← All works

Peshitta Hosea

Peshitta (Syriac Old Testament) · 197 sections

1. Hosea 8:1

   ܦܘܡܟ ܐܝܟ ܩܪܢܐ ܘܐܝܟ ܢܫܪܐ ܥܠ ܒܝܬܗ ܕܡܪܝܐ ܥܠ ܕܥܒܪܘ ܥܠ ܩܝܡܝ ܘܥܠ ܢܡܘܣܝ ܐܥܠܝܘ

2. Hosea 8:2

   ܠܝ ܩܪܘ ܘܐܡܪܘ ܝܕܥܢܟ ܐܠܗܢ

3. Hosea 8:3

   ܛܥܐ ܐܝܣܪܝܠ ܛܒܬܐ ܘܒܥܠܕܒܒܐ ܪܕܦ ܐܢܘܢ

4. Hosea 8:4

   ܐܡܠܟܘ ܐܠܐ ܠܐ ܡܢܝ ܘܐܫܬܠܛܘ ܘܠܐ ܐܘܕܥܘܢܝ ܣܐܡܗܘܢ ܘܕܗܒܗܘܢ ܥܒܕܘ ܠܗܘܢ ܦܬܟܪܐ ܕܢܐܒܕܘܢ

5. Hosea 8:5

   ܛܥܘ ܒܥܓܠܟܝ ܫܡܪܝܢ ܘܐܬܚܡܬ ܪܘܓܙܝ ܥܠܝܗܘܢ ܥܕܡܐ ܠܐܡܬܝ ܠܐ ܡܫܟܚܝܢ ܠܡܙܟܐ

6. Hosea 8:6

   ܡܛܠ ܕܡܢ ܐܝܣܪܝܠ ܗܘ ܘܢܓܪܐ ܗܘ ܥܒܕܗ ܘܠܐ ܗܘܐ ܐܠܗܐ ܐܠܐ ܠܛܥܝܘܬܐ ܗܘܐ ܥܓܠܟܝ ܫܡܪܝܢ

7. Hosea 8:7

   ܡܛܠ ܕܪܘܚܐ ܙܪܥܘ ܘܥܠܥܠܐ ܚܨܕܘ ܘܩܝܡܬܐ ܠܝܬ ܠܗܘܢ ܘܐܦ ܠܐ ܫܒܠܐ ܕܥܒܕ ܩܡܚܐ ܘܐܠܘ ܐܝܬ ܗܘܐ ܠܗܘܢ ܢܘܟܪܝܐ ܐܟܠܝܢ ܗܘܘ ܠܗ

8. Hosea 8:8

   ܐܬܒܠܥ ܐܝܣܪܝܠ ܘܡܟܝܠ ܗܘܘ ܒܥܡܡܐ ܐܝܟ ܡܐܢܐ ܕܠܝܬ ܒܗ ܚܫܚܘ

9. Hosea 8:9

   ܡܛܠ ܕܗܢܘܢ ܣܠܩܘ ܠܐܬܘܪ ܐܝܟ ܥܪܕܐ ܝܚܝܕܝܐ ܐܦܪܝܡ ܡܘܗܒܬܐ ܪܚܡ

10. Hosea 8:10

    ܐܦܢ ܢܫܬܠܡܘܢ ܒܥܡܡܐ ܐܟܢܫ ܐܢܘܢ ܘܢܬܬܢܝܚܘܢ ܩܠܝܠ ܡܢ ܫܩܠܐ ܕܡܠܟܐ ܘܕܫܠܝܛܢܐ

11. Hosea 8:11

    ܡܛܠ ܕܐܣܓܝ ܐܦܪܝܡ ܡܕܒܚܐ ܠܚܛܝܬܐ ܘܗܘܘ ܠܗ ܡܕܒܚܐ ܠܚܛܗܐ ܪܒܐ

12. Hosea 8:12

    ܘܟܬܒܬ ܠܗ ܣܘܓܐܐ ܕܢܡܘܣܝ ܘܐܝܟ ܢܘܟܪܝܬܐ ܚܫܒ ܐܢܝܢ ܠܡܠܝ

13. Hosea 8:13

    ܕܒܚܐ ܕܓܒܝܬܐ ܡܕܒܚܝܢ ܘܒܣܪܐ ܐܟܠܝܢ ܘܡܪܝܐ ܠܐ ܨܒܐ ܒܗܘܢ ܡܟܝܠ ܢܬܕܟܪ ܥܘܠܗܘܢ ܘܢܦܩܘܕ ܚܛܗܝܗܘܢ ܘܗܢܘܢ ܠܡܨܪܝܢ ܢܗܦܟܘܢ

14. Hosea 8:14

    ܛܥܐ ܐܝܣܪܝܠ ܠܡܢ ܕܥܒܕܗ ܘܒܢܐ ܗܝܟܠܐ ܘܝܗܘܕܐ ܐܣܓܝ ܡܕܝܢܬܐ ܥܫܝܢܬܐ ܐܫܒܘܩ ܢܘܪܐ ܒܡܕܝܢܬܗ ܘܬܐܟܘܠ ܣܚܪܬܗ

15. Hosea 9:1

    ܠܐ ܬܚܕܐ ܐܝܣܪܝܠ ܘܠܐ ܬܕܘܨ ܐܝܟ ܥܡܡܐ ܡܛܠ ܕܛܥܝܬ ܡܢ ܐܠܗܟ ܘܪܚܡܬ ܡܘܗܒܬܐ ܡܢ ܟܘܠ ܐܕܪܐ

16. Hosea 9:2

    ܘܡܢ ܐܕܪܐ ܘܡܢ ܡܥܨܪܬܐ ܠܐ ܢܣܒܥܘܢ ܘܡܫܚܐ ܢܟܕܒ ܒܗܘܢ

17. Hosea 9:3

    ܠܐ ܢܬܒܘܢ ܒܐܪܥܗ ܕܡܪܝܐ ܐܠܐ ܢܗܦܘܟ ܐܦܪܝܡ ܠܡܨܪܝܢ ܘܒܐܬܘܪ ܛܢܦܘܬܐ ܢܐܟܠܘܢ

18. Hosea 9:4

    ܠܐ ܢܢܩܘܢ ܠܡܪܝܐ ܚܡܪܐ ܘܠܐ ܢܒܣܡܘܢ ܠܗ ܕܒܚܝܗܘܢ ܐܝܟ ܠܚܡܐ ܗܘ ܠܗܘܢ ܕܐܘܠܨܢܐ ܟܠ ܐܟܘܠܘܗܝ ܢܬܛܢܦܘܢ ܡܛܠ ܕܠܚܡܐ ܕܢܦܫܗܘܢ ܠܐ ܥܐܠ ܠܒܝܬܗ ܕܡܪܝܐ

19. Hosea 9:5

    ܡܢܐ ܬܥܒܕܘܢ ܠܝܘܡܐ ܕܥܐܕܐ ܘܠܝܘܡܐ ܕܥܕܥܐܕܗ ܕܡܪܝܐ

20. Hosea 9:6

    ܡܛܠ ܕܗܢܘܢ ܐܙܠܘ ܒܒܙܬܐ ܘܡܨܪܝܢ ܬܟܢܫ ܐܢܘܢ ܘܡܦܣ ܬܩܒܘܪ ܐܢܘܢ ܪܓܬܐ ܕܣܐܡܗܘܢ ܢܘܟܪܝܐ ܢܐܪܬܘܢܗ ܘܟܘܒܐ ܒܡܫܟܢܝܗܘܢ

21. Hosea 9:7

    ܡܛܝܘ ܝܘܡܬܐ ܕܬܒܥܬܐ ܩܪܒܘ ܝܘܡܬܐ ܕܦܘܪܥܢܐ ܢܕܥ ܐܝܣܪܝܠ ܣܟܠܐ ܢܒܝܐ ܫܛܝܐ ܓܒܪܐ ܕܠܒܝܫܐ ܒܗ ܪܘܚܐ ܕܫܛܝܘܬܐ ܡܢ ܣܘܓܐܐ ܕܥܘܠܟ ܐܬܝܬܪܬ ܫܪܝܚܘܬܟ

22. Hosea 9:8

    ܕܘܩܐ ܐܦܪܝܡ ܥܡ ܐܠܗܝ ܢܒܝܐ ܦܚܐ ܕܬܘܩܠܬܐ ܥܠ ܟܠܗܝܢ ܐܘܪܚܬܗ ܘܫܪܝܚܘܬܐ ܒܒܝܬܗ ܕܐܠܗܐ

23. Hosea 9:9

    ܥܡܩܘ ܘܚܒܠܘ ܐܝܟ ܝܘܡܬܐ ܕܪܡܬܐ ܡܟܝܠ ܢܬܕܟܪ ܥܘܠܗܘܢ ܘܢܦܩܘܕ ܚܛܗܝܗܘܢ

24. Hosea 9:10

    ܐܝܟ ܥܢܒܐ ܒܡܕܒܪܐ ܐܫܟܚܬ ܠܐܝܣܪܝܠ ܘܐܝܟ ܬܬܐ ܒܟܪܬܐ ܚܙܝܬ ܠܐܒܗܝܗܘܢ ܘܗܢܘܢ ܥܠܘ ܠܘܬ ܒܥܠ ܦܥܘܪ ܘܐܬܢܙܪܘ ܠܒܗܬܬܐ ܘܗܘܘ ܠܛܢܦܘܬܐ ܐܝܟ ܕܪܚܡܘ

25. Hosea 9:11

    ܐܦܪܝܡ ܐܝܟ ܦܪܚܬܐ ܦܪܚ ܐܝܩܪܗܘܢ ܡܢ ܝܠܕܐ ܘܡܢ ܟܪܣܐ ܘܡܢ ܒܛܢܐ

26. Hosea 9:12

    ܐܦܢ ܢܪܒܘܢ ܒܢܝܐ ܐܓܝܙ ܐܢܘܢ ܡܢ ܒܢܝ ܐܢܫܐ ܡܛܘܠ ܕܘܝ ܠܗܘܢ ܡܬܦܪܥ ܐܢܐ ܡܢܗܘܢ

27. Hosea 9:13

    ܐܦܪܝܡ ܐܝܟ ܕܚܙܝܬ ܠܨܘܪ ܕܫܬܝܠܐ ܒܒܢܝܢܝܗ ܗܟܢܐ ܐܦܪܝܡ ܢܦܩ ܒܢܘܗܝ ܠܩܛܠܐ

28. Hosea 9:14

    ܗܒ ܠܗܘܢ ܡܪܝܐ ܡܕܡ ܕܝܗܒ ܐܢܬ ܗܒ ܠܗܘܢ ܡܪܒܥܐ ܡܓܙܝܐ ܘܬܕܝܐ ܝܒܝܫܐ

29. Hosea 9:15

    ܟܠܗܝܢ ܒܝܫܬܗܘܢ ܒܓܠܓܠܐ ܡܛܠ ܕܬܡܢ ܣܢܝܬ ܐܢܘܢ ܒܒܝܫܘܬܐ ܕܨܢܥܬܗܘܢ ܡܢ ܒܝܬܝ ܐܦܩ ܐܢܘܢ ܘܠܐ ܐܘܣܦ ܠܡܪܚܡܘ ܥܠܝܗܘܢ ܟܠܗܘܢ ܫܠܝܛܢܝܗܘܢ ܡܪܘܕܝܢ

30. Hosea 9:16

    ܡܚܐ ܐܦܪܝܡ ܥܩܪܐ ܘܝܒܫ ܕܠܐ ܢܬܠ ܦܐܪ̈ܐ ܘܐܢ ܢܘܠܕܘܢ ܒܢܝܐ ܐܡܝܬ ܪܓܬܐ ܕܡܥܝܗܘܢ

31. Hosea 9:17

    ܘܢܣܠܐ ܐܢܘܢ ܐܠܗܝ ܥܠ ܕܠܐ ܫܡܥܘܗܝ ܘܢܗܘܘܢ ܛܥܝܢ ܒܝܬ ܥܡܡܐ

32. Hosea 10:1

    ܓܦܬܐ ܕܫܒܘܩܐ ܐܝܣܪܝܠ ܕܥܒܕܬ ܦܐܪܐ ܐܝܟ ܣܘܓܐܐ ܕܦܐܪܝܗ ܐܣܓܝܘ ܡܕܒܚܐ ܘܐܝܟ ܛܘܒܐ ܕܐܪܥܗܘܢ ܒܢܘ ܥܠܘܬܐ

33. Hosea 10:2

    ܐܬܦܠܓ ܠܒܗܘܢ ܘܡܢ ܗܫܐ ܢܬܚܝܒܘܢ ܗܘ ܢܣܚܘܦ ܡܕܒܚܝܗܘܢ ܘܢܒܘܙ ܥܠܘܬܗܘܢ

34. Hosea 10:3

    ܡܛܘܠ ܕܡܟܝܠ ܢܐܡܪܘܢ ܠܝܬ ܠܢ ܡܠܟܐ ܡܢ ܡܪܝܐ ܠܐ ܕܚܠܢ ܡܠܟܐ ܡܢܐ ܢܥܒܕ ܠܢ

35. Hosea 10:4

    ܡܠܠܘ ܡܠܐ ܕܥܠܠܬܐ ܕܓܠܬܐ ܦܣܩܘ ܕܝܬܩܐ ܘܦܪܥܘ ܕܝܢܐ ܐܝܟ ܝܥܪܐ ܒܚܩܠܐ ܕܐܪܥܐ ܒܝܪܬܐ

36. Hosea 10:5

    ܠܥܓܠܐ ܕܒܝܬ ܐܘܢ ܢܗܘܘܢ ܬܘܬܒܐ ܥܡܘܪܐ ܕܫܡܪܝܢ ܡܛܠ ܕܝܬܒܘ ܥܠܘܗܝ ܒܐܒܠܐ ܥܡܗ ܘܟܘܡܪܘܗܝ ܘܥܠܘܗܝ ܢܚܕܘܢ ܘܥܠ ܐܝܩܪܗ ܕܥܒܪ ܡܢܗ

37. Hosea 10:6

    ܘܐܦ ܠܗ ܠܐܬܘܪ ܢܘܒܠܘܢ ܩܘܪܒܢܐ ܠܡܠܟܐ ܕܝܪܒ ܒܗܬܬܐ ܢܩܒܠ ܐܦܪܝܡ ܘܐܝܣܪܝܠ ܢܒܗܬ ܒܬܪܥܝܬܗ

38. Hosea 10:7

    ܫܕܬ ܫܡܪܝܢ ܡܠܟܗ ܐܝܟ ܓܠܐ ܥܠ ܐܦܝ ܡܝܐ

39. Hosea 10:8

    ܘܢܚܪܒܢ ܦܪܟܐ ܕܐܘܢ ܚܛܝܬܗ ܕܐܝܣܪܝܠ ܟܘܒܐ ܘܕܪܕܪܐ ܢܐܥܘܢ ܒܡܕܒܚܝܗܘܢ ܘܢܐܡܪܘܢ ܠܛܘܪܐ ܕܟܣܐܘܢ ܘܠܪܡܬܐ ܕܢܦܠܢ ܥܠܝܗܘܢ

40. Hosea 10:9

    ܡܢ ܝܘܡܬܐ ܕܪܡܬܐ ܚܛܝܬ ܐܝܣܪܝܠ ܬܡܢ ܢܩܘܡܘܢ ܘܠܐ ܢܕܪܟ ܐܢܘܢ ܩܪܒܐ ܒܪܡܬܐ ܥܠ ܒܢܝܐ ܕܥܘܠܐ

41. Hosea 10:10

    ܒܟܐܬܝ ܐܪܕܐ ܐܢܘܢ ܘܢܬܟܢܫܘܢ ܥܠܝܗܘܢ ܥܡܡܐ ܡܐ ܕܡܬܪܕܝܢ ܥܠ ܬܪܬܝܗܝܢ ܣܟܠܘܬܗܘܢ

42. Hosea 10:11

    ܐܦܪܝܡ ܥܓܠܬܐ ܡܠܦܬܐ ܕܪܚܡܐ ܠܡܕܪܟܘ ܘܐܢܐ ܥܒܪܬ ܥܠ ܨܘܪܗ ܐܪܟܒ ܠܐܦܪܝܡ ܘܢܕܪܟ ܝܗܘܕܐ ܘܢܒܘܙ ܝܥܩܘܒ

43. Hosea 10:12

    ܙܪܘܥܘ ܠܟܘܢ ܙܕܝܩܘܬܐ ܘܚܨܘܕܘ ܦܘܡܗ ܕܛܝܒܘܬܐ ܐܢܗܪܘ ܠܟܘܢ ܫܪܓܐ ܡܛܘܠ ܕܙܒܢܐ ܗܘ ܠܡܒܥܝܗ ܠܡܪܝܐ ܥܕ ܐܬܐ ܘܡܚܘܐ ܠܟܘܢ ܙܕܝܩܘܬܗ

44. Hosea 10:13

    ܕܒܪܬܘܢ ܚܛܝܬܐ ܘܥܘܠܐ ܘܚܨܕܬܘܢ ܘܐܟܠܬܘܢ ܦܐܪܐ ܕܕܓܠܘܬܐ ܡܛܠ ܕܐܬܬܟܠܬܘܢ ܒܐܘܪܚܬܟܘܢ ܘܒܣܘܓܐܐ ܕܓܢܒܪܘܬܟܘܢ

45. Hosea 10:14

    ܢܩܘܡ ܐܒܕܢܐ ܒܥܡܟ ܘܟܠܗܘܢ ܟܪܟܝܟ ܢܬܒܙܘܢ ܐܝܟ ܒܙܬܐ ܕܫܠܡܐ ܡܢ ܒܝܬ ܐܝܠ ܒܝܘܡܐ ܕܩܪܒܐ ܐܡܐ ܥܠ ܒܢܝܗ ܫܩܦܘ

46. Hosea 10:15

    ܗܟܢܐ ܥܒܕܘ ܠܟܘܢ ܒܝܬ ܐܝܠ ܡܢ ܩܕܡ ܒܝܫܘܬ ܒܝܫܘܬܟܘܢ ܒܫܦܪܐ ܬܘܪ ܘܒܗܬ ܡܠܟܐ ܕܐܝܣܪܝܠ

47. Hosea 11:1

    ܡܛܠ ܕܟܕ ܛܠܐ ܗܘܐ ܐܝܣܪܝܠ ܪܚܡܬܗ ܘܡܢ ܡܨܪܝܢ ܩܪܝܬܗ ܒܪܝ

48. Hosea 11:2

    ܐܝܟ ܕܩܪܘ ܐܢܘܢ ܗܟܢܐ ܐܙܠܘ ܡܢ ܩܕܡܝ ܘܠܒܥܠܐ ܕܒܚܘ ܘܠܓܠܝܦܐ ܣܡܘ ܒܣܡܐ

49. Hosea 11:3

    ܘܐܢܐ ܕܒܪܬ ܠܐܦܪܝܡ ܘܩܒܠܬ ܐܢܘܢ ܥܠ ܕܪܥܝ ܘܠܐ ܝܕܥܘ ܕܐܣܝܬ ܐܢܘܢ

50. Hosea 11:4

    ܒܚܒܠܐ ܕܒܢܝ ܐܢܫܐ ܢܓܕܬ ܐܢܘܢ ܘܒܫܫܠܬܐ ܕܪܚܡܬܐ ܘܗܘܝܬ ܠܗܘܢ ܐܝܟ ܗܘ ܕܡܪܝܡ ܢܝܪܐ ܡܢ ܩܕܠܗܘܢ ܘܐܪܟܢܬ ܠܗܘܢ ܘܐܟܠܘ

51. Hosea 11:5

    ܠܐ ܢܗܦܟܘܢ ܠܐܪܥܐ ܕܡܨܪܝܢ ܘܐܬܘܪܝܐ ܗܘ ܡܠܟܗܘܢ ܡܛܠ ܕܠܐ ܨܒܘ ܠܡܗܦܟ

52. Hosea 11:6

    ܢܬܟܪܗ ܣܝܦܐ ܒܡܕܝܢܬܗܘܢ ܘܢܬܛܠܩ ܡܢ ܐܝܕܝܗܘܢ ܘܢܐܟܠܘܢ ܡܢ ܬܪܥܝܬܗܘܢ

53. Hosea 11:7

    ܘܥܡܝ ܬܠܝܢ ܠܡܬܒ ܠܘܬܝ ܘܠܐܠܗܐ ܢܩܪܘܢ ܘܢܪܢܐ ܐܝܟ ܚܕܐ ܘܠܐ ܢܬܬܪܝܡ

54. Hosea 11:8

    ܐܝܟܢܐ ܐܣܝܥܟ ܐܦܪܝܡ ܐܘ ܐܝܟܢܐ ܐܥܕܪܟ ܐܝܣܪܝܠ ܐܘ ܐܝܟܢܐ ܐܥܒܕܟ ܐܝܟ ܐܕܡܐ ܐܘ ܐܝܟ ܨܒܘܐܝܡ ܐܬܗܦܟ ܠܒܝ ܘܓܠܘ ܪܚܡܝ

55. Hosea 11:9

    ܠܐ ܐܥܒܕ ܚܡܬܐ ܕܪܘܓܙܝ ܘܠܐ ܐܗܦܘܟ ܠܡܚܒܠܘܬܗ ܠܐܦܪܝܡ ܡܛܠ ܕܐܠܗܐ ܐܢܐ ܘܠܐ ܗܘܝܬ ܒܪܢܫܐ ܒܝܢܬܟܘܢ ܩܕܝܫܐ ܐܢܐ ܘܠܐ ܐܥܘܠ ܠܡܕܝܢܬܐ

56. Hosea 11:10

    ܒܬܪ ܡܪܝܐ ܢܐܙܠܘܢ ܐܝܟ ܐܪܝܐ ܕܢܗܡ ܡܛܠ ܕܗܘ ܢܢܗܡ ܘܢܙܘܥܘܢ ܒܢܝܐ ܡܢ ܥܡܐ

57. Hosea 11:11

    ܘܢܕܘܠܘܢ ܐܝܟ ܛܝܪܐ ܡܢ ܡܨܪܝܢ ܘܐܝܟ ܝܘܢܐ ܡܢ ܐܪܥܐ ܕܐܬܘܪ ܘܐܗܦܟ ܐܢܘܢ ܠܝܬܒܗܘܢ ܐܡܪ ܡܪܝܐ

58. Hosea 12:1

    ܚܕܪܢܝ ܒܕܓܠܘܬܐ ܐܦܪܝܡ ܘܒܝܬ ܐܝܣܪܐܝܠ ܘܝܗܘܕܐ ܒܢܟܠܐ ܥܕܡܐ ܕܢܚܬ ܥܡܗ ܕܐܠܗܐ ܥܡܐ ܩܕܝܫܐ ܘܡܗܝܡܢܐ

59. Hosea 12:2

    ܐܦܪܝܡ ܪܥܐ ܪܘܚܐ ܘܪܕܦ ܥܠܥܠܐ ܝܘܡܐ ܟܠܗ ܕܓܠܘܬܐ ܘܒܙܬܐ ܐܣܓܝܘ ܘܕܝܬܩܐ ܥܡ ܐܬܘܪܝܐ ܦܣܩܘ ܘܡܫܚܐ ܠܡܨܪܝܢ ܐܘܒܠܘ

60. Hosea 12:3

    ܘܕܝܢܐ ܐܝܬ ܠܡܪܝܐ ܥܡ ܝܗܘܕܐ ܘܢܬܒܥ ܠܝܥܩܘܒ ܐܝܟ ܐܘܪܚܬܗ ܘܐܝܟ ܨܢܥܬܗ ܢܦܪܥܝܘܗܝ

61. Hosea 12:4

    ܒܡܪܒܥܐ ܓܝܪ ܢܟܠ ܠܐܚܘܗܝ ܘܒܥܘܫܢܗ ܐܬܪܘܪܒ ܩܕܡ ܐܠܗܐ

62. Hosea 12:5

    ܘܐܬܡܨܝ ܚܝܠ ܡܠܐܟܐ ܘܒܥܐ ܡܢܗ ܒܝܬ ܐܝܠ ܐܫܟܚܗ ܘܬܡܢ ܡܠܠ ܥܡܗ

63. Hosea 12:6

    ܘܡܪܝܐ ܐܠܗܐ ܚܝܠܬܢܐ ܐܬܕܟܪܗ

64. Hosea 12:7

    ܐܢܬ ܕܝܢ ܐܬܦܢܝ ܠܘܬ ܐܠܗܟ ܘܛܝܒܘܬܐ ܘܕܝܢܐ ܛܪ ܣܟܐ ܠܐܠܗܟ ܐܡܝܢܐܝܬ

65. Hosea 12:8

    ܡܣܐܬܐ ܕܢܟܠܐ ܒܐܝܕܗ ܕܟܢܥܢ ܘܠܡܛܠܡ ܪܚܡ

66. Hosea 12:9

    ܘܐܡܪ ܐܦܪܝܡ ܕܥܬܪܬ ܘܐܫܟܚܬ ܠܝ ܟܐܒܐ ܘܟܠܗ ܠܐܘܬܝ ܠܐ ܣܦܩܐ ܠܝ ܠܚܛܗܐ ܕܚܛܝܬ

67. Hosea 12:10

    ܐܢܐ ܐܢܐ ܡܪܝܐ ܐܠܗܟ ܕܐܣܩܬܟ ܡܢ ܐܪܥܐ ܕܡܨܪܝܢ ܬܘܒ ܐܘܬܒܟ ܒܡܫܟܢܐ ܐܝܟ ܝܘܡܬܐ ܕܥܕܥܐܕܐ

68. Hosea 12:11

    ܘܡܠܠܬ ܥܡ ܢܒܝܐ ܘܐܢܐ ܚܙܘܢܝ ܐܣܓܝܬ ܘܒܐܝܕܐ ܕܢܒܝܐ ܐܬܕܡܝܬ

69. Hosea 12:12

    ܒܓܠܥܕ ܟܐܒܐ ܘܒܓܠܓܠܐ ܠܣܪܝܩܘܬܐ ܕܒܚܬܘܢ ܬܘܪܐ ܐܦ ܡܕܒܚܝܟܘܢ ܐܝܟ ܓܠܐ ܒܚܩܠܐ ܕܐܪܥܐ ܒܝܪܬܐ

70. Hosea 12:13

    ܘܥܪܩ ܝܥܩܘܒ ܠܐܪܥܐ ܕܐܪܡ ܘܦܠܚ ܐܝܣܪܝܠ ܚܠܦ ܐܢܬܬܐ ܘܥܠ ܐܦܝ ܐܢܬܬܐ ܢܛܪ

71. Hosea 12:14

    ܘܒܢܒܝܐ ܐܣܩ ܡܪܝܐ ܠܐܝܣܪܝܠ ܡܢ ܡܨܪܝܢ ܘܒܢܒܝܐ ܐܬܢܛܪ

72. Hosea 12:15

    ܐܪܓܙ ܐܦܪܝܡ ܘܡܪܡܪ ܘܕܡܗ ܥܠܘܗܝ ܢܬܐܫܕ ܘܚܣܕܗ ܢܦܢܐ ܠܗ ܡܪܗ

73. Hosea 13:1

    ܟܕ ܡܡܠܠ ܐܦܪܝܡ ܪܐܬ ܗܘܐ ܘܗܘܐ ܪܒܐ ܒܐܝܣܪܝܠ ܘܐܬܚܝܒ ܒܒܥܠܐ ܘܡܝܬ

74. Hosea 13:2

    ܘܗܫܐ ܐܘܣܦܘ ܠܡܚܛܐ ܘܥܒܕܘ ܠܗܘܢ ܢܣܝܟܐ ܡܢ ܣܐܡܗܘܢ ܒܕܡܘܬܗܘܢ ܦܬܟܪܐ ܥܒܕܐ ܕܢܓܪܐ ܘܐܡܪܝܢ ܗܘܘ ܠܗܘܢ ܕܒܚܝ ܒܢܝ ܐܢܫܐ ܘܠܥܓܠܐ ܡܢܫܩܝܢ

75. Hosea 13:3

    ܡܛܠ ܗܢܐ ܢܗܘܘܢ ܐܝܟ ܥܢܢܐ ܕܨܦܪܐ ܘܐܝܟ ܛܠܐ ܕܡܩܕܡ ܘܥܒܪ ܘܐܝܟ ܓܠܐ ܕܦܪܚ ܡܢ ܐܕܪܐ ܘܐܝܟ ܬܢܢܐ ܡܢ ܟܘܬܐ

76. Hosea 13:4

    ܐܢܐ ܐܢܐ ܡܪܝܐ ܐܠܗܟ ܕܐܣܩܬܟ ܡܢ ܐܪܥܐ ܕܡܨܪܝܢ ܐܠܗ ܠܒܪ ܡܢܝ ܠܐ ܬܕܥ ܘܠܝܬ ܕܦܪܩ ܐܠܐ ܐܢܐ

77. Hosea 13:5

    ܐܢܐ ܪܥܝܬܟ ܒܡܕܒܪܐ ܒܐܪܥܐ ܚܪܒܬܐ ܕܠܐ ܝܬܒܐ

78. Hosea 13:6

    ܘܪܥܝܬ ܐܢܘܢ ܘܡܠܘ ܟܪܣܗܘܢ ܘܐܬܬܪܝܡ ܠܒܗܘܢ ܡܛܠ ܗܢܐ ܛܥܐܘܢܝ

79. Hosea 13:7

    ܘܗܘܝܬ ܠܗܘܢ ܐܝܟ ܐܪܝܐ ܘܐܝܟ ܢܡܪܐ ܒܐܘܪܚܐ ܕܐܬܘܪ

80. Hosea 13:8

    ܐܦܓܥ ܒܗܘܢ ܐܝܟ ܕܒܐ ܕܬܒܪܐ ܘܐܒܙܘܥ ܡܩܪܡܐ ܕܠܒܗܘܢ ܘܢܐܟܘܠ ܐܢܘܢ ܬܡܢ ܐܪܝܐ ܘܚܝܘܬ ܒܪܐ ܬܦܪܬ ܐܢܘܢ

81. Hosea 13:9

    ܚܒܠܬܟ ܐܝܣܪܐܝܠ ܡܢܘ ܢܥܕܪܟ

82. Hosea 13:10

    ܐܝܟܘ ܗܟܝܠ ܡܠܟܟ ܢܦܪܩܟ ܘܠܟܘܠܗܝܢ ܡܕܝܢܬܟ ܘܕܝܢܟ ܕܫܐܠܬܢܝ ܘܐܡܪܬ ܗܒ ܠܝ ܡܠܟܐ ܘܫܠܝܛܐ

83. Hosea 13:11

    ܘܝܗܒܬ ܠܟ ܡܠܟܐ ܒܪܘܓܙܝ ܘܢܣܒܬܗ ܒܚܡܬܝ

84. Hosea 13:12

    ܨܪܝܪ ܥܘܠܗ ܕܐܦܪܝܡ ܘܡܛܫܝܐ ܚܛܝܬܗ

85. Hosea 13:13

    ܚܒܠܐ ܐܝܟ ܕܝܠܕܬܐ ܢܐܬܘܢ ܥܠܘܗܝ ܡܛܠ ܕܒܪܐ ܗܘ ܕܠܐ ܚܟܝܡ ܡܟܝܠ ܠܐ ܢܩܘܡ ܒܚܒܠܐ ܕܒܢܝܐ

86. Hosea 13:14

    ܡܢ ܝܕ ܫܝܘܠ ܐܦܪܘܩ ܐܢܘܢ ܘܡܢ ܡܘܬܐ ܐܦܨܐ ܐܢܘܢ ܐܝܟܐ ܗܝ ܗܟܝܠ ܙܟܘܬܟ ܡܘܬܐ ܐܘ ܐܝܟܘ ܥܘܩܣܟܝ ܫܝܘܠ ܒܘܝܐܐ ܛܫܐ ܡܢ ܥܝܢܝ

87. Hosea 13:15

    ܡܛܠ ܕܗܘ ܒܝܬ ܐܚܐ ܢܦܪܘܫ ܬܐܬܐ ܡܕܢܚܐ ܪܘܚܗ ܕܡܪܝܐ ܡܢ ܡܕܒܪܐ ܬܣܩ ܘܬܚܪܒ ܡܥܝܢܘܗܝ ܘܬܘܒܫ ܡܒܘܥܘܗܝ ܘܗܘ ܢܒܘܙ ܓܙܐ ܕܟܠ ܡܐܢܐ ܕܪܓܬܐ

88. Hosea 14:1

    ܬܬܚܝܒ ܫܡܪܝܢ ܥܠ ܕܡܪܡܪܬ ܠܐܠܗܗ ܒܚܪܒܐ ܢܦܠܘܢ ܘܝܠܘܕܝܗܘܢ ܢܫܬܩܦܘܢ ܘܒܛܢܬܗܘܢ ܢܬܦܪܬܢ

89. Hosea 14:2

    ܐܬܦܢܝ ܐܝܣܪܝܠ ܠܘܬ ܡܪܝܐ ܐܠܗܟ ܡܛܠ ܕܐܬܬܩܠܬ ܒܥܘܠܟ

90. Hosea 14:3

    ܣܒܘ ܥܠܝܟܘܢ ܡܠܐ ܘܐܬܦܢܘ ܠܘܬ ܡܪܝܐ ܐܠܗܟܘܢ ܘܐܡܪܘ ܠܗ ܕܢܫܒܘܩ ܠܟܘܢ ܥܘܠܟܘܢ ܘܩܒܠܘ ܛܒܬܐ ܘܢܦܪܘܥܟܘܢ ܦܐܪܐ ܕܣܦܘܬܟܘܢ

91. Hosea 14:4

    ܘܐܡܪܘ ܐܬܘܪܝܐ ܠܐ ܢܦܪܩܢ ܘܥܠ ܪܟܫܐ ܠܐ ܢܪܟܒ ܘܠܐ ܢܩܪܐ ܬܘܒ ܐܠܗܐ ܠܥܒܕ ܐܝܕܝܢ ܡܛܠ ܕܐܢܬ ܡܪܚܡ ܐܢܬ ܥܠ ܝܬܡܐ

92. Hosea 14:5

    ܐܣܐ ܬܝܒܘܬܗܘܢ ܘܐܪܚܡ ܢܕܪܝܗܘܢ ܘܢܗܦܘܟ ܪܘܓܙܝ ܡܢܗܘܢ

93. Hosea 14:6

    ܘܐܗܘܐ ܐܝܟ ܛܠܐ ܠܐܝܣܪܝܠ ܘܢܦܪܥ ܐܝܟ ܫܘܫܢܬܐ ܘܢܪܡܐ ܥܩܪܘܗܝ ܐܝܟ ܕܠܒܢܢ

94. Hosea 14:7

    ܘܢܫܘܚܘܢ ܥܘܦܘܗܝ ܘܢܗܘܐ ܐܝܟ ܙܝܬܐ ܕܗܕܝܪ ܒܦܐܪܘܗܝ ܘܪܝܚܗ ܐܝܟ ܕܠܒܢܢ

95. Hosea 14:8

    ܢܬܒܢܘܢ ܘܢܬܒܘܢ ܒܛܠܠܗ ܘܢܚܘܢ ܡܢ ܥܒܘܪܐ ܘܢܦܪܥܘܢ ܐܝܟ ܓܦܬܐ ܘܕܘܟܪܢܗܘܢ ܐܝܟ ܚܡܪܐ ܕܠܒܢܢ

96. Hosea 14:9

    ܘܢܐܡܪ ܐܦܪܝܡ ܡܐ ܠܝ ܬܘܒ ܘܠܦܬܟܪܐ ܐܢܐ ܡܟܟܬܗ ܘܐܢܐ ܐܫܒܚܝܘܗܝ ܐܝܟ ܩܛܪܩܐ ܥܒܝܛܐ ܘܡܢܝ ܐܫܬܟܚܘ ܦܐܪܝܟܝ

97. Hosea 14:10

    ܡܢܘ ܕܚܟܝܡ ܢܣܬܟܠ ܗܠܝܢ ܘܕܡܬܒܝܢ ܢܫܬܘܕܥ ܐܢܝܢ ܕܬܪܝܨܢ ܐܘܪܚܬܗ ܕܡܪܝܐ ܘܙܕܝܩܐ ܡܗܠܟܝܢ ܒܗܝܢ ܘܥܘܠܐ ܡܬܬܩܠܝܢ ܒܗܝܢ

← Previous — showing 101–197 of 197

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.