← All works

Peshitta Ezra

Peshitta (Syriac Old Testament) · 280 sections

1. Ezra 8:16

   ܘܫ̇ܠܚܬ ܠܠܥܙܪ ܘܠܐܪܢܝܐ ܘܠܫܡܥܝܐ ܘܠܐܢܬܢ ܘܠܝܪܒ ܘܠܐܠܝܬܢ ܘܠܢܬܢ ܘܠܙܟܪܝܐ ܘܠܡܫܠܘܡ ܪ̈ܫܐ ܘܠܝܘܢܕܒ ܘܠܐܠܝܬܢ ܗܠܝܢ ܟܘܠܗܘܢ ܪ̈ܫܐ

2. Ezra 8:17

   ܘܦ̇ܩܕܬ ܐܢܘܢ ܠܘܬ ܐ̇ܕܝ ܪܝܫܐ ܕܝܠܗܘܢ ܕܒܟܣܦܝܐ ܐܬܪܐ ܘܣ̇ܡܬ ܒܦܘܡܗܘܢ ܦܬܓܡ̈ܐ ܠܡܡܠܠܘ ܥܡ ܗܕܝ ܐܚܘܢ ܕܫ̣ܪܝܢ ܗܘܘ ܒܟܣܦܝܐ ܐܬܪܐ ܠܡܝܬܝܘ ܠܢ ܡܫܡ̈ܫܢܐ ܠܒܝܬܐ ܕܐܠܗܢ

3. Ezra 8:18

   ܘܐܝܬܝܘ ܠܢ ܐܝܟ ܐܝܕܐ ܕܐܠܗܐ ܕܐܛܐܒܬ ܥܠܝܢ ܠܓܒܪܐ ܚܕ ܚܟܝܡܐ ܡܢ ܒܢ̈ܝ ܡܚܠܝ ܒܪ ܠܘܝ ܒܪ ܐܝܣܪܐܝܠ ܘܫܪܝܐ ܘܐܚܘ̈ܗܝ ܘܒܢ̈ܘܗܝ ܬܪܥܣܪ

4. Ezra 8:19

   ܘܚܫܒܝܐ ܘܥܡܗ ܐܫܥܝܐ ܡܢ ܒܢ̈ܝ ܡܪܪܝ ܘܐܚܘ̈ܗܝ ܘܒܢ̈ܘܗܝ ܥܣܪܝܢ

5. Ezra 8:20

   ܡܢ ܓܒܪ̈ܐ ܕܝ̣ܗܒ ܕܘܝܕ ܠܦܘܠܚܢܐ ܕܠܘܝ̈ܐ ܕܝܗܝܒܝܢ ܡܐܬܝܢ ܘܥܣܪܝܢ ܟܠܗܘܢ ܐܬܩܪܝܘ ܒܫܡ̈ܗܝܗܘܢ

6. Ezra 8:21

   ܘܩ̇ܪܝܬ ܘܦ̇ܩܕܬ ܐܢܘܢ ܥܠ ܢܗܪ ܗ̇ܘܐ ܠܡܬܥܢܝܘ ܩܕܡ ܐܠܗܢ ܘܠܡܒܥܐ ܡܢܗ ܐܘܪܚ ܬܪܝܨܐ ܠܢ ܘܠܛܦܠܢ ܘܠܟܠܗ ܩܢܝܢܢ

7. Ezra 8:22

   ܡܛܠ ܕܒ̇ܗܬܬ ܕܐܫܐܠ ܡܢ ܡܠܟܐ ܚܝ̈ܠܐ ܘܦܪ̈ܫܐ ܕܢܥܕܪܘܢܢ ܡܢ ܒܥܠܕܒ̈ܒܝܢ ܒܐܘܪܚܐ ܡܛܠ ܕܐܡܪܢ ܗܘܝܢ ܠܡܠܟܐ ܕܐܝܕܐ ܕܐܠܗܐ ܗܘܝܐ ܥܡ ܟܠ ܕܒܥܝܢ ܠܗ ܠܛܒ ܘܥܘܫܢܗ ܘܚܡܬܗ ܥܠ ܟܠ ܡ̇ܢ ܕܫܒܩܝܢ ܠܗ

8. Ezra 8:23

   ܘܢܨܘܡ ܘܢܒܥܐ ܡܢ ܐܠܗܢ ܥܠ ܗܕܐ ܘܡܫܬܡܥ ܠܢ

9. Ezra 8:24

   ܘܓܒ̇ܝܬ ܡܢ ܩܫܝ̈ܫܝ ܟܘܡܪ̈ܐ ܬܪܥܣܪ ܠܫܪܒܝܐ ܘܠܚܫܒܝܐ ܘܥܡܗܘܢ ܡܢ ܐܚܝ̈ܗܘܢ ܥܣܪܐ

10. Ezra 8:25

    ܘܡ̇ܢܝܬ ܠܗܘܢ ܟܣܦܐ ܘܕܗܒܐ ܘܡܐ̈ܢܐ ܪܫܝܬܐ ܠܒܝܬܐ ܕܐܠܗܢ ܕܝ̣ܗܒ ܡܠܟܐ ܘܚܐܪ̈ܘܗܝ ܘܪ̈ܘܪܒܢܘܗܝ ܘܟܠܗ ܐܝܣܪܝܠ ܕܐܫܬܟܚܘ ܬܡܢ

11. Ezra 8:26

    ܘܡ̇ܢܝܬ ܥܠܝܗܘܢ ܟܣܦܐ ܟܟܪ̈ܐ ܡܐܐ ܘܚܡܫܝܢ ܘܡܐ̈ܢܝ ܟܣܦܐ ܡܐܐ ܘܕܗܒܐ ܡܐܐ ܟܟܪ̈ܝܢ

12. Ezra 8:27

    ܘܦ̈ܛܩܐ ܕܕܗܒܐ ܥܣܪ̈ܝܢ ܘܕܪ̈ܝܟܘܢܐ ܐܠܦ ܘܡܐ̈ܢܝ ܢܚܫܐ ܩܘܪܢܬܝܢܐ ܛܒܐ ܕܫܦܝܪܝܢ ܐܝܟ ܕܗܒܐ

13. Ezra 8:28

    ܘܐ̇ܡܪܬ ܠܗܘܢ ܐܢܬܘܢ ܩܕܝܫܝܢ ܘܡܐ̈ܢܐ ܩܕܝܫܝܢ ܘܟܣܦܐ ܘܕܗܒܐ ܩܘܪܒܢܐ ܠܡܪܝܐ ܐܠܗܐ ܕܐܒܗ̈ܝܟܘܢ

14. Ezra 8:29

    ܐܙܕܗܪܘ ܘܛܪܘ ܥܕܡܐ ܕܬܫܠܡܘܢܗ ܩܕܡ ܪ̈ܒܝ ܟܘܡܪ̈ܐ ܘܠܘܝ̈ܐ ܘܪ̈ܝܫܝ ܐܒܗ̈ܐ ܕܐܝܣܪܝܠ ܒܐܘܪܫܠܡ ܒܗܝܟܠܐ ܕܒܝܬ ܡܪܝܐ

15. Ezra 8:30

    ܘܩ̇ܒܠܘ ܟܘܡܪ̈ܐ ܘܠܘܝ̈ܐ ܥܠܝܗܘܢ ܕܢܫܠܡܘܢ ܒܡܬܩܠܐ ܟܣܦܐ ܘܕܗܒܐ ܘܡܐ̈ܢܐ ܠܡܥܠܘ ܠܐܘܪܫܠܡ ܠܒܝܬܐ ܕܐܠܗܢ

16. Ezra 8:31

    ܘܫܩܠܢ ܡܢ ܢܗܪ ܗܘܐ ܒܬܪܥܣܪܐ ܒܝܪܚܐ ܩܕܡܝܐ ܠܡܐܙܠ ܠܐܘܪܫܠܡ ܘܐܝܕܐ ܕܐܠܗܐ ܗܘܬ ܥܠܝܢ ܘܦܪܩܢ ܡܢ ܐܝܕܐ ܕܒ̈ܥܠܕܒܒܝܢ ܘܐܦ ܡܢ ܕܘܩ̈ܐ ܕܐܝܬ ܒܐܘܪܚܐ

17. Ezra 8:32

    ܘܐܬܝܢ ܠܐܘܪܫܠܡ ܘܝܬܒܢ ܬܡܢ ܝܘܡ̈ܬܐ ܬܠܬܐ

18. Ezra 8:33

    ܘܒܝܘܡܐ ܕܐܪܒܥܐ ܬܩܠܢ ܟܣܦܐ ܘܕܗܒܐ ܘܡܐ̈ܢܐ ܒܒܝܬܐ ܕܐܠܗܢ ܘܐܫܠܡܢ ܐܢܘܢ ܠܡܪܡܘܬ ܒܪ ܐܘܪܝܐ ܟܗܢܐ ܘܥܡܗ ܠܥܙܪ ܒܪ ܦܝܢܚܣ ܘܥܡܗܘܢ ܝܗܘܙܒܪ ܒܪ ܝܫܘܥ ܘܝܘܕܥܝܐ ܒܪ ܒܓܘܝ ܠܘ̈ܝܐ

19. Ezra 8:34

    ܒܡܢܝܢܐ ܒܡܬܩܠܐ ܠܟܠ ܡܕܡ ܘܐܬܟܬܒ ܟܠܗ ܡܬܩܠܐ ܒܙܒܢܐ ܗ̇ܘ

20. Ezra 8:35

    ܘܗܠܝܢ ܐܝܠܝܢ ܕܐܬܘ ܡܢ ܫܒܝܐ ܡܢ ܒܢ̈ܝ ܓܠܘܬܐ ܘܩ̇ܪܒܘ ܥܠܘ̈ܬܐ ܠܐܠܗܐ ܕܐܝܣܪܝܠ ܬܘܪ̈ܐ ܬܪܥܣܪ ܥܠ ܟܘܠܗ ܐܝܣܪܐܝܠ ܕܟܪ̈ܐ ܬܫܥܝܢ ܘܫܬܐ ܐܡܪ̈ܐ ܫܒܥܝܢ ܘܫܒܥܐ ܨܦܪ̈ܝܐ ܠܫܘܒܩܢ ܚܛܗ̈ܐ ܬܪܥܣܪ ܗܠܝܢ ܟܘܠܗܝܢ ܥܠܘ̈ܬܐ ܠܡܪܝܐ

21. Ezra 8:36

    ܘܝ̣ܗܒ ܕܝܛܓܡܐ ܕܡܠܟܐ ܠܪ̈ܘܪܒܢܝ ܡܠܟܐ ܘܠܫ̈ܠܝܛܝ ܥܒܪܐ ܕܢܗܪܐ ܘܡܝܩܪܝܢ ܗܘܘ ܠܥܡܐ ܘܠܒܝܬܗ ܕܐܠܗܐ

22. Ezra 9:1

    ܘܟܕ ܫ̣ܠܡ ܟܠܗܝܢ ܗܠܝܢ ܩܪܒܘ ܠܘܬܝ ܩܫܝ̈ܫܐ ܘܐܡܪܝܢ ܠܐ ܐܬܦܪܫ ܥܡܐ ܕܐܝܣܪܝܠ ܘܟܘܡܪ̈ܐ ܘܠܘܝ̈ܐ ܡܢ ܥܡܡ̈ܐ ܕܡܕܝ̈ܢܬܐ ܒܛܡܐܘܬܗܘܢ ܘܟܢܥ̈ܢܝܐ ܘܚܬ̈ܝܐ ܘܥܡ̈ܘܢܝܐ ܘܦܪ̈ܙܝܐ ܘܝܒܘ̈ܣܝܐ ܘܡܨܪ̈ܝܐ ܘܡܘܐܒܝ̈ܐ ܘܐܡܘܪ̈ܝܐ

23. Ezra 9:2

    ܡܛܠ ܕܢܣܒܘ ܡܢ ܒܢ̈ܬܗܘܢ ܠܗܘܢ ܘܠܒܢܝ̈ܗܘܢ ܘܐܬܚܠܛ ܙܪܥܐ ܩܕܝܫܐ ܒܥܡܡ̈ܐ ܕܡܕܝ̈ܢܬܐ ܘܐܝܕܐ ܕܩܫܝ̈ܫܐ ܘܕܠܘܝ̈ܐ ܗܘܬ ܒܥܘ̣ܠܐ ܗܢܐ ܩܕܡܝܬ

24. Ezra 9:3

    ܗܝܕܝܢ ܟܕ ܫ̇ܡܥܬ ܡܠܬܐ ܗܕܐ ܣ̇ܕܩܬ ܢܚ̈ܬܝ ܘܟܠܡܝܕܝ ܘܡ̇ܠܓܬ ܡܢ ܣܥܪܐ ܕܪܝܫܝ ܘܕܕܩܢܝ ܘܝ̇ܬܒ ܗ̇ܘܝܬ ܘܬܡܝܗ

25. Ezra 9:4

    ܘܐܬܟܢܫܘ ܠܘܬܝ ܟܠ ܐܝܠܝܢ ܕܒܛܝܠ ܗܘܐ ܠܗܘܢ ܥܠ ܡܠܬܐ ܕܐܠܗܐ ܕܐܝܣܪܝܠ ܥܠ ܥܘ̣ܠܐ ܕܐܥܠܝܘ ܒܢ̈ܝ ܫܒܝܬܐ ܘܐܢܐ ܝ̇ܬܒ ܗ̇ܘܝܬ ܘܬܡܝܗ ܥܕܡܐ ܠܬܫܥ ܫܥ̈ܝܢ

26. Ezra 9:5

    ܘܒܥܕܢܐ ܕܬܫܥ ܫܥ̈ܝܢ ܩ̇ܡܬ ܡܢ ܥܩܬܝ ܘܡܢ ܣܘܕܩ ܢܚ̈ܬܝ ܘܒ̇ܪܟܬ ܥܠ ܒܘܪ̈ܟܝ ܘܦ̇ܪܣܬ ܐܝ̈ܕܝ ܒܨܠܘܬܐ ܩܕܡ ܡܪܝܐ ܐܠܗܐ

27. Ezra 9:6

    ܘܐ̇ܡܪܬ ܐܠܗܝ ܒܗܬܝܢܢ ܠܡܪܡܘ ܐܦ̈ܝܢ ܠܘܬܟ ܐܠܗܢ ܡܛܘܠ ܕܚܘ̈ܒܝܢ ܣܓܝܘ ܠܥܠ ܡܢ ܪܝܫܢ ܘܚܛܗ̈ܝܢ ܪ̈ܘܪܒܐ ܣܠܩܘ ܥܕܡܐ ܠܫܡܝܐ

28. Ezra 9:7

    ܘܡܢ ܝܘܡ̈ܝ ܐܒܗ̈ܬܢ ܚܢܢ ܐܫܬܟܚܢ ܒܚܛܗ̈ܐ ܪ̈ܘܪܒܐ ܥܕܡܐ ܠܝܘܡܢܐ ܡܛܠ ܕܐܣܓܝܢ ܠܡܚܛܐ ܚܢܢ ܘܐܒܗ̈ܝܢ ܘܡ̈ܠܟܝܢ ܘܟܘܡܪ̈ܝܢ ܡܛܠ ܗܢܐ ܐܫܬܠܡܢ ܠܚܪܒܐ ܘܠܫܒܝܐ ܘܠܒܙܬܐ ܘܠܒܗܬܬܐ ܕܐܦ̈ܐ ܒܐܝܕܐ ܕܡ̈ܠܟܐ ܕܡܕܝ̈ܢܬܐ ܘܒܐܝܕܐ ܕܒܥܠܕ̈ܒܒܝܢ ܐܝܟ ܕܝܘܡܢܐ

29. Ezra 9:8

    ܘܡܟܝܠ ܥܕ ܩܠܝܠ ܙܥܘܪ ܢܗܘܘܢ ܪ̈ܚܡܝܢ ܡܢ ܩܕܡ ܡܪܝܐ ܐܠܗܢ ܠܡܘܬܪܘ ܡܢܢ ܫܪܟܢܐ ܘܠܡܬܠ ܠܢ ܕܘܟܬܐ ܒܐܬܪܐ ܕܩܘܕܫܗ ܘܠܡܢܗܪܘ ܥ̈ܝܢܝܢ ܐܠܗܢ ܘܠܡܬܠ ܚܝ̈ܐ ܩܠܝܠ ܒܥܒܕܘܬܢ

30. Ezra 9:9

    ܡܛܘܠ ܕܥܒ̣̈ܕܐ ܚܢܢ ܘܒܥܒܕܘܬܢ ܠܐ ܐܫܬܒܩܢ ܐܠܗܢ ܘܝܗܒܢ ܐܠܗܢ ܠܪ̈ܚܡܐ ܩܕܡ ܡܠܟܐ ܕܦܪܣ ܘܝ̣ܗܒ ܠܢ ܦܘܪܢܣܢ ܕܝܘܡܐ ܘܢܪܡܪܡ ܠܒܝܬܐ ܕܐܠܗܢ ܘܢܩܝܡ ܚܪ̈ܒܬܗ ܘܢܬܠ ܠܢ ܣܝܓܐ ܒܐܝܗܘܕ ܘܒܐܘܪܫܠܡ

31. Ezra 9:10

    ܘܡܟܝܠ ܡܢܐ ܢܐܡܪ ܒܬܪ ܗܠܝܢ ܟܠܗܝܢ ܡܛܠ ܕܫܒܩܢ ܦܘܩ̈ܕܢܝܟ

32. Ezra 9:11

    ܕܦܩܕܬܢ ܒܐܝܕܐ ܕܥܒ̣̈ܕܝܟ ܢܒܝ̈ܐ ܘܐܡܪܬ ܠܢ ܐܪܥܐ ܕܥܐܠܝܢ ܐܢܬܘܢ ܠܗ̇ ܠܡܐܪܬܗ̇ ܛܡܐܐ ܗܝ ܒܛܡܐܘܬܐ ܕܥܡ̈ܡܐ ܘܕܡܕܝ̈ܢܬܐ ܒܛܡܐܘܬܗܘܢ ܕܡܠܘܐܗ̇ ܡܢ ܣܦܐ ܠܣܦܐ ܘܒܥ̇ܒ̈ܕܝܗܘܢ ܣܢ̈ܝܐ ܡܠܐܘܗ̇

33. Ezra 9:12

    ܘܡܟܝܠ ܒܢ̈ܬܟܘܢ ܠܐ ܬܬܠܘܢ ܠܒܢܝ̈ܗܘܢ ܘܒܢ̈ܬܗܘܢ ܠܐ ܬܣܒܘܢ ܠܒܢܝ̈ܟܘܢ ܘܠܐ ܬܬܪܥܘܢ ܠܫܠܡܗܘܢ ܘܠܛܒܬܗܘܢ ܥܕܡܐ ܠܥܠܡ ܡܛܘܠ ܕܬܬܥܫܢܘܢ ܘܬܐܟܠܘܢ ܛܒ̈ܬܗ̇ ܕܐܪܥܐ ܘܬܘܪܬܘܢ ܠܒܢܝ̈ܟܘܢ ܘܢܐܪܬܘܢ ܥܕܡܐ ܠܥܠܡ

34. Ezra 9:13

    ܘܒܬܪ ܗܠܝܢ ܟܠܗܝܢ ܕܐܬ̈ܝ ܥܠܝܢ ܒܥ̇ܒ̈ܕܝܢ ܒܝ̈ܫܐ ܘܒܚ̈ܛܗܝܢ ܪ̈ܘܪܒܐ ܡܛܠ ܕܐܢܬ ܐܠܗܢ ܐܬܚܫܒܬ ܠܡܫܒܩ ܠܢ ܚܛܗ̈ܝܢ ܘܬܬܠ ܠܢ ܫܪܟܢܐ ܒܥܠܡܐ

35. Ezra 9:14

    ܘܚܢܢ ܐܬܗܦܟܢ ܘܥܒܪܢ ܥܠ ܦܘܩ̈ܕܢܝܟ ܘܐܙܠܢ ܐܬܕܒܩܢ ܒܗܠܝܢ ܥܡ̈ܡܐ ܛܡ̈ܐܐ ܘܥܒܕܢ ܐܝܟ ܥ̇ܒ̈ܕܝܗܘܢ ܘܐܢܬ ܪܚܡܬܢܐ ܐܢܬ ܠܐ ܬܪܓܙ ܥܠܝܢ ܫܒܘܩ ܠܚܘܒ̈ܝܢ ܡܢ ܩܕܡܝܟ ܡܛܠ ܕܪܚܡܬܢܐ ܐܢܬ ܫܒܘܩ ܠܢ ܬܘܬܪܐ ܒܥܠܡܐ ܡܛܘܠ ܕܠܝܬ ܐܟܘܬܟ ܘܠܐ ܢܐܒܕ

36. Ezra 9:15

    ܡܪܝܐ ܐܠܗܐ ܕܐܝܣܪܝܠ ܙܕܝܩ ܐܢܬ ܡܛܠ ܕܫܒܩܬ ܡܢܢ ܫܪܟܢܐ ܐܝܟ ܕܝܘܡܢܐ ܗܐ ܚܢܢ ܩܝܡܝܢܢ ܘܡܘܕܝܢܢ ܩܕܡܝܟ ܥܠ ܚܛܗ̈ܝܢ ܡܛܠ ܕܠܝܬ ܠܡܐܡܪ ܩܕܡܝܟ ܡܠܐ ܥܠ ܗܕܐ

37. Ezra 10:1

    ܘܟܕ ܨ̇ܠܝ ܥܙܪܐ ܘܟܕ ܐܬܝܕܝ ܪܡ̣ܐ ܗܘܐ ܘܒ̇ܟܐ ܩܕܡ ܒܝܬܗ ܕܡܪܝܐ ܘܐܬܟܢܫܘ ܠܘܬܗ ܡܢ ܐܝܣܪܝܠ ܟܢܫܐ ܪܒܐ ܕܛܒ ܓܒܪ̈ܐ ܘܢܫ̈ܐ ܘܛܠܝ̈ܐ ܡܛܠ ܕܒ̇ܟܝܢ ܗܘܘ ܛܠܝ̈ܐ ܒܟܝܐ ܪܒܐ ܕܛܒ

38. Ezra 10:2

    ܘܥ̣ܢܐ ܫܟܢܝܐ ܒܪ ܢܚܐܝܠ ܡܢ ܒܢ̈ܝ ܥܝܠܡ ܘܐ̣ܡܪ ܠܥܙܪܐ ܣ̇ܦܪܐ ܚܢܢ ܟܕܒܢ ܒܡܪܝܐ ܐܠܗܢ ܘܐܘܬܒܢ ܢܫ̈ܐ ܢܘܟܪ̈ܝܬܐ ܡܢ ܥܡܡ̈ܐ ܕܐܪܥܐ ܡܟܝܠ ܐܝܬ ܣܒܪܐ ܠܐܝܣܪܝܠ ܡܛܠ ܗܕܐ

39. Ezra 10:3

    ܘܡܟܝܠ ܢܐܡܪ ܡܘܡ̈ܬܐ ܩܕܡ ܐܠܗܢ ܠܡܦܩܘ ܟܘܠ ܢܫ̈ܐ ܢܘܟܪ̈ܝܬܐ ܘܐܝܠܝܢ ܕܐܬܝܠܕܘ ܡܢܗܝܢ ܘܐܝܟ ܡ̣ܠܟܐ ܕܡܪܝܐ ܘܐܝܠܝܢ ܕܕܚܠܝܢ ܡܢ ܢܡܘܣܐ ܕܐܠܗܢ ܥܒܕܘ

40. Ezra 10:4

    ܘܐܫܪܘ ܡܛܠ ܕܥܠܝܟܘܢ ܦܣܝܩ ܦܣܩܐ ܗܢܐ ܡܛܠ ܕܚܢܢ ܥܡܟ ܐܬܥܫܢ ܘܥܒܕ

41. Ezra 10:5

    ܘܩ̣ܡ ܥܙܪܐ ܣ̇ܦܪܐ ܘܐܘܡܝ ܠܩܫܝ̈ܫܝ ܟܘܡܪ̈ܐ ܘܠܠܘܝ̈ܐ ܘܠܟܠܗ ܐܝܣܪܝܠ ܠܡܥܒܕ ܐܝܟ ܦܘܩܕܢܐ ܗܢܐ ܘܝܡܘ

42. Ezra 10:6

    ܘܩ̣ܡ ܥܙܪܐ ܣ̇ܦܪܐ ܡܢ ܩܕܡ ܒܝܬܐ ܕܡܪܝܐ ܘܐ̣ܙܠ ܠܐܟܣܕܪܐ ܕܝܘܚܢܢ ܒܪ ܐܠܝܫܒ ܘܝ̣ܬܒ ܬܡܢ ܠܚܡܐ ܠܐ ܐ̣ܟܠ ܘܡܝ̈ܐ ܠܐ ܐܫܬܝ ܡܛܠ ܕܟܪܝܐ ܗܘܬ ܠܗ ܥܠ ܥܘܠܗ ܕܥܡܐ

43. Ezra 10:7

    ܘܩܪܘ ܟܪ̈ܘܙܐ ܒܝܗܘܕ ܘܒܐܪܫܠܡ ܠܟܠ ܒܢ̈ܝ ܫܒܝܬܐ ܠܡܬܩܪܒܘ ܠܐܘܪܫܠܡ ܡܕܝܢܬܐ

44. Ezra 10:8

    ܘܟܠ ܡ̇ܢ ܕܠܐ ܢܐܬܐ ܠܬܠܬܐ ܝܘܡ̈ܝܢ ܢܗܘܐ ܠܗ ܐܝܟ ܡ̣ܠܟܐ ܕܩܫܝ̈ܫܐ ܘܕܪ̈ܘܪܒܢܐ ܢܗܘܘܢ ܚܪܝܒܝܢ ܢܟܣ̈ܘܗܝ ܘܗܘ ܢܬܦܪܫ ܡܢ ܥܡܐ ܕܐܝܣܪܝܠ

45. Ezra 10:9

    ܘܐܬܟܢܫܘ ܟܠ ܐܢܫ̈ܝ ܝܗܘܕܐ ܘܒܢܝܡܝܢ ܠܐܪܫܠܡ ܠܬܠܬܐ ܝܘܡ̈ܝܢ ܒܝܪܚܐ ܕܬܫܥܐ ܒܥܣܪܬܐ ܒܝܪܚܐ ܘܟܢܫܘ ܟܠܗ ܥܡܐ ܕܡܪܝܐ ܒܫܘܩ ܗܝܟܠܐ ܕܡܪܝܐ ܙܝܝܥܝܢ ܘܪܬܝܬܝܢ ܥܠ ܡܠܬܐ

46. Ezra 10:10

    ܘܩ̣ܡ ܥܙܪܐ ܟܗܢܐ ܘܐ̣ܡܪ ܠܗܘܢ ܐܢܬܘܢ ܟܕܒܬܘܢ ܒܐܠܗܐ ܘܢܣܒܬܘܢ ܢܫ̈ܐ ܢܘܟܪ̈ܝܬܐ ܘܐܘܣܦܬܘܢ ܥܠ ܚܛܗ̈ܐ ܕܐܝܣܪܝܠ

47. Ezra 10:11

    ܡܟܝܠ ܗܒܘ ܬܘܕܝܬܐ ܠܡܪܝܐ ܐܠܗܐ ܕܐܒܗ̈ܝܟܘܢ ܘܥܒܕܘ ܨܒܝܢܗ ܘܐܬܦܪܫܘ ܡܢ ܥܡܡ̈ܐ ܕܐܪܥܐ ܘܡܢ ܢܫ̈ܐ ܢܘܟܪ̈ܝܬܐ

48. Ezra 10:12

    ܘܥܢܘ ܟܠܗ ܥܡܐ ܘܐܡܪܝܢ ܠܥܙܪܐ ܒܩܠܐ ܪܡܐ ܫܦܝܪܝܢ ܦܬܓܡ̈ܝܟ ܥܠܝܢ ܘܡܩܒܠ ܟܠܡܕܡ ܕܐ̇ܡܪ ܐܢܬ ܥܠܝܢ ܠܡܥܒܕ ܒܫܪܝܪܬܐ

49. Ezra 10:13

    ܗܫܐ ܕܝܢ ܥܡܐ ܣܓܝ ܘܥܕܢܐ ܕܡܛܪܐ ܗܘ ܘܠܝܬ ܒܢ ܚܝܠܐ ܠܡܩܡ ܒܫܘܩܐ ܘܥܒܝܕܬܐ ܠܐ ܗܘܬ ܕܚܕ ܗܝ ܘܠܐ ܕܬܪܝܢ ܡܛܠ ܕܣܓܝܐܝܢ ܐܢܘܢ ܚܛܗ̈ܝܢ ܒܦܬܓܡܐ ܗܢܐ

50. Ezra 10:14

    ܡܟܝܠ ܢܩܘܡܘܢ ܩܫܝ̈ܫܝܢ ܘܟܠܗ ܥܡܐ ܘܟܠ ܕܐܝܬ ܒܩܘܪ̈ܝܐ ܕܝܠܢ ܐܝܠܝܢ ܕܐܘܬܒܘ ܢܫ̈ܐ ܢܘܟܪ̈ܝܬܐ ܘܢܐܬܘܢ ܠܥܕܢܐ ܕܨܠܘܬܐ ܘܥܡܗܘܢ ܩܫܝ̈ܫܐ ܕܩܘܪ̈ܝܐ ܘܩܘܪ̈ܝܐ ܘܕܝ̈ܢܝ̇ܗܝܢ ܥܕܡܐ ܕܢܗܦܟܘܢ ܚܡܬܐ ܕܪܘܓܙܗ ܕܐܠܗܢ ܡܢܢ ܡܛܠ ܡܘܡܬܐ ܗܕܐ

51. Ezra 10:15

    ܒܪܡ ܝܘܢܬܢ ܒܪ ܥܡܘܐܝܠ ܘܢܚܙܝܐ ܒܪ ܬܩܘܐ ܘܡܫܠܡ ܩܡܘ ܥܠ ܗܕܐ ܡܠܬܐ ܘܡܬܝ ܠܘܝܐ ܥܕܘܪܗܘܢ

52. Ezra 10:16

    ܘܗܟܢܐ ܥܒܕܘ ܒܢ̈ܝ ܫܒܝܬܐ ܘܦ̣ܪܫ ܥܙܪܐ ܟܗ̈ܢܐ ܥܣܪܐ ܓܒܪ̈ܐ ܪ̈ܫܐ ܕܐܒܗ̈ܬܐ ܠܒܝܬ ܐܒܗ̈ܝܗܘܢ ܘܟܘܠܗܘܢ ܒܫܡ̈ܗܐ ܐܬܩܪܝܘ ܘܝܬܒܘ ܒܝܘܡ ܚܕ ܒܝܪܚܐ ܕܥܣܪܐ ܠܡܬܒܥܗ ܠܗ ܠܦܬܓܡܐ

53. Ezra 10:17

    ܘܓܡܪܘ ܟܘܠܗܘܢ ܓܒܪ̈ܐ ܕܐܘܬܒܘ ܢܫ̈ܐ ܢܘܟܪ̈ܝܬܐ ܥܕܡܐ ܠܝܘܡ ܚܕ ܒܝܪܚܐ ܩܕܡܝܐ

54. Ezra 10:18

    ܘܐܫܬܟܚܘ ܡܢ ܒܢ̈ܝ ܟܘܡܪ̈ܐ ܕܐܘܬܒܘ ܢܫ̈ܐ ܢܘܟܪ̈ܝܬܐ ܡܢ ܒܢ̈ܘܗܝ ܕܝܫܘܥ ܒܪ ܝܘܙܕܩ ܘܐܚ̈ܘܗܝ ܡܥܣܝܐ ܘܐܠܝܥܙܪ ܘܝܘܢܕܒ ܘܓܕܠܝܐ

55. Ezra 10:19

    ܘܐܬܛܦܝܣܘ ܘܐܦ ܗܢܘܢ ܕܢܦܩܘܢ ܢܫ̈ܝܗܘܢ ܘܩ̇ܪܒܘ ܕܟܪ̈ܐ ܕܥ̈ܢܐ ܥܠ ܚܛܗܝ̈ܗܘܢ

56. Ezra 10:20

    ܡܢ ܒܢ̈ܝ ܐܡܝܪ ܚܢܢܝ ܘܙܟܪܝܐ

57. Ezra 10:21

    ܡܢ ܒܢ̈ܝ ܚܪܡ ܡܥܣܝܐ ܘܐܠܝܐ ܘܫܡܥܝܐ ܘܐܚܝܐܝܠ ܘܥܘܙܝܐ

58. Ezra 10:22

    ܡܢ ܒܢ̈ܝ ܦܫܚܘܪ ܐܠܝܢ ܘܡܥܣܝܐ ܘܐܫܡܥܝܠ ܘܢܬܢܝܐܝܠ ܘܝܘܙܒܪ ܘܐܠܥܣܝܐ

59. Ezra 10:23

    ܡܢ ܠܘܝ̈ܐ ܝܘ̇ܙܒܪ ܘܫܡܥܝ ܘܩܠܢܐ ܘܩܠܛܐ ܘܦܬܚܝܐ ܘܝܗܘܕܐ ܘܐܠܝܥܙܪ

60. Ezra 10:24

    ܘܡܢ ܡܫܡ̈ܫܢܐ ܐܠܝܫܒ ܘܡܢ ܬܪ̈ܥܐ ܫܠܡܘ ܘܐܛܠܡ ܘܐܘܕܝ

61. Ezra 10:25

    ܡܢ ܐܝܣܪܐܝܠ ܡܢ ܒܢ̈ܝ ܦܪܥܫ ܐܪܡܝܐ ܝܙܢܝܐ ܡܠܟܝܐ ܒܢܝܡܝܢ ܠܥܙܝܪ ܡܠܟܝܐ ܒܢܝܐ

62. Ezra 10:26

    ܡܢ ܒܢ̈ܝ ܥܝܠܡ ܢܬܢܝܐ ܙܟܪܝܐ ܢܥܐܝܠ ܥܒܪܝ ܝܪܡܘܬ ܐܠܝܗܘ

63. Ezra 10:27

    ܡܢ ܒܢ̈ܝ ܙܬܝܐ ܐܠܥܢܝ ܐܠܝܫܒ ܢܬܢܝܐ ܝܪܡܘܬ ܙܒܘܪ ܥܘܙܝܐ

64. Ezra 10:28

    ܡܢ ܒܢ̈ܝ ܒܒܝ ܝܘܚܢܢ ܚܢܢܝܐ ܙܒܝ ܥܬܠܝ

65. Ezra 10:29

    ܡܢ ܒܢ̈ܝ ܒ̇ܢܝ ܒ̇ܟܝ ܡܢ ܬܫܠܘܡ ܡܠܘܟ ܥܘܙܝܐ ܘܝܫܘܒ ܘܫܐܘܠ ܘܝܪܡܘܬ

66. Ezra 10:30

    ܘܡܢ ܒܢ̈ܝ ܫܘܠܛܢ ܡܘܐܒ ܓܕܠܝܐ ܟܠܠ ܒܢܝܐ ܡܥܣܝܐ ܡܬܢܝܐ ܒܨܠܝܐܝܠ ܘܒܢ̈ܘܗܝ ܒܢ̈ܝ ܡܢܫܐ

67. Ezra 10:31

    ܒܢ̈ܝ ܚܪܡ ܐܠܝܥܙܪ ܡ̇ܠܟܝܐ ܐܢܫܘܐ ܫܡܥܝܐ ܫܡܥܘܢ

68. Ezra 10:32

    ܒܢܝܡܝܢ ܡܠܘܟ ܫܡܥܝܐ

69. Ezra 10:33

    ܡܢ ܒܢ̈ܝ ܚܫܘܡ ܡܬܢܝ ܡܬܝܬܐ ܙܟܪ ܐܠܝܦܠܛ ܟܪܡܝ ܡܢܫܐ ܫܡܥܝ

70. Ezra 10:34

    ܡܢ ܒܢ̈ܝ ܒ̇ܟܝ ܡܕܪܥܝ ܥܡܪܡ ܘܝܘܐܝܠ

71. Ezra 10:35

    ܘܒܙܝܐ ܒܪ ܟܠܝܗܘ

72. Ezra 10:36

    ܘܢܗܐܝܠ ܡܪܡܘܬ ܐܠܝܫܒ

73. Ezra 10:37

    ܡܬܢܝܐ ܡܬܢܝ ܥܘܬܝ

74. Ezra 10:38

    ܘܒܢܝ ܘܒܢ̈ܘܗܝ ܫܡܥܝ

75. Ezra 10:39

    ܘܫܠܡܝܐ ܘܢܬܢ ܘܥܙܪܝܐ

76. Ezra 10:40

    ܘܡܟܝܙܒ ܘܫܝܫܝ ܘܣ̇ܪܝ

77. Ezra 10:41

    ܘܥܕܪܐܝܠ ܘܫܡܪܝܐ

78. Ezra 10:42

    ܘܫܠܘܡ ܘܐܡܪܝܐ ܘܝܘܣܦ

79. Ezra 10:43

    ܡܢ ܒܢ̈ܝ ܢܒ̇ܘ ܢܒܐܝܠ ܘܡܬܝܬܐ ܘܙܟܘܪ ܘܙܒܝܢܐ ܘܝܘܐܝܠ ܘܒܢܝܐ

80. Ezra 10:44

    ܟܘܠܗܘܢ ܗܠܝܢ ܢܣܒܘ ܢܫ̈ܐ ܢܘܟܪ̈ܝܬܐ ܐܝܬ ܕܝܢ ܐܢ̈ܫܐ ܕܐܘܠܕܘ ܒܢ̈ܝܐ

← Previous — showing 201–280 of 280

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.