← All works
Peshitta Jeremiah Peshitta (Syriac Old Testament) · 1,366 sections
Single column Two columns
Jeremiah 29:12 Jeremiah 29:13 Jeremiah 29:14 ܬܫܟܚܘܢܢܝ ܐܡܪ ܡܪܝܐ ܘܐܗܦܟ ܫܒܝܬܟܘܢ ܘܐܟܢܫܟܘܢ ܡܢ ܟܠ ܥܡ̈ܡܐ ܘܡܢ ܟܘܠ ܐܪ̈ܥܬܐ ܕܒܕܪܬܟܘܢ ܠܬܡܢ ܐܡܪ ܡܪܝܐ ܘܐܗܦܟܟܘܢ ܠܐܬܪܐ ܕܐܫܒܝܬܟܘܢ ܡܢ ܬܡܢ
Jeremiah 29:15 ܡܛܠ ܕܐܡܪܬܘܢ ܕܐܩܝܡ ܠܢ ܡܪܝܐ ܢ̈ܒܝܐ ܒܒܒܠ
Jeremiah 29:16 ܡܛܠ ܕܗܟܢܐ ܐܡܪ ܡܪܝܐ ܥܠ ܡܠܟܐ ܕܝܬܒ ܥܠ ܟܘܪܣܝܗ ܕܕܘܝܕ ܘܥܠ ܟܠܗ ܥܡܐ ܕܝܬܒ ܒܩܪܝܬܐ ܗܕܐ ܐ̈ܚܝܟܘܢ ܐܝܠܝܢ ܕܠܐ ܢܦܩܘ ܥܡܟܘܢ ܒܫܒܝܬܐ
Jeremiah 29:17 ܗܟܢܐ ܐܡܪ ܡܪܝܐ ܚܝܠܬܢܐ ܗܐ ܡܫܕܪ ܐܢܐ ܥܠܝܗܘܢ ܚܪܒܐ ܘܟܦܢܐ ܘܡܘܬܢܐ ܘܐܥܒܕ ܐܢܘܢ ܐܝܟ ܬܐ̈ܢܐ ܒܝܫ̈ܬܐ ܕܠܐ ܡܬܐ̈ܟܠܢ ܡܢ ܒܝܫܘܬܗܝܢ
Jeremiah 29:18 ܘܐܪܕܘܦ ܒܬܪܗܘܢ ܒܚܪܒܐ ܘܒܟܦܢܐ ܘܒܡܘܬܢܐ ܘܐܬܠ ܐܢܘܢ ܠܙܘܥܬܐ ܠܟܘܠܗܝܢ ܡ̈ܠܟܘܬܐ ܕܐܪܥܐ ܠܬܡܗܐ ܘܠܠܘܛܬܐ ܘܠܚܣܕܐ ܘܠܡܫܪܘܩܝܬܐ ܒܟܠܗܘܢ ܥܡ̈ܡܐ ܕܒܕܪܬ ܐܢܘܢ ܠܬܡܢ
Jeremiah 29:19 ܥܠ ܕܠܐ ܫܡܥܘ ܦܬ̈ܓܡܝ ܘܫܕܪܬ ܠܘܬܗܘܢ ܟܠܗܘܢ ܥܒ̈ܕܝ ܢܒ̈ܝܐ ܩܕܡܬ ܘܫܕܪܬ ܘܠܐ ܫܡܥܘ ܐܢܘܢ ܐܡܪ ܡܪܝܐ
Jeremiah 29:20 ܘܐܢܬܘܢ ܫܡܥܘ ܦܬܓܡܗ ܕܡܪܝܐ ܟܠܗ̇ ܫܒܝܬܐ ܕܐܫܬܒܝܬ ܡܢ ܐܘܪܫܠܡ ܠܒܒܠ
Jeremiah 29:21 ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ ܥܠ ܐܚܒ ܒܪ ܩܘܠܝܐ ܘܥܠ ܨܕܩܝܐ ܒܪ ܡܥܣܝܐ ܕܡܬܢܒܝܢ ܠܟܘܢ ܒܫܡܝ ܒܫܘܩܪܐ ܗܐ ܡܫܠܡ ܐܢܐ ܠܗܘܢ ܒܐܝܕܐ ܕܢܒܘܟܕܢܨܪ ܡܠܟܐ ܕܒܒܠ ܘܢܩܛܠ ܐܢܘܢ ܒܚܪܒܐ ܠܥܢ̈ܝܟܘܢ
Jeremiah 29:22 ܘܢܗܘܘܢ ܠܠܘܛܬܐ ܠܟܘܠܗ̇ ܫܒܝܬܐ ܕܝܗܘܕܐ ܕܒܒܒܠ ܘܢܐܡܪܘܢ ܥܒܕܟ ܡܪܝܐ ܐܝܟ ܨܕܩܝܐ ܘܐܝܟ ܐܚܒ ܕܛܓܢ ܐܢܘܢ ܡܠܟܐ ܕܒܒܠ ܒܢܘܪܐ
Jeremiah 29:23 ܥܠ ܕܥܒܕܘ ܥܘܠܐ ܒܐܝܣܪܝܠ ܘܓܪܘ ܢܫ̈ܝ ܚܒܪ̈ܝܗܘܢ ܘܡܠܠܘ ܦܬܓܡ̈ܐ ܒܫܡܝ ܒܫܘܩܪܐ ܕܠܐ ܦܩܕܬ ܐܢܘܢ ܘܐܢܐ ܝܕܥ ܐܢܐ ܘܣܗܕ ܐܢܐ ܐܡܪ ܡܪܝܐ
Jeremiah 29:24 Jeremiah 29:25 ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ ܘܫܕܪ ܒܫܡܗ ܐܓܪܬܐ ܠܟܠܗ ܥܡܐ ܕܒܐܘܪܫܠܡ ܘܠܨܦܢܝܐ ܒܪ ܡܥܣܝܐ ܟܗܢܐ ܘܠܟܗ̈ܢܐ
Jeremiah 29:26 ܡܪܝܐ ܐܩܝܡܟ ܟܗܢܐ ܚܠܦ ܝܘܝܕܥ ܟܗܢܐ ܕܬܗܘܐ ܦܩܘܕܐ ܒܒܝܬܗ ܕܡܪܝܐ ܥܠ ܟܘܠ ܐܢܫ ܕܡܫܬܛܐ ܘܡܬܢܒܐ ܒܕܓܠܘܬܐ ܘܬܪܡܝܘܗܝ ܒܝܬ ܐܣܝܪ̈ܐ ܘܒܚܒܘܫܝܐ
Jeremiah 29:27 ܘܗܫܐ ܠܡܢܐ ܠܐ ܟܐܐ ܐܢܬ ܒܐܪܡܝܐ ܕܡܢ ܥܢܬܘܬ ܕܡܬܢܒܐ ܠܟܘܢ
Jeremiah 29:28 ܡܛܠ ܕܗܐ ܫܠܚ ܠܢ ܠܒܒܠ ܕܢܘܓܪܐ ܗܘܝܢ ܐܢܬܘܢ ܬܡܢ ܒܢܘ ܒ̈ܬܐ ܘܬܒܘ ܘܨܘܒܘ ܓܢ̈ܐ ܘܐܟܘܠܘ ܦܐܪ̈ܝܗܝܢ
Jeremiah 29:29 ܘܩܪܐ ܨܦܢܝܐ ܟܗܢܐ ܐܓܪܬܐ ܗܕܐ ܒܐ̈ܕܢܘܗܝ ܕܐܪܡܝܐ ܢܒܝܐ
Jeremiah 29:30 ܘܗܘܐ ܦܬܓܡܗ ܕܡܪܝܐ ܥܠ ܐܪܡܝܐ ܠܡܐܡܪ
Jeremiah 29:31 ܫܠܘܚ ܠܟܠܗ̇ ܫܒܝܬܐ ܗܟܢܐ ܐܡܪ ܡܪܝܐ ܠܫܡܥܝܐ ܢܚܡܠܝܐ ܥܠ ܕܐܬܢܒܝ ܠܟܘܢ ܫܡܥܝܐ ܡܕܡ ܕܐܢܐ ܠܐ ܫܕܪܬܗ ܘܐܬܟܠܟܘܢ ܥܠ ܫܘܩܪܐ
Jeremiah 29:32 ܡܛܠ ܗܢܐ ܗܟܢܐ ܐܡܪ ܡܪܝܐ ܗܐ ܦܩܕ ܐܢܐ ܥܠ ܫܡܥܝܐ ܢܚܡܠܝܐ ܘܥܠ ܙܪܥܗ ܕܠܐ ܢܗܘܐ ܠܗ ܓܒܪܐ ܕܝܬܒ ܒܓܘ ܥܡܐ ܗܢܐ ܘܠܐ ܢܚܙܐ ܒܛܒܬܐ ܕܥܒܕ ܐܢܐ ܠܥܡܝ ܐܡܪ ܡܪܝܐ ܡܛܠ ܕܥܘܠܐ ܡܠܠ ܥܠ ܡܪܝܐ
Jeremiah 30:1 ܦܬܓܡܐ ܕܗܘܐ ܥܠ ܐܪܡܝܐ ܡܢ ܩܕܡ ܡܪܝܐ ܘܐܡܪ
Jeremiah 30:2 ܗܟܢܐ ܐܡܪ ܡܪܝܐ ܐܠܗܐ ܕܐܝܣܪܝܠ ܟܬܘܒ ܠܟ ܟܠܗܘܢ ܦܬ̈ܓܡܐ ܕܐܡܪܬ ܠܟ ܥܠ ܣܦܪܐ
Jeremiah 30:3 ܡܛܠ ܕܗܐ ܝܘܡ̈ܬܐ ܐܬܝܢ ܐܡܪ ܡܪܝܐ ܘܐܗܦܟ ܫܒܝܬܐ ܕܥܡܝ ܐܝܣܪܐܝܠ ܘܕܝܗܘܕܐ ܐܡܪ ܡܪܝܐ ܘܐܗܦܟ ܐܢܘܢ ܠܐܪܥܐ ܕܝܗܒܬ ܠܐ̈ܒܗܝܗܘܢ ܘܢܐܪܬܘܢܗ̇
Jeremiah 30:4 ܘܗܠܝܢ ܦܬ̈ܓܡܐ ܕܐܡܪ ܡܪܝܐ ܥܠ ܐܝܣܪܐܝܠ ܘܥܠ ܝܗܘܕܐ
Jeremiah 30:5 ܗܟܢܐ ܐܡܪ ܡܪܝܐ ܩܠܐ ܕܙܘܥܬܐ ܫܡܥܢ ܕܚܠܬܐ ܘܠܝܬ ܫܠܡܐ
Jeremiah 30:6 ܫܐܠܘ ܘܚܙܘ ܐܢ ܝܠܕ ܕܟܪܐ ܡܛܠ ܡܢܐ ܚܙܝܬ ܟܠ ܓܒܪ ܣܝ̈ܡܢ ܐ̈ܝܕܘܗܝ ܥܠ ܓܣ̈ܘܗܝ ܐܝܟ ܝܠܕܬܐ ܘܐܬܗܦܟ ܟܠܗܝܢ ܐ̈ܦܐ ܠܝܩܕܢܐ
Jeremiah 30:7 ܘܝ ܕܪܒ ܗܘ ܝܘܡܐ ܗ̇ܘ ܘܠܝܬ ܐܟܘܬܗ ܘܙܒܢ ܥܩܬܐ ܗܘ ܠܝܥܩܘܒ ܘܡܢܗ ܢܬܦܪܩ
Jeremiah 30:8 ܘܢܗܘܐ ܒܝܘܡܐ ܗ̇ܘ ܐܡܪ ܡܪܝܐ ܨܒܐܘܬ ܐܬܒܪ ܢܝܪܗ ܡܢ ܨܘܪܟ ܘܚܢ̈ܩܝܟ ܐܦܣܩ ܘܠܐ ܢܫܥܒܕܘܢ ܐܢܘܢ ܬܘܒ ܢܘܟܪ̈ܝܐ
Jeremiah 30:9 ܐܠܐ ܢܦܠܚܘܢ ܠܡܪܝܐ ܐܠܗܗܘܢ ܘܠܕܘܝܕ ܡܠܟܗܘܢ ܕܐܩܝܡ ܠܗܘܢ
Jeremiah 30:10 ܘܐܢܬ ܠܐ ܬܕܚܠ ܥܒܕܝ ܝܥܩܘܒ ܐܡܪ ܡܪܝܐ ܘܠܐ ܬܬܒܪ ܐܝܣܪܝܠ ܕܗܐ ܦܪܩ ܐܢܐ ܠܟ ܡܢ ܪܘܚܩܐ ܘܠܙܪܥܟ ܡܢ ܐܪܥܐ ܕܫܒܝܬܗܘܢ ܘܢܬܒ ܝܥܩܘܒ ܘܢܫܠܐ ܘܢܫܟܬ ܘܢܬܬܢܝܚ ܘܠܐ ܢܗܘܐ ܠܗ ܡܗܪܢܐ ܘܐܢܬ ܠܐ ܬܕܚܠ ܥܒܕܝ ܝܥܩܘܒ ܐܡܪ ܡܪܝܐ
Jeremiah 30:11 ܡܛܠ ܕܥܡܟ ܐܢܐ ܠܡܦܪܩܟ ܐܡܪ ܡܪܝܐ ܡܛܠ ܕܐܥܒܕ ܓܡܘܪܝܐ ܒܟܠܗܘܢ ܥܡ̈ܡܐ ܕܒܕܪܬܟ ܬܡܢ ܘܠܟ ܠܐ ܐܥܒܕ ܓܡܘܪܝܐ ܘܐܪܕܝܟ ܒܕܝܢܐ ܘܡܙܟܝܘ ܠܐ ܐܙܟܝܟ
Jeremiah 30:12 ܡܛܠ ܕܗܟܢܐ ܐܡܪ ܡܪܝܐ ܟܐܒ ܗܘ ܬܒܪܟܝ ܘܚܣܝܢܐ ܗܝ ܡܚܘܬܟܝ
Jeremiah 30:13 ܘܠܝܬ ܕܕܐܢ ܕܝܢܟܝ ܕܢܥܕܪܟܝ ܘܢܐܣܝܟܝ
Jeremiah 30:14 ܟܠܗܘܢ ܪ̈ܚܡܝܟܝ ܛܥܐܘܟܝ ܘܢܦܫܟܝ ܒܥܝܢ ܡܛܠ ܕܡܚܘܬܐ ܕܒ̈ܥܠܕܒܒܐ ܡܚܝܬܟܝ ܘܡܪܕܘܬܐ ܬܩܝܦܬܐ ܥܠ ܕܣܓܝܘ ܚ̈ܘܒܝܟܝ ܘܥܫܢܘ ܚ̈ܛܗܝܟܝ ܕܠܐ ܬܬܘܒܝܢ
Jeremiah 30:15 ܡܢܐ ܡܝܠܠܬܝ ܥܠ ܬܒܪܟܝ ܟܐܒ ܗܘ ܟܐܒܟܝ ܥܠ ܣܘܓܐܬ ܚ̈ܘܒܝܟܝ ܘܕܥܫܢܘ ܚ̈ܛܗܝܟܝ ܥܒܕܬ ܠܟܝ ܗܠܝܢ
Jeremiah 30:16 ܡܛܠ ܗܢܐ ܟܘܠ ܐ̈ܟܘܠܝܟܝ ܢܬܐܟܠܘܢ ܘܟܠܗܘܢ ܒ̈ܥܠܕܒܒܝܟܝ ܒܫܒܝܐ ܢܐܙܠܘܢ ܘܢܗܘܘܢ ܕܝܘܫ̈ܝܟܝ ܠܕܝܫܐ ܘܟܘܠܗܘܢ ܒܙܘ̈ܙܝܟܝ ܐܬܠ ܠܒܙܬܐ
Jeremiah 30:17 ܡܛܠ ܕܐܣܩ ܠܟܝ ܐܣܝܘܬܐ ܘܡܢ ܡܚܘܬܟܝ ܐܣܝܟܝ ܐܡܪ ܡܪܝܐ ܡܛܠ ܕܕܚܝܩܬܐ ܩܪܐܘܟܝ ܨܗܝܘܢ ܗܝ ܕܬܒܘܥܐ ܠܝܬ ܠܗ̇
Jeremiah 30:18 ܗܟܢܐ ܐܡܪ ܡܪܝܐ ܗܐ ܡܗܦܟ ܐܢܐ ܫܒܝܬܐ ܕܡܫܟܢܗ ܕܝܥܩܘܒ ܘܥܒܕ ܐܢܐ ܠܗ ܐܝܟ ܕܡܢ ܩܕܝܡ ܘܥܠ ܡܫܟ̈ܢܘܗܝ ܐܪܚܡ ܘܬܬܒܢܐ ܩܪܝܬܐ ܥܠ ܬܠܗ̇ ܘܢܘܣܐ ܒܙܕܩܗ ܢܬܩܢ
Jeremiah 30:19 ܘܬܦܘܩ ܡܢܗܘܢ ܬܘܕܝܬܐ ܘܩܠܐ ܕܡܫ̈ܒܚܢܐ ܘܐܣܓܐ ܐܢܘܢ ܘܠܐ ܢܙܥܪܘܢ ܘܐܥܫܢ ܐܢܘܢ ܘܠܐ ܢܒܨܪܘܢ
Jeremiah 30:20 ܘܢܗܘܘܢ ܒ̈ܢܝܗܘܢ ܐܝܟ ܕܡܢ ܩܕܝܡ ܘܥܕܬܗܘܢ ܩܕܡܝ ܬܬܩܢ ܘܐܦܩܘܕ ܥܠ ܟܠܗܘܢ ܐ̈ܠܘܨܝܗܘܢ
Jeremiah 30:21 ܘܢܗܘܐ ܡܠܟܗܘܢ ܡܢܗܘܢ ܘܫܠܝܛܗܘܢ ܡܢ ܒܝܢܬܗܘܢ ܢܦܘܩ ܘܐܩܪܒܝܘܗܝ ܘܢܬܩܪܒ ܠܘܬܝ ܡܛܠ ܕܐܦܢܝ ܠܒܗ ܠܘܬ ܐܡܪ ܡܪܝܐ
Jeremiah 30:22 ܘܬܗܘܘܢ ܠܝ ܥܡܐ ܘܐܢܐ ܐܗܘܐ ܠܟܘܢ ܐܠܗܐ
Jeremiah 30:23 ܗܐ ܥܠܥܠܗ ܕܡܪܝܐ ܒܚܡܬܐ ܢܦܩܐ ܘܥܠܥܠܐ ܡܬܓܘܙܠܐ ܥܠ ܪܝܫܐ ܕܪ̈ܫܝܥܐ ܬܬܢܝܚ
Jeremiah 30:24 ܠܐ ܬܗܦܘܟ ܚܡܬܐ ܕܪܘܓܙܗ ܕܡܪܝܐ ܥܕܡܐ ܕܢܥܒܪ ܘܥܕܡܐ ܕܢܩܝܡ ܬܪܥܝܬܐ ܕܠܒܗ ܒܐܚܪܝܬ ܝܘܡ̈ܬܐ ܬܬܒܝܢܘܢ ܒܗ
Jeremiah 31:1 ܒܙܒܢܐ ܗ̇ܘ ܐܡܪ ܡܪܝܐ ܐܗܘܐ ܐܠܗܐ ܠܟܠܗܝܢ ܫܪ̈ܒܬܐ ܕܐܝܣܪܝܠ ܘܗܢܘܢ ܢܗܘܘܢ ܠܝ ܥܡܐ
Jeremiah 31:2 ܗܟܢܐ ܐܡܪ ܡܪܝܐ ܐܫܟܚ ܪ̈ܚܡܐ ܒܡܕܒܪܐ ܥܡܐ ܕܐܬܦܨܝ ܡܢ ܚܪܒܐ ܐܙܠ ܒܫܒܝܐ ܐܝܣܪܝܠ
Jeremiah 31:3 ܡܢ ܪܘܚܩܐ ܡܪܝܐ ܐܬܚܙܝ ܠܝ ܘܐܡܪ ܠܝ ܪܚܡܬܐ ܕܥܠܡܐ ܪܚܡܬܟܝ ܡܛܠ ܗܢܐ ܢܓܕܬܟܝ ܠܛܝܒܘܬܐ
Jeremiah 31:4 ܬܘܒ ܐܒܢܝܟܝ ܘܬܬܒܢܝܢ ܒܬܘܠܬܐ ܕܐܝܣܪܝܠ ܬܘܒ ܬܨܛܒܬܝܢ ܒܬܨܒܝܬܐ ܘܬܦܩܝܢ ܒܟܢܘܫܬܐ ܕܡܫ̈ܒܚܢܐ
Jeremiah 31:5 ܬܘܒ ܬܨܒܝܢ ܟܪܡܐ ܒܛܘܪܐ ܕܫܡܪܝܢ ܨܘܒܝ ܢܨܒܬܐ ܘܫܒܚܝ
Jeremiah 31:6 ܡܛܠ ܕܥܬܝܕ ܗܘ ܝܘܡܐ ܕܢܩܪܘܢ ܢܛܘܪ̈ܐ ܒܛܘܪܐ ܕܐܦܪܝܡ ܘܢܐܡܪܘܢ ܩܘܡܘ ܢܣܩ ܠܨܗܝܘܢ ܠܘܬ ܡܪܝܐ ܐܠܗܢ
Jeremiah 31:7 ܡܛܠ ܕܗܟܢܐ ܐܡܪ ܡܪܝܐ ܫܒܚܘ ܕܒܝܬ ܝܥܩܘܒ ܒܚܕܘܬܐ ܘܕܘܨܘ ܒܪܝܫ ܥܡ̈ܡܐ ܐܫܡܥܘ ܘܫܒܚܘ ܘܐܡܪܘ ܦܪܘܩ ܡܪܝܐ ܠܥܡܟ ܠܫܪܟܗ ܕܐܝܣܪܝܠ
Jeremiah 31:8 ܗܐ ܡܝܬܐ ܐܢܐ ܠܗܘܢ ܡܢ ܐܪܥܐ ܕܓܪܒܝܐ ܘܐܟܢܫ ܐܢܘܢ ܡܢ ܣ̈ܘܦܝܗ̇ ܕܐܪܥܐ ܘܐܦ ܥܘܝܪ̈ܐ ܘܚܓܝܪ̈ܐ ܕܐܝܬ ܒܗܘܢ ܘܕܒܛܢܐ ܘܕܝܠܕܐ ܐܝܟ ܚܕܐ ܟܢܫܐ ܪܒܐ ܢܗܦܟܘܢ ܠܗܪܟܐ
Jeremiah 31:9 ܒܒܟܬܐ ܢܐܙܠܘܢ ܘܒܬܚܢܢܬܐ ܢܐܬܘܢ ܐܕܒܪ ܐܢܘܢ ܥܠ ܫܒ̈ܝܠܐ ܕܡ̈ܝܐ ܒܐܘܪ̈ܚܬܐ ܬܪ̈ܝܨܬܐ ܕܠܐ ܢܬܬܩܠܘܢ ܒܗܝܢ ܡܛܠ ܕܗܘܝܬ ܠܐܝܣܪܝܠ ܠܐܒܐ ܘܐܦܪܝܡ ܗܘܐ ܒܘܟܪܝ
Jeremiah 31:10 ܫܡܥܘ ܦܬܓܡܗ ܕܡܪܝܐ ܥܡܗ ܘܚܘܘ ܒܓܙܪ̈ܬܐ ܪ̈ܚܝܩܬܐ ܘܐܡܪܘ ܡ̇ܢ ܕܒܕܪܗ ܠܐܝܣܪܝܠ ܢܟܢܫܝܘܗܝ ܘܢܢܛܪܝܘܗܝ ܐܝܟ ܪܥܝܐ ܠܓܙܪܗ
Jeremiah 31:11 ܡܛܠ ܕܦܪܩ ܡܪܝܐ ܠܝܥܩܘܒ ܥܒܕܗ ܘܦܨܝܗ ܡܢ ܐ̈ܝܕܝ ܡ̇ܢ ܕܥܫܝܢ ܡܢܗ
Jeremiah 31:12 ܘܢܐܬܘܢ ܘܢܫܒܚܘܢ ܒܪܘܡܗ̇ ܕܨܗܝܘܢ ܘܢܬܒܣܡܘܢ ܡܢ ܛܒ̈ܬܗ ܕܡܪܝܐ ܡܢ ܥܒܘܪܐ ܘܡܢ ܚܡܪܐ ܘܡܢ ܡܫܚܐ ܘܡܢ ܒܢ̈ܝ ܥܢܐ ܘܬܘܪ̈ܐ ܘܬܗܘܐ ܢܦܫܗܘܢ ܐܝܟ ܓܢܬ ܫܩܝܐ ܘܠܐ ܢܘܣܦܘܢ ܬܘܒ ܠܡܣܬܪܩܘ
Jeremiah 31:13 ܗܝ ܕܝܢ ܬܚܕܐ ܒܬܘܠܬܐ ܒܚܕܘܬܐ ܘܓܕܘ̈ܕܐ ܘܣܒ̈ܐ ܐܟܚܕܐ ܢܚܕܘܢ ܘܐܗܦܟ ܐܒܠܗܘܢ ܠܚܕܘܬܐ ܘܐܒܝܐ ܐܢܘܢ ܘܐܚܕܐ ܐܢܘܢ ܡܢ ܕܐܘܢܗܘܢ
Jeremiah 31:14 ܘܐܪܘܐ ܢܦܫܐ ܕܟܗ̈ܢܐ ܕܘܗܢܐ ܘܥܡܝ ܡܢ ܛܘܒܝ ܢܣܒܥܘܢ ܐܡܪ ܡܪܝܐ
Jeremiah 31:15 ܗܟܢܐ ܐܡܪ ܡܪܝܐ ܩܠܐ ܒܪܡܬܐ ܐܫܬܡܥ ܐܠܝܐ ܘܒܟܬܐ ܡܪܝܪܬܐ ܪܚܝܠ ܒܟܝܐ ܥܠ ܒܢ̈ܝܗ̇ ܘܠܐ ܨܒܝܐ ܠܡܬܒܝܐܘ ܡܛܠ ܕܠܝܬ ܐܢܘܢ
Jeremiah 31:16 ܗܟܢܐ ܐܡܪ ܡܪܝܐ ܟܠܝ ܩܠܟܝ ܡܢ ܒܟܝܐ ܘܥܝܢ̈ܝܟܝ ܡܢ ܕܡܥܬܐ ܡܛܠ ܕܐܝܬ ܐܓܪܐ ܠܕܡ̈ܥܝܟܝ ܐܡܪ ܡܪܝܐ ܘܢܗܦܟܘܢ ܡܢ ܐܪܥܐ ܕܒ̈ܥܠܕܒܒܐ
Jeremiah 31:17 ܘܐܝܬ ܣܒܪܐ ܠܚܪܬܟܝ ܐܡܪ ܡܪܝܐ ܘܢܗܦܟܘܢ ܒ̈ܢܝܐ ܠܬܚܘܡܗܘܢ
Jeremiah 31:18 ܡܫܡܥ ܫܡܥܬ ܠܐܦܪܝܡ ܕܐܠܐ ܘܐܡܪ ܪܕܝܬܢܝ ܡܪܝܐ ܘܐܬܪܕܝܬ ܐܝܟ ܥܓܠܐ ܗܘܝܬ ܕܠܐ ܡܟܒܫ ܐܬܝܒܝܢܝ ܘܐܬܘܒ ܡܛܘܠ ܕܐܢܬ ܗܘ ܡܪܝܐ ܐܠܗܝ
Jeremiah 31:19 ܡܛܠ ܕܡܢ ܒܬܪ ܕܬܒܬ ܐܬܒܝܐܬ ܘܡܢ ܒܬܪ ܕܝܕܥܬ ܐܬܬܢܚܬ ܒܗܬܬ ܘܐܦ ܐܬܬܟܣܬ ܕܩܒܠܬ ܚܣܕܐ ܕܛܠܝܘܬܝ
Jeremiah 31:20 ܒܪܐ ܗܘ ܝܩܝܪܐ ܠܝ ܐܦܪܝܡ ܘܝܠܕܐ ܚܒܝܒܐ ܡܛܠ ܕܒܙܒܢܐ ܕܡܡܠܠ ܐܢܐ ܒܗ ܡܬܕܟܪ ܐܢܐ ܠܗ ܡܛܠ ܗܢܐ ܗܘܘ ܪ̈ܚܡܝ ܥܠܘܗܝ ܘܐܪܚܡ ܥܠܘܗܝ ܐܡܪ ܡܪܝܐ
Jeremiah 31:21 ܐܩܝܡ ܠܟܝ ܐܬܐ ܘܬܒܝ ܒܡܕܒܪܐ ܗܒܝ ܠܒܟܝ ܠܐܘܪܚܐ ܬܪܝܨܬܐ ܬܘܒܝ ܒܬܘܠܬܐ ܕܐܝܣܪܝܠ ܐܡܪ ܡܪܝܐ ܘܬܒܝ ܒܩܘܪ̈ܝܝܟܝ ܗܠܝܢ
Jeremiah 31:22 ܥܕܡܐ ܠܐܡܬܝ ܡܬܦܠܓܬܝ ܒܪܬܐ ܬܝܒܬܐ ܡܛܠ ܕܒܪܐ ܡܪܝܐ ܚܕܬܐ ܒܐܪܥܐ ܢܩܒܬܐ ܬܚܒܒ ܓܒܪܐ
Jeremiah 31:23 ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ ܡܟܝܠ ܢܐܡܪܘܢ ܦܬܓܡܐ ܗܢܐ ܒܐܪܥܐ ܕܝܗܘܕܐ ܘܒܩܘܪ̈ܝܗ ܡܐ ܕܡܗܦܟ ܐܢܐ ܫܒܝܬܗܘܢ ܢܒܪܟܟ ܡܪܝܐ ܕܝܪܐ ܙܕܝܩܐ ܛܘܪܐ ܩܕܝܫܐ
Jeremiah 31:24 ܘܢܬܒܘܢ ܒܗ̇ ܝܗܘܕܐ ܘܟܠܗܝܢ ܩܘܪ̈ܝܗ ܐܟܚܕܐ ܐܟܪ̈ܐ ܘܪ̈ܥܝܝ ܓܙܪ̈ܐ
Jeremiah 31:25 ܡܛܠ ܕܐܪܘܝܬ ܢܦܫܐ ܕܨܗܝܐ ܘܟܠ ܢܦܫܐ ܕܟܦܢܐ ܣܒܥܬ
Jeremiah 31:26 ܡܛܠ ܗܢܐ ܐܬܬܥܝܪܬ ܘܚܙܝܬ ܘܫܢܬܝ ܒܣܡܬ ܠܝ
Jeremiah 31:27 ܗܐ ܝܘܡ̈ܬܐ ܐܬܝܢ ܐܡܪ ܡܪܝܐ ܘܐܙܪܘܥ ܠܕܒܝܬ ܐܝܣܪܝܠ ܘܠܕܒܝܬ ܝܗܘܕܐ ܙܪܥܐ ܕܒܢ̈ܝ ܐܢܫܐ ܘܙܪܥܐ ܕܒܥܝܪܐ
Jeremiah 31:28 ܘܐܝܟ ܕܐܬܪܥܝܬ ܥܠܝܗܘܢ ܠܡܥܩܪ ܐܢܘܢ ܘܠܡܣܬܪ ܘܠܡܣܚܦܘ ܘܠܡܘܒܕܘ ܘܠܡܒܐܫܘ ܗܟܢܐ ܐܥܗܕ ܥܠܝܗܘܢ ܠܡܒܢܐ ܘܠܡܨܒ ܐܡܪ ܡܪܝܐ
Jeremiah 31:29 ܒܝ̈ܘܡܬܐ ܗܢܘܢ ܠܐ ܢܐܡܪܘܢ ܬܘܒ ܐ̈ܒܗܐ ܐܟܠܘ ܒܣܪ̈ܐ ܘܫܢ̈ܐ ܕܒ̈ܢܝܐ ܩܗܝܢ
Jeremiah 31:30 ܐܠܐ ܐܢܫ ܒܚ̈ܛܗܘܗܝ ܢܡܘܬ ܟܠ ܒܪܢܫܐ ܕܐܟܠ ܒܣܪ̈ܐ ܫ̈ܢܘܗܝ ܕܝܠܗ ܢܩܗܝܢ
Jeremiah 31:31 ܗܐ ܝܘܡ̈ܬܐ ܐܬܝܢ ܐܡܪ ܡܪܝܐ ܘܐܩܝܡ ܠܕܒܝܬ ܐܝܣܪܐܝܠ ܘܠܕܒܝܬ ܝܗܘܕܐ ܕܝܬܩܐ ܚܕܬܐ
Jeremiah 31:32 ܠܐ ܐܝܟ ܗ̇ܝ ܕܝܬܩܐ ܕܐܩܝܡܬ ܠܐܒ̈ܗܝܗܘܢ ܒܝܘܡܐ ܕܐܚܕܬ ܒܐܝܕܗܘܢ ܘܐܦܩܬ ܐܢܘܢ ܡܢ ܐܪܥܐ ܕܡܨܪܝܢ ܡܛܠ ܕܗܢܘܢ ܒܛܠܘ ܕܝܬܩܐ ܕܝܠܝ ܘܐܦ ܐܢܐ ܒܣܝܬ ܒܗܘܢ ܐܡܪ ܡܪܝܐ
Jeremiah 31:33 ܐܠܐ ܗܕܐ ܕܝܬܩܐ ܕܐܣܝܡ ܠܕܒܝܬ ܐܝܣܪܝܠ ܒܬܪ ܝܘܡ̈ܬܐ ܗܢܘܢ ܐܡܪ ܡܪܝܐ ܐܬܠ ܢܡܘܣܝ ܒܓܘܗܘܢ ܘܥܠ ܠܒ̈ܘܬܗܘܢ ܐܟܬܒܝܘܗܝ ܘܐܗܘܐ ܠܗܘܢ ܐܠܗܐ ܘܗܢܘܢ ܢܗܘܘܢ ܠܝ ܥܡܐ
Jeremiah 31:34 ܘܠܐ ܢܠܦܘܢ ܬܘܒ ܓܒܪ ܠܐܚܘܗܝ ܘܓܒܪ ܠܚܒܪܗ ܘܢܐܡܪܘܢ ܕܕܥܘ ܠܡܪܝܐ ܡܛܠ ܕܟܠܗܘܢ ܢܕܥܘܢܢܝ ܡܢ ܙܥܘܪܗܘܢ ܘܥܕܡܐ ܠܩܫܝܫܗܘܢ ܐܡܪ ܡܪܝܐ ܡܛܠ ܕܐܫܒܘܩ ܠܚ̈ܘܒܝܗܘܢ ܘܚ̈ܛܗܝܗܘܢ ܬܘܒ ܠܐ ܐܬܕܟܪ
Jeremiah 31:35 ܗܟܢܐ ܐܡܪ ܡܪܝܐ ܕܝܗܒ ܫܡܫܐ ܠܢܘܗܪܐ ܕܐܝܡܡܐ ܘܕܘܒܪܐ ܕܣܗܪܐ ܘܕܟܘ̈ܟܒܐ ܠܢܘܗܪܐ ܕܠܠܝܐ ܕܟܐܐ ܒܝܡܐ ܘܫܠܝܢ ܓܠܠܘ̈ܗܝ ܡܪܝܐ ܚܝܠܬܢܐ ܫܡܗ
Jeremiah 31:36 ܐܢ ܢܥܒܪܘܢ ܕܘܒܪ̈ܐ ܗܠܝܢ ܡܢ ܩܕܡܝ ܐܡܪ ܡܪܝܐ ܐܦ ܙܪܥܐ ܕܐܝܣܪܝܠ ܢܒܛܠܘܢ ܕܠܐ ܢܗܘܘܢ ܥܡܐ ܩܕܡܝ ܟܠܗܘܢ ܝܘܡ̈ܬܐ
Jeremiah 31:37 ܗܟܢܐ ܐܡܪ ܡܪܝܐ ܐܢ ܢܬܡܫܚܘܢ ܫܡܝܐ ܡܢ ܠܥܠ ܘܢܬܒ̈ܕܩܢ ܫܬ̈ܐܣܝܗ̇ ܕܐܪܥܐ ܡܢ ܠܬܚܬ ܐܦ ܐܢܐ ܐܣܠܐ ܠܟܠܗ ܙܪܥܗ ܕܐܝܣܪܝܠ ܥܠ ܟܠ ܡܕܡ ܕܥܒܕܘ ܐܡܪ ܡܪܝܐ
Jeremiah 31:38 ܗܐ ܝܘܡ̈ܬܐ ܐܬܝܢ ܐܡܪ ܡܪܝܐ ܘܬܬܒܢܐ ܩܪܝܬܐ ܠܡܪܝܐ ܡܢ ܡܓܕܠܐ ܕܚܢܢܐܝܠ ܥܕܡܐ ܠܬܪܥܐ ܕܙܘܝܬܐ
Jeremiah 31:39 ܘܢܦܘܩ ܬܘܒ ܚܘܛܐ ܕܡܫܘܚܬܐ ܠܩܘܒܠܗ ܥܠ ܪܡܬܐ ܕܓܪܒ ܘܢܬܟܪܟ ܠܪܡܬܐ
Jeremiah 31:40 ܘܟܘܠܗ ܥܘܡܩܐ ܕܫܕܝܢ ܒܗ ܦܪܬܐ ܘܩܛܡܐ ܥܕܡܐ ܠܢܚܠܐ ܕܩܕܪܘܢ ܘܥܕܡܐ ܠܙܘܝܬܐ ܕܬܪܥܐ ܕܪ̈ܟܫܐ ܡܕܢܚܝܐ ܩܘܕܫܐ ܠܡܪܝܐ ܠܐ ܢܬܥܩܪ ܘܠܐ ܢܣܬܚܦ ܬܘܒ ܠܥܠܡ
Jeremiah 32:1 ܦܬܓܡܐ ܕܗܘܐ ܥܠ ܐܪܡܝܐ ܡܢ ܩܕܡ ܡܪܝܐ ܒܫܢܬܐ ܥܣܝܪܝܬܐ ܕܨܕܩܝܐ ܡܠܟܐ ܕܝܗܘܕܐ ܗܝ ܗܝ ܫܢܬ ܬܡܢܥܣܪܐ ܠܢܒܘܟܕܢܨܪ ܡܠܟܐ ܕܒܒܠ
Jeremiah 32:2 ܘܗܝܕܝܢ ܚ̈ܝܠܐ ܕܡܠܟܐ ܕܒܒܠ ܟܪ̈ܝܟܝܢ ܠܐܘܪܫܠܡ ܘܐܪܡܝܐ ܢܒܝܐ ܟܠܐ ܗܘܐ ܒܕܪܬ ܡܛܪܬܐ ܕܒܝܬ ܡܠܟܐ ܕܝܗܘܕܐ
Jeremiah 32:3 ܕܟܠܝܗܝ ܨܕܩܝܐ ܡܠܟܐ ܕܝܗܘܕܐ ܘܐܡܪ ܡܛܠ ܡܢܐ ܡܬܢܒܐ ܐܢܬ ܘܐܡܪ ܐܢܬ ܗܟܢܐ ܐܡܪ ܡܪܝܐ ܗܐ ܡܫܠܡ ܐܢܐ ܠܗ̇ ܠܩܪܝܬܐ ܗܕܐ ܒܐ̈ܝܕܘܗܝ ܕܡܠܟܐ ܕܒܒܠ ܘܢܟܒܫܝܗ̇
Jeremiah 32:4 ܘܨܕܩܝܐ ܡܠܟܐ ܕܝܗܘܕܐ ܠܐ ܢܬܦܠܛ ܡܢ ܐܝܕܐ ܕܟ̈ܠܕܝܐ ܡܛܠ ܕܡܫܬܠܡܘ ܢܫܬܠܡ ܒܐ̈ܝܕܘܗܝ ܕܡܠܟܐ ܕܒܒܠ ܘܢܡܠܠ ܦܘܡܗ ܥܡ ܦܘܡܗ ܘܥܝܢ̈ܘܗܝ ܠܥܝܢ̈ܘܗܝ ܢܚ̈ܙܝܢ
Jeremiah 32:5 ܘܠܒܒܠ ܢܘܒܠܝܘܗܝ ܠܨܕܩܝܐ ܘܬܡܢ ܢܗܘܐ ܥܕܡܐ ܠܝܘܡܐ ܕܦܩܕ ܐܢܐ ܠܗ ܐܡܪ ܡܪܝܐ ܡܛܠ ܕܬܬܟܬܫܘܢ ܥܡ ܟ̈ܠܕܝܐ ܘܠܐ ܬܙܟܘܢ
Jeremiah 32:6 ܘܗܘܐ ܦܬܓܡܗ̇ ܕܡܪܝܐ ܥܠ ܐܪܡܝܐ ܠܡܐܡܪ
Jeremiah 32:7 ܗܐ ܢܚܡܐܝܠ ܒܪ ܫܠܘܡ ܕܕܟ ܐܬܐ ܠܘܬܟ ܘܐܡܪ ܙܒܢ ܠܟ ܚܩܠܝ ܕܒܥܢܬܘܬ ܕܒܐܪܥܐ ܕܒܢܝܡܝܢ ܡܛܠ ܕܠܟ ܙܕܩܐ ܝܪܬܘܬܐ ܠܡܙܒܢ
Jeremiah 32:8 ܘܐܬܐ ܠܘܬܝ ܢܚܡܐܝܠ ܒܪ ܕܕܝ ܐܝܟ ܦܬܓܡܗ ܕܡܪܝܐ ܠܕܪܬ ܡܛܪܬܐ ܘܐܡܪ ܠܝ ܙܒܢ ܠܟ ܚܩܠܝ ܕܒܥܢܬܘܬ ܕܒܐܪܥܐ ܕܒܢܝܡܝܢ ܡܛܠ ܕܠܟ ܙܕܩܐ ܝܪܬܘܬܐ ܘܠܟ ܘܠܝܐ ܙܒܢܝܗ̇ ܠܟ ܘܝܕܥܬ ܕܦܬܓܡܗ ܗܘ ܕܡܪܝܐ
Jeremiah 32:9 ܘܙܒܢܬ ܚܩܠܐ ܡܢ ܢܚܡܐܝܠ ܒܪ ܕܕܝ ܕܒܥܢܬܘܬ ܘܬܩܠܬ ܠܗ ܟܣܦܐ ܫܒܥܐ ܡܬܩ̈ܠܝܢ ܘܥܣܪܐ ܕܟܣܦܐ
Jeremiah 32:10 ܘܟܬܒܬ ܐܫܛܪ̈ܐ ܘܚܬܡܬ ܘܣܗܕܬ ܣܗ̈ܕܐ ܘܬܩܠܬ ܟܣܦܐ ܒܡܣܐܬܐ
Jeremiah 32:11 ܘܢܣܒܬ ܫܛܪ̈ܐ ܕܙܒܝܢܬܐ ܕܚܬܝܡ ܒܦܘܩܕܢܐ ܘܒܢܡܘܣܐ ܘܕܠܐ ܡܚܬܡ
Jeremiah 32:12 ܘܝܗܒܬ ܫܛܪ̈ܐ ܕܙܒܝܢܬܐ ܠܒܪܘܟ ܒܪ ܢܪܝܐ ܒܪ ܡܥܣܝܐ ܠܥܝܢ ܢܚܡܐܝܠ ܒܪ ܕܕܝ ܘܠܥܝܢ ܣܗ̈ܕܐ ܕܟܬܝܒܝܢ ܒܫܛܪ̈ܐ ܕܙܒܝܢܬܐ ܘܠܥܝܢ ܟܠܗܘܢ ܝܗ̈ܘܕܝܐ ܕܝܬܒܝܢ ܒܕܪܬ ܡܛܪܬܐ
Jeremiah 32:13 ܘܦܩܕܬ ܠܒܪܘܟ ܠܥܝܢ̈ܝܗܘܢ ܘܐܡܪܬ
Jeremiah 32:14 ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ ܣܒ ܫܛܪ̈ܐ ܗܠܝܢ ܫܛܪܐ ܗܢܐ ܕܙܒܝܢܬܐ ܕܡܚܬܡ ܘܫܛܪܐ ܗܢܐ ܕܠܐ ܡܚܬܡ ܘܐܪܡܐ ܐܢܘܢ ܒܡܐܢܐ ܕܦܚܪܐ ܕܢܬܢܛܪܘܢ ܝܘܡ̈ܬܐ ܣ̈ܓܝܐܐ
Jeremiah 32:15 ܡܛܠ ܕܗܟܢܐ ܐܡܪ ܡܪܝܐ ܨܒܐܘܬ ܐܠܗܐ ܕܐܝܣܪܝܠ ܡܟܝܠ ܢܙܕܒܢܘܢ ܒܬ̈ܐ ܘܚ̈ܩܠܬܐ ܘܟܪ̈ܡܐ ܒܐܪܥܐ ܗܕܐ
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .