← All works

Peshitta Daniel

Peshitta (Syriac Old Testament) · 412 sections

1. Daniel 5:9

   ܗܝܕܝܢ ܡ̇ܠܟܐ ܒܠܛܫܨܪ ܣܓܝ ܐܬܕܠܚ ܘܙܝܘܗ ܐܫܬܢܝ ܘܪ̈ܘܪܒܢܘܗܝ ܡܬܒܠܗܝܢ ܗܘܘ

2. Daniel 5:10

   ܘܡܠܟܬܐ ܡܛܠ ܡ̈ܠܝ ܡ̇ܠܟܐ ܘܪ̈ܘܪܒܢܘܗܝ ܠܒܝܬ ܡܫܬܝܐ ܥܠܬ ܥܢܬ ܘܐܡ̇ܪܐ ܠܡ̇ܠܟܐ ܡ̇ܠܟܐ ܠܥܠܡ ܚܝܝ ܪ̈ܥܝܢܝܟ ܠܐ ܢܕܠܚܘܢܟ ܘܙܝܘ̈ܝܟ ܠܐ ܢܫܬܢܘܢ

3. Daniel 5:11

   ܐܝܬ ܓܒܪܐ ܒܡܠܟܘܬܟ ܕܪܘܚ ܐܠܗ̈ܝܢ ܩܕܝ̈ܫܝܢ ܐܝܬ ܒܗ ܘܒܝܘܡ̈ܝ ܐܒܘܟ ܢܗܝܪܘܬܐ ܘܣܘܟܠܐ ܘܚܟܡܬܐ ܣܓܝܐܬܐ ܐܝܟ ܚܟܡܬ ܐܠܗ̈ܝܢ ܐܫܬܟܚܬ ܒܗ ܘܡ̇ܠܟܐ ܢܒܘܟܕܢܨܪ ܐܒܘܟ ܪܒ ܚܪ̈ܫܐ ܘܐܫܘ̈ܦܐ ܘܡܓܘ̈ܫܐ ܘܟ̈ܠܕܝܐ ܐܩܝܡܗ

4. Daniel 5:12

   ܡܛܘܠ ܕܪܘܚܐ ܘܡܕܥܐ ܘܣܘܟܠܐ ܝܬܝܪܐ ܐܫܬܟܚ ܒܗ ܦܫ̇ܪ ܚܠܡ̈ܝܢ ܘܐܚ̇ܕ ܐܘܚ̈ܕܢ ܘܫ̇ܪܐ ܩܛܪ̈ܝܢ ܕܢܝܐܝܠ ܕܡ̇ܠܟܐ ܫܡܝ ܫܡܗ ܒܠܛܫܨܪ ܡܟܝܠ ܕܢܝܐܝܠ ܢܬܩܪܐ ܘܦܫܪܐ ܢܚ̇ܘܐ

5. Daniel 5:13

   ܗܝܕܝܢ ܕܢܝܐܝܠ ܥܠ ܩܕܡ ܡܠܟܐ ܥܢ̣ܐ ܡ̇ܠܟܐ ܘܐܡ̣ܪ ܠܕܢܝܐܝܠ ܐܢܬ ܗܘ ܕܢܝܐܝܠ ܡܢ ܒ̈ܢܝ ܫܒܝܬܐ ܕܝܗܘܕ ܕܐܝܬܝ ܐܒܝ ܡ̇ܠܟܐ ܡܢ ܝܗܘܕ

6. Daniel 5:14

   ܫܡܥܬ ܥܠܝܟ ܕܪܘܚ ܐܠܗ̈ܝܢ ܩܕܝ̈ܫܝܢ ܐܝܬ ܒܟ ܘܢܗܝܪܘܬܐ ܘܣܘܟܠܐ ܘܚܟܡܬܐ ܝܬܝܪܬܐ ܐܫܬܟܚܬ ܒܟ

7. Daniel 5:15

   ܘܐܥܠܘ ܩܕܡܝ ܐܫܘ̈ܦܐ ܕܟܬܒܐ ܗܢܐ ܢܩܪܘܢ ܘܦܫܪܗ ܢܚܘܘܢܢܝ ܘܠܐ ܐܫܟܚܘ ܦܫܪܗ̇ ܕܡܠܬܐ ܠܡܘܕܥܘܬܢܝ

8. Daniel 5:16

   ܘܐܢܐ ܫܡܥܬ ܥܠܝܟ ܕܡܫܟܚ ܐܢܬ ܦܫܪ̈ܝܢ ܠܡܦܫܪ ܘܩܛܪ̈ܝܢ ܠܡܫܪܐ ܐܢ ܬܫܟܚ ܟܬܒܐ ܗܢܐ ܠܡܩܪܐ ܘܦܫܪܗ ܠܡܘܕܥܘܬܢܝ ܐܪ̈ܓܘܢܐ ܬܠܒܫ ܘܗܡܢܝܟܐ ܕܕܗܒܐ ܒܨܘܪܟ ܘܬܘܠܬܐ ܒܡܠܟܘܬܐ ܬܫܠܛ

9. Daniel 5:17

   ܗܝܕܝܢ ܥܢ̣ܐ ܕܢܝܐܝܠ ܘܐܡ̣ܪ ܠܡ̇ܠܟܐ ܡܘܗ̈ܒܬܟ ܠܟ ܢܗܘܝ̈ܢ ܘܐܝܩܪ ܒܝܬܟ ܠܐܚܪ̈ܢܝܢ ܗܒ ܒܪܡ ܟܬܒܐ ܐܢܐ ܐܩܪܐ ܠܡ̇ܠܟܐ ܘܦܫܪܗ ܐܚܘܝܘܗܝ

10. Daniel 5:18

    ܐܢܬ ܡ̇ܠܟܐ ܐܠܗܐ ܡܪܝܡܐ ܡܠܟܘܬܐ ܘܪܒܘܬܐ ܘܐܝܩܪܐ ܘܫܘܒܚܐ ܝܗ̣ܒ ܠܢܒܘܟܕܢܨܪ ܐܒܘܟ

11. Daniel 5:19

    ܘܡܢ ܪܒܘܬܐ ܕܝܗ̣ܒ ܠܗ ܟܠܗܘܢ ܥܡܡ̈ܐ ܘܐܡܘ̈ܬܐ ܘܠܫܢ̈ܐ ܙܝ̇ܥܝܢ ܗܘܘ ܘܕܚܠܝܢ ܡܢ ܩܕܡܘܗܝ ܐܝܠܝܢ ܕܨ̇ܒܐ ܗܘܐ ܩ̇ܛܠ ܘܐܝܠܝܢ ܕܨ̇ܒܐ ܗܘܐ ܡ̇ܚܐ ܘܕܨ̇ܒܐ ܡܪܝܡ ܘܕܨ̇ܒܐ ܡܡ̇ܟܟ

12. Daniel 5:20

    ܘܟܕ ܐܬܬܪܝܡ ܠܒܗ ܘܪܘܚܗ ܥܫܢܬ ܠܡܥܠܝܘ ܢ̣ܚܬ ܡܢ ܟܘܪܣܝܐ ܕܡ̇ܠܟܘܬܗ ܘܐܝܩܪܗ ܥܒ̣ܪ ܡܢܗ

13. Daniel 5:21

    ܘܡܢ ܒܢܝܢ̈ܫܐ ܐܬܪܕܦ ܘܠܒܗ ܥܡ ܕܚܝܘ̈ܬܐ ܐܫܬܘܝ ܘܥܡ ܥܪ̈ܕܐ ܡܥܡܪܗ ܘܥܣܒܐ ܐܝܟ ܬܘܪܐ ܐܘܟܠܘܗܝ ܘܡܢ ܛܠܐ ܕܫܡܝܐ ܓܘܫܡܗ ܐܨܛܒܥ ܥܕܡܐ ܕܣܥܪܗ ܪܒ̣ܐ ܐܝܟ ܕܢܫܪܐ ܘܛܦܪ̈ܘܗܝ ܐܝܟ ܕܥܘܦܐ ܥܕܡܐ ܕܝ̣ܕܥ ܕܫܠܝܛ ܗܘ ܐܠܗܐ ܡܪܝܡܐ ܒܡܠܟܘܬܐ ܕܐܢܫܐ ܕܠܡ̇ܢ ܕܨ̇ܒܐ ܢܬܠܝܗ̇ ܘܠܫܦܠ ܐܢ̈ܫܝܢ ܢܩܝܡ ܥܠܝܗ̇

14. Daniel 5:22

    ܘܐܢܬ ܒܪܗ ܒܠܛܫܨܪ ܠܐ ܐܡܟܬ ܠܒܟ ܟܕ ܗܠܝܢ ܟܠܗܝܢ ܝܕܥܬ

15. Daniel 5:23

    ܘܥܠ ܡܪܐ ܫܡܝܐ ܐܬܬܪܝܡܬ ܘܠܡܐ̈ܢܐ ܕܒܝܬܗ ܐܝܬܝܘ ܩܕܡܝܟ ܘܐܢܬ ܘܪ̈ܘܪܒܢܝܟ ܘܢܫ̈ܝܟ ܘܕܪ̈ܘܟܬܟ ܚܡܪܐ ܐܫܬܝܬܘܢ ܒܗܘܢ ܘܠܐܠܗ̈ܐ ܕܕܗܒܐ ܘܕܣܐܡܐ ܘܕܢܚܫܐ ܘܕܦܪܙܠܐ ܘܕܩܝܣܐ ܘܕܟܐܦܐ ܕܠܐ ܚ̇ܙܝܢ ܘܠܐ ܫܡ̇ܥܝܢ ܘܠܐ ܝܕ̇ܥܝܢ ܫܒܚܬ ܘܠܐܠܗܐ ܕܢܫܡܬܟ ܒܐܝܕ̈ܘܗܝ ܘܟܠܗܝܢ ܐܘܪ̈ܚܬܟ ܠܗ ܠܐ ܫܒܚܬ ܘܠܐ ܝܩܪܬ

16. Daniel 5:24

    ܗܝܕܝܢ ܡܢ ܩܕܡܘܗܝ ܐܫܬܠܚܬ ܦܣܬ ܐܝܕܐ

17. Daniel 5:25

    ܘܟܬܒܐ ܗܢܐ ܪܫܡܬ ܘܟܬܒܐ ܗܢܐ ܪܫܝܡ ܡܢܐ ܡܢܐ ܬܩܠ ܘܦܪܣܝܢ

18. Daniel 5:26

    ܗ̇ܢܘ ܦܫܪܗ̇ ܕܡܠܬܐ ܡܢܐ ܡܢܗ̇ ܐܠܗܐ ܠܡ̇ܠܟܘܬܟ ܘܐܫܠܡܗ̇

19. Daniel 5:27

    ܬܩܠ ܬܩܝܠ ܐܢܬ ܒܡܣܐܬܐ ܘܐܫܬܟܚܬ ܚܣܝܪ

20. Daniel 5:28

    ܦܪܣ ܦܪܝܣܐ ܗܝ ܡ̇ܠܟܘܬܟ ܘܝܗܝܒܐ ܗܝ ܠܡܕܝ ܘܠܦܪܣ

21. Daniel 5:29

    ܗܝܕܝܢ ܐܡ̣ܪ ܡ̇ܠܟܐ ܒܠܛܫܨܪ ܘܐܠܒܫܘܗܝ ܠܕܢܝܐܝܠ ܐܪ̈ܓܘܢܐ ܘܗܡܢܝܟܐ ܕܕܗܒܐ ܒܨܘܪܗ ܘܐܟܪܙܘ ܥܠܘܗܝ ܕܢܗܘܐ ܫܠܝܛ ܬܘܠܬܐ ܒܡܠܟܘܬܐ

22. Daniel 5:30

    ܒܗ ܒܠܠܝܐ ܩܛܝܠ ܒܠܛܫܨܪ ܡ̇ܠܟܐ ܟܠܕܝܐ

23. Daniel 6:1

    ܘܕܪܝܘܫ ܡܕܝܐ ܩ̇ܒܠ ܡܠܟܘܬܐ ܐܝܟ ܒܪ ܫܢ̈ܝܢ ܫܬܝܢ ܘܬܪܬܝܢ

24. Daniel 6:2

    ܘܫܦ̣ܪ ܩܕܡ ܕܪܝܘܫ ܘܐܩܝܡ ܒܡܠܟܘܬܗ ܪ̈ܒܝ ܚܝ̈ܠܐ ܡܐܐ ܘܥܣܪܝܢ ܕܢܗܘܘܢ ܒܟܠܗ̇ ܡܠܟܘܬܗ

25. Daniel 6:3

    ܘܠܥܠ ܡܢܗܘܢ ܫܠܝܛܝܢ ܬܠܬܐ ܘܕܢܝܐܝܠ ܚܕ ܡܢܗܘܢ ܕܢܗܘܘܢ ܪ̈ܒܝ ܚܝ̈ܠܐ ܗܠܝܢ ܝܗܒܝܢ ܠܗܘܢ ܚܘܫܒܢܐ ܘܠܡ̇ܠܟܐ ܠܐ ܢܗܘܘܢ ܡܗܪܝܢ

26. Daniel 6:4

    ܗܝܕܝܢ ܕܢܝܐܝܠ ܡܝܬܪ ܗܘܐ ܡܢ ܟܠܗܘܢ ܡܛܠ ܕܪܘܚܐ ܝܬܝܪܬܐ ܐܝܬ ܒܗ ܘܡ̇ܠܟܐ ܐܬܚܫܒ ܠܡܩܡܘܬܗ ܥܠ ܟܠܗ̇ ܡܠܟܘܬܗ

27. Daniel 6:5

    ܗܝܕܝܢ ܫܠܝ̈ܛܢܐ ܘܪ̈ܒܝ ܚܝ̈ܠܐ ܒ̇ܥܝܢ ܗܘܘ ܥܠܬܐ ܕܢܫܟܚܘܢ ܥܠ ܕܢܝܐܝܠ ܡܢ ܨܒܘܬ ܡܠܟܘܬܐ ܘܟܠ ܣܟܠܘ ܘܥܠܐ ܠܐ ܐܫܟܚܘ ܒܬܪܗ ܡܛܠ ܕܡܗܝܡܢ ܗܘܐ ܒܐܠܗܗ ܘܣܘܪܚܢܐ ܘܣܟܠܘܬܐ ܠܐ ܐܫܟܚܘ ܥܠܘܗܝ

28. Daniel 6:6

    ܘܐܡ̇ܪܝܢ ܓܒܪ̈ܐ ܗ̇ܢܘܢ ܠܐ ܡܫܟܚܝܢܢ ܥܠ ܕܢܝܐܝܠ ܗܢܐ ܥܠܬܐ ܐܠܐ ܐܢ ܐܫܟܚܢ ܥܠܘܗܝ ܒܕܝܢ̣ܐ ܕܐܠܗܗ

29. Daniel 6:7

    ܗܝܕܝܢ ܩ̣ܪܒܘ ܫ̈ܠܝܛܢܐ ܘܪ̈ܒܝ ܚܝ̈ܠܐ ܠܘܬ ܡ̇ܠܟܐ ܘܐܡ̇ܪܝܢ ܠܗ ܕܪܝܘܫ ܡ̇ܠܟܐ ܠܥܠܡ ܚܝܝ

30. Daniel 6:8

    ܐܬܚܫ̇ܒܘ ܟܠܗܘܢ ܫܠܝ̈ܛܝ ܡܠܟܘܬܐ ܘܪ̈ܘܪܒܢܐ ܘܪ̈ܒܝ ܚܝ̈ܠܐ ܘܡܪ̈ܘܬܐ ܠܡܩܡܘ ܩܝܡܐ ܕܡ̇ܠܟܐ ܘܠܡܫܪܘ ܐܣܪܐ ܕܟܠ ܐܢܫ ܕܢܒܥܐ ܒܥܘ ܡܢ ܟܘܠ ܐܠܗ ܘܐܢܫ ܥܕܡܐ ܠܝܘܡ̈ܝܢ ܬܠܬܝܢ ܐܠܐ ܐܢ ܡܢܟ ܡ̇ܠܟܐ ܢܫܬܕܐ ܒܓܘܒܐ ܕܐܪ̈ܝܘܬܐ

31. Daniel 6:9

    ܡܟܝܠ ܡ̇ܠܟܐ ܬܦܩܘܕ ܦܘܩܕܢܐ ܗܢܐ ܘܬܟܬܘܒ ܟܬܒܐ ܕܠܐ ܢܫܢ̇ܐ ܒܢܡܘܣ ܡܕܝ ܘܦܪܣ ܘܠܐ ܢܬܚ̇ܠܦ

32. Daniel 6:10

    ܗܝܕܝܢ ܕܪܝܘܫ ܡ̇ܠܟܐ ܪܫ̣ܡ ܟܬܒܐ ܘܦܩ̣ܕ ܦܘܩܕܢܐ

33. Daniel 6:11

    ܘܟܕ ܝܕܥ̣ ܕܢܝܐܝܠ ܕܐܬܪܫܡ ܟܬܒܐ ܥܠ ܠܗ ܠܒܝܬܗ ܘܟ̈ܘܐ ܦܬܝ̈ܚܢ ܗܘ̈ܝ ܠܥܠܝܬܗ ܠܘܩܒܠ ܐܘܪܫܠܡ ܘܬܠܬ ܙܒ̈ܢܝܢ ܒܝܘܡܐ ܒ̇ܪܟ ܗܘܐ ܥܠ ܒܘܪ̈ܟܘܗܝ ܘܡܨ̇ܠܐ ܘܡܘܕܐ ܩܕܡ ܐܠܗܗ ܐܝܟܢܐ ܕܥ̇ܒܕ ܗܘܐ ܡܢ ܩܕܝܡ

34. Daniel 6:12

    ܗܝܕܝܢ ܓܒܪ̈ܐ ܗ̇ܢܘܢ ܢܛܪܘ ܘܐܫܟܚܘܗܝ ܠܕܢܝܐܝܠ ܟܕ ܒ̇ܥܐ ܘܡܬܚ̇ܢܢ ܩܕܡ ܐܠܗܗ

35. Daniel 6:13

    ܗܝܕܝܢ ܩ̣ܪܒܘ ܘܐܡ̇ܪܝܢ ܩܕܡ ܡ̇ܠܟܐ ܡ̇ܠܟܐ ܠܥܠܡ ܚܝܝ ܠܐ ܦܣܩܐ ܦܣܩܬ ܡ̇ܠܟܐ ܘܪܫܡܬ ܕܟܠܢܫ ܕܢܒܥܐ ܒܥܘ ܡܢ ܟܠ ܐܠܗ ܘܐܢܫ ܥܕܡܐ ܠܬܠܬܝܢ ܝܘ̈ܡܝܢ ܐܠܐ ܐܢ ܡܢܟ ܡ̇ܠܟܐ ܢܫܬܕܐ ܒܓܘܒܐ ܕܐܪ̈ܝܘܬܐ ܥ̣ܢܐ ܡ̇ܠܟܐ ܘܐܡ̣ܪ ܒܩܘܫܬܐ ܗܝ ܡܠܬܐ ܐܝܟ ܢܡܘܣ ܡܕܝ ܘܦܪܣ ܕܠܐ ܥ̇ܒܪ

36. Daniel 6:14

    ܗܝܕܝܢ ܥܢܘ ܘܐܡ̇ܪܝܢ ܩܕܡ ܡ̇ܠܟܐ ܕܢܝܐܝܠ ܡܢ ܒ̈ܢܝ ܫܒܝܬܐ ܕܝܗܘܕ ܠܐ ܐܩܝܡ ܥܠܝܟ ܘܥܠ ܦܣܩܐ ܕܦܣܩܬ ܘܙܒ̈ܢܝܢ ܬܠܬ ܒ̇ܥܐ ܒܥܘܬܗ

37. Daniel 6:15

    ܗܝܕܝܢ ܡ̇ܠܟܐ ܟܕ ܡܠܬܐ ܗܕܐ ܫܡ̣ܥ ܣܓܝ ܟܪܝܬ ܠܗ ܘܣܡ ܒܪܥܝܢܗ ܕܢܦܨܝܘܗܝ ܠܕܢܝܐܝܠ ܘܥܕܡܐ ܠܡܥܪ̈ܒܝ ܫܡܫܐ ܡܬܟܬܫ ܗܘܐ ܕܢܦܨܝܘܗܝ

38. Daniel 6:16

    ܗܝܕܝܢ ܓܒܪ̈ܐ ܗ̇ܢܘܢ ܐܪܝܒܘ ܥܠ ܡ̇ܠܟܐ ܘܐܡ̇ܪܝܢ ܠܗ ܕܥ ܡ̇ܠܟܐ ܕܢܡܘܣܐ ܐܝܬ ܠܡܕܝ ܘܠܦܪܣ ܕܟܠ ܦܣܩ ܘܩܝܡ ܕܢܩܝܡ ܡ̇ܠܟܐ ܠܐ ܢܫ̇ܢܐ

39. Daniel 6:17

    ܗܝܕܝܢ ܐܡ̣ܪ ܡ̇ܠܟܐ ܘܐܝܬܝܘܗܝ ܠܕܢܝܐܝܠ ܘܐܪܡܝܘܗܝ ܒܓܘܒܐ ܕܐܪ̈ܝܘܬܐ ܥܢ̣ܐ ܡ̇ܠܟܐ ܘܐܡ̣ܪ ܠܕܢܝܐܝܠ ܐܠܗܟ ܕܐܢܬ ܦ̇ܠܚ ܠܗ ܐܡܝܢܐܝܬ ܗܘ ܢܫܘܙܒܟ

40. Daniel 6:18

    ܘܐܝܬܝܘ ܟܐܦܐ ܚܕܐ ܘܣܡܘ ܥܠ ܦܘܡܗ ܕܓܘܒܐ ܘܚܬܡܗ ܡ̇ܠܟܐ ܒܥܙܩܬܗ ܘܒܥܙܩܬ ܪ̈ܘܪܒܢܘܗܝ ܕܠܐ ܬܫ̇ܢܐ ܨܒܘ ܒܕܢܝܐܝܠ

41. Daniel 6:19

    ܗܝܕܝܢ ܐܙ̣ܠ ܡ̇ܠܟܐ ܠܗܝܟܠܗ ܘܒܬ ܛܘܬ ܘܡܐܟܘܠܬܐ ܠܐ ܐܥܠܘ ܩܕܡܘܗܝ ܘܫܢܬܗ ܦܪܕܬ ܡܢܗ

42. Daniel 6:20

    ܗܝܕܝܢ ܡ̇ܠܟܐ ܒܨܦܪܐ ܩܡ ܡܣܪܗܒܐܝܬ ܘܒܥܓܠ ܠܓܘܒܐ ܕܐܪ̈ܝܘܬܐ ܐܙ̣ܠ

43. Daniel 6:21

    ܘܟܕ ܩ̣ܪܒ ܠܓܘܒܐ ܠܕܢܝܐܝܠ ܒܩܠܐ ܪܡܐ ܩ̣ܪܐ ܥܢ̣ܐ ܡ̇ܠܟܐ ܘܐܡ̣ܪ ܠܕܢܝܐܝܠ ܕܢܝܐܝܠ ܥ̣ܒܕܗ ܕܐܠܗܐ ܚܝܐ ܐܠܗܟ ܕܐܢܬ ܦ̇ܠܚ ܠܗ ܐܡܝܢܐܝܬ ܐܫܟܚ ܦܨܝܟ ܡܢ ܐܪ̈ܝܘܬܐ

44. Daniel 6:22

    ܗܝܕܝܢ ܕܢܝܐܝܠ ܥܡ ܡ̇ܠܟܐ ܡܠܠ ܘܐܡ̣ܪ ܡ̇ܠܟܐ ܠܥܠܡ ܚܝܝ

45. Daniel 6:23

    ܐܠܗܝ ܫ̇ܕܪ ܡܠܐܟܗ ܘܣ̇ܟܪ ܦܘܡܗܘܢ ܕܐܪ̈ܝܘܬܐ ܘܠܐ ܚܒܠܘܢܝ ܡܛܠ ܕܙܟܘܬܐ ܩܕܡܘܗܝ ܐܫܬܟܚܬ ܠܝ ܘܐܦ ܩܕܡܝܟ ܡ̇ܠܟܐ ܣܟܠܘ ܠܐ ܥ̇ܒܕܬ

46. Daniel 6:24

    ܗܝܕܝܢ ܥܠ ܡ̇ܠܟܐ ܣ̇ܓܝ ܫܦ̣ܪ ܥܠܘܗܝ ܘܐܡ̣ܪ ܠܡܣܩܘܬܗ ܠܕܢܝܐܝܠ ܡܢ ܓܘܒܐ ܘܐܣܩܘܗܝ ܠܕܢܝܐܝܠ ܡܢ ܓܘܒܐ ܘܡܕܡ ܚܒ̇ܠܐ ܠܐ ܐܫܬܟܚ ܒܗ ܡܛܠ ܕܡܗܝܡܢ ܗܘܐ ܒܐܠܗܗ

47. Daniel 6:25

    ܘܐܡ̣ܪ ܡ̇ܠܟܐ ܐܝܬܘ ܐܢܘܢ ܠܓܒܪ̈ܐ ܗ̇ܢܘܢ ܕܐܟܠܘ ܩܪ̈ܨܘܗܝ ܕܕܢܝܐܝܠ ܘܐܪܡܘ ܐܢܘܢ ܒܓܘܒܐ ܕܐܪ̈ܝܘܬܐ ܠܗܘܢ ܘܠܢܫ̈ܝܗܘܢ ܘܠܒܢܝ̈ܗܘܢ ܘܐܪܡܝܘ ܐܢܘܢ ܒܓܘܒܐ ܘܠܐ ܡܛܘ ܐܫܬܗ ܕܓܘܒܐ ܘܫܠܛܘ ܒܗܘܢ ܐܪ̈ܝܘܬܐ ܘܟܠ ܓܪ̈ܡܝܗܘܢ ܕܩ̇ܩܘ

48. Daniel 6:26

    ܗܝܕܝܢ ܕܪܝܘܫ ܡ̇ܠܟܐ ܟܬܒ ܠܟܠܗܘܢ ܥܡܡ̈ܐ ܘܐܡ̈ܘܬܐ ܘܠܫ̈ܢܐ ܕܥܡ̇ܪܝܢ ܒܟܠܗ̇ ܐܪܥܐ ܫܠܡܐ ܢܣܓܐ ܠܟܘܢ

49. Daniel 6:27

    ܡܢ ܩܕܡܝ ܐܬܬܣܝܡ ܢܡܘܣܐ ܕܒܟܠ ܫܘܠܛܢ ܡ̇ܠܟܘܬܝ ܢܗܘܘܢ ܙܝ̇ܥܝܢ ܘܕܚ̇ܠܝܢ ܡܢ ܩܕܡ ܐܠܗܗ ܕܕܢܝܐܝܠ ܕܗܘܝܘ ܐܠܗܐ ܚܝ̇ܐ ܘܩܝܡ ܠܥܠܡܝܢ ܘܡܠܟܘܬܗ ܠܐ ܡܬܚܒܠܐ ܘܫܘܠܛܢܗ ܥܕܡܐ ܠܣܘܦܐ

50. Daniel 6:28

    ܦ̇ܪܩ ܘܡܫܘܙܒ ܘܡ̇ܦܨܐ ܘܥ̇ܒܕ ܐܬܘ̈ܬܐ ܘܬܕܡܪ̈ܬܐ ܒܫܡܝܐ ܘܒܐܪܥܐ ܕܫܘܙܒ ܠܕܢܝܐܝܠ ܡܢ ܐܪ̈ܝܘܬܐ

51. Daniel 6:29

    ܘܕܢܝܐܝܠ ܝܪ̣ܒ ܒܡܠܟܘܬܗ ܕܕܪܝܘܫ ܘܒܡܠܟܘܬܗ ܕܟܘܪܫ ܦܪܣܝܐ

52. Daniel 7:1

    ܒܫܢܬ ܚܕܐ ܠܒܠܛܫܨܪ ܡ̇ܠܟܐ ܕܒܒܠ ܕܢܝܐܝܠ ܚܠܡܐ ܚ̣ܙܐ ܘܚܙ̈ܘܝ ܪܫܗ ܕܥܠ ܡܫܟܒܗ ܗܝܕܝܢ ܚܠܡܐ ܟܬ̣ܒ ܘܪܝܫ ܡ̈ܠܘܗܝ ܐܡ̣ܪ

53. Daniel 7:2

    ܥ̣ܢܐ ܕܢܝܐܝܠ ܘܐܡ̣ܪ ܚ̇ܙܐ ܗܘܝܬ ܒܚܙܘܐ ܕܠܠܝܐ ܘܗܐ ܐܪܒܥ ܪ̈ܘܚܝ ܫܡܝܐ ܡܓܝܚ̈ܢ ܠܝܡܐ ܪܒܐ

54. Daniel 7:3

    ܘܐܪܒܥ ܚܝ̈ܘܢ ܪ̈ܘܪܒܢ ܣ̈ܠܩܢ ܡܢ ܝܡܐ ܘܡ̈ܫܓܢܝܢ ܚܕܐ ܡܢ ܚܕܐ

55. Daniel 7:4

    ܩܕܡܝܬܐ ܐܝܟ ܐܪܝܐ ܘܓ̈ܦܐ ܕܢܫܪܐ ܐܝܬ ܠܗ̇ ܚ̇ܙܐ ܗܘܝܬ ܕܐܬܡܪܛܘ ܓ̈ܦܝܗ̇ ܘܐܬܬܪܝܡܬ ܡܢ ܐܪܥܐ ܘܥܠ ܪ̈ܓܠܝܗ̇ ܐܝܟ ܐܢܫܐ ܩܡܬ ܘܠܒܐ ܕܐܢܫܐ ܐܬܝܗܒ ܠܗ̇

56. Daniel 7:5

    ܘܚܝܘܬܐ ܕܬܪܬܝܢ ܕܡ̇ܝܐ ܠܕܐܒܐ ܘܠܚܕ ܣܛܪ ܩܡܬ ܘܬܠܬ ܐ̈ܠܥܝܢ ܒܦܘܡܗ̇ ܒܝܬ ܫ̈ܢܝܗ̇ ܘܗܟܢܐ ܐܡܪܝܢ ܠܗ̇ ܩܘܡܝ ܐܟܘܠܝ ܒܣܪܐ ܣܓܝܐܐ

57. Daniel 7:6

    ܒܬܪ ܗܠܝܢ ܚ̇ܙܐ ܗܘܝܬ ܚܝܘܬܐ ܐܚܪܬܐ ܐܝܟ ܢܡܪܐ ܘܐܝܬ ܠܗ̇ ܓ̈ܦܐ ܐܪܒܥܐ ܕܦܪܚܬܐ ܥܠ ܓܒܝ̈ܗ̇ ܘܐܪܒܥܐ ܪ̈ܫܝܢ ܐܝܬ ܠܗ̇ ܠܚܝܘܬܐ ܗ̇ܝ ܘܫܘܠܛܢܐ ܐܬܝܗܒ ܠܗ̇

58. Daniel 7:7

    ܒܬܪ ܗܠܝܢ ܚ̇ܙܐ ܗܘܝܬ ܒܚܙܘܐ ܕܠܠܝܐ ܚܝܘܬܐ ܪܒܝܥܝܬܐ ܕܚܝܠܐ ܘܥܫܝܢܐ ܘܬܩܝܦܐ ܝܬܝܪܐܝܬ ܘܫܢ̈ܐ ܪ̈ܘܪܒܬܐ ܕܦܪܙܠܐ ܐܝܬ ܠܗ̇ ܐ̇ܟܠܐ ܘܡ̇ܕܩܐ ܘܡܕܡ ܕܡܘܬܪܐ ܒܪ̈ܓܠܝܗ̇ ܕܝܫ̇ܐ ܘܗܝ ܡܫܓܢܝܐ ܡܢ ܟܠܗܝܢ ܚܝܘ̈ܬܐ ܕܩܕܡܝܗ̇ ܘܩܪ̈ܢܬܐ ܥܣܪ ܐܝܬ ܠܗ̇

59. Daniel 7:8

    ܘܡܣܬܟܠ ܗܘܝܬ ܒܩܪ̈ܢܬܗ̇ ܘܩܪܢܐ ܚܕܐ ܙܥܘܪܬܐ ܣܠܩܬ ܡܢ ܒܝܢܬܗܝܢ ܘܬܠܬ ܡܢ ܩܪ̈ܢܬܐ ܩܕܡ̈ܝܬܐ ܐܬܥܩܪ ܡܢ ܩܕܡܝܗ̇ ܘܥܝ̈ܢܐ ܐܝܟ ܥܝܢ̈ܝ ܒܪܢܫܐ ܒܩܪܢܐ ܗ̇ܝ ܘܦܘܡܗ̇ ܡܡܠܠ ܪ̈ܘܪܒܬܐ

60. Daniel 7:9

    ܚ̇ܙܐ ܗܘܝܬ ܟܘܪ̈ܣܘܬܐ ܐܬܬܣܝܡܘ ܘܥܬܝܩ ܝܘܡ̈ܬܐ ܝܬ̣ܒ ܠܒܘܫܗ ܐܝܟ ܬܠܓܐ ܚܘ̇ܪܐ ܘܣܥܪܐ ܕܪܫܗ ܐܝܟ ܥܡܪܐ ܕܟܝܐ ܟܘܪܣܝܗ ܫܠܗܒܝܬܐ ܕܢܘܪܐ ܘܓܝ̈ܓܠܘܗܝ ܕܢܘܪܐ ܝܩܕܬܐ

61. Daniel 7:10

    ܢܗܪܐ ܕܢܘܪܐ ܪܕ̇ܐ ܘܢܦ̇ܩ ܡܢ ܩܕܡܘܗܝ ܐܠܦ ܐܠܦܝ̈ܢ ܡܫܡܫܝܢ ܠܗ ܘܪܒܘ ܪ̈ܒܘܢ ܩܝܡܝܢ ܩܕܡܘܗܝ ܕܝܢ̇ܐ ܝܬܒ ܘܣ̣ܦܪ̈ܐ ܐܬܦܬܚܘ

62. Daniel 7:11

    ܚ̇ܙܐ ܗܘܝܬ ܕܐܬܩܛܠܬ ܚܝܘܬܐ ܗ̇ܝ ܘܐܒܕ ܓܘܫܡܗ̇ ܘܐܬܝܗܒܬ ܠܝܩܕܢܐ ܕܢܘܪܐ

63. Daniel 7:12

    ܘܫܪܟܗܝܢ ܕܚܝ̈ܘܬܐ ܐܫܬܩܠ ܡܢ ܫܘܠܛܢܗܝܢ ܘܢܘܓܪܐ ܘܚܝ̈ܐ ܐܬܝܗܒ ܠܗܝܢ ܥܕ ܙܒܢ ܘܥܕܢ

64. Daniel 7:13

    ܚ̇ܙܐ ܗܘܝܬ ܥܠ ܥ̈ܢܢܝ ܫܡܝܐ ܐܝܟ ܒܪ ܐܢܫ̈ܝܢ ܐܬ̣ܐ ܘܡܛ̣ܐ ܥܕܡܐ ܠܥܬܝܩ ܝܘܡ̈ܬܐ ܘܩܕܡܘܗܝ ܩܪܒܘܗܝ

65. Daniel 7:14

    ܘܠܗ ܝܗ̣ܒ ܫܘܠܛܢܐ ܘܡܠܟܘܬܐ ܘܐܝܩܪܐ ܕܟܠܗܘܢ ܥܡ̈ܡܐ ܘܐܡ̈ܘܬܐ ܘܠܫ̈ܢܐ ܠܗ ܢܦܠܚܘܢ ܫܘܠܛܢܗ ܫܘܠܛܢ ܥܠܡ ܘܠܐ ܥܒ̇ܪ ܘܡܠܟܘܬܗ ܠܐ ܡܬܚ̇ܒܠܐ

66. Daniel 7:15

    ܐܬܟܪܝܬ ܪܘܚܝ ܐܢܐ ܕܢܝܐܝܠ ܒܓܘ ܡܫܟܒܝ ܘܚ̈ܙܘܝ ܪܫܝ ܕܠܚ̣ܘܢܝ

67. Daniel 7:16

    ܘܩܪܒܬ ܠܘܬ ܚܕ ܡܢ ܡܫܡ̈ܫܢܐ ܘܥܠ ܫܪܪܐ ܥܩ̇ܒܬܗ ܥܠ ܗܠܝܢ ܟܠܗܝܢ ܘܐܡ̣ܪ ܠܝ ܒܫܪܪܐ ܘܦܫܪ ܡ̈ܠܝ ܐܘܕܥܢܝ

68. Daniel 7:17

    ܘܐܡ̣ܪ ܠܝ ܗܠܝܢ ܚܝ̈ܘܬܐ ܪ̈ܘܪܒܬܐ ܐܪܒܥ ܕܚ̣ܙܝܬ ܐܪܒܥܐ ܡ̈ܠܟܝܢ ܢܩܘܡܘܢ ܡܢ ܐܪܥܐ

69. Daniel 7:18

    ܘܢܩ̇ܒܠܘܢ ܡܠܟܘܬܐ ܩ̈ܕܝܫܐ ܕܡܪܝܡܐ ܘܢܐܪܬܘܢܗ̇ ܠܡܠܟܘܬܐ ܠܥܠܡ ܘܠܥܠܡ ܥܠܡܝܢ

70. Daniel 7:19

    ܗܝܕܝܢ ܨܒܝܬ ܠܡܥܩܒܘ ܥܠ ܚܝܘܬܐ ܐܪܒܝܥܝܬܐ ܕܡܫܓܢܝܐ ܗܘܬ ܡܢ ܟܠܗܝܢ ܘܕܚܝܠܐ ܪܘܪܒܐܝܬ ܫܢ̈ܝܗ̇ ܕܦܪܙܠܐ ܘܛܦܪ̈ܝܗ̇ ܕܢܚܫܐ ܐܟ̇ܠܐ ܘܡ̇ܕܩܐ ܘܡܕܡ ܕܡܘܬܪܐ ܒܪ̈ܓܠܝܗ̇ ܕܝܫ̇ܐ

71. Daniel 7:20

    ܘܥܠ ܩܪ̈ܢܬܐ ܥܣܪ ܕܒܪܝܫܗ̇ ܘܥܠ ܐܚܪܬܐ ܕܣܠܩ̣ܬ ܡܢ ܒܝܢܬܗܝܢ ܘܢܦ̣ܠ ܡܢ ܩܕܡܝܗ̇ ܬܠܬ ܘܩܪܢܐ ܗ̇ܝ ܥܝ̈ܢܐ ܐܝܬ ܠܗ̇ ܘܦܘܡܗ̇ ܡܡܠܠ ܪ̈ܘܪܒܢ ܘܚܙܘܗ̇ ܪܒ ܡܢ ܕܚܒܪ̈ܬܗ̇

72. Daniel 7:21

    ܚ̇ܙܐ ܗܘܝܬ ܩܪܢܐ ܗ̇ܝ ܥ̇ܒܕܐ ܩܪܒܐ ܥܡ ܩܕܝ̈ܫܐ ܘܡܨ̇ܝܐ ܚܝܠܗܘܢ

73. Daniel 7:22

    ܥܕܡܐ ܕܐ̣ܬܐ ܥܬܝܩ ܝܘܡ̈ܬܐ ܘܕܝ̣ܢܐ ܝܗ̣ܒ ܠܩܕܝܫ̈ܐ ܕܡܪܝܡܐ ܘܙܒܢܐ ܡ̣ܛܐ ܘܡܠܟܘܬܐ ܝܪܬܘ ܩܕܝ̈ܫܐ

74. Daniel 7:23

    ܘܗܟܢܐ ܐܡ̣ܪ ܠܝ ܚܝܘܬܐ ܪܒܝܥܝܬܐ ܡܠܟܘܬܐ ܪܒܝܥܝܬܐ ܬܗܘܐ ܒܐܪܥܐ ܘܬܬܝܬܪ ܥܠ ܡܠܟ̈ܘܬܐ ܘܬܐܟܘܠ ܐܪܥܐ ܟܘܠܗ̇ ܘܬܕܘܫܝܗ̇ ܘܬܕܩܝܗ̇

75. Daniel 7:24

    ܘܩܪ̈ܢܬܐ ܥܣܪ ܡܢ ܡܠܟܘܬܐ ܥܣܪܐ ܡ̈ܠܟ̇ܝܢ ܢܩܘܡܘܢ ܘܐܚܪܢܐ ܢܩܘܡ ܒܬܪܗܘܢ ܘܗܘ ܢܬܝܬܪ ܡܢ ܩܕܡ̈ܝܐ ܘܬܠܬܐ ܡ̇ܠܟ̈ܝܢ ܢܡ̇ܟܟ

76. Daniel 7:25

    ܘܡ̈ܠܐ ܥܠ ܡܪܝܡܐ ܢܡܠܠ ܘܥܠ ܩܕܝ̈ܫܐ ܕܡܪܝܡܐ ܢܟܠܐ ܘܢܣ̣ܒܪ ܠܡܚ̇ܠܦܘ ܙܒ̈ܢܐ ܘܢܡܘ̈ܣܐ ܘܢܬܝܗܒܘܢ ܒܐܝܕܗ ܥܕ ܥܕܢ ܥܕ̈ܢܝܢ ܘܦܠܓܘܬ ܥܕܢ

77. Daniel 7:26

    ܘܕܝ̇ܢܐ ܝܬ̣ܒ ܘܫܘܠܛܢܗ ܫܩ̣ܠܘ ܡܢܗ ܕܢܚܒܠܘܢܗ ܘܢܘܒܕܘܢܗ ܥܕܡܐ ܠܣܘܦܐ

78. Daniel 7:27

    ܕܡܠܟܘܬܐ ܘܫܘܠܛܢܐ ܘܪܒܘܬܐ ܘܡܠܟܘܬܐ ܕܬܚܝܬ ܫܡܝܐ ܐܬܝܗܒܬ ܠܥܡܐ ܩܕܝܫܐ ܕܡܪܝܡܐ ܡܠܟܘܬܗ ܡܠܟܘܬ ܥܠܡ ܘܟܠ ܫܘ̈ܠܛܢܝܢ ܠܗ ܢܦܠܚܘܢ ܘܢܫܬܡܥܘܢ

79. Daniel 7:28

    ܥܕܡܐ ܠܗܪܟܐ ܣܘܦܗ̇ ܕܡܠܬܐ ܐܢܐ ܕܢܝܐܝܠ ܣܓܝ ܪ̈ܥܝܢܝ ܕܠܚܘܢܝ ܘܙܝܘ̈ܝ ܐܫܬܢܝܘ ܥܠܝ ܘܡܠܬܐ ܒܠܒܝ ܢܛܪܬ

80. Daniel 8:1

    ܒܫܢܬ ܬܠܬ ܕܡܠܟܘܬܗ ܕܒܠܛܫܨܪ ܡ̇ܠܟܐ ܚܙܘܐ ܐܬܚܙܝ ܠܝ ܐܢܐ ܕܢܝܐܝܠ ܡܢ ܒܬܪ ܚܙܘܐ ܩܕܡܝܐ ܕܐܬܚܙܝ ܠܝ

81. Daniel 8:2

    ܚܙܝܬ ܒܚܠܡܝ ܕܒܫܘܫܢ ܗܘܝܬ ܒܝܪܬܐ ܕܒܥܝܠܡ ܡܕܝܢܬܐ ܘܚܙܝܬ ܒܚܠܡܝ ܕܩܐ̇ܡ ܐܢܐ ܥܠ ܐܒܘܠ ܐܘܠܝ

82. Daniel 8:3

    ܘܐܪܝܡܬ ܥ̈ܝܢܝ ܘܚܙܝܬ ܘܗܐ ܕܟܪܐ ܚܕ ܩܐ̇ܡ ܩܕܡ ܐܒܘܠ ܘܐܝܬ ܠܗ ܩܪ̈ܢܬܐ ܘܩܪ̈ܢܬܗ ܪ̈ܡܢ ܘܚܕܐ ܪܡܐ ܡܢ ܚܒܪܬܗ̇ ܘܗ̇ܝ ܪܡܬܐ ܐܚܪܝܬ ܝܥܬ

83. Daniel 8:4

    ܘܚܙܝܬ ܕܟܪܐ ܡܕܩܪ ܠܡܥܪܒܐ ܘܠܓܪܒܝܐ ܘܠܬܝܡܢܐ ܘܟܠܗܝܢ ܚܝܘ̈ܬܐ ܠܐ ܩܝ̈ܡܢ ܩܕܡܘܗܝ ܘܠܝܬ ܕܡܫܬܘܙܒ ܡܢ ܐܝܕ̈ܘܗܝ ܘܥܒ̣ܕ ܐܝܟ ܕܨܒܐ ܘܐܬܪܝܡ

84. Daniel 8:5

    ܘܐܢܐ ܡܬܒܝܢ ܗܘܝܬ ܘܨܦܪܝܐ ܕܥ̈ܙܐ ܐܬ̣ܐ ܡܢ ܡܥܪܒܐ ܥܠ ܐ̈ܦܝ ܟܠܗ̇ ܐܪܥܐ ܘܠܐ ܢ̇ܟܐ ܗܘܐ ܒܐܪܥܐ ܘܨܦܪܝܐ ܩܪܢܐ ܡܬܚܙܝܐ ܒܝܬ ܥ̈ܝܢܘܗܝ

85. Daniel 8:6

    ܘܐܬ̣ܐ ܘܡܛ̣ܐ ܥܕܡܐ ܠܕܟܪܐ ܗ̇ܘ ܕܐܝܬ ܠܗ ܩܪ̈ܢܬܐ ܕܚܙܝܬ ܕܩܐ̇ܡ ܩܕܡ ܐܒܘܠ ܘܪܗ̣ܛ ܥܠܘܗܝ ܒܚܐܦܗ

86. Daniel 8:7

    ܘܡܛܝܗܝ ܠܕܟܪܐ ܘܐܬܡܪܡܪ ܥܠܘܗܝ ܘܡܚܝܗܝ ܠܕܟܪܐ ܘܬܒܪ ܠܬܪ̈ܬܝܗܝܢ ܩܪ̈ܢܬܗ ܘܠܐ ܗ̣ܘܐ ܒܗ ܚܝܠܐ ܒܕܟܪܐ ܠܡܩܡ ܩܕܡܘܗܝ ܘܐܪܡܝܗ ܥܠ ܐܪܥܐ ܘܕܫܗ ܘܠܐ ܗ̣ܘܐ ܕܡܦܨܐ ܠܗ ܠܕܟܪܐ ܡܢ ܐܝܕ̈ܘܗܝ ܕܨܦܪܝܐ ܕܥ̈ܙܐ

87. Daniel 8:8

    ܘܨܦܪܝܐ ܕܥ̈ܙܐ ܪܒ̣ܐ ܣܓܝ ܘܟܕ ܥܫ̣ܢ ܐܬܬܒܪܬ ܩܪܢܗ ܪܒܬܐ ܘܣܠ̣ܩ ܕܡ̈ܬܚܙܝܢ ܐܪܒܥ ܡܢ ܬܚܘܬܝܗ̇ ܠܐܪܒܥ ܪ̈ܘܚܝ ܫܡܝܐ

88. Daniel 8:9

    ܘܡܢ ܚܕܐ ܡܢܗܝܢ ܢܦܩܬ ܩܪܢܐ ܚܕܐ ܙܥܘܪܬܐ ܘܪܒܬ ܝܬܝܪܐܝܬ ܠܬܝܡܢܐ ܘܠܡܕܢܚܐ

89. Daniel 8:10

    ܘܪܒܬ ܥܕܡܐ ܠܚ̈ܝܠܐ ܕܫܡܝܐ ܘܐܦܠܬ ܥܠ ܐܪܥܐ ܘܡܢ ܚܝ̈ܠܐ ܘܡܢ ܟܘܟܒ̈ܐ ܘܕܫܬ ܐܢܘܢ

90. Daniel 8:11

    ܘܥܕܡܐ ܠܪ̈ܒܝ ܚܝ̈ܠܐ ܡܛܬ ܘܡܢܗ ܐܪܝܡ ܐܡܝܢܘܬܐ ܘܫ̣ܪܐ ܡܬܩܢ ܡܩܕܫܗ

91. Daniel 8:12

    ܘܚܝܠܐ ܐܬܝܗܒ ܥܠ ܐܡܝܢܘܬܐ ܒܚܘܒ̈ܐ ܘܐܫܬܕܝ ܩܘܕܫܐ ܥܠ ܐܪܥܐ ܘܥܒ̣ܪ ܘܐܨܠܚ

92. Daniel 8:13

    ܘܫܡܥܬ ܚܕ ܩܕܝܫܐ ܕܡܡܠܠ ܘܐܡ̇ܪ ܚܕ ܩܕܝܫܐ ܠܦܠܘܡܢܝ ܕܡܡܠܠ ܥܕܡܐ ܠܐܡܬܝ ܚܙܘܐ ܕܐܡܝܢܘܬܐ ܘܥ̣ܘܠܐ ܘܚܒܠܐ ܢܫܬܠܡ ܘܩܘܕܫܐ ܘܚܝܠܐ ܢܬܕܝܫ

93. Daniel 8:14

    ܘܐܡ̣ܪ ܠܗ ܥܕ ܪܡܫ ܨܦܪ ܬܪܝܢ ܐ̈ܠܦܝܢ ܘܬܠܬܡܐܐ ܘܢܙ̣ܟܐ ܙܕܩܐ

94. Daniel 8:15

    ܘܟܕ ܚܙܝܬ ܐܢܐ ܕܢܝܐܝܠ ܚܙܘܐ ܒܥܝܬ ܠܡܣܬܟܠܘ ܘܗܐ ܩܐ̇ܡ ܠܘܩܒܠܝ ܐܝܟ ܚܙܘܐ ܕܓܒܪܐ

95. Daniel 8:16

    ܘܫܡܥܬ ܩܠܐ ܕܐܢܫܐ ܡܢ ܒܝܢܬ ܐܘܠܝ ܕܩܪܐ ܘܐܡܪ ܓܒܪܝܐܝܠ ܣ̇ܟܠ ܠܗܢܐ ܚܙܘܐ ܗܢܐ

96. Daniel 8:17

    ܘܐ̣ܬܐ ܠܘܬܝ ܐܬܪ ܕܩܐ̇ܡ ܐܢܐ ܘܟܕ ܐܬ̣ܐ ܕܚܠܬ ܘܢܦܠܬ ܥܠ ܐ̈ܦܝ ܘܐܡ̣ܪ ܠܝ ܐܣܬܟܠ ܒܪܢܫܐ ܡܛܠ ܕܠܥܕܢ ܣܘܦܐ ܚܙܘܐ ܗܢܐ

97. Daniel 8:18

    ܘܟܕ ܡܡܠܠ ܥܡܝ ܐܬܓ̇ܪܓܚܬ ܥܠ ܐ̈ܦܝ ܥܠ ܐܪܥܐ ܘܩ̣ܪܒ ܠܝ ܘܐܩܝܡܢܝ ܥܠ ܩܝܡܝ

98. Daniel 8:19

    ܘܐܡ̣ܪ ܠܝ ܗܐ ܐܢܐ ܡܚܘܐ ܐܢܐ ܠܟ ܡܐ ܕܢܗܘܐ ܒܣܘܦ ܪܘܓܙܐ ܒܙܒܢ ܣܘܦܐ

99. Daniel 8:20

    ܕܟܪܐ ܕܚܙܝܬ ܕܐܝܬ ܠܗ ܩܪ̈ܢܬܐ ܡ̇ܠܟ ܡܕܝ ܘܦܪܣ

100. Daniel 8:21

     ܘܨܦܪܝܐ ܕܥ̈ܙܐ ܡ̇ܠܟܐ ܕܝܘܢ̈ܝܐ ܘܩܪܢܐ ܪܒܬܐ ܕܐܝܬ ܒܝܬ ܥܝܢܘ̈ܗܝ ܗܘܝܘ ܡ̇ܠܟܐ ܩܕܡܝܐ

← Previous · Next → — showing 201–300 of 412

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.