Peshitta Ezekiel

ܘܒܙܒܢܐ ܕܥܕܥܐܕܐ ܢܗܘܐ ܣܡܝܕܐ ܣܐܬܐ ܠܬܘܪܐ ܘܣܐܬܐ ܠܕܟܪܐ ܘܠܐܡܪܐ ܐܢܫ ܐܝܟ ܕܡ̇ܛܐ ܒܐ̈ܝܕܘܗܝ ܡܫܚܐ ܕܝܢ ܗܡܝܢܐ ܠܣܐܬܐ

ܘܡܐ ܕܡܩܪܒ ܡܕܒܪܢܐ ܝܩ̈ܕܐ ܫ̈ܠܡܐ ܐܘ ܩܘܪ̈ܒܢܐ ܦܘܪܫܢܐ ܠܡܪܝܐ ܢܬܦܬܚ ܠܗ ܬܪܥܐ ܕܚܐ̇ܪ ܠܡܕܢܚܐ ܕܐܚܝܕ ܘܢܩܪܒ ܝܩ̈ܕܘܗܝ ܫ̈ܠܡܐ ܘܩܘܪ̈ܒܢܘܗܝ ܘܢܐܚܕܝܘܗܝ ܠܬܪܥܐ ܘܗܝܕܝܢ ܢܦܘܩ ܐܝܟ ܕܥܒ̇ܕ ܒܝܘܡܐ ܕܫܒܬܐ

ܘܐܡܪܐ ܒܪ ܫܢܬܐ ܕܠܝܬ ܒܗ ܡܘܡܐ ܢܗܘܐ ܡܩܪܒ ܒܝܘܡܐ ܝܩܕܐ ܫܠܡܐ ܠܡܪܝܐ ܡܢ ܨܦܪ ܠܨܦܪ

ܘܣܡܝܕܐ ܢܩܪܒ ܥܠܘܗܝ ܡܢ ܨܦܪ ܠܨܦܪ ܚܕ ܡܢ ܫܬܐ ܠܣܐܬܐ ܘܡܫܚܐ ܚܕܐ ܡܢ ܬܠܬ ܡܢ̈ܘܬܗ ܕܗܡܝܢܐ ܠܡܦܠܗ ܠܣܡܝܕܐ ܠܡܪܝܐ ܢܡܘܣܐ ܠܥܠܡ ܐܡܝܢܐܝܬ

ܘܢܩܪܒܘܢ ܐܡܪ̈ܐ ܘܣܡܝܕܐ ܘܡܫܚܐ ܡܢ ܨܦܪ ܠܨܦܪ ܝܩܕܐ ܫܠܡܐ ܐܡܝܢܐܝܬ

ܗܟܢܐ ܐܡ̇ܪ ܡܪܐ ܡܪ̈ܘܬܐ ܡܕܒܪܢܐ ܟܕ ܢܬܠ ܡܘܗܒܬܐ ܠܚܕ ܡܢ ܒܢ̈ܘܗܝ ܝܪܬܘܬܗ ܠܒ̈ܢܘܗܝ ܬܗܘܐ

ܘܟܕ ܢܬܠ ܡܘܗܒܬܐ ܡܢ ܝܪܬܘܬܗ ܠܚܕ ܡܢ ܥܒ̣̈ܕܘܗܝ ܬܗܘܐ ܠܗ ܥܕܡܐ ܠܫܢܬܐ ܕܡܬܚܪܪ ܘܬܗܘܐ ܠܗ ܠܡܕܒܪܢܐ ܝܪܬܘܬܐ ܕܝܢ ܕܒܢ̈ܘܗܝ ܠܗܘܢ ܬܗܘܐ

ܘܠܐ ܢܣܒ ܡܕܒܪܢܐ ܡܢ ܝܪܬܘܬܗ ܕܥܡܐ ܘܠܐ ܢܥܠܘܒ ܐܢܘܢ ܡܢ ܝܘܪܬܢܗܘܢ ܐܠܐ ܡܢ ܝܪܬܘܬܗ ܢܘܪܬ ܠܒܢ̈ܘܗܝ ܕܠܐ ܢܬܒܕܪܘܢ ܥܡܝ ܐܢܫ ܡܢ ܝܘܪܬܢܗ

ܘܐܥܠܢܝ ܒܡܥܠܢܐ ܕܥܠ ܓܢܒ ܬܪܥܐ ܕܐܟܣܕܪܐ ܓܘܝܬܐ ܕܩܘܕܫܐ ܕܟܗ̈ܢܐ ܕܚܝ̇ܪܐ ܠܓܪܒܝܐ ܘܚܙ̇ܝܬ ܕܐܝܬ ܬܡܢ ܐܬܪܐ ܒܫ̈ܦܘܠܝܗ̇ ܡܢ ܡܥܪܒܐ

ܘܐܡܪ ܠܝ ܗܢܘ ܐܬܪܐ ܕܡܒܫܠܝܢ ܒܗ ܟܗ̈ܢܐ ܬܕܟܝܬܐ ܕܚ̈ܛܗܐ ܘܐܦ̇ܝܢ ܒܗ ܣܡܝܕܐ ܕܠܐ ܢܦܩܘܢ ܠܕܪܬܐ ܒܪܝܬܐ ܘܢܩܕܫܘܢܗ ܠܥܡܐ

ܘܐܦܩܢܝ ܠܕܪܬܐ ܒܪܝܬܐ ܘܐܥܒܪܢܝ ܥܠ ܐܪ̈ܒܥܐ ܣܛܪ̈ܝܗ̇ ܕܕܪܬܐ ܘܚܙ̇ܝܬ ܕܪܬܐ ܒܣܛܪ ܕܪܬܐ ܘܕܪܬܐ ܐܚܪܬܐ ܒܣܛܪܐ ܐܚܪܢܐ ܕܕܪܬܐ

ܒܐܪ̈ܒܥܐ ܣܛܪ̈ܝܗ̇ ܕܕܪܬܐ ܕܪ̈ܐ ܕܩ̈ܕܩܬܐ ܐܪ̈ܒܥܝܢ ܐ̈ܡܝܢ ܐܘܪܟܗܝܢ ܘܬܠܬܝܢ ܦܬܝܗܝܢ

ܘܐܟܣܕܪ̈ܐ ܚܕܪ̈ܢ ܠܐܪ̈ܒܥܬܝܗܝܢ

ܘܐܡܪ ܠܝ ܗܢܘ ܒܝܬ ܛܒܚ̈ܐ ܕܡܒܫܠܝܢ ܒܗ ܕܒܚܬܐ ܕܥܡܐ ܡܫܡܫ̈ܢܘܗܝ ܕܒܝܬܐ

ܘܐܗܦܟ ܐܥܠܢܝ ܠܬܪܥܗ ܕܒܝܬܐ ܘܚܙ̇ܝܬ ܡ̈ܝܐ ܕܢܦܩ̇ܝܢ ܡܢ ܬܚܝܬ ܐܣܟܘܦܬܐ ܡܕܢܚܝܬܐ ܕܒܝܬܐ ܘܗܢܘܢ ܡ̈ܝܐ ܢܚܬ̇ܝܢ ܡܢ ܣܛܪܗ ܕܒܝܬܐ ܡܢ ܬܝܡܢܝܗ ܕܡܕܒܚܐ

ܘܐܦܩܢܝ ܒܬܪܥܐ ܓܪܒܝܝܐ ܘܐܟܪܟܢܝ ܡܢ ܠܒܪ ܥܠ ܬܪܥܐ ܕܕܪܬܐ ܕܚܐ̇ܪ ܠܡܕܢܚܐ ܘܚܙ̇ܝܬ ܡ̈ܝܐ ܕܢܦܩ̇ܝܢ ܡܢ ܣܛܪܗ ܕܝܡܝܢܐ

ܘܟܕ ܢܦܩ ܓܒܪܐ ܡܫܒܚ ܘܡܫܘܚܬܐ ܒܐܝܕܗ ܘܡܫܚ ܐܠܦ ܐ̈ܡܝܢ ܘܐܥܒܪܢܝ ܒܡ̈ܝܐ ܥܕܡܐ ܠܩܘܪ̈ܨܠܐ

ܘܡܫܚ ܐܠܦ ܐ̈ܡܝܢ ܘܐܥܒܪܢܝ ܒܡ̈ܝܐ ܥܕܡܐ ܠܒܘܪ̈ܟܐ. ܘܡܫܚ ܐܠܦ ܐ̈ܡܝܢ. ܘܐܥܒܪܢܝ ܒܡ̈ܝܐ ܥܕܡܐ ܠܚ̈ܨܐ

ܘܡܫܚ ܐܠܦ ܐ̈ܡܝܢ ܐܪܓܠܬܐ ܕܠܐ ܐܢܫ ܡܫܟܚ ܠܡܥܒܪܗ̇ ܡܛܠ ܕܣܓܝܘ ܡ̈ܝܐ ܘܥܫܢܬ ܐܪܓܠܬܐ ܘܠܐ ܐܢܫ ܡܫܟܚ ܠܡܥܒܪܗ̇

ܘܐܡܪ ܠܝ ܚܙ̇ܐ ܐܢܬ ܒܪܢܫܐ ܘܐܘܒܠܢܝ ܘܐܘܬܒܢܝ ܥܠ ܣܦܬܗ̇ ܕܪܓܠܬܐ

ܘܟܕ ܝܬܒ̇ܬ ܚܙ̇ܝܬ ܥܠ ܣܦܬܗ̇ ܕܐܪܓܠܬܐ ܐ̈ܝܠܢܐ ܕܛܒ ܣ̈ܓܝܐܝܢ ܡܟܐ ܘܡܟܐ

ܘܐܡܪ ܠܝ ܡ̈ܝܐ ܗܠܝܢ ܕܢܦ̇ܩܝܢ ܠܓܠܝܠܐ ܕܒܡܕܢܚܐ ܘܢܚ̇ܬܝܢ ܠܓܪܒܝܐ ܘܢܦ̇ܠܝܢ ܒܝܡܐ ܒܡ̈ܝܐ ܣܪ̈ܝܐ ܘܒܣ̇ܡܝܢ ܡ̈ܝܐ

ܘܟܠ ܢܦܫܐ ܚܝܬܐ ܕܡܘܠܕܐ ܐܬܪ ܕܐܝܬ ܡ̈ܝܐ ܕܪܓܠܬܐ ܚܝ̈ܝܢ ܘܗܘ̇ܝܢ ܢܘܢ̈ܐ ܣܓ̈ܝܐܐ ܡܛܠ ܡ̈ܝܐ ܗ̇ܢܘܢ ܕܢ̇ܦܠܝܢ ܬܡܢ ܘܒܣ̇ܡܝܢ ܡ̈ܝܐ

ܘܩܝ̇ܡܝܢ ܥܠܘܗܝ ܨܝ̈ܕܐ ܡܢ ܥܝܢ ܓܕ ܘܥܕܡܐ ܠܥܝܢ ܥ̈ܓܠܝܢ ܡܫ̈ܛܚܐ ܠܡܨ̈ܝܕܬܐ ܢܗܘܐ ܘܢܗܘܘܢ ܒܗ ܢܘ̈ܢܐ ܣܓ̈ܝܐܐ ܐܝܟ ܕܝܡܐ ܪܒܐ

ܘܡ̈ܦܩܢܘܗܝ ܘܡ̈ܥܠܢܘܗܝ ܠܐ ܢܒܣܡܘܢ ܐܠܐ ܢܗܘܘܢ ܡܠܚܐ

ܘܒܗ̇ ܒܐܪܓܠܬܐ ܢܫܘܚܘܢ ܥܠ ܣܦܪ̈ܝܗ̇ ܡܟܐ ܘܡܟܐ ܟܠ ܐܝܠܢ ܕܡܐܟܘܠܬܐ ܠܐ ܢܬܪܘܢ ܛܪ̈ܦܝܗܘܢ ܘܠܐ ܢܓܡܪܘܢ ܦܐܪ̈ܝܗܘܢ ܘܒܟܠ ܪܝܫ ܝܪ̈ܚܐ ܢܗܘܘܢ ܡܒܟܪ̈ܝܢ ܡܛܠ ܕܡ̈ܝܐ ܕܫܬ̇ܝܢ ܡܢ ܡܩܕܫܐ ܢܦ̇ܩܝܢ ܢܗܘܘܢ ܦܐܪ̈ܝܗܘܢ ܠܡܐܟܠ ܘܛܪ̈ܦܝܗܘܢ ܠܐܣܝܘܬܐ

ܗܟܢܐ ܐܡ̇ܪ ܡܪܐ ܡܪ̈ܘܬܐ ܢܚ̈ܠܐ ܕܬܚ̈ܘܡܐ ܕܝܪ̈ܬܝܢ ܠܗ̇ ܠܐܪܥܐ ܠܬܪ̈ܥܣܪ ܫܒ̈ܛܐ ܕܐܝܣܪܝܠ ܘܕܝܘܣܦ ܠܚܒܠܐ

ܕܬܐܪܬܘܢܗ̇ ܐܢܫ ܡܢ ܐ̈ܚܘܗܝ ܕܐܪܝܡ̇ܬ ܐܝܕܝ ܠܡܬܠܗ̇ ܠܐ̈ܒܗܝܟܘܢ ܘܬܬܦܠܓ ܠܟܘܢ ܐܪܥܐ ܠܝܘܪܬܢܐ

ܘܗܢܐ ܗܘ ܬܚܘܡܐ ܕܐܪܥܐ ܠܓܪܒܝܐ ܡܢ ܝܡܐ ܪܒܐ ܐܘܪܚܐ ܕܚܬܪܘܢ ܕܥܐ̇ܠܐ ܠܨܕܕ

ܘܚܡܬ ܘܒܪܘܬ ܘܣܦܪܘܝܡ ܕܒܝܢܬ ܬܚ̈ܘܡܐ ܕܕܪܡܣܘܩ ܘܒܝܢܬ ܬܚ̈ܘܡܐ ܕܚܡܬ ܘܚܨܪ ܡܨܥܝܬܐ ܕܒܬܚܘܡܐ ܕܚܘܪܢ

ܘܢܗܘܐ ܬܚܘܡܐ ܡܢ ܝܡܐ ܠܚܨܪ ܥܝܢܢ ܕܒܬܚܘܡܐ ܕܕܪܡܣܘܩ ܘܨܦܘܢ ܕܒܓܪܒܝܐ ܕܒܬܚܘܡܐ ܕܚܡܬ ܗܕܐ ܗܝ ܪܘܚܐ ܕܓܪܒܝܐ

ܘܡܢ ܪܘܚܐ ܕܡܕܢܚܐ ܡܢ ܒܝܬ ܚܘܪܢ ܘܡܢ ܒܝܬ ܕܪܡܣܘܩ ܘܡܢ ܒܝܬ ܓܠܥܕ ܘܡܢ ܒܝܬ ܐܪܥܐ ܕܐܝܣܪܝܠ ܘܝܘܪܕܢܢ ܡܬܚܡ ܥܠ ܝܡܐ ܡܕܢܚܝܐ ܕܬܡܪ ܗܕܐ ܗܝ ܪܘܚܐ ܕܡܕܢܚܐ

ܘܪܘܚܐ ܕܬܝܡܢܐ ܡܢ ܬܡܪ ܘܥܕܡܐ ܠܡ̈ܝ ܡܪܝܒܬ ܩܕܝܫ ܝܘܪܬܢܗ ܕܝܡܐ ܪܒܐ

ܘܡܬܚܡ ܥܕܡܐ ܠܢܟܚ ܕܐܝܬ ܒܡܥܠܢܐ ܕܚܡܬ ܗܕܐ ܗܝ ܪܘܚܐ ܕܡܥܪܒܐ

ܘܬܦܠܓܘܢܗ̇ ܠܐܪܥܐ ܗܕܐ ܠܫܪ̈ܒܬܐ ܕܐܝܣܪܐܝܠ

ܘܡܐ ܕܦܠܓܬܘܢܗ̇ ܝܪܬܘܬܐ ܠܟܘܢ ܘܠܐܝܠܝܢ ܕܡܬܦܢܝܢ ܠܘܬܝ ܕܥܡ̇ܪܝܢ ܒܝܢܬܟܘܢ ܘܐܘܠܕܘ ܒ̈ܢܝܐ ܒܝܢܬܟܘܢ ܘܢܗܘܘܢ ܐܝܟ ܒܢ̈ܝ ܐܝܣܪܝܠ ܘܥܡܟܘܢ ܢܦܠܓܘܢ ܝܪܬܘܬܐ ܒܝܢܬ ܫܪ̈ܒܬܐ ܕܐܝܣܪܝܠ

ܘܫܪܒܬܐ ܕܐܝܬ ܒܗ̇ ܐܝܢܐ ܕܡܬܦܢܐ ܠܘܬܝ ܒܗ̇ ܢܬܠܘܢ ܠܗ ܝܪܬܘܬܐ ܐܡ̇ܪ ܡܪܐ ܡܪ̈ܘܬܐ

ܘܗܠܝܢ ܫܡ̈ܗܐ ܕܫܒ̈ܛܐ ܡܢ ܚܪܬܐ ܕܓܪܒܝܐ ܥܠ ܝܕ ܐܘܪܚܐ ܕܚܬܪܘܢ ܕܒܡܥܠܢܐ ܕܚܡܬ ܘܕܚܨܪ ܥܝܢܢ ܘܬܚܘܡܐ ܕܕܪܡܣܘܩ ܕܒܓܪܒܝܐ ܕܥܠ ܝܕ ܚܡܬ ܗܕܐ ܗܝ ܪܘܚܐ ܕܡܕܢܚ̈ܝ ܝܡܐ ܕܕܢ

ܘܥܠ ܬܚܘܡܐ ܕܕܢ ܡܢ ܪܘܚܐ ܕܡܕܢܚܐ ܘܥܕܡܐ ܠܪܘܚܐ ܕܡܥܪܒܐ ܕܐܫܝܪ

ܘܥܠ ܬܚܘܡܐ ܕܐܫܝܪ ܡܢ ܪܘܚܐ ܕܡܕܢܚܐ ܘܥܕܡܐ ܠܪܘܚܐ ܕܡܥܪܒܐ ܕܢܦܬܠܝ

ܘܥܠ ܬܚܘܡܐ ܕܢܦܬܠܝ ܡܢ ܪܘܚܐ ܕܡܕܢܚܐ ܘܥܕܡܐ ܠܪܘܚܐ ܕܡܥܪܒܐ ܕܡܢܫܐ

ܘܥܠ ܬܚܘܡܐ ܕܡܢܫܐ ܡܢ ܪܘܚܐ ܕܡܕܢܚܐ ܘܥܕܡܐ ܠܪܘܚܐ ܕܡܥܪܒܐ ܕܪܘܒܝܠ

ܘܥܠ ܬܚܘܡܐ ܕܪܘܒܝܠ ܡܢ ܪܘܚܐ ܕܡܕܢܚܐ ܘܥܕܡܐ ܠܪܘܚܐ ܕܡܥܪܒܐ ܕܝܗܘܕܐ

ܘܥܠ ܬܚܘܡܐ ܕܝܗܘܕܐ ܡܢ ܪܘܚܐ ܕܡܕܢܚܐ ܘܥܕܡܐ ܠܪܘܚܐ ܕܡܥܪܒܐ ܢܗܘܐ ܦܘܪܫܢܐ ܕܦ̇ܪܫܝܢ ܐܢܬܘܢ ܦܬܝܐ ܥܣܪ̈ܝܢ ܘܚܡܫܐ ܐ̈ܠܦܝܢ ܘܐܘܪܟܐ ܐܝܟ ܚܕܐ ܡܢ ܡܢ̈ܘܬܐ ܘܡܢ ܪܘܚܐ ܕܡܕܢܚܐ ܘܥܕܡܐ ܠܪܘܚܐ ܕܡܥܪܒܐ ܢܗܘܐ ܡܩܕܫܐ ܒܓܘܗ

ܦܘܪܫܢܐ ܕܦ̇ܪܫܝܢ ܐܢܬܘܢ ܠܡܪܝܐ ܐܘܪܟܐ ܥܣܪ̈ܝܢ ܘܚܡܫܐ ܐ̈ܠܦܝܢ ܘܦܬܝܐ ܥܣܪ̈ܐ ܐ̈ܠܦܝܢ

ܘܠܟܗ̈ܢܐ ܢܗܘܐ ܦܘܪܫܢܐ ܕܩܘܕܫܐ ܠܓܪܒܝܐ ܥܣܪ̈ܝܢ ܘܚܡܫܐ ܐ̈ܠܦܝܢ ܘܦܬܝܐ ܥܣܪ̈ܐ ܐ̈ܠܦܝܢ ܘܠܡܥܪܒܐ ܥܣܪ̈ܐ ܐ̈ܠܦܝܢ. ܘܠܡܕܢܚܐ ܥܣܪ̈ܐ ܐ̈ܠܦܝܢ ܘܠܬܝܡܢܐ ܥܣܪ̈ܝܢ ܘܚܡܫܐ ܐ̈ܠܦܝܢ ܘܢܗܘܐ ܡܩܕܫܗ ܕܡܪܝܐ ܒܓܘܗ

ܘܢܗܘܐ ܠܟܗ̈ܢܐ ܕܡܬܩܕܫܝܢ ܡܢ ܒܢ̈ܝ ܨܕܘܩ ܕܢܛܪܘ ܢܛܘܪ̈ܬܝ ܘܠܐ ܛܥܘ ܐܝܟ ܕܛܥܘ ܒܢ̈ܝ ܐܝܣܪܝܠ ܘܐܝܟ ܕܛܥܘ ܠܘ̈ܝܐ

ܘܢܗܘܐ ܠܗܘܢ ܦܘܪܫܢܐ ܡܢ ܦܘܪܫܢܗ̇ ܕܐܪܥܐ ܩܕܘܫ ܩܘ̈ܕܫܐ ܒܬܚܘܡܐ ܕܠܘܝ̈ܐ

ܘܠܘ̈ܝܐ ܠܘܩܒܠ ܬܚܘܡܐ ܕܟܗ̈ܢܐ ܐܘܪܟܐ ܥܣܪ̈ܝܢ ܘܚܡܫܐ ܐ̈ܠܦܝܢ ܘܦܬܝܐ ܥܣܪ̈ܐ ܐ̈ܠܦܝܢ. ܟܠܗ ܐܬܪܗܘܢ ܥܣܪ̈ܝܢ ܘܚܡܫܐ ܐ̈ܠܦܝܢ. ܘܦܬܝܐ ܥܣܪ̈ܐ ܐ̈ܠܦܝܢ

ܠܐ ܢܙܒܢܘܢ ܡܢܗ ܘܠܐ ܢܚܠܦܘܢ ܘܠܐ ܢܥܒܪܘܢ ܪ̈ܫܝܬܐ ܕܐܪܥܐ ܡܛܠ ܕܩܘܕܫܗ ܗܘ ܕܡܪܝܐ

ܘܚܡܫܐ ܐ̈ܠܦܝܢ ܕܡܫܬܚܪ ܥܠ ܦܘܡ ܥܣܪ̈ܝܢ ܘܚܡܫܐ ܐ̈ܠܦܝܢ ܕܘܟܬܐ ܗ̇ܝ ܠܡܕܝܢܬܐ ܠܝܬܒܐ ܘܠܫܛܚܐ ܕܬܗܘܐ ܡܕܝܢܬܐ ܒܓܘܗ̇

ܘܗܠܝܢ ܡܘܫܚ̈ܬܐ ܠܪܘܚܐ ܕܓܪܒܝܐ ܐܪ̈ܒܥܐ ܐ̈ܠܦܝܢ ܘܚܡܫܡܐܐ ܘܠܡܕܢܚܐ ܐܪ̈ܒܥܐ ܐ̈ܠܦܝܢ ܘܚܡܫܡܐܐ ܘܠܬܝܡܢܐ ܐܪ̈ܒܥܐ ܐ̈ܠܦܝܢ ܘܚܡܫܡܐܐ ܘܠܡܥܪܒܐ ܐܪ̈ܒܥܐ ܐ̈ܠܦܝܢ ܘܚܡܫܡܐܐ

ܘܢܗܘܐ ܫܛܚܗ̇ ܕܡܕܝܢܬܐ ܠܓܪܒܝܐ ܡܐܬܝܢ ܘܚܡܫܝܢ ܘܠܬܝܡܢܐ ܡܐܬܝܢ ܘܚܡܫܝܢ ܘܠܡܕܢܚܐ ܡܐܬܝܢ ܘܚܡܫܝܢ ܘܠܡܥܪܒܐ ܡܐܬܝܢ ܘܚܡܫܝܢ

ܘܕܡܫܬܚܪ ܠܘܩܒܠ ܦܘܪܫܢܐ ܕܩܘܕܫܐ ܥܣܪ̈ܐ ܐ̈ܠܦܝܢ ܠܡܕܢܚܐ ܘܥܣܪ̈ܐ ܐ̈ܠܦܝܢ ܠܡܥܪܒܐ ܢܗܘܐ ܠܘܩܒܠ ܦܘܪܫܢܐ ܕܩܘܕܫܐ ܘܬܗܘܐ ܥܠܠܬܗ̇ ܡܐܟܘܠܬܐ ܠܐܝܠܝܢ ܕܦ̇ܠܚ̈ܝܢ ܠܡܕܝܢܬܐ

ܘܐܝܢܐ ܕܦ̇ܠܚ ܠܡܕܝܢܬܐ ܢܬܦܠܚ ܡܢ ܟܠܗܝܢ ܫܪ̈ܒܬܐ ܕܐܝܣܪܝܠ

ܟܠܗ ܦܘܪܫܢܐ ܥܣܪ̈ܝܢ ܘܚܡܫܐ ܐ̈ܠܦܝܢ ܒܥܣܪ̈ܝܢ ܘܚܡܫܐ ܐ̈ܠܦܝܢ ܘܦܪܘܫܘ ܦܘܪܫܢܐ ܕܩܘܕܫܐ ܡܢ ܝܘܪܬܢܐ ܕܡܕܝܢܬܐ

ܘܕܡܫܬܚܪ ܢܗܘܐ ܠܡܕܒܪܢܐ ܕܡܕܝܢܬܐ ܘܡܢ ܦܘܪܫܢܐ ܕܩܘܕܫܐ ܘܡܢ ܝܘܪܬܢܐ ܕܡܕܝܢܬܐ ܠܬܚܘܡܐ ܕܡܕܢܚܐ ܥܣܪ̈ܝܢ ܘܚܡܫܐ ܐ̈ܠܦܝܢ ܘܠܡܥܪܒܐ ܥܣܪ̈ܝܢ ܘܚܡܫܐ ܐ̈ܠܦܝܢ ܒܬܚܘܡܐ ܕܡܥܪܒܐ ܠܘܩܒܠ ܦܠܓܘܬܗ ܕܡܕܒܪܢܐ ܘܢܗܘܐ ܦܘܪܫܢܐ ܕܩܘܕܫܐ ܘܡܩܕܫܗ ܕܒܝܬܐ ܒܓܘܗ

ܘܡܢ ܝܪܬܘܬܐ ܕܠܘ̈ܝܐ ܘܡܢ ܝܪܬܘܬܐ ܕܡܕܝܢܬܐ ܡܢܬܗ ܕܡܕܒܪܢܐ ܬܗܘܐ ܒܡܕܝܢܬܐ ܒܝܢܬ ܬܚܘܡܐ ܕܝܗܘܕܐ ܠܬܚܘܡܐ ܕܒܢܝܡܝܢ

ܫܪܟܐ ܕܝܢ ܕܫ̈ܒܛܐ ܡܢ ܪܘܚܐ ܕܡܕܢܚܐ ܘܥܕܡܐ ܠܪܘܚܐ ܕܡܥܪܒܐ ܕܒܢܝܡܝܢ

ܘܥܠ ܬܚܘܡܐ ܕܒܢܝܡܝܢ ܡܢ ܪܘܚܐ ܕܡܕܢܚܐ ܘܥܕܡܐ ܠܪܘܚܐ ܕܡܥܪܒܐ ܕܫܡܥܘܢ

ܘܥܠ ܬܚܘܡܐ ܕܫܡܥܘܢ ܡܢ ܪܘܚܐ ܕܡܕܢܚܐ ܘܥܕܡܐ ܠܪܘܚܐ ܕܡܥܪܒܐ ܕܐܝܣܟܪ

ܘܥܠ ܬܚܘܡܐ ܕܐܝܣܟܪ ܡܢ ܪܘܚܐ ܕܡܕܢܚܐ ܘܥܕܡܐ ܠܪܘܚܐ ܕܡܥܪܒܐ ܕܙܒܘܠܘܢ

ܘܥܠ ܬܚܘܡܐ ܕܙܒܘܠܘܢ ܡܢ ܪܘܚܐ ܕܡܕܢܚܐ ܘܥܕܡܐ ܠܪܘܚܐ ܕܡܥܪܒܐ ܕܓܕ

ܘܥܠ ܬܚܘܡܐ ܕܓܕ ܡܢ ܪܘܚܐ ܕܬܝܡܢܐ ܢܗܘܐ ܬܚܘܡܐ ܡܢ ܬܡܪ ܥܕܡܐ ܠܡ̈ܝ ܡܪܝܒܬ ܩܕܝܫ ܝܘܪܬܢܗ ܥܠ ܝܡܐ ܪܒܐ

ܗܕܐ ܗܝ ܐܪܥܐ ܕܬܦܠܓܘܢ ܝܪܬܘܬܐ ܠܫܒ̈ܛܐ ܕܐܝܣܪܝܠ ܘܗܠܝܢ ܐ̈ܢܝܢ ܦ̈ܠܓܘܬܗܘܢ ܐܡ̇ܪ ܡܪܐ ܡܪ̈ܘܬܐ

ܘܗܠܝܢ ܡܦܩ̈ܢܝܗ̇ ܕܡܕܝܢܬܐ ܡܢ ܪܘܚܐ ܕܓܪܒܝܐ ܡܫܘܚܬܐ ܐܪ̈ܒܥܐ ܐ̈ܠܦܝܢ ܘܚܡܫܡܐܐ

ܘܬܪ̈ܥܝܗ̇ ܕܡܕܝܢܬܐ ܥܠ ܫܡ̈ܗܐ ܕܫܒ̈ܛܐ ܕܒܢ̈ܝ ܐܝܣܪܝܠ ܒܓܪܒܝܐ ܬܠܬܐ ܬܪ̈ܥܝܢ ܚܕ ܕܪܘܒܝܠ ܘܚܕ ܕܝܗܘܕܐ ܘܚܕ ܕܠܘܝ

ܘܒܡܕܢܚܐ ܡܫܘܚܬܐ ܐܪ̈ܒܥܐ ܐ̈ܠܦܝܢ ܘܚܡܫܡܐܐ ܘܬܠܬܐ ܬܪ̈ܥܝܢ ܚܕ ܕܝܘܣܦ ܘܚܕ ܕܒܢܝܡܝܢ ܘܚܕ ܕܕܢ

ܘܒܬܝܡܢܐ ܡܫܘܚܬܐ ܐܪ̈ܒܥܐ ܐ̈ܠܦܝܢ ܘܚܡܫܡܐܐ ܘܬܠܬܐ ܬܪ̈ܥܝܢ ܚܕ ܕܫܡܥܘܢ ܘܚܕ ܕܐܝܣܟܪ ܘܚܕ ܕܙܒܘܠܘܢ

ܘܒܡܥܪܒܐ ܡܫܘܚܬܐ ܐܪ̈ܒܥܐ ܐ̈ܠܦܝܢ ܘܚܡܫܡܐܐ ܘܬܠܬܐ ܬܪ̈ܥܝܢ ܚܕ ܕܓܕ ܘܚܕ ܕܐܫܝܪ ܘܚܕ ܕܢܦܬܠܝ

ܘܚܕܪ̈ܝܗ̇ ܬܡܢܬܥܣܪ̈ ܐ̈ܠܦܝܢ ܘܫܡܗ̇ ܕܡܕܝܢܬܐ ܡܢ ܝܘܡ̈ܝܗ̇ ܡܪܝܐ ܫܡܗܗ̇