← All works
Peshitta Exodus Peshitta (Syriac Old Testament) · 1,213 sections
Single column Two columns
Exodus 31:13 ܐܢܬ ܐܡ̣ܪ ܠܒ̈ܢܝ ܐܝܣܪܝܠ . ܫ̈ܒܐ ܗܘܝܬܘܢ ܢܛܪܝܢ . ܡܛܠ ܕܐܬ̇ܐ ܗܝ ܒܝܢ̈ܝ ܘܠܟܘܢ ܠܕܪ̈ܝܟܘܢ . ܕܬܕܥܘܢ ܕܐܢܐ ܐܢܐ ܡܪܝܐ ܕܡܩܕܫ ܐܢܐ ܠܟܘܢ .
Exodus 31:14 ܛܪܘ ܫܒܬܐ ܡܛܠ ܕܩܘܕܫܐ ܗܝ ܠܟܘܢ . ܟܠ ܡ̇ܢ ܕܢܚܠܝܗ̇ ܡܬܩܛܠܘ ܢܬܩܛܠ . ܘܟܠ ܡ̇ܢ ܕܢܥܒ̇ܕ ܒܗ̇ ܥܒ̇ܕܐ ܢܐܒܕ ܐܢܫܐ ܗ̇ܘ ܡܢ ܥܡܗ .
Exodus 31:15 ܫܬܐ ܝܘܡ̈ܝܢ ܬܥܒ̇ܕܘܢ ܥܒ̇ܕܐ . ܘܒܝܘܡܐ ܫܒܝܥܝܐ ܫܒܬܐ ܢܝܚܐ ܩܘܕܫܐ ܗܝ ܠܡܪܝܐ . ܟܠ ܡ̇ܢ ܕܢܥܒܕ ܥܒ̇ܕܐ ܒܝܘܡܐ ܕܫܒܬܐ ܡܬܩܛܠܘ ܢܬܩܛܠ .
Exodus 31:16 ܘܢܛܪܘܢ ܒܢ̈ܝ ܐܝܣܪܝܠ ܫܒܬܐ ܠܡܪܝܐ . ܠܡܥܒܕ ܫܒܬܐ ܠܕܪ̈ܝܗܘܢ . ܩܝܡܐ ܠܥܠܡ .
Exodus 31:17 ܒܝܢ̈ܝ ܠܕܒܝܬ ܐܝܣܪܝܠ . ܐܬ̇ܐ ܗܝ ܠܥܠܡ . ܡܛܘܠ ܕܠܫܬܐ ܝܘܡ̈ܝܢ ܥܒ̣ܕ ܡܪܝܐ ܫܡܝܐ ܘܐܪܥܐ . ܘܝܡ̈ܡܐ ܘܟܠ ܕܐܝܬ ܒܗܘܢ . ܘܒܝܘܡܐ ܫܒܝܥܝܐ ܫܠܝ ܘܐܬܬܢܝܚ .
Exodus 31:18 ܘܝܗ̣ܒ ܠܡܘܫܐ ܟܕ ܫ̇ܠܡ ܠܡܡܠܠܘ ܥܡܗ ܒܛܘܪܐ ܕܣܝܢܝ . ܬܪ̈ܬܝܢ ܠܘܚ̈ܐ ܕܣܗܕܘܬܐ . ܠܘܚ̈ܐ ܕܟܐܦܐ ܕܟܬ̈ܝܒܢ ܒܨܒܥܗ ܕܐܠܗܐ .
Exodus 32:1 ܘܚܙܘ ܥܡܐ ܕܐܘܚܪ ܡܘܫܐ ܕܢܚܘܬ ܡܢ ܛܘܪܐ . ܘܐܬܟܢܫܘ ܥܡܐ ܥܠ ܐܗܪܘܢ ܘܐܡܪܝܢ ܠܗ . ܩܘܡ ܥܒ̇ܕ ܠܢ ܐ̈ܠܗܐ ܕܢܐܙܠܘܢ ܩܕܡܝܢ . ܡܛܠ ܕܗܢܐ ܓܒܪܐ ܡܘܫܐ ܕܐܣܩܢ ܡܢ ܐܪܥܐ ܕܡܨܪܝܢ . ܠܐ ܝܕܥܝܢܢ ܡܢܐ ܗܘܝܗܝ .
Exodus 32:2 ܐܡ̇ܪ ܠܗܘܢ ܐܗܪܘܢ . ܦ̇ܪܩ̣ܘ ܩ̈ܕܫܐ ܕܕܗܒܐ ܕܐܝܬ ܒܐ̈ܕܢܐ ܕܢܝܫ̈ܝܟܘܢ ܘܕܒܢܝ̈ܟܘܢ ܘܕܒܢ̈ܬܟܘܢ ܘܐܝܬܘ ܠܝ .
Exodus 32:3 ܘܦ̇ܪܩܘ ܟܘܠܗ ܥܡܐ ܩ̈ܕܫܐ ܕܐܝܬ ܒܐ̈ܕܢܝܗܘܢ . ܘܐܝܬܝܘ ܠܐܗܪܘܢ .
Exodus 32:4 ܘܢܣܒܗ ܡܢܗܘܢ ܘܨܪܗ ܒܛܘܦܣܐ . ܘܥܒܕܗ ܥܓܠܐ ܕܢܣܟܬܐ . ܘܐܡܪܘ ܗܢܘ ܐܠܗܟ ܐܝܣܪܝܠ ܕܐܣܩܟ ܡܢ ܐܪܥܐ ܕܡܨܪܝܢ .
Exodus 32:5 ܘܕܚ̣ܠ ܐܗܪܘܢ ܘܒܢ̣ܐ ܡܕܒܚܐ ܩܕܡܘܗܝ . ܘܩ̣ܪܐ ܐܗܪܘܢ ܘܐܡ̣ܪ . ܚܓܐ ܗܘ ܠܡܪܝܐ ܡܚܪ .
Exodus 32:6 ܘܩ̇ܕܡܘ ܠܝܘܡܐ ܕܒܬܪܗ . ܘܐܣܩܘ ܥ̈ܠܘܬܐ ܘܕܒ̇ܚܘ ܫ̈ܠܡܐ . ܘܩ̇ܪ̈ܒܘ ܩܘܪ̈ܒܢܐ . ܘܝܬܒܘ ܥܡܐ ܠܡܐܟܠ ܘܠܡܫܬܐ . ܘܩܡܘ ܠܡܓܚܟ ܘܠܡܫܬܥܝܘ .
Exodus 32:7 ܘܐܡ̣ܪ ܡܪܝܐ ܠܡܘܫܐ . ܚܘܬ ܙܠ ܠܟ ܡܟܐ . ܡܛܠ ܕܚ̇ܒܠ ܥܡܟ ܕܐܦܩ̣ܬ ܡܢ ܡܨܪܝܢ .
Exodus 32:8 ܣܛܘ ܒܥܓܠ ܡܢ ܐܘܪܚܐ ܕܦܩ̇ܕܬ ܐܢܘܢ . ܘܥܒ̣ܕܘ ܠܗܘܢ ܥܓܠܐ ܕܢܣܟܬܐ . ܘܣܓܕܘ ܠܗ ܘܕܒܚܘ ܠܗ ܘܐܡܪܘ . ܗܢܘ ܐܠܗܟ ܐܝܣܪܝܠ ܕܐܣܩܟ ܡܢ ܐܪܥܐ ܕܡܨܪܝܢ .
Exodus 32:9 ܘܐܡ̣ܪ ܡܪܝܐ ܠܡܘܫܐ . ܚܙܝܬܗ ܠܥܡܐ ܗܢܐ . ܘܗܐ ܥܡܐ ܩܫ̣ܐ ܩܕܠܐ ܗܘ .
Exodus 32:10 ܗܫܐ ܫܒܘܩܝܢܝ . ܘܢܬܩ̣ܦ ܪܘܓܙܝ ܒܗܘܢ ܘܐܚܪܘܒ ܐܢܘܢ . ܘܐܥܒ̇ܕܟ ܠܥܡܐ ܪܒܐ .
Exodus 32:11 ܘܨܠܝ ܡܘܫܐ ܩܕܡ ܡܪܝܐ ܐܠܗܗ . ܘܐܡ̣ܪ ܠܐ ܡܪܝܐ . ܠܐ ܢܬܩ̣ܦ ܪܘܓܙܟ ܒܥܡܟ ܕܐܦܩ̣ܬ ܡܢ ܡܨܪܝܢ . ܒܚܝܠܟ ܪܒܐ ܘܒܕܪܥܟ ܪܡܐ .
Exodus 32:12 ܘܠܐ ܢܐܡܪ̈ܘܢ ܡܨܪ̈ܝܐ ܕܠܒܝܫܬܗܘܢ ܐܦܩ ܐܢܘܢ . ܕܢܩ̇ܛܠ ܐܢܘܢ ܒܝܢ̈ܝ ܛܘܪ̈ܐ . ܘܕܢܚܪܘܒ ܐܢܘܢ ܡܢ ܐ̈ܦܝ ܐܪܥܐ . ܐܬܬܢܝܚ ܡܢ ܚܡܬܐ ܕܪܘܓܙܟ . ܘܐܬܪܥܐ ܥܠ ܒܝܫܬܗ ܕܥܡܟ .
Exodus 32:13 ܐܬܕܟܪ ܠܐܒܪܗܡ ܘܠܐܝܣܚܩ ܘܠܐܝܣܪܝܠ ܥܒ̈ܕ̣ܝܟ . ܕܝܡ̣ܝܬ ܠܗܘܢ ܒܟ ܘܐܡ̣ܪܬ ܠܗܘܢ . ܕܐܣܓܐ ܙܪܥܟܘܢ ܐܝܟ ܟܘܟ̈ܒܐ ܕܒܫܡܝܐ . ܘܟܠܗ̇ ܐܪܥܐ ܕܐܡ̣ܪܬ . ܐܬܠ ܠܙܪܥܟܘܢ . ܘܢܐܪܬܘܢܗ̇ ܠܥܠܡ .
Exodus 32:14 ܘܐܬܪܥܝ ܡܪܝܐ ܥܠ ܒܝܫܬܐ ܕܐܡ̣ܪ ܠܡܥ̣ܒܕ ܠܥܡܗ .
Exodus 32:15 ܘܐܬܦܢܝ ܡܘܫܐ ܘܢܚ̣ܬ ܡܢ ܛܘܪܐ . ܘܬܪ̈ܬܝܢ ܠܘܚ̈ܐ ܕܣܗܕܘܬܐ ܒܐܝܕܗ . ܠܘܚ̈ܐ ܕܟܬܝܒ̈ܢ ܡܢ ܬܪ̈ܝܗܘܢ ܣܛܪ̈ܝܗܝܢ . ܡܟܐ ܘܡܟܐ ܟܬ̈ܝܒܢ .
Exodus 32:16 ܘܠܘܚ̈ܐ ܥܒ̇ܕܗ ܐ̈ܢܝܢ ܕܐܠܗܐ . ܘܟܬܒܐ ܟܬܒܗ ܗܘ ܕܐܠܗܐ . ܪܫܝܡ ܗܘܐ ܥܠ ܠܘܚ̈ܐ .
Exodus 32:17 ܘܫܡ̣ܥ ܝܫܘܥ ܩܠܗ ܕܥܡܐ ܟܕ ܡܬܟܬܫ . ܘܐܡ̣ܪ ܠܡܘܫܐ . ܩܠܐ ܕܩܪܒܐ ܒܡܫܪܝܬܐ .
Exodus 32:18 ܐܡ̇ܪ ܠܗ ܡܘܫܐ . ܠܐ ܩܠܐ ܕܡܡܠܠܐ ܕܓܢܒܪ̈ܐ ܐܦ ܠܐ ܩܠܐ ܕܚ̈ܠܫܐ . ܩܠܐ ܕܝܢ ܕܚܛܝܬܐ ܫܡ̇ܥ ܐܢܐ .
Exodus 32:19 ܘܟܕ ܩܪ̣ܒ ܠܡܫܪܝܬܐ . ܚܙܝܗܝ ܠܥܓܠܐ ܘܠܨܨ̈ܠܐ . ܘܐܬܦܝܪ ܡܘܫܐ . ܘܫ̣ܕܐ ܡܢ ܐܝܕܗ ܠܘܚ̈ܐ . ܘܬܒ̇ܪ ܐܢܝ̈ܢ ܒܫ̈ܦܘܠܘܗܝ ܕܛܘܪܐ .
Exodus 32:20 ܘܢܣܒܗ ܠܥܓܠܐ ܕܥܒܕܘ ܘܐܘܩܕܗ ܒܢܘܪܐ . ܘܫܦܗ ܒܫܘܦܝܢܐ ܥܕܡܐ ܕܐܬܕܩܩ ܐܝܟ ܥܦܪܐ . ܘܒܙܩܗ̇ ܕܩܬܗ ܥܠ ܐ̈ܦܝ ܡ̈ܝܐ . ܘܐܫܩܝ ܠܕܒܝܬ ܐܝܣܪܝܠ .
Exodus 32:21 ܘܐܡ̣ܪ ܡܘܫܐ ܠܐܗܪܘܢ . ܡܢܐ ܥܒ̣ܕ ܠܟ ܥܡܐ ܗܢܐ ܕܐܝܬܝܬ ܥܠܘܗܝ ܚܛܝܬܐ ܪܒܬܐ .
Exodus 32:22 ܘܐܡ̣ܪ ܐܗܪܘܢ . ܠܐ ܢܬܚܡܬ ܪܘܓܙܗ ܕܡܪܝ . ܐܢܬ ܝܕܥ̇ ܐܢܬ ܠܗ ܠܥܡܐ ܗܢܐ ܕܒܝܫ ܗܘ .
Exodus 32:23 ܘܐܡܪܘ ܠܝ . ܥܒ̇ܕ ܠܢ ܐ̈ܠܗܐ ܕܢܐܙܠܘܢ ܩܕܡܝܢ . ܡܛܠ ܕܗܢܐ ܡܘܫܐ ܕܐܣܩܢ ܡܢ ܐܪܥܐ ܕܡܨܪܝܢ . ܠܐ ܝܕܥ̇ܝܢܢ ܡܢܐ ܗܘܝܗܝ .
Exodus 32:24 ܘܐܡ̇ܪܬ ܠܗܘܢ . ܡ̇ܢ ܕܐܝܬ ܠܗ ܕܗܒܐ ܐܝܬܘ ܠܝ . ܘܐܝܬܝܘ ܠܝ . ܘܐܪܡܝܬܗ ܒܢܘܪܐ ܘܗܘ̣ܐ ܥܓܠܐ ܗܢܐ .
Exodus 32:25 ܘܚ̣ܙܐ ܡܘܫܐ ܠܥܡܐ ܕܚܛܘ ܠܗܘܢ . ܕܐܚܛܝ ܐܢܘܢ ܐܗܪܘܢ . ܕܢܗܘܘܢ ܫܡܐ ܣܪܝܐ ܒܐܚܪܝܬܗܘܢ .
Exodus 32:26 ܘܩܡ ܠܗ ܡܘܫܐ ܒܬܪܥܐ ܕܡܫܟܢܐ ܘܐܡ̣ܪ . ܡܢܘ ܡܢ ܡܪܝܐ ܢܐܬܐ ܠܘܬܝ . ܘܐܬ̇ܟܢܫܘ ܠܘܬܗ ܟܠܗܘܢ ܒܢ̈ܘܗܝ ܕܠܘܝ .
Exodus 32:27 ܘܐܡ̣ܪ ܠܗܘܢ ܡܘܫܐ . ܗܟܢܐ ܐܡ̇ܪ ܡܪܝܐ ܐܠܗܐ ܕܐܝܣܪܝܠ . ܐܪܡܘ ܐܢܫ ܣܝܦܗ ܒܚ̈ܨܘܗܝ . ܘܥܒܪܘ ܘܬܘܒܘ ܡܢ ܬܪܥ ܠܬܪܥ ܒܡܫܪܝܬܐ . ܘܩܛܘܠܘ ܐܢܫ ܠܐܚܘܗܝ ܘܐܢܫ ܠܚܒܪܗ ܘܐܢܫ ܠܩܪܝܒܗ .
Exodus 32:28 ܘܥܒ̣ܕܘ ܒܢ̈ܝ ܠܘܝ ܐܝܟ ܡܠܬܗ ܕܡܘܫܐ . ܘܢܦܠܘ ܡܢ ܥܡܐ ܒܝܘܡܐ ܗ̇ܘ . ܐܝܟ ܬܠܬܐ ܐ̈ܠܦܝܢ ܓܒܪ̈ܝܢ .
Exodus 32:29 ܐܡ̇ܪ ܠܗܘܢ ܡܘܫܐ . ܡܠ̣ܘ ܐ̈ܝܕܝܟܘܢ ܝܘܡ̣ܢܐ ܠܡܪܝܐ . ܐܢܫ ܒܒܪܗ ܘܒܐܚܘܗܝ . ܡܛܠ ܕܬ̇ܐܬܐ ܥܠܝܟܘܢ ܒܘܪܟܬܐ ܝܘܡܢܐ .
Exodus 32:30 ܘܗܘ̣ܐ ܠܝܘܡܐ ܕܒܬܪܗ . ܘܐܡ̣ܪ ܡܘܫܐ ܠܥܡܐ . ܐܢܬܘܢ ܚܛܝܬܘܢ ܚܛܝܬܐ ܗܕܐ ܪܒܬܐ . ܗܫܐ ܐܣܩ ܠܘܬ ܡܪܝܐ . ܛܟ ܢܫܒܘܩ ܠܚ̈ܘܒܝܟܘܢ .
Exodus 32:31 ܘܗܦ̣ܟ ܡܘܫܐ ܠܘܬ ܡܪܝܐ ܘܐܡ̣ܪ . ܒܒܥܘ ܡܪܝܐ ܐܠܗܐ . ܫܪܝܪܐܝܬ ܚ̣ܛܐ ܥܡܐ ܗܢܐ ܚܛܝܬܐ ܪܒܬܐ . ܘܥܒ̣ܕܘ ܠܗܘܢ ܐ̈ܠܗܐ ܕܕܗܒܐ .
Exodus 32:32 ܗܫܐ ܐܢ ܫܒ̇ܩ ܐܢܬ ܠܚ̈ܛܗܝܗܘܢ . ܘܐܢ ܠܐ ܥܛܝܢܝ ܡܢ ܣܦܪܟ ܕܟܬ̣ܒܬ .
Exodus 32:33 ܘܐܡ̣ܪ ܡܪܝܐ ܠܡܘܫܐ . ܡ̇ܢ ܕܚ̣ܛܐ ܠܝ ܐܥܛܝܘܗܝ ܡܢ ܣܦܪܝ .
Exodus 32:34 ܗܫܐ ܙܠ ܐܘܒܠܝܗܝ ܠܥܡܐ ܗܢܐ ܠܐܝܟܐ ܕܐܡ̇ܪ ܐܢܐ ܠܟ . ܘܗܐ ܡܠܐܟܝ ܢܐܙܠ ܩܕܡܝܟ . ܘܒܝܘܡܐ ܕܦܘܩܕܢܝ ܐܦܩܘܕ ܥܠܝܗܘܢ ܚ̈ܛܗܝܗܘܢ .
Exodus 32:35 ܘܡܚ̣ܐ ܡܪܝܐ ܠܥܡܐ ܥܠ ܕܦܠܚܘ ܠܥܓܠܐ ܕܥܒ̣ܕ ܐܗܪܘܢ .
Exodus 33:1 ܘܐܡ̣ܪ ܡܪܝܐ ܠܡܘܫܐ . ܣܩ ܙܠ ܡܟܐ . ܐܢܬ ܘܥܡܟ ܕܐܦܩ̣ܬ ܡܢ ܡܨܪܝܢ . ܠܐܪܥܐ ܕܝܡ̇ܝܬ ܠܐܒܪܗܡ ܘܠܐܝܣܚܩ ܘܠܝܥܩܘܒ . ܘܐܡ̇ܪܬ ܠܗܘܢ ܕܠܙܪܥܟܘܢ ܐܬܠܝܗ̇ .
Exodus 33:2 ܘܐܫܕܪ ܩܕܡܝܟ ܡܠܐܟܐ . ܘܢܚܪܘܒ ܠܟܢܥ̈ܢܝܐ ܘܠܐܡܘܪ̈ܝܐ ܘܠܚ̈ܬܝܐ ܘܠܦܪ̈ܙܝܐ . ܘܠܚ̈ܘܝܐ ܘܠܝܒ̈ܘܣܝܐ .
Exodus 33:3 ܠܐܪܥܐ ܕܡܪܕܝܐ ܚܠܒܐ ܘܕܒܫܐ . ܡܛܠ ܕܠܐ ܣ̇ܠܩ ܐܢܐ ܒܝܢܬܟܘܢ . ܡܛܠ ܕܥܡܐ ܐܢܬܘܢ ܩܫ̣ܐ ܩܕܠܐ . ܕܠܡܐ ܐܘܒܕܟܘܢ ܒܐܘܪܚܐ .
Exodus 33:4 ܘܫܡܥܘ ܥܡܐ ܦܬܓܡܐ ܗܢܐ ܒܝܫܐ ܘܟ̣ܪܝܬ ܠܗܘܢ . ܘܠܐ ܫܩܠܘ ܓܒܪ ܙܝܢܗ ܥܠܘܗܝ .
Exodus 33:5 ܘܐܡ̣ܪ ܡܪܝܐ ܠܡܘܫܐ . ܐܡ̣ܪ ܠܒܢ̈ܝ ܐܝܣܪܝܠ . ܐܢܬܘܢ ܥܡܐ ܐܢܬܘܢ ܩܫ̣ܐ ܩܕܠܐ . ܫܥܬܐ ܚܕܐ ܐܣܩ ܒܝܢܬܟܘܢ ܘܐܘܒܕܟܘܢ . ܗܫܐ ܐܥܒܪܘ ܙܝܢܟܘܢ ܡܢܟܘܢ ܘܐܕܥ ܡܢܐ ܐܥܒ̇ܕ ܠܟܘܢ .
Exodus 33:6 ܘܫܩܠܘ ܒܢ̈ܝ ܐܝܣܪܝܠ ܙܝܢܗܘܢ ܡܢܗܘܢ ܡܢ ܛܘܪܐ ܕܚܘܪܝܒ .
Exodus 33:7 ܘܡܘܫܐ ܢܣ̣ܒ ܡܫܟܢܗ . ܘܢܩܫܗ ܠܗ ܠܒܪ ܡܢ ܡܫܪܝܬܐ . ܐܪܚܩܗ ܡܢ ܡܫܪܝܬܐ . ܘܩܪܝܗܝ ܡܫܟܢܙܒܢܐ . ܘܟܠ ܡ̇ܢ ܕܫܐ̇ܠ ܗܘܐ ܡܢ ܡܪܝܐ . ܢ̇ܦܩ ܠܡܫܟܢܙܒܢܐ ܕܠܒܪ ܡܢ ܡܫܪܝܬܐ .
Exodus 33:8 ܘܡܐ ܕܢܦܩ̇ ܡܘܫܐ ܠܡܫܟܢܐ . ܩܝܡܝܢ ܟܠܗ ܥܡܐ ܘܡܬܛܝܒܝܢ ܐܢܫ ܒܬܪܥ ܡܫܟܢܗ . ܘܚܝܪܝܢ ܒܬܪܗ ܕܡܘܫܐ . ܥܕܡܐ ܕܥܐ̇ܠ ܠܡܫܟܢܐ .
Exodus 33:9 ܘܡܐ ܕܥܠ ܡܘܫܐ ܠܡܫܟܢܐ . ܢܚ̇ܬ ܥܡܘܕܐ ܕܥܢܢܐ ܘܩܐܡ ܒܬܪܥܐ ܕܡܫܟܢܐ . ܘܡܬܡܠܠ ܥܡ ܡܘܫܐ .
Exodus 33:10 ܘܚ̇ܙܐ ܟܠܗ ܥܡܐ ܥܡܘܕܐ ܕܥܢܢܐ ܕܩܐܡ ܒܬܪܥܐ ܕܡܫܟܢܐ . ܘܩܝܡܝܢ ܟܘܠܗ ܥܡܐ . ܘܣܓܕܝܢ ܐܢܫ ܒܬܪܥ ܡܫܟܢܗ .
Exodus 33:11 ܘܡܠܠ ܡܪܝܐ ܥܡ ܡܘܫܐ ܐ̈ܦܝܢ ܠܘܩܒܠ ܐ̈ܦܝܢ . ܐܝܟ ܕܡܡܠܠ ܓܒܪܐ ܥܡ ܚܒܪܗ . ܘܗ̣ܦܟ ܠܡܫܪܝܬܐ . ܘܡܫܡܫܢܗ ܗܘܫܥ ܒܪܢܘܢ ܛܠܝܐ ܠܐ ܥ̇ܢܕ ܗܘܐ ܡܢ ܓܘ ܡܫܟܢܐ .
Exodus 33:12 ܘܐܡ̣ܪ ܡܘܫܐ ܠܡܪܝܐ . ܚܙܝ ܕܐܢܬ ܐܡ̣ܪܬ ܠܝ . ܐܣܩܝܗܝ ܠܥܡܐ ܗܢܐ . ܘܐܢܬ ܠܐ ܚܘܝܬܢܝ ܡ̇ܢ ܕܡܫܕܪ ܐܢܬ ܥܡܝ . ܘܐܢܬ ܐܡ̣ܪܬ ܝܕܥܬܟ ܒܫܡܐ . ܘܐܦ ܐܫܟ̣ܚܬ ܪ̈ܚܡܐ ܒܥܝܢ̈ܝ .
Exodus 33:13 ܗܫܐ ܐܢ ܐܫܟ̇ܚܬ ܪ̈ܚܡܐ ܒܥܝܢ̈ܝܟ . ܚܘܢܝ ܐܘܪܚܟ ܘܐܕܥܟ . ܡܛܠ ܕܐܫܟܚ ܪ̈ܚܡܐ ܒܥܝܢ̈ܝܟ . ܘܚܙܝ ܕܥܡܟ ܗܢܐ ܥܡܐ ܗܘ ܪܒܐ .
Exodus 33:14 ܘܐܡ̣ܪ ܡܪܝܐ ܠܡܘܫܐ . ܩܕܡܝ ܙܠ ܘܐܢܝܚ ܠܟ .
Exodus 33:15 ܐܡ̇ܪ ܠܗ . ܐܢ ܐܢܬ ܠܐ ܐ̇ܙܠ ܐܢܬ ܥܡܢ ܠܐ ܬܣܩܢ ܡܟܐ .
Exodus 33:16 ܘܒܡܢܐ ܢܬܝܕܥ ܗܪܟܐ . ܕܐܫܟ̇ܚܬ ܪ̈ܚܡܐ ܒܥܝܢ̈ܝܟ ܐܢܐ ܘܥܡܟ . ܐܠܐ ܡܐ ܕܐܙܠ̣ܬ ܥܡܢ . ܘܗܘܝܢ ܦܪ̈ܝܫܝܢ ܐܢܐ ܘܥܡܟ . ܡܢ ܟܠܗܘܢ ܥܡ̈ܡܐ ܕܐܝܬ ܥܠ ܐ̈ܦܝ ܐܪܥܐ .
Exodus 33:17 ܘܐܡ̣ܪ ܡܪܝܐ ܠܡܘܫܐ . ܐܝܟ ܡܠܬܐ ܗܕܐ ܕܐܡ̣ܪܬ ܐܥܒܕ . ܡܛܠ ܕܐܫܟ̣ܚܬ ܪ̈ܚܡܐ ܒܥܝܢ̈ܝ . ܘܐܕܥܟ ܒܫܡܐ .
Exodus 33:18 Exodus 33:19 ܘܐܡ̣ܪ ܐܢܐ ܐܥܒ̣ܪ ܟܠܗ ܛܘܒܝ ܩܕܡܝܟ . ܘܐܩܪܐ ܒܫܡܐ ܡܪܝܐ ܩܕܡܝܟ . ܘܐ̇ܚܘܢ ܠܡ̇ܢ ܕܐܚܘܢ ܘܐܪ̣ܚܡ ܠܡ̇ܢ ܕܐܪܚܡ .
Exodus 33:20 ܘܐܡ̣ܪ ܠܐ ܡܫܟܚ ܐܢܬ ܠܡܚܙܐ ܐ̈ܦܝ . ܡܛܠ ܕܠܐ ܚ̇ܙܐ ܠܝ ܒܪܢܫܐ ܘܚ̇ܝܐ .
Exodus 33:21 ܘܐܡ̣ܪ ܡܪܝܐ ܠܡܘܫܐ . ܗܐ ܐܬܪܐ ܩܕܡܝ . ܩܘܡ ܥܠ ܛܪܢܐ .
Exodus 33:22 ܘܡܐ ܕܥܒ̇ܪ ܐܝܩܪܝ ܐܣܝܡܟ ܒܡܥܪܬܐ ܕܛܪܢܐ . ܘܐܓܢ ܐܝܕܝ ܥܠܝܟ ܥܕܡܐ ܕܐܥܒܪ .
Exodus 33:23 ܘܐܥܒ̣ܪ ܐܝܕܝ ܘܬܚܙܐ ܒܣܬܪܝ . ܘܐ̈ܦܝ ܠܐ ܢܬܚܙܝܢ .
Exodus 34:1 ܘܐܡ̣ܪ ܡܪܝܐ ܠܡܘܫܐ . ܦܣܘܠ ܠܟ ܬܪ̈ܬܝܢ ܠܘܚ̈ܐ ܕܟܐܦܐ . ܐܝܟ ܩܕܡܝ̈ܬܐ . ܘܐܟܬܘܒ ܥܠ ܠܘܚ̈ܐ ܦܬ̈ܓܡܐ . ܕܐܝܬ ܗܘܘ ܥܠ ܠܘܚ̈ܐ ܩܕܡܝ̈ܬܐ ܕܬܒ̣ܪܬ .
Exodus 34:2 ܘܗ̣ܘܝ ܡܛܝܒ ܒܨܦܪܐ . ܘܣܩ ܒܨܦܪܐ ܠܛܘܪܐ ܕܣܝܢܝ . ܘܩܘܡ ܬܡ̇ܢ ܒܪܝܫ ܛܘܪܐ .
Exodus 34:3 ܘܐܢܫ ܠܐ ܢܣܩ ܥܡܟ . ܘܐܢܫ ܠܐ ܢܬܚܙܐ ܒܟܠܗ ܛܘܪܐ . ܐܦ ܠܐ ܥܢܐ ܘܬܘܪ̈ܐ ܢܪܥܘܢ ܠܩܘܒܠܗ ܕܛܘܪܐ ܗ̇ܘ .
Exodus 34:4 ܘܦܣ̣ܠ ܬܪ̈ܬܝܢ ܠܘܚ̈ܐ ܕܟܐܦܐ ܐܝܟ ܩܕܡܝ̈ܬܐ . ܘܩ̇ܕܡ ܡܘܫܐ ܒܨܦܪܐ . ܘܣܠ̣ܩ ܠܛܘܪܐ ܕܣܝܢܝ ܐܝܟܢܐ ܕܦܩܕܗ ܡܪܝܐ . ܘܢܣܒ̣ ܬܪ̈ܬܝܢ ܠܘܚ̈ܐ ܕܟܐܦܐ ܒܐܝܕܗ .
Exodus 34:5 ܘܢܚ̣ܬ ܡܪܝܐ ܒܥܢܢܐ . ܘܩܡ ܥܡܗ ܬܡܢ . ܘܩ̣ܪܐ ܒܫܡܐ ܡܪܝܐ .
Exodus 34:6 ܘܥܒ̣ܪ ܡܪܝܐ ܩܕܡܘܗܝ . ܘܩ̣ܪܐ ܡܪܝܐ ܡܪܝܐ . ܐܠܗܐ ܡܪܚܡܢܐ ܘܡܪܚܦܢܐ . ܕܢܓܝܪܐ ܪܘܚܗ ܘܣܓܝܐܐ ܛܝܒܘܬܗ ܘܩܘܫܬܗ .
Exodus 34:7 ܢ̇ܛܪ ܛܝܒܘܬܐ ܠܐ̈ܠܦܝ ܕܪ̈ܐ . ܘܫܒ̇ܩ ܚ̈ܛܗܐ ܘܚ̈ܘܒܐ . ܘܡܙܟܝܘ ܠܐ ܡܙܟܐ . ܦܩ̇ܕ ܚ̈ܘܒܐ ܕܐ̈ܒܗܐ ܥܠ ܒܢ̈ܝܐ ܘܥܠ ܒܢ̈ܝ ܒ̈ܢܝܐ . ܥܠ ܬܠܬܐ ܘܥܠ ܐܪ̈ܒܥܐ ܕܪ̈ܝܢ .
Exodus 34:8 ܘܐܣܬܪܗܒ ܡܘܫܐ ܘܢܦ̣ܠ ܥܠ ܐܪܥܐ ܘܣܓܕ̣ .
Exodus 34:9 ܘܐܡ̣ܪ ܐܢ ܐ̇ܫܟܚܬ ܪ̈ܚܡܐ ܒܥܝܢ̈ܝܟ ܡܪܝ . ܢܐܙܠ ܗܫܐ ܡܪܝ ܒܝܢܬܢ . ܡܛܠ ܕܥܡܐ ܐܢܘܢ ܩܫܐ ܩܕܠܐ . ܘܫܒܘܩ ܠܚ̈ܘܒܝܢ ܘܠܚ̈ܛܗܝܢ ܘܬܐܪܬܢ .
Exodus 34:10 ܘܐܡ̣ܪ ܗܐ ܡܩܝܡ ܐܢܐ ܩܝܡܐ . ܠܘܩܒܠ ܟܠܗ ܥܡܟ . ܘܐܥܒ̇ܕ ܦܪ̈ܝܫܬܐ ܕܠܐ ܐܬܥ̣ܒܕ . ܒܟܠܗ̇ ܐܪܥܐ ܘܒܟܠܗܘܢ ܥܡ̈ܡܐ . ܘܢܚܙܐ ܟܠܗ ܥܡܐ ܗܢܐ ܕܐܢܬ ܒܓܘܗ . ܥܒ̇ܕܗ ܕܡܪܝܐ ܕܕܚܝܠ ܗܘ . ܕܥܒ̇ܕ ܐܢܐ ܥܡܟ .
Exodus 34:11 ܛܪ ܡܕܡ ܕܡܦ̇ܩܕ ܐܢܐ ܠܟ ܝܘܡܢܐ . ܗܐ ܚ̇ܪܒ ܐܢܐ ܡܢ ܩܕܡܝܟ . ܟܢ̈ܥܢܝܐ ܘܐܡܘܪ̈ܝܐ . ܘܚ̈ܬܝܐ . ܘܦܪ̈ܙܝܐ . ܘܚ̈ܘܝܐ ܘܝܒ̈ܘܣܝܐ .
Exodus 34:12 ܐܙܕܗܪ ܠܐ ܬܩܝܡ ܩܝ̇ܡܐ ܠܝܬ̈ܒܝ ܐܪܥܐ ܕܐ̇ܙܠ ܐܢܬ ܠܘܬܗܘܢ . ܕܠܐ ܢܗܘܘܢ ܠܟ ܬܘܩܠܬܐ .
Exodus 34:13 ܡ̈ܕܒܚܝܗܘܢ ܥܩ̇ܪ . ܘܩܝ̈ܡܬܗܘܢ ܬܒ̇ܪ . ܘܕܚ̈ܠܬܗܘܢ ܦܣ̇ܩ .
Exodus 34:14 ܠܐ ܬܣܓܘܕ ܠܐܠܗ ܐܚܪܝܢ . ܡܛܠ ܕܡܪܝܐ ܛܢܢܐ ܫܡܗ . ܐܠܗܐ ܗܘ ܛܢܢܐ .
Exodus 34:15 ܠܐ ܬܩܝܡ ܩܝ̇ܡܐ ܥܡ ܝܬܒ̈ܝ ܐܪܥܐ . ܕܠܐ ܢܛܥܘܢ ܒܬܪ ܕܚ̈ܠܬܗܘܢ . ܘܢ̇ܕܒܚܘܢ ܠܐ̈ܠܗܝܗܘܢ . ܘܢܩܪܘܢܟ ܘܬܐܟܘܠ ܡܢ ܕܒܚܝ̈ܗܘܢ .
Exodus 34:16 ܘܬܣܒ ܡܢ ܒܢ̈ܬܗܘܢ ܠܒܢ̈ܝܟ . ܘܒܢ̈ܬܟ ܬܬܠ ܠܒ̈ܢܝܗܘܢ . ܘܢ̣ܛܥܝܢ ܒܢ̈ܬܟܘܢ ܒܬܪ ܐ̈ܠܗܝܗܘܢ . ܘܢ̇ܛܥܝܢ ܠܒ̈ܢܝܟ ܒܬܪ ܐ̈ܠܗܝܗܝܢ .
Exodus 34:17 ܐ̈ܠܗܐ ܕܢܣܟܬܐ ܠܐ ܬܥܒ̇ܕ ܠܟ .
Exodus 34:18 ܥܕܥܐܕܐ ܕܦܛܝܪ̈ܐ ܬܛܪ . ܫܒܥܐ ܝܘܡ̈ܝܢ ܬܐܟܘܠ ܦܛܝܪܐ . ܐܝܟ ܕܦܩܕܬܟ ܒܙܒܢܐ ܕܝܪܚܐ ܕܗ̈ܒܒܐ . ܡܛܠ ܕܒܝܪܚܐ ܕܗ̈ܒܒܐ ܢܦܩܬ ܡܢ ܡܨܪܝܢ .
Exodus 34:19 ܟܠ ܦܬ̇ܚ ܪ̈ܚܡܐ ܠܝ . ܘܟܠ ܒܘܟܪ̈ܐ ܕܒܥܝܪ̈ܟ . ܕܬܘܪ̈ܐ ܘܕܐܡܪ̈ܐ .
Exodus 34:20 ܘܒܘܟܪ̈ܐ ܕܒܥܝܪ̈ܐ ܬܦܪܘܩ ܒܐܡܪܐ . ܘܐܢ ܠܐ ܬܦܪܩܝܘܗܝ ܬܩܛܠܝܘܗܝ . ܘܟܠ ܒܘܟܪ̈ܐ ܕܒ̈ܢܝܟ ܬܦܪܘܩ . ܘܠܐ ܬܬܚܙܘܢ ܩܕܡܝ ܣܪܝܩܐܝܬ .
Exodus 34:21 ܫܬܐ ܝܘܡ̈ܝܢ ܬܦܠܘܚ . ܘܒܝܘܡܐ ܫܒܝܥܝܐ ܬܬܢܝܚ . ܒܙܪܥܐ ܘܒܚܨܕܐ ܬܬܢܝܚ .
Exodus 34:22 ܘܥܕܥܐܕܐ ܕܫܒ̈ܘܥܐ ܬܥܒ̇ܕ ܠܟ ܪܝܫ ܚܨܕܐ ܕܚ̈ܛܐ . ܘܚܓܐ ܕܚܡܠܐ ܒܡܦܩܗ̇ ܕܫܢܬܐ .
Exodus 34:23 ܬܠܬ ܙܒ̈ܢܝܢ ܒܫܢܬܐ ܢܬܚܙܐ ܟܠ ܕܘܟܪܢܟ ܩܕܡ ܡܪܝܐ ܐܠܗܐ ܕܐܝܣܪܝܠ .
Exodus 34:24 ܡܛܠ ܕܐܚܪܘܒ ܥܡ̈ܡܐ ܡܢ ܩܕܡܝܟ ܘܐܦܬܐ ܬܚܘܡܟ . ܘܠܐ ܢܪܓ ܐܢܫ ܐܪܥܟ . ܡܐ ܕܣ̇ܠܩ ܐܢܬ ܠܡܬܚܙܝܘ ܩܕܡ ܡܪܝܐ ܐܠܗܟ . ܬܠܬ ܙܒ̈ܢܝܢ ܒܫܢܬܐ .
Exodus 34:25 ܠܐ ܬܟܘܣ ܥܠ ܚܡܝܥܐ ܕܡܐ ܕܕܒܚܬܐ . ܘܠܐ ܢܒܘܬ ܠܨܦܪܐ ܕܒܚܐ ܕܥܕܥܐܕܐ ܕܦܨܚܐ .
Exodus 34:26 ܪܝܫ ܥܠܠܬ̈ܗ̇ ܕܐܪܥܟ ܬܝܬܐ ܠܒܝܬܗ ܕܡܪܝܐ ܐܠܗܟ . ܠܐ ܬܒܫܠ ܓܕܝܐ ܒܚܠܒܐ ܕܐܡܗ .
Exodus 34:27 ܘܐܡ̣ܪ ܡܪܝܐ ܠܡܘܫܐ . ܟܬܘܒ ܠܟ ܗܠܝܢ ܦܬ̈ܓܡܐ . ܕܡܛܠ ܗܠܝܢ ܦܬ̈ܓܡܐ ܐ̇ܩܝܡܬ ܥܡܟ ܩܝ̇ܡܐ ܘܥܡ ܟܠܗ ܐܝܣܪܝܠ .
Exodus 34:28 ܘܗܘ̣ܐ ܬܡܢ ܥܡ ܡܪܝܐ . ܐܪ̈ܒܥܝܢ ܐܝܡܡ̈ܝܢ ܘܐܪ̈ܒܥܝܢ ܠܝ̈ܠܘܢ . ܠܚܡܐ ܠܐ ܐܟ̣ܠ . ܘܡ̈ܝܐ ܠܐ ܐܫܬܝ . ܘܟܬܒ̣ ܥܠ ܠܘܚ̈ܐ ܕܟܐܦܐ ܡ̈ܠܝ ܩܝ̇ܡܐ ܥܣܪܐ ܦܬ̈ܓܡܝܢ .
Exodus 34:29 ܘܟܕ ܢܚ̣ܬ ܡܘܫܐ ܡܢ ܛܘܪܐ ܕܣܝܢܝ . ܬܪ̈ܬܝܢ ܠܘܚ̈ܐ ܕܣܗܕܘܬܐ ܒܐܝܕܗ ܕܡܘܫܐ . ܟܕ ܢܚ̣ܬ ܡܢ ܛܘܪܐ . ܘܡܘܫܐ ܠܐ ܝܕܥ̣ ܕܐܙܕܗܝ ܡܫܟܐ ܕܐ̈ܦܘܗܝ . ܟܕ ܡܠܠ ܥܡܗ ܐܠܗܐ .
Exodus 34:30 ܘܚ̣ܙܐ ܐܗܪܘܢ ܘܟܠܗ ܐܝܣܪܝܠ . ܕܐܙܕܗܝ ܡܫܟܐ ܕܐ̈ܦܘܗܝ ܕܡܘܫܐ . ܘܕܚܠܘ ܠܡܩܪܒ ܠܘܬܗ .
Exodus 34:31 ܘܩ̣ܪܐ ܐܢܘܢ ܡܘܫܐ ܘܐܬܘ ܠܘܬܗ . ܐܗܪܘܢ ܘܟܠܗܘܢ ܪ̈ܘܪܒܢܐ ܕܟܢܘܫܬܐ . ܘܡܠܠ ܡܘܫܐ ܥܡܗܘܢ .
Exodus 34:32 ܘܗܝܕܝܢ ܩܪܒܘ ܠܘܬܗ ܟܠܗܘܢ ܒܢ̈ܝ ܐܝܣܪܝܠ . ܘܦܩ̇ܕ ܐܢܘܢ ܟܠܡܕܡ ܕܡܠܠ ܡܪܝܐ ܥܡܗ ܒܛܘܪܐ ܕܣܝܢܝ .
Exodus 34:33 ܘܟܕ ܫ̇ܠܡ ܡܘܫܐ ܕܢܡܠܠ ܥܡܗܘܢ . ܐܪܡܝ ܥܠ ܐ̈ܦܘܗܝ ܫܘܫܦܐ .
Exodus 34:34 ܘܟܕ ܥܐ̇ܠ ܗܘܐ ܡܘܫܐ ܩܕܡ ܡܪܝܐ ܕܢܡܠܠ ܥܡܗ . ܫ̇ܩܠ ܗܘܐ ܠܗ̇ ܠܫܘܫܦܐ ܥܕܡܐ ܕܢ̇ܦܩ . ܘܢ̇ܦܩ ܗܘܐ ܐܡ̇ܪ ܠܕܒܝܬ ܐܝܣܪܝܠ ܡܕܡ ܕܡ̇ܬܦܩܕ .
Exodus 34:35 ܘܚ̇ܙܝܢ ܗܘܘ ܒܢ̈ܝ ܐܝܣܪܝܠ ܐ̈ܦܘܗܝ ܕܡܘܫܐ . ܕܐܙܕܗܝ ܡܫܟܐ ܕܐ̈ܦܘܗܝ ܕܡܘܫܐ . ܘܫܩ̇ܠ ܗܘܐ ܡܘܫܐ ܫܘܫܦܐ ܡܢ ܐ̈ܦܘܗܝ . ܡܐ ܕܥܐ̇ܠ ܗܘܐ ܕܢܡܠܠ ܥܡܗ .
Exodus 35:1 ܘܟܢ̇ܫ ܡܘܫܐ ܠܟܠܗ̇ ܟܢܘܫܬܐ ܕܒܢ̈ܝ ܐܝܣܪܝܠ ܘܐܡ̣ܪ ܠܗܘܢ . ܗܠܝܢ ܦܬ̈ܓܡܐ ܕܦܩ̇ܕ ܡܪܝܐ ܠܡܥܒ̇ܕ .
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .