← All works

Peshitta Isaiah

Peshitta (Syriac Old Testament) · 1,290 sections

1. Isaiah 1:1

   ܚܙܘܐ ܕܐܫܥܝܐ ܒܪ ܐܡܘܨ ܕܚܙܐ ܥܠ ܝܗܘܕܐ ܘܥܠ ܐܘܪܫܠܡ ܒܝ̈ܘܡܝ ܥܘܙܝܐ ܘܝܘܬܡ ܘܐܚܙ ܘܚܙܩܝܐ ܡ̈ܠܟܐ ܕܝܗܘܕܐ

2. Isaiah 1:2

   ܫܡܥܘ ܫܡܝܐ ܘܨܘܬܝ ܐܪܥܐ ܡܛܠ ܕܡܪܝܐ ܡܠܠ ܒ̈ܢܝܐ ܪܒܝܬ ܘܪܡܪܡ̇ܬ ܘܗܢܘܢ ܐܥܠܝܘ ܒܝ

3. Isaiah 1:3

   ܐܝܕܥ ܬܘܪܐ ܩܢܝܗ ܘܚܡܪܐ ܐܘܪܝܐ ܕܡܪܗ ܘܐܝܣܪܝܠ ܠܐ ܝܕܥ ܘܥܡܝ ܠܐ ܐܣܬܟܠܘ

4. Isaiah 1:4

   ܘܝ ܠܥܡܐ ܚܛܝܐ ܥܡܐ ܥܫܝܢ ܥܘܠܐ ܙܪܥܐ ܡܒܐܫܐ ܒ̈ܢܝܐ ܡܚ̈ܒܠܐ ܫܒܩܬܘܢ ܠܡܪܝܐ ܘܐܪܓܙܬܘܢ ܠܩܕܝܫܐ ܕܐܝܣܪܝܠ ܘܗܦܟܬܘܢ ܠܒܣܬܪܟܘܢ

5. Isaiah 1:5

   ܠܡܢܐ ܬܘܒ ܬܒܠܥܘܢ ܘܬܘܣܦܘܢ ܠܡܬܪܕܝܘ ܟܠ ܪܝܫ ܠܟܐܒܐ ܘܟܠ ܠܒܐ ܠܟܪܝܘܬܐ

6. Isaiah 1:6

   ܡܢ ܦܣܬܐ ܕܪܓܠܐ ܘܥܕܡܐ ܠܡܘܚܐ ܠܝܬ ܒܗ ܕܘܟܬܐ ܕܫܪܝܪܐ ܨܘ̈ܠܦܬܐ ܘܫܘ̈ܡܬܐ ܘܡܚ̈ܘܬܐ ܕܥܒ̈ܝܐ ܠܐ ܠܡܨܡܕ ܘܠܐ ܠܡܥܨܒ ܐܦ ܠܐ ܠܡܪܟܟܘ ܒܡܫܚܐ

7. Isaiah 1:7

   ܐܪܥܟܘܢ ܚܪܒܐ ܘܩܘܪ̈ܝܟܘܢ ܝܩ̈ܕܢ ܒܢܘܪܐ ܐܪܥܟܘܢ ܠܘܩܒܠܟܘܢ ܐܟ̇ܠܝܢ ܠܗ̇ ܢܘܟܪ̈ܝܐ ܘܨ̇ܕܝܐ ܐܝܟ ܗܦܝܟܬܐ ܕܢܘܟܪ̈ܝܐ

8. Isaiah 1:8

   ܘܐܫܬܚܪܬ ܒܪܬ ܨܗܝܘܢ ܐܝܟ ܡܛܠܬܐ ܒܟܪܡܐ ܘܐܝܟ ܥܪܙܠܐ ܒܡܩܛܝܐ ܘܐܝܟ ܡܕܝܢܬܐ ܚܒܝܫܬܐ

9. Isaiah 1:9

   ܘܐܠܘ ܠܐ ܡܪܝܐ ܨܒܐܘܬ ܐܘܬܪ ܠܢ ܣܪܝܕܐ ܐܝܟ ܣܕܘܡ ܗܘ̇ܝܢ ܗܘܝܢ ܘܠܥܡܘܪܐ ܡܬܕܡܝܢ ܗܘܝܢ

10. Isaiah 1:10

    ܫܡܥܘ ܦܬܓܡܗ ܕܡܪܝܐ ܫ̈ܠܝܛܐ̈ ܕܣܕܘܡ ܘܨܘܬܘ ܢܡܘܣܗ ܕܐܠܗܢ ܥܡܐ ܕܥܡܘܪܐ

11. Isaiah 1:11

    ܠܡܢܐ ܗܘ̇ܝܢ ܠܝ ܣܘܓܐܐ ܕܕܒܚܝ̈ܟܘܢ ܐܡ̇ܪ ܡܪܝܐ ܣܒ̇ܥܬ ܥ̈ܠܘܬܐ ܕܕܟܪ̈ܐ ܘܬܪܒܐ ܕܡ̈ܦܛܡܐ ܘܕܡܐ ܕܬܘܪ̈ܐ ܘܕܐܡܪ̈ܐ ܘܕܓܕ̈ܝܐ ܠܐ ܨܒ̇ܝܬ

12. Isaiah 1:12

    ܟܕ ܬܐܬܘܢ ܠܡܚܙܐ ܐ̈ܦܝ ܡܢܘ ܒܥܐ ܗܠܝܢ ܡܢ ܐ̈ܝܕܝܟܘܢ ܠܡܕܫ ܕܪ̈ܝ

13. Isaiah 1:13

    ܠܐ ܬܘܣܦܘܢ ܠܡܝܬܝܘ ܠܝ ܩܘܪ̈ܒܢܐ ܣܪ̈ܝܩܐ ܣܘܬܐ ܡܣܠܝܐ ܗܝ ܠܝ ܒܪܝܫ ܝܪ̈ܚܐ ܘܒܫܒܬܐ ܟܢ̇ܫܝܢ ܐܢܬܘܢ ܟܢܘܫܝܐ ܠܐ ܐܟ̇ܠ ܐܢܐ ܕܥܬܐ ܘܕܚܒܘܫܝܐ

14. Isaiah 1:14

    ܪܝܫ ܝܪ̈ܚܝܟܘܢ ܘܥܕ̈ܥܐܕܝܟܘܢ ܣܢܬ ܢܦܫܝ ܗܘܘ ܥܠܝ ܠܐܝܩܪܬܐ ܠܐ̇ܝܬ ܠܡܫܩܠ

15. Isaiah 1:15

    ܟܕ ܬܦܪܣܘܢ ܐ̈ܝܕܝܟܘܢ ܐܗܡܐ ܥܝ̈ܢܝ ܡܢܟܘܢ ܘܐܦܢ ܬܣܓܘܢ ܨܠܘܬܐ ܠܐ ܫܡ̇ܥ ܐܢܐ ܐ̈ܝܕܝܟܘܢ ܡ̈ܠܝܢ ܕܡܐ

16. Isaiah 1:16

    ܣܚܘ ܘܐܬܕܟܘ ܘܐܥܒܪܘ ܒܝܫ̈ܬܐ ܕܥ̇ܒ̈ܕܝܟܘܢ ܡܢ ܩܕܡ ܥܝ̈ܢܝ ܫܠܘ ܡܢ ܒܝܫ̈ܬܐ

17. Isaiah 1:17

    ܘܐܝܠܦܘ ܠܡܛܐܒܘ ܥܩܒܘ ܕܝܢܐ ܘܐܛܐܒܘ ܠܛܠܝܡ̈ܐ ܕܘܢܘ ܝܬ̈ܡܐ ܘܕܘܢܘ ܐܪ̈ܡܠܬܐ

18. Isaiah 1:18

    ܘܬܘ ܢܡܠܠ ܥܡ ܚ̈ܕܕܐ ܐܡ̇ܪ ܡܪܝܐ ܘܐܢ ܢܗܘܘܢ ܚ̈ܛܗܝܟܘܢ ܐܝܟ ܙܚܘܪܝܬܐ ܐܝܟ ܬܠܓܐ ܢܬܚܘܪܘܢ ܘܐܢ ܢܣܡܩܘܢ ܐܝܟ ܬܘܠܥܬܐ ܐܝܟ ܥܡܪܐ ܢܗܘܘܢ

19. Isaiah 1:19

    ܘܐܢ ܬܛܦܝܣܘܢ ܘܬܫܡܥܘܢܢܝ ܛܘܒܗ̇ ܕܐܪܥܐ ܬܐܟܠܘܢ

20. Isaiah 1:20

    ܘܐܢ ܠܐ ܬܛܦܝܣܘܢ ܘܬܬܚܪܘܢ ܒܚܪܒܐ ܬܬܐܟܠܘܢ ܦܘܡܗ ܕܡܪܝܐ ܡܠܠ

21. Isaiah 1:21

    ܐܝܟܢܐ ܗܘܬ ܙܢܝܬܐ ܡܕܝܢܬܐ ܡܗܝܡܢܬܐ ܕܡܠܝܐ ܗܘܬ ܕܝܢܐ ܘܙܕܝܩܘܬܐ ܒܬܬ ܒܗ̇ ܘܗܫܐ ܩܛܘ̈ܠܐ

22. Isaiah 1:22

    ܟܣܦܟܝ ܐܣܬܠܝ ܚܢܘܝܝ̈ܟܝ ܚܠ̇ܛܝܢ ܡ̈ܝܐ

23. Isaiah 1:23

    ܪ̈ܘܪܒܢܝܟܝ ܡܪܘܕܝܢ ܘܫ̈ܘܬܦܐ ܐܢܘܢ ܕܓܢܒ̈ܐ ܟܠܗܘܢ ܪܚ̇ܡܝܢ ܫܘܚܕܐ ܘܡܣܬܪܗܒܝܢ ܠܡܦܪܥ ܚ̈ܘܒܠܐ ܠܝ̈ܬܡܐ ܠܐ ܕܝܢ̇ܝܢ ܘܕܝ̣ܢܐ ܕܐܪ̈ܡܠܬܐ ܠܐ ܥܐ̇ܠ ܠܘܬܗܘܢ

24. Isaiah 1:24

    ܡܛܠ ܗܢܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܚܝܠܬܢܐ ܥܫܝܢܐ ܕܐܝܣܪܝܠ ܘܝ ܡܬܦܪܥ ܐܢܐ ܡܢ ܣ̈ܢܐܝ ܘܡܬܢܩܡ ܐܢܐ ܡܢ ܒ̈ܥܠܕܒܒܝ

25. Isaiah 1:25

    ܘܐܦܢܐ ܐܝܕܝ ܥܠܝܟܝ ܘܐܨܪܘܦ ܡܪ̈ܘܕܝܟܝ ܠܕܟܝܘ ܘܐܥܒܪ ܥ̇ܘ̈ܠܝܟܝ ܟܠܗܘܢ

26. Isaiah 1:26

    ܘܐܩܝܡ ܕܝ̇ܢ̈ܝܟܝ ܐܝܟ ܕܡܢ ܩܕܝܡ ܘܡ̈ܠܘܟܝܟܝ ܐܝܟ ܕܡܢ ܠܩܘܕܡܝܢ ܘܒܬܪܟܢ ܬܬܩܪܝܢ ܡܕܝܢܬܐ ܕܙܕܝܩܘܬܐ ܘܡܕܝܢܬܐ ܕܗܝܡܢܘܬܐ

27. Isaiah 1:27

    ܨܗܝܘܢ ܒܕܝܢܐ ܬܬܦܪܩ ܘܫܒܝܬܗ̇ ܒܙܕܝܩܘܬܐ

28. Isaiah 1:28

    ܘܬܒܪܐ ܕܥ̇ܘ̈ܠܐ ܘܕܚ̈ܛܝܐ ܐܟܚܕܐ ܘܐܝܠܝܢ ܕܫܒܩܘ ܠܡܪܝܐ ܢܣܘܦܘܢ

29. Isaiah 1:29

    ܡܛܠ ܕܢܒܗܬܘܢ ܡܢ ܦܬܟܪ̈ܐ ܕܪܓܘ ܘܢܚܦܪܘܢ ܡܢ ܓܢܝ̈ܬܐ ܕܓܒܘ

30. Isaiah 1:30

    ܡܛܠ ܕܢܗܘܘܢ ܐܝܟ ܒܛܡܬܐ ܕܢܬܪܘ ܛܪ̈ܦܝܗ̇ ܘܐܝܟ ܓܢܬܐ ܕܡ̈ܝܐ ܠܝܬ ܠܗ̇

31. Isaiah 1:31

    ܘܢܗܘܐ ܥܘܫܢܗܘܢ ܠܣܪܩܬܐ ܘܥ̇ܒ̈ܕܝܗܘܢ ܠܒܠܨܘܨ̈ܝܬܐ ܘܢܐܩܕܘܢ ܬܪ̈ܝܗܘܢ ܐܟܚܕܐ ܘܠܝܬ ܕܡܕܥܟ

32. Isaiah 2:1

    ܦܬܓܡܐ ܕܚܙܐ ܐܫܥܝܐ ܒܪ ܐܡܘܨ ܥܠ ܝܗܘܕܐ ܘܥܠ ܐܘܪܫܠܡ

33. Isaiah 2:2

    ܢܗܘܐ ܒܝܘܡ̈ܬܐ ܐܚܪ̈ܝܐ ܛܘܪ ܒܝܬܗ ܕܡܪܝܐ ܡܬܩܢ ܒܪܝܫ ܛܘܪ̈ܐ ܘܪܡ ܡܢ ܪ̈ܡܬܐ ܘܢܣܟܘܢ ܠܗ ܟܠܗܘܢ ܥܡ̈ܡܐ

34. Isaiah 2:3

    ܘܢܐܙܠܘܢ ܥܡ̈ܡܐ ܣ̈ܓܝܐܐ ܘܢܐܡܪܘܢ ܬܘ ܢܣܩ ܠܛܘܪܗ ܕܡܪܝܐ ܘܠܒܝܬ ܐܠܗܗ ܕܝܥܩܘܒ ܘܢܠܦܢ ܡܢ ܐܘܪ̈ܚܬܗ ܘܢܗܠܟ ܒܫ̈ܒܝܠܘܗܝ ܡܛܠ ܕܡܢ ܨܗܝܘܢ ܢܦ̇ܩ ܢܡܘܣܐ ܘܦܬܓܡܗ ܕܡܪܝܐ ܡܢ ܐܪܫܠܡ

35. Isaiah 2:4

    ܘܢܕܘܢ ܒܝܬ ܥܡ̈ܡܐ ܘܢܟܣ ܠܥܡ̈ܡܐ ܣ̈ܓܝܐܐ ܕܒܪܘܚܩܐ ܘܢܪܥܘܢ ܣܦܣܪ̈ܝܗܘܢ ܠܣ̈ܟܝ ܦܕ̈ܢܐ ܘܪ̈ܘܡܚܝܗܘܢ ܠܡ̈ܓܠܐ ܘܠܐ ܢܫܩܘܠ ܥܡܐ ܥܠ ܥܡܐ ܣܝܦܐ ܘܬܘܒ ܠܐ ܢܐܠܦܘܢ ܩܪܒܐ

36. Isaiah 2:5

    ܕܒܝܬ ܝܥܩܘܒ ܬܘ ܢܐܙܠ ܒܢܘܗܪܗ ܕܡܪܝܐ

37. Isaiah 2:6

    ܡܛܠ ܕܫܒܩܬܝܗܝ ܠܥܡܟ ܕܒܝܬ ܝܥܩܘܒ ܡܛܘܠ ܕܐܬܡܠܝܘ ܐܝܟ ܕܡܢ ܩܕܝܡ ܘܡܢܚܫܝܢ ܐܝܟ ܦܠܫ̈ܬܝܐ ܘܣܘܓܐܐ ܕܒ̈ܢܝܐ ܢܘܟܪ̈ܝܐ ܪܒܝܘ

38. Isaiah 2:7

    ܘܐܬܡܠܝܬ ܐܪܥܗܘܢ ܣܐܡܐ ܘܕܗܒܐ ܘܠܝܬ ܣܟܐ ܠܓܙܝ̈ܗܘܢ ܘܐܬܡܠܝܬ ܐܪܥܗܘܢ ܪ̈ܟܫܐ ܘܠܝܬ ܣܟܐ ܠܡܪ̈ܟܒܬܗܘܢ

39. Isaiah 2:8

    ܘܐܬܡܠܝܬ ܐܪܥܗܘܢ ܦܬܟܪ̈ܐ ܠܥܒ̇ܕ ܐ̈ܝܕܝܗܘܢ ܣܓ̈ܕܝܢ ܠܕܥܒ̣ܕ ܨܒ̈ܥܬܗܘܢ

40. Isaiah 2:9

    ܘܐܬܡܟܟ ܐܢܫܐ ܘܐܫܬܦܠ ܓܒܪܐ ܘܠܐ ܬܫܒܘܩ ܠܗܘܢ

41. Isaiah 2:10

    ܥܘܠܘ ܒܛܪ̈ܢܐ ܘܐܬܛܡܪܘ ܒܥܦܪܐ ܡܢ ܩܕܡ ܕܚܠܬܗ ܕܡܪܝܐ ܘܡܢ ܗܕܪܐ ܕܥܘܫܢܗ

42. Isaiah 2:11

    ܥܝ̈ܢܐ ܪ̈ܡܬܐ ܕܐܢܫܐ ܢܡܟܟ ܘܢܬܡܟܟ ܪܘܡܐ ܕܓܒܪܐ ܘܢܥܫܢ ܡܪܝܐ ܒܠܚܘܕܘܗܝ ܒܝܘܡܐ ܗ̇ܘ

43. Isaiah 2:12

    ܡܛܠ ܕܝܘܡܗ ܕܡܪܝܐ ܥܠ ܟܠ ܕܡܬܓܐܐ ܘܡܬܬܪܝܡ ܘܥܠ ܟܠ ܕܡܫܬܩܠ ܕܢܬܡܟܟ

44. Isaiah 2:13

    ܘܥܠ ܟܠܗܘܢ ܐܪ̈ܙܐ ܕܠܒܢܢ ܕܪܡܝܢ ܘܡܫܩܠܝܢ ܘܥܠ ܟܠܗܘܢ ܒ̈ܠܘܛܐ ܕܒܝܫܢ

45. Isaiah 2:14

    ܘܥܠ ܟܠܗܘܢ ܛܘܪ̈ܐ ܕܪܡܝܢ ܘܥܠ ܟܠ ܪ̈ܡܬܐ ܕܪ̈ܡܢ

46. Isaiah 2:15

    ܘܥܠ ܟܠ ܡ̈ܓܕܠܐ ܕܪܡܝܢ ܘܥܠ ܟܠ ܫܘܪ̈ܐ ܕܥܫܝܢܝܢ

47. Isaiah 2:16

    ܘܥܠ ܟܠܗܝܢ ܐ̈ܠܦܐ ܕܬܪܫܝܫ ܘܥܠ ܟܠܗܘܢ ܕܘܩ̈ܐ ܕܪܓܬܐ

48. Isaiah 2:17

    ܘܢܬܡܟܟ ܪܘܡܐ ܕܐܢܫܐ ܘܢܫܬܦܠ ܪܘܡܐ ܕܓܒܪܐ ܘܢܥܫܢ ܡܪܝܐ ܒܠܚܘܕܘܗܝ ܒܝܘܡܐ ܗ̇ܘ

49. Isaiah 2:18

    ܘܦܬܟܪ̈ܐ ܓܡܝܪܐܝܬ ܢܥܒܪܘܢ

50. Isaiah 2:19

    ܘܢܥܠܘܢ ܒܡܥܪ̈ܐ ܕܟܐܦܐ ܘܒܚ̈ܘܠܢܐ ܕܥܦܪܐ ܡܢ ܩܕܡ ܕܚܠܬܗ ܕܡܪܝܐ ܘܡܢ ܗܕܪܐ ܕܥܘܫܢܗ ܡܐ ܕܩܐ̇ܡ ܠܡܟܒܫܘ ܠܐܪܥܐ

51. Isaiah 2:20

    ܒܗ ܒܝܘܡܐ ܗ̇ܘ ܢܫܕܘܢ ܐܢܫܐ ܦܬܟܪ̈ܐ ܕܕܗܒܐ ܘܕܣܐܡܐ ܕܥܒܕܘ ܠܗܘܢ ܠܡܣܓܕ ܠܣܪܝܩܘܬܐ ܘܠܦܪ̈ܚܕܘܕܐ

52. Isaiah 2:21

    ܠܡܥܠ ܒܡܥܪ̈ܐ ܕܛܪܢܐ ܘܒܫܩܝܦܐ ܕܟܐܦܐ ܡܢ ܩܕܡ ܕܚܠܬܗ ܕܡܪܝܐ ܘܡܢ ܗܕܪܐ ܕܥܘܫܢܗ ܡܐ ܕܩܐ̇ܡ ܠܡܟܒܫܘ ܠܐܪܥܐ

53. Isaiah 2:22

    ܫܠܘ ܠܟܘܢ ܡܢ ܐܢܫܐ ܕܢܫܡܬܐ ܒܢܚܝܪ̈ܘܗܝ ܡܛܠ ܕܐܝܟ ܡܢܐ ܚܫܝܒ

54. Isaiah 3:1

    ܡܛܠ ܕܗܐ ܡܪܐ ܡܪ̈ܘܬܐ ܡܥܒܪ ܡܢ ܐܘܪܫܠܡ ܘܡܢ ܝܗܘܕܐ ܣܡܘܟܐ ܘܣܡܘܟܬܐ ܟܠ ܕܣܡܟ ܒܠܚܡܐ ܘܟܠ ܕܣܡܟ ܒܡ̈ܝܐ

55. Isaiah 3:2

    ܘܓܢܒܪܐ ܘܓܒܪܐ ܩܪܒܬܢܐ ܘܕܝ̇ܢܐ ܘܢܒܝܐ ܘܩܨܘܡܐ ܘܩܫܝܫܐ

56. Isaiah 3:3

    ܘܪܝܫ ܚܡܫܝܢ ܘܗܕܝܪ ܐ̈ܦܐ ܘܡܠܘܟܐ ܘܚܟܝܡ ܢܓܪ̈ܐ ܘܕܡܬܒܝܢ ܒܡܠ̣ܟܐ

57. Isaiah 3:4

    ܘܐܩܝܡ ܥܠܝ̈ܡܐ ܪ̈ܘܪܒܢܝܗܘܢ ܘܡܒ̈ܙܚܢܐ ܢܫܬܠܛܘܢ ܒܗܘܢ

58. Isaiah 3:5

    ܘܢܦܠ ܥܡܐ ܓܒܪ ܒܓܒܪ ܓܒܪܐ ܒܚܒܪܗ ܘܢܬܓܪܘܢ ܥܠܝ̈ܡܐ ܥܠ ܣ̈ܒܐ ܘܡܨܥܪ̈ܐ ܥܠ ܡܝܩܪ̈ܐ

59. Isaiah 3:6

    ܡܛܠ ܕܢܐܚܘܕ ܓܒܪܐ ܓܒܪ ܠܐܚܘܗܝ ܡܢ ܒܝܬ ܐܒܘܗܝ ܘܢܐܡܪ ܠܗ ܢܚ̈ܬܐ ܐܝܬ ܠܟ ܗܘܝ ܠܢ ܫܠܝܛܐ ܘܬܘܩܠܬܐ ܗܕܐ ܬܚܝܬ ܐܝܕܟ

60. Isaiah 3:7

    ܘܢܥܢܐ ܒܝܘܡܐ ܗ̇ܘ ܘܢܐܡܪ ܠܐ ܗܘ̇ܐ ܐܢܐ ܪܝܫܐ ܕܒܒܝܬܝ ܠܝܬ ܠܚܡܐ ܘܐܦ ܠܐ ܬܟܣܝܬܐ ܠܐ ܬܥܒܕܘܢܢܝ ܫܠܝܛܐ ܥܠ ܥܡܐ

61. Isaiah 3:8

    ܡܛܘܠ ܕܐܬܬܩܠܬ ܐܘܪܫܠܡ ܘܝܗܘܕܐ ܢܦܠ ܡܛܠ ܕܠܫܢܗܘܢ ܘܥܒ̇ܕ ܐ̈ܝܕܝܗܘܢ ܡܪܡܪܘ ܩܕܡ ܡܪܝܐ ܘܠܥܢܢܐ ܕܐܝܩܪܗ

62. Isaiah 3:9

    ܡܣܒ ܒܐ̈ܦܝܗܘܢ ܣܗ̇ܕ ܒܗܘܢ ܘܚ̈ܛܗܝܗܘܢ ܐܝܟ ܣܕܘܡ ܚܘܝܘ ܘܠܐ ܐܬܬܟܣܘ ܘܝ ܠܢܦܫܗܘܢ ܕܐܪܡܝܘ ܠܗܘܢ ܚ̈ܘܒܠܐ ܒܝܫ̈ܐ

63. Isaiah 3:10

    ܐܡܪܘ ܠܙܕܝܩܐ ܛܒ ܡܛܠ ܗܢܐ ܦܐܪ̈ܝ ܥ̇ܒܕܝ̈ܗܘܢ ܢܐܟܠܘܢ

64. Isaiah 3:11

    ܘܝ ܠܪܫܝܥܐ ܒܝܫܐ ܡܛܠ ܕܥܒ̇ܕ ܐ̈ܝܕܘܗܝ ܡܬܦܪܥ

65. Isaiah 3:12

    ܫ̈ܠܝܛܘܗܝ ܕܥܡܝ ܡܒܥܪܝܢ ܠܗ ܘܢܫ̈ܐ ܐܫܬܠܛ ܒܗ ܥܡܝ ܡܛܐ̈ܒܢܝܟ ܐܛܥܝܘܟ ܘܐܘܪܚܐ ܕܫܒܝ̈ܠܝܟ ܕܠܚܘ

66. Isaiah 3:13

    ܩܐ̇ܡ ܠܡܕܢ ܡܪܝܐ ܘܩܐ̇ܡ ܠܡܕܢ ܠܥܡܗ

67. Isaiah 3:14

    ܡܪܝܐ ܒܕܝܢܐ ܢܥܘܠ ܥܡ ܣܒ̈ܐ ܕܥܡܗ ܘܥܡ ܪ̈ܘܪܒܢܘܗܝ ܐܢܬܘܢ ܐܘܩܕܬܘܢ ܟܪܡܐ ܘܚܛܘܦܝܐ ܕܡܣ̈ܟܢܐ ܒܒ̈ܬܝܟܘܢ

68. Isaiah 3:15

    ܠܡܢܐ ܢܟܝܬܘܢ ܠܥܡܝ ܘܐ̈ܦܐ ܕܡܣ̈ܟܢܐ ܐܒܗܬܬܘܢ ܐܡ̇ܪ ܡܪܝܐ ܚܝܠܬܢܐ

69. Isaiah 3:16

    ܥܠ ܕܐܬܬܪܝܡ ܒܢ̈ܬ ܨܗܝܘܢ ܘܗܠܟ ܒܨܘܪܐ ܪܡܐ ܘܒܪܡܙܐ ܕܥܝ̈ܢܐ ܡܗ̈ܠܟܢ ܗ̈ܘܝ ܘܡܛܪ̈ܦܢ ܒܪ̈ܓܠܝܗܝܢ ܘܡܪ̈ܓܙܢ

70. Isaiah 3:17

    ܢܡܟܟ ܡܪܝܐ ܪ̈ܫܝܬܐ ܕܒܢ̈ܬ ܨܗܝܘܢ ܘܡܪܝܐ ܐܣܟܡܗܝܢ ܢܦܪܣܐ

71. Isaiah 3:18

    ܒܝܘܡܐ ܗ̇ܘ ܢܥܒܪ ܡܪܝܐ ܫܘܒܚܐ ܕܢܚ̈ܬܝܗܝܢ ܘܕܨܒܬܗܝܢ ܘܕܓܕܘ̈ܠܝܗܝܢ

72. Isaiah 3:19

    ܘܐܣܦܪ̈ܐ ܕܣܥܪ̈ܝܗܝܢ ܘܒ̈ܠܘܪܝܗܝܢ

73. Isaiah 3:20

    ܘܨܕܥ̈ܝܗܝܢ ܘܨܒܬܐ ܕܐ̈ܦܝܗܝܢ ܘܩ̈ܕܫܝܗܝܢ ܘܥܩ̈ܝܗܝܢ ܘܐܩ̈ܠܢܝܗܝܢ

74. Isaiah 3:21

    ܘܩ̈ܘܠܒܝܗܝܢ ܘܫܐܪ̈ܝܗܝܢ

75. Isaiah 3:22

    ܘܟܘܬ̈ܝܢܝܬܗܝܢ ܘܡܫ̈ܠܡܢܝܬܗܝܢ ܘܒܘܨܗܝܢ ܘܐܪ̈ܓܘܢܝܗܝܢ

76. Isaiah 3:23

    ܘܢܚ̈ܬܝܗܝܢ ܘܬܟܠܝ̈ܬܗܝܢ ܘܙܚܘܪ̈ܝܬܗܝܢ ܘܨܡܕܐ ܟܠܗ ܕܨܒܬܗܝܢ

77. Isaiah 3:24

    ܘܢܗܘܐ ܚܠܐ ܚܠܦ ܪܝܚܗܝܢ ܒܣܝܡܐ ܘܚܠܦ ܐܣܪ ܚ̈ܨܝܗܝܢ ܡܝܙܪ̈ܢܐ ܢܐܣܪ̈ܢ ܘܚܠܦ ܒܠܘܪ̈ܐ ܩܘܕܚ̈ܬܐ ܘܚܠܦ ܬܟ̈ܠܝܬܗܝܢ ܣ̈ܩܐ ܢܬ̈ܟܣܝܢ ܡܛܠ ܕܢܬܚܒܠ ܫܘܦܪܗܝܢ

78. Isaiah 3:25

    ܘܥܫܝ̈ܢܝܟܝ ܒܚܪܒܐ ܢܦܠܘܢ ܘܓܢܒܪ̈ܝܟܝ ܒܩܪܒܐ

79. Isaiah 3:26

    ܘܢܐܠܘܢ ܘܢܬܒܘܢ ܒܐܒܠܐ ܬܪ̈ܥܝܗ̇ ܘܙܟܘܬܗ̇ ܒܐܪܥܐ ܬܦܠ

80. Isaiah 4:1

    ܘܢܐ̈ܚܕܢ ܫܒܥ ܢܫ̈ܝܢ ܠܓܒܪܐ ܚܕ ܒܝܘܡܐ ܗ̇ܘ ܘܢܐܡܪ̈ܢ ܠܗ ܠܚܡܢ ܢܐܟܘܠ ܘܢܚ̈ܬܝܢ ܢܬܟܣܐ ܒܠܚܘܕ ܫܡܟ ܢܬܩܪܐ ܥܠܝܢ ܘܐܥܒܪ ܚܣܕܢ

81. Isaiah 4:2

    ܒܗ ܒܝܘܡܐ ܗ̇ܘ ܢܗܘܐ ܕܢܚܗ ܕܡܪܝܐ ܠܫܘܒܚܐ ܘܠܐܝܩܪܐ ܘܦܐܪ̈ܐ ܕܐܪܥܐ ܠܓܐܝܘܬܐ ܘܠܫܘܒܚܐ ܠܡܕܡ ܕܐܫܬܚܪ ܡܢ ܐܝܣܪܝܠ

82. Isaiah 4:3

    ܘܢܗܘܐ ܡ̇ܢ ܕܡܫܬܚܪ ܒܨܗܝܘܢ ܘܡ̇ܢ ܕܡܫܬܚܪ ܒܐܘܪܫܠܡ ܩܕܝܫܐ ܢܬܩܪܐ ܟܠ ܕܟܬܝܒ ܒܐܘܪܫܠܡ ܠܚ̈ܝܐ

83. Isaiah 4:4

    ܘܢܫܝܓ ܡܪܝܐ ܨܐܬܐ ܕܒܢ̈ܬ ܨܗܝܘܢ ܘܕܡܐ ܢܪܚܩ ܡܢ ܓܘܗ̇ ܕܐܘܪܫܠܡ ܒܪܘܚܐ ܕܕܝܢܐ ܘܒܪܘܚܐ ܝܩܝܕܬܐ

84. Isaiah 4:5

    ܘܢܒܪܐ ܡܪܝܐ ܥܠ ܟܠܗ ܡܬܩܢܐ ܠܛܘܪܐ ܕܨܗܝܘܢ ܥܠ ܚܕܪ̈ܝܗ̇ ܥܢܢܐ ܒܐܝܡܡܐ ܘܬܢܢܐ ܘܙܗܪܐ ܕܫܠܗܒܝܬܐ ܕܢܘܪܐ ܒܠܠܝܐ ܡܛܠ ܕܥܠ ܟܠ ܐܝܩܪ ܬܛܠ

85. Isaiah 4:6

    ܘܣܬܪܐ ܢܗܘܐ ܠܛܠܠܐ ܕܝܘܡܐ ܡܢ ܫܘܒܐ ܠܡܟܣܝܘ ܘܠܡܣܬܪܘ ܡܢ ܙܪܝܦܬܐ ܘܡܢ ܡܛܪܐ

86. Isaiah 5:1

    ܐܫܒܚ ܠܚܒܝܒܝ ܬܫܒܘܚܬܐ ܕܚܒܝܒܝ ܠܟܪܡܗ ܟܪܡܐ ܗܘܐ ܠܚܒܝܒܝ ܒܩܪܢܐ ܕܐܬܪܐ ܫܡܝܢܐ

87. Isaiah 5:2

    ܘܦܠܚܗ ܘܐܚܕܪܗ ܣܝܓܐ ܘܢܨܒܗ ܫܒ̈ܘܩܐ ܘܒܢܐ ܡܓܕܠܐ ܒܓܘܗ ܐܦ ܡܥܨܪܬܐ ܥܒܕ ܒܗ ܘܣܟܝ ܕܢܥܒܕ ܥܢ̈ܒܐ ܘܥܒܕ ܚܪ̈ܘܒܐ

88. Isaiah 5:3

    ܗܫܐ ܓܒܪ̈ܐ ܕܝܗܘܕܐ ܘܥܡܘܪ̈ܝܗ̇ ܕܐܘܪܫܠܡ ܕܘܢܘ ܒܝܢ̈ܝ ܠܟܪܡܝ

89. Isaiah 5:4

    ܡܢܐ ܬܘܒ ܘܠ̇ܐ ܗܘܐ ܠܡܥܒܕ ܠܟܪܡܝ ܘܠܐ ܥܒ̇ܕܬ ܠܗ ܕܣܟ̇ܝܬ ܕܢܥܒܕ ܥܢ̈ܒܐ ܘܥܒܕ ܚܪ̈ܘܒܐ

90. Isaiah 5:5

    ܗܫܐ ܐܚܘܝܟܘܢ ܡܕܡ ܕܥܒ̇ܕ ܐܢܐ ܠܗ ܠܟܪܡܝ ܥܩ̇ܪ ܐܢܐ ܡܓܕܠܗ ܘܢܗܘܐ ܠܒܙܬܐ ܘܬ̇ܪܥ ܐܢܐ ܣܝܓܗ ܘܢܗܘܐ ܠܕܝܫܐ

91. Isaiah 5:6

    ܘܐܥܒܕܝܘܗܝ ܕܢܚܪܒ ܘܠܐ ܢܬܟܣܚ ܘܠܐ ܢܬܦܠܚ ܘܢܐܥܘܢ ܒܗ ܟܘ̈ܒܐ ܘܝܥܪܐ ܘܐܦܩܘܕ ܠܥܢ̈ܢܐ ܕܠܐ ܢܚ̈ܬܢ ܥܠܘܗܝ ܡܛܪܐ

92. Isaiah 5:7

    ܡܛܠ ܕܟܪܡܗ ܕܡܪܝܐ ܚܝܠܬܢܐ ܒܝܬܐ ܗܘ ܕܒܝܬ ܐܝܣܪܝܠ ܘܓܒܪ̈ܐ ܕܡܢ ܝܗܘܕܐ ܢܨܒܬܐ ܚܕܬܐ ܘܚܒܝܒܬܐ ܣܟ̇ܝܬ ܠܕܝܢܐ ܘܗܘܐ ܚܛܘܦܝܐ ܘܠܙܕܝܩܘܬܐ ܘܗܐ ܐܝܠܠܬܐ

93. Isaiah 5:8

    ܘܝ ܠܕܡܩܪܒܝܢ ܒܝܬܐ ܠܒܝܬܐ ܘܚܩܠܐ ܒܚܩܠܐ ܚܠܛ̇ܝܢ ܕܬܐܚܕܘܢ ܐܬܪܐ ܘܬܬܒܘܢ ܒܠܚܘܕܝܟܘܢ ܒܓܘܗ̇ ܕܐܪܥܐ

94. Isaiah 5:9

    ܒܐ̈ܕܢܝ ܡܪܝܐ ܚܝܠܬܢܐ ܐܫܬܡܥ ܒ̈ܬܐ ܣ̈ܓܝܐܐ ܠܚܘܪܒܐ ܢܗܘܘܢ ܡܢ ܒܠܝ ܕܝܬ̇ܒ

95. Isaiah 5:10

    ܡܛܠ ܕܥܣܪ ܐܫܟܪ̈ܐ ܕܟܪܡܐ ܢܥܒܕ̈ܢ ܚܕܐ ܚܒܝܬܐ ܘܙܪܥܐ ܕܟܘܪ ܢܥܒܕ ܣܐܐ

96. Isaiah 5:11

    ܘܝ ܠܕܡܩܕܡܝܢ ܒܨܦܪܐ ܘܪܗ̇ܛܝܢ ܠܫܟܪܐ ܘܡܘܚܪܝܢ ܒܪܡܫܐ ܘܚܡܪܐ ܡܘܩܕ ܠܗܘܢ

97. Isaiah 5:12

    ܒܟܢܪ̈ܐ ܘܒܩܝܬܪ̈ܐ ܘܒ̈ܦܠܓܐ ܘܒܪ̈ܒܝܥܐ ܚܡܪܐ ܫ̇ܬܝܢ ܘܒܥܒ̈ܕܘܗܝ ܕܐܠܗܐ ܠܐ ܡܣܬܟܠܝܢ ܘܒܥܒ̇ܕ ܐ̈ܝܕܘܗܝ ܠܐ ܚܝ̇ܪܝܢ

98. Isaiah 5:13

    ܡܛܠ ܗܢܐ ܐܫܬܒܝ ܥܡܝ ܡܢ ܒܠܝ ܐܝܕܥܬܐ ܘܣܓܝܘ ܡܝ̈ܬܝܗܘܢ ܡܢ ܟܦܢܐ ܘܥܫܢܘ ܡܢ ܨܗܝܐ

99. Isaiah 5:14

    ܡܛܠ ܗܢܐ ܐܦܬܝܬ ܫܝܘܠ ܢܦܫܗ̇ ܘܦܥܪܬ ܦܘܡܗ̇ ܕܠܐ ܣܟ ܘܢܚܬܘܢ ܠܗ̇ ܡܫ̈ܒܚܐ ܘܡܝܩܪ̈ܐ ܘܥܫ̈ܝܢܐ

100. Isaiah 5:15

     ܘܢܬܡܟܟ ܐܢܫܐ ܘܢܫܬܦܠ ܓܒܪܐ ܘܥܝ̈ܢܐ ܪ̈ܡܬܐ ܢܬܡ̈ܟܟܢ

Next → — showing 1–100 of 1,290

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.