Peshitta Jeremiah

ܘܐܬܐ ܐܪܡܝܐ ܠܘܬ ܓܕܠܝܐ ܒܪ ܐܚܝܩܡ ܒܪ ܫܦܢ ܠܡܨܦܝܐ ܘܝܬܒ ܠܘܬܗ ܒܓܘ ܥܡܐ ܕܐܫܬܚܪܘ ܒܐܪܥܐ

ܘܫܡܥܘ ܟܠ ܪ̈ܒܝ ܚ̈ܝܠܐ ܕܒܩܘܪ̈ܝܐ ܗܢܘܢ ܘܓܒܪ̈ܐ ܕܥܡܗܘܢ ܕܐܫܠܛ ܡܠܟܐ ܕܒܒܠ ܠܓܕܠܝܐ ܒܪ ܐܚܝܩܡ ܒܐܪܥܐ ܘܕܐܫܠܡ ܠܗ ܓܒܪ̈ܐ ܘܢܫ̈ܐ ܘ̈ܛܠܝܐ ܘܡܢ ܡܣ̈ܟܢܐ ܕܐܪܥܐ ܐܝܠܝܢ ܕܠܐ ܐܫܬܒܝܘ ܠܒܒܠ

ܘܐܬܘ ܠܘܬ ܓܕܠܝܐ ܠܡܨܦܝܐ ܐܝܫܡܥܐܝܠ ܒܪ ܢܬܢܝܐ ܘܝܘܚܢܢ ܘܝܘܢܬܢ ܒܢ̈ܝ ܩܘܪܚ ܘܫܪܝܐ ܒܪ ܬܢܚܡܬ ܘܒܢ̈ܝ ܥܝ̈ܦܝ ܕܡܢ ܢܛܘܦܬ ܘܝܙܢܝܐ ܒܪ ܡܥܟܬ ܗܢܘܢ ܘܓܒܪ̈ܝܗܘܢ

ܘܐܝܡܐ ܠܗܘܢ ܓܕܠܝܐ ܒܪ ܐܚܝܩܡ ܒܪ ܫܦܢ ܘܠܓܒܪ̈ܐ ܕܥܡܗܘܢ ܘܐܡܪ ܠܐ ܬܕܚܠܘܢ ܠܡܦܠܚ ܠܟ̈ܠܕܝܐ ܬܒܘ ܒܐܪܥܐ ܘܦܠܘܚܘ ܠܡܠܟܐ ܕܒܒܠ ܘܢܛܐܒ ܠܟܘܢ

ܘܐܢܐ ܗܐ ܝܬܒ ܐܢܐ ܒܡܨܦܝܐ ܠܡܩܡ ܩܕܡ ܟ̈ܠܕܝܐ ܕܐܬܝܢ ܥܠܝܢ ܘܐܢܬܘܢ ܚܡܘܠܘ ܥܒܘܪܐ ܘܚܡܪܐ ܘܡܫܚܐ ܘܐܒܐ ܕܩܝܛܐ ܘܐܪܡܘ ܒܡ̈ܐܢܝܟܘܢ ܘܬܒܘ ܒܩܘܪ̈ܝܟܘܢ ܕܐܚܕܬܘܢ

ܐܦ ܟܠܗܘܢ ܝܗ̈ܘܕܝܐ ܕܐܝܬ ܒܐܕܘܡ ܘܒܡܘܐܒ ܘܒܒ̈ܢܝ ܥܡܘܢ ܘܒܟܠܗܝܢ ܐܪ̈ܥܬܐ ܫܡܥܘ ܕܫܒܩ ܡܠܟܐ ܕܒܒܠ ܫܪܟܢܐ ܠܝܗ̈ܘܕܝܐ ܘܕܐܫܠܛ ܥܠܝܗܘܢ ܠܓܕܠܝܐ ܒܪ ܐܚܝܩܡ ܒܪ ܫܦܢ

ܘܗܦܟܘ ܟܠܗܘܢ ܝܗ̈ܘܕܝܐ ܡܢ ܟܠܗܘܢ ܐܬܪ̈ܘܬܐ ܕܐܬܒܕܪܘ ܠܬܡܢ ܘܐܬܘ ܠܐܪܥܐ ܕܝܗܘܕܐ ܠܘܬ ܓܕܠܝܐ ܠܡܨܦܝܐ ܘܚܡܠܘ ܚܡܪܐ ܘܥ̈ܠܠܬܐ ܕܩܝܛܐ ܣܘܓܐܐ ܕܛܒ

ܘܝܘܚܢܢ ܒܪ ܩܘܪܚ ܘܟܠܗܘܢ ܪ̈ܒܝ ܚܝ̈ܠܐ ܕܒܩܘܪ̈ܝܐ ܐܬܘ ܠܘܬ ܓܕܠܝܐ ܠܡܨܦܝܐ

ܘܐܡܪܘ ܠܗ ܠܐ ܝܕܥ ܐܢܬ ܕܒܠܥܝܣ ܡܠܟܐ ܕܒܢ̈ܝ ܥܡܘܢ ܫܕܪ ܠܐܝܫܡܥܝܠ ܒܪ ܢܬܢܝܐ ܠܡܩܛܠܟ ܘܠܐ ܗܝܡܢ ܐܢܘܢ ܓܕܠܝܐ ܒܪ ܐܚܝܩܡ

ܘܝܘܚܢܢ ܒܪ ܩܘܪܚ ܐܡܪ ܠܓܕܠܝܐ ܡܛܫܝܐܝܬ ܒܡܨܦܝܐ ܐܙܠ ܐܩܛܠܝܘܗܝ ܠܐܝܫܡܥܝܠ ܒܪ ܢܬܢܝܐ ܘܐܢܫ ܠܐ ܢܕܥ ܕܠܡܐ ܢܩܛܠܟ ܘܢܬܒܕܪܘܢ ܟܠܗܘܢ ܕܒܝܬ ܝܗܘܕܐ ܕܡܬܟܢܫܝܢ ܠܘܬܟ ܘܢܐܒܕ ܫܪܟܢܐ ܕܝܗ̈ܘܕܝܐ

ܘܐܡܪ ܓܕܠܝܐ ܒܪ ܐܚܝܩܡ ܠܝܘܚܢܢ ܒܪ ܩܘܪܚ ܠܐ ܬܥܒܕ ܦܬܓܡܐ ܗܢܐ ܡܛܠ ܕܕܓܠܘܬܐ ܡܠܠܬ ܥܠ ܐܝܫܡܥܝܠ

ܘܒܝܪܚܐ ܕܫܒܥܐ ܐܬܐ ܐܝܫܡܥܝܠ ܒܪ ܢܬܢܝܐ ܒܪ ܐܝܫܡܥܝܠ ܡܢ ܙܪܥܐ ܕܡܠܟܘܬܐ ܘܪ̈ܘܪܒܢܝ ܡܠܟܐ ܘܥܣܪ̈ܝܢ ܓܒܪ̈ܝܢ ܥܡܗ ܠܘܬ ܓܕܠܝܐ ܒܪ ܐܚܝܩܡ ܠܡܨܦܝܐ ܘܐܟܠܘ ܬܡܢ ܠܚܡܐ ܐܟܚܕܐ ܒܡܨܦܝܐ

ܘܩܡ ܐܝܫܡܥܝܠ ܒܪ ܢܬܢܝܐ ܗܘ ܘܥܣܪ̈ܝܢ ܓܒܪ̈ܝܢ ܕܐܬܘ ܥܡܗ ܘܡܚܐܘܗܝ ܠܓܕܠܝܐ ܒܪ ܐܚܝܩܡ ܒܪ ܫܦܢ ܒܚܪܒܐ ܘܩܛܠܘܗܝ ܗ̇ܘ ܕܐܫܠܛܗ ܡܠܟܐ ܕܒܒܠ ܒܐܪܥܐ

ܘܠܟܠܗܘܢ ܝܗ̈ܘܕܝܐ ܕܐܝܬ ܗܘܘ ܥܡܗ ܥܡ ܓܕܠܝܐ ܒܡܨܦܝܐ ܘܠܟ̈ܠܕܝܐ ܕܐܫܬܟܚܘ ܬܡܢ ܘܐܦ ܠܓܒܪ̈ܐ ܩܪ̈ܒܬܢܐ ܩܛܠ ܐܝܫܡܥܝܠ

ܘܐܢܫ ܠܐ ܫܡܥ ܘܒܝܘܡܐ ܕܬܪ̈ܝܢ ܡܢ ܒܬܪ ܕܐܬܩܛܠ ܓܕܠܝܐ

ܐܬܘ ܓܒܪ̈ܐ ܡܢ ܫܟܝܡ ܘܡܢ ܫܝܠܘ ܘܡܢ ܫܡܪܝܢ ܬܡܢܐܝܢ ܓܒܪ̈ܝܢ ܓܪ̈ܝܥܝܢ ܕܩܢ̈ܝܗܘܢ ܘܡܨܪܝܢ ܠܒܘܫ̈ܝܗܘܢ ܘܡܬܟܬܫܝܢ ܘܩܘܪ̈ܒܢܐ ܘܠܒܘܢܬܐ ܒܐ̈ܝܕܝܗܘܢ ܠܡܥܠܘ ܠܒܝܬܗ ܕܡܪܝܐ

ܘܢܦܩ ܐܝܫܡܥܝܠ ܒܪ ܢܬܢܝܐ ܠܐܘܪܥܗܘܢ ܡܢ ܡܨܦܝܐ ܡܗܠܟ ܘܐܙܠ ܘܒܟܐ ܘܟܕ ܦܓܥ ܒܗܘܢ ܐܡܪ ܠܗܘܢ ܬܘ ܠܘܬ ܓܕܠܝܐ ܒܪ ܐܚܝܩܡ

ܘܟܕ ܥܠܘ ܠܓܘ ܩܪܝܬܐ ܢܟܣ ܐܢܘܢ ܐܝܫܡܥܝܠ ܒܪ ܢܬܢܝܐ ܘܐܪܡܝ ܐܢܘܢ ܒܓܘܒܐ ܗܘ ܘܓܒܪ̈ܐ ܕܥܡܗ

ܘܥܣܪܐ ܓܒܪ̈ܝܢ ܐܫܬܟܚܘ ܒܗܘܢ ܘܐܡܪܝܢ ܠܐܝܫܡܥܝܠ ܠܐ ܬܩܛܠܢ ܡܛܠ ܕܐܝܬ ܠܢ ܚ̈ܕܘܬܐ ܒܚܩܠܐ ܕܚ̈ܛܐ ܘܕܣܥܪ̈ܐ ܘܡܫܚܐ ܘܕܒܫܐ ܘܫܒܩ ܐܢܘܢ ܘܠܐ ܩܛܠ ܐܢܘܢ ܥܡ ܐܚܝܗܘܢ

ܘܓܘܒܐ ܕܫܕܐ ܒܗ ܐܝܫܡܥܝܠ ܟܠܗܝܢ ܫ̈ܠܕܐ ܕܓܒܪ̈ܐ ܕܩܛܠ ܥܡ ܓܕܠܝܐ ܗ̇ܘ ܗܘ ܕܥܒܕ ܐܣܐ ܡܠܟܐ ܕܝܗܘܕܐ ܡܢ ܩܕܡ ܒܥܫܐ ܡܠܟܐ ܕܐܝܣܪܝܠ ܠܗ ܠܓܘܒܐ ܗ̇ܘ ܡܠܝܗܝ ܐܝܫܡܥܝܠ ܒܪ ܢܬܢܝܐ ܩ̈ܛܝܠܐ

ܘܫܒܐ ܐܝܫܡܥܝܠ ܟܠܗ ܫܪܟܐ ܕܥܡܐ ܕܒܡܨܦܝܐ ܕܐܫܠܡ ܢܒܘܙܪܕܢ ܪܒ ܕܚܫ̈ܐ ܠܓܕܠܝܐ ܒܪ ܐܚܝܩܡ ܘܫܒܐ ܐܢܘܢ ܐܝܫܡܥܝܠ ܒܪ ܢܬܢܝܐ ܘܐܙܠ ܠܥܒܪܐ ܕܒܢ̈ܝ ܥܡܘܢ

ܘܫܡܥ ܝܘܚܢܢ ܒܪ ܩܘܪܚ ܘܟܘܠܗܘܢ ܪ̈ܒܝ ܚܝ̈ܠܐ ܕܥܡܗ ܥܠ ܟܠܗ̇ ܫܒܝܬܐ ܕܕܒܪ ܐܝܫܡܥܝܠ ܒܪ ܢܬܢܝܐ

ܘܕܒܪ ܟܠܗܘܢ ܓܒܪܐ ܘܐܙܠ ܠܡܬܟܬܫܘ ܥܡ ܐܝܫܡܥܝܠ ܒܪ ܢܬܢܝܐ ܘܐܫܟܚܘܗܝ ܥܠ ܡ̈ܝܐ ܣ̈ܓܝܐܐ ܕܐܝܬ ܒܓܒܥܘܢ

ܘܟܕ ܚܙܐ ܟܠܗ ܥܡܐ ܕܥܡ ܐܝܫܡܥܝܠ ܠܝܘܚܢܢ ܒܪ ܩܘܪܚ ܘܠܟܠܗܘܢ ܪ̈ܒܝ ܚ̈ܝܠܐ ܕܥܡܗ ܚܕܝܘ

ܘܗܦܟܘ ܟܠܗ ܥܡܐ ܕܫܒܐ ܐܝܫܡܥܝܠ ܡܢ ܡܨܦܝܐ ܘܐܬܘ ܠܘܬ ܝܘܚܢܢ ܒܪ ܩܘܪܚ

ܘܐܝܫܡܥܝܠ ܒܪ ܢܬܢܝܐ ܐܫܬܘܙܒ ܒܬܡܢܝܐ ܐ̈ܢܫܝܢ ܡܢ ܩܕܡ ܝܘܚܢܢ ܘܐܙܠ ܠܘܬ ܒܢ̈ܝ ܥܡܘܢ

ܘܕܒܪ ܝܘܚܢܢ ܒܪ ܩܘܪܚ ܘܟܠܗܘܢ ܪ̈ܒܝ ܚ̈ܝܠܐ ܕܥܡܗ ܟܠ ܫܪܟܐ ܕܥܡܐ ܕܐܗܦܟ ܡܢ ܠܘܬ ܐܝܫܡܥܝܠ ܒܪ ܢܬܢܝܐ ܡܢ ܡܨܦܝܐ ܡܢ ܒܬܪ ܕܩܛܠ ܐܝܫܡܥܝܠ ܠܓܕܠܝܐ ܒܪ ܐܚܝܩܡ ܘܕܒܪ ܓܒܪ̈ܐ ܩܪ̈ܒܬܢܐ ܘܢܫ̈ܐ ܘ̈ܛܠܝܐ ܘܡܗܝ̈ܡܢܐ ܕܐܗܦܟ ܡܢ ܓܒܥܘܢ

ܘܐܙܠ ܘܝܬܒ ܒܐܕܪ̈ܐ ܕܒܡܗܡ ܕܥܠ ܓܢܒ ܒܝܬ ܠܚܡ ܠܡܐܙܠ ܠܡܥܠ ܠܡܨܪܝܢ

ܡܢ ܩܕܡ ܟ̈ܠܕܝܐ ܕܕܚܠܘ ܡܢܗܘܢ ܥܠ ܕܩܛܠ ܐܝܫܡܥܝܠ ܒܪ ܢܬܢܝܐ ܠܓܕܠܝܐ ܒܪ ܐܚܝܩܡ ܗ̇ܘ ܕܐܫܠܛܗ ܡܠܟܐ ܕܒܒܠ ܒܐܪܥܐ ܕܝܗܘܕܐ

ܘܩܪܒܘ ܟܠܗܘܢ ܪ̈ܒܝ ܚܝ̈ܠܐ ܘܝܘܚܢܢ ܒܪ ܩܘܪܚ ܘܝܙܢܝܐ ܒܪ ܗܘܫܥܝܐ ܘܟܠܗ ܥܡܐ ܡܢ ܙܥܘܪܐ ܘܥܕܡܐ ܠܩܫܝܫܐ

ܘܐܡܪܘ ܠܐܪܡܝܐ ܒܥܝܢ ܚܢܢ ܡܢܟ ܨܠܐ ܥܠܝܢ ܩܕܡ ܡܪܝܐ ܐܠܗܟ ܡܛܠ ܕܐܫܬܚܪܢ ܩܠܝܠ ܡܢ ܣܘܓܐܐ ܐܝܟ ܕܥܝܢ̈ܝܟ ܚ̈ܙܝܢ ܠܢ

ܘܢܚܘܝܢ ܡܪܝܐ ܐܠܗܟ ܐܘܪܚܐ ܕܢܐܙܠ ܒܗ ܘܦܬܓܡܐ ܕܢܥܒܕ

ܘܐܡܪ ܠܗܘܢ ܐܪܡܝܐ ܢܒܝܐ ܫܡܥܬ ܗܐ ܡܨܠܐ ܐܢܐ ܩܕܡ ܡܪܝܐ ܐܠܗܟܘܢ ܐܝܟ ܦܬ̈ܓܡܝܟܘܢ ܘܟܠ ܦܬܓܡܐ ܕܢܥܢܝܟܘܢ ܡܪܝܐ ܐܠܗܟܘܢ ܐܚܘܝܟܘܢ ܘܠܐ ܐܛܫܐ ܡܢܟܘܢ ܡܠܐ

ܘܗܢܘܢ ܐܡܪܘ ܠܐܪܡܝܐ ܢܗܘܐ ܒܢ ܡܪܝܐ ܣܗܕܐ ܫܪܝܪܐ ܘܡܗܝܡܢܐ ܐܠܐ ܐܝܟ ܦܬܓܡܐ ܕܢܫܕܪܟ ܡܪܝܐ ܐܠܗܟ ܠܘܬܢ ܗܟܢܐ ܢܥܒܕ

ܐܢ ܕܛܒ ܘܐܢ ܕܒܝܫ ܒܩܠܗ ܕܡܪܝܐ ܐܠܗܢ ܢܫܡܥ ܕܡܫܕܪܝܢܢ ܠܟ ܠܘܬܗ ܘܢܛܐܒ ܠܢ ܟܕ ܢܫܡܥ ܒܩܠܗ ܕܡܪܝܐ ܐܠܗܢ

ܘܡܢ ܒܬܪ ܥܣܪܐ ܝܘܡ̈ܝܢ ܗܘܐ ܦܬܓܡܗ ܕܡܪܝܐ ܥܠ ܐܪܡܝܐ ܢܒܝܐ

ܘܩܪܐ ܠܝܘܚܢܢ ܒܪ ܩܘܪܚ ܘܠܟܠܗܘܢ ܪ̈ܒܝ ܚܝ̈ܠܐ ܕܥܡܗ ܘܠܟܠܗ ܥܡܐ ܡܢ ܙܥܘܪܐ ܘܥܕܡܐ ܠܩܫܝܫܐ

ܘܐܡܪ ܠܗܘܢ ܗܟܢܐ ܐܡܪ ܡܪܝܐ ܐܠܗܐ ܕܐܝܣܪܝܠ ܕܫܕܪܬܘܢܢܝ ܠܘܬܗ ܠܡܪܡܝܘ ܒܥܘܬܟܘܢ ܩܕܡܘܗܝ

ܐܢ ܬܬܒܘܢ ܒܐܪܥܐ ܗܕܐ ܐܒܢܝܟܘܢ ܘܠܐ ܐܣܚܘܦܟܘܢ ܘܐܨܘܒܟܘܢ ܘܠܐ ܐܥܩܘܪܟܘܢ ܘܐܫܠܐ ܡܢ ܒܝܫܬܐ ܕܥܒܕܬ ܠܟܘܢ

ܘܠܐ ܬܕܚܠܘܢ ܡܢ ܩܕܡ ܡܠܟܐ ܕܒܒܠ ܕܐܢܬܘܢ ܕܚܠܝܢ ܡܢܗ ܠܐ ܬܕܚܠܘܢ ܡܢܗ ܐܡܪ ܡܪܝܐ ܡܛܠ ܕܥܡܟܘܢ ܐܢܐ ܐܡܪ ܡܪܝܐ ܠܡܦܪܩܟܘܢ ܘܠܡܦܨܝܘܬܟܘܢ ܡܢ ܐ̈ܝܕܘܗܝ

ܘܐܬܠ ܥܠܝܟܘܢ ܪ̈ܚܡܐ ܘܐܪܚܡܟܘܢ ܘܐܘܬܒܟܘܢ ܒܐܪܥܟܘܢ

ܘܐܢ ܐܡܪܝܢ ܐܢܬܘܢ ܠܐ ܝܬܒܝܢܢ ܒܐܪܥܐ ܗܕܐ ܡܛܠ ܕܠܐ ܬܫܡܥܘܢ ܒܩܠܗ ܕܡܪܝܐ ܐܠܗܟܘܢ

ܘܐܡܪܬܘܢ ܠܐ ܗܟܢܐ ܠܐܪܥܐ ܕܡܨܪܝܢ ܢܥܘܠ ܕܠܐ ܢܚܙܐ ܩܪܒܐ ܘܩܠܐ ܕܫܝܦܘܪܐ ܠܐ ܢܫܡܥ ܘܠܠܚܡܐ ܠܐ ܢܟܦܢ ܘܬܡܢ ܢܬܒ

ܗܫܐ ܫܡܥܘ ܦܬܓܡܗ ܕܡܪܝܐ ܫܪܟܐ ܕܝܗܘܕܐ ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ ܐܢ ܐܢܬܘܢ ܬܣܝܡܘܢ ܐ̈ܦܝܟܘܢ ܠܡܥܠ ܠܡܨܪܝܢ ܘܬܥܠܘܢ ܠܡܥܡܪ ܬܡܢ

ܗ̇ܝ ܚܪܒܐ ܕܕܚܠܝܢ ܐܢܬܘܢ ܡܢܗ̇ ܬܡܢ ܬܕܪܟܟܘܢ ܒܐܪܥܐ ܕܡܨܪܝܢ ܘܟܦܢܐ ܕܐܢܬܘܢ ܕܚܠܝܢ ܡܢܗ ܬܡܢ ܢܪܕܘܦ ܒܬܪܟܘܢ ܠܡܨܪܝܢ ܘܬܡܢ ܬܡܘܬܘܢ

ܘܢܗܘܘܢ ܟܠܗܘܢ ܓܒܪ̈ܐ ܕܣܡܘ ܐ̈ܦܝܗܘܢ ܠܡܥܠ ܠܡܨܪܝܢ ܠܡܥܡܪ ܬܡܢ ܢܡܘܬܘܢ ܒܚܪܒܐ ܘܒܟܦܢܐ ܘܒܡܘܬܢܐ ܘܠܐ ܢܗܘܐ ܠܗܘܢ ܣܪܝܕܐ ܕܡܫܬܘܙܒ ܡܢ ܩܕܡ ܒܝܫܬܐ ܕܡܝܬܐ ܐܢܐ ܥܠܝܗܘܢ

ܡܛܠ ܕܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܐܝܠ ܐܝܟ ܕܐܬܬܢܝܚ ܪܘܓܙܝ ܘܚܡܬܝ ܥܠ ܥܡܘܪ̈ܝܗ̇ ܕܐܘܪܫܠܡ ܗܟܢܐ ܬܬܢܝܚ ܚܡܬܝ ܥܠܝܟܘܢ ܡܐ ܕܥܠܬܘܢ ܠܡܨܪܝܢ ܘܬܗܘܘܢ ܠܡ̈ܘܡܬܐ ܘܠܬܡܗܐ ܘܠܠܘܛܬܐ ܘܠܚܣܕܐ ܘܠܐ ܬܚܙܘܢ ܬܘܒ ܐܬܪܐ ܗܢܐ

ܐܡܪ ܡܪܝܐ ܥܠܝܟܘܢ ܫܪܟܐ ܕܝܗܘܕܐ ܠܐ ܬܥܠܘܢ ܠܡܨܪܝܢ ܘܕܥܘ ܕܣܗܕܬ ܒܟܘܢ ܝܘܡܢܐ

ܕܐܢܬܘܢ ܐܛܥܝܬܘܢ ܒܢܦܫܟܘܢ ܘܫܕܪܬܘܢܢܝ ܠܘܬ ܡܪܝܐ ܐܠܗܟܘܢ ܘܐܡܪܬܘܢ ܨܠܐ ܥܠܝܢ ܩܕܡ ܡܪܝܐ ܐܠܗܢ ܘܟܠܡܕܡ ܕܐܡܪ ܠܟ ܡܪܝܐ ܐܠܗܢ ܚܘܢ ܘܢܥܒܕ

ܘܚܘܝܬܟܘܢ ܝܘܡܢܐ ܘܠܐ ܫܡܥܬܘܢ ܒܩܠܗ ܕܡܪܝܐ ܐܠܗܟܘܢ ܘܥܠ ܟܘܠ ܕܫܕܪܢܝ ܠܘܬܟܘܢ ܠܐ ܥܒܕܬܘܢ

ܗܫܐ ܕܥܘ ܕܒܚܪܒܐ ܘܒܟܦܢܐ ܘܒܡܘܬܢܐ ܬܡܘܬܘܢ ܒܐܬܪܐ ܕܨܒܝܬܘܢ ܠܡܥܠ ܠܗ ܠܡܥܡܪ ܬܡܢ

ܘܟܕ ܫܠܡ ܐܪܡܝܐ ܠܡܐܡܪ ܠܟܠܗ ܥܡܐ ܟܠܗܘܢ ܦܬ̈ܓܡܘܗܝ ܕܡܪܝܐ ܐܠܗܗܘܢ ܕܫܕܪܗ ܡܪܝܐ ܐܠܗܗܘܢ ܠܘܬܗܘܢ ܠܡܐܡܪ ܠܗܘܢ ܦܬ̈ܓܡܐ ܗܠܝܢ

ܐܡܪ ܝܙܢܝܐ ܒܪ ܗܘܫܥܝܐ ܘܝܘܚܢܢ ܒܪ ܩܘܪܚ ܘܟܠܗܘܢ ܓܒܪ̈ܐ ܪ̈ܫܝܥܐ ܐܡܪܘ ܠܐܪܡܝܐ ܕܓܠܐܝܬ ܐܡܪܬ ܠܐ ܫܕܪܟ ܡܪܝܐ ܐܠܗܢ ܕܬܐܡܪ ܠܢ ܕܠܐ ܬܥܠܘܢ ܠܡܨܪܝܢ ܠܡܥܡܪ ܬܡܢ

ܡܛܠ ܕܒܪܘܟ ܒܪ ܢܪܝܐ ܡܓܪܐ ܠܟ ܒܢ ܕܢܫܠܡܢ ܒܐܝܕܐ ܕܟ̈ܠܕܝܐ ܕܢܩܛܠܘܢܢ ܘܢܫܒܘܢܢ ܠܒܒܠ

ܘܠܐ ܫܡܥ ܝܘܚܢܢ ܒܪ ܩܘܪܚ ܘܟܠܗܘܢ ܪ̈ܒܝ ܚܝ̈ܠܐ ܘܟܘܠܗ ܥܡܐ ܒܩܠܗ ܕܡܪܝܐ ܕܢܬܒܘܢ ܒܐܪܥܐ ܕܝܗܘܕܐ

ܘܕܒܪ ܝܘܚܢܢ ܒܪ ܩܘܪܚ ܠܟܠܗܘܢ ܪ̈ܒܝ ܚܝ̈ܠܐ ܘܠܟܠܗ ܫܪܟܐ ܕܐܫܬܚܪܘ ܡܢ ܕܒܝܬ ܝܗܘܕܐ

ܠܓܒܪ̈ܐ ܘܠܢܫ̈ܐ ܘ̈ܠܛܠܝܐ ܘܠܒܝܬ ܡܠܟܐ ܟܘܠܗܝܢ ܢܦܫܬ̈ܐ ܕܫܒܩ ܢܒܘܙܪܕܢ ܪܒ ܕܚܫ̈ܐ ܠܘܬ ܓܕܠܝܐ ܒܪ ܐܚܝܩܡ ܒܪ ܫܦܢ ܘܠܐܪܡܝܐ ܢܒܝܐ ܘܠܒܪܘܟ ܒܪ ܢܪܝܐ

ܘܐܬܘ ܠܐܪܥܐ ܕܡܨܪܝܢ ܡܛܠ ܕܠܐ ܫܡܥܘ ܒܩܠܗ ܕܡܪܝܐ ܘܐܬܘ ܥܕܡܐ ܠܬܚܦܝܣ

ܘܗܘܐ ܦܬܓܡܗ ܕܡܪܝܐ ܥܠ ܐܪܡܝܐ ܒܬܚܦܝܣ ܠܡܐܡܪ

ܣܒ ܒܐܝܕܟ ܟܐ̈ܦܐ ܪ̈ܘܪܒܬܐ ܘܛܡܘܪ ܐܢܝ̈ܢ ܒܡܠܛܐ ܒܡܠܒܢܐ ܒܬܪܥܐ ܕܒܝܬ ܦܪܥܘܢ ܒܬܚܦܝܣ ܠܥܝܢ ܓܒܪ̈ܐ ܕܝܗܘܕܐ

ܘܐܡܪ ܠܗܘܢ ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ ܗܐ ܡܫܕܪ ܐܢܐ ܘܕܒܪ ܐܢܐ ܠܢܒܘܟܕܢܨܪ ܡܠܟܐ ܕܒܒܠ ܥܒܕܝ ܘܢܪܡܐ ܟܘܪܣܝܗ ܠܥܠ ܡܢ ܟܐ̈ܦܐ ܗܠܝܢ ܕܛܡܪܬ ܘܢܫܩܘܠ ܙܝܢܗ ܥܠܝܗܝܢ

ܘܢܐܬܐ ܘܢܡܚܝܗ̇ ܠܐܪܥܐ ܕܡܨܪܝܢ ܕܠܡܘܬܐ ܠܡܘܬܐ ܘܕܠܫܒܝܐ ܠܫܒܝܐ ܘܕܠܚܪܒܐ ܠܚܪܒܐ

ܘܢܫܒܘܩ ܢܘܪܐ ܒܒ̈ܬܐ ܕܐ̈ܠܗܐ ܕܡܨܪ̈ܝܐ ܘܢܘܩܕ ܐܢܘܢ ܘܢܫܒܐ ܐܢܘܢ ܘܢܬܥܛܦܝܗ̇ ܠܐܪܥܐ ܐܝܟ ܕܡܬܥܛܦ ܪܥܝܐ ܠܓܘܠܬܗ ܘܢܦܘܩ ܡܢ ܬܡܢ ܒܫܠܡܐ

ܘܢܬܒܪ ܩܝܡܬܐ ܕܒܝܬ ܫܡܫ ܕܒܐܪܥܐ ܕܡܨܪܝܢ ܘܒ̈ܬܐ ܕܐ̈ܠܗܐ ܕܡܨܪ̈ܝܐ ܢܘܩܕ ܒܢܘܪܐ

ܦܬܓܡܐ ܕܗܘܐ ܥܠ ܐܪܡܝܐ ܡܢ ܩܕܡ ܡܪܝܐ ܕܢܬܢܒܐ ܥܠ ܟܠܗܘܢ ܝܗ̈ܘܕܝܐ ܕܝܬܒܝܢ ܒܐܪܥܐ ܕܡܨܪܝܢ ܘܕܝܬܒܝܢ ܒܡܓܕܘܠ ܘܒܬܚܦܝܣ ܘܒܡܦܣ ܘܒܐܪܥܐ ܕܦܬܪܘܣ

ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ ܐܢܬܘܢ ܚܙܝܬܘܢ ܟܠܗ̇ ܒܝܫܬܐ ܕܐܝܬܝܬ ܥܠ ܐܘܪܫܠܡ ܘܥܠ ܟܘܠܗܝܢ ܩܘܪ̈ܝܐ ܕܝܗܘܕܐ ܘܗܢܝܢ ܚܪ̈ܒܢ ܝܘܡܢܐ ܘܠܝܬ ܒܗܝܢ ܐܢܫ ܕܝܬܒ

ܡܛܠ ܟܠܗ̇ ܒܝܫܬܐ ܕܥܒܕܘ ܘܐܪܓܙܘܢܝ ܘܐܙܠܘ ܘܣܡܘ ܒܣ̈ܡܐ ܠܐ̈ܠܗܐ ܐܚܪ̈ܢܐ ܐܝܠܝܢ ܕܠܐ ܝܕܥܘ ܐܢܘܢ ܗܢܘܢ ܘܐ̈ܒܗܝܗܘܢ

ܘܫܕܪܬ ܠܘܬܗܘܢ ܠܟܠܗܘܢ ܥܒ̈ܕܝ ܢܒ̈ܝܐ ܩܕܡܬ ܘܫܕܪܬ ܘܐܡܪܬ ܠܐ ܬܥܒܕܘܢ ܛܢܦܘܬܐ ܗܕܐ ܕܣܢܝܬ

ܘܠܐ ܫܡܥܘ ܘܠܐ ܨܠܘ ܐܕܢܗܘܢ ܕܢܗܦܟܘܢ ܡܢ ܒܝܫ̈ܬܗܘܢ ܕܠܐ ܢܣܝܡܘܢ ܒܣ̈ܡܐ ܠܐ̈ܠܗܐ ܐܚܪ̈ܢܐ

ܘܐܬܬܢܝܚ ܪܘܓܙܝ ܘܚܡܬܝ ܘܐܚܕܬ ܢܘܪܐ ܒܩܘܪ̈ܝܐ ܕܝܗܘܕܐ ܘܒܫ̈ܘܩܝܗ̇ ܕܐܘܪܫܠܡ ܘܗ̈ܘܝ ܠܚܘܪܒܐ ܘܠܬܡܗܐ ܐܝܟ ܕܝܘܡܢܐ

ܘܗܫܐ ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ ܠܡܢܐ ܥܒܕܝܢ ܐܢܬܘܢ ܒܝܫܬܐ ܪܒܬܐ ܥܠ ܢܦܫ̈ܬܟܘܢ ܕܬܘܒܕܘܢ ܡܢܟܘܢ ܓܒܪ̈ܐ ܘܢܫ̈ܐ ܘܥ̈ܠܝܡܐ ܘܝ̈ܠܘܕܐ ܡܢ ܓܘ ܝܗܘܕܐ ܕܠܐ ܬܫܒܩܘܢ ܠܟܘܢ ܚܪܬܐ

ܡܛܠ ܕܐܪܓܙܬܘܢܢܝ ܒܥܒܕ ܐ̈ܝܕܝܟܘܢ ܘܣܡܬܘܢ ܒܣ̈ܡܐ ܠܐ̈ܠܗܐ ܐܚܪ̈ܢܐ ܒܐܪܥܐ ܕܡܨܪܝܢ ܕܥܠܬܘܢ ܠܡܥܡܪ ܬܡܢ ܕܐܘܒܕܟܘܢ ܘܬܗܘܘܢ ܠܠܘܛܬܐ ܘܠܚܣܕܐ ܒܟܠܗܘܢ ܥܡ̈ܡܐ ܕܐܪܥܐ

ܠܡܐ ܛܥܝܬܘܢ ܒܝܫܬܐ ܕܐ̈ܒܗܝܟܘܢ ܘܒܝܫܬܐ ܕܡ̈ܠܟܐ ܕܝܗܘܕܐ ܘܒܝܫܬܐ ܕܢܫ̈ܝܗܘܢ ܕܥܒܕܘ ܒܐܪܥܐ ܕܝܗܘܕܐ ܘܒܫ̈ܘܩܝܗ ܕܐܘܪܫܠܡ

ܘܠܐ ܐܬܕܟܝܘ ܥܕܡܐ ܠܝܘܡܢܐ ܘܠܐ ܕܚܠܘ ܘܠܐ ܦܠܚܘܢܝ ܘܠܐ ܗܠܟܘ ܒܢܡܘܣܝ ܘܒܩܝܡܝ ܕܝܗܒܬ ܠܗܘܢ ܘܠܐ̈ܒܗܝܗܘܢ

ܡܛܘܠ ܗܢܐ ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ ܗܐ ܣܐܡ ܐܢܐ ܐ̈ܦܝ ܒܟܘܢ ܠܒܝܫܬܐ ܘܠܡܘܒܕܘ ܠܟܠܗܘܢ ܕܒܝܬ ܝܗܘܕܐ

ܘܐܬܒܪ ܫܪܟܐ ܕܝܗܘܕܐ ܕܣܡܘ ܐ̈ܦܝܗܘܢ ܠܡܥܠ ܠܡܨܪܝܢ ܠܡܥܡܪ ܬܡܢ ܢܣܘܦܘܢ ܟܠܗܘܢ ܒܐܪܥܐ ܕܡܨܪܝܢ ܘܢܡܘܬܘܢ ܒܚܪܒܐ ܘܒܟܦܢܐ ܘܒܡܘܬܢܐ ܘܢܗܘܘܢ ܠܡ̈ܘܡܬܐ ܘܠܬܡܗܐ ܘܠܠܘܛܬܐ ܘܠܚܣܕܐ

ܘܐܦܩܘܕ ܥܠ ܕܝܬܒܝܢ ܒܐܪܥܐ ܕܡܨܪܝܢ ܐܝܟ ܕܦܩܕܬ ܥܠ ܐܘܪܫܠܡ ܒܚܪܒܐ ܘܒܟܦܢܐ ܘܒܡܘܬܢܐ

ܘܠܐ ܢܗܘܐ ܠܗܘܢ ܦܠܝܛܐ ܘܣܪܝܕܐ ܠܫܪܟܐ ܕܝܗܘܕܐ ܕܥܐܠܝܢ ܠܡܥܡܪ ܬܡܢ ܒܐܪܥܐ ܕܡܨܪܝܢ ܘܠܡܗܦܟ ܠܐܪܥܐ ܕܝܗܘܕܐ ܕܗܢܘܢ ܣܒܪܝܢ ܒܢܦܫܗܘܢ ܠܡܗܦܟ ܠܬܡܢ ܠܐ ܢܗܦܟܘܢ ܐܠܐ ܐܢ ܙܥܘܪ̈ܐ

ܘܥܢܘ ܘܐܡܪܘ ܠܐܪܡܝܐ ܟܠ ܓܒܪ̈ܐ ܕܝܕܥܝܢ ܗܘܘ ܕܣ̈ܝܡܢ ܗ̈ܘܝ ܢܫ̈ܝܗܘܢ ܒܣ̈ܡܐ ܠܐ̈ܠܗܐ ܐܚܪ̈ܢܐ ܘܟܠܗܝܢ ܢܫ̈ܐ ܕܩܝ̈ܡܢ ܟܢܫܐ ܪܒܐ ܘܟܠܗ ܥܡܐ ܕܝܬܒܝܢ ܒܐܪܥܐ ܕܡܨܪܝܢ ܘܒܦܬܪܘܣ ܘܐܡܪܘ ܠܗ

ܦܬܓܡܐ ܕܐܡܪܬ ܠܢ ܒܫܡ ܡܪܝܐ ܠܐ ܫܡܥܝܢ ܚܢܢ ܠܟ

ܐܠܐ ܥܒܕܝܢܢ ܟܘܠ ܦܬܓܡܐ ܕܢܦܩ ܡܢ ܦܘܡܢ ܠܡܣܡ ܒܣ̈ܡܐ ܠܦܘܠܚܢ ܫܡܝܐ ܘܠܡܢܩܝܘ ܠܗ ܢܘܩ̈ܝܐ ܐܝܟ ܕܥܒܕܢ ܚܢܢ ܘܐ̈ܒܗܝܢ ܘܡ̈ܠܟܝܢ ܘܪ̈ܘܪܒܢܝܢ ܒܩܘܪ̈ܝܐ ܕܝܗܘܕܐ ܘܒܫ̈ܘܩܝܗ̇ ܕܐܘܪܫܠܡ ܘܣܒܥܝܢ ܗ̈ܘܝܢ ܠܚܡܐ ܘܛܒ ܗܘܐ ܠܢ ܘܒܝܫܬܐ ܠܐ ܚܙܝܢ

ܘܗܐ ܡܢ ܕܦܫܢ ܡܢ ܕܠܡܣܡ ܒܣ̈ܡܐ ܠܦܘܠܚܢ ܫܡܝܐ ܘܠܡܢܩܝܘ ܠܗ̇ ܢܘܩ̈ܝܐ ܚܣܪ ܠܢ ܟܠ ܡܕܡ ܘܒܚܪܒܐ ܘܒܟܦܢܐ ܣܦܢ

ܘܥܢ̈ܝ ܟܠܗܝܢ ܢܫ̈ܐ ܘܐܡܪ̈ܢ ܟܕ ܚܢܢ ܣܝ̈ܡܢ ܗ̈ܘܝܢ ܒܣ̈ܡܐ ܠܡܠܟܬ ܫܡܝܐ ܘܡܢ̈ܩܝܢ ܗ̈ܘܝܢ ܠܗ̇ ܢܘܩ̈ܝܐ ܠܐ ܗܘܐ ܒܠܥܕ ܡܢ ܓܒܪܝܢ ܥܒܕܢ ܠܗ̇ ܙܘܬܪ̈ܐ ܘܢܩܝܢ ܠܗ̇ ܢܘܩ̈ܝܐ

ܘܐܡܪ ܐܪܡܝܐ ܠܟܠܗ ܥܡܐ ܠܓܒܪ̈ܐ ܘܠܢܫ̈ܐ ܘܠܟܠܗ ܥܡܐ ܕܐܡܪܘ ܠܗ ܡ̈ܠܐ ܗܠܝܢ

ܗ̇ܘ ܥܛܪܐ ܕܒܣ̈ܡܐ ܕܣܡܬܘܢ ܒܩܘܪ̈ܝܐ ܕܝܗܘܕܐ ܘܒ̈ܫܘܩܝܗ̇ ܕܐܘܪܫܠܡ ܐܢܬܘܢ ܘܐ̈ܒܗܝܟܘܢ ܘܡ̈ܠܟܝܟܘܢ ܘܪ̈ܘܪܒܢܝܟܘܢ ܘܥܡܐ ܕܐܪܥܐ ܠܗ ܗܘ ܐܬܕܟܪ ܡܪܝܐ ܘܣܠܩ ܥܠ ܠܒܗ

ܘܠܐ ܡܫܟܚ ܬܘܒ ܡܪܝܐ ܠܡܫܒܩ ܠܟܘܢ ܡܛܠ ܒܝܫܘܬܐ ܕܥܒ̈ܕܝܟܘܢ ܘܡܛܠ ܛܢܦܘܬܐ ܕܥܒܕܬܘܢ ܘܗܘܬ ܐܪܥܟܘܢ ܠܬܡܗܐ ܘܠܠܘܛܬܐ ܘܠܚܘܪܒܐ ܡܢ ܒܠܝ ܕܝܬܒ ܐܝܟ ܕܝܘܡܢܐ

ܥܠ ܕܣܡܬܘܢ ܒܣ̈ܡܐ ܘܚܛܝܬܘܢ ܠܡܪܝܐ ܘܠܐ ܫܡܥܬܘܢ ܒܩܠܗ ܕܡܪܝܐ ܘܒܢܡܘܣܗ ܘܒܩܝܡܗ ܘܒܣ̈ܗܕܘܬܗ ܠܐ ܗܠܟܬܘܢ ܡܛܠ ܗܢܐ ܐܕܪܟܬܟܘܢ ܒܝܫܬܐ ܗܕܐ ܐܝܟ ܕܝܘܡܢܐ

ܘܐܡܪ ܐܪܡܝܐ ܠܟܠܗ ܥܡܐ ܠܓܒܪ̈ܐ ܘܠܢܫ̈ܐ ܫܡܥܘ ܦܬܓܡܗ ܕܡܪܝܐ ܟܠܗ ܝܗܘܕܐ ܕܒܐܪܥܐ ܕܡܨܪܝܢ

ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܐܝܠ ܐܢܬܘܢ ܘܢܫ̈ܝܟܘܢ ܐܡܪܬܘܢ ܒܦܘܡܟܘܢ ܘܒܐ̈ܝܕܝܟܘܢ ܫܠܡܝܢ ܐܢܬܘܢ ܘܐܡܪܬܘܢ ܢܫ̈ܪ ܢܕܪ̈ܝܢ ܕܢܕܪܢ ܠܡܣܡ ܒܣ̈ܡܐ ܠܦܘܠܚܢ ܫܡܝܐ ܘܠܡܢܩܝܘ ܠܗ̇ ܢܘܩ̈ܝܐ ܐܫܪܬܘܢ ܡܘܡ̈ܬܟܘܢ ܘܥܒܕܬܘܢ ܢܕܪ̈ܝܟܘܢ

ܡܛܠ ܗܢܐ ܫܡܥܘ ܦܬܓܡܗ ܕܡܪܝܐ ܟܠܗ ܝܗܘܕܐ ܕܝܬܒܝܢ ܒܐܪܥܐ ܕܡܨܪܝܢ ܗܐ ܐܢܐ ܝܡܝܬ ܒܫܡܝ ܪܒܐ ܐܡܪ ܡܪܝܐ ܕܠܐ ܢܗܘܐ ܬܘܒ ܫܡܝ ܒܦܘܡܗܘܢ ܕܒܝܬ ܝܗܘܕܐ ܕܒܟܠܗ̇ ܐܪܥܐ ܕܡܨܪܝܢ ܘܠܐ ܢܐܡܪܘܢ ܚܝ ܗܘ ܡܪܝܐ ܐܠܗܐ

ܐܢܐ ܓܝܪ ܡܣܪܗܒ ܐܢܐ ܥܠܝܗܘܢ ܒܝܫܬܐ ܐܡܪ ܡܪܝܐ ܘܢܣܘܦܘܢ ܟܠܗܘܢ ܓܒܪ̈ܐ ܕܝܗܘܕܐ ܕܒܐܪܥܐ ܕܡܨܪܝܢ ܒܚܪܒܐ ܘܒܟܦܢܐ ܘܒܡܘܬܢܐ ܥܕܡܐ ܕܐܓܡܪ ܐܢܘܢ

ܘܦ̈ܠܝܛܝ ܚܪܒܐ ܢܗܦܟܘܢ ܡܢ ܐܪܥܐ ܕܡܨܪܝܢ ܠܐܪܥܐ ܕܝܗܘܕܐ ܩܠܝܠ ܒܡܢܝܢܐ ܘܢܕܥܘܢ ܟܠܗ ܫܪܟܐ ܕܝܗܘܕܐ ܕܐܙܠܘ ܠܡܥܡܪ ܒܐܪܥܐ ܕܡܨܪܝܢ ܦܬܓܡܐ ܕܡ̇ܢ ܢܫܪ ܕܝܠܝ ܐܘ ܕܝܠܗܘܢ

ܘܗܕܐ ܐܬܐ ܠܟܘܢ ܐܡܪ ܡܪܝܐ ܕܦܩܕ ܐܢܐ ܥܠܝܟܘܢ ܒܐܬܪܐ ܗܢܐ ܕܬܕܥܘܢ ܕܫܪ̈ܢ ܡ̈ܠܝ ܥܠܝܟܘܢ ܠܒܝܫܬܐ

ܗܟܢܐ ܐܡܪ ܡܪܝܐ ܗܐ ܡܫܠܡ ܐܢܐ ܠܗ ܠܦܪܥܘܢ ܚܓܝܪܐ ܡܠܟܐ ܕܡܨܪܝܢ ܒܐܝܕܐ ܕܒ̈ܥܠܕܒܒܘܗܝ ܘܒܐܝܕܐ ܕܐܝܠܝܢ ܕܒܥܝܢ ܢܦܫܗ ܐܝܟ ܕܐܫܠܡܬ ܠܨܕܩܝܐ ܡܠܟܐ ܕܝܗܘܕܐ ܒܐܝܕܐ ܕܢܒܘܟܕܢܨܪ ܡܠܟܐ ܕܒܒܠ ܒܥܠܕܒܒܗ ܘܒܥܐ ܢܦܫܗ

ܦܬܓܡܐ ܕܐܡܪ ܐܪܡܝܐ ܠܒܪܘܟ ܒܪ ܢܪܝܐ ܟܕ ܟܬܒ ܦܬ̈ܓܡܐ ܗܠܝܢ ܥܠ ܣܦܪܐ ܡܢ ܦܘܡܗ ܕܐܪܡܝܐ ܒܫܢܬܐ ܪܒܝܥܝܬܐ ܕܝܘܝܩܝܡ ܒܪ ܝܘܫܝܐ ܡܠܟܐ ܕܝܗܘܕܐ ܠܡܐܡܪ

ܗܟܢܐ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ ܥܠܝܟ ܒܪܘܟ

ܐܡܪܬ ܘܝ ܕܐܘܣܦ ܡܪܝܐ ܕܐܘܘܐܢܐ ܥܠ ܟܐܒܝ ܠܐܝܬ ܒܬ̈ܢܚܬܝ ܘܢܝܚܐ ܠܐ ܐܫܟܚܬ

ܗܟܢܐ ܐܡܪ ܠܗ ܗܟܢܐ ܐܡܪ ܡܪܝܐ ܗܐ ܡܕܡ ܕܒܢܝܬ ܐܢܐ ܣܚܦ ܘܡܕܡ ܕܢܨܒܬ ܐܢܐ ܥܩܪ ܘܠܟܠܗ̇ ܐܪܥܐ ܡܚܪܒ ܐܢܐ

ܘܐܢܬ ܕܝܢ ܕܒܥܝܬ ܠܟ ܪ̈ܘܪܒܬܐ ܠܐ ܬܒܥܐ ܕܡܝܬܪ̈ܢ ܡܢܟ ܡܛܠ ܕܗܐ ܡܝܬܐ ܐܢܐ ܒܝܫܬܐ ܥܠ ܟܠ ܒܣܪ ܐܡܪ ܡܪܝܐ ܘܐܬܠ ܠܟ ܕܬܫܘܙܒ ܢܦܫܟ ܒܟܘܠܗܘܢ ܐܬܪ̈ܘܬܐ ܕܬܐܙܠ ܠܬܡܢ

ܘܗܘܐ ܦܬܓܡܗ ܕܡܪܝܐ ܥܠ ܐܪܡܝܐ ܢܒܝܐ ܕܢܬܢܒܐ ܥܠ ܥܡ̈ܡܐ