟܚܬ ܕܐܥܒܕ ܐܟܘܬܟܘܢ ܗܝܕܝܢ ܦܪܩܬ ܚܡܬܗܘܢ ܡܢܗ ܟܕ ܐܡܪ ܦܬܓܡܐ ܗܢܐ

14. Judges 8:4

    ܘܐܬܐ ܓܕܥܘܢ ܠܝܘܪܕܢܢ ܘܥܒܪ ܗܘ ܘܬܠܬܡܐܐ ܓܒܪ̈ܝܢ ܕܥܡܗ ܪܗܛܝܢ ܘܥܝܝܦܝܢ

15. Judges 8:5

    ܘܐܡܪ ܠܐܢܫ̈ܝ ܣܟܘܬ ܗܒܘ ܓܪܝܨܬܐ ܓܪܝܨܬܐ ܕܠܚܡܐ ܠܥܡܐ ܕܥܡܝ ܡܛܘܠ ܕܥܝܝܦܝܢ ܐܢܘܢ ܘܐܢܐ ܗܐ ܪܕܦ ܐܢܐ ܒܬܪ ܙܒܚ ܘܨܠܡܢܥ ܡ̈ܠܟܐ ܕܡܕܝܢ

16. Judges 8:6

    ܐܡܪܝܢ ܠܗ ܪ̈ܘܪܒܢܐ ܕܣܟܘܬ ܗܐ ܐܝܕܗ ܕܙܒܚ ܘܕܨܠܡܢܥ ܗܫܐ ܒܐ̈ܝܕܝܟ ܕܢܬܠ ܠܚܝܠܟ ܠܚܡܐ

17. Judges 8:7

    ܘܐܡܪ ܠܗܘܢ ܓܕܥܘܢ ܡܛܠ ܗܢܐ ܡܐ ܕܐܫܠܡ ܡܪܝܐ ܠܙܒܚ ܘܠܨܠܡܢܥ ܒܐ̈ܝܕܝ ܐܕܘܫ ܒܣܪܟܘܢ ܥܠ ܟ̈ܘܒܐ ܕܒܡܕܒܪܐ ܘܥܠ ܩܘܪ̈ܛܒܐ

18. Judges 8:8

    ܘܣܠܩ ܡܢ ܬܡܢ ܠܦܢܘܐܝܠ ܘܐܝܟ ܕܥܢܐܘܗܝ ܐܢܫ̈ܝ ܣܟܘܬ ܗܟܢܐ ܥܢܐܘܗܝ ܐܦ ܐܢܫ̈ܝ ܦܢܘܐܝܠ

19. Judges 8:9

    ܘܐܡܪ ܐܦ ܠܐ̈ܢܫܝ ܦܢܘܐܝܠ ܡܐ ܕܐܬܝܬ ܒܫܠܡܐ ܐܥܩܪܝܘܗܝ ܠܡܓܕܠܐ ܗܢܐ

20. Judges 8:10

    ܘܙܒܚ ܘܨܠܡܢܥ ܫܪܝܢ ܒܩܪܩܒ ܘܡܫܪ̈ܝܬܗܘܢ ܥܡܗܘܢ ܐܝܟ ܚܡܫܬܥܣܪ ܐ̈ܠܦܝܢ ܟܠ ܕܐܫܬܚܪܘ ܡܢ ܟܘܠܗܝܢ ܡܫܪ̈ܝܬܐ ܕܒܢ̈ܝ ܡܕܢܚܐ ܘܕܢܦܠܘ ܡܐܐ ܘܥܣܪ̈ܝܢ ܐ̈ܠܦܝܢ ܓܒܪ̈ܝܢ ܫܡ̈ܛܝ ܣܝܦܐ

21. Judges 8:11

    ܘܣܠܩ ܓܕܥܘܢ ܒܐܘܪܚܐ ܕܫܪ̈ܝܝ ܡܫܟܢܐ ܡܢ ܡܕܢܚܐ ܕܢܟܚ ܘܕܝܒܓܗܐ ܘܡܚܐ ܠܡܫܪܝܬܐ ܘܡܫܪܝܬܐ ܗܘܬ ܒܫܠܝܐ

22. Judges 8:12

    ܘܥܪܩܘ ܙܒܚ ܘܨܠܡܢܥ ܘܪܕܦܘ ܒܬܪܗܘܢ ܘܐܚܕܘ ܠܬܪ̈ܝܢ ܡ̈ܠܟܐ ܕܡܕܝܢ ܘܠܟܠܗ̇ ܡܫܪܝܬܐ ܐܙܝܥ

23. Judges 8:13

    ܘܗܦܟ ܓܕܥܘܢ ܒܪ ܝܘܐܫ ܡܢ ܩܪܒܐ ܡܢ ܡܣܩܢܐ ܕܚܕܣ

24. Judges 8:14

    ܘܐܚܕ ܥܠܝܡܐ ܚܕ ܡܢ ܐܢܫ̈ܝܗ ܕܣܟܘܬ ܘܫܐܠܗ ܘܐܟܬܒ ܠܗ ܪ̈ܘܪܒܢܐ ܕܣܟܘܬ ܘܩܫܝܫ̈ܝܗ ܫܒܥܝܢ ܘܫܒܥܐ ܓܒܪ̈ܝܢ

25. Judges 8:15

    ܘܐܬܐ ܠܘܬ ܐܢܫ̈ܝ ܣܟܘܬ ܘܐܡܪ ܠܗܘܢ ܗܐ ܙܒܚ ܘܨܠܡܢܥ ܕܚܣܕܬܘܢܢܝ ܘܐܡܪܬܘܢ ܠܝ ܙܒܚ ܘܨܠܡܢܥ ܦܟܝܪܝܢ ܒܐ̈ܝܕܝܟ ܕܢܬܠ ܠܥܒ̈ܕܝܟ ܠܚܡܐ ܕܥܝܝܦܝܢ

26. Judges 8:16

    ܘܓܪ ܠܣ̈ܒܐ ܕܩܪܝܬܐ ܥܠ ܟ̈ܘܒܐ ܕܒܡܕܒܪܐ ܘܥܠ ܩܘܪ̈ܛܒܐ ܘܐܫܬܢܕ ܒܗܘܢ ܒܐ̈ܢܫܝ ܣܟܘܬ

27. Judges 8:17

    ܘܡܓܕܠܐ ܕܦܢܘܐܝܠ ܥܩܪ ܘܩܛܠ ܠܐܢܫ̈ܝ ܩܪܝܬܐ

28. Judges 8:18

    ܘܐܡܪ ܠܙܒܚ ܘܠܨܠܡܢܥ ܐܝܟܐ ܐܢܘܢ ܐܢܫܐ ܕܩܛܠܬܘܢ ܒܬܒܘܪ ܘܐܡܪܝܢ ܠܗ ܐܟܘܬܟ ܐܝܬܝܗܘܢ ܗܘܘ ܐܝܟ ܚܙܘܐ ܕܒܢܝ̈ ܡܠܟܐ

29. Judges 8:19

    ܘܐܡܪ ܐ̈ܚܝ ܐܢܘܢ ܒܢ̈ܝ ܐܡܝ ܚܝ ܗܘ ܡܪܝܐ ܐܠܗܐ ܕܐܠܘ ܐܚܝܬܘܢ ܐܢܘܢ ܠܐ ܩܛܠܬܟܘܢ

30. Judges 8:20

    ܘܐܡܪ ܠܝܬܪ ܒܘܟܪܗ ܩܘܡ ܩܛܘܠ ܐܢܘܢ ܘܠܐ ܫܡܛ ܛܠܝܐ ܣܝܦܗ ܡܛܠ ܕܕܚܠ ܕܥܕܟܝܠ ܛܠܝܐ ܗܘܐ

31. Judges 8:21

    ܘܐܡܪ ܙܒܚ ܘܨܠܡܢܥ ܩܘܡ ܐܢܬ ܘܦܓܥ ܒܢ ܘܐܝܟ ܓܒܪܐ ܓܢܒܪܘܬܗ ܘܩܡ ܓܕܥܘܢ ܘܩܛܠ ܠܙܒܚ ܘܠܨܠܡܢܥ ܘܢܣܒ ܣܗܪ̈ܢܐ ܕܐܝܬ ܗܘܘ ܒܨܘܪ̈ܐ ܕܓܡ̈ܠܝܗܘܢ

32. Judges 8:22

    ܘܐܡܪ̈ܝܢ ܒ̈ܢܝ ܐܝܣܪܝܠ ܠܓܕܥܘܢ ܐܫܬܠܛ ܒܢ ܐܦ ܐܢܬ ܐܦ ܒܪܟ ܐܦ ܒܪ ܒܪܟ ܕܦܪܩܬܢ ܡܢ ܐܝܕܐ ܕܡܕܝܢ

33. Judges 8:23

    ܐܡܪ ܠܗܘܢ ܓܕܥܘܢ ܠܐ ܐܢܐ ܡܫܬܠܛ ܐܢܐ ܒܟܘܢ ܘܠܐ ܒܪܝ ܡܫܬܠܛ ܒܟܘܢ ܡܪܝܐ ܢܫܬܠܛ ܒܟܘܢ

34. Judges 8:24

    ܘܐܡܪ ܠܗܘܢ ܓܕܥܘܢ ܐܢܐ ܫܐܠܬܐ ܚܕܐ ܫܐܠ ܐܢܐ ܡܢܟܘܢ ܗܒܘ ܠܝ ܐܢܫ ܚܕ ܚܕ ܩܕܫܐ ܡܢ ܒܙܬܗ ܡܛܠ ܕܩܕܫ̈ܐ ܕܕܗܒܐ ܐܝܬ ܗܘܘ ܠܗܘܢ ܡܛܠ ܕܥܪ̈ܒܝܐ ܗܘܘ

35. Judges 8:25

    ܐܡܪ̈ܝܢ ܠܗ ܝܗܒܝܢܢ ܠܟ ܘܦܪܣ ܡܪܛܘܛܐ ܘܐܪܡܝܘ ܬܡܢ ܐܢܫ ܩܕܫܐ ܡܢ ܒܙܬܗ

36. Judges 8:26

    ܘܗܘܐ ܡܬܩܠܐ ܕܩ̈ܕܫܐ ܕܕܗܒܐ ܕܫܐܠ ܐܠܦ ܘܫܒܥܡܐܐ ܕܕܗܒܐ ܣܛܪ ܡܢ ܣܗܪ̈ܢܐ ܘܥܩ̈ܐ ܘܠܒ̈ܘܫܐ ܕܐܪܓܘܢܐ ܕܐܝܬ ܗܘܘ ܥܠ ܡ̈ܠܟܐ ܕܡܕܝܢ ܘܣܛܪ ܡܢ ܥܩ̈ܐ ܕܐܝܬ ܗܘܘ ܒܨܘܪ̈ܐ ܕܓܡ̈ܠܝܗܘܢ ܘܢܣܒ ܡܢܗܘܢ ܓܕܥܘܢ

37. Judges 8:27

    ܘܥܒܕ ܠܘܦܪܐ ܘܐܩܝܡܗ ܒܩܪܝܬܗ ܒܥܘܦܪܐ ܘܛܥܘ ܠܗܘܢ ܒܢ̈ܝ ܐܝܣܪܝܠ ܒܬܪܗ ܬܡܢ ܘܗܘܐ ܠܓܕܥܘܢ ܘܠܒܝܬܗ ܠܬܘܩܠܬܐ

38. Judges 8:28

    ܘܐܬܬܒܪܘ ܡܕܝ̈ܢܝܐ ܩܕܡ ܒܢ̈ܝ ܐܝܣܪܝܠ ܘܬܘܒ ܠܐ ܐܘܣܦܘ ܕܢܪܝܡܘܢ ܪܝܫܗܘܢ ܘܫܠܝܬ ܐܪܥܐ ܐܪ̈ܒܥܝܢ ܫܢܝ̈ܢ ܒܝ̈ܘܡܘܗܝ ܕܓܕܥܘܢ

39. Judges 8:29

    ܘܐܙܠ ܢܕܘܒܥܝܠ ܒܪ ܝܘܐܫ ܘܐܝܬܒ ܒܒܝܬܗ

40. Judges 8:30

    ܘܠܗ ܠܓܕܥܘܢ ܐܝܬ ܗܘܘ ܫܒܥܝܢ ܒ̈ܢܝܢ ܕܢܦܩܘ ܡܢ ܚܨܗ ܡܛܠ ܕܢܫ̈ܐ ܣ̈ܓܝܐܬܐ ܐܝܬ ܗ̈ܘܝ ܠܗ

41. Judges 8:31

    ܘܕܪܘܟܬܗ ܕܒܫܟܝܡ ܝܠܕܬ ܠܗ ܒܪܐ ܘܫܡܝ ܫܡܗ ܐܒܝܡܠܟ

42. Judges 8:32

    ܘܡܝܬ ܓܕܥܘܢ ܒܪ ܝܘܐܫ ܒܣܝܒܘܬܐ ܛܒܬܐ ܘܐܬܩܒܪ ܒܩܪܝܬܐ ܕܝܘܐܫ ܐܒܘܗܝ ܒܥܘܦܪܐ ܕܐܒܘܗܝ ܕܥܙܪܝ

43. Judges 8:33

    ܘܟܕ ܡܝܬ ܓܕܥܘܢ ܗܦܟܘ ܒܢܝ̈ ܐܝܣܪܝܠ ܘܛܥܘ ܒܬܪ ܒܥܠܐ ܘܥܒܕܘ ܠܗܘܢ ܒܥܠ ܩܝܡܐ ܐܠܗܐ

44. Judges 8:34

    ܘܠܐ ܐܬܕܟܪܘ ܒ̈ܢܝ ܐܝܣܪܝܠ ܠܡܪܝܐ ܐܠܗܗܘܢ ܕܡܦܨܐ ܠܗܘܢ ܡܢ ܟܘܠܗܘܢ ܒ̈ܥܠܕܒܒܝܗܘܢ ܕܒܚܕܪ̈ܝܗܘܢ

45. Judges 8:35

    ܘܠܐ ܥܒܕܘ ܛܝܒܘܬܐ ܥܡ ܒܝܬܗ ܕܢܕܘܒܥܝܠ ܕܗܘܝܘ ܓܕܥܘܢ ܐܝܟ ܟܠܗ̇ ܛܝܒܘܬܐ ܕܥܒܕ ܥܡ ܐܝܣܪܝܠ

46. Judges 9:1

    ܘܐܙܠ ܐܒܝܡܠܟ ܒܪ ܢܕܘܒܥܠ ܠܫܟܝܡ ܠܘܬ ܐܚ̈ܐ ܕܐܡܗ ܘܐܡܪ ܠܗܘܢ ܘܠܟܠܗ̇ ܫܪܒܬܐ ܕܒܝܬ ܐܒܘܗ ܕܐܡܗ

47. Judges 9:2

    ܐܡܪ ܩܕܡ ܟܠܗܘܢ ܡܪ̈ܝܗ ܕܫܟܝܡ ܡܢܐ ܦܩܚ ܠܟܘܢ ܕܢܫܬܠܛܘܢ ܒܟܘܢ ܫܒܥܝܢ ܓܒܪ̈ܝܢ ܒܢ̈ܘܗܝ ܕܢܕܘܒܥܝܠ ܐܘ ܕܢܫܬܠܛ ܒܟܘܢ ܚܕ ܓܒܪ ܘܐܬܕܟܪܘ ܕܓܪܡܟܘܢ ܐܢܐ ܘܒܣܪܟܘܢ

48. Judges 9:3

    ܘܐܡܪܘ ܐ̈ܚܐ ܕܐܡܗ ܩܕܡ ܟܘܠܗܘܢ ܡܪ̈ܝܗ ܕܫܟܝܡ ܥܠܘܗܝ ܟܠܗܝܢ ܡ̈ܠܐ ܗܠܝܢ ܘܐܨܛܒܝ ܠܒܗܘܢ ܒܬܪ ܐܒܝܡܠܟ ܘܐܡܪܝܢ ܐܚܘܢ ܗܘ

49. Judges 9:4

    ܘܝܗܒܘ ܠܗ ܫܒܥܝܢ ܕܟܣܦܐ ܡܢ ܒܝܬ ܒܥܠ ܩܝܡܐ ܘܐܓܪ ܒܗܘܢ ܐܒܝܡܠܟ ܐܢܫܐ ܣܪ̈ܝܩܐ ܘܦܚ̈ܙܐ ܘܐܙܠܘ ܒܬܪܗ

50. Judges 9:5

    ܘܥܠ ܠܒܝܬ ܐܒܘܗܝ ܠܥܘܦܪܐ ܘܩܛܠ ܠܐ̈ܚܘܗܝ ܒܢ̈ܘܗܝ ܕܢܕܘܒܥܝܠ ܫܒܥܝܢ ܓܒܪ̈ܝܢ ܥܠ ܟܐܦܐ ܚܕܐ ܘܐܫܬܚܪ ܝܘܬܡ ܒܪ ܢܕܘܒܥܝܠ ܙܥܘܪܐ ܡܛܠ ܕܐܬܛܫܝ

51. Judges 9:6

    ܘܐܬܟܢܫܘ ܟܠܗܘܢ ܡܪ̈ܝܗ ܕܫܟܝܡ ܘܟܘܠܗ ܥܡܐ ܕܒܝܬ ܡܠܘ ܘܐܙܠܘ ܘܐܩܝܡܘ ܠܐܒܝܡܠܟ ܕܢܗܘܐ ܥܠܝܗܘܢ ܡܠܟܐ ܥܠ ܓܢܒ ܒܠܘܛܐ ܕܡܨܦܝܐ ܕܐܝܬ ܒܫܟܝܡ

52. Judges 9:7

    ܘܚܘܝܘ ܠܝܘܬܡ ܘܣܠܩ ܘܩܡ ܒܪܝܫ ܛܘܪܐ ܕܓܪܙܝܡ ܘܐܪܝܡ ܩܠܗ ܘܐܡܪ ܫܘܡܥܘܢܝ ܡܪ̈ܝܗ ܕܫܟܝܡ ܕܢܫܡܥܟܘܢ ܐܠܗܐ

53. Judges 9:8

    ܡܐܙܠ ܐܙܠܘ ܐ̈ܝܠܢܐ ܕܢܡܫܚܘܢ ܥܠܝܗܘܢ ܡܠܟܐ ܐܡܪܝܢ ܠܙܝܬܐ ܐܡܠܟ ܥܠܝܢ

54. Judges 9:9

    ܐܡܪ ܠܗܘܢ ܙܝܬܐ ܠܐ ܫܒܩ ܐܢܐ ܕܘܗܢܝ ܕܒܝ ܡܬܝܩܪܝܢ ܐ̈ܠܗܐ ܘܐ̈ܢܫܐ ܘܐܙܠ ܐܢܐ ܠܡܢܕ ܥܠ ܐ̈ܝܠܢܐ

55. Judges 9:10

    ܐܡܪܝܢ ܐ̈ܝܠܢܐ ܠܬܬܐ ܬܝ ܐܢܬܝ ܐܡܠܟ ܥܠܝܢ

56. Judges 9:11

    ܐܡܪܐ ܠܗܘܢ ܬܬܐ ܠܐ ܫܒܩܐ ܐܢܐ ܚܠܝܘܬܝ ܘܐܒܝ ܛܒܐ ܘܐܙܠܐ ܐܢܐ ܠܡܢܕ ܥܠ ܐ̈ܝܠܢܐ

57. Judges 9:12

    ܐܡܪ̈ܝܢ ܐܝ̈ܠܢܐ ܠܓܦܬܐ ܐܢܬܝ ܬܝ ܐܡܠܟ ܥܠܝܢ

58. Judges 9:13

    ܐܡܪܐ ܠܗܘܢ ܓܦܬܐ ܠܐ ܫܒܩܐ ܐܢܐ ܐܕܫܝ ܕܡܚܕܐ ܠܒܐ ܕܐ̈ܠܗܐ ܘܐܢܫܐ ܘܐܙܠܐ ܐܢܐ ܠܡܢܕ ܥܠ ܐ̈ܝܠܢܐ

59. Judges 9:14

    ܐܡܪܝܢ ܐܝ̈ܠܢܐ ܟܠܗܘܢ ܠܗܛܛܐ ܐܢܬ ܐܡܠܟ ܥܠܝܢ

60. Judges 9:15

    ܐܡܪ ܗܛܛܐ ܠܐ̈ܝܠܢܐ ܐܢ ܒܫܪܪܐ ܡܫܚܝܢ ܐܢܬܘܢ ܠܝ ܕܐܡܠܟ ܥܠܝܟܘܢ ܬܘ ܐܣܬܬܪܘ ܒܛܠܠܝ ܘܐܠܐ ܬܦܘܩ ܢܘܪܐ ܡܢ ܗܛܛܐ ܘܬܐܟܘܠ ܠܐܪ̈ܙܐ ܕܒܠܒܢܢ

61. Judges 9:16

    ܘܗܫܐ ܐܢ ܒܩܘܫܬܐ ܘܒܫܪܪܐ ܥܒܕܬܘܢ ܘܐܡܠܟܬܘܢ ܠܐܒܝܡܠܟ ܘܐܢ ܛܒܬܐ ܥܒܕܬܘܢ ܥܡ ܢܕܘܒܥܝܠ ܘܥܡ ܒܝܬܗ ܐܘ ܐܝܟ ܥܡܠܐ ܕܐ̈ܝܕܘܗܝ ܦܪܥܬܘܢܝܗܝ

62. Judges 9:17

    ܕܐܬܟܬܫ ܐܒܝ ܥܠ ܐ̈ܦܝܟܘܢ ܘܫܕܐ ܢܦܫܗ ܡܢ ܩܒܘܠ ܘܦܨܝܟܘܢ ܡܢ ܐܝܕܐ ܕܡܕܝܢ

63. Judges 9:18

    ܘܐܢܬܘܢ ܩܡܬܘܢ ܥܠ ܒܝܬ ܐܒܝ ܝܘܡܢܐ ܘܩܛܠܬܘܢ ܠܒܢ̈ܘܗܝ ܫܒܥܝܢ ܓܒܪ̈ܝܢ ܥܠ ܟܐܦܐ ܚܕܐ ܘܐܡܠܟܬܘܢ ܠܐܒܝܡܠܟ ܒܪ ܐܡܬܗ ܥܠ ܡܪ̈ܝܗ ܕܫܟܝܡ ܡܛܠ ܕܐܚܘܟܘܢ ܗܘ

64. Judges 9:19

    ܘܐܢ ܒܩܘܫܬܐ ܘܒܫܪܪܐ ܥܒܕܬܘܢ ܥܡ ܕܒܝܬ ܢܕܘܒܥܝܠ ܘܥܡ ܒܝܬܗ ܝܘܡܢܐ ܚܕܘ ܒܐܒܝܡܠܟ ܘܐܦ ܗܘ ܢܚܕܐ ܒܟܘܢ

65. Judges 9:20

    ܘܐܠܐ ܬܦܘܩ ܢܘܪܐ ܡܢ ܐܒܝܡܠܟ ܘܬܐܟܘܠ ܠܡܪ̈ܝܗ ܕܫܟܝܡ ܘܠܡܪ̈ܝܗ ܕܡܠܘ ܘܬܦܘܩ ܢܘܪܐ ܡܢ ܒܝܬ ܡܪ̈ܝܗ ܕܫܟܝܡ ܘܡܪ̈ܝܗ ܕܡܠܘ ܘܬܐܟܠܝܘܗܝ ܠܐܒܝܡܠܟ

66. Judges 9:21

    ܘܥܪܩ ܝܘܬܡ ܘܐܬܦܠܛ ܘܐܙܠ ܠܕܒܝܪ ܘܐܝܬܒ ܬܡܢ ܐܝܟܐ ܕܝܬ̇ܒ ܗܘܐ ܐܒܝܡܠܟ ܡܢ ܩܕܝܡ

67. Judges 9:22

    ܘܐܫܬܠܛ ܐܒܝܡܠܟ ܥܠ ܐܝܣܪܝܠ ܬܠܬ ܫ̈ܢܝܢ

68. Judges 9:23

    ܘܫܕܪ ܐܠܗܐ ܪܘܚܐ ܒܝܫܬܐ ܥܠ ܐܒܝܡܠܟ ܘܥܠ ܡܪ̈ܝܗ ܕܫܟܝܡ ܘܕܓܠܘ ܡܪ̈ܝܗ ܕܫܟܝܡ ܒܐܒܝܡܠܟ

69. Judges 9:24

    ܡܛܠ ܕܢܐܬܐ ܥܘܠܐ ܕܫܒܥܝܢ ܒ̈ܢܘܗܝ ܕܢܕܘܒܥܠ ܘܕܡܗܘܢ ܠܡܣܡ ܥܠ ܐܒܝܡܠܟ ܐܚܘܗܘܢ ܕܩܛܠ ܐܢܘܢ ܘܥܠ ܡܪ̈ܝܗ ܕܫܟܝܡ ܕܚܝܠܘ ܐ̈ܝܕܘܗܝ ܕܢܩܛܠ ܠܐܚ̈ܘܗܝ

70. Judges 9:25

    ܘܐܟܡܢܘ ܠܗ ܟܡܐܢܐ ܥܠ ܪܝܫ ܛܘܪܐ ܘܚܛܦܘ ܟܠ ܕܥܒܪ ܥܠܝܗܘܢ ܒܐܘܪܚܐ ܘܐܬܚܘܝ ܠܐܒܝܡܠܟ

71. Judges 9:26

    ܘܐܬܐ ܓܥܠ ܒܪ ܥܦܪ ܘܐ̈ܚܘܗܝ ܘܥܒܪ ܒܫܟܝܡ ܘܐܬܬܟܠܘ ܥܠܘܗܝ ܡܪ̈ܝܗ ܕܫܟܝܡ

72. Judges 9:27

    ܘܢܦܩܘ ܠܕܒܪܐ ܘܩܛܦܘ ܟܪ̈ܡܝܗܘܢ ܘܥܨܪܘ ܘܥܒܕܘ ܚܠܘܠܐ ܘܥܠܘ ܠܒܝܬ ܐ̈ܠܗܝܗܘܢ ܘܠܥܣܘ ܘܐܫܬܝܘ ܘܨܚܝܘ ܠܐܒܝܡܠܟ

73. Judges 9:28

    ܘܐܡܪ ܓܥܠ ܒܪ ܥܦܪ ܡܢܘ ܐܒܝܡܠܟ ܘܡܢܘ ܫܟܝܡ ܕܢܦܠܚܝܘܗܝ ܠܐ ܗܘܐ ܒܪ ܢܕܘܒܥܠ ܘܙܟܠ ܕܫܢܝ ܦܘܩܕܢܗ ܦܠܚ ܠܐܢܫ̈ܝ ܚܡܘܪ ܐܒܘܗܝ ܕܫܟܝܡ ܡܛܘܠ ܡܢܐ ܢܦܠܚܝܘܗܝ ܚܢܢ

74. Judges 9:29

    ܡ̇ܢ ܕܝܢ ܐܫܠܡܗ ܠܥܡܐ ܗܢܐ ܒܐ̈ܝܕܝ ܘܐܥܒܪܬܗ ܠܐܒܝܡܠܟ. ܘܐܡܪ ܠܐܒܝܡܠܟ ܐܣܓܐ ܚܝܠܟ ܘܦܘܩ

75. Judges 9:30

    ܘܫܡܥ ܙܟܠ ܫܠܝܛܐ ܕܩܪܝܬܐ ܡ̈ܠܘܗܝ ܕܓܥܠ ܒܪ ܥܦܪ ܘܐܬܚܡܬ ܪܘܓܙܗ

76. Judges 9:31

    ܘܫܕܪ ܐܝ̈ܙܓܕܐ ܠܘܬ ܐܒܝܡܠܟ ܒܢܟܠܐ ܘܐܡܪ ܗܐ ܓܥܠ ܒܪ ܥܦܪ ܗܘ ܘܐܚ̈ܘܗܝ ܐܬܘ ܠܫܟܝܡ ܘܗܐ ܚܕܝܪܝܢ ܠܩܪܝܬܐ ܥܠܝܟ

77. Judges 9:32

    ܗܫܐ ܩܘܡ ܒܠܠܝܐ ܐܢܬ ܘܥܡܐ ܕܥܡܟ ܘܐܬܟܡܢܘ ܒܕܒܪܐ

78. Judges 9:33

    ܘܒܨܦܪܐ ܡܐ ܕܕܢܚܬ ܫܡܫܐ ܩܘܡ ܘܗܠܟ ܥܠ ܩܪܝܬܐ ܘܗܐ ܗܘ ܘܥܡܐ ܕܥܡܗ ܢܦܩܝܢ ܠܘܬܟ ܥܒܕ ܠܗܘܢ ܐܝܟ ܡܐ ܕܣܦܩܐ ܒܐ̈ܝܕܝܟ

79. Judges 9:34

    ܘܩܡ ܐܒܝܡܠܟ ܘܟܠܗ ܥܡܐ ܕܥܡܗ ܒܠܠܝܐ ܘܐܬܟܡܢܘ ܥܠ ܫܟܝܡ ܐܪܒܥܐ ܪ̈ܫܝܢ

80. Judges 9:35

    ܘܢܦܩ ܓܥܠ ܒܪ ܥܦܪ ܘܩܡ ܒܡܥܠܢܐ ܕܬܪܥܐ ܕܩܪܝܬܐ ܘܩܡ ܐܒܝܡܠܟ ܘܥܡܐ ܕܥܡܗ ܡܢ ܟܡܐܢܐ

81. Judges 9:36

    ܘܚܙܐ ܓܥܠ ܠܥܡܐ ܘܐܡܪ ܠܙܟܠ ܗܐ ܥܡܐ ܢܚܬܝܢ ܡܢ ܪ̈ܝܫܝ ܛܘܪ̈ܐ ܘܐܡܪ ܠܗ ܙܟܠ ܛܠܠܐ ܗܘ ܕܛܘܪ̈ܐ ܚܙܐ ܐܢܬ ܐܝܟ ܐܢܫ̈ܐ

82. Judges 9:37

    ܘܐܘܣܦ ܓܥܠ ܘܐܡܪ ܠܙܟܠ ܗܐ ܥܡܐ ܢܚܬܝܢ ܡܢ ܬܘܩܢܗ̇ ܕܐܪܥܐ ܘܪܫܐ ܚܕ ܐܬ̇ܐ ܡܢ ܐܘܪܚܐ ܕܒܝܬ ܒܠܘܛܐ ܕܡܥܘܢܝܢ

83. Judges 9:38

    ܐܡܪ ܠܗ ܙܟܠ ܐܝܟܐ ܗܘ ܦܘܡܟ ܗܘ ܕܐܡܪ ܗܘܐ ܕܡܢܘ ܐܒܝܡܠܟ ܕܢܦܠܚܝܘܗܝ ܠܐ ܗܘܐ ܗܢܐ ܥܡܐ ܕܐܣܠܝܬ ܦܘܩ ܗܫܐ ܘܐܬܟܬܫ ܥܡܗ

84. Judges 9:39

    ܘܢܦܩ ܓܥܠ ܩܕܡ ܡܪ̈ܝܗ ܕܩܪܝܬܐ ܘܐܬܟܬܫ ܥܡ ܐܒܝܡܠܟ

85. Judges 9:40

    ܘܪܕܦܗ ܐܒܝܡܠܟ ܘܥܪܩ ܡܢ ܩܕܡܘܗܝ ܘܢܦܠܘ ܩ̈ܛܝܠܐ ܣ̈ܓܝܐܐ ܥܕܡܐ ܠܡܥܠܢܐ ܕܬܪܥܐ

86. Judges 9:41

    ܘܐܝܬܒ ܐܒܝܡܠܟ ܒܐܕܘܡܐ ܘܛܪܕ ܙܟܠ ܠܓܥܠ ܘܠܐ̈ܚܘܗܝ ܕܠܐ ܢܬܒܘܢ ܒܫܟܝܡ

87. Judges 9:42

    ܘܗܘܐ ܡܢ ܒܬܪ ܝܘܡܐ ܘܢܦܩܘ ܥܡܐ ܠܕܒܪܐ ܘܚܘܝܘ ܠܐܒܝܡܠܟ

88. Judges 9:43

    ܘܕܒܪ ܠܥܡܐ ܘܦܠܓ ܐܢܘܢ ܠܬܠܬܐ ܪ̈ܫܝܢ ܘܐܬܟܡܢܘ ܒܕܒܪܐ ܘܚܙܐ ܘܗܐ ܥܡܐ ܢܦܩ ܡܢ ܩܪܝܬܐ ܘܩܡ ܥܠܝܗܘܢ ܘܩܛܠ ܐܢܘܢ

89. Judges 9:44

    ܘܐܒܝܡܠܟ ܘܪ̈ܝܫܐ ܕܥܡܗ ܗܠܟܘ ܘܩܡܘ ܒܡܥܠܢܐ ܕܬܪܥܐ ܕܩܪܝܬܐ ܘܬܪ̈ܝܢ ܪ̈ܝܫܝܢ ܗܠܟܘ ܥܠ ܟܠ ܕܒܡܕܒܪܐ ܘܩܛܠܘ ܐܢܘܢ

90. Judges 9:45

    ܘܐܒܝܡܠܟ ܐܬܟܬܫ ܒܩܪܝܬܐ ܟܠܗ ܝܘܡܐ ܗܘ ܘܟܒܫܗ̇ ܠܩܪܝܬܐ ܘܠܟܠܗ ܥܡܐ ܕܐܝܬ ܒܗ̇ ܩܛܠ ܘܥܩܪܗ̇ ܠܩܪܝܬܐ ܘܙܪܥܗ̇ ܡܠܘܚܐ

91. Judges 9:46

    ܘܫܡܥܘ ܟܠܗܘܢ ܡܪ̈ܝܗ ܕܡܓܕܠ ܫܟܝܡ ܘܐܬܘ ܠܡܦܣܩ ܒܝܬ ܐܝܠ ܩܝܡܐ

92. Judges 9:47

    ܘܚܘܝܘ ܠܐܒܝܡܠܟ ܕܐܬܟܢܫܘ ܡܪ̈ܝܗ ܕܡܓܕܠ ܫܟܝܡ

93. Judges 9:48

    ܘܣܠܩ ܐܒܝܡܠܟ ܠܛܘܪܐ ܕܨܠܡܘܢ ܘܟܠܗ ܥܡܐ ܕܥܡܗ ܘܢܣܒ ܐܒܝܡܠܟ ܢܪܓܐ ܒܐܝܕܗ ܘܦܣܩ ܣܘܟܬܐ ܕܩܝ̈ܣܐ ܘܫܩܠܗ̇ ܘܣܡܗ̇ ܥܠ ܟܬܦܗ ܘܐܡܪ ܠܥܡܐ ܕܥܡܗ ܡܐ ܕܚܙܝܬܘܢ ܕܥܒܕܬ ܥܒܕܘ ܐܦ ܐܢܬܘܢ ܒܥܓܠ ܐܟܘܬܝ

94. Judges 9:49

    ܘܦܣܩܘ ܓܒܪ ܣܘܟܬܗ ܘܐܙܠܘ ܒܬܪ ܐܒܝܡܠܟ ܘܣܡܘ ܟܫܝܬܐ ܘܐܘܩܕܘܗ ܠܩܪܝܬܐ ܒܢܘܪܐ ܘܡܝܬܘ ܟܠܗܘܢ ܐܢܫܐ ܕܐܝܬ ܒܡܓܕܠ ܫܟܝܡ ܒܢܘܪܐ ܐܝܟ ܐܠܦ ܒܝܬ ܓܒܪ̈ܐ ܠܢܫ̈ܐ

95. Judges 9:50

    ܘܐܙܠ ܐܒܝܡܠܟ ܠܬܒܨ ܘܫܪܐ ܒܬܒܨ ܘܐܚܕܗ̇

96. Judges 9:51

    ܘܡܓܕܠܐ ܥܫܝܢܐ ܗܘܐ ܒܓܘܗ̇ ܕܩܪܝܬܐ ܘܥܪܩܘ ܠܬܡܢ ܟܠܗܘܢ ܓܒܪ̈ܐ ܘܢܫ̈ܐ ܘܟܠܗܘܢ ܡܪ̈ܝܗ ܕܩܪܝܬܐ ܘܐܚܕܘ ܒܐ̈ܦܝܗܘܢ ܘܣܠܩܘ ܠܐܓܪܐ ܕܡܓܕܠܐ

97. Judges 9:52

    ܘܡܛܝ ܐܒܝܡܠܟ ܥܕܡܐ ܠܡܓܕܠܐ ܘܡܬܟܬܫ ܒܗ ܘܩܪܒ ܥܕܡܐ ܠܬܪܥܐ ܕܡܓܕܠܐ ܕܢܘܩܕܝܘܗܝ ܒܢܘܪܐ

98. Judges 9:53

    ܘܫܕܬ ܐܢܬܬܐ ܚܕܐ ܬܒܪܐ ܕܪܟܒܐ ܕܪܚܝܐ ܥܠ ܪܝܫܗ ܕܐܒܝܡܠܟ ܘܬܒܪܬܗ ܠܪܝܫܗ

99. Judges 9:54

    ܘܩܪܐ ܡܣܪܗܒܐܝܬ ܠܛܠܝܐ ܫ̇ܩܠ ܡܐ̈ܢܘܗܝ ܘܐܡܪ ܠܗ ܫܡܘܛ ܣܝܦܟ ܘܩܛܘܠܝܢܝ ܒܗ ܕܠܐ ܢܐܡܪܘܢ ܥܠܝ ܕܐܢܬܬܐ ܩܛܠܬܗ ܘܕܩܪܗ ܥܠܝܡܐ ܘܡܝܬ

100. Judges 9:55

     ܘܚܙܘ ܒ̈ܢܝ ܐܝܣܪܝܠ ܕܡܝܬ ܠܗ ܐܒܝܡܠܟ ܘܐܙܠܘ ܐܢܫ ܠܐܬܪܗ

← Previous · Next → — showing 201–300 of 617

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.