← All works

Peshitta Ezekiel

Peshitta (Syriac Old Testament) · 1,271 sections

1. Ezekiel 1:1

   ܘܗܘܐ ܒܫܢܬ ܬܠܬܝܢ ܒܚܡܫܬܐ ܒܝܪܚܐ ܪܒܝܥܝܐ ܘܐܢܐ ܒܓܘ ܫܒܝܬܐ ܗܘܝܬ ܥܠ ܢܗܪܟܒܪ ܘܐܬܦܬܚܘ ܫܡܝܐ ܘܚ̇ܙܝܬ ܚܙܘܐ ܕܐܠܗܐ

2. Ezekiel 1:2

   ܒܚܡܫܬܐ ܒܝܪܚܐ ܒܫܢܬ ܚܡܫ ܕܫܒܝܬܗ ܕܝܘܝܟܝܢ ܡܠܟܐ ܕܝܗܘܕܐ

3. Ezekiel 1:3

   ܗܘܐ ܦܬܓܡܗ ܕܡܪܝܐ ܥܠ ܚܙܩܝܐܝܠ ܒܪ ܒܘܙܝ ܟܗܢܐ ܒܐܪܥܐ ܕܟ̈ܠܕܝܐ ܥܠ ܢܗܪܟܒܪ ܘܗܘܬ ܥܠܝ ܬܡܢ ܐܝܕܗ ܕܡܪܝܐ

4. Ezekiel 1:4

   ܘܚ̇ܙܝܬ ܘܗܐ ܪܘܚܐ ܕܥܠܥܠܐ ܐ̇ܬܝܐ ܡܢ ܓܪܒܝܐ ܥܢܢܐ ܪܒܬܐ ܘܢܘܪܐ ܕܡܬܓܘܙܠܐ ܘܡܙܗܪܐ ܚܕܪ̈ܝܗ̇ ܘܡܢ ܓܘܗ̇ ܐܝܟ ܚܙܘܐ ܡܢ ܓܘ ܢܘܪܐ

5. Ezekiel 1:5

   ܘܡܢ ܓܘܗ̇ ܕܡܘܬܐ ܕܐܪ̈ܒܥ ܚܝ̈ܘܢ ܘܗܢܘ ܚܙܘܗܝܢ ܐܝܟ ܕܡܘܬܐ ܕܒܢ̈ܝ ܐܢܫܐ

6. Ezekiel 1:6

   ܘܐܪ̈ܒܥ ܐ̈ܦܝܢ ܠܚܕܐ ܘܐܪ̈ܒܥܐ ܓܦܝ̈ܢ

7. Ezekiel 1:7

   ܘܪ̈ܓܠܝܗܝܢ ܦܫ̈ܝܛܢ ܘܦܪ̈ܣܬܐ ܕܪ̈ܓܠܝܗܝܢ ܐܝܟ ܦܪ̈ܣܬܐ ܕܥ̈ܓܠܐ ܘܡܒܪ̈ܩܢ ܐܝܟ ܢܚܫܐ ܕܡܒܪܩ

8. Ezekiel 1:8

   ܘܐܝܕܐ ܕܒܪ ܐܢܫܐ ܬܚܝܬ ܓܦܝ̈ܗܝܢ ܡܢ ܐܪ̈ܒܥܐ ܓܒܝ̈ܗܝܢ ܘܐ̈ܦܝܗܝܢ ܘܓܦܝ̈ܗܝܢ ܒܓܒܝ̈ܗܝܢ

9. Ezekiel 1:9

   ܘܓܦܝ̈ܗܝܢ ܢܩܝܦܝܢ ܗܘܘ ܚܕ ܠܚܕ ܘܡܐ ܕܐ̈ܙܠܢ ܗ̈ܘܝ ܠܘܩܒܠܗܝܢ ܐ̈ܙܠܢ ܗ̈ܘܝ ܘܠܐ ܡܬܗ̈ܦܟܢ ܗ̈ܘܝ

10. Ezekiel 1:10

    ܘܕܡܘܬܐ ܕܐ̈ܦܝܗܝܢ ܐ̈ܦܐ ܕܒܪܢܫܐ ܘܐ̈ܦܐ ܕܐܪܝܐ ܒܓܒܝ̈ܗܝܢ ܕܝܡܝܢܐ ܘܐ̈ܦܐ ܕܬܘܪܐ ܘܐ̈ܦܐ ܕܢܫܪܐ ܒܓܒܝ̈ܗܝܢ ܕܣܡܠܐ

11. Ezekiel 1:11

    ܘܐ̈ܦܝܗܝܢ ܘܓܦܝ̈ܗܝܢ ܦܪ̈ܝܣܝܢ ܗܘܘ ܡܢ ܠܥܠ ܬܪ̈ܝܢ ܢܩܝܦܝܢ ܚܕ ܠܚܕ ܘܬܪ̈ܝܢ ܡܟܣܝܢ ܓܘܫܡܗܝܢ

12. Ezekiel 1:12

    ܘܠܘܩܒܠܗܝܢ ܐ̈ܙܠܢ ܗ̈ܘܝ ܠܐܬܪܐ ܕܐ̇ܙܠܐ ܗܘܬ ܪܘܚܐ ܘܠܐ ܡܬܗ̈ܦܟܢ ܗ̈ܘܝ

13. Ezekiel 1:13

    ܘܕܡܘܬܐ ܕܚܝ̈ܘܬܐ ܐܝܟ ܚܙܘܐ ܕܓܘܡܪ̈ܐ ܕܢܘܪܐ ܕܝܩ̈ܕܢ ܘܐܝܟ ܚܙܘܐ ܕܠܡܦܐܕܐ ܡܗܠܟܐ ܗܘܬ ܒܝܬ ܚܝ̈ܘܬܐ ܘܡܙܗܪܐ ܗܘܬ ܢܘܪܐ ܘܒܪܩܐ ܢܦ̇ܩ ܗܘܐ ܡܢܗ̇

14. Ezekiel 1:14

    ܘܚܝ̈ܘܬܐ ܪ̈ܗܛܢ ܗ̈ܘܝ ܘܠܐ ܡܬ̈ܦܢܝܢ ܗ̈ܘܝ ܐܝܟ ܚܙܘܐ ܕܙܝܩܬܐ

15. Ezekiel 1:15

    ܘܚ̇ܙܝܬ ܚܝ̈ܘܬܐ ܘܗܐ ܓܝ̈ܓܠܐ ܒܐܪܥܐ ܥܠ ܓܢܒ ܐܪ̈ܒܥܬܝܗܝܢ ܚܝ̈ܘܬܐ

16. Ezekiel 1:16

    ܘܚܙܘܐ ܕܓܝ̈ܓܠܐ ܘܥܒ̇ܕܗܝܢ ܐܝܟ ܚܙܘܐ ܕܬܪܫܝܫ ܘܕܡܘܬܐ ܚܕܐ ܠܐܪ̈ܒܥܬܝܗܝܢ ܘܚܙܘܗܝܢ ܘܥܒ̇ܕܗܝܢ ܐܝܟ ܓܝܓܠܐ ܒܓܘ ܓܝܓܠܐ

17. Ezekiel 1:17

    ܥܠ ܐܪܒܥܐ ܓܒ̈ܝܗܝܢ ܐ̈ܙܠܢ ܗ̈ܘܝ ܘܠܐ ܡܬܗ̈ܦܟܢ ܗ̈ܘܝ ܘܠܐܬܪܐ ܕܦܢ̇ܝܐ ܗܘܬ ܪܫܝܬܗܝܢ ܠܡܐܙܠ ܒܬܪܗ̇ ܐ̈ܙܠܢ ܗ̈ܘܝ ܘܠܐ ܡܬܗ̈ܦܟܢ ܗ̈ܘܝ

18. Ezekiel 1:18

    ܘܪܘܡܐ ܐܝܬ ܠܚ̈ܨܝܗܝܢ ܘܚ̈ܙܝܢ ܗ̈ܘܝ ܘܚܨ̈ܝܗܝܢ ܡ̇ܠܐ ܥܝ̈ܢܐ ܕܐܪ̈ܒܥܬܝܗܝܢ ܟܕ ܡܬܟܪ̈ܟܢ

19. Ezekiel 1:19

    ܘܟܕ ܐ̈ܙܠܢ ܗ̈ܘܝ ܚܝ̈ܘܬܐ ܐ̈ܙܠܢ ܗ̈ܘܝ ܓܝ̈ܓܠܐ ܥܡܗܝܢ ܘܡܐ ܕܫ̈ܩܠܢ ܗ̈ܘܝ ܚܝ̈ܘܬܐ ܡܢ ܐܪܥܐ ܫܩ̈ܠܢ ܗ̈ܘܝ ܓܝ̈ܓܠܐ ܥܡܗܝܢ

20. Ezekiel 1:20

    ܘܠܐܬܪ ܕܐ̇ܙܠܐ ܗܘܬ ܪܘܚܐ ܐ̈ܙܠܢ ܗ̈ܘܝ ܘܓܝ̈ܓܠܐ ܫܩ̈ܠܢ ܗ̈ܘܝ ܥܡܗܝܢ ܡܛܠ ܕܪܘܚܐ ܚܝܬܐ ܐܝܬ ܗܘܬ ܒ̈ܓܝܓܠܐ

21. Ezekiel 1:21

    ܘܡܐ ܕܐ̈ܙܠܢ ܗ̈ܘܝ ܐ̈ܙܠܢ ܗ̈ܘܝ ܘܡܐ ܕܩܝ̈ܡܢ ܗ̈ܘܝ ܩܝ̈ܡܢ ܗ̈ܘܝ ܘܡܐ ܕܫ̈ܩܠܢ ܗ̈ܘܝ ܡܢ ܐܪܥܐ ܫܩ̈ܠܢ ܗ̈ܘܝ ܓܝ̈ܓܠܐ ܥܡܗܝܢ ܡܛܠ ܕܪܘܚܐ ܚܝܬܐ ܐܝܬ ܗܘܬ ܒ̈ܓܝܓܠܐ

22. Ezekiel 1:22

    ܘܡܬܝܚ ܠܥܠ ܡܢ ܪܝܫܐ ܕܚܝ̈ܘܬܐ ܐܝܟ ܕܡܘܬܐ ܕܚܙܘܐ ܕܩܪܘܣܛܠܘܣ ܕܚܝܠܐ

23. Ezekiel 1:23

    ܘܬܚܘܬܘܗܝ ܓܦ̈ܝܗܝܢ ܬܪ̈ܝܨܝܢ ܗܘܘ ܚܕ ܠܘܩܒܠ ܚܕ ܡܢ ܠܥܠ ܘܡܢ ܠܬܚܬ ܬܪ̈ܝܢ ܡܟܣܝܢ ܠܗܝܢ ܘܬܪ̈ܝܢ ܡܟܣܝܢ ܓܘܫܡܗܝܢ

24. Ezekiel 1:24

    ܘܫܡܥ̇ܬ ܩܠܐ ܕܓܦܝ̈ܗܝܢ ܐܝܟ ܩܠܐ ܕܡ̈ܝܐ ܣܓ̈ܝܐܐ ܘܐܝܟ ܩܠܐ ܕܐܠܗܐ ܡܐ ܕܐ̈ܙܠܢ ܗ̈ܘܝ ܘܐܝܟ ܩܠܐ ܕܡܡܠܠܐ ܒܓܘ ܡܫܪܝܬܐ ܘܡܐ ܕܩܝ̈ܡܢ ܗ̈ܘܝ ܡܫ̈ܠܝܢ ܗ̈ܘܝ ܓܦܝ̈ܗܝܢ

25. Ezekiel 1:25

    ܘܗܘ̇ܐ ܩܠܐ ܥܠ ܡܛܠܠܐ ܕܠܥܠ ܡܢ ܪ̈ܝܫܝܗܝܢ ܘܡܐ ܕܩܝ̈ܡܢ ܗ̈ܘܝ ܡܫ̈ܠܝܢ ܗ̈ܘܝ ܓܦܝ̈ܗܝܢ

26. Ezekiel 1:26

    ܘܠܥܠ ܡܢ ܡܛܠܠܐ ܕܠܥܠ ܡܢ ܪ̈ܝܫܝܗܝܢ ܐܝܟ ܚܙܘܐ ܕܟܐܦܐ ܕܣܦܝܠܐ ܘܐܝܟ ܕܡܘܬܐ ܕܟܘܪܣܝܐ ܘܥܠ ܕܡܘܬܐ ܕܟܘܪܣܝܐ ܐܝܟ ܕܡܘܬܐ ܘܐܝܟ ܚܙܘܐ ܕܒܪ ܐܢܫܐ ܐܝܬ ܥܠܘܗܝ ܡܢ ܠܥܠ

27. Ezekiel 1:27

    ܘܚ̇ܙܝܬ ܐܝܟ ܚܙܘܐ ܕܐܠܗܐ ܘܐܝܟ ܚܙܘܐ ܕܢܘܪܐ ܡܢ ܠܓܘ ܚܕܪ ܠܗ ܡܢ ܚܙܘܐ ܕܚ̈ܨܘܗܝ ܘܠܥܠ ܘܡܢ ܚ̈ܨܘܗܝ ܘܠܬܚܬ ܚ̇ܙܝܬ ܐܝܟ ܚܙܘܐ ܕܢܘܪܐ ܘܙܗܪܐ ܟܪܟ ܠܗ

28. Ezekiel 1:28

    ܐܝܟ ܚܙܘܐ ܕܩܫܬܐ ܕܗ̇ܘܝܐ ܒܥ̈ܢܢܐ ܒܝܘܡܐ ܕܡܛܪܐ ܗܟܢܐ ܗܘܐ ܚܙܘܐ ܕܙܗܪܐ ܕܟܪܟ ܠܗ ܘܗܟܢܐ ܗܘܐ ܚܙܘܐ ܕܕܡܘܬܐ ܕܐܝܩܪܗ ܕܡܪܝܐ ܘܚܙܝܬܗ ܘܢܦ̇ܠܬ ܥܠ ܐ̈ܦܝ ܘܫܡܥ̇ܬ ܩܠܗ ܕܡܡܠܠ

29. Ezekiel 2:1

    ܘܐܡܪ ܠܝ ܒܪܢܫܐ ܩܘܡ ܥܠ ܪ̈ܓܠܝܟ ܐܡܠܠ ܥܡܟ

30. Ezekiel 2:2

    ܘܥܠܬ ܒܝ ܪܘܚܐ ܟܕ ܡܡܠܠ ܥܡܝ ܘܐܩܝܡܬܢܝ ܥܠ ܪ̈ܓܠܝ ܘܫܡ̇ܥܬ ܕܡܡܠܠ ܥܡܝ

31. Ezekiel 2:3

    ܘܐܡܪ ܠܝ ܒܪܢܫܐ ܡܫܕܪ ܐܢܐ ܠܟ ܥܠ ܒܢ̈ܝ ܐܝܣܪܝܠ ܥܠ ܥܡܐ ܡܪܘܕܐ ܕܡܪܕܘ ܥܠܝ ܗܢܘܢ ܘܐ̈ܒܗܝܗܘܢ ܘܐܥܠܝܘ ܒܝ ܥܕܡܐ ܠܝܘܡܢܐ

32. Ezekiel 2:4

    ܘܥܠ ܒܢ̈ܝܐ ܕܩܫ̈ܝܢ ܐ̈ܦܝܗܘܢ ܘܥܫܝܢ ܠܒܗܘܢ ܡܫܕܪ ܐܢܐ ܠܟ ܐܡܪ ܠܗܘܢ ܗܟܢܐ ܐܡ̇ܪ ܡܪܐ ܡܪ̈ܘܬܐ

33. Ezekiel 2:5

    ܟܒܪ ܢܫܡܥܘܢ ܘܢܙܘܥܘܢ ܡܛܠ ܕܒܝܬܐ ܐܢܘܢ ܡܡܪܡܪܢܐ ܘܢܕܥܘܢ ܕܢܒܝܐ ܐܢܬ ܒܝܢܬܗܘܢ

34. Ezekiel 2:6

    ܘܐܢܬ ܒܪ ܐܢܫܐ ܠܐ ܬܕܚܠ ܡܢܗܘܢ ܘܡܢ ܡ̈ܠܝܗܘܢ ܠܐ ܬܙܘܥ ܕܣ̇ܪ̈ܒܝܢ ܘܡܣܠܝܢ ܠܟ ܡܛܠ ܕܒܝܢܬ ܥܩܪ̈ܒܐ ܥܡ̇ܪ ܐܢܬ ܠܐ ܬܕܚܠ ܡܢ ܡ̈ܠܝܗܘܢ ܘܡܢ ܐ̈ܦܝܗܘܢ ܠܐ ܬܙܘܥ ܡܛܠ ܕܒܝܬܐ ܐܢܘܢ ܡܡܪܡܪܢܐ

35. Ezekiel 2:7

    ܐܠܐ ܐܡܪ ܠܗܘܢ ܦܬ̈ܓܡܝ ܟܒܪ ܢܫܡܥܘܢ ܘܢܙܘܥܘܢ ܡܛܠ ܕܒܝܬܐ ܐܢܘܢ ܡܡܪܡܪܢܐ

36. Ezekiel 2:8

    ܐܢܬ ܕܝܢ ܒܪܢܫܐ ܫܡܥ ܡܕܡ ܕܐܡ̇ܪ ܐܢܐ ܠܟ ܠܐ ܬܗܘܐ ܡܡܪܡܪܢ ܐܝܟ ܒܝܬܐ ܡܡܪܡܪܢܐ ܐܠܐ ܦܬܚ ܦܘܡܟ ܘܐܟܘܠ ܡܕܡ ܕܝܗ̇ܒ ܐܢܐ ܠܟ

37. Ezekiel 2:9

    ܘܚ̇ܙܝܬ ܘܗܐ ܐܝܕܐ ܐܬܦܫܛܬ ܠܘܬܝ ܘܐܝܬ ܒܗ̇ ܟܪܟܐ ܕܣܦܪܐ

38. Ezekiel 2:10

    ܘܦܫܛܗ ܩܕܡܝ ܘܟܬܝܒ ܡܢ ܩܕܡܘܗܝ ܘܡܢ ܒܣܬܪܗ ܘܟܬ̈ܝܒܢ ܒܗ ܩܝܢ̈ܬܐ ܘܚܫ̈ܒܬܐ ܘܐ̈ܘܠܝܬܐ

39. Ezekiel 3:1

    ܘܐܡܪ ܠܝ ܒܪܢܫܐ ܡܕܡ ܕܡܫܟܚ ܐܢܬ ܐܟܘܠ ܐܟܘܠܝܗܝ ܠܟܪܟܐ ܗܢܐ ܘܙܠ ܡܠܠ ܥܡ ܕܒܝܬ ܐܝܣܪܐܝܠ

40. Ezekiel 3:2

    ܘܦܬܚ̇ܬ ܦܘܡܝ ܘܐܘܟܠܢܝ ܟܪܟܐ ܗ̇ܘ

41. Ezekiel 3:3

    ܘܐܡܪ ܠܝ ܒܪܢܫܐ ܡܠܝ ܟܪܣܟ ܘܡ̈ܥܝܟ ܡܢ ܟܪܟܐ ܗܢܐ ܕܝܗ̇ܒ ܐܢܐ ܠܟ ܘܐܟ̇ܠܬܗ ܘܗܘܐ ܒܦܘܡܝ ܐܝܟ ܕܒܫܐ ܚܠܝܐ

42. Ezekiel 3:4

    ܘܐܡܪ ܠܝ ܒܪܢܫܐ ܙܠ ܥܘܠ ܠܫܒܝܬܐ ܠܘܬ ܒܢ̈ܝ ܐܝܣܪܝܠ ܘܐܡܪ ܠܗܘܢ ܦܬ̈ܓܡܝ

43. Ezekiel 3:5

    ܡܛܠ ܕܠܐ ܗܘܐ ܥܠ ܥܡܐ ܥܡܝܩ ܡܡܠܠܐ ܘܠܥܓ ܠܫܢܐ ܫܕܪܬܟ ܥܠ ܕܒܝܬ ܐܝܣܪܐܝܠ

44. Ezekiel 3:6

    ܘܐܦ ܠܐ ܥܠ ܥܡ̈ܡܐ ܣܓܝܐ̈ܐ ܕܠܐ ܫܡ̇ܥ ܐܢܬ ܡܡܠܠܗܘܢ ܘܐܠܘ ܥܠܝܗܘܢ ܫܕܪܬܟ ܫܡ̇ܥܝܢ ܗܘܘ ܠܟ

45. Ezekiel 3:7

    ܕܒܝܬ ܐܝܣܪܝܠ ܕܝܢ ܠܐ ܫܡ̇ܥܝܢ ܠܟ ܡܛܠ ܕܠܐ ܨ̇ܒܝܢ ܠܡܫܡܥܢܝ ܕܟܠܗ ܓܝܪ ܒܝܬ ܐܝܣܪܝܠ ܥܫܝܢ ܒܝܬ ܥܝܢ̈ܝܗܘܢ ܘܩܫܐ ܠܒܗܘܢ

46. Ezekiel 3:8

    ܗܐ ܐܥܫ̇ܢܬ ܐ̈ܦܝܟ ܠܘܩܒܠ ܐ̈ܦܝܗܘܢ ܘܒܝܬ ܥܝܢ̈ܝܟ ܐ̇ܫܪܬ ܠܘܩܒܠ ܒܝܬ ܥܝܢ̈ܝܗܘܢ

47. Ezekiel 3:9

    ܐܝܟ ܫܡܝܪܐ ܕܥܫܝܢ ܡܢ ܛܪܢܐ ܥܒ̇ܕܬ ܒܝܬ ܥܝܢ̈ܝܟ ܠܐ ܬܕܚܠ ܡܢܗܘܢ ܘܠܐ ܬܙܘܥ ܡܢ ܩܕܡܝܗܘܢ ܡܛܠ ܕܒܝܬܐ ܐܢܘܢ ܡܡܪܡܪܢܐ

48. Ezekiel 3:10

    ܘܐܡܪ ܠܝ ܒܪܢܫܐ ܟܠ ܦܬ̈ܓܡܝ ܕܐܡ̇ܪ ܐܢܐ ܠܟ ܩܒ̇ܠ ܒܠܒܟ ܘܫܡܥ ܒܐ̈ܕܢܝܟ

49. Ezekiel 3:11

    ܘܙܠ ܥܘܠ ܠܫܒܝܬܐ ܠܘܬ ܒܢ̈ܝ ܥܡܟ ܘܡܠܠ ܥܡܗܘܢ ܘܐܡܪ ܠܗܘܢ ܗܟܢܐ ܐܡ̇ܪ ܡܪܐ ܡܪ̈ܘܬܐ ܟܒܪ ܢܫܡܥܘܢ ܘܢܙܘܥܘܢ

50. Ezekiel 3:12

    ܘܫܩܠܬܢܝ ܪܘܚܐ ܘܫܡ̇ܥܬ ܒܬܪܝ ܩܠܐ ܕܙܘܥܐ ܪܒܐ ܕܐܡ̇ܪ ܒܪܝܟ ܗܘ ܐܝܩܪܗ ܕܡܪܝܐ ܡܢ ܐܬܪܗ

51. Ezekiel 3:13

    ܘܩܠܐ ܕܓܦ̈ܐ ܕܚ̈ܝܘܬܐ ܕܛ̇ܪܦܝܢ ܚܕ ܠܚܕ ܘܩܠܐ ܕܓܝ̈ܓܠܐ ܥܡܗܘܢ ܘܩܠܐ ܕܙܘܥܐ ܪܒܐ

52. Ezekiel 3:14

    ܘܫܩܠܬܢܝ ܪܘܚܐ ܘܐܘܒܠܬܢܝ ܘܐ̇ܙܠܬ ܒܚܐܦܐ ܕܪܘܚܝ ܘܐܝܕܗ ܕܡܪܝܐ ܥܫܢܬ ܥܠܝ

53. Ezekiel 3:15

    ܘܥ̇ܠܬ ܠܫܒܝܬܐ ܠܬܠܐܟܝܒ ܕܝܬ̇ܒ ܥܠ ܢܗܪܟܒܪ ܘܝܬܒ̇ܬ ܬܡܢ ܫܒܥܐ ܝܘܡ̈ܝܢ ܟܕ ܬܡܝܗ ܐܢܐ ܒܝܢܬܗܘܢ

54. Ezekiel 3:16

    ܘܡܢ ܒܬܪ ܫܒܥܐ ܝܘܡ̈ܝܢ ܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ

55. Ezekiel 3:17

    ܒܪܢܫܐ ܕܘܩܐ ܝܗ̇ܒܬܟ ܠܕܒܝܬ ܐܝܣܪܝܠ ܕܬܗܘܐ ܫܡ̇ܥ ܡܢ ܦܘܡܝ ܦܬ̈ܓܡܐ ܘܬܙܗܪ ܐܢܘܢ ܡܢܝ

56. Ezekiel 3:18

    ܡܐ ܕܐܡ̇ܪ ܐܢܐ ܠܚܛܝܐ ܕܡܡܬ ܬܡܘܬ ܘܠܐ ܙܗܪܬܝܗܝ ܘܠܐ ܐܡܪܬ ܠܗ ܠܚܛܝܐ ܕܢܙܕܗܪ ܡܢ ܐܘܪܚܗ ܘܢܚܐ ܗ̇ܘ ܚܛܝܐ ܒܥܘ̣ܠܗ ܢܡܘܬ ܘܕܡܗ ܡܢ ܐ̈ܝܕܝܟ ܐܬܒܥ

57. Ezekiel 3:19

    ܐܢ ܬܙܗܪ ܕܝܢ ܠܚܛܝܐ ܘܠܐ ܢܗܦܘܟ ܡܢ ܚܛܝܬܗ ܘܡܢ ܐܘܪܚܗ ܒܝܫܬܐ ܗܘ ܒܚ̈ܛܗܘܗܝ ܢܡܘܬ ܘܐܢܬ ܢܦܫܟ ܬܦܨܐ

58. Ezekiel 3:20

    ܘܟܕ ܙܕܝܩܐ ܢܗܦܘܟ ܡܢ ܙܕܝܩܘܬܗ ܘܢܥܒܕ ܥܘ̣ܠܐ ܐܬܠ ܬܘܩܠܬܐ ܩܕܡܘܗܝ ܘܢܡܘܬ ܥܠ ܕܠܐ ܙܗܪܬܝܗܝ ܒܚ̈ܛܗܘܗܝ ܢܡܘܬ ܘܠܐ ܬܬܕܟܪ ܠܗ ܙܕܝܩܘܬܗ ܕܥܒܕ ܘܕܡܗ ܡܢ ܐ̈ܝܕܝܟ ܐܬܒܥ

59. Ezekiel 3:21

    ܐܢ ܕܝܢ ܬܙܗܪ ܠܙܕܝܩܐ ܕܠܐ ܢܚܛܐ ܘܠܐ ܚܛܐ ܙܕܝܩܐ ܢܚܐ ܕܐܙܕܗܪ ܘܐܢܬ ܢܦܫܟ ܬܦܨܐ

60. Ezekiel 3:22

    ܘܗܘܬ ܥܠܝ ܬܡܢ ܐܝܕܗ ܕܡܪܝܐ ܘܐܡܪ ܠܝ ܩܘܡ ܦܘܩ ܠܦܩܥܬܐ ܘܬܡܢ ܐܡܠܠ ܥܡܟ

61. Ezekiel 3:23

    ܘܩ̇ܡܬ ܢܦܩ̇ܬ ܠܦܩܥܬܐ ܘܬܡܢ ܩܐ̇ܡ ܗܘܐ ܫܘܒܚܗ ܕܐܠܗܐ ܕܐܝܣܪܝܠ ܐܝܟ ܫܘܒܚܐ ܕܚ̇ܙܝܬ ܥܠ ܢܗܪܟܒܪ ܘܢܦܠ̇ܬ ܥܠ ܐ̈ܦܝ

62. Ezekiel 3:24

    ܘܥܠܬ ܒܝ ܪܘܚܐ ܘܐܩܝܡܬܢܝ ܥܠ ܪ̈ܓܠܝ ܘܡܠܠ ܥܡܝ ܘܐܡܪ ܠܝ ܥܘܠ ܐܬܚܒܫ ܒܒܝܬܟ

63. Ezekiel 3:25

    ܘܐܢܬ ܒܪܢܫܐ ܗܐ ܪܡ̇ܝܢ ܥܠܝܟ ܫܫ̈ܠܬܐ ܘܐܣ̇ܪܝܢ ܠܟ ܒܗܝܢ ܕܠܐ ܬܦܘܩ ܒܝܢܬܗܘܢ

64. Ezekiel 3:26

    ܘܠܫܢܟ ܐܕܒܩ ܠܫܡܝ ܚܟܟ ܘܬܚܪܫ ܘܠܐ ܬܗܘܐ ܠܗܘܢ ܓܒܪܐ ܡܟܣܢܐ ܡܛܠ ܕܒܝܬܐ ܐܢܘܢ ܡܡܪܡܪܢܐ

65. Ezekiel 3:27

    ܘܡܐ ܕܡܡܠܠ ܐܢܐ ܥܡܟ ܦܬ̇ܚ ܐܢܐ ܦܘܡܟ ܕܬܐܡܪ ܠܗܘܢ ܗܟܢܐ ܐܡ̇ܪ ܡܪܐ ܡܪ̈ܘܬܐ ܕܫܡ̇ܥ ܢܫܡܥ ܘܕܙܐ̇ܥ ܢܙܘܥ ܡܛܠ ܕܒܝܬܐ ܐܢܘܢ ܡܡܪܡܪܢܐ

66. Ezekiel 4:1

    ܐܢܬ ܕܝܢ ܒܪܢܫܐ ܣܒ ܠܟ ܠܒܬܐ ܘܣܝܡܝܗ̇ ܩܕܡܝܟ ܘܪܫܘܡ ܥܠܝܗ̇ ܡܕܝܢܬܐ ܐܘܪܫܠܡ

67. Ezekiel 4:2

    ܘܥܒܕ ܥܠܝܗ̇ ܐܘܠܨܢܐ ܘܒܢܝ ܥܠܝܗ̇ ܩ̈ܠܩܘܡܐ ܘܐܟܡܢ ܥܠܝܗ̇ ܟܡܐ̈ܢܐ ܘܐܫܪܐ ܥܠܝܗ̇ ܡܫܪ̈ܝܬܐ ܘܥܒܕ ܠܗ̇ ܙܘܝ̈ܕܢܐ ܟܕ ܚ̇ܕܪܐ

68. Ezekiel 4:3

    ܘܐܢܬ ܣܒ ܠܟ ܛܓܢܐ ܕܦܪܙܠܐ ܘܥܒܕܝܗܝ ܐܣܬܐ ܕܦܪܙܠܐ ܒܝܢ̈ܝܟ ܠܡܕܝܢܬܐ ܘܛܝܒ ܐ̈ܦܝܟ ܥܠܝܗ̇ ܘܬܗܘܐ ܒܚܒܘܫܝܐ ܘܬܐܠܨܝܗ̇ ܗܕܐ ܐܬܐ ܗܝ ܠܕܒܝܬ ܐܝܣܪܝܠ

69. Ezekiel 4:4

    ܘܐܢܬ ܕܡܟ ܥܠ ܣܛܪܟ ܕܣܡܠܐ ܘܣܝܡ ܥܘ̣ܠܐ ܕܒܝܬ ܐܝܣܪܝܠ ܥܠܘܗܝ ܡܢܝܢ ܝܘܡ̈ܬܐ ܕܕܡ̇ܟ ܐܢܬ ܥܠܘܗܝ ܬܫܩܘܠ ܥܘ̣ܠܗܘܢ

70. Ezekiel 4:5

    ܘܐܢܐ ܝܗ̇ܒܬ ܠܟ ܬܪ̈ܝܢ ܥܘ̣ܠܝܢ ܠܡܢܝܢܐ ܕܝܘܡ̈ܬܐ ܬܠܬܡܐܐ ܘܬܫܥܝܢ ܝܘܡ̈ܝܢ ܘܬܫܩܘܠ ܥܘ̣ܠܐ ܕܒܝܬ ܐܝܣܪܝܠ

71. Ezekiel 4:6

    ܘܬܫܡܠܐ ܗܠܝܢ ܘܬܕܡܟ ܥܠ ܣܛܪܟ ܕܝܡܝܢܐ ܘܬܫܩܘܠ ܥܘ̣ܠܐ ܕܒܝܬ ܝܗܘܕܐ ܐܪ̈ܒܥܝܢ ܝܘ̈ܡܝܢ ܝܘܡܐ ܠܫܢܬܐ ܝܗܒ̇ܬ ܠܟ

72. Ezekiel 4:7

    ܘܥܠ ܐܘܠܨܢܗ̇ ܕܐܘܪܫܠܡ ܬܛܝܒ ܐ̈ܦܝܟ ܘܕܪܥܟ ܬܥܫܢ ܘܬܬܢܒܐ ܥܠܝܗ̇

73. Ezekiel 4:8

    ܗܐ ܐܪܡ̇ܝܬ ܥܠܝܟ ܫܫ̈ܠܬܐ ܘܠܐ ܬܬܗܦܟ ܡܢ ܣܛܪܟ ܠܣܛܪܟ ܥܕܡܐ ܕܢܫܠܡܘܢ ܝܘܡ̈ܬܐ ܕܚܒܘܫܝܟ

74. Ezekiel 4:9

    ܘܣܒ ܠܟ ܚ̈ܛܐ ܘܣܥܪ̈ܐ ܘܓܘ̈ܡܐ ܘܛܠܦܚ̈ܐ ܘܕܘܚܢܐ ܘܟܘܢ̈ܬܐ ܘܐܪܡܐ ܐܢܘܢ ܒܡܐܢܐ ܚܕ ܘܥܒܕ ܐܢܘܢ ܠܟ ܠܚܡܐ ܠܡܢܝܢܐ ܕܝܘܡ̈ܬܐ ܕܕܡ̇ܟ ܐܢܬ ܥܠ ܣܛܪܟ ܬܠܬܡܐܐ ܘܬܫܥܝܢ ܝܘܡ̈ܝܢ ܬܐܟܠܝܘܗܝ

75. Ezekiel 4:10

    ܘܡܐܟܘܠܬܟ ܬܗܘܐ ܥܣܪ̈ܝܢ ܡܬ̈ܩܠܝܢ ܒܝܘܡܐ ܡܢ ܥܕܢܐ ܠܥܕܢܐ

76. Ezekiel 4:11

    ܘܡ̈ܝܐ ܒܟܝܠܬܐ ܬܫܬܐ ܚܕܐ ܡܢ ܫܬ ܡܢ̈ܘܬܗ ܕܗܡܝܢܐ ܡܢ ܥܕܢܐ ܠܥܕܢܐ ܬܫܬܐ

77. Ezekiel 4:12

    ܘܪܥܦܐ ܕܣܥܪ̈ܐ ܬܐܟܘܠ ܕܡܛܘܝ ܥܠ ܟܒ̈ܝܐ ܕܒܪܢܫܐ ܠܥ̈ܢܝܗܘܢ

78. Ezekiel 4:13

    ܐܡ̇ܪ ܡܪܝܐ ܗܟܢܐ ܢܐܟܠܘܢ ܒܢ̈ܝ ܐܝܣܪܝܠ ܠܚܡܗܘܢ ܒܛܢܦܘܬܐ ܒܝܬ ܥܡ̈ܡܐ ܕܐܕܚܘܩ ܐܢܘܢ ܠܬܡܢ

79. Ezekiel 4:14

    ܘܐ̇ܡܪܬ ܐܠܗܐ ܡܪܐ ܡܪ̈ܘܬܐ ܢܦܫܝ ܠܐ ܗܘܬ ܡܛܢܦܐ ܘܕܡܪܥܐ ܘܕܬܒܝܪܐ ܠܚܝܘܬܐ ܠܐ ܐ̇ܟܠܬ ܡܢ ܛܠܝܘܬܝ ܘܥܕܡܐ ܠܝܘܡܢܐ ܘܠܐ ܥܠ ܠܦܘܡܝ ܒܣܪܐ ܛܢܦܐ

80. Ezekiel 4:15

    ܘܐܡܪ ܠܝ ܗܐ ܝܗ̇ܒܬ ܠܟ ܟܒ̈ܝܐ ܕܬܘܪ̈ܐ ܚܠܦ ܟܒ̈ܝܐ ܕܒܢܝ̈ ܐܢܫܐ ܕܬܥܒܕ ܠܚܡܟ ܥܠܝܗܝܢ

81. Ezekiel 4:16

    ܘܐܡܪ ܠܝ ܒܪܢܫܐ ܗܐ ܬܒ̇ܪ ܐܢܐ ܩܢܝܐ ܕܥܒܘܪܐ ܒܐܘܪܫܠܡ ܘܢܐܟܠܘܢ ܠܚܡܐ ܒܡܬܩܠܐ ܘܡ̈ܝܐ ܒܨܗܘܢܐ ܒܟܝܠܬܐ ܢܫܬܘܢ

82. Ezekiel 4:17

    ܘܢܗܘܘܢ ܨܪ̈ܝܟܝܢ ܠܠܚܡܐ ܘܠܡ̈ܝܐ ܘܢܣܘܦܘܢ ܓܒܪ ܘܐܚܘܗܝ ܘܢܬܡܣܘܢ ܒܥܘ̣ܠܗܘܢ

83. Ezekiel 5:1

    ܐܢܬ ܕܝܢ ܒܪܢܫܐ ܣܒ ܠܟ ܣܝܦܐ ܕܚܪܝܦ ܐܝܟ ܡܕܟܝܐ ܕܓܪܥܐ ܘܐܥܒܪܝܗܝ ܥܠ ܪܝܫܟ ܘܥܠ ܕܩܢܟ ܘܣܒ ܠܟ ܡܣܐܬܐ ܕܡܬܩ̈ܠܐ ܘܦܠ̇ܓ ܐܢܘܢ ܠܬܠܬ ܡܢ̈ܘܢ

84. Ezekiel 5:2

    ܘܚܕܐ ܡܢ ܬܠܬ ܡ̈ܢܘܢ ܐܘܩܕ ܒܢܘܪܐ ܒܓܘ ܡܕܝܢܬܐ ܡܐ ܕܫܠܡܘ ܝܘܡ̈ܬܐ ܕܚܒܘܫܝܟ ܘܬܣܒ ܡܢܬܐ ܐܚܪܬܐ ܘܬܦܣܘܩ ܒܣܝܦܐ ܚܕܪ̈ܝܗ̇ ܕܡܕܝܢܬܐ ܘܡܢܬܐ ܕܬܠܬ ܬܕܪܐ ܒܪܘܚܐ ܘܣܝܦܐ ܢܚܪܘܒ ܒܬܪܗܘܢ

85. Ezekiel 5:3

    ܘܬܣܒ ܡܢ ܬܡܢ ܙܥܘܪ̈ܐ ܒܡܢܝܢܐ ܘܬܨܘܪ ܐܢܘܢ ܒܟܢܦܟ

86. Ezekiel 5:4

    ܘܡܢܗܘܢ ܬܘܒ ܬܣܒ ܘܬܪܡܐ ܐܢܘܢ ܒܓܘ ܢܘܪܐ ܘܬܘܩܕ ܐܢܘܢ ܒܢܘܪܐ ܘܡܢܗܘܢ ܬܦܘܩ ܢܘܪܐ ܥܠ ܟܠܗܘܢ ܕܒܝܬ ܐܝܣܪܝܠ

87. Ezekiel 5:5

    ܗܟܢܐ ܐܡ̇ܪ ܡܪܐ ܡܪ̈ܘܬܐ ܗܕܐ ܐܘܪܫܠܡ ܒܝܢܬ ܥܡ̈ܡܐ ܣܡ̇ܬܗ̇ ܘܟܠܗܝܢ ܡܕܝܢ̈ܬܐ ܚܕܝܪ̈ܢ ܠܗ̇

88. Ezekiel 5:6

    ܘܚܠܦܬ ܕܝܢ̈ܝ ܒܚܛܝܬܐ ܡܢ ܥܡ̈ܡܐ ܘܦܘܩ̈ܕܢܝ ܡܢ ܡܕܝܢ̈ܬܐ ܕܚܕܝܪ̈ܢ ܠܗ̇ ܡܛܠ ܕܕܝܢ̈ܝ ܐܣܠܝܘ ܘܒܦܘ̈ܩܕܢܝ ܠܐ ܗܠܟܘ

89. Ezekiel 5:7

    ܡܛܠ ܗܠܝܢ ܗܟܢܐ ܐܡ̇ܪ ܡܪܐ ܡܪ̈ܘܬܐ ܥܠ ܕܐܬܚܫܒܬܘܢ ܡܢ ܥܡ̈ܡܐ ܕܚܕܝܪ̈ܝܢ ܠܟܘܢ ܘܒܦܘܩ̈ܕܢܝ ܠܐ ܗܠܟܬܘܢ ܘܕܝܢ̈ܝ ܠܐ ܥܒܕܬܘܢ ܘܥܒܕܬܘܢ ܕܝ̈ܢܐ ܕܥܡ̈ܡܐ ܕܚܕܝܪ̈ܝܢ ܠܟܘܢ

90. Ezekiel 5:8

    ܡܛܠ ܗܢܐ ܗܟܢܐ ܐܡ̇ܪ ܡܪܐ ܡܪ̈ܘܬܐ ܗܐ ܐܢܐ ܥܠܝܟܝ ܘܐܥܒܕ ܒܓܘܟܝ ܕܝ̈ܢܐ ܠܥܝܢ ܟܠܗܘܢ ܥܡ̈ܡܐ

91. Ezekiel 5:9

    ܘܐܥܒܕ ܒܟܝ ܡܕܡ ܕܠܐ ܥܒ̇ܕܬ ܘܡܕܡ ܕܠܐ ܐܥܒܕ ܬܘܒ ܐܟܘܬܗ ܡܛܠ ܟܠܗ̇ ܛܢܦܘܬܟܝ

92. Ezekiel 5:10

    ܡܛܠ ܗܢܐ ܐܒ̈ܗܐ ܢܐܟܠܘܢ ܒ̈ܢܝܗܘܢ ܒܓܘܟܝ ܘܒ̈ܢܝܐ ܢܐܟܠܘܢ ܠܐ̈ܒܗܝܗܘܢ ܘܐܥܒܕ ܒܟܝ ܕܝ̈ܢܐ ܘܐܕܪܐ ܠܐܝܠܝܢ ܕܡܫܬܚܪܝܢ ܒܓܘܟܝ ܠܟܠ ܪܘܚ

93. Ezekiel 5:11

    ܡܛܠ ܗܢܐ ܚܝ ܐܢܐ ܐܡ̇ܪ ܡܪܐ ܡܪ̈ܘܬܐ ܥܠ ܕܛܢܦܬܝ ܡܩܕܫܝ ܒܟܠ ܛܢ̈ܦܘܬܟܝ ܘܒܟܠܗ̇ ܛܡܐܘܬܟܝ ܐܦ ܐܢܐ ܐܕܚܩܟܝ ܘܠܐ ܬܚܘܣ ܥܝܢܝ ܥܠܝܟܝ ܘܠܐ ܐܪܚܡ

94. Ezekiel 5:12

    ܚܕܐ ܡܢܬܟܝ ܒܡܘܬܐ ܢܡܘܬܘܢ ܘܒܟܦܢܐ ܢܣܘܦܘܢ ܒܓܘܟܝ ܘܐܚܪܬܐ ܒܚܪܒܐ ܢܦܠܘܢ ܚܕܪ̈ܝܟܝ ܘܕܬܠܬ ܠܟܠ ܪܘܚ ܐܕܪܐ ܘܣܝܦܐ ܢܚܪܘܒ ܒܬܪܗܘܢ

95. Ezekiel 5:13

    ܘܐܫܡܠܐ ܪܘܓܙܝ ܘܐܢܝܚ ܚܡܬܝ ܒܗܘܢ ܘܐܬܒܝܐ ܘܢܕܥܘܢ ܕܐܢܐ ܐܢܐ ܡܪܝܐ ܕܡܠ̇ܠܬ ܒܛܢܢܝ ܡܐ ܕܫܡ̇ܠܝܬ ܒܗܘܢ ܪܘܓܙܝ

96. Ezekiel 5:14

    ܘܐܬܠܟܝ ܠܚܪܒܐ ܘܠܚܣܕܐ ܒܥܡ̈ܡܐ ܕܚܕܝܪ̈ܝܢ ܠܟܝ ܩܕܡ ܟܠ ܕܥܒ̇ܪ

97. Ezekiel 5:15

    ܘܬܗܘܝܢ ܠܚܣܕܐ ܘܠܓܘܕܦܐ ܘܠܡܪܕܘܬܐ ܘܠܬܡܗܐ ܒܥܡ̈ܡܐ ܕܚܕܝܪ̈ܝܢ ܠܟܝ ܡܐ ܕܥܒ̇ܕܬ ܒܟܝ ܕܝ̈ܢܐ ܒܪܘܓܙܐ ܘܒܚܡܬܐ ܘܒܡܟܣܢܘܬܐ ܐܢܐ ܡܪܝܐ ܐܡ̇ܪܬ

98. Ezekiel 5:16

    ܡܐ ܕܫ̇ܕܪܬ ܥܠܝܟܘܢ ܓܐܪ̈ܝ ܒܝ̈ܫܐ ܕܟܦܢܐ ܕܗܘܘ ܠܚܒܠܐ ܕܐܫܕܪ ܐܢܘܢ ܠܡܚܒܠܘܬܟܘܢ ܘܟܦܢܐ ܐܘܣܦ ܥܠܝܟܘܢ ܘܐܬܒܪ ܩܢܝܐ ܕܥܒܘܪܟܘܢ

99. Ezekiel 5:17

    ܘܐܫܕܪ ܥܠܝܟܘܢ ܟܦܢܐ ܘܚܝܘܬܐ ܒܝܫܬܐ ܘܐܘܒܕܟܘܢ ܘܡܘܬܢܐ ܘܕܡܐ ܢܥܒܪ ܒܟܘܢ ܘܚܪܒܐ ܐܝܬܐ ܥܠܝܟܘܢ ܐܢܐ ܡܪܝܐ ܐܡ̇ܪܬ

100. Ezekiel 6:1

     ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ

Next → — showing 1–100 of 1,271

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.