← All works

Peshitta Ezekiel

Peshitta (Syriac Old Testament) · 1,271 sections

1. Ezekiel 21:26

   ܡܛܠ ܕܩܡ ܡܠܟܐ ܕܒܒܠ ܥܠ ܪܝܫ ܐܘܪܚܐ ܕܦܠܫܬ ܐܘܪ̈ܚܬܐ ܠܡܩܨܡ ܩܨܡܐ ܫܕܐ ܓܐܪܐ ܘܫܐܠ ܒܦܬܟܪ̈ܐ ܚܙܐ ܒܫܘܒܚܗ

2. Ezekiel 21:27

   ܘܒܝܡܝܢܗ ܗܘܐ ܩܨܡܐ ܥܠ ܐܘܪܫܠܡ ܕܢܟܡܢ ܥܠܝܗ̇ ܟܡܐ̈ܢܐ ܘܢܦܬܚ ܦܘܡܗ ܒܥܘܫܢܗ ܘܢܪܝܡ ܩܠܗ ܒܩܥܬܐ ܘܢܩܝܡ ܬ̈ܠܠܐ ܠܘܩܒܠ ܬܪ̈ܥܝܗ̇ ܘܢܟܡܢ ܟܡܐ̈ܢܐ ܘܢܒܢܐ ܕܘܩ̈ܐ

3. Ezekiel 21:28

   ܘܢܗܘܐ ܠܗܘܢ ܐܝܟ ܩܨܡܐ ܣܪܝܩܐ ܠܘܩܒܠ ܥܝ̈ܢܝܗܘܢ ܘܗܘ ܢܬܕܟܪ ܥܘ̣ܠܐ ܘܢܬܬܚܕ

4. Ezekiel 21:29

   ܡܛܠ ܗܢܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܥܠ ܕܐܬܕܟܪܬܘܢ ܥܘ̣ܠܟܘܢ ܒܫܒܝܬܐ ܕܚ̈ܛܗܝܟܘܢ ܘܚܙܝܬܘܢ ܚ̈ܛܗܝܟܘܢ ܘܟܠܗܝܢ ܨܢܥܬ̈ܟܘܢ ܒܐܝܕܐ ܬܬܚܕܘܢ

5. Ezekiel 21:30

   ܐܢܬ ܕܝܢ ܛܢܦܐ ܚܛܝܐ ܪܒܐ ܕܐܝܣܪܝܠ ܕܡܛܐ ܝܘܡܟ ܘܙܒܢܐ ܕܥܘ̣ܠܟ ܘܚܪܬܟ

6. Ezekiel 21:31

   ܗܟܢܐ ܐܡ̇ܪ ܡܪܐ ܡܪ̈ܘܬܐ ܣܒ ܡܢܟ ܡܨܢܦܬܐ ܘܐܢܝܚ ܡܢܟ ܟܠܝܠܐ ܡܟܝܟܐ ܐܪܝܡ ܘܪܡܐ ܐܡܟ

7. Ezekiel 21:32

   ܘܐܦ ܗܕܐ ܠܥܘ̣ܠܐ ܘܠܥܬܐ ܐܥܒܕܝܗ̇ ܥܕܡܐ ܕܢܐܬܐ ܡ̇ܢ ܕܕܝܠܗ ܗܘ ܕܝܢܐ ܘܐܫܠܡܝܘܗܝ ܠܗ

8. Ezekiel 21:33

   ܐܢܬ ܕܝܢ ܒܪܢܫܐ ܐܬܢܒܐ ܘܐܡܪ ܗܟܢܐ ܐܡ̇ܪ ܡܪܐ ܡܪ̈ܘܬܐ ܥܠ ܒܢ̈ܝ ܥܡܘܢ ܘܥܠ ܚܣܕܗܘܢ ܘܐܡܪ ܣܝܦܐ ܣܝܦܐ ܕܡܛܝܒ ܠܩܛܠܐ ܘܠܛܝܫ ܘܡܒܪܩ

9. Ezekiel 21:34

   ܥܠ ܚܙܘܟܘܢ ܣܪܝܩܐ ܘܥܠ ܩܨܡܟܘܢ ܕܓܠܐ ܠܡܬܠܟ ܥܠ ܨܘܪ̈ܝܗܘܢ ܕܚ̈ܛܝܐ ܥ̇ܘ̈ܠܐ ܕܡܛܐ ܝܘܡܗܘܢ ܘܙܒܢܐ ܕܥܘ̇ܠܗܘܢ ܘܩܨܗܘܢ

10. Ezekiel 21:35

    ܐܬܚܡܠ ܒܚܠܬܟ ܒܐܬܪܐ ܕܐܬܝܠܕܬ ܒܗ ܘܬܡܢ ܐܕܘܢܟ

11. Ezekiel 21:36

    ܘܐܫܘܕ ܥܠܝܟ ܪܘܓܙܝ ܘܒܢܘܪܐ ܕܚܡܬܝ ܐܦܘܚ ܒܟ ܘܐܫܠܡܟ ܒܐܝܕܐ ܕܓܒܪ̈ܐ ܒܥܪ̈ܝܪܝܐ ܕܣܥ̇ܪ̈ܝܢ ܚܒܠܐ

12. Ezekiel 21:37

    ܘܬܗܘܐ ܡܐܟܘܠܬܐ ܠܢܘܪܐ ܘܕܡܟ ܢܗܘܐ ܒܓܘ ܐܪܥܐ ܘܠܐ ܬܬܕܟܪ ܡܛܠ ܕܐܢܐ ܐܢܐ ܡܪܝܐ ܡܠܠ̇ܬ

13. Ezekiel 22:1

    ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ

14. Ezekiel 22:2

    ܐܢܬ ܕܝܢ ܒܪܢܫܐ ܕܘܢ ܠܡܕܝܢܬܐ ܕܕܡܐ ܘܐܘܕܥܝܗ̇ ܟܠܗ̇ ܛܢܦܘܬܗ̇

15. Ezekiel 22:3

    ܘܐܡܪ ܗܟܢܐ ܐܡ̇ܪ ܡܪܐ ܡܪ̈ܘܬܐ ܡܕܝܢܬܐ ܕܐܬܐܫܕ ܕܡܐ ܒܓܘܗ̇ ܡܛܝ ܙܒܢܗ̇ ܘܥܒܕܬ ܦܬܟܪ̈ܐ ܒܓܘܗ̇ ܘܐܬܛܢܦܬ

16. Ezekiel 22:4

    ܒܕܡܐ ܕܐܫܕܬܝ ܐܬܚܝܒܬܝ ܘܒܦܬܟܪ̈ܐ ܕܥܒܕܬܝ ܐܬܛܡܐܬܝ ܩܪܒܘ ܝܘܡ̈ܝܟܝ ܘܡܛܝ ܙܒܢܐ ܕܫܢܝܟܝ ܡܛܠ ܗܢܐ ܝܗ̇ܒܬܟܝ ܚܣܕܐ ܠܥܡ̈ܡܐ ܘܡܘܝܩܐ ܠܟܠܗܝܢ ܡܕܝܢ̈ܬܐ

17. Ezekiel 22:5

    ܐܝܠܝܢ ܕܪ̈ܚܝܩܢ ܡܢܟܝ ܘܐܝܠܝܢ ܕܩܪ̈ܝܒܢ ܠܟܝ ܢܡ̈ܝܩܢ ܒܟܝ ܘܢܐܡܪ̈ܢ ܛܢܦܬܐ ܕܫ̈ܡܗܬܗ̇ ܘܣܓܝܐܬ ܒܥܘ̈ܠܝܗ̇

18. Ezekiel 22:6

    ܗܐ ܪ̈ܘܪܒܢܐ ܕܐܝܣܪܝܠ ܐܢܫ ܠܫܪܒܬܗ ܗܘܘ ܒܟܝ ܕܢܐܫܕܘܢ ܕܡܐ

19. Ezekiel 22:7

    ܠܐܒܐ ܘܠܐܡܐ ܨܚܝܘ ܒܟܝ ܘܠܐܝܢܐ ܕܡܬܦܢܐ ܠܘܬܝ ܛܠܡܘ ܒܓܘܟܝ ܘܠܝܬ̈ܡܐ ܘܠܐܪ̈ܡܠܬܐ ܥܠܒܘ ܒܟܝ

20. Ezekiel 22:8

    ܘܩܘ̈ܕܫܝ ܐܣܠܝܬܝ ܘܫ̈ܒܝ ܛܘܫܬܝ

21. Ezekiel 22:9

    ܘܓܒܪ̈ܐ ܬܓܪ̈ܐ ܗܘܘ ܒܟܝ ܕܢܐܫܕܘܢ ܕܡܐ ܘܥܠ ܛܘܪ̈ܐ ܐܟܠܘ ܒܟܝ ܘܚܛܝܬܐ ܥܒܕܘ ܒܓܘܟܝ

22. Ezekiel 22:10

    ܘܦܘܪܣܝܐ ܕܐܒܐ ܓܠܘ ܒܟܝ ܘܛܢܦܘܬܐ ܕܟܦܣܢܝܬܐ ܥܒܕܘ ܒܓܘܟܝ

23. Ezekiel 22:11

    ܘܓܒܪ ܠܐܢܬܬ ܚܒܪܗ ܛܢܦܘ ܘܓܒܪ ܠܟܠܬܗ ܛܢܦܘ ܒܙܢܝܘܬܐ ܘܓܒܪ ܠܚܬܗ ܒܪܬ ܐܒܘܗܝ ܨܥܪܘ ܒܟܝ

24. Ezekiel 22:12

    ܘܫܘܚܕܐ ܢܣܒܘ ܒܟܝ ܕܢܐܫܕܘܢ ܕܡܐ ܘܪܒܝܬܐ ܢܣܒܘ ܒܟܝ ܘܝܬܝܪܐ ܫܩܠܘ ܒܟܝ ܘܢܟܠܘ ܠܪ̈ܚܡܝܗܘܢ ܒܛܠܘܡܝܐ ܘܠܝ ܛܥܝܬܝ ܐܡ̇ܪ ܡܪܐ ܡܪ̈ܘܬܐ

25. Ezekiel 22:13

    ܐܦ ܐܢܐ ܐܛܪܦ ܐܝܕܝ ܥܠ ܐܝܕܝ ܥܠ ܥܘ̣ܠܐ ܕܥܒܕܬܝ ܘܥܠ ܕܡܐ ܕܐܬܐܫܕ ܒܓܘܟܝ

26. Ezekiel 22:14

    ܐܢ ܩܐ̇ܡ ܠܒܟܝ ܘܐܢ ܡܚܡ̈ܣܢܢ ܐܝ̈ܕܝܟܝ ܠܝܘ̈ܡܬܐ ܕܥܒ̇ܕ ܐܢܐ ܐܢܐ ܡܪܝܐ ܡܠܠ̇ܬ ܘܥܒ̇ܕܬ

27. Ezekiel 22:15

    ܘܐܒܕܪܟܝ ܒܥܡ̈ܡܐ ܘܐܕܪܝܟܝ ܒܡ̈ܕܝܢܬܐ

28. Ezekiel 22:16

    ܘܐܪܬܟܝ ܠܥܝܢ ܥܡ̈ܡܐ ܘܬܕܥܝܢ ܕܐܢܐ ܐܢܐ ܡܪܝܐ

29. Ezekiel 22:17

    ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ

30. Ezekiel 22:18

    ܒܪܢܫܐ ܗܘܘ ܠܝ ܕܒܝܬ ܐܝܣܪܝܠ ܡܣ̈ܠܝܐ ܟܠܗܘܢ ܐܝܟ ܢܚܫܐ ܘܐܝܟ ܐܢܟܐ ܘܐܝܟ ܦܪܙܠܐ ܘܐܝܟ ܐܒܪܐ ܒܓܘ ܟܘܪܐ ܕܚܠܝܛܝܢ ܒܣܐܡܐ

31. Ezekiel 22:19

    ܡܛܠ ܗܢܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܥܠ ܕܐܬܚܠܛܬܘܢ ܟܠܟܘܢ ܗܐ ܡܟܢܫ ܐܢܐ ܠܟܘܢ ܠܓܘ ܐܘܪܫܠܡ

32. Ezekiel 22:20

    ܐܝܟ ܕܡܬܟܢܫ ܣܐܡܐ ܘܢܚܫܐ ܘܦܪܙܠܐ ܘܐܢܟܐ ܘܐܒܪܐ ܒܓܘ ܟܘܪܐ ܘܢܦ̇ܚܝܢ ܒܗܘܢ ܢܘܪܐ ܕܢܬܦܫܪܘܢ ܗܟܢܐ ܐܟܢܫܟܘܢ ܒܪܘܓܙܝ ܘܒܚܡܬܝ ܐܦܫܪܟܘܢ

33. Ezekiel 22:21

    ܘܐܦܘܚ ܥܠܝܟܘܢ ܢܘܪܐ ܕܪܘܓܙܝ ܘܐܦܫܪܟܘܢ ܒܓܘܗ̇

34. Ezekiel 22:22

    ܐܝܟ ܕܡܬܦܫܪ ܣܐܡܐ ܒܓܘ ܟܘܪܐ ܗܟܢܐ ܬܬܦܫܪܘܢ ܒܓܘܗ̇ ܘܬܕܥܘܢ ܕܐܢܐ ܐܢܐ ܡܪܝܐ ܐܫ̇ܕܬ ܚܡܬܝ ܥܠܝܟܘܢ

35. Ezekiel 22:23

    ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ

36. Ezekiel 22:24

    ܒܪܢܫܐ ܐܡܪ ܠܗ̇ ܐܢܬܝ ܐܪܥܐ ܠܐ ܗܘܝܬܝ ܕܟܝܐ ܘܠܐ ܐܨܛܒܥܬܝ ܘܠܐ ܢܚܬ ܥܠܝܟܝ ܡܛܪܐ

37. Ezekiel 22:25

    ܡܪܕܘ ܢܒܝ̈ܝܗ̇ ܒܓܘܗ̇ ܐܝܟ ܐܪܝܐ ܕܢܗ̇ܡ ܘܬ̇ܒܪ ܬܒܪܐ ܐܟܠܘ ܢܦܫ̈ܬܐ ܒܥܫܝܢܘܬܗܘܢ ܘܐܝܩܪܐ ܕܣܚܪ̈ܬܗܘܢ ܢܣܒܘ

38. Ezekiel 22:26

    ܟܗ̈ܢܝܗ̇ ܐܥܠܝܘ ܒܢܡܘܣܝ ܘܛܘܫܘ ܩܘܕܫܝ ܘܒܝܬ ܩܘܕܫܐ ܠܛܡܐܐ ܠܐ ܦܪܫܘ ܘܒܝܬ ܡܣܝܒܐ ܠܕܟܝܐ ܠܐ ܝܕܥܘ ܘܡܢ ܫܒ̈ܝ ܐܡܟܘ ܥܝܢ̈ܝܗܘܢ ܘܐܬܛܘ̇ܫܬ ܒܝܢܬܗܘܢ

39. Ezekiel 22:27

    ܪ̈ܘܪܒܢܝܗ̇ ܒܓܘܗ̇ ܐܝܟ ܕܐ̈ܒܐ ܚܛ̇ܦܝܢ ܠܡܐܫܕ ܕܡܐ ܘܠܡܘܒܕܘ ܢܦܫ̈ܬܐ ܕܢܩܢܘܢ ܩܢܝܢܐ

40. Ezekiel 22:28

    ܘܢܒܝ̈ܝܗ̇ ܛܪܘ ܠܗ̇ ܛܪܝܐ ܕܬܦܠ ܚܙܘ ܠܗܘܢ ܣܪܝܩܘܬܐ ܘܩܨܡܘ ܠܗܘܢ ܕܓܠܘܬܐ ܘܐܡ̇ܪܝܢ ܗܟܢܐ ܐܡ̇ܪ ܡܪܝܐ ܘܡܪܝܐ ܠܐ ܐܡܪ

41. Ezekiel 22:29

    ܠܥܡܐ ܕܐܪܥܐ ܛܠܡܘ ܘܬܟܘ ܘܥܠܒܘ ܠܡܣ̈ܟܢܐ ܘܠܒ̇ܝܫ̈ܐ ܘܠܕܡܬܦܢܐ ܠܘܬܝ ܛܠܡܘ ܕܠܐ ܒܕܝܢܐ

42. Ezekiel 22:30

    ܘܒܥ̇ܝܬ ܒܗܘܢ ܓܒܪܐ ܕܣܐ̇ܓ ܣܝܓܐ ܘܩܐ̇ܡ ܒܬܘܪܥܬܐ ܩܕܡܝ ܥܠ ܐ̈ܦܝܗ̇ ܕܐܪܥܐ ܕܠܐ ܐܚܒܠܝܗ̇ ܘܠܐ ܐܫܟܚ̇ܬ

43. Ezekiel 22:31

    ܘܐܫ̇ܕܬ ܥܠܝܗܘܢ ܪܘܓܙܝ ܘܒܢܘܪܐ ܕܚܡܬܝ ܐܣܝ̇ܦܬ ܐܢܘܢ ܐܘܪ̈ܚܬܗܘܢ ܦܪܥ̇ܬ ܒܪܫܗܘܢ ܐܡ̇ܪ ܡܪܐ ܡܪ̈ܘܬܐ

44. Ezekiel 23:1

    ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ

45. Ezekiel 23:2

    ܒܪܢܫܐ ܬܪ̈ܬܝܢ ܢܫ̈ܝܢ ܐܝܬ ܗ̈ܘܝ ܒܢ̈ܬ ܚܕܐ ܐܡܐ

46. Ezekiel 23:3

    ܘܙ̈ܢܝ ܒܡܨܪܝܢ ܒܛܠܝܘܬܗܝܢ ܬܡܢ ܡ̇ܪܣܘ ܬܕܝ̈ܗܝܢ ܘܬܡܢ ܐܬܒܬܠ

47. Ezekiel 23:4

    ܫܡܗ̇ ܕܩܫܝܫܬܐ ܐܗܠܐ ܘܫܡܗ̇ ܕܐܚܪܬܐ ܐܗܠܝܒܐ ܘܗ̈ܘܝ ܠܝ ܘܝܠܕ ܒܢ̈ܝܐ ܘܒܢ̈ܬܐ ܫܡܗ̇ ܕܫܡܪܝܢ ܐܗܠܐ ܘܕܐܘܪܫܠܡ ܐܗܠܝܒܐ

48. Ezekiel 23:5

    ܘܙܢܝܬ ܐܗܠܐ ܡܢܝ ܘܢܩܦܬ ܠܪ̈ܚܡܝܗ̇ ܠܐܬܘܪ̈ܝܐ ܕܩܪܝܒܝܢ ܠܗ̇

49. Ezekiel 23:6

    ܕܠܒܝܫܝܢ ܬܟܠܬܐ ܡܪ̈ܘܬܐ ܘܫ̈ܠܝܛܢܐ ܓܕܘ̈ܕܐ ܕܪܓܬܐ ܟܠܗܘܢ ܦܪ̈ܫܐ ܪ̈ܟܒܝ ܪ̈ܟܫܐ

50. Ezekiel 23:7

    ܘܐܪܡܝܬ ܙܢܝܘܬܗ̇ ܥܠܝܗܘܢ ܥܠ ܟܠܗܘܢ ܓܒ̈ܝܐ ܕܒܢ̈ܝ ܐܬܘܪ ܘܥܠ ܟܠ ܕܐܬܢܩܦܬ ܒܦܬܟܪ̈ܝܗܘܢ ܘܐܬܛܘܫܬ

51. Ezekiel 23:8

    ܘܙܢܝܘܬܗ̇ ܕܒܡܨܪܝܢ ܠܐ ܫܒܩܬ ܡܛܠ ܕܠܗ̇ ܨܥܪܘ ܒܛܠܝܘܬܗ̇ ܘܗܢܘܢ ܒܬܠܘܗ̇ ܘܐܪܡܝܘ ܥܠܝܗ̇ ܙܢܝܘܬܗܘܢ

52. Ezekiel 23:9

    ܡܛܠ ܗܢܐ ܗܐ ܐܫܠܡ̇ܬܗ̇ ܒܐܝܕܐ ܕܪ̈ܚܡܝܗ̇ ܒܐܝܕܐ ܕܒܢܝ̈ ܐܬܘܪ ܕܐܬܢܩܦܬ ܠܗܘܢ

53. Ezekiel 23:10

    ܗܢܘܢ ܓܠܘ ܦܘܪܣܝܗ̇ ܘܕܒܪܘ ܒ̈ܢܝܗ̇ ܘܒܢ̈ܬܗ̇ ܘܠܗ̇ ܩܛܠܘ ܒܚܪܒܐ ܘܗܘܬ ܬܡܢ ܡܡܠܠܐ ܠܢܫ̈ܐ ܘܕܝ̈ܢܐ ܥܒܕܘ ܒܗ̇

54. Ezekiel 23:11

    ܘܚܙܬ ܚܬܗ̇ ܐܗܠܝܒܐ ܘܚܒܠܬ ܢܩܦܗ̇ ܝܬܝܪ ܡܢܗ̇ ܘܙܢܝܘܬܗ̇ ܝܬܝܪ ܡܢ ܙܢܝܘܬܐ ܕܚܬܗ̇

55. Ezekiel 23:12

    ܠܒܢ̈ܝ ܐܬܘܪ ܢܩܦܬ ܠܡܪ̈ܘܬܐ ܘܠܫ̈ܠܝܛܢܐ ܕܩܪ̈ܝܒܝܢ ܠܗ̇ ܦܪ̈ܫܐ ܠܒܝܫ̈ܝ ܬܟܠܬܐ ܘܪ̈ܟܒܝ ܪ̈ܟܫܐ ܟܠܗܘܢ ܓܕܘ̈ܕܐ ܐܢܘܢ ܕܪܓܬܐ

56. Ezekiel 23:13

    ܘܚܙ̇ܝܬ ܕܐܬܛܢܦܬ ܐܘܪܚܐ ܕܬܪ̈ܬܝܗܝܢ

57. Ezekiel 23:14

    ܘܐܬܬܘܣܦ ܥܠ ܙܢܝܘܬܗܝܢ ܘܚ̈ܙܝ ܓܒܪ̈ܐ ܕܨܝܪ̈ܝܢ ܒܐܣܬܐ ܨ̈ܠܡܐ ܕܟ̈ܠܕܝܐ ܕܨܝܪ̈ܝܢ ܒܣܡ̈ܡܢܐ

58. Ezekiel 23:15

    ܘܚܙܝܩܝܢ ܡܚ̈ܙܩܬܐ ܒܚ̈ܨܝܗܘܢ ܘܥܪ̈ܩܐ ܩܛܝܪ̈ܢ ܒܪ̈ܝܫܝܗܘܢ ܚܙܘܐ ܐܢܘܢ ܕܓܒܪ̈ܐ ܟܠܗܘܢ ܕܡܘܬܐ ܐܢܘܢ ܕܒܢ̈ܝ ܒܒܠ ܘܕܟ̈ܠܕܝܐ ܐܪܥܐ ܕܐܬܝܠܕܘ ܒܗ̇

59. Ezekiel 23:16

    ܘܐܬܢܩܦܬ ܠܗܘܢ ܒܚܙܘܐ ܕܥܝ̈ܢܝܗ̇ ܘܫܕܪܬ ܥܠܝܗܘܢ ܡܠܐ̈ܟܐ ܠܐܪܥܐ ܕܟ̈ܠܕܝܐ

60. Ezekiel 23:17

    ܘܐܬܘ ܠܘܬܗ̇ ܒܢ̈ܝ ܒܒܠ ܠܡܕܡܟ ܥܡܗ̇ ܘܛܢܦܘܗ̇ ܒܙܢܝܘܬܗܘܢ ܘܐܬܛܢܦܬ ܒܗܘܢ ܘܢܕܬ ܢܦܫܗ̇ ܡܢܗܘܢ

61. Ezekiel 23:18

    ܘܓܠܬ ܙܢܝܘܬܗ̇ ܘܓܠܬ ܦܘܪܣܝܗ̇ ܘܢܕܬ ܢܦܫܝ ܡܢܗ̇ ܐܝܟ ܕܢܕܬ ܢܦܫܝ ܡܢ ܚܬܗ̇

62. Ezekiel 23:19

    ܘܐܣܓܝܬ ܙܢܝܘܬܗ̇ ܘܐܬܕܟܪܬ ܝܘܡ̈ܬܐ ܕܛܠܝܘܬܗ̇ ܕܙܢܝܬ ܒܐܪܥܐ ܕܡܨܪܝܢ

63. Ezekiel 23:20

    ܘܐܬܢܩܦܬ ܠܥܒ̈ܕܝܗܘܢ ܕܒܣܪܗܘܢ ܐܝܟ ܒܣܪܐ ܗܘ ܕܚܡܪܐ ܘܚ̈ܢܝܗܘܢ ܐܝܟ ܚ̈ܢܐ ܕܪ̈ܟܫܐ

64. Ezekiel 23:21

    ܘܦܩܕܬܝ ܥܘ̣ܠܐ ܕܛܠܝܘܬܟܝ ܟܕ ܐܬܒܬܠܬܝ ܒܡܨܪܝܢ ܘܐܬܡܪܣܘ ܬ̈ܕܝ ܛܠܝܘܬܟܝ

65. Ezekiel 23:22

    ܡܛܠ ܗܢܐ ܐܗܠܝܒܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܗܐ ܡܥܝܪ ܐܢܐ ܥܠܝܟܝ ܠܟܠܗܘܢ ܪ̈ܚܡܝܟܝ ܕܢܕܬ ܢܦܫܟܝ ܡܢܗܘܢ ܘܐܝܬܐ ܐܢܘܢ ܥܠܝܟܝ

66. Ezekiel 23:23

    ܘܢܚܕܪܘܢܟܝ ܒܢ̈ܝ ܒܒܠ ܘܟܠܗܘܢ ܟ̈ܠܕܝܐ ܘܦܘܛ ܘܠܘܕ ܘܩܘܥ ܘܟܠܗܘܢ ܒܢ̈ܝ ܐܬܘܪ ܥܡܗܘܢ ܓܕܘ̈ܕܐ ܕܪܓܬܐ ܡܪ̈ܘܬܐ ܘ̈ܫܠܝܛܢܐ ܟܠܗܘܢ ܓܒܪ̈ܐ ܕܩܕܪ ܪ̈ܟܒܝ ܪ̈ܟܫܐ

67. Ezekiel 23:24

    ܘܢܐܬܘܢ ܥܠܝܟܝ ܟܕ ܡܙܝܢܝܢ ܒܡܪ̈ܟܒܬܐ ܘܒ̈ܓܝܓܠܐ ܘܒܟܢ̈ܫܐ ܕܥܡ̈ܡܐ ܒ̈ܢܝܙܟܐ ܘܒܣܟܪ̈ܐ ܘܒܣܢܘܪ̈ܬܐ ܢܟܪܟܘܢܟܝ ܘܐܬܠ ܩܕܡܝܗܘܢ ܕܝܢ̈ܐ ܘܢܕܘܢܘܢܟܝ ܒܕܝܢ̈ܝܗܘܢ

68. Ezekiel 23:25

    ܘܐܬܠ ܒܟܝ ܛܢܢܝ ܘܢܬܒܪܘܢ ܢܚܝܪ̈ܝܟܝ ܒܚܡܬܐ ܘܐ̈ܕܢܝܟܝ ܢܥܩܪܘܢ ܘܚܪܬܟܝ ܒܚܪܒܐ ܬܦܠ ܗܢܘܢ ܢܕܒܪܘܢ ܒܢܝ̈ܟܝ ܘܒܢ̈ܬܟܝ ܘܚܪܬܟܝ ܬܬܐܟܠ ܒܢܘܪܐ

69. Ezekiel 23:26

    ܘܢܣܒܘܢ ܡܐ̈ܢܐ ܕܫܘܒܚܟܝ ܘܢܫܠܚܘܢܟܝ ܠܒܘܫ̈ܝܟܝ

70. Ezekiel 23:27

    ܘܐܒܛܠ ܬܪܥܝܬܟܝ ܡܢܟܝ ܘܙܢܝܘܬܟܝ ܡܢ ܐܪܥܐ ܕܡܨܪܝܢ ܘܠܐ ܬܪܝܡܝܢ ܥܝܢ̈ܝܟܝ ܥܠܝܗܘܢ ܘܠܡܨܪܝܢ ܬܘܒ ܠܐ ܬܬܕܟܪܝܢ

71. Ezekiel 23:28

    ܡܛܠ ܗܢܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܗܐ ܡܫܠܡ ܐܢܐ ܠܟܝ ܒܝܕ ܐܝܠܝܢ ܕܣܢܝܬܝ ܒܝܕ ܐܬܘܪ̈ܝܐ ܕܢܕܬ ܢܦܫܟܝ ܡܢܗܘܢ

72. Ezekiel 23:29

    ܘܢܡܚܘܢܟܝ ܒܣܢܐܬܗܘܢ ܘܢܣܒܘܢ ܟܘܠܗ̇ ܠܐܘܬܟܝ ܘܢܫܒܩܘܢܟܝ ܥܪܛܠ ܘܥܪܝܬ ܘܢܬܓܠܐ ܦܘܪܣܝܐ ܕܙܢܝܘܬܟܝ ܘܕܥܘ̣ܠܟܝ

73. Ezekiel 23:30

    ܘܒܙܢܝܘܬܟܝ ܐܬܥܒܕ ܠܟܝ ܗܠܝܢ ܕܙܢܝܬܝ ܒܬܪ ܥܡ̈ܡܐ ܘܐܬܛܢܦܬܝ ܒܦܬܟܪ̈ܝܗܘܢ

74. Ezekiel 23:31

    ܘܥܠ ܕܗܠܟܬܝ ܒܐܘܪ̈ܚܬܗ̇ ܕܚܬܟܝ ܐܬܠ ܟܣܗ̇ ܒܐ̈ܝܕܝܟܝ

75. Ezekiel 23:32

    ܗܟܢܐ ܐܡ̇ܪ ܡܪܐ ܡܪ̈ܘܬܐ ܟܣܐ ܕܚܬܟܝ ܬܫܬܝܢ ܥܡܝܩܐ ܘܪܘܝܚܐ ܘܬܗܘܝܢ ܠܓܘܚܟܐ ܘܠܡܘܝܩܐ ܪܒܐ ܘܓܡܝܪܐ

76. Ezekiel 23:33

    ܪܘܝܘܬܐ ܘܕܐܘܘܐܢܐ ܬܬܡܠܝܢ ܟܣܐ ܕܬܡܗܐ ܘܕܚܒܠܐ ܟܣܐ ܕܚܬܟܝ ܫܡܪܝܢ

77. Ezekiel 23:34

    ܬܫܬܝܢܗ ܘܬܡܨܝܢܗ ܘܣܥܪܟܝ ܬܓܙܝܢ ܘܬܕܝ̈ܟܝ ܬܩܛܥܝܢ ܡܛܠ ܕܐܢܐ ܡܠܠ̇ܬ ܐܡ̇ܪ ܡܪܐ ܡܪ̈ܘܬܐ

78. Ezekiel 23:35

    ܡܛܠ ܗܢܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܥܠ ܕܛܥܝܬܝܢܝ ܘܐܫܬܕܝܬܝ ܒܬܪ ܕܚ̈ܠܬܟܝ ܐܦ ܐܢܬܝ ܩܒܠܝ ܥܘ̣ܠܟܝ ܘܙܢܝܘܬܟܝ

79. Ezekiel 23:36

    ܘܐܡܪ ܠܝ ܡܪܝܐ ܒܪܢܫܐ ܕܘܢ ܠܐܗܠܐ ܘܠܐܗܠܝܒܐ ܘܚܘܐ ܐ̈ܢܝܢ ܛܢܦܘܬܗܝܢ

80. Ezekiel 23:37

    ܕܓܪ ܘܕܡܐ ܐܝܬ ܒܐܝ̈ܕܝܗܝܢ ܘܒܦܬܟܪ̈ܝܗܝܢ ܓܪ ܘܒܢܝ̈ܗܝܢ ܕܝܠܕ ܠܝ ܐ̈ܘܩܕܝܢ ܠܗܘܢ ܒܢܘܪܐ

81. Ezekiel 23:38

    ܘܗܕܐ ܐܚܪܬܐ ܕܥܒܕ ܠܝ ܛܢܦ ܡܩܕܫܝ ܒܗ ܒܝܘܡܐ ܗ̇ܘ ܘܫ̈ܒܝ ܛܘܫ

82. Ezekiel 23:39

    ܘܟܕ ܢܟܣ ܗ̈ܘܝ ܒܢܝ̈ܗܝܢ ܠܦܬܟܪ̈ܝܗܝܢ ܥܠ ܠܡܩܕܫܝ ܒܗ ܒܝܘܡܐ ܗ̇ܘ ܘܛܘܫ̈ܝܗܝ ܗܟܢܐ ܥܒܕ ܒܓܘ ܒܝܬܝ

83. Ezekiel 23:40

    ܘܐܦ ܫܠܚ ܥܠ ܓܒܪ̈ܐ ܕܐܬ̇ܝܢ ܠܘܬܗܝܢ ܡܢ ܪܘܚܩܐ ܗ̇ܢܘܢ ܕܫܕܪ ܥܠܝܗܘܢ ܡܠܐ̈ܟܐ ܘܟܕ ܐܬܘ ܒܪܫܥܬܗ ܣܚ̈ܝ ܘܟܚܠ ܥܝܢ̈ܝܗܝܢ ܘܐܨܛܒܬ ܨܒܬܗܝܢ

84. Ezekiel 23:41

    ܘܝܬܒ ܥܠ ܥܪ̈ܣܬܐ ܕܩܪ̈ܝܡܢ ܘܦܬܘܪ̈ܐ ܐܣܬܕܪܘ ܩܕܡܝܗܝܢ ܘܡܫܚܝ ܘܒܣ̈ܡܝ ܫܩܠ ܥܠܝܗܝܢ

85. Ezekiel 23:42

    ܘܩܠܐ ܕܚܕܘܬܗܝܢ ܐ̇ܙܠ ܗܘܐ ܘܐܦ ܕܓܒܪ̈ܐ ܕܐܬܘ ܡܢ ܫܒܐ ܘܡܢ ܡܕܒܪܐ ܘܐܪܡܝܘ ܫܐܪ̈ܐ ܒܐ̈ܝܕܝܗܝܢ ܘܟܠܝܠܐ ܕܫܘܒܚܐ ܒܪ̈ܝܫܝܗܝܢ

86. Ezekiel 23:43

    ܘܐ̇ܡܪܬ ܒܗܠܝܢ ܓܪ ܘܒܥ̇ܒ̈ܕܐ ܕܙܢܝ̈ܬܐ ܙܢ̈ܝ

87. Ezekiel 23:44

    ܘܥܐ̇ܠܝܢ ܗܘܘ ܠܘܬܗܝܢ ܐܝܟ ܕܥܐ̇ܠܝܢ ܠܘܬ ܐܢܬܬܐ ܙܢܝܬܐ ܗܟܢܐ ܥܐ̇ܠܝܢ ܗܘܘ ܥܠ ܐܗܠܐ ܘܥܠ ܐܗܠܝܒܐ ܢܫ̈ܐ ܙܢܝ̈ܬܐ

88. Ezekiel 23:45

    ܘܓܒܪ̈ܐ ܙܕܝܩ̈ܐ ܢܕܘܢܘܢ ܐܢܝ̈ܢ ܕܝܢܐ ܕܓܝܪ̈ܬܐ ܘܕܝܢܐ ܕܐܝܠܝܢ ܕܐ̈ܫܕܢ ܕܡܐ ܡܛܠ ܕܓܝܪ̈ܬܐ ܐ̈ܢܝܢ ܘܕܡܐ ܐܝܬ ܒܐ̈ܝܕܝܗܝܢ

89. Ezekiel 23:46

    ܡܛܘܠ ܕܗܟܢܐ ܐܡ̇ܪ ܡܪܐ ܡܪ̈ܘܬܐ ܐܣܩ ܥܠܝܗܝܢ ܟܢܘܫܝܐ ܘܗܒ ܐܢܝ̈ܢ ܠܙܘܥܬܐ ܘܠܒܙܬܐ

90. Ezekiel 23:47

    ܘܢܪܓܘܡ ܐܢܝ̈ܢ ܟܢܫܐ ܒܟܐ̈ܦܐ ܘܢܡܚܘܢ ܐܢܝ̈ܢ ܒܣ̈ܝܦܝܗܘܢ ܘܠܒܢܝ̈ܗܝܢ ܘܠܒܢܬ̈ܗܝܢ ܢܩܛܠܘܢ ܘܒܬ̈ܝܗܝܢ ܢܘܩܕܘܢ ܒܢܘܪܐ

91. Ezekiel 23:48

    ܘܐܒܛܠ ܥܘ̣ܠܐ ܡܢ ܐܪܥܐ ܘܢܬܪ̈ܕܝܢ ܟܠܗܝܢ ܢܫ̈ܐ ܘܠܐ ܢܥܒ̈ܕܢ ܐܝܟ ܙܢܝܘܬܟܝܢ

92. Ezekiel 23:49

    ܘܐܬܠ ܙܢܝܘܬܟܝܢ ܥܠܝܟܝܢ ܘܚ̈ܛܗܐ ܕܦܬܟܪ̈ܝܟܝܢ ܬܩ̈ܒܠܢ ܘܬ̈ܕܥܢ ܕܐܢܐ ܐܢܐ ܡܪܝܐ

93. Ezekiel 24:1

    ܘܗܘܐ ܥܠܝ ܦܬܓܡܗ ܕܡܪܝܐ ܒܫܢܬܐ ܬܫܝܥܝܬܐ ܒܥܣܪܬܐ ܒܝܪܚܐ ܕܥܣܪܐ ܠܡܐܡܪ

94. Ezekiel 24:2

    ܒܪ ܐܢܫܐ ܟܬܘܒ ܠܟ ܫܡܗ ܕܝܘܡܐ ܗܢܐ ܕܣ̇ܡܟ ܡܠܟܐ ܕܒܒܠ ܠܐܘܪܫܠܡ ܒܗ ܒܝܘܡܐ ܗܢܐ

95. Ezekiel 24:3

    ܘܐܡܬܠ ܡܬܠܐ ܥܠ ܒܝܬܐ ܡܡܪܡܪܢܐ ܘܐܡܪ ܠܗܘܢ ܗܟܢܐ ܐܡ̇ܪ ܡܪܐ ܡܪ̈ܘܬܐ ܬܦܝ ܩܕܣܐ ܘܣܘܟ ܒܗ ܡ̈ܝܐ

96. Ezekiel 24:4

    ܘܐܪܡܐ ܒܗ ܢܩܣ̈ܐ ܕܛܒܝ̈ܢ ܘܫܡܝܢ̈ܝܢ ܟܬܦܐ ܕܫܡܝܛ ܓܪܡܗ̇

97. Ezekiel 24:5

    ܡܢ ܓܒ̈ܝܐ ܕܥܢܐ ܘܓܪ̈ܡܐ ܬܚܝܬ ܩܕܣܐ ܫܓܘܪ ܐܢܘܢ ܘܐܘܩܕ ܐܢܘܢ ܬܚܘܬܘܗܝ

98. Ezekiel 24:6

    ܡܛܠ ܕܗܟܢܐ ܐܡ̇ܪ ܡܪܐ ܡܪ̈ܘܬܐ ܐܘ ܡܕܝܢܬܐ ܕܕܡܐ ܕܩܕܣܐ ܬܦܐ ܒܗ̇ ܘܥܘ̣ܠܗ̇ ܠܐ ܢܦܩ ܡܢܗ̇ ܗܕܡ ܗܕܡ ܦܘܣܩܘܗ̇ ܘܦܣܐ ܠܐ ܢܦܠ ܥܠܝܗ̇

99. Ezekiel 24:7

    ܡܛܠ ܕܕܡܗ̇ ܒܓܘܗ̇ ܗܘܐ ܘܥܠ ܟܐܦܐ ܣܡ̇ܬܗ ܘܠܐ ܐܫܕܬܗ ܒܐܪܥܐ ܕܠܐ ܢܬܟܣܐ ܥܠܘܗܝ ܥܦܪܐ

100. Ezekiel 24:8

     ܕܬܣܩ ܚܡܬܐ ܠܦܘܪܥܢܘܬܐ ܝܗ̇ܒܬ ܕܡܗ̇ ܥܠ ܟܐܦܐ ܫܥܝܥܬܐ ܕܠܐ ܢܬܟܣܐ

← Previous · Next → — showing 501–600 of 1,271

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.