← All works
Peshitta Deuteronomy Peshitta (Syriac Old Testament) · 959 sections
Single column Two columns
Deuteronomy 22:23 ܘܐܢ ܬܗܘܐ ܥܠܝܡܬܐ ܒܬܘܠܬܐ ܕܡܟܝܪܐ ܠܓܒܪܐ . ܘܢܫܟܚܝܗ̇ ܓܒܪܐ ܐܚܪܢܐ ܒܩܪܝܬܐ ܘܢܕܡܟ ܥܡܗ̇ .
Deuteronomy 22:24 ܐܦܩܘ ܐܢܘܢ ܠܬܪ̈ܝܗܘܢ ܠܬܪܥܐ ܕܩܪܝܬܐ ܗ̇ܝ . ܘܪܓܘܡܘ ܐܢܘܢ ܒܟܐ̈ܦܐ ܘܢܡܘܬܘܢ . ܥܠ ܕܠܐ ܒܓܢܬ ܗ̇ܝ ܥܠܝܡܬܐ ܒܩܪܝܬܐ . ܘܗ̇ܘ ܓܒܪܐ ܥܠ ܕܨܥܪ ܐܢܬܬ ܚܒܪܗ . ܘܒܥܪܘ ܒܝܫܬܐ ܡܢ ܒܝܢܬܟܘܢ .
Deuteronomy 22:25 ܘܐܢ ܒܚܩܠܐ ܐܫܟܚ ܓܒܪܐ ܥܠܝܡܬܐ ܕܡܟܝܪܐ . ܘܐܚܕܗ̇ ܒܩܛܝܪܐ ܘܕܡܟ ܥܡܗ̇ . ܢܬܩܛܠ ܓܒܪܐ ܕܕܡܟ ܥܡܗ̇ ܒܠܚܘܕܘܗܝ .
Deuteronomy 22:26 ܘܠܥܠܝܡܬܐ ܠܐ ܬܥܒܕܘܢ ܠܗ̇ ܡܕܡ . ܡܛܠ ܕܠܐ ܚܝ̇ܒܐ ܥܠܝܡܬܐ ܚܛܗܐ ܕܡܘܬܐ . ܐܝܟ ܕܩ̇ܐܡ ܓܝܪ ܓܒܪܐ ܥܠ ܚܒܪܗ ܘܩ̇ܛܠ ܠܗ . ܗܟܢܐ ܗܝ ܨܒܘܬܐ ܗܕܐ .
Deuteronomy 22:27 ܡܛܠ ܕܒܚܩܠܐ ܗܘ ܐܫܟܚܗ̇ . ܘܒܓܢܬ ܥܠܝܡܬܐ ܕܡܟܝܪܐ ܘܠܝܬ ܕܡܦܨܐ ܠܗ̇ .
Deuteronomy 22:28 ܘܐܢ ܢܫܟܚ ܓܒܪܐ ܥܠܝܡܬܐ ܒܬܘܠܬܐ ܕܠܐ ܗܘܬ ܡܟܝܪܐ . ܘܢܐܚܕܝܗ̇ ܘܢܕܡܟ ܥܡܗ̇ ܘܢܫܬܟܚܘܢ .
Deuteronomy 22:29 ܢܬܠ ܓܒܪܐ ܗ̇ܘ ܕܕܡܟ ܥܡܗ̇ ܠܐܒܘܗ̇ ܕܥܠܝܡܬܐ ܚܡܫܝܢ ܕܟܣܦܐ . ܘܠܗ ܬܗܘܐ ܐܢܬܬܐ ܚܠܦ ܕܨܥܪܗ̇ . ܘܠܐ ܢܫܬܠܛ ܠܡܫܒܩܗ̇ ܟܠ ܝܘܡ̈ܝ ܚ̈ܝܘܗܝ .
Deuteronomy 23:1 ܠܐ ܢܣܒ ܓܒܪܐ ܐܢܬܬ ܐܒܘܗܝ . ܘܠܐ ܢܓܠܐ ܟܢܦܐ ܕܐܒܘܗܝ .
Deuteronomy 23:2 ܠܐ ܢܥܘܠ ܓܝܪܐ ܠܟܢܘܫܬܗ ܕܡܪܝܐ .
Deuteronomy 23:3 ܘܠܐ ܢܥܘܠ ܒܪ ܓܘܪ̈ܐ ܠܟܢܘܫܬܗ ܕܡܪܝܐ . ܐܦ ܠܐ ܥܠ ܥܣܪܐ ܕܪ̈ܝܢ ܢܥܘܠ ܠܟܢܘܫܬܗ ܕܡܪܝܐ .
Deuteronomy 23:4 ܠܐ ܢܥܘܠ ܥܡܘܢܝܐ ܘܡܘܐܒܝܐ ܠܟܢܘܫܬܗ ܕܡܪܝܐ . ܐܦ ܠܐ ܠܕܪܐ ܥܣܝܪܝܐ ܢܥܠܘܢ ܠܟܢܘܫܬܗ ܕܡܪܝܐ ܠܥܠܡ .
Deuteronomy 23:5 ܥܠ ܕܠܐ ܩܪܒܘ ܠܟܘܢ ܠܚܡܐ ܘܡ̈ܝܐ ܒܐܘܪܚܐ . ܟܕ ܢܦܩܬܘܢ ܡܢ ܡܨܪܝܢ . ܘܥܠ ܕܐܓܪ ܥܠܝܟ ܠܒܠܥܡ ܒܪ ܒܥܘܪ . ܡܢ ܦܝܬܘܪ ܕܐܪܡ ܢܗܪ̈ܝܢ ܠܡܠܛܟ .
Deuteronomy 23:6 ܘܠܐ ܨܒܐ ܡܪܝܐ ܐܠܗܟ ܠܡܫܡܥܗ ܠܒܠܥܡ . ܘܐܗܦܟ ܐ̈ܢܝܢ ܡܪܝܐ ܐܠܗܟ ܠܘ̈ܛܬܗ ܠܒܘܪ̈ܟܬܐ . ܡܛܠ ܕܪܚܡܟ ܡܪܝܐ ܐܠܗܟ .
Deuteronomy 23:7 ܠܐ ܬܨܒܐ ܠܫܠܡܗܘܢ ܘܠܛܒܬܗܘܢ ܟܘܠ ܝܘܡ̈ܝ ܚܝ̈ܝܟ ܠܥܠܡ .
Deuteronomy 23:8 ܠܐ ܬܕܚܩܝܘܗܝ ܠܐܕܘܡܝܐ ܡܛܠ ܕܐܚܘܟ ܗܘ . ܘܠܐ ܬܕܚܩܝܘܗܝ ܠܡܨܪܝܐ ܡܛܠ ܕܥܡܘܪܐ ܗܘܝܬ ܒܐܪܥܗ .
Deuteronomy 23:9 ܒܢ̈ܝܐ ܕܡܬܝܠܕܝܢ ܠܗܘܢ ܒܕܪܐ ܬܠܝܬܝܐ ܢܥܠܘܢ ܠܟܢܘܫܬܗ ܕܡܪܝܐ .
Deuteronomy 23:10 ܘܟܕ ܬܦܘܩ ܒܡܫܪܝܬܐ ܥܠ ܒ̈ܥܠܕܒܒܝܟ . ܐܙܕܗܪ ܡܢ ܟܠ ܡܕܡ ܕܒܝܫ .
Deuteronomy 23:11 ܘܐܢ ܢܗܘܐ ܒܟ ܓܒܪܐ ܕܠܐ ܗܘܐ ܕܟܐ ܡܢ ܩܪܝܐ ܕܠܠܝܐ . ܢܦܘܩ ܠܗ ܠܒܪ ܡܢ ܡܫܪܝܬܐ . ܘܠܐ ܢܥܘܠ ܠܓܘ ܡܫܪܝܬܐ .
Deuteronomy 23:12 ܘܠܥܕܢ ܪܡܫܐ ܢܣܚܐ ܒܡ̈ܝܐ . ܘܡܐ ܕܥܪܒܬ ܫܡܫܐ . ܢܥܘܠ ܠܓܘ ܡܫܪܝܬܐ .
Deuteronomy 23:13 ܘܐܬܪܐ ܢܗܘܐ ܝܕܝܥ ܠܟ ܠܒܪ ܡܢ ܡܫܪܝܬܐ . ܘܦܘܩ ܬܡܢ ܠܡ̈ܝ ܪ̈ܓܠܝܟ .
Deuteronomy 23:14 ܘܣܟܬܐ ܬܗܘܐ ܠܟ ܥܠ ܙܝܢܟ . ܘܡܐ ܕܝ̇ܬܒ ܐܢܬ ܠܡ̈ܝ ܪ̈ܓܠܝܟ . ܗܘܝܬ ܚ̇ܦܪ ܒܗ̇ . ܘܗܘܝܬ ܡܟܣܐ ܬܒܬܟ .
Deuteronomy 23:15 ܡܛܠ ܕܡܪܝܐ ܐܠܗܟ ܡܗܠܟ ܒܓܘ ܡܫܪܝܬܟ . ܕܢܦܨܝܟ ܘܢܫܠܡ ܒ̈ܥܠܕܒܒܝܟ ܩܕܡܝܟ . ܘܬܗܘܐ ܡܫܪܝܬܟ ܩܕܝܫܐ . ܕܠܐ ܢܚܙܐ ܒܟ ܨܒܘܬܐ ܕܡܦܪܣܝܐ ܘܢܗܦܘܟ ܠܗ ܡܢܟܘܢ .
Deuteronomy 23:16 ܠܐ ܬܫܠܡ ܥܒܕܐ ܠܡܪܗ ܕܥ̇ܪܩ ܠܘܬܟ ܡܢ ܡܪܗ .
Deuteronomy 23:17 ܐܠܐ ܥܡܟ ܢܬܒ ܒܐܬܪܐ ܕܨ̇ܒܐ . ܒܚܕܐ ܡܢ ܩܘܪ̈ܝܟ . ܐܬܪ ܕܫܦܝܪ ܠܗ . ܘܠܐ ܬܥܠܒܝܘܗܝ .
Deuteronomy 23:18 ܠܐ ܬܗܘܐ ܙܢܝܬܐ ܡܢ ܒܢ̈ܬ ܐܝܣܪܝܠ . ܘܐܦ ܠܐ ܢܗܘܐ ܕܡ̇ܙܢܐ ܡܢ ܒܢ̈ܝ ܐܝܣܪܝܠ .
Deuteronomy 23:19 ܠܐ ܬܥܠ ܐܓܪ ܙܢܝܬܐ ܘܕܡ̈ܝ ܟܠܒܐ . ܠܒܝܬܗ ܕܡܪܝܐ ܐܠܗܟ ܠܟܠ ܢܕܪ . ܡܛܠ ܕܛܡܐܝܢ ܐܢܘܢ ܩܕܡ ܡܪܝܐ ܐܠܗܟ ܬܪ̈ܝܗܘܢ .
Deuteronomy 23:20 ܠܐ ܬܪܒܐ ܥܠ ܐܚܘܟ ܪܒܝܬܐ ܕܟܣܦܐ . ܘܪܒܝܬܐ ܕܥܒܘܪܐ ܘܪܒܝܬܐ ܕܟܠ ܡܕܡ ܕܪܒܐ .
Deuteronomy 23:21 ܥܠ ܢܘܟܪܝܐ ܪܒܐ . ܘܥܠ ܐܚܘܟ ܠܐ ܬܪܒܐ . ܕܢܒܪܟܟ ܡܪܝܐ ܐܠܗܟ ܒܟܘܠ ܡܕܡ ܕܡܘܫܛ ܐܢܬ ܐܝܕܟ . ܒܐܪܥܐ ܕܥ̇ܐܠ ܐܢܬ ܠܗ̇ ܠܡܐܪܬܗ̇ .
Deuteronomy 23:22 ܘܐܢ ܢ̇ܕܪ ܐܢܬ ܢܕܪܐ ܠܡܪܝܐ ܐܠܗܟ . ܠܐ ܬܫܘܚܪ ܠܡܦܪܥܗ . ܡܛܘܠ ܕܡܬܒܥ ܬܒ̇ܥ ܠܗ ܡܪܝܐ ܡܢܟ . ܘܗ̇ܘܐ ܥܠܝܟ ܚܛܗܐ .
Deuteronomy 23:23 ܘܐܢ ܠܐ ܨ̇ܒܐ ܐܢܬ ܠܡܕܪ . ܠܐ ܗ̇ܘܐ ܥܠܝܟ ܚܛܗܐ .
Deuteronomy 23:24 ܡܕܡ ܕܢ̇ܦܩ ܡܢ ܣ̈ܦܘܬܟ . ܛܪ ܘܥܒܕ ܐܝܟ ܕܢܕܪܬ ܠܡܪܝܐ ܐܠܗܟ . ܦܘܪܫܢܐ ܕܡܠܠܬ ܒܦܘܡܟ .
Deuteronomy 23:25 ܘܡܐ ܕܥ̇ܐܠ ܐܢܬ ܠܟܪܡܐ ܕܚܒܪܟ . ܐܟܘܠ ܥܢ̈ܒܐ ܥܕܡܐ ܕܣ̇ܒܥܐ ܢܦܫܟ . ܘܒܡܐܢܟ ܠܐ ܬܪܡܐ .
Deuteronomy 23:26 ܘܡܐ ܕܥ̇ܐܠ ܐܢܬ ܠܩܝܡܬܐ ܕܚܒܪܟ ܡܠܘܓ ܫܒ̈ܠܐ ܒܐܝܕܟ . ܘܡܓܠܐ ܠܐ ܬܢܝܦ ܥܠ ܩܝܡܬܐ ܕܚܒܪܟ .
Deuteronomy 24:1 ܘܐܢ ܢܣܒ ܓܒܪܐ ܐܢܬܬܐ ܘܢܕܡܟ ܥܡܗ̇ . ܐܠܐ ܐܫܟܚܬ ܪ̈ܚܡܐ ܩܕܡܘܗܝ ܥܠ ܕܐܫܟܚ ܒܗ̇ ܨܒܘܬܐ ܕܡܦܪܣܝܐ . ܢܟܬܘܒ ܠܗ̇ ܟܬܒܐ ܕܫܘܒܩܢܐ . ܘܢܬܠ ܠܗ̇ ܘܢܫܪܝܗ̇ .
Deuteronomy 24:2 ܘܬܦܘܩ ܡܢ ܒܝܬܗ . ܘܐܢ ܬܐܙܠ ܘܬܗܘܐ ܠܓܒܪܐ ܐܚܪܢܐ .
Deuteronomy 24:3 ܘܢܣܢܝܗ̇ ܓܒܪܐ ܐܚܪܢܐ . ܘܢܟܬܘܒ ܠܗ̇ ܟܬܒܐ ܕܫܘܒܩܢܐ . ܘܢܬܠ ܠܗ̇ ܘܢܫܪܝܗ̇ ܡܢ ܒܝܬܗ . ܐܘ ܐܢ ܢܡܘܬ ܓܒܪܐ ܐܚܪܢܐ ܕܢܣܒܗ̇ .
Deuteronomy 24:4 ܠܐ ܫܠܝܛ ܠܗ ܠܒܥܠܗ̇ ܩܕܡܝܐ ܕܫܒܩܗ̇ . ܕܢܚܕܪ ܢܣܒܝܗ̇ ܒܬܪ ܕܐܬܛܡܐܬ . ܡܛܠ ܕܛܡܐܐ ܗܝ ܩܕܡ ܡܪܝܐ . ܘܠܐ ܬܚܛܐ ܠܐܪܥܐ ܕܝ̇ܗܒ ܠܟ ܡܪܝܐ ܐܠܗܟ ܝܘܪܬܢܐ .
Deuteronomy 24:5 ܘܟܕ ܢܣܒ ܓܒܪܐ ܐܢܬܬܐ ܚܕܬܐ . ܠܐ ܢܦܘܩ ܒܚܝܠܐ . ܘܠܐ ܢܐܙܠ ܠܟܠ ܨܒܘ . ܐܠܐ ܢܗܘܐ ܒܒܝܬܗ ܫܢܬܐ ܚܕܐ . ܘܢܚܕܐ ܥܡ ܐܢܬܬܗ ܕܢܣܒ .
Deuteronomy 24:6 ܠܐ ܬܣܒ ܪܚܝܐ ܘܪܟܒܗ̇ ܡܫܟܢܐ . ܢܦܫܐ ܗܘ ܓܝܪ ܡܥܝܩ ܐܢܬ .
Deuteronomy 24:7 ܘܐܢ ܢܫܬܟܚ ܓܒܪܐ ܡܢ ܒܢ̈ܝ ܐܝܣܪܝܠ . ܕܢܓܢܘܒ ܢܦܫܐ ܡܢ ܐ̈ܚܘܗܝ ܡܢ ܒܢ̈ܝ ܐܝܣܪܝܠ ܕܢܬܬܓܪ ܒܗ̇ ܘܢܙܒܢܝܗ̇ . ܡܬܩܛܠܘ ܢܬܩܛܠ ܓܒܪܐ ܗ̇ܘ . ܘܒܥܪܘ ܒܝܫܬܐ ܡܢ ܒܝܢܬܟܘܢ .
Deuteronomy 24:8 ܛܪܘ ܡܚܘܬܐ ܕܓܪܒܐ ܘܐܙܕܗܪܘ ܛܒ . ܘܥܒܕܘ ܐܝܟ ܕܡܠܦܝܢ ܠܟܘܢ ܟܗ̈ܢܐ ܘܠܘ̈ܝܐ . ܐܝܟ ܕܦ̇ܩܕܬ ܐܢܘܢ ܢܛܪܘܢ ܘܢܥܒܕܘܢ .
Deuteronomy 24:9 ܘܐܬܕܟܪ ܡܕܡ ܕܥܒܕ ܡܪܝܐ ܐܠܗܟ ܠܡܪܝܡ ܒܐܘܪܚܐ . ܟܕ ܢܦܩܬܘܢ ܡܢ ܡܨܪܝܢ .
Deuteronomy 24:10 ܘܐܢ ܢܚܘܒ ܠܟ ܚܒܪܟ ܚܘܒܬܐ ܕܡܕܡ ܠܐ ܬܥܘܠ ܠܒܝܬܗ ܠܡܣܒ ܡܫܟܢܗ .
Deuteronomy 24:11 ܐܠܐ ܩܘܡ ܒܫܘܩܐ . ܘܓܒܪܐ ܗ̇ܘ ܕܚܝܒ ܠܟ . ܗܘ ܢܦܩܝܘܗܝ ܠܟ ܡܫܟܢܐ ܠܫܘܩܐ .
Deuteronomy 24:12 ܘܐܢ ܓܒܪܐ ܗܘ ܡܣܟܢܐ . ܠܐ ܬܕܡܟ ܒܡܪܛܘܛܗ .
Deuteronomy 24:13 ܐܠܐ ܦܢܝܗܝ ܠܗ ܡܫܟܢܗ ܡܐ ܕܥܪܒܬ ܫܡܫܐ . ܘܢܕܡܟ ܒܡܪܛܘܛܗ ܘܢܒܪܟܟ . ܘܬܗܘܐ ܠܟ ܙܕܝܩܘܬܐ ܩܕܡ ܡܪܝܐ ܐܠܗܟ .
Deuteronomy 24:14 ܠܐ ܬܛܠܘܡ ܐܓܪܐ ܕܡܣܟܢܐ ܘܕܒ̇ܝܫܐ ܡܢ ܐܚܝ̈ܟ . ܐܘ ܡܢ ܥܡܘܪܐ ܕܒܩܘܪ̈ܝܟ .
Deuteronomy 24:15 ܐܠܐ ܒܪ ܝܘܡܗ ܗܒ ܠܗ ܐܓܪܗ . ܘܠܐ ܬܥܪܒ ܥܠܘܗܝ ܫܡܫܐ . ܡܛܠ ܕܡܣܟܢܐ ܗܘ . ܘܥܠ ܐ̈ܦܝ ܐܓܪܗ ܗܘ ܡܫܠܡ ܠܟ ܢܦܫܗ . ܕܠܐ ܢܩܪܐ ܥܠܝܟ ܩܕܡ ܡܪܝܐ . ܘܢܗܘܐ ܥܠܝܟ ܚܛܗܐ .
Deuteronomy 24:16 ܠܐ ܢܡܘܬܘܢ ܐ̈ܒܗܐ ܥܠ ܐ̈ܦܝ ܒܢ̈ܝܗܘܢ . ܘܒܢ̈ܝܐ ܠܐ ܢܡܘܬܘܢ ܥܠ ܐ̈ܦܝ ܐ̈ܒܗܝܗܘܢ . ܐܠܐ ܐܢܫ ܒܚ̈ܛܗܘܗܝ ܢܡܘܬ .
Deuteronomy 24:17 ܠܐ ܬܨܠܐ ܕܝܢ̣ܐ ܕܥܡܘܪܐ ܘܕܝܬܡܐ . ܘܠܐ ܬܣܒ ܡܫܟܢܐ ܡܪܛܘܛܗ̇ ܕܐܪܡܠܬܐ .
Deuteronomy 24:18 ܘܐܬܕܟܪ ܕܥܒ̣ܕܐ ܗܘܝܬ ܒܡܨܪܝܢ . ܘܦܪܩܟ ܡܪܝܐ ܐܠܗܟ ܡܢ ܬܡܢ . ܡܛܠ ܗܢܐ ܡܦܩܕ ܐܢܐ ܠܟ . ܘܐ̇ܡܪ ܐܢܐ ܠܟ ܕܬܥܒܕ ܦܬܓܡܐ ܗܢܐ .
Deuteronomy 24:19 ܘܡܐ ܕܚ̇ܨܕ ܐܢܬ ܚܨܕܐ ܕܚܩܠܟ . ܘܛ̇ܥܐ ܐܢܬ ܟܦܐ . ܠܐ ܬܗܦܘܟ ܬܣܒܝܗ̇ . ܐܠܐ ܬܗܘܐ ܠܥܡܘܪܐ ܘܠܝܬܡܐ ܘܠܐܪܡܠܬܐ . ܕܢܒܪܟܟ ܡܪܝܐ ܐܠܗܟ ܒܟܘܠܗ ܥܒ̇ܕܐ ܕܐ̈ܝܕܝܟ .
Deuteronomy 24:20 ܘܡܐ ܕܚ̇ܒܛ ܐܢܬ ܙܝ̈ܬܝܟ . ܠܐ ܬܦܠܐ ܒܣܬܪܟ . ܐܠܐ ܠܥܡܘܪܐ ܘܠܝܬܡܐ ܘܠܐܪܡܠܬܐ ܢܗܘܐ .
Deuteronomy 24:21 ܘܡܐ ܕܩ̇ܛܦ ܐܢܬ ܟܪܡܟ . ܠܐ ܬܒܥܪ ܒܣܬܪܟ . ܐܠܐ ܠܥܡܘܪܐ ܘܠܝܬܡܐ ܘܠܐܪܡܠܬܐ ܢܗܘܐ .
Deuteronomy 24:22 ܘܐܬܕܟܪ ܕܥܒ̣ܕܐ ܗܘܝܬ ܒܡܨܪܝܢ . ܡܛܠ ܗܢܐ ܡܦܩܕ ܐܢܐ ܠܟ ܕܬܥܒܕ ܦܬܓܡܐ ܗܢܐ .
Deuteronomy 25:1 ܘܐܢ ܢܗܘܐ ܕܝܢ̣ܐ ܒܝܬ ܓܒܪܐ ܠܚܒܪܗ . ܢܩܪܒܘܢ ܠܘܬ ܕܝ̈ܢ̇ܐ ܘܢܕܘܢܘܢ ܐܢܘܢ . ܘܢܙܟܘܢ ܠܙ̇ܟܝܐ ܘܢܚܝܒܘܢ ܠܚܝ̇ܒܐ .
Deuteronomy 25:2 ܘܐܢ ܚܝܒ ܡܪܕܘܬܐ ܚܝ̇ܒܐ . ܢܪܡܝܘܗܝ ܕܝ̇ܢܐ ܘܢܢܓܕܘܢܗ ܩܕܡܘܗܝ . ܐܝܟ ܙܕܩܐ ܕܣܟܠܘܬܗ .
Deuteronomy 25:3 ܒܡܢܝܢܐ ܐܪ̈ܒܥܝܢ ܢܢܓܕܘܢܗ ܘܠܐ ܢܘܣܦܘܢ . ܕܠܐ ܟܕ ܢܘܣܦܘܢ ܢܢܓܕܘܢܗ . ܝܬܝܪ ܥܠ ܗܢܐ ܢܓܕܐ ܢܬܩܠܐ ܐܚܘܟ ܠܥܢܝ̈ܟ .
Deuteronomy 25:4 Deuteronomy 25:5 ܘܟܕ ܢܬܒܘܢ ܐܚ̈ܐ ܐܝܟ ܚܕܐ . ܘܢܡܘܬ ܚܕ ܡܢܗܘܢ ܘܠܝܬ ܠܗ ܒܪܐ . ܠܐ ܬܗܘܐ ܐܢܬܬܗ ܕܡܝܬܐ ܠܓܒܪܐ ܢܘܟܪܝܐ . ܐܠܐ ܝܒܡܗ̇ ܢܣܒܝܗ̇ . ܘܬܗܘܐ ܠܗ ܐܢܬܬܐ ܘܢܝܒܡܝܗ̇ .
Deuteronomy 25:6 ܘܒܘܟܪܐ ܕܝ̇ܠܕܐ ܢܫܬܡܐ ܥܠ ܫܡܐ ܕܐܚܘܗܝ ܡܝܬܐ . ܕܠܐ ܢܬܛܥܐ ܫܡܗ ܡܢ ܐܝܣܪܝܠ .
Deuteronomy 25:7 ܘܐܢ ܠܐ ܨ̇ܒܐ ܓܒܪܐ ܕܢܣܒ ܐܢܬܬ ܐܚܘܗܝ . ܬܣܩ ܐܢܬܬ ܐܚܘܗܝ ܠܬܪܥܐ ܠܘܬ ܣܒ̈ܐ ܘܬܐܡܪ . ܠܐ ܨ̇ܒܐ ܝܒܡܝ ܕܢܩܝܡ ܠܐܚܘܗܝ ܫܡܐ ܒܐܝܣܪܝܠ . ܘܠܐ ܨ̇ܒܐ ܠܡܣܒܢܝ .
Deuteronomy 25:8 ܢܩܪܘܢܗ ܣ̈ܒܐ ܕܩܪܝܬܗ . ܘܢܡܠܠܘܢ ܥܡܗ . ܘܐܢ ܢܩܘܡ ܘܢܐܡܪ ܕܠܐ ܢ̇ܣܒ ܐܢܐ ܠܗ̇ .
Deuteronomy 25:9 ܬܩܪܘܒ ܐܝܒܡܬܗ ܠܘܬܗ ܩܕܡ ܣܒ̈ܐ . ܘܬܫܪܐ ܡܣܢܗ ܡܢ ܪܓܠܗ . ܘܬܪܘܩ ܒܐ̈ܦܘܗܝ ܘܬܐܡܪ . ܗܟܢܐ ܢܬܥܒܕ ܠܓܒܪܐ ܕܠܐ ܢܒܢܐ ܒܝܬܐ ܠܐܚܘܗܝ .
Deuteronomy 25:10 ܘܢܬܩܪܐ ܫܡܗ ܒܐܝܣܪܝܠ ܒܝܬ ܫܪܐ ܡܣܢܐ .
Deuteronomy 25:11 ܘܟܕ ܢܨܘܢ ܓܒܪܐ ܘܐܚܘܗܝ ܚܕ ܥܡ ܚܕ . ܘܬܩܪܘܒ ܐܢܬܬ ܚܕ ܡܢܗܘܢ . ܠܡܦܨܝܘ ܒܥܠܗ̇ ܡܢ ܐ̈ܝܕܝ ܡ̇ܢ ܕܡܬܟܬܫ ܥܡܗ . ܘܬܘܫܛ ܐܝܕܗ̇ ܘܬܐܚܘܕ ܒܚܢܗ .
Deuteronomy 25:12 ܦܣܘܩ ܐܝܕܗ̇ ܘܠܐ ܬܚܘܣ ܥܝܢܟ ܥܠܝܗ̇ .
Deuteronomy 25:13 ܠܐ ܢܗܘܐ ܠܟ ܒܡܪܣܘܦܟ ܡܬܩܠܐ ܘܡܬܩܠܐ ܪܒܐ ܘܙܥܘܪܐ .
Deuteronomy 25:14 ܠܐ ܬܗܘܐ ܠܟ ܒܒܝܬܟ . ܟܝܠܬܐ ܘܟܝܠܬܐ ܪܒܬܐ ܘܙܥܘܪܬܐ .
Deuteronomy 25:15 ܡܬܩܠܐ ܫܠܡܐ ܕܙܕܝܩܘܬܐ ܢܗܘܐ ܠܟ . ܘܟܝܠܬܐ ܬܪܝܨܬܐ ܕܙܕܝܩܘܬܐ ܬܗܘܐ ܠܟ . ܕܢܣܓܘܢ ܝܘܡ̈ܝܟ ܒܐܪܥܐ ܕܝ̇ܗܒ ܠܟ ܡܪܝܐ ܐܠܗܟ .
Deuteronomy 25:16 ܡܛܠ ܕܛܡܐ ܗܘ ܩܕܡ ܡܪܝܐ ܐܠܗܟ . ܟܠ ܡ̇ܢ ܕܥ̇ܒܕ ܗܠܝܢ . ܘܟܠ ܡ̇ܢ ܕܥ̇ܒܕ ܥܘܠܐ .
Deuteronomy 25:17 ܐܬܕܟܪ ܟܘܠ ܡܕܡ ܕܥܒܕ ܠܟ ܥܡܠܝܩ ܒܐܘܪܚܐ . ܟܕ ܢܦܩܬܘܢ ܡܢ ܡܨܪܝܢ .
Deuteronomy 25:18 ܕܐܪܥܟܘܢ ܒܚܪܒܐ . ܘܩܛܠ ܒܟܘܢ ܟܠ ܕܦܫ ܒܬܪܟܘܢ . ܘܐܢܬ ܡܛܪܦ ܘܠܐܐ . ܘܠܐ ܕܚܠ ܡܢ ܩܕܡ ܡܪܝܐ ܐܠܗܟ .
Deuteronomy 25:19 ܘܡܐ ܕܐܢܝܚ ܠܟ ܡܪܝܐ ܐܠܗܟ ܡܢ ܟܠܗܘܢ ܒ̈ܥܠܕܒܒܝܟ ܕܒܚܕܪ̈ܝܟ . ܒܐܪܥܐ ܕܝ̇ܗܒ ܠܟ ܡܪܝܐ ܐܠܗܟ ܝܘܪܬܢܐ . ܥܛܝ ܕܘܟܪܢܗ ܕܥܡܠܝܩ ܡܢ ܬܚܝܬ ܫܡܝܐ ܘܠܐ ܬܛܥܐ .
Deuteronomy 26:1 ܘܡܐ ܕܥܠܬ ܠܐܪܥܐ ܕܝ̇ܗܒ ܠܟ ܡܪܝܐ ܐܠܗܟ ܝܘܪܬܢܐ . ܘܝܪܬܬܗ̇ ܘܝܬܒܬ ܒܗ̇ .
Deuteronomy 26:2 ܣܒ ܡܢ ܪܝܫ ܟܘܠܗܘܢ ܦܐܪ̈ܐ ܕܐܪܥܐ ܕܡ̇ܥܠ ܐܢܬ . ܡܢ ܐܪܥܐ ܕܝ̇ܗܒ ܠܟ ܡܪܝܐ ܐܠܗܟ . ܘܣܝܡ ܒܡܣܢܬܐ . ܘܩܘܡ ܙܠ ܠܐܬܪܐ ܕܓ̇ܒܐ ܡܪܝܐ ܐܠܗܟ ܕܢܫܪܐ ܫܡܗ ܬܡܢ .
Deuteronomy 26:3 ܘܬܐ ܠܘܬ ܟܗܢܐ ܕܢܗܘܐ ܒܝܘܡ̈ܬܐ ܗ̇ܢܘܢ . ܘܐܡܪ ܠܗ . ܚܘܝܬ ܝܘܡܢܐ ܠܡܪܝܐ ܐܠܗܟ . ܕܐܬ̇ܝܬ ܠܐܪܥܐ ܕܝܡܐ ܡܪܝܐ ܠܐ̈ܒܗܝܢ ܠܡܬܠ ܠܢ .
Deuteronomy 26:4 ܘܢܣܒ ܟܗܢܐ ܡܣܢܬܐ ܡܢ ܐܝܕܟ . ܘܢܣܝܡܝܗ̇ ܩܕܡ ܡܪܝܐ ܐܠܗܟ .
Deuteronomy 26:5 ܘܥܢܝ ܘܐܡܪ ܩܕܡ ܡܪܝܐ ܐܠܗܟ . ܠܐܪܡ ܐܬܕܒܪ ܐܒܝ ܘܢܚܬ ܠܡܨܪܝܢ . ܘܥܡܪ ܬܡܢ ܙܒܢܐ ܙܥܘܪܐ . ܘܗܘܐ ܬܡܢ ܠܥܡܐ ܪܒܐ ܘܥܫܝܢܐ .
Deuteronomy 26:6 ܘܐܒܐܫܘ ܠܢ ܡܨܪ̈ܝܐ ܘܡܟܟܘܢ . ܘܣܡܘ ܥܠܝܢ ܦܘܠܚܢܐ ܩܫܝܐ .
Deuteronomy 26:7 ܘܓܥܝܢ ܠܘܬ ܡܪܝܐ ܐܠܗܐ ܕܐ̈ܒܗܝܢ . ܘܫܡܥ ܡܪܝܐ ܩܠܢ . ܘܚܙܐ ܡܘܟܟܢ ܘܥܡܠܢ ܘܐܘܠܨܢܝܢ .
Deuteronomy 26:8 ܘܐܦܩܢ ܡܪܝܐ ܡܢ ܡܨܪܝܢ . ܒܐܝܕܐ ܥܫܝܢܬܐ ܘܒܕܪܥܐ ܪܡܐ . ܘܒܚܙܘܐ ܪܒܐ ܘܒܐ̈ܬܘܬܐ ܘܒܬܕܡܪ̈ܬܐ .
Deuteronomy 26:9 ܘܐܬܝܢ ܠܐܬܪܐ ܗܢܐ . ܘܝܗܒ ܠܢ ܡܪܝܐ ܐܪܥܐ ܗܕܐ . ܐܪܥܐ ܕܡܪܕܝܐ ܚܠܒܐ ܘܕܒܫܐ .
Deuteronomy 26:10 ܘܗܫܐ ܗܐ ܐܝܬ̇ܝܬ ܪܫܝܬܐ ܕܦܐܪ̈ܐ ܕܐܪܥܐ ܕܝܗܒ ܠܝ ܡܪܝܐ . ܘܣܝܡܝܗ̇ ܩܕܡ ܡܪܝܐ ܐܠܗܟ . ܘܣܓܘܕ ܬܡܢ ܩܕܡ ܡܪܝܐ ܐܠܗܟ .
Deuteronomy 26:11 ܘܚܕܝ ܒܟܘܠ ܛܒ̈ܬܐ ܕܝ̇ܗܒ ܠܟ ܡܪܝܐ ܐܠܗܟ ܘܠܒܝܬܟ . ܐܢܬ ܘܠܘܝܐ ܘܥܡܘܪܐ ܕܒܓܘܟ .
Deuteronomy 26:12 ܘܡܐ ܕܫܠܡܬ ܠܡܥܣܪܘ ܟܠܗ ܡܥܣܪܐ ܕܥܠܠܬܟ . ܒܫܢܬܐ ܕܬܠܬ ܕܗܝ ܗܝ ܫܢܬ ܡܥܣܪ̈ܐ . ܗܒ ܠܠܘܝܐ ܘܠܥܡܘܪܐ ܘܠܝܬܡܐ ܘܠܐܪܡܠܬܐ . ܘܢܐܟܠܘܢ ܒܩܘܪ̈ܝܟ ܘܢܣܒܥܘܢ .
Deuteronomy 26:13 ܘܐܡܪ ܩܕܡ ܡܪܝܐ ܐܠܗܟ . ܒܨ̇ܝܬ ܩܘܕܫܐ ܡܢ ܒܝܬܐ . ܘܝܗ̇ܒܬ ܠܠܘܝܐ ܘܠܥܡܘܪܐ ܘܠܝܬܡܐ ܘܠܐܪܡܠܬܐ . ܐܝܟ ܟܠܗܘܢ ܦܘܩ̈ܕܢܐ ܕܦ̇ܩܕܬܢܝ . ܠܐ ܥ̇ܒܪܬ ܡܢ ܦܘܩ̈ܕܢܝܟ . ܘܠܐ ܛܥ̇ܝܬ .
Deuteronomy 26:14 ܘܠܐ ܐܟ̇ܠܬ ܒܐܒܠܝ ܡܢܗ . ܘܠܐ ܒܨܝܬܗ ܟܕ ܛܡܐ ܐܢܐ . ܘܠܐ ܣ̇ܡܬ ܡܢܗ ܠܡܝܬܐ . ܐܠܐ ܫܡ̇ܥܬ ܒܩܠܗ ܕܡܪܝܐ ܐܠܗܝ . ܘܥܒ̇ܕܬ ܐܝܟ ܕܦ̇ܩܕܬܢܝ .
Deuteronomy 26:15 ܚܙܝ ܡܢ ܡܥܡܪܐ ܕܩܘܕܫܟ ܡܢ ܫܡܝܐ . ܘܒܪܟ ܠܥܡܟ ܐܝܣܪܝܠ ܘܠܐܪܥܐ ܕܝܗܒܬ ܠܢ . ܐܝܟ ܕܝܡܝܬ ܠܐ̈ܒܗܝܢ ܐܪܥܐ ܕܡܪܕܝܐ ܚܠܒܐ ܘܕܒܫܐ .
Deuteronomy 26:16 ܝܘܡܢܐ ܡܪܝܐ ܐܠܗܟ ܡܦܩܕ ܠܟ ܕܬܥܒܕ ܢܡ̈ܘܣܐ ܗܠܝܢ ܘܕܝ̈ܢܐ . ܛܪ ܘܥܒܕ ܐܢܘܢ . ܡܢ ܟܘܠܗ ܠܒܟ ܘܡܢ ܟܠܗ̇ ܢܦܫܟ .
Deuteronomy 26:17 ܠܡܪܝܐ ܐܡܪܬ ܝܘܡܢܐ . ܕܢܗܘܐ ܠܟ ܐܠܗܐ ܘܬܗܠܟ ܒܐܘܪ̈ܚܬܗ . ܘܬܛܪ ܢܡ̈ܘܣܘܗܝ ܘܕܝ̈ܢܘܗܝ ܘܦܘܩ̈ܕܢܘܗܝ ܘܬܫܡܥ ܒܩܠܗ .
Deuteronomy 26:18 ܘܡܪܝܐ ܐܡܪ ܠܟ ܝܘܡܢܐ . ܕܬܗܘܐ ܠܗ ܥܡܐ ܚܒܝܒܐ . ܐܝܟ ܕܐܡܪ ܠܟ . ܘܬܛܪ ܟܠܗܘܢ ܦܘܩ̈ܕܢܘܗܝ .
Deuteronomy 26:19 ܘܢܥܒܕܟ ܠܥܠ ܡܢ ܟܠܗܘܢ ܥܡ̈ܡܐ ܕܥܒܕ ܠܬܫܒܘܚܬܐ ܘܠܫܡܐ ܘܠܐܝܩܪܐ . ܘܬܗܘܐ ܥܡܐ ܩܕܝܫܐ ܠܡܪܝܐ ܐܠܗܟ . ܐܝܟ ܕܐܡܪ ܠܟ .
Deuteronomy 27:1 ܘܦܩܕ ܡܘܫܐ ܘܣ̈ܒܐ ܕܐܝܣܪܝܠ ܠܥܡܐ ܘܐܡܪ ܠܗܘܢ . ܛܪܘ ܟܠܗܘܢ ܦܘܩ̈ܕܢܐ ܕܡܦܩܕ ܐܢܐ ܠܟܘܢ ܝܘܡܢܐ .
Deuteronomy 27:2 ܒܝܘܡܐ ܕܥ̇ܒܪܝܢ ܐܢܬܘܢ ܝܘܪܕܢܢ ܠܐܪܥܐ ܕܝ̇ܗܒ ܠܟ ܡܪܝܐ ܐܠܗܟ . ܐܩܝܡ ܠܟ ܟܐ̈ܦܐ ܪ̈ܘܪܒܬܐ ܘܐܟܠܫ ܐ̈ܢܝܢ ܒܟܠܫܐ .
Deuteronomy 27:3 ܘܟܬܘܒ ܥܠܝܗܝܢ ܟܘܠܗܘܢ ܦ̈ܬܓܡܐ ܕܢܡܘܣܐ ܗܢܐ . ܡܐ ܕܥܒܪܬ ܕܬܥܘܠ ܠܐܪܥܐ ܕܝ̇ܗܒ ܠܟ ܡܪܝܐ ܐܠܗܟ . ܐܪܥܐ ܕܡܪܕܝܐ ܚܠܒܐ ܘܕܒܫܐ . ܐܝܟ ܕܐܡܪ ܠܟ ܡܪܝܐ ܐܠܗܐ ܕܐ̈ܒܗܝܟ .
Deuteronomy 27:4 ܘܡܐ ܕܥܒܪܬܘܢ ܝܘܪܕܢܢ . ܐܩܝܡ ܟܐ̈ܦܐ ܗܠܝܢ ܕܡܦܩܕ ܐܢܐ ܠܟܘܢ ܝܘܡܢܐ ܒܛܘܪܐ ܕܓܒܠ . ܘܐܟܠܫ ܐ̈ܢܝܢ ܒܟܠܫܐ .
Deuteronomy 27:5 ܘܒܢܝ ܬܡܢ ܡܕܒܚܐ ܠܡܪܝܐ ܐܠܗܟ . ܡܕܒܚܐ ܕܟܐ̈ܦܐ . ܘܠܐ ܬܪܡܐ ܥܠܝܗܝܢ ܦܪܙܠܐ .
Deuteronomy 27:6 ܐܠܐ ܒܟܐ̈ܦܐ ܫ̈ܠܡܠܡܬܐ ܒܢܝ ܡܕܒܚܗ ܕܡܪܝܐ ܐܠܗܟ . ܘܐܣܩ ܥܠܘܗܝ ܝܩ̈ܕܐ ܫ̈ܠܡܐ . ܩܕܡ ܡܪܝܐ ܐܠܗܟ .
Deuteronomy 27:7 ܘܕܒܚ ܫ̈ܠܡܐ ܘܐܟܘܠ ܬܡܢ . ܘܚܕܝ ܩܕܡ ܡܪܝܐ ܐܠܗܟ .
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .