← All works
Peshitta Genesis Peshitta (Syriac Old Testament) · 1,533 sections
Single column Two columns
Genesis 26:8 ܘܗܘܐ ܕܟܕ ܢܓ̣ܪܘ ܠܗ ܬܡܢ ܝܘܡ̈ܬܐ . ܐܕܝܩ ܐܒܝܡܠܟ ܡ̇ܠܟܐ ܕܦܠܫܬ̈ܝܐ ܡܢ ܟܘܬܐ . ܘܚܙܝܗܝ ܠܐܝܣܚܩ ܟܕ ܡܓܚܟ ܥܡ ܪܦܩܐ ܐܢܬܬܗ .
Genesis 26:9 ܘܩ̣ܪܐ ܐܒܝܡܠܟ ܠܐܝܣܚܩ ܘܐܡ̣ܪ ܠܗ . ܗܐ ܐܢܬܬܟ ܗܝ . ܐܝܟܢܐ ܐܡ̇ܪ ܗܘܝ̣ܬ ܕܚܬܝ ܗܝ . ܐܡ̇ܪ ܠܗ ܐܝܣܚܩ . ܡܛܠ ܕܐܡ̇ܪܬ ܕܠܡܐ ܐܡܘܬ ܡܛܠܬܗ̇ .
Genesis 26:10 ܐܡ̇ܪ ܠܗ ܐܒܝܡܠܟ . ܡܢܘ ܗܢܐ ܕܥܒ̣ܕܬ ܠܢ . ܥܕ ܩܠܝܠ ܕܡ̇ܟ ܗܘ̣ܐ ܚܕ ܡܢ ܥܡܐ ܥܡ ܐܢܬܬܟ . ܘܡ̇ܝܬܐ ܗܘܝ̣ܬ ܥܠܝܢ ܚܛܗܐ .
Genesis 26:11 ܘܦܩ̇ܕ ܐܒܝܡܠܟ ܠܟܠܗ ܥܡܐ ܘܐܡ̣ܪ . ܡ̇ܢ ܕܡ̇ܗܪ ܠܓܒܪܐ ܗܢܐ ܘܠܐܢܬܬܗ ܡܬܩܛܠܘ ܢܬܩܛܠ .
Genesis 26:12 ܘܙܪܥ̣ ܐܝܣܚܩ ܒܐܪܥܐ . ܘܐܫܟܚ ܒܫܢܬܐ ܗ̇ܝ ܡܐܐ ܕܣܥܪ̈ܐ . ܘܒܪܟܗ ܡܪܝܐ .
Genesis 26:13 ܘܝܪ̣ܒ ܓܒܪܐ . ܘܐܙ̇ܠ ܡܐܙܠ ܥܕܡܐ ܕܝܪ̣ܒ ܛܒ .
Genesis 26:14 ܘܗܘ̣ܐ ܠܗ ܩܢܝܢܐ ܕܥܢܐ . ܘܩܢܝܢܐ ܕܬܘܪ̈ܐ ܘܥܒܕܬܐ ܪܒܬܐ . ܘܛܢܘ ܒܗ ܦܠܫܬ̈ܝܐ .
Genesis 26:15 ܘܟܠܗܝܢ ܒܪ̈ܐ ܕܚܦܪܘ ܥܒ̈ܕܝ ܐܒܘܗܝ . ܒܝ̈ܘܡܘܗܝ ܕܐܒܪܗܡ ܐܒܘܗܝ . ܛܡܡܘ ܐ̈ܢܝܢ ܦܠܫ̈ܬܝܐ . ܘܡܠܘ ܐ̈ܢܝܢ ܥܦܪܐ .
Genesis 26:16 ܘܐܡ̣ܪ ܐܒܝܡܠܟ ܠܐܝܣܚܩ . ܙܠ ܠܟ ܡܢ ܠܘܬܢ . ܡܛܠ ܕܥܫ̣ܢܬ ܡܢܢ ܛܒ .
Genesis 26:17 ܘܐܙ̣ܠ ܡܢ ܬܡܢ ܐܝܣܚܩ . ܘܫ̣ܪܐ ܒܢܚܠܐ ܕܓܕܪ . ܘܝܬ̣ܒ ܬܡܢ .
Genesis 26:18 ܘܗ̣ܦܟ ܐܝܣܚܩ ܘܚܦ̣ܪ ܒܪ̈ܐ ܕܡ̈ܝܐ . ܕܚܦܪܘ ܥܒ̣̈ܕܝ ܐܒܘܗܝ . ܒܝ̈ܘܡܘܗܝ ܕܐܒܪܗܡ ܐܒܘܗܝ . ܘܛܡܡܘ ܐܢܝ̈ܢ ܦܠܫ̈ܬܝܐ . ܡܢ ܒܬܪ ܕܡܝܬ ܐܒܪܗܡ . ܘܩ̣ܪܐ ܠܗܝܢ ܫ̈ܡܗܐ ܐܝܟ ܫܡ̈ܗܐ ܕܩ̇ܪܐ ܗܘܐ ܠܗܝܢ ܐܒܘܗܝ .
Genesis 26:19 ܘܚܦܪܘ ܥܒ̈ܕܘܗܝ ܕܐܝܣܚܩ ܒܢܚܠܐ . ܘܐܫܟܚܘ ܬܡܢ ܒܪܐ ܕܡ̈ܝܐ ܚ̈ܝܐ .
Genesis 26:20 ܘܢܨܘ ܪ̈ܥܘܬܐ ܕܓܕܪ ܥܡ ܪ̈ܥܘܬܐ ܕܐܝܣܚܩ ܘܐܡܪܘ . ܕܝܠܢ ܐܢܘܢ ܡ̈ܝܐ . ܘܩ̣ܪܐ ܫܡܗ̇ ܕܒܪܐ ܥܣܩܐ . ܡܛܠ ܕܐܬܥܣܩܘ ܥܡܗ .
Genesis 26:21 ܘܚܦܪܘ ܒܪܐ ܐܚܪܬܐ . ܘܢܨܘ ܐܦ ܥܠܝܗ̇ . ܘܩ̣ܪܐ ܫܡܗ̇ ܣܛܢܐ .
Genesis 26:22 ܘܫ̣ܢܝ ܡܢ ܬܡ̇ܢ . ܘܚܦܪܘ ܒܪܐ ܐܚܪܬܐ ܘܠܐ ܢܨܘ ܥܠܝܗ̇ . ܘܩ̣ܪܐ ܫܡܗ̇ ܪܚܒܘܬ . ܘܐܡ̣ܪ . ܗܫܐ ܐܪܘܚ ܠܢ ܡܪܝܐ ܘܣܓܝܢ ܒܐܪܥܐ .
Genesis 26:23 Genesis 26:24 ܘܐܬܓܠܝ ܥܠܘܗܝ ܡܪܝܐ ܒܠܠܝܐ ܗ̇ܘ ܘܐܡ̣ܪ ܠܗ . ܐܢܐ ܐܢܐ ܐܠܗܗ ܕܐܒܪܗܡ ܐܒܘܟ . ܠܐ ܬܕܚܠ ܡܛܠ ܕܥܡܟ ܐܢܐ . ܘܐܒܪܟܟ ܘܐܣܓܐ ܙܪܥܟ . ܡܛܠ ܐܒܪܗܡ ܥܒܕܝ .
Genesis 26:25 ܘܒܢ̣ܐ ܬܡ̇ܢ ܡܕܒܚܐ . ܘܩ̣ܪܐ ܒܫܡܗ ܕܡܪܝܐ . ܘܢܩ̣ܫ ܬܡܢ ܡܫܟܢܗ . ܘܚܦܪܘ ܬܡ̇ܢ ܥܒ̈ܕܘܗܝ ܕܐܝܣܚܩ ܒܪܐ .
Genesis 26:26 ܘܐܒܝܡܠܟ ܐܬ̣ܐ ܠܘܬܗ ܡܢ ܓܕܪ . ܘܐܚܙܘܬ ܪܚܡܗ ܘܦܝܟܠ ܪܒ ܚܝܠܗ .
Genesis 26:27 ܘܐܡ̣ܪ ܠܗܘܢ ܐܝܣܚܩ . ܡܢܐ ܐܬܝ̣ܬܘܢ ܠܘܬܝ . ܐܢܬܘܢ ܣܢܝܬܘܢܢܝ ܘܫܕܪܬܘܢܢܝ ܡܢ ܠܘܬܟܘܢ .
Genesis 26:28 ܘܐܡܪܘ ܠܗ . ܡܚܙܐ ܚܙܝܢ ܕܗܘܐ ܡܪܝܐ ܥܡܟ . ܘܐܡܪܢ ܕܬܗܘܐ ܡܘ̈ܡܬܐ ܒܝܢ̈ܝܢ ܘܠܟ . ܘܢܩܝܡ ܩܝܡܐ ܥܡܟ .
Genesis 26:29 ܕܠܐ ܬܥܒܕ ܠܢ ܒܝܫܬܐ . ܐܝܟܢܐ ܕܠܐ ܐܗܪܢܟ . ܘܐܝܟܢܐ ܕܥܒܕܢ ܠܘܬܟ ܫܦܝܪܬܐ ܘܫܕܪܢܟ ܒܫܠܡܐ . ܐܢܬ ܗ̣ܘ ܗܫܐ ܒܪܝܟܗ ܕܡܪܝܐ .
Genesis 26:30 ܘܥܒ̣ܕ ܠܗܘܢ ܡܫܬܝܐ . ܘܠܥܣܘ ܘܐܫܬܝܘ .
Genesis 26:31 ܘܩ̇ܕܡܘ ܒܨܦܪܐ ܘܝܡܘ ܓܒܪ ܠܐܚܘܗܝ . ܘܫܕܪ ܐܢܘܢ ܐܝܣܚܩ . ܘܐܙܠܘ ܡܢ ܠܘܬܗ ܒܫܠܡܐ .
Genesis 26:32 ܘܗܘ̣ܐ ܒܝܘܡܐ ܗ̇ܘ ܘܐܬܘ ܥܒ̣̈ܕܘܗܝ ܕܐܝܣܚܩ . ܘܚܘܝܘܗܝ ܥܠ ܨܒܘܬܐ ܕܒܪܐ ܕܚܦܪܘ . ܘܐܡܪܘ ܠܗ ܐܫܟܚܢ ܡ̈ܝܐ .
Genesis 26:33 ܘܩ̣ܪܐ ܫܡܗ̇ ܣܒܥܐ . ܡܛܠ ܗܢܐ ܩ̣ܪܐ ܫܡܗ̇ ܕܩܪܝܬܐ ܒܪܣܒܥ . ܥܕܡܐ ܠܝܘܡܢܐ .
Genesis 26:34 ܘܗܘ̣ܐ ܥܣܘ ܒܪ ܐܪ̈ܒܥܝܢ ܫ̈ܢܝܢ . ܘܢܣ̣ܒ ܐܢܬܬܐ ܠܝܗܘܕܝܬ ܒܪܬ ܒܪܝ ܚܬܝܐ . ܘܠܒܣܡܬ ܒܪܬ ܐܠܘܢ ܚܘܝܐ .
Genesis 26:35 ܘܗ̈ܘܝ ܡܡܪ̈ܢ ܠܪܘܚܗ ܕܐܝܣܚܩ ܘܕܪܦܩܐ .
Genesis 27:1 ܘܗܘ̣ܐ ܕܟܕ ܣܐܒ ܐܝܣܚܩ ܘܝܩ̣ܪ ܥܝܢ̈ܘܗܝ ܠܡܚܙܐ . ܩ̣ܪܐ ܠܥܣܘ ܒܪܗ ܪܒܐ ܘܐܡ̣ܪ ܠܗ ܒܪܝ . ܘܐܡ̣ܪ ܗܐ ܐܢܐ .
Genesis 27:2 ܘܐܡ̣ܪ ܠܗ ܐܝܣܚܩ . ܗܐ ܐܢܐ ܣܐ̇ܒܬ . ܘܠܐ ܝܕܥ̇ ܐܢܐ ܝܘܡܐ ܕܡܐܬ ܐܢܐ ܒܗ .
Genesis 27:3 ܗܫܐ ܣܒ ܡܐ̈ܢܝܟ ܣܝܦܟ ܘܩܫܬܟ . ܘܦܘܩ ܠܕܒܪܐ . ܘܨܘܕ ܨܝܕܐ .
Genesis 27:4 ܘܥܒ̣ܕ ܒܘܫܠܐ ܐܝܟ ܕܪܚ̇ܡܬ . ܘܐܝܬܐ ܠܝ ܐܟܘܠ . ܡܛܠ ܕܬܒܪܟܟ ܢܦܫܝ ܥܕܠܐ ܐܡܘܬ .
Genesis 27:5 ܘܪܦܩܐ ܫܡܥ̣ܬ ܟܕ ܐܡ̣ܪ ܐܝܣܚܩ ܠܥܣܘ ܒܪܗ . ܘܐܙ̣ܠ ܥܣܘ ܠܚܩܠܐ ܠܡܨܕ ܨܝܕܐ ܠܡܝܬܝܘ .
Genesis 27:6 ܘܪܦܩܐ ܐܡ̣ܪܬ ܠܝܥܩܘܒ ܒܪܗ̇ . ܗܐ ܫܡ̇ܥܬ ܠܐܒܘܟ ܕܐܡ̣ܪ ܠܥܣܘ ܐܚܘܟ .
Genesis 27:7 ܐܝܬܐ ܠܝ ܨܝܕܐ ܘܥܒ̣ܕ ܠܝ ܒܘܫܠܐ . ܘܐܟܘܠ ܘܐܒܪܟܟ ܩܕܡ ܡܪܝܐ ܩܕܡ ܡܘܬܝ .
Genesis 27:8 ܗܫܐ ܒܪܝ ܫܡ̣ܥ ܒܩܠܝ ܠܡܕܡ ܕܡܦܩܕܐ ܐܢܐ ܠܟ .
Genesis 27:9 ܙܠ ܠܥܢܐ ܘܣܒ ܠܝ ܡܢ ܬܡܢ ܬܪ̈ܝܢ ܓܕ̈ܝܐ ܕܥܙ̈ܐ ܕܛܒܝ̈ܢ . ܘܐܥܒܕ ܐܢܘܢ ܒܘܫܠܐ ܠܐܒܘܟ ܐܝܟ ܕܪܚ̇ܡ .
Genesis 27:10 ܘܐܥܠ ܠܐܒܘܟ ܘܢܐܟܘܠ . ܘܢܒܪܟܟ ܩܕܡ ܡܪܝܐ ܡܢ ܩܕܡ ܡܘܬܗ .
Genesis 27:11 ܘܐܡ̣ܪ ܝܥܩܘܒ ܠܪܦܩܐ ܐܡܗ . ܗܐ ܥܣܘ ܐܚܝ ܓܒܪ ܣܥܪ . ܘܐܢܐ ܓܒܪ ܫܥܥ .
Genesis 27:12 ܕܠܡܐ ܢܡܘܫܢܝ ܐܒܝ ܘܐܗܘܐ ܒܥܝܢ̈ܘܗܝ ܐܝܟ ܡܒܙܚܢܐ . ܘܬܝܬܝܢ ܥܠܝ ܠܘ̈ܛܬܐ ܘܠܐ ܒܘܪ̈ܟܬܐ .
Genesis 27:13 ܘܐܡ̣ܪܬ ܠܗ ܐܡܗ . ܥܠܝ ܠܘ̈ܛܬܟ ܒܪܝ . ܒܠܚܘܕ ܫܡܥ ܒܩܠܝ ܘܙܠ ܣܒ ܠܝ .
Genesis 27:14 ܘܐܙܠ ܢܣ̣ܒ ܘܐܝܬܝ ܠܐܡܗ . ܘܥܒ̣ܕܬ ܐܡܗ ܒܘܫܠܐ ܐܝܟܢܐ ܕܪܚ̇ܡ ܐܒܘܗܝ .
Genesis 27:15 ܘܢܣ̣ܒܬ ܪܦܩܐ ܡܐ̈ܢܐ ܕܥܣܘ ܒܪܗ̇ ܪܒܐ . ܐܪ̈ܓܝܓܐ ܕܐܝܬ ܥܡܗ̇ ܒܒܝܬܐ . ܘܐܠܒ̣ܫܬ ܠܝܥܩܘܒ ܒܪܗ̇ ܙܥܘܪܐ .
Genesis 27:16 ܘܡܫ̈ܟܐ ܕܓ̈ܕܝܐ ܕܥܙ̈ܐ . ܐܠܒ̣ܫܬ ܥܠ ܐ̈ܝܕܘܗܝ ܘܥܠ ܫܥܥܘܬܐ ܕܨܘܪܗ .
Genesis 27:17 ܘܝܗ̣ܒܬ ܒܘܫܠܐ ܘܠܚܡܐ . ܕܥܒ̣ܕܬ ܠܝܥܩܘܒ ܒܪܗ̇ .
Genesis 27:18 ܘܐܥܠ ܠܐܒܘܗܝ ܘܐܡ̣ܪ ܐܒܝ . ܘܐܡ̣ܪ . ܗܐ ܐܢܐ . ܘܐܡ̣ܪ . ܡ̇ܢ ܐܢܬ ܒܪܝ .
Genesis 27:19 ܘܐܡ̣ܪ ܝܥܩܘܒ ܠܐܒܘܗܝ . ܐܢܐ ܗ̣ܘ ܒܪܟ ܒܘܟܪܟ ܥܣܘ . ܥܒ̇ܕܬ ܐܝܟ ܕܐܡ̣ܪܬ ܠܝ . ܩܘܡ ܬܒ ܘܐܟܘܠ ܡܢ ܨܝܕܝ . ܡܛܠ ܕܬܒܪܟܢܝ ܢܦܫܟ .
Genesis 27:20 ܘܐܡ̣ܪ ܐܝܣܚܩ ܠܒܪܗ . ܡܢܘ ܗܢܐ ܕܒܥܓܠ ܐܫܟܚܬ ܒܪܝ . ܘܐܡ̣ܪ . ܡܕܡ ܕܛܝܒ ܡܪܝܐ ܐܠܗܟ ܩܕܡܝ .
Genesis 27:21 ܘܐܡ̣ܪ ܐܝܣܚܩ ܠܝܥܩܘܒ ܒܪܗ . ܩܪܘܒ ܢܐ ܐܡ̇ܘܫܟ ܒܪܝ . ܐܢ ܐܢܬ ܗ̣ܘ ܒܪܝ ܥܣܘ ܐܘ ܠܐ .
Genesis 27:22 ܘܩ̣ܪܒ ܝܥܩܘܒ ܠܘܬ ܐܝܣܚܩ ܐܒܘܗܝ ܘܡܫܗ . ܘܐܡ̣ܪ ܩܠܐ ܕܝܥܩܘܒ ܘܓܫ̣ܬ ܐ̈ܝܕܝܐ ܕܥܣܘ .
Genesis 27:23 ܘܠܐ ܐܫܬܘܕܥܗ . ܡܛܠ ܕܗ̈ܘܝ ܐܝ̈ܕܘܗܝ ܐܝܟ ܐ̈ܝܕܝ ܥܣܘ ܐܚܘܗܝ ܣܥܪ̈ܢ ܘܒܪܟܗ .
Genesis 27:24 ܘܐܡ̣ܪ ܐܢܬ ܗ̣ܘ ܗܢܐ ܒܪܝ ܥܣܘ . ܘܐܡ̣ܪ ܐܢܐ ܗܘ .
Genesis 27:25 ܘܐܡ̣ܪ ܠܗ . ܩ̇ܪܒ ܠܝ ܐܟܘܠ ܡܢ ܨܝܕܐ ܕܒܪܝ . ܡܛܠ ܕܬܒܪܟܟ ܢܦܫܝ . ܘܩ̇ܪܒ ܠܗ ܘܠܥܣ . ܘܐܥܠ ܠܗ ܚܡܪܐ ܘܐܫܬܝ .
Genesis 27:26 ܘܐܡ̣ܪ ܠܗ ܐܝܣܚܩ ܐܒܘܗܝ . ܩܪܘܒ ܘܫܘܩܝܢܝ ܒܪܝ .
Genesis 27:27 ܘܩ̣ܪܒ ܘܢܫ̣ܩܗ . ܘܐܪܝܚ ܪܝܚܐ ܕܡܐ̈ܢܘܗܝ . ܘܒܪܟܗ ܘܐܡ̣ܪ . ܚܙܘ ܪܝܚܗ ܕܒܪܝ . ܐܝܟ ܪܝܚܐ ܕܚܩ̣ܠܐ ܕܒܪܟܗ̇ ܡܪܝܐ .
Genesis 27:28 ܢܬܠ ܠܟ ܐܠܗܐ ܡܢ ܛܠܐ ܕܫܡܝܐ ܘܡܢ ܫܘܡܢܗ̇ ܕܐܪܥܐ . ܘܣܘܓܐܐ ܕܥܒܘܪܐ ܘܕܚܡܪܐ .
Genesis 27:29 ܢܦܠܚܘܢܟ ܥܡ̈ܡܐ ܘܢܣ̈ܓܕܢ ܠܟ ܐ̈ܡܘܬܐ . ܗܘܝ ܪܫܐ ܠܐ̈ܚܝܟ . ܘܢܣܓܕܘܢ ܠܟ ܒܢ̈ܝ ܐܡܟ . ܠܝܛܝ̈ܟ ܠܝ̈ܛܝܢ ܘܒܪ̈ܟܝܟ ܒܪ̈ܝܟܝܢ .
Genesis 27:30 ܘܟܕ ܫ̇ܠܡ ܐܝܣܚܩ ܠܡܒܪܟܘܬܗ ܠܝܥܩܘܒ . ܘܢܦ̣ܩ ܝܥܩܘܒ ܡܢ ܠܘܬ ܐܝܣܚܩ ܐܒܘܗܝ . ܘܗܐ ܥܣܘ ܐܚܘܗܝ ܐܬܐ ܡܢ ܨܝܕܗ .
Genesis 27:31 ܘܥܒ̣ܕ ܐܦ ܗ̣ܘ ܒܘܫܠܐ . ܘܐܥܠ ܠܐܒܘܗܝ . ܘܐܡ̣ܪ ܠܐܒܘܗܝ . ܢܩܘܡ ܐܒܝ ܘܢܠܥܣ ܡܢ ܨܝ̣ܕܐ ܕܒܪܗ . ܡܛܠ ܕܬܒܪܟܢܝ ܢܦܫܟ .
Genesis 27:32 ܐܡ̇ܪ ܠܗ ܐܝܣܚܩ ܐܒܘܗܝ . ܡ̇ܢ ܐܢܬ . ܘܐܡ̣ܪ . ܐܢܐ ܗܘ ܒܪܟ ܒܘܟܪܟ ܥܣܘ .
Genesis 27:33 ܘܬܘܗ̇ ܐܝܣܚܩ ܬܘܗܬܐ ܪܒܬܐ ܘܥܫܝܢܬܐ ܕܛܒ . ܘܐܡ̣ܪ ܡܢܘ ܟܝ ܗ̇ܘ ܕܨܕ ܨܝܕܐ ܘܐܝܬܝ ܠܝ . ܘܠܥܣ̇ܬ ܡܢ ܟܠ ܥܕܠܐ ܬܐܬܐ . ܘܒܪܟܬܗ ܘܐܦ ܒܪܝܟ ܢܗܘܐ .
Genesis 27:34 ܘܟܕ ܫܡܥ̣ ܥܣܘ ܡ̈ܠܘܗܝ ܕܐܒܘܗܝ . ܐܝܠܠ ܐܝܠܠܬܐ ܪܒܬܐ ܘܡܪܝܪܬܐ ܕܛܒ . ܘܐܡ̣ܪ ܠܐܒܘܗܝ . ܒܪܟܝܢܝ ܐܦ ܠܝ ܐܒܝ .
Genesis 27:35 ܐܡ̇ܪ ܠܗ ܐܒܘܗܝ . ܥܠ ܐܚܘܟ ܒܢܟܠܐ ܘܩ̇ܒܠ ܐܢܝ̈ܢ ܒܘܪ̈ܟܬܟ .
Genesis 27:36 ܘܐܡ̣ܪ ܥܣܘ . ܫܪܝܪܐܝܬ ܐܬܩܪܝ ܫܡܗ ܝܥܩܘܒ . ܕܢܟܠܢܝ ܗܐ ܬܪ̈ܬܝܢ ܙܒ̈ܢܝܢ . ܒܘܟܪܘܬܝ ܢܣ̣ܒ . ܘܗܫܐ ܗܐ ܩ̇ܒܠ ܒܘܪ̈ܟܬܝ . ܘܐܡ̣ܪ ܥܣܘ ܠܐܒܘܗܝ . ܠܝ ܠܐ ܫܒ̣ܩܬ ܒܘܪܟܬܐ .
Genesis 27:37 ܥܢ̣ܐ ܐܝܣܚܩ ܘܐܡ̣ܪ ܠܥܣܘ . ܗܐ ܪܫܐ ܥܒܕܬܗ ܠܟ . ܐܦ ܟܠܗܘܢ ܐ̈ܚܘܗܝ ܝܗ̇ܒܬ ܠܗ ܥܒ̈ܕܐ . ܘܒܥܒܘܪܐ ܘܒܚܡܪܐ ܣܡܟܬܗ . ܘܠܟ ܗܟܝܠ ܡܢܐ ܐܥܒܕ ܒܪܝ .
Genesis 27:38 ܘܐܡ̣ܪ ܥܣܘ ܠܐܒܘܗܝ . ܒܘܪܟܬܐ ܚܕܐ ܗܝ ܠܟ ܐܒܝ . ܒܪܟܝܢܝ ܐܦ ܠܝ ܐܒܝ . ܘܐܪܝܡ ܥܣܘ ܩܠܗ ܘܒܟ̣ܐ .
Genesis 27:39 ܥܢ̣ܐ ܐܝܣܚܩ ܐܒܘܗܝ ܘܐܡ̣ܪ ܠܗ . ܗܐ ܒܫܘܡܢܗ̇ ܕܐܪܥܐ ܢܗܘܐ ܡܘܬܒܟ . ܘܡܢ ܛܠܐ ܕܫܡܝܐ ܡܢ ܠܥܠ .
Genesis 27:40 ܘܥܠ ܚܪܒܟ ܬܚܐ . ܘܠܐܚܘܟ ܬܦܠܘܚ . ܘܐܢ ܬܬܘܒ ܢܥܒܪ ܢܝܪܗ ܡܢ ܨܘܪܟ .
Genesis 27:41 ܘܣܩ̣ܪ ܥܣܘ ܠܝܥܩܘܒ ܥܠ ܒܘܪ̈ܟܬܐ ܕܒܪܟܗ ܐܒܘܗܝ . ܘܐܡ̣ܪ ܥܣܘ ܒܠܒܗ . ܢܩ̣ܪܒܘܢ ܝܘܡ̈ܬܐ ܕܒܝܬ ܒܟ̈ܘܗܝ ܕܐܒܝ . ܘܐܩܛܠܝܘܗܝ ܠܝܥܩܘܒ ܐܚܝ .
Genesis 27:42 ܘܐܬܐܡܪ ܠܪܦܩܐ ܡ̈ܠܘܗܝ ܕܥܣܘ ܒܪܗ̇ ܩܫܝܫܐ . ܘܫ̣ܕܪܬ ܩ̣ܪܬ ܠܝܥܩܘܒ ܒܪܗ̇ ܙܥܘܪܐ ܘܐܡ̣ܪܬ ܠܗ . ܗܐ ܥܣܘ ܐܚܘܟ ܡܬܠܚܡ ܠܟ ܠܡܩܛܠܟ .
Genesis 27:43 ܗܫܐ ܒܪܝ ܫܡ̣ܥ ܒܩܠܝ . ܘܩܘܡ ܙܠ ܠܟ ܠܘܬ ܠܒܢ ܐܚܝ ܠܚܪܢ .
Genesis 27:44 ܘܬܒ ܬܡ̇ܢ ܝܘܡ̈ܬܐ ܙܥܘܪ̈ܐ . ܥܕܡܐ ܕܢܬܬܢܝܚ ܪܘܓܙܗ ܕܐܚܘܟ .
Genesis 27:45 ܘܥܕܡܐ ܕܢܥܒܪ ܪܘܓܙܗ ܕܐܚܘܟ ܡܢܟ . ܘܢܛܥܐ ܡܕܡ ܕܥܒ̣ܕܬ ܠܗ . ܘܐܫܕܪ ܐܕܒܪܟ ܡܢ ܬܡ̇ܢ . ܕܠܡܐ ܐܬܓܙܐ ܐܦ ܡܢ ܬܪ̈ܝܟܘܢ ܒܝܘܡܐ ܚܕ .
Genesis 27:46 ܘܐܡ̣ܪܬ ܪܦܩܐ ܠܐܝܣܚܩ . ܥܩ̣ܬ ܠܝ ܒܚܝ̈ܝ ܡܢ ܩܕܡ ܒܢ̈ܬ ܚܝܬ . ܐܢ ܢܣܒ ܝܥܩܘܒ ܐܢܬܬܐ ܡܢ ܒܢ̈ܬ ܚܝܬ . ܐܝܟ ܗܠܝܢ ܒܢ̈ܬ ܐܪܥܐ ܠܡܢܐ ܐܙܠܝܢ ܠܝ ܚ̈ܝܐ .
Genesis 28:1 ܘܩ̣ܪܐ ܐܝܣܚܩ ܠܝܥܩܘܒ . ܘܒܪܟܗ ܘܦܩܕܗ ܘܐܡ̣ܪ ܠܗ . ܠܐ ܬܣܒ ܐܢܬܬܐ ܡܢ ܒܢ̈ܬ ܟܢܥܢ .
Genesis 28:2 ܩܘܡ ܙܠ ܠܟ ܠܦܕܢ ܕܐܪܡ . ܠܒܝܬ ܒܬܘܐܝܠ ܐܒܘܗ̇ ܕܐܡܟ . ܘܣܒ ܠܟ ܡܢ ܬܡܢ ܐܢܬܬܐ . ܡܢ ܒܢ̈ܬ ܠܒܢ ܐܚܘܗ̇ ܕܐܡܟ .
Genesis 28:3 ܘܐܝܠܫܕܝ ܢܒܪܟܟ . ܘܢܟܒܪܟ ܘܢܣܓܝܟ . ܘܬܗܘܐ ܠܟܢܫܐ ܕܥܡ̈ܡܐ .
Genesis 28:4 ܘܢܬܠ ܠܟ ܒܘܪ̈ܟܬܗ ܕܐܒܪܗܡ ܠܟ ܘܠܙܪܥܟ ܥܡܟ . ܘܢܘܪܬܟ ܐܪܥܐ ܕܡܥܡܪܟ . ܕܝܗ̣ܒ ܐܠܗܐ ܠܐܒܪܗܡ .
Genesis 28:5 ܘܫܕܪܗ ܐܝܣܚܩ ܠܝܥܩܘܒ . ܘܐܙ̣ܠ ܠܦܕܢ ܕܐܪܡ ܠܘܬ ܠܒܢ ܒܪ ܒܬܘܐܝܠ ܐܪܡܝܐ . ܐܚܘܗ̇ ܕܪܦܩܐ ܐܡܗ ܕܝܥܩܘܒ ܘܕܥܣܘ .
Genesis 28:6 ܘܚ̣ܙܐ ܥܣܘ ܕܒܪܟܗ ܐܝܣܚܩ ܠܝܥܩܘܒ ܐܚܘܗܝ . ܘܫܕܪܗ ܠܦܕܢ ܕܐܪܡ ܠܡܣܒ ܠܗ ܡܢ ܬܡܢ ܐܢܬܬܐ . ܟܕ ܒܪܟܗ ܘܦܩܕܗ ܘܐܡ̣ܪ ܠܗ . ܠܐ ܬܣܒ ܐܢܬܬܐ ܡܢ ܒܢ̈ܬ ܟܢܥܢ .
Genesis 28:7 ܘܫܡ̣ܥ ܝܥܩܘܒ ܠܐܒܘܗܝ ܘܠܐܡܗ . ܘܐܙ̣ܠ ܠܦܕܢ ܕܐܪܡ .
Genesis 28:8 ܘܚ̣ܙܐ ܥܣܘ ܕܒܝܫܢ ܒܢ̈ܬ ܟܢܥܢ ܒܥܝܢ̈ܝ ܐܝܣܚܩ ܐܒܘܗܝ .
Genesis 28:9 ܘܐܙܠ ܥܣܘ ܠܘܬ ܐܝܫܡܥܐܝܠ . ܘܢܣ̣ܒ ܠܒܣܡܬ ܒܪܬ ܐܝܫܡܥܝܠ ܒܪ ܐܒܪܗܡ ܚܬܗ ܕܢܒܝܘܬ ܥܠ ܢܫ̈ܘܗܝ ܠܗ ܐܢܬܬܐ .
Genesis 28:10 ܘܢܦ̣ܩ ܝܥܩܘܒ ܡܢ ܒܪܫܒܥ ܕܢܐܙܠ ܠܚܪܢ .
Genesis 28:11 ܘܦܓ̣ܥ ܒܐܬܪܐ ܘܒܬ ܬܡܢ . ܡܛܠ ܕܥܪܒ̣ܬ ܫܡܫܐ . ܘܢܣ̣ܒ ܡܢ ܟܐ̈ܦܐ ܕܐܬܪܐ ܘܣܡ ܐ̈ܣܕܘܗܝ . ܘܕܡ̣ܟ ܒܗ̇ܘ ܐܬܪܐ .
Genesis 28:12 ܘܚ̣ܙܐ ܒܚܠܡܗ . ܘܗܐ ܣܒܠܬܐ ܩܝܡܐ ܒܐܪܥܐ . ܘܪܫܗ̇ ܡ̇ܛܐ ܠܫܡܝܐ . ܘܗܐ ܡܠܐ̈ܟܘܗܝ ܕܐܠܗܐ ܣܠܩܝܢ ܘܢܚܬܝܢ ܒܗ̇ .
Genesis 28:13 ܘܗܐ ܡܪܝܐ ܩܐܡ ܠܥܠ ܡܢܗ̇ . ܘܐܡ̣ܪ ܐܢܐ ܐܢܐ ܡܪܝܐ ܐܠܗܗ ܕܐܒܪܗܡ ܐܒܘܟ . ܘܐܠܗܗ ܕܐܝܣܚܩ . ܐܪܥܐ ܕܕܡ̇ܟ ܐܢܬ ܥܠܝܗ̇ ܠܟ ܐܬܠܝܗ̇ ܘܠܙܪܥܟ .
Genesis 28:14 ܘܢܗܘܐ ܙܪܥܟ ܐܝܟ ܥܦܪܐ ܕܐܪܥܐ . ܘܬܣܓܐ ܠܡܕܢܚܐ ܘܠܡܥܪܒܐ . ܘܠܓܪܒܝܐ ܘܠܬܝܡܢܐ . ܘܢܬܒܪ̈ܟܢ ܒܟ ܟܠܗܝܢ ܫܪ̈ܒܬܐ ܕܐܪܥܐ ܘܒܙܪܥܟ .
Genesis 28:15 ܘܗܐ ܐܢܐ ܥܡܟ . ܘܐܛܪܟ ܠܐܝܟܐ ܕܬܐܙܠ ܘܐܗܦܟܟ ܠܐܪܥܐ ܗܕܐ . ܘܠܐ ܐܫܒܩܟ ܥܕܡܐ ܕܐܥܒܕ ܡܕܡ ܕܐܡ̇ܪܬ ܠܟ .
Genesis 28:16 ܘܐܬܬܥܝܪ ܝܥܩܘܒ ܡܢ ܫܢܬܗ ܘܐܡ̣ܪ . ܫܪܝܪܐܝܬ ܐܝܬ ܡܪܝܐ ܒܐܬܪܐ ܗܢܐ . ܘܐܢܐ ܠܐ ܝܕܥ̇ܬ .
Genesis 28:17 ܘܕܚܠ ܝܥܩܘܒ ܕܚܠܬܐ ܪܒܬܐ ܘܐܡ̣ܪ . ܡܐ ܕܚܝܠ ܗܘ ܐܬܪܐ ܗܢܐ ܝܘܡܢܐ . ܠܝܬܘܗܝ ܗܢܐ ܐܠܐ ܐܢ ܒܝܬܗ ܕܐܠܗܐ . ܘܗܢܘ ܬܪܥܗ̇ ܕܫܡܝܐ .
Genesis 28:18 ܘܩ̇ܕܡ ܝܥܩܘܒ ܒܫܦܪܐ . ܘܢܣ̣ܒ ܟܐܦܐ ܕܣܡ ܐ̈ܣܕܘܗܝ . ܘܥܒ̣ܕܗ̇ ܩܝܡܬܐ . ܘܢܣ̣ܟ ܡܫܚܐ ܒܪܫܗ̇ .
Genesis 28:19 ܘܩ̣ܪܐ ܝܥܩܘܒ ܫܡܗ ܕܐܬܪܐ ܗ̇ܘ ܒܝܬ ܐܝܠ . ܒܪܡ ܠܘܙ ܫܡܗ ܗܘܐ ܠܐܬܪܐ ܗ̇ܘ ܡܢ ܩܕܝܡ .
Genesis 28:20 ܘܢܕܪ ܝܥܩܘܒ ܢܕܪܐ ܘܐܡ̣ܪ . ܐܢ ܢܗܘ̣ܐ ܐܠܗܐ ܥܡܝ . ܘܢܢܛܪܢܝ ܒܐܘܪܚܐ ܗܕܐ ܕܐ̇ܙܠ ܐܢܐ ܒܗ̇ . ܘܢܬܠ ܠܝ ܠܚܡܐ ܠܡܐܟܠ ܘܠܒܘܫܐ ܠܡܠܒܫ .
Genesis 28:21 ܘܐܗܦܘܟ ܒܫܠܡܐ ܠܒܝܬ ܐܒܝ . ܢܗܘܐ ܠܝ ܡܪܝܐ ܐܠܗܐ .
Genesis 28:22 ܘܟܐܦܐ ܗܕܐ ܕܥܒ̇ܕܬ ܩܝܡܬܐ . ܬܗܘܐ ܒܝܬܗ ܕܐܠܗܐ . ܘܟܠ ܕܬܬܠ ܠܝ ܡܥܣܪܘ ܐܥܣܪ ܠܟ .
Genesis 29:1 ܘܐܪܝܡ ܝܥܩܘܒ ܪ̈ܓܠܘܗܝ . ܘܐܙܠ ܠܐܪܥܐ ܕܒ̈ܢܝ ܡܕܢܚܐ .
Genesis 29:2 ܘܚ̣ܙܐ ܘܗܐ ܒܪܐ ܒܚܩܠܐ . ܘܬܡܢ ܬܠܬܐ ܓܙܪ̈ܝܢ ܕܥܢܐ ܪ̈ܒܝܥܝܢ ܥܠܝܗ̇ . ܡܛܠ ܕܡܢ ܒܪܐ ܗ̇ܝ ܫܬܝܢ ܓܙܪ̈ܐ . ܘܟܐܦܐ ܪܒܬܐ ܥܠ ܦܘܡܗ̇ ܕܒܪܐ .
Genesis 29:3 ܘܡܬܟܢܫܝܢ ܠܬܡܢ ܟܠܗܘܢ ܓܙܪ̈ܐ . ܘܡܥܓܠܝܢ ܟܐܦܐ ܡܢ ܦܘܡܗ̇ ܕܒܪܐ ܘܡܫܩܝܢ ܥܢܐ . ܘܡܗܦܟܝܢ ܟܐܦܐ ܠܦܘܡܗ̇ ܕܒܪܐ ܠܕܘܟܬܗ̇ .
Genesis 29:4 ܐܡ̇ܪ ܠܗܘܢ ܝܥܩܘܒ . ܐ̈ܚܝ ܐܝܡܟܐ ܐܢܬܘܢ . ܐܡܪܝܢ ܠܗ ܡܢ ܚܪܢ ܚܢܢ .
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .