← All works
Peshitta Isaiah Peshitta (Syriac Old Testament) · 1,290 sections
Single column Two columns
Isaiah 56:3 ܘܠܐ ܢܐܡܪ ܒܪ ܢܘܟܪ̈ܝܐ ܕܡܬܠܘܐ ܠܡܪܝܐ ܕܡܦܪܫ ܦ̇ܪܫ ܠܝ ܡܪܝܐ ܡܢ ܥܡܗ ܘܠܐ ܢܐܡܪ ܡܗܝܡܢܐ ܕܩܝܣܐ ܐܢܐ ܝܒܝܫܐ
Isaiah 56:4 ܡܛܠ ܕܗܟܢܐ ܐܡ̇ܪ ܡܪܝܐ ܠܡܗ̈ܝܡܢܐ ܕܢ̇ܛܪܝܢ ܫ̈ܒܝ ܘܓ̇ܒܝܢ ܡܕܡ ܕܨ̇ܒܐ ܐܢܐ ܘܡܬܚܝܠܝܢ ܒܩܝܡܝ
Isaiah 56:5 ܐܬܠ ܠܗܘܢ ܒܒܝܬܝ ܘܒܫܘܪܝ ܐܬܪܐ ܘܫܡܐ ܕܛܒ ܡܢ ܒ̈ܢܝܐ ܘܡܢ ܒܢ̈ܬܐ ܫܡܐ ܕܠܥܠܡ ܐܬܠ ܠܗܘܢ ܕܠܐ ܓܡ̇ܪ
Isaiah 56:6 ܘܠܒܢ̈ܝ ܢܘܟܪ̈ܝܐ ܕܡܬܠܘܝܢ ܠܡܪܝܐ ܠܡܫܡܫܘܬܗ ܘܠܡܪܚܡ ܫܡܗ ܕܡܪܝܐ ܘܕܢܗܘܘܢ ܠܗ ܥܒ̈ܕܐ ܟܠ ܕܢ̇ܛܪ ܐܦ ܫܒܬܐ ܕܠܐ ܢܚܠܝܗ̇ ܘܡܬܚܝܠܝܢ ܒܩܝܡܝ
Isaiah 56:7 ܐܝܬܐ ܐܢܘܢ ܠܛܘܪܝ ܩܕܝܫܐ ܘܐܚܕܐ ܐܢܘܢ ܒܒܝܬܐ ܕܨܠܘܬܝ ܥ̈ܠܘܬܗܘܢ ܘܕܒܚ̈ܝܗܘܢ ܠܨܒܝܢܐ ܠܡܕܒܚܝ ܡܛܠ ܕܒܝܬܝ ܒܝܬ ܨܠܘܬܐ ܡܬܩܪܐ ܠܟܘܠܗܘܢ ܥܡ̈ܡܐ
Isaiah 56:8 ܗܟܢܐ ܐܡ̇ܪ ܡܪܝܐ ܐܠܗܐ ܕܡܟܢܫ ܠܡܒܕܪ̈ܐ ܕܐܝܣܪܝܠ ܬܘܒ ܐܟܢܫ ܥܠܘܗܝ ܠܡܟܢܫ̈ܐ
Isaiah 56:9 ܟܠ ܚܝܘܬܐ ܕܕܒܪܐ ܬܝ ܐܟܘܠܝ ܠܟܠܗ̇ ܚܝܘܬܐ ܕܥܒܐ
Isaiah 56:10 ܚ̇ܙܝܢ ܟܠܗܘܢ ܥܘܝܪ̈ܐ ܘܠܐ ܝܕܥ̇ܝܢ ܟܠܗܘܢ ܟܠܒ̈ܐ ܐܢܘܢ ܦܐܩ̈ܐ ܘܠܐ ܡܫܟܚܝܢ ܠܡܒܚ ܚܙ̇ܝܢ ܘܕܡ̇ܟܝܢ ܘܪܚ̇ܡܝܢ ܠܡܢܡ
Isaiah 56:11 ܘܟ̈ܠܒܐ ܐܢܘܢ ܕܝܥܢܐ ܢܦܫܗܘܢ ܘܠܐ ܝܕܥ̇ܝܢ ܠܡܣܒܥ ܢܗܘܘܢ ܒܝܫܝܢ ܘܠܐ ܝܕܥ̇ܝܢ ܣܘܟܠܐ ܟܘܠܗܘܢ ܠܐܘܪܚܗܘܢ ܦܢܘ ܐܢܫ ܠܣܛܪܗ ܘܠܓܒܗ
Isaiah 56:12 ܬܘ ܢܣܒ ܚܡܪܐ ܘܢܣܒ ܫܟܪܐ ܘܢܗܘܐ ܐܝܟ ܕܝܘܡܢܐ ܘܢܘܬܪ ܠܢ ܣܘܓܐܐ ܕܛܒ
Isaiah 57:1 ܗܐ ܙܕܝܩܐ ܐܒܕ ܘܠܝܬ ܐܢܫ ܕܡܝܬܐ ܥܠ ܒܠܗ ܘܓܒܪ̈ܐ ܚ̈ܣܝܐ ܡܬܟܢܫܝܢ ܕܠܐ ܣܘܟܠܐ ܡܛܠ ܕܡܢ ܩܕܡ ܒܝܫܬܐ ܡܬܟܢܫ ܙܕܝܩܐ
Isaiah 57:2 ܘܢܐܬܐ ܫܠܡܐ ܘܢܬܬܢܝܚܘܢ ܥܠ ܡܫܟܒܗܘܢ ܘܢܐܙܠܘܢ ܠܘܩܒܠܗܘܢ
Isaiah 57:3 ܘܐܢܬܘܢ ܩܪܘܒܘ ܠܟܐ ܒܢ̈ܝ ܡܡܟܟܬܐ ܙܪܥܐ ܓܝܪܐ ܘܙܢܝܐ
Isaiah 57:4 ܥܠ ܡ̇ܢ ܐܬܠܥܒܬܘܢ ܘܥܠ ܡ̇ܢ ܦܬܚܬܘܢ ܦܘܡܟܘܢ ܘܐܘܪܟܬܘܢ ܠܫܢܟܘܢ ܕܗܐ ܐܢܬܘܢ ܝܠܕܐ ܐܢܬܘܢ ܕܥܘܠܐ ܘܙܪܥܐ ܕܓܠܐ
Isaiah 57:5 ܕܡܬܒܝܐܝܢ ܒܦܬܟܪ̈ܐ ܬܚܝܬ ܟܠ ܐܝܠܢ ܕܥܒܐ ܘܢܟܣܬܘܢ ܛ̈ܠܝܐ ܒܢ̈ܚܠܐ ܬܚܝܬ ܫܩܝ̈ܦܐ ܕܟܐܦܐ
Isaiah 57:6 ܡܢܬܟܝ ܘܝܪܬܘܬܟܝ ܥܡ ܡܢܬܐ ܗܝ ܕܢܚ̈ܠܐ ܘܐܦ ܥܠܝܗܘܢ ܢܩܝܬܝ ܢܘܩ̈ܝܐ ܘܐܣܩܬܝ ܩܘܪ̈ܒܢܐ ܥܠ ܗܠܝܢ ܐܬܒܝܐ
Isaiah 57:7 ܥܠ ܛܘܪ̈ܐ ܪ̈ܡܐ ܘܡܫܩ̈ܠܐ ܥܒܕܬܝ ܡܫܟܒܟܝ ܘܐܦ ܠܬܡܢ ܣܠܩܬܝ ܠܡܕܒܚ ܕܒ̈ܚܐ
Isaiah 57:8 ܘܒܣܬܪ ܬܪ̈ܥܐ ܥܠ ܦܪ̈ܘܣܬܕܐ ܪܫܡܬܝ ܕܘܟܪܢܟܝ ܡܛܠ ܕܡܢ ܠܘܬܝ ܓܠܝܬܝ ܘܣܠܩܬܝ ܘܪܘܚܬܝ ܡܫܟܒܟܝ ܘܗܘܝܬܝ ܠܟܝ ܡܢܗܘܢ ܘܪܚܡܬܝ ܡܫܟܒܗܘܢ ܘܐܬܪܐ ܚܙܝܬܝ
Isaiah 57:9 ܘܐܫܬܒܚܬܝ ܠܡ̈ܠܟܐ ܒܡܫܚܐ ܘܐܣܓܝܬܝ ܒܣܡ̈ܝܟܝ ܘܫܕܪܬܝ ܐܝܙ̈ܓܕܝܟܝ ܠܪܘܚܩܐ ܘܐܬܡܟܟܬܝ ܥܕܡܐ ܠܫܝܘܠ
Isaiah 57:10 ܒܣܘܓܐܬ ܐܘܪ̈ܚܬܟܝ ܠܐܝܬܝ ܘܠܐ ܐܡܪܬܝ ܕܐܫܠܐ ܒܚܘܒܬܐ ܕܐܝ̈ܕܝܟܝ ܐܫܝܚܬܝ ܡܛܠ ܗܢܐ ܠܐ ܐܬܟܫܦܬܝ
Isaiah 57:11 ܡܢ ܡ̇ܢ ܐܬܪܗܒܬܝ ܘܕܚܠܬܝ ܕܟܕܒܬܝ ܒܝ ܘܠܐ ܐܬܕܟܪܬܝܢܝ ܘܠܐ ܚܫܒܬܝܢܝ ܒܠܒܟܝ ܗܐ ܐܢܐ ܗܘ ܚܣܝܐ ܕܡܢ ܥܠܡ ܘܡܢܝ ܠܐ ܕܚܠܬܝ
Isaiah 57:12 ܐܢܐ ܐܚܘܐ ܙܕܝܩܘܬܝ ܘܥ̇ܒ̈ܕܝܟܝ ܠܐ ܢܘܬܪܘܢܟܝ
Isaiah 57:13 ܒܓܥܬܟܝ ܢܦܨܘܢܟܝ ܐܝܠܝܢ ܕܡܬܟܢܫܝܢ ܠܟܝ ܠܟܠܗܘܢ ܬܫܩܘܠ ܐܢܘܢ ܪܘܚܐ ܘܬܣܒ ܐܢܘܢ ܥܠܥܠܐ ܘܐܝܠܝܢ ܕܡܣܒܪܝܢ ܒܝ ܢܐܪܬܘܢ ܐܪܥܐ ܘܢܐܪܬܘܢ ܛܘܪܝ ܩܕܝܫܐ
Isaiah 57:14 ܘܢܐܡܪܘܢ ܫܦܘ ܫܦܘ ܦܢܘ ܐܘܪܚܐ ܘܐܪܝܡܘ ܬܘܩ̈ܠܬܐ ܡܢ ܐܘܪܚܗ ܕܥܡܝ
Isaiah 57:15 ܡܛܠ ܕܗܟܢܐ ܐܡ̇ܪ ܡܪܝܡܐ ܘܡܫܩܠܐ ܕܫ̇ܪܐ ܠܥܠܡܝܢ ܘܩܕܝܫ ܫܡܗ ܡܪܝܡܐ ܘܩܕܝܫ ܡܫܪܝܗ ܠܡܟܝ̈ܟܐ ܘܠܥܝܝ̈ܩܝ ܪܘܚܐ ܠܡܚܝܘ ܪܘܚܐ ܕܡܟܝ̈ܟܐ ܘܠܡܚܝܘ ܠܒܐ ܕܡܟܐ̈ܒܐ
Isaiah 57:16 ܡܛܠ ܕܠܐ ܠܥܠܡ ܐ̇ܠܡ ܐܢܐ ܘܠܐ ܠܥܠܡ ܪܓ̇ܙ ܐܢܐ ܡܛܠ ܕܪܘܚܐ ܡܢ ܩܕܡܝ ܢܦ̇ܩܐ ܘܢܫܡܬܐ ܐܢܐ ܥܒ̇ܕܬ
Isaiah 57:17 ܒܥܘܠܐ ܕܢܟܠܗ̇ ܪܓܙ̇ܬ ܘܡܚܝ̇ܬܗ̇ ܘܐܬ̇ܦܢܝܬ ܘܪܓܙ̇ܬ ܘܐܙܠܬ ܚܢܓܬܗ̇ ܒܐܘܪܚܐ ܕܠܒܗ̇
Isaiah 57:18 ܐܘܪ̈ܚܬܗ̇ ܚܙܝ̇ܬ ܘܐܣܝ̇ܬܗ̇ ܘܒܝܐ̇ܬܗ̇ ܘܦܪܥ̇ܬ ܒܘܝܐܐ ܠܗ̇ ܘܠܐ̈ܒܝܠܝܗ̇
Isaiah 57:19 ܒ̇ܪܐ ܡܡܠܠܐ ܕܣ̈ܦܘܬܐ ܫܠܡܐ ܫܠܡܐ ܠܪ̈ܚܝܩܐ ܘܠܩܪ̈ܝܒܐ ܐܡ̇ܪ ܡܪܝܐ ܘܐܣܐ ܐܢܘܢ
Isaiah 57:20 ܘܪ̈ܫܝܥܐ ܐܝܟ ܝܡܐ ܡܬܕܠܚܝܢ ܡܛܠ ܕܫܠܝܐ ܠܐ ܡܫܟܚܝܢ ܘܗ̇ܦܟܝܢ ܡ̈ܘܗܝ ܪܚܫܐ ܘܣܝܢܐ
Isaiah 57:21 ܠܝܬ ܫܠܡܐ ܠܪ̈ܫܝܥܐ ܐܡ̇ܪ ܐܠܗܝ
Isaiah 58:1 ܩܪܝ ܒܓܓܪܬܟ ܘܠܐ ܬܚܘܣ ܘܐܪܝܡ ܩܠܟ ܐܝܟ ܫܝܦܘܪܐ ܘܚܘܐ ܠܥܡܝ ܥܘܠܗܘܢ ܘܠܒܝܬ ܝܥܩܘܒ ܚ̈ܛܗܝܗܘܢ
Isaiah 58:2 ܘܠܝ ܒܥ̇ܝܢ ܒܟܠܝܘܡ ܘܨܒ̇ܝܢ ܠܡܕܥ ܐܘܪ̈ܚܬܝ ܐܝܟ ܥܡܐ ܕܥܒܕ ܙܕܝܩܘܬܐ ܘܠܐ ܫܒܩ ܕܝܢܐ ܕܐܠܗܗ ܫܐ̇ܠܝܢ ܠܝ ܕܝܢܐ ܘܙܕܝܩܘܬܐ ܘܨܒ̇ܝܢ ܠܡܬܩܪܒܘ ܠܐܠܗܐ
Isaiah 58:3 ܠܡܢܐ ܨܡܢ ܘܠܐ ܚܙܝܬ ܘܡܟܟܢ ܢܦܫܢ ܘܠܐ ܝܕܥܬ ܗܐ ܒܝܘܡܐ ܕܨܘܡܟܘܢ ܥܒ̇ܕܝܢ ܐܢܬܘܢ ܨܒܝ̈ܢܝܟܘܢ ܘܡܩܪܒܝܢ ܐܢܬܘܢ ܦܬܟܪ̈ܝܟܘܢ ܟܠܗܘܢ
Isaiah 58:4 ܗܐ ܠܚܪܝܢܐ ܘܠܡܨܘܬܐ ܨܝܡ̇ܝܢ ܐܢܬܘܢ ܘܠܡܡܚܐ ܒܩܛܝܪܐ ܕܥܘܠܐ ܠܐ ܬܨܘܡܘܢ ܐܝܟ ܕܝܘܡܢܐ ܘܬܫܡܥܘܢ ܩܠܟܘܢ ܒܡܪܘܡܐ
Isaiah 58:5 ܗܢܘ ܨܘܡܐ ܕܓܒ̇ܝܬ ܕܢܡܟ ܐܢܫ ܢܦܫܗ ܘܢܟܘܦ ܨܘܪܗ ܐܝܟ ܟܪܘܠܐ ܘܣܩܐ ܘܩܛܡܐ ܡܐ̇ܟ ܠܗ ܠܗܢܐ ܬܩܪܘܢ ܨܘܡܐ ܘܝܘܡܐ ܕܨܒܝܢܗ ܕܡܪܝܐ
Isaiah 58:6 ܗܢܘ ܨܘܡܐ ܕܓܒܝ̇ܬ ܕܬܫܪܐ ܩܛܪܐ ܕܥܘܠܐ ܘܬܦܣܩ ܡܐܣܪ̈ܝܬܐ ܕܢܟܠܐ ܘܬܫܪܐ ܟܒܝܫ̈ܐ ܠܚܐܪܘܬܐ ܘܟܠܗܝܢ ܡܐܣܪ̈ܝܬܐ ܬܦܣܩܘܢ
Isaiah 58:7 ܘܬܩܨܐ ܠܚܡܟ ܠܟܦܢܐ ܘܠܐܟܣܢܝܐ ܬܥܠ ܠܒܝܬܟ ܟܕ ܬܚܙܐ ܥܪܛܠܝܐ ܘܬܟܣܝܘܗܝ ܘܠܐ ܬܗܡܐ ܡܢ ܒܪ ܒܣܪܟ
Isaiah 58:8 ܗܝܕܝܢ ܢܬܦܬܚ ܢܘܗܪܟ ܐܝܟ ܨܦܪܐ ܘܙܕܝܩܘܬܟ ܒܥܓܠ ܬܕܢܚ ܘܬܐܙܠ ܩܕܡܝܟ ܙܕܝܩܘܬܟ ܘܐܝܩܪܗ ܕܡܪܝܐ ܢܟܢܫܟ
Isaiah 58:9 ܗܝܕܝܢ ܬܩܪܐ ܘܢܥܢܝܟ ܡܪܝܐ ܘܬܓܥܐ ܘܢܐܡܪ ܗܐ ܐܢܐ ܐܢ ܬܥܒܪ ܡܢ ܓܘܟ ܢܟܠܐ ܘܬܫܪܐ ܠܟܒܝܫ̈ܐ ܘܡܢ ܡܡܠܠܐ ܕܓܠܐ ܬܪܚܩ
Isaiah 58:10 ܘܬܬܠ ܠܚܡܟ ܠܟܦܢܐ ܘܬܣܒܥ ܢܦܫܐ ܕܟܦܢܐ ܢܕܢܚ ܢܘܗܪܟ ܒܚܫܘܟܐ ܘܚܫܘܟܟ ܐܝܟ ܛܗܪܐ
Isaiah 58:11 ܘܢܕܒܪܟ ܡܪܝܐ ܐܡܝܢܐܝܬ ܘܢܣܒܥ ܢܦܫܟ ܒܕܘܗܢܐ ܘܢܫܪ ܓܪ̈ܡܝܟ ܘܬܗܘܐ ܐܝܟ ܦܪܕܝܣܐ ܕܪܘ̇ܙ ܘܐܝܟ ܡܒܘܥܐ ܕܡ̈ܝܐ ܕܠܐ ܓܝ̇ܙܝܢ ܡ̈ܘܗܝ
Isaiah 58:12 ܘܢܒܢܘܢ ܡܢܟ ܚܪ̈ܒܬܐ ܕܡܢ ܥܠܡ ܘܫܬܐ̈ܣܐ ܕܕܪܕܪܝܢ ܬܩܝܡ ܘܢܩܪܘܢܟ ܣܐ̇ܓ ܬܘܪ̈ܥܬܐ ܘܡܗܦܟ ܫܒܝ̈ܠܐ ܠܝܬܒܐ
Isaiah 58:13 ܐܢ ܬܗܦܟ ܪܓܠܟ ܡܢ ܫܒܬܐ ܕܠܐ ܬܥܒܕ ܨܒܝܢܟ ܒܝܘܡܐ ܕܩܘܕܫܝ ܘܬܩܪܐ ܠܫܒܬܐ ܡܦܢܩܬܐ ܘܩܘܕܫܗ ܕܡܪܝܐ ܡܝܩܪܐ ܘܬܝܩܪܝܗ̇ ܕܠܐ ܬܥܒܕ ܒܗ̇ ܐܘܪܚܟ ܘܠܐ ܬܥܒܕ ܒܗ̇ ܨܒܝܢܟ ܘܠܐ ܬܡܠܠ ܡܠܬܐ
Isaiah 58:14 ܗܝܕܝܢ ܬܬܟܠ ܥܠ ܡܪܝܐ ܕܐܪܟܒܟ ܥܠ ܥܘܫܢܗ̇ ܕܐܪܥܐ ܘܐܘܟܠܟ ܝܪܬܘܬܗ ܕܝܥܩܘܒ ܐܒܘܟ ܡܛܠ ܕܦܘܡܗ ܕܡܪܝܐ ܡܠܠ
Isaiah 59:1 ܗܐ ܠܐ ܙܥܘܪܝܐ ܐܝܕܗ ܕܡܪܝܐ ܠܡܦܪܩ ܘܠܐ ܝܩܝܪܐ ܐܕܢܗ ܠܡܫܡܥ
Isaiah 59:2 ܐܠܐ ܚ̈ܘܒܝܟܘܢ ܗܘ ܦܪܫܘ ܒܝܢ̈ܝܟܘܢ ܠܐܠܗܟܘܢ ܘܚ̈ܛܗܝܟܘܢ ܐܗܦܟܘ ܐ̈ܦܘܗܝ ܡܢܟܘܢ ܕܠܐ ܢܫܡܥ
Isaiah 59:3 ܡܛܠ ܕܐ̈ܝܕܝܟܘܢ ܡ̈ܛܢܦܢ ܒܕܡܐ ܘܨܒ̈ܥܬܟܘܢ ܒܥܘܠܐ ܣܦܘ̈ܬܟܘܢ ܡܡ̈ܠܠܢ ܫܘܩܪܐ ܘܠܫܢܟܘܢ ܪܢ̇ܐ ܒܥܘܠܐ
Isaiah 59:4 ܘܠܝܬ ܕܩ̇ܪܐ ܒܙܕܝܩܘܬܐ ܘܠܝܬ ܕܕܐ̇ܢ ܒܗܝܡܢܘܬܐ ܐܬܬܟܠܘ ܥܠ ܣܪܝܩܘܬܐ ܘܡܠܠܘ ܪܝܩܢܘܬܐ ܒܛܢܘ ܥܘܠܐ ܘܝܠܕܘ ܟܐ̈ܒܐ
Isaiah 59:5 ܒܢ̈ܬܐ ܕܚܪܡܢܐ ܐܦܥܘ ܘܢܘܠܐ ܕܓܘܓܝ ܙܩܪܘ ܕܐ̇ܟܠ ܡܢ ܒܢ̈ܬܗܘܢ ܢܡܘܬ ܘܕܬܒܪܗ̇ ܡܫܟܚ ܫܥܛܐ
Isaiah 59:6 ܢܘܠܗܘܢ ܠܐ ܢܗܘܐ ܠܠܒܘܫܐ ܘܠܐ ܢܬܟܣܘܢ ܒܥ̇ܒ̈ܕܝܗܘܢ ܥ̇ܒ̈ܕܝܗܘܢ ܥ̇ܒ̈ܕܐ ܐܢܘܢ ܕܥܬܐ ܘܥ̇ܒ̈ܕܐ ܕܥܘܠܐ ܒܐܝܕ̈ܝܗܘܢ
Isaiah 59:7 ܪ̈ܓܠܝܗܘܢ ܪ̈ܗܛܢ ܠܒܝܫܬܐ ܘܡܣܬܪܗܒܝܢ ܠܡܐܫܕ ܕܡܐ ܙܟܝܐ ܬܪ̈ܥܝܬܗܘܢ ܬܪ̈ܥܝܬܐ ܐ̈ܢܝܢ ܕܥܬܐ ܘܒܙܬܐ ܘܬܒܪܐ ܒܫ̈ܒܝܠܝܗܘܢ
Isaiah 59:8 ܐܘܪܚܐ ܕܫܠܡܐ ܠܐ ܐܝܕܥܘ ܘܠܝܬ ܕܝܢܐ ܒܗ̈ܠܟܬܗܘܢ ܫܒܝ̈ܠܝܗܘܢ ܡܥܩܡܝܢ ܘܟܠ ܕܡܗܠܟ ܒܗܘܢ ܠܐ ܝ̇ܕܥ ܫܠܡܐ
Isaiah 59:9 ܡܛܠ ܗܢܐ ܐܬܪܚܩ ܡܢܢ ܕܝܢܐ ܘܙܕܝܩܘܬܐ ܠܐ ܬܕܪܟܢ ܣܟܝܢ ܠܢܘܗܪܐ ܘܗܘܐ ܚܫܘܟܐ ܘܠܙܗܪܐ ܘܒܥܡܛܢܐ ܗܠܟܢ
Isaiah 59:10 ܡܫܢ ܐܣܬܐ ܐܝܟ ܥܘܝܪ̈ܐ ܘܡܫܢ ܐܝܟ ܗ̇ܢܘܢ ܕܠܝܬ ܠܗܘܢ ܥܝ̈ܢܐ ܐܬܬܩܠܢ ܒܛܗܪܐ ܐܝܟ ܕܒܪܡܫܐ ܘܐܬܬܢܚܢ ܐܝܟ ܗ̇ܢܘܢ ܕܩܪܝܒܝܢ ܠܡܡܬ
Isaiah 59:11 ܢܗܡܢ ܟܠܢ ܐܝܟ ܕܒ̈ܐ ܘܐܝܟ ܝܘ̈ܢܐ ܢܗܡܢ ܣܟܝܢ ܠܕܝܢܐ ܘܠܝܬ ܘܠܦܘܪܩܢܐ ܘܐܬܪܚܩ ܡܢܢ
Isaiah 59:12 ܡܛܠ ܕܣܓܝ ܥܘܠܢ ܩܕܡܝܟ ܘܚ̈ܛܗܝܢ ܣܗܕܘܢ ܡܛܠ ܕܥܘܠܢ ܥܡܢ ܗܘ ܘܚ̈ܛܗܝܢ ܝܕܝܥܝܢ ܐܢܘܢ
Isaiah 59:13 ܐܥܠܝܢ ܘܕܓܠܢ ܒܡܪܝܐ ܘܗܦܟܢ ܡܢ ܒܬܪܗ ܕܐܠܗܢ ܡܠܠܢ ܛܠܘܡܝܐ ܘܡܪܕܢ ܒܛܢܢ ܘܪܢܝܢ ܡܢ ܠܒܢ ܡ̈ܠܐ ܕܫܘܩܪܐ
Isaiah 59:14 ܐܗܦܟܢ ܕܝܢܐ ܠܒܣܬܪܗ ܘܙܕܝܩܘܬܐ ܐܩܝܡܢ ܒܪܘܚܩܐ ܡܛܠ ܕܐܬܬܩܠ ܩܘܫܬܐ ܒܐܪܘܚܬܐ ܘܡܟܣܢܘܬܐ ܠܐ ܡܫܟܚܐ ܠܡܐܬܐ
Isaiah 59:15 ܘܗܘܐ ܩܘܫܬܐ ܒܟܣܝܐ ܘܥܒܪ ܣܘܟܠܐ ܡܢ ܪܥܝܢܢ ܘܚܙܐ ܡܪܝܐ ܕܠܝܬ ܕܝܢܐ ܘܐܬܒܐܫ ܒܥܝܢ̈ܘܗܝ
Isaiah 59:16 ܘܚܙܐ ܕܠܝܬ ܐܢܫ ܘܐܬܕܡܪ ܕܠܝܬ ܕܡܥܕܪ ܘܦܪܩܗ ܕܪܥܗ ܘܙܕܝܩܘܬܗ ܗܝ ܣܡܟܬܗ
Isaiah 59:17 ܠܒܫ ܙܕܝܩܘܬܐ ܐܝܟ ܫܪܝܢܐ ܘܣܢܘܪܬܐ ܕܦܘܪܩܢܐ ܒܪܝܫܗ ܘܠܒܫ ܠܒܘܫܐ ܕܦܘܪܥܢܐ
Isaiah 59:18 ܕܢܬܬܒܥ ܡܢ ܣܢܐ̈ܘܗܝ ܘܢܦܪܘܥ ܠܒ̈ܥܠܕܒܒܘܗܝ ܘܠܓܙܪ̈ܬܐ ܢܦܪܘܥ ܦܘܪܥܢܐ
Isaiah 59:19 ܢܕܚܠܘܢ ܡܢ ܡܥܪܒܐ ܠܫܡܗ ܕܡܪܝܐ ܘܡܢ ܡܕܢܚ̈ܝ ܫܡܫܐ ܠܐܝܩܪܗ ܡܛܠ ܕܢܐܬܐ ܐܠܘܨܐ ܐܝܟ ܢܗܪܐ ܘܪܘܚܗ ܕܡܪܝܐ ܬܡܟܟܝܘܗܝ
Isaiah 59:20 ܘܢܐܬܐ ܠܨܗܝܘܢ ܦܪܘܩܐ ܘܐܝܠܝܢ ܕܡܦܢܝܢ ܥܘܠܐ ܡܢ ܝܥܩܘܒ ܐܡ̇ܪ ܡܪܝܐ
Isaiah 59:21 ܘܐܢܐ ܗܢܘ ܩܝܡܝ ܕܥܡܟܘܢ ܐܡ̇ܪ ܡܪܝܐ ܪܘܚܝ ܕܥܠܝܟ ܘܡ̈ܠܝ ܕܣܡ̇ܬ ܒܦܘܡܟ ܠܐ ܢܥܢ̈ܕܢ ܡܢ ܦܘܡܟ ܘܡܢ ܦܘܡܗ ܕܙܪܥܟ ܘܡܢ ܦܘܡܐ ܕܙܪܥܐ ܕܙܪܥܟ ܐܡ̇ܪ ܡܪܝܐ ܡܢ ܗܫܐ ܘܥܕܡܐ ܠܥܠܡ
Isaiah 60:1 ܩܘܡܝ ܐܢܗܪܝ ܡܛܠ ܕܡܛܐ ܢܘܗܪܟܝ ܘܐܝܩܪܗ ܕܡܪܝܐ ܥܠܝܟܝ ܢܕܢܚ
Isaiah 60:2 ܡܛܠ ܕܗܐ ܚܫܘܟܐ ܡܟܣܐ ܠܐܪܥܐ ܘܥܪܦܠܐ ܠܐܡ̈ܘܬܐ ܘܥܠܝܟܝ ܢܕܢܚ ܡܪܝܐ ܘܐܝܩܪܗ ܥܠܝܟܝ ܢܬܚܙܐ
Isaiah 60:3 ܘܢܐܬܘܢ ܥܡ̈ܡܐ ܠܢܘܗܪܟܝ ܘܡ̈ܠܟܐ ܠܢܘܗܪܐ ܕܕܢܚܟܝ
Isaiah 60:4 ܐܪܝܡܝ ܥܝܢ̈ܝܟܝ ܠܚܕܪ̈ܝܟܝ ܘܚܙܝ ܕܟܠܗܘܢ ܡܬܟܢܫܝܢ ܘܐ̇ܬܝܢ ܠܟܝ ܒܢ̈ܝܟܝ ܡܢ ܪܘܚܩܐ ܢܐܬܘܢ ܘܒܢ̈ܬܟܝ ܥܠ ܦܪ̈ܝܘܬܐ ܢܬܪ̈ܒܝܢ
Isaiah 60:5 ܗܝܕܝܢ ܬܚܙܝܢ ܘܬܢܗܪܝܢ ܘܬܚܕܝܢ ܘܢܪܘܚ ܠܒܟܝ ܡܛܠ ܕܗ̇ܦܟ ܠܟܝ ܥܘܬܪܗ ܕܝܡܐ ܘܚܝ̈ܠܐ ܕܥܡ̈ܡܐ ܢܐܬܘܢ ܠܟܝ
Isaiah 60:6 ܐܒܠܬܐ ܕܓܡ̈ܠܐ ܬܟܣܝܟܝ ܒܘܟܪ̈ܐ ܕܡܕܝܢ ܘܕܥܦܐ ܟܠܗܘܢ ܡܢ ܫܒܐ ܢܐܬܘܢ ܕܗܒܐ ܘܠܒܘܢܬܐ ܢܫܩܠܘܢ ܘܬܫ̈ܒܚܬܗ ܕܡܪܝܐ ܢܣܒܪܘܢ
Isaiah 60:7 ܟܠܗ̇ ܥܢܐ ܕܩܕܪ ܢܟܢܫܘܢ ܠܟܝ ܘܕܟܪ̈ܐ ܕܢܒܐܘܬ ܢܫܡܫܘܢܟܝ ܘܢܣܩܘܢ ܠܨܒܝܢܐ ܥܠ ܡܕܒܚܝ ܘܒܝܬܐ ܕܬܫܒܘܚܬܝ ܐܫܒܚ
Isaiah 60:8 ܡ̇ܢ ܐܢܘܢ ܗܠܝܢ ܕܐܝܟ ܥܢ̈ܢܐ ܦ̇ܪܚܝܢ ܘܐܝܟ ܝܘ̈ܢܐ ܠܟ̈ܘܝܗܝܢ
Isaiah 60:9 ܡܛܠ ܕܠܝ ܢܣ̈ܟܝܢ ܓܙܪ̈ܬܐ ܘܐ̈ܠܦܐ ܕܬܪܫܝܫ ܐܝܟ ܕܒܩܕܡܝܬܐ ܠܡܝܬܝܘ ܒܢܝ̈ܟܝ ܡܢ ܪܘܚܩܐ ܘܣܐܡܗܘܢ ܘܕܗܒܗܘܢ ܥܡܗܘܢ ܫܡܗ ܕܡܪܝܐ ܐܠܗܟܝ ܘܩܕܝܫܐ ܕܐܝܣܪܝܠ ܕܫܒܚܟܝ
Isaiah 60:10 ܘܢܒܢܘܢ ܒ̈ܢܝ ܢܘܟܪ̈ܝܐ ܫܘܪ̈ܝܟܝ ܘܡ̈ܠܟܝܗܘܢ ܢܫܡܫܘܢܟܝ ܡܛܠ ܕܒܪܘܓܙܝ ܡܚܝ̇ܬܟܝ ܘܒܨܒܝܢܝ ܪܚܡ̇ܬ ܥܠܝܟܝ
Isaiah 60:11 ܢܬܦܬܚܘܢ ܬܪ̈ܥܝܟܝ ܐܡܝܢܐܝܬ ܒܐܝܡܡܐ ܘܒܠܠܝܐ ܘܠܐ ܢܬܬܚܕܘܢ ܘܢܥܠܘܢ ܠܟܝ ܚܝ̈ܠܐ ܕܥܡ̈ܡܐ ܘܡ̈ܠܟܝܗܘܢ ܟܕ ܕܒܝܪܝܢ
Isaiah 60:12 ܡܛܠ ܕܥܡܐ ܘܡܠܟܘܬܐ ܕܠܐ ܢܦܠܚܘܢܟܝ ܢܐܒܕܘܢ ܘܥܡ̈ܡܐ ܒܚܪܒܐ ܢܬܚܪܒܘܢ
Isaiah 60:13 ܐܝܩܪܐ ܕܠܒܢܢ ܢܐܬܐ ܠܟܝ ܒܪܘܬܐ ܗܕܝܪܬܐ ܘܫܪ̈ܘܝܢܐ ܐܟܚܕܐ ܠܡܫܒܚܘ ܐܬܪܐ ܕܡܩܕܫܝ ܘܐܬܪܐ ܕܪ̈ܓܠܝ ܐܝܩܪܝ
Isaiah 60:14 ܘܢܐܬܘܢ ܠܟܝ ܟܕ ܡܡܟܟܝܢ ܒ̈ܢܝ ܡ̈ܡܟܟܢܝܟܝ ܘܢܣܓܕܘܢ ܠܦܣ̈ܐ ܕܪ̈ܓܠܝܟܝ ܟܠܗܘܢ ܡܪ̈ܓܙܢܝܟܝ ܘܢܩܪܘܢܟܝ ܨܗܝܘܢ ܩܪܝܬܗ ܕܡܪܝܐ ܩܕܝܫܐ ܕܐܝܣܪܝܠ
Isaiah 60:15 ܚܠܦ ܕܗܘܝܬܝ ܫܒܝܩܬܐ ܘܣܢܝܐܬܐ ܡܢ ܒܠܝ ܕܥܒ̇ܪ ܐܥܒܕܟܝ ܐܝܩܪܐ ܠܥܠܡ ܘܚܕܘܬܐ ܠܕܪܕܪܝܢ
Isaiah 60:16 ܘܬܐܢܩܝܢ ܚܠܒܐ ܕܥܡ̈ܡܐ ܘܒܙܬܐ ܕܡ̈ܠܟܐ ܬܐܢܩܝܢ ܘܬܕܥܝܢ ܕܐܢܐ ܐܢܐ ܡܪܝܐ ܦܪܘܩܟܝ ܘܡܦܨܝܢܟܝ ܬܩܝܦܗ ܕܝܥܩܘܒ
Isaiah 60:17 ܚܠܦ ܢܚܫܐ ܐܝܬܐ ܕܗܒܐ ܘܚܠܦ ܦܪܙܠܐ ܐܝܬܐ ܣܐܡܐ ܘܚܠܦ ܩܝ̈ܣܐ ܢܚܫܐ ܘܚܠܦ ܟܐ̈ܦܐ ܦܪܙܠܐ ܘܐܥܒܕ ܫܠܡܐ ܦܩܘܕܟܝ ܘܫܠܝܛܟܝ ܙܕܝܩܘܬܐ
Isaiah 60:18 ܘܠܐ ܢܫܬܡܥ ܬܘܒ ܥܘܠܐ ܒܐܪܥܟܝ ܘܒܙܬܐ ܘܬܒܪܐ ܒܬ̈ܚܘܡܝܟܝ ܘܢܩܪܘܢ ܫܘܪ̈ܝܟܝ ܦܘܪܩܢܐ ܘܬܪ̈ܥܝܟܝ ܬܫܒܘܚܬܐ
Isaiah 60:19 ܘܠܐ ܢܗܘܐ ܠܟܝ ܬܘܒ ܫܡܫܐ ܠܢܘܗܪܐ ܕܐܝܡܡܐ ܘܢܘܗܪܗ ܕܣܗܪܐ ܠܐ ܢܢܗܪ ܠܟܝ ܡܛܠ ܕܢܗܘܐ ܠܟܝ ܡܪܝܐ ܢܘܗܪܐ ܠܥܠܡ
Isaiah 60:20 Isaiah 60:21 ܘܟܠܗ ܥܡܟܝ ܙܕܝܩܐ ܠܥܠܡ ܢܐܪܬܘܢ ܐܪܥܐ ܢܘܪܒܐ ܕܢܨ̇ܒܬ ܥ̇ܒܕ ܐܝ̈ܕܝ ܢܫܬܒܚ
Isaiah 60:22 ܙܥܘܪܐ ܢܗܘܐ ܒܐ̈ܠܦܐ ܘܒܨܝܪܐ ܒܥܡܐ ܥܫܝܢܐ ܐܢܐ ܡܪܝܐ ܠܙܒܢܗ ܐܛܪܝܘܗܝ
Isaiah 61:1 ܪܘܚܗ ܕܡܪܝܐ ܐܠܗܐ ܥܠܝ ܚܠܦ ܕܡܫܚܢܝ ܡܪܝܐ ܘܫܕܪܢܝ ܕܐܣܒܪ ܠܡܟܝ̈ܟܐ ܘܐܥܨܘܒ ܠܬܒܝܪ̈ܝ ܠܒܐ ܘܐܩܪܐ ܚܐܪܘܬܐ ܠܫܒܝ̈ܐ ܘܫܪܝܐ ܠܐܣܝܪ̈ܐ
Isaiah 61:2 ܘܐܩܪܐ ܫܢܬܐ ܕܨܒܝܢܐ ܠܡܪܝܐ ܘܝܘܡܐ ܕܦܘܪܩܢܐ ܠܐܠܗܢ ܠܡܒܝܐܘ ܠܟܠܗܘܢ ܐܒܝ̈ܠܐ
Isaiah 61:3 ܠܡܬܠ ܠܐ̈ܒܝܠܐ ܕܨܗܝܘܢ ܫܘܒܚܐ ܚܠܦ ܩܛܡܐ ܡܫܚܐ ܒܣܝܡܐ ܚܠܦ ܐܒܠܐ ܥܛܦܐ ܕܬܫܒܘܚܬܐ ܚܠܦ ܪܘܚܐ ܡܟܐܒܬܐ ܢܬܩܪܘܢ ܕܟܪ̈ܐ ܕܙܕܝܩܘܬܐ ܢܨܒܬܗ ܕܡܪܝܐ ܡܫܒܚܬܐ
Isaiah 61:4 ܘܢܒܢܘܢ ܚܪ̈ܒܬܐ ܕܡܢ ܥܠܡ ܘܨܕܝ̈ܬܐ ܕܡܢ ܪܫܝܬܐ ܢܩܝܡܘܢ ܘܢܚܕܬܘܢ ܩܘܪ̈ܝܐ ܚܪ̈ܒܬܐ ܘܨܕܝ̈ܬܐ ܕܕܪܕܪܝܢ
Isaiah 61:5 ܘܢܩܘܡܘܢ ܢܘܟܪ̈ܝܐ ܘܢܪܥܘܢ ܥܢܗܘܢ ܘܒܢ̈ܝ ܢܘܟܪ̈ܝܐ ܢܗܘܘܢ ܠܗܘܢ ܐܟܪ̈ܐ ܘܟܪ̈ܡܐ
Isaiah 61:6 ܘܐܢܬܘܢ ܟܘܡܪ̈ܘܗܝ ܕܡܪܝܐ ܬܬܩܪܘܢ ܘܡܫ̈ܡܫܢܘܗܝ ܕܐܠܗܢ ܢܬܐܡܪ ܠܟܘܢ ܢܟܣ̈ܝܗܘܢ ܕܥܡ̈ܡܐ ܬܐܟܠܘܢ ܘܒܐܝܩܪܗܘܢ ܬܫܬܒܚܘܢ
Isaiah 61:7 ܚܠܦ ܒܗܬܬܟܘܢ ܘܚܠܦ ܚܦܪܟܘܢ ܝܘܪܬܢܐ ܬܢܝܢܐ ܬܐܪܬܘܢ ܒܐܪܥܗܘܢ ܘܬܫܬܒܚܘܢ ܒܦܠܓܘܬܗܘܢ ܚܕܘܬܐ ܠܥܠܡ ܬܗܘܐ ܠܟܘܢ
Isaiah 61:8 ܡܛܠ ܕܐܢܐ ܐܢܐ ܡܪܝܐ ܕܪܚ̇ܡ ܐܢܐ ܕܝܢܐ ܘܣ̇ܢܐ ܐܢܐ ܚܛܘܦܝܐ ܘܥܘܠܐ ܘܐܬܠ ܥܡܠܟܘܢ ܒܩܘܫܬܐ ܘܩܝܡܐ ܕܥܠܡ ܐܩܝܡ ܠܟܘܢ
Isaiah 61:9 ܘܢܬܝܕܥ ܙܪܥܟܘܢ ܒܥܡ̈ܡܐ ܘܙܪܥܐ ܕܙܪܥܟܘܢ ܒܐ̈ܡܘܬܐ ܟܠ ܚ̈ܙܝܝܟܘܢ ܢܫܬܘܕܥܘܢܟܘܢ ܕܙܪܥܐ ܐܢܬܘܢ ܕܒܪܟ ܡܪܝܐ
Isaiah 61:10 ܡܬܒܣܡܘ ܐܬܒܣܡ ܒܡܪܝܐ ܘܬܕܘܨ ܢܦܫܝ ܒܐܠܗܝ ܡܛܘܠ ܕܐܠܒܫܢܝ ܠܒܘܫܐ ܕܦܘܪܩܢܐ ܘܐܥܛܦܢܝ ܦܪܝܣܐ ܕܙܕܝܩܘܬܐ ܐܝܟ ܚܬܢܐ ܫܒܝܚܐ ܘܐܝܟ ܟܠܬܐ ܡܨܒܬܬܐ
Isaiah 61:11 ܘܐܝܟ ܐܪܥܐ ܕܡܦܩܐ ܥܘܦܝܐ ܘܐܝܟ ܓܢܬܐ ܕܡܘܥܝܐ ܙܪܥܐ ܗܟܢܐ ܢܘܥܐ ܡܪܝܐ ܐܠܗܐ ܙܕܝܩܘܬܐ ܘܬܫܒܘܚܬܐ ܩܕܡ ܟܠܗܘܢ ܥܡ̈ܡܐ
Isaiah 62:1 ܡܛܠ ܨܗܝܘܢ ܠܐ ܐܫܬܘܩ ܘܡܛܠ ܐܘܪܫܠܡ ܠܐ ܐܫܠܐ ܥܕܡܐ ܕܬܦܘܩ ܙܕܝܩܘܬܗ̇ ܐܝܟ ܢܘܗܪܐ ܘܦܘܪܩܢܗ̇ ܐܝܟ ܠܡܦܐܕܐ ܢܕܠܩ
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .