← All works

Peshitta Joel

Peshitta (Syriac Old Testament) · 73 sections

1. Joel 1:1

   ܦܬܓܡܗ ܕܡܪܝܐ ܕܗܘܐ ܥܠ ܝܘܐܝܠ ܒܪ ܒܬܘܐܝܠ

2. Joel 1:2

   ܫܡܥܘ ܗܕܐ ܩܫܝ̈ܫܐ ܘܨܘܬܘ ܟܘܠ ܥܡܘܪ̈ܝܗ̇ ܕܐܪܥܐ ܐܢ ܗܘܬ ܐܝܟ ܗܕܐ ܒܝ̈ܘܡܝܟܘܢ ܐܘ ܒܝ̈ܘܡܝ ܐ̈ܒܗܝܟܘܢ

3. Joel 1:3

   ܐܫܬܥܘ ܥܠܝܗ̇ ܠܒ̈ܢܝܟܘܢ ܘܒ̈ܢܝܟܘܢ ܠܒ̈ܢܝܗܘܢ ܘܒܢܝ̈ܗܘܢ ܠܕܪܐ ܐܚܪܢܐ

4. Joel 1:4

   ܕܡܕܡ ܕܐܘܬܪ ܡܫܘܛܐ ܐܟܠ ܩܡܨܐ ܦܪܚܐ ܘܡܕܡ ܕܐܘܬܪ ܩܡܨܐ ܦܪܚܐ ܐܟܠ ܩܡܨܐ ܙܚܠܐ ܘܡܕܡ ܕܐܘܬܪ ܙܚܠܐ ܐܟܠ ܨܪܨܘܪܐ

5. Joel 1:5

   ܐܬܬܥܝܪܘ ܪ̈ܘܝܐ ܘܒܟܘ ܘܐܝܠܠܘ ܟܘܠ ܫܬ̈ܝܝ ܚܡܪܐ ܥܠ ܚܡܪܐ ܕܥܒܪ ܡܢ ܦܘܡܟܘܢ

6. Joel 1:6

   ܡܛܠ ܕܥܡܐ ܣܠܩ ܠܐܪܥܝ ܥܫܝܢ ܘܠܝܬ ܠܗ ܡܢܝܢ ܫܢ̈ܘܗܝ ܐܝܟ ܫ̈ܢܐ ܕܐܪܝܐ ܘܢܝ̈ܒܘܗܝ ܐܝܟ ܢܝ̈ܒܐ ܕܓܘܪܝܐ ܕܐܪܝܐ

7. Joel 1:7

   ܥܒܕ ܓܦܬܝ ܠܚܘܪܒܐ ܘܬܬܝ ܠܦܘܫܚܐ ܦܫܚܗ̇ ܘܫܕܗ̇ ܘܚ̇ܘܪ ܣܘ̈ܟܝܗ̇

8. Joel 1:8

   ܐܠܝ ܐܝܟ ܒܬܘܠܬܐ ܕܟܒܝܢܐ ܣܩܐ ܥܠ ܒܥܠ ܛܠܝܘܬܗ̇

9. Joel 1:9

   ܥܒܪ ܣܡܝܕܐ ܘܢܘܩܝܐ ܡܢ ܒܝܬܗ ܕܡܪܝܐ ܝܬܒܘ ܡ̈ܠܟܐ ܒܐܒܠܐ ܘܟܗ̈ܢܐ ܕܡܫܡܫܝܢ ܠܡܪܝܐ

10. Joel 1:10

    ܐܬܒܙܬ ܚܩܠܐ ܘܝܬܒܬ ܒܐܒܠܐ ܐܪܥܐ ܡܛܠ ܕܐܬܒܙܙ ܥܒܘܪܐ ܘܝܒܫ ܚܡܪܐ ܘܚܪܒܘ ܙܝ̈ܬܐ

11. Joel 1:11

    ܒܗܬܘ ܐܟܪ̈ܐ ܘܐܝܠܠܘ ܟܪ̈ܡܐ ܥܠ ܚ̈ܛܐ ܘܥܠ ܣܥܪ̈ܐ ܕܥܒܪ ܚܨܕܐ ܕܚܩܠܐ

12. Joel 1:12

    ܓܦܬܐ ܝܒܫܬ ܘܬܬܐ ܚܪܒܬ ܘܪ̈ܘܡܢܐ ܘܕܩ̈ܠܐ ܘܚܙܘܪ̈ܐ ܘܟܠܗܘܢ ܐ̈ܝܠܢܐ ܕܚܩܠܐ ܝܒܫܘ ܡܛܠ ܕܒܛܠܬ ܚܕܘܬܐ ܡܢ ܒܢ̈ܝ ܐܢܫܐ

13. Joel 1:13

    ܟܗ̈ܢܐ ܐܬܟܒܢܘ ܣ̈ܩܐ ܘܐܪܩܕܘ ܘܐܝܠܠܘ ܡܫܡܫ̈ܢܝ ܡܕܒܚܐ ܥܘܠܘ ܒܘܬܘ ܒܣ̈ܩܐ ܡܫܡ̈ܫܢܘܗܝ ܕܐܠܗܝ ܡܛܠ ܕܐܬܟܠܝ ܡܢ ܒܝܬܗ ܕܐܠܗܟܘܢ ܣܡܝܕܐ ܘܢܘܩܝܐ

14. Joel 1:14

    ܩܕܫܘ ܨܘܡܐ ܩܪܘ ܟܢܘܫܝܐ ܐܬܟܢܫܘ ܩܫܝܫ̈ܐ ܘܟܠܗܘܢ ܥܡܘܪ̈ܝܗ̇ ܕܐܪܥܐ ܠܒܝܬܗ ܕܡܪܝܐ ܐܠܗܟܘܢ ܓܥܘ ܠܘܬ ܡܪܝܐ ܐܠܗܟܘܢ ܘܐܡܪܘ

15. Joel 1:15

    ܐܘܗ ܐܘܗ ܠܝܘܡܐ ܕܩܪܝܒ ܗܘ ܝܘܡܗ ܕܡܪܝܐ ܘܒܙܬܐ ܡܢ ܐܠܗܐ ܬܐܬܐ

16. Joel 1:16

    ܗܐ ܠܘܩܒܠ ܥܝܢܝ̈ܢ ܥܒܪ ܡܐ̈ܟܠܬܐ ܡܢ ܒܝܬܗ ܕܐܠܗܢ ܘܚܕܘܬܐ ܘܕܝܨܐ

17. Joel 1:17

    ܘ̈ܛܘܝ ܡܘܫܚ̈ܐ ܥܠ ܐܘܪ̈ܘܬܗܝܢ ܚܪܒܘ ܐܘܨܪ̈ܐ ܘܐܣܬܚܦ ܡܥܨܪ̈ܬܐ ܘܝܒܫ ܥܒܘܪܐ

18. Joel 1:18

    ܠܡܢܐ ܡܬܬܢܚܐ ܒܥܝܪܐ ܘܒܟܝܢ ܒܩܪ̈ܐ ܕܬܘܪ̈ܐ ܕܠܝܬ ܠܗܝܢ ܪܥܝܐ ܐܦ ܓܙܪ̈ܐ ܕܥܢܐ ܣܦܘ

19. Joel 1:19

    ܠܘܬܟ ܡܪܝܐ ܐܩܪܐ ܡܛܠ ܕܐܟܠܬ ܢܘܪܐ ܠܕܝܪ̈ܐ ܕܡܕܒܪܐ ܘܫܠܗܒܝܬܐ ܐܘܩܕܬ ܠܟܠܗܘܢ ܐܝ̈ܠܢܐ ܕܕܒܪܐ

20. Joel 1:20

    ܐܦ ܚܝܘܬܐ ܕܕܒܪܐ ܓܥܝܐ ܠܘܬܟ ܡܛܠ ܕܝܒܫܘ ܦܨ̈ܝܕܐ ܕܡ̈ܝܐ ܘܐܟܠܬ ܢܘܪܐ ܠܕܝܪ̈ܐ ܕܡܕܒܪܐ

21. Joel 2:1

    ܩܪܘ ܫܝܦܘܪܐ ܒܨܗܝܘܢ ܘܩܥܘ ܒܛܘܪܐ ܕܩܘܕܫܝ ܢܙܘܥܘܢ ܟܘܠܗܘܢ ܥܡܘܪ̈ܝܗ̇ ܕܐܪܥܐ ܡܛܠ ܕܡܛܐ ܝܘܡܗ ܕܡܪܝܐ ܘܩܪܒ

22. Joel 2:2

    ܝܘܡܐ ܕܚܫܘܟܐ ܘܕܥܡܛܢܐ ܝܘܡܐ ܕܥܢܢܐ ܘܕܥܪܦܠܐ ܐܝܟ ܫܦܪܐ ܕܦܪܝܣ ܥܠ ܛܘܪ̈ܐ ܥܡܐ ܣܓܝܐܐ ܘܥܫܝܢܐ ܕܐܟܘܬܗ ܠܐ ܗܘܐ ܡܢ ܥܠܡ ܘܒܬܪܗ ܠܐ ܢܗܘܐ ܥܕܡܐ ܠܫ̈ܢܝ ܕܪܕܪ̈ܝܢ

23. Joel 2:3

    ܩܕܡܘܗܝ ܐܟܠܐ ܢܘܪܐ ܘܒܬܪܗ ܡܘܩܕܐ ܫܠܗܒܝܬܐ ܐܝܟ ܦܪܕܝܣܐ ܕܥܕܢ ܐܪܥܐ ܩܕܡܘܗܝ ܘܒܣܬܪܗ ܡܕܒܪܐ ܚܪܒܐ ܘܠܝܬ ܕܡܫܬܘܙܒ ܡܢܗ

24. Joel 2:4

    ܐܝܟ ܚܙܘܐ ܕܪ̈ܟܫܐ ܚܙܘܗ ܘܐܝܟ ܦܪ̈ܫܐ ܗܟܢܐ ܪܗܛܝܢ

25. Joel 2:5

    ܐܝܟ ܩܠܐ ܕܡܪ̈ܟܒܬܐ ܕܡܢܗ̈ܙܢ ܥܠ ܪ̈ܝܫܝ ܛܘܪ̈ܐ ܘܐܝܟ ܩܠܐ ܕܫܠܗܒܝܬܐ ܕܢܘܪܐ ܕܐܟܠܐ ܚܒܬܐ ܘܐܝܟ ܥܡܐ ܥܫܝܢܐ ܕܣܕܝܪ ܠܩܪܒܐ

26. Joel 2:6

    ܡܢ ܩܕܡܘܗܝ ܢܙܘܥܘܢ ܥܡ̈ܡܐ ܘܟܠ ܐ̈ܦܝܢ ܢܐܟܡ̈ܢ ܐܝܟ ܫܘܚܪ̈ܐ ܕܩܕܪܐ

27. Joel 2:7

    ܐܝܟ ܓܢܒܪ̈ܐ ܢܪܗܛܘܢ ܘܐܝܟ ܓܒܪ̈ܐ ܩܪ̈ܒܬܢܐ ܢܣܩܘܢ ܒܫܘܪ̈ܐ ܘܓܒܪ ܒܐܘܪܚܗ ܢܐܙܠܘܢ ܘܠܐ ܢܣܛܘܢ ܡܢ ܐܘܪ̈ܚܬܗܘܢ

28. Joel 2:8

    ܘܓܒܪ ܠܐܚܘܗܝ ܠܐ ܢܕܚܩܘܢ ܐܠܐ ܓܒܪ ܒܫܒܝܠܗ ܢܐܙܠܘܢ ܡܢ ܝܘܩܪܐ ܕܙܝܢܗܘܢ ܢܦܠܘܢ ܘܠܐ ܢܣܩܘܢ ܠܪܝܫ

29. Joel 2:9

    ܒܡ̈ܕܝܢܬܐ ܢܣܩܘܢ ܘܥܠ ܫܘܪ̈ܐ ܢܪܗܛܘܢ ܘܥܠ ܒ̈ܬܐ ܢܣܩܘܢ ܘܡܢ ܟܘ̈ܐ ܢܥܠܘܢ ܐܝܟ ܓܢ̈ܒܐ

30. Joel 2:10

    ܩܕܡܘܗܝ ܐܬܕܠܚܬ ܐܪܥܐ ܘܙܥܘ ܫܡܝܐ ܫܡܫܐ ܘܣܗܪܐ ܚܫܟܘ ܘܥܪܒ ܢܘܗܪܐ ܕܟܘ̈ܟܒܐ

31. Joel 2:11

    ܘܡܪܝܐ ܝܗܒ ܩܠܗ ܩܕܡ ܚܝܠܗ ܡܛܘܠ ܕܣܓܝܐܐ ܗܝ ܛܒ ܡܫܪܝܬܗ ܘܥܫܝܢ ܥ̇ܒܕܐ ܕܦܬܓܡܗ ܡܛܠ ܕܪܒ ܗܘ ܝܘܡܗ ܕܡܪܝܐ ܘܕܚܝܠ ܛܒ ܘܡܢܘ ܡܫܟܚ ܡܣܝܒܪ ܠܗ

32. Joel 2:12

    ܡܟܝܠ ܐܡܪ ܡܪܝܐ ܐܬܦܢܘ ܠܘܬܝ ܡܢ ܟܠܗ ܠܒܟܘܢ ܒܨܘܡܐ ܘܒܒܟܬܐ ܘܒܡܪ̈ܩܕܬܐ

33. Joel 2:13

    ܘܨܪܘ ܠܒܝ̈ܟܘܢ ܘܠܐ ܢܚ̈ܬܝܟܘܢ ܘܐܬܦܢܘ ܠܘܬ ܡܪܝܐ ܐܠܗܟܘܢ ܡܛܠ ܕܡܪܚܡܢܐ ܗܘ ܘܡܪܚܦܢܐ ܘܢܓܝܪܐ ܪܘܚܗ ܘܣܓܝܐܐ ܛܝܒܘܬܗ ܘܡܗܦܟ ܒܝܫܬܐ

34. Joel 2:14

    ܡ̇ܢ ܝܕܥ ܐܢ ܡܬܦܢܐ ܘܡܪܚܡ ܥܠܝܢ ܘܡܘܬܪ ܒܐܬܪܗ ܒܘܪܟܬܐ ܘܣܡܝܕܐ ܘܢܘܩܝܐ ܠܡܪܝܐ ܐܠܗܟܘܢ

35. Joel 2:15

    ܩܪܘ ܫܝܦܘܪܐ ܒܨܗܝܘܢ ܩܕܫܘ ܨܘܡܐ ܩܪܘ ܟܢܘܫܝܐ

36. Joel 2:16

    ܟܢܘܫܘ ܥܡܐ ܩܕܫܘ ܥܕܬܐ ܟܢܘܫܘ ܣܒ̈ܐ ܘܟܢܘܫܘ ܥܠܝܡ̈ܐ ܘܝܢܩ̈ܝ ܬ̈ܕܝܐ ܢܦܘܩ ܚܬܢܐ ܡܢ ܩܝܛܘܢܗ ܘܟܠܬܐ ܡܢ ܒܝܬ ܓܢܘܢܗ̇

37. Joel 2:17

    ܒܝܢ̈ܝ ܩܣܛܪܘܡܐ ܠܡܕܒܚܐ ܢܒܟܘܢ ܟܗ̈ܢܐ ܡܫܡ̈ܫܢܘܗܝ ܕܡܪܝܐ ܘܢܐܡܪܘܢ ܚܘܣ ܡܪܝܐ ܥܠ ܥܡܟ ܘܠܐ ܬܬܠ ܝܪܬܘܬܟ ܠܚܣܕܐ ܘܠܫܘܠܛܢܐ ܕܥܡ̈ܡܐ ܕܠܐ ܢܐܡܪܘܢ ܥܡ̈ܡܐ ܐܝܟܘ ܐܠܗܗܘܢ

38. Joel 2:18

    ܘܛܢ ܡܪܝܐ ܒܐܪܥܗ ܘܚܣ ܥܠ ܥܡܗ

39. Joel 2:19

    ܘܥܢܐ ܡܪܝܐ ܘܐܡܪ ܠܥܡܗ ܗܐ ܡܫܕܪ ܐܢܐ ܠܟܘܢ ܥܒܘܪܐ ܘܚܡܪܐ ܘܡܫܚܐ ܕܬܣܒܥܘܢ ܘܠܐ ܐܬܠܟܘܢ ܬܘܒ ܠܚܣܕܐ ܕܥܡ̈ܡܐ

40. Joel 2:20

    ܘܠܓܪܒܝܝܐ ܐܕܚܘܩ ܡܢܟܘܢ ܘܐܕܚܩܝܘܗܝ ܠܐܪܥܐ ܨܗܝܬܐ ܘܚܪܒܬܐ ܐ̈ܦܘܗܝ ܠܝܡܐ ܩܕܡܝܐ ܘܚܪܬܗ ܠܝܡܐ ܐܚܪܝܐ ܘܢܡܚܐ ܪܝܚܗ ܘܬܣܩ ܣܘܬܗ ܥܠ ܕܐܬܬܪܝܡ ܠܡܥܒܕ

41. Joel 2:21

    ܠܐ ܬܕܚܠܝܢ ܐܪܥܐ ܕܘܨܝ ܘܚܕܝ ܡܛܠ ܕܐܬܬܪܝܡ ܡܪܝܐ ܠܡܥܒܕ

42. Joel 2:22

    ܠܐ ܬܕܚܠܝܢ ܚܝܘܬܐ ܕܕܒܪܐ ܡܛܠ ܕܝܥܐ ܬܕܐܐ ܒܕܝܪ̈ܐ ܕܡܕܒܪܐ ܘܐܝܠܢܐ ܝܗܒ ܦܐܪ̈ܘܗܝ ܘܓܦܬܐ ܘܬܬܐ ܝܗܒ ܚܝܠܗܝܢ

43. Joel 2:23

    ܒܢ̈ܝ ܨܗܝܘܢ ܕܘܨܘ ܘܚܕܘ ܒܡܪܝܐ ܐܠܗܟܘܢ ܕܝܗܒ ܠܟܘܢ ܡܐܟܘܠܬܐ ܕܙܕܝܩܘܬܐ ܘܡܚܬ ܠܟܘܢ ܡܛܪܐ ܐܪܒܝܥܝܐ ܘܠܩܝܫܝܐ ܐܝܟ ܕܡܢ ܠܘܩܕܡ

44. Joel 2:24

    ܘܢܬܡܠܘܢ ܐܕܪ̈ܐ ܥܒܘܪܐ ܘܢܫ̈ܦܥܢ ܡܥܨܪ̈ܬܐ ܚܡܪܐ ܘܡܫܚܐ

45. Joel 2:25

    ܘܐܦܪܘܥܟܘܢ ܫ̈ܢܝܐ ܕܐܟܠ ܩܡܨܐ ܦܪܚܐ ܘܙܚܠܐ ܘܨܪܨܘܪܐ ܘܡܫܘܛܐ ܚܝܠܝ ܪܒܐ ܕܫܕܪܬ ܥܠܝܟܘܢ

46. Joel 2:26

    ܘܬܐܟܠܘܢ ܘܬܣܒܥܘܢ ܘܬܫܒܚܘܢ ܠܫܡܗ ܕܡܪܝܐ ܐܠܗܟܘܢ ܕܥܒܕ ܥܡܟܘܢ ܬܕܡܪ̈ܬܐ ܘܠܐ ܢܒܗܬ ܥܡܝ ܠܥܠܡ

47. Joel 2:27

    ܘܬܕܥܘܢ ܕܒܓܘ ܐܝܣܪܝܠ ܐܢܐ ܐܢܐ ܐܢܐ ܡܪܝܐ ܐܠܗܟܘܢ ܘܠܝܬ ܬܘܒ ܠܒܪ ܡܢܝ ܘܠܐ ܢܒܗܬ ܥܡܝ ܠܥܠܡ

48. Joel 3:1

    ܘܡܢ ܒܬܪܟܢ ܐܫܘܕ ܪܘܚܝ ܥܠ ܟܠܒܣܪ ܘܢܬܢܒܘܢ ܒ̈ܢܝܟܘܢ ܘܒܢ̈ܬܟܘܢ ܘܣܒܝ̈ܟܘܢ ܚ̈ܠܡܐ ܢܚܠܡܘܢ ܘܥܠܝܡ̈ܝܟܘܢ ܚܙܘ̈ܢܐ ܢܚܙܘܢ

49. Joel 3:2

    ܘܐܦ ܥܠ ܥܒ̈ܕܐ ܘܥܠ ܐ̈ܡܗܬܐ ܐܫܘܕ ܪܘܚܝ ܒܝ̈ܘܡܬܐ ܗܢܘܢ

50. Joel 3:3

    ܘܐܥܒܕ ܬܕܡܪ̈ܬܐ ܒܫܡܝܐ ܘܒܐܪܥܐ ܕܡܐ ܘܢܘܪܐ ܘܥܛܪܐ ܕܬܢܢܐ

51. Joel 3:4

    ܫܡܫܐ ܢܬܗܦܟ ܠܚܫܘܟܐ ܘܣܗܪܐ ܠܕܡܐ ܩܕܡ ܕܢܐܬܐ ܝܘܡܗ ܕܡܪܝܐ ܪܒܐ ܘܕܚܝܠܐ

52. Joel 3:5

    ܘܟܠ ܕܢܩܪܐ ܫܡܗ ܕܡܪܝܐ ܢܬܦܨܐ ܡܛܠ ܕܒܛܘܪܐ ܕܨܗܝܘܢ ܘܒܐܘܪܫܠܡ ܬܗܘܐ ܡܫܘܙܒܘܬܐ ܐܝܟ ܕܐܡܪ ܡܪܝܐ ܠܡܫ̈ܘܙܒܐ ܕܩܪܐ ܡܪܝܐ

53. Joel 4:1

    ܡܛܠ ܕܒܝ̈ܘܡܬܐ ܗ̇ܢܘܢ ܘܒܙܒܢܐ ܗ̇ܘ ܕܡܗܦܟ ܐܢܐ ܫܒܝܬܐ ܕܝܗܘܕܐ ܘܕܐܘܪܫܠܡ

54. Joel 4:2

    ܐܟܢܫ ܠܟܠܗܘܢ ܥܡ̈ܡܐ ܘܐܚܬ ܐܢܘܢ ܠܢܚܠܐ ܕܝܘܫܦܛ ܘܐܕܘܢ ܥܡܗܘܢ ܬܡܢ ܥܠ ܐ̈ܦܝ ܥܡܝ ܘܥܠ ܐ̈ܦܝ ܐܝܣܪܝܠ ܝܪܬܘܬܝ ܕܐܬܒܕܪܘ ܒܝܬ ܥܡ̈ܡܐ ܥܠ ܕܦܠܓܘ ܐܪܥܝ

55. Joel 4:3

    ܘܥܠ ܥܡܝ ܐܪܡܝܘ ܦܨ̈ܐ ܘܝܗܒܘ ܛ̈ܠܝܐ ܒܐܓܪ ܙܢܝ̈ܬܐ ܘܛܠܝ̈ܬܐ ܙܒܢܘ ܒܚܡܪܐ ܘܐܫܬܝܘ

56. Joel 4:4

    ܡܢܐ ܚܫܝ̈ܒܢ ܐܢܬܝܢ ܠܝ ܨܘܪ ܘܨܝܕܢ ܘܟܠܗ ܓܠܝܠܐ ܕܦܠܫܬ ܕܠܡܐ ܦܘܪܥܢܐ ܦܪܥܝܢ ܐܢܬܘܢ ܠܝ ܘܐܢ ܚ̈ܘܒܠܐ ܪܡܝܢ ܐܢܬܘܢ ܥܠܝ ܒܥܓܠ ܘܡܣܪܗܒܐܝܬ ܐܗܦܟ ܦܘܪܥܢܟܘܢ ܒܪܝܫܟܘܢ

57. Joel 4:5

    ܥܠ ܕܢܣܒܬܘܢ ܟܣܦܝ ܘܕܗܒܝ ܘܡܐ̈ܢܝ ܫܦܝܪ̈ܐ ܐܥܠܬܘܢ ܠܗܝ̈ܟܠܝܟܘܢ

58. Joel 4:6

    ܘܒܢ̈ܝ ܝܗܘܕܐ ܘܒܢ̈ܝ ܐܘܪܫܠܡ ܙܒܢܬܘܢ ܠܒܢ̈ܝ ܝܘ̈ܢܝܐ ܕܬܪܚܩܘܢ ܐܢܘܢ ܡܢ ܬܚܘܡܗܘܢ

59. Joel 4:7

    ܗܐ ܐܢܐ ܡܥܝܪ ܐܢܐ ܠܗܘܢ ܡܢ ܐܬܪܐ ܕܙܒܢܬܘܢ ܐܢܘܢ ܠܬܡܢ ܘܐܗܦܟ ܦܘܪܥܢܟܘܢ ܒܪܝܫܟܘܢ

60. Joel 4:8

    ܘܐܫܠܡ ܒ̈ܢܝܟܘܢ ܘܒܢ̈ܬܟܘܢ ܒܝܕ ܒܢ̈ܝ ܝܗܘܕܐ ܘܢܙܒܢܘܢ ܐܢܘܢ ܠܫܒܐ ܠܥܡܐ ܪܚܝܩܐ ܡܛܠ ܕܡܪܝܐ ܡܠܠ

61. Joel 4:9

    ܐܟܪܙܘ ܗܕܐ ܒܝܬ ܥܡ̈ܡܐ ܩܕܫܘ ܩܪܒܐ ܐܥܝܪܘ ܠܓܢܒܪ̈ܐ ܢܩܪܒܘܢ ܘܢܣܩܘܢ ܟܠܗܘܢ ܓܒܪ̈ܐ ܩܪ̈ܒܬܢܐ

62. Joel 4:10

    ܪܘܥܘ ܣ̈ܟܝ ܦܕܢܝ̈ܟܘܢ ܠܣ̈ܝܦܐ ܘܡ̈ܓܠܝܟܘܢ ܠܪ̈ܘܡܚܐ ܘܡ̇ܢ ܕܚܠܫ ܢܐܡܪ ܕܓܢܒܪܐ ܐܢܐ

63. Joel 4:11

    ܐܬܟܢܫܘ ܘܬܘ ܟܠܟܘܢ ܥܡ̈ܡܐ ܕܚܕܝܪ̈ܝܢ ܐܬܩܪܒܘ ܘܬܡܢ ܬܒܪ ܡܪܝܐ ܓܢܒܪܘܬܟܘܢ

64. Joel 4:12

    ܢܬܬܥܝܪܘܢ ܘܢܣܩܘܢ ܥܡ̈ܡܐ ܠܥܘܡܩܐ ܕܝܘܫܦܛ ܡܛܠ ܕܬܡܢ ܐܬܒ ܠܡܕܢ ܠܟܠܗܘܢ ܥܡ̈ܡܐ ܕܚܕܝܪ̈ܝܢ

65. Joel 4:13

    ܫܪܪܘ ܡ̈ܓܠܐ ܡܛܠ ܕܒܫܠ ܩܛܦܐ ܥܘܠܘ ܕܘܫܘ ܡܛܠ ܕܡܠܘ ܓܘ̈ܒܐ ܘܫܦܥ ܡܥܨܪ̈ܬܐ ܡܛܠ ܕܣܓܝܬ ܒܝܫܘܬܗܘܢ

66. Joel 4:14

    ܪܓܫܐ ܕܪ̈ܓܘܫܝܐ ܒܥܘܡܩܐ ܕܦܣ̈ܝܩܬܐ ܡܛܠ ܕܩܪܝܒ ܗܘ ܝܘܡܗ ܕܡܪܝܐ ܒܥܘܡܩܐ ܕܦܣܝ̈ܩܬܐ

67. Joel 4:15

    ܫܡܫܐ ܘܣܗܪܐ ܚܫܟܘ ܘܥܪܒ ܢܘܗܪܐ ܕܟܘ̈ܟܒܐ

68. Joel 4:16

    ܘܡܪܝܐ ܡܢ ܨܗܝܘܢ ܢܢܗܡ ܘܡܢ ܐܘܪܫܠܡ ܢܬܠ ܩܠܗ ܘܢܙܘܥܘܢ ܫܡܝܐ ܘܐܪܥܐ ܘܡܪܝܐ ܢܚܘܣ ܥܠ ܥܡܗ ܘܢܚܝܠ ܠܒܢ̈ܝ ܐܝܣܪܝܠ

69. Joel 4:17

    ܘܬܕܥܘܢ ܕܐܢܐ ܐܢܐ ܡܪܝܐ ܐܠܗܟܘܢ ܕܥܡܪ ܐܢܐ ܒܨܗܝܘܢ ܛܘܪܐ ܕܩܘܕܫܝ ܘܬܗܘܐ ܐܘܪܫܠܡ ܩܕܝܫܐ ܘܢܘܟܪ̈ܝܐ ܬܘܒ ܠܐ ܢܥܡܪܘܢ ܒܗ̇

70. Joel 4:18

    ܒܗ ܒܝܘܡܐ ܗ̇ܘ ܢܛܦܘܢ ܛܘܪ̈ܐ ܚܠܝܘܬܐ ܘܪ̈ܡܬܐ ܢܪ̈ܕܝܢ ܚܠܒܐ ܘܟܠܗܘܢ ܦܨ̈ܝܕܐ ܕܝܗܘܕܐ ܢܪܕܘܢ ܡ̈ܝܐ ܘܡܒܘܥܐ ܡܢ ܒܝܬܗ ܕܡܪܝܐ ܢܦܘܩ ܘܢܫܩܐ ܠܢܚܠܐ ܕܣܛܝܡ

71. Joel 4:19

    ܡܨܪܝܢ ܠܚܒܠܐ ܬܗܘܐ ܘܐܕܘܡ ܠܡܕܒܪܐ ܚܪܒܐ ܡܢ ܚܛܘܦܝܐ ܕܒܢ̈ܝ ܝܗܘܕܐ ܕܐܫܕܘ ܕܡܐ ܙܟܝܐ ܒܐܪܥܗܘܢ

72. Joel 4:20

    ܝܗܘܕܐ ܠܥܠܡ ܬܬܒ ܘܐܘܪܫܠܡ ܠܕܪ̈ܕܪܝܢ

73. Joel 4:21

    ܘܐܬܒܥ ܕܡܗܘܢ ܘܠܐ ܐܚܣܐ ܘܡܪܝܐ ܥܡܪ ܒܨܗܝܘܢ

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.