← All works

Peshitta Jeremiah

Peshitta (Syriac Old Testament) · 1,366 sections

1. Jeremiah 21:7

   ܘܒܬܪܟܢ ܐܡܪ ܡܪܝܐ ܐܫܠܡܝܘܗܝ ܠܨܕܩܝܐ ܡܠܟܐ ܕܝܗܘܕܐ ܘܠܥܒ̈ܕܘܗܝ ܘܠܥܡܐ ܕܐܫܬܚܪܘ ܒܩܪܝܬܐ ܗܕܐ ܡܢ ܚܪܒܐ ܘܡܢ ܟܦܢܐ ܘܡܢ ܡܘܬܢܐ ܐܫܠܡ ܒܐܝܕܐ ܕܢܒܘܟܕܢܨܪ ܡܠܟܐ ܕܒܒܠ ܘܒܐܝܕܐ ܕܒ̈ܥܠܕܒܒܝܗܘܢ ܘܒܐܝܕܐ ܕܐܝܠܝܢ ܕܒܥܝܢ ܢܦܫܗܘܢ ܘܢܡܚܐ ܐܢܘܢ ܒܦܘܡܐ ܕܚܪܒܐ ܘܠܐ ܢܚܘܣ ܥܠܝܗܘܢ ܘܠܐ ܢܪܚܦ ܘܠܐ ܢܪܚܡ ܥܠܝܗܘܢ

2. Jeremiah 21:8

   ܘܠܥܡܐ ܗܢܐ ܐܡܪ ܗܟܢܐ ܐܡܪ ܡܪܝܐ ܗܐ ܝܗܒ ܐܢܐ ܩܕܡܝܟܘܢ ܐܘܪܚܐ ܕܚ̈ܝܐ ܘܐܘܪܚܐ ܕܡܘܬܐ

3. Jeremiah 21:9

   ܡ̇ܢ ܕܝܬܒ ܒܩܪܝܬܐ ܗܕܐ ܢܡܘܬ ܒܚܪܒܐ ܘܒܟܦܢܐ ܘܒܡܘܬܢܐ ܘܡܢ ܕܢܦܩ ܠܘܬ ܟ̈ܠܕܝܐ ܕܟܪ̈ܝܟܝܢ ܠܟܘܢ ܚܝܐ ܘܡܫܘܙܒ ܢܦܫܗ

4. Jeremiah 21:10

   ܡܛܠ ܕܣܡܬ ܐ̈ܦܝ ܒܩܪܝܬܐ ܗܕܐ ܠܒܝܫܬܐ ܘܠܐ ܠܛܒܬܐ ܐܡܪ ܡܪܝܐ ܘܒܐܝܕܗ ܕܡܠܟܐ ܕܒܒܠ ܬܫܬܠܡ ܘܢܘܩܕܝܗ ܒܢܘܪܐ

5. Jeremiah 21:11

   ܘܠܒܝܬ ܡܠܟܐ ܕܝܗܘܕܐ ܫܡܥܘ ܦܬܓܡܗ ܕܡܪܝܐ

6. Jeremiah 21:12

   ܕܒܝܬ ܕܘܝܕ ܗܟܢܐ ܐܡܪ ܡܪܝܐ ܕܘܢܘ ܒܨܦܪܐ ܕܝܢܐ ܘܦܨܘ ܠܛܠܝܡܐ ܡܢ ܡ̇ܢ ܕܛܠܡ ܠܗ ܕܠܡܐ ܬܦܘܩ ܐܝܟ ܢܘܪܐ ܚܡܬܝ ܘܬܘܩܕ ܘܠܝܬ ܕܡܕܥܟ ܡܛܠ ܒܝܫܘܬܐ ܕܥܒ̈ܕܝܟܘܢ

7. Jeremiah 21:13

   ܗܐ ܐܢܐ ܥܠܝܟܝ ܝܬܒܬ ܒܥܘܡܩܐ ܥܡܝܩܬ ܦܩܥܬܐ ܐܡܪ ܡܪܝܐ ܕܐܡܪܝܢ ܡ̇ܢ ܢܐܬܐ ܥܠܝܢ ܘܡܢܘ ܢܥܘܠ ܠܡܥܡܪܢ

8. Jeremiah 21:14

   ܐܦܩܘܕ ܥܠܝܟܘܢ ܐܝܟ ܦܐܪ̈ܝ ܥܒ̈ܕܝܟܘܢ ܐܡܪ ܡܪܝܐ ܘܐܫܒܘܩ ܢܘܪܐ ܒܩܘܪ̈ܝܗ ܘܬܐܟܘܠ ܟܠܗܘܢ ܚܕܪ̈ܝܗ

9. Jeremiah 22:1

   ܗܟܢܐ ܐܡܪ ܡܪܝܐ ܚܘܬ ܠܒܝܬ ܡܠܟܐ ܕܝܗܘܕܐ ܘܡܠܠ ܬܡܢ ܦܬܓܡܐ ܗܢܐ

10. Jeremiah 22:2

    ܘܐܡܪ ܫܡܥܘ ܦܬܓܡܗ ܕܡܪܝܐ ܡܠܟܐ ܕܝܗܘܕܐ ܕܝܬܒ ܥܠ ܟܘܪܣܝܗ ܕܕܘܝܕ ܐܢܬ ܘܥܒ̈ܕܝܟ ܘܥܡܟ ܕܥܐܠܝܢ ܒܬܪ̈ܥܐ ܗܠܝܢ

11. Jeremiah 22:3

    ܗܟܢܐ ܐܡܪ ܡܪܝܐ ܥܒܕܘ ܕܝܢܐ ܘܙܕܝܩܘܬܐ ܘܦܨܘ ܠܛܠܝܡܐ ܡܢ ܡ̇ܢ ܕܛܠܡ ܠܗ ܘܠܥܡܘܪ̈ܐ ܘܠܝ̈ܬܡܐ ܘܠܐܪ̈ܡܠܬܐ ܠܐ ܬܥܠܒܘܢ ܘܠܐ ܬܛܠܡܘܢ ܘܕܡܐ ܙܟܝܐ ܠܐ ܬܐܫܕܘܢ ܒܐܬܪܐ ܗܢܐ

12. Jeremiah 22:4

    ܘܐܢ ܡܥܒܕ ܬܥܒܕܘܢ ܦܬܓܡܐ ܗܢܐ ܢܥܠܘܢ ܒܬܪ̈ܥܘܗܝ ܕܒܝܬܐ ܗܢܐ ܡ̈ܠܟܐ ܕܝܬܒܝܢ ܥܠ ܟܘܪܣܝܗ ܕܕܘܝܕ ܟܕ ܪܟܝܒܝܢ ܒܡܪ̈ܟܒܬܐ ܘܒܪ̈ܟܫܐ ܗܘ ܘܥܒ̈ܕܘܗܝ ܘܥܡܗ

13. Jeremiah 22:5

    ܘܐܠܐ ܬܫܡܥܘܢ ܦܬܓܡܐ ܗܢܐ ܒܝ ܐܝܡܝܬ ܐܡܪ ܡܪܝܐ ܕܠܚܘܪܒܐ ܢܗܘܐ ܒܝܬܐ ܗܢܐ

14. Jeremiah 22:6

    ܡܛܠ ܕܗܟܢܐ ܐܡܪ ܡܪܝܐ ܥܠ ܒܝܬ ܡܠܟܐ ܕܝܗܘܕܐ ܓܠܥܕ ܐܢܬ ܗܘ ܪܝܫ ܠܒܢܢ ܐܠܐ ܐܥܒܕܟ ܡܕܒܪܐ ܐܝܟ ܩܘܪ̈ܝܐ ܕܠܐ ܐܬܝܬܒ

15. Jeremiah 22:7

    ܘܐܛܝܒ ܥܠܝܟ ܡܚܒ̈ܠܢܐ ܓܒܪܐ ܘܢܪܓܗ ܒܐܝܕܗ ܘܢܦܣܩܘܢ ܓܒ̈ܝܐ ܕܐܪ̈ܙܝܟ ܘܢܪܡܘܢ ܒܢܘܪܐ

16. Jeremiah 22:8

    ܘܢܥܒܪܘܢ ܥܡ̈ܡܐ ܣ̈ܓܝܐܐ ܥܠ ܩܪܝܬܐ ܗܕܐ ܪܒܬܐ ܘܢܐܡܪܘܢ ܓܒܪ ܠܚܒܪܗ ܥܠ ܡܢܐ ܥܒܕ ܡܪܝܐ ܗܟܢܐ ܠܩܪܝܬܐ ܗܕܐ ܪܒܬܐ

17. Jeremiah 22:9

    ܘܢܐܡܪܘܢ ܥܠ ܕܫܒܩܘ ܩܝܡܗ ܕܡܪܝܐ ܐܠܗܗܘܢ ܘܣܓܕܘ ܠܐ̈ܠܗܐ ܐܚܪ̈ܢܐ ܘܦܠܚܘ ܐܢܘܢ

18. Jeremiah 22:10

    ܠܐ ܬܒܟܘܢ ܥܠ ܡܝܬܐ ܘܠܐ ܬܢܘܕܘܢ ܥܠܘܗܝ ܒܟܘ ܡܒܟܐ ܥܠ ܡ̇ܢ ܕܐܙܠ ܘܬܘܒ ܠܐ ܗܦܟ ܘܠܐ ܚܙܐ ܐܪܥܐ ܕܐܬܝܠܕ ܒ̇ܗ

19. Jeremiah 22:11

    ܡܛܠ ܕܗܟܢܐ ܐܡܪ ܡܪܝܐ ܥܠ ܫܠܘܡ ܒܪ ܝܘܫܝܐ ܕܐܡܠܟ ܚܠܦ ܝܘܫܝܐ ܐܒܘܗܝ ܕܢܦܩ ܡܢ ܐܬܪܐ ܗܢܐ ܠܐ ܢܗܦܘܟ ܠܬܡܢ ܬܘܒ

20. Jeremiah 22:12

    ܐܠܐ ܒܐܬܪܐ ܕܐܫܬܒܝ ܬܡܢ ܢܡܘܬ ܘܐܪܥܐ ܗܕܐ ܬܘܒ ܠܐ ܢܚܙܐ

21. Jeremiah 22:13

    ܘܝ ܠܕܒܢܐ ܒܝܬܗ ܕܠܐ ܒܙܕܩܐ ܘܥ̈ܠܝܬܗ ܕܠܐ ܒܕܝܢܐ ܚܒܪܗ ܦܠܚ ܠܗ ܡܓܢ ܘܐܓܪܗ ܠܐ ܝܗܒ ܠܗ

22. Jeremiah 22:14

    ܕܐܡܪ ܐܒܢܐ ܠܝ ܒܝܬܐ ܕܡܘܫ̈ܚܬܐ ܘܥ̈ܠܝܬܐ ܡܪ̈ܘܚܬܐ ܘܦܬܚ ܠܗܝܢ ܟܘ̈ܐ ܘܡܛܠܠ ܠܗܝܢ ܒܐܪ̈ܙܐ ܘܨܐܪ ܠܗܝܢ ܨܘܪ̈ܬܐ

23. Jeremiah 22:15

    ܡܡܠܟ ܐܢܬ ܕܐܢܬ ܡܬܚܕܐ ܒܐܪ̈ܙܐ ܐܒܘܟ ܐܟܠ ܘܐܫܬܝ ܘܥܒܕ ܕܝܢܐ ܘܙܕܝܩܘܬܐ ܡܛܠ ܗܢܐ ܐܛܐܒܬ ܠܗ

24. Jeremiah 22:16

    ܕܢ ܕܝܢܐ ܕܡܣ̈ܟܢܐ ܘܕܒܝ̈ܫܐ ܘܥܒܕ ܕܫܦܝܪ ܡ̇ܢ ܕܗܠܝܢ ܥܒܕ ܝܕܥ ܠܝ ܐܡܪ ܡܪܝܐ

25. Jeremiah 22:17

    ܕܝܠܟ ܕܝܢ ܥܝܢ̈ܝܟ ܘܠܒܟ ܠܝܬ ܥܠ ܡܕܡ ܐܚܪܝܢ ܐܠܐ ܥܠ ܩܢܝܢܟ ܘܥܠ ܕܡܐ ܙܟܝܐ ܠܡܐܫܕ ܘܥܠ ܥܫܘܩܝܐ ܘܥܠ ܛܠܘܡܝܐ ܠܡܥܒܕ

26. Jeremiah 22:18

    ܡܛܠ ܕܗܟܢܐ ܐܡܪ ܡܪܝܐ ܥܠ ܝܘܝܩܝܡ ܒܪ ܝܘܫܝܐ ܡܠܟܐ ܕܝܗܘܕܐ ܠܐ ܢܪ̈ܩܕܘܢ ܥܠܘܗܝ ܘܠܐ ܢܐܡܪܘܢ ܘܝ ܐܚܝ ܘܝ ܐܚܝ ܘܠܐ ܢܪܩܕܘܢ ܥܠܘܗܝ ܘܝ ܡܪܐ ܘܝ ܡܪܐ

27. Jeremiah 22:19

    ܩܒܘܪܬ ܚܡܪ ܢܬܩܒܪ ܘܢܓܪܘܢ ܢܫܕܘܢܗ ܠܗܠ ܡܢ ܬܪ̈ܥܝܗ̇ ܕܐܘܪܫܠܡ

28. Jeremiah 22:20

    ܣܩܝ ܠܠܒܢܢ ܘܐܙܥܩܝ ܘܒܡܬܢܝܢ ܐܪܝܡܝ ܩܠܟܝ ܘܐܙܥܩܝ ܡܢ ܥܒܪ̈ܝ ܝܡܐ ܕܐܬܬܒܪܘ ܟܠܗܘܢ ܪ̈ܚܡܝܟܝ

29. Jeremiah 22:21

    ܘܐܡܪܬ ܠܟܝ ܒܟܗܝܢܘܬܟܝ ܘܐܡܪܬܝ ܠܐ ܐܫܡܥ ܗܕܐ ܗܝ ܐܘܪܚܟܝ ܡܢ ܛܠܝܘܬܟܝ ܘܠܐ ܫܡܥܬܝ ܒܩܠܝ

30. Jeremiah 22:22

    ܠܟܠܗܘܢ ܪ̈ܥܘܬܟܝ ܬܪܥܐ ܐܢܘܢ ܪܘܚܐ ܘܪ̈ܚܡܝܟܝ ܒܫܒܝܐ ܢܐܙܠܘܢ ܘܗ̇ܝ ܕܝܢ ܬܒܗܬܝܢ ܘܬܬܟܣܝܢ ܡܢ ܟܠܗܝܢ ܒܝܫܬ̈ܟܝ

31. Jeremiah 22:23

    ܝܬܒܬ ܒܠܒܢܢ ܡܩܢܬ ܒܐܪ̈ܙܐ ܡܢܐ ܡܬܬܢܚܬܝ ܟܕ ܢܐܬܘܢ ܥܠܝܟܝ ܚܒ̈ܠܐ ܘܙܘܥܬܐ ܐܝܟ ܕܝܠܕܬܐ

32. Jeremiah 22:24

    ܚܝ ܐܢܐ ܐܡܪ ܡܪܝܐ ܐܠܗܐ ܐܢ ܢܗܘܐ ܝܘܟܢܝܐ ܒܪ ܝܘܝܩܝܡ ܡܠܟܐ ܕܝܗܘܕܐ ܚܬܡܐ ܥܠ ܐܝܕܝ ܕܝܡܝܢܐ ܐܠܐ ܡ̇ܢ ܬܡܢ ܐܥܩܪܟ

33. Jeremiah 22:25

    ܘܐܫܠܡܟ ܒܝܕ ܐܢܫܐ ܐܝܠܝܢ ܕܒܥܝܢ ܢܦܫܟ ܘܒܝܕ ܐܝܠܝܢ ܕܕܚܠ ܐܢܬ ܡܢ ܩܕܡܝܗܘܢ ܒܐܝܕܐ ܕܢܒܘܟܕܢܨܪ ܡܠܟܐ ܕܒܒܠ ܘܒܐܝܕܐ ܕܟ̈ܠܕܝܐ

34. Jeremiah 22:26

    ܘܐܫܕܝܟ ܠܟ ܘܠܐܡܟ ܕܝܠܕܬܟ ܠܐܪܥܐ ܐܚܪܬܐ ܕܠܐ ܐܬܝܠܕܬܘܢ ܬܡܢ ܘܬܡܢ ܬܡܘܬܘܢ

35. Jeremiah 22:27

    ܘܠܐܪܥܐ ܕܣܒܪܢ ܢܦܫ̈ܬܟܘܢ ܠܡܗܦܟ ܠܬܡܢ ܠܐ ܬܗܦܟܘܢ

36. Jeremiah 22:28

    ܒܣܝܪܐ ܘܫܝܛܐ ܓܒܪܐ ܗܢܐ ܝܘܟܢܝܐ ܐܝܟ ܡܐܢܐ ܕܠܝܬ ܒܗ ܚܫܚܘ ܡܛܠ ܗܢܐ ܐܫܬܩܠ ܗܘ ܘܙܪܥܗ ܘܐܫܬܕܝܘ ܠܐܪܥܐ ܕܠܐ ܝܕܥܝܢ

37. Jeremiah 22:29

    ܐܪܥܐ ܐܪܥܐ ܐܪܥܐ ܫܡܥܝ ܦܬܓܡܗ ܕܡܪܝܐ

38. Jeremiah 22:30

    ܗܟܢܐ ܐܡܪ ܡܪܝܐ ܟܘܬܒܘܗܝ ܠܓܒܪܐ ܗܢܐ ܡܟܪܙܐ ܕܠܐ ܒܢܝ̈ܢ ܡܛܠ ܕܓܒܪ̈ܐ ܒܝ̈ܘܡܬܗ ܠܐ ܢܨܠܚ ܡܢ ܙܪܥܗ ܓܒܪܐ ܕܝܬܒ ܥܠ ܟܘܪܣܝܗ ܕܕܘܝܕ ܘܡܫܬܠܛ ܬܘܒ ܒܝܗܘܕܐ

39. Jeremiah 23:1

    ܐܘ ܪ̈ܥܘܬܐ ܕܡܘܒܕܝܢ ܘܡܒܕܪܝܢ ܥܢܐ ܕܡܪܥܝܬܝ ܐܡܪ ܡܪܝܐ

40. Jeremiah 23:2

    ܡܛܠ ܗܢܐ ܗܟܢܐ ܐܡܪ ܡܪܝܐ ܐܠܗܐ ܕܐܝܣܪܝܠ ܥܠ ܪ̈ܥܘܬܐ ܕܪܥܝܢ ܠܥܡܝ ܐܢܬܘܢ ܒܕܪܬܘܢ ܠܥܢܝ ܘܐܛܥܝܬܘܢ ܐ̈ܢܝܢ ܘܠܐ ܦܩܕܬܘܢ ܐ̈ܢܝܢ ܗܐ ܦܩܕ ܐܢܐ ܥܠܝܟܘܢ ܐܝܟ ܒܝܫܘܬ ܥܒ̈ܕܝܟܘܢ ܐܡܪ ܡܪܝܐ

41. Jeremiah 23:3

    ܘܐܢܐ ܐܟܢܫ ܫܪܟܐ ܕܥܢܝ ܡܢ ܟܠܗܘܢ ܐܬܪ̈ܘܬܐ ܕܒܕܪܬ ܐܢܘܢ ܠܬܡܢ ܘܐܗܦܟ ܐܢܘܢ ܠܕܝܪܗܘܢ ܘܢܟܒܪܘܢ ܘܢܣܓܘܢ

42. Jeremiah 23:4

    ܘܐܩܝܡ ܥܠܝܗܘܢ ܪ̈ܥܘܬܐ ܘܢܪܥܘܢ ܐܢܘܢ ܘܠܐ ܢܕܚܠܘܢ ܬܘܒ ܘܠܐ ܢܬܒܕܪܘܢ ܘܠܐ ܢܛܥܘܢ ܐܡܪ ܡܪܝܐ

43. Jeremiah 23:5

    ܗܐ ܝܘܡ̈ܬܐ ܐܬܝܢ ܐܡܪ ܡܪܝܐ ܘܐܩܝܡ ܠܕܘܝܕ ܨܡܚܐ ܕܙܕܝܩܘܬܐ ܘܢܡܠܟ ܒܡܠܟܘܬܐ ܘܢܣܬܟܠ ܘܢܥܒܕ ܕܝܢܐ ܘܙܕܝܩܘܬܐ ܒܐܪܥܐ

44. Jeremiah 23:6

    ܒܝ̈ܘܡܘܗܝ ܢܬܦܪܩ ܝܗܘܕܐ ܘܐܝܣܪܝܠ ܢܫܪܐ ܒܫܠܝܐ ܘܗܢܘ ܫܡܗ ܕܢܩܪܘܢܗ ܡܪܝܐ ܙܕܩܢ

45. Jeremiah 23:7

    ܡܛܠ ܗܢܐ ܗܐ ܝܘܡ̈ܬܐ ܐܬܝܢ ܐܡܪ ܡܪܝܐ ܘܠܐ ܢܬܐܡܪ ܬܘܒ ܚܝ ܗܘ ܡܪܝܐ ܕܐܣܩ ܠܕܒܝܬ ܐܝܣܪܝܠ ܡܢ ܐܪܥܐ ܕܡܨܪܝܢ

46. Jeremiah 23:8

    ܐܠܐ ܚܝ ܗܘ ܡܪܝܐ ܕܢܣܩ ܘܢܝܬܐ ܠܕܒܝܬ ܐܝܣܪܝܠ ܡܢ ܐܪܥܐ ܕܓܪܒܝܐ ܘܡܢ ܟܠܗܘܢ ܐܬܪ̈ܘܬܐ ܕܐܬܒܕܪܘ ܒܗܘܢ ܘܢܬܒܘܢ ܒܐܪܥܗܘܢ

47. Jeremiah 23:9

    ܥܠ ܢܒ̈ܝܐ ܐܬܬܒܪ ܠܒܝ ܒܓܘܝ ܘܙܥܘ ܟܠܗܘܢ ܓܪ̈ܡܝ ܗܘܝܬ ܐܝܟ ܓܒܪܐ ܪܘܝܐ ܘܐܝܟ ܓܒܪܐ ܕܥܒܪܗ ܚܡܪܗ ܡܢ ܩܕܡ ܡܪܝܐ ܘܡܢ ܩܕܡ ܦܬ̈ܓܡܝ ܩܘܕܫܗ

48. Jeremiah 23:10

    ܡܛܠ ܕܓܝܪ̈ܐ ܘܚ̈ܛܘܦܐ ܐܬܡܠܝܬ ܐܪܥܐ ܡܛܠ ܗܠܝܢ ܐܬܐܒܠܬ ܐܪܥܐ ܘܝܒܫ ܕܝܪ̈ܐ ܕܡܕܒܪܐ ܘܗܘܐ ܪܗܛܢܗܘܢ ܒܝܫ ܘܒܓܢܒܪܘܬܗܘܢ ܠܐ ܐܟܫܪܘ

49. Jeremiah 23:11

    ܡܛܠ ܕܐܦ ܢܒ̈ܝܐ ܐܦ ܟܗ̈ܢܐ ܐܬܚܢܦܘ ܐܦ ܒܒܝܬܝ ܐܫܟܚܬ ܒܝܫܘܬܗܘܢ ܐܡܪ ܡܪܝܐ

50. Jeremiah 23:12

    ܡܛܠ ܗܢܐ ܢܗ̈ܘܝܢ ܠܗܘܢ ܐܘܪ̈ܚܬܗܘܢ ܡܫܪ̈ܘܥܝܬܐ ܘܠܚܫܘܟܐ ܢܬܕܚܘܢ ܘܢܦܠܘܢ ܒܗܝܢ ܡܛܠ ܕܡܝܬܐ ܐܢܐ ܥܠܝܗܘܢ ܒܝܫܬܐ ܫܢܬܐ ܕܦܘܩܕܢܗܘܢ ܐܡܪ ܡܪܝܐ

51. Jeremiah 23:13

    ܘܒܢ̈ܒܝܝ ܫܡܪܝܢ ܚܙܝܬ ܕܓܠܘܬܐ ܐܬܢܒܝܘ ܒܒܥܠܐ ܘܐܛܥܝܘ ܠܥܡܝ ܐܝܣܪܝܠ

52. Jeremiah 23:14

    ܘܒܢ̈ܒܝܝ ܐܘܪܫܠܡ ܚܙܝܬ ܫܛܝܘܬܐ ܓܝܪܝܢ ܘܡܗܠܟܝܢ ܒܫܘܩܪܐ ܘܡܚܡܣܢܝܢ ܐ̈ܝܕܝܗܘܢ ܡܢ ܪ̈ܚܡܝܗܘܢ ܕܠܐ ܢܗܦܟܘܢ ܓܒܪ ܡܢ ܐܘܪܚܗ ܒܝܫܬܐ ܘܗܘܘ ܠܝ ܟܠܗܘܢ ܐܝܟ ܣܕܘܡ ܘܝܬܒ̈ܝܗ̇ ܐܝܟ ܥܡܘܪܐ

53. Jeremiah 23:15

    ܡܛܠ ܗܢܐ ܗܟܢܐ ܐܡܪ ܡܪܝܐ ܨܒܐܘܬ ܥܠ ܢܒ̈ܝܐ ܗܐ ܡܘܟܠ ܐܢܐ ܠܗܘܢ ܡܪ̈ܪܐ ܘܐܫܩܐ ܐܢܘܢ ܡ̈ܝܐ ܡܪ̈ܝܪܐ ܡܛܠ ܕܡܢ ܠܘܬ ܢܒ̈ܝܐ ܕܐܘܪܫܠܡ ܢܦܩܬ ܚܢܦܘܬܐ ܒܟܠܗ ܐܪܥܐ

54. Jeremiah 23:16

    ܗܟܢܐ ܐܡܪ ܡܪܝܐ ܨܒܐܘܬ ܠܐ ܬܫܡܥܘܢ ܠܦܬ̈ܓܡܐ ܕܢܒ̈ܝܐ ܕܓ̈ܠܐ ܕܡܬܢܒܝܢ ܠܟܘܢ ܘܡܛܥܝܢ ܠܟܘܢ ܚܙܘܐ ܗܘ ܕܠܒܗܘܢ ܡܡܠܠܝܢ ܘܠܐ ܗܘܐ ܡܢ ܦܘܡ ܡܪܝܐ

55. Jeremiah 23:17

    ܘܐܡܪܝܢ ܠܐܝܠܝܢ ܕܡܪܓܙܝܢ ܒܦܬܓܡܗ ܕܡܪܝܐ ܫܠܡܐ ܢܗܘܐ ܠܟܘܢ ܘܟܠ ܕܡܗܠܟ ܒܨܒܝܢܐ ܕܠܒܗ ܐܡܪܝܢ ܠܗ ܠܐ ܬܐܬܐ ܥܠܝܟܘܢ ܒܝܫܬܐ

56. Jeremiah 23:18

    ܡܢܘ ܓܝܪ ܩܡ ܒܐܪܙܗ ܕܡܪܝܐ ܘܚܙܝܗܝ ܘܫܡܥ ܦܬܓܡܗ ܐܘ ܡܢܘ ܨܬ ܦܬܓܡܗ ܘܫܡܥܗ

57. Jeremiah 23:19

    ܗܐ ܣܘܥܪܢܗ ܕܡܪܝܐ ܒܪܘܓܙܐ ܢܦܩ ܘܣܘܥܪܢܐ ܡܬܓܘܙܠ ܥܠ ܪܝܫܐ ܕܪ̈ܫܝܥܐ ܢܬܬܢܝܚ

58. Jeremiah 23:20

    ܠܐ ܬܗܦܘܟ ܚܡܬܐ ܕܪܘܓܙܗ ܕܡܪܝܐ ܥܕܡܐ ܕܢܥܒܪ ܘܥܕܡܐ ܕܢܩܝܡ ܬܪܥܝܬܐ ܕܠܒܗ ܒܐܚܪܝܬ ܝܘܡ̈ܬܐ ܬܬܒܝܢܘܢ ܒܗ

59. Jeremiah 23:21

    ܠܐ ܫܕܪܬ ܠܢܒ̈ܝܐ ܘܗܢܘܢ ܐܙܠܘ ܘܠܐ ܐܡܪܬ ܠܗܘܢ ܘܗܢܘܢ ܐܬܢܒܝܘ

60. Jeremiah 23:22

    ܘܠܐ ܩܡܘ ܒܐܪܙܝ ܘܐܫܡܥܘ ܦܬ̈ܓܡܝ ܠܥܡܝ ܘܐܬܝܒܘ ܐܢܘܢ ܡܢ ܐܘܪ̈ܚܬܗܘܢ ܒܝܫ̈ܬܐ ܘܡܢ ܒܝܫܘܬ ܥܒ̈ܕܝܗܘܢ

61. Jeremiah 23:23

    ܐܠܗܐ ܐܢܐ ܕܡܢ ܩܘܪܒܐ ܐܡܪ ܡܪܝܐ ܘܠܐ ܗܘܝܬ ܐܠܗܐ ܕܡܢ ܪܘܚܩܐ

62. Jeremiah 23:24

    ܐܢ ܢܛܫܐ ܓܒܪܐ ܒܛܘܫܝܝ ܐܢܐ ܠܐ ܚܙܐ ܐܢܐ ܠܗ ܐܡܪ ܡܪܝܐ ܗܐ ܫܡܝܐ ܘܐܪܥܐ ܡܢܝ ܡܠܝܢ ܐܡܪ ܡܪܝܐ ܚܝܠܬܢܐ

63. Jeremiah 23:25

    ܫܡܥܬ ܡܕܡ ܕܐܡܪܘ ܢܒ̈ܝܐ ܕܡܬܢܒܝܢ ܒܫܡܝ ܒܕܓܠܘܬܐ ܘܐܡܪܝܢ ܚܠܡܐ ܚܠܡܬ

64. Jeremiah 23:26

    ܥܕܡܐ ܠܐܡܬܝ ܐܝܬ ܒܦܘܡܗܘܢ ܕܢܒ̈ܝܐ ܕܓ̈ܠܐ ܢܒܝ̈ܘܬܐ ܕܓܠܬ̈ܐ ܢܒܝ̈ܘܬܐ ܕܢܟܠܐ ܕܠܒܗܘܢ

65. Jeremiah 23:27

    ܕܡܬܚܫܒܝܢ ܠܡܛܥܝܘ ܒܫܡܝ ܠܥܡܝ ܒܚ̈ܠܡܝܗܘܢ ܕܡܫܬܥܝܢ ܓܒܪ ܠܚܒܪܗ ܐܝܟ ܕܛܥܘ ܐ̈ܒܗܝܗܘܢ ܫܡܝ ܘܦܠܚܘ ܠܒܥܠܐ

66. Jeremiah 23:28

    ܢܒܝܐ ܕܚܙܐ ܚܠܡܐ ܢܫܬܥܐ ܚܠܡܐ ܘܕܦܬ̈ܓܡܝ ܥܡܗ ܢܡܠܠ ܦܬ̈ܓܡܝ ܒܩܘܫܬܐ ܠܡܢܐ ܚܠܛܝܢ ܐܢܬܘܢ ܬܒܢܐ ܒܥܒܘܪܐ ܐܡܪ ܡܪܝܐ

67. Jeremiah 23:29

    ܗܐ ܦܬ̈ܓܡܝ ܐܝܟ ܢܘܪܐ ܢܦܩܝܢ ܐܡܪ ܡܪܝܐ ܘܐܝܟ ܦܪܙܠܐ ܕܓܙܪ ܟܐܦܐ

68. Jeremiah 23:30

    ܡܛܠ ܗܢܐ ܗܐ ܐܢܐ ܥܠ ܢܒ̈ܝܐ ܐܡܪ ܡܪܝܐ ܕܡܓܢܒܝܢ ܦܬ̈ܓܡܝ ܐܢܫ ܡܢ ܚܒܪܗ

69. Jeremiah 23:31

    ܗܐ ܐܢܐ ܥܠ ܢܒ̈ܝܐ ܐܡܪ ܡܪܝܐ ܕܡܗܦܟܝܢ ܠܫ̈ܢܝܗܘܢ ܘܐܡܪ̈ܝܢ ܡܪܝܐ ܐܡܪ ܗܟܢܐ

70. Jeremiah 23:32

    ܗܐ ܐܢܐ ܥܠ ܢܒ̈ܝܐ ܕܚܙܝܢ ܚ̈ܠܡܐ ܕܓ̈ܠܐ ܐܡܪ ܡܪܝܐ ܘܡܫܬܥܝܢ ܠܗܘܢ ܘܡܛܥܝܢ ܠܥܡܝ ܒܕܓܠܘܬܗܘܢ ܘܒܦܚܙܘܬܗܘܢ ܘܐܢܐ ܠܐ ܫܕܪܬ ܐܢܘܢ ܘܠܐ ܦܩܕܬ ܐܢܘܢ ܘܡܕܡ ܠܐ ܡܘܬܪܝܢ ܠܥܡܐ ܗܢܐ

71. Jeremiah 23:33

    ܘܟܕ ܢܫܐܠܟ ܥܡܐ ܗܢܐ ܐܘ ܢܒܝܐ ܐܘ ܟܗܢܐ ܘܢܐܡܪ ܠܟ ܡܢܘ ܦܬܓܡܗ ܕܡܪܝܐ ܐܡܪ ܠܗܘܢ ܐܢܬ ܗܢܐ ܗܘ ܦܬܓܡܗ ܕܡܪܝܐ ܕܐܥܩܘܪܟܘܢ ܐܡܪ ܡܪܝܐ

72. Jeremiah 23:34

    ܘܢܒܝܐ ܐܘ ܟܗܢܐ ܐܘ ܥܡܐ ܕܢܐܡܪ ܦܬܓܡܗ ܕܡܪܝܐ ܐܦܩܘܕ ܥܠ ܓܒܪܐ ܗ̇ܘ ܘܥܠ ܒܝܬܗ

73. Jeremiah 23:35

    ܗܟܢܐ ܬܐܡܪܘܢ ܓܒܪ ܠܚܒܪܗ ܘܓܒܪ ܠܐܚܘܗܝ ܡܢܐ ܥܢܐ ܡܪܝܐ ܘܡܢܐ ܡܠܠ ܡܪܝܐ

74. Jeremiah 23:36

    ܘܦܬܓܡܗ ܕܡܪܝܐ ܠܐ ܬܬܕܟܪܘܢ ܬܘܒ ܡܛܠ ܕܦܬܓܡܐ ܢܗܘܐ ܠܓܒܪܐ ܢܒܝܘܬܗ ܘܗܦܟܝܢ ܐܢܬܘܢ ܦܬ̈ܓܡܘܗܝ ܕܐܠܗܐ ܚܝܐ ܡܪܝܐ ܚܝܠܬܢܐ ܐܠܗܢ

75. Jeremiah 23:37

    ܗܟܢܐ ܬܐܡܪܘܢ ܠܓܒܪܐ ܡܢܐ ܥܢܟ ܡܪܝܐ ܘܡܢܐ ܡܠܠ ܡܪܝܐ

76. Jeremiah 23:38

    ܘܐܢ ܦܬܓܡܗ ܕܡܪܝܐ ܬܐܡܪܘܢ ܗܟܢܐ ܐܡܪ ܡܪܝܐ ܥܠ ܕܐܡܪܬܘܢ ܦܬܓܡܐ ܗܢܐ ܘܫܠܚܬ ܠܟܘܢ ܕܠܐ ܬܐܡܪܘܢ

77. Jeremiah 23:39

    ܡܛܠ ܗܢܐ ܐܫܩܘܠܟܘܢ ܡܫܩܠ ܘܐܫܕܝܟܘܢ ܘܠܩܪܝܬܐ ܕܝܗܒܬ ܠܟܘܢ ܘܠܐ̈ܒܗܝܟܘܢ ܡܢ ܩܕܡ ܐ̈ܦܝ

78. Jeremiah 23:40

    ܘܐܬܠ ܥܠܝܟܘܢ ܚܣܕܐ ܕܥܠܡ ܘܒܗܬܬܐ ܕܠܥܠܡ ܕܠܐ ܡܬܛܥܝܐ

79. Jeremiah 24:1

    ܚܘܝܢܝ ܡܪܝܐ ܬܪ̈ܬܝܢ ܡܣ̈ܢܐ ܕܬܐ̈ܢܐ ܣܝܡܢ ܩܕܡ ܗܝܟܠܗ ܕܡܪܝܐ ܡܢ ܒܬܪ ܕܫܒܐ ܢܒܘܟܕܢܨܪ ܡܠܟܐ ܕܒܒܠ ܠܝܘܟܢܝܐ ܒܪ ܝܘܝܩܝܡ ܡܠܟܐ ܕܝܗܘܕܐ ܘܠܐ̈ܘܡܢܐ ܘܠܕܚ̈ܫܐ ܡܢ ܐܘܪܫܠܡ ܘܐܘܒܠ ܐܢܘܢ ܠܒܒܠ

80. Jeremiah 24:2

    ܡܣܢܬܐ ܚܕܐ ܕܬܐ̈ܢܐ ܕܛܒ̈ܢ ܛܒ ܐܝܟ ܬܐ̈ܢܐ ܒܟܪ̈ܬܐ ܘܡܣܢܬܐ ܐܚܪܬܐ ܕܬܐ̈ܢܐ ܕܒ̈ܝܫܢ ܛܒ ܕܠܐ ܡܬܐ̈ܟܠܢ ܡܢ ܒܝܫܘܬܗܝܢ

81. Jeremiah 24:3

    ܘܐܡܪ ܠܝ ܡܪܝܐ ܡܢܐ ܚܙܝܬ ܐܪܡܝܐ ܘܐܡܪܬ ܬܐ̈ܢܐ ܕܛܒ̈ܢ ܛܒ̈ܢ ܛܒ ܘܕܒܝܫ̈ܢ ܒܝܫ̈ܢ ܛܒ ܕܠܐ ܡܬܐ̈ܟܠܢ ܡܢ ܒܝܫܘܬܗܝܢ

82. Jeremiah 24:4

    ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ

83. Jeremiah 24:5

    ܗܟܢܐ ܐܡܪ ܡܪܝܐ ܐܠܗܐ ܕܐܝܣܪܝܠ ܐܝܟ ܬܐ̈ܢܐ ܛܒ̈ܬܐ ܗܠܝܢ ܗܟܢܐ ܐܫܬܘܕܥܝܗ̇ ܠܫܒܝܬܐ ܕܝܗܘܕܐ ܕܫܕܪܬ ܡܢ ܐܬܪܐ ܗܢܐ ܠܐܪܥܐ ܕܟ̈ܠܕܝܐ ܠܛܒܬܐ

84. Jeremiah 24:6

    ܘܐܣܝܡ ܥܝܢܝ ܥܠܝܗܘܢ ܠܛܒܬܐ ܘܐܗܦܟ ܐܢܘܢ ܠܐܬܪܐ ܗܢܐ ܘܐܒܢܐ ܐܢܘܢ ܘܠܐ ܐܣܚܘܦ ܘܐܨܘܒ ܐܢܘܢ ܘܠܐ ܐܥܩܘܪ

85. Jeremiah 24:7

    ܘܐܬܠ ܠܗܘܢ ܠܒܐ ܕܢܕܥܘܢܢܝ ܕܐܢܐ ܐܢܐ ܡܪܝܐ ܘܢܗܘܘܢ ܠܝ ܥܡܐ ܘܐܢܐ ܐܗܘܐ ܠܗܘܢ ܐܠܗܐ ܟܕ ܢܬܘܒܘܢ ܠܘܬܝ ܡܢ ܟܠܗ ܠܒܗܘܢ

86. Jeremiah 24:8

    ܘܐܝܟ ܬܐ̈ܢܐ ܒܝܫ̈ܬܐ ܕܠܐ ܡܬܐ̈ܟܠܢ ܡܢ ܒܝܫܘܬܗܝܢ ܗܟܢܐ ܐܡܪ ܡܪܝܐ ܗܟܢܐ ܐܫܠܡܝܘܗܝ ܠܨܕܩܝܐ ܡܠܟܐ ܕܝܗܘܕܐ ܘܠܪ̈ܘܪܒܢܘܗܝ ܘܠܫܪܟܐ ܕܥܡܐ ܕܐܫܬܚܪ ܒܩܪܝܬܐ ܗܕܐ ܘܕܝܬܒܝܢ ܒܐܪܥܐ ܕܡܨܪܝܢ

87. Jeremiah 24:9

    ܘܐܬܠ ܐܢܘܢ ܠܙܘܥܬܐ ܘܠܢܝܕܐ ܘܠܒܝܫܬܐ ܒܝܢ̈ܬ ܟܠܗܝܢ ܡ̈ܠܟܘܬܐ ܕܐܪܥܐ ܠܚܣܕܐ ܘܠܡܬܠܐ ܘܠܬܘܢܝܐ ܘܠܠܘܛܬܐ ܒܟܠܗܘܢ ܐܬܪ̈ܘܬܐ ܕܐܒܕܪ ܐܢܘܢ ܠܬܡܢ

88. Jeremiah 24:10

    ܘܐܫܕܪ ܒܬܪܗܘܢ ܚܪܒܐ ܘܟܦܢܐ ܘܡܘܬܢܐ ܥܕܡܐ ܕܐܓܡܪ ܐܢܘܢ ܡܢ ܐܪܥܐ ܕܝܗܒܬ ܠܗܘܢ ܘܠܐ̈ܒܗܝܗܘܢ

89. Jeremiah 25:1

    ܦܬܓܡܐ ܕܗܘܐ ܥܠ ܐܪܡܝܐ ܥܠ ܟܠܗ ܥܡܐ ܕܝܗܘܕܐ ܒܫܢܬܐ ܪܒܝܥܝܬܐ ܕܝܘܝܩܝܡ ܒܪ ܝܘܫܝܐ ܡܠܟܐ ܕܝܗܘܕܐ ܗܝ ܗܝ ܫܢܬܐ ܩܕܡܝܬܐ ܕܢܒܘܟܕܢܨܪ ܡܠܟܐ ܕܒܒܠ

90. Jeremiah 25:2

    ܕܐܡܪ ܐܪܡܝܐ ܢܒܝܐ ܥܠ ܟܠܗ ܥܡܐ ܕܝܗܘܕܐ ܘܥܠ ܟܠܗܘܢ ܥܡܘܪ̈ܝܗ̇ ܕܐܘܪܫܠܡ ܠܡܐܡܪ

91. Jeremiah 25:3

    ܡܢ ܬܠܬܥܣܪܐ ܫ̈ܢܝܢ ܠܝܘܫܝܐ ܒܪ ܐܡܘܢ ܡܠܟܐ ܕܝܗܘܕܐ ܘܥܕܡܐ ܠܝܘܡܐ ܗܢܐ ܗܐ ܥܣܪ̈ܝܢ ܘܬܠܬ ܫ̈ܢܝܢ ܗܘܐ ܥܠܝ ܦܬܓܡܗ ܕܡܪܝܐ ܘܐܡܪܬ ܠܟܘܢ ܩܕܡܬ ܟܠ ܝܘܡ ܘܐܡܪܬ ܘܠܐ ܫܡܥܬܘܢ

92. Jeremiah 25:4

    ܘܫܕܪ ܡܪܝܐ ܠܘܬܟܘܢ ܟܠܗܘܢ ܥܒ̈ܕܘܗܝ ܢܒ̈ܝܐ ܩܕܡ ܘܫܕܪ ܘܠܐ ܫܡܥܬܘܢ ܘܠܐ ܐܪܟܢܬܘܢ ܐܕܢܟܘܢ ܠܡܫܡܥ

93. Jeremiah 25:5

    ܘܠܡܐܡܪ ܬܘܒܘ ܓܒܪ ܡܢ ܐܘܪܚܗ ܒܝܫܬܐ ܘܡܢ ܒܝܫܘܬ ܥܒ̈ܕܝܟܘܢ ܘܬܒܘ ܒܐܪܥܐ ܕܝܗܒ ܡܪܝܐ ܠܟܘܢ ܘܠܐ̈ܒܗܝܟܘܢ ܡܢ ܥܠܡ ܘܥܕܡܐ ܠܥܠܡ

94. Jeremiah 25:6

    ܘܠܐ ܬܐܙܠܘܢ ܒܬܪ ܐ̈ܠܗܐ ܐܚܪ̈ܢܐ ܠܡܦܠܚ ܐܢܘܢ ܘܠܡܣܓܕ ܠܗܘܢ ܘܠܐ ܬܪܓܙܘܢܢܝ ܒܥܒܕ ܐ̈ܝܕܝܟܘܢ ܕܠܐ ܐܒܐܫ ܠܟܘܢ

95. Jeremiah 25:7

    ܘܠܐ ܫܡܥܬܘܢܢܝ ܐܡܪ ܡܪܝܐ ܘܐܪܓܙܬܘܢܢܝ ܒܥܒܕ ܐ̈ܝܕܝܟܘܢ ܕܢܒܐܫ ܠܟܘܢ

96. Jeremiah 25:8

    ܡܛܠ ܗܢܐ ܗܟܢܐ ܐܡܪ ܡܪܝܐ ܨܒܐܘܬ ܥܠ ܕܠܐ ܫܡܥܬܘܢ ܦܬ̈ܓܡܝ

97. Jeremiah 25:9

    ܗܐ ܡܫܕܪ ܐܢܐ ܘܕܒܪ ܐܢܐ ܠܟܠܗܝܢ ܫܪ̈ܒܬܐ ܕܡ̈ܠܟܘܬܐ ܕܓܪܒܝܐ ܐܡܪ ܡܪܝܐ ܘܠܢܒܘܟܕܢܨܪ ܡܠܟܐ ܕܒܒܠ ܥܒܕܝ ܘܐܝܬܐ ܐܢܘܢ ܥܠ ܐܪܥܐ ܗܕܐ ܘܥܠ ܥܡܘܪ̈ܝܗ̇ ܘܥܠ ܥܡ̈ܡܐ ܗܠܝܢ ܕܒܚ̈ܕܪܝܗ̇ ܘܐܚܪܘܒ ܐܢܘܢ ܘܐܥܒܕ ܐܢܘܢ ܠܬܡܗܐ ܘܠܡܫܪܘܩܝܬܐ ܘܠܚܘܪܒܐ ܠܥܠܡ

98. Jeremiah 25:10

    ܘܐܘܒܕ ܡܢܗܘܢ ܩܠܐ ܕܕܝܨܐ ܘܩܠܐ ܕܚܕܘܬܐ ܩܠܐ ܕܚܬܢܐ ܘܩܠܐ ܕܟܠܬܐ ܩܠܐ ܕܪܚܝܐ ܘܢܘܗܪܐ ܕܫܪܓܐ

99. Jeremiah 25:11

    ܘܬܗܘܐ ܐܪܥܐ ܗܕܐ ܟܘܠܗ̇ ܠܚܘܪܒܐ ܘܠܬܡܗܐ ܘܢܦܠܚܘܢ ܥܡ̈ܡܐ ܗܠܝܢ ܠܡܠܟܐ ܕܒܒܠ ܫܒܥܝܢ ܫ̈ܢܝܢ

100. Jeremiah 25:12

     ܘܡܐ ܕܫܠܡ ܫܒܥܝܢ ܫ̈ܢܝܢ ܐܦܩܘܕ ܥܠ ܡܠܟܐ ܕܒܒܠ ܘܥܠ ܥܡܗ ܚ̈ܘܒܝܗܘܢ ܐܡܪ ܡܪܝܐ ܘܥܠ ܐܪܥܐ ܕܟ̈ܠܕܝܐ ܘܐܥܒܕܝܗ̇ ܠܬܡܗܐ ܠܥܠܡ

← Previous · Next → — showing 501–600 of 1,366

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.